བོད།

རྒྱ་ནག་ཏུ་ཀུ་ཤུ་རྟགས་ཅན་གྱི་ཁ་པར་མཉེན་ཆས་བང་མཛོད་དུ་བོད་དང་འབྲེལ་བའི་མཉེན་ཆས་མ་ལག་ཉེར་དགུ་བཀག་སྡོམ་བྱས་ཏེ་ཕབ་ལེན་གནང་ཐབས་མེད་པར་གྱུར་འདུག རྒྱ་ནག་ནང་དུ་༸གོང་ས་མཆོག་དང་འབྲེལ་བའི་མཉེས་ཆས་མ་ལག་ཡོད་ཚད་སྔ་མོ་ནས་བཀག་སྡོམ་བྱས་ཡོད་པ་མ་ཟད། མཉེན་ཆས་དེ་དག་ཕབ་ལེན་གྱི་བང་མཛོད་ནས་ཕྱིར་བཏོན་བྱས་ཡོད་ཀྱང་། མཉེན་ཆས་བྱུས་འགོད་པར་བརྡ་ལན་གང་ཡང་འབྱོར་གྱི་མེད་པར་བཟོས་ཡོད་པ་མ་ཟད། ཀུ་ཤུ་རྟགས་ཅན་གྱི་ཁ་པར་བཟོ་ལས་ཁང་གི་མགྲིན་ཚབ་པ་ཞིག་གིས་གནད་དོན་དེ་ནི་རྒྱ་ནག་གི་ས་གནས་ཡུལ་ཁྲིམས་དང་བསྟུན་ཡོད་པ་ཞིག་ཡིན་པར་འགྲེལ་བརྗོད་བྱས་འདུག Greatfire ཞེས་རྒྱ་ནག་གི་དྲྭ་རྒྱ་བཀག་སྡོམ་གི་གནད་དོན་ཐོག་ཞིབ་འཇུག་བྱེད་མཁན་ཚོགས་པས་འདི་ག་རླུང་འཕྲིན་ཁང་ལ་བཏང་འབྱོར་བྱུང་བའི་གནས་ཚུལ་ནང་གསལ་ལྟར་ན།། རྒྱ་ནག་ནང་ཀུ་ཤུ་རྟགས་ཅན་གྱི་ཁ་པར་བང་མཛོད་དུ་བཀག་སྡོམ་བྱས་ཡོད་པའི་མཉེན་ཆས་མ་ལག་དེ་དག་གི་རིགས་དབྱེ་ལྔའི་ནང་བསྡུས་ཡོད་པའི་ཁོངས་སུ་བོད་དོན་གྱི་གསར་འགྱུར་བརྒྱུད་ལམ་ཁག ཆོས་སྤྱོད་དང་ཡུལ་སྐོར་སྤྲོ་འཆམ་གྱི་མཉེན་ཆས་མ་ལག དེ་བཞིན་བོད་ཀྱི་རིག་གཞུང་དང་ཆབ་སྲིད་ལ་འབྲེལ་བ། ཐ་ན་བོད་ཀྱི་རྒྱལ་དར་ཡོད་པའི་རྩེད་མོ་རིགས་ཀྱི་མཉེས་ཆས་ཡོད་ཚད་བཀག་སྡོམ་བྱས་ཡོད་པར་མངོན་གསལ་གནང་འདུགཚོགས་པ་དེས་ད་དུང་ཀུ་ཤུ་རྟགས་ཅན་ཚོང་ལས་ཁང་གིས་ཁ་པར་མཉེན་ཆས་བང་མཛོད་ཁྲོད་ནས་བོད་དོན་དང་འབྲེལ་བའི་མཉེན་ཆས་མ་ལག་ཁག་བཀག་སྡོམ་བྱས་འགོ་ཚུགས་ནས་ད་བར་ལོ་བཅུ་ཕྲག་གཅིག་ལྷག་སོང་ཡོད་ཀྱང་ཚོང་ལས་དེའི་ངོས་ནས་དུས་ད་ལྟའང་མུ་མཐུད་དེ་རྒྱ་ནག་དང་ལྷན་དུ་ལག་འབྲེལ་བྱས་ཏེ་གནས་སྟངས་ལ་འགྱུར་བ་གང་ཡང་ཕྱིན་མེད་པར་སྐྱོན་བརྗོད་དང་འབྲེལ། ཚོང་ལས་ཁང་གི་གཙོ་འཛིན་ Tim Cook ལགས་སུ་ཚོང་ལས་ཁང་གི་སྲིད་བྱུས་ལ་འགྱུར་བ་ནམ་གཏོང་རྒྱུ་ཡིན་པའི་དྲི་བ་གླེང་འདུག དེ་བཞིན་ Greatfire ཚོགས་པ་དང་ལྷན་ཀུ་ཤུ་རྟགས་ཅན་ཚོང་ལས་ཁང་གིས་མཉེན་ཆས་མ་ལག་བཀག་སྡོམ་གི་ལས་དོན་ཐོག་ཞིབ་འཇུག་གནང་མཁན TibCERT ཞེས་པའི་བོད་ཀྱི་དྲྭ་རྒྱའི་བདེ་འཇགས་སྐོར་ལ་ཕྱག་ལས་གནང་མཁན་རུ་ཁག་གི་རྡོ་རྗེ་ཕུན་ཚོགས་ལགས་ཀྱིས་ཀུ་ཤུ་རྟགས་ཅན་ཚོང་ལས་ཁང་གིས་རྒྱ་ནག་གི་ཡུལ་ཁྲིམས་ལ་ཁ་གཡར་ནས་བོད་དང་འབྲེལ་བའི་མཉེན་ཆས་མ་ལག་མང་པོ་ཞིག་བཀག་སྡོམ་བྱས་ཡོད་ཀྱང་། བཟོ་ཁང་དེའི་བྱེད་བབ་དེར་ཕྱི་གསལ་ནང་གསལ་གྱི་ཆ་གང་ཡང་མེད་པར་བརྗོད་ཡོད་པ་དང་སྦྲགས། རྒྱ་ནག་དང་ཁ་པར་བཟོ་ལས་ཁང་གཉིས་ཀྱིས་མཉམ་འབྲེལ་གྱིས་བྱས་ཏེ།  བོད་མའི་གཞི་རྩའི་འགྲོ་བ་མིའི་ཐོབ་ཐང་ལ་རྡོག་རོལ་བཏང་ཡོད་མ་ཟད་བོད་མི་དག་གིས་གནས་ཚུལ་མཁོ་སྒྲུབ་བྱེད་རྒྱུར་དོ་ཕོག་བཏང་ཡོད་པར་བརྗོད་འདུག རྩ་བའི་ TibCERT ནས་ཀུ་ཤུ་རྟགས་ཅན་གྱི་མཉེན་ཆས་མ་ལག་ ༡༡༩ ལྷག་ལ་ཞིབ་འཇུག་བྱས་པའི་གྲུབ་དོན་དུ་རྒྱ་ནག་ནང་བོད་དང་བོད་མི། ཏཱ་ལའི་བླ་མ།  དེ་བཞིན་ནང་ཆོས་སོགས་ཀྱི་མཉེན་ཆས་ཡོད་ཚད་བཀག་ཡོད་པའི་ཁོངས་སུ་མཉེན་ཆས་བདུན་ནི་ཆོས་ལུགས་དང་རིག་གཞུང་ལ་འབྲེལ་བ་ཡོད་པ་དང་། མཉེན་ཆས་ལྔ་གསར་འགྱུར་དང་ཆབ་སྲིད་ལ་འབྲེལ་བ་ཡོད་པ་ཤེས་རྟོགས་བྱུང་འདུག

ཁ་སང་ཕྱི་དྲོ་བཞུགས་སྒར་གྱི་ Club house ཚོགས་ཁང་དུ་བོད་རང་བཙན་སློབ་ཕྲུག་ཚོགས་པ་དང་རྒྱལ་སྤྱིའི་བོད་དོན་འབྲེལ་མཐུན་ཁང་གཉིས་ཀྱིས་གོ་སྒྲིག་གི་འོག་རྒྱ་ནག་གི་གྱ་དགུ་ལོའི་དྲུག་བཞིའི་དོན་རྐྱེན་བྱུང་ནས་མི་ལོ་ཧྲིལ་པོ་ ༣༠ འཁོར་བའི་དུས་དྲན་སྲུང་བརྩི་ཞུས་ཏེ། བོད་རྒྱ་གཉིས་ཀྱི་མི་རིགས་འཐབ་རྩོད་པ་དང་ལུས་འགུལ་བ་ཁག་གཅིག་གིས་ད་ལྟའི་རྒྱ་ནག་གི་གནས་བབ་དང་སྒེར་གཅོད་ཀྱི་སྲིད་བྱུས་ཐོག་གཏམ་བཤད་གནང་སོང་།མཛད་སྒོའི་ཐོག་དྲུག་བཞིའི་དོན་རྐྱེན་གྱི་ཁྲོད་དངོས་སུ་ཞུགས་མྱོང་མཁན་གྱི་རྒྱ་རིགས་ཁྲིམས་རྩོད་པ་སྐུ་ཞབས་ཏཱེན་པཱོ་ལགས་དང་ཁེ་ན་ཌའི་གཙུག་ལག་སློབ་ཆེན་གྱི་སློབ་ཕྲུག་ཚོགས་པའི་ཚོགས་གཙོ་བོད་དོན་ལས་འགུལ་བ་འཆི་མེད་ལྷ་མོ་ལགས། བོད་དང་ཐེ་ཝན་གྱི་འགྲོ་བ་མིའི་ཐོབ་ཐང་འབྲེལ་མཐུད་ཁང་གི་ཚོགས་གཙོ་བཀྲ་ཤིས་ཚེ་རིང་ལགས། དེ་བཞིན་བོད་རང་བཙན་ལས་འགུལ་བ་བསྟན་འཛིན་བརྩོན་འགྲུས་ལགས་དང་བོད་དོན་ལས་འགུལ་ཁང་གི་སློབ་སྟོན་པ་བསྟན་འཛིན་རྡོ་རྗེ་ལགས་བཅས་དབུ་བཞུགས་ཐོག་བོད་རིགས་གཞོན་སྐྱེས་ཁག་གི་གཙོ་བྱས་པའི་རྒྱ་གར་བ་དང་ཕྱི་གླིང་བ་བརྒྱ་ཕྲག་ཅིག་གིས་ལས་རིམ་དེར་མཉམ་ཞུགས་བྱས་སོང་།སྐབས་དེར་བོད་རང་བཙན་སློབ་ཕྲུག་ཚོགས་པའི་རྒྱལ་ཡོངས་ངེས་སྟོན་པ་རྡོ་རྗེ་ཚེ་བརྟན་ལགས་ཀྱིས་ལས་རིམ་ངོ་སྤྲོད་བྱས་པ་དང་སྦྲགས། ལས་རིམ་དེ་བརྒྱུད་ནས་རྒྱ་ནག་གི་མང་གཙོ་དོན་གཉེར་བ་རྣམས་ལ་རྒྱབ་སྐྱོར་དང་དྲུག་བཞིའི་དོན་རྐྱེན་ཀྱི་ཁྲོད་དུ་ཤི་རྨས་ཐེབས་པའི་སློབ་ཕྲུག་དེ་དག་ལ་གདུང་སེམས་མཉམ་བསྐྱེད་ཡོད་པར་བརྗོད་སོང་།སྐུ་ཞབས་ཏཱེན་པཱོ་ལགས་ཀྱིས་ཕྱི་ནས་བལྟས་ན་རྒྱ་ནག་དེ་སྟོབས་ཆེན་རྒྱལ་ཁབ་ཅིག་ཡིན་ནའང་། དོན་དུ་དྲུག་བཞིའི་དོན་རྐྱེན་གྱི་ཁྲག་དྲི་བྲོ་བའི་དམར་གསོད་ཀྱི་བྱ་ངན་བྱེད་གཏེ་དེའི་དབང་གིས་རྒྱ་ནག་མི་མང་གི་རྩ་བའི་ཐོབ་ཐང་ཡོངས་སུ་འཕྲོག་ཡོད་པ་མ་ཟད། རྒྱ་ནག་ནང་ངལ་རྩོལ་མི་མང་གིས་ཁྲིམས་མཐུན་གྱི་ཆིག་སྒྲིལ་ཚོགས་པ་གཅིག་ཀྱང་བཙུགས་ཆོག་གི་མེད་པར་བརྟེན། རྒྱ་ནག་གི་སྤྱི་ཚོགས་དང་དཔལ་འབྱོར་གྱི་གནས་བབ་དེ་དམར་ཤོག་ཚོགས་པ་སྒེར་གཅོད་ཀྱི་དབང་ཆའི་འོག་ཏུ་ཡོད་པར་ཡོངས་གྲགས་གནང་བ་དང་རྒྱ་ནག་གི་དམར་ཤོག་ཚོགས་པའི་ལྟ་བའི་ནང་བཙན་རྒྱལ་གྱི་སྟོབས་ཤུགས་ནི་མེ་དམའི་རྩེ་ན་ཡོད་པའི་བཤད་སྲོལ་ཡོད་པ་བཞིན། རྒྱ་ནག་གིས་མི་ལོ་ཉི་ཤུའི་སྤྱི་ཚོགས་བདེ་འཇགས་ཀྱི་ཆེད་དུ་མི་འབོར་འབུམ་གཉིས་དམར་གསོད་བཏང་ཡོད་པའི་མང་ཚོགས་ཀྱི་ཁ་རྒྱུན་དེ་ལུང་འདྲེན་གནང་སོང་།དེ་བཞིན་འཆི་མེད་ལྷ་མོ་ལགས་ཀྱིས་རྒྱ་ནག་གིས་བོད་ནང་ཙམ་དུ་མ་ཟད་རང་དབང་གི་སྤྱི་ཚོགས་ཁེ་ན་ཌའི་ནང་ལའང་རྒྱ་ནག་གིས་སྤྱི་ཚོགས་དང་ཤེས་ཡོན་གྱི་ལྟེ་གནས་ཕྱོགས་ཡོངས་ནས་ཤན་ཤུགས་སྤྲོད་ཐབས་བྱེད་བཞིན་པའི་སྐོར་ནས་གཏམ་བཤད་གནང་སྟེ་ཁོང་ཁེ་ན་ཌའི་གཙུག་ལག་སློབ་ཆེན་གྱི་སློབ་མའི་ཚོགས་གཙོར་བདམས་ཐོན་བྱུང་མ་ཐག་ཕྱི་ཕྱོགས་ཀྱི་རྒྱ་རིགས་སྟོང་ཕྲག་མང་པོས་ཁོང་དང་ཁོང་གི་ནང་མི་ཡོངས་ལ་འཇིགས་སྐུལ་བྱས་ཏེ། མཙན་གཡེམ་དང་ངན་གསོད་ཀྱི་འཇིགས་སྐུལ་བྱས་པབ་མ་ཟད་ཁྱེད་རང་གསོད་བྱེད་ཀྱི་མདེའུ་དེ་རྒྱ་ནག་གི་ནང་ནས་བཟོས་པ་རེད། ནམ་ཞིག་ངས་ཁྱེད་མཐོང་མ་ཐག་རྡུང་རྡེག་གཏོང་གི་ཡིན་ཞེས་པའི་འཇིགས་སྐུལ་བྱས་ཡོད་པའི་གནས་ཚུལ་ངོ་སྤྲོད་གནང་སྟེ་རྒྱལ་སྤྱའི་སྟེང་ནས་རྒྱ་ནག་གིས་གནོད་ཤུགས་སྤྲོད་བཞིན་པ་དེར་ཁ་གཏད་གཅོག་དགོས་པའི་འབོད་སྐུལ་དང་ཆབས་ཅིག རྒྱ་ནག་དམར་ཤོག་ཚོགས་པའི་འཐབ་བྱུས་རང་བཞིན་གྱི་བརྙས་བཅོས་དེ་ནམ་ཡང་ལམ་ལྷོངས་བྱུང་གི་མ་རེད་ཅེས་གསུངས་པམ་ཟད། བོད་པའི་ན་གཞོན་དག་མེས་པོའི་སྙིང་སྟོབས་ཁུར་ནས་རྒྱ་ནག་གི་མདུན་དུ་ལངས་ཡོད་ཅེས་གཏམ་བཤད་གནང་ཡོད།དེ་ཞིན་བཀྲ་ཤིས་ཚེ་རིང་ལགས་ཀྱིས་བཙན་བྱོལ་གྱི་མི་ལོ་དྲུག་ཅུའི་རིང་གི་འཐབ་རྩོད་ཀྱི་སྐོར་ནས་གཏམ་བཤད་གནང་སྟེ་བཙན་བྱོལ་གྱི་བོད་མིའི་མི་ཐོག་དང་པོའི་གྲས་ཁོང་གི་ཕ་མ་གཉིས་ཀྱིས་བོད་ཡུལ་མིག་གིས་མ་མཐོང་ནས་འདས་གྲོངས་སུ་གྱུར་ཟིན་ནའང་། མི་ཐོག་གཉིས་པ་དག་ཐོག་མའི་འཐབ་རྩོད་ཀྱི་དམིགས་འབེན་མ་བོར་བའི་ཐོག་ནུས་ཤུགས་ཡོད་དགུ་རྩལ་སྤྲུག་གིས་རྩ་དོན་རྩོད་ཀྱི་ཡོད་པར་བརྗོད་དེ། ད་ཆ་གཞོན་སྐྱེས་འཐབ་རྩོད་པ་མང་པོ་ཞིག་ཆར་རྗེས་ཀྱི་ཤ་མོ་ལྟར་བརྡོལ་བཞིན་པ་དེ་ནི་གདེང་སྤོབས་སྐྱེས་འོས་པ་ཞིག་རེད་ཅེས་གཏམ་བཤད་གནང་སོང་།བསྟན་འཛིན་བརྩོན་འགྲུས་ལགས་ཀྱིས་དྲུག་བཞིའི་དོན་རྐྱེན་གྱི་བྱུང་རིམ་ཐད་ནས་གཏམ་བཤད་གནང་སྟེ་བོད་རྒྱ་གཉིས་ཀྱིས་འཐབ་རྩོད་ཀྱི་ནུས་པ་ཕྱོགས་གཅིག་ཏུ་སྒྲིལ་རྒྱུར་ནུས་ཤུགས་འདོན་དགོས་པར་བཤད་ཡོད་པ་མ་ཟད། བསྟན་རྡོར་ལགས་ཀྱིས་ཀྱང་དེང་སང་གི་རྒྱ་ནག་གི་བྱེད་བབ་དེ་ནི་ལོ་རབས་སུམ་ཅུའི་སྟོད་དུ་འཇར་མན་གྱི་བཀག་སྐྱིལ་ཁང་དུ་མི་མང་སྡེབ་གསོད་ཀྱི་བྱེད་ལས་སྣ་ཚོགས་བརྩམས་ཡོད་པ་བཞིན་རྒྱ་ནག་ནང་དུའང་ ཁ་སང་དེ་རིང་ཡུ་གུར་མི་རིགས་ས་ཡ་གཉིས་ཙམ་བཀག་སྐྱིལ་གྱིས་སྡུག་གྱོང་མནར་གཅོད་གཏོང་བཞིན་ཡོད་སྐོར་བརྗོད་པ་དང་སྦྲགས། འཛམ་གླིང་ནང་འཕྲུལ་ལས་གསར་བཟོ་བྱས་ནས་རང་དབང་དང་མང་གཙོ་གོང་སྤེལ་གྱི་ཐབས་བྱུས་ཇེ་ལེགས་སུ་གཏོང་བཞིན་ཡོད་ཀྱང་། རྒྱ་ནག་གིས་དེ་ལས་ཟློག་ཏེ་དེང་རབས་འཕྲུལ་ལས་གསར་བཟོ་བརྒྱུད་ནས་མི་མང་ལ་དྲག་གནོན་དང་དོ་དོམ་བྱེད་པར་སྤྱོད་བཞིན་སྐོར་བཤད་ཡོད།རྩ་བའི་དྲུག་བཞིའི་དོན་རྐྱེན་ནི་རྒྱ་ནག་གི་ཉེ་རབས་ལོ་རྒྱུས་ཁྲོད་དུ་མང་གཙོའི་དགོས་འདུན་མངོན་པར་བྱས་པའི་དུས་འགྱུར་གྱི་དཀྱོག་མཚམས་གལ་ཆེན་ཞིག་ཡིན་པར་བརྟེན། དྲུག་བཞིའི་དོན་རྐྱེན་གྱི་དམར་གསོད་དང་རྨས་སྐྱོན་ཁྲོད་ནས་རྒྱ་ནག་གི་འཐབ་རྩོད་པ་མང་པོ་ཞིག་ཕྱི་ཕྱོགས་སུ་བྲོས་བྱོལ་ཏུ་ཕྱིན་ཡོད་སྟབས། དེང་སང་ནུབ་ཕྱོགས་རྒྱལ་ཁབ་ཁག་ཏུ་ཡང་དྲུག་བཞིའི་དོན་རྐྱེན་གྱི་མེ་རོ་གསོ་བཞིན་པའི་མང་གཙོ་དོན་གཉེར་གྱི་དཔུང་ཁག་གཅིག་འཚར་ལོངས་འབྱུང་བཞིན་ཡོད་སྟབས་རྒྱ་ནག་གིས་དུས་དྲན་འདིར་ཚོར་བ་རྣོ་བའི་ཐོག་ནས་དམ་དྲག་དང་དོ་དམ་བྱེད་བཞིན་ཡོད་པ་རེད།

རྒྱ་གཞུང་གིས་རྒྱ་ནག་ནང་ཡོད་པའི་ནང་པའི་དགོན་སྡེ་དང་ལྷ་ཁང་ཁག་གི་བཟོ་བཀོད་བོད་བརྒྱུད་ནང་བསྟན་ལྟར་ཡོད་པ་རྣམས་ལ་བསྒྱུར་བཅོས་གཏང་དགོས་པའི་བཀའ་རྒྱ་བཏང་ཡོད་པ་རེད།ཁ་སང་བོད་གནས་ལྟ་ཞིབ་ཁང་གིས་ Free Tibet ལ་གནས་ཚུལ་མཁོ་སྤྲོད་གནང་བར་གཞིགས་ཚེ་རྒྱ་ནག་གི་ Du’an Yao རང་སྐྱོང་ལྗོངས་ཀྱི་རྒྱལ་ཡོངས་དང་ཆོས་ལུགས་དོ་དམ་ལྷན་ཁང་ནས་ཉེ་ལམ་ཚེས་ ༡༣ ཉིན་ Disu གྲོང་སྡེ་ཉེ་འདབས་སུ་ཡོད་པའི་ Anfu ས་ཁུལ་ནང་གི་ནང་པའི་ལྷ་ཁང་གི་བཟོ་བཀོད་རྣམས་ཧན་ནང་པའི་ལྟ་གྲུབ་དང་འགལ་གྱི་ཡོད་སྟབས། དགོན་སྡེ་དང་ལྷ་ཁང་གི་དཀོན་གཉེར་ནས་བོད་བརྒྱུད་ནང་བསྟན་གྱི་བཟོ་བཀོད་དང་ལྡན་པའི་ལྷ་སྐུ་དང་མ་ནི་འཁོར་ལོ་ཡོངས་རྫོགས་བསྒྱུར་བཅོས་དགོས་པར་བཀའ་རྒྱ་བཏང་ཡོད་པ་རེད།བཀའ་རྒྱའི་ནང་ནང་པའི་ལྷ་ཁང་ཁག་གི་འདུ་ཁང་གཙོ་བོར་གྱུར་པའི་སྐུ་བརྙན་རྣམས་ཟླ་བ་འདིའི་ཚེས་ ༢༦ སྔ་རོལ་དུ་བསྒྱུར་བཅོས་བྱེད་ཚར་དགོས་པ་དང་། དེ་བཞིན་མ་ནི་འཁོར་ལོའི་བཟོ་བཀོད་ཚེས་ ༡༦ གོང་བཟོ་བཅོས་དགོས་པ་བཅས་ལྷ་ཁང་རྣམས་ཀྱི་བཟོ་བཀོད་རྣམས་ཧན་ནང་པའི་ལྟ་གྲུབ་དང་མཐུན་པ་བཟོས་དགོས་པའི་བཀའ་རྒྱ་བཏང་བ་མ་ཟད། གལ་ཏེ་དུས་ཚོད་དེའི་རིང་བསྒྱུར་བཅོས་མ་བྱེད་ཚེ་སྐུ་བརྙན་དང་བཟོ་བཀོད་རྣམས་གཏོར་བཤིག་དང་ཁྲིམས་སྒྲིག་གཞིར་བཟུང་ཉེས་ཆད་གཏང་རྒྱུ་ཡིན་པར་བརྗོད་འདུགགནད་དོན་དེ་འབྲེལ་རྒྱ་གར་དུ་ཡོད་པའི་བོད་གནས་ལྟ་ཞིབ་ཁང་གི་རྒྱ་ཡིག་ཉམས་ཞིབ་པ་ཞི་བདེ་ཟླ་བ་ལགས་སུ་བཅར་འདྲི་ཞུས་པར་ཨན་བྷུ་ལྷ་ཁང་ནས་ཉེ་ལམ་ཤྲི་ལངྐ་ནས་སངས་རྒྱས་ཀྱི་རིང་བསྲེལ་གདན་འདྲེན་ཞུས་པའི་ཐོག་ལྷ་ཁང་དེ་སྙན་གྲགས་ཅན་ཞིག་ཡིན་སྐོར་དང་། དེ་བཞིན་ལྷ་ཁང་དེ་དང་བོད་གསེར་རྟ་བླ་རུང་སྒར་གཉིས་དབར་འབྲེལ་བ་ཤུགས་ཆེ་ཡོད་པ་ཞིག་ཡིན་པ་མ་ཟད། སྒོས་སུ་རྒྱ་ནག་གཞུང་གིས་ཐོག་མཐའ་བར་གསུམ་ནས་བོད་བརྒྱུད་ནང་བསྟན་གཙོས་པའི་ཆོས་ལུགས་གཞན་ཁག་རྒྱ་ནག་གི་སྤྱི་ཚོགས་རིང་ལུགས་ཀྱི་ངོ་བོ་ལྡན་པར་འགྱུར་ཐབས་སུ་འབད་བཞིན་སྟབས། བོད་བརྒྱུད་ནང་བསྟན་དར་སྤེལ་གྱི་ཤུགས་རྐྱེན་དེ་བཀག་སྡོམ་བྱེད་བཞིན་པར་གསུངས་སོང་།རྩ་བའི་ཨན་བྷུ་ནང་ཡོད་པའི་ནང་པའི་ལྷ་ཁང་དེ་རྒྱ་ནག་ནང་པ་སྟོང་ཕྲག་མང་པོར་གནས་ཆེན་གཙོ་བོ་ཞིག་ཆགས་ཀྱི་ཡོད་པ་རེད། རྒྱ་གཞུང་ནས་ཉེ་ལམ་ཧྲན་ཞི་ཞིང་ཆེན་ནང་ཁུལ་དེར་ཡོད་པའི་ནང་པའི་དགོན་སྡེ་ཁག་ལ་སྤྱི་བསྒྲགས་གཅིག་མཚུངས་སྤེལ་ཡོད་པ་དང་། ཁྲིམས་སྒྲིག་དོན་ཚན་ ༩ ཆེད་བཏོན་དང་འབྲེལ་རྒྱ་ནག་གི་རྫོང་དང་ཁུལ་རིམ་པ་ཁག་ཏུ་བོད་བརྒྱུད་ནང་བསྟན་དང་འབྲེལ་བའི་རྡོར་དྲིལ་དང་། མ་ནི་འཁོར་ལོ། དེ་བཞིན་དར་ལྕོག་སོགས་ཀྱི་མཆོད་རྫས་བེད་སྤྱོད་དང་བོད་བརྒྱུད་ནང་བསྟན་དར་སྤེལ་གཏོང་མི་ཆོག་པའི་བཀའ་རྒྱ་བཏང་ཡོད་པ་རེད།  ཉེ་ལམ་ Henan ཞིང་ཆེན་ཁྱབ་ཁོངས་སུ་ཡོད་པའི་ནང་པའི་དགོན་པ་ཞིག་ཏུ་སྟོན་པའི་༸སྐུ་བརྙན་ཚབ་ཏུ་མའོ་ཙེ་ཏུང་གཙོས་པའི་དཔོན་རིགས་གཉིས་ཀྱི་སྣང་བརྙན་བཤམ་པའི་ཐོག་དགོན་པ་དེར་དམར་པོའི་རྒྱལ་ཞེན་གྱི་སློབ་གསོ་ཁང་ཞེས་མིང་བཏགས་ཏེ་རྒྱའི་དཔོན་རིགས་མང་པོ་ཞིག་དགོན་པ་དེར་ཕྱག་མཆོད་བྱེད་དུ་ཡོང་གི་ཡོད་པ་རེད།

ཁ་ཉིན་ཕྱི་ཚེས་ ༢༩ ཉིད་ཡོ་རོབ་ Netherlands རྒྱལ་ས་ Hague  ཁུལ་དུ་རྒྱ་ནག་གྱི་སྲིད་འཛིན་གཞོན་པ་ Wang Qishan ཚོང་འབྲེལ་ཆེད་དུ་ཁུལ་དེར་འབྱོར་བ་དང་བསྟུན། རྒྱལ་སྤྱིའི་བོད་དོན་ལས་འགུལ་ཁང་དང་ས་གནས་བོད་རིགས། ཡུ་གུར་བ་དང་བོད་དོན་རྒྱབ་སྐྱོར་བ་ཁག་གཅིག་ནས་ཡུལ་དེར་རྟེན་གཞིར་བྱས་པའི་སྲིད་འཛིན་གྱི་གཞུང་འབྲེལ་བཞུགས་གནས་ཀྱི་ཉེ་འདབས་སུ་ཡོད་པའི་རྒྱ་ལམ་གྱི་ཟུར་ནས་ངོ་རྒོལ་སྐད་འབོད་གནང་འདུགརྒྱ་རིགས་རུ་ཁག་ཞིག་གིས་ལམ་ཟུར་དེ་ནས་རྒྱའི་རྒྱལ་དར་དང་སྦྱར་ཡིག་ཁྱེར་ནས་སྣེ་ལེན་ཞུ་བཞིན་པའི་ཁ་སྤྲོད་དུ་བོད་རིགས་ཚོས་ཕྱག་ལ་བོད་ཀྱི་རྒྱལ་དར་བསྣམས་ནས་༸གོང་ས་མཆོག་དང་ལྷན་དུ་གྲོས་མོལ་བྱེད་དགོས། བོད་ནང་དྲག་གནོན་མཚམས་འཇོག་བྱེད་དགོས། གཞི་རྩའི་འགྲོ་བ་མིའི་ཐོབ་ཐང་ལ་གུས་བརྩི་ཞུ་དགོས་ཞེས་འཁོད་པའི་སྦྱར་ཡིག་འཕྱར་བཞིན་ཞལ་ནས་༸གོང་ས་༸སྐྱབས་མགོན་ཆེན་པོ་མཆོག་༸སྐུ་ཚེ་ཡུན་རིང་བརྟན་པར་ཤོག བོད་ལ་རང་དབང་དགོས། ༸པཎ་ཆེན་རིན་པོ་ཆེ་མཆོག་གློད་བཀྲོལ་དགོས་ཞེས་འབོད་ཚིག་སྒྲོག་ནས་ངོ་རྒོལ་གྱི་ལམ་ནས་རྒྱ་ནག་གི་སྲིད་འཛིན་གཞོན་པར་སྣེ་ལེན་གནང་འདུགསྐབས་དེར་ཁུལ་དེའི་ Boeddhistisch dabnlad ཞེས་པའི་གསར་ཁང་ལ་ཡོ་རོབ་རྒྱལ་སྤྱིའི་བོད་དོན་ལས་འགུལ་ཁང་གི་ངེས་སྟོན་པ་ཚེ་རིང་བྱམས་པ་ལགས་ཀྱིས་ Netherlands སྲིད་བློན་ Ruttem མཆོག་ནས་ངེས་པར་དུ་རྒྱ་གཞུང་གི་ངོས་ནས་༸གོང་ས་མཆོག་དང་ལྷན་དུ་གྲོས་མོལ་བྱེད་དགོས་པ་དང་། བོད་ཀྱི་རང་བྱུང་ཁོར་ཡུག་ལ་དོ་ཕོག་གཏང་རྒྱུ་མེད་སྐོར་ཐོག་ལ་སྐུལ་མ་གནང་དགོས་པ་མ་ཟད། བོད་ཀྱི་ས་ཁུལ་ཁག་ཏུ་ཆུ་མཛོད་གསར་རྒྱག་གི་ལས་གཞི་མཚམས་འཇོག་དགོས་པ་དང་། རྒྱ་ནག་གཞུང་ནས་བོད་ཀྱི་རང་བྱུང་ཁོར་ཡུག་གི་སྲིད་བྱུས་དང་འབྲེལ་བའི་འཆར་གཞི་དང་ལས་འགུལ་སྤེལ་བར་ས་གནས་བོད་རིགས་གཙོ་གྱུར་ས་གནས་ཁོར་ཡུག་ཚན་པའི་ཚོགས་མི་རྣམས་མཉམ་ཞུགས་གནང་འཇུག་དགོས་པ་སོགས་ངེས་པར་དུ་གླེང་སློང་གནང་་དགོས་པའི་དགོས་འདུན་ཁག་གཅིག་ཆེད་འདོན་གནང་འདུགརྩ་བའི་རྒྱ་ནག་གི་སྲིད་འཛིན་གཞོན་པ་ཟླ་ ༥ ཚེས་ ༢༦ ནས་ཉིན་གསུམ་གྱི་རིང་ Pakistan ཁུལ་དུ་འབྱོར་ཡོད་པ་དང་སྐབས་དེར་ཡུལ་དེའི་སྲིད་འཛིན་དང་སྲིད་བློན་གྱི་ལྷན་དུ་ཕྱོགས་གཉིས་ཀྱི་འབྲེལ་ལམ་སྐོར་གྲོས་བསྡུར་བྱས་ཡོད་པ་དང་། དེ་ནས་ཡོ་རོབ་ Netherlands ཁུལ་དུ་ཡུལ་དེའི་སྲིད་བློན་དང་ལྷན་དུ་ཚོང་འབྲེལ་སླད་གྲོས་བསྡུར་བྱས་ཡོད་པ་མ་ཟད་ཁ་སང་ཚེས་ ༣༠ ཉིན་ Germany ཁུལ་དུ་འབྱོར་ནས་ཕྱི་ཚེས་ ༢ གྱི་བར་དུ་འཇར་མ་ནིའི་དཔོན་རིགས་དང་ལྷན་དུ་ཕྱོགས་གཉིས་ཀྱི་འབྲེལ་ལམ་དང་ཚོང་འབྲེལ་སོགས་ཀྱི་སྐོར་ལ་གྲོས་བསྡུར་བྱ་རྒྱུ་ཡིན་པ་རེད།

རྒྱ་ནག་གིས་ཁོར་ཡུག་སྲུང་སྐྱོབ་དང་རྨ་འབྲུ་རྫ་གསུམ་གྱི་འགོ་ཁུངས་གཅེས་སྤྲོས་ཀྱི་འབོད་སྒྲའི་འོག་བོད་ཁུལ་དུ་ཞིང་འབྲོག་མང་ཚོགས་ཀྱི་ས་ཆ་བཙན་འའཕྲོག་གིས་ཞིང་གྲོང་དུ་སྡོད་ཁང་གནས་སྤོའི་སྲིད་བྱུས་སྤེལ་བཞིན་པ་ལྟར། འབའ་རྫོང་མགར་རྩེ་རྒྱལ་མོ་སྡེ་བར་སྲིད་གཞུང་གིས་སྲིད་བྱུས་དེ་ལག་བསྟར་བྱས་ནས་མང་ཚོགས་ལ་དཀའ་ངལ་མང་དག་ཅིག་འཕྲད་བཞིན་འདུག འབའ་རྫོང་མགར་རྩེ་རྒྱལ་མོ་རྫོང་གི་ཡུལ་མི་ཞིག་གིས་དེ་རིང་འདི་གར་ཡུལ་དངོས་ཀྱི་གནས་ཚུལ་ངོ་སྤྲོད་གནང་བར་ཕྱི་ལོ་ ༢༠༡༡ ལོ་ནས་བཟུང་རྒྱལ་ཁབ་ཀྱི་བཀས་བཀོད་ལྟར་འབྲོག་ཁུལ་གྱི་རྩྭ་ས་ཚང་མ་རིན་མེད་ཀྱིས་ལྕགས་ར་སྐོར་ཏེ་ཕྱུགས་ཟོག་འཚོ་སྐྱོང་ཉུང་འཕྲི་བྱེད་དགོས་པའི་སྲིད་བྱུས་གཏན་འབེབས་བྱས་པར་བརྟེན།  ཞིང་འབྲོག་མང་ཚོགས་མང་པོ་གྲོང་བརྡལ་དུ་གནས་སྤོར་བྱས་ཡོད་པ་དང་སྔོན་ཆད་རྩེད་དགའ་དང་འདུ་འཛི་ཆེ་བའི་འབྲོག་ཐང་དུ་ད་ལྟའི་ཆར་རྒན་རྒོན་འགའ་ལས་ལྷག་མེད་པར་མ་ཟད། འབྲོག་ཁུལ་གྱི་རིག་གཞུང་དང་སྔོན་ཆད་ཀྱི་འབྲེལ་འདྲིས་དེ་ཛ་དྲག་ཅན་དུ་གྱུར་ཡོད་པར་ངོ་སྤྲོད་གནང་སོང་།དེ་བཞིན་རྒྱ་ནག་གིས་འབྲོག་ཁུལ་གྱི་རྩ་སར་བདག་བཟུང་བྱས་ནས་མ་འོངས་པར་གཏེར་ཁ་སྔོག་འདོན་བྱེད་རྩིས་དང་འབྲོག་པ་མང་ཚོགས་ཀྱི་མི་རིགས་ཀྱི་བསམ་བློར་བསྒྱུར་བཅོས་གཏོང་རྒྱུའི་དམིགས་ཡུལ་ཡོད་པར་བརྗོད་དེ་རྩྭ་ས་སྲུང་སྐྱོབ་ཀྱི་སྲིད་བྱུས་རྒྱབ་ལ་རྣོ་ངར་ལྡན་པའི་རལ་གྲི་ཞིག་སྦས་ཡོད་པ་རེད་ཅེས་ངོ་སྤྲོད་གནང་ཡོད། རྩ་བའི་ཕྱི་ལོ་ ༢༠༠༣ ལོ་ནས་རྒྱ་ནག་གིས་བོད་ཁུལ་དུ་ཕྱུགས་སྐྱུར་རྩ་འདེབས་དང་འབྲོག་པ་གྲོང་བསྙེགས། དེ་བཞིན་ནུབ་རྒྱུད་གསར་གཏོད།  ཁོར་ཡུག་སྲུང་སྐྱོབ་སོགས་ཀྱི་འབོད་སྒྲའི་འོག་འབྲོག་པ་མང་ཚོགས་ཀྱི་སྲོལ་རྒྱུན་གྱི་འཚོ་བའི་ལམ་ལུགས་ལ་བསྒྱུར་བཅོས་བཏང་སྟེ་རི་ལུང་ནས་གྲོང་བརྡལ་དུ་གནས་སྤོར་བྱེད་དགོས་པའི་སྲིད་བྱུས་ཤིག་གཏན་འབེབས་ཀྱིས་ལག་བསྟར་བྱེད་བཞིན་ཡོད་སྟབས། བོད་ཁུལ་གྱི་ཆོས་དང་རིག་གཞུང་། ཡུལ་སྲོལ་གོམས་གཤིས་དང་བཅས་ལ་ཉམས་ཉེས་ཆེན་པོ་འབྱུང་བཞིན་པའི་སྣང་ཚུལ་ས་ཕྱོགས་གང་སར་འབྱུང་བཞིན་ཡོད་པ་རེད།གཞན་ཡང་བཞུགས་སྒར་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་བོད་གནས་ཉམས་ཞིབ་པ་པདྨ་རྒྱལ་ལགས་སུ་འབྲོག་རི་གནས་སྤོའི་སྲིད་བྱུས་འདི་དུས་ནམ་ཞིག་ལ་འགོ་ཚུགས་ཤིང་ཡུལ་དངོས་ཀྱི་ཞིང་འབྲོག་མི་མང་ལ་ཤན་ཤུགས་ཅི་ཞིག་སྤྲད་ཡོད་སྐོར་བཅར་འདྲི་ཞུས་པར་ཁོང་གིས་རྒྱ་ནག་གིས་དམིགས་འབེན་གཙོ་བོ་ནི་ཞིང་འབྲོག་མང་ཚོགས་གནས་སྤོར་དུ་བཅུག་ནས་ཐོན་ཁུངས་སྐྱེལ་འདྲེན་དང་ཆུ་གློག་འཛུགས་སྐྲུན་སོགས་ཀྱིས་མཚོན་པའི་རྒྱ་ནག་རང་གི་ཁེ་ཕན་འབའ་ཞིག་གི་ཆེད་དུ་བོད་ཁུལ་གྱི་སྙི་མོ་རྫོང་དང་ཅོ་ནེ་ཁུལ། དེ་བཞིན་འཇོ་མདའ་རྫོང་སོགས་སུ་འབྲོག་པ་གནས་སྤོར་གྱིས་མཚོན་པའི་ས་གནས་མང་དག་ཅིག་བཙན་དབང་གིས་གནས་སྤོར་བྱེད་དུ་བཅུག་ཡོད་སྟབས། ཞིང་འབྲོག་མི་མང་གི་མིག་སྔའི་འཚོ་གནས་ལ་དཀའ་ངལ་ཆེས་ཆེར་འཕྲད་བཞིན་ཡོད་པར་ངོ་སྤྲོད་གནང་ཡོད།

ཁ་སང་ཁེ་ན་ཌའི་གྲོས་ཚོགས་འཚོགས་བཞིན་པའི་དབུས་སུ་གྲོས་ཚོགས་ཀྱི་འཐུས་མི་སྐུ་ཞབས་ Randall Garrison ལགས་ཀྱིས་བོད་ནང་གི་འགྲོ་བ་མིའི་ཐོབ་ཐང་གི་གནས་བབས་དང་སྐད་ཡིག་རྡོག་རོལ་གྱི་གནད་དོན་གླེང་སློང་གནང་སྟེ་བོད་དོན་རྒྱབ་སྐྱོར་དགོས་པའི་ཞུ་སྐུལ་གནང་འདུགསྐུ་ཞབས་ Randall Garrison ལགས་ཀྱིས་རྒྱ་ན་གིས་སྔར་ལོ་ཡང་བོད་མིའི་འགྲོ་བ་མིའི་ཐོབ་ཐང་ལ་རྡོག་རོལ་ཤུགས་ཆེན་བཏང་ཡོད་པ་མ་ཟད། དོགས་སྲུང་གསང་མྱུལ་གྱི་དོ་དམ་ཤུགས་ཆེར་བྱས་ཏེ་བོད་མི་དག་གི་ཞི་བའི་ངོ་རྒོལ་ལ་འཇིགས་སྐུལ་དང་གང་བྱུང་འཛིན་བཟུང་བྱས་ཡོད་པའི་གནད་དོན་ལུང་འདྲེན་དང་སྦྲགས། ཉེ་ཆར་ཨ་རིའི་གཞུང་ཚབ་པ་བོད་དུ་ཆེད་ཕེབས་ཀྱིས་བོད་ནང་ཆོས་ལུགས་རང་དབང་ལ་རྡོག་རོལ་འགྲོ་བཞིན་པ་དང་། རྒྱལ་སྤྱིའི་ཕྱི་མི་བོད་ནང་འགྲོ་རྒྱུར་བཀག་འགོག་བྱེད་བཞིན་པའི་གནས་བབས་ཐེར་འདོན་གནང་བ་མ་ཟད། རྒྱ་ནག་གིས་གང་མགྱོགས་༸གོང་ས་མཆོག་དང་ལྷན་དུ་བོད་དོན་གྲོས་མོལ་བྱེད་དགོས་པའི་འབོད་སྐུལ་བྱས་ཡོད་པ་ལྟར། ཁ་ན་ཌའི་ངོས་ནས་ཀྱང་ཁོང་གི་འབོད་སྐུལ་ལྟར་རྒྱ་ནག་གིས་༸གོང་ས་མཆོག་དང་ལྷན་དུ་གྲོས་མོལ་བྱེད་རྒྱུར་རྒྱབ་སྐྱོར་གནང་དགོས་པའི་ཞུ་སྐུལ་གནང་འདུག ཁོང་གིས་གྲོས་ཚོགས་ཀྱི་ནང་བོད་དོན་གླེང་སློང་གནང་འཕྲལ་ཁེ་ན་ཌའི་བོད་དོན་རྒྱབ་སྐྱོར་ཚོགས་པའི་ངོས་ནས་ཁོང་གིས་བོད་དོན་གླེང་སློང་གནང་བ་ལུང་འདྲེན་གྱིས་ twitter དྲྭ་རྒྱ་བརྒྱུད་ནས་ཁོང་གིས་གྲོས་ཚོགས་སུ་བོད་དོན་གླེང་སློང་གནང་སྟེ་ཁ་ན་ཌའི་སྲིད་གཞུང་གིས་བོད་རྒྱ་ཞི་མོལ་ཡོང་བར་རྒྱབ་སྐྱོར་གནང་བར་ཐུགས་རྗེ་ཆེ་ཞུའི་འཚམས་འདྲི་གནང་འདུག

རྒྱ་ནག་གཞུང་གིས་ Henan ཞིང་ཆེནགྱི་ཁྱབ་ཁོངས་སུ་ཡོད་པའི་ནང་པའི་དགོན་པ་ཞིག་ཏུ་སྟོན་པའི་༸སྐུ་བརྙན་ཚབ་ཏུ་མའོ་ཙེ་ཏུང་གིས་གཙོས་པའི་དཔོན་རིགས་གཉིས་ཀྱི་སྣང་བརྙན་བཤམ་ནས་རྒྱ་ནག་གི་དཔོན་རིགས་ཚོས་དེར་ཕྱག་མཆོད་བྱེད་ཀྱི་ཡོད་སྐོར་གནས་ཚུལ་སྤེལ་འདུགBreitbart གསར་ཁང་གིས་ Bitter Winter ཞེས་པའི་ཆོས་དད་རང་དབང་འབྲེལ་བའི་དུས་དེབ་ཅིག་གིས་གནས་ཚུལ་སྤེལ་བ་ལུང་འདྲེན་གནང་བར་གཞིགས་ན། Henan ཞིང་ཆེན་གྱི་རྒྱལ་ས་ Ruzhou ནང་ལོ་རབས་མང་པོའི་སྔོན་ལ་སྒེར་གྱི་ཆེད་འཛུགས་བྱས་པའི་ནང་པའི་དགོན་པ་དེར་ད་ཆ་རྒྱ་ནག་གི་དྲག་པོའི་སྲིད་བྱུས་འོག་ཕྱག་མཆོད་བྱེད་སའི་ལྷ་ཁང་གི་ངོ་བོའི་ཕྱག་འཁྱེར་སྤྲད་མེད་རྐྱེན་དགོན་པའི་ངོས་ནས་སྟོན་པའི་༸སྐུ་བརྙན་དེ་མའོ་ཙེ་ཏུང་དང་འགོ་ཁྲིད་གཉིས་ཀྱི་སྣང་བརྙན་དང་བརྗེ་སྟབས། ས་གནས་གཞུང་ནས་དགོན་པ་དེར་ red patriotic education base འམ་དམར་པོའི་རྒྱལ་ཞེན་གྱི་སློབ་གསོ་ཁང་ཞེས་མིང་གནས་སྤྲད་དེ་དེར་རྒྱའི་དཔོན་རིགས་མང་པོས་མའོ་ལ་ཕྱག་མཆོད་བྱེད་དུ་ཡོང་གི་ཡོད་པར་བརྗོད་འདུགད་ལྟའི་ཆར་ཁང་ཐོག་གཉིས་ཅན་གྱི་དགོན་པ་དེའི་རྩེ་ཐོག་ཏུ་རྒྱ་ནག་གི་རྒྱལ་དར་གཅིག་དང་རྒྱལ་སྒོའི་གཡས་གཡོན་དུ་རྒྱལ་དར་རེ་རེ་མཐོང་རྒྱུ་ཡོད་པ་མ་ཟད། ཁང་ཐོག་གཉིས་པའི་དཀྱིལ་དུ་མའོ་འདྲ་གཟུགས་ཀྱི་སྣང་བརྙན་དང་། སྣང་བརྙན་དེའི་གཡོན་དུ་རྒྱ་ནག་དམར་ཤོག་ཚོགས་པའི་ཚོགས་གཙོ་ཟུར་པ་ Hua Guofeng གྱི་འདྲ་གཟུགས་ཀྱི་སྣང་བརྙན། དེ་བཞིན་གཡས་ཕྱོགས་སུ་རྒྱ་ནག་སྤྱི་མཐུན་རྒྱལ་ཁབ་ཆེད་འཛུགས་བྱེད་མཁན་ཁོངས་སུ་ཡོད་པ་ Dong Biwu གྱི་འདྲ་གཟུགས་ཀྱི་སྣང་བརྙན་སྒྲིག་གཤོམ་བྱས་ཡོད་པ་དང་ལྷ་ཁང་དེའི་གྱང་ངོས་སུ་བདེ་སྲུང་བློན་ཆེན་ཟུར་པ་དང་དམག་སྤྱི་ཁག་གཅིག་གི་འདྲ་པར་སོགས་ཀྱང་བཤམ་འདུགས་གནས་གྲོང་གསེབ་པ་ཞིག་གིས་སྤྱི་ཚོགས་དྲྭ་རྒྱའི་ཐོག་མའོ་ནི་མི་ཞིག་ཡིན་པའི་ཁར་དཀོན་མཆོག་ལ་དུས་ནམ་ཡང་ཁས་ལེན་མི་བྱེད་མཁན་ཞིག་ཡིན་པ་མ་ཟད། རིག་གནས་གསར་བརྗེའི་དུས་སུ་བྱས་པའི་ལས་ངན་དེ་དག་ནི་གདོན་འདྲེའི་བྱ་བ་དང་ཁྱད་མེད་ནའང་ད་ལྟ་གཞུང་འཛིན་མི་སྣ་ཚོས་ཁོ་པར་ཕྱག་མཆོད་བྱེད་བཞིན་པ་ནི་ཁྱད་མཚར་ཞིག་རེད་ཅེས་བརྗོད་འདུགརྩ་བའི་རྒྱ་གཞུང་གིས་ཡུལ་དེའི་ཆོས་ལུགས་རྣམས་རྒྱ་ནག་གི་ཁྱད་ཆོས་ལྡན་པའི་ཆོས་ལུགས་ཏུ་འགྱུར་རྒྱུའི་ཆ་ཤས་འོག་སྔ་ལོ་རྒྱ་ནག་གི་གྲགས་ཅན་ Shaolin temple ཞེས་པའི་ལྷ་ཁང་སྟེང་དུ་རྒྱ་ནག་གི་རྒྱལ་དར་སྒྲེང་འཛུགས་ཡོད་པ་དང་། དེ་ནི་ལྷ་ཁང་དེའི་སྟེང་རྒྱ་ནག་གི་རྒྱལ་དར་སྒྲེང་འཛུགས་བྱས་པ་དུས་རབས་ ༡༥ ནང་ཐེངས་དང་པོ་ཆགས་ཡོད་པ་མ་ཟད། སྐབས་དེར་ནང་པ་ཞིག་གིས་སྤྱི་ཚོགས་དྲྭ་རྒྱའི་ཐོག་ནང་ཆོས་ཞེས་པ་ནི་མིའི་བསམ་བློར་བསྒྱུར་བཅོས་གཏོང་རྒྱུའི་ལྟ་གྲུབ་ཅིག་ཡིན་སྟབས་ཆབ་སྲིད་དང་འབྲེལ་བ་གང་ཡང་མེད་པ་དང་། བྱེད་སྟངས་དེ་ནི་ཧ་ཅང་འོས་འཚམས་ཤིག་མ་ཡིན་པར་འགྲེལ་བརྗོད་གནང་ཡོད་པ་རེད།Breitbart གསར་ཁང་གིས་རྒྱ་ནག་དམར་ཤོག་ཚོགས་པའི་དཔོན་རིགས་གཙོས་ས་གནས་དཔོན་རིགས་ཚོས་ནང་པའི་ཆོས་དེ་ཚོང་འབྲེལ་སླད་དུ་སྤྱོད་བཞིན་ཡོད་པ་མ་ཟད། ལྷག་པར་དུ་བོད་ནང་གི་ཆོས་དད་གཙོས་བོད་བརྒྱུད་ནང་བསྟན་ལ་འཇིགས་སྐུལ་སྣ་ཚོགས་བྱེད་བཞིན་པ་དང་ཆབས་ཅིག བོད་བརྒྱུད་ནང་བསྟན་ཆོས་བརྒྱུད་ཀྱི་ཤུགས་རྐྱེན་མེད་པ་བཟོ་སླད་བོད་མི་རིགས་མཉམ་བསྲེས་ཀྱི་སྲིད་བྱུས་འོག་བོད་མིའི་ངོ་བོ་སྲུབ་ཐབས་བྱེད་ཀྱི་ཡོད་པར་བརྗོད་འདུགབོད་ཀྱི་རྩོམ་པ་པོ་ཚེ་རིང་འོད་ཟེར་ལགས་ཀྱིས་རང་ཉིད་ཀྱི་ངོ་དེབ་ཐོག་ཉེ་ལམ་ཕྱི་ཟླ་ ༥ ཚེས ༢༣ ཉིན་རྒྱ་ནག་ཤག་ཤིས་ཞིང་ཆེན་གྱི་ཁྱབ་ཁོངས་སུ་ཡོད་པའི་མི་རིགས་ཆོས་དོན་ལས་ཁུངས་ཀྱིས་བོད་བརྒྱུད་ནང་བསྟན་དེ་རྒྱ་ནག་གི་ས་ཁུལ་ཁག་ཏུ་དར་སྤེལ་གཏོང་ཕྱོགས་ཀྱི་ཐད་བྱེད་མི་ཆོག་པའི་ཁྲིམས་སྒྲིག་དོན་ཚན་ ༩ ཆེད་བཏོན་ཡོད་པ་གསལ་སྤེལ་བ་དང་འབྲེལ། སྤྱི་བསྒྲགས་ནང་བོད་བརྒྱུད་ནང་བསྟན་དེ་བཞིན་རྒྱ་ནག་གི་རྫོང་རིམ་དང་ཁུལ་རིམ་པ་སོགས་ཀྱི་ནང་དར་སྤེལ་གཏོང་ཕྱིར་ལས་འགུལ་གང་འདྲ་ཞིག་སྤེལ་གྱི་ཡོད་ན་མི་རིགས་ཆོས་དད་ལས་ཁུངས་སུ་ཆོག་ཆེན་མ་ཞུས་པར་བོད་བརྒྱུད་ནས་བསྟན་གྱི་བླ་མ་དང་ཆོས་དཔོན་ཚོས་དར་སྤེལ་གནང་མི་ཆོག་པའི་བཀའ་བརྒྱ་བཏང་ཡོད་པ་བཀོད་འདུག

པེ་ཅིང་དུ་ཡོད་པའི་ཨ་རིའི་གཞུང་ཚབ་པ་སྐུ་ཞབས་ Terry Branstad ལགས་ཟླ་བ་འདིའི་ཚེས་ ༡༩ ནས་བོད་རང་སྐྱོང་ལྗོངས་ཟེར་བ་དང་དེ་བཞིན་མཚོ་སྔོན་གཙོས་པའི་ས་ཁུལ་ཁག་གཅིག་ཏུ་གཞུང་འབྲེལ་འཚམས་གཟིགས་གནང་བཞིན་པ་དང་བསྟུན། ཨ་རིར་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གིས་སྐུ་ཞབས་ Branstad ལགས་ནས་བོད་ནང་གི་འཚམས་གཟིགས་དང་འབྲེལ་བའི་མྱོང་བ་རྣམས་རྒྱལ་སྤྱིའི་གསར་ཁང་ཁག་ལ་འཛེམས་ཟོན་མེད་པར་ཡོངས་བསྒྲགས་གསུངས་དགོས་པར་ཞུས་འདུག ཁ་སང་རྒྱལ་སྤྱིའི་བོད་དོན་ལས་འགུལ་ཁང་གིས་སྐུ་ཞབས་ Branstad ལགས་ནས་བོད་ནང་གི་འཚམས་གཟིགས་དང་འབྲེལ་སྤྱི་བསྒྲགས་ཤིག་སྤེལ་འདུག་པ་དང་། སྤྱི་བསྒྲགས་ནང་ད་རེས་ཨ་རིའི་གཞུང་ཚབ་པས་བོད་ནང་འཚམས་གཟིགས་གནང་བ་དེ་ནི་ཨ་རིའི་གཞུང་ནས་རྒྱའི་དབང་སྒྱུར་འོག་ལྷུང་བའི་བོད་མིར་རྒྱབ་སྐྱོར་ཡོད་པ་མཚོན་པ་དང་། ལྷག་པར་དུ་ཨ་རིའི་ཕྱི་སྲིད་ལས་ཁུངས་དང་གྲོས་ཚོགས་ཀྱི་ལས་དོན་ལ་གྲུབ་འབྲས་ངེས་ཅན་ཡོད་པ་ར་འཕྲོད་ཐུབ་སྐོར་གསུངས་འདུག རྩ་བའི་ཉེ་ལམ་ཨ་རི་ཕྱི་སྲིད་ལས་ཁུངས་ནས་བོད་ནང་འདྲ་མཉམ་གྱི་འགྲུལ་བསྐྱོད་ཆོག་པའི་ཐད་སྙན་ཐོ་འདོན་སྤེལ་གནང་བའི་ནང་ཕྱི་ལོ་ ༢༠༡༨ ལོར་ཨ་རིའི་གཞུང་ཚབ་པ་བོད་ནང་སྐྱོད་ཆོག་པར་ཆོག་མཆན་ཞུས་ཀྱང་རྒྱ་གཞུང་གིས་རྒྱུ་མཚན་གང་ཡང་མེད་པར་དེ་འབྲེལ་ཆོག་མཆན་སྤྲད་མེད་པ་དེ་ལྟར་ཡང་། འདས་ལོའི་ཟླ་མཇུག་ཏུ་བོད་ནང་འདྲ་མཉམ་གྱི་འགྲུལ་སྐྱོད་ཆོག་པའི་ཁྲིམས་གཞི་གཏན་འབེབས་གནང་རྗེས་སྐུ་ཞབས་ Branstadལགས་བོད་ནང་ཕེབས་ཆོག་པའི་ཆོག་མཆན་སྤྲད་ཡོད་པ་དང་།  ད་རེས་ཁོང་གི་འཚམས་གཟིགས་དེ་ནི་ཕྱི་ལོ་ ༢༠༡༥ རྗེས་སུ་ཨ་རི་གཞུང་ཚབ་པ་ཕེབས་པ་ཐོག་མ་དེ་ཆགས་ཀྱི་ཡོད་པ་རེད། འཚམས་གཟིགས་དེ་འབྲེལ་རྒྱལ་སྤྱིའི་བོད་དོན་ལས་འགུལ་ཁང་གིས་འདས་པའི་དུས་ཡུན་ནང་བོད་ནང་གི་བོད་མི་ནས་ཕྱི་མི་དང་ལྷན་དུ་བློ་ཁོག་ལྡན་པའི་སྒོ་ནས་རང་རང་སོ་སོའི་མྱོང་ཚོར་བཤད་སྐབས་རྒྱ་གཞུང་ནས་བོད་མི་དེ་རྣམས་ལ་བཙོན་འཇུག་དང་མི་སྤྱོད་ལས་འདས་པའི་ཉེས་རྡུང་བཏང་ཡོད་སྟབས། ད་རེས་རྒྱ་གཞུང་གིས་སྐུ་ཞབས་ Branstad ལགས་དང་བོད་མི་དབར་གུ་ཡངས་ཐོག་བཀའ་མོལ་ཡོང་བར་ཆེས་དམ་དྲག་བྱེད་སྲིད་པ་ང་ཚོར་ཤེས་རྟོགས་དང་སྒོས་རྒྱ་གཞུང་གིས་བཏང་འཛིན་འོག་ཡོད་པའི་རྒྱའི་གསར་ཁང་ནས་ཀྱང་ད་རེས་ཨ་རིའི་གཞུང་ཚབ་ཀྱི་འཚམས་གཟིགས་དེ་རྒྱལ་སྤྱིའི་སྡིངས་ཆའི་ཁྲོད་རྒྱ་གཞུང་ནས་ཨ་རིའི་སྲིད་དོན་པ་དང་། གསར་འགོད་པ། དེ་བཞིན་བོད་མི་ཨ་རིའི་མི་སེར་ཡིན་པ་རྣམས་བོད་ནང་འགྲོ་འོང་གི་ཆོག་མཆན་སྤྲད་ཀྱི་མེད་པའི་གནད་དོན་ཁྱབ་སྤེལ་ཤུགས་ཆེ་བྱུང་བ་དེར་གདོང་ལེན་གྱི་ཚུལ་དུ་གནས་ཚུལ་དྲིལ་བསྒྲགས་བྱ་ཕྱིར་ཡིན་སྟབས་སྐུ་ཞབས་  Branstad ལགས་ནས་འཚམས་གཟིགས་དེའི་ཁྲོད་དམ་དྲག་བྱས་པས་དེ་འབྲེལ་མྱོང་ཚོར་རྣམས་ཕྱིའི་གསར་ཁང་ཁག་ལ་འཛེམས་ཟོན་མེད་པར་ཡོངས་བསྒྲགས་གསུངས་དགོས་གལ་ཡིན་པ་དང་། ལྷག་པར་དུ་རྒྱ་ནག་གི་གཞུང་འབྲེལ་མི་སྣ་ནས་དེ་འབྲེལ་དམ་དྲག་ཨ་རིའི་ནང་མྱོང་དགོས་ཀྱི་མེད་པ་གསུངས་འདུག དེ་བཞིན་སྐུ་ཞབས་ Branstad ལགས་སུ་བོད་ནང་འཚམས་གཟིགས་སུ་ཕེབས་པ་དེར་ཐུགས་རྗེ་ཆེ་ཞུས་པ་དང་སྦྲགས།  རྒྱལ་སྤྱིའི་བོད་དོན་ལས་འགུལ་ཁང་ནས་ལོ་འདིའི་ཟླ་མཇུག་ཏུ་བོད་ནང་འདྲ་མཉམ་འགྲུལ་སྐྱོད་ཀྱི་ཁྲིམས་གཞི་དེ་ལག་ལེན་དུ་འཁྱོལ་ཐབས་ཀྱི་ལས་འགུལ་སྤེལ་རྒྱུ་དང་། ཁྲིམས་གཞི་དེ་བརྒྱུད་རྒྱ་གཞུང་ནས་ཨ་རིའི་མི་སེར་བོད་ནང་སྐྱོད་པར་དབྱེ་འབྱེད་ཀྱི་སྲིད་བྱུས་དེ་མཚམས་འཇོག་བྱེད་དགོས་པ་ཤེས་ཐབས་བཟོ་རྒྱུ་ཡིན་པར་གསུངས་འདུག རྩ་བའི་སྐུ་ཞབས་ Branstad ལགས་ཀྱི་འཚམས་གཟིགས་དེའི་ཁྲོད་གཞུང་འབྲེལ་ཚོགས་འདུ་དང་ཆོས་ཕྱོགས་ཀྱི་ས་གནས་དང་ཕ་མེས་ནས་བརྒྱུད་པའི་གཅེས་ནོར་ལ་གཟིགས་སྐོར། དེ་བཞིན་ས་གནས་འགོ་ཁྲིད་ཚོ་དང་མཇལ་འཕྲད་གནང་བས་ཨ་རིའི་ཕྱི་སྲིད་ལས་ཁུངས་ཀྱི་མགྲིན་ཚབ་པས་འཚམས་གཟིགས་དེ་ནི་རྒྱ་གཞུང་གིས་བོད་མིའི་སྐད་དང་རིག་གཞུང་།  ཆོས་ལུགས་རང་དབང་སོགས་ལ་ཡུན་རིང་ནས་དམ་དྲག་བྱས་པའི་གནད་དོན་རྣམས་གླེང་རྒྱུའི་གོ་སྐབས་བཟང་པོ་ཞིག་ཡིན་པར་གསུངས་འདུག ཡིན་ནའང་ཉེ་ལམ་རྒྱ་ནག་གི་ཕྱི་འབྲེལ་མགྲིན་ཚབ་པ་ Lu Kang ཡིས་སྐུ་ཞབས་ Branstad ལགས་ནས་ད་རེས་འཚམས་གཟིགས་དེའི་ཁྲོད་བོད་ཞི་བའི་བཅིངས་བཀྲོལ་བཏང་ནས་ལོ་ངོ་ ༦༠ འགྲོ་བའི་བོད་ནང་གི་བོད་མིའི་འཚོ་བ་དང་། དཔལ་འབྱོར། སྤྱི་ཚོགས་སོགས་འཕེལ་རྒྱས་འགྲོ་བ་གཟིགས་རྒྱུ་དང་། ལྷག་པར་དུ་ཨ་རིའི་གཞུང་ཚབ་ནས་བོད་མིའི་རིག་གཞུང་དང་ཆོས་ལུགས། ལོ་རྒྱུས་རང་བཞིན་ལྡན་པའི་ཕ་མེས་ནས་བརྒྱུད་པའི་གཅེས་ནོར་སོགས་ཀྱི་ཐད་འཁྱོག་བཤད་ཀྱི་སྐད་ཆ་ལ་ཤུགས་རྐྱེན་མ་ཐེབས་པར་བོད་ཀྱི་དངོས་ཡོད་གནས་སྟངས་ལ་སྡོམ་ཚིག་གནང་བའི་རེ་བ་ཡོད་ཅེས་བརྗོད་ཡོད་པ་རེད།

འདི་ལོ་ ༢༠༡༩ ཕྱི་ཟླ་ལྔ་པའི་ཚེས་ཤར་ནས་བཟུང་རྒྱ་ནག་གཞུང་གིས་བོད་ནང་མཚོ་སྔོན་ཞིང་ཆེན་མགོ་ལོག་རྫོང་ཁག་དྲུག་ནང་ནག་ཚོགས་གསང་སེལ་ཟེར་བའི་ལས་འགུལ་སྤེལ་ཡོད་པ་དང་ནག་ཚོགས་གཙང་སེལ་ཟེར་བའི་ལས་འགུལ་དེའི་འོག་ནས་བོད་མི་གང་བྱུང་འཛིན་བཟུང་བྱེད་བཞིན་ཡོད་པ་དང་། ཕྱི་ཟླ་ལྔ་པའི་ནང་ལས་འགུལ་འགོ་འཛུགས་ཀྱིས་ད་བར་དངོས་སུ་ཤེས་རྟོགས་བྱུང་བར་བོད་མི་ ༡༤ ཙམ་འཛིན་བཟུང་བྱས་ཡོད་པ་ལྟར། དེ་དག་ནི་མགོ་ལོག་དགའ་བདེ་ནས་མི་༧ དང་མགོ་ལོག་དར་ལག་ནས་མི་ ༧ བཅས་འཛིན་བཟུང་བྱས་ཡོད་པ་རེད་འདུག ལས་འགུལ་དེ་སྤེལ་བ་ནས་ཁྲོམ་གཞུང་དུ་ས་གནས་བོད་མི་ཕན་ཚུན་དབར་རྒྱུན་གཏན་བཞིན་བཀའ་མོལ་གནང་ཕད་ཀྱི་མེད་པར་འཇིགས་སྣང་འོག་གནས་མུས་རེད་འདུག ནག་ཚོགསགཙང་སེལ་ཞེས་པའི་ཉེས་ཁྲིམས་ནང་ཁྲིམས་དང་མི་མཐུན་པའི་ཤོ་སྦག་རྒྱག་པ་དང་། རྒྱན་འཛུགས་བྱེད་པ། ཚོགས་པ་བཙུགས་ནས་མང་ཚོགས་ཀྱི་ལག་ནས་དངུལ་ལེན་པ་སོགས་འཛིན་བཟུང་གིས་རྡུང་རྡེག་གཏང་རྒྱུ་ཡིན་འདུག་ཀྱང་། གཙོ་བོ་ནི་རྒྱལ་ཁབ་ལ་མི་དགའ་མཁན་དང་རྒྱལ་ཁབ་ལ་ཁ་གཏད་ཀྱིས་ཆབ་སྲིད་ལས་འགུལ་ནང་ཞུགས་མྱོང་མཁན་དང་དེ་བཞིན་གནད་དོན་དེ་དག་དང་འབྲེལ་ཡོད་དོགས་གཞི་ཡོད་པ་རྣམས་གཙོ་གནད་དུ་བཟུང་ནས་རྡུང་རྡེག་གཏོང་བཞིན་ཡོད་པ་རེད།མང་ཚོགས་ནང་མི་གྲངས་བཅུ་ཡན་གྱི་ཚོགས་པ་འཛུགས་དགོས་ན་ཐོག་མར་ས་གནས་ཡུལ་ཚོ་དང་རྫོང་བཅས་སོགས་སུ་སྙན་ཞུ་ཕུལ་ནས་ཐོ་འགོད་དང་ཆོག་མཆན་ཞུ་དགོས་པ་མ་ཟད། བརྡ་འཕྲིན་བརྒྱུད་ནས་ཐེ་ཝན། ཧོང་ཀོང་། བོད་དང་རྒྱ་ནག་གི་སྐོར་གྱི་ཆབ་སྲིད་དང་འབྲེལ་བའི་གནས་ཚུལ་རིགས་སྐུར་མི་ཆོག་པ། ད་དུང་ཨ་རི་དང་ནུབ་ཕྱོགས་རྒྱལ་ཁབ་ནས་ཡོང་བའི་མི་ལ་བཀའ་མོལ་གནང་མི་ཆོག་པ། ཁོང་ཚོའི་དྲི་བར་ལན་འདེབས་གནང་མི་ཆོག་པ་སོགས་ཀྱི་བརྒྱུད་བསྒྲགས་ཀྱང་བྱེད་བཞིན་ཡོད་པ་རེད། སྤྱིར་ནག་ཚོགས་གཙང་སེལ་ཞེས་པའི་ལས་འགུལ་དེ་ནི་ཕྱི་ལོ་ ༢༠༡༨ ཕྱི་ཟླ་དང་པོར་རྒྱ་ནག་གི་རྒྱལ་ས་པེ་ཅིང་གྲོང་ཁྱེར་དུ་རྒྱ་ནག་དམར་ཤོག་ཚོགས་པའི་སྒྲིག་ཁྲིམས་ཞིབ་བཤེར་ཁང་གི་མགོ་ཁྲིད་ཚོགས་འདུ་ཚོགས་ཏེ་ཞི་ཅིན་ཕིང་གི་གཙང་སེལ་ལས་འགུལ་གཞི་རྩར་བཟུང་ནས་ ༢༠༡༨ ལོ་ནས་ཕྱི་ལོ་ ༢༠༢༡ བར་སྤྱི་ཚོགས་ཁྲོད་ཀྱི་ནག་ཚོགས་གཙང་སེལ་དགོས་སྐོར་གྱི་དོན་ཚན་བཞི་ཅན་གྱི་བསྒྲགས་གཏམ་ཞིག་སྤེལ་ཡོད་པ་མ་ཟད། ནག་ཚོགས་འབུར་འཇོམ་གྱི་ལས་འགུལ་དེར་ས་གནས་སོ་སོ་ནས་དོ་ནན་ལག་བསྟར་དགོས་པའི་བཀོད་ཁྱབ་བཏང་ཡོད་སྟབས། ལོ་དེའི་ཕྱི་ཟླ་གཉིས་པ་ཚེས་ཤར་ནས་བཟུང་ལས་འགུལ་དེ་རྒྱ་ནག་གི་གྲོང་ཁྱེར་ཁག་དང་ལྷག་པར་དུ་བོད་ཀྱིས་གཙོས་པའི་གྲངས་ཉུང་མི་རིགས་ས་ཁུལ་དུ་ཤུགས་ཆེར་སྤེལ་བཞིན་ཡོད་པ་རེད། ཕྱི་ལོ་ ༢༠༡༨ ནས་བཟུང་བོད་ཀྱི་རྒྱལ་ས་ལྷ་ས་གཙོ་གྱུར་མཚོ་སྔོན་དང་སི་ཁྲོན། ཡུན་ནན་སོགས་བོད་རིགས་གནས་སྡོད་ས་ཁུལ་ཡོངས་སུ་ལས་འགུལ་དེ་སྤེལ་སྤེལ་མུས་ཡིན་པ་མ་ཟད་ལྷ་སའི་ནག་ཚོགས་འབུར་འཇོམས་གསལ་བསྒྲགས་ནང་ནག་ཚོགས་ཀྱི་དམིགས་གཏད་གཙོ་བོ་དེ་ཏཱ་ལའི་ཁ་བྲལ་ཤོག་ཁག་དང་ཏཱ་ལའི་དབུ་མའི་ལམ་ལ་རྒྱབ་སྐྱོར་བྱེད་མཁན། དེ་བཞིན་སྐད་ཡིག་དང་ཁོར་ཡུག་སྲུང་སྐྱོབ་ཀྱི་མིང་བྱང་འོག་ནས་ལས་འགུལ་སྤེལ་མཁན་རིགས་ལ་དམིགས་པ་ཡིན་སྐོར་བརྗོད་འདུག