Tibetan Royal Year of 2151 | Year of the Wood Dragon

རྒྱ་གར།

བཞུགས་སྒར་དྷ་ས་རྒྱལ་སྤྱིའི་ས་བཀྲ་ཐོག་འབུར་དུ་ཐོན་ཐུབ་པ་ནི་༸གོང་ས་མཆོག་གི་བཀའ་དྲིན་རེད།

ཟླ་བ་འདིའི་ཕྱི་ཚེས་ ༡༠ ཉིན་ནས་བཞུགས་སྒར་ཉེ་འདབས་སུ་རྟེན་གཞི་བྱས་པའི་ཧི་མཱ་ཅལ་མངའ་སྡེའི་གྲོས་ཚོགས་ཚོགས་ཁང་དུ་ཧི་མཱ་ཅལ་མངའ་སྡེའི་དགུན་དུས་ཀྱི་གྲོས་ཚོགས་འཚོགས་བཞིན་པ་དང་བསྟུན། ཁ་སང་དགོང་དྲོ་ཚོུད་ ༥༌༠༠ མ་ཟིན་ཙམ་ལ་བོད་མི་མང་སྤྱི་འཐུས་ལྷན་ཚོགས་ནས་མངའ་སྡེའི་གྲོས་ཚོགས་སུ་ཆེད་བཅར་གྱིས་མངའ་སྡེའི་སྤྱི་ཁྱབ་བློན་ཆེན་དང་གྲོས་ཀྱི་ཚོགས་གཙོ་མཆོག་རྣམ་གཉིས་ཀྱིས་དབུས་པའི་གྲོས་ཚོགས་འཐུས་མི་རྣམས་ལ་མཛའ་བརྩེའི་འཚམས་འདྲི་མཚོན་ཆེད་གསོལ་ཇ་ཞལ་ཏོག་འདེགས་འབུལ་ཞུས་སོང་། མཛའ་བརྩེའི་གསོལ་ཇ་ཞལ་ཏོག་འདེགས་འབུལ་གྱི་ལྷན་འཛོམས་དེའི་ཐོག་ཧི་མཱ་ཅལ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ Jai Ram Thakur མཆོག་དང་མངའ་སྡེའི་གྲོས་ཚོགས་ཀྱི་ཚོགས་གཙོ་སྐུ་ཞབས་ Rajeev Bindal མཆོག མངའ་སྡེའི་སྤྱི་ཁྱབ་བློན་ཆེན་ཟུར་པ་སྐུ་ཞབས་ Virbhadra Singh མཆོག་བཅས་ཀྱིས་གཙོས་པའི་མངའ་སྡེའི་གྲོས་ཚོགས་འཐུས་མི་རྣམ་པ། དེ་བཞིན་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་པདྨ་འབྱུང་གནས་མཆོག་དང་ཚོགས་གཞོན་ཨཱ་ཙཱརྱ་ཡེ་ཤེས་ཕུན་ཚོགས་མཆོག་གིས་དབུས་པའི་སྤྱི་འཐུས་རྒྱུན་ལས་བཅས་ཕེབས་འདུགསྐབས་དེར་ཧི་མཱ་ཅལ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ Jai Ram Thakur མཆོག་གིས་༸གོང་ས་༸སྐྱབས་མགོན་ཆེན་པོ་མཆོག་གིས་རྣམ་ཀུན་ནས་ཧི་མཱ་ཅལ་མངའ་སྡེ་འདི་ནི་༸གང་ཉིད་མཆོག་གི་ནང་ལྟ་བུར་ངོས་བཞེས་མཛད་ཀྱི་ཡོད་པ་མ་ཟད། མགོན་པོ་༸གང་ཉིད་མཆོག་ནས་ཁྱེད་ནི་དུས་རྟག་ཏུ་ངོས་ཀྱི་སྤྱི་ཁྱབ་བློན་ཆེན་རེད་ཅེས་ཐུགས་དགའ་ཚོར་ཆེན་པོ་གནང་གི་ཡོད་པ་དང་། ༸གོང་ས་མཆོག་གི་ཐུགས་རྗེ་བཀའ་དྲིན་ལ་བརྟེན་ནས་བཞུགས་སྒར་དྷ་རྨ་ས་ལ་འདི་རྒྱལ་སྤྱིའི་ས་བཀྲའི་སྟེང་འབུར་དུ་ཐོན་ཐུབ་ཡོད་པ་རེད།ད་ལྟའི་ཆར་ཕྱི་ནང་གི་ཡུལ་སྐོར་སྤྲོ་འཆམ་པ་མང་པོ་ཡོང་གི་ཡོད་པ་སོགས་འགྲེལ་བརྗོད་དང་སྦྲགས། ཧི་མཱ་ཅལ་གྱི་མི་མང་དང་བོད་མི་དབར་ཐུན་མོང་མ་ཡིན་པའི་འབྲེལ་བ་ཡོད་པ་ལྟར་ང་ཚོས་འབྱུང་འགྱུར་ཡང་སྐྱིད་སྡུག་མཉམ་མྱོང་དང་། མཉམ་རུབ་ཀྱི་ཐོག་ནས་རྒྱུན་འཛིན་གནང་དགོས་གལ་ཡིན་པ་རེད་ཅེས་གསུངས་ཡོད།དེ་བཞིན་ཧི་མཱ་ཅལ་མངའ་སྡེའི་སྤྱི་ཁྱབ་བློན་ཆེན་ཟུར་པ་སྐུ་ཞབས་ Virbhadra Singh མཆོག་གིས་གསར་འགོད་པའི་བཅར་འདྲི་དང་ལེན་གནང་བར། ཁོང་ད་རེས་ལྷན་འཛོམས་ཐོག་བཅར་དོན་གཙོ་བོ་ནི་བོད་པ་དང་ས་གནས་ཡུལ་མིའི་དབར་གྱི་འབྲེལ་བ་བཟང་པོ་ཡོད་པ་དེ་གོང་འཕེལ་གནང་རྒྱུ་དང་། ལྷག་པར་དུ་༸གོང་ས་མཆོག་ལ་གུས་བརྩི་དང་བོད་ཀྱི་འཐབ་རྩོད་ལ་རྒྱབ་སྐྱོར་ཡོད་པ་མཚོན་ཕྱིར་ཆེད་ཕེབས་གནང་བ་ཡིན་ཞེས་གསུངས་ཡོད།   གཞི་རྩའི་ལྷན་འཛོམས་དེའི་ཐོག་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་སྦྲེལ་པོས་དབུས་པའི་སྤྱི་འཐུས་རྒྱུན་ལས་དང་མངའ་སྡེའི་གྲོས་ཚོགས་འཐུས་མི་རྣམ་པའི་དབར་ཕན་ཚུན་ངོ་སྤྲོད་དང་། ལྷག་པར་དུ་བོད་མི་མང་སྤྱི་འཐུས་ལྷན་ཚོགས་ཀྱི་གཞུང་འབྲེལ་དྲིལ་བསྒྲགས་ཡིག་ཆ་ཁག་གཅིག་ཕུལ་ནས་བོད་ཀྱི་གནད་དོན་གསལ་བཤད་སོགས་གནང་ཡོད་པ་རེད།སྐབས་དེར་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་པདྨ་འབྱུང་གནས་མཆོག་གིས་མངའ་སྡེའི་སྤྱི་ཁྱབ་བློན་ཆེན་དང་ཚོགས་གཙོ་རྣམ་གཉིས་མཆོག་གིས་དབུས་པའི་གྲོས་ཚོགས་འཐུས་མི་རྣམས་ལ་འཚམས་འདྲི་དང་འབྲེལ། བོད་མི་རྣམས་བཙན་བྱོལ་ལ་འབྱོར་ནས་ལོ་ངོ་ ༦༠ འཁོར་ལ་ཉེ་ཡང་རྒྱ་གར་གྱི་མངའ་སྡེའི་ཁག་ཏུ་ད་ལྟའང་མངའ་སྡེའི་གྲོས་ཚོགས་བོད་དོན་རྒྱབ་སྐྱོར་ཚོགས་པ་གསར་འཛུགས་ཐུབ་མེད་སྐོར་འགྲེལ་བརྗོད་དང་ཆབས་ཅིག འབྱུང་འགྱུར་གྱི་དུས་ཚོད་དེའི་ནང་ཧི་མཱ་ཅལ་མངའ་སྡེའི་བློན་ཆེན་དང་ཚོགས་གཙོ་མཆོག་རྣམ་གཉིས་ཀྱིས་རྒྱབ་སྐྱོར་གནང་ཐོག་ཧི་མཱ་ཅལ་མངའ་སྡེའི་གྲོས་ཚོགས་བོད་དོན་རྒྱབ་སྐྱོར་ཚོགས་པ་གསར་འཛུགས་ཡོང་བའི་རེ་སྐུལ་ཞུས་ཡོད་པ་རེད།གཞི་རྩའི་ཧི་མཱ་ཅལ་མངའ་སྡེའི་དབྱར་ཁའི་གྲོས་ཚོགས་དེ་གྲོང་ཁྱེར་ Shimla དང་དགུན་ཁའི་ཚོགས་འདི་བཞུགས་སྒར་དུ་ཚོགས་གནང་གི་ཡོད་པ་དང་། ཐེངས་འདིའི་དགུན་དུས་ཀྱི་གྲོགས་ཚོགས་འདི་ཟླ་ ༡༢ ཚེས་ ༡༠ ཉིན་དབུ་འཛུགས་ཀྱིས་གནངས་ཚེས་ ༡༥ བར་ཚོགས་ཀྱི་ཡོད་པ་དང་། ཧི་མཱ་མངའ་སྡེའི་གྲོས་ཚོགས་འདི་ནི་རྒྱ་གར་གྱི་ eVidhan ཞེས་ཤོག་བུ་མེད་པའི་གྲོས་ཚོགས་ཆེས་ཐོག་མ་དེ་ཡིན་པ་རེད།

རྒྱ་གར་གྱི་སྲིད་བློན་ཟུར་པ་སྐུ་ཞབས་ཝཱ་ཇ་པཱ་ཡི་མཆོག་དགོངས་པ་རྫོགས་པར་མྱ་ངན་གུས་འདུད་ཀྱི་མཆོད་འབུལ།

དེ་རིང་ཟླ་ ༨ ཚེས་ ༢༨ ཉིན་རྒྱ་གར་གྱི་རྒྱལ་ས་ལྡི་ལི་གསར་པའི་ NDMC Convention ལྟེ་གནས་ཁང་དུ་བོད་མི་གཙོ་གྱུར་ཁུལ་འདིའི་ནང་པ་ཚོས་ཉེ་ཆར་ཕྱི་ཚེས་ ༡༦  ཉིན་འདས་གྲོངས་སུ་གྱུར་བའི་རྒྱ་གར་སྲིད་བློན་ཟུར་པ་དང་།  རྒྱ་གར་མི་སེར་གྱི་གཟེངས་རྟགས་མཐོ་ཤོས་ Bharat Ratna བཞེས་མྱོང་མཁན་རྒྱ་གར་གྱི་སྲིད་བློན་ཟུར་པ་སྐུ་ཞབས་ཝཱ་ཇ་པཱ་ཡི་མཆོག་དགོངས་པ་རྫོགས་པར་མྱ་ངན་གུས་འདུད་ཀྱི་མཆོད་འབུལ་སྨོན་ལམ་གཞི་རྒྱ་ཆེན་པོ་ཞིག་ཚོགས་གནང་ཡོད་པ་དང་། མཆོད་འབུལ་སྨོན་ལམ་དེའི་ཐོག་ལྡི་ལིའི་ཉེ་འཁྲིས་རྡེ་ར་རྡུན་ཁུལ་གྱི་དགོན་སྡེ་ཁག་ཅིག་ནས་དགེ་འདུན་ཞལ་གྲངས་ ༦༠ ལྷག་ཙམ་ཞིག་ཆེད་ཕེབས་གནང་འདུག་པ་མ་ཟད་ལྡི་ལི་ཁུལ་གནས་སྡོད་བོད་མི་དང་ས་གནས་ཀྱི་ནང་པ་ཁག་ཅིག་བཅས་ཁྱོན་མི་གྲངས་ ༡༠༠༠  ལྷག་འདུ་འཛོམས་བྱུང་འདུག ཧིན་བོད་མཛའ་འབྲེལ་ཚོགས་པ་དང་ཧི་མཱ་ལ་ཡ་ནང་པའི་མཐུན་ཚོགས། ལྡི་ལི་ཁུལ་དུ་གནས་སྡོད་བྱེད་མཁན་གྱི་བོད་རིགས་དང་། བལ་པོ། ཧི་མཱ་ཅལ་སྤ་རི་ཝར་བཅས་ཀྱིས་ཐུན་མོང་ཐོག་མཆོད་འབུལ་དེ་གོ་སྒྲིག་གནང་ཡོད་པ་རེད། རྒྱལ་ས་ལྡི་ལིའི་ NDMC Convention ལྟེ་གནས་ཁང་དུ་ཚོགས་པའི་དེ་རིང་གི་མཆོད་འབུལ་སྨོན་ལམ་དེའི་ཐོག་རྒྱ་གར་གྱི་  RSS  ཚོགས་པའི་སྐུ་ཞབས་ Indresh Kumar མཆོག་གིས་དབུས་པའི་བཀའ་ཟུར་རྒྱ་རི་སྒྲོལ་མ་མཆོག དགའ་ལྡན་ཕོ་བྲང་གི་རྒྱ་གར་དང་ལྷོ་ཨེ་ཤ་ཡའི་ངེས་སྟོན་པ་བཀའ་ཟུར་བསྟན་པ་ཚེ་རིང་མཆོག ཧི་མཱ་ལ་ཡའི་ནང་པའི་ཆོས་དང་རིག་གཞུང་སྲུང་སྐྱོབ་ཁང་གི་བླ་མ་ཆོས་འཕེལ་བཟོད་པ་ལགས། རྒྱ་གར་ BJP ཆབ་སྲིད་ཚོགས་པའི་འབྲེལ་ཡོད་ཁག་ཅིག་དང་ས་གནས་ཀྱི་བོད་པའི་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་པ་ཁག་གི་འགན་འཛིན་དང་ལས་བྱེད་བཅས་ནས་ཀྱང་ལྷན་ཞུགས་གནང་འདུག

ཨ་རུ་ནཱ་ཅལ་ནང་ས་གནས་བོད་མི་རྣམས་ཕྱིར་ཕུད་གཏོང་དགོས་པའི་ངོ་རྒོལ་བྱེད་བཞིན་འདུག

ཟླ་ ༧ ཚེས་ ༣ ཙམ་ནས་རྒྱ་གར་བྱང་ཕྱོགས་ཨ་རུ་ནཱ་ཅལ་མངའ་སྡེའི་སློབ་ཕྲུག་ཚོགས་པ་ AAPSU དང་ SUMAA དེ་བཞིན་ས་གནས་གདོད་མའི་མི་རིགས་ཚོགས་པ་སོགས་ནས་མངའ་སྡེའི་ནང་གནས་སྡོད་བྱེད་བཞིན་པའི་བོད་མི་རྣམས་ཕྱིར་ཕུད་གཏོང་དགོས་པའི་ངོ་རྒོལ་སྐད་འབོད་དང་། ས་གནས་འབྲེལ་ཡོད་གཞུང་ལ་ཞུ་གཏུགས་སོགས་ཀྱི་ལས་འགུལ་སྤེལ་བཞིན་ཡོད་པ་རེད། ཚོགས་པ་དེ་དག་ནས་འདས་པའི་ཉིན་ཤས་ཁྲོད་ས་གནས་སོ་སོའི་རྫོང་དཔོན་གྱི་མཚན་ཐོག་ཏུ་ཞུ་སྙན་ཞིག་ཕུལ་བའི་བརྒྱུད་རྒྱ་གར་དབུས་གཞུང་གིས་གཏན་འབེབས་གནང་བའི་བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་བྱུས་ ༢༠༡༤ ཞེས་པ་དེ་མངའ་སྡེའི་ནང་ལག་བསྟར་གནང་རྒྱུ་མཚམས་འཇོག་དགོས་པ་དང་བོད་མི་རྣམས་ལ་ཚོགས་སྡེའི་ལག་ཁྱེར་ཐོབ་པ་རྣམས་ཕྱིར་བསྡུ་དགོས་པ། དེ་བཞིན་ས་གནས་བོད་མི་རྣམས་ལ་ཚོང་གཉེར་ཆོག་པའི་ལག་ཁྱེར་གནང་ཁག་ཕྱིར་བསྡུ་དགོས་པ། བོད་མི་རྣམས་བཅད་མཚམས་ལྡན་པའི་ས་གནས་གཞན་ལ་ཕྱིར་ཕུད་གཏོང་དགོས་པ་སོགས་ཀྱི་དགོས་འདུན་བཏོན་ཡོད་པ་དང་། ལྷག་པར་དུ་ཚེས་ ༡༢ ཉིན་ཚོགས་པ་དེ་དག་གི་ཚོགས་མི་ཁག་ཅིག་བསྟན་འཛིན་སྒང་བོད་མིའི་གཞིས་ཆགས་ལས་ཁུངས་སུ་བཅར་ནས་བསྟན་འཛིན་སྒང་གཙོས་གྱུར་མོན་ཏ་དབང་དང་། འབུམ་སྡེ་ལ་སོགས་མངའ་སྡེ་དེའི་ནང་གནས་སྡོད་བྱེད་བཞིན་པའི་བོད་མི་རྣམས་ཁྲིམས་འགལ་བ་ཡིན་སྐོར་སོགས་བརྗོད་ནས་ས་གནས་ནས་ཕྱིར་ཐོན་དགོས་པའི་སྡིགས་ར་བསྐུལ་འདུག ས་གནས་དེར་ད་ལྟའི་ཆར་མུ་མཐུད་ནས་ངོ་རྒོལ་བྱེད་བཞིན་པའི་གནས་སྟངས་དང་འབྲེལ་རླུང་འཕྲིན་ཁང་ནས་ཞལ་པར་བརྒྱུད་བསྟན་འཛིན་སྒང་བོད་མིའི་གཞིས་ཆགས་ལས་ཁུངས་ཀྱི་ལས་དྲུང་ཚེ་རིང་ནོར་བུ་ལགས་སུ་བཀའ་འདྲི་ཁག་ཅིག་ཞུས་པར་ཨ་རུ་ནཱ་ཅལ་སློབ་ཕྲུག་ཚོགས་པ་རྣམས་ནས་དེ་སྔ་དང་མི་འདྲ་བར་ས་གནས་བོད་མིའི་གཞིས་ཆགས་ཁག་གི་ནང་དངོས་སུ་ཡོང་ནས་ངོ་རྒོལ་དང་སྡིགས་ར་རིགས་བསྐུལ་ཡོད་སྟབས། ད་ལྟའི་ཆར་ས་གནས་གཞིས་ཆགས་ཁག་ཏུ་རྒྱ་གར་གཞུང་གི་དམག་མི་དང་ཉེན་རྟོག་མི་སྣ་ ༢༤ ལྷག་སྲུང་སྐྱོབ་ཆེད་བསྐོ་གཞག་གནང་ཡོད་པ་དང་། དཀའ་རྙོག་དེ་གང་མགྱོགས་སེལ་ཐབས་སུ་འཛིན་སྐྱོང་བཀའ་ཤག་དང་ནང་སྲིད་ལས་ཁུངས། ལྡི་ལི་དོན་གཅོད་བཅས་སུ་ས་གནས་ཀྱི་ཛ་དྲག་གནས་སྟངས་འཁོད་པའི་སྙན་ཐོ་ཞིག་ཕུལ་ཡོད་པ་སོགས་གསུངས་སོང་། གཞི་རྩའི་ཨ་རུ་ནཱ་ཅལ་མངའ་སྡེའི་སློབ་ཕྲུག་ཚོགས་པ་ AAPSU དང་ SUMAA དེ་བཞིན་ས་གནས་གདོད་མའི་མི་རིགས་ཚོགས་པ་ཁག་ནས་ད་རེས་ཙམ་མིན་པར་དེ་སྔ་ས་གནས་བོད་མིའི་ཐོག་ངོ་རྒོལ་སྐད་འབོད་བྱས་ཡོད་པ་དང་། ལྷག་པར་དུ་སྔར་ལོ་ ༢༠༡༧ ཟླ་༨ ཚེས་ ༡༢ ཉིན་ཨ་རུ་ནཱ་ཅལ་མངའ་སྡེའི་འཛིན་སྐྱོང་གི་ཚོགས་འདུའི་ཐོག་ཨ་རུ་ནཱ་ཅལ་ནང་རྒྱ་གར་དབུས་གཞུང་ནས་གཏན་འབེབས་གནང་བའི་བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་ཀྱི་སྲིད་བྱུས་ ༢༠༡༤ ཞེས་པ་དེ་ལག་བསྟར་གནང་རྒྱུ་ཐག་གཅོད་བྱུང་སྐབས་སློབ་ཕྲུག་ཚོགས་པ་དེ་དག་གིས་བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་ཀྱི་སྲིད་བྱུས་ལག་བསྟར་བྱ་རྒྱུར་ཐག་གཅོད་བྱུང་བ་དེ་ཕྱིར་བསྡུ་དགོས་པའི་ངོ་རྒོལ་གྱི་ལས་འགུལ་གཞི་རྒྱ་ཆེ་བ་ཞིག་སྤེལ་མྱོང་ཡོད་པ་རེད།

དགེ་བཤེས་ལྷུན་གྲུབ་དཔལ་འབར་ལགས་སེར་སྨད་གྲྭ་ཚང་གི་མཁན་ཐོག་༩༡ པར་ཁྲི་འདོན་གནང་པ།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་གོང་ས་སྐྱབས་མགོན་ཆེན་པོ་མཆོག་གིས་སེར་སྨད་ཐོས་བསམ་ནོར་གླིང་གྲྭ་ཚང་གི་མཁན་ཐོག་༩༠ པ་དགེ་བཤེས་ངག་དབང་འབྱོར་ལྡན་མཆོག་མཁན་པོའི་མཛད་འགན་ཁྱུར་བའི་ཚབ་ཏུ་དབྱིན་ཡུལ་དུ་བཞུགས་པའི་སེར་སྨད་ཐོས་བསམ་ནོར་གླིང་གྲྭ་ཚང་ཀོང་པོ་ཁང་ཚན་གྱི་དགེ་བཤེས་ལྷུན་གྲུབ་དཔལ་འབར་ལགས་སུ་འདི་ལོ་ཕྱི་ཟླ་༣ ནང་སེར་སྨད་ཐོས་བསམ་ནོར་གླིང་གྲྭ་ཚང་གིི་མཁན་ཐོག་༩༡ པར་བསྐོ་གཞག་གི་བཀའ་ཡིག་ཕེབས་ཏེ་ཁ་སང་ཕྱི་ཟླ་ ༦ ཚེས་ ༡༧ ཉིན་སེར་སྨད་ཐོས་བསམ་ནོར་གླིང་གྲྭ་ཚང་དུ་དངོས་སུ་མཁན་པོ་ཁྲི་འདོན་མཛད་སྒོ་ཟབ་རྒྱས་ངང་སྤེལ་ཡོད་པ་རེད། ཟླ་བ་འདིའི་ཕྱི་ཚེས་༢༥ ཉིན་བཞུགས་སྒར་རྡ་རམ་ས་ལར་གོང་ས་སྐྱབས་མགོན་ཆེན་པོ་མཆོག་ལ་མཁན་པོ་གསར་པའི་མཇལ་ཁ་ཞུ་གཏན་ཁེལ་འདུག  

བོད་པའི་གཞོན་སྐྱེས་ཚོ་མ་འོངས་འགོ་ཁྲིད་བཟང་པོ་ཞིག་བྱེད་རྒྱུ་གལ་ཆེན་པོ་རེད།

དེ་རིང་ཕྱི་ཚེས་༡༨ ཉིན་གྱི་སྔ་དྲོ་ཆུ་ཚོད་དགུ་པ་ཡོལ་ཙམ་ལ་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་མདུན་ལམ་སློབ་སྟོན་ཚན་པས་གོ་སྒྲིག་འོག་བཞུགས་སྒར་ཉེ་འདབ་སུ་རྟེན་གཞི་བྱས་པའི་དབུས་སྣེ་ལེན་ཁང་གི་འཛིན་སྐྱོང་སྦྱོང་བརྡར་ཁང་དུ་རྒྱ་གར་གྱི་མཐོ་སློབ་འདྲ་མིན་ནང་སློབ་གཉེར་གནང་བཞིན་པའི་བོད་རིགས་གཞོན་སྐྱེས་ལྔ་བཅུ་ལྷག་ལ་འགོ་ཁྲིད་ཀྱི་ཟབ་སྦྱོང་ཞིག་གནང་འགོ་བཙུགས་སོང་། སྐབས་དེར་ཟབ་སྦྱོང་དབུ་འབྱེད་མཛད་སྒོའི་སྐུ་མགྲོན་གཙོ་བོ་ཤེས་རིག་བཀའ་བློན་པདྨ་དབྱངས་ཅན་མཆོག་ནས་ད་ལྟའི་ཆ་ལ་འཛམ་བུ་གླིང་འདིའི་ཐོག་འགྲོ་བ་མི་ཐེར་འབུམ་བདུན་ལྷག་ཡོད་པའི་ནང་ནས་ཐེར་འབུམ་གཉིས་ལྷག་གཞོན་སྐྱེས་ལོ་ན་༡༨ ནས་༢༩ བར་ཆགས་ཀྱི་ཡོད་སྟབས། རྒྱ་སྤྱིའི་ཉམས་ཞིབ་པ་དང་མཁས་པ་མང་པོ་ཞིག་ནས་གཞོན་སྐྱེས་ཚོས་བཟང་ངན་ག་རེ་གནང་པ་ཡིན་ན་དེས་སྤྱི་ཚོགས་ཐོག་ལ་ནུས་པ་ཆེན་པོ་ཐོན་གྱི་ཡོད་སྐོར་གསུང་བཞིན་པ་འགྲེལ་བརྗོད་དང་སྦྲགས། གཞོན་སྐྱེས་རྣམས་ལ་སྤྱི་ཚོགས་བཟང་པོ་ཞིག་བསྐྲུན་རྒྱུའི་དམིགས་བསལ་གྱི་འགན་ཡོད་པ་དང་། ལྷག་པར་དུ་བོད་པའི་གཞོན་སྐྱེས་རྣམས་ལ་༸གོང་ས་སྐྱབས་མགོན་ཆེན་པོ་མཆོག་གི་དགོངས་བཞེས་ལམ་བསྟོན་ཕེབས་དོན་ལྟར། ཆེ་ས་ནས་འཛམས་གླིང་ཐོག་ཞི་བདེ་ཁྱབ་སྤེལ་གནང་ཐུབ་མཁན་གྱི་ན་གཞོན་འགོ་ཁྲིད་ཅིག་བྱེད་དགོས་ཀྱི་རེད་ཅེས་གསུངས་ཡོད། མ་ཟད་བཀའ་བློན་མཆོག་ནས་སྤྱིར་འགོ་ཁྲིད་ཀྱི་ཁྱད་ཆོས་དང་འབྲེལ། རང་ཉིད་ཀྱི་གཤམ་ལ་ཡོད་པའི་མི་མང་ལ་སྐད་ཆ་བཤད་རྒྱུའི་གོ་སྐབས་སྤྲོད་ཐུབ་པ་དང་། ཁོང་རྣམས་པས་གང་གསུངས་པ་དེ་དག་ཉན་ཐུབ་པ། དེ་ནས་གནད་དོན་ཐོག་བསམ་བློ་དང་དཔྱད་པ་གནང་ཐུབ་པ་ཙམ་མ་ཟད། གནད་དོན་རྣམས་གོ་བདེ་པོའི་ཐོག་ནས་མི་མང་ལ་འགྲེལ་བཤད་རྒྱབ་ཐུབ་པ། དེ་བཞིན་གནས་ཚུལ་གང་འདྲ་ཞིག་ཡིན་ཡང་བཟང་ཕྱོགས་ནས་ལྟ་ཐུབ་མཁན་སོགས་ཀྱི་ཁྱད་ཆོས་ལྡན་པས་མ་འོངས་བོད་པའི་འགོ་ཁྲིད་བཟང་པོ་ཞིག་བྱེད་རྒྱུ་གལ་ཆེན་པོ་ཡིན་པ་གསུངས་སོང་།   གཞན་ཡང་བཀའ་བློན་མཆོག་ནས་རང་ཉིད་སྒེར་གྱི་མྱོང་བ་ཁག་ཅིག་དྲན་གསོ་དང་སྦྲགས། གཞོན་སྐྱེས་སློབ་མ་རྣམས་ནས་མཐོ་སློབ་ཀྱི་དུས་ཡུན་དེ་སྟངས་འཛིན་གནང་རྒྱུ་གལ་ཆེན་པོ་ཡིན་པ་དང་། ལྷག་པར་དུ་མཐོ་སློབ་ཀྱི་གུང་གསེང་སྐབས་སུ་རང་ཉིད་ཀྱི་ཤེས་ཡོན་དང་འབྲེལ་བའི་ཉམས་ཞིབ་ཀྱི་སློབ་ཚན་ཐོག་ལ་དོ་སྣང་དང་གྲོས་བསྡུར་གནང་རྒྱུ། དེ་བཞིན་སྤྱི་ཚོགས་ལ་ཕན་པའི་དང་ལངས་ཀྱི་ཞབས་ཞུ་གནང་རྒྱུ་གལ་ཆེན་པོ་ཡིན་པ་སོགས་ཀྱི་ལམ་སྟོན་ཡང་གནང་ཡོད། གཞི་རྩའི་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་མདུན་ལམ་སློབ་སྟོན་ཚན་པས་གོ་སྒྲིག་འོག་ལོ་ལྟར་སློབ་གྲྭར་འགྲིམས་བཞིན་པའི་འཛིན་རིམ་བཅུ་པ་དང་གཅུ་གཉིས་ཀྱི་སློབ་མ། དེ་བཞིན་སློབ་གྲྭའི་རྒན་བདག་བཅས་ལ་འགོ་ཁྲིད་ཀྱི་ནུས་པ་བསྐྱེད་སྲིང་གནང་ཕྱོགས་སོགས་དང་འབྲེལ་བའི་ཟབ་སྦྱོང་ཁག་ཅིག་གནང་མུས་ཐོག ཉེས་དུས་ནས་མཐོ་སློབ་འགྲིམས་བཞིན་པའི་གཞོན་སྐྱེས་ཚོ་ལ་ཡང་འགོ་ཁྲིད་ཟབ་སྦྱོང་གནང་འགོ་འཙུགས་ཏེ། དེ་རིང་གི་ཟབ་སྦྱོང་དེ་ཐེངས་གསུམ་པ་དེ་ཆགས་ཀྱི་ཡོད་པ་རེད།

རྒྱལ་སྤྱིའི་དབུ་མའི་ལམ་མི་མང་ཚོགས་ཆེན་ཐེངས་དང་པོ་དབུ་འཛུགས་གནང་སོང་།

དེ་རིང་ཕྱི་ཚེས་ ༢༦ ཉིན་གྱི་སྔ་དྲོའི་ཆུ་ཚོད་དགུ་པ་ཡོལ་ཙམ་ལ་བཞུགས་སྒར་དུ་རྟེན་གཞི་བྱས་པའི་བོད་ཀྱི་ཟློས་གར་ཚོགས་པའི་ཚོགས་ཁང་ནང་དུ་རྒྱ་གར་གཙོས་པའི་ཨ་རི་དང་ཡོ་རོབ་སོགས་རྒྱལ་སྤྱིའི་ཡུལ་གྲུ་འདྲ་མིན་ནང་བཞུགས་པའི་བོད་རིགས་རྒན་གཞོན་ལྔ་བརྒྱ་ལྷག་འདུ་འཛོམས་ཐོག་རྒྱལ་སྤྱིའི་དབུ་མའི་ལམ་མི་མང་ཚོགས་ཆེན་ཐེངས་དང་པོ་དབུ་འཛུགས་གནང་སོང་། ཚོགས་ཆེན་དེ་ནི་བཞུགས་སྒར་དུ་རྟེན་གཞི་བྱས་པའི་དབུ་མའི་ལམ་མི་མང་ལས་འགུལ་ཁང་དང་། ཨ་རིའི་ Minnesota ནང་རྟེན་གཞི་བྱས་པའི་དབུ་མའི་ལམ་གྱི་གཞོན་ནུའི་མཐུན་ཚོགས་གཉིས་ཀྱིས་རྐང་གོ་སྒྲིག་ཞུས་པ་ཞིག་ཡིན་པ་དང། ཚོགས་ཆེན་དབུ་འབྱེད་ཀྱི་མཛད་སྒོའི་ཐོག་སྐུ་མགྲོན་གཙོ་བོ་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་ཟུར་པདྨ་འབྱུང་གནས་མཆོག་དང་། དམིགས་བསལ་སྐུ་མགྲོན་ཧི་མ་ཅལ་མངའ་སྡེའི་ཡུལ་སྐོར་སྤྲོ་འཆམ་གྱི་བློན་ཆེན་ཟུར་པ་སྐུ་ཞབས་Vijay Singh Mankotia ལགས་དང་ཨ་མི་རི་ཀའི་New York གཙུག་ལག་སློབ་གཉེར་ཁང་གི་ཆབ་སྲིད་སློབ་དཔོན་སྐུ་ཞབས་ Ming Xia ལགས་བཅས་དང་། གཞན་ཡང་་གནས་ཆུང་ཆོས་རྒྱལ་ཆེན་མོའི་སྐུ་རྟེན་དང་ཀེའུ་ཚང་རིན་པོ་ཆེ། བོད་མི་མང་སྤྱི་འཐུས་ལས་ཟུར་ཁག་ཅིག སྲི་ཞུ་བ་ཟུར་པ་དང་གཞུང་འབྲེལ་མ་ཡིན་པའི་ཚོགས་པ་ཁག་ཅིག་གི་སྐུ་ཚབ། དེ་བཞིན་མཐོ་སློབ་འགྲིམ་བཞིན་པའི་སློབ་མ་དང་མང་ཚོགས་བཅས་ཁྱོན་བོད་རིགས་ལྔ་བརྒྱ་ལྷག་ནས་མཉམ་ཞུགས་གནང་འདུག དེ་རིང་གི་ཚོགས་ཆེན་དེའི་ཐོག་བོད་བརྒྱུད་ནང་བསྟན་གྱི་ཆོས་བརྒྱུད་ཁག་ཅིག་གི་བླ་ཆེན་བསྟན་བདག་རྣམ་པ་དང་། ཡུན་རིང་ནས་བོད་དོན་རྒྱབ་སྐྱོར་གནང་མཁན་ཨ་རིའི་གྲོས་ཚོགས་འཐུས་མི་ལྕམ་ Nancy Pelosi ལགས་དང་སྐུ་ཞབས་ Jim Mcgovern ལགས་བཅས་ཀྱིས་འཚམས་འདྲིའི་བརྙན་ཐུང་གནང་ཡོད་པ་མ་ཟད། དམིགས་བསལ་སྐུ་མགྲོན་རྒྱ་རིགས་སློབ་དཔོན་སྐུ་ཞབས་ Ming Xia ལགས་ཀྱི་བརྒྱུད་ཕྱི་སྡོད་རྒྱ་རིགས་ ༦༠ ལྷག་མཐུན་མོང་གིས་ཕྱག་བྲིས་ཤིག་གནང་ཡོད་པའི་ནང་དབུ་མའི་ལམ་གྱི་སྲིད་བྱུས་འདི་ནི་བོད་རྒྱའི་དཀའ་རྙོག་ཐག་གཅོད་ཐུབ་རྒྱུ་དང་། རྒྱ་ནག་རྒྱལ་ཁབ་འདི་བཞིན་མང་གཙོའི་རྒྱལ་ཁབ་ཞིག་ཏུ་འགྱུར་རྒྱུ་བཅས་ནུས་པ་ལྡན་པའི་སྲིད་བྱུས་ཤིག་ལ་ངོས་འཛིན་ཞུ་བཞིན་ཡོད་པ་དང་། རྒྱ་ནག་གཞུང་ནས་༸གོང་ས་མཆོག་གི་བླ་ན་མེད་པའི་དགོངས་བཞེས་དང་བག་ཡངས་པའི་ཐུགས་བཞེས་ལ་དཔྱད་པ་གནང་སྟེ། དྲང་བདེན་གྱི་བརྡ་ལན་དང་གྲོས་མོལ་སླར་གསོ་ཡོང་ཐབས་གནང་གལ་ཡིན་པའི་སྐུལ་མ་གནང་འདུག  

བོད་དོན་བདེན་མཐའ་མ་སེལ་བར་དུ་རང་བཙན་འཐབ་རྩོད་མུ་མཐུད་རྒྱུན་སྲིང་བྱ་རྒྱུའི་ཆོད་སེམས་བརྟན་པོ་ཡོད།

བོད་རང་བཙན་སླར་གསོ་དགོས་པ་ནི་བོད་མི་འདས་གསོན་ཡོངས་ཀྱི་དམིགས་འདུན་གཙོ་བོ་ཡིན་པ་འགྲེལ་བརྗོད་དང་འབྲེལ། མི་ཚེ་མི་རབས་ལ་འཐབ་རྩོད་བྱེད་དགོས་ཀྱང་བོད་དོན་བདེན་མཐའ་མ་སེལ་གྱི་བར་དུ་སྙིང་ལ་རུས་པ་བཅུག་ནས་རང་བཙན་འཐབ་རྩོད་མུ་མཐུད་རྒྱུན་བསྲིང་བྱ་རྒྱུའི་ཆོད་སེམས་བརྟན་པོ་དང་བཅས། རྒྱལ་སྤྱིའི་བོད་རང་བཙན་ཚོགས་ཆེན་ཐེངས་ལྔ་པ་དེ་མཇུག་བསྒྲིལ་གནང་སོང་། དེ་ཡང་ཞུགས་སྒར་རྡ་ཤོད་སྣུམ་འཁོར་འབབ་ཚུགས་ཀྱི་ཉེ་འགྲམ་དུ་རྟེན་གཞི་བྱས་པའི་ས་གནས་རྒྱ་གར་གཞུང་གི་ཚོགས་ཁང་ཆེན་མོའི་ནང་དུ་ཟླ་བ་འདིའི་ཚེས་ ༢༣ ནས་བཟུང་དབུ་འཛུགས་གནང་བའི་རྒྱལ་སྤྱིའི་བོད་རང་བཙན་ཚོགས་ཆེན་ཐེངས་ལྔ་པ་དེ་ཁ་ས་ཕྱི་ཟླ་ ༥ ཚེས་ ༢༥ ཉིན་གྱི་དགོང་མོ་ཕྱག་ཚོད་ ༧ ཡས་མས་ཞིག་ལ་མཇུག་བསྒྲིལ་གནང་ཡོད་པ་དང་། ཐེངས་འདིའི་ཚོགས་ཆེན་ཐོག་ནས་བསྒྲགས་གཏམ་དོན་ཚན་ལྔ་དང་དགོངས་ཚུལ་ཁག་བཅོ་ལྔ་འཁོད་པ་ཞིག་ཡོངས་བསྒྲགས་གནང་སོང་། དོན་ཚན་ལྔ་ཅན་གྱི་བསྒྲགས་གཏམ་དེའི་ནང་གཙོ་བོ་བོད་དོན་བདེན་མཐའ་མ་སེལ་བར་དུ་བོད་རང་བཙན་འཐབ་རྩོད་ཀྱི་ལས་འགུལ་མི་རབས་ནས་མི་རབས་བར་རྒྱུན་བསྲིང་བྱ་རྒྱུ་ཙམ་མ་ཟད། བོད་རང་བཙན་འཐབ་རྩོད་པ་རྣམས་ནས་དགྲ་གཉེན་མགོན་གསུམ་གྱི་ཁ་ཕྱོགས་མ་ནོར་བའི་ཐོག་ནས་རྡོག་རྩ་གཅིག་བསྒྲིལ་དགོས་པ། གཞན་ཡང་རྒྱ་གར་གཞུང་མང་ཡོངས་ལ་བཀྲིན་ཆེ་ཞེས་ཞུས་པ་དང་ཆབས་ཅིག བོད་རང་བཙན་དེ་རྒྱ་གར་གྱི་བདེ་འཇགས་དང་ཐུག་ཡོད་སྟབས་རྒྱ་གར་གཞུང་ནས་དེའི་ཐོག་སྔར་ལྷག་རྒྱབ་སྐྱོར་ཡོང་བ་སོགས་ཀྱི་འབོད་སྐུལ་ཞུས་གནང་འདུག དེ་རིང་གི་ཚོགས་ཆེན་དེའི་ཐོག་ཚོགས་བཅར་བ་ ༡༦༠ ལྷག་ཙམ་མཉམ་ཞུགས་གནང་ཡོད་པ་དང་། ཁ་ས་ཚོགས་འདུ་ཉིན་མཐའ་མའི་ཐོག་སྐབས་རྗེས་མའི་ཚོགས་ཆེན་དེ་རྒྱ་གར་ནང་དུ་ཚོགས་རྒྱུ་གཏན་འཁེལ་བྱུང་ཡོད་པ་མ་ཟད། ད་ལན་གྱི་ཚོགས་ཆེན་དེའི་བརྒྱུད་རྒྱལ་ཁབ་རེ་ནས་འབྲེལ་མཐུད་པ་རེ་བསྐོ་བཞག་གནང་ཡོད་པ་རེད།

རྒྱལ་སྤྱིའི་བོད་རང་བཙན་ཚོགས་ཆེན་ཐེངས་ ༥ པ་འགོ་འཛུགས།

དེ་རིང་ཕྱི་ཚེས་ ༢༣ ཉིན་གྱི་སྔ་དྲོའི་ཆུ་ཚོད་དགུ་པ་ཡོལ་ཙམ་ལ་བཞུགས་སྒར་རྡ་ཤོད་སྣུམ་འཁོར་འབབ་ཚུགས་ཀྱི་ཉེ་འགྲམ་དུ་རྟེན་གཞི་བྱས་པའི་ས་གནས་རྒྱ་གར་གཞུང་གི་ཚོགས་ཁང་ཆེན་མོའི་ནང་དུ་བོད་མིའི་སྤྱི་ཚོགས་ཁྲོད་རང་བཙན་ལྟ་གྲུབ་འཛིན་མཁན་གྱི་མི་སྣ་རྒན་གཞོན་བརྒྱ་ལྷག་འདུ་འཛོམས་ཐོག་རྒྱལ་སྤྱིའི་བོད་རང་བཙན་ཚོགས་ཆེན་ཐེངས་ལྔ་པ་འགོ་འཛུགས་གནང་སོང་། ཚོགས་ཆེན་དབུ་འབྱེད་ཀྱི་སྐུ་མགྲོན་གཙོ་བོ་རྡ་ས་འཕགས་བོད་འབྲེལ་མཐུད་ཚོགས་པའི་ཚོགས་གཙོ་སྐུ་ཞབས་ Ajay Singh Mankotia ལགས་དང་། དམིགས་བསལ་སྐུ་མགྲོན་དུ་རང་བཙན་འཐབ་རྩོད་པ་རྒན་གྲས་ལྷ་བཟང་ཚེ་རིང་ལགས་དང་འཇམ་དབྱངས་ནོར་བུ་ལགས། དེ་བཞིན་རྒྱུན་དུ་བོད་ཐོག་དཔྱད་གཏམ་རིགས་སྤེལ་མཁན་རྒྱ་གར་གི་གསར་འགོད་པ་ Vijay Kranti  ལགས་བཅས་ཆེད་ཕེབས་གནང་འདུག དམིགས་བསལ་སྐུ་མགྲོན་རང་བཙན་འཐབ་རྩོད་པ་རྒན་གྲས་ལྷ་བཟང་ཚེ་རིང་ལགས་ནས་ཐེངས་འདིའི་ཚོགས་ཆེན་དང་འབྲེལ། བོད་རང་བཙན་རྩོད་རྒྱུ་དེ་ནི་ཁེ་གྱོང་དང་ཐོབ་ཤོར་གྱི་གནད་དོན་ཞིག་མིན་པར་བདེན་པའི་འཐབ་རྩོད་ཞིག་ཡིན་སྟབས། དེ་ལ་བསྒྱུར་བ་མེད་པའི་ཐོག་ནས་རྩོད་དགོས་སྐོར་གསུངས་པ་དང་ཆབས་ཅིག ད་ལྟའི་ཆ་ལ་བོད་མིའི་སྒྲིག་འཛུགས་ནས་དབུ་མའི་ལམ་གྱི་ཐོག་རང་སྐྱོང་གི་གནས་བབས་རྩོད་བཞིན་པ་དེ་ནི་རྒྱ་ནག་ནང་སྲིད་གནད་དོན་ཞིག་རེད་ཅེས་གསུངས་བ་མ་ཟད། བོད་ཀྱི་ཁོར་ཡུག་གནས་བབས་དང་། དམག་དོན། དེ་བཞིན་ཚོང་གི་གནད་དོན་སོགས་ཕྱོགས་གང་ས་ནས་བོད་ཀྱི་གནད་དོན་དེ་བོད་མིའི་གནད་དོན་རྐྱང་པ་ཞིག་མ་ཡིན་པར། རྒྱལ་སྤྱིའི་གནད་དོན་ཞིག་ཏུ་བཟོ་རྒྱུ་གལ་ཆེན་པོ་ཡིན་པ་གསུངས་ཡོད། དེ་བཞིན་དམིགས་བསལ་སྐུ་མགྲོན་བོད་རང་བཙན་འཐབ་རྩོད་པ་འཇམ་དབྱངས་ནོར་བུ་ལགས་ནས་ཁོང་ད་རེས་ཀྱི་ཚོགས་ཆེན་དེར་བོད་རྒྱལ་ཡོངས་རང་བཙན་ལྷན་ཚོགས་ཀྱི་སྐུ་ཚབ་ཀྱི་ངོ་བོའི་ཐོག་ཕེབས་ཡོདཔ་འགྲེལ་བརྗོད་དང་འབྲེལ། ཐེངས་འདིའི་ཚོགས་ཆེན་ཐོག་ནས་བོད་རང་བཙན་འཐབ་རྩོད་དང་འབྲེལ་བའི་ཚོགས་འདུ་སྐོང་ཚོགས་གནང་རྒྱུ་ཙམ་མ་ཡིན་པར། འཐབ་རྩོད་དེའི་ལས་དོན་གྲུབ་ཆེད་གཏན་འཇགས་ཚོགས་པ་ཞིག་བཙུག་རྒྱུའི་ཐོག་གྲོས་སྡུར་གནང་གལ་ཡིན་པའི་འབོད་སྐུལ་ཞུས་སོང་། ཡང་ཚོགས་ཆེན་གྱི་སྐུ་མགྲོན་གཙོ་བོ་རྡ་ས་འཕགས་བོད་འབྲེལ་མཐུད་ཚོགས་པའི་ཚོགས་གཙོ་སྐུ་ཞབས་ Ajay Singh Mankotya ལགས་ནས། བོད་པའི་འཐབ་རྩོད་དེ་བཞིན་དུས་ཚོད་ཀྱི་ཆ་ནས་རྒྱུན་རིང་པོ་འགོར་སྲིད་པ་རེད། གཙོ་ཆེ་ཤོས་འཐབ་རྩོད་ཁྲོད་རང་ཉིད་ཀྱི་སེམས་ཚོར་དང་འཚོ་བའི་དབང་དུ་མ་ཕྱིན་པར་དྲང་བདེན་གྱི་ཐོག་ནས་ཐབས་བྱུས་དང་སྲིད་བྱུས་ངེས་གཏན་ཞིག་གཏན་འབེབས་གནང་སྟེ་གོམ་པ་མདུན་བསྐྱོད་གནང་རྒྱུ་ཡིན་པའི་ལམ་བསྟོན་གནང་སོང་། གཞན་ཡང་ཐེངས་འདིའི་བོད་རང་བཙན་ཚོགས་ཆེན་ཐེངས་ ༥ པའི་ཐོག་ནས་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་ཟུར་པ་བོད་རང་བཙན་འཐབ་རྩོད་པ་སྐུ་ཞབས་ཀརྨ་ཆོས་འཕེལ་ལགས་དམ་པ་དེ་ཉིད་ལ་ཆེ་བསྟོད་གཟེངས་རྟགས་ཤིག་ཕུལ་སོང་བ་ལྟར། དམ་པ་ཁོང་གི་སྐུ་ཟླ་བདེ་སྐྱིད་ལགས་ནས་གཟེངས་རྟགས་བཞེས་ཡོད་པ་རེད། གཞི་རྩའི་རྒྱལ་སྤྱིའི་བོད་རང་བཙན་ཚོགས་ཆེན་འདི་ནི་བོད་རང་བཙན་སླར་གསོའི་ལངས་ཕྱོགས་འཛིན་མཁན་གྱི་བོད་མི་ཚོའི་དབར་ལ་བསམ་ཚུལ་བརྗེ་ལེན་དང་བགྲོ་གླེང་བྱེད་སའི་སྡིང་ཆ་ཞིག་ཡིན་པ་དང་། ཚོགས་ཆེན་འདི་བཞིན་ཐོག་མར་ཕྱི་ལོ་ ༢༠༡༢ ལོར་བཞུགས་སྒར་རྡ་རམ་ས་ལར་འགོ་འཛུགས་ཀྱིས་རིམ་པས་རྒྱལ་ས་ལྡི་ལི་དང་ཨ་རིའི་གྲོང་ཁྱེར་ནིའུ་ཡོག དེ་བཞིན་ཕ་རན་སི་རྒྱལ་ས་ Paris བཅས་སུ་ཚོགས་ཡོད་པ་རེད།

༸གོང་ས་མཆོག་གིས་བོད་ཀྱི་རྐང་སྤོལ་རུ་ཁག་ལ་ས་གནས་གང་དུ་ཕྱིན་ནའང་བོད་མི་རིགས་ཀྱི་གཤིས་ཀ་བཟང་པོ་དེ་འཁྱེར་ནས་ཕེབས་ཞེས་བཀའ་བསྩལ་བ།

  ༸གོང་ས་མཆོག་གིས་བོད་ཀྱི་རྐང་སྤོལ་རུ་ཁག་ལ་ས་གནས་གང་དུ་ཕྱིན་ནའང་བོད་མི་རིགས་ཀྱི་གཤིས་ཀ་བཟང་པོ་དེ་འཁྱེར་ནས་ཕེབས་ཞེས་བཀའ་བསྩལ་བ། ཕྱི་ཟླ་ ༥ ཕྱི་ཚེས་ ༡༨ ཉིན་གྱི་སྔ་དྲོ་ཆུ་ཚོད་དགུ་པ་ཙམ་ལ་བོད་ཀྱི་རྐང་སྤོལ་རུ་ཁག་འཚོགས་ལ་ཉེ་བའི་༢༠༡༨ ལོའི་ CONIFA འཛམ་གླིང་རྐང་རྩེད་སྤོ་ལོའི་གཟེངས་རྟགས་ཀྱི་འགྲན་སྡུར་ཆེད་དབྱིན་ཡུལ་ཕྱོགས་སུ་ཐོན་ལ་ཉེ་བ་དང་བསྟུན་༸གོང་ས་སྐྱབས་མགོན་ཆེན་པོ་མཆོག་གི་མཇལ་ཁར་བཅར་ཡོད།   དེ་ཡང་མཇལ་བཅར་ཐོག་བོད་ཀྱི་རྐང་སྤོལ་རུ་ཁག་གི་སྦྱོང་འཁྲིད་པ་སྤེན་པ་ཚེ་རིང་ལགས་དང་རུ་དཔོན་སྐར་མ་ཚེ་དབང་ལགས་གཙོས་པའི་རྩེད་མོ་བ་རྣམས་པ་དང་། བཞུགས་སྒར་དུ་རྟེན་གཞི་བྱས་པའི་བོད་རྒྱལ་ཡོངས་རྩེད་རིགས་ཚོགས་པའི་དྲུང་ཆེ་པ་སངས་རྡོ་རྗེ་ལགས་གཙོས་པའི་ལས་བྱེད་བཅས་ཕེབས་འདུག་པ་དང་། སྐབས་དེར་༸གོང་ས་སྐྱབས་མགོན་ཆེན་པོ་མཆོག་གིས་རྩེད་འགྲན་པ་རྣམས་ལ། བོད་མི་རིགས་ཀྱི་མཐུན་མོང་མ་ཡིན་པའི་ཆོས་དང་རིག་གཞུང་། ལྷག་དོན་བྱམས་བརྩེའི་གཤིས་ཀ་དེ་དག་རྒྱལ་སྤྱིའི་ཐོག་སྤོབས་པ་བྱ་འོས་པ་ཞིག་ཡིན་སྐོར་བཀའ་འགྲེལ་དང་སྦྲགས། ད་རེས་ཕྱོགས་ཐོན་གནང་མཁན་གྱི་རྩེད་འགྲན་པ་རྣམས་ས་གནས་གང་དུ་ཕྱིན་པ་ཡིན་ནའང་བོད་མི་རིགས་ཀྱི་གཤིས་ཀ་བཟང་པོ་དེ་འཁྱེར་ནས་ཕེབས་ཨ་ཞེས་བཀའ་བསྩལཡོད། གཞན་ཡང་ཁོང་རྩེད་འགྲན་པ་རྣམས་རྩེད་འགྲན་ཆེད་ཕེབས་ལ་ཉེ་བ་དང་བསྟུན། དེ་རིང་ཉིན་དགུང་ཚོུད་ ༡༢།༣༠ ཡོལ་ཙམ་ལ་བོད་རྒྱལ་ཡོངས་རྩེད་རིགས་ཚོགས་པས་བོད་མིའི་སྒྲིག་འཛུགས་བཀའ་ཤག་ཚོགས་ཁང་དུ་སྲིད་སྐྱོང་བློ་བཟང་སེང་གེ་མཆོག་དང་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་གདན་ཞུའི་ཐོག་གསར་འགོད་ལྷན་ཚོགས་ཤིག་སྐོང་ཚོགས་གནང་སོང་བ་དང་། སྐབས་དེར་སྲིད་སྐྱོང་མཆོག་ནས་བོད་ཀྱི་རྐང་སྤོལ་རུ་ཁག་ལོ་ངོ་༡༠ ཙམ་གྱི་རྗེས་སུ་སླར་ཡང་རྒྱལ་སྤྱིའི་སྡིངས་ཆའི་ཐོག་རྩེད་འགྲན་གནང་རྒྱུའི་གོ་སྐབས་བྱུང་བ་དེ་ནི་རྩེད་མོའི་ངོ་བོ་ཁོ་ན་ཙམ་མ་ཡིན་པར། ཆབ་སྲིད་ཀྱི་ཆ་ནས་ཀྱང་བྱས་རྗེས་ཆེན་པོ་ཞིག་མཚོན་གྱི་ཡོད་པ་གསུངས་སོང་། གཞི་རྩའི་བོད་ཀྱི་རྐང་སྤོལ་རུ་ཁག་ཟླ་བ་འདིའི་ཕྱི་ཚེས་ ༣༡ ནས་དབྱིན་ཡུལ་གྱི་རྒྱལ་ས་ London ནང་འཚོགས་གཏན་འཁེལ་བའི་ ༢༠༡༨ ལོའི་ CONIFA འཛམ་གླིང་རྐང་སྤོལ་རྩེད་འགྲན་ཆེན་མོའི་ཆེད་སང་ཉིན་བཞུགས་སྒར་ནས་རྩེད་འགྲན་པ་ ༡༥ དང་ལས་བྱེད་ཁག་ཅིག་ཕྱོགས་ཐོན་གནང་གི་ཡོད་པ་མ་ཟད། རྩེད་འགྲན་དེའི་ཆེད་ཨ་རི་དང་ཁེ་ན་ཌ་ དེ་བཞིན་དབྱིན་ཡུལ་དང་ཡོ་རོབ་ཁུལ་གྱི་ས་གནས་གཞན་བཅས་ནས་བོད་རིགས་རྩེད་འགྲན་པ་ ༨ ནས་མཉམ་ཞུགས་གནང་གི་འདུག  

Latest news