Tibetan Royal Year of 2151 | Year of the Wood Dragon

བཙན་བྱོལ།

རྒྱ་གཞུང་གི་བཙོན་འོག་ཏུ་ཚུད་པའི་བོད་མིའི་རྩོམ་པ་པོ་རྣམས་ལ་རྗེས་དྲན་ཞུས་པ།

དེ་རིང་ཟླ་ ༡༡ ཚེས་ ༡༥ ཉིན་གྱི་ཞོགས་པ་ཕྱག་ཚོད་ ༡༠ ཐོག་དྷ་སར་རྟེན་གཞི་བྱས་པའི་བོད་ཀྱི་དཔེ་མཛོད་ཁང་དུ་པེན་བོད་ཀྱི་རྩོམ་པ་པོ་མཐུན་ཚོགས་དང་དྷ་སར་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གཉིས་ཟུང་འབྲེལ་གྱིས་བཙོན་འོག་ཏུ་ཚུད་པའི་རྒྱལ་སྤྱིའི་རྩོམ་པ་པོའི་ཉིན་མོ་སྲུང་བརྩི་ཞུས་སོང་།སྐབས་དེར་མཛད་སྒོའི་སྐུ་མགྲོན་གཙོ་བོ་ ཨ་མྱེས་རྨ་ཆེན་བོད་ཀྱི་རིག་གཞུང་ཞིབ་འཇུག་ཁང་གི་འགན་འཛིན་ལོ་རྒྱུས་སྨྲ་བ་མཁས་དབང་བཀྲ་ཤིས་ཚེ་རིང་ལགས་དང་དམིགས་བསལ་སྐུ་མགྲོན་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་རྣམ་གཉིས་གདན་ཞུས་ཐོག་བཀག་སྡོམ་དང་དབྱེ་འབྱེད་འོག་གི་བོད་ཀྱི་རྩོམ་རིག་ཅེས་པའི་བོད་དབྱིན་སྐད་ཡིག་གཉིས་ཀྱི་ནང་ཞིབ་འཇུག་སྙན་ཐོ་རྒྱས་པ་ཞིག་དང་། དབྱིན་སྒྱུར་བྱིས་སྒྲུང་དེབ་བརྒྱད། སྙན་ངག་ཆེད་དེབ་གཅིག་བཅས་དབུ་འབྱེད་གནང་ཡོད་པ་རེད།སྐུ་མགྲོན་གཙོ་བོ་མཁས་དབང་བཀྲིས་ཚེ་རིང་ལགས་ཀྱིས་པེན་བོད་ཀྱི་རྩོམ་པ་པོ་མཐུན་ཚོགས་དང་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གཉིས་ནས་ལས་འགུལ་སྣ་མང་དང་། དཔྱད་ཞིབ་གནང་ནས་དཔེ་དེབ་མང་དག་ཞིག་འདོན་སྤེལ་གནང་བར་བསྔགས་བརྗོད་དང་འབྲེལ། དོན་དངོས་ཐོག་བཙན་བྱོལ་སྤྱི་ཚོགས་ཀྱི་བོད་པའམ་རྩོམ་པ་པོ་ཞིག་ཡིན་ཕྱིན་ཆད་དབུས་བོད་མི་སྒྲིག་འཛུགས་དང་། རྒྱ་གཞུང་། གཞིས་ལ་ཡོད་པའི་སྤུན་ཉེ། རྒྱ་གར་གཞུང་ལ་སྐྲག་ཏེ་བསྟུན་དགོས་སྟབས་རང་དབང་ཞིག་ཡོད་མ་རེད་ཅེས་གསུངས་ཡོད། དམིགས་བསལ་སྐུ་མགྲོན་དགེ་བཤེས་ལྷག་རྡོར་ལགས་ཀྱིས་འཆད་རྩོད་རྩོམ་གསུམ་སྟེ། འཆད་པ་ནི་གསལ་པོ་ཤེས་པའི་ཕྱིར་དུ་ཡིན་པ་དང་རྩོད་པ་ནི་ལོག་རྟོག་སེལ་ཕྱིར་ཡིན་པ། རྩོམ་པ་ནི་ཚིག་གི་སྦྱོར་བ་དེས་ཀློག་པ་པོར་དགའ་བ་སྐྲུན་ཐུབ་པ་ཞིག་དགོས་ཀྱི་ཡོད་སྐོར་དང་འབྲེལ། རྩོམ་པོ་པོ་མང་དག་ཞིག་གིས་ཕར་བཤུ་ཚུར་བཤུ་བྱས་པ་དང་སྔར་གྱི་མཁས་པའི་ལེགས་བྱ་ལེན་ནས་བྲིས་པ་ཙམ་ལས་རང་གི་མྱོང་ཚོར་དེ་དག་བསམ་བློ་བཏང་ནས་འབྲི་མཁན་དཀོན་པོ་ཡིན་སྟབས་བློ་སྐྱེད་གསར་པ་རྙེད་རྒྱུ་དཀོན་པོ་ཡོད་སྐོར་གྱི་དགོངས་ཚུལ་གསུངས་པ་མ་ཟད་བོད་ནང་གི་གནས་ཚུལ་དེ་དག་བརྩམས་ནས་རྒྱལ་སྤྱིའི་སྡིངས་ཆར་སླེབས་ཐབས་ལ་འབད་དགོས་པར་ལམ་སྟོན་གནང་ཡོད། བོད་པའི་རིག་གཞུང་དེ་གཞན་དང་མི་འདྲ་བ་ཞིག་ཡོད་པ་ནི་བོད་པའི་རིག་གཞུང་ལས་ཆས་པའི་ནང་བསམ་བློ་དང་འབྲེལ་བའི་རིག་གཞུང་ཁྱད་འཕགས་བ་ཞིག་ཆགས་ཡོད་སྟབས། དེ་དག་ཉམས་སུ་ལེན་པར་འབད་བརྩོན་དང་བརྩོན་འགྲུས་གནང་གནད་ཡིན་པ་མ་ཟད་བོད་ནང་རྩོམ་རིག་རང་དབང་མེད་པར་རྟོགས་ནས་བཙན་བྱོལ་ནང་གི་རང་དབང་དེ་ལོངས་སུ་སྤྱད་དེ་དགའ་བ་བསྒོམས་ནས་འབད་དགོས་པ་གསུངས་སོང་།དེ་བཞིན་པེན་བོད་ཀྱི་རྩོམ་པ་པོ་མཐུན་ཚོགས་ཀྱི་ཚོགས་གཞོན་སྨན་ཞར་བློ་གྲོས་ལགས་ཀྱིས་བཀག་སྡོམ་དང་དབྱེ་འབྱེད་འོག་གི་བོད་ཀྱི་རྩོམ་རིག་ཅེས་པའི་ཞིབ་འཇུག་སྙན་ཐོ་དང་འབྲེལ་བའི་ངོ་སྤྲོད་གནང་ཡོད་པ་དང་། བོད་ཀྱི་དཔེ་མཛོད་ཁང་གི་ཉམས་ཞིབ་པ་དང་རྩོམ་སྒྲིག་འགན་འཛིན་ན་ག་སངས་རྒྱས་བསྟན་དར་ལགས་ཀྱིས་རྩོམ་པ་པོ་དང་རྩོམ་སྒྲིག་རང་དབང་གལ་ཆེན་ཡིན་པའི་སྐོར་གསུང་བཤད་གནང་ཡོད། དེ་བཞིན་ས་རཱ་བོད་ཀྱི་མཐོ་རིམ་སློབ་གཉེར་ཁང་གི་ལོ་རྒྱུས་སློབ་དཔོན་བསོད་ནམས་རྒྱལ་མཚན་ལགས་ནས་རིག་གཞུང་རྒྱུན་གནས་ཡོང་ཐབས་སུ་རྩོམ་པ་པོའི་གལ་གནད་སྐོར་དང་། སྨོན་ལམ་བོད་ཀྱི་བརྡ་སྒྲིག་ཞིབ་འཇུག་ཁང་གི་ཚིག་མཛོད་རྩོམ་སྒྲིག་པ་མཁན་པོ་འཇུ་བསྟན་སྐྱོང་ལགས་ནས་རྩོམ་འབྲི་རང་དབང་གལ་ཆེན་ཡིན་པ་སོགས་ཀྱི་ཐད་གསུང་བཤད་གནང་ཡོད་པ་རེད།  

འདས་པའི་ལོ་རྒྱུས་ཀྱི་ཉམས་མྱོང་ལས་བསླབ་བྱ་བླངས་ཏེ་རྒྱ་ནག་ལ་ཁ་གཏད་གཅོག་དགོས།

བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་འཇར་མན་གྱི་མང་ཚོགས་ལ་བོད་ཀྱི་འདས་མ་ད་གསུམ་གྱི་གནས་སྟངས་ཐད་གསུང་བཤད་གནང་བ་དང་འབྲེལ། བོད་ཀྱི་མ་འོངས་གནས་བབ་དེ་ནི་བོད་ནང་གི་བོད་མི་ཙམ་མ་ཡིན་པར་འཛམ་གླིང་ཡོངས་དང་འབྲེལ་བའི་གནད་དོན་ཞིག་ཡིན་པ་དང་། ང་ཚོས་འདས་པའི་ལོ་རྒྱུས་ཀྱི་ཉམས་མྱོང་ལས་བསླབ་བྱ་བླངས་ཏེ་རྒྱ་ནག་ལ་ཁ་གཏད་གཅོག་དགོས་གལ་ཡིན་པར་གསུང་བཤད་གནང་འདུགབོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ཁ་ཉིན་ཚེས་ ༡༡ ཉིན་འཇར་མ་ནིའི་ Frieburg གྲོང་ཁྱེར་དུ་རྟེན་གཞི་བྱས་པའི་ཀེ་ལ་ཤི་བོད་ཁང་དུ་རྒྱུན་དུ་བཙན་བྱོལ་བོད་མིའི་སྤྱི་ཚོགས་ལ་འཚོ་སྣོན་རོགས་སྐྱོར་ཤུགས་ཆེ་གནང་མཁན་འཇར་མ་ནི་ནང་གི་ཁེ་མེད་ཚོགས་པ་ Tibet Forderkreis eV ཡིས་གོ་སྒྲིག་འོག་འཇར་མན་མང་ཚོགས་ཁག་གཅིག་ལ་བོད་ཀྱི་འདས་མ་ད་གསུམ་གྱི་གནས་སྟངས་ཐད་གསུང་བཤད་གནང་ཡོད་པ་དང་། སྐབས་དེར་སྲིད་སྐྱོང་མཆོག་གིས་ཁེ་མེད་ཚོགས་པ་དེའི་ཚོགས་གཙོ་སྐུ་ཞབས་ Wilfried Pfeffer ལགས་དང་གོ་སྒྲིག་ཚོགས་ཆུང་གི་ཚོགས་མི་རྣམས་ཆེད་ཕེབས་གནང་བ་དེས་བོད་མིའི་འཚེ་མེད་ཞི་བའི་འཐབ་རྩོད་ལ་རྒྱབ་སྐྱོར་གྱི་བརྡ་ལན་གསལ་པོ་ཞིག་བསྟན་ཡོད་པར་ངོས་འཛིན་གྱིས་ཐུགས་རྗེ་ཆེ་ཞུས་འདུགབོད་མའི་སྒྲིག་འཛུགས་ཀྱི་དབྱིན་ཡིག་གི་དྲྭ་རྒྱའི་ཐོག་གནས་ཚུལ་ཐོན་པར་གཞིགས་ཚེ་སྲིད་སྐྱོང་མཆོག་གིས་བོད་མཐོ་སྒང་ནི་འཛམ་གླིང་གི་སྣེ་གསུམ་པ་དེ་ཆགས་ཀྱི་ཡོད་པ་དང་། བོད་ཁ་བ་གངས་ཅན་གྱི་ལྗོངས་ནི་འཁྱགས་རོམ་ ༤༦༠༠༠ ལྷག་གི་ལྟེ་གནས་ཆགས་ཡོད་པས་ཨེ་ཤ་ཡའི་རྒྱལ་ཁབ་མང་པོ་ཞིག་གི་འཐུང་ཆུའི་འགོ་ཁུངས་ལྟ་བུ་ཡིན་ནའང་། ད་ཆ་རྒྱ་ནག་གི་གཙང་ཆུ་ཁ་བསྒྱུར་དང་རང་བྱུང་གཏེར་ཁ་སྔོག་འདོན་སོགས་ཀྱི་བྱ་སྤྱོད་ཀྱིས་བོད་མཐོ་སྒང་གི་སྐྱེ་ཁམས་ཁོར་ཡུག་གི་གནས་བབ་དེ་ནི་ཧ་ཅང་གི་ཛ་དྲག་གི་གནས་སུ་ལྷུང་ཡོད་པར་འགྲེལ་བརྗོད་གནང་འདུག དེ་བཞིན་བོད་མཐོ་སྒང་གི་གནད་དོན་དེ་ནི་འགྲོ་བ་མིའི་ཐོབ་ཐང་དང་དྲང་བདེན།མང་གཙོ་སོགས་ཀྱི་གནད་དོན་ཞིག་ཡིན་པ་དང་། དེ་དག་ནི་རྒྱལ་སྤྱིའི་མང་ཚོགས་སྤྱི་དང་སྒོས་སུ་འཇར་མ་ནིའི་མང་ཚོགས་ཀྱིས་ཆེས་གཅེས་པར་འཛིན་པའི་རིན་ཐང་ཞིག་ཡིན་སྟབས། དེ་ནི་ངེས་པར་དུ་རྒྱུན་འཛིན་བྱེད་དགོས་པ་ཞིག་ཡིན་སྐོར་གསུངས་པ་མ་ཟད། ཁོང་ཉེ་ཆར Spain གྱི་གྲོང་ཁྱེར་ Madrid ནང་རྒྱལ་སྤྱའི་ཚོང་འབྲེལ་ཀྱི་ཚོགས་ཆེན་ཞིག་ཏུ་མགྲོན་འབོད་གནང་སྐབས་རྒྱ་ནག་གཞུང་ཚབ་ཁང་གིས་ལས་རིམ་གོ་སྒྲིག་པ་རྣམས་ལ་གནོན་ཤུགས་སྤྲད་དེ་ཁོང་ཚོགས་ཆེན་དེར་བཅར་ཐབས་མེད་པར་བཀག་འགོག་བྱས་ཡོད་པར་འགྲེལ་བརྗོད་དང་འབྲེལ། རྒྱ་གཞུང་གིས་གནོན་ཤུགས་ཇི་ཙམ་སྤྲོད་ཀྱང་ངས་འགྲོ་བ་མིའི་ཐོབ་ཐང་དང་དྲང་བདེན། མང་གཙོ་བཅས་ཀྱི་ཆེད་དུ་རྒྱ་ནག་ལ་གདོང་ལེན་མུ་མཐུད་བྱ་ངེས་ཡིན་ཞེས་གསུངས་འདུག གཞན་ཡང་སྲིད་སྐྱོང་མཆོག་གིས་རྒྱ་ནག་གིས་མི་སུ་ཞིག་གིས་བོད་དོན་དང་འབྲེལ་བའི་གླེང་སློང་གནང་བར་བཀག་འགོག་བྱེད་བཞིན་པ་དེས་བོད་ནང་གི་བཙན་གནོན་རང་བཞིན་གྱི་གནས་སྟངས་དེ་མཚོན་ཐུབ་པ་ཞིག་དང་། ཟླ་འདིའི་ཚེས་ ༤ ཉིན་བོད་མདོ་སྨད་རྔ་བ་རྫོང་དུ་རྒྱལ་གཅེས་པ་རྡོ་པོ་ལགས་ཀྱིས་རང་ལུས་མེར་བསྲེགས་གནང་སྟེ་ད་ཆ་བོད་ནང་དུ་རྒྱ་ནག་གི་བཙན་གནོན་རྐྱེན་པས་བོད་མི་ ༡༥༣ ནས་རང་བསྲེགས་གནང་ཡོད་པར་འགྲེལ་བརྗོད་བསྐྱར་ནན་གནང་ཡོད་པ་རེད། སྲིད་སྐྱོང་མཆོག་གིས་རྒྱ་ནག་གི་རྒྱུད་གཅིག་ལམ་གཅིག་གི་སྲིད་བྱུས་ཀྱི་འོག་ནས་བོད་དུ་ཞི་བདེ་སྐྲུན་ཐབས་དང་ཡར་རྒྱས་གཏོང་ཐབས་སོགས་ཁས་ལེན་གྱིས་ལམ་ཁ་གསར་རྒྱག་གི་འཛུགས་སྐྲུན་ལས་གཞི་འགོ་འཛུགས་བྱེད་བཞིན་ཡོད་ནའང་། དེ་ནི་རྒྱ་ནག་གི་དམག་མི་དང་གཡུལ་འགྱེལ་གྱི་གོ་མཚོན་ནང་འདྲེན་བྱེད་པ་ཞིག་ཡིན་པ་དང་། བྱེད་སྟངས་དེ་ནི་སྔོན་ཆད་རྒྱ་ནག་ཇི་ལྟར་བོད་དུ་འཛུལ་བར་བརྟེན་ནས་ང་ཚོ་རང་ཉིད་ཀྱི་རྒྱལ་ཁབ་ཤོར་ཡོད་སྟབས་ད་ཆ་ང་ཚོས་འདས་པའི་ལོ་རྒྱུས་ཀྱི་ཉམས་མྱོང་ལས་བསླབ་བྱ་བླངས་དགོས་གལ་ཡིན་པ་གསུངས་འདུག རྩ་བའི་སྲིད་སྐྱོང་མཆོག་ཟླ་སྔོན་མའི་ཚེས་ ༢༩ ཉིན་གཞུང་འབྲེལ་གྱི་འཚམས་གཟིགས་སུ་ཐོག་མར་རྒྱ་གར་རྒྱལ་ས་ལྡི་ལི་དང། དེ་རྗེས་སི་པེན་གྱི་ Madrid དང་སུད་སིའི་ Geneva གྲོང་ཁྱེར་བཅས་སུ་ཆེད་ཕེབས་གནང་ཡོད་པ་མ་ཟད། འཇར་མ་ནི་དང་དེ་རྗེས་ཨ་རི། ཁེ་ན་ཌ། དེ་ཞིན་ Netherlands བཅས་སུ་ཕེབས་གཏན་འཁེལ་ཡོད་པ་རེད།

དྷ་སའི་རྒྱལ་སྤྱིའི་གློག་བརྙན་དུས་སྟོན་ཐེངས་བདུན་པར་སྐྱོ་དབྱངས་མངར་མོའི་གློག་བརྙན་གཟིགས་འབུལ།

དྷ་སའི་རྒྱལ་སྤྱིའི་གློག་བརྙན་དུས་སྟོན་ཐེངས་བདུན་པའི་ཐོག་བོད་རིགས་གློག་བརྙན་བཟོ་སྐྲུན་པ་བསྟན་འཛིན་བསོད་ནམས་ལགས་དང་ཁོང་གི་སྐུ་ཟླ་རི་ཏུ་ས་རིན་ལགས་རྣམ་གཉིས་ཀྱིས་བཟོ་སྐྲུན་ཞུས་པའི་སྐྱོ་དབྱངས་མངར་མོའམ་ The Sweet Requiem ཞེས་པའི་གློག་བརྙན་དེ་མང་ཚོགས་ལ་གཟིགས་འབུལ་ཞུས་སོང་།བཞུགས་སྒར་དུ་རྟེན་གཞི་བྱས་པའི་དྷ་སྟེང་བོད་ཁྱིམ་དུ་ཟླ་ ༡༡ ཚེས་ ༡ ནས་འགོ་འཛུགས་ཀྱིས་ཚེས་ ༤ བར་ DIFF འམ་དྷ་རྨ་ས་ལའི་རྒྱལ་སྤྱིའི་གློག་བརྙན་དུས་སྟོན་ཐེངས་ ༧ པ་དེ་ཚོགས་ཡོད་པ་དང།  ཁ་སང་ཉིན་བཞི་པའི་ཉིན་དགུང་ཚོུད་ ༡༌༡༥ ཐོག་དྷ་སྟེང་བོད་ཁྱིམ་གྱི་ཧར་མིན་གྷ་མི་ནར་ཚོགས་ཁང་དུ་བོད་མི་དང་རྒྱ་གར་བ། དེ་བཞིན་ཕྱི་རྒྱལ་མི་རིགས་སོགས་མང་ཚོགས་མང་དག་ཞིག་འདུ་འཛོམས་བྱུང་ཐོག་རྒྱལ་སྤྱིའི་ཊོ་རོན་ཊོ་གློག་བརྙན་དུས་སྟོན་དུ་གདམས་ཐོན་བྱུང་བའི་བོད་པའི་གློག་བརྙན་སྐྱོ་དབྱངས་མངར་མོ་གཟིགས་འབུལ་ཞུས་ཡོད་པ་རེད། གཞི་རྩའི་སྐྱོ་དབྱངས་མངར་མོ་གློག་བརྙན་དེ་ཕྱི་ལོ་ ༢༠༠༦ ལོར་རྒྱའི་ས་མཚམས་དམག་མིས་ནང་པ་ལ་བརྒྱུད་བོད་ནས་བྲོས་བྱོལ་དུ་ཕེབས་མཁན་གྱི་ཚོགས་ཁག་ཞིག་ལ་མེ་མདའ་བརྒྱབས་ཏེ་ལོ་ན་ ༡༦ སོན་པའི་བཙུན་མ་ཞིག་བསད་པའི་དངོས་སྒྲུང་ལ་གཞིགས་པའི་རྟོག་སྒྲུང་ཞིག་ཡིན་པ་དང་། གློག་བརྙན་དེའི་ནང་དོན་གཙོ་བོ་ནི་རྒྱ་གར་རྒྱལ་ས་ལྡི་ལིར་འཚོ་སྡོད་བྱས་པའི་བུ་མོ་སྒྲོལ་དཀར་ལགས་རང་ཉིད་ལོ་ན་བརྒྱད་སྐབས་ཕ་རྒན་དང་ལྷན་དུ་བོད་ནས་བྲོས་བྱོལ་དུ་ཡོང་སྐབས་ལམ་ཁར་མགོན་པོ་ཟེར་བའི་ལམ་ཁྲིད་པ་ཞིག་དང་འཕྲད་པ་དང་། ལམ་བར་ན་ཁོང་ཚོར་རུ་ཁག་གཞན་དང་འཕྲད་ཅིང་བྲོས་བྱོལ་གྱི་བརྒྱུད་རིམ་དེའི་ཁྲོད་དཀའ་སྡུག་དུ་མ་མྱངས་སྟབས། མགོན་པོས་ཁ་ཁུ་སིམ་པོར་ཁོང་ཚོ་གཡུགས་ནས་ཕྱིན་པས་ལམ་ཁྲིད་པ་མེད་པར་འགྲུལ་བསྐྱོད་གནང་སྐབས་དཀའ་སྡུག་དེ་ལས་མང་བ་འཕྲད་པའི་སྒྲོལ་དཀར་དང་དེ་འབྲེལ་བོད་ནས་བྲོས་བྱོལ་དུ་ཡོང་བའི་བོད་མིའི་སྤྱིའི་མྱོང་ཚོར་མངོན་པའི་གློག་བརྙན་ཞིག་ཡིན་པ་རེད།བསྟན་འཛིན་བསོད་ནམས་ལགས་དང་རི་ཏུ་ས་རིན་ལགས་རྣམས་གཉིས་ཀྱི་གློག་བརྙད་དེར་མང་ཚོགས་ནས་དགའ་བསུ་དང་བཟོ་སྐྲུན་གནང་སྟངས་ཧ་ཅང་ཡག་པོ་ཡོད་པར་བསྔགས་བརྗོད་གནང་གི་འདུགབསྟན་འཛིན་བསོད་ནམས་ལགས་སུ་གློག་བརྙན་དེ་འབྲེལ་བཅར་འདྲི་ཁག་ཅིག་ཞུས་པར་ཁོང་གིས་རྒྱལ་སྤྱིའི་སྡིངས་ཆའི་ཁྲོད་དེ་སྔ་དང་མཚུངས་བསྡུར་གནང་ཚེ་བོད་ཀྱི་གནད་དོན་ཐོག་ཐུགས་སྣང་དེ་ཅུང་ཞན་པོ་ཆགས་ཡོད་པ་དང།  ད་ཆ་གློག་བརྙན་འདིེའི་བརྒྱུད་ནས་ཐུགས་སྣང་གནང་བར་ཐུགས་ཕན་གསོ་བའི་རེ་བ་ཞུ་མུས་ཡིན་སྐོར་གསུངས་སོང་།གཞི་རྩའི་དྷ་རམ་ས་ལའི་རྒྱལ་སྤྱིའི་གློག་བརྙན་དུས་སྟོན་གོ་སྒྲིག་པ་བོད་པའི་གློག་བརྙན་བཟོ་སྐྲུན་པ་བསྟན་འཛིན་བསོད་ནམས་ལགས་དང་ཁོང་གི་སྐུ་ཟླ་ Ritu Sarin ལགས་རྣམ་གཉིས་ནས་གློག་བརྙན་དུས་སྟོན་དེའི་དམིགས་ཡུལ་གཙོ་བོ་ནི་རྒྱལ་སྤྱིའི་ཁྲོད་རང་དབང་ཅན་གྱི་གློག་བརྙན་ཡོད་པ་རྣམས་དྷ་སའི་ས་གནས་མི་མང་རྣམས་ལ་གཟིགས་རྒྱུའི་གོ་སྐབས་སྐྲུན་ཆེད་ཡིན་པ་རེད།འདི་ལོའི་དུས་སྟོན་ཁོངས་སུ་རྒྱལ་སྤྱིའི་དང་རྒྱ་གར་གྱི་དངོས་བྱུང་དང། རྟོག་སྒྲུང་དང།  བྱིས་པའི་གློག་བརྙན།   དེ་བཞིན་དུས་ཐུང་གློག་བརྙན་རིགས་སོགས་ཁྱོན་གློག་བརྙན་ ༢༡ བསྟན་ཐུབ་པ་བྱུང་བ་མ་ཟད།  དུས་སྟོན་དེར་གློག་བརྙན་བཟོ་སྐྲུན་པ་དང་།  གློག་བརྙན་འཁྲབ་ཁྲིད་པ་སོགས་ཆེད་ཕེབས་གནང་ཡོད།

བོད་དང་ཡུ་གུར་བཅས་ཀྱི་འགྲོ་བ་མིའི་ཐོབ་ཐང་གི་གནས་སྟངས་སྐོར་ལྷན་ཚོགས།

བདུན་རྗེས་མའི་རེས་གཟའ་མིག་དམར་ཉིན་Swiss གྲོང་ཁྱེར་Geneva ནང་རྟེན་གཞི་བྱས་པའི་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་ནས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཡར་རྒྱས་ཕྱིན་ཡོད་མེད་དང་། ད་ལྟའི་གནས་སྟངས་ཇི་ཡིན་སོགས་དང་འབྲེལ་དུས་བཀག་བསྐྱར་ཞིབ་ཀྱི་ལས་རིམ་ཐེངས་གསུམ་པ་དེ་གནང་གཏན་འཁེལ་པ་དང་བསྟུན། ཁ་སང་ཁུལ་དེར་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་དང་། ཇི་ནི་ཝ་སྐུ་ཚབ་དོན་ཁང་གཉིས་ནས་བོད་དང་ཡུ་གུར། ནང་སོག་བཅས་ཀྱི་འགྲོ་བ་མིའི་ཐོབ་ཐང་གི་གནས་སྟངས་དང་འབྲེལ་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་དབང་བསྒྱུར་འོག་ཡོད་པའི་ས་ཁུལ་ཁག་གི་ནང་དུ་འགྲོ་བ་མིའི་ཐོབ་ཐང་གི་གནས་སྟངས། ཇི་ནི་ཝའི་ལྷན་ཚོགས་ ༢༠༡༨ ཞེས་པ་ཞིག་གོ་སྒྲིག་ཞུས་འདུག སུད་སི་གྲོས་ཚོགས་འཐུས་མི་ལྕམ་ Lisa Mazzone མཆོག་གིས་དབུ་འབྱེད་གནང་པའི་ལྷན་ཚོགས་ཐོག་སྲིད་སྐྱོང་བློ་བཟང་སེང་གེ་མཆོག་གཙོས་པའི་བོད་མིའི་སྒྲིག་འཛུགས་ཀྱི་སྐུ་ཚབ་དོན་གཅོད་རྣམ་པ། ཨ་རིའི་ Pomona གཙུག་ལག་སློབ་གཉེར་ཁང་གི་སློབ་དཔོན་ Dru C. Gladney ལགས། དེ་བཞིན་རྒྱ་ནག་གི་འགྲོ་བ་མིའི་ཐོབ་ཐང་ལས་འགུལ་བ་Wuer Kaixi ལགས་དང་གསར་འགོད་པ་ Min Mitchell ལགས། ནང་སོག་དྲིལ་བསྒྲགས་བསྟི་གནས་ཁང་གི་འགན་འཛིན་ Engnebatu Togoc ལགས། གཞན་ཡང་རྒྱ་ནག་དང་ཡུ་གུར། ལྷོ་སོག དེ་བཞིན་ཧོང་ཀོང་བཅས་ཀྱི་གནད་དོན་ཐོག་ཐུགས་སྣང་ཡོད་པའི་ས་གནས་མི་སྣ་དང་གསར་འགོད་པ་སོགས་ནས་ལྷན་ཞུགས་གནང་འདུག སྐབས་དེར་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་འདས་པའི་ལོ་དུས་ནང་རྒྱལ་སྤྱིའི་རྒྱལ་ཁབ་ཁག་ནས་རྒྱ་ནག་ལྷན་དུ་འབྲེལ་བ་བཞག་སྟེ་རིམ་པས་རྒྱ་ནག་དེ་བཞིན་མང་གཙོའི་ལམ་ལུགས་ཐོག་བསྐྱོད་དེ་འགྲོ་བ་མིའི་ཐོབ་ཐང་ལ་གུས་རྩི་ཞུ་མཁན་ཞིག་ཆགས་ཀྱི་རེད་བསམ་ནས་བསྡད་ཡོད་ཀྱང་། ང་ཚོས་འདས་པའི་ལོ་ངོ་ཉི་ཤུ་ལ་ཕྱིར་མིག་ཞིག་བལྟ་ན། རྒྱ་ནག་འདི་བཟང་ཕྱོགས་ཀྱི་ཐོག་ལ་འགྱུར་བ་གང་ཡང་ཕྱིན་མེད་པའི་ཁར། རྒྱ་ནག་གིས་རྒྱལ་སྤྱིའི་རྒྱལ་ཁབ་རྣམས་ལ་ནོན་ཤུགས་འདྲ་མིན་ཐོག་ནས་ཁ་ཕྱོགས་བསྒྱུར་བཞིན་པ་རེད་ཅེས་གསུངས་འདུག མ་ཟད་སྲིད་སྐྱོང་མཆོག་ནས་ཡོ་རོབ་ Madrid དང་ Norway དེ་བཞིན་Australia དང་Swiss སོགས་ནས་ཚོང་དང་འགྲོ་བ་མིའི་ཐོབ་ཐང་གི་གནད་དོན་སོགས་ཕྱོགས་གང་ས་ནས་རྒྱ་ནག་ལ་བསྟུན་མཁས་བྱས་ཡོད་པ་མ་ཟད། རྒྱལ་སྤྱིའི་ངོས་ནས་ཀྱང་དེ་སྔ་རྒྱ་ནག་ལ་ Most Favoured Nation ཞེས་ཚོང་འབྲེལ་གྱི་གནས་བབས་སྤྲད་པ་དང་། རྒྱལ་སྤྱིའི་ཨོ་རྩལ་རྩེད་འགྲན་གོ་སྒྲིག་ཞུ་རྒྱུའི་གོ་སྐབས་སོགས་ཕུལ་ཡོད་ཀྱང་། རྒྱ་ནག་ཕྱོགས་ནས་འགྲོ་བ་མའི་ཐོབ་ཐང་གི་གནས་སྟངས་སོགས་ཕྱོགས་ཡོངས་ནས་ཡར་རྒྱས་རྩ་བ་ནས་བཏང་མེད་པ་མ་ཟད། བར་སྐབས་ནས་རྒྱ་ནག་ཕྱོགས་ནས་ཡུལ་དེ་དག་གི་ཆབ་སྲིད་དང་ཤེས་ཡོན་གྱི་བསྟི་གནས། དེ་བཞིན་འོས་བསྡུ་སོགས་ཀྱི་ལས་དོན་ནང་ཐེས་བྱུས་ཤུགས་ཆེ་རུ་བཏང་སྟེ་རང་ཉིད་ཀྱི་དབང་ཐང་རྒྱ་སྐྱེད་དང་། རྒྱ་ནག་གི་ཁྱད་ཆོས་ལྡན་པའི་སྤྱི་ཚོགས་རིང་ལུགས་དར་ཁྱབ་གཏོང་བཞིན་པ་སོགས་ཀྱང་གསུངས་འདུག དེ་བཞིན་སྐབས་དེར་སྲིད་སྐྱོང་མཆོག་གིས་ལྷན་ཚོགས་དེའི་ཐོག་བཅར་བའི་ཚོགས་བཅར་བ་རྣམས་ལ་རྒྱ་ནག་གི་རྒྱུད་ཅིག་ལམ་ཅིག་གི་སྲིད་བྱུས་དང་འབྲེལ། ལོ་ངོ་དྲུག་ཅུའི་གོང་ལ་རྒྱ་ནག་གི་ལམ་ཅིག་སྲིད་བྱུས་འོག་བོད་འདི་བཙན་འཛུགས་བྱས་ཡོད་སྟབས་རྒྱལ་སྤྱིའི་རྒྱལ་ཁབ་རྣམས་ནས་རྒྱ་ནག་གི་སྲིད་བྱུས་དེར་དོགས་ཟོན་བྱེད་དེ་བོད་ལྟ་བུ་རྒྱ་ནག་འོག་མ་ཚུད་པ་བྱེད་དགོས་པ་ཡང་གསུངས་འདུག

བཀའ་བློན་རྣམས་ཀྱིས་ཉིན་གཅིག་གི་ཕོགས་འབབ་ཨོ་རི་ས་བོད་མའི་གཞིས་སྒར་ལ་ཞལ་འདེབས་གནང་བ།

ཟླ་བ་སྔོན་མའི་ཚེས་ ༡༠ ཉིན་ཨོ་རི་ས་ཕུན་ཚོགས་གླིང་བོད་མིའི་གཞིས་ཆགས་སུ་ titli ཞེས་པའི་དྲག་ཆར་རླུང་འཚུབ་དྲག་པོ་རྒྱག་ཏེ་མང་ཚོགས་ཀྱི་འཚོ་གནས་ལ་གནོད་སྐྱོན་ཚབས་ཆེ་བྱུང་ཡོད་པར་བརྟེན་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་གིས་དབུས་པའི་བཀའ་བློན་རྣམ་པས་ཉིན་གཅིག་གི་ཕོགས་འབབ་གདུང་སེམས་མཉམ་བསྐྱེད་ཀྱི་ཚུལ་དུ་ཞལ་འདེབས་གནང་བ་དང་ཆབས་ཅིག་ཆབས་ཅིག་ཏུ་སྲི་ཞུ་ལས་བྱེད་རྣམས་ནས་ཀྱང་དེ་ལྟར་དགོངས་བཞེས་གནང་གལ་ཡིན་པར་འབོད་སྐུལ་གནང་འདུག དེ་ཡང་བཀའ་དྲུང་ཡིག་ཚང་གིས་བོད་མིའི་སྒྲིག་འཛུགས་ཀྱི་ལྷན་ཁང་ཁག་ལ་བཀོད་ཁྱབ་གནང་བའི་ནང་གསལ་ལྟར་ན། བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་གིས་གཙོས་པའི་བཀའ་བློན་རྣམས་ནས་གདུང་སེམས་མཉམ་བསྐྱེད་མཚོན་ཕྱིར་ཉིན་གཅིག་གི་ཕོགས་འབབ་ཞལ་འདེབས་གནང་བ་དང་ཆབས་ཅིག་ཏུ་སྲི་ཞུ་ལས་བྱེད་རྣམས་ནས་ཀྱང་དེ་ལྟར་དགོངས་བཞེས་གནང་རྒྱུར་འབོད་སྐུལ་གནང་བ་དང་འབྲེལ། བོད་མིའི་སྒྲིག་འཛུགས་ཀྱི་སྲིད་ཞུའི་ལས་བྱེད་སར་ནས་ཞལ་འདེབས་ཇི་བྱུང་རྣམས་ནང་སྲིད་ལས་ཁུངས་སུ་དབུས་ལས་ཁུངས་ཁག་ནས་ཟླ་བ་འདིའི་ཚེས་ ༡༠ ནང་ཚུད་འབུལ་དགོས་པ་དང་། དེ་བཞིན་ཕྱོགས་མཐའི་ཁྱབ་ཁོངས་སུ་ཡོད་པའི་ལས་བྱེད་རྣམས་ཀྱི་ཞལ་འདེབས་རྣམས་ཟླ་བ་འདིའི་ཚེས་ ༣༠ ནང་ཚུད་འབུལ་ཐབས་གནང་ཟིན་དགོས་པའི་འབོད་སྐུལ་གནང་འདུག རྩ་བའི་ཨོ་རི་ས་ཕུན་ཚོགས་གླིང་བོད་མིའི་གཞིས་ཆགས་སུ་ཟླ་བ་སྔོན་མའི་ཚེས་ ༡༠ ཉིན་ titli ཞེས་པའི་དྲག་ཆར་རླུང་འཚུབ་ཀྱི་དོན་རྐྱེན་ཞིག་བྱུང་བའི་འོག་ས་ཞིང་ཨེ་ཀར་ ༡༧༠༠ ལྷ་ལ་གནོད་འཚེ་ཕོག་ཡོད་པ་དང་། ཤིང་འབྲས་ཅན་གྱི་སྡོང་པོ་ ༡༥༠༠ ཙམ་ཞིག་རྩ་མེད་དུ་ཕྱིན་ཡོད་པ་རེད། ཁང་ཁྱིམ་ ༦༠ ཡས་མས་ཤིལ་ལ་གནོད་སྐྱོན་བྱུང་ཡོད་སྟབས་ཟླ་བ་སྔོན་མར་བོད་མིའི་སྒྲིག་འཛུགས་ནང་སྲིད་ལས་ཁུངས་ནས་ཛ་དྲག་རོགས་སྐྱོར་ཆེད་ཕྱི་རྒྱ་ཡུལ་གྲུ་ཁག་ཏུ་གནས་སྡོད་གནང་མཁན་གཏོང་ཕོད་ཅན་གྱི་བོད་རིགས་ཀུན་ལ་ཞལ་འདེབས་གང་ཐུབ་གནང་སྐྱོང་ཡོང་བའི་གསལ་བསྒྲགས་ཀྱང་གནང་ཡོད་པ་རེད།

ཨོ་སི་ཊོ་ལི་ཡ་ནང་བོད་རིག་སློབ་མ་ཞིག་ལ་མངའ་སྡེའི་རིམ་པ་གཉིས་པའི་བློན་ཆེན་བྱ་དགའ་ཐོབ་པ།

ཨོ་སི་ཊོ་ལི་ཡ་ནང་རྟེན་གཞི་བྱས་པའི་སིཌ་ནི་བོད་རིགས་མཐུན་ཚོགས་རིག་གནས་སྐྱེད་ཚལ་ཁང་གི་འཛིན་རིམ་དྲུག་པའི་སློབ་མ་བསྟན་འཛིན་ཚེ་བརྟན་ལགས་ལ་བོད་ཀྱི་སྐད་ཡིག་སློབ་གཉེར་ཡིག་རྒྱུགས་རྩེ་སོན་གྱི་མངའ་སྡེའི་རིམ་པ་གཉིས་པའི་བློན་ཆེན་གྱི་བྱ་དགའ་ཐོབ་འདུག དེ་ཡང་ཉེ་ཆར་ཟླ་ ༡༠ ཚེས་ ༢༩ རེས་གཟའ་ཟླ་བའི་ཉིན་ཨོ་སི་ཊོ་ལི་ཡའི་སིཌ་ནིའི་གྲོང་ཁྱེར་དུ་ཡོད་པའི་ New South Wales གཙུག་ལག་སློབ་གྲྭ་ཆེན་མོའི་ Sir John Clancy ཚོགས་ཁང་ཆེན་མོར་ལོ་ན་བཅུ་བཞིར་སོན་པའི་བོུ་བསྟན་འཛིན་ཚེ་བརྟན་ལགས་སུ་བོད་ཀྱི་སྐད་ཡིག་སློབ་གཉེར་སྦྱང་འབྲས་རྩེ་སོན་གྱི་ཡུལ་དེའི་རིམ་པ་གཉིས་པའི་བྱ་དགའ་ཐོབ་འདུག་པ་དང། དེའང་མངའ་སྡེའི་ཤེས་རིག་བློན་ཆེན་སྐུ་ཞབས་ Rob Stokes མཆོག་དབུ་བཞུགས་ཐོག་ New South Wales མངའ་སྡེའི་མི་རིགས་སྐད་ཡིག་སློབ་གྲྭའི་རྒྱུན་ལས་ལྕམ་ Hilary Hughes མཆོག་གི་ཕྱག་ནས་བཞེས་གནང་འདུགམཛད་སྒོའི་ཐོག་རིག་གནས་སྐྱེད་ཚལ་ཁང་གི་འཛིན་རིམ་གསུམ་པའི་བོུ་ཕུན་ཚོགས་སྒྲོལ་མ་ལགས་སུ་ཕུལ་བྱུང་སློབ་མའི་གཟེངས་རྟགས་ཀྱང་ཐོབ་འདུག རྩ་བའི་ཕི་ལོ་ ༡༩༧༨ ལོར་གསར་འཛུགས་གནང་བའི་ New South Wales མངའ་སྡེའི་མི་རིགས་སྐད་ཡིག་སློབ་གྲྭའམ་གཟའ་མཇུག་སློབ་གྲྭ་དེའི་ནང་རིག་གནས་སྐྱེད་ཚལ་ཁང་གིས་གཙོས་པའི་འདི་ལོ་བར་སྐད་ཡིག་ ༦༢ ཐོག་གཟའ་འཇུག་སློབ་གྲྭ་ཁྱོན་ ༥༦༡ དང་ལོ་འདིའི་ནང་སློབ་མ་ ༣༦༠༨༨ ཡོད་པ་དང་དང་བླངས་དགེ་རྒན་ ༢༩༢༥ ཡོད་པ་རེད། བློན་ཆེན་གྱི་བྱ་དགའ་དེ་ནི་གཟའ་མཇུག་སློབ་གྲྭ་སོ་སོས་རང་ཁོངས་སློབ་མའི་ནང་ནས་ལོ་འཁོར་ཡིག་རྒྱུགས་དང་འཛིན་གྲྭར་བཅར་ཐོ། སྤྱོད་ལམ། རིག་རྩལ་འགྲན་ཚོགས་སུ་འཛུལ་ཞུགས་ཀྱི་སྤུས་ཚད་བཅས་གཙོ་བཟུང་གིས་བྱ་དགའི་འོས་མི་གཉིས་རེ་མངའ་སྡེའི་ཤེས་རིག་ལས་ཁུངས་སུ་འབུལ་གནང་གི་ཡོད་པ་དང། ཤེས་རིག་ལས་ཁུངས་ཀྱིས་འོས་མི་དེ་དག་གི་གནས་སྟངས་ལ་ཞིབ་དཔྱད་ཀྱིས་རྩེ་ཕུད་སློབ་མ་ ༡༠ དྲག་འདེམས་ཐོག་བློན་ཆེན་བྱ་དགའ་རིམ་པ་དང་པོར་འོས་འདེམས་དང་གཞན་རྣམས་བྱ་དགའ་རིམ་པ་གཉིས་པ་དང་གསུམ་པའི་བྱ་དགའ་གནང་གི་ཡོད་པ་རེད།ད་རེས་བོད་ཕྲུག་ལ་བྱ་དགའ་ཐོབ་པ་དེ་ནི་ཨོ་སི་ཊོ་ལི་ཡའི་ལོ་རྒྱུས་ནང་བོད་ཕྲུག་ཚོས་བོད་ཀྱི་སྐད་ཡིག་སློབ་སྦྱོང་གནང་ནས་བློན་ཆེན་གི་བྱ་དགའ་ཐོབ་པ་ཐེངས་གཉིས་པ་དེ་ཆགས་ཀྱི་ཡོད་པ་རེད། གཞི་རྩའི་སིཌ་ནི་བོད་རིགས་མཐུན་ཚོགས་རིག་གནས་སྐྱེད་ཚལ་ཁང་དེ་ཕྱི་ལོ་ ༡༩༩༧ ཟླ་ ༩ པའི་ནང་ཁྱིམ་ཚང་གི་བོད་སྐད་བོད་ཡིག་སློབ་གྲྭའི་ངོ་བོ་ཙམ་ནས་རིམ་བཞིན་ཡར་རྒྱས་སོང་ཡོད་པ་དང་། ཕྱི་ལོ་ ༢༠༡༠ ལོར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རིག་གནས་སྐྱེད་ཚལ་ཁང་ཞེས་མཚན་གསོལ་མཛད་པ་ཞིག་དང། ཕྱི་ལོ་ ༢༠༡༣ ལོར་མངའ་སྡེའི་ཤེས་རིག་ལས་ཁུངས་མི་རིགས་སྣ་མང་སྐད་ཡིག་སློབ་གྲྭར་དེབ་སྐྱེལ་ཞུས་རྗེས་སློབ་གྲྭར་མངའ་སྡེ་གཞུང་གི་ངོས་ནས་མི་རིགས་གཞན་ཁག་དང་གཅིག་མཚུངས་ཀྱི་མཐུན་རྐྱེན་གནང་རྒྱུ་དབུ་འཛུགས་གནང་ཡོད་པ་རེད་འདུག སློབ་གྲྭར་ད་ལྟའི་ཆར་བོད་རིག་སློབ་མ་གྲངས་ ༩༠ དང་། དང་བླངས་དགེ་རྒན་དང་ལས་བྱེད་ ༢༠ ཡོད་པ་མ་ཟད་སློབ་གྲྭའི་འཛིན་སྐྱོང་གི་སྒྲིག་གཞི་དང་ཤེས་ཡོན་གྱི་སྲིད་བྱུས་རྣམས་ས་གནས་མངའ་སྡེ་གཞུང་གི་མི་རིགས་སྣ་མང་སྐད་ཡིག་སློབ་གྲྭའི་ལམ་སྟོན་ཁག་དང་དབུས་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་གཞི་རིམ་ཤེས་ཡོན་སྲིད་བྱུས་གཉིས་ཟུང་འབྲེལ་ཐོག་ནས་འགྲོ་བཞིན་པ་དང་འབྲེལ། རེས་གཟའ་སྤེན་པ་ནམ་ཡིན་ལ་དང་བླངས་དགེ་རྒན་ཚོས་སློབ་ཕྲུག་ཚོར་བོད་ཀྱི་སྐད་དང་རིག་གཞུང་། ལོ་རྒྱུས། ནང་ཆོས། དེ་བཞིན་རྐང་བྲོ་གླུ་གཞས་བཅས་སློབ་ཁྲིད་གནང་བཞིན་ཡོད་པ་དང། དེར་ས་གནས་བོད་རིགས་མཐུན་ཚོགས་དང་ཕ་མ་ཚོས་སློབ་མའི་འགྲིམ་འགྲུལ་དང་། བདེ་འཇགས། མཐུན་རྐྱེན་བཅས་ཀྱི་ཐད་མཐུན་འགྱུར་ཞབས་འདེགས་གནང་བཞིན་ཡོད་པ་རེད།

བཀའ་ཟུར་རྒྱ་རི་རིན་པོ་ཆེ་མཆོག་དམ་པ་དེ་ཉིད་ཀྱི་སྐུ་ཕུང་ལྡེ་ར་ལྡུན་སྨིན་གྲོལ་གླིང་དུ་གདན་ཞུ་གནང་རྒྱུ།

ཁ་ཉིན་ཟླ་ ༡༠ ཚེས་ ༢༩ ཉིན་ཨ་རི་གྲོང་ཁྱེར་ san Francisco ནང་དུ་དགོངས་པ་རྫོགས་པའི་༸གོང་ས་མཆོག་གི་བྱ་ཨ་རིའི་དམིགས་བསལ་སྐུ་ཚབ་ཟུར་པ་བཀའ་ཟུར་རྒྱ་རི་རིན་པོ་ཆེ་མཆོག་དམཔ་དེ་ཉིད་ཀྱི་སྐུ་ཕུང་རྒྱ་གར་བྱང་ཕྱོགས་ལྡེ་ར་ལྡུན་དུ་རྟེན་གཞི་བྱས་པའི་འོག་མིན་ཨོ་རྒྱན་སྨིན་གྲོལ་གླིང་དགོན་པར་གདན་ཞུ་གནང་རྒྱུ་རེད་འདུགདེའང་དེ་རིང་འདི་ག་རླུང་འཕྲིན་ཁང་ལ་སྨོན་གྲོལ་གླིང་དགོན་པའི་དྲུང་ཆེ་དང་རྙིང་མའི་སྤྱི་ཟུར་བསྟན་སྐྱབས་ལགས་ཀྱིས་འགྲེལ་བརྗོད་གནང་དོན་ལྟར་ན། དགོན་པ་དེའི་རིན་པོ་ཆེ་དམ་པ་དེ་ཉིད་ཀྱི་ནང་མི་སྐུ་འཁོར་རྣམས་ནས་གཟའ་འཁོར་དེའི་གཟའ་མཇུག་གོང་དུ་དམ་པ་དེ་ཉིད་ཀྱི་སྐུ་ཕུང་དགོན་པ་དེར་གདན་ཞུ་གནང་རྒྱུ་ཡིན་པ་དང། དགོན་པའི་གཙོ་བདག་༸སྐྱབས་རྗེ་མཁོ་ཁྱིམ་རིན་པོ་ཆེ་མཆོག་དང་༸སྐྱབས་རྗེ་རི་མགོ་སྤྲུལ་སྐུ་རིན་པོ་ཆེ་མཆོག་བཅས་དམ་པ་ཁོང་སྐུ་གཤེགས་པའི་གནས་ཚུལ་ཐོན་ཕྲལ་ཨ་རིར་ཆེད་ཕེབས་གནང་ཡོད་པ་རེད་འདུགརྩ་བའི་བཀའ་ཟུར་རྒྱ་རི་རིན་པོ་ཆེ་བློ་གྲོས་རྒྱལ་མཚན་མཆོག་ཟླ་བ་འདིའི་ཚེས་ ༢༩ ཉིན་གྱི་སྔ་འདྲོ་ཚོུད་ ༦།༡༥ ཐོག་ཨ་རིའི་ San Francisco གྲོང་ཁྱེར་ནང་དགུང་ལོ་ ༦༩ ཐོག་མཆིན་སྐྲན་དབང་གི་དགོངས་པ་རྫོགས་ཡོད་པ་དང། ཁ་སང་བོད་མིའི་སྒྲིག་འཛུགས་ངོས་ནས་དམ་པ་དེ་ཉིད་ཀྱིས་སྐུ་ཚེ་ཧྲིལ་པོར་བོད་བསྟན་སྲིད་མི་རིགས་ཀྱི་ཆེད་དུ་ཞབས་ཞུ་གནང་བར་ཡི་རང་བསྔགས་བརྗོད་དང་རྗེས་དྲན་ཞུ་ཆེད་ཉིན་རྒྱབ་ལས་མཚམས་བཞག་སྟེ་བསྔོ་སྨོན་གསུང་དོན་གནང་ཡོད་པ་རེད།ཡུན་རིང་ནས་བོད་དོན་ལ་རྒྱབ་སྐྱོར་གནང་མཁན་ཨ་རིའི་མང་གཙོ་ཚོགས་པའི་དབུ་ཁྲིད་ལྕམ་ Nancy Pelosi མཆོག་གིས་རྒྱ་རི་རིན་པོ་ཆེ་མཆོག་ནི་ཆོས་ཕྱོགས་ཀྱི་དབུ་ཁྲིད་ཞིག་དང་། ཕྱི་འབྲེལ་སྐུ་ཚབ། འཛིན་སྐྱོང་བ། དེ་བཞིན་ལས་འགུལ་བ་སོགས་ཡིན་པ་དེ་ལྟང་ཡང་། རིན་པོ་ཆེ་མཆོག་གཙོ་བོ་དགེ་རྒན་ཆེན་མོ་བ་ཞིག་ཀྱང་ རེད་ཅེས་གསུངས་པ་འབྲེལ། འཛམ་གླིང་འདི་ནས་ཆེས་ཐུན་མིན་གྱི་བོད་མི་འཐབ་རྩོད་པ་ཞིག་མེད་པ་གྱུར་ཡོད་པ་གསུངས་འདུག ལྕམ་སྐུ་མཆོག་གིས་ད་དུང་རྒྱ་གཞུང་གིས་བཙན་དབང་འོག་བོད་མི་རྣམས་བཙན་བྱོལ་དུ་ཕེབས་རྗེས་སྙིང་སྟོབས་ཞུམ་པ་མེད་པར་བོད་ཀྱི་མ་འོངས་བདེན་དོན་སླད་སྐུ་ལས་བསྐྱོན་ཡོད་པ་དང་། ལྷག་དོན་རིན་པོ་ཆེ་མཆོག་ནས་༸གོང་ས་མཆོག་གི་དམིགས་བསལ་སྐུ་ཚབ་དང་རྒྱལ་སྤྱིའི་བོད་དོན་ལས་འགུལ་ཁང་གི་ཚོགས་གཙོ་གནང་བའི་རིང་ལ་བོད་ཀྱི་ལོ་རྒྱུས་དང་འབྲེལ་བའི་དགོས་འདུན་ཁག་འཕེལ་རྒྱས་དང་འདི་བཞིན་ཨ་རིས་གཙོས་པའི་འཛམ་གླིང་ཁྱོན་ཡོངས་ནས་བོད་དོན་ལ་གཏིང་ཟབ་ཀྱི་རྒྱབ་སྐྱོར་སོགས་ཐོབ་ཐུབ་པ་བྱུང་ཡོད་བཅས་དང་ཆབས་ཅིག ཨ་རིའི་གྲོས་ཚོགས་གོང་འོག་གི་འཐུས་མི་ཚོར་རིན་པོ་ཆེ་མཆོག་གི་ནང་གི་རྟོགས་པ་དང་ཡོན་ཏན་ལས་ཕན་ཐོགས་ཆེན་པོ་བྱུང་ཡོད་སྐོར་གསུངས་འདུག ཁོང་གིས་ད་དུང་ང་ཚོའི་ངོས་ནས་རྒྱ་རི་རིན་པོ་ཆེ་དམ་པ་མཆོག་གི་མཛད་རྗེས་རྣམས་མུ་མཐུད་ལག་ལེན་ནང་རྒྱུན་སྐྱོང་གནང་དགོས་པ་དང་། འཛམ་གླིང་ཐོག་བོད་ཀྱི་འཐབ་རྩོད་དང་འབྲེལ་བའི་དངོས་ཀྱི་གནད་དོན་གང་ཡིན་ཤེས་བཞིན་རང་ཉིད་ཀྱི་ཚོང་འབྲེལ་ཁེ་ཕན་ཁོ་ནའི་ཆེད་བོད་དང་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་བབ་སྐོར་གླེང་སློང་མ་གནང་ཚེ་འཛམ་གླིང་ཐོག་གི་ས་གནས་གང་ཡང་རུང་བའི་འགྲོ་བ་མིའི་ཐོབ་ཐང་སྐོར་གླེང་རྒྱུའི་བཟང་སྤྱོད་ཀྱི་ཐོབ་ཐང་མེད་པར་ནན་བརྗོད་དང་སྦྲགས། རིན་པོ་ཆེ་མཆོག་སྐུ་གཤེགས་པར་མྱ་ངན་གུས་བཏུད་གནང་འདུག དེ་བཞིན་རིན་པོ་ཆེ་མཆོག་དབུས་བོད་ཀྱི་གཞོན་ནུ་ལྷན་ཚོགས་ཐོག་མར་ཕྱི་ལོ་ ༡༩༧༠ ལོར་གསར་འཛུགས་གནང་མཁན་མི་སྣ་གཙོ་གྲས་སུ་ཡོད་པ་དང་ཚོགས་པའི་ཚོགས་གཙོའི་ཐུགས་འགན་བཞེས་མྱོང་ཡོད་སྟབས། དབུས་བོད་ཀྱི་གཞོན་ནུ་ལྷན་ཚོགས་ཀྱིས་རིན་པོ་ཆེ་དམ་པ་དེ་ཉིད་སྐུ་ཚེ་གང་པོར་བོད་བསྟན་སྲིད་དང་མི་རིགས་སླད་ཕྱག་ལས་གནང་བར་གཞོན་ལྷན་དབུས་སའི་རྒྱུན་ལས་དང་ཚོགས་མི་ཡོངས་ཀྱི་ཚབ་ཞུས་ཏེ་ཡི་རངས་བསྔགས་བརྗོད་གུས་འདུད་དང་ཤུལ་ལུས་སྐུ་འཁོར་ལྷན་རྒྱས་ལ་གདུང་སེམས་མཉམ་བསྐྱེད་ཞུས་ཡོད་པ་རེད།

བསྟན་པ་སྤྱི་ལ་ཞབས་འདེགས་ཞུ་ཕྱིར་ཕྱིར་བསྐྱོད་ལག་འཁྱེར་བཟོས་པ་ཡིན།

ཟླ་བ་འདིའི་ཚེས་ ༢༨ ཉིན་༸རྒྱལ་དབང་ཀརྨ་པ་ཨོ་རྒྱན་འཕྲིན་ལས་རྡོ་རྗེ་མཆོག་གིས་ཁེ་ན་ཌའི་ནང་དྲ་ལམ་བརྒྱུད་ཐད་གཏོང་གསུང་ཆོས་བསྩལ་བ་དང་བསྟུན་གནད་དོན་ཁག་ཅིག་ལ་གསལ་བཤད་གནང་སྐབས་སུ་བོད་ཀྱི་བླ་ཆེན་རྣམས་ནས་ཕྱི་རྒྱལ་ཡུལ་གྲུ་ཁག་ཏུ་བསྟན་པ་སྤྱི་ལ་ཞབས་འདེགས་ཞུ་རྒྱུར་དམིགས་ཏེ་འགྲུལ་བསྐྱོད་སྟབས་བདེ་ཡོང་བར་ཕྱིར་བསྐྱོད་ལག་འཁྱེར་བཟོས་གནང་ཡོད་པ་ལྟར་རིན་པོ་ཆེ་མཆོག་ནས་ཀྱང་མ་འོངས་པར་ཕྱི་རྒྱལ་ཡུལ་གྲུ་ཁག་ཏུ་བསྟན་པ་སྤྱི་ལ་ཞབས་འདེགས་བསྒྲུབ་རྒྱུའི་ཆེད་ཕྱིར་བསྐྱོད་ལག་འཁྱེར་བཟོས་གནང་བ་ཞིག་ཡིན་པ་དང་། ལག་འཁྱེར་དེའི་བརྒྱུད་རྒྱ་གར་ལ་གང་མགྱོགས་ཕེབས་ཐུབ་ཕྱིར་ཐོངས་མཆན་ཞུ་བཞིན་ཡོད་ཅེས་གསལ་བཤད་གནང་འདུགརིན་པོ་ཆེ་མཆོག་གིས་སྤྱིར་རྒྱ་གར་གཞུང་གིས་བོད་མི་ཚོར་ཕྱི་རྒྱལ་ཡུལ་གྲུ་ཁག་ཏུ་བསྐྱོད་རྒྱུའི་སླད་འགྲུལ་བསྐྱོད་ལམ་ཡིག་གནང་བཞིན་ཡོད་པ་དེ་ལྟར་ཡང་། དོན་དངོས་ཐོག་ལག་འཁྱེར་དེ་ཕྱི་རྒྱལ་ཡུལ་གྲུག་ཁག་ཅིག་ཏུ་འགྲིམ་འགྲུལ་བྱེད་སྐབས་ངོས་ལེན་མེད་པའི་དཀའ་ངལ་འཕྲད་ཀྱི་ཡོད་པ་ངོ་སྤྲོད་དང་འབྲེལ། དེ་སྔ་བརྒྱུད་ལམ་ཁག་ཏུ་རིན་པོ་ཆེ་མཆོག་ནས་Dominican Republic གྱི་མེ་སེར་བཞེས་ཀྱི་ཡོད་སྐོར་གྱི་གནས་ཚུལ་རིམ་པ་ཐོན་པ་ནི་དངོས་ཡོད་ཀྱི་གནས་ཚུལ་ཞིག་མ་ཡིན་པར་རྫུན་མ་ ཡིན་པ་དང་། དོན་དངོས་ཀྱི་གནས་ཚུལ་ནི་ Commonwealth of Dominica ཞེས་པའི་ལུང་པ་དེའི་ཕྱིར་བསྐྱོད་ལག་འཁྱེར་བཟོས་ཡོད་པར་བཀའ་བསྩལ་བ་དང་སྦྲགས། ༸གོང་ས་མཆོག་དང་རྒྱ་གར་གཞུང་། དབུས་བོད་མིའི་སྒྲིག་འཛུགས་བཅས་ལ་སྙན་སེང་ཞུས་ཡོད་སྐོར་གསུངས་འདུག  དེ་བཞིན་རིན་པོ་ཆེ་མཆོག་གིས་ལོ་ཤས་སྔོན་ནས་༸གོང་ས་མཆོག་གིས་བཀའ་དགོངས་ལམ་སྟོན་དང་། ༸སྐུ་ཉིད་ཀྱི་ཆུང་དུས་ནས་ཐུགས་རེ་གནང་བ་བཞིན་ཟླ་བ་འདིའི་ཚེས་ ༩ དང་ ༡༠ བཅས་ཉིན་གཉིས་ཀྱི་རིང་ France ཡི་དབེན་པའི་གནས་ཤིག་ཏུ་༸རྒྱལ་དབང་མཐའ་ཡས་རྡོ་རྗེ་མཆོག་དང་མཇལ་འཕྲད་བྱུང་བ་ནི་ངོ་ཤེས་བཟང་པོ་ཞིག་ཡོང་རྒྱུ་དང་། མི་རབས་ནས་མི་རབས་ལ་དུམ་བུ་གཉིས་སུ་འགྲོ་མི་དགོས་པ། ཀརྨ་པའི་ཡང་སྲིད་ལ་བདེན་རྫུན་གྱི་འཁྲུག་རྩོད་མི་ཡོང་བའི་ཆེད་༸སྐུ་སྒེར་གྱི་ངོས་ནས་ཀརྨ་ཚང་གི་སྤྱི་དོན་ལ་དམིགས་ཏེ་ཐུགས་ཐག་བཅད་པ་ཞིག་ཡིན་པ་དང་རིན་པོ་ཆེ་རྣམ་གཉིསཀྱི་མཇལ་འཕྲད་དེ་ཡང་ཕྱི་རྒྱལ་མ་གཏོགས་རྒྱ་གར་ནང་ཡོང་ཐབས་མེད་པ་ཞིག་ཡིན་སྐོར་བཀའ་བསྩལ་ཡོད།རིན་པོ་ཆེ་མཆོག་གིས་མཇལ་འཕྲད་སྐབས་༸རྒྱལ་དབང་མཐའ་ཡས་རྡོ་རྗེ་མཆོག་ནི་ཐུགས་གཤིས་བཟང་པོ་དང་བསྟན་པ་སྤྱི་ལ་དགོངས་པ་བཞེས་མཁན། ཁ་རུ་ཁ་ཐུག་དང་འདྲིས་བདེ་པོ་ཞིག་ཡོད་པ་སོགས་ཀྱི་ཐུགས་ཚོར་བྱུང་ཞེས་བཀའ་བསྩལ་བ་དང་། མཇལ་འཕྲད་དེ་དབུ་འཛུགས་པ་ལས་མཇུག་བསྡོམས་སམ་ཐག་བཅད་པ་ཞིག་མིན་སྟབས། བཟང་ཕྱོགས་ཀྱི་འགྱུར་བ་ཞིག་ཡོང་བར་ཀརྨ་ཀཾ་ཚང་གི་རྗེས་འཇུག་ཡོངས་དང་སྤྱི་ཚོགས་ཡོངས་ལ་རག་ལས་པ་ཞིག་ཡིན་པས་ཚང་མས་ཕུགས་རྒྱང་རིང་པོར་དགོངས་བཞེས་གནང་རོགས་ཞེས་རེ་སྐུལ་གནང་ཡོད་པ་རེད།རྩ་བའི་རིན་པོ་ཆེ་མཆོག་ལོ་ ༢ མ་ཟིན་ཙམ་ཞིག་ཨ་རིར་བཞུགས་བཞག་གནང་བ་དེ་ནི་རྒྱ་གར་ནང་ལོ་ ༡༨ རིང་བཞུགས་བཞག་གནང་བ་ལས་ཕྱི་རྒྱལ་དུ་བཞུགས་ཡུན་རིང་ཤོས་ཆགས་ཀྱི་ཡོད་ཀྱང་། ཕྱི་ཚུལ་ནས་རང་དབང་ཡོད་པ་མཐོང་ཚུལ་ཞིག་ཡོང་གི་ཡོད་པ་དེ་ལྟར་ཡང་དེ་ནི་ལྟ་ཚོད་ཞིག་ཡིན་པ་ལས་སྐུ་ཉིད་ཀྱི་སྐུའི་འཕྲོད་བཞེས་ཀྱི་དཀའ་ངལ་དང་ཕྱི་ནང་གི་གནས་ཚུལ་མང་དག་ལ་གདོང་ལེན་གནང་དགོས་པའི་རྐྱེན་གྱིས་རིན་པོ་ཆེ་མཆོག་གི་༸སྐུ་ཚེའི་ནང་དཀའ་ངལ་ཆེ་ཤོས་བྱུང་བ་ཞིག་ལ་ངོས་འཛིན་གནང་གི་ཡོད་ཅེས་གསུངས་འདུག

བོད་ཀྱི་འདས་མ་ད་གསུམ་གྱི་གནས་བབས་འཁོད་པའི་རྒྱབ་ཤ་དཀར་པོའི་དཔེ་དེབ་དབུ་འབྱེད།

ཁ་སང་ཉིན་རྒྱབ་རྒྱ་གར་རྒྱལ་ས་ལྡི་ལིའི་ནང་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་སྐུ་མགྲོན་གཙོ་བོ་མཁས་དབང་  Dr. Anand Kumar མཆོག་དབུ་བཞུགས་ཀྱིས་ལོ་རྒྱུས་ཐོག་བོད་དེ་རྒྱ་ནག་གི་ཆ་ཤས་ནམ་ཡང་མིན། འོན་ཀྱང་དབུ་མའི་ལམ་གྱི་སྲིད་བྱུས་ནི་བོད་རྒྱའི་དཀའ་རྙོག་བར་ལག་བསྟར་རུང་བའི་ཐབས་ལམ་ཞིག་ཡིན་ཞེས་པའི་དཔེ་དེབ་གསར་པ་ཞིག་དབུ་འབྱེད་གནང་ཡོད་པ་རེད།རྒྱལ་ས་ལྡི་ལི་གསར་པའི་ IIC རྒྱ་གར་དང་རྒྱལ་སྤྱིའི་བལྟེ་གནས་ཁང་དུ་ཚོགས་པའི་དཔེ་དེབ་དབུ་འབྱེད་ཀྱི་མཛད་སྒོའི་ཐོག་བོད་དོན་ཐོག་ཐུགས་སྣང་ཡོད་པའི་རྒྱ་གར་གྱི་མཁས་དབང་དང་། ཉམས་ཞིབ་པ།   ཕྱི་རྒྱལ་གཞུང་ཚབ་ཁག་ཅིག་གི་སྐུ་ཚབ་སོགས་མི་གྲངས་དྲུག་ཅུ་སྐོར་ཞིག་འདུ་འཛོམས་གནང་ཡོད་པ་མ་ཟད། སྐབས་དེར་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ནས་གསར་དུ་འདོན་སྤེལ་གནང་བའི་དཔེ་དེབ་དེ་ནི་རྒྱ་ནག་གིས་རྒྱལ་སྤྱིའི་ནང་བོད་ཀྱི་དངོས་ཡོད་གནས་སྟངས་དང་མི་མཐུན་པའི་འཁྱོགས་བཤད་དྲིལ་བསྒྲགས་བྱེད་བཞིན་པར་ལན་འདེབས་ཤིག་ཡིན་སྐོར་གནད་དོན་ཁག་ཅིག་གསལ་བཤད་གནང་བ་དང་། ལྷག་པར་དུ་རྒྱ་ནག་གཞུང་གི་ངོས་ནས་བོད་བརྒྱུད་ནང་བསྟན་གྱི་བླ་སྤྲུལ་ངོས་འཛིན་གནང་ཕྱོགས་ཐད་ཐེ་བྱུས་བྱེད་བཞིན་པར་སྐྱོན་བརྗོད་དང་འབྲེལ། བླ་སྤྲུལ་ངོས་འཛིན་གནང་ཕྱོགས་ཀྱི་དབང་ཚད་དེ་འབྲེལ་ཡོད་ནང་བསྟན་བླ་མ་སྐྱེ་ཆེན་རྣམས་ལ་ཡོད་པར་ངོ་སྤྲོད་གནང་ཡོད། རྒྱ་ནག་གཞུང་གི་ངོས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་དང་ལྷན་བོད་རྒྱ་གྲོས་མོལ་བསྐྱར་གསོ་གནང་དགོས་གལ་ཡིན་པ་སོགས་གསུངས་ཡོད། སྐབས་དེའི་སྐུ་མགྲོན་གཙོ་བོ་སྤྱི་ཚོགས་རིང་ལུགས་པ་མཁས་དབང་ Anand Kumar  མཆོག་ནས་རྒྱ་གར་ནི་བོད་ཀྱི་དཀའ་ངལ་སེལ་ཐབས་དང་དེ་བཞིན་དཀའ་རྙོག་ཡོང་གཞི་བཅས་ཕྱོགས་གཉིས་ཀའི་ཆ་ཤས་ཤིག་ཡིན་སྐོར་གསུངས་པ་མ་ཟད་རྒྱལ་ཁམས་རིང་ལུགས་ཀྱི་སྲིད་བྱུས་ལ་མདུན་ལམ་མེད་སྐོར་འགྲེལ་བརྗོད་གནང་བ་དང་ཆབས་ཅིག རྒྱ་གར་གཞུང་གི་ངོས་ནས་ཡར་ཐོན་ཅན་གྱི་རྒྱལ་ཁབ་གཞན་ལྟར་མདུན་བསྐྱོད་གནང་ཐོག་༸གོང་ས་༸སྐྱབས་མགོན་ཆེན་པོ་མཆོག་གི་འདོན་གནང་མཛད་པའི་གཉིས་སྨན་དབུ་མའི་ལམ་གྱི་སྲིད་བྱུས་ལ་རྒྱབ་སྐྱོར་གནང་རྒྱུ་དེ་ཕྱོགས་ཡོངས་ཀྱི་ཁེ་ཕན་ཉག་གཅིག་ཡིན་སྐོར་སོགས་གསུངས་ཡོད།དཔེ་དེབ་དབུ་འབྱེད་ཀྱི་མཛད་སྒོ་དེ་གྲུབ་བསྟུན་སྲིད་སྐྱོང་བློ་བཟང་སེང་གེ་མཆོག་དང་མཁས་དབང་  Wahid Siddiq མཆོག། ལྕམ་སྐུ་མཁས་དབང་  Madhuri Sondhi  མཆོག སློབ་དཔོན་ཡེ་ཤེས་ཆོས་སྒྲོན་ལགས་བཅས་དབུ་བཞུགས་ཐོག་བོད་ཀྱི་གནད་དོན་སྤྱི་དང་།   ཧི་མཱ་ལ་ཡའི་མི་མང་གི་བོད་དོན་དགོངས་པ་བཞེས་ཕྱོགས། ཉེ་བའི་ཆར་རྒྱ་དཀར་ནག་གཉིས་ཀྱི་ཆབ་སྲིད་འཕེལ་རིམ་བཅས་ཀྱི་ཐོག་བགྲོ་གླེང་དང་དྲི་བ་དྲིས་ལན་སོགས་ཀྱང་གནང་སོང་།དབུས་བོད་མིའི་སྒྲིག་འཛུགས་ཕྱི་འབྲེལ་ལས་ཁུངས་ཀྱི་དྲུང་ཆེ་དྭགས་པོ་བསོད་ནམས་ནོར་བུ་ལགས་དང་དྲུང་ཆེ་ཚད་མཉམ་ཤར་གླིང་བསྟན་འཛིན་ཟླ་སྒྲོན་ལགས་ཀྱིས་དབུས་པའི་ལས་བྱེད་ཁག་ཅིག་ཆེད་ཕེབས་གནང་འདུག་པ་ལྟར་འདི་ག་རླུང་འཕྲིན་ཁང་ནས་དྲུང་ཆེ་དྭགས་པོ་བསོད་ནམས་ནོར་བུ་ལགས་སུ་དཔེ་དེབ་དབུ་འབྱེད་གནང་བའི་བརྒྱུད་ཐུགས་རེ་གསར་པ་གང་དག་གནང་གི་ཡོད་དམ་ཞེས་བཅར་འདྲི་ཞུས་ཡོད།གཞི་རྩའི་རྒྱ་གར་རྒྱལ་ས་ལྡི་ལིར་དབུ་འབྱེད་གནང་བའི་ལོ་རྒྱུས་ཐོག་བོད་དེ་རྒྱ་ནག་གི་ཆ་ཤས་ནམ་ཡང་མིན། འོན་ཀྱང་དབུ་མའི་ལམ་གྱི་སྲིད་བྱུས་ནི་བོད་རྒྱའི་དཀའ་རྙོག་བར་ལག་བསྟར་རུང་བའི་ཐབས་ལམ་ཞིག་ཡིན་ཞེས་པའི་དཔེ་དེབ་དེ་བོད་དབྱིན་རྒྱ་གསུམ་གྱི་སྐད་ཡིག་ནང་འདོན་སྤེལ་གནང་འདུག་པ་མ་ཟད།   དེབ་དེའི་ནང་བརྗོད་གཞི་ལེ་མཚན་དགུ་ཡོད་པ་ལྟར་བོད་ནང་རང་ལུས་མེར་སྲེག་གནང་སྟེ་བོད་མི་ཚོས་ངོ་རྒོལ་གནང་བཞིན་པའི་གནས་སྟངས་དང་།  འདས་པའི་བོད་ཀྱི་གནས་བབ།  འགྲོ་བ་མིའི་ཐོབ་ཐང་གི་གནས་སྟངས། བོད་ཀྱི་རིག་གཞུང་རྩ་མེད་བཟོ་བཞིན་པའི་གནད་དོན། བོད་ཀྱི་ཁོར་ཡུག་གནས་སྟངས།  དཔལ་འབྱོར།  རྒྱ་ནག་གིས་རིམ་པས་བོད་དེ་གྲོང་ཁྱེར་གྱི་ངོ་བོར་སྒྱུར་བཞིན་པའི་གནད་དོན་བཅས་འཁོད་ཡོད་པ་མ་ཟད། ལྷག་པར་དུ་རྒྱ་ནག་གིས་སྤྲུལ་སྐུའི་ཡང་སྲིད་ངོས་འཛིན་གནང་ཕྱོགས་བརྒྱུད་བོད་ལ་དབང་སྒྱུར་ཡོང་ཐབས་ཀྱི་སྲིད་བྱུས་ལག་བསྟར་བྱེད་བཞིན་པ་བཅས། བོད་ཀྱི་འདས་པ་དང་ད་ལྟ་བཅས་ཀྱི་དངོས་ཡོད་གནས་སྟངས་ཁག་གསལ་བཤད་གནང་འདུག བརྗོད་གཞི་ལེ་མཚན་མཐའ་མའི་ནང་དབུ་མའི་ལམ་ནི་བོད་རྒྱ་ཕྱོགས་གཉིས་ཀར་ཁེ་ཕན་ཡོད་པའི་ཐབས་ལམ་ཞིག་ཡིན་སྐོར་བཅས་འཁོད་འདུག

Latest news