Tibetan Royal Year of 2151 | Year of the Wood Dragon

རྒྱ་ནག

བཀྲིས་དབང་ཕྱུག་ལགས་འཕྲལ་མར་གློད་བཀྲོལ་དགོས་པའི་འབོད་སྐུལ།

ཟླ་བ་འདིའི་ཚེས་ ༢༧ ཉིན་བོད་མིའི་སྐད་ཡིག་ལས་འགུལ་བ་བཀྲིས་དབང་ཕྱུག་ལགས་རྒྱ་གཞུང་གིས་འཛིན་བཟུང་བཀག་ཉར་བྱས་ནས་ལོ་གསུམ་འཁོར་བ་དང་སྟབས་བསྟུན། བོད་མིའི་ཚོགས་སྡེ་གསུམ་མཉམ་རུབ་ཐོག་རྒྱ་གཞུང་ལ་བཀྲིས་དབང་ཕྱུག་ལགས་ནས་ནག་ཉེས་གང་ཡང་བསགས་མེད་སྟབས་ཁོང་འཕྲལ་མར་གློད་བཀྲོལ་དགོས་པའི་འབོད་སྐུལ་གནང་འདུགཁ་སང་རྒྱལ་སྤྱིའི་བོད་དོན་འབྲེལ་མཐུད་ལས་ཁང་དང་བོད་རང་བཙན་སློབ་ཕྲུག་ཚོགས་པ། དེ་བཞིན་ Tibet Justice Center བཅས་ཚོགས་པ་གསུམ་མཉམ་འབྲེལ་ཐོག་ཡོངས་ཁྱབ་སྤྱི་བསྒྲགས་ཤིག་སྤེལ་ཏེ་རྒྱ་གཞུང་གིས་ཉེ་ཆར་བཀྲིས་དབང་ཕྱུག་ལགས་ནི་ཚོར་བ་རྣོ་བའི་གནད་དོན་ཡིན་པར་བཤད་དེ་ཁོང་ལ་རང་ཉིད་ཀྱི་ཁྲིམས་རྩོད་པ་དང་ཐུག་འཕྲད་གནང་བཅུག་མེད་པའི་གནས་ཚུལ་ཐོན་ཡོད་པ་མངོན་གསལ་དང་སྦྲགས། བཀྲིས་དབང་ཕྱུག་ལགས་ཀྱིས་རྒྱ་གཞུང་གི་རྩ་ཁྲིམས་ནང་འཁོད་པའི་རང་མི་རིགས་ཀྱི་སྐད་ཡིག་རང་དབང་བརྩོད་པར་རྒྱལ་ཁབ་ཀྱི་ཁ་བྲལ་བརྒྱུད་སྐུལ་བྱས་པའི་ནག་ཉེས་འོག་ལོ་ལྔའི་བཙོན་འཇུག་ཁྲིམས་ཐག་བཅད་པར་རྒྱ་གཞུང་ལ་མཐའ་གཅིག་ཏུ་ངོས་ལེན་མེད་པ་དང་ཁོང་འཕྲལ་མར་གློད་བཀྲོལ་དགོས་པའི་འབོད་སྐུལ་གནང་འདུགསྤྱི་བསྒྲགས་དེའི་ནང་ཉེ་ཆར་ཟླ་བ་འདིའི་ཚེས་ ༡༥ ཉིན་བཀྲིས་དབང་ཕྱུག་ལགས་ཀྱི་ཁྲིམས་རྩོད་པ་སྐུ་ཞབས་ Lin Qilei  ལགས་བཙོན་ཁང་དུ་ཐུག་འཕྲད་ཆེད་ཕེབས་སྐབས་སུ་རྒྱ་གཞུང་གིས་ཐུག་འཕྲད་གནང་བཅུག་མེད་པ་མ་ཟད། རྒྱལ་ནང་གི་རྟོག་ཞིབ་ལྷན་ཁང་ནས་བཀའ་ཁྲོལ་ཞུ་དགོས་ལུགས་བརྗོད་པ་བཞིན་ཁྲིམས་རྩོད་པས་དངོས་སུ་དེ་ལྟར་གནང་སྐབས་རྒྱ་གཞུང་གིས་དེ་ལའང་ངོས་ལེན་བྱས་མེད་པ་དང་།  ཁྲིམས་རྩོད་པར་བཀྲིས་དབང་ཕྱུག་ལགས་ནི་ཚོར་བ་རྣོ་བའི་གནད་དོན་ཡིན་སྟབས་ཐུག་འཕྲད་གནང་བར་མཐོ་རིམ་ཁག་ནས་དམིགས་བསལ་གྱི་བཀའ་ཁྲོལ་ཞུ་དགོས་ཚུལ་འགྲེལ་བརྗོད་བྱས་ནས་ཐུག་འཕྲད་གནང་བཅུག་མེད་པ་བཀོད་འདུགབཀྲིས་དབང་ཕྱུག་ལགས་སུ་ཁྲིམས་བཤེར་བྱས་པ་ནས་བཟུང་ད་བར་ཁོང་གི་ནང་མི་བཙོན་ཁང་དུ་ཐུག་འཕྲད་ཆེད་ཐེངས་གསུམ་མ་གཏོགས་བཏང་མེད་པ་མ་ཟད། དེ་སྔ་ ༢༠༡༨ ལོའི་ཕྱི་ཟླ་ ༨ པའི་ནང་མཚོ་སྔོན་ཞིང་ཆེན་མཐོ་རིམ་མི་དམངས་ཁྲིམས་ཁང་ནས་ཁོང་གི་གྱོད་དོན་ལ་ཁྲིམས་བཤེས་ཐེངས་དང་པོ་སྐབས་སུ་ཁོང་གི་ནང་མི་གཅིག་ཀྱང་ཁྲིམས་ཁང་དུ་བཏང་མེད་སྐོར་གསུངས་ཡོད་པ་དང་། དེ་བཞིན་སྔ་ལོ་ཕྱི་ཟླ་ ༡༡ ནང་སྤུན་མཆེད་ཐུག་འཕྲད་གནང་ཐུབ་པ་བྱུང་རྗེས་ད་ཆ་ཁོང་གི་ནང་མི་རྣམས་བསྐྱར་དུ་བཀྲིས་དབང་ཕྱུག་ལགས་དང་ཐུག་འཕྲད་གནང་རྒྱུར་ངང་སྒུག་གནང་བཞིན་ཡོད་སྐོར་བཀོད་འདུག ལྷག་དོན་བོད་རང་བཙན་སློབ་ཕྲུག་ཚོགས་པའི་ངེས་སྟོན་པ་རྡོ་རྗེ་ཚེ་བརྟན་ལགས་ཀྱིས་རྒྱ་གཞུང་གིས་བཀྲིས་དབང་ཕྱུག་ལགས་འཛིན་བཟུང་བཀག་ཉར་དང་ཁྲིམས་ཆད་བཏང་བ་ཡོངས་རྫོགས་ཆབ་སྲིད་ཀྱི་ཀུན་སློང་བཅོས་ཐབས་འབའ་ཞིག་ཆགས་ཀྱི་ཡོད་པ་དང་། ད་ཆ་ཁོང་ནས་རྒྱའི་བཙོན་ཁང་དུ་མནར་གཅོད་མྱོང་བཞིན་པ་མ་ཟད། ཁོང་ནས་རང་ཉིད་ཀྱི་ཁྲིམས་རྩོད་པ་བརྒྱུད་ཁྲིམས་ཁང་གོང་མའི་ནང་དུ་ཞུ་གཏུགས་མུ་མཐུད་གནང་རྒྱུའི་གཞི་རྩའི་ཐོབ་ཐང་གི་ཁེ་དབང་སོགས་ཀྱང་རྒྱ་གཞུང་གིས་འཕྲོག་མུས་ཡིན་པར་སྐྱོན་བརྗོད་ཤུགས་ཆེ་གནང་འདུག

གྷོ་གྷལ་གྱི་ Dragonfly འཚོལ་བཤེར་མ་ལག་གི་ལས་གཞི་མཚམས་འཇོག་དགོས།

དེ་རིང་སྔ་དྲོ་རྒྱ་གར་གྱི་རྒྱལ་ས་ལྡི་ལིའི་ Gurgaon ཁུལ་དུ་ཡོད་པའི་གྷོ་གྷལ་གྱི་ལས་ཁུངས་མདུན་དུ་བོད་ཀྱི་བུད་མེད་ལྷན་ཚོགས་དང་བོད་རང་བཙན་སློབ་ཕྲུག་ཚོགས་པའི་ཚོགས་མི་བཅས་ཁྱོན་མི་གྲངས་ ༢༠ ལྷག་ཙམ་ཞིག་ནས་ཚོང་འབྲེལ་ཁེ་ཕན་ཆེད་དུ་རང་དབང་བརྩི་མེད་རྡོག་རོལ་མ་གནང་རོགས། མཉེན་ཆས་གསར་པ་དེས་རྒྱ་ནག་གི་བཙན་འོག་ཏུ་ཡོད་པའི་བོད་མི་དང་ཡུ་གུར་སོགས་ཀྱི་མི་རིགས་ཚོར་དྲྭ་རྒྱའི་རང་དབང་ལོངས་སུ་སྤྱོད་རྒྱུར་འགོག་རྐྱེན་བཟོ་རྒྱུ་ཡིན་པ་སོགས་ཀྱི་ཡིག་བྱང་བསྣམས་ནས་ལས་འགུལ་སྤེལ་ཡོད་པ་མ་ཟད། གཞུང་འབྲེལ་མ་ཡིན་པའི་ཚོགས་པ་གཉིས་ཀྱི་སྐུ་ཚབ་གཉིས་དངོས་སུ་གྷོ་གྷལ་གྱི་ལས་ཁུངས་ནང་ཆེད་བཅར་གྱིས་ཁོང་ཚོའི་ཁྲིམས་ཀྱི་སློབ་སྟོན་པ་སྐུ་ཞབས་ Diwarkar དང་ཐུག་འཕྲད་བརྒྱུད་ dragonfly ལས་འཆར་དེ་མཚམས་འཇོགས་གནང་དགོས་པའི་འབོད་སྐུལ་སོགས་ཀྱང་ཞུས་ཡོད་པ་རེད།རྒྱལ་ས་ལྡི་ལི་ Gurgaon  ཁུལ་དུ་ཡོད་པའི་རྒྱ་གར་གྱི་གྷོ་གྷལ་ལས་ཁུངས་མདུན་དུ་ལས་འགུལ་སྤེལ་བའི་སྐབས་དབུས་བུད་མེད་ལྷན་ཚོགས་ཀྱི་རྒྱུན་ལས་ཁག་གཅིག་དང་ལྡི་ལི་བོད་སྒར་བསམ་ཡས་གླིང་གི་ས་གནས་རྒྱུན་ལས་རྣམ་པ། དེ་བཞིན་རོ་ཧི་ནི་བོད་ཕྲུག་སྡོད་ཁང་གི་བོད་རང་བཙན་སློབ་ཕྲུག་ཚོགས་པའི་ཚོགས་མི་བཅས་ལས་འགུལ་བ་མི་གྲངས་ ༢༠ ལྷག་ཙམ་ཕེབས་ནས་གྷོ་གྷལ་ཚོང་ལས་ཁང་ནས་ Dragonfly འཚོལ་བཤེར་མ་ལག་གི་ལས་གཞི་མཚམས་འཇོག་གནང་དགོས་པའི་ཞུ་སྐུལ་གནང་ཡོད་པ་རེད།གཞི་རྩའི་ Google ཚོང་ལས་ཁང་ནས་འདི་ལོའི་ཟླ་ ༧ ནང་རྒྱ་ནག་གཞུང་གི་དགོས་མཁོ་དང་མཐུན་པའི་འཚོལ་བཤེར་མ་ལག་དེ་གསང་བའི་ཐོག་བཟོ་སྐྲུན་བྱས་པའི་གནས་ཚུལ་ཕྱིར་གྱར་བྱུང་རྗེས་འདི་ལོའི་ཟླ་ ༨ ནང་གྷོ་གྷལ་གྱི་ལས་བྱེད་ ༡༤༠༠ ཙམ་གྱིས་ཡིག་ཐོག་སྙན་ཞུ་བྲིས་སྟེ་ངོ་རྒོལ་བྱས་པ་མ་ཟད། གནད་དོན་དེ་དང་འབྲེལ་ཟླ་ ༡༢ ནང་ཨ་རིའི་གྲོས་ཚོགས་འོག་མའི་ཁྲིམས་ཞིབ་ཚོགས་ཆུང་གི་ཉན་ཞིབ་ལས་རིམ་ཐོག་གྷོ་གྷལ་ཚོང་ལས་ཁང་གི་གཙོ་འཛིན་ Sundar Pichai ལགས་ཆེད་འབོད་ཀྱིས་ཉན་ཞིབ་གནང་སྐབས་བོད་རང་བཙན་སློབ་ཕྲུག་ཚོགས་པའི་འཐུས་མི་དང་དང་ཡུ་གུར་ལས་འགུལ་བ་གཙོ་གྱུར་འགྲོ་བ་མིའི་ཐོབ་ཐང་ལྟ་ཞིབ་ཚོགས་པ་ཁག་གཅིག་ནས་ངོ་རྒོལ་གྱི་ལས་འགུལ་སྤེལ་རྗེས་ཚོང་ལས་ཁང་དེའི་འགོ་གཙོ་རྣམས་ནས་ལས་གཞི་དེ་གནས་སྐབས་རིང་མཚམས་འཇོག་བྱས་ཡོད་ཚུལ་གྱི་གནས་ཚུལ་ཐོན་ཡོད་པ་རེད།

རྒྱ་གཞུང་གིས་བོད་མིའི་ཐོག་བཙན་གནོན་གྱི་བྱ་སྤྱོད་མུ་མཐུད་སྤེལ་བཞིན་པ་གསལ་བཏོན།

ཨ་རིར་རྟེན་གཞི་བྱས་པའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པས་འཛམ་གླིང་རྒྱལ་ཁབ་ ༩༠ ནང་གི་འགྲོ་བ་མིའི་ཐོབ་ཐང་གི་གནས་སྟངས་ལ་ཞིབ་འཇུག་གནང་བའི་ལོ་འཁོར་སྙན་ཐོ་ཞིག་འདོན་སྤེལ་གནང་བའི་ནང་རྒྱ་གཞུང་གིས་བོད་མིའི་ཐོག་བཙན་གནོན་གྱི་བྱ་སྤྱོད་མུ་མཐུད་སྤེལ་བཞིན་ཡོད་པ་གསལ་བཏོན་གནང་འདུག འགྲོ་བ་མིའི་ཐོབ་ཐང་ལྟ་ཞིབ་ཚོགས་པའི་ལོ་འཁོར་སྙན་ཐོ་དེའི་རྒྱ་ནག་གི་ཚན་པ་ནང་གསེས་བོད་སྐོར་སྡེ་ཚན་ཟུར་བཀོད་གནང་འདུག་པ་དེའི་ནང་། རྒྱ་གཞུང་གིས་བོད་ནང་གི་བོད་མིའི་ཆོས་དད་དང་གཏམ་བརྗོད་རང་དབང་། འགྲུལ་བཞུད་རང་དབང་སོགས་ལ་དམ་དྲག་ཤུགས་ཆེ་བྱེད་མུས་ཡིན་པ་མ་ཟད། བོད་ཀྱི་ས་ཁུལ་ཁག་ཏུ་རྒྱ་གཞུང་གི་འགོ་ཁྲིད་མི་སྣས་ས་གནས་བོད་མིའི་ས་ཁང་བཙན་འཕྲོག་དང་གཏེར་ཁ་སྔོག་འདོན་ཚད་འགལ་གྱི་བྱ་སྤྱོད་སོགས་སྤེལ་བའི་ཁྲོད་བཙན་གནོན་གྱི་གནས་འབབ་འོག་བོད་མིའི་འགྲུལ་བསྐྱོད་ལ་ལྟ་རྟོག་ནན་པོ་བྱས་ཏེ་སྤྱི་ཚོགས་དྲྭ་རྒྱ་དང་ཁ་པར་ལ་ཞིབ་བཤེར་མུ་མཐུད་བྱེད་བཞིན་ཡོད་པ་སོགས་ཀྱི་གནས་སྟངས་དངོས་གསལ་བཏོན་གནང་འདུག སྙན་ཐོའི་ནང་ད་དུང་བོད་མི་ཆབ་སྲིད་བཙོན་ཟུར་ཚེ་མགོན་རྒྱལ་ལ་ལོ་གསུམ་བཙོན་འཇུག་དང་བོད་མི་སྐད་ཡིག་སྲུང་སྐྱོབ་པ་བཀྲིས་དབང་ཕྱུག་ལགས་ལོ་ལྔ་བཙོན་འཇུག་གི་ཁྲིམས་བཅད་ཡོད་པ་དེ་ཡང་གཞི་མེད་ཀྱི་སྐྱོན་འཛུགས་བྱས་ཏེ་ཁྲིམས་ཆད་བཏང་སྐོར་སྐྱོན་བརྗོད་བྱས་པ་དང་འབྲེལ། སྔ་ལོ་གནས་མཆོག་རྡོ་རྗེ་གདན་དུ་༸གོང་ས་༸སྐྱབས་མགོན་ཆེན་པོ་མཆོག་གི་དྲུང་ནས་གསུང་ཆོས་ཞུས་བར་བཅར་བའི་བོད་ནང་གི་བོད་མི་བརྒྱ་ཕྲག་ཁ་ཤས་ལ་རྒྱ་གཞུང་གིས་ཕྱིར་ལོག་དགོས་པའི་བཙན་བཀའ་བཏང་བ་དང་། གལ་ཏེ་དུས་བཅད་ནང་ཕྱིར་ལོག་མ་གནང་ཚེ་ཉེས་ཆད་གཏོང་རྒྱུའི་འཇིགས་སྐུལ་བྱས་པ་དང་བོད་ཀྱི་དགོན་སྡེ་དང་སློབ་གྲྭ་ཁག་གི་ནང་ཆབ་སྲིད་ཀྱི་སློབ་གསོའི་ལས་འགུལ་སྤེལ་ཤུགས་ཆེ་རུ་བཏང་བ་སོགས་བོད་ནང་གི་བོད་མིའི་འགྲོ་བ་མིའི་ཐོབ་ཐང་གི་གནས་སྟངས་ནི་མུ་མཐུད་ནས་ཇེ་ཞན་ཇེ་སྡུག་ཏུ་འགྲོ་བཞིན་ཡོད་པ་མངོན་གསལ་གནང་འདུག ཚོགས་པའི་གཙོ་འཛིན་སྐུ་ཞབས་ Kenneth Roth ལགས་ཀྱིས་ཁ་སང་སྙན་ཐོ་དེ་འདོན་སྤེལ་གནང་སྐབས་སུ་རྒྱ་གཞུང་གིས་ཤིན་ཅང་གི་ཡུ་གུར་མི་རིགས་ས་ཡ་བརྒལ་བར་བཀག་ཉར་བྱེད་བཞིན་པའི་གནས་ཚུལ་དེ་ནི་འཛམ་གླིང་ཁྱོན་ནས་དོ་སྣང་མ་གནང་བའི་གནད་དོན་ཆེ་གྲས་ཤིག་ཆགས་ཡོད་པར་འགྲེལ་བརྗོད་དང་ཨ་རི་དང་དབྱིན་ཡུལ་གཙོ་གྱུར་ནུབ་ཕྱོགས་རྒྱལ་ཁབ་ཙམ་མིན་པར་རྒྱལ་ཁབ་ཆུང་གྲས་དང་ལྷག་དོན་ OIC ལྟ་བུ་ཁ་ཆེའི་ཚོགས་སྡེ་ཁག་ནས་ཀྱང་གནད་དོན་དེའི་ཐོག་དོ་སྣང་གནང་རྒྱུར་རེ་བ་གནང་བཞིན་ཡོད་པ་གསུངས་འདུག གཞི་རྩའི་སྐུ་ཞབས་ Kenneth Roth ཡིས་ཁ་སང་རེས་གཟའ་ཕུར་བུ་ཉིན་ཚོགས་པའི་ལོ་རེའི་སྙན་ཐོ་དེ་འདོན་སྤེལ་གནང་བའི་སྔོན་གླེང་ནང་ཚོགས་པ་དེའི་ངོས་ནས་རྒྱལ་སྤྱིའི་འགྲོ་བ་མིའི་ཐོབ་ཐང་གི་གནས་སྟངས་ལ་ཞིབ་འཇུག་གནང་པའི་ཁྲོད་འདས་ལོའི་ནང་འཛམ་གླིང་རྒྱལ་ཁབ་མང་པོ་ཞིག་གི་ནང་སྲིད་དབང་སྒེར་གཅོད་སྲིད་གཞུང་ཁག་ལ་མང་ཚོགས་ནས་འགོག་རྒོལ་བྱས་པའི་རྣམ་པ་འབུར་ཐོན་བྱུང་ཡོད་པར་མངོན་གསལ་དང་འགོག་རྒོལ་ལས་འགུལ་དེ་དག་ལ་བཟང་ཕྱོགས་ཀྱི་གནས་ཚུལ་མང་པོ་བྱུང་བ་མ་ཟད། རྒྱལ་སྤྱིའི་ཁྱོན་དུ་འགྲོ་བ་མིའི་ཐོབ་ཐང་སྲུང་སྐྱོབ་བྱ་རྒྱུའི་ནུས་ཤུགས་གསར་པ་ཞིག་ཀྱང་འཐོན་བཞིན་ཡོད་པ་གསུངས་འདུག

རྒྱ་ནག་གིས་མི་ཆིག་སྟོང་ལྷག་བོད་དུ་འགྲོ་རྒྱུར་བཀག་སྡོམ་བྱས་པ།

རྒྱ་ནག་གིས་ས་བགོས་བྱས་པའི་བོད་རང་སྐྱོང་ལྗོངས་ཀྱི་ཕྱི་མི་ཞིབ་བཤེར་ལས་ཁུངས་ཀྱིས་བོད་དུ་ནང་འཛུལ་དང་ཕྱིར་བསྐྱོད་ཀྱི་འགྲིམ་འགྲུལ་ཐད་ནས་བཀག་སྡོམ་གྱི་ལས་གཞི་དོ་དམ་སྔར་ལས་ཤུགས་ཆེར་བཏང་ཡོད་སྟབས་ཕྱི་ལོ་ ༢༠༡༨ ལོར་མི་ ༡༠༠༠ ལྷག་བོད་དུ་འགྲོ་རྒྱུར་བཀག་སྡོམ་བྱས་ཡོད་པ་རེད། ཁ་སང་རྒྱ་ནག་གི་གྷོ་ལོ་བྷལ་གསར་ཁང་ལ་ས་མཚམས་དོ་དམ་ལས་ཁུངས་ཀྱིས་གནས་ཚུལ་མཁོ་སྤྲོད་བྱས་པ་བཀོད་པར་ཕྱི་ལོ་ ༢༠༡༨ ཟླ་ ༧ པ་ནས་བཟུང་རྒྱ་ནག་གིས་བོད་ཁུལ་དུ་ཕྱིར་བསྐྱོད་དང་ནང་འཛུལ་གྱི་སྲིད་བྱུས་ཇེ་དམ་དུ་བཏང་ཡོད་སྟབས་ལོ་ཕྱེད་ནང་བོད་ཁུལ་དུ་འགྲུལ་བཞུད་ཀྱི་བརྒྱ་ཆ་ ༨༠ ཙམ་མར་ཆག་ཡོད་པ་བཀོད་འདུག ཕྱི་ལོ་ ༢༠༡༨ ལོའི་ཟླ་ ༧ པའི་ནང་བོད་དུ་ཁྲིམས་འགལ་གྱིས་ཕྱིར་བསྐྱོད་དང་ནང་འཛུལ་བྱེད་མཁན་གྱི་དོན་རྐྱེན་ཇེ་མང་དུ་ཕྱིན་པས་ཕྱི་མི་ཞིབ་བཤེར་ལས་ཁུངས་ཀྱིས་བཅིངས་བཀྲོལ་དམག་མི་དང་མཉམ་འབྲེལ་གྱིས་ས་མཚམས་ཞིབ་བཤེར་གྱི་ལས་གཞིར་སྔར་ལྷག་ཤུགས་སྣོན་བརྒྱབ་ཡོད་པ་རེད། བོད་ནང་གི་འགྲིམ་འགྲུལ་ཞིབ་བཤེར་ལས་ཁུངས་ཀྱི་སྐུ་ཞབས་ཡཱོན་པེན་གྱིས་གསར་ལམ་དུ་འགྲེལ་བརྗོད་ཀྱིས་བོད་ཁུལ་དུ་ནང་མི་ཕྱིར་བསྐྱོད་དང་ཕྱི་མི་ནང་འཛུལ་གྱི་འགན་ཆ་ཚང་ང་ཚོར་ཡོད་སྟབས་ང་ཚོས་གཟབ་ནན་གྱིས་ཁྲིམས་འགལ་རང་བཞིན་གྱི་འགྲིམ་འགྲུལ་ལ་དོ་དམ་ནན་པོ་བྱས་ཏེ་རྒྱལ་ནང་དང་ཕྱི་རྒྱལ་གྱི་ཡུལ་སྐོར་སྤྲོ་འཆམ་པ་དག་ལ་ཞབས་ཞུའི་རྣམ་པ་ཇེ་ལེགས་སུ་གཏོང་མུས་ཡིན་པར་བརྗོད་འདུག དེ་བཞིན་བོད་ནང་གི་ཕྱི་མི་ཞིབ་བཤེར་ལས་ཁུངས་ཀྱིས་ཕྱི་ལོག་ནས་འཇིགས་སྐུལ་རིང་ལུགས་པ་དང་ཉེས་ཅན་གྱི་རིགས་རྒྱ་ནག་དང་བོད་ནང་མི་འཛུལ་བར་ལྟ་རྟོག་ནན་པོ་བྱེད་པའི་ལས་གཞི་རྒྱ་སྐྱེད་བྱས་ཡོད་པས་ཕྱི་ལོ་ ༢༠༡༨ ལོར་མི་འབོར་ ༡༠༠༠༠༠ ལྷག་དང་རླངས་འཁོར་ ༥༠༠༠༠༠ ལྷག་ལ་ཞིབ་བཤེར་ནན་པོ་བྱས་ཡོད་པའི་ཁྲོད་བོད་དུ་ནང་འཛུལ་བྱེད་མཁན་གྱི་ཁྲོད་ནས་ཁྲིམས་སྒྲིག་འོས་འཚམས་མིན་པའི་མི་གྲངས་ ༡༠༠༠ ལྷག་བོད་དུ་འགྲོ་རྒྱུར་བཀག་སྡོམ་བྱས་འདུགརྒྱ་གཞུང་གིས་བདེ་སྲུང་གི་ལས་བྱེད་ ༡༦༠༠༠ ལྷག་གི་ཆེད་དུ་ས་མཚམས་ཀྱི་དུད་ཚང་གྲངས་ ༢༡༠༠༠ ལྷག་ལ་མངགས་གཏོང་གིས་ཞིང་ཆེན་གཞན་ནས་ཡོང་བའི་མི་གྲངས་ ༤༨༠༠༠ ལྷག་ཐོ་འགོད་བྱེད་དུ་བཅུག་ཡོད་པ་ལྟར། ས་ཁུལ་ཁག་བདུན་གྱིས་རྒྱ་ནག་གི་ཞིབ་བཤེར་ལས་གཞིའི་ཐད་མཉམ་ལས་ཀྱི་ནུས་པ་ཐོན་ཡོད་པར་བསྒྲགས་ནས་རྒྱ་སྒོར་ ༨༤༠༠༠ ལྷག་གི་བྱ་དགའ་སྤྲད་འདུག རྩ་བའི་དབུས་བོད་མིའི་སྒྲིག་འཛུགས་ཀྱི་བདེ་སྲུང་ལས་ཁུངས་ཀྱིས་གསར་ལམ་ཁག་ཏུ་གནས་ཚུལ་སྤེལ་ཏེ། རྒྱ་གཞུག་གིས་མཐའ་མཚམས་སུ་ལྟ་རྟོག་ནན་པོ་བྱེད་བཞིན་པར་བརྟེན་ཕྱི་ལོ་ ༢༠༡༨ ནས་ ༢༠༡༩ ལོར་བོད་ནང་ནས་བོད་མི་ ༨༠ ཙམ་མ་གཏོགས་རྒྱ་གར་དུ་ཕེབས་ཐུབ་མེད་པར་གསལ་ཁ་གནང་འདུག དེ་བཞིན་འདི་ལོ་ནང་རྡོར་གདན་དུ་༸གོང་ས་མཆོག་གི་བཀའ་ཆོས་སྐབས་སུ་ཡང་རྒྱ་ནག་སྲིདགཞུང་གིས་བོད་ཁུལ་ནས་ཕེབས་པའི་དད་ལྡན་ཆོས་ཞུ་བ་མང་དག་ཅིག་འཕྲལ་དུ་ཉིན་གསུམ་གྱི་ནང་ཕྱིར་ལོག་དགོས་པའི་བཀའ་རྒྱ་བཏང་བའི་གནས་ཚུལ་ཐོན་ཡོད་པ་རེད། དེ་རིང་སླར་བལ་ཡུལ་སྲིད་གཞུང་གིས་འདས་པའི་ལོ་གཅིག་གི་ནང་ཕྱི་རྒྱལ་གྱི་མི་གྲངས་ ༨༤ ལྷག་ཕྱིར་ཕུད་བཏང་ཡོད་པའི་གསར་འགྱུར་སྤེལ་ཡོད་པ་ལས་མང་ཤོས་རྒྱ་ནག་གི་མི་ཡིན་པར་བཀོད་ཡོད་ཀྱང་དེའི་ནང་ཕལ་མོ་ཆེ་བོད་རིགས་ཡོད་སྲིད་པ་ཞིག་རེད།

རྒྱ་དཀར་ནག་གཉིས་ཀྱི་ས་མཚམས་སུ་བདེ་སྲུང་གི་འཛུགས་སྐྲུན།

རྒྱ་གར་གྱིས་འགྲོ་གྲོན་ཨ་སྒོར་ཐེར་འབུམ་ ༣  མ་ཟིན་ཙམ་ཆེད་གཏོང་གིས་མངའ་སྡེ་ ༥ ཡི་ནང་དུ་གཞུང་ལམ་གསར་རྒྱག་བྱས་ནས་རྒྱ་དཀར་ནག་གི་ས་མཚམས་ཀྱི་རྙོག་གླེང་གི་སྐབས་སུ་གང་མགྱོགས་དམག་ཆས་མཁོ་འདོན་བྱེད་ཐུབ་པའི་འཛུགས་སྐྲུན་གྱི་ལས་གཞི་རྒྱ་སྐྱེད་བྱེད་བཞིན་ཡོད་པ་རེད། དེ་རིང་ལྷོ་རྒྱ་ནག་གི་ཞོགས་པའི་ཆ་འཕྲིན་གྱིས་གསར་འགྱུར་སྤེལ་བར་འདས་པའི་ལོ་བཅུ་ཕྲག་འགའ་ཤས་ཀྱི་ནང་རྒྱ་གར་གྱིས་རྒྱ་དཀར་ནག་གི་ས་མཚམས་ལ་འཛུགས་སྐྲུན་གྱི་ལས་གཞི་གང་ཡང་སྤེལ་མེད་ཀྱང་། ཕྱི་ལོ་ ༢༠༡༧ ལོའི་འབྲོག་ལམ་ཁུལ་དུ་རྒྱ་དཀར་ནག་གཉིས་ཀྱིས་ཕན་ཚུལ་དབར་གདོང་ཐུག་བརྒྱབ་པར་བརྟེན་ད་ཆ་རྒྱ་གར་གྱིས་མངའ་སྡེ་ལྔའི་ནང་དུ་གཞུང་ལམ་གསར་རྒྱག་གིས་ས་མཚམས་ཁག་གི་བདེ་སྲུང་ཇེ་བརྟན་གཏོང་རྒྱུའི་ལས་གཞི་སྤེལ་བཞིན་ཡོད་པ་བཀོད་འདུགརྒྱ་གར་དབུས་གཞུང་ནས་འཛུགས་སྐྲུན་གསར་རྒྱག་གི་ལས་གཞི་དེ་རྒྱ་ནག་དང་ས་འབྲེལ་ཡོད་པའི་རྒྱ་གར་བྱང་ཕྱོགས་ཀྱི་མངའ་སྡེ་ཧི་མཱ་ཅལ་དང་ཨུཏྲཁཎ། ཇམྨུ་ཀཤྨིར། དེ་བཞིན་བྱང་ཤར་གྱི་མངའ་སྡེ་ཨ་རུ་ནཱ་ཅལ་དང་འབྲས་ལྗོངས་བཅས་སུ་གཏན་ཁེལ་ཡོད་པ་རེད། རྒྱ་གར་གྱི་སྲིད་བློན་མོ་དྷི་མཆོག་གིས་སྲིད་དབང་བཞེས་པ་དང་ལྷན་དུ་རྒྱ་ནག་གིས་ས་མཚམས་ལ་བཟུང་བའི་ལངས་ཕྱོགས་དེ་ལ་ཁ་གཏད་གཅོག་པར་རྒྱ་གར་བྱང་ཕྱོགས་ཁུལ་གྱི་མངའ་སྡེ་ཁག་ཅིག་གི་ནང་གཞུང་ལམ་གསར་རྒྱག་གིས་མཚོན་པའི་ལས་གཞི་རྒྱ་སྐྱེད་ཀྱི་སྲིད་བྱུས་གཏན་ལ་ཕབས་ཡོད་པ་དང་། འཛུགས་སྐྲུན་གྱི་ལས་གཞི་དེ་དག་རྒྱ་གར་ནང་སྲིད་དང་བདེ་སྲུང་། ས་མཚམས་ཉེན་སྲུང་གི་དམག་མིའི་ལས་ཁུངས་སོགས་དང་ལྷན་དུ་གྲོས་མཐུན་གྱིས་ཤུགས་སྣོན་རྒྱག་བཞིན་ཡོད་སྟབས་ལམ་ཁ་གསར་རྒྱག་གི་ལས་གཞི་ཁག་ཅིག་ལེགས་གྲུབ་བྱུང་ཡོད་པར་གསལ་ཁ་གནང་འདུགརྒྱ་གར་གྱི་རྒྱ་ནག་སྲིད་བྱུས་ཉམས་ཞིབ་ཁང་གི་འགན་འཛིན་དང་ཆབ་སྲིད་དཔྱད་བརྗོད་པ་སྐུ་ཞབས་ Jayadeva Ranade ལགས་ཀྱིས་རྒྱ་ནག་གི་ས་མཚམས་ཀྱི་འཛུགས་སྐྲུན་ལས་གཞི་དང་བསྡུར་ནས་བལྟས་ཚེ་རྒྱ་གར་གྱི་ས་མཚམས་འཛུགས་སྐྲུན་གསར་རྒྱག་གི་ལས་གཞི་ནི་གལ་འགངས་ཆེན་པོ་ཞིག་ཡིན་པ་མ་ཟད།  དུས་ལ་བབ་པའི་མདུན་སྐྱོད་ཅིག་རེད་ཅེས་གསུངས་པ་དང་སྦྲགས་ཏེ། འཛུགས་སྐྲུན་ལས་གཞི་དེ་ལས་ཤེས་རྟོགས་ཐུབ་པ་ནི་ལམ་ཁ་གསར་རྒྱག་གིས་འབྲེལ་མཐུད་ཀྱི་ནུས་བ་ཇེ་ཆེར་བཏང་ནས་ས་མཚམས་ཀྱི་དཔལ་འབྱོར་གྱི་ལས་གཞི་མཐོར་འདེགས་གཏོང་ཐུབ་པ་དང་། དམག་མིའི་འགྲིམ་འགྲུལ་རིགས་ལས་སླ་རུ་བཏང་ནས་སྣུམ་ཚུགས་ཀྱི་དཀའ་མེད་པར་གཏོང་ཐུབ་པ། དེ་བཞིན་ལམ་ཁ་གསར་རྒྱག་གི་རྐྱེན་གྱིས་དམག་ཆས་མཁོ་འདོན་གྱི་ནུས་པ་ཇེ་མགྱོགས་སུ་གཏོང་ཐུབ་པ་བཅས་ཀྱི་ཁེ་བཟང་གསུམ་ལྡན་ཡོད་པར་བརྗོད་འདུག དེ་བཞིན་ཟླ་སྔོན་མའི་ནང་རྒྱ་གར་གྲོས་ཚོགས་ཀྱིས་ཕྱི་འབྲེལ་གྱི་ལས་དོན་ཐད་ནས་ཚོགས་འདུ་ཞིག་བསྡུ་བསྐོང་གནང་སྟེ་ས་མཚམས་ཀྱི་འཛུགས་སྐྲུན་ལས་གཞི་བསྐྱར་བཅོས་ཞེས་པའི་སྙན་ཐོ་གསར་པ་ཞིག་འདོན་སྤེལ་དང་འབྲེལ། རྒྱ་དཀར་ནག་གི་ས་མཚམས་འཛུགས་སྐྲུན་ལས་གཞིའི་ཐད་ནས་ཞན་ཆ་ཆེན་པོ་ཡོད་པར་བརྗོད་དེ་རྒྱ་གར་གྱི་མཐའ་མཚམས་ཁག་ནི་ལམ་ཁ་གཅིག་ཁོ་ནར་བསྟེན་ནས་ཡོད་པ་དང་། དཀའ་རྙོག་གི་དུས་སུ་དེ་ལྟ་བུའི་གནས་སྟངས་དེ་ཧ་ཅང་གི་ཉེན་ཁ་ཆེན་པོ་ཆགས་ཡོད་པར་བརྗོད་པ་ཟད། ཕྱི་ལོ་ ༡༩༦༢ ལོའི་རྒྱ་དཀར་ནག་གི་དམག་འཐབ་ཀྱི་སྐབས་སུ་ཡང་རྒྱ་ནག་གིས་རྒྱ་གར་གྱི་འཛུགས་སྐྲུན་ལས་གཞིའི་ཞན་ཆ་དེའི་གོ་སྐབས་བླངས་ཡོད་པར་བརྟེན་རྒྱ་གར་ནས་བདུན་ཕྲག་བཞིའི་རིང་ལ་ཧི་མཱ་ལ་ཡའི་རི་རྒྱུད་ནས་ངོ་གནོང་དགོས་པའི་ཕམ་ཉེས་ཆེན་པོ་མྱངས་ཡོད་པས་རྒྱ་གར་གྱི་ངོས་ནས་འདས་པའི་དེ་བྱུང་ལས་བསླབ་བྱ་ལེན་དགོས་པ་རེད་ཅེས་བཀོད་འདུག

ཞི་ཅིན་ཕིང་གཙོ་གྱུར་རྒྱ་ནག་གི་འགོ་ཁྲིད་ཚོའི་འདྲ་པར་ལ་ཕྱག་འཚལ་དགོས་པའི་བཀའ་རྒྱ།

ཉེ་ཆར་ཟླ་ ༡ ཚེས་ ༡༠ ནས་ ༡༤ བར་བོད་ཀྱི་རྒྱལ་ས་ལྷ་སར་ཚོགས་པའི་རྒྱ་ནག་གི་རང་སྐྱོང་ལྗོངས་མི་དམངས་འཐུས་ཚོགས་ཀྱི་ཚོགས་ཆེན་སྐབས་ ༡༡ ཚོགས་འདུ་ཐེངས་ ༢ པའི་ཐོག་རྒྱ་གཞུང་ནས་དབྱེ་བའི་བོད་རང་སྐྱོང་ལྗོངས་གཙོ་གྱུར་བོད་ཀྱི་ས་ཁུལ་ཁག་ཏུ་བཞུགས་པའི་བོད་མི་རྣམས་ནས་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་པའི་ནང་པའི་བླ་སྤྲུལ་རྣམ་པའི་སྐུ་འདྲར་མཆོད་འབུལ་དང་སྐུ་ཕྱག་འབུལ་རྒྱུ་མཚམས་འཇོག་གིས་ཞི་ཅིན་ཕིང་གཙོ་གྱུར་རྒྱ་ནག་གི་འགོ་ཁྲིད་ཚོའི་འདྲ་པར་ལ་ཕྱག་འཚལ་དགོས་པའི་བཀའ་རྒྱ་བཏང་འདུག ཁ་སང་ཨ་རིའི་རྒྱལ་ས་ Washington DC ནང་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་ནས་ཉེ་ཆར་མཇུག་སྒྲིལ་ཟིན་པའི་རྒྱ་ནག་གི་རང་སྐྱོང་ལྗོངས་མི་དམངས་འཐུས་ཚོགས་ཀྱི་ཚོགས་ཆེན་དང་འབྲེལ་ Inside Tibet Report འམ་བོད་ནང་གི་སྙན་ཐོ་ཞེས་པའི་དཔྱད་གཏམ་ཞིག་སྤེལ་འདུག་པ་དང་། དེའི་ནང་དུ་བོད་རང་སྐྱོང་ལྗོངས་ཟེར་བའི་འགོ་གཙོ་ Qi Zhala ཡིས་ལྷན་ཚོགས་ཐོག་༸གོང་ས་མཆོག་གིས་གཙོས་པའི་བོད་གཞིས་བྱེས་གཉིས་སུ་ཡོད་པའི་བོད་དོན་རྒྱབ་སྐྱོར་བ་རྣམས་ནས་ད་བར་བོད་ནང་གི་བོད་མིའི་སེམས་ནང་ལ་སིམ་འཛུལ་གྱིས་ཁ་བྲལ་དང་གཏོར་རྒོལ་སོགས་དྲག་པོའི་ལས་གཞི་མང་པོ་སྤེལ་ཡོད་སྐོར་འགྲེལ་བརྗོད་དང་ཆབས་ཅིག ཐེངས་འདིའི་ལྷན་ཚོགས་ཐོག་རྒྱ་གཞུང་ནས་དབྱེ་བའི་བོད་རང་སྐྱོང་ལྗོངས་ཁུལ་གྱི་འགོ་གཙོ་རྣམས་ནས་༸གོང་ས་མཆོག་དང་ཁ་གཏད་པར་གདོང་ལེན་ནན་པོ་བྱེད་དགོས་པའི་ཐག་གཅོད་བྱས་ཡོད་པ་བཤད་འདུག ལྷག་པར་དུ་རྒྱ་ནག་གི་འགོ་ཁྲིད་ཚོས་བོད་མི་རྣམས་ནས་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་པའི་ནང་པའི་བླ་སྤྲུལ་རྣམ་པའི་སྐུ་འདྲར་ཕྱག་འཚལ་བ་དང་། མཆོད་པ་འབུལ་རྒྱུ་རིགས་མཚམས་འཇོག་བྱས་ནས་རྒྱ་ནག་གི་སྲིད་འཛིན་ཞི་ཅིན་ཕིང་གཙོ་གྱུར་འགོ་ཁྲིད་རྣམས་ཀྱི་འདྲ་པར་ལ་ཕྱག་འཚལ་དགོས་པའི་བཀའ་རྒྱ་བཏང་ཡོད་པ་དང་། བོད་ཁམས་ཕྱོགས་ནས་ཡིན་པའི་བོད་མི་ཞིག་གིས་རྒྱ་ནག་གིས་དེ་སྔ་བོད་མི་གཞིས་སྤོས་ཀྱི་ལས་གཞིའི་འོག་ཁམས་ཕྱོགས་སུ་བཏང་པའི་བོད་མི་རྣམས་ལ་ཞི་ཅིན་ཕིང་གི་གཟུགས་བརྙན་འཁོད་པའི་འདྲ་པར་རིགས་འགྲེམས་སྤེལ་བྱས་ཡོད་སྐོར་གསུངས་ཡོད། བོད་མིའི་ཆབ་སྲིད་བཙོན་ཟུར་མགོ་ལོག་འཇིགས་མེད་ལགས་ནས་བོད་སེར་རྟ་ཁུལ་དུ་དེ་སྔ་རྒྱ་གཞུང་གི་འཚོ་སྣོན་རིགས་ལེན་མཁན་གྱི་བོད་མི་རྣམས་ལ་དོ་དག་སོ་སོའི་སྡོད་ཁང་ནས་༸གོང་ས་མཆོག་གི་༸སྐུ་པར་སྒྲིག་གཤོམ་གནང་མི་ཆོག་པ་དང་ནང་པའི་བླ་སྤྲུལ་རྣམ་པའི་སྐུ་པར་ཡང་དེ་ལྟར་ཕྱིར་འཐེན་དགོས་པའི་བཀའ་རྒྱ་ནན་པོ་བཏང་སྐོར་གསུངས་འདུག

བོད་མི་ ༢༥ ལ་ཁ་བྲལ་བའི་ཉེས་མིང་འོག་ཁྲིམས་ཐག་བཅད་ཡོད་པ་བཤད་འདུག

རྒྱ་ནག་མི་དམངས་འཐུས་མི་ཚོགས་ཆེན་ཐོག་བོད་རང་སྐྱོང་ལྗོངས་མི་དམངས་ཁྲིམས་ཁང་གི་ལས་དོན་སྙན་སྒྲོན་ཞུས་པའི་ནང་རྒྱ་གཞུང་གིས་སྔ་ལོ་ ༢༠༡༨ ནང་ཁྱོན་བོད་མི་ ༥༨ ལ་ཁྲིམས་ཐག་བཅད་ཡོད་པ་ལས་བོད་མི་ ༢༥ ལ་ཁ་བྲལ་བའི་ཉེས་མིང་འོག་ཁྲིམས་ཆད་བཏང་ཡོད་པ་གསལ་འདུག རྒྱ་གཞུང་གི་ Global Times གསར་ཁང་གིས་གནས་ཚུལ་སྤེལ་བར་ཉེ་ཆར་བོད་ཀྱི་རྒྱལ་ས་ལྷ་སར་བོད་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་དང་རྒྱ་ནག་ཆབ་སྲིད་གྲོས་མོལ་ཁང་གི་ཚོགས་འདུ་བཅས་ཚོགས་ཡོད་པ་དང་བསྟུན། རྒྱ་གཞུང་གི་ལོ་གཅིག་གི་ལས་དོན་དང་བོད་རང་སྐྱོང་ལྗོངས་མི་དམངས་ཁྲིམས་ཁང་གི་ལས་བསྡོམས་ཁག་འགོད་འབུལ་ཞུས་འདུག་པ་དང་། རྒྱ་ནག་མི་དམངས་འཐུས་མི་ཚོགས་ཆེན་ཐོག་སྙན་སྒྲོན་ཞུས་པའི་བོད་རང་སྐྱོང་ལྗོངས་མི་དམངས་ཁྲིམས་ཁང་གི་ ༢༠༡༨ ལོའི་ལས་བསྡོམས་ནང་རྒྱ་གཞུང་གིས་མི་རིགས་དང་ཆོས་དད་ཀྱི་མིང་འཁྱེར་བའི་ཐོག་ནས་གྲངས་ཉུང་མི་རིགས་དང་ཆོས་ལུགས་ཀྱི་ཚོགས་སྡེ་དབར་དབྱེ་འབྱེད་བྱ་ཐབས་དང་ཁ་བྲལ་རིང་ལུགས་པར་ངན་སྐུལ་དང་རོགས་འདེགས། དེ་བཞིན་རྒྱལ་ཁབ་ཀྱི་བདེ་འཇགས་ལ་གནོད་འཚེ་བཟོ་ལུགས་བཅས་ཀྱི་གྱོད་གཞི་འདྲ་མིན་འོག་ཁྱོན་བོད་མི་ ༥༨ ལྷག་ལ་ཁྲིམས་ཐག་བཅད་ཡོད་པ་ལས་བོད་མི་ ༢༥ ལ་ཁ་བྲལ་བའི་ཉེས་མིང་འོག་ཁྲིམས་ཆད་བཏང་ཡོད་པ་གསལ་འདུགབཞུགས་སྒར་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་ཚེ་རིང་མཚོ་མོ་ལགས་སུ་བཅར་འདྲི་ཞུས་པར་རྒྱ་གཞུང་གིས་ད་བར་འཛིན་བཟུང་བཙོན་འཇུག་བྱས་པའི་བོད་མི་རྣམས་དོན་དངོས་རང་ཉིད་ཀྱི་གཞི་རྩའི་འགྲོ་བ་མིའི་ཐོབ་ཐང་སྲུང་སྐྱོབ་གནང་བ་མ་གཏོགས་ཁྲིམས་འགལ་གྱི་ལས་དོན་གང་ཡང་སྤེལ་མེད་པར་ནན་བརྗོད་དང་སྦྲགས། སྲིད་འཛིན་ཞི་ཅིན་ཕིང་གིས་འགོ་ཁྲིད་འོག་བོད་ནང་སྤེལ་བཞིན་པའི་ནག་ཚོགས་ལ་རྡུང་རྡེག་དྲག་པོ་གཏང་རྒྱུའི་ལས་གཞི་དེ་བོད་ཀྱི་སྐད་ཡིག་དང་ཁོར་ཡུག་སྲུང་སྐྱོབ་བཅས་ཀྱི་ཞི་བའི་ལས་འགུལ་དག་ཁྲིམས་འགལ་ལ་ངོས་འཛིན་ནས་ཁ་བྲལ་བའི་ལས་འགུལ་སྤེལ་བཞིན་ཡོད་པ་བརྗོད་ཐབས་བྱས་པར་སྐྱོན་བརྗོད་གནང་ཡོད། གཞན་ཡང་ཨོ་སི་ཊོ་ལི་ཡ་སྐུ་ཚབ་དོན་ཁང་གི་རྒྱ་རིགས་འབྲེལ་མཐུད་པ་སྤྱི་ཟུར་འབའ་བ་སྐལ་བཟང་རྒྱལ་མཚན་ལགས་ཀྱིས་རྒྱ་ནག་མི་དམངས་འཐུས་མི་ཚོགས་ཆེན་ཐོག་སྙན་སྒྲོན་ཞུས་པའི་བོད་རང་སྐྱོང་ལྗོངས་མི་དམངས་ཁྲིམས་ཁང་གི་ལས་བསྡོམས་ལ་གཞིགས་ཚེ་རྒྱ་གཞུང་གིས་སྔ་ལོ་ ༢༠༡༨ ནང་གྱོད་གཞི་མི་འདྲ་བ་ ༣༠ ཙམ་ལ་རྟོག་ཞིབ་ཀྱིས་ཁྲིམས་ཐག་བཅད་ཡོད་པ་ནི་དེ་སྔའི་ལོ་དང་བསྡུར་ན་བརྒྱ་ཆ་ ༣༠ མང་དུ་ཕྱིན་ཡོད་པ་དང་། ཆབ་སྲིད་རང་གི་ཐོག་ཏུ་མི་མང་པོ་གང་བྱུང་དུ་འཛིན་བཟུང་བཀག་ཉར་བྱས་ཡོད་པར་ནན་བརྗོད་གནང་བ་མ་ཟད། རྒྱ་གཞུང་ནས་མི་རིགས་ཁ་བྲལ་བར་ཁ་གཡར་ནས་བོད་མིར་མི་སྤྱོད་ལས་འདས་པའི་མནར་གཅོད་གཏོང་བཞིན་པ་མངོན་གསལ་ཆགས་ཡོད་པ་གསུངས་ཡོད།

བོད་ནང་ཡུལ་སྐོར་སྤྲོ་འཆམ་པ་བསྐྱོད་རྒྱུ་སྔར་ལས་སྟབས་བདེ་ཆགས་ཡོད་ཚུལ་གསལ་བསྒྲགས་སྤེལ་བ།

རྒྱ་གཞུང་གི་ CGTN གསར་འགྱུར་ལས་ཁང་གིས་གནས་ཚུལ་སྤེལ་བར་ཁ་སང་བོད་རང་སྐྱོང་ལྗོངས་ཀྱི་འགོ་གཙོ་ Qi Zhala ཡིས་རྒྱལ་ས་ལྷ་སར་རྒྱ་ནག་མི་དམངས་འཐུས་མི་ཚོགས་ཆེན་གྱི་གཞུང་འབྲེལ་ལས་དོན་སྙན་ཐོ་འགོད་འབུལ་ཐོག་རྒྱ་ནག་གཞུང་གིས་འདི་ལོ་བོད་ཁུལ་དུ་ཡུལ་སྐོར་སྤྲོ་འཆམ་པའི་གྲངས་འབོར་ས་ཡ་བཞི་བཅུ་ལྷག་བརྒལ་ཐུབ་པར་དམིགས་ཏེ། ཡུལ་སྐོར་སྤྲོ་འཆམ་པ་རྣམས་བོད་ནང་འགྲུལ་བསྐྱོད་སྟབས་བདེ་ཡོང་སླད་ཡུན་རིང་བསྒུག་མི་དགོས་པར་ཕྱིར་བསྐྱོད་ལག་འཁྱེར་བཟོ་རྒྱུའི་འཚང་སྙན་ཕུལ་ཟིན་རྗེས་ཉིན་གྲངས་བཅོ་ལྔ་ནང་ཚུད་ཕྱིར་བསྐྱོད་ལག་འཁྱེར་སྤྲད་རྒྱུ་ཡིན་ལུགས་ཡོངས་བསྒྲགས་བྱས་འདུག བོད་རང་སྐྱོང་ལྗོངས་ཡུལ་སྐོར་སྤྲོ་འཆམ་འཕེལ་རྒྱས་ལྷན་ཁང་གི་ལས་བྱེད་ Hong Wei ཡིས་སྔ་ལོ་ ༢༠༡༨ ལོར་བོད་ཁུལ་དུ་ཕྱི་རྒྱལ་གྱི་ཡུལ་སྐོར་སྤྲོ་འཆམ་འབུམ་གཉིས་ལྷག་འབྱོར་ཡོད་པ་དང་ལྷག་དོན་རྒྱ་གཞུང་ནས་འདས་པའི་ལོ་ཤས་རིང་བོད་ནང་ཡུལ་སྐོར་སྤྲོ་འཆམ་པ་བསྐྱོད་རྒྱུར་སྒོ་མོ་ཕྱེ་ཡོད་སྟབས་ཡུལ་སྐོར་བ་ཡོང་མཁན་ཇེ་མང་དུ་འགྲོ་བཞིན་ཡོད་སྐོར་བཤད་པ་མ་ཟད། རྒྱ་གཞུང་གིས་སྔ་ལོ་ནས་བོད་ནང་ཕྱིའི་རྒྱལ་ཁབ་ཁག་གི་ཡུལ་སྐོར་སྤྲོ་འཆམ་པ་བསྐྱོད་རྒྱུའི་འཚང་སྙན་འབུལ་ཕྱོགས་ཀྱི་བརྒྱུད་རིམ་རྣམས་སྟབས་བདེ་བཟོ་ཆེད་ཀྱི་འཆར་འགོད་སྒྲིག་བཞིན་ཡོད་ཚུལ་སོགས་བཤད་འདུག གནད་དོན་དེའི་ཐད་ཨོ་སི་ཊོ་ལི་ཡའི་སྐུ་ཚབ་དོན་ཁང་གི་རྒྱ་རིགས་འབྲེལ་མཐུད་པ་སྤྱི་ཟུར་འབའ་བ་སྐལ་བཟང་རྒྱལ་མཚན་ལགས་སུ་བཅར་འདྲི་ཞུས་པར་རྒྱ་གཞུང་ནས་ཕྱི་རྒྱལ་ཡུལ་སྐོར་སྤྲོ་འཆམ་པ་བོད་ནང་བསྐྱོད་རྒྱུར་སྟབས་བདེ་བཟོ་ཡོད་ལུགས་བཤད་པ་དེ་ནི་གཙོ་བོ་ཉེ་ཆར་ཨ་རིའི་གཞུང་གིས་བོད་ནང་འདྲ་མཉམ་ཐོག་འགྲུལ་བསྐྱོད་ཆོག་པའི་ཁྲིམས་འཆར་གཏན་འབེབས་གནང་བ་དེའི་ཤུགས་རྐྱེན་དུ་རྒྱ་གཞུང་གིས་རྒྱལ་སྤྱིའི་ཁྲོད་དུ་བོད་ནང་ཕྱིའི་རྒྱལ་ཁབ་ཁག་གི་ཡུལ་སྐོར་སྤྲོ་འཆམ་པ་བསྐྱོད་རྒྱུར་སྒོ་མ་ཕྱེ་ཡོད་ཚུལ་གྱི་ཕྱིའི་རྣམ་པ་བསྟན་པ་ཙམ་ལས་དོན་དངོས་ཐོག་དམ་བསྒྲགས་དང་དེ་འབྲེལ་བཀའ་ཁྲོལ་ཞུ་དགོས་སྐོར་སོགས་གསུངས་ཡོད།

བོད་རིགས་སློབ་ཕྲུག་རྣམས་ལ་བོད་ཀྱི་སྐད་ཡིག་ཐོག་སློབ་གཉེར་གནང་བར་དཀའ་ངལ་འཕྲད་བཞིན་པ།

རྒྱ་ནག་གི་ཧྲན་ཞི་ཞིང་ཆེན་ནང་ཡོད་པའི་བོད་ལྗོངས་མི་རིགས་སློབ་གྲྭ་ཆེན་མོ་ནི་བོད་རིགས་གཙོ་གྱུར་གྲངས་ཉུང་མི་རིགས་ཚོའི་ཆེད་དུ་གསར་འཛུགས་བྱས་པ་ཆེས་རྙིང་གྲས་ཀྱི་སློབ་ཆེན་ཞིག་ཡིན་པ་བརྗོད་ཀྱི་ཡོད་ནའང་། སློབ་ཆེན་དེར་བོད་ཀྱི་སྐད་ཡིག་བཀོལ་སྤྱོད་ཉུང་ལ་མི་རིགས་ཀྱི་ཐུན་མོང་མ་ཡིན་པའི་རིག་གནས་ཁག་ལ་སློབ་གཉེར་གནང་རྒྱུའི་བསླབ་གཞི་གཏན་འབེབས་མེད་པར་བརྟེན་བོད་རིགས་སློབ་ཕྲུག་ཚོར་བོད་ཀྱི་ཐུན་མིན་རིག་གནས་ཐོག་ཆེད་ལས་སློབ་གཉེར་གནང་ས་མེད་པའི་་ངལ་བ་ཕྲད་བཞིན་ཡོད་པ་རེད་འདུག ཨེ་ཤི་ཡ་རང་དབང་རླུང་འཕྲིན་ཁང་གི་དབྱིན་ཡིག་དྲྭ་རྒྱའི་ཐོག་གནས་ཚུལ་སྤེལ་བར་བོད་ལྗོངས་མི་རིགས་སློབ་གྲྭ་ཆེན་མོར་སློབ་ཕྲུག་ ༦༠༠༠ ལྷག་ཡོད་པ་ལས་སློབ་ཕྲུག་ཕྱེད་ཀ་ཙམ་བོད་རིགས་ཆགས་ཀྱི་ཡོད་ཀྱང་། སློབ་ཆེན་དེར་བོད་ཀྱི་སྐད་ཡིག་གཙོ་གྱུར་རིག་པའི་གནས་དག་གི་བསླབ་གཞི་མེད་པ་དང་བོད་ཡིག་གི་ཆེད་ལས་སློབ་གཉེར་གནང་ས་མེད་པ། དེ་བཞིན་རང་མི་རིགས་ཀྱི་ཐུན་མོང་མ་ཡིན་པའི་རིག་གནས་ལས་གསོ་བ་རིག་པ་གཙོས་ཆེད་ལས་སློབ་ཚན་ཁག་ ༡༡ ཡོད་ནའང་། བསླབ་གཞི་ཡོད་ཚད་རྒྱ་ཡིག་མ་གཏོགས་བོད་ཡིག་ནང་མཐོང་རྒྱུ་མེད་སྟབས་བོད་རིགས་སློབ་གཉེར་བ་རྣམས་ལ་ངལ་བ་ཆེན་པོ་འཕྲད་བཞིན་ཡོད་པ་དང་། ལྷག་པར་དུ་སློབ་ཆེན་དེའི་ནང་ད་ལྟའི་ཆར་བོད་ཡིག་འཛིན་གྲྭ་གཅིག་ལས་མེད་པ་མ་ཟད། བོད་ཡིག་ཐོག་ཆེད་ལས་སློབ་གཉེར་གནང་སླད་སློབ་མ་གཅིག་མ་གཏོགས་སློབ་ཡོན་སྤྲད་ཀྱི་མེད་པ་རེད་འདུག རྩ་བའི་སློབ་གྲྭ་ཆེན་མོ་དེ་ཕྱི་ལོ་ ༡༩༥༨ ལོར་བོད་རིགས་གཙོ་བོར་གྱུར་པའི་གྲངས་ཉུང་མི་རིགས་ཀྱི་ཆེད་དུ་ཆེད་འཛུགས་བྱས་པ་དང་། ཐོག་མར་བོད་ལྗོངས་མང་ཚོགས་སློབ་གྲྭ་ཞེས་མིང་བཏགས་ཡོད་ནའང་ཕྱི་ལོ་ ༡༩༦༨ ལོར་བོད་ལྗོངས་མི་རིགས་སློབ་གྲྭ་ཆེན་མོ་ཞེས་མིང་བསྒྱུར་བྱས་ཡོད། སློབ་ཆེན་དེ་རྒྱ་ནག་གི་ཞིང་ཆེན་ནང་དུ་ཡོད་ནའང་བོད་རང་སྐྱོང་ལྗོངས་ཀྱི་ཁྱབ་ཁོངས་སུ་ངོས་འཛིན་བྱེད་བཞིན་ཡོད་པ་རེད།

Latest news