ཡུ་གུར།

ཧོང་ཀོང་ནང་བདུན་ཕྲག་སྔོན་མའི་རེས་གཟའ་ཉི་མ་ཉིན་མུ་མཐུད་ནས་ངོ་རྒོལ་གྱི་ལས་འགུལ་སྤེལ་ཡོད་པ་དང་བསྟུན་རྒྱལ་སྤྱིའི་ཁྱོན་དུ་གནས་པའི་མང་ཚོགས་འདུ་འཛོམས་ཀྱིས་རང་སོ་སོའི་རྒྱལ་ཁབ་ཀྱི་གཞུང་འཛིན་དབུ་ཁྲིད་རྣམས་ཀྱིས་རྒྱ་གཞུང་ནས་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཁྲིམས་སྒྲིག་ཁག་དོན་འཁྱོལ་ལག་བསྟར་བྱེད་རྒྱུར་ནུས་ལྡན་གནོན་ཤུགས་སྤྲོད་དགོས་པའི་རེ་སྐུལ་འོག་གཞི་རྒྱ་ཆེ་བའི་རྔམ་སྟོན་ལས་འགུལ་སྤེལ་འདུག ལས་འགུལ་དེ་ཟླ་ ༡ ཚེས་ ༡༨ དང་ ༡༩ བཅས་ཉིན་གཉིས་ཀྱི་རིང་ཨ་རི་དང་ཁེ་ན་ཌ། ཨོ་སི་ཊོ་ལི་ཡ་སོགས་གཙོ་གྱུར་ནུབ་ཕྱོགས་རྒྱལ་ཁབ་ ༡༢ ནང་གི་གྲོང་ཁྱེར་མི་དྲ་བ་ ༢༣ ནང་ཉིན་བརྒྱ་དུས་གཅིག་ཏུ་སྤེལ་འདུག་པ་དང་གཞི་རྒྱ་ཆེའི་ལས་འགུལ་དེ་བརྒྱུད་ནས་འཛམ་གླིང་རྒྱལ་ཁབ་ཁག་གི་དབུ་ཁྲིད་རྣམས་ནས་ཡུལ་སོ་སོའི་ནང་ཨ་རི་ལྟར་ཧོང་ཀོང་ནང་གི་འགྲོ་བ་མིའི་ཐོབ་ཐང་དང་མང་གཙོའི་ཐོག་ཁྲིམས་འཆར་གཏན་འབེབས་གནང་སྐྱོང་ཡོང་བའི་ཞུ་སྐུལ་གནང་འདུག རྒྱལ་སྤྱིའི་ཁྱོན་ནས་རྒྱ་གཞུང་གིས་འགྲོ་བ་མིའི་ཐོབ་ཐང་ལ་རྡོག་རོལ་གཏོང་བཞིན་པར་སྐྱོན་བརྗོད་ཀྱི་གཞི་རྒྱ་ཆེའི་རྔམ་སྟོན་ལས་འགུལ་སྤེལ་བའི་ཁྲོད་དུ་འཇར་མ་ནིའི་རྔམ་སྟོན་ལས་འགུལ་ནང་མཉམ་ཞུགས་གནང་མཁན་སྐུ་ཞབས་ Mehmet Kizilkaya ལགས་ཀྱིས་རྒྱ་གཞུང་གིས་ད་ཆ་བོད་མི་དང་ཡུ་གུར་བ། དེ་བཞིན་ཧོང་ཀོང་མང་ཚོགས་ཐོག་དྲག་གནོན་མུ་མཐུད་བྱེད་བཞིན་པ་དེ་དྲང་བདེན་ཞིག་ཆགས་ཀྱི་མེད་སྟབས། ཁོང་ནས་ཀྱང་རྒྱ་ནག་གཞུང་ལ་ངོ་རྒོལ་གནང་ཕྱིར་མཉམ་ཞུགས་གནང་བ་ཞིག་ཡིན་སྐོར་གསུངས་པ་མ་ཟད། རྒྱ་གཞུང་ནས་དྲག་གནོན་གང་བྱེད་ལ་སེམས་ཤུགས་མ་ཆག་པར་མང་ཚོགས་ཕོན་ཆེ་ཞིག་ཁྲོམ་གཞུང་དུ་ཕེབས་ཏེ་སྐད་འབོད་གནང་བཞིན་པ་དེ་ནི་ངོ་མཚར་ཅན་ཞིག་ཡིན་པས་ཁོང་གིས་དེར་བསྔགས་བརྗོད་ཡོད་ཅེས་གསུངས་འདུག དེ་བཞིན་ཨ་རི་ནིའུ་ཡོག་གི་ Manhattan གྲོང་ཁྱེར་ནང་མང་ཚོགས་བརྒྱ་སྐོར་བརྒལ་བ་འདུ་འཛོམས་གནང་བ་ལྟར་ལས་འགུལ་བ་ Colin Smith ལགས་ཀྱིས་ཁོང་ནས་ཧོང་ཀོང་གི་ལས་འགུལ་བ་རྣམས་དང་དེ་དག་གི་རང་ཚུགས་བརྟན་པའི་ཆོད་སེམས་ལ་གུས་བརྩི་ཞུ་བཞིན་ཡོད་པ་དང་། ད་ཆ་ལས་འགུལ་དེ་རྐྱེན་ཧོང་ཀོང་ནང་གོད་ཆག་རིམ་པའི་མཐོང་ཆོས་སུ་འགྱུར་བཞིན་ཡོད་སྟབས། ཧོང་མང་ཚོགས་ནས་རང་ཉིད་ཀྱི་ལས་འགུལ་དེ་མུ་མཐུད་ནས་སྤེལ་དགོས་གལ་དུ་གཟིགས་ཀྱི་ཡོད་པ་གསུངས་པ་མ་ཟད། ཁོང་རྣམས་ཀྱིས་ཀྱང་ཨ་རི་གཞུང་འཛིན་དབུ་ཁྲིད་ཁག་ལ་རྒྱ་གཞུང་ལ་གནད་དོན་དེ་འབྲེལ་ཐོག་ཤུགས་གནོན་སྤྲོད་ཐབས་བྱ་རྒྱུ་ཡིན་པ་གསུངས་འདུག ལས་འགུལ་མཉམ་ཞུགས་པ་ལྕམ་ Laura Sauriat ལགས་ཀྱིས་ཧོང་ཀོང་གི་མང་ཚོགས་ངོས་ནས་ཨ་རི་དེ་བཞིན་མང་གཙོའི་མངོན་རྟགས་ཀྱི་རྒྱལ་ཁབ་ཅིག་ལ་ངོས་འཛིན་གནང་ཐོག་ཧོང་ཀོང་མི་མང་ལ་རྒྱབ་སྐྱོར་གྱིས་རང་སོར་གནས་པའི་རེ་བ་གནང་བཞིན་ཡོད་པ་ལྟར། ཧོང་ཀོང་མང་ཚོགས་ནས་ཀྱང་དེ་ལྟར་གནང་ཆོག་པ་དང་ཧོང་ཀོང་ལ་ཉིན་གཅིག་རང་དབང་ཐོབ་པའི་ཡིད་ཆེས་ཡོད་ཅེས་གསུངས་འདུགནིའུ་ཡོག་ནང་གི་རྔམ་སྟོན་ལས་འགུལ་གོ་སྒྲིག་གནང་མཁན་ཁོངས་སུ་ཡོད་པ་ Ken ལགས་ཀྱིས་ང་ཚོ་ཧོང་ཀོང་ལས་འགུལ་བ་ཁྱེད་ཚོ་དང་མཉམ་དུ་ཡོད་ཅེས་བརྡ་ལན་གནང་འདུག་པ་མ་ཟད་ལས་འགུལ་བ་ཁག་ཅིག་གིས་རྒྱ་གཞུང་ལ་ངོ་རྒོལ་གྱི་གཞི་རྒྱ་ཆེ་བའི་རྔམ་སྟོན་ལས་འགུལ་དེས་ཧོང་ཀོང་གི་གནད་དོན་ཁོ་ན་མིན་པར་རྒྱ་ནག་དམར་ཤོག་ཚོགས་པའི་དྲག་གནོན་སྲིད་བྱུས་འོག་མྱོང་བཞིན་པའི་གྲངས་ཉུང་མི་རིགས་ཡོངས་ཀྱི་གནད་དོན་ཁག་ཆེས་མངོན་གསལ་གནང་ཡོད་པ་གསུངས་འདུག ལྷག་དོན་གཟའ་འཁོར་སྔོན་མའི་རེ་གཟའ་ཉི་མ་ཉིན་དབྱིན་ཡུལ་བོད་རིགས་ཚོགས་པ་དང་ཧོང་ཀོང་། ཡུ་གུར་བཅས་ཀྱི་གོ་སྒྲིག་འོག་ཁུལ་དེར་རྟེན་གཞི་བྱས་པའིརྒྱ་ནག་གཞུང་ཚབ་ཁང་གི་ཕྱི་ཕྱོགས་སུ་རྒྱའི་དྲག་གནོན་འོག་ཡོད་པའི་བོད་མི་དང་ཡུ་གུར་བ། དེ་བཞིན་ཧོང་ཀོང་མི་མང་སོགས་ལ་གདུང་སེམས་མཉམ་བསྐྱེད་ཀྱིས་ལས་འགུལ་སྤེལ་ཡོད་པ་རེད། ལས་འགུལ་ཐོག་ཆོས་ལུགས་འདྲ་མིན་དང་འགྲོ་བ་མིའི་ཐོབ་ཐང་ཚོགས་སྡེ་ཁག་གི་སྐུ་ཚབ་འཐུས་མི་བཅས་ནས་མཉམ་ཞུགས་གནང་ཡོད་པ་མ་ཟད། བོད་མིའི་ཕྱོགས་ནས་དབྱིན་ཡུལ་བོད་རིགས་ཚོགས་པའི་ཚོགས་གཙོ་དགྲ་ལྷ་ཚེ་རིང་ལགས་མཉམ་ཞུགས་གནང་སྟེ་རྒྱ་གཞུང་གིས་ཉེ་དུས་ཧོང་ཀོང་མང་ཚོགས་ཐོག་ཆེས་དྲག་གནོན་བྱེད་བཞིན་པ་དང་ལྷག་དོན་བོད་མི་དང་ཡུ་གུར་མི་རིགས་ཐོག་མུ་མཐུད་དྲག་རྩུབ་ཅན་གྱི་སྲིད་བྱུས་ལག་བསྟར་བྱེད་བཞིན་ཁག་ཐོག་སེམས་འཚབ་ཀྱི་རྣམ་པ་བསྟན་པ་དང་སྦྲགས་ཏེ་དབྱིན་ཡུལ་གཞུང་ནས་རྒྱ་གཞུང་གིས་ནག་ཉེས་ཁག་ཐེར་འདོན་གྱིས་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏང་མཁན་རྣམས་ལ་ཉེས་ཆད་གཏོང་དགོས་པའི་འབོད་སྐུལ་ཞུས་འདུག

བོད་མི་གཙོས་པའི་ཁ་ན་ཊྲའི་སྤྱི་མང་གི་ཚོགས་སྡེ་ཁག་གཅིག་གིས་གྲོང་ཁྱེར་ཊྲོ་རིན་ཊྲོ་ནང་དུ་རྒྱལ་ཡོངས་ཀྱི་ལས་འགུལ་ཞིག་དབུ་འཛུགས་དང་སྦྲགས།  ཡུལ་དེའི་གཞུང་ངོས་ནས་རྒྱ་ནག་ཐོག་ Magnitsky ཞེས་པའི་ཁྲིམས་གཞི་ལག་བསྟར་བྱས་ཏེ་ཧོང་ཀོང་དང་ཤིན་ཅང། དེ་བཞིན་བོད་སོགས་ཀྱི་ས་ཁུལ་དུ་འགྲོ་བ་མིའི་ཐོབ་ཐང་རྡོག་རོལ་གཏོང་མཁན་རྒྱ་ནག་གི་དཔོན་རིགས་རྣམས་ཁ་ན་ཊྲའི་ནང་བསྐྱོད་རྒྱུ་བཀག་སྡོམས་སོགས་ཀྱི་ཉེས་ཆད་གཅོད་དགོས་པའི་ཞུ་སྐུལ་གནང་འདུག དེ་ཡང་དེ་རིང་global news གསར་ཁང་གིས་གནས་ཚུལ་སྤེལ་བ་ལྟར་ན། ཁ་ན་ཊྲའི་ནང་གི་ལུས་འགུལ་དེའི་ཁྲོད།  ཧོང་ཀོང་དང་ཁ་ན་ཊྲའི་འབྲེལ་ལམ་གྱི་ཚོགས་གཙོ་སྐུ་ཞབས་Gloria Fung ལགས་ཀྱིས།  རྒྱ་ནག་གི་དཔོན་རིགས་རྣམས་ཀྱིས་ཧོང་ཀོང་དང་ཡུ་གུར། དེ་བཞིན་བོད་སོགས་ཀྱི་ས་ཁུལ་དུ་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པ་རྣམས་ལ་བཀག་སྡོམ་བྱེད་རྒྱུ་དེར། རྒྱལ་སྤྱིའི་སྒང་ནས་སྐད་ཆ་བཤད་དགོས་རྒྱུ་དེ་གལ་ཆེན་པོ་ཡིན་པ་དང་།  གནད་དོན་དེ་ནི་ཧོང་ཀོང་གི་མི་སེར་རྣམས་ལ་གདུང་སེམས་མཉམ་སྐྱེད་བྱས་བ་ཁོ་ན་ཙམ་ཞིག་མིན་པར།  དེ་ནི་ཧོང་ཀོང་གི་ནང་དུ་ལས་ཀ་གཉེར་ནས་གཏན་སྡོད་བྱེད་བཞིན་པའི་ཁ་ན་ཊྲའི་མི་སེར་འབུམ་གསུམ་གྱི་བདེ་དོན་དང་ཡང་འབྲེལ་བ་ཆེན་པོ་ཡོད་པ་ཞིག་ཡིན་ཡིན་པ་མ་ཟད།  དེ་ནི་ཁ་ན་ཊྲའི་རྒྱལ་ཁབ་ཀྱི་བདེ་འཇགས་ཀྱི་གནད་དོན་དང་ང་ཚོ་ཚང་མས་ཡི་རངས་བྱེད་བཞིན་པའི་རིན་ཐང་གི་སྙིང་བོ་དེ་ཡང་ཡིན་པར་བརྗོད་འདུག གོམ་བགྲོད་དེའི་ཁྲོད་ཀྱི་ཡུ་གུར་གྱི་ལས་འགུལ་བ། སྐུ་ཞབས་ Mehmet Tohi ལགས་ཀྱིས་ཀྱང་གསར་ཁང་ལ་བརྗོད་པ་ལྟར་ན།  ང་རང་ཙམ་མ་ཡིན་པར། ཕྱི་ཕྱོགས་སུ་གནས་བའི་ཡུ་གུར་ནང་མི་མང་པོ་རང་གི་ནང་མི་ཁ་བྲལ་བྱུང་སྟེ། རང་གི་ཨ་མ་འཇིག་རྟེན་འདིར་འཚོ་བཞུགས་ཡོད་མིན་གྱི་གནད་དོན་ལ་ཤེས་རྟོགས་ཙམ་ཡང་མེད་པའི་གནས་བབ་དེ་ནི་སེམས་ཁམས་ཀྱི་ཐོག་ནས་ཕམ་ཉེས་ཆེན་པོ་བྱུང་བ་དང་གཅིག་མཚུངས་ཡིན་པར་ངོ་སྤྲོད་གནང་བ་དང་སྦྲགས།  དུས་རབས་ཉེར་གཅིག་གི་ནང་དུ་གནད་དོན་འདི་དག་བྱུང་བཞིན་པ་ནི་འཇིགས་སུ་རུང་བའི་མྱོང་བ་ཞིག་ཡིན་སྐོར་བརྗོད་འདུག རྩ་བའི་ Magnitsky ཞེས་པའི་ཁྲིམས་གཞི་འདི་ནི་ཐོག་མར་ཕྱི་ལོ་ ༢༠༡༢ ལོར་ཨ་རིའི་གྲོས་ཚོགས་འོག་མའི་ནང་གཏན་འབེབས་བྱས་པའི་རྒྱལ་སྤྱིའི་རང་བཞིན་གྱི་ཁྲིམས་གཞི་ཞིག་ཡིན་པ་དང། ཁ་ན་ཊའི་ངོས་ནས་འགྲོ་བ་མིའི་ཐོབ་ཐང་ལ་རྡོག་རོལ་གཏོང་མཁན་རྣམས་ལ་བཀག་སྡོམ་བྱས་ནས་ཁོང་ཅག་གི་ཚོང་དོན་དང་འགྲུལ་བཞུད་སོགས་ལ་ཚད་གཞི་བཟོས་པའི་ཁྲིམས་གཞི་དེ་སྤྱི་ལོ་ ༢༠༡༧ ལོར་དངོས་སུ་ལག་བསྟར་བྱས་ཡོད་པ་ཞིག་ཡིན་པ་རེད། གྲོང་ཁྱེར་ཊྲོ་རིན་ཊྲོ་ནང་གི་གོམ་བགྲོད་ཀྱི་ལས་འགུལ་དེའི་ཁྲོད་དུ།  ཁྲིམས་གཞི་དེ་དང་འབྲེལ་བའི་མཁས་དབང་དང་། དེ་བཞིན་རྒྱ་ནག་གི་འགྲོ་བ་མིི་ཐོབ་ཐང་རྡོག་རོལ་གྱི་བྱས་ཉེས་ཁྲོད་ནས་རང་གི་ནང་མི་རྣམས་ལ་དངོས་སུ་ཤན་ཤུགས་ཐེབས་ཡོད་པའི་ཁ་ན་ཊའི་བོད་རིགས་མི་མང་དང། ཧོང་ཀོང་། ཡུ་གུར་གྱི་མི་མང་བཅས་ཀྱིས་མཉམ་ཞུགས་གནང་ཡོད་པ་རེད་འདུག ཁ་ན་ཊའི་སྲིད་བྱུས་ཉམས་ཞིབ་ཁང་གི་ཁྲིམས་ལུགས་ཀྱི་མཁས་དབང་།  སྐུ་ཞབས་ Marcuz Kolgarལགས་ཀྱིས།  ང་ཚོ་ཁ་ན་ཊའི་མི་སེར་ཞིག་ལ་མཚོན་ན། འགྲོ་བ་མིའི་ཐོབ་ཐང་ནི་ང་ཚོའི་གཙུག་ཏུ་བཟུང་ཡོད་པའི་གནད་དོན་ཞིག་ཡིན་སྐོར་འགྲེལ་བརྗོད་ཀྱིས། ང་ཚོས་ཁྲིམས་ཐོག་ནས་འགྲོ་བ་མིའི་ཐོབ་ཐང་རྡོག་རོིལ་གཏོང་བཞིན་པའི་རྒྱ་ནག་གི་དཔོན་རིགས་དེ་དག་བཀག་སྡོམ་བྱས་ཏེ།  རང་རྒྱལ་གྱི་ནང་དུ་རྒྱ་ནག་གི་དཔོིན་རིགས་དེ་དག་ལ་མ་དངུལ་གྱི་སྒོར་མོ་ཡོད་ཚེ་བཀག་སྡོམ་བྱེད་དགོས་བ་དང་། གལ་སྲིད་རྒྱ་ནག་གི་དཔོན་རིགས་དེ་དག་ཁ་ན་ཊར་ཡོང་ཚེ་ཁོང་ཚོའི་འགྲོ་འདུག་ལ་ཚད་བཀག་བྱེད་དགོས་བར་བརྗོད་པ་དང་སྦྲགས། རྒྱལ་སྤྱིའི་སྒང་ནས་ང་ཚོ་འགྲོ་བ་མིའི་ཐོབ་ཐང་གི་འགོ་ཁྲིད་ཅིག་ཏུ་ལྟ་བཞིན་ཡོད་དུས།  ང་ཚོས་ངེས་བར་དུ་དཀའ་ངལ་འཕྲད་བཞིན་པ་རྣམས་ལ་རོགས་རམ་བྱེད་དགོས་བར་བརྗོད་འདུག གཞི་རྩའི་ཧོང་ཀོང་ནང་ད་ལྟའི་ཆར་ཁ་ན་ཊའི་མི་སེར་འབུམ་གསུམ་ཙམ་གྱིས་སློབ་སྦྱོང་དང་ལས་ཀ་སོགས་གཉེར་བཞིན་ཡོད་པ་དང་། ཁ་ན་ཊའི་སྲིད་གཞུང་གིས། རྒྱལ་སྤྱིའི་སྤྱི་ཚོགས་དང་མཉམ་ལས་ཀྱི་ཐོག་ནས།  ཁ་ན་ཊའི་མི་སེར་དེ་དག་གི་ བདེ་འཇགས་ལ་སྲུང་སྐྱོབ་བྱེད་རྒྱུ་ཡིན་སྐོར་གསུངས་བཞིན་ཡོད་པ་རེད།

ཁ་སང་རྒྱལ་སྤྱིའི་དྲ་རྒྱའི་རང་དབང་གི་ཉིན་མོར། ཨ་རིར་རྟེན་གཞི་བྱས་པའི་བོད་རང་བཙན་སློབ་ཕྲུག་ཚོགས་པས། ཨ་རིའི་གྲོང་ཁྱེར་ནེའུ་ཡོག་ཏུ་ཡོད་པའི་ཀུ་ཤུ་རྟགས་ཅན་གྱི་ཁ་པར་བཟོ་ཚང་ལ་སོང་ནས། བཟོ་ཚོང་ཁང་དེའི་ངོས་ནས་རྒྱ་ནག་དང་ལག་འབྲེལ་གྱིས་བོད་དོན་དང་ཡུ་གུར། དེ་བཞིན་ཧོང་ཀོང་དང་བོད་སོགས་ཀྱི་གནས་ཚུལ་ལ་བཀག་སྡོམ་བྱས་ཏེ་འགྲོ་བ་མིའི་ཐོབ་ཐང་ལ་རྡོག་རོལ་གཏོང་གི་ཡོད་པར་བརྗོད་དེ་ངོ་རྒོལ་སྐད་འབོད་ཀྱི་ལས་འགུལ་སྤེལ་འདུག སྐབས་དེར། བོད་རང་བཙན་སློབ་ཕྲུག་ཚོགས་པའི་ཚོགས་མི་རྣམས་ཀྱིས་ཀུ་ཤུ་བཟོ་ཚོང་ཁང་གི་མདུན་དུ་ངོ་རྒོལ་ལས་འགུལ་སྤེལ་བ་མ་ཟད། ངོ་རྒོལ་བ་རྣམས་ཀྱིས་འཕྲེད་དར་མང་པོ་བཟུང་ཡོད་པ་ལས། ཀུ་ཤུ་བཟོ་ཚང་ཁང་གིས་མི་སྒེར་གྱི་གནད་དོན་དང་མིའི་རིགས་ཀྱི་མངོན་འདོད་ལ་རང་དབང་ཡོད་པར་བཀོད་ཡོད་ཡོད་ནའང་། ད་ཆ་བཟོ་ཚོང་ཁང་གིས་རྒྱ་ནག་་ལ་ལག་འབྲེལ་གྱིས་གནས་ཚུལ་བཀག་སྡོམ་བྱེད་བྱས་ཡོད་པ་མ་ཟད། མཉེན་ཆས་དང་འཚོལ་བྱེད་མ་ལག དེ་བཞིན་བརྡ་སྟོན་གྱི་བརྙན་རིས་སོགས་བཀག་སྡོམ་བྱས་ཡོད་པ་ལུང་འདྲེན་གྱིས། བཟོ་ཚོང་ཁང་གིས་གནས་ཚུལ་དེ་དག་མཚམས་བཞག་པའི་ཐོག བོད་དོན་དང་དབང་གི་ཆེད་དུ་རྒྱབ་སྐྱོར་བྱེད་དགོས་བ་སོགས་ཀྱི་འབོད་སྐུལ་གྱི་འཕྲེད་དར་མང་པོ་ཁྲོམ་བསྒྲགས་གནང་འདུག གཞན་ཡང་བོད་བཙན་སློབ་ཕྲུག་ཚོགས་པའི་ལས་འགུལ་གྱི་ངེས་སྟོན་པ་པད་མ་སྒྲོལ་མ་ལགས་ཀྱིས་གཏམ་བཤད་གནང་སྟེ། སྤྱི་ལོ་ཉེས་སྟོང་བཅོ་བརྒྱད་ལོ་ནས་བཟུང་། ཀུ་ཤུ་བཟོ་ཚོང་ཁང་གིས་རྒྱ་ནག་གི་རེ་འདོད་ལྟར་ལོ་རྒྱུས་ཀྱི་སྟེང་བྱུང་མ་མྱོང་བའི་གནས་ཚུལ་བཀག་སྡོམ་བྱེད་ཀྱི་ཡོད་ལུགས་བརྗོད་ཡོད་པ་མ་ཟད། ཀུ་ཤུའི་ཁ་པར་གྱི་བྱེད་ལས་ཐོན་གསར་བཅུ་གསུམ་པའི་ནང་དུ། རྒྱ་ནག་གིས་ཐེ་ཝན་ནི་རྒྱ་ནག་གི་ཆ་ཤོས་ཡིན་པར་བརྗོད་ཡོད་པ་བཞིན། ཀུ་ཤུ་བཟོ་ཚོང་ཁང་གིས་ཐེ་ཝན་གྱི་རྒྱལ་དར་གྱི་བརྡ་སྟོན་བརྙན་རིས་སོགས་ཀུ་ཤུའི་ཁ་པར་གྱི་ནང་དུ་ནག་གསུབ་བཏང་ཡོད་པར་བརྗོད་དེ། བཟོ་ཚོང་ཁང་གིས་རྒྱ་ནག་དང་ལག་འབྲེལ་གྱིས་མི་མང་གིས་གནས་ཚུལ་ལ་རྒྱུས་ལོན་བྱེད་རྒྱུ་དང་འབྲེལ་ལམ་གྱི་བདེ་འཇགས། གཞན་ཡང་རང་དབང་གི་མངོན་འདོད་སོགས་ལ་བཀག་སྡོམ་བྱེད་བཞིན་པ་མཚམས་འཇོག་དགོས་ཞེས་པ་དང་། བཟོ་ཚོང་ཁང་གིས་རྒྱ་ནག་གི་དབང་ཆ་གཅིག་སྒྲིལ་གྱི་ལམ་ལུགས་ལ་རྒྱབ་སྐྱོར་བྱེད་མཚམས་བཞག་སྟེ། བཟོ་ཚོང་རང་གི་ངོས་ནས་ལངས་ཕྱོགས་བསྟན་པོ་བཟུང་སྟེ། འགྲོ་བ་མིའི་རིགས་ཀྱི་ཆེ་མཐོང་དང་ཆབ་སྲིད་ཀྱི་རང་དབང་སོགས་ལ་རྒྱབ་སྐྱོར་བྱེད་དགོས་ཞེས་འབོད་སྐུལ་བྱས་འདུག གཞན་ཡང་བོད་རང་དབང་སློབ་ཕྲུག་ཚོགས་པས། ཀུ་ཤུ་བཟོ་ཚོང་ཁང་གིས་རྒྱ་ནག་གི་མངོན་འདོད་སྒྲུབ་ཀྱི་ཡོད་པ་གསལ་བཤད་ཀྱིས། འདི་ལོའི་སྤྱི་ཟླ་༢ བའི་ཚེས་ ༢༦ ཉིན་ཀུ་ཤུ་བཟོ་ཚོང་ཁང་གིས་ལོ་མཇུག་གིི་མ་འཛུགས་ཀྱི་ཚོགས་ཆེན་འཚོགས་གཏན་འཁེལ་ཡོད་པར་བརྟེན། བོད་རང་བཙན་སློབ་ཕྲུག་ཚོགས་པའི་ངོས་ནས། ཀུ་ཤུ་བཟོ་ཚོང་ཁང་ལ་མ་འཛུགས་བྱེད་མཁན་རྣམས་ལ་འགྲོ་བ་མིའི་སྨྲ་བརྗོད་རང་དབང་དེ་གལ་ཆེན་དུ་བརྩི་དགོས་པའི་འབོད་བརྡ་རང་བཞིན་གྱི་སྙན་ཞུ་དབུལ་རྒྱུ་ཡིན་པར་བརྗོད་དེ། མི་མང་གིས་ཁོང་ཅག་གི་འབོད་བརྡ་རང་བཞིན་གྱི་སྙན་ཞུ་དེར་མཚན་རྟགས་བཀོད་དེ་ལས་འགུལ་དེར་རྒྱབ་སྐྱོར་བྱེད་དགོས་བའི་སྐུལ་མ་བཏང་འདུག གཞན་ཡང་ཁོང་ཚོས། ཀུ་ཤུ་བཟོ་ཚོང་ཁང་གིས་བཟོ་ཁང་གཞན་ལྟར་མ་ཡིན་པར། རྒྱ་ནག་གི་ནང་དུ་ཀུ་ཤུའི་ཁ་པར་བེད་སྤྱོད་གཏོང་ཕྱོགས་དང་འབྲེལ་ནས། རྒྱ་ནག་གི་མངོན་འདོད་ལྟར་གནས་ཚུལ་མང་པོ་བཀག་སྡོམ་བྱེད་ཀྱི་ཡོད་པ་ཡོངས་གྲགས་གནང་སྟེ། འདས་བའི་ཟླ་ངོ་གཅིག་གི་ནང་དུ། རྒྱ་ནག་གཞུང་གི་རེ་སྐུལ་ལྟར། རྒྱ་ནག་གི་ཚོང་རའི་ནང་དུ་ཀུ་ཤུ་བཟོ་ཚོང་ཁང་ནས་མཉེན་ཆས་ ༥༡༧ ཙམ་ནག་གསུབ་བཏང་ཡོད་པ་ཡོངས་གྲགས་གནང་བ་དང་འབྲེལ། སྤྱི་ལོི་ ༢༠༡༧ ལོར་ཡང་རྒྱ་ནག་གི་རེ་འདོད་ལྟར། ཀུ་ཤུ་བཟོ་ཚོང་ཁང་གིས་ VPNs ཞེས་པའི་གནས་ཚུལ་འཚོལ་བྱེད་ལས་མཉེན་ཆས་ ༦༠༠ ཙམ་ནག་གསུབ་བཏང་ཡོད་ལུགས་བརྗོད་དེ། རྒྱ་ནག་ནང་གི་འགྲོ་བ་མིའི་ཐོབ་ཐང་རྩོད་སྒྲུབ་པ་དག་ལ་མཚོན་ན། VPNs ཞེས་པ་ནི་རང་ཉིད་ལ་ཉེན་ཁ་མེད་པའི་སྒང་ནས་གནས་ཚུལ་འཚོལ་སྡུད་བྱེད་སྤྱད་གལ་ཆེན་ཞིག་ཡིན་ནའང་། ད་ཆ་རྒྱ་ནག་གིས་འཚོལ་བྱེད་མ་ལག་ཡོད་ཚད་བཀག་སྡོམ་བྱས་ཡོད་པ་ཡོངས་གྲགས་གནང་འདུག དེ་བཞིན་གྷོ་གྷེལ་བཟོ་ཚོང་ཁང་གིས་སྔོན་ཆད་རྒྱ་ནག་དང་ལྷན་དུ་Dragonfly ཞེས་པའི་འཚོལ་བཤེར་མ་ལག་གི་ལམ་ནས་འགྲོ་བ་མིའི་ཐོབ་ཐང་ལ་རྡོག་རོལ་གཏོང་རྒྱུའི་ལས་གཞི་དེར་བཟོ་ལས་བ་མ་མང་པོས་ངོ་རྒོལ་བྱས་པ་བཞིན། གྷོ་གྷེལ་བཟོ་ཚོང་ཁང་གིས་ལས་འཆར་དེར་གནོད་ཤུགས་སྤྲད་ནས་ཕྱིར་བསྡུ་བྱས་ཡོད་པ་ལྟར། ད་ཆ་ཀུ་ཤུ་བཟོ་ཚོང་ཁང་ལ་ཡང་མི་མང་གི་གནོད་ཤུགས་སྤྲད་ནས་རྒྱ་ནག་དང་མཉམ་དུ་ལག་འབྲེལ་བྱེད་བཞིན་པ་དེ་མཚམས་འཇོག་བྱེད་དུ་འཇུག་དགོས་ཞེས་བྲིས་འདུག

CECC ཞེས་ཨ་མི་རི་ཀའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་གིས་ཕྱི་ལོ་ ༢༠༡༩ ལོའི་ལོ་འཁོར་སྙན་ཐོ་འདོན་སྤེལ་གནང་བའི་ནང་ལ་འདས་ལོ་ ༢༠༡༩ ནང་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་དང་ཁྲིམས་ལུགས་དབང་འཛིན་ཇེ་སྡུག་ཏུ་ཕྱིན་ཡོད་པ་ཐེར་འདོན་དང་སྦྲགས། ཨ་རི་མི་ཀའི་འཛིན་སྐྱོང་དང་གྲོས་ཚོགས་ཀྱིས་རྒྱ་ནག་ནང་གི་འགྲོ་བ་མིའི་ཐོབ་ཐང་ཐོག་ངེས་པར་དུ་གླེང་སློང་དང་ལྷག་དོན་སྲིད་འཛིན་སྐུ་ཞབས་ Donald Trump མཆོག་ནས་རྒྱ་ནག་གཞུང་ལ་༸གོང་ས་མཆོག་གི་༸སྐུའི་ཡང་སྲིད་གནད་དོན་ཐད་ལ་ཐེ་བྱུས་བྱེད་དབང་མེད་ཅེས་གསུངས་དགོས་པའི་དགོས་འདུན་ཁག་གཅིག་ཆེད་བཏོན་གནང་འདུག ཁ་སང་ཕྱི་ཚེས་ ༨ ཉིན་ཨ་མི་རི་ཀའི་གྲོས་ཚོགས་ཀྱི་ཚོགས་ཁང་ཨང་ ༢༠༠ ནང་ལ་ཨ་མི་རི་ཀའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་གི་ཚོགས་གཙོ་གྲོས་ཚོགས་འོག་མའི་འཐུས་མི་སྐུ་ཞབས་ James McGovern ལགས་དང་མཉམ་འབྲེལ་ཚོགས་གཙོ་གྲོས་ཚོགས་གོང་མའི་འཐུས་མི་སྐུ་ཞབས་ Marco Rubio ལགས་གཉིས་ཀྱིས་དབུས་པའི་ཚོགས་ཆུང་གི་ཚོགས་མི་གྲོས་ཚོགས་འཐུས་མི་རྣམ་པ་ལྷན་ཞུགས་ཐོག་ཕྱི་ལོ་ ༢༠༡༩ ལོའི་ཚོགས་ཆུང་གི་ལོ་འཁོར་སྙན་འདོན་སྤེལ་གནང་ཡོད་པ་དང་། དེའི་ནང་རྒྱ་ནག་དམར་ཤོག་ཚོགས་པ་ཆེད་འཛུགས་བྱས་པ་ནས་བཟུང་སྟེ་རྒྱ་ནག་གཞུང་གི་འགྲོ་བ་མིའི་གཞི་རྩའི་ཐོབ་ཐང་སྤྱི་དང་ལྷག་པར་དུ་གཞི་རིམ་མང་ཚོགས་ཀྱི་སྨྲ་བརྗོད་དང་འདུ་འཛོམས། དེ་བཞིན་ཆོས་དད་རང་དབང་སོགས་ལ་ཚོད་འཛིན་དམ་དྲག་བྱེད་མུས་ཁར་ཕྱི་ལོ་ ༢༠༡༣ ལོར་ཞི་ཅིན་ཕིང་རྒྱ་ནག་གི་སྲིད་འཛིན་ཆགས་པ་ནས་བཟུང་རྒྱ་ནག་གི་བདེ་འཇགས་དང་གཏན་ལྷིང་གི་མིང་བྱང་འོག་ཁྲིམས་ལུགས་གསར་བཟོ་མང་དག་ཅིག་གི་བརྒྱུད་ནས་རྒྱལ་ནག་ཁྱོན་ཡོངས་སུ་དམ་དྲག་བྱེད་ཤུགས་ཆེ་རུ་བཏང་ཡོད་པ་བཀོད་འདུག འདས་ལོ་ ༢༠༡༩ ནང་ལ་རྒྱ་གཞུང་གིས་གཏན་འབེབས་བྱས་པའི་ཁྲིམས་ལུགས་གསར་དེ་དག་བེད་སྤྱོད་བྱས་ཏེ་སྤྱི་ཚོགས་དང་ཆབ་སྲིད་ལས་དོན་ལ་དམ་དྲག གསར་འགོད་རང་དབང་ལ་ཚོད་འཛིན། དེ་བཞིན་བོད་དང་ཡུ་གུར་གཙོས་པའི་གྲངས་ཉུང་མི་རིགས་ཀྱི་ས་ཁུལ་ཁག་ཏུ་དེང་དུས་ཀྱི་གསང་བའི་ལྟ་སྲུང་འཕྲུལ་ཆས་སྤྱོད་དེ་མང་ཚོགས་ཀྱི་ལས་དོན་སྤྱི་རིགས་ཐོག་ལྟ་སྲུང་གིས་འཛིན་བཟུང་བྱས་པ་ཐེར་འདོན་གནང་སྟེ་འདས་ལོ་ ༢༠༡༩ ནང་རྒྱ་ནག་ནང་འགྲོ་བ་མིའི་ཐོབ་ཐང་གི་གནས་སྟངས་སྤྱི་དང་ཁྲིམས་ལུགས་དབང་འཛིན་ལག་བསྟར་བྱེད་ཕྱོགས་ཇེ་སྡུག་ཏུ་ཕྱིན་འདུག་ཅེས་གསུངས་འདུག ལྷག་པར་དུ་སྙན་ཐོ་དེའི་ནང་བོད་དང་འབྲེལ་བའི་གནས་ཚུལ་ཁོངས་སུ་སྔར་ལོ་ ༢༠༡༩ ལོ་དེ་ནི་༸གོང་ས་མཆོག་གིས་དབུས་པའི་བོད་མི་རྣམས་བཙན་བྱོལ་དུ་འབྱོར་ནས་ལོ་ངོ་ ༦༠ འཁོར་བཞིན་ཡོད་ཀྱང་རྒྱ་ནག་གཞུང་ནས་ཕྱོགས་གཉིས་ཀྱི་དཀའ་རྙོག་ཞི་འགྲིག་ཡོང་ཐབས་སུ་༸གོང་ས་མཆོག་གམ་ཡང་ན་མགོན་པོ་༸གང་ཉིད་མཆོག་གི་སྐུ་ཚབ་དང་ལྷན་དུ་གྲོས་མོལ་ཡོང་ཐབས་སུ་དོན་དམ་གྱི་འབད་བརྩོན་རྩ་་བ་ནས་མ་གནང་བའི་ཁར་འདས་ལོའི་ནང་ཐབས་བྱུས་ལྡན་པའི་ཐོག་བོད་མི་མང་ཚོགས་ཀྱི་གཞི་རྩའི་འགྲོ་བ་མིའི་ཐོབ་ཐང་རྡོལ་རོལ་བཏང་བ་མ་ཟད། བོད་ཐོག་རྒྱབ་ཤ་དཀར་པོ་ཞེས་པའི་ཡིག་ཆ་འདོན་སྤེལ་བྱས་ཏེ་༸གོང་ས་མཆོག་གི་༸སྐུའི་ཡང་སྲིད་ཀྱི་གནད་དོན་ཐག་གཅོད་བྱེད་རྒྱུའི་འགན་དབང་རྒྱ་ནག་གཞུང་ལ་ཡོད་སྐོར་བརྗོད་པ་སོགས་ཐེར་འདོན་གྱིས་རྒྱ་གཞུང་གི་ཐེ་བྱུས་ཅན་གྱི་བྱ་སྤྱོད་དེ་དག་བོད་མིའི་ཆོས་དད་རང་དབང་ལ་རྡོག་རོག་བཏང་བ་ཞིག་རེད་ཅེས་བཀོད་འདུག རྒྱ་གཞུང་གིས་བོད་ས་ཁྱོན་ཡོངས་སུ་ཆོས་ཕྱོགས་དང་ཚོགས་པ་ཁག་གི་ལས་དོན་ལ་དམ་དྲག་བྱེད་མུས་ཁྲོད་སྔ་ལོ་རྒྱ་གཞུང་གིས་དབྱེ་བའི་བོད་རང་སྐྱོང་ལྗོངས་ཁུལ་དུ་རྒྱལ་སྤྱིའི་སྐུ་ཚབ་མི་སྣ་དང་གསར་འགོད་པ་རྣམས་འགྲོ་བསྐྱོད་བྱེད་རྒྱུར་སྔར་དམ་དྲག་ཆེ་རུ་བཏང་བ་དེས་དམ་དྲག་ཆེ་ས་བྱང་ཀོ་རི་ཡའི་རྒྱལ་ཁབ་ནང་འགྲོ་རྒྱུ་ལས་བོད་རང་སྐྱོང་ལྗོངས་ནང་འགྲོ་རྒྱུ་དཀའ་བ་ཆགས་འདུག་ཅེས་གསུངས་འདུག གཞན་ཡང་ཤོགས་གྲངས་ ༣༢༣ ཅན་གྱི་ལོ་འཁོར་སྙན་ཐོ་དེའི་ནང་ལ་རྒྱ་ནག་གཞུང་གིས་འདས་ལོའི་ནང་ཧོང་མི་མང་གི་ཞི་བའི་ལས་འགུལ་ལ་དྲག་པོས་ཐེ་བྱུས་བྱས་པའི་གནས་སྟངས་དང་། སྔར་ལོ་རྒྱ་ནག་གིས་དྲུག་བཞི་དོན་རྐྱེན་བྱུང་ནས་ལོ་ངོ་ ༣༠ འཁོར་བཞིན་ཡོད་ཀྱང་རྒྱ་ནག་གཞུང་ནས་སྐབས་དེའི་དངོས་ཡོད་གནས་སྟངས་དང་འབྲེལ་བའི་གནས་ཚུལ་རྣམས་རྒྱལ་སྤྱིའི་མང་ཚོགས་ལ་འགྲེལ་བརྗོད་མ་བྱས་པར་རྗེས་དྲན་གྱི་ལོ་ཚིག་སྲུང་བརྩི་ཞུ་མཁན་གྱི་གཞི་རིམ་མང་ཚོགས་རྣམས་ལ་དམ་དྲག་བྱས་པར་མ་ཟད་ཡུ་གུར་མི་མང་ས་ཡ་ལྷག་བཀག་ཉར་གྱིས་ཆབ་སྲིད་ཀྱི་སློབ་གསོ་སྤྲོད་བཞིན་པ་སོགས་ཞིབ་ཕྲ་འགྲེལ་བརྗོད་དང་འབྲེལ་ཏེ་རྒྱ་གཞུང་གིས་བྱེད་སྟངས་དེ་ནི་འགྲོ་མིའི་ཐོག་ལ་སྤེལ་བའི་འཁྲིམས་འགལ་གྱི་ནག་ཉེས་ཚབས་ཆེན་ཞིག་རེད་ཅེས་གསུངས་འདུག གཞི་རྩའི་ CECC ཞེས་ཨ་མི་རི་ཀའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་ནས་ལོ་ལྟར་རྒྱ་ནག་ནང་གི་འགྲོ་བ་མིའི་ཐོབ་དང་ཁྲིམས་ལུགས་ལས་དོན་སོགས་དང་འབྲེལ་ཨ་རིའི་གྲོས་ཚོགས་ནང་ཉན་ཞིབ་ལས་རིམ་དང་། ཁྲིམས་འཆར་འདོན་སྤེལ་སོགས་གནང་མུས་ལྟར་འདས་ལོའི་ནང་བོད་དང་ཤིན་ཅང་། ཧོང་ཀོང་། རྒྱ་ནག་བཅས་ཀྱི་ཐོག་ཉན་ཞིབ་ལས་རིམ་བཞི་དང་ལྷག་པར་དུ་ཕྱི་ཟླ་ ༩ ཕྱི་ཚེས་ ༢༤ ཉིན་ཚོགས་ཆུང་དེའི་ཚོགས་གཙོ་དང་སྐུ་ཞབས་ Jim McGovern ལགས་དང་མཉམ་འབྲེལ་ཚོགས་གཙོ་སྐུ་ཞབས་ Marco Rubio ལགས་གཉིས་ནས་ཡུལ་དེའི་གྲོས་ཚོགས་གོང་འོག་གཉིས་སུ་ Tibetan Policy and Support Act of 2019 ཞེས་པའི་ཨ་རིའི་བོད་དོན་ཁྲིམས་འཆར་གསར་པ་ཞིག་ཆེད་འདོན་གནང་ཡོད་པ་དང་། ཁ་སང་ལོ་འཁོར་སྙན་ཐོ་འདོན་སྤེལ་གནང་སྐབས་སྐུ་ཞབས་སྐུ་ཞབས་ James McGovern ལགས་ཀྱིས་བོད་དོན་ཁྲིམས་འཆར་གསར་པ་དེ་བདུན་ཕྲག་རྗེས་མའི་ནང་གྲོས་ཚོགས་གོང་འོག་གཉིས་སུ་གཏན་འབེབས་ཐུབ་པའི་རེ་བ་ཡོད་པ་གསུངས་འདུག རྩའི་ཁ་སང་ཨ་མི་རི་ཀའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་ནས་རྒྱ་ནག་དང་འབྲེལ་བའི་ལོ་འཁོར་སྙན་ཐོ་འདོན་སྤེལ་དང་སྦྲགས་ཏེ་ཨ་མི་རི་ཀའི་སྲིད་འཛིན་ Donald Trump མཆོག་རྒྱ་ནག་དང་ལྷན་དུ་ཆབ་སྲིད་ཀྱི་འབྲེལ་བ་བྱེད་སྐབས་བོད་དང་ཧོང་ཀོང་། ཤིན་ཅང་སོགས་ཀྱི་གནད་དོན་གླེང་དགོས་པ་དང་། རྒྱ་ནག་གཞུང་ལ་༸གོང་ས་མཆོག་གི་༸སྐུའི་ཡང་སྲིད་གནད་དོན་ཐོག་ཐེ་བྱུས་བྱེད་རྒྱུའི་ཐོབ་ཐང་མེད་པ། འགྲོ་བ་མིའི་ཐོབ་ཐང་རྡོལ་རོལ་གཏོང་བཞིན་པའི་གནད་དོན་རྣམས་ཐེར་འདོན་བྱེད་དགོས་པ་མ་ཟད་དེ་སྔ་ ༢༠༡༨ ལོར་གཏན་འབེབས་གནང་བའི་བོད་ནང་འདྲ་མཉམ་ཐོག་འགྲུལ་བསྐྱོད་ཆོག་པའི་ཁྲིམས་འཆར་ལག་བསྟར་བྱེད་དགོས་པ་སོགས་ཀྱི་འདོན་འདུན་ཁག་གཅིག་ཆེད་བཏོན་གནང་ཡོད་པ་རེད།

དེ་རིང་བོད་མིའི་སྒྲིག་འཛུགས་ཀྱི་དྲ་གནས་སུ་གནས་ཚུལ་སྤེལ་བ་ལྟར་ན། ཨ་རིའི་བོད་ཀྱི་དོན་གཅོད་ཁང་གི་གོ་སྒྲིག་གིས། སྤྱི་ལོ་༢༠༡༩ ལོའི་བོད་རྒྱ་ཞི་མོལ་ཞེས་པའི་བརྗོད་གཞིའི་འོག རྒྱ་རིགས་ཤེས་ལྡན་མི་སྣ་དང་མང་གཙོ་དོན་གཉེར་བ་སོགས་ཀྱི་གཙོ་བྱས་པའི་རྒྱ་རིགས་འཐུས་ཚབ་པ་སུམ་བཅུ་ཙམ་མཉམ་འཛོམས་ཀྱི་ཐོག་ནས་གསར་འགོད་གསལ་བསྒྲགས་ཤིག་སྤེལ་དེ། རྒྱ་ནག་གིས་༸གོང་ས་ཏཱ་ལའི་བླ་མིའི་ཡང་སྲིད་ཀྱི་ཐད་ལ་ཐེ་ཇུས་བྱེད་བཞིན་པ་དེར་ངོས་ལེན་མེད་པའི་དོན་ཚན་བཞི་ཕྱིར་བསྒྲགས་བྱས་འདུག ཨ་རིའི་གྲོང་ཁྱེར་ནིའུ་ཡོག་ཏུ་འཚོགས་པའི་ལས་རིམ་དེའི་སྐབས། རྒྱ་ནག་གི་དཔྱིད་ཀ་དུས་དེབ་ཀྱི་རྩོམ་སྒྲིག་པ་ཟུར་བ་སྐུ་ཞབས་ཧཱོ་ཕཱེན་ 胡平དང་། རྒྱ་རིགས་མང་གཙོ་དོན་གཉེར་བའི་ཚོགས་གཙོ་སྐུ་ཞབས་ཁྲིན་པོ་ཁཱོང་陈破空སོགས་ཀྱི་གཙོ་བྱས་པའི་རྒྱ་རིགས་ཀྱི་ཤེས་ལྡན་མི་སྣ་སུམ་བཅུ་ཙམ་ལྷན་འཛོམས་ཀྱི་ཐོག ༸གོང་ས་ཏ་ལའི་བླ་མིའི་སྐུའི་ཡང་སྲིད་ཀྱི་གནད་དོན་དེ་ནི་ཆོས་ལུགས་ཀྱི་བྱེད་སྒོ་དང་འབྲེལ་བ་ཡོད་པ་ཞིག་ཡིན་པར་བརྟེན། གནད་དོན་དེ་ནི་༸གོང་ས་མཆོག་དང་བོད་མི་མང་གི་ཕྱག་ན་ཡོད་པ་ལས་རྒྱ་ནག་དམར་ཤོག་སྲིད་གཞུང་ལ་དེར་ཐེ་བྱུས་བྱེད་རྒྱུའི་དབང་ཆ་གཅིག་ཀྱང་མེད་པ་ཡོངས་གྲགས་གནང་འདུག དེ་ཡང་ཐེངས་འདིའི་ཚོགས་ཐོག་ཏུ་སྐུའི་ཡང་སྲིད་དང་འབྲེལ་བའི་དོན་ཚན་བཞི་ཅན་གྱི་བསྒྲགས་གཏམ་ཞིག་ཕྱིར་བསྒྲགས་བྱས་ཡོད་པ་རྣམས་ནི། ལོ་རྒྱུས་ཀྱི་ཐོག་ནས་བོད་བརྒྱུད་ནང་བསྟན་གྱི་བླ་སྤྲུལ་ངོས་འཛིན་ཞུ་ཕྱོགས་དེ་ནི་བོད་མི་ཁོ་ནས་རང་ཆས་སུ་མངའ་བའི་ཆོས་ཕྱོགས་ཀྱི་ལམ་ལུགས་ཤིག་ཡིན་པར་བརྟེན། རྒྱ་ནག་གཞུང་གིས་༸གོང་ས་ཏཱ་ལའི་བླ་མའི་ཡང་སྲིད་འཚོལ་ཞིབ་ཀྱི་ཐད་ལ་ཐེ་གཏོགས་བྱེད་ཐབས་མེད་པ་དང་། དམིགས་བསལ་གྱིས་དུས་རྒྱུན་ནས་༸གོང་ས་མཆོག་གིས་བཀའ་གནང་བ་ལྟར། རྒྱ་ནག་དམར་ཤོག་སྲིད་གཞུང་གིས་ནང་བསྟན་ཆོས་ལུགས་འདི་རྨོངས་དད་དང་རྗེས་ལུས་སུ་བརྩི་མཁན་ཞིག་ཡིན་པ་མ་ཟད། མགོན་པོ་གང་ཉིད་གདོན་འདྲེར་བལྟ་མཁན་ཞིག་ཡིན་པར་བརྟེན། མགོན་པོ་གང་ཉིད་མཆོག་གི་ཡང་སྲིད་འཚོལ་ཞིབ་ལ་ཐེ་གཏོགས་བྱེད་བཞིན་པ་དེ་ནི་རྒྱུ་མཚན་དང་བྲལ་ཞིང་དགོད་བྲོ་བའི་བྱ་སྤྱོད་ཅིག་ཡིན་པ་དང་། ལྷག་པར་དུ་རྒྱ་ནག་གིས་སྐུའི་ཡང་སྲིད་ལ་ཐེ་བྱུས་བྱས་པ་འདི་ཡིས་འཛམ་གླིང་གི་ཤར་ནུབ་གང་སར་ཡོད་པའི་བོད་མི་རྣམས་ཀྱི་རྩ་བའི་ཐོབ་ཐང་ལ་རྡོག་རོལ་བྱས་པ་ཞིག་ཡིན་པར་བརྟེན། རྒྱ་ནག་གིས་སྐུའི་ཡང་སྲིད་ཀྱི་གནད་དོན་དེར་ཐེ་གཏོགས་བྱས་པ་ནི་དུས་ནམ་ཡང་ཁྲིམས་འགལ་གྱི་བྱ་སྤྱོད་ཅིག་ཡིན་པར་གསུངས་འདུག གཞན་ཡང་། ཐེངས་འདིའི་ཚོགས་ཞུགས་ཀྱི་རྒྱ་རིགས་ཤེས་ལྡན་པ་དང་མང་གཙོ་དོན་གཉེར་བ་རྣམས་ཀྱིས་བོད་མི་རྣམས་ཀྱི་རྩ་བའི་འགྲོ་བ་མིའི་ཐོབ་དང་རིག་གཞུང་སྲུང་སྐྱོབ། གཞན་ཡང་ཆོས་ལུགས་དད་མོས་དང་རང་བྱུང་སྐྱེད་ཁམས་ཁོར་ཡུག་སྲུང་སྐྱོབ་བཅས་ཀྱི་ཐོབ་ཐང་ལ་རྒྱབ་སྐྱོར་བྱེད་ཀྱི་ཡོད་པ། དེ་བཞིན་མགོན་པོ་གང་ཉིད་ཀྱིས་ལམ་སྟོན་མཛད་པའི་བོད་རྒྱ་གཉིས་ཕན་གྱི་དབུ་མའི་ལམ་གྱི་སྲིད་བྱུས་ལ་ཡང་རྒྱབ་སྐྱོར་བྱེད་ཀྱི་ཡོད་པར་གསལ་བོར་འཁོད་འདུག དེ་བཞིན་དོན་ཚན་ཕྱི་མའི་ནང་དུ། ཚོགས་ཞུགས་པ་རྣམས་ཀྱིས་མགོན་པོ་གང་ཉིད་མཆོག་གིས་དགོངས་བཞེས་མཛད་པའི་བོད་རྒྱ་མཛའ་འབྲེལ་དེར་རྒྱབ་སྐྱོར་དང་གུས་བརྩི་ཡོད་པར་བརྗོད་དེ། བོད་རྒྱ་མཛའ་འབྲེལ་དེ་ནི་ལོ་རྒྱུས་རང་བཞིན་ལྡན་པ་ཞིག་ཡིན་ཕྱིར་རྒྱ་རིགས་ཤེས་ལྡན་པ་དང་མང་གཙོ་དོན་གཉེར་བ་རྣམས་ཀྱིས་མཛའ་འབྲེལ་དེ་རྒྱུན་སྲིང་བྱེད་རྒྱུར་ཤུགས་སྣོན་བྱེད་རྒྱུ་ཡིན་པ་སོགས་ཀྱི་དོན་ཚན་བཞི་འཁོད་པའི་ཐོག རྒྱ་ནག་ལ་ནམ་ཡང་མགོན་པོ་གང་གི་སྐུའི་ཡང་སྲིད་འཚོལ་ཞིབ་ཀྱི་ཐད་ལ་ཐེ་བྱུས་བྱེད་རྒྱུའི་ཐོབ་ཐང་མེད་པ་མངོན་གསལ་གནང་འདུག གཞན་ཡང་སྐབས་དེར་རྒྱ་རིགས་མང་གཙོ་དོན་གཉེར་བའི་ཚོགས་གཙོ་སྐུ་ཞབས་ཁྲིན་པོ་ཁཱོང་陈破空 ཀྱིས། དེང་གི་ཆར་རྒྱ་ནག་གི་ནང་དུ་དཔལ་འབྱོར་དང་ཕྱི་འབྲེལ་གྱི་ཐད་ནས་ཉམས་དམས་ཆེན་པོ་བྱུང་བཞིན་པའི་གཏམ་བཤད་སྤེལ་བ་མ་ཟད། ཧོང་ཀོང་གཙོ་བྱས་པའི་རྒྱ་ནག་གི་ས་ཁུལ་གང་སར་སྤྱི་ཚོགས་བརྟན་བརླིང་དང་ལྷིང་འཇགས་མེད་སྐོར་བརྗོད་ཡོད་པ་ལྟར། ཧོང་ཀོང་གི་སྐུ་ཚབ་ཞིག་གིས་ཀྱང་ཧོང་མི་མང་གི་མངོན་འདོད་དང་ཕུགས་བསམ་སོགས་ཀྱི་ཐད་ནས་གཏམ་བཤད་གནང་འདུག སྐབས་དེར་ཨ་རིའི་དོན་གཅོད་དངོས་གྲུབ་ཚེ་རིང་ལགས་ཀྱིས། རྒྱ་ནག་དམར་ཤོག་གི་རྩུབ་སྤྱོད་འོག་ཏུ་མནར་གཅོད་ཐེབས་པའི་བོད་མི་དང་ཡུ་གུར་བ། དེ་བཞིན་ཧོང་ཀོང་མི་མང་སོགས་ཀྱིས་མཉམ་མཐུན་གྱི་སྒོ་ནས་ལས་འགུལ་སྤེལ་ཤུགས་ཆེ་རུ་བཏང་སྟེ། རྒྱལ་སྤྱིའི་སྤྱིི་ཚོགས་ཀྱི་ཁྲོད་དུ་རྒྱ་ནག་གི་དབང་བསྒྱུར་ལ་ཁ་གཏད་གཅོག་དགོས་གལ་ཡིན་པ་དང་། དེ་བཞིན་བོད་མིའི་སྒྲིག་འཛུགས་ཀྱི་ངོས་ནས་མི་ལོ་བཞི་བཅུའི་རིང་ལ་དབུ་མའི་ལམ་གྱི་སྲིད་བྱུས་ཀྱི་ཐོག་ནས་བོད་རྒྱ་དཀའ་རྙོག་སེལ་ཐབས་མཛད་ཡོད་ནའང་རྒྱ་ནག་དམར་ཤོག་སྲིད་གཞུང་གིས་དེར་ངོས་ལེན་གནང་མེད་ཚུལ་དང་འབྲེལ་ནས་ད་ཆ་བོད་རྒྱ་མཛའ་འབྲེལ་ཀྱི་ཚོགས་པ་དེ་ཤུགས་ཆེ་རུ་གཏོང་དགོས་བའི་ཞུ་སྐུལ་གནང་འདུག གཞན་ཡང་ཁོང་གིས། རྒྱ་ནག་སྲིད་གཞུང་གིས་ཉེ་བའི་ཆར་ཧྥོ་ཊན་གཙུལ་ལག་མཐོ་སློབ་ཀྱི་སྒྲིག་ཡིག་གི་ཁོངས་ནས་བསམ་བློའི་རང་དབང་སོགས་ཀྱི་ཚིག་བརྗོད་ཁག་ཕྱིར་འཐེན་བྱས་ཏེ་ཞི་ཅིན་ཕིང་གི་ལྟ་བ་གསར་འཇུག་བྱས་ཡོད་པ་སོགས་ཀྱི་གནས་ཚུལ་དེ་ཡང་ལུང་འདྲེན་གནང་སྟེ་ད་ལྟའི་སྤྱི་ཡོངས་ཀྱི་རྒྱ་ནག་གི་གནས་བབ་ཐད་ནས་གཏམ་བཤད་གནང་འདུག རྩ་བའི་ཐེངས་འདིའི་བོད་རྒྱ་མཛའ་འབྲེལ་གྱི་བསྒྲགས་གཏམ་གྱི་ཚོགས་ཐོག་ཏུ། རྒྱ་རིགས་མང་གཙོ་དོན་གཉེར་བ་དང་ཤེས་ལྡན་མི་སྣ་སུམ་བཅུ་ལྷག་གི་གཙོ་བྱས་པའི་ཨ་རིའི་དོན་གཅོད་པ་དང་ད་ཡོད་ཀྱི་ཨ་རིའི་དོན་གཅོད་ཁང་གི་བོད་རྒྱ་འབྲེལ་མཐུད་པ་ཚུལ་ཁྲིམས་རྒྱ་མཚོ་ལགས་དང་འབྲེལ་མཐུད་པ་ཟུར་བ་ཀུན་དགའ་བཀྲ་ཤིས་ལགས། གཞན་ཡང་ཨ་རིའི་ནིའུ་ཡོག་དང་ནིའུ་ཇིར་སཱི་ཁུལ་གྱི་བོད་རིགས་སྤྱི་དོན་ཚོགས་པའི་ཚོགས་གཙོ་དང་ཚོགས་མི་རྣམས། དེ་བཞིན་ཨ་རིའི་ཁུལ་གྱི་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་སོགས་ཀྱིས་མཉམ་ཞུགས་མཛད་ཡོད་པ་དང་། རྒྱ་རིགས་འབྲེལ་མཐུད་པ་ཚུལ་ཁྲིམས་རྒྱ་མཚོ་ལགས་ཀྱིས་རྒྱ་རིགས་རྣམས་ལ་སྣེ་ལེན་བྱས་པའི་ཐོག དོན་གཅོད་ཁང་གི་རྒྱ་རིགས་འབྲེལ་མཐུད་ཀྱི་ལས་རིམ་ངོ་སྤྲོད་དང་བོད་རྒྱ་གཉིས་ཀྱི་སྤྱི་ཚོགས་ཀྱི་ཁྲོད་དུ་མཛའ་འབྲེལ་མཐོར་འདེགས་གཏོང་ཕྱོགས་སོགས་ཀྱི་ཐད་ནས་གསུངས་བཤད་གནང་འདུག

རྒྱལ་ཁབ་ཁ་བྲལ་གྱི་ཉེས་འཛུགས་འོག་རྒྱ་ནག་གཞུང་གི་བཙོན་ཁང་ནང་ཚེ་བཙོན་གྱི་ཁྲིམས་ཆད་མྱོང་བཞིན་པའི་ཡུ་གུར་མི་རིགས་ཀྱི་རང་དབང་རྩོད་ལེན་པ་སྐུ་ཞབས་ Ilham Tohti ལགས་ལ་འདི་ལོའི་ཡོ་རོབ་གྲོས་ཚོགས་ཀྱི་འགྲོ་བ་མིའི་ཐོབ་ཐང་དང་འབྲེལ་བའི་ཆེས་མཐོའི་གཟེངས་རྟགས་ Sakharov ཞེས་པ་དེ་འབུལ་བཞེས་གནང་འདུག དེ་ཡང་ཁེ་ཉིན་ཕྱི་ཚེས་ ༡༨ ཉིན་ཡོ་རོབ་ France གི་གྲོང་ཁྱེར་ Strasbourg ནང་རྟེན་གཞི་བྱས་པའི་ཡོ་རོབ་གྲོས་ཚོགས་སུ་གྲོས་ཚོགས་ཀྱི་ཚོགས་གཙོ་སྐུ་ཞབས་ David Sassoli ལགས་དབུས་པའི་འཐུས་མི་རྣམ་པ་དང་འབྲེལ་ཡོད་ལས་བྱེད་བཅས་ལྷན་བཞུགས་ཐོག་འདི་ལོ་ ༢༠༡༩ ལོའི་ཡོ་རོབ་གྲོས་ཚོགས་ཀྱི་འགྲོ་བ་མིའི་ཐོབ་ཐང་དང་འབྲེལ་བའི་ཆེས་མཐོའི་གཟེངས་རྟགས་ Sakharov ཞེས་པ་འབུལ་བཞེས་ཀྱི་མཛད་སྒོ་ཚོགས་ཡོད་པ་དང་། སྐབས་དེར་ཡོ་རོབ་གྲོས་ཚོགས་ནས་རྒྱ་གཞུང་གི་བཙོན་ཁང་ནང་ཚེ་བཙོན་གྱི་ཁྲིམས་ཆད་མྱོང་བཞིན་པའི་ཡུ་གུར་མི་རིགས་ཀྱི་རང་དབང་རྩོད་ལེན་པ་སྐུ་ཞབས་ Ilham Tohti ལགས་ཀྱི་འདས་པའི་ལོ་དུས་ནང་ལ་ཡུ་གུར་དང་རྒྱ་ནག་དབར་གྱི་དཀའ་རྙོག་ཞི་སྒྲིག་ཡོང་ཐབས་སུ་ཕྱོགས་གཉིས་དབར་བསམ་ཤེས་ལྡན་པའི་ཐོག་གྲོས་མོལ་ཡོང་རྒྱུར་འབད་རྩོན་རབས་དང་རིམ་པ་གནང་པའི་བྱས་རྗེས་སྤྱི་དང་། ལྷག་པར་དུ་རྒྱ་ནག་གི་དམ་དྲགས་ལ་མ་བལྟས་པར་རང་ཉིད་ཀྱི་སྨྲ་བརྗོད་རང་དབང་ལོངས་སུ་སྤྱད་དེ་ཡུ་གུར་ནང་གི་འགྲོ་བ་མིའི་ཐོབ་ཐང་གི་དངོས་ཡོད་གནས་སྟངས་གསལ་སྟོན་གནང་པ་སོགས་ལ་ཆེ་བསྟོད་དང་སྦྲགས། འདི་ལོའི་གཟེངས་རྟགས་དེ་སྐུ་ཞབས་ Ilham Tohti ལགས་ལ་འབུལ་བཞེས་གནང་འདུག སྐུ་ཞབས་ Ilham Tohti ལགས་ད་ཆ་རྒྱ་གཞུང་གི་བཙོན་ཁང་ནང་ཡོད་སྟབས་མཛད་སྒོའི་ཐོག་དངོས་སུ་བཅར་ཐུབ་མེད་ཀྱང་། ཨ་རིར་གནས་བཞུགས་ཁོང་གི་བུ་མོ་ Jewher Ilham ལགས་མཛད་སྒོའི་ཐོག་ལྷན་བཞུགས་གནང་སྟེ། ཁོ་མོའི་པཱ་ལགས་ཀྱི་ངོ་ཚབ་བྱས་པའི་ཐོག་ཆེས་མཐོའི་འགྲོ་བ་མིའི་ཐོབ་ཐང་གི་གཟེངས་རྟགས་དེ་བཞེས་པ་དང་སྦྲགས། ཡོ་རོབ་གྲོས་ཚོགས་ཀྱི་གཟེངས་རྟགས་འདི་ཡིས་ཁོང་མོའི་པཱ་ལགས་ཀྱི་བྱས་རྗེས་ལ་ཆེ་བསྟོད་མཚོན་པ་ཙམ་མ་ཡིན་པར། གཟེངས་རྟགས་འདི་བརྒྱུད་ཡོ་རོབ་མཐུན་ཚོགས་གཙོས་པའི་རྒྱལ་སྤྱིའི་ཁྱོན་ཡོངས་ལ་རྒྱ་གཞུང་གི་དམ་དྲགས་སྲིད་བྱུས་འོག་ད་ལྟ་ཡང་ཡུ་གུར་མི་མང་ས་ཡ་ལྷག་གིས་བཀག་སྐྱིལ་ཁང་དུ་དཀའ་སྡུག་མྱོང་བཞིན་པའི་གནས་སྟངས་ལ་དོ་སྣང་བྱེད་དགོས་པའི་བརྡ་ལན་ཞིག་ཀྱང་མཚོན་ཡོད་པར་གསུངས་འདུག མ་ཟད་ཁོ་མོའི་པཱ་ལགས་རྒྱ་གཞུང་གིས་འཛིན་བཟུང་མ་བྱས་པའི་གོང་དུ་ཡུ་གུར་གྱི་གནད་དོན་ཐོག་ཕྱག་ལས་གནང་པའི་བརྒྱུད་རིམ་ཁག་ཅིག་དྲན་གསོ་དང་སྦྲགས། དེ་སྔ་ཕྱི་ལོ་ ༢༠༡༣ ལོར་ཁོ་མོ་Beijing གྱི་གནམ་ཐང་དུ་པཱ་ལགས་དང་ཁ་བྲལ་བ་ནས་བཟུང་ད་བར་པྰ་ལགས་ཐུགས་འཕྲད་བྱུང་ཐུབ་མེད་པ་མ་ཟད། ཕྱི་ལོ་༢༠༡༧ ལོར་ཁོ་མོའི་པཱ་ལགས་གང་དུ་ཡོད་མེད་ཀྱི་གནས་ཚུལ་གོ་བ་དེ་ནི་པཱ་ལགས་སྐོར་གནས་ཚུལ་གོ་བའི་དུས་ཚོད་མཐའ་མ་དེ་ཡིན་པ་དང་། དྲང་པོ་བཤད་ན། ངས་རང་ཉིད་ཀྱི་པཱ་ལགས་ད་ཆ་གང་དུ་ཡོད་མེད་ཤེས་ཀྱི་མེད་ཀྱང་། ཁོང་གསོན་པོ་ཡིན་པའི་རེ་བ་ཞུ་བཞིན་ཡོད་ཅེས་གསུངས་འདུག གཞན་ཡང་སྐབས་དེའི་གོ་སྐབས་དང་བསྟུན། Jewher Ilham ལགས་ནས་རྒྱ་ནག་གི་ཡུ་གུར་མི་མང་ལ་སྡུག་སྦྱོང་མནར་གཅོད་གཏོང་བཞིན་པའི་དཀའ་ངལ་དེ་ནི་འགྲོ་བ་མིའི་གཞི་རྩའི་ཐོབ་ཐང་དང་འབྲེལ་བ་ཡོད་པ་ཞིག་ཡིན་སྟབས། རྒྱལ་སྤྱིའི་ཆབ་སྲིད་མི་སྣང་དང་། ཤེས་ལྡན་མི་སྣ། དེ་བཞིན་སློབ་མ་དང་ཚོགས་སྡེ་ཡོངས་ཀྱིས་རྒྱ་ནག་གིས་སྡུག་སྦྱོང་མནར་གཅོད་གཏོང་བཞིན་པའི་དཀའ་ངལ་དེ་སེལ་ཐབས་གནང་དགོས་པའི་རེ་སྐུལ་དང་སྦྲགས། རྒྱལ་སྤྱིའི་འགོ་ཁྲིད་ཚོས་རྒྱ་ནག་དང་ངན་པ་ལག་སྦྲེལ་ནམ་ཡང་བྱེད་རྒྱུ་མེད་པར་གསུངས་འདུག དེ་བཞིན་གཟེངས་རྟགས་འབུལ་བཞེས་ཀྱི་མཛད་སྒོའི་ཐོག་ཡོ་རོབ་གྲོས་ཚོགས་ཀྱི་ཚོགས་གཙོ་སྐུ་ཞབས་ David Sassoli ལགས་ཀྱིས། ཐེངས་འདིའི་མཛད་སྒོ་དེ་ནི་འགྲོ་བ་མིའི་ཐོབ་ཐང་དང་སྨྲ་བརྗོད་རང་དབང་ལ་ཆེ་མཐོང་དང་གུས་བརྩི་ཞུ་རྒྱུའི་དུས་ཚོད་དགའ་འོས་པ་ཞིག་ཡིན་དགོས་རུང་། ད་རེས་གཟེངས་རྟགས་བཞེས་མཁན་སྐུ་ཞབས་ Ilham Tohti ལགས་དངོས་སུ་ཕེབས་མ་ཐུབ་པར་ཁོང་གི་ཞབས་སྟེགས་སྟོང་པ་ལྷག་པ་དེ་ནི་སེམས་སྐྱོ་བའི་རང་བཞིན་ཞིག་རེད་ཅེས་སེམས་སྡུག་ཆེན་པོ་གནང་འདུག གཞི་རྩའི་སྐུ་ཞབས་ Ilham Tohti ལགས་ནི་དེ་སྔོན་པེ་ཅིན་མི་རིགས་སློབ་གྲྭ་ཆེན་མོའི་དཔལ་འབྱོར་རིག་པའི་སློབ་དཔོན་ཡིན་པ་དང་། ཕྱི་ལོ་ ༢༠༠༦ ལོར་ཁོང་གིས་ Uyghur Online ཞེས་པའི་དྲྭ་རྒྱ་གསར་བཟོ་གནང་སྟེ་ཡུ་གུར་མི་རིགས་ཀྱི་རང་དབང་དང་འགྲོ་བ་མིའི་ཐོབ་ཐང་སྲུང་སྐྱོབ་སོགས་དང་འབྲེལ་བའི་རྩོམ་ཡིག་སྤེལ་བ་བརྒྱུད་རྒྱ་གཞུང་གིས་ཡུ་གུར་མི་རིགས་ཐོག་འཛིན་པའི་སྲིད་བྱུས་ལ་སྐྱོན་བརྗོད་ཤུགས་ཆེར་གནང་ཡོད་སྟབས། ཕྱི་ལོ་༢༠༡༤ ལོར་རྒྱ་གཞུང་གིས་ཁོང་ཁ་བྲལ་རིང་ལུགས་ཀྱི་ཉེས་མིང་འོག་ཚེ་བཙོན་གྱི་ཁྲིམས་ཐག་བཅད་ཡོད་ཀྱང་། རྒྱལ་སྤྱིའི་གཞུང་དང་འགྲོ་བ་མིའི་ཐོབ་ཐང་ཚོགས་པ་མང་དག་ཅིག་གིས་སྐུ་ཞབས་ Ilham Tohti ལགས་ཀྱི་བྱས་རྗེས་ལ་ཆེ་བསྟོད་དང་སྒྲགས། རྒྱ་ནག་གཞུང་ནས་ཁོང་གློད་བཀྲོལ་དགོས་པའི་ཞུ་སྐུལ་སོགས་ཀྱི་ལས་འགུལ་སྣ་མང་སྤེལ་མུས་ཙམ་མ་ཟད། འདས་པའི་ལོ་དུས་སུ་ཁོང་ལ་སྙ་གྲགས་ཆེ་བའི་ Václav Havel འགྲོ་བ་མིའི་ཐོབ་ཐང་གི་གཟེངས་རྟགས་དང་། ཨ་རིའི་རང་དབང་ཁང་པའི་རང་དབང་གཟེངས་རྟགས་སོགས་འབུལ་བཞེས་གནང་ཡོད། ཕྱོགས་མཚུངས་ཁ་ས་ཕྱི་ཚེས་ ༡༩ སྟེ། ཡོ་རོབ་གྲོས་ཚོགས་ཀྱི་ཆེས་མཐོའི་གཟེངས་རྟགས་ Sakharov ཞེས་པ་དེ་ཡུ་གུར་མི་རིགས་ཀྱི་རང་དབང་རྩོད་ལེན་པ་སྐུ་ཞབས་ Ilham Tohti ལགས་ལ་འབུལ་བཞེས་གནང་སྟེ་ཉིན་མ་གཅིག་ཕྱིན་པའི་མཚམས་དེར། ཡོ་རོབ་གྲོས་ནས་ཡུ་གུར་ནང་གི་ཛ་དྲགས་གནས་སྟངས་ལ་སེམས་འཚབ་དང་སྦྲགས། རྒྱ་ནག་གཞུང་གིས་ཡུ་གུར་ས་ཡ་ལྷག་འཛིན་བཟུང་བྱེད་བཞིན་པ་རྣམས་འཕྲལ་མར་གློད་ཀྲོལ་བཏང་སྟེ་བཀག་སྐྱིལ་ཁང་རྣམས་སྒོ་རྒྱག་དགོས་པའི་ཞུ་སྐུལ་གྱི་གྲོས་ཆོད་ཅིག་ཀྱང་བཞག་འདུག གྲོས་ཆོད་དེས་གཞན་ཡང་རྒྱ་གཞུང་ནས་སྐུ་ཞབས་ Ilham Tohti ལགས་གཙོས་པའི་ད་ཆ་རྒྱ་ནག་གི་བཙོན་འཇུག་འོག་ཡོད་པའི་ཡུ་གུར་བ་ཡོངས་རྫོགས་ཆ་རྐྱེན་གང་ཡང་མེད་པའི་ཐོག་གློད་བཀྲོལ་གཏོང་དགོས་པ་མ་ཟད། ཡུ་གུར་ནང་གི་དངོས་ཡོད་གནས་སྟངས་ཤེས་རྟོགས་སླད་རྒྱལ་སྤྱིའི་རང་དབང་ཅན་གྱི་གསར་འགོད་པ་དང་། དཔྱད་ཞིབ་པ་རྣམས་ཤིང་ཅང་ནང་བསྐྱོད་རྒྱུའི་ཐོབ་ཐང་སྤྲོད་དགོས་པ་གསུངས་འདུག མ་ཟད་ཡོ་རོབ་གྲོས་ཚོགས་ཀྱི་འཐུས་མི་རྣམས་ཀྱིས་ད་བར་ཡོ་རོབ་མཐུན་ཚོགས་དང་རྒྱ་ནག་དབར་བཞག་པའི་གྲོས་མཐུན་ཁག་ནས་བཟང་ཕྱོགས་ཀྱི་གྲུབ་འབྲས་མངོན་རྒྱུ་མེད་པའི་ཁར། རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཇེ་ཞན་ཇེ་སྡུག་ཏུ་འགྲོ་བཞིན་པ་མ་ཟད། ལྷག་པར་དུ་རྒྱ་གཞུང་གི་ཡུ་གུར་མི་མང་ལ་དྲག་གནོན་བརྙས་བཅོས་དང་བཙན་ཤེད་སོགས་བྱེད་བཞིན་པར་བློ་འཚབ་ཆེན་པོ་ཡོད་པ་འགྲེལ་བརྗོད་དང་སྦྲགས། ཡོ་རོབ་གྲོས་ཚོགས་ཀྱིས་ཤིན་ཅང་ནང་དྲག་པོའི་སྲིད་བྱུས་ལག་བསྟར་བྱེད་མཁན་གྱི་རྒྱ་ནག་གི་འགོ་ཁྲིད་དང་ལས་བྱེད་རྣམས་ལ་སྲིད་དོན་གྱི་ཉེས་ཆད་གཅོད་དགོས་པ་སོགས་འཁོད་འདུག

རྒྱལ་སྤྱིའི་མཉམ་འབྲེལ་རྒྱལ་ཚོགས་ཀྱི་ལས་བྱེད་ Emma Reilly ལགས་ཀྱིས་སུད་སི་གྲོང་ཁྱེར་ཇི་ནི་ཝ་ནང་རྟེན་གཞི་བྱས་པའི་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱིས་རྒྱ་གཞུང་དང་ངན་པ་ལག་སྦྲེལ་གྱིས་དེ་གའི་གཞུང་དང་ལྟ་སྤྱོད་མི་མཐུན་མཁན་གྱི་འགྲོ་བ་མིའི་ཐོབ་ཐང་གི་ལས་འགུལ་བ་རྣམས་ཀྱི་ཐོག་ལྟ་སྲུང་དང་།   ཁོང་ཚོའི་གནད་དོན་རྒྱ་ནག་ལ་མཁོ་སྤྲོད་བྱེད་ཀྱི་ཡོད་པར་སྐྱོན་འཛུགས་བྱས་འདུག གཞི་རྩའི་ Reilly ལགས་ཀྱིས་གནད་དོན་དེ་དང་འབྲེལ་དེ་སྔ་ཕྱི་ལོ་ ༢༠༡༣ ལོར་ཡོངས་གྲགས་གནང་ཡོད་པ་དང་།  ཁ་སང་ཨ་རིའི་སྙན་གྲགས་ཆེ་བའི་ Fox གསར་ཁང་གི་དྲ་གནས་ཐོག་གནས་ཚུལ་སྤེལ་བར་གཞིགས་ན།  Reilly ལགས་ཀྱིས་ཉེ་ཆར་རྒྱལ་ཚོགས་ཀྱི་དེར་འབྲེལ་གནད་དོན་ཨ་མི་རི་ཀའི་གཞུང་འབྲེལ་ལས་བྱེད་བགྲེས་བ་དང་གྲོས་ཚོགས་འཐུས་མི་རྣམས་ཀྱི་མཚན་ཐོག་ཏུ་ཕྱག་བྲིས་ཤིག་ཕུལ་ཡོད་པ་དང་།  ཕྱག་བྲིས་དེ་བརྒྱུད་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱིས་མུ་མཐུད་རྒྱ་ནག་གི་དམིགས་འབེན་དུ་བཟུང་བའི་འགྲོ་བ་མིའི་ཐོབ་ཐང་གི་ལས་འགུལ་བ་རྣམས་རྒྱལ་ཚོགས་ཀྱི་ལྷན་ཚོགས་ཐོག་མཉམ་ཞུགས་གནང་མིན་གྱི་མཚན་དང་བཅས་པའི་གནད་དོན་ཡོངས་མཁོ་སྤྲོད་བྱེད་ཀྱི་ཡོད་པ་མངོན་གསལ་བྱུང་འདུག་པ་དང་།   Fox གསར་ཁང་ལ་ཕྱག་བྲིས་དེ་དང་འབྲེལ་གློག་འཕྲིན་གྱི་འདྲ་བཤུས་ལག་སོན་བྱུང་བའི་ནང་།  འགྲོ་བ་མིའི་ཐོབ་ཐང་གི་ལས་འགུལ་བའི་ཐོ་གཞུང་ནང་བོད་མི་དང་།  ཡུ་གུར་བ།  དེ་བཞིན་ཨ་མི་རི་ཀའི་མི་སེར་ཡང་ཡོད་པ་ཤེས་རྟོགས་བྱུང་འདུག ཉེ་ལམ་ Reilly ལགས་ཀྱིས་ Fox གསར་ཁང་ལ།  རྒྱལ་ཚོགས་ཀྱིས་རྒྱ་ནག་ལ་མཐུན་འགྱུར་བྱེད་རྒྱུ་མཚམས་འཇོག་བྱེད་རྒྱུ་ལས་ལྡོག་སྟེ།  Reilly ལགས་ལ་འཁོན་ལན་ཚུལ་དུ་སྐུར་འདེབས་བྱེད་རྒྱུ་དང་།  དེ་བཞིན་ཁོང་གི་མདུན་ལམ་མེད་པ་བཟོ་ཐབས་བྱེད་པ།   ལྷག་པར་དུ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ནས་རང་ཉིད་ཀྱི་ཁེ་ཕན་སླད་པེ་ཅིན་དང་ལྷན་དུ་ལག་སྦྲེལ་བྱེད་ཀྱི་ཡོད་པ་གསུངས་འདུག འོན་ཀྱང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་མགྲིན་ཚབ་པ་ Rolando Gomez ལགས་ཀྱིས།  Reilly ལགས་ཀྱིས་གསུངས་པ་དེ་འཁྱོགས་བཤད་ཡིན་པ་དང་།  རྒྱལ་ཚོགས་ནས་རྒྱ་གཞུང་ལ་དེ་འབྲེལ་གནས་ཚུལ་མཁོ་སྤྲོད་བྱས་པའི་གནད་དོན་ལ་ངོས་ལེན་བྱས་མི་འདུག དེ་བཞིན་གནད་དོན་དེའི་ཐོག་རྒྱལ་སྤྱིའི་ཡུ་གུར་ཚོགས་པའི་ཚོགས་གཙོ་ Dolkun Isa ལགས་ཀྱིས། རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་བྱ་སྤྱོད་ལ་བློ་ཕམ་དང་སྦྲགས།  ལྷན་ཚོགས་ཀྱིས་ཡུ་གུར་མི་རིགས་ཀྱི་འགྲོ་བ་མིའི་ཐོབ་ཐང་སྲུང་སྐྱོབ་དང་འབྲེལ་ཕྱི་གསལ་ནང་གསལ་གྱི་ལས་དོན་མ་གནང་བ་དེ་དཀའ་ངལ་ཞིག་ཡིན་པར་གསུངས་འདུག དེ་དོན་ཨ་རི་གྲོས་ཚོགས་གོང་མའི་འཐུས་མི་སྐུ་ཞབས་ Ted Cruz ལགས་ཀྱི་མགྲིན་ཚབ་པས།  གལ་ཏེ་ Reilly ལགས་ཀྱིས་གསུངས་པ་དེ་བདེན་པ་ཡིན་ན།  རྒྱལ་ཚོགས་ནི་འཛམ་བུ་གླིང་གི་ཆེས་དྲག་གནོན་ཅན་གྱི་སྲིད་གཞུང་ལ་མགོ་བོ་སྒུར་མཁན་དང་མང་གཙོར་བཙན་རྒོལ་བྱེད་མཁན་གྱི་མི་ངན་གི་ཚོགས་པ་ཞིག་ཡིན་པར་སྐྱོན་བརྗོད་གནང་སྟེ་དངོས་དོན་ར་སྤྲོད་བྱུང་རྒྱུ་ཡིན་པ་གསུངས་ཏེ།  ཁོང་གིས་རྒྱལ་ཚོགས་དེ་རྒྱལ་སྤྱིའི་ཚོགས་པ་ཞིག་ཡིན་པའི་ཆ་ནས་རྒྱ་ནག་གི་སྟོབས་ཤུགས་ལ་མགོ་བོ་སྒུར་རྒྱུའི་ཚབ་ཏུ་དེར་གདོང་ལེན་བྱེད་དགོས་པར་གསུངས་འདུག ད་དུང་ཇི་ན་ཝ་ནང་རྟེན་གཞི་བྱས་པའི་རྒྱལ་ཚོགས་ལྟ་ཞིབ་ཚོགས་པ་ཞེས་པའི་འགྲོ་བ་མིའི་ཐོབ་ཐང་གི་ཚོགས་པའི་འགན་འཛིན་ Hillel Neuer ལགས་ཀྱིས།  འདས་པའི་ལོ་ཤས་ནས་རྒྱ་གཞུང་གིས་རྒྱལ་ཚོགས་ཀྱིས་དེ་གའི་གཞུང་ལ་སྐྱོན་བརྗོད་བྱེད་མཁན་ཆེ་ཆུང་ལ་མ་བལྟས་པར་ཁོང་ཚོའི་སྨྲ་བརྗོད་རང་དབང་འགོག་ཐབས་སླད་ཐབས་ཤེས་ཡོད་དགུ་གཏོང་བཞིན་ཡོད་སྐོར་དང་།   ཡང་སྒོས་རྒྱ་གཞུང་གིས་དེ་གའི་གཞུང་དང་ལྟ་སྤྱོད་འགལ་ཚེ་ལྟ་སྤྱོད་མི་མཐུན་མཁན་གང་ཟག་གི་མདུན་ལམ་ལ་དོ་ཕོག་གཏང་སྲིད་པ་གསུངས་འདུག

༢༠༡༩ལོའི་འགྲོ་བ་མིའི་ཐོབ་ཐང་དང་འབྲེལ་བའི་ཇི་ནི་ཝའི་གླེང་སྟེགས་མཇུག་སྒྲིལ་དང་འབྲེལ། རྒྱ་ནག་གཞུང་གི་ངོས་ནས་ཁུལ་དེའི་མངའ་འོག་ཏུ་ཡོད་པའི་ས་ཁུལ་ཁག་གི་མང་ཚོགས་ཐོག་ཚད་མཐོའི་འཕྲུལ་རིགས་ཀྱི་ལམ་ནས་དམ་དྲག་དང་མང་ཚོགས་ཀྱི་འགྲོ་བ་མིའི་ཐོབ་ཐང་ཐང་རྡོག་རོལ་གཏོང་བཞིན་པའི་བྱ་སྤྱོད་དེ་འཕྲལ་མར་མཚམས་འཇོག་དགོས་པའི་ཡོངས་ཁྱབ་སྤྱིར་བསྒྲགས་ཤིག་གནང་སོང་། དེ་ཡང། ཟླ་བ་འདིའི་ཕྱི་ཚེས་༡༤་དང་༡༥བཅས་ཉིིན་གཉིས་རིང་འདི་ག་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གནས་ཡུལ་སུད་སི་གྲོང་ཁྱེར་ཇི་ནི་ཝའི་ནང་སུད་སི་སྐུ་ཚབ་དོན་གཅོད་ཁང་གི་གོ་སྒྲིག་འོག རྒྱ་ནག་གི་ཚད་མཐོའི་འཕྲུལ་རིགས་ལམ་ནས་དམ་དྲག་དང་མང་ཚོགས་ཀྱི་ཆོས་དད་རང་དབང་ཞེས་པའི་བརྗོད་གཞིའི་ཐོག་༢༠༡༩ལོའི་ཇི་ནི་ཝའི་གླེང་སྟེགས་སྐོང་ཚོགས་བྱས་ཡོད་པ་རེད། ཕྱི་ཚེས་༡༥ཉིན་ཕྱི་དྲོ་ལྷན་ཚོགས་མཇུག་སྒྲིལ་དང་འབྲེལ། ཐེངས་དེའི་ཚོགས་འདུའི་ཐོག་གཏམ་བཤད་གནང་མཁན་དང་ཚོགས་བཅར་བ་བཅས་ཀྱིས་བསམ་ཚུལ་བསྡུ་ལེན་བྱས་པའི་ཐོག ད་ལྟའི་ཆར་རྒྱ་གཞུང་གི་ཚད་མཐོ་བའི་འཕྲུལ་རིགས་ཀྱི་ལམ་ནས་མང་ཚོགས་ལ་དྲག་གནོན་བྱེད་བཞིན་པའི་བྱ་སྤྱོད་ལ་སེམས་འཚབ་དང། དེ་བཞིན་རྒྱ་ནག་གཞུང་དང་རྒྱལ་སྤྱིའི་གཞུང་འབྲེལ་ཚོགས་ཁག་ལ་འབོད་སྐུལ་བཅས་དོན་ཚན་ཁག་གཉིས་ཀྱི་ཐོག་ནས་སྤྱི་མོས་མཚན་རྟགས་འཁོད་པའི་ཡོངས་ཁྱབ་ཀྱི་སྤྱིར་བསྒྲགས་ཤིག་སྤེལ་སོང་། སྤྱིར་བསྒྲགས་དེའི་ནང་འཁོད་པར་གཞིགས་ན། རྒྱ་ནག་གཞུང་གི་ངོས་ནས་བོད་ཚུད་པའི་ནང་སོག་དང་། ཡུ་གུར། ཧོང་ཀོང་སོགས་ཀྱི་མང་ཚོགས་ཐོག་ ཚད་མཐོའི་འཕྲུལ་རིགས་ལམ་ནས་དམ་དྲག་དང་མང་ཚོགས་ཀྱི་འགྲོ་བ་མིའི་ཐོབ་ཐང་ཐང་དང་། ཆོས་དད་རང་དབང་རྡོག་རོལ་གཏོང་བཞིན་པའི་བྱ་སྤྱོད་འཕྲལ་མར་མཚམས་འཇོག་དགོས་པ་དང་། དེ་བཞིན་དེའི་འདྲའི་འཕྲུལ་རིགས་ཁག་རྒྱལ་ཁབ་གཞན་གྱི་ནང་དུ་ཕྱིར་བཙོང་བྱེད་བཞིན་པ་མཚམས་འཇོག་པ་དང་། ལྷག་པར་དུ་རྒྱ་ནག་གཞུང་གིས་རྒྱལ་སྤྱིའི་འགྲོ་བ་མིའི་ཐོོབ་ཐང་ཡོངས་ཁྱབ་སྤྱིར་བསྒྲགས་ནང་འཁོད་པའི་འབྲུ་དོན་གཞིར་བཟུང། མང་ཚོགས་ཀྱི་འགྲོ་བ་མིའི་ཐོབ་ཐང་དང། ས་གནས་མང་ཚོགས་ཀྱི་ཆོས་དད་རང་དབང། རང་ཉིད་ཀྱི་ཆོས་ལུགས་དབུ་ཁྲིད་འདེམས་པར་རང་དབང་བཅས་ལ་གུས་བརྩི་དང་། ཕྱི་གསལ་ནང་གསལ། དེ་བཞིན་མང་ཚོགས་ཀྱི་ཐོབ་ཐང་དང་རང་དབང་ལ་འགན་ལེན་བྱ་དགོས་ཅེས་བརྗོད་འདུག   དེ་ག་ནང་བཞིན་ཐེངས་འདིའི་གླེང་སྟེགས་དེ་བརྒྱུད་ནས། རྒྱལ་ཚོགས་དང་། རྒྱལ་སྤྱིའི་གཞུང། ཡོ་རོབ་མཐུན་ཚོགས། འགྲོ་བ་མིའི་ཐོབ་ཐང་སྲུང་སྐྱོབ་གནང་མཁན་གཞུང་འབྲེལ་མིན་པའི་ཚོགས་སྡེ་ཁག དེ་བཞིན་རྒྱལ་སྤྱིའི་ཚོང་ལས་སྡེ་ཁག་བཅས་ལ། རྒྱ་ནག་དང་ལྷན་དུ་ཚོང་འབྲེལ་བྱེད་པའི་སྐབས་སུ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཁག་ལག་བསྟར་དོན་འཁྱོལ་དང་། མང་ཚོགས་ཀྱི་རང་དབང་དང་ཐོབ་ཐང་སྲུང་སྐྱོབ་བྱ་དགོས་པ། རྒྱ་ནག་གཞུང་གིས་མང་ཚོགས་ཐོག་དམ་དྲག་བྱ་རྒྱུའི་ཚད་མཐོའི་འཕྲུལ་རིགས་ཁག་ཕྱི་བཙོངགི་བྱ་སྤྱོད་ལ་སྟངས་འཛིན་དང། བཀག་འགོག དེ་བཞིན་མང་ཚོགས་ཀྱི་རང་དབང་ཐོབ་ཐང་སྲུང་སྐྱོབ་འགན་ལེན་དགོས་ཞེས་གསལ་འདུག སྐབས་དེའི་ཇི་ནི་ཝའི་གླེང་སྟེགས་ཐོག་ཕེབས་མཁན་གཏམ་བཤད་གནང་མཁན་རྣམས་ཀྱི་ངོས་ནས་སྤྱིར་བསྒྲགས་དེའི་ཐོག་སེམས་འཚབ་ཡོད་པ་བསྟན་གནང་པའི་དོན་ཚན་གྱི་ཁོངས་སུ། རྒྱ་ནག་གཞུང་གིས་ད་སྐབས་ཁུལ་དེའི་མངའ་འོག་ཏུ་ཡོད་པའི་བོད་གཙོས་པའི་ས་ཁུལ་ཧོང་ཀོང་། ནང་སོག དེ་བཞིན་ཡུ་གུར་བཅས་ས་ཁུལ་ནང་དུ་ཚད་མཐོའི་འཕྲུལ་རིགས་བེད་སྤྱད་དེ་མང་ཚོགས་ཀྱི་ཆོས་དད་རང་དབང་། འདུ་འཛོམས་རང་དབང་། སྨྲ་བརྗོད་རང་དབང་། དེ་བཞིན་འགྲོ་འདུག་སྤྱོད་གསུམ་གྱི་རང་དབང་ཐོག་དམ་དྲག་ཇེ་ཆེར་གཏོང་བཞིན་པའི་གནས་སྟངས་དང་། དེ་བཞིན་རྒྱ་ནག་གཞུང་གིས་བོད་གཙོས་ས་ཁུལ་དེ་དག་ནང་གི་རང་སོ་སོའི་མི་རིགས་ཀྱི་ངོ་བོ་མཚོན་པའི་སྐད་ཡིག་དང་། རིག་གཞུང་བཅས་རྩ་མེད་གཏོང་བཞིན་པར་ཆེས་སེམས་འཚབ་ཡོད་པར་བརྗོད་འདུག ལྷག་པར་དུ་ད་སྐབས་རྒྱ་གཞུང་གིས་དབང་ཆ་གཅིག་བསྡུས་རིང་ལུགས་གིས་བཟོ་སྐྲུན་བྱས་པའི་མང་ཚོགས་ཐོག་དམ་དྲག་བྱ་རྒྱུའི་ཚད་མཐོའི་འཕྲུལ་རིགས་ཁག་རྒྱལ་ཁབ་གཞན་ནང་དུ་ཕྱི་བཙོང་དང་། རྒྱལ་སྤྱིའི་ཁྱོན་ཡོངས་ཀྱི་དྲ་ལམ་ཁག་སྟངས་འཛིན་གྱིས་འཛམ་གླིང་ཁྱོན་ཡོངས་ཀྱི་མང་གཙོར་ཉམས་རྒུད་གཏོང་བཞིན་པ་དང་། དབང་ཆ་གཅིག་བསྡུས་རིང་ལུགས་ཀྱིས་དབང་ཚད་གོ་ལ་ཁྱོན་ཡོངས་སུ་དར་སྤེལ་བྱེད་བཞིན་པའི་བྱ་སྤྱོད་ལ་ཧ་ཅང་སེམས་འཚབ་བྱེད་ཡུལ་ཞིག་ཆགས་ཡོད་པ་ཡང་འགྲེལ་བརྗོད་བྱས་འདུག རྩ་བའི་ཐེངས་འདིའི་རྒྱ་ནག་ཚད་མཐོའི་འཕྲུལ་རིགས་ཀྱི་ལམ་ནས་དམ་དྲག་དང་ཆོས་དད་རང་དབང་ཞེས་པའི་༢༠༡༩ཇི་ནི་ཝའི་གླེང་སྟེགས་འདིའི་ཐོག ཧོང་ཀོང་དང་ཐེ་ཝན། ཅེཀ་སྤྱི་མཐུན་རྒྱལ་ཁབ། ཡུ་གུར། ནང་སོག རྒྱ་རིགས། བོད་མི། དེ་བཞིན་རྒྱ་ནག་དང་བོད་ནང་གི་འགྲོ་བ་མིའི་ཐོབ་ཐང་ཐོག་ཉམས་ཞིབ་གནང་མཁན་དང་། དེང་དུས་འཕྲུལ་རིགས་དམ་དྲག་ཐོག་ཆེད་ལས་ཉམས་ཞིབ་པ་། འགྲོ་བ་མིའི་ཐོབ་ཐང་རྩོད་ལེན་པ། ཆབ་སྲིད་མི་སྣ་དང་། དེ་བཞིན་གྲོས་ཚོགས་འཐུས་མི། ཆབ་སྲིད་བཙོན་ཟུར་བཅས་ཡོ་རོབ་དང་ཨེ་ཤ་ཡ། བྱང་ཨ་མི་རི་བཅས་ཁྱོན་རྒྱལ་ཁབ་མི་འདྲ་བ་༧ལྷག་ནས། གཏམ་བཤད་གནང་མཁན་མི་སྣ་༡༦དང་། འདི་ག་ཇི་ནི་ཝའི་གཞུང་ཚབ་ཁག་གི་འབྲེལ་ཡོད་མི་སྣ། བོད་དོན་རྒྱབ་སྐྱོར་བ། དེ་བཞིན་འདི་ག་སུད་སི་བོད་མིའི་གཞུང་དང་གཞུང་འབྲེལ་མིན་པའི་ཚོགས་པའི་སྐུ་ཚབ་ཚོགས་མི་བཅས་ཁྱོན་ཚོགས་བཅར་༡༣༠ལྷག་འདུ་འཛོམས་བྱུང་ཡོད་པ་རེད།

ཁ་སང་ཕྱི་ཟླ་ ༩ ཚེས་ ༨ ཉིན་ཨ་རིའི་སྲིད་གཞུང་གིས་ཤིན་ཅང་གི་ཡུ་གུར་མི་རིགས་གཙོས་གཞན་ཁ་ཆེའི་གྲངས་ཉུང་མི་རིགས་ཁྲི་ཚོ་མང་པོ་བཙོན་འཇུག་མནར་གཅོད་བཏང་ནས་འགྲོ་བ་མིའི་ཐོབ་ཐང་ལ་བརྡལ་བཤིག་གཏོང་བའི་བྱ་སྤྱོད་དང་ངན་པ་ལག་སྦྲེལ་ཡོད་པའི་རྒྱ་ནག་གཞུང་འབྲེལ་མི་སྣ་རྣམས་ཨ་རིའི་ནང་འགྲུལ་སྐྱོད་ཆོག་པའི་མཐོང་མཆན་གནང་རྒྱུ་མིན་པའི་བསྒྲགས་གཏམ་སྤེལ་འདུག ཨ་རི་ New York ནང་རྟེན་གཞི་བྱས་པའི་ Bloomberg ཞེས་པའི་དྲྭ་རྒྱ་གཙོས་དྲྭ་རྒྱ་ཁག་ཅིག་གི་ཐོག་ཏུ་གནས་ཚུལ་སྤེལ་བར་ཨ་རིའི་ཚོང་ལས་སྡེ་ཚན་གྱིས་རྒྱ་ནག་གི་འཕྲུལ་ལས་བཟོ་གྲྭ་དང་ཚོགས་པ་ཁག་ ༢༨ མིང་ཐོ་ནག་པོའི་ནང་དུ་བཅུག་ནས་ཚོགས་པ་དེ་དག་གིས་ཨ་རི་ནས་ཅ་དངོས་རིགས་ཉོ་ཚོང་དང་མཉམ་ལས་རིགས་བྱ་རྒྱུ་མེད་པ་བཟོ་རྒྱུའི་གསལ་བསྒྲགས་སྤེལ་ནས་ཉིན་གཅིག་གི་རྗེས་སུ་ཨ་རིའི་ཕྱི་སྲིད་དྲུང་ཆེ་སྐུ་ཞབས་ Michael Pompeo ལགས་ཀྱིས་ the stain of the century ཞེས་དུས་རབས་ཀྱི་དྲི་ནོག་ཅན་ཞེས་བརྗོད་དེ་ཤིན་ཅང་གི་ཡུ་གུར་མི་རིགས་གཙོས་ཁཱ་ཛཱ་ཁི་སི་དང་། གཞན་ཁ་ཆེའི་གྲངས་ཉུང་མི་རིགས་རྣམས་ལ་ཚད་འདས་རང་བཞིན་གྱི་དྲག་གནོན་དང་མི་གྲངས་ཁྲི་ཕྲག་མང་པོ་བཙོན་འཇུག་མནར་གཅོད་བཏང་ནས་འགྲོ་བ་མིའི་ཐོབ་ཐང་ལ་རྡོག་རོལ་གཏོང་བའི་བྱ་སྤྱོད་དང་ངན་པ་ལག་སྦྲེལ་ཡོད་མཁན་གྱི་རྒྱ་ནག་གཞུང་གི་འགོ་ཁྲིད་དང་རྒྱ་ནག་དམར་ཤོག་ཚོགས་པའི་གཞུང་འབྲེལ་མི་སྣ་རྣམས་ལ་ཨ་རིར་འགྲུལ་སྐྱོད་ཆོག་པའི་མཐོང་མཆན་གནང་རྒྱུ་མིན་པ་མ་ཟད། རྒྱ་ནག་གཞུང་གི་དཔོན་རིགས་དེ་དག་གི་ནང་མི་རྣམས་ལའང་མཐོང་དེ་བཞིན་དམ་དྲག་གནང་རྒྱུ་ཡིན་པ་གསུངས་འདུག ད་དུང་བརྒྱུད་ལམ་དེའི་ཐོག་རྒྱ་ནག་གཞུང་གི་དཔོན་རིགས་ཚོར་མཐོང་མཆན་གནང་རྒྱུ་མིན་པའི་ཐག་གཅོད་དེ་ནི་ Immigration and Nationality Act ཞེས་པའི་ཁྲིམས་གཞི་དེའི་འོག་ནས་བཀའ་འཁྲོལ་བྱུང་བ་ཞིག་དང་ཨ་རིའི་ཕྱི་འབྲེལ་སྲིད་བྱུས་ལ་དོ་ཕོག་གཏོང་མཁན་གྱི་གང་ཟག་སུ་འདྲ་ཞིག་ལ་མཐོང་མཆན་གནང་མི་ཆོག་པའི་ཐག་གཅོད་གནང་རྒྱུའི་དབང་ཚད་དེ་ཕྱི་དྲིལ་དྲུང་ཆེ་ལ་དབང་བ་ཞིག་ཡིན་པ་མ་ཟད། རྒྱ་ནག་གཞུང་ཀྱི་ཚོང་འབྲེལ་འཐུས་ཚབ་མི་སྣ་ཁག་གཅིག་ཨ་རིའི་ནང་སང་ཚོང་འབྲེལ་གྱི་གྲོས་མོལ་ཆེད་སླེབས་ལ་ཉེ་བའི་ཚོར་བ་རྣོ་བའི་དུས་ཚིགས་ཤིག་དང་སྟབས་ཁེལ་ཡོད་པ་རེད། རྒྱ་ནག་གཞུང་གིས་ཤིན་ཅང་གི་ཡུ་གུར་མི་རིགས་གཙོས་ཁཱ་ཛཱ་ཁི་སི་དང་ཁ་ཆེའི་གྲངས་ཉུང་མི་རིགས་རྣམས་ལ་མནར་གཅོད་ཚད་མེད་བཏང་དང་གཏོང་བཞིན་པ་དང་འབྲེལ། སྐུ་ཞབས་ Pompeo ལགས་ཀྱིས་བསྒྲགས་གཏམ་ནང་རྒྱ་ནག་གཞུང་གིས་དྲག་གནོན་དེ་འཕྲལ་དུ་མཚམས་འཇོག་དགོས་པ་དང་། འགྲོ་བ་མིའི་ཐོབ་ཐང་སྲུང་སྐྱོབ་བྱ་རྒྱུ་ནི་གལ་གནད་ཆེ་བ་ཞིག་དང་། རྒྱལ་ཁབ་ཚང་མའི་ངོས་ནས་ངེས་པར་དུ་ འགྲོ་བ་མིའི་ཐོབ་ཐང་དང་འབྲེལ་བའི་དམ་བཅའ་ལ་གུས་བརྩི་ཞུ་དགོས་པ་གསུངས་འདུག དེ་བཞིན་ཨ་རིའི་གཞུང་ནས་བསྒྲགས་གཏམ་དེ་སྤེལ་ཟིན་རྗེས་ཨ་རིར་རྟེན་གཞི་བྱས་པའི་རྒྱ་ནག་གཞུང་ཚབ་ཁང་གིས་འཕྲུལ་བྱའི་དྲྭ་ལམ་བརྒྱུད་ཨ་རིའི་གཞུང་ནས་གཞི་རྩའི་འགྲོ་བ་མིའི་ཐོབ་ཐང་ལ་ཁ་གཡར་ནས་རྒྱ་ནག་གི་འཕྲུལ་ལས་བཟོ་གྲྭ་དང་ཚོགས་པ་ཁག་ཅིག་མིང་ཐོ་ནག་པོའི་ནང་དུ་བཅུག་པའི་ཕྱི་ཉིན་དེར་རྒྱ་ནག་གི་གཞུང་འབྲེལ་མི་སྣ་ལ་མཐོང་མཆན་གནང་རྒྱུ་མིན་ཟེར་བ་ནི་རྒྱལ་སྤྱིའི་ཁྲོད་ཕྱི་འབྲེལ་སྲིད་བྱུས་ཀྱི་འབྲུ་དོན་དང་མཐའ་གཅིག་ཏུ་འགལ་བ་ཞིག་ཡིན་པ་དང་། ཤིན་ཅང་ནང་གི་གནད་དོན་ནི་རྒྱ་ནག་ནང་ཁུལ་གྱི་གནད་དོན་ཞིག་ཡིན་པ་ལས་དེར་ཕྱིའི་རྒྱལ་ཁབ་ཀྱི་ཐད་བྱུས་བྱེད་ཆོག་གི་མེད་པ་མ་ཟད། ཨ་རིའི་གཞུང་ནས་ནོར་འཁྲུལ་དེ་ཁས་བླངས་ཐོག་ནོར་འཁྲུལ་ཡོ་བསྲང་དགོས་སྐོར་རྒོལ་ལན་བྱས་འདུག གཞི་རྩའི་རེས་གཟའ་ཟླ་བའི་ཉིན་ཨ་རིའི་ཚོང་ལས་སྡེ་ཚན་གྱིས་རྒྱ་ནག་གི་འཕྲུལ་ལས་བཟོ་གྲྭ་དང་ཚོགས་པ་ཁག་ ༢༨ མིང་ཐོ་ནག་པོར་བཅུག་དོན་ནི་ཚོང་ལས་ཁང་དེ་དག་གིས་རྒྱ་ནག་གཞུང་ལ་མཉམ་འབྲེལ་བྱས་ནས་ཤིན་ཅང་གི་ཡུ་གུར་མི་རིགས་གཙོས་ཁ་ཆེའི་གྲངས་ཉུང་མི་རིགས་ལ་དྲག་གནོན་དང་འཛིན་བཟུང་འགྲོ་བ་མིའི་ཐོབ་ཐང་ལ་རྡོག་རོལ་ཚབས་ཆེན་བཏང་དང་གཏོང་བཞིན་རྐྱེན་ཡིན་པ་རེད།