Tibetan Royal Year of 2151 | Year of the Wood Dragon

བོད།

བོད་རང་སྐྱོང་ལྗོངས་དབུ་བརྙེས་བའི་དུས་ཆེན་སྲུང་བརྩི་ཞུས་པ།

དེ་རིང་བོད་རང་སྐྱོང་ལྗོངས་ཟེར་བ་དབུ་བརྙེས་པའི་དུས་ཆེན་སྲུང་བརྩི་ཞུ་བཞིན་པའི་དུས་མཚམས་འདིར། བོད་རང་དབང་ཚོགས་པས་རྒྱ་གཞུང་གིས་བོད་དེ་ཕྱོགས་ཡོངས་ནས་སྒོ་མོ་རྒྱག་ཡོད་པའི་སྐྱོན་བརྗོད་གནང་འདུག དེ་རིང་ཕྱི་ཟླ་ ༩ ཚེས་ ༨ ཉིན་བོད་ཀྱི་རྒྱལ་ས་ལྷ་སའི་ཕོ་བྲང་པོ་ཏཱ་ལ་མདུན་ཐང་དུ་རྒྱ་ནག་གི་རྐང་མཚོ་གནམ་གསུམ་གྱི་དམག་གི་རུ་སྒྲིག་སོགས་གཟིགས་འབུལ་བརྒྱུད། བོད་རང་སྐྱོང་བཙུགས་ནས་ལོ་ ༥༠ འཁོར་བའི་དུས་ཆེན་སྲུང་བརྩི་ཞུས་འདུག་པ་དང། མང་ཚོགས་ཁྲི་གཉིས་ལྷག་འདུ་འཛོམས་བྱས་པའི་མཛད་སྒོའི་ཐོག་རྒྱ་ནག་རྒྱལ་ཡོངས་ཆབ་སྲིད་གྲོས་ཚོགས་ཀྱི་ཚོགས་གཙོ་ཡུས་ཀྲེང་ཧྲེང་གིས་གཙོས་པའི་ཆེས་མཐོའི་དཔོན་རིགས་ཁག་ཅིག་དང་རང་སྐྱོང་ལྗོངས་ཀྱི་འགོ་ཁྲིད་ཁྲེན་ཆོན་གོ་སོགས་གནད་ཡོད་མི་སྣ་བརྒྱ་ཁྲག་ཁ་ཤས་སླེབས་ཡོད་པ་རེད་འདུག ཡུས་ཀྲེང་ཧྲེང་གི་གཏམ་བཤད་བྱས་པའི་ཁྲོད་འདས་པའི་ལོ་ངོ་༥༠ དེའི་རིང་རྒྱ་གཞུང་གིས་བོད་ནང་དཔལ་འབྱོར་ཡར་རྒྱས་དང་འཛུགས་སྐྲུན་འཕེལ་རྒྱས་ལ་འོད་སྟོང་འབར་བའི་གྲུབ་འབྲས་ཐོན་ཡོད་པར་བསྔགས་བརྗོད་དང་སྦྲགས། འདས་པའི་ལོ་དུས་དེའི་ནང་བོད་རྙིང་པ་རྗེས་ལུས་ཅན་དེ་བཞིན་ཀྲུང་དབྱང་གི་ཁྱད་ཆོས་ལྡན་པའི་སྤྱི་ཚོགས་རིང་ལུགས་སྔོན་ཐོན་ཅན་ཞིག་ཏུ་གྱུར་ཐུབ་ཡོད་པ་བཤད་འདུག ད་དུང་རྒྱལ་ཡོངས་ཆབ་སྲིད་གྲོས་ཚོགས་ཀྱི་ཚོགས་གཙོ་ཡུས་ཀྲེང་ཧྲེང་གིས་དེ་རིང་གི་མཛད་སྒོའི་འདིའི་ཐོག་ནས་རྒྱ་ནག་གི་ཆིག་སྒྲིལ་ལ་ཆེ་བསྟོད་ཞུས་པ་དང་ཆབས་ཅིག་ཏུ། རྒྱལ་ཁབ་ཁ་བྲལ་དང་ཆིག་སྒྲིག་གཏོར་བཤིག་གཏོང་མཁན་ཏཱ་ལའི་རུ་ཚོགས་སོགས་ལ་ནུས་པ་མཉམ་དུ་སྤུངས་ཐོག་ནས་གདོང་ལེན་དང་ཁ་གཏད་གཅོག་དགོས་གལ་ཡིན་པ་ནན་བརྗོད་བྱས་འདུག བོད་ཀྱི་རྒྱལ་ས་ལྷ་སར་བོད་རང་སྐྱོང་ལྗོངས་དབུ་བརྙེས་པའི་ཉིན་མོ་སྲུང་བརྩི་ཞུ་བཞིན་པ་ཡོད་པ་འདིའི་བར་ན་དབྱིན་ཡུལ་ནང་དུ་རྟེན་གཞི་བྱས་པའི་བོད་རང་དབང་ཚོགས་པས་ (Free Tibet) རྒྱ་གཞུང་གི་དུས་ཆེན་འདི་ལ་སྐྱོན་བརྗོད་དང་སྦྲགས། བོད་ནང་གི་བོད་མི་རྣམས་ལ་འགྲོ་བསྐྱོད་རང་དབང་མེད་པར་དམ་བསྒྲགས་དང་གཉའ་གནོན་མྱོང་མུས་ཡིན་པ་མ་ཟད། བོད་དེ་བཞིན་ཕྱི་རྒྱལ་གྱི་སྐུ་ཚབ་དང་རང་དབང་ཅན་གྱི་གསར་ཁང། དེ་བཞིན་འགྲོ་བ་མིའི་ཐོབ་ཐང་ཚོགས་ཁག་ཀུན་ལ་སྒོ་མོ་རྒྱབ་ཡོད་པ་གསུངས་འདུག ད་དུང་ཚོགས་དེ་ནས་རྒྱ་གཞུང་ལ་གལ་ཏེ་དོན་ངོ་མའི་ཐོག་བོད་ནང་གི་བོད་མི་རྣམས་ལ་སྤྲོ་སྣང་ལྡན་པའི་གཏམ་བཟང་རིགས་ཡོད་ན། འཛམ་གླིང་གི་གསར་འགོད་པ་བོད་ནང་དུ་རང་དབང་ངང་འགྲོ་བསྐྱོད་མི་ཆོག་པ་བཟོ་དགོས་གང་ཡིན་ཅེས་དྲི་བ་ཡང་བཏང་འདུག ལྷག་པར་དུ་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ཟླ་བ་འདིའི་ཚེས་ ༡ ཉིན་རྒྱ་གཞུང་གིས་རྒྱབ་ཤ་དཀར་པོར་དོན་ཚན་བཞིའི་སྟེང་ནས་ལན་འདེབས་གསལ་བསྒྲགས་གནང་སྐབས། རྒྱ་གཞུང་གིས་བོད་རང་སྐྱོང་ལྗོངས་དབུ་བརྙེས་བའི་དུས་ཆེན་གྱི་འཛུམ་མདངས་འདི་ནི་བཙན་དབང་གི་འཛུམ་མདངས་ཤིག་ཡིན་པ་གསུངས་ཡོད་པ་རེད།

གྲྭ་བློ་བཟང་སྐལ་བཟང་ལགས་དང་བོད་མི་གཞན་ཞིག་རྒྱ་གཞུང་ཉེན་རྟོག་པས་འཛིན་བཟུང་བྱས་འདུག

རྔ་པ་ཀིརྟི་དགོན་གྱི་གྲྭ་བློ་བཟང་སྐལ་བཟང་ལགས་ཀྱིས་རྔ་པ་རྫོང་མཁར་གྱི་སྲང་ལམ་དུ་ལག་གཉིས་ཀྱིས་༸གོང་ས་མཆོག་གི་སྐུ་པར་མཁའ་དབྱིངས་སུ་འཕྱར་བཞིན་བོད་ལ་རང་དབང་དགོས་སོགས་ཀྱི་ཞི་རྒོལ་སྐད་འབོད་གནང་པས་རྒྱ་གཞུང་གི་ཉེན་རྟོག་པས་ཁོང་འཛིན་བཟུང་བྱས་འདུག ཁ་སང་ཟླ་ ༩ ཕྱི་ཚེས་ ༧ ཉིན་བོད་རྔ་པ་ཀིརྟི་དགོན་གྱི་རང་ལོ་ ༡༩ སོན་པའི་གྲྭ་བློ་བཟང་སྐལ་བཟང་ལགས་ཀྱིས་རྔ་པ་རྫོང་མཁར་གྱི་སྲང་ལམ་ནས་ལག་གཉིས་ཀྱིས་༸གོང་ས་མཆོག་གི་སྐུ་པར་མཁའ་དབྱིངས་སུ་འཕྱར་བཞིན་”བོད་ཁ་བ་གངས་ཅན་པ་ལ་རང་དབང་དགོས། རྒྱལ་དབང་བསྟན་འཛིན་རྒྱ་མཚོ་སྐུ་ཚེ་ཁྲི་ལོ་བརྟན་པར་ཤོག”ཞེས་རྒྱ་གཞུང་ལ་ཞི་རྒོལ་སྐད་འབོད་གནང་སྐབས་ས་གནས་བོད་མི་ཚོས་༸གོང་ས་མཆོག་གི་མཚན་འབོད་གནང་བཞིན་རྒྱ་གཞུང་ཉེན་རྟོག་པས་ང་ཚོ་གསོན་པོ་གནས་བཅུག་གི་མེད་སྐོར་སོགས་ཀྱི་ཀི་སྒྲ་སྒྲོག་བཞིན་ཞི་རྒོལ་གནང་ཡང་དུས་ཚོད་རིང་པོ་མ་ཐོགས་པར་རྒྱ་གཞུང་གི་དྲག་ཆས་ཉེན་རྟོག་པས་དགེ་འདུན་པ་བློ་བཟང་སྐལ་བཟང་ལགས་རླངས་འཁོར་ནང་བླུགས་ནས་དེ་མ་ཉིད་བཙན་ཁྲིད་འོག་འཛིན་བཟུང་བྱས་འདུག ད་ལྟའི་ཆར་ཁོང་ས་གནས་དང་བཙོན་ཁང་གང་དུ་བཙོན་འཇུག་བྱེད་ཡོད་མེད་དང་གནས་སྟངས་ཇི་ཆགས་གས་ཤེས་རྟོགས་ ཐུབ་མེད་པ་མ་ཟད། ཁོང་དང་མཉམ་དུ་བོད་མི་ན་གཞོན་གཅིག་ཉེན་རྟོག་པས་འཛིན་བཟུང་བྱས་ ཡོད་ཀྱང་གོང་གནས་ལྟར་ཤེས་རྟོགས་གང་ཡང་ཐུབ་མེད་པ་རེད་འདུག རྩ་བའི་གྲྭ་བློ་བཟང་སྐལ་བཟང་ལགས་ནི་བོད་མདོ་སྨད་རྔ་པ་རྫོང་རྨེའུ་རུ་མ་རུ་ཆེན་གཉིས་པའི་ཕ་ཚེ་རིང་བརྟན་ཁོ་དང་། མ་ལྷ་སྐྱིད་གཉིས་ལ་ཕྲུ་གུ་བཞི་ཡོད་པ་ལས་ཁོང་རྒས་གྲས་གཉིས་པ་དེ་ཡིན་འདུག ཆུང་དུས་ནས་རྔ་པ་ཀིརྟི་དགོན་པར་ཆོས་ཞུགས་གནང་ནས་སྤྱི་ལོ་ ༢༠༡༤ ལོར་སྔོན་འགྲོའི་འཛིན་གྲྭ་མཐར་ཕྱིན་ནས་དེང་སྐབས་མཚན་ཉིད་ཀྱི་འཛིན་གྲྭ་ནང་སློབ་གཉེར་བྱེད་བཞིན་ཡོད་པ་དང། སྔར་ལོ་ཁོང་གི་ཨ་མའི་སྤུན་མཆེད་གྲྭ་བློ་བཟང་བསྟན་གྱིས་རྔ་པའི་སྲང་ལམ་ནས་བོད་དོན་སྐད་འབོད་གནང་རྗེས་ལོ་ ༢ རིང་བཙོན་འཇུག་ཁྲིམས་ཐག་བཅད་ནས་བཙོན་ཁང་དུ་ཡོད་མུས་ཡིན་འདུག ཁོང་ནས་དེ་སྔ་ ༢༠༠༨ ས་བྱི་ཞི་རྒོལ་ཆེན་མོ་སྐབས་ཁོང་གི་ཨ་ཞང་ཚེ་བདག་དང་། ཆོས་འཕེལ་གཉིས་ལ་ལོ་ ༦ དང་ ༤ བཅས་བཙོན་འཇུག་ཁྲིམས་ཆད་ཕོག་པའི་གནད་དོན་དངོས་སུ་མཐོང་མྱོང་ཡོད་པ་རེད་འདུག

བྷེལ་འཇམ་གྲོས་ཚོགས་འཐུས་མི་ལྕམ་ Sutter Petra ལགས་བཞུགས་སྒར་དུ་འཚམས་གཟིགས་སུ་ཕེབས་འདུག

བྷེལ་ཇམ་ (Belgium) གྲོས་ཚོགས་གོང་མའི་འཐུས་མི་ལྕམ་ Sutter Petra མཆོག་བཞུགས་སྒར་རྡ་རམ་ས་ལར་ཆེད་ཕེབས་དང་འབྲེལ། དེ་རིང་༸གོང་ས་སྐྱབས་མགོན་ཆེན་པོ་མཆོག་ལྷན་མཇལ་གྲུབ་བསྟུན་བོད་མི་མང་སྤྱི་འཐུས་ཚོགས་གཙོ་མཆོག་ཀྱང་མཇལ་འཕྲད་གནང་འདུག དེ་རེང་ཟླ་བ་༩ པའི་ཚེས་༤ ཉིན་སྔ་ཐོག་བཞུགས་སྒར་དུ་ཕེབས་འབྱོར་བྱུང་ནས་༸གོང་ས་སྐྱབས་མགོན་ཆེན་པོ་མཆོག་དང་ལྷན་མཇལ་གྲུབ་བསྟུན་བོད་མི་མང་སྤྱི་འཐུས་ལྷན་ཚོགས་སུ་ཆེད་ཕེབས་ཀྱིས་ཚོགས་གཙོ་སྤེན་པ་ཚེ་རིང་མཆོག་དབུས་པའི་སྤྱི་འཐུས་རྒྱུན་ལས་རྣམ་པར་ཐུགས་འཕྲད་གནང་སྟེ་ཕན་ཚུན་བཀའ་སྡུར་སོགས་གནང་འདུག སྐབས་དེར་གྲོས་ཚོགས་འཐུས་མི་ལྕམ་ Sutter Petra ལགས་ཀྱིས་བོད་མིའི་ཆབ་སྲིད་དང་མང་གཙོའི་འཕེལ་རིམ་རྣམས་ཡར་རྒྱས་ཚད་མཐོ་པོ་ཕྱིན་ཡོད་པར་བསྔགས་བརྗོད་དང་སྦྲགས་བཙན་བྱོལ་བོད་མིའི་གྲོས་ཚོགས་འཐུས་མི་འདེམས་ཕྱོགས་དེ་རྒྱལ་ཁབ་གཞན་དང་མི་འདྲ་བའི་དམིགས་གསལ་གྱི་ཁྱད་ཆོས་ཞིག་ལྡན་པར་གསུངས་སོང་བ་མ་ཟད། ཁོང་ཕྱིར་རང་ཡུལ་དུ་ཕེབས་སྐབས་བོད་མིའི་གཤིས་སྤྱོད་བཟང་པོའི་ཁྱད་ཆོས་དེ་དག་རང་གི་མི་རིགས་ཚོའི་རྒྱུན་ལྡན་གྱི་ཀུན་སྤྱོད་ལ་ཕན་ཕྱིར་ཕྱག་རྟགས་ལྟ་བུ་བསྣམ་རྒྱུ་ཡིན་སྐོར་སོགས་གསུངས་སོང་། རྩ་བའི་གྲོས་ཚོགས་འཐུས་མི་ལྕམ་ Sutter Petra ལགས་ཀྱི་ཐེངས་འདིའི་འཚམས་གཟིགས་ཁྲོད། གཙོ་བོ་བོད་མིའི་སྒྲིག་འཛུགས་གཙོས་ལྷན་ཁང་ཁག་ཏུ་འཚམས་གཟིགས་ཙམ་མ་ཡིན་པར་བཞུགས་སྒར་དུ་རྟེན་གཞི་བྱས་པའི་བོད་གཞུང་བདེ་ལེགས་སྨན་ཁང་དང། བོད་ཀྱི་སྨན་རྩིས་ཁང་སོགས་གཞུང་འབྲེལ་དང་གཞུང་འབྲེལ་མིན་པའི་ཚོགས་སྐྱིད་ཁག་ལ་གཟིགས་སྐོར་གནང་རྒྱུ་རེད་འདུག

བོད་ཀྱི་ས་ཁུལ་མང་པོའི་ནང་སྤྲུན་སྐུ་བསྟན་འཛིན་བདེ་ལེགས་མཆོག་གྱི་ཞེ་དགུའི་མཆོད་འབུལ་གནང་པ།

ཉེ་ལམ་ལི་ཐང་སྤྲུལ་སྐུ་བསྟན་འཛིན་བདེ་ལེགས་མཆོག་དགོངས་པ་རྫོགས་ནས་ཞག་ཞེ་དགུ་འཁོར་བའི་དུས་ཚིགས་དང་བསྟུན། བོད་ཁམས་ལི་ཐང་དང་། ནག་ཆུ། དེ་བཞིན་འབའ་ཐང་སོགས་བོད་ཀྱི་ས་ཁུལ་མང་པོར་མཆོད་འབུལ་སྨོན་ལམ་གནང་འདུག རྣམ་ཀུན་བོད་ཟླ་དྲུག་པའི་ནང་ལོ་ལྟར་ཁམས་ལི་ཐང་གཙོས་པའི་བོད་ཀྱི་ས་ཁུལ་མང་པོའི་ནང་མང་ཚོགས་འདུ་འཛོམས་གནང་སྟེ། རྟ་རྒྱུག་དང་རྐང་བྲོ་གླུ་གཞས་སོགས་གཟིགས་འབུལ་གྱིས་སྤྲོ་སྣང་ལྡན་པའི་དུས་ཆེན་སྲུང་བརྩི་ཞུ་སྲོལ་ཡོད་ཀྱང་། འདི་ལོའི་ཕྱི་ཟླ་ ༧ ཚེས་ ༡༢ ཉིན་སྤྲུལ་སྐུ་བསྟན་འཛིན་བསྟན་འཛིན་བདེ་ལེགས་མཆོག་གླུ་བུར་དུ་རྒྱ་གཞུང་གི་བཙོན་ཁང་ནང་སྐུ་བཀྲོངས་པའི་ཡིད་སྐྱོའི་གནས་ཚུལ་ཐོན་པར་བོད་མི་རྣམས་ཀྱིས་དགའ་སྟོན་དེ་དག་མཚམས་འཇོག་གནང་སྟེ་དམ་པ་ཁོང་གི་ཆེད་གདུང་སེམས་མཉམ་བསྐྱེད་ཀྱི་མྱ་ངན་གུས་འདུད་ཞུས་པ་མ་ཟད། ལྷག་པར་ཞག་ཞེ་དགུ་ཉིན་ཁམས་འབའ་ཐང་དང་ཉག་ཆུ་ཁུལ་གྱི་དགོན་སྡེ་ཁ་ཤས་ནང་རིན་པོ་ཆེའི་སྐུ་པར་སྒྲིག་གཤོམ་གནང་སྟེ་མཆོད་འབུལ་རྒྱ་ཆེ་གནང་འདུག དེ་བཞིན་རིན་པོ་ཆེའི་དགོན་པ་ཁམས་ན་ལེནྡྲ་ཐེག་ཆེན་བྱང་ཆུབ་ཆོས་གླིང་ནང་དུའང་སེར་སྐྱ་མང་ཚོགས་ཀྱིས་མངོན་པར་གསལ་བའི་ཆོས་ཕྱོགས་ཀྱི་ཞུ་སྒོ་བསྔོ་སྨོན་གནང་འདུག ཤེས་རྟོགས་བྱུང་བར་གཞིགས་ན། སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་རྒྱ་གཞུང་གི་བཙོན་ཁང་ནང་ཕྱི་ཟླ་ ༧ ཚེས་ ༡༢ ཉིན་རྒྱའི་བཙོན་ཁང་དུ་སྐུ་བཀྲོངས་པའི་མགནས་ཚུལ་ཐོན་པ་ནས་བཟུང་། ད་བར་རྒྱ་གཞུང་གིས་རིན་པོ་ཆེའི་སྤུན་ཉེ་འབྲེལ་ཚོར་འདྲི་རྩད་ཀྱི་ལམ་ནས་དེ་འབྲེལ་གནད་དོན་ཕྱི་ཕྱོགས་སུ་བཤད་མི་ཆོག་པའི་བཙན་བཀའ་བསྟུད་མར་གཏོང་ བཞིན་པ་མ་ཟད། ལྷག་པར་རིན་པོ་ཆེ་དམ་པ་དེ་ཉིད་ཀྱི་དགོན་པ་ཨོ་ཐོག་ནང་གི་གྲྭ་པ་དང་དེའི་ཉེ་འཁོར་གྱི་བོད་མི་ཚོ་ས་གནས་དེའི་ནང་ཕར་འགྲོ་ཚུར་འོང་བྱས་པར་ངེས་པར་དུ་ས་གནས་སྲིད་གཞུང་གི་ཆོག་མཆན་དགོས་པ་སོགས་བོད་མི་ཚོར་སུན་གཙིར་སྔར་ལྷག་བཟོ་མུས་ཡིན་འདུག དེང་ཆར་ཁུལ་དེའི་བོད་མི་རྣམས་ཀྱི་འགྲོ་སྡོད་སྤྱོད་གསུམ་གྱི་རང་དབང་ཡོངས་ལ་ དམ་དྲག་ཤུགས་ཆེ་བྱས་དང་བྱེད་མུས་ཡིན་པའི་གནས་སྟངས་ཤིག་ཆགས་ཡོད་པ་རེད་འདུག  

ཡུ་རོབ་རྒྱལ་སྤྱིའི་དཔར་རིས་འགྲེམས་སྟོན་ཐོག་བོད་པའི་སྒྱུ་རྩལ་བ་སྐོར་ཞིག་མཉམ་ཞུགས་གནང་པ།

 ཡུ་རོབ་རྒྱལ་སྤྱིའི་དཔར་རིས་འགྲེམས་སྟོན་ཐོག་བོད་པའི་སྒྱུ་རྩལ་བ་ ༡༤༠ མཉམ་ཞུགས་གནང་ནས་བོད་དོན་དང་འབྲེལ་བའི་དཔར་རིས་ཁག་ཅིག་སྒྲིག་གཤོམ་གནང་ཐུབ་པ་བྱུང་འདུག  ཟླ་འདིའི་ཕྱི་ཚེས་ ༡ ནས་ཨི་ཊ་ལི་ (Italy) གྲོང་ཁྱེར་ venise ནང་ཚོགས་བཞིན་པའི་ Olympics of contemporary art exhibitions ཞེས་པ་རྒྱལ་སྤྱིའི་དཔར་རིས་འགྲེམས་སྟོན་ཐོག་རྒྱལ་སྤྱིའི་རྒྱལ་ཁབ་བཞི་བཅུ་ལྷག་ནས་སྒྱུ་རྩལ་བ་ ༦༩༠༠ ལྷག་མཉམ་ཞུགས་གནང་པའི་ཁྲོད་བོད་མི་སྒྱུ་རྩལ་བ་ ༡༤༠ ཙམ་ལྷན་ཞུགས་གནང་འདུག་པ་མ་ཟད། ཁོང་རྣམས་ནས་བོད་ནང་གི་ད་ལྟའི་གནས་སྟངས་གསལ་བའི་དཔར་རིས་ཁག་ཅིག་འགྲེམས་སྟོན་གནང་འདུག དེ་ནི་རྒྱལ་སྤྱིའི་སྡིངས་ཆའི་སྟེང་བོད་པའི་སྒྱུ་རྩལ་བ་རྣམས་ནས་ཟུང་འབྲེལ་ཐོག་གཞི་རྒྱ་ཆེ་བའི་བོད་དོན་དཔར་རིས་འགྲེམས་སྟོན་གནང་པ་ཆེས་ཐོག་མ་ཆགས་ཀྱི་ཡོད་པ་རེད་འདུག གཞི་རྩའི་ཨི་ཊ་ལི་གྲོང་ཁྱེར་ Venice ནང་ཚོགས་བཞིན་པའི་རྒྱལ་སྤྱིའི་དཔར་རིས་འགྲེམས་སྟོན་འདི་བཞིན་རྒྱལ་སྤྱིའི་ཁྲོད་དར་ཁྱབ་ཆེ་བའི་ United Colors of Benetton ཞེས་པའི་བཟོ་གྲྭས་གོ་སྒྲིག་འོག་ལོ་ངོ་གཉིས་རེའི་མཚམས་སུ་ཐེངས་རེ་ཚོགས་ཀྱི་ཡོད་པ་དང་། ཐེངས་འདིའི་འགྲེམས་སྟོན་ནང་བོད་པའི་སྒྱུ་རྩལ་བ་ ༡༤༠ གཙོས་པའི་རྒྱལ་སྤྱིའི་རྒྱལ་ཁབ་བཞི་བཅུ་ལྷག་ནས་རྒྱུ་རྩལ་བ་ ༦༩༠༠ ལྷག་མཉམ་ཞུགས་གནང་ཡོད་པ་མ་ཟད་། འགྲེམས་སྟོན་དེ་བཞིན་ཟླ་བ་འདིའི་ཕྱི་ཚེས་གཅིག་ནས་དབུ་འཛུགས་གནང་ནས་ཟླ་བ་གཉིས་རིང་ཚོགས་ཀྱི་ཡོད་འདུག      

བཙན་བྱོལ་བོད་མིའི་ཡར་ཐོན་ཚོང་པའི་འདུ་འཛོམས་དབུ་འཛུགས་གནང་བ།

དེ་རིང་ཟླ་ ༨ ཚེས་ ༣༡ ཉིན་སྔ་ཐོག་བཞུགས་སྒར་གངས་སྐྱིད་གཉའ་ཁྲི་ ཚོགས་ཁང་དུ་བཙན་བྱོལ་བོད་མིའི་ཡར་ཐོན་ཚོང་པའི་འདུ་འཛོམས་ཐོག་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག དཔལ་འབྱོར་བཀའ་བློན་ཚེ་རིང་དོན་གྲུབ་མཆོག་གཙོས་ལྷན་ཁང་ཁག་གི་ཕྱགས་སྦྲེལ་བཀའ་བློན་རྣམ་པ་ཆེད་ཕེབས་ཐོག་རྒྱ་བལ་གཉིས་ནས་བོད་མིའི་ཁེ་ལས་ཚོང་གཉེར་བ་གསར་རྙིང་ ༧༠ ལྷག་འདུ་འཛོམས་གནང་འདུག སྐབས་དེར་དཔལ་འབྱོར་བཀའ་བློན་ཚེ་རིང་དོན་གྲུབ་མཆོག་གིས་བཀའ་ཤག་ངོས་ནས་བཙན་བྱོལ་བོད་མིའི་ཚོས་ལས་ཡར་རྒྱས་རམ་འདེགས་ཚན་པ་ཞེས་པ་གསར་བཙུགས་གནང་པའི་དགོས་པའི་དམིགས་དང་བརྒྱུད་རིམ། དེ་བཞིན་བཙན་བྱོལ་བོད་མིའི་སྤྱི་ཚོགས་ཁྲོད་ཚོང་གཉེར་ལས་དོན་འཕེལ་རིམ་སོགས་ངོ་སྤྲོད་གནང་ཡོད་པ་མ་ཟད། ལྷག་པར་དུ་མང་ཚོགས་ཀྱི་དཔལ་འབྱོར་གནས་སྟངས་སྲ་བརྟན་ཡོང་རྒྱུའི་གལ་གནད་སྐོར་དང་འབྲེལ་ཏེ་བོད་མི་ཚོའི་བསམ་བློའི་རང་དབང་དང་དཔལ་འབྱོར་གྱི་རང་དབང་སྲུང་སྐྱོབ་མ་ཐུབ་ཚེ་མི་རིགས་འཐབ་རྩོད་ཀྱི་ངོ་བོ་ཉམས་མེད་དུ་འགྲོ་རྒྱུ་ཡིན་པར་གསུངས་སོང། ཁོང་གིས་མུ་མཐུད་ད་རེས་དཔལ་འབྱོལ་ལས་ཁུངས་ཀྱི་ངོས་ནས་གོ་སྒྲིག་ཞུས་པའི་ཚོགས་འདུ་དེ་སྤྱིར་བོད་རིགས་ཚོང་པ་དང་ལྷག་དོན་བོད་པའི་གཞོན་སྐྱེས་ཚོང་གཉེར་བའི་ཁྲོད་དེང་དུས་དང་མཐུན་པའི་རིགས་གསར་ཚོང་ལས་གོ་རྟོགས་ཀྱི་ནུས་པ་ཇེ་ཆེར་སྤེལ་ཐབས་ཆེད་ཡིན་སྐོར་སོགས་གསུངས་སོང། སྐུ་མགྲོན་གཙོ་བོ་སྲིད་སྐྱོང་བློ་བཟང་སེང་གེ་མཆོག་གིས་དཔལ་འབྱོར་ལས་ཁུངས་ནས་གོ་སྒྲིག་ཞུས་པའི་འདུ་འཛོམས་འདིར་བསྔགས་བརྗོདང་དང་འབྲེལ། ལས་གཞི་དེའི་ཐོག་མཉམ་ཞུགས་གནང་མཁན་བོད་མིའི་ཚོང་གཉེར་བའི་ཁྲོད་ནས་མ་འོངས་པར་སྤྱི་ཚོགས་དང་འཐབ་རྩོད་གཉིས་ཀར་ཕན་པའི་ཚོང་གཉེར་གྲགས་ཅན་གྱི་ལོ་རྒྱུས་ཟིན་ཐོ་གསར་པ་ཞིག་ཡོང་ཐུབ་པ་བྱ་དགོས་སྐོར་སོགས་གསུངས་སོང། རྩ་བའི་ཉིན་གཉིས་རིང་བཙན་འབྱོལ་བོད་མི་ཡར་ཐོན་ཚོང་པའི་འདུ་འཛོམས་དེ་ཚོགས་དོན་ནི་འཛམ་གླིང་ས་ཕྱོགས་གང་སར་ཡོད་པའི་བོད་པའི་ཚོང་གཉེར་བ་གསར་རྙིང་དབར་ཕན་ཚུན་དབར་མཉམ་འབྲེལ་དང། ཡར་ཐོན་ཚོང་ལས་པར་ཚོང་ལས་གཉེར་རྒྱུའི་གདོང་ལེན་དང་གོ་སྐབས། ཚོང་ལས་ཀྱི་འཆར་གཞི་ཚད་ལྡན་བཟོ་འགོད་དང་ལག་བསྟར་བྱ་ཕྱོགས་སོགས་བརྗོད་གཞི་འདྲ་མིན་ཐད་ཆེད་ལས་མི་སྣས་གཏམ་བཤད་དང་བགྲོ་གླེང་སོགས་ཀྱི་ལས་རིམ་ཡོད་པ་རེད་འདུག

རྒྱ་གཞུང་གིས་འཛིན་བཟུང་འོག་སྒོ་དམར་ཆོས་འཕེལ་ལགས་ཤེས་རྟོགས་མེད་པར་གྱུར་པ།

བོད་རེབ་གོང་རོང་པོ་དགོན་ཆེན་གྱི་གྲྭ་སྒོ་དམར་ཆོས་འཕེལ་ལགས་རྒྱ་གཞུང་གིས་འཛིན་བཟུང་བྱས་ཏེ་གནས་སྟངས་ཤེས་རྟོག་མེད་པར་གྱུར་འདུག འདི་ལོའི་ཟླ་ ༧ ཕྱི་ཚེས་ ༡༠ ཙམ་རྒྱ་གཞུང་གིས་བོད་མདོ་སྨད་རེབ་གོང་རོང་པོ་དགོན་ཆེན་ཐོས་བསམ་ནོར་གླིང་གྲྭ་ཚང་གི་རང་ལོ་ ༤༦ སོན་པའི་གྲྭ་སྒོ་དམར་ཆོས་འཕེལ་ལགས་ཐུན་རིན་རྫོང་གི་རྒྱ་གཞུང་སྤྱི་བདེ་ཉེན་རྟོག་པས་འཛིན་བཟུང་བཙན་ཁྲིད་བྱས་སྟབས། རྒྱ་གཞུང་གིས་ཁོང་འཛིནབཟུང་བྱེད་དགོས་དོན་གང་ཡིན་དང་ད་ལྟའི་ཆར་ཁོང་ས་གནས་གང་དུ་འཛིན་བཟུང་བྱས་ཡོད་མེད་སོགས་གནས་ཚུལ་གང་ཡང་ཤེས་རྟོགས་མེད་པ་མ་ཟད། དེ་བས་ཀྱང་ཁོང་གི་ནང་མི་གཙོས་ཉེ་འབྲེལ་ཚོ་སེམས་འཚབ་ཆེན་པོ་བྱེད་བཞིན་ཡོད་པ་རེད་འདུག གཞི་རྩའི་དགེ་འདུན་པ་སྒོ་དམར་ཆོས་འཕེལ་ལགས་ཀྱི་སྐྱེས་ཡུལ་ནི་སྒོ་དམར་སྡེ་བ་དང་ཕ་མིང་ལ་ཀླུ་བྱམས་ཡིན་པ་རེད་འདུག ཁོང་རེབ་གོང་རོང་པོ་དགོན་ཆེན་གྱི་གྲྭ་པ་རྒན་གྲས་ཡིན་པ་དང། རྒྱུན་དུ་ཡ་རབས་ཚུལ་མཐུན་ཅན་དང་སློབ་སྦྱོང་ལ་བརྩོན་ཞིང་དགོན་པ་ནས་བསླབ་པ་མཐར་སོན་པ་བྱུང་འདུག

རྒྱལ་གཅེས་པ་བཀྲ་ཤིས་སྐྱིད་ལགས་ནི་ངའི་ཨ་མ་གཉིས་པ་ལྟ་བུ་ཡིན།

ཟླ་འདིའི་ཕྱི་ཚེས་ ༢༧ ཉིན་བོད་མདོ་སྨད་ཀན་ལྷོ་ཁུལ་སངས་ཆུ་རྫོང་བསང་ཁོག་ཡུལ་ཚོའི་དངུལ་རྭ་སྡེ་བའི་ནང་དུ་རང་ལུས་མེར་སྲེག་བཏང་མཁན། ཕྲུག་གུ་ལྔའི་ཨ་མ་བཀྲིས་སྐྱིད་ལགས་ཀྱི་བཟའ་ཟླའི་མིང་ལ་སངས་རྒྱས་སྐྱབས་དང་ཁོང་གཉིས་ལ་བུ་བཞི་དང་བོུ་གཅིག་བཅས་ཡོད་པ་ལས་བརྩོན་འགྲུས་རྒྱ་མཚོ་དང་། སངས་རྒྱས་རྒྱ་མཚོ། སྐལ་བཟང་རྒྱ་མཚོ་གསུམ་ནི་གྲྭ་པ་ཡིན་པ་དང། གཞན་ཡོན་ཏན་རྒྱ་མཚོ་དང་བུ་མོ་ཀུན་བཟང་སྐྱིད་བཅས་ཡིན་འདུག རྒྱགར་དུ་བཅའ་བཞུགས་དམ་པ་དེ་ཉིད་ཀྱི་ཚ་བོ་འཇམ་དབྱངས་སྦྱིན་པ་ལགས་ཀྱིས་གསུངས་པར། ཁོང་གི་ཨ་ནི་བཀྲིས་སྐྱིད་ལགས་ནི་མདོ་སྨད་བླ་བྲང་བསང་ཁོག་དངུལ་རྭ་ཞེས་པའི་འབྲོག་སྡེ་དེ་ནས་ཡིན་ཞིང་། ད་ལོ་ལོ་ན་ ༥༥ སོན་གྱི་ཡོད་པ་དང། ཁོང་གི་ཁྱིམ་ཚང་གི་ཆ་རྐྱེན་ལེགས་པོ་ཡོད་པས་བླ་བྲང་དགོན་པའི་ཉེ་འགྲམ་ན་ཁང་བ་བསྟར་མ་སུམ་ཐོག་ཅན་ཞིག་དང་།བསང་ཁོག་ཡུལ་འཚོར་ཡོད་པའི་བོད་མི་ཚོས་ཁང་བ་དམར་རོ་དང་རྒྱ་མིས་འབྲོག་སྡེ་གསར་བ་རུ་འབོད་པ་དེར་ཡང་ཁང་བ་ཞིག་ཡོད་པ་ལས། མེར་སྲེག་གནང་ས་ནི་བླ་བྲང་དགོན་པ་བར་སྤྱི་ལེ་བཅུ་ཙམ་སར་ཡོད་པའི་ཁང་བ་དམར་རོའི་ནང་ཡིན་པ་རེད་འདུག འཇམ་དབྱངས་སྦྱིན་པ་ལགས་ཀྱིས་ད་དུང། ཁོ་མོ་ནི་རྒྱུན་ལྡན་གཤིས་རྒྱུད་དྲང་ཞིང་ཀུན་ལ་སེམས་བཟང་འཆང་མཁན་ཞིག་ཡིན་པ་དང། ལྷག་པར་དགེ་སྒྲུབ་ལ་བརྩོན་པ་ཆེ་བ་ཞིག་ཡིན་སྐོར་འགྲེལ་བརྗོད་དང་འབྲེལ། རྒྱལ་གཅེས་པ་དམ་པ་དེ་ཉིད་ཁོང་གི་ཨ་མ་གཉིས་པ་ནང་བཞིན་ཡིན་པའི་འགྲེལ་བརྗོད་གནང་གི་འདུག རྩ་བའི་གསང་ཆུ་རྫོང་ནང་དེ་སྔ་ཕྱི་ལོ་ ༢༠༡༢ ལོའི་ཕྱི་ཟླ་ ༡༢ པའི་ནང་རང་ལོ་ ༡༨ སྲོན་པའི་རྒྱལ་གཅེས་པ་སངས་རྒྱས་བཀྲིས་ལགས་ཀྱིས་རང་ལུས་མེར་བསྲེགས་བཏང་ནས་འདས་གྲོངས་འགྱུར་ཡོད་པ་དང། ཁོང་ཡང་འཇམ་དབྱངས་སྦྱིན་པ་ལགས་ཀྱིས་བུ་སྤུན་རེད་འདུག ད་རེས་ཚེས་༢༧་ཉིན་རང་ལུས་མེར་བསྲེགས་གནང་མཁན་བཀྲིས་སྐྱིད་ལགས་དེ་སྔ་རྒྱ་གར་ནང་ཕྱི་ལོ་ ༢༠༡༢ ལོའི་དཔལ་དུས་ཀྱི་འཁོར་ལོའི་དབང་ཆེན་མཚོན་པའི་ཐེངས་གཉིས་ཕེབས་མྱོང་ཡོད་པ་ཞིག་ཡིན་པ་དང། ད་ལྟའི་ཆར་གསང་ཆུ་རྫོང་ནང་དམ་དྲག་ཆེ་བའི་རྐྱེན་གྱིས་དམ་པ་དེ་ཉིད་ནས་རང་ལུས་མེར་སྲེག་གནང་དོན་དང་སྐབས་དེར་ཞི་རྒོལ་གྱི་འབོད་ཚིག་གང་ཡིན་སོགས་ཀྱི་ཐད་ཁ་གསལ་ཤེས་རྟོགས་བྱུང་མེད།

བཙན་བྱོལ་བོད་མི་ཚོས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེའི་ཞེ་དགུ་སྲུང་བརྩི་ཞུས་པ།

ལི་ཐང་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་རྒྱའི་བཙོན་ཁང་ནང་སྐུ་བཀྲོངས་ནས་ཞག་ཞེ་དགུ་འཁོར་བའི་འདས་མཆོད་དང་བསྟུན། དེ་རིང་བཞུགས་སྒར་མཚོན་པའི་བོད་མི་གནས་སྡོད་གང་སར་ཆོས་ཕྱོགས་ཀྱི་མཆོད་འབུལ་སྨོན་ལམ་འཚོགས་བཞིན་འདུག ཟླ་ ༨ ཕྱི་ཚེས་ ༢༩ ཉིན་རྒྱབ་ཚོུད་ ༣ ཐོག་རྡ་ས་ཐེག་ཆེན་ཆོས་གླིང་གཙུག་ཁང་དུ་བོད་ཀྱི་བེུད་ལྷན་ཚོགས་ཀྱིས་གོ་སྒྲིག་འོག་མཆོད་ལམ་སྨོན་ལམ་ཞིག་ཚོགས་པར་རྡ་ས་གནས་སྡོད་བོད་མི་སེར་སྐྱ་མང་ཚོགས་བརྒྱ་སྐོར་ལྷག་ཙམ་ལྷན་བཞུགས་གནང་འདུགསྐབས་དེར་བོད་ཀྱི་བུད་མེད་ལྷན་ཚོགས་ཀྱི་ཚོགས་གཙོ་སྒྲོལ་མ་དབྱངས་ཅན་ལགས་ཀྱིས་གསུངས་དོན་ལ་བོད་མི་ཚོས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེའི་གནད་དོན་ཐད་རྒྱལ་སྤྱིའི་ཐོག་བསྟུད་མར་ཞུ་གཏུགས་ཞུས་ཡོད་ཀྱང་བཟང་ཕྱོགས་ཀྱི་བརྡ་ལན་གང་ཡང་བྱུང་མེད་པ་མ་ཟད། ལྷག་དོན་རྒྱ་གཞུང་ནས་གནད་དོན་དེར་དྲང་བདེན་རྩ་བ་ནས་བྱེད་མེད་པར་བློ་ཕམ་ཆེན་པོ་ཡོད་ཅེས་གསུངས་སོང། དུས་མཚུངས་རྒྱ་གར་བྱང་ཕྱོགས་རྡེ་ར་རྡུན་ཁུལ་དུ་བདེ་སྐྱིད་གླིང་བོད་མིའི་གཞིས་ཆགས་དང། ཚེ་རིང་དོན་ལྡན་གླིང། དོན་གྲུབ་གླིུང། དེ་བཞིན་རཱཇ་པུར་བཅས་ས་གནས་ཁག་བཞིའི་བོད་ཀྱི་བེུད་ལྷན་ཚོགས་དང་གཞོན་ནུ་མཉམ་སྦྲེལ་ཐོག་མཆོད་འབུལ་སྨོན་ལམ་དང་མཆོད་མེ་སྟོང་མཆོད་སོགས་ཆོས་ཕྱོགས་ཀྱི་བྱ་བ་རྒྱ་ཆེ་བ་གནང་བ་མ་ཟད། ས་གནས་ཀྱི་ཡུལ་མི་ཉམས་ཐག་རྣམས་ལ་སྒོར་ཆིག་འབུམ་ལྔ་ཁྲི་ལྷག་གི་ཞལ་ལག་བགོད་འགྲེམས་གནང་རྒྱུ་སོགས་ཀྱི་ལས་འགུལ་གཞི་རྒྱ་ཆེ་བར་སྤེལ་འདུག གཞན་ཡང་ཡོ་རོབ་འཇར་མ་ནི་རྒྱལ་ས་ Berlin ནང་དུ་ཁུལ་དེའི་བོད་མི་དང་བོད་དོན་རྒྱབ་སྐྱོར་བ་རྣམས་ཚོས་རྒྱ་ནག་གཞུང་ཚབ་ཁང་གི་མདུན་དུ་གདུང་སེམས་མཉམ་བསྐྱེད་ཀྱིས་ལས་འགུལ་ཞིག་སྤེལ་ནས་རྒྱ་གཞུང་གིས་བོད་མིའི་ཐོག་འཛིན་པའི་མཁྲེགས་འཛིན་གྱི་སྲིད་བྱུས་དེར་སྐྱོན་བརྗོད་གནང་བ་དང་། ཆབས་ཅིག་རིན་པོ་ཆེ་བཙོན་ཁང་སྐུ་བཀྲོངས་སོང་བའི་རྒྱུ་རྐྱེན་སོགས་ཁ་གསལ་བྱེད་དགོས་པའི་ནན་བརྗོད་གནང་འདུག འཇར་མ་ནི་བོད་དོན་རྒྱབ་སྐྱོར་ཚོགས་པའི་འཛིན་སྐྱོང་འགན་འཛིན་ Nadine Baumann ལགས་ཀྱིས་རིན་པོ་ཆེ་དགོངས་པ་རྫོགས་པའི་གནད་དོན་ཐད་བློ་ཕམ་དང་འབྲེལ། རིན་པོ་ཆེའི་གནད་དོན་ལ་རྒྱལ་སྤྱིའི་རང་དབང་བདེན་པའི་རྟོག་ཞིབ་གནང་དགོས་པའི་དགོས་འདུན་ལ་རྒྱལ་སྤྱིའི་ཚོགས་སྡེ་ཁག་དང་། ལྷག་དོན་འཇར་མན་གཞུང་ནས་རྒྱབ་སྐྱོར་གནང་སྐྱོང་ཡོང་བའི་རེ་འབོད་གནང་འདུག

Latest news