Tibetan Royal Year of 2151 | Year of the Wood Dragon

བོད།

རྒྱ་གཞུང་གིས་རྔ་བ་ནས་བེུད་གཅིག་འཛིན་བཟུང།

བོད་མདོ་སྨད་རྔ་བ་ནས་ཡིན་པའི་འོད་དཀར་སྐྱིད་ཞུ་མཁན་བེུད་གཅིག་གིས་བོད་ལ་རང་དབང་དགོས་པའི་ཞི་རྒོལ་གྱི་རྔམ་སྟོན་གནང་རྗེས་བཙོན་འཇུག་བྱས་འདུག ཕྱི་ཟླ་ ༨ ཚེས་ ༡༥ ཉིན་གྱི་བོད་ནང་གི་ཕྱི་དྲོ་ཚོུད་ ༣ ཙམ་ལ་རྔ་པ་རྫོང་རྨེའུ་རུ་མ་ཡུལ་ཚོ་ནས་རང་ལོ་ ༢༣ ཡས་མས་སོན་པའི་བུ་མོ་འོད་དཀར་སྐྱིད་ལགས་ཀྱིས་བོད་ལ་རང་དབང་དགོས། ༸གོང་ས་༸སྐྱབ་མགོན་ཆེན་པོ་མཆོག་བོད་ལ་གདན་ཞུའི་རང་དབང་དགོས། ང་ཚོ་ལ་གཉའ་གནོན་བྱས་པ་ཚད་ལས་བརྒལ་སོང་ཞེས་རྨེའུ་རུ་མ་ཡུལ་ཚོའི་གཞུང་ལམ་ཐོག་ཞི་རྒོལ་གྱི་འབོད་ཚིག་སྒྲོག་བཞིན་རྔམ་སྟོན་གནང་རྗེས།དེ་མ་ཐག་ས་གནས་ཀྱི་རྒྱ་གཞུང་ཉེན་རྟོག་མི་སྣས་ཁོང་བཙན་ཁྲིད་འོག་འཛིན་བཟུང་བྱས་འདུག ད་ལྟའི་ཆར་ཁོང་ས་གནས་གང་དུ་བཙོན་འཇུག་བྱེད་ཡོད་མེད་དང་གནས་སྟངས་ཇི་ཆགས་སོགས་ཤེས་རྟོགས་གང་ཡང་བྱུང་ཐུབ་མེད། ཁོང་གི་ནང་མི་གཙོས་གཉེན་འབྲེལ་རྣམས་ནས་འོད་དཀར་སྐྱིད་ལགས་ཀྱི་གནས་སྟངས་ཇི་ཆགས་ཐད་ཐུགས་འཚབ་ངང་གནས་ཡོད་པ་རེད་འདུག རྩ་བའི་ཁོང་ནི་རྨེའུ་རུ་མའི་རུ་ཆེན་དང་པོ་ནས་ཡིན་པ་དང། ཕ་ཀུན་པོ་དང་མ་འཕགས་པ་རྣམ་གཉིས་ཀྱི་མཉམ་དུ་འབྲོག་སར་འཚར་ལོངས་བྱུང་ཞིང་སློབ་སྦྱོང་གི་གོ་སྐབས་ཐོབ་མྱོང་མེད་པ་ཞིག་དང། བཟའ་ཟླའི་མིང་ལ་ལ་བཀྲ་ཤིས་ཡིན་པ་དང་། ཁོང་གཉིས་ལ་བུ་ལོ་ན་ ༤ སོན་པ་གཅིག་འདུག

བོད་ནང་བརྟན་ལྷིང་ཆེད་དུ་ཡིན་ཟེར་ནས་དྲག་ཆས་དམག་དཔུང་ཕོན་ཆེ་གཏོང་བཞིན་པ་རེད་འདུག

ཕྱི་ཟླ་དགུ་པའི་ཚེས་ ༡ སྟེ་རྒྱ་གཞུང་གི་དབྱེ་བའི་བོད་རང་སྐྱོང་ལྗོངས་ཟེར་བ་དབུ་བརྙེས་ནས་ལོ་ ༥༠ འཁོར་བའི་ཉིན་མོ་ཁེལ་གྱི་ཡོད་པ་དང། དེའི་ཐོག་རྒྱ་ནག་གི་སྲིད་འཛིན་ཞི་ཇིན་པིང་གཙོས་པའི་དཔོན་རིག་ཆེ་གྲས་མང་དག་ཅིག་ཡོང་གི་ཡོད་སྟབས། བོད་ཀྱི་ས་ཁུལ་ཁག་ཅིག་ཏེ་ལྷ་ས་དང་ཞི་རྒ་རྩེ། རེབ་སྒོང་སོགས་ས་ཁུལ་ཁག་ཅིག་གི་ནང་དུ། དྲག་ཆས་དམག་མི་སྟོང་ཕྲག་མང་པོ་དང་འཐབ་འཁོར་ཐན་ཁེ་སོགས་དམག་གི་གོ་ཚོན་ཕོན་ཆེན་པོ་ཁྱེར་བའི་མོ་ཊ་བརྒྱ་ཕྲག་མང་པོ་འབྱོར་བཞིན་པ་རེད་འདུགཁ་སང་ཕྱི་ཚེས་ ༡༢ ཉིན་རྒྱལ་སྤྱིའི་བོད་དོན་ལས་འགུལ་ཁང་གི་དྲ་གནས་ཐོག་ཏུ་དེ་འབྲེལ་གནས་ཚུལ་སྤེལ་ལ་གཞིགས་ན། ཕྱི་ཟླ་ ༧ པའི་ཟླ་འཇུག་ནས་ལྷ་ས་དང་ཞི་རྩེ། དེ་བཞིན་མདོ་སྨད་རེབ་གོང་སོགས་ཀྱི་ནང་དུ་བོད་ཀྱི་བདེ་འཇགས་དང་བརྟན་ལྷིང་སྲུང་སྐྱོབ། ཞི་བདེ་ལྡན་པའི་སྤྱི་ཚོགས་ནི་མང་ཚོགས་ཀྱི་རེ་བ་ཡིན། དེ་བཞིན་དམར་ཤོག་ཚོགས་པར་བློ་དད་རྩེ་གཅིག་དང་ཚོགས་པའི་ལས་དོན་གྲུབ་རྒྱུའི་བློ་སེམས་བརྟན་པོ་ཡོད་སྐོར་སོགས་རས་གཞི་དམར་པོའི་ཐོག་བྲིས་པའི་དམག་མིའི་མོ་ཊ་བརྒྱ་ཕྲག་ཁ་ཤས་འབྱོར་བཞིན་པའི་བརྙན་པར་ཐུང་ངུ་ཁག་ཅིག་ཀྱང་འདོན་སྤེལ་གནང་འདུག མོ་ཊ་དེ་དག་ནང་དུ་དྲག་ཆས་དམག་མི་དང་དམག་གི་གོ་མཚོན་ཕོན་ཆེན་འོར་འདྲེན་བྱེད་བཞིན་པ་མངོན་རྒྱུ་ཡོད་པ་མ་ཟད། ས་གནས་བོད་མི་ཚོས་ད་བར་དེ་འདྲ་བྱུང་མྱོང་མེད་པའི་གནད་དོན་ཞིག་ཡིན་པར་འགྲེལ་བརྗོད་གནང་འདུག རྒྱ་གཞུང་དམག་མི་སླེབས་ཐེངས་རེ་རེའི་ནང་རླང་འཁོར་ ༢༠༠ ཙམ་ཡོད་པ་དང། དེ་དག་ལྷ་ས་བརྒྱུད་བོད་རྒྱ་ས་མཚམས་དང་ཐག་ཉེ་བའི་དམག་སྒར་ཆེ་ཤོས་ཉང་ཆུའི་སྟོད་རྒྱུད་ཀོང་པོ་ཁུལ་གྱི་བྲག་གཡབ་གྲོང་སྡེ་ཕྱོགས་སུ་བསྐྱོད་བཞིན་ཡོད་པ་རེད་འདུག རྩ་བའི་དམག་དཔུང་ཕོན་ཆེན་དེ་འདྲ་ཞིག་གློ་བུར་དུ་སླེབས་དགོས་པའི་རྒྱུ་མཚན་གསལ་ཁ་མེད་ཀྱང། གནད་དོན་དབྱེ་ཞིབ་པ་འགས་དེ་དག་དམར་ཤོག་ཚོགས་པས་ཟླ་ ༩ ཚེས་ ༡ སྟེ་རྒྱ་གཞུང་གི་དབྱེ་བའི་བོད་རང་སྐྱོང་ལྗོངས་ཟེར་བ་དེ་དབུ་བརྙེས་ནས་ལོ་ ༥༠ འཁོར་བའི་ཉིན་མོ་ཁེལ་གྱི་ཡོད་པ་དང་བསྟུན། ཤོག་ཚོགས་པའི་ཁྱབ་བསྒྲགས་དང་སྟོབས་ཤུགས་ངོམ་རྒྱུ། དེ་བཞིན་དམག་སྦྱོང་བཅས་ཀྱི་སླད་ཡིན་སྲིད་པའི་ཚོད་དཔག་གནང་བཞིན་འདུག ཟླ་བ་འདིའི་ཚེས་༡༡ ཉིན་རྒྱ་ནག་གཞུང་འབྲེལ་བརྒྱུད་ལམ་ Xinhua ཡི་དྲ་གནས་ཐོག་གནས་ཚུལ་སྤེལ་བའི་གསར་གནས་ལ་གཞིས་ན། རྒྱ་གཞུང་གིས་དབྱེ་བའི་ཟི་ཁྲོན་ཞིང་ཆེན་ཁྲིན་ཏུའུ་གྲོང་ཁྱེར་ཁུལ་དུ་ཡོད་པའི་རྒྱ་ནག་བཅིང་གྲོལ་དམག་སྒར་ཆེ་ཤོས་ཀྱིས་གོ་སྒྲིག་འོག དམག་གི་དངོས་བྱུང་སྦྱོང་བརྡར་ཁག་ལྔ་ཙམ་སྤྲད་ཆར་ཡོད་པ་དང། དེའི་ནང་རྒྱ་ནག་བཅིང་གྲོལ་དམག་གི་རུ་ཁག་ ༡༤༠ ཙམ་ནས་དམག་མི་ཁྱོན་འབུམ་གཅིག་དང་སྟོང་ཕྲག་ ༤༠ ཙམ་ནས་མཉམ་ཞུགས་བྱེད་རྒྱུ་ཡིན་སྐོར་འཁོད་པ་མ་ཟད། དེ་བས་ཀྱང་བོད་རང་སྐྱོང་ལྗོངས་དབུ་བརྙེས་ནས་ལོ་ ༥༠ འཁོར་བའི་ཉིན་མོ་སྲུང་བརྩི་བྱ་འཆར་དང་འབྲེལ། རྒྱ་གཞུང་བརྒྱུད་ལམ་ཁག་གི་ནང་དུ་བདེ་འཇགས་དང་བརྟན་ལྷིང་སྲུང་སྐྱོབ་སོགས་ཀྱི་ཐོག་ལ་འགྲེལ་བརྗོད་ཤུགས་ཆེར་བྱེད་བཞིན་པ་རེད།

ཁམས་ནང་ཆེན་ཁུལ་གྱི་བོད་མི་ཚོར་རྒྱ་གཞུང་ཉེན་རྟོག་པས་གཅར་བརྡུང་བཏང་སྟེ་བོད་མི་ ༣༠ ལྷག་ལ་རྨས་སྐྱོན་ཚབས་ཆེ་ཕོག་འདུག

བོད་མདོ་ཁམས་ནང་ཆེན་ཁུལ་གྱི་བོད་མི་ཚོར་རྒྱ་ནག་གཞུང་ཉེན་རྟོག་པས་བཙན་གནོན་གྱིས་གཅར་བརྡུང་བཏང་ནས་བོད་མི་ ༣༠ ལྷག་ལ་རྨས་སྐྱོན་ཚབས་ཆེ་ཕོག་པས་མྱུར་སྐྱོབས་སླད་སྨན་ཁང་དུ་སྐྱེལ་དགོས་པའི་གནས་ཚུལ་ཐོན་ཡོད་པ་རེད་འདུག ཟླ་འདིའི་ཕྱི་ཚེས་ ༡ ཉིན་རྒྱ་ནག་གཞུང་གིས་བརྒྱད་གཅིག་དམག་མིའི་དུས་ཆེན་སྐབས་ཁམས་ནང་ཆེན་རྫོང་ཁོངས་སུ་རྫོང་ཆེ་ཆུང་མི་འདྲ་བ་བཅུ་ཙམ་ཡོད་པའི་ནང་ནས་ཀ་གཞུང་རྫོང་དུ་དུས་སྟོན་ཚོགས་དགོས་པའི་བཀའ་རྒྱ་ཕབ་པ་དང་སྦྲགས་རྒྱ་གཞུང་གིས་དུས་སྟོན་དེ་ནི་བོད་མི་རིགས་ཀྱི་རིག་གནས་དར་སྤེལ་ཆེད་ཡིན་ཚུལ་བཤད་ནས་བོད་མི་ཁྱིམ་ཚང་སོ་སོའི་མཆོར་ཆས་ལེགས་སྤྲས་ཀྱིས་གསལ་སྟོན་བྱ་དགོས་པ་དང་། དེ་བས་ཀྱང་སྲོལ་རྒྱུན་ལག་རྩལ་ཁག་འགྲེམས་སྟོན་བྱེད་དགོས་ཀྱི་འདུག་ཀྱང།ནང་ཆེན་རྫོང་དུ་ཚེས་གཅིག་ནས་གསུམ་བར་རིག་གནས་དར་སྤེལ་ཞེས་པའི་དུས་སྟོན་ཚོགས་བཞིན་པའི་རིང་ལ་ས་གནས་བོད་མི་ཚོས་སྤྱིར་བཏང་གི་བོད་པའི་གྱོན་ཆས་གོན་པ་མ་གཏོགས་དེ་མིན་སྟག་སྤགས་དང་གཟིགས་པགས་ཀྱིས་བརྒྱན་པའི་གྱོན་གོས་རིགས་གྱོན་མེད་པ་དང། མགོ་དང་། སྐེ། ལག་པ་སོགས་ལུས་པོ་ཡོངས་རྫོགས་གཟི་དང་བྱུ་རུ། དེ་བཞིན་སྤོས་ཤེལ་ལ་སོགས་པའི་མཆོར་ཆས་གྱོན་མེད་པ་མ་ཟད། བོད་མི་བསམ་ཤེས་ཅན་འགས་ད་ལན་གྱི་དུས་སྟོན་དེའི་དམིགས་ཡུལ་ལེགས་པོ་ཞིག་མེད་སྟབས། ང་ཚོས་གཟབ་གཟབ་བྱེད་དགོས་ཀྱི་འདུག་ཅེས་ཕན་ཚུལ་གླེང་རེས་བྱས་པའི་སྐད་ཆ་དེ་རིམ་བཞིན་ཁྱབ་བརྡལ་སོང་བར་བརྟེན་ཚེས་གསུམ་གྱི་ཉིན་གུང་དང་ཚེས་བཞིའི་མཚན་མོ་བཅས་སུ་རྒྱ་གཞུང་ཉེན་རྟོག་པས་དོན་མེད་བོད་མི་ཚོར་མེ་མདའ་དང། གློག་རྒྱུགས་སོགས་གོ་མཚོན་སྤྱོད་ནས་བོད་མི་དེ་དག་ལ་མི་སྤྱོད་ལས་འདས་པའི་བཙན་གནོན་ཐོག་དུས་སྟོན་ཚོགས་སའི་མང་ཚོགས་ཉལ་གུར་ནང་ཡོང་ནས་རྣམ་འགྱུར་ལེགས་པོ་མེད་ལུགས་རྒྱུ་མཚན་དུ་ཁྱེར་ནས་གཅར་བརྡུང་ཚད་མེད་བཏང་ཡོད་པ་རེད་འདུག དུས་མཚུངས་སུ་ཟླ་༨ ཚེས་ ༡ ཉིན་རྒྱ་གཞུང་གིས་བཙན་དབང་འོག་ཁམས་འབྲི་རུའི་བོད་མི་རྣམས་ལ་གཅན་གཟན་གྱི་པགས་རིགས་གྱོན་བཅུག་པ་དང། ཅི་ལྟེ་བོད་མི་དེ་དག་ནས་དང་ལེན་གྱིས་ས་གནས་སུ་བྱེད་དགོས་པ་བཞིའི་བཀོད་ཁྱབ་འོག གཞས་སྣ་འཁྲབ་སྟོན་པས་གཅན་གཟན་གྱི་པགས་རིགས་གྱོན་དགོས་པ་དང་དེའི་ཚེ་མང་ཚོགས་ཚོས་ཀྱང་ལྟད་མོ་བལྟ་བར་མཉམ་ཞུགས་མ་བྱེད་ཚེ་ཁུལ་དེའི་བོད་མིའི་འཚོ་རྟེན་གཙོ་བོ་་དབྱར་རྩ་དགུན་འབུ་རྐོ་མི་ཆོག་པའི་སྡིག་ར་སྐུལ་འདུག དེ་ལྟར་བྱེད་དོན་གཙོ་བོ་ནི་༸གོང་ས་༸སྐྱབས་མགོན་ཆེན་པོ་མཆོག་གིས་ ༢༠༠༦ ལོར་རྒྱ་གར་ལྷོ་ཕྱོགས་དཔལ་ལྡན་འབྲས་སྤུངས་སུ་དུས་དབང་ཐེངས་ ༣༠ པའི་སྐབས་བོད་མི་རྣམས་ལ་གཅན་གཟན་གྱི་པགས་རིགས་སྐོར་བླང་དོར་གྱི་བཀའ་སློབ་བསྩལ་མ་ཐག་མདོ་ཁམས་འབྲི་རུ་གཙོས་པའི་བོད་ས་ཡོངས་ནས་མགོན་པོ་༸གང་ཉིད་མཆོག་གི་བཀའ་དགོངས་ཇི་བཞིན་གཅན་གཟན་གྱི་པགས་རིགས་དང་གྲི་སོགས་གོ་མཚོན་རིགས་མེར་བསྲེགས་གནང་ཡོད་པ་རེད།

རྒྱ་གཞུང་གིས་པ་སངས་དབང་ཕྱུག་ལགས་བཙོན་གྲོལ་བཏང་འདུག

བོད་མདོ་ཁམས་ཏྲེ་ཧོར་དཀར་མཛེས་ནས་ཡིན་པའི་བོད་མི་ཚོང་པ་པ་སངས་དབང་ཕྱུག་ལགས་རྒྱ་གཞུང་ཉེན་རྟོག་པས་ཟླ་བ་གཅིག་ལྷག་བཙན་བཀག་འོག་བཙོན་འཇུག་བྱས་རྗེས་གློད་བཀྲོལ་བཏང་ཡོད་པ་རེད། ཟླ་ ༨ ཕྱི་ཚེས་ ༦ ཉིན་པ་སངས་དབང་ཕྱུག་ལགས་རྒྱ་གཞུང་ཉེན་རྟོག་པས་ཟླ་བ་གཅིག་ལྷག་བཙན་བཀག་འོག་བཙོན་འཇུག་བྱས་རྗེས་གློད་བཀྲོལ་བཏང་འདུག རྩ་བའི་ཁོང་རྒྱ་གཞུང་ཉེན་རྟོག་པས་བཙན་ཁྲིད་ཀྱིས་འཛིན་བཟུང་བྱ་དོན་ནི། འདི་ལོ་ཟླ་ ༧ ཕྱི་ཚེས་ ༦ ཉིན་༸གོང་ས་མཆོག་དགུང་གྲངས་ ༨༠ ཕེབས་པའི་༸སྐུའི་འཁྲུངས་སྐར་སྐབས་རྒྱ་གཞུང་ཉེན་རྟོག་མི་སྣས་མདོ་ཁམས་དཀར་མཛེས་ཁུལ་དུ་འདི་ལོའི་༸སྐུའི་འཁྲུངས་སྐར་ཉིན་བསང་གསོལ་གཏང་མི་ཆོག་པའི་བཙན་བཀའ་ཕབ་ཡོད་ཀྱང་ཁོང་གིས་བཙན་བཀའ་ཕབ་པར་ལྟོས་མེད་ཀྱིས་བོད་ཆས་གཙང་བཞེས་ཐོག་དགོན་ཁག་ཕེབས་པ་དང་བསང་གསོལ་གཏོང་བ་དེ་ནི་ཆབ་སྲིད་ཀྱི་ནག་ཉེས་ཤིག་ལ་ངོས་འཛིན་བྱས་པར་བརྟེན་ཟླ་ ༧ ཕྱི་ཚེས་ ༧ ཉིན་བཙོན་འཇུག་བྱས་པ་ཞིག་ཡིན་འདུག རྩ་བའི་་པ་སངས་དབང་ཕྱུག་ལགས་ཀྱིས་ ༢༠༡༤ ཟླ་ ༡༠ ཚེས་ ༤ ཉིན་རྒྱ་གཞུང་ལ་བོད་ལ་རང་དབང་དགོས། ༸གོང་ས་༸སྐྱབས་མགོན་ཆེན་པོ་མཆོག་བོད་ལ་གདན་འདྲེན་ཞུ་དགོས་པ་སོགས་འཁོད་པའི་འབོད་ཚིག་བྲིས་པའི་ཕྲད་དར་སྣམས་ནས་དཀར་མཛེས་རྫོང་གི་ཁྲོམ་གཞུང་དུ་ཞི་རྒོལ་གྱི་རྔམ་སྟོན་གནང་བའི་རྗེས་རྒྱ་གཞུང་ཉེན་རྟོག་པས་ཁོང་ཟླ་ཤས་རིང་འཛིན་བཟུང་བྱས་རྗེས་གློད་བཀྲོལ་བཏང་ཡོད་ཀྱང་ལོ་གཅིག་རིང་བལྟ་སྲུང་ཞིབ་འཇུག་བྱ་རྒྱུ་དང་ཅི་ཏེ་གནས་ཚུལ་ཕྲད་ཚེ་སླར་བཙོན་འཇུག་བྱ་རྒྱུའི་ཉེན་བརྡ་ཞིག་བཏང་འདུག འདི་ལོའི་ཟླ་ ༧ ཚེས་ ༦་ཉིན་བཙོན་འཇུག་བྱས་པ་དེ་ཐེངས་གཉིས་པ་དེ་ཆགས་ཡོད་པ་རེད་འདུག དེ་བཞིན་ཁོང་གི་སྤུན་མཆེད་བཙུན་མ་དཔལ་དབང་ལགས་ཀྱང་ ༢༠༠༨ ལོའི་ས་བྱི་ཞི་རྒོལ་ཆེན་མོའི་ནང་མཉམ་ཞུགས་གནང་སྟབས་ལོ་གཉིས་དང་ཕྱེད་ཙམ་བཙོན་འཇུག་བྱས་རྗེས་གློད་བཀྲོལ་བཏང་ཡོད་ཀྱང་བཙོན་ཁང་དུ་སྡུག་སྦྱོང་ཚད་མེད་བཏང་སྟབས་ད་ལྟའི་མཆར་ཁོང་གི་སྐུ་གཟུགས་ཀྱི་གནས་སྟངས་ཤིན་ཏུ་སྐྱོ་པོ་ཆགས་ཡོད་པ་རེད་འདུག

སྤྲུལ་སྐུ་བསྟན་འཛིན་བདེ་ལེགས་མཆོག་གི་རྗེས་འཇུག་དད་ལྡན་པ་ཚོར་རྒྱ་གཞུང་གིས་ཆབ་སྲིད་ཀྱི་བསམ་བློ་སྤེལ་བཞིན་འདུག

སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་རྒྱ་གཞུང་གིས་བཙན་འོག་ཏུ་བཙོན་ཁང་ནང་བཀྲོངས་པ་མ་ཟད། ཁོང་གི་སྐུ་ཕུང་ཀྱང་ནང་མིར་ཕྱིར་སྤྲོད་མེད་པའི་གནས་ཚུལ་ཞིག་ཐོན་རྗེས་ཁོང་གི་མ་དགོན་ཆགས་སའི་འབྲོལ་ཁུལ་དུ་རྒྱ་གཞུང་གིས་དད་ལྡན་མང་ཚོགས་ཚོར་ཆབ་སྲིད་ཀྱི་བསམ་བློ་གསར་པ་ཞིག་སྤེལ་ཏེ་དཀའ་ཚེགས་ཆེན་པོ་འཕྲད་བཞིན་འདུག སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་རྒྱ་གཞུང་གིས་བཙན་འོག་ཏུ་བཙོན་ཁང་ནང་སྐུ་གཟུགས་ཤོར་བའི་རྗེས་ལ་རྒྱ་གཞུང་གིས་དམ་དྲག་འོག་བརྒྱུད་ལམ་ཁག་བཀག་སྡོམ་བྱས་སྟབས་ཁུལ་དེའི་མང་ཚོགས་ཚོར་དཀའ་ཚེགས་འཕྲད་མིན་གྱི་གནས་སྟངས་ཇི་ཡིན་ཤེས་རྟོགས་གང་ཡང་བྱུང་མེད་ཀྱང། ཉེ་ཆར་དེ་འབྲེལ་གྱི་གནས་ཚུལ་བྱུང་དོན་ལ་གཞིགས་ན། རིན་པོ་ཆེ་ཁོང་གི་མ་དགོན་ཎ་ལེནྡྲ་ཐེག་ཆེན་བྱང་ཆུབ་ཆོས་གླིང་གི་ཉེ་འདབས་སུ་ཡོད་པའི་འབྲོག་སར་རྒྱ་གཞུང་གིས་དམག་མི་ཆེད་གཏོང་གིས་ཉིན་ལྟར་འབྲོག་མི་ཚོར་སྔོན་འགྲོའི་སློབ་གསོ་ཞེས་པའི་ཆབ་སྲིད་ཀྱི་བསམ་བློ་གསར་པ་ཞིག་སྤེལ་ཏེ་སྤྲུལ་སྐུ་བསྟན་འཛིན་བདེ་ལེགས་མཆོག་གི་གནད་དོན་མཐའ་དག་ཐག་གཅོད་གཙང་མ་ཟིན་ཡོད་པས་ཁོང་ནི་སྙུང་གཞི་རྐྱེན་པས་སྐུ་གཤེགས་པ་དང་སླད་མར་དེའི་ཐད་མང་ཚོགས་ཚོས་གཟིང་ཆ་དང་གླེང་སློང་གང་ཡང་བྱ་མི་ཆོག་པའི་གནད་དོན་སོགས་ཡིན་པ་རེད་འདུག གཞན་ཡང་ཡུལ་མི་སྐྱེས་པ་ཚོར་ཉིན་ལྟར་དམག་སྦྱོང་བྱ་བཅུག་ཏེ་སྡུག་སྦྱོང་ཚད་མེད་གཏོང་བཞིན་ཡོད་པ་དང། ལྷག་དོན་དུ་སློབ་གསོ་དེའི་རིགས་ཉན་འཇོག་མ་བྱེད་ཚེ་ས་གནས་རྫོང་དུ་བཀག་ཉར་གྱིས་འདྲི་རྩད་བྱས་པ་སོགས་སྔར་གྱི་རིག་གནས་གསར་བརྗེ་ཆེན་མོ་སླར་དངོས་སུ་ལངས་པ་ལྟར་དཀའ་ཚེགས་ཤིན་ཏུ་ཆེ་བའི་གནས་སུ་ལྷུང་ཡོད་པ་རེད་འདུག རིན་པོ་ཆེ་མཆོག་གི་ཆེད་རྒྱ་གཞུང་ལ་ཞུ་གཏུགས་གནང་མཁན་ཚོའི་ནང་མིར་ཉིན་ལྟར་ཁོང་གི་གནས་དོན་ཐད་བསམ་ཚུལ་ཇི་ཡོད་ཀྱི་འདྲི་རྩད་བྱས་ནས་སུན་གཙེར་ཆེན་པོ་བཟོ་བཞིན་ཡོད་པ་དང། ཁུལ་དེར་རྒྱ་མི་དམག་མི་སྔར་ལྷག་སྤོ་ཤུགས་ཐོག་རིན་པོ་ཆེ་མཆོག་གི་དགོན་པར་འབྲོག་མི་གཞན་བསྐྱོད་པར་རྒྱ་གཞུང་ལ་ཆོག་མཆན་ཞུ་དགོས་པ་དང་རིན་པོ་ཆེ་ཁོང་གི་སྲིང་མོ་དང་ཚ་མོ་གཉིས་གློད་བཀྲོལ་བཏང་ནས་ཕ་ཡུལ་དུ་འབྱོར་ཡོད་ཀྱང་ཕྱི་བསྐྱོད་མི་ཆོག་པ་དང་ཕྱི་མིར་འབྲེལ་བ་བྱ་མི་ཆོག་པའི་དམ་དྲག་འོག་བཞག་ཡོད་པ་མ་ཟད། དེབས་ཀྱང་ཡུལ་མི་ཚོ་ཆེད་སྐྱོར་གྱིས་དེ་འབྲེལ་གཏམ་གླེང་གང་བྱུང་བྱ་མི་ཆོག་པའི་བཙན་བཀའ་སོགས་བཏང་ཡོད་པ་རེད་འདུག

རྒྱ་གཞུང་གིས་པ་སངས་དབང་ཕྱུག་ལགས་སླར་ཡང་འཛིན་བཟུང་བྱས་འདུག

བོད་མདོ་ཏྲེ་ཧོར་ཁམས་དཀར་མཛེས་ནས་ཡིན་པའི་བོད་མི་ཚོང་པ་སངས་དབང་ཕྱུག་ལགས་སླར་ཡང་རྒྱ་གཞུང་ཉེན་རྟོག་པས་འདི་ལོ་ ཟླ་ ༧ ཚེས་ ༦ ཏེ་༸གོང་ས་མཆོག་གི་༸སྐུའི་འཁྲུངས་སྐར་ཉིན་བཙན་ཁྲིད་ཀྱིས་འཛིན་བཟུང་བྱས་འདུག འདི་ལོ་ཟླ་ ༧ ཕྱི་ཚེས་ ༦ ཉིན་༸གོང་ས་མཆོག་གི་༸སྐུའི་འཁྲུངས་སྐར་སྐབས་རྒྱ་གཞུང་ཉེན་རྟོག་མི་སྣས་མདོ་ཁམས་དཀར་མཛེས་ཁུལ་དུ་འདི་ལོའི་༸སྐུའི་འཁྲུངས་ཉིན་བསང་གསོལ་གཏང་མི་ཆོག་པའི་བཙན་བཀའ་ཕབ་ཡོད་ཀྱང་ཁོང་གིས་བཙན་བཀའ་ཕབ་པར་ལྟོས་མེད་ཀྱིས་བསང་གསོལ་གཏོང་བ་དེ་ནི་ཆབ་སྲིད་ཀྱི་ནག་ཉེས་ཤིག་ལ་ངོས་འཛིན་བྱས་ཏེ་བཙོན་འཇུག་བྱས་པ་ཞིག་ཡིན་འདུག འོན་ཀྱང་ད་ལྟའི་ཆར་ཁོང་གི་གནས་བབ་ཇི་ཆགས་སོགས་ཀྱི་གནས་ཚུལ་གང་ཡང་ཤེས་རྟོགས་བྱུང་མི་འདུག རྩ་བའི་་པ་སངས་དབང་ཕྱུག་ལགས་ཀྱིས་ ༢༠༡༤ ཟླ་ ༡༠ ཚེས་ ༤ ཉིན་རྒྱ་གཞུང་ལ་ཞི་རྒོལ་བྱ་རྒྱུའི་འབོད་ཚིག་བྲིས་པའི་ཕྲད་དར་སྣམས་ནས་དཀར་མཛེས་རྫོང་གི་ཁྲོམ་གཞུང་དུ་ཞི་རྒོལ་གྱི་རྔམ་སྟོན་གནང་བའི་རྗེས་རྒྱ་གཞུང་ཉེན་རྟོག་པས་ཁོང་ཟླ་ཤས་རིང་འཛིན་བཟུང་བྱས་རྗེས་གློད་བཀྲོལ་བཏང་ཡོད་ཀྱང་ལོ་གཅིག་རིང་བལྟ་སྲུང་ཞིབ་འཇུག་བྱ་རྒྱུ་དང་ཅི་ཏེ་གནས་ཚུལ་ཕྲད་ཚེ་སླར་བཙོན་འཇུག་བྱ་རྒྱུའི་ཉེན་བརྡ་ཞིག་བཏང་འདུག ད་ལན་གྱི་བཙོན་འཇུག་བྱས་པ་དེ་ཐེངས་གཉིས་པ་དེ་ཆགས་ཡོད་པ་རེད་འདུག དེ་བཞིན་ཁོང་གི་སྤུན་མཆེད་བཙུན་མ་དཔལ་དབང་ལགས་ཀྱང་ ༢༠༠༨ ལོའི་ས་བྱི་ཞི་རྒོལ་ཆེན་མོའི་ནང་མཉམ་ཞུགས་གནང་སྟབས་ལོ་གཉིས་དང་ཕྱེད་ཙམ་བཙོན་འཇུག་བྱས་རྗེས་གློད་བཀྲོལ་བཏང་ཡོད་ཀྱང་བཙོན་ཁང་དུ་སྡུག་སྦྱོང་ཚད་མེད་བཏང་སྟབས་ད་ལྟའི་མཆར་ཁོང་གི་སྐུ་གཟུགས་ཀྱི་གནས་སྟངས་ཤིན་ནཏུ་སྐྱོ་པོ་ཆགས་ཡོད་པ་རེད་འདུག

དགེ་འདུན་པ་བློ་བཟང་ཚེ་རིང་ལགས་བཙོན་གྲོལ་བཏང་འདུག

བོད་མདོ་སྨད་མགོ་ལོག་ཁང་གསར་ནས་ཡིན་པ། རང་ལོ་ ༣༦ སོན་པའི་གྲྭ་བློ་ཚེ་འམ་བློ་བཟང་ཚེ་རིང་ལགས་ རྒྱ་གཞུང་ཉེན་རྟོག་པས་བཙན་ཁྲིད་འོག་ཟླ་བ་གཉིས་ཙམ་རིང་བཀག་ཉར་བྱས་རྗེས་ཟླ་འདིའི་ཕྱི་ཚེས་ ༤ ཉིན་བཙོན་ནས་གློད་བཀྲོལ་བཏང་ཡོད་པ་རེད། འདི་ལོ་ཟླ་ ༦ ཚེས་ ༡༡ ཉིན་རྒྱ་གཞུང་ཉེན་རྟོག་མི་སྣས་གློ་བུར་དུ་གྲྭ་བློ་བཟང་ཚེ་རིང་ལགས་ཀྱི་གྲྭ་ཤག་སྔོག་གཤེར་གྱིས་ཁོང་གི་ཁ་པར་དང་རྩིས་འཕྲུལ།དེ་བཞིན་ཕྱག་དཔེ་སོགས་ཅ་དངོས་མང་དག་ཞིག་བཙན་འཕྲོག་བྱས་པ་མ་ཟད། ཉེན་རྟོག་མི་སྣས་བཙོན་ཁང་དུ་ཁོང་ལ་འདྲི་རྩད་ལན་མང་བྱས་མཐར་ཁོང་གིས་༸གོང་ས་མཆོག་གི་༸སྐུའི་གྱ་སྟོན་སྲུང་བརྩི་ཞུ་ཕྱིར་༸རྒྱལ་བའི་བཞུགས་ཁྲི་བཤམས་པ་དང་སེམས་ཅན་སྲོག་བླུ་ཚེ་ཐར་བཏང་བའི་སྡིག་སྤོང་དགེ་བསྒྲུབ་ཀྱི་ཉེས་འཛུགས་འོག་འཛིན་བཟུང་བྱས་པ་ཞིག་རེད་འདུག རྩ་བའི་གྲྭ་བློ་ཚེ་ལགས་ནི་དེ་སྔོན་ ༢༠༡༡ ལོར་ལྔ་པ་ཀིརྟི་དགོན་པའི་རྒྱལ་གཅེས་པ་གྲྭ་ཕུན་ཚོགས་ལགས་ཀྱིས་བོད་དོན་སླད་སྐུ་ལུས་མེར་བསྲེགས་གནང་ཚེ་དགོན་པར་རྒྱ་གཞུང་དམག་མི་འབྱོར་ཏེ་ས་གནས་དགོན་པའི་དགེ་འདུན་པ་མ་ཡིན་པ་རྣམས་འཛིན་བཟུང་བྱེད་སྐབས་ཁོང་ཡང་དེའི་སྐབས་འཛིན་བཟུང་བྱས་མྱོང་ཡོད་པ་དང། ད་ལན་གྱི་འཛིན་བཟུང་དང་གློད་བཀྲོལ་དེ་ཐེངས་གཉིས་པ་དེ་ཆགས་ཡོད་པ་རེད་འདུག

རྒྱ་གཞུང་གིས་བོད་མི་འབྲོག་པ་ཚོའི་ཐོག་སྲིད་བྱུས་གསར་པ་ཞིག་འཁྱེར་དགོས་རྒྱུ་ཛ་དྲགས་ཡིན་པ་གསུངས་སོང།

ཉེ་ལམ་རྒྱ་གཞུང་གིས་བོད་ནང་ཕྱི་རྒྱལ་གསར་འགོད་པ་ཆེད་གཏོང་གིས་རྒྱལ་སྤྱིའི་ཁྲོད་རྒྱ་གཞུང་གིས་བོད་ཀྱི་འབྲོག་པའི་ཐོག་འཛིན་པའི་གཞི་སྤོས་སྲིད་བྱུས་ཀྱི་འགྲུབ་འབྲས་ཡག་པོ་ཐོན་ཡོད་ཡོད་ལུགས་དང། སྲིད་བྱུས་དེའི་འོག་བོད་མི་འཚོ་བའི་གནས་སྟངས་ཀྱང་ཡག་པོ་ཡིན་ལུགས་ཁག་གསལ་སྟོན་བྱས་འདུག འོན་ཀྱང་བཞུགས་སྒར་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་དོན་དངོས་ཐོག་འདས་པའི་ལོ་ངོ་༢༠ལྷག་རིང་རྒྱ་གཞུང་གིས་བོད་མི་འབྲོག་པ་ཚོའི་ཐོག་འཛིན་པའི་སྲིད་བྱུས་དེ་ད་བར་ལམ་ལྷོང་གང་ཡང་བྱུང་མེད་སྐོར་གསལ་སྟོན་གནང་བ་དང། ད་ལྟའི་དུས་སྐབས་འདིར་རྒྱ་གཞུང་གིས་བོད་མི་འབྲོག་པ་ཚོའི་ཐོག་སྲིད་བྱུས་གསར་པ་ཞིག་འཁྱེར་དགོས་རྒྱུ་ཛ་དྲག་གི་གནད་དོན་ཞིག་ཡིན་པ་གསུངས་སོང། འདས་པའི་ལོ་ཤས་ནང་རྒྱལ་སྤྱིའི་འགྲོ་བ་མིའི་ཐོབ་ཐང་ཁོར་ཡུག་སྲུང་སྐྱོབ་ཚོགས་སྡེ་ཁག་ནས། རྒྱ་གཞུང་གིས་བོད་མི་འབྲོག་པའི་ཐོག་ལག་བསྟར་བྱེད་བཞིན་པའི་གཞི་སྤོས་སྲིད་བྱུས་ཐོག་སྐྱོན་བརྗོད་ཤུགས་ཆེ་བྱེད་བཞིན་ཡོད་པའི་དུས་སྐབས་འདིར། ཉེ་ཆར་རྒྱ་ནག་གཞུང་གིས་ཕྱི་རྒྱལ་གསར་འགོད་པ་རུ་ཁག་ཅིགརང་ལུས་མེར་བསྲེགས་མང་ཤོས་བྱུང་ས་བོད་མདོ་སྨད་རྔ་པ་ས་ཁུལ་གྱི་འབྲོག་པའི་ས་གནས་ཁག་ཅིག་ཏུ་གཞུང་འབྲེལ་སྐོར་བསྐྱོད་ལས་རིམ་ཞིག་གོ་སྒྲིག་བྱས་འདུག ད་ལན་གྱི་སྐོར་བསྐྱོད་དེའི་ནང་ཡོད་པ་ཨ་རིའི་ Wall Street Journal གསར་ཤོག་གྱི་རྒྱ་ནག་ཚན་པའི་གསར་འགོད་པ་ Chun Han Wong ལགས་ཀྱིས་ས་གནས་སུ་དངོས་ཡོད་ཀྱི་གནས་སྟངས་རྒྱུས་ལོན་བྱས་པའི་བརྒྱུད། ཐེངས་དེའི་རྒྱ་གཞུང་ གིས་གོ་སྒྲིག་བྱས་པའི་རྔ་པ་ཁུལ་གྱི་ཉིན་གཉིས་ཀྱི་སྐོར་སྐྱོད་དེ་ཡང་གཙོ་བོ། རྒྱལ་སྤྱིའི་བརྒྱུད་ལམ་ཁག་དུ་རྒྱ་གཞུང་གིས་ད་བར་ལག་བསྟར་བྱེད་བཞིན་འབྲོག་པ་གཞི་སྤོས་ཀྱི་སྲིད་བྱུས་དེ་བརྒྱུད། རྒྱ་ནག་མཐའ་མཚམས་ས་ཁུལ་གྱི་འབྲོག་པའི་མང་ཚོགས་ཚོར་ཕན་ཐོག་ཆེན་པོ་བྱུང་ཡོད་ལུགས་དྲིལ་བསྒྲགས་བྱ་རྒྱུ་ཆེད་ཡིན་པ་རེད་འདུག་ཅེས་འགྲེལ་བརྗོད་བྱས་འདུག ཁོང་གིས་མུ་མཐུད་གསུང་དོན་ལ། ཐེངས་དེའི་སྐོར་སྐྱོད་དེའི་སྐབས་སུ་རྒྱ་གཞུང་གིས་སྔོན་ཚོད་ནས་འདེམས་པའི་ས་ཁུལ་ཁག་ལས། གསར་འགོད་པ་འགྲོ་འདོད་ཡོད་པ་དང། དངོས་ཡོད་ཀྱི་རྩོད་རྙོག་ཡོད་པའི་ས་ཁུལ་ཁག་ཏུ་གནས་སྟངས་ཇི་ཡིན་སོགས་ཀྱི་གནས་ཚུལ་རྒྱུས་ལོན་ཆེད་འགྲོ་བསྐྱོད་ཆོག་པའི་རང་དབང་མེད་པ་མ་ཟད། སྐོར་བསྐྱོད་ཁྲིད་མཁན་དང་གསར་འགོད་པའི་བཅར་འདྲི་བྱེད་སའི་མི་སྣ་ཡང་གཞུང་འབྲེལ་མི་སྣ་དང་གཞུང་ལ་དགའ་མོས་བྱེད་མཁན་ཁོ་ན་ཡིན་སྐོར་ཡང་འགྲེལ་བརྗོད་བྱས་ཡོད་པ་རེད། ཐེངས་དེའི་སྐབས་རྒྱ་གཞུང་གིས་ཕྱི་རྒྱལ་གསར་འགོད་པ་ཚོར་འདས་པའི་ལོ་བཅོ་ལྔའི་ནང་འབྲོག་པ་གཞི་སྤོས་སྲིད་བྱུས་དེའི་ཆེད་ཨ་སྒོར་ས་ཡ་མང་པོ་བཏང་ནས། འབྲོག་པ་འབུམ་གཉིས་ལྷག་ལ་ས་ཆ་གནས་སྤོས་ཀྱིས་གྲོང་ཁྱེར་ནང་གི་འཚོ་བར་རོལ་བཞིན་ཡོད་པ་མ་ཟད། ཤེས་ཡོན་དང་དཔལ་འབྱོར། དེ་བཞིན་འཕྲོད་བསྟེན་སོགས་གང་སྤྱིའི་ཐད་ནས་ཡར་རྒྱས་ཆེན་པོ་ཕྱིན་ཡོད་ལུགས་བརྗོད་ཡོད་ནའང། བཞུགས་སྒར་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་ཚེ་རིང་མཚོ་མོ་ལགས་ཀྱིས་ཉེ་ཆར་ལྟེ་གནས་ཁང་གི་ངོས་ནས་བོད་ནང་འབྲོག་པོ་གཞི་སྤོས་ཀྱི་གནད་དོན་ཐོག་འདོན་སྤེལ་བྱས་པའི་སྙན་ཐོག་ནང་གསལ་ཁག་ལུང་འདྲེན་དང་འབྲེལ། དོན་དངོས་ཐོག་འདས་པའི་ལོ་ངོ་ ༢༠ ལྷག་རིང་རྒྱ་གཞུང་གིས་བོད་མི་འབྲོག་པ་ཚོའི་ཐོག་འཛིན་པའི་སྲིད་བྱུས་འདིར་ད་བར་ལམ་ལྷོང་གང་ཡང་བྱུང་མེད་སྐོར་གསལ་སྟོན་དང་སྦྲགས། ད་ལྟའི་དུས་སྐབས་འདིར་རྒྱ་གཞུང་གིས་བོད་མིའི་འབྲོག་པ་ཚོའི་ཐོག་སྲིད་བྱུས་གསར་པ་ཞིག་འཁྱེར་དགོས་རྒྱུ་ཛ་དྲག་གི་གནད་དོན་ཞིག་ཡིན་པ་གསུངས་པ་མ་ཟད། ད་རེ་རྒྱ་གཞུང་གིས་ངོས་ནས་འབྲོག་པ་གཞི་སྤོས་ཀྱི་གནད་དོན་དང་བོད་ནང་བྱུང་བཞིན་པའི་རང་ལུས་མེར་བསྲེགས་དབར་འབྲེལ་བ་གང་ཡང་མེད་ལུགས་བརྗོད་བྱས་འདུག་ཀྱང་ཚེ་རིང་མཚོ་ལགས་ཀྱིས་དཔེ་མཚོན་དང་སྦྲགས་ནས་དེ་དོན་བདེན་པ་མིན་པའི་གསལ་བཤད་གནང་སོང།

རུང་རྒྱས་ཨ་གྲགས་ནི་ཐང་ལ་འགྱེལ་མ་མྱོང་བའི་བོད་ཀྱི་རྡོ་རིང་ཞིག་རེད་ཅེས་གསུངས་འདུག

བོད་ཀྱི་རྩོམ་པ་པོ་གྲགས་ཅན་ཐེའུ་རང་ལགས་ཀྱིས་རུང་རྒྱས་ཨ་གྲགས་ནི་ཐང་ལ་འགྱེལ་མ་མྱོང་བའི་བོད་ཀྱི་རྡོ་རིང་ཞིག་རེད་ཅེས་གསུངས་འདུག ཟླ་ ༧ ཕྱི་ཚེས་ ༣༡ ཉིན་རྒྱ་ནག་གཞུང་གི་བཙོན་ནས་རྒྱལ་གཅེས་པ་རུང་རྒྱས་ཨ་གྲགས་ལགས་ལོ་བརྒྱད་ཀྱི་བཙོན་འཇུག་དུས་བཀག་གཙང་ཟིན་གྱིས་བཙོན་གྲོལ་ཐོབ་མ་ཐག རྒྱ་གཞུང་གི་བཙོན་ཁང་དུ་ལོ་བཞི་རིང་བཙོན་འཇུག་གི་ངལ་བ་མྱོང་ཡོད་པའི་རྩོམ་པ་པོ་ཐེའུ་རང་ལགས་ཀྱིས་རང་ཉིད་ཀྱི་ཚོར་བ་དང་འབྲེལ། རུང་རྒྱས་ཨ་གྲགས་ལགས་ཀྱི་བོད་མི་རིགས་ལ་བཅང་པའི་སྙིང་སྟོབས་ལ་ཆེ་བསྟོད་ཀྱི་ཚུལ་དུ་རུང་རྒྱས་ཨ་གྲགས་བྲིས་པ་ཞེས་པའི་སྙན་རྩོམ་ཞིག་བྲིས་འདུག སྙན་རྩོམ་དེའི་ནང་ཐེའུ་རང་ལགས་ཀྱིས། རུང་རྒྱས་ཨ་གྲགས་ལགས། བྱ་རྒོད་དང། གཙང་པོ། འབྲོང། དེ་བཞིན་རྡོ་རིང་བཅས་ལ་དཔེ་མཚོན་བཞག་ནས་རྒྱལ་གཅེས་པ་ཁོང་གི་བོད་མི་རིགས་དང་རྒྱལ་ཁབ་ལ་ཞེན་པའི་བརྩེ་སེམས་དང་ཆོད་སེམས་ལ་ཆེ་བསྟོད་ཞུས་འདུག རྩོམ་པ་པོ་ཐེའུ་རང་ལགས་ནི། ཕྱི་ལོ་ ༢༠༠༨ ལོར་ས་བྱི་ཞི་རྒོལ་ཆེནམོའི་སྐབས་རྒྱ་གཞུང་གིས་མི་གསད་ཁྲག་སྦྱོར་དང་བོད་མིའི་དཀའ་སྡུག་མྱོང་བའི་སྐོར་ལ་ཁྲག་ཡིག་ཞེས་པའི་ཕྱག་དེབ་བརྩམས་ཆོས་སྤེལ་བའི་དོན་རྐྱེན་འོག་ལོ་བཞིའི་བཙོན་འཇུག་ཕོག་ནས་སྔ་ལོ་གློད་བཀྲོལ་ཐོབ་པའི་ཆབ་སྲིད་བཙོན་ཟུར་ཞིག་ཡིན་པ་རེད། རུང་རྒྱས་ཨ་གྲགས་ལགས་དང་ཐེའུ་རང་གཉིས་པོ་མཚོ་སྔོན་མི་ཡང་བཙོན་ཁང་ནང་མཉམ་དུ་བཙོན་འཇུག་འོག་མཉམ་གཤིབས་བྱས་མྱོང་ཡོད་པ་རེད། རྩོམ་པ་པོ་ཐེའུ་རང་ལགས་ཀྱིས། དེ་སྔ་རུང་རྒྱས་ཨ་གྲགས་ལགས་དང་བཙོན་ཁང་ནང་ཐོག་མར་ཐུགས་འཕྲད་བྱུང་བ་དང། བཙོན་ཁང་ནང་མཉམ་དུ་ངལ་རྩོལ་ཆེན་པོས་དཀའ་སྡུག་མྱོང་བའི་དུས་ཚོད་ཁག་དྲན་གསོ་བྱས་པ་འབྲེལ། ཁོང་གི་སེམས་ཁོང་ནས་རུང་རྒྱས་ཨ་གྲགས་ནི། བོད་མིའི་མིག་དཔེ་གསོན་པོ་ཞིག་ཡིན་པ་དང། སྐད་ཅིག་ཙམ་ཡང་བྲང་ཁོག་རྒྱ་མཚོ་སྐམ་མ་མྱོང་བའི་རྒད་པོ་ཞིག་དང་དར་ཆ་ཞིག་ཡིན་པ་མ་ཟད། བཙོན་ཁང་ནང་ཁོང་དང་ལྷན་དུ་བསྡད་པའི་དུས་ཡུན་དེའི་ནང། ཁོང་ལ་དྲོད་དང་བོད་མི་ཞིག་ཡིན་པའི་སྤོབས་པ་སོགས་སྤྲོད་བྱུང་ཅེས་གསུངས་འདུག

Latest news