Tibetan Royal Year of 2151 | Year of the Wood Dragon

བོད།

རྒྱ་གཞུང་གིས་དམ་དྲག་འོག་ཁུལ་དེའི་མི་མང་ནས་རང་གིས་རང་ལ་དམ་དྲག་གི་གནས་སྟངས་བཟོ་བཞིན་འདུག

རྒྱ་གཞུང་གིས་རྒྱལ་ཁབ་ཀྱི་ཚོར་བ་རྣོ་བའི་གནས་ཚུལ་ཕྱིར་བསྒྲགས་བྱེད་མཁན་ཚོ་གང་བྱུང་འཛིན་བཟུང་གིས་མང་ཚོགས་ཐོག་ཚོད་འཛིན་བྱེད་བཞིན་ཡོད་སྟབས། ད་ཆ་གནད་དོན་དེས་བོད་མི་དང་ཡུ་གུར་མི་རིགས་རྣམས་ནས་རང་གིསརང་ལ་དམ་དྲག་བྱས་ཏེ་རྒྱ་གཞུང་གི་གདུག་རྩུབ་ལས་གཡོལ་ཐབས་གནང་པ་མངོན་གསལ་གནང་འདུག དེ་ཡང་ Daily Dot ཞེས་པའི་གསར་ཁང་ཐོག་དཔྱད་རྩོམ་ཞིག་སྤེལ་བར་གཞིགས་ན། གསར་ཁང་དེའི་གསར་འགོད་པ་སྐུ་ཞབས་ Nithin Coca ལགས་ཀྱིས་དེང་དུས་ཁ་པར་དང་སྤྱི་ཚོགས་བརྒྱུད་ལམ་ཁག་སྤྱོད་ཤུགས་ཆེན་པོ་བྱེད་བཞིན་པའི་དུས་སྐབས་འདིར་བཟང་ངན་གྱི་གནས་ཚུལ་གང་ཞིག་འཛམ་གླིང་སྤྱི་ལ་ཁྱབ་མྱུར་ཆེ་བའི་ཁྲོད། འདི་ལོ་ཕྱི་ཟླ་ ༣ ནང་ཕྲུ་གུ་ལྔ་ཅན་གྱི་མ་བསོད་ནམས་འཚོ་ལགས་ཀྱིས་རྒྱ་གཞུང་ལ་ངོ་རྒོལ་གྱིས་བོད་མདོ་སྨད་རྔ་བ་ཁུལ་མཛོད་དགེ་རྫོང་དུ་རང་ལུས་མེར་སྲེག་བཏང་ཡོད་ཀྱང་། རྒྱ་གཞུང་གིས་ཆེས་དམ་དྲག་གནས་སྟངས་འོག་གནས་ཚུལ་དེ་འདི་ལོའི་ཕྱི་ཟླ་ ༥ ནང་གཞི་ནས་གཞི་རིམ་མང་ཚོགས་ཀྱིས་ཤེས་རྟོགས་བྱུང་ཡོད་པ་ལུང་འདྲེན་དང་འབྲེལ། གནས་སྟངས་དེ་འདྲ་བྱུང་དོན་གང་ཡིན་གྱི་གནད་དོན་ཁག་ཅིག་གླེང་འདུག ད་དུང་དཔྱད་རྩོམ་དེའི་ནང་རྒྱལ་སྤྱིའི་གསར་འགོད་པ་སྲུང་སྐྱོབ་ཚོགས་པའི་བྱང་ཤར་ཨེ་ཤེ་ཡ་སྡེ་ཚན་གྱི་གསར་འགོད་པ་ Yaqiu Wang ལགས་ཀྱིས་ཆབ་སྲིད་ཚོགས་པ་གཅིག་ལས་གྲུབ་པའི་རྒྱ་ནག་གི་དབང་ཆ་གཅིག་བསྡུས་རིང་ལུགས་ཀྱི་གཞུང་དེ་གནསཚུལ་སྟངས་འཛིན་བྱ་རྒྱུ་ཐད་ཤུགས་ཆེ་བརྟེན་གྱི་ཡོད་པ་པ་དང་། རྒྱ་གཞུང་ནས་ཁུལ་དེའི་ནང་གི་མི་མང་གཙོས་རྒྱ་ནག་ཕྱི་ལ་གནས་པའི་མང་ཚོགས་ཁྲོད་བོད་དང་ཤིན་ཅང་གཉིས་ནང་ད་བར་ཐབས་སྡུག་གི་གནས་ཚུལ་བྱུང་དང་བྱུང་བཞིན་པ་ཁག་ཤེས་རྟོགས་བྱུང་བཅུག་འདོད་མེད་སྐོར་བརྗོད་འདུག གསར་འགོད་པ་ Nithin Coca ལགས་ཀྱིས་ད་ཆ་དེང་དུས་འཕྲུལ་ལས་ཀྱི་རྐྱེན་པས་ཕྱོགས་གཅིག་ནས་འཛམ་གླིང་མི་ཕན་ཚུན་དབར་འབྲེལ་ལམ་སྟབས་བདེ་ཆགས་ཡོད་ཀྱང་། ཕྱོགས་གཞན་ཞིག་ལ་རྒྱལ་ཁབ་ཁག་གི་སྲིད་གཞུང་ནས་རང་ཉིད་ཀྱི་ཚོར་བ་རྣོན་བའི་གསང་བའི་གནས་ཚུལ་རྣམས་རྒྱལ་ཁབ་ཕྱི་ལ་ཁྱབ་རྒྱུ་བཀག་སྡོམ་བྱ་རྒྱུའི་ནུས་པ་དེ་ཆེ་རུ་བཏང་ཡོད་པ་དང་། ལྷག་དོན་རྒྱ་ནག་གི་དབང་བསྒྱུར་འོག་ཡོད་པའི་བོད་དང་ཤིན་ཅང་གི་ས་གནས་གཉིས་ནང་གནད་དོན་དེ་མངོན་སུམ་མཐོང་རྒྱུ་ཡོད་པ་རེད། སྤྱིར་གསར་འགོད་པ་དང་ལས་འགུལ་བ་རྣམས་ནས་སྤྱི་ཚོགས་འབྲེལ་མཐུད་ཀྱི་དྲ་བ་འཕྲུལ་བྱ་ Twiiter དང་ངོ་དེབ། Snapchat སོགས་བེད་སྤྱོད་བརྒྱུད་འཛམ་གླིང་ནང་གང་བྱུང་བཞིན་ཡོད་པའི་གནས་ཚུལ་ཁག་རྒྱུས་ལོན་གནང་གི་ཡོད་ཀྱང་། བརྒྱུད་ལམ་དེ་དག་བོད་དང་ཤིན་ཅང་ནང་རང་དབང་ལྡན་པའི་སྒོ་ནས་སྤྱོད་ཐུབ་ཀྱི་མེད་སྟབས། ས་གནས་དེ་དག་ནས་བདེན་དཔང་ར་སྤྲོད་ཀྱི་གནས་ཚུལ་མཁོ་སྒྲུབ་བྱ་རྒྱུ་དཀའ་རུ་འགྲོ་བཞིན་ཡོད་པ་དང་། ཁྱད་པར་དུ་རྒྱ་ནག་གཞུང་གིས་དམ་དྲག་དང་ས་ཁུལ་དེའི་ནང་རྒྱ་ནག་གི་དྲག་གནོན་ལ་ཞེད་སྣང་འོག་རང་གིས་རང་ལ་དམ་དྲག་ཚོད་འཛིན་བྱས་པ་ར་སྤྲོད་གནང་འདུག དཔྱད་རྩོམ་དེའི་ནང་ཕྱི་རྒྱལ་གསར་འགོད་པ་ཁག་ཅིག་གིས་དཔྱད་ཞིབ་བྱས་པའི་གྲུབ་འབྲས་ནང་དོན་ལ་གཞིགས་ན། མང་ཚོགས་ནས་གསར་འགོད་པར་བཀའ་མོལ་གནང་བ་ཙམ་གྱིས་དོ་བདག་དེར་རྒྱ་གཞུང་གིས་བརྙས་བཅོས་དང་བཀག་སྐྱིལ། ཡང་ན་འདྲི་རྩད་དང་ཉེས་ཆད་སྐྱེལ་གྱི་ཡོད་པ་དང་། དེའི་ཁྲོད་སྔ་ལོ་བོད་མི་བཀྲིས་དབང་ཕྱུག་ལགས་ཀྱིས་ཨ་རིའི་ནིའུ་ཡོག་དུས་བབ་ཀྱི་གསར་ཤོག་ཐོག་བོད་ཀྱི་སྐད་ཡིག་སྲུང་སྐྱོབ་ཀྱི་རྩོམ་ཡིག་ཞིག་སྤེལ་བའི་རྗེས་སུ། རྒྱ་གཞུང་གིས་ཁོང་ལ་ཁ་བྲལ་གྱི་ལས་འགུལ་སྤེལ་བའི་ཉེས་མིང་འོག་འཛིན་བཟུང་བཀར་ཉར་བྱས་ཡོད་པ་སོགས་ཐེར་བཏོན་གནང་པ་དང་ཆབས་ཅིག རྒྱ་ནག་ནང་གནས་ཚུལ་དེ་རིགས་ནམ་བྱུང་ཚེ་རྒྱལ་ཁབ་དེའི་ནང་གི་དྲ་རྒྱ་དང་ཁ་པར་གྱི་འབྲེལ་མཐུད་ཡོངས་རྫོགས་བཙན་དབང་གིས་སྒོ་རྒྱག་བཅུག་གི་ཡོད་སྐོར་སོགས་འཁོད་འདུག དེ་བཞིན་ Citizen Lab ཞེས་པའི་དྲ་རྒྱའི་བེད་འཇགས་སྲུང་སྐྱོབ་དང་འབྲེལ་བའི་ཚོགས་པའི་ཉམས་ཞིབ་པ་ Masashi Nishihata ལགས་ཀྱིས་རྒྱ་ནག་གིས་མཉན་ཆས་དང་སྤྱི་ཚོགས་འབྲེལ་མཐུད་ཀྱི་བརྒྱུད་ལམ་ནས་གཙོ་བོ་བོད་དོན་དང་འབྲེལ་བའི་གནས་ཚུལ་ཁག་ལ་གསང་ཞིབ་མྱུལ་ལྟ་བྱས་པ་མ་ཟད། རྒྱ་གཞུང་གིས་བཟོས་པའི་མཉན་ཆས་སྐད་འཕྲིན་འམ་ We Chat ལ་སོགས་པ་རྣམས་རྒྱ་ནག་གཞུང་གི་ཁྲིམས་ལྟར་འགྲོ་དགོས་ཀྱི་ཡོད་པ་བཟོས་པ་དང་། དེ་སྔ་མཉན་ཆས་དེ་བེད་སྤྱོད་བྱས་པའི་བོད་མི་ཁག་ཅིག་འཛིན་བཟུང་བྱས་པའི་གནས་ཚུལ་ཐོན་པ་ལུང་འདྲེན་གནང་འདུག ད་དུང་རྒྱ་གཞུང་གི་ཐབས་བྱུས་ལ་རྟོག་ཞིབ་བྱེད་མཁན་དྲ་རྒྱའི་བདེ་འཇགས་གི་མཁས་ལས་པ་སྐུ་ཞབས་ Greg Walton ལགས་ཀྱིས་གཞི་རིམ་ཚོགས་པ་ཁག་དང་ལྷག་པར་དུ་ཨ་རིའི་གཞུང་གིས་རྒྱབ་སྐྱོར་ཡོད་པའི་ཚོགས་པ་རྣམས་ནས་རྒྱ་ནག་ནང་གི་དྲ་རྒྱའི་རང་དབང་སྲུང་སྐྱོབ་དང་རྒྱལ་ཁབ་དེའི་ནང་གི་གནས་ཚུལ་རྒྱུས་ལོན་ཆེད་སྐུ་ལས་ཚད་མེད་སྐྱོན་བཞིན་ཡོད་ཀྱང་། རྒྱ་གཞུང་གིས་དེ་ལས་ལྡོག་ཏེ་ལྡབ་འགྱུར་གྱིས་མང་ཚོགས་དང་དཔལ་འབྱོར་སོགས་སྤྱོད་པའི་བརྒྱུད་ཁུལ་དེའི་མི་མང་ཐོག་སྟངས་འཛིན་དང་གསང་ཞིབ་མྱུལ་ལྟ་ཤུགས་ཆེ་བྱེད་བཞིན་ཡོད་པར་སྐྱོན་བརྗོད་བྱས་འདུག དེ་བཞིན་ Fordham གཙུག་ལག་སློབ་གཉེར་ཁང་གི་སློབ་དཔོན་ Carl Midner ལགས་ཀྱིས་ཀྱང་རྒྱ་གཞུང་གིས་ཁུལ་དེའི་མི་མང་ཐོག་ཚོད་འཛིན་བྱས་པ་དང་། རྒྱལ་ཁབ་ཀྱི་ཚོར་བ་རྣོ་བའི་གནས་ཚུལ་ཕྱིར་བསྒྲགས་བྱེད་མཁན་ཚོར་གང་བྱུང་འཛིན་བཟུང་གིས་བཙོན་འཇུག་བྱས་ཡོད་པ་རེད། ད་ཆ་བོད་མི་དང་ཡུ་གུར་མི་རིགས་ནས་རང་གིས་རང་ལ་དམ་དྲག་བྱས་ཏེ་རྒྱ་གཞུང་གི་གདུག་རྩུབ་ལས་གཡོལ་ཐབས་གནང་བཞིན་ཡོད་པར་འགྲེལ་བརྗོད་གནང་པ་དང་། གནད་དོན་དེ་ནི་སེམས་འཚབ་བྱ་དགོས་པ་ཞིག་དང་། ཐབས་བྱུས་དེ་ད་ཆ་རྒྱ་གཞུང་གིས་ཁུལ་དེའི་གྲངས་ཉུང་མི་རིགས་ལས་བོད་རིགས་ཐོག་དྲག་གནོན་བྱ་རྒྱུའི་ལམ་ལུགས་ཁྲོད་ལག་ཆ་གཙོ་བོ་ཞིག་ཡིན་པ་མ་ཟད། དེ་ནི་དེང་དུས་འཕྲུལ་ཆས་བཀག་སྡོམ་ལས་ཉེན་ཁ་ཆེ་བ་ཆགས་ཀྱི་ཡོད་ཅེས་གསུངས་འདུག ད་ཆ་བོད་དང་ཤིན་ཅང་ནང་རྒྱ་གཞུང་གིས་དྲག་གནོན་ཚབས་ཆེ་བྱེད་བཞིན་པའི་སྲིད་བྱུས་དེ་རིམ་པའི་རྒྱ་ནག་རྒྱལ་ཡོངས་སུ་ལག་བསྟར་བྱེད་འགོ་འཛུགས་བཞིན་ཡོད་པ་དང་། ད་ལྟའི་དམ་དྲག་གི་གནས་སྟངས་དེའི་འོག་མ་འོངས་པར་བོད་ནང་ཞི་བའི་ངོ་རྒོལ་ལས་འགུལ་སྤེལ་བ་དང་ཡང་ན་རང་ལུས་མེར་སྲེག་གི་དོན་རྐྱེན་ལ་སོགས་པ་བྱུང་ཚེ། གནས་ཚུལ་དེ་རྒྱལ་སྤྱིའི་མང་ཚོགས་ཁྲོད་བསླེབ་པར་དུས་ཚོད་རིང་པོ་འགོར་ངེས་ཡིན་པ་དང་། ཡང་ན་གནས་ཚུལ་དེ་ནམ་ཡང་ཕྱིར་ཐོན་ཐུབ་ཀྱི་མ་རེད་ཅེས་མངོན་གསལ་གནང་འདུག

དགེ་འདུན་པ་ཚོར་གྱོད་དཔེ་ཀློག་དེབ་གཟབ་སྦྱོང་གྱིས་ཤིག་ཅེས་བཙན་བཀའ་བཏང་པ།

དེའང་ཟླ་བ་གོང་མའི་ནང་རྔ་བ་རྫོང་གི་འབྲེལ་ཡོད་ལས་བྱེད་པས་རྔ་བ་ཀིརྟིའི་དགོན་གྱི་གྲྭ་ཤག་རེ་རེ་བཞིན་དུ་དགོན་པའི་གྱོད་དཔེ་ཀློག་དེབ་ཟེར་བའི་དེབ་ཆུང་ཞིག་སྤྲད་དེ་དགེ་འདུན་པ་ཚོས་དེར་སློབ་སྦྱོང་གཟབ་ནན་བྱེད་དགོས་པའི་བཙན་བཀའ་བཏང་འདུག རྒྱ་གཞུང་གིས་བཙན་བཤད་ཀྱིས་འདི་ལོའི་ཟླ་ ༧ ཚེས་ ༢༨ ཉིན་ཆེད་སྤྲད་བྱས་པའི་དགོན་པའི་གྱོད་དཔེ་ཀློག་དེབ་དེའི་ནང་དུ་གཞིས་བཞུགས་བོད་མི་ཚོས་རང་ལུས་མེར་སྲེག་གིས་ཞི་རྒོལ་སྐད་འབོད་གནང་པ་དང་། ལྷག་དོན་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུ་པར་མཁའ་དབྱིངས་སུ་འཕྱར་ནས་ཞི་བའི་གོམ་བགྲོད་གནང་བ་སོགས་སྤྱི་ཚོགས་ཀྱི་བདེ་འཇགས་ལ་གནོད་འཚེ་བཟོས་པའི་ཁྲིམས་འགལ་ཡིན་པས་དེ་དག་ལ་ཉེས་ཆད་གཅོད་དགོས་པ་དང་། དེ་བཞིན་སྐད་འཕྲིན་གཙོས་སྤྱི་ཚོགས་ཀྱི་བརྒྱུད་ལམ་ཁག་སྤྱོད་དེ་ཕྱི་ཕྱོགས་ལ་ས་གནས་ཀྱི་གནས་ཚུལ་སྐུར་བ་སོགས་རྒྱལ་ཁབ་ཀྱི་གསང་དོན་ཕྱི་ལ་བསྒྲགས་པའི་ཁྲིམས་འགལ་གྱི་ཉེས་ཆད་གཅོད་རྒྱུ་སོགས་དོན་ཚན་ལྔ་ཅན་འཁོད་པའི་བོད་རྒྱ་གཉིས་ཀྱི་ཡིག་རིགས་ཡོད་པ་ཞིག་ཆེད་སྤྲད་ཀྱིས་དགེ་འདུན་པ་ཚོས་དེར་སློབ་སྦྱོང་གཟབ་ནན་བྱེད་དགོས་པའི་བཙན་བཀའ་བཏང་ཡོད་པ་རེད། འདི་ག་རླུང་འཕྲིན་ཁང་ལ་བོད་གནས་མཁོ་སྤྲོད་པ་ཀིརྟི་དགོན་པའི་གྲྭ་བློ་བཟང་ཡེ་ཤེས་ལགས་ཀྱིས་འདི་ལོའི་ཟླ་བ་ ༧ ཚེས་ ༢༨ ཉིན་རྒྱ་གཞུང་གིས་རྔ་བ་རྫོང་གི་དགོན་པ་ཁག་ ༤༠ ལྷག་གི་འཐུས་མི་ཆེད་སྐོང་ཐོག་ཚོགས་འདུ་ཚོགས་ཤིང་བཅའ་ཁྲིམས་དགོན་པར་བསྐྱལ་བའི་ལས་དོན་དེ་ལེགས་གྲུབ་བྱུང་སོང་ཅེས་རྔ་བའི་གསར་འགྱུར་བརྒྱུད་ལམ་ཐོག་སྤྱི་བསྒྲགས་བྱས་ཡོད་པ་གསུངས་སོང་།    ད་དུང་ཁོང་གིས་བོད་ནང་བོད་མི་ཚོས་རྒྱ་གཞུང་གིས་བོད་ཐོག་ལ་གདུག་རྩུབ་ཆེ་བའི་བྱ་སྤྱོད་སྤེལ་བར་མ་བཟོད་ནས་དེ་འབྲེལ་ཞི་རྒོལ་སྐད་འབོད་གནང་པ་མཚོན་ལས་འགུལ་ཕྲན་བུ་སྤེལ་བར་ཆེས་གདུག་རྩུབ་ཅན་གྱི་སྲིད་བྱུས་ལག་བསྟར་གྱིས་དྲག་གནོན་བྱས་དང་བྱེད་བཞིན་པ་མ་ཟད། རྒྱ་གཞུང་རང་གིས་བོད་ཐོག་སྤེལ་བའི་ཁྲིམས་འགལ་གྱི་ལས་རིགས་གང་སྤེལ་ཡང་དེ་དག་ཐམས་ཅད་ཁྲིམས་མཐུན་ལུགས་ཡིན་སྐོར་བཤད་ཀྱི་ཡོད་པ་གསུངས་སོང་། དེ་བཞིན་རྒྱ་གཞུང་གིས་བོད་མི་ཚོས་རང་ལུས་མེར་སྲེག་དང་ཞི་བའི་གོམ་བགྲོད་སོགས་ཀྱི་ལས་འགུལ་སྣ་མང་སྤེལ་བར་བརྟེན་རྒྱལ་གཅེས་པ་དེ་དག་གི་ནང་མི་ཉེ་འབྲེལ་གཙོས་དགེ་རྒན་སོགས་ལ་ཉེས་ཆད་བཏང་ཡོད་པ་རེད་ལ། དེ་སྔོན་རྒྱལ་གཅེས་པ་ཀིརྟི་དགོན་གྱི་གྲྭ་བློ་བཟང་ཕུན་ཚོགས་ཀྱི་ཨ་ཁུ་དང་ཤག་གི་དགེ་རྒན་ཡིན་པའི་དགེ་འདུན་པ་བློ་བཟང་བརྩོན་འགྲུས་ལགས་ལ་གྲྭ་བློ་བཟང་ཕུན་ཚོགས་ལགས་བཀྲོངས་པའི་ཉེས་མིང་འོག་ལོ་ ༡༡ རིང་བཙོན་འཇུག་ཁྲིམས་ཐག་བཅད་ཡོད་པ་དང་། དེ་བཞིན་ ༢༠༡༣ ལོར་ཀིརྟི་དགོན་པའི་གྲྭ་བློ་བཟང་དཀོན་མཆོག་གིས་རང་ལུས་མེར་སྲེག་ལ་བརྒྱུད་སྐུལ་བྱས་པའི་ཉེས་མིང་འོག་བཙོན་འཇུག་ལོ་ ༢ ནར་འགྱང་གིས་སྲོག་ཐོག་གི་ཁྲིམས་ཆད་བཅད་ཡོད་ཀྱང་ད་ལྟའི་ཆར་ཁོང་གི་གནས་སྟངས་ཇི་ཆགས་ཤེས་རྟོགས་ཐུབ་ཀྱི་མེད་པ་རེད། གཞན་ཡང་མཛོད་དགེ་རྫོང་ནས་དཀོན་མཆོག་དབང་མོས་རང་ལུས་མེར་སྲེག་གནང་བ་དེ་ཁོ་མོ་རང་གི་ཟླ་བོ་སྒྲོལ་མ་སྐྱབས་ལ་བཟའ་ཟླ་བཀྲོངས་པའི་ཉེས་མིང་གཡོག་ནས་སྲོག་ཐོག་གི་ཉེས་ཆད་བཅད་པ་སོགས་རང་ལུས་མེར་སྲེག་གཏོང་མཁན་རྣམས་ཀྱི་ཤུལ་ལུས་ནང་མི་འབྲེལ་སྤུན་མཆེད་སོགས་ལ་མི་སྤྱོད་ལས་འདས་པའི་མནར་གཅོད་བཏང་ཡོད་པ་རེད། རྩ་བའི་ཐེངས་འདིའི་དེབ་དེ་དགོན་པའི་གྲྭ་ཤག་རེ་རེ་བཞིན་ཆེད་སྤྲད་བྱེད་དོན་ནི་མ་འོངས་པར་དགོན་ཁག་གི་དགེ་འདུན་པ་ཚོས་ལས་འགུལ་དེ་རིགས་སྤེལ་ཚེ་ཁྲིམས་ཐག་ནན་པོ་གཅོད་རྒྱུ་ཡིན་པའི་དཔང་ཡིག་ལྟ་བུ་ཞིག་ཡིན་པ་རེད་འདུག

རྒྱལ་ཁབ་ཀྱི་གསང་བ་ཕྱིར་བསྒྲགས་ཉེས་མིང་འོག་ལོ་ ༨ རིང་བཙོན་འཇུག་བྱས་པའི་སངས་དགའ་ལགས་གློད་གྲོལ་བཏང་པ།

རྒྱ་གཞུང་གིས་བོད་མི་ཆབ་སྲིད་བཙོན་ཟུར་སངས་དགའ་ལགས་ལ་རྒྱལ་ཁབ་ཀྱི་གསང་བ་ཕྱིར་བསྒྲགས་ཉེས་མིང་འོག་ལོ་བརྒྱད་རིང་བཙོན་འཇུག་ཁྲིམས་ཆད་ཚང་ནས་ཟླ་འདིའི་ཚེས་ ༡༢ ཉིན་གློག་གྲོལ་བཏང་འདུག འདི་ག་རླུང་འཕྲིན་ཁང་དུ་ཁུངས་ལྡན་གནས་ཚུལ་ངོ་སྤྲོད་གནང་དོན་ལ། རྡ་ས་བཅར་བཞུགས་མདོ་སྨད་ཆོལ་ཁའི་ཚོགས་གཞོན་རྔ་བ་ཆོས་འཛིན་ལགས་ཀྱིས་ཆབ་སྲིད་བཙོན་ཟུར་སངས་དགའ་ལགས་ཟླ་འདིའི་ཚེས་ ༡༢ ཉིན་བོད་ནང་གི་ཞོགས་པའི་ཚོུད་ ༧།༠༠ ཐོག་ཁྲིའུ་ཏུའུ་མེན་ཡཱང་བཙོན་ཁང་ནས་གསང་སྟབས་ཀྱིས་བཙོན་གྲོལ་བཏང་ཡོད་པ་དང་། དེ་རྗེས་ཕྱི་ཚེས་ ༡༣ ཉིན་རྔ་བ་ས་གནས་བོད་མི་མང་ཚོགས་ཚོས་དགའ་བསུ་དང་བཅས་ཏེ་སྣེ་ལེན་གཟབ་རྒྱས་ཀྱིས་ཐེའུ་ཆུང་སྡེ་བའི་རང་ཁྱིམ་དུ་བདེ་ལེགས་ངང་འབྱོར་ཡོད་པ་ཤེས་རྟོགས་བྱུང་བ་ཙམ་ལས་དེ་མིན་གཟུགས་གཞིའི་གནས་སྟངས་སོགས་ཞིབ་ཕྲའི་གནས་ཚུལ་གང་ཡང་ཤེས་རྟོགས་ཐུབ་མེད་སྐོར་གསུངས་སོང་། ད་དུང་ཁོང་གིས་སངས་དགའ་ལགས་ནི་དེ་སྔ་སྤྱི་ལོ་ ༢༠༠༡ ཟླ་ ༡༡ པའི་ནང་རྔ་བ་རྫོང་དུ་ཁོང་གིས་བོད་རང་བཙན་གྱི་ཡི་གེ་སྦྱར་འགྲེམས་གནང་པར་བརྟེན་རྔ་བ་རྫོང་རྒྱ་གཞུང་ཉེན་རྟོག་པས་འཛིན་བཟུང་བྱས་ཏེ་རྔ་བ་བོད་རིགས་རང་སྐྱོང་ཁུལ་གྱི་འབྲིང་རིམ་ཁྲིམས་ཁང་དུ་ལོ་ངོ་གསུམ་རིང་བཙོན་འཇུག་བྱས་མཐར་སྤྱི་ལོ་ ༢༠༠༤ ལོར་བཙོན་གྲོལ་བཏང་ཡོད་པ་དང་། དེ་རྗེས་རྒྱ་གཞུང་གིས་ཁོང་ཟླ་ ༨ ཚེས་ ༡༣ ཉིན་སླར་རྒྱལ་ཁབ་གྱི་གསང་བ་ཕྱིར་བསྒྲགས་གནང་པའི་ཉེས་མིང་འོག་འཛིན་བཟུང་བྱས་ཡོད་པ་སོགས་གསུངས་ཀྱི་འདུག གཞི་རྩའི་ཆབ་སྲིད་བཙོན་ཟུར་སངས་དགའ་ལགས་ནི་དེ་སྔ་སྤྱི་ལོ་ ༢༠༠༡ ཟླ་ ༡༡ པའི་ནང་རྔ་བ་རྫོང་དུ་ཁོང་གིས་བོད་རང་བཙན་གྱི་ཡི་གེ་སྦྱར་འགྲེམས་གནང་པར་བརྟེན་རྔ་བ་རྫོང་རྒྱ་གཞུང་ཉེན་རྟོག་པས་འཛིན་བཟུང་བྱས་ཏེ་རྔ་བ་བོད་རིགས་རང་སྐྱོང་ཁུལ་གྱི་འབྲིང་རིམ་ཁྲིམས་ཁང་དུ་ལོ་ངོ་གསུམ་རིང་བཙོན་འཇུག་བྱས་མཐར་སྤྱི་ལོ་ ༢༠༠༤ ལོར་བཙོན་གྲོལ་བཏང་ཡོད་ཀྱང་། སྤྱི་ལོ་ ༢༠༠༨ ལོར་ཁོང་གིས་རྒྱལ་ཁབ་གྱི་གསང་བ་ཕྱིར་བསྒྲགས་གནང་པའི་ཉེས་མིང་འོག་ཟླ་ ༨ ཚེས་ ༡༣ ཉིན་སླར་ཁུལ་དང་ཞིང་ཆེན་གྱི་ཉེན་རྟོག་རུ་ཁག་གིས་རྔ་བའི་ཇ་ཁང་ཞིག་ཏུ་གྲོགས་པོ་སྐོར་ཞིག་དང་ལྷན་འཛོམས་སྐབས་འཛིན་བཟུང་བྱས་ཡོད་པ་རེད། སྐབས་དེར་ཁོང་གི་སྲིང་མོའི་ཟླ་བོའི་ལག་ཏུ་ཉེན་རྟོག་པས་ཡི་གེ་ཞིག་བཞག་ཏེ་འདི་ཧོར་ཚང་ལ་སྤྲོད་རོགས་ཞེས་ཡི་གེ་ཞིག་བཞག་པ་ལས་དེ་མིན་ཁོང་གི་ཞིབ་ཕྲའི་གནས་སྟངས་གང་ཡིན་ཤེས་རྟོགས་མེད་པར་གྱུར་ཡོད། དེ་རྗེས་ཟླ་བ་གཉིས་ཀྱི་རྗེས་ནས་རྔ་བ་ཁུལ་འབྲིང་རིམ་མི་དམངས་ཁྲིམས་ཁང་གིས་གསང་སྟབས་འོག་ལོ་བརྒྱད་ཀྱི་རིང་བཙོན་འཇུག་ཁྲིམས་ཐག་བཅད་ཡོད་པ་དང་། སྐབས་དེར་ཁོང་གི་ཨ་མ་གཙོས་པའི་ནང་མི་གསུམ་ཙམ་ཐུག་འཕྲད་དུ་ཕྱིན་ཡོད་ཀྱང་ཁྲིམས་ཆད་ཀྱི་བརྒྱུད་རིམ་ཆ་ཚང་ཁ་གསལ་ཞིག་ཤེས་རྟོགས་བྱུང་མེད་པ་རེད། ཉེ་ཆར་ཟླ་འདིའི་ཚེས་ ༡༢ ཉིན་བོད་ནང་གི་ཞོགས་པའི་ཚོུད་ ༧།༠༠ ཐོག་ཁྲིའུ་ཏུའུ་མེན་ཡཱང་བཙོན་ཁང་ནས་གསང་སྟབས་ཀྱིས་བཙོན་གྲོལ་བཏང་ཡོད་པ་དང་། སང་ཉིན་ཏེ་ཕྱི་ཚེས་ ༡༣ ཉིན་རྔ་བ་ས་གནས་བོད་མི་མང་ཚོགས་ཚོས་དགའ་བསུ་དང་བཅས་ཏེ་སྣེ་ལེན་གཟབ་རྒྱས་ཀྱིས་ཐེའུ་ཆུང་སྡེ་བའི་རང་ཁྱིམ་དུ་བདེ་ལེགས་ངང་འབྱོར་ཡོད་པ་རེད། རྩ་བའི་ཆབ་སྲིད་བཙོན་ཟུར་སངས་དགའ་ལགས་ནི་རྔ་བ་རྫོང་བར་མ་ཤང་ཐེའུ་ཆུང་སྡེ་བའི་ཧོར་ཚང་གི་ཕ་ཀུན་ཁོ་དང་མ་ཕུན་ཚོགས་སྐྱིད་གཉིས་ལ་བུ་ཕྲུག་བཞི་ཡོད་པ་ལས་ཁོང་གསུམ་པ་དེ་ཡིན་ཞིང་། ཆུང་དུས་རྔ་བ་རྟོགས་ལྡན་དགོན་གྱི་ཆོས་སྒོར་ཞུགས་ཏེ་བསླབ་པ་སློབ་གཉེར་སོགས་གནང་མྱོང་ཡོད་པ་རེད། ལྷག་དོན་ཁོང་དགོན་པར་སློབ་ཞུགས་གནང་རིང་ལ་ལས་སྣེ་གང་ཅིའི་ཐད་ལ་འཇོན་ཐང་ཆེ་ཞིང་ཤེས་ཡོན་དང་ཀུན་སྤྱོད་གཉིས་ཀྱི་ཐོག་ལ་དགོན་པ་དེའི་ཚད་འཛིན་ཞུ་སའི་མི་སྤྱི་སེམས་ཅན་ཞིག་ཡིན་པ་རེད་འདུག

རྩ་སའི་བདག་དབང་ཆེད་བོད་མི་གཅིག་འཛིན་བཟུང་གིས་ཤེས་རྟོག་མེད་པར་གྱུར་འདུག

དེའང་སེར་ཤུལ་རྫོང་སྲིད་གཞུང་གི་རྒྱལ་སྒོ་མདུན་དུ་གྲྭ་བློ་བཟང་བཟོད་པ་ལགས་ཀྱིས་དབོན་པོ་རུ་ཁག་གཉིས་པའི་རྩ་སའི་བདག་དབང་ཕྱིར་སྤྲོད་དགོས་པའི་ཞུ་འབོད་ཀྱི་ལས་འགུལ་སྤེལ་བས་རྒྱ་གཞུང་གི་ཉེན་རྟོག་པས་ཁོང་བཙན་ཁྲིད་བྱས་འདུག འདི་ག་རླུང་འཕྲིན་ཁང་གིས་བརྒྱུད་ལམ་ཁག་ཏུ་ཁུངས་ལྡན་གྱི་གནས་ཚུལ་ཐོན་པ་ལས་ཤེས་རྟོགས་བྱུང་བར། ཁ་ཉིན་ཟླ་འདིའི་ཚེས་ ༡༠ ཉིན་སེར་ཤུལ་རྫོང་ཁོངས་ཀྱི་གྲྭ་བློ་བཟང་བཟོད་པ་ལགས་ཀྱིས་སེར་ཤུལ་རྫོང་མི་དམངས་སྲིད་གཞུང་གི་རྒྱལ་སྒོ་མདུན་དུ་གུར་ཞིག་ཕུབ་ནས་རང་དཀར་པོའི་སྟེང་ལ་སེར་ཤུལ་དབོན་པོ་རུ་ཁག་གཉིས་པའི་རྩ་སའི་བདག་དབང་ཕྱིར་སྤྲོད་དགོས་ཞེས་ཡོག་ཐོག་ཏུ་བྲིས་ཏེ་ཞུ་འབོད་ཀྱི་ལས་འགུལ་སྤེལ་སྟབས། དེ་མ་ཐག་རྒྱ་གཞུང་གི་དྲག་ཆས་ཉེན་རྟོག་པས་ཁོང་འཛིན་བཟུང་གིས་རླངས་འཁོར་ནང་དུ་བཅུག་སྟེ་བཙན་ཁྲིད་བྱས་འདུག ད་ལྟའི་ཆར་ཁོང་བཙོན་ཁང་གང་དུ་བཀག་སྐྱིལ་བྱེད་ཡོད་པ་དང་ལོ་ཇི་ཡིན་སོགས་ཞིབ་ཕྲའི་གནས་ཚུལ་གང་ཡང་ཤེས་རྟོགས་མེད་པར་གྱུར་ཡོད་པ་རེད། གཞི་རྩའི་སེར་ཤུལ་རྫོང་ཁོངས་ཀྱི་གྲྭ་བློ་བཟང་བཟོད་པ་ལགས་ཀྱིས་ལོ་ཤས་གོང་ནས་གོང་རིམ་ལ་རིམ་པ་བརྒྱུད་དེ་ལན་མང་རིང་དབོན་པོ་རུ་ཁག་གཉིས་པའི་རྩ་སའི་བདག་དབང་ཕྱིར་སྤྲོད་དགོས་སྐོར་གྱི་ཞུ་གཏུག་མང་དག་ཞིག་གནང་ཡོད་ཀྱང་། གོང་རིམ་གྱི་ལས་སྣེ་བཟུང་བའི་དཔོན་རིགས་ཚོས་དེར་ཕན་འབྲས་སོན་པའི་ལན་འདེབས་གང་ཡང་མ་བྱུང་སྟབས། ཁོང་རང་ཉིད་འུ་ཐུག་ཐབས་ཟད་ཀྱི་གནས་ལས་མ་འདས་པས་སེར་ཤུལ་རྫོང་སྲིད་གཞུང་གི་རྒྱལ་སྒོ་མདུན་དུ་དངོས་སུ་བཅར་ཏེ་དབོན་པོ་རུ་ཁག་གཉིས་པའི་རྩ་སའི་བདག་དབང་ཕྱིར་སྤྲོད་དགོས་པའི་ཞུ་འབོད་ཀྱི་ལས་འགུལ་སྤེལ་ཡོད་པ་རེད།     རྒྱ་གཞུང་གིས་ཕྱི་རྒྱལ་དཔོན་རིགས་ཚོ་དང་གསར་འགོད་པར་བོད་ནང་གི་བོད་མི་རྣམས་ཞི་བདེ་ལྷིང་འཇགས་ངང་གནས་ཡོད་པ་མ་ཟད། རྒྱ་གཞུང་གིས་རྐང་འགན་འཁུར་ཐོག་འབྱོར་འབྲིང་སྤྱི་ཚོགས་འཛུགས་སྐྲུན་དང་རྣམ་པ་གསར་པ་ཞེས་སོགས་ལ་སྙད་སྟེ་བོད་མི་ཞིང་འབྲོག་མང་ཚོགས་ཚོའི་འཚོ་བར་དོག་ཕོག་འགྲི་གཞིའི་རྩ་ས་བཙན་འཕྲོག་བྱས་དང་བྱེད་བཞིན་ཡོད་པ་རེད། དེ་མཚུངས་སུ་དེ་སྔ་བོད་མདོ་སྨད་རྔ་བ་ནང་ཁྱུང་མཆུ་རྫོང་སྲིད་གཞུང་གིས་ཁུལ་དེའི་བོད་མིའི་འབྲོག་ས་བཙན་འཕྲོག་གིས་ཁོང་རྣམ་པའི་འཚོ་བར་དཀའ་ངལ་ཆེན་པོ་བཟོས་པ་མ་ཟད། ལྷག་དོན་བོད་མི་དེ་དག་གིས་རྫོང་སྲིད་ལ་ཞུ་གཏུག་བྱེད་སྐབས་སླར་ཡོང་ཚེ་བཙོན་འཇུག་བྱ་རྒྱུ་ཡིན་པའི་འཇིགས་སྐུལ་ཡང་བྱས་པའི་གནས་ཚུལ་ཐོན་མྱོང་ཡོད་པ་རེད། རྩ་བའི་ Wikipedia དྲ་གནས་ཐོག་སེར་ཤུལ་རྫོང་དང་འབྲེལ་བའི་གནས་ཚུལ་འཁོད་པ་ལྟར་ན།  རྫོང་དེ་ཟི་ཁྲོན་ཞིང་ཆེན་གྱི་བྱང་ཕྱོགས་ལ་ཁེལ་གྱི་ཡོད་པ་དང་། རྫོང་དེའི་མི་འབོར་ཧ་ལམ་སྟོང་ཕྲག་ ༦༨ ཙམ་ཡོད་པའི་ནང་ནས་རྒྱ་ཆ་ ༩༦ བོད་པའི་བྲོག་པ་ཆགས་ཀྱི་ཡོད་པ་རེད་འདུག  སྤྱི་ལེ་གྲུ་བཞི་མ་ ༢༥༠༠༠ ཙམ་ལ་ཁྱབ་པའི་སེར་ཤུལ་རྫོང་དེ་ས་གནས་ཕལ་ཆེ་བ་རྩ་ས་ཡིན་པ་དང་།  ཁུལ་དེའི་བོད་པའི་བྲོག་པ་མང་ཚོགས་རྣམས་ཀྱི་འཚོ་གནས་གཙོ་བོ་གནང་ཡུལ་ཆགས་ཀྱི་ཡོད་པ་རེད་འདུག

ཆབ་སྲིད་བཙོན་ཟུར་གྲྭ་མཁྱེན་རབ་མཐར་ཕྱིན་ལགས་འདས་གྲོངས་སུ་གྱུར་འདུག

དེ་སྔ་ཕྱི་ལོ་ ༢༠༡༣ ལོ་མཇུག་ཏུ་བཙོན་འཇུག་དུས་ཡུན་ཚང་སྟེ་གློད་གྲོལ་ཐོབ་པའི་ཆབ་སྲིད་བཙོན་ཟུར་གྲྭ་མཁྱེན་རབ་མཐར་ཕྱིན་ལགས་ཁ་ཉིན་ཟླ་ ༨ ཚེས་ ༧ ཉིན་གཟུགས་གཞི་གནས་སྟངས་ཞན་པའི་འོག་འདས་གྲོངས་སུ་གྱུར་འདུག དེའང་བོད་སྟོད་དིང་རི་རྫོང་ཤེལ་དཀར་དགོན་པའི་གྲྭ་མཁྱེན་རབ་མཐར་ཕྱིན་ལགས་ནས་དཔའ་ངར་ཞུམ་མེད་ཀྱིས་རྒྱ་གཞུང་གིས་དྲག་པོའི་རྒྱལ་གཅེས་ཆོས་གཅེས་ཀྱི་སློབ་གསོ་དང༌། ༸གོང་ས་མཆོག་ལ་མཚན་སྨད་སྐུར་འདེབས་ཞུ་དགོས་པའི་སློབ་གསོའི་ལས་རིམ་ལ་ངོས་ལེན་ནམ་ཡང་ཞུ་ཐབས་མེད་ཅེས་སྐད་གསང་མཐོན་པོས་ཞི་རྒོལ་གནང་པ་དང་དགེ་འདུན་པ་བཅུ་གཅིག་ཡར་བཞེངས་ཏེ་ཀྱང་ཁོང་ལ་རྒྱབ་སྐྱོར་གནང་སྟབས། རྒྱ་གཞུང་གིས་འཛིན་བཟུང་འོག་བཙོན་ཁང་ནང་མི་སྤྱོད་ལས་འདས་པའི་རྡུང་རྡེག་མནར་གཅོད་བཟོད་གླགས་མེད་པ་བཏང་བ་དང་། དེ་བས་ཀྱང་འཚོ་རྟེན་སྨན་བཅོས་ཀྱི་མཐུན་རྐྱེན་ཆེས་ཞན་པའི་དབང་གིས་མཐར་ཁོང་བཙོན་ལས་གཟུགས་གཞི་ནད་གཅོང་འོག་གློག་གྲོལ་བཏང་ནས་རང་ཁྱིམ་དུ་བཞུགས་རིང་ལ་སྨན་བཅོས་གང་དྲག་ཞུས་ཀྱང་ཕན་འབྲས་གང་ཡང་མ་སོན་པས་ཁ་ཉིན་ཟླ་ ༨ ཚེས་ ༧ ཉིན་འདས་གྲོངས་སུ་གྱུར་འདུག གཞི་རྩའི་ཕྱི་ལོ་ ༢༠༠༨ ལོའི་ཟླ་ ༥ ཚེས་ ༡༩ ཉིན་སྟོད་དིང་རི་རྫོང་ཤེལ་དཀར་དགོན་པའི་དགེ་འདུན་པ་ཚོར་ རྒྱ་གཞུང་གིས་དྲག་པོའི་རྒྱལ་གཅེས་ཆོས་གཅེས་ཀྱི་སློབ་གསོ་དང༌། ༸གོང་ས་མཆོག་ལ་མཚན་སྨད་སྐུར་འདེབས་ཞུ་དགོས་པའི་སློབ་གསོའི་ལས་རིམ་སྤེལ་སྐབས་དེར་ངོས་ལེན་ནམ་ཡང་ཞུ་ཐབས་མེད་ཅེས་སྐད་གསང་མཐོན་པོས་ཞི་རྒོལ་གནང་པ་དང་དགེ་འདུན་པ་བཅུ་གཅིག་ཡར་བཞེངས་ཏེ་ཀྱང་ཁོང་ལ་རྒྱབ་སྐྱོར་གནང་སྟབས། གྲྭ་མཁྱེན་རབ་མཐར་ཕྱིན་ལགས་ཀྱིས་གཙོས་དགེ་འདུན་པ་གྲངས་ ༡༣ འཛིན་བཟུང་བྱས་ཡོད་པ་རེད། དེ་དག་ལས་དགེ་འདུན་པ་བཞི་ལ་དུས་ཡུན་ལོ་ ༡ དང་ཕྱེད་ཀྱི་ཁྲིམས་ཐག་བཅད་པ་དང་། དགེ་འདུན་པ་གསུམ་མུ་མཐུད་བཀག་ཉར་བྱེད་བཞིན་པའི་ཁོངས་ནས་གྲྭ་མཁྱེན་རབ་མཐར་ཕྱིན་ལགས་མགོ་གཙོ་ཡིན་པར་ངོས་འཛིན་གྱིས་ཉེས་མིང་འོག་ལོ་ ༥ རིང་བཙོན་འཇུག་ཁྲིམས་ཐག་བཅད་ཡོད་པ་རེད། དེའང་ཁོང་ལ་ལོ་གསུམ་རིང་གཞིས་རྩེའི་བཙོན་ཁང་དུ་བཙོན་འཇུག་དང་། དེ་རྗེས་ལོ་གཉིས་རིང་ལྷ་སའི་ཆུ་ཤུལ་བཙོན་ཁང་དུ་བཙོན་འཇུག་བྱས་ཡོད། སྐབས་དེར་རྒྱ་གཞུང་གིས་གནས་ཚུལ་དེ་བྱུང་མ་ཐག་དགོན་པར་ཕྱི་མི་གནས་མཇལ་བ་སོགས་བཀག་འགོག་བྱས་པ་མ་ཟད། དགོན་པའི་དགེ་འདུན་པ་རྣམས་ཕྱིར་བསྐྱོད་མི་ཆོག་པའི་བཙན་བཀའ་བཏང་བ། དགེ་འདུན་པ་རྣམས་ཀྱི་ལག་ཐོག་ཁ་པར་ཀྱང་བཙན་འཕྲོག་བྱས་ཏེ་གནས་ཚུལ་དེ་རིགས་ཕྱིར་བསྒྲགས་བྱ་མི་ཆོག་ཅིང་། དགོན་པའི་ཕྱི་ནང་ཡོངས་རྫོགས་དམ་དྲག་ཤུགས་ཆེ་བྱས་ཡོད་པ་རེད། ལྷག་དོན་ཤེལ་དཀར་ས་གནས་སུ་སྔར་ལྷག་གིས་དམ་དྲག་དང་དྲག་གནོན་ཤུགས་ཆེ་རུ་བཏང་བའི་གནས་ཚུལ་ཐོན་པ་ཤེས་རྟོགས་ཐུབ་པ་བྱུང་ཡོད། རྩ་བའི་མཁྱེན་རབ་མཐར་ཕྱིན་ལགས་ནི་སྟོད་དིང་རི་རྫོང་གྲུ་བཞི་གྲོང་ཚོ་ནས་ཡིན་ཞིང་། ད་ལྟ་རང་ལོ་ ༤༠ ཙམ་སོན་ཡོད་པ་རེད་འདུག

གསེར་རྟ་བླ་རུང་ཆོས་སྒར་གཏོར་བཤིག་གཏོང་བཞིན་པར་མ་བཟོད་ནས་བཙུན་མ་གཅིག་གིས་རང་སྲོག་བཅད་པ།

དེའང་རྒྱ་ནག་གཞུང་ནས་ཕྱི་ཟླ་ ༧ ཚེས་ ༢༠ ཉིན་མགོ་བཙུགས་ཀྱིས་གསེར་རྟ་བླ་རུང་ཆོས་སྒར་དགོན་པའི་གྲྭ་ཤག་མང་དག་ཞིག་གཏོར་བཤིག་གཏོང་བཞིན་པའི་ངལ་བ་བཟོད་གླགས་མེད་པའི་གནས་སྟངས་དབང་གིས་དགོན་པ་དེར་སློབ་གཉེར་གནང་བཞིན་པའི་བཙུན་མ་རིག་འཛིན་སྒྲོལ་མ་ཀྱིས་རང་སྲོག་བཅད་འདུག ཟླ་བ་སྔོན་མའི་ཚེས་ ༢༠ ཉིན་བླ་རུང་སྒར་པདྨ་མཁའ་འགྲོའི་མདུན་ལམ་གྱི་ཉེ་འཁྲིས་ཀྱི་རྒྱུན་སྡོད་སློབ་གཉེར་བ་གྲྭ་བཙུན་ཚོའི་ཤག་གཏོར་བཤིག་གཏོང་པའི་ཉིན་དེར་བཙུན་མ་རིག་འཛིན་སྒྲོལ་མ་ལགས་ཀྱིས་ རང་ཉིད་ཀྱི་སྐེར་ཐག་པས་བཅིངས་ནས་རང་སྲོག་བཅད་ཡོད་པ་དང། སྐབས་དེར་ཁོང་གི་ཤུལ་དུ་དངུལ་ཁ་ཤས་དང། ཞལ་ཆེམས་ཡི་གེ་ཞིག་བཞག་ཡོད་པ་ལག་སོན་བྱུང་འདུག ཡི་དགེ་དེའི་ནང་ཁོང་ནས་བླ་རུང་ཆོས་སྒར་དུ་སློབ་གཉེར་གནང་རིང་ལ་རྒྱ་གཞུང་གིས་སྔ་ཕྱི་རིམ་པར་བཙན་གནོན་གྱིས་སུན་གཙེར་བཟོད་གླགས་བྲལ་བ་བཟོས་པས་ཁོ་མོ་རང་སེམས་བཟོད་ཐབས་མི་འདུག་ཅེས་དང་། ཁོང་འདས་ཚར་བའི་རྗེས་སུ་ཤུལ་བཞག་གི་སྒོར་མོ་འགའ་ཡོད་པ་དེ་དག་དགོན་པར་ཕུལ་རོགས་ཞེས་བྲིས་ཡོད་པ་རེད་འདུག དེ་བཞིན་རྒྱ་ནག་གཞུང་གིས་བླ་རུང་ཆོས་སྒར་དུ་གྲྭ་ཤག་གཏོར་བཤིག་ཟིན་རིགས་ལ་རྒྱ་སྒོར་ཁྲི་གཉིས་མ་ཟིན་ཙམ་རེ་གུན་གསབ་ཀྱི་ཚུལ་དུ་སྤྲོད་བཞིན་ཡོད་པ་དང། དེའི་ཐོག་ལ་སྒེར་གྱི་ངོས་ནས་ཀྱང་རོགས་སྐྱོར་མི་ཉུང་བ་ཞིག་གནང་གི་ཡོད་པ་རེད་འདུག གྲྭ་ཤག་གཏོར་བཤིག་ཟིན་པའི་དགེ་བཙུན་རྣམས་གནས་སྐབས་རིང་གྲྭ་བཙུན་གཞན་གྱི་གྲྭ་ཤག་ནང་མཉམ་བཞུགས་ཀྱིས་སློབ་གཉེར་མུ་མཐུད་གནང་བཞིན་ཡོད་པ་སོགས་ཀྱང་འཁོད་འདུག འདི་ག་རླུང་འཕྲིན་ཁང་ནས་བཙུན་མ་རིག་འཛིན་སྒྲོལ་མ་ལགས་ཀྱི་རང་སྲོག་བཅད་པའི་སྐོར་གནས་ཚུལ་རྒྱུས་ལོན་ཞུས་སྐབས་གོང་གནས་དེ་ཁུངས་ལྡན་ཡིན་པ་ཤེས་རྟོགས་བྱུང་བ་དང་། གནས་ཚུལ་ཡོང་ཁུངས་གཞན་ཞིག་གིས་ཀྱང་རྒྱ་ནག་གཞུང་དང་བླ་རུང་ཆོས་སྒར་གཉིས་ནས་གསང་སྟབས་ཀྱིས་ཕྱིར་བསྒྲགས་མ་བྱེད་པ་མ་གཏོགས་རང་སྲོག་བཅད་པའི་གནས་ཚུལ་དེ་གཅིག་པོ་ཚད་ཀྱི་མེད་སྐོར་གསུངས་པ་མ་ཟད། དེ་སྔོན་ ༢༠༠༡ ལོར་རྒྱ་གཞུང་གིས་བླ་རུང་སྒར་དུ་གྲྭ་ཤག་གཏོར་བཤིག་གི་ལས་གཞི་ཐེངས་གཅིག་སྤེལ་མྱོང་ཡོད་པའི་སྐབས་སུ་སྡུག་བསྔལ་གྱིས་མནར་བའི་སློབ་གཉེར་བ་དགེ་བཙུན་ཁག་ཅིག་ནས་ཀྱང་རང་སྲོག་བཅད་པ་དང། དེ་བཞིན་ཁག་ཅིག་སེམས་ཁམས་མི་བདེ་བའི་གནས་སྟངས་ཐོན་པ་བྱུང་ཡོད། འོན་ཀྱང་ད་ལྟའི་ཆར་ཞིབ་ཕྲའི་གནས་ཚུལ་ཇི་བྱུང་ཤེས་རྟོགས་ཐུབ་མེད། ཡང་དེའི་བར་ན་ཁ་སང་ཨ་རིའི་ཕྱི་སྲིད་ལྷན་ཁང་གི་དྲ་གནས་ཐོག དེ་ལས་གསར་འགོད་སྡེ་ཚན་གྱི་ངེས་སྟོན་པ་ལྕམ་ Elizabeth Trudeau ལགས་ནས་གསར་འགོད་པ་དང་མཇལ་འཕྲད་སྐབས། གསར་འགོད་པས་བོད་གསེར་རྟ་བླ་རུང་སྒར་དུ་བོད་མིའི་འདོད་པ་མེད་བཞིན་དུ་རྒྱ་གཞུང་གིས་དགོན་པའི་གྲྭ་ཤག་གཏོར་བཤིག་གཏོང་བཞིན་པའི་སྐོར་ལ་བཅར་འདྲི་ཞུས་པར། ལྕམ་ Trudeau ལགས་ཀྱིས་ཁོང་ནས་གནས་ཚུལ་དེའི་སྐོར་མཁྱོན་རྟོགས་ཡོད་པ་དང་། རྒྱ་གཞུང་གིས་གསེར་རྟ་བླ་རུང་ཆོས་སྒར་གྱི་གནད་ཡོད་དབུ་ཁྲིད་མཁན་པོ་རྣམ་པ་ཚོས་བཀའ་འཁྲོལ་གང་ཡང་མེད་པར་དགོན་པའི་གྲྭ་ཤག་གཏོར་བཤིག་གཏོང་བཞིན་པར་བློ་འཚབ་ཡོད་པ་གསུངས་པ་དང་འབྲེལ། རྒྱ་ནག་གཞུང་གི་ངོས་ནས་རྙོག་གླེང་གྱི་ཉེན་ཁ་ཤུགས་ཆེ་ཡོད་པའི་ལས་དོན་དེ་དག་འཕྲལ་མར་མཚམས་འཇོག་དགོས་པ་དང། རྒྱ་གཞུང་གིས་དགོན་པའི་གནད་ཡོད་དབུ་ཁྲིད་རྣམས་དང་གྲོས་མཐུན་གྱིས་བོད་མིའི་ཆོས་དད་རང་དབང་ལ་དོག་ཕོག་མི་འགྲོ་བའི་ཐོག་དགོན་པར་ཉེན་སྲུང་གི་ལས་དོན་སྤེལ་དགོས་གལ་ཡིན་པ་བཅས་གསུངས་འདུག གཞི་རྩའི་ཟླ་བ་སྔོན་མའི་ཟླ་ཤར་ཙམ་ལ་རྒྱ་ནག་ཀྲུང་དབྱང་སྐབས་ ༦ པའི་བོད་ཁུལ་ལས་དོན་ཚོགས་འདུ་དང་རྒྱལ་ཡོངས་ཆོས་ལུགས་ལས་དོན་ཚོགས་འདུ་གཉིས་ཀྱི་དགོངས་དོན་དང་འབྲེལ། ༢༠༡༧ ལོའི་ཕྱི་ཟླ་ ༩ ཚེས་ ༣༠ སྔོན་ཚུད་དུ་བླ་རུང་སྒར་སྤྱིའི་མི་འབོར་ ༥༠༠༠ བར་ཚོད་འཛིན་ཐུབ་པ་དགོས་རྒྱུ་དང། འདི་ལོའི་ཟླ་ ༡༠ ཚེས་ ༣༠ སྔོན་དུ་གཏོར་བཤིག་གི་ལས་དོན་ཟིན་དགོས་སྐོར་སོགས་ཀྱི་བཀའ་རྒྱ་བཏང་ཡོད་པ་དང། དེ་རྗེས་རྒྱ་གཞུང་གི་དམག་མི་དང་ལས་མི་བཏང་སྟེ་ཕྱི་ཟླ་ ༧ ཚེས་ ༢༠ ཉིན་དངོས་སུ་གྲྭ་ཤག་གཏོར་བཤིག་གི་ལས་གཞིས་མགོ་བཙུགས་ཡོད་པ་རེད། འོན་ཀྱང་དགོན་པའི་དགོན་བདག་མཁན་པོ་རྣམས་ཀྱིས་མང་ཚོགས་ལ་གནད་དོན་དེའི་སྐོར་ལབ་གླེང་མང་པོ་བྱེད་རྒྱུ་མེད་པ་དང། གྲྭ་ཤག་གཏོར་བཤིག་གི་ལས་དོན་ལ་འགོག་རྐྱེན་བཟོ་རྒྱུ་མེད་པའི་འབོད་སྐུལ་ནན་པོ་ཞུས་པའི་ཁར། ད་ལྟ་ས་གནས་དེར་དགེ་བཙུན་སློབ་གཉེར་བ་སུས་ཀྱང་འགོག་རྐྱེན་མེད་པར་གྲྭ་ཤག་གཏོར་བཤིག་གི་ལས་གཞི་འགྲོ་བཞིན་པ་དང། དེའང་ཆེས་ཐོག་མར་གྲྭ་བཙུན་གཉིས་ཀྱི་ཤག་ལས་བཙུན་མའི་ཤག་ནས་གཏོར་བཤིག་གཏོང་མགོ་བཙུགས་ཡོད་པ་རེད། རྩ་བའི་བཙུན་མ་རིག་འཛིན་སྒྲོལ་མ་ལགས་ནི་བླ་རུང་ཆོས་སྒར་དུ་རྒྱུན་བཞུགས་སློབ་གཉེར་བ་ཞིག་ཡིན་པ་དང། ཕ་ཡུལ་ཁམས་སྡེ་དགེ་ནས་ཡིན་པ་རེད་འདུག

རྒྱ་ནག་གི་རྒྱལ་དར་འགྲེང་འཛུགས་མ་བྱས་པས་བོད་མིའི་དུས་སྟོན་བཀག་འགོག་བྱས་པ།

 རྒྱ་ནག་གི་རྒྱལ་དར་འགྲེང་འཛུགས་བྱེད་རྒྱུའི་བཀའ་རྒྱ་ལ་ཁས་ལེན་མ་བྱས་པས་རྒྱ་གཞུང་གིས་ཏྲེ་ཧོར་དར་རྒྱས་ཡུལ་དགོན་གཉིས་ཀྱི་རི་བསང་ཆེན་མོའི་དུས་སྟོན་སྲུང་བརྩི་ཞུ་བར་བཀག་འགོག་བྱས་འདུག དེའང་ལོ་ལྟར་བོད་ཁམས་དཀར་མཛེས་ཁུལ་དཀར་མཛེས་རྫོང་ཏྲེ་ཧོར་དར་རྒྱས་ཡུལ་དགོན་གཉིས་ཀྱི་རི་བསང་ཆེན་མོ་ཞེས་ལོ་ལྟར་ཆར་དུས་སྐབས་ཆར་ཆུ་དུས་སུ་འབབ་པ་དང་ལོ་ཕྱུག་རྟག་ཏུ་ལེགས་པ་ཡོང་སླད། དར་རྒྱས་ཡུལ་དགོན་གཉིས་ཀྱི་རི་བསང་ཆེན་མོ་ཟེར་བ་ཞིག་ལོ་ལྟར་བོད་ཟླ་དྲུག་པའི་ནང་སྲུང་བརྩི་གནང་སྲོལ་ཡོད་པ་དང། དེའི་ཐོག་ཡུལ་དགོན་གཉིས་ཀྱི་རྟ་རྒྱུག་བྲོ་གར་སོགས་ཆོས་ཕྱོགས་དང་དགའ་སྤྲོའི་བྱེད་སྒོ་སྣ་མང་ཞིག་སྤེལ་སྲོལ་ཡོད་པ་རེད་འདུག འོན་ཀྱང་འདི་ལོའི་དུས་སྟོན་དབུ་འཛུགས་གནང་རན་པའི་སྐབས་དེར་རྒྱ་གཞུང་གིས་དུས་སྟོན་དེའི་ཐོག་སྐར་མ་ལྔ་ཅན་གྱི་དར་དམར་འགྲེང་འཛུགས་བྱེད་དགོས་པའི་བཀའ་རྒྱ་བཏང་ཡང་། ས་གནས་བོད་མི་རྣམས་ཀྱིས་དུས་སྟོན་དེའི་ཐོག་གནའ་སྔ་མོ་ནས་དེ་ལྟར་བྱེད་སྲོལ་མེད་པས་རྒྱ་ནག་གི་རྒྱལ་དར་འགྲེང་འཛུགས་བྱེད་རྒྱུ་མིན་ཅེས་བརྗོད་ཡོད་སྟབས། རྒྱ་གཞུང་གིས་དུས་སྟོན་དེ་ཚོགས་མ་བཅུག་པར་བཀག་འགོག་བྱས་ཡོད་པ་རེད་འདུག དེ་བཞིན་བརྒྱུད་ལམ་ཐོག་ཏུ་གནས་ཚུལ་ཐོན་ཁག་ལ་གཞིགས་ན།  དུས་སྟོན་དེ་ཕྱི་ཟླ་བརྒྱད་པའི་ཟླ་ཤར་ཙམ་ནས་དབུ་འཛུགས་ཀྱིས་རྟ་རྒྱུག་དང་གཞས་ཞབས་བྲོ་སོགས་ཉིན་ཤས་རིང་གནང་གཏན་འཁེལ་ཡོད་པ་དང། དར་རྒྱས་དགོན་དང་ཡུལ་མི་རྣམས་ནས་ལྷ་མོ་དང་སེང་གེ བཀྲིས་གླུ་གར་འཁྲབ་སྟོན། དེ་བཞིན་གྲོང་ཚོ་སོ་སོ་ནས་གཞས་ཞབས་བྲོ་འཁྲབ་བསྟོན་དང་རྟ་རྒྱུག་སོགས་གྲ་སྒྲིག་ཆ་ཚང་གནང་ཟིན་པ་དང། རི་བསང་དུས་སྟོན་དེའི་གྲ་སྒྲིག་ཆེད་དུ་རྒྱ་མིའི་སྒོར་མོ་ཁྲི་ཚོ་མང་པོའི་འགྲོ་སོང་བཏང་ཟིན་ཡོད་ཀྱང། ས་གནས་བོད་མི་རྣམས་ནས་དུས་སྟོན་ཐོག་རྒྱ་གཞུང་གི་དར་དམར་འགྲེང་མཛུགས་བྱེད་རྒྱུའི་བཀའ་རྒྱར་དང་ལེན་མ་བྱས་པས་དུས་སྟོན་སྲུང་བརྩི་ཞུ་རྒྱུར་བཀག་འགོག་བྱས་འདུག རྩ་བའི་རྒྱ་ནག་གཞུང་གི་རྩ་ཁྲིམས་ནང་དུ་གྲངས་ཉུང་མི་རིགས་རྣམས་ལ་རང་གི་ཆོས་དང་རིག་གཞུང་དར་སྤེལ་བྱེད་རྒྱུའི་རང་དབང་ཆ་ཚང་ཡོད་སྐོར་འཁོད་པ་དེ་ལྟར་ཡང། དུས་སྟོན་དེ་དག་རྒྱ་ནག་གཞུང་གི་ཆབ་སྲིད་ཀྱི་གྲུ་དོན་དང་མི་མཐུན་པ་ཡིན་ན། དེ་དག་ལ་བཀག་འགོག་དང་། ལ་ལར་མང་ཚོགས་ཀྱི་འདོད་པ་མེད་བཞིན་དུ་བཙན་བཀའ་བཏང་ནས་དུས་སྟོན་སྲུང་བརྩི་ཞུས་བཅུག་པ་སོགས་ཀྱི་གནས་སྟངས་བྱུང་མྱོང་ཡོད་པ་རེད། དཔེར་ན་ཕྱི་ལོ་ ༢༠༡༤ ལོར་འབྲི་རུ་ནང་དུ་རྒྱ་གཞུང་གིས་བོད་མི་རྣམས་ལ་རང་གི་ཁང་སྟེང་ལ་སྐར་མ་ལྔ་ཅན་གྱི་དར་དམར་འགྲེང་འཛུགས་བྱེད་དགོས་པའི་བཙན་བཀའ་ལན་མང་བཏང་ཡང་བོད་མི་ཚོས་དེར་ངོས་ལེན་མ་བྱས་སྟབས་བོད་མི་རྣམས་ཀྱི་ཐོག་ལ་དྲག་གནོན་ཤུགས་ཆེ་བྱས་ནས་ཡ་ང་བའི་གནས་ཚུལ་ཐོན་ཡོད་པ་རེད། སྐབས་དེ་ནས་བཟུང་ས་གནས་བོད་མི་རྣམས་ནས་མྱ་ངན་དང་ངོ་རྒོལ་གྱི་ཚུལ་དུ་ཡུལ་དེའི་ལོ་འཁོར་དུས་སྟོན་ཆེན་མོ་སྲུང་བརྩི་ཞུ་རྒྱུ་མིན་པའི་ཐག་གཅོད་བྱུང་སྟབས།  རྒྱ་གཞུང་གིས་བཙན་བཀའ་བཏང་ནས་དུས་སྟོན་དེ་སྲུང་བརྩི་ཞུ་བཅུག་པ་དང་། ལྷག་དོན་དེར་མཉམ་ཞུགས་མི་བྱེད་མཁན་བྱུང་རིགས་ལ་ཉེས་ཆད་དྲག་པོ་གཏང་རྒྱུའི་བཙན་བཀའ་བཏང་འདུག དེ་མཚུངས་སུ་ཉེ་སྔོན་རྒྱ་གཞུང་གིས་ངོས་འཛིན་བྱས་པའི་རྒྱལ་མཚན་ནོར་བུར་གཞིས་ཀ་རྩེ་ལ་དུས་དབང་བསྩལ་བཅུག་པ་མ་ཟད། ས་གནས་མང་ཚོགས་རྣམས་ལ་དུས་འཁོར་དབང་ཆེན་དེའི་ཐོག་ངེས་པར་དུ་བཅར་དགོས་པ་ཡོངས་བསྒྲགས་བྱས་དོན་ལྟར་མ་བྱེད་ཚེ་ཉེས་ཆད་གཏང་རྒྱུའི་བཙན་བཀའ་བཏང་ཡོད་པ་རེད།

རྒྱ་གཞུང་གིས་སླར་བོད་པའི་དགེ་འདུན་པ་གཅིག་ལ་ལོ་ ༣ གྱི་བཙོན་འཇུག་ཁྲིམས་ཐག་བཅད་འདུག

སྔ་ལོར་རྒྱ་གཞུང་ལ་ཞི་རྒོལ་སྐད་འབོད་གནང་མཁན་རྔ་བ་ཀིརྟི་དགོན་པའི་གྲྭ་ཨ་གྲགས་ལགས་ལ་གསང་སྟབས་ཀྱིས་ལོ་ ༣ གྱི་བཙོན་འཇུག་ཁྲིམས་ཐད་བཅད་ནས་ད་ལྟའི་ཆར་ཁོང་ཟིན་ཁྲོན་མི་ཡང་བཙོན་ཁང་དུ་བཙོན་འཇུག་བྱས་འདུག དེའང་ཨ་གྲགས་སམ་གྲྭ་བློ་བཟང་གྲགས་པ་ལགས་ཀྱིས་སྔ་ལོའི་ཟླ་ ༩ ཚེས་ ༡༠ ཉིན་གྱི་སྔ་དྲོ་རྔ་པ་ཀིརྟི་དགོན་གྱི་རང་ལོ་ ༢༡ ཙམ་སོན་པའི་གྲྭ་ཨ་གྲགས་ལགས་ཀྱིས་”བོད་ལ་རང་དབང་དགོས། ༸རྒྱལ་བ་རིན་པོ་ཆེ་སྐུ་ཚེ་ཁྲི་ལོར་བརྟན་པར་ཤོག་” ཅེས་རྒྱ་གཞུང་ལ་ཞི་རྒོལ་སྐད་འབོད་བྱེད་བཞིན་རྔ་པ་རྫོང་མཁར་གྱི་གཞུང་ལམ་དུ་ཞི་བའི་གོམ་བགྲོད་བྱས་པར་དེ་མ་ཐག་རྒྱ་གཞུང་ཉེན་རྟོག་པས་ཉེས་རྡུང་གཏོང་བཞིན་འཛིན་བཟུང་བྱས་ཡོད་པ་དང།  ལྷག་དོན་སྐབས་དེ་ནས་བཟུང་འདི་ལོའི་ཟླ་ ༨ ཚེས་ ༤ བར་བཅས་ལོ་གཅིག་མིན་ཙམ་རིང་ཁོང་གི་གནས་སྟངས་ཇི་ཡིན་སོགས་ཞིབ་ཕྲའི་གནས་ཚུལ་ཤེས་རྟོགས་ཐུབ་མེད།   འོན་ཀྱང་དེ་ཉིན་ཉེ་འཁོར་དུ་ཡོད་པའི་ས་གནས་བོད་མི་ཚོས་སྐད་འབོད་སྣ་ཚོགས་གནང་སྟབས་ཉེན་རྟོག་པས་བོད་མི་ཚོར་གང་བྱུང་ཉེས་བརྡུང་བཏང་པ་མ་ཟད། དེ་དག་ལས་བོད་མི་མང་པོ་ཞིག་འཛིན་བཟུང་བཙན་ཁྲིད་བྱས་ཡོད་པའི་གནས་ཚུལ་ཐོན་ཡོད། འདི་ག་རླུང་འཕྲིན་ཁང་ལ་སུད་སིར་བཞུགས་པའི་བསོད་ནམས་ལགས་ཀྱིས་གནས་ཚུལ་མཁོ་སྤྲོད་གནང་པར་གཞིགས་ན། ཉེ་ཆར་རྒྱ་ནག་གཞུང་གིས་རྔ་བ་ཀིརྟི་དགོན་པའི་གྲྭ་ཨ་གྲགས་ལགས་ཀྱི་ཕ་མ་སྤུན་མཆེད་སོགས་ནང་མི་སུ་གང་ཞིག་ལ་བརྡ་ལན་མེད་པར་གསང་སྟབས་ཀྱིས་ཁོང་ལ་ལོ་གསུམ་གྱི་བཙོན་འཇུག་ཁྲིམས་ཐག་བཅད་འདུག་ཅེས་གསུངས་སོང་། ད་རེས་རྒྱ་ནག་གཞུང་ནས་གྲྭ་ཨ་གྲགས་ལགས་ལ་གསང་སྟབས་ཀྱིས་ལོ་གསུམ་རིང་བཙོན་འཇུག་ཁྲིམས་ཐག་བཅད་པར་གཞིགས་ན། ཁོང་ལ་ཁྲིམས་ཐག་ནམ་བཅད་ཡོད་མེད་ཀྱི་གནས་ཚུལ་ཤེས་རྟོགས་དཀའ་བའི་གནས་ལས་མ་འདས་ཀྱང་། གནས་ཚུལ་དེ་ཐོན་པའི་དུས་མཚུངས་ཙམ་ལ་བོད་ནང་གི་འབྲེལ་ཡོད་མི་སྣ་གཅིག་གིས་ཁོང་དང་འབྲེལ་བའི་རྩོམ་ཡིག་ཞིག་སྤེལ་ཡོད་སྟབས་རྒྱ་གཞུང་གིས་ཨ་གྲགས་ལགས་ལ་ཁྲིམས་ཐག་བཅད་པའི་དུས་ཚིགས་དེ་འདི་ལོའི་ཟླ་ ༨ པའི་གཡས་གཡོན་ཙམ་ཞིག་ཡིན་པར་ཚོད་དཔག་གནང་བཞིན་འདུག རྩ་བའི་སྔ་ལོ་ཕྱི་ཟླ་ ༣ པའི་ནང་དུ་ཀིརྟི་དགོན་པའི་དགེ་འདུན་པ་བློ་བཟང་སྐལ་བཟང་ལགས་ནས་འགོ་བཙུགས་ཀྱིས། ད་བར་བོད་མདོ་སྨད་རྔ་བའི་ནང་དུ་བོད་དོན་ཆེད་ཁེར་རྐྱང་གི་ཞི་རྒོལ་གནང་མཁན། བོད་མི་སེར་སྐྱ་ཕོ་མོ་ཁྱིན་ ༡༢ བྱུང་ཡོད་པ་དང་། དེ་དག་ཁྲོད་ནས་རྒྱ་གཞུང་གིས་རྔ་བ་རྨི་རུ་མ་ཡུལ་ཚོའི་དབང་མོ་ལགས་གློད་གྲོལ་བཏང་བ་མ་གཏོགས། དེ་མིན་རྔ་བ་ཀིརྟི་དགོན་པའི་གྲྭ་བློ་བཟང་ལགས་དང་འཇམ་དཔལ་རྒྱ་མཚོ་ལགས། དེ་བཞིན་གྲྭ་ཨ་གྲགས་ལགས་བཅས་ལ་སྔ་རྗེས་སུ་ལོ་གསུམ་གྱི་བཙོན་འཇུག་ཁྲིམས་ཐག་བཅད་ཡོད་པ་རེད། དེ་མིན་བོད་མི་གཞན་འཛིན་བཟུང་བྱས་པ་དེ་དག་གི་གནས་སྟངས་ཇི་ཆགས་ཤེས་རྟོགས་གང་ཡང་ཐུབ་ཀྱི་མེད་པ་རེད།

གྲྭ་ཨ་གྲགས་ལགས་ལ་ལོ་ ༣ གྱི་བཙོན་འཇུག་ཁྲིམས་བཅད།

དེ་རིང་ཟླ་ ༨ ཚེས་ ༤ ཉིན་གནས་ཚུལ་འབྱོར་གསལ་ལྟར་ན། བོད་རྔ་བ་ཀིརྟི་དགོན་པའི་གྲྭ་ཨ་གྲགས་ལགས་ལ་རྒྱ་གཞུང་གིས་ལོ་ ༣ གྱི་བཙོན་འཇུག་ཁྲིམས་ཐད་བཅད་འདུག་པ་དང་། དེའང་ད་ལྟ་ཁོང་ཟིན་ཁྲོན་མི་ཡང་བཙོན་ཁང་དུ་བཙོན་འཇུག་བྱས་ཡོད་པ་རེད་འདུག གཞི་རྩའི་རྔ་བ་ཀིརྟི་དགོན་པའི་རང་ལོ་ ༢༡ སོན་པའི་གྲྭ་ཨ་གྲགས་ལགས་ཀྱིས་སྔ་ལོའི་ཟླ་ ༩ ཚེས་ ༡༠ ཉིན་གྱི་སྔ་དྲོར་”བོད་ལ་རང་དབང་དགོས། ༸རྒྱལ་བ་རིན་པོ་ཆེ་སྐུ་ཚེ་ཁྲི་ལོར་བརྟན་པར་ཤོག་” ཅེས་རྒྱ་གཞུང་ལ་ཞི་རྒོལ་སྐད་འབོད་བྱེད་བཞིན་རྔ་པ་རྫོང་མཁར་གྱི་གཞུང་ལམ་དུ་ཞི་བའི་གོམ་བགྲོད་བྱས་པར་དེ་མ་ཐག་རྒྱ་གཞུང་ཉེན་རྟོག་པས་ཉེས་རྡུང་གཏོང་བཞིན་འཛིན་བཟུང་བྱས་ཡོད་པ་རེད། འོན་ཀྱང་འཛིན་བཟུང་བྱས་རྗེས་ད་བར་ཁོང་གི་གནས་སྟངས་ཇི་ཆགས་སོགས་ཞིབ་ཕྲའི་གནས་ཚུལ་ཤེས་རྟོགས་ཐུབ་མེད།

Latest news