རྒྱ་ནག

རྒྱ་གཞུང་གིས་མཚོ་སྔོན་ཞིང་ཆེན་མགོ་ལོག་དགའ་བདེ་རྫོང་རྐྱང་ཆད་ནས་ཡིན་པའི་ལྐོག་ཟ་རུལ་སུངས་ཐེར་འདོན་གནང་མཁན་གྱི་བོད་མི་ལས་འགུལ་བ་ཨ་ཉ་སེང་སྒྲ་ལགས་སྤྱི་ཚོགས་དཀྲུག་པའི་ཉེས་འཛུགས་འོག་བཀག་བསྐྱིལ་བྱས་པ་དང་སྦྲགས། བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་ཁོང་གིས་ལྐོག་ཟ་རུལ་སུངས་ཐེར་འདོན་གནང་བ་དེ་ནག་ཉེས་མིན་པས་ཁོང་དེ་འཕྲལ་མར་གློད་བཀྲོལ་དགོས་པ་གསུངས་སོང་། ཁ་སང་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་ནས་འདོན་སྤེལ་གནང་བའི་སྙན་ཐོའི་ནང་འདི་ལོའི་ཟླ་ ༩ ཚེས ༤ ཉིན་དགའ་བདེ་རྫོང་སྤྱི་བདེ་མི་སྣས་ཁོང་སྤྱི་ཚོགས་དཀྲུག་རྐྱེན་བཟོས་པའི་ཉེས་འཛུགས་འོག་འཛིན་བཟུང་གྱིས་ཟི་ལིང་བརྒྱུད་གྲོ་ཚང་གི་ལྟ་སྲུང་ཁང་དུ་བཀག་ཉར་བྱས་ཡོད་པ་དང་། འདི་ལོའི་ཟླ་ ༡༡ ཚེས་ ༡༢ ནང་སྤེལ་བའི་སྤྱི་བདེ་ལས་ཁུངས་ཀྱི་གསལ་བསྒྲགས་ཐོག་ཨ་ཉ་སེང་སྒྲ་ལགས་ནས་སྤྱི་ཚོགས་དཀྲུག་པའི་གྱོད་དོན་དང་། ཉེས་ཅན་གཞན་ཡང་ཡོད་སྲིད་པའི་དོགས་གཞི་ལ་བརྟེན་ནས་བཀག་ཉར་གྱི་དུས་ཡུན་ཕྱི་ལོ་ ༢༠༡༩ ཟླ་ ༡ ཚེས ༡༢ བར་ཕྱིར་འགྱངས་བྱས་ཡོད་པ་བཀོད་འདུག གཞི་རྩའི་ལོ་ན་ ༤༧ ལ་སོན་པའི་ཨ་ཉ་སེང་སྒྲ་ལགས་ནས་སྔ་ལོ་ཕྱི་ལོ་ ༢༠༡༤ ལོར་ཁོང་དང་ལྷན་དུ་མི་བཅུ་གཙོ་གྱུར་ས་གནས་སྲིད་གཞུང་ལ་ལྐོག་ཟ་རུལ་སུངས་ཐེར་འདོན་དང་། མང་ཚོགས་དབུལ་ཕོངས་ཀྱི་དཀའ་སྡུག་གི་གནས་སྟངས་བཅས་གནད་དོན་ ༧ ལྷག་ཡོད་པའི་ཞུ་སྙན་ཞིག་ཕུལ་བ་དང་། དེའི་ནང་འབྲོག་མིའི་སྡོད་ཁང་འཛུགས་སྐྲུན་གྱི་རོགས་དངུལ་ཆད་པ་དང་། རྐྱང་ཆད་ཁུལ་དུ་འབྲོག་མི་གནས་སྤོས་ཟིན་པ་ཚོར་ཁང་པ་མེད་པའི་རྒྱུ་མཚན། འབྲོག་མིའི་སྡོད་ཁང་འཛུགས་སྐྲུན་གྱི་དངུལ་ཆད་པའི་གནད་དོན། རྫོང་འགྲིམ་གྲུལ་ལས་ཁུངས་ཀྱིས་རྐྱང་ཆའི་ཡུལ་མཚོའི་རུ་ཆེན་གོང་འོག་བར་གསུམ་སོགས་སུ་ཟམ་པ་འཛུགས་སྐྲུན་བྱས་ཡོད་མེད་ཀྱི་གནད་དོན་ཁག་ཆེད་བཀོད་གནང་ཡོད་པ་རེད། ཁོང་གི་ཁྲིམས་རྩོད་པ་ལིན་ཆི་ལེ་དང་བཟའ་ཟླ་དབྱངས་སྐྱིད་གཉིས་བཙོན་འཇུག་ཁང་དུ་ཐུག་འཕྲད་དུ་བཅར་ཀྱང་ས་གནས་སྤྱི་བདེ་མི་སྣས་ཐུག་འཕྲད་གནང་མ་བཅུག་པ་དང་།  ཟླ་ ༩ ཚེས་ ༢༢ ཉིན་དགའ་བདེ་རྫོང་སྤྱི་བདེ་ལས་ཁུངས་ཀྱི་ཆོག་མཆན་བརྒྱུད་ཁྲིམས་རྩོད་པ་ཨ་ཉ་སེང་སྒྲ་ལགས་དང་ཐུག་བཅུག་པ་དང་། སྐབས་དེར་སྤྱི་བདེ་མི་སྣས་ཁོང་ས་བབ་མཐོ་ས་ནས་དམའ་སར་བཀག་ཉར་བྱས་རྐྱེན་ས་ཆུ་མ་འཕྲོད་པས་གྲོད་ཁོག་ཤལ་ནས་ལུས་སྟོབས་ཧ་ཅང་ཞན་པོ་ཆགས་ཡོད་པ་རེད་འདུག བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་ཚེ་རིང་མཆོ་མོ་ལགས་ཀྱིས་ཨ་ཉ་སེང་སྒྲ་ལགས་ནས་ས་གནས་སྲིད་གཞུང་གི་དབང་ཆ་ལོག་སྤྱོད་དང་ལྐོག་ཟ་རུལ་སུངས་ཐེར་འདོན་གནང་བ་དེ་ཁྲིམས་འགལ་ཡིན་ལུགས་ཀྱི་ནག་ཉེས་བཙུགས་པ་དེས་རྒྱ་གཞུང་གིས་ལྐོག་ཟ་རུལ་སུངས་གཙང་སེལ་གྱི་ལས་འགུལ་དེ་སྟོང་བཤད་ཡིན་པ་གསལ་སྟོན་གནང་སྐོར་གསུངས་ཡོད། འདི་ག་རླུང་འཕྲིན་ཁང་ནས་ལྟེ་གནས་ཁང་གི་ཉམས་ཞིབ་པ་པདྨ་རྒྱལ་ལགས་སུ་དེ་འབྲེལ་བཅར་འདྲི་ཞུས་པར་ཨ་ཉ་སེང་སྒྲ་ལགས་ཀྱིས་མི་མང་གི་བདེ་འཇགས་ལ་གཞིགས་ནས་ལྐོག་ཟ་རུལ་སུངས་ཐེར་འདོན་གནང་བ་དེ་ནག་ཉེས་མིན་པས་འཕྲལ་མར་གློད་བཀྲོལ་དགོས་པ་སོགས་གསུངས་སོང་།

Google ཚོང་ལས་ཁང་གི་ལས་བྱེད་ནང་ཁུལ་དང་བོད་མི། ཡུ་གུར་བ་གཙོ་གྱུར་འགྲོ་བ་མིའི་ཐོབ་ཐང་ཚོགས་པ་ཁག་གིས་གནོན་ཤུགས་དུ་མ་སྤྲོད་བཞིན་པའི་ཁྲོད་ཚོང་ལས་ཁང་དེའི་ངོས་ནས་ Dragonfly ཞེས་རྒྱ་ནག་དང་ལྷན་གསང་བའི་འཚོལ་བྱེད་མ་ལག་གསར་བཟོ་བྱེད་བཞིན་པའི་ལས་གཞི་དེ་རེ་ཞིག་མཚམས་འཇོག་བྱས་འདུག དེ་ཡང་ཁ་སང་ The Intercept བརྒྱུད་ལམ་གྱིས་སྙན་མཐོ་ཞིག་འདོན་སྤེལ་གནང་བའི་ནང་མིང་གསལ་མེད་པའི་གནས་ཚུལ་ཡོང་ཁུངས་གཉིས་ཀྱིས་བརྗོད་པ་ལུང་འདྲེན་དང་འབྲེལ། ཚོང་ལས་ཁང་དེའི་འགོ་གཙོ་རྣམས་ནས་ལས་གཞི་དེ་གནས་སྐབས་རིང་མཚམས་འཇོག་བྱས་ཡོད་ཚོད་དང། ལས་གཞི་དེའི་ཐོག་ཕྱག་ལས་གནང་མཁན་གྱི་ཆེད་ལས་པ་རྣམས་ཨུ་རུ་སུ་དང་བྷར་སིལ། ཨིན་ཌོ་ནེ་ཤ་ཡ་སོགས་རྒྱལ་ཁབ་གཞན་ཁག་གཅིག་དང་འབྲེལ་བའི་ལས་གཞི་གཞན་ནང་གནས་སྤོས་བྱས་འདུག ཉེ་ཆར་ཟླ་ ༡༢ ཚེས་ ༡༡ ཉིན་ཨ་རིའི་རྒྱལ་ས་ Washington DC ནང་རྟེན་གཞི་བྱས་པའི་ཨ་རིའི་གྲོས་ཚོགས་འོག་མའི་ཁྲིམས་ཞིབ་ཚོགས་ཆུང་གི་ཉན་ཞིབ་ལས་རིམ་ཐོག་ Google ཚོང་ལས་ཁང་གི་གཙོ་འཛིན་ Sundar Pichai ལགས་ཀྱིས་རྒྱ་གཞུང་གི་དགོས་མཁོ་དང་མཚུངས་པའི་བཀག་སྡོམ་ཅན་གྱི་འཚོལ་བཤེར་མ་ལག་གི་ལས་གཞི་དེ་ལག་བསྟར་བྱ་རྒྱུའི་འཆར་གཞི་མེད་པ་དང། གལ་ཏེ་དེ་འབྲེལ་གནད་དོན་བྱུང་ཚེ་ཚོང་ལས་ཁང་གི་ངོས་ནས་ལམ་སྟོན་སློབ་གསོ་རྒྱ་གང་ཆེ་ཞུས་པ་དང་འབྲེལ་ཕྱི་གསལ་ནང་གསལ་གནང་རྒྱུ་ཡིན་སྐོར་གསུངས་ཡོད། འོན་ཀྱང་ཁོང་གིས་དེ་སྔོན་ཕྱི་ཟླ་ ༡༠ པའི་ནང་ལས་གཞི་དེ་ཕྱི་ལོ་ ༢༠༡༩ ལོ་སྟོད་དུ་ལག་བསྟར་བྱ་རྒྱུ་ཡིན་སྐོར་འགྲེལ་བརྗོད་བྱས་ཡོད་པ་རེད།གཞི་རྩའི་ Google ཚོང་ལས་ཁང་ནས་འདི་ལོའི་ཟླ་ ༧ ནང་རྒྱ་ནག་གཞུང་དང་མཉམ་འབྲེལ་གྱིས་དྲུག་བཞིའི་དོན་རྐྱེན་དང་རང་དབང། མང་གཙོ་སོགས་གཞུང་གི་འདོད་བློ་དང་མི་མཐུན་པའི་བརྡ་ཆད་མང་པོ་ཞིག་བཀག་སྡོམ་བྱས་པའི་འཚོལ་བཤེར་མ་ལག་ཅིག་གསང་བའི་ཐོག་བཟོ་སྐྲུན་བྱས་པའི་གནས་ཚུལ་ཕྱིར་གྱར་བྱུང་རྗེས་འདི་ལོའི་ཟླ་ ༨ ནང་གྷོ་གྷལ་གྱི་ལས་བྱེད་ ༡༤༠༠ ཙམ་གྱིས་ཡིག་ཐོག་སྙན་ཞུ་བྲིས་སྟེ་ངོ་རྒོལ་བྱས་པ་མ་ཟད། གནད་དོན་དེ་དང་འབྲེལ་ཟླ་ ༡༢ ཚེས་ ༡༡ ཉིན་ཨ་རིའི་གྲོས་ཚོགས་འོག་མའི་ཁྲིམས་ཞིབ་ཚོགས་ཆུང་གི་ཉན་ཞིབ་ལས་རིམ་ཐོག Google ཚོང་ལས་ཁང་གི་གཙོ་འཛིན་ Sundar Pichai ལགས་ཆེད་བཅར་ཞུ་སྐབས་བོད་རང་བཙན་སློབ་ཕྲུག་ཚོགས་པའི་འཐུས་མི་དང་དང་ཡུ་གུར་ལས་འགུལ་བ་གཙོ་གྱུར་འགྲོ་བ་མིའི་ཐོབ་ཐང་ལྟ་ཞིབ་ཚོགས་པ་ཁག་གཅིག་ནས་ངོ་རྒོལ་ལས་འགུལ་སྤེལ་ཡོད་པ་རེད།

རྒྱག་ནག་གི་གསར་ཁང་ Ecns.cn ཞེས་པས་རྒྱ་ནག་ནང་གི་དམིགས་བསལ་གྱི་སྐོར་སྲུང་དམག་མིས་བོད་ལྷོ་ནུབ་ཁུལ་དུ་འཇིགས་སྐུལ་འགོག་རྒོལ་གྱི་དམག་སྦྱོང་བྱེད་བཞིན་ཡོད་པ་རེད་འདུག ཟླ་ ༡༢ ཚེས་ ༡༥ ཉིན་ནས་བཟུང་དམག་སྦྱོང་དེ་དངོས་སུ་འགོ་ཚུགས་ཡོད་པ་དང་། ཐེངས་འདིའི་དམག་སྦྱོང་ནང་སྦྱོང་བརྡར་གྱི་ལས་རིམ་མི་འདྲ་བ་ཁག་ ༥༠ ལྷག་གཏན་ཁེལ་ཡོད་པ་དང་། བོད་ཀྱི་ས་ཁུལ་ཁག་ ༡༥ ལ་སྐོར་བསྐྱོད་བྱས་ནས་རྙོག་འཛིང་རང་བཞིན་གྱི་གནས་སྟངས་སྐབས་སུ་ཇི་ལྟར་མགྱོགས་མྱུར་ལྡན་པའི་ངང་ནས་ཕར་རྒོལ་བྱེད་དགོས་བའི་དམིགས་ཡུལ་གཙོར་བཟུང་བྱས་ཡོད་པ་བཀོད་འདུགརྩ་བའི་རྒྱ་ནག་གིས་བོད་ནང་གནས་ཚུལ་འདྲ་མིན་ཁ་ལ་ཁྱེར་ནས་དམག་སྦྱོང་རིགས་མང་དག་ཅིག་སྤེལ་བཞིན་ཡོད་པ་རེད། འདི་ལོའི་ཟླ་ ༧ ནང་དུའང་རྒྱ་ནག་གིས་བོད་རང་སྐྱོང་ལྗོངས་ཁུལ་དུ་དམག་སྦྱོང་གི་ལས་གཞི་འདྲ་མིན་ཞིག་སྤེལ་ཡོད་པ་དང་། སྐབས་དེར་ཆེད་མཁས་པ་དག་གིས་དེ་ནི་རྒྱ་ནག་གི་མཐའ་མཚམས་སྲུང་སྐྱོབ་ལ་དམིགས་པ་ཞིག་ཡིན་པར་འགྲེལ་བརྗོད་བྱས་ཡོད། འོན་ཀྱང་རྒྱ་ནག་གིས་དམག་སྦྱོང་སྤྲད་པ་དེས་ས་གནས་ཀྱི་བོད་རིགས་ཚོར་འཇིགས་སྐུལ་གྱི་རྣམ་པའི་ཐོག་ནས་ཉེན་བརྡ་སྤྲོད་བཞིན་པ་ཞིག་ཆགས་ཡོད་པ་རེད།

བོད་ཀྱི་རྒྱལ་ས་ལྷ་ས་ནང་དེང་སྐབས་བོད་རིགས་ཧ་ཅང་གྲངས་ཉུང་འགྱུར་བཞིན་ཡོད་པ་མ་ཟད་བོད་རིགས་རླངས་འཁོར་ལས་རྒྱ་རིགས་རླངས་འཁོར་ལྡབ་ལྔ་ལྷག་མང་བ་ཆགས་འདུག བོད་རིགས་རླངས་འཁོར་གཏོང་མཁན་དེ་དག་ལ་འགྲིམ་འགྲུལ་གྱི་ནོར་འཁྲུལ་ཕྲན་བུ་ཙམ་ཤོར་ཚེ་རྒྱ་སྒོར་ ༢༠༠ ནས་ ༣༠༠ བར་གྱི་ཉེས་ཆད་བཏང་བ་དང་། ལག་འཁྱེར་ནས་སྐར་གྲངས་གཅོག་པ་མ་ཟད། དེ་འབྲེལ་སློབ་གཉེར་བྱེད་པར་འགྲོ་དགོས་པ་སོགས་ཀྱི་ཉེས་ཆད་འདྲ་མིན་གཏོང་བཞིན་ཡོད་ཀྱང་རྒྱ་རིགས་རླངས་འཁོར་གཏོང་མཁན་ལ་དམིགས་བསལ་ཡོད་པ་རེད་འདུག རྒྱ་རིགས་རླངས་འཁོར་གྱི་ཨང་གྲངས་ཚང་མ་རྒྱ་ནག་ནང་ཁུལ་ནས་བཟོས་པ་ཤ་སྟག་ཡིན་སྟབས་ཁོང་ཚོར་ཆད་པ་ཕོག་གི་མེད་པ་རེད་འདུག དེང་སྐབས་བོད་ནང་སྔར་ལྷག་དམ་དྲག་ཇེ་ཆེར་འགྲོ་བཞིན་ཡོད་པ་མ་ཟད་སྔ་ལམ་ཡོད་ཚད་ལ་དམག་གི་རླངས་འཁོར་དང་དམག་མི་རུ་སྒྲིག་གིས་མང་ཚོགས་ལ་འཇིགས་སྐུལ་དཔུང་ངོམས་བྱེད་བཞིན་ཡོད་པ་མ་ཟད། འདི་གར་གནས་ཚུལ་མཁོ་སྤྲོད་གནང་མཁན་ཁོང་རང་ཉིད་ལའང་རྒྱ་གཞུང་གིས་དོགས་པའི་འོག་ལྟ་སྲུང་བྱེད་མུས་ཡིན་སྟབས་གནས་ཚུལ་མང་པོ་ངོ་སྤྲོད་གནང་ཐབས་མི་འདུག་ཅེས་འགྲེལ་བརྗོད་གནང་སོང་།

རྔ་པ་ཀིརྟི་དགོན་གྱི་གྲྭ་གཞོན་སངས་རྒྱས་རྒྱ་མཚོ་ལགས་ཀྱིས་རྒྱ་གཞུང་གི་དྲག་སྤྱོད་ལ་ངོ་རྒོལ་གྱིས་སྲང་ལམ་དུ་ཞི་བའི་སྐད་འབོད་གནང་བར་བརྟེན་རྒྱ་གཞུང་གིས་ཁོང་འཕྲལ་མར་འཛིན་བཟུང་བྱས་འདུག ཀིརྟི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་གྲྭ་བློ་བཟང་ཡེ་ཤེས་ལགས་དང་གྲྭ་ཀ་ཉག་ཚེ་རིང་ལགས་རྣམ་གཉིས་ཀྱིས་དེ་རིང་འདིར་གནང་བའི་གནས་ཚུལ་ལྟར་ན། ཁ་སང་བོད་ནང་གྲྭ་གཞོན་སངས་རྒྱས་རྒྱ་མཚོ་ལགས་ཀྱིས་རང་བསྲེགས་གནང་ཡོད་པའི་གནས་ཚུལ་ཞིག་ཁྱབ་སྤེལ་གནང་བཞིན་ཡོད་ཀྱང་། ཁོང་གིས་རང་བསྲེགས་གནང་བ་མིན་པར་ཞི་བའི་སྐད་འབོད་གནང་རྐྱེན་རྒྱ་གཞུང་གིས་བཙན་ཁྲིད་བྱས་ཡོད་པ་གསུངས་སོང་། འདི་རླུང་འཕྲིན་ཁང་གིས་གྲྭ་ཀ་ཉག་ཚེ་རིང་ལགས་སུ་གྲྭ་སངས་རྒྱ་མཚོ་ལགས་ཀྱི་གནད་དོན་དང་འབྲེལ་བཅའ་འདྲི་ཞུས་པར་ཁོང་གིས་ཕྱི་ལོ་ ༢༠༡༨ ཟླ་ ༡༢ ཚེས་ ༡༠ ཉིན་ཨ་མདོ་རྔ་པ་ཀིརྟི་དགོན་གྱི་གྲྭ་གཞོན་སངས་རྒྱས་རྒྱ་མཚོ་ལགས་ཀྱིས་རྔ་པའི་རྫོང་མཁར་གྱི་གཞུང་ལམ་དུ་བོད་ལ་རང་དབང་དགོས་པའི་སྐད་འབོད་གནང་བཞིན་གོམ་བགྲོད་གནང་སྟབས་དེ་མ་ཐག་ཏུ་རྒྱ་གཞུང་གི་ཉེན་རྟོག་མི་སྣ་སོགས་ཀྱིས་མི་མང་གི་མཐོང་སར་ཁོང་ལ་གཅར་རྡུང་གཏོང་བཞིན་བཙན་ཁྲིད་བྱས་ཡོད་ཀྱང་། ད་ཏཱི་ཆར་ཁོང་གང་དུ་བཀག་བསྐྱིལ་བྱས་ཡོད་མེད་སོགས་ཞིབ་ཕྲའི་གནས་སྟངས་གང་ཡང་ཤེས་རྟོགས་ཐུབ་མེད་པ་རེད་འདུག གྲྭ་སངས་རྒྱས་རྒྱ་མཚོ་ལགས་ནི་དགུང་ལོ་ ༡༧ ཡིན་ཞིང་ཕ་ཡུལ་ཆོས་རྗེ་མ་ཡུལ་ཚོ་སོ་རུ་མ་སྡེ་བ་ནས་ཡིན་པ་དང་། ཆུང་ཆུང་སྐབས་ནས་རྔ་པ་ཀིརྟི་དགོན་པར་ཆོས་ཞུགས་གནང་བ་མ་ཟད་དེང་སྐབས་སྔོན་འགྲོའི་འཛིན་གྲྭ་དགུ་པ་རེད་འདུག ཕ་མིང་ལ་རྗེས་དཀར་བཟོད་པ་དང་མ་མིང་ལ་དབང་ཁོ་ཡིན་པར་འགྲེལ་བརྗོད་གནང་ཡོད། གྲྭ་སངས་རྒྱས་རྒྱ་མཚོ་ལགས་ཀྱི་ཞི་རྒོལ་གྱི་གནས་ཚུལ་ཙམ་མ་ཡིན་པར་ཨ་མདོ་རྔ་པའི་ནང་གནས་ཚུལ་གཞན་པ་རེ་བྱུང་ཡོད་ཚུལ་འདུག་ཀྱང་། ད་ལྟའི་ཆར་རྒྱ་གཞུང་གི་དྲག་གནོན་རྐྱེན་པས་ཇི་བཞིན་གསལ་རྟོགས་གནང་ཐབས་མི་འདུག་ཅེས་འཁོད་འདུག རྩ་བའི་འདི་ག་རླུང་འཕྲིན་ཁང་ལ་ཁ་སང་གནས་ཚུལ་ཡོང་ཁུངས་ཤིག་གིས་བོད་རྔ་པའི་ནང་ཉིན་ཤས་གོང་དུ་དགེ་འདུན་རྒྱ་མཚོ་ལགས་དང་ཆོས་ཀྱི་རྒྱ་མཚོ་ལགས་གཉིས་ཀྱིས་རང་ལུས་མེར་བསྲེགས་གནང་ཡོད་སྐོར་འགྲེལ་བརྗོད་གནང་བ་མ་ཟད། བརྒྱུད་ལམ་གཞན་ཁག་གཅིག་ཏུའང་གནས་ཚུལ་དེ་ལྟར་ཕྱིར་བསྒྲགས་བྱས་ཡོད་ཀྱང་། ཆོས་ཀྱི་རྒྱ་མཚོ་ལགས་ནི་ཉེ་སྔོན་ཟླ་བ་འདིའི་ཟླ་སྟོད་དུ་རང་ལུས་མེར་བསྲེགས་གནང་བའི་སྐྱ་བོ་འབྲུག་ཁོ་ལགས་ཀྱི་ཆོས་མིང་ཡིན་སྟབས་མི་གཅིག་ཡིན་པར་འཁྲུལ་ཡོད་པ་རེད་འདུག  

ཉེ་སྔོན་ཨ་རིའི་གྲོས་ཚོགས་གོང་འོག་གཉིས་ནས་བོད་ནང་འདྲ་མཉམ་ཐོག་འགྲུལ་བསྐྱོད་ཆོག་པའི་ཁྲིམས་འཆར་དེ་སྤྱི་མོས་ཀྱིས་གཏན་འབེབས་གནང་བ་དང་འབྲེལ། རྒྱ་གཞུང་གིས་ཨ་རིའི་སྲིད་འཛིན་མཆོག་ལ་ཁྲིམས་འཆར་དེའི་ཐོག་རྒྱབ་སྐྱོར་གྱི་མཚན་རྟགས་བསྐྱོན་རྒྱུ་མེད་པའི་འབོད་སྐུལ་ཞུས་འདུག ཁ་སང་རྒྱ་ནག་གི་ Xinhua གསར་ཁང་གིས་གནས་ཚུལ་སྤེལ་བར་ཁ་སང་ཚེས་ ༡༤ ཉིན་རྒྱ་ནག་གི་ཕྱི་སྲིད་ལས་ཁུངས་ཀྱི་མགྲིན་ཚབ་པ་ LuKang ཡིས་འཆར་ཅན་གྱི་གསར་འགོད་ལྷན་ཚོགས་ཐོག་ཁྲིམས་འཆར་དེ་དངོས་ཡོད་གནས་སྟངས་དང་མ་འཚམས་པ་མ་ཟད། རྒྱ་ནག་ནང་སྲིད་ཀྱི་གནད་དོན་ལ་ཐེ་བྱུས་དང་རྒྱལ་སྤྱིའི་འབྲེལ་ལམ་གྱི་སྒྲོམ་གཞི་དང་མི་མཐུན་པ་ཞིག་ཡིན་སྟབས། རྒྱ་གཞུང་ནས་བོད་ནང་རང་དབང་འདྲ་མཉམ་འགྲུལ་བཞུད་ཆོག་པའི་ཁྲིམས་འཆར་དེར་མཐའ་གཅིག་ཏུ་ངོ་རྒོལ་ཡོད་པ་ལྟར་ཨ་རིའི་འབྲེལ་ཡོད་ཚོར་བརྡ་ལན་ཁ་གསལ་ཞིག་སྤྲད་ཡོད་པར་བརྗོད་འདུགལྷག་པར་དུ་ LuKang ཡིས་བོད་དང་འབྲེལ་བའི་གནད་དོན་རྣམས་ཐད་ཀར་རྒྱ་ནག་རྒྱལ་ནང་གི་གནད་དོན་དང་འབྲེལ་བ་ཆགས་ཀྱི་ཡོད་སྟབས། དེའི་ཐད་རྒྱལ་ཁབ་སུ་གང་ལའང་ཐེ་བྱུས་བྱ་རྒྱུའི་དབང་ཆ་མེད་པའི་ཉེན་བརྡ་བཏང་བ་མ་ཟད། ཁྲིམས་འཆར་དེ་བརྒྱུད་ནས་རྒྱ་གཞུང་ལ་གཞི་མེད་སྐྱོན་འཛུགས་བྱས་པ་ནི་རྒྱ་ནག་གཞུང་མང་གཉིས་ཀས་ཁས་ལེན་བྱ་ཐབས་བྲལ་སྐོར་བཤད་འདུག དེ་བཞིན་ལུ་ཁང་གིས་ཕྱི་ལོ་ ༢༠༡༥ ལོ་ནས་བཟུང་ད་བར་བོད་ནང་ཨ་རིའི་ཆབ་སྲིད་མི་སྣས་གཙོས་པའི་ཨ་རིའི་མི་སེར་དང་ཕྱི་རྒྱལ་མི་རིགས་བཞི་ཁྲི་ཙམ་ལྟ་སྐོར་དུ་སླེབས་ཡོད་པ་ནི་དངོས་ཡོད་གནས་སྟངས་ཡིན་པ་དང་། ལྷག་དོན་ཕྱི་རྒྱལ་མི་རིགས་རྣམས་ནས་བོད་རང་སྐྱོང་ལྗོངས་ཁུལ་དུ་འགྲོ་རྒྱུའི་འདུན་པ་ཡོད་ཚེ་རྒྱུན་ལྡན་གྱི་ལམ་སྲོལ་ཐོག་ནས་ཆོག་མཆན་ཞུས་ན་འགྲིག་གི་ཡོད་པ་རེད། ཨ་རིའི་གཞུང་ལ་རྒྱལ་ཁབ་གཉིས་ཀྱི་འབྲེལ་བར་དོ་ཕོག་མི་འགྲོ་བའི་སླད་གོང་གི་ཁྲིམས་འཆར་དེ་དངོས་སུ་ཁྲིམས་ལ་གཏན་འབེབས་གནང་རྒྱུ་མེད་པར་འབོད་སྐུལ་ནན་པོ་ཞུས་འདུག ད་ལན་ཨ་མི་རི་ཀའི་གྲོས་ཚོགས་གོང་འོག་གཉིས་ནས་བོད་ནང་ཕར་འགྲོ་ཚུར་འོང་གི་ཁྲིམས་འཆར་དེར་འགག་བྱ་གང་ཡང་མེད་པར་སྤྱི་མོས་ཀྱིས་གཏན་འབེབས་གནང་བར་རྒྱ་ནག་གཞུང་གིས་མི་འདོད་པའི་རྣམ་འགྱུར་སྟོན་ཐོག་ཨ་རིའི་གཞུང་ལ་སྐྱོན་བརྗོད་ཤུགས་ཆེ་བྱས་ཡོད་རེད། རྩ་བའི་ཟླ་ ༡༢ ཚེས་ ༡༡ ཉིན་ཨ་རིའི་གྲོས་ཚོགས་གོང་མའི་འཐུས་མི་ཚོས་སྤྱི་མོས་ཀྱིས་བོད་དུ་རང་དབང་ཐོག་འགྲུལ་བསྐྱོད་ཆོག་པའི་ཁྲིམས་འཆར་གཏན་འབེབས་གནང་ཡོད་པ་དང་། ད་ཆ་ཨ་རིའི་སྲིད་འཛིན་སྐུ་ཞབས་ཌོ་ནལ་ཊམ་མཆོག་ནས་ཁྲིམས་འཆར་དེར་མཚན་རྟགས་བསྐྱོན་བསྒྲུབས་ཚེ་དངོས་སུ་ཕྱག་བསྟར་གནང་ཆོག་གི་ཡོད་པ་རེད།

རྒྱ་གཞུང་གི་བོད་ལྗོངས་ཉིན་རེའི་ཚགས་པར་ཐོག་ཟླ་བ་འདིའི་ཚེས་ ༡༢ ནས་ ༡༤ བར་བཅས་ཉིན་གྲངས་གསུམ་བསྟུད་མར་ ༸གོང་ས་༸སྐྱབས་མགོན་ཆེན་པོ་མཆོག་ལ་ཏཱ་ལའི་བླ་མ་༸སྐུ་ཕྲེང་བཅུ་བཞི་པའི་ཆབ་སྲིད་ཐད་ཀྱི་ལོག་སྤྱོད་རང་བཞིན་གསལ་རྟོགས་མཐར་ཕྱིན་པ་བྱེད་དགོས་ཞེས་པའི་དཔྱད་རྩོམ་ཞིག་སྤེལ་ནས་ཆོས་ལུགས་དང་ཆབ་སྲིད། བྱེད་ཐབས་བཅས་ཀྱི་ཐོག་ནས་སླར་མཚན་སྨད་ཤུགས་ཆེ་ཞུས་འདུག དེའང་༸གོང་ས་མཆོག་ལ་མཚན་སྨད་ཞུས་པའི་དཔྱད་རྩོམ་དེའི་ནང་གཙོ་བོ་ཆོས་ལུགས་ཀྱི་ཆ་ནས་བཅོས་མའི་རང་བཞིན་དང་བྱེད་ཐབས་ཀྱི་ཆ་ནས་མགོ་སྐོར་རང་བཞིན། ཆབ་སྲིད་ཀྱི་ཆ་ནས་ངོ་ལོག་རང་བཞིན་བཅས་སྡེ་ཚན་གསུམ་དབྱེ་བའི་ཐོག་ནས་༸གོང་ས་༸སྐྱབས་མགོན་ཆེན་པོ་མཆོག་ལ་སྒྲོ་སྐུར་མཚན་སྨད་ཞུས་འདུག་པ་མ་ཟད། ༸གང་ཉིད་མཆོག་ནི་བོད་རང་བཙན་གྱི་ལྐོག་གཡོ་བྱེད་མཁན་ཁ་བྲལ་རིང་ལུགས་ཀྱི་ཆབ་སྲིད་ཤོག་ཁའི་འགོ་གཙོ་དང་རྒྱ་གཞུང་ལ་ངོ་རྒོལ་བྱེད་མཁན་རྒྱལ་སྤྱིའི་ཕྱོགས་གཏོགས་ཀྱི་ལག་ཆ་འཁྲུལ་མེད། དེ་བཞིན་བོད་དུ་སྤྱི་ཚོགས་ཟང་ཟིང་བཟོ་མཁན་སྤྱིའི་གཞི་རྩ་དང་བོད་བརྒྱུད་ནང་བསྟན་གྱི་རྒྱུན་གཏན་སྒྲིག་སྲོལ་འཛུགས་རྒྱུར་བཀག་འགོག་བྱེད་མཁན་གྱི་འགོག་རྐྱེན་ཆེ་ཤོས་ཡིན་པ་ཙམ་མ་ཟད། ཆོས་ལུགས་ཀྱི་ཕྱི་གོས་གྱོན་པའི་བོད་ཕུང་ཆོས་གནོད་ཀྱི་སྲིད་འཚོང་བ་རེད་ཅེས་བརྗོད་འདུག ལྷག་པར་དུ་ཏཱ་ལའི་བླ་མས་ད་བར་དབུ་མའི་ལམ་དང་ཚད་མཐོའི་རང་སྐྱོང་ཟེར་བ་དེ་བརྒྱུད་ནས་དོན་ངོ་མར་རང་བཙན་ཐོབ་ཐབས་བྱས་ཏེ་རྒྱ་གཞུང་གི་འགོ་ཁྲིད་དང་སྤྱི་ཚོགས་རིང་ལུགས་ཀྱི་ལམ་ལུགས། དེ་བཞིན་མི་རིགས་ས་ཁོངས་རང་སྐྱོང་ལམ་ལུགས་བཅས་ལ་ངོ་རྒོལ་བྱས་ཡོད་པ་མ་ཟད། བོད་དུ་བཀས་བཀོད་རྒྱུན་འཛིན་དང་གྲལ་རིམ་གྱི་དབང་སྒྱུར་གནས་བབ་སླར་གསོ་བྱེད་བཞིན་པ་སོགས་བརྗོད་ནས་མགོན་པོ་༸གང་ཉིད་མཆོག་ལ་མཚན་སྨད་མིའི་བསམ་སྤྱོད་ལས་འདས་པ་ཞུས་ཡོད་པ་རེད། རྒྱ་ནག་ཐོག་ཉམས་ཞིབ་གནང་མཁན་བོད་མིའི་སྒྲིག་འཛུགས་ཀྱི་རྒྱ་རིགས་འབྲེལ་མཐུད་པ་འབའ་བ་སྐལ་བཟང་རྒྱལ་མཚན་ལགས་ཀྱིས་ཉེ་བའི་ཆར་རྒྱ་གཞུང་དང་ནུབ་ཕྱོགས་ཀྱི་རང་དབང་མང་གཙོ་རྒྱལ་ཁབ་དབར་འགལ་ཟླ་ཤུགས་ཆེ་འབྱུང་བཞིན་པ་དང་ལྷག་དོན་རྒྱ་ནག་རྒྱལ་ནང་དུ་མི་རིགས་རིང་ལུགས་ཀྱི་གནད་དོན་དེའང་ཚ་ཚ་འུར་འུར་ངང་སློང་བཞིན་པའི་དུས་མཚམས་འདིར་རྒྱ་གཞུང་གིས་ད་རེས་སླར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གཞུང་ལ་ངོ་རྒོལ་གནང་མཁན་ནུབ་ཕྱོགས་ཕྱོགས་གཏོགས་ཀྱི་ལག་ཆ་འཁྲུལ་མེད་ཡིན་ཚུལ་བརྗོད་ནས་མཚན་སྨད་ཞུས་ཐབས་བྱེད་བཞིན་པ་དེ་ནི་གཙོ་བོ་༸གང་ཉིད་མཆོག་རྒྱ་རིགས་མང་ཚོགས་ཁྲོད་ནག་པོ་བཟོ་ཐབས་དང་རྒྱ་ནག་གི་འབྲེལ་ཡོད་དཔོན་རིགས་རྣམས་ནས་རང་ཉིད་ཀྱི་མ་འོངས་མདུན་ལམ་དང་གོ་གནས་བཅས་ཀྱི་སླད་ཡུལ་དེའི་ནང་མར་ཁེ་སི་རིང་ལུགས་ཀྱི་ལྟ་བའི་སློབ་གསོ་གཏིང་ཟབ་སྤེལ་ཕྱིར་ཡིན་པར་ནན་བརྗོད་དང་ཆབ་ཅིག ད་ཆ་ཞི་ཅིན་ཕིང་གིས་འགོ་ཁྲིད་པའི་རྒྱ་ནག་གཞུང་ནས་བོད་ཐོག་མཁྲེགས་འཛིན་དང་གཡོ་ཐལ་གྱི་ལངས་ཕྱོགས་སྔར་ལྷག་ཆེ་རུ་གཏང་རྒྱུའི་ཉེན་ཁ་ཆེན་པོ་ཆགས་སྐོར་གསུངས་སོང་། སྤྱིར་གནད་དོན་དེའི་ཐད་དེ་རིང་རྒྱལ་སྤྱིའི་བརྒྱུད་ལམ་ཁག་ཏུའང་། ད་རེས་རྒྱ་གཞུང་གིས་༸གོང་ས་མཆོག་ལ་སླར་ཡང་མཚན་སྨད་ཞུས་པའི་ཆེད་རྩོམ་སྤེལ་བ་དེ་ནི་ཡོང་ལ་ཉེ་བའི་བོད་མིའི་རང་དབང་སྒེར་ལངས་གསུམ་བཅུ་དུས་དྲན་དང་བསྟུན་ནས་བོད་ནང་གི་བོད་མི་ཚོར་ཉེན་བརྡ་གཏང་ཕྱིར་ཡིན་པར་འགྲེལ་བརྗོད་གནང་བཞིན་འདུག རྩ་བའི་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་གྱི་ Mumbai གྲོང་ཁྱེར་ནང་མཛད་འཕྲིན་སྐྱོང་བཞིན་པའི་ཁྲོད་ཁ་སང་གུ་རུ་ནཱ་ནཱཀ་མཐོ་སློབ་ཀྱི་ཚན་རིག་དང་སྒྱུ་རྩལ། ཚོང་འབྲེལ་ཚན་པའི་གསུང་བཤད་ལས་རིམ་ཐོག་དབུ་བཞུགས་མཛད་ནས་༸གང་ཉིད་མཆོག་གིས་མི་ལོ་ ༧༠ རྗེས་སུའང་བོད་ཀྱི་གནད་དོན་དེ་གསོན་པོར་གནས་ཡོད་པ་བཀའ་བསྩལ་བ་དང་སྦྲགས་ཏེ། དེ་སྔ་བོད་དེ་ལོ་རྒྱུས་ཀྱི་ཐོག་ནས་རང་བཙན་གཙང་མའི་རྒྱལ་ཁབ་ཡིན་པར་འདོད་ཀྱི་ཡོད་ཀྱང་ད་ཆ་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་སྒྲོམ་གཞིའི་འོག་ནས་བོད་མིར་མིང་དོན་མཚུངས་པའི་རང་སྲིད་རང་སྐྱོང་རྩོད་བཞིན་ཡོད་པར་བསྐྱར་ནན་མཛད་འདུག

རྒྱ་ནག་གི་རྒྱལ་སྲིད་སྤྱི་ཁྱབ་ཁང་གིས་འགྲོ་བ་མིའི་ཐོབ་ཐང་ཐད་ཀྱི་ཡིག་ཆ་དཀར་པོ་ཞིག་འདོན་སྤེལ་བྱས་ཏེ། བོད་དང་ཤིན་ཅང་གཉིས་ཀྱིས་གཙོས་པའི་གྲངས་ཉུང་མི་རིགས་ཁག་གི་འགྲོ་བ་མིའི་ཐོབ་ཐང་གི་གནས་བབས་དེ་སྔ་ལས་ཡར་རྒྱས་ཆེན་པོ་ཕྱིན་ཡོད་པར་བརྗོད་འདུག ཤིན་ཧཱ་གསར་ཁང་གིས་གནས་ཚུལ་སྤེལ་བར་རྒྱ་ནག་གི་རྒྱལ་སྲིད་སྤྱི་ཁྱབ་ཁང་གི་དྲིལ་བསྒྲགས་ཚན་པས་ཁ་སང་ཚེས་ ༡༢ ཉིན་འདོན་སྤེལ་བྱས་པའི་ཡིག་ཆ་དཀར་པོའི་ནང་ཡུལ་དེའི་གྲངས་ཉུང་མི་རིགས་རྣམས་ལ་ཆོས་ལུགས་ཀྱི་ཐོབ་ཐང་ཆ་ཚང་ཡོད་སྐོར་བརྗོད་པ་དང་འབྲེལ། བོད་ནང་ལ་ཆ་མཚོན་ན་ནང་ཆོས་ཀྱི་བྱེད་སྒོ་སྤེལ་སའི་དགོན་སྡེ་ཁག་ ༡༧༧༨ ཡོད་པ་མ་ཟད་མང་ཚོགས་ཀྱི་ཆོས་ལུགས་དད་མོས་ཀྱི་ཡིད་ཆེས་དང་བྱེད་སྒོ་ཡོད་ཚད་ཁྲིམས་མཐུན་ཐོག་ནས་སྲུང་སྐྱོབ་བྱེད་བཞིན་ཡོད་པར་བཀོད་འདུག བོད་ཀྱི་ནང་བསྟན་ཆོས་བརྒྱུད་ཁག་གི་བླ་སྤྲུལ་ངོས་འཛིན་གྱི་ལམ་ལུགས་ལ་རོགས་རམ་བྱས་པའི་བརྒྱུད་ད་ལྟའི་ཆར་བོད་དུ་གཞུང་འབྲེལ་ངོས་འཛིན་གནང་བའི་བླ་སྤྲུལ ༣༨༥ ཡོད་པ་དང་། དེ་དག་ལས་ ༦༠ ལྷག་ནི་བོད་རང་གི་ལོ་རྒྱུས་རང་བཞིན་ལྡན་པའི་སྲོལ་རྒྱུན་གྱི་ལམ་ལུགས་གཞིར་བཞག་ཐོག་འདེམས་ཐོན་བྱུང་ཡོད་པར་བརྗོད་འདུག ཤིན་ཅང་ལ་ཆ་མཚོན་ན་རྒྱ་ནག་གཞུང་གི་ཆོས་དོན་ལྷན་ཁང་གིས་ཕྱི་ལོ་ ༢༠༡༡ ལོ་ནས་བཟུང་ཁ་ཆེ་གསུང་རབ་དང་འབྲེལ་བའི་ལས་གཞི་མང་པོ་སྤེལ་ཡོད་པ་ལྟར། ཤིན་ཅང་ཁུལ་ནས་སེར་མོ་བ་མང་པོར་དམིགས་བསལ་གྱི་སྦྱོང་བརྡར་སྤྲད་ཡོད་པ་མ་ཟད། ཁ་ཆེ་ཆོས་ལུགས་སློབ་སྦྱོང་གི་ལྟེ་གནས་ཁག་རྒྱ་སྐྱེད་བྱས་པ་དང་། སློབ་ཁྲིད་ཀྱི་གནས་སྟངས་གོང་མཐོར་བཏང་བ། ལྟེ་གནས་དེ་དག་ཏུ་སློབ་གཉེར་བ་མང་པོ་གསར་འཇུག་བྱ་རྒྱུའི་ཐད་རོགས་འདེགས་རྒྱ་ཆེ་བྱས་ཡོད་པ་གསལ་འདུགརྒྱ་ནག་གིས་ཕྱིའི་རྒྱལ་ཁབ་ ༢༦ ལྷག་དང་ལྷན་དུ་འགྲོ་བ་མིའི་ཐོབ་ཐང་གི་ཁྲིམས་ཡིག་གཏན་འབེབས་བྱས་ནས་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཁྲིམས་ཡིག་ཁག་གི་འགན་དབང་ཡོངས་རྫོགས་ལག་བསྟར་བྱེད་བཞིན་ཡོད་པ་མ་ཟད། ཕྱིའི་རྒྱལ་ཁབ་ ༢༠ ལྷག་དང་མཉམ་དུ་འགྲོ་བ་མིའི་ཐོབ་ཐང་ཐད་མཉམ་ལས་དང་གྲོས་མོལ་བྱས་ཡོད་སྐོར་བཀོད་ཡོད་པ་རེད། འོན་ཀྱང་ཁ་སང་ Breitbart  ཞེས་པའི་དྲྭ་རྒྱར་ཐེངས་འདིའི་རྒྱ་ནག་གི་ཡིག་ཆ་དཀར་པོའི་ནང་གསལ་བའི་འགྲོ་བ་མིའི་ཐོབ་ཐང་གི་གནས་བབས་དེ་ཚད་བརྒལ་རང་བཞིན་གྱི་འུར་གཏམ་ཁོ་ན་ཡིན་པར་བསྒྲགས་ཏེ། རྒྱ་ནག་གིས་སྲིད་གཞུང་གི་ཆབ་སྲིད་ལ་ལྟ་བ་མི་མཐུན་པའི་མི་ལ་རྡུང་རྡེག་གཏོང་བཞིན་པ་དང་། ཆོས་ལུགས་དད་མོས་ལ་བཙན་གནོན་བྱེད་བཞིན་པ། ལྷག་དོན་ཤིན་ཅང་གིས་མཚོན་པའི་གྲངས་ཉུང་མི་རིགས་བཀག་བསྐྱིལ་བྱེད་བཞིན་པ་སོགས་གསལ་འདོན་བྱས་པ་དང་ཆབས་ཅིག རྒྱ་ནག་ལ་དེ་ལྟར་བརྗོད་རྒྱུའི་བདེན་དབང་གང་ཡང་མེད་སྐོར་བཀོད་འདུག རྒྱ་ནག་གི་ཡིག་ཆ་དཀར་པོར་དོན་གནད་ཆེ་བའི་གནས་ཚུལ་གང་མང་མེད་པ་མ་ཟད་རྒྱལ་སྤྱིའི་སྤྱི་ཚོགས་ཀྱི་ངོས་ནས་རྒྱ་ནག་ལ་ཞུ་སྐུལ་རིམ་པ་བྱས་ནས་ཆེས་ཡ་ང་བའི་ཡུ་གུར་མི་རིགས་བཀག་སྡོམ་གྱི་གནས་སྟངས་དེ་མཚམས་འཇོག་བྱེད་དགོས་པར་བརྗོད་བཞིན་པའི་དུས་འདིར་རྒྱ་ནག་གིས་ཡིག་ཆ་དཀར་པོའི་བརྒྱུད་ཁོང་ཚོ་ནི་མི་ཆོས་རིང་ལུགས་ཀྱི་ཡང་རྩེར་བསླེབས་ཡོད་པར་བརྗོད་བཞིན་པ་དེ་དགོད་བྲོ་བའི་གནས་བབས་ཤིག་རེད་ཅེས་གསལ་ཡོད་པ་རེད། རྒྱ་ནག་གིས་རྒྱལ་སྤྱིའི་དཔྱད་ཞིབ་པ་རྣམས་རྒྱ་ནག་ཏུ་འགྲོ་རྒྱུར་བཀག་སྡོམ་བྱེད་བཞིན་པ་མ་ཟད། ཡི་ཤུ་རྣམ་དག་ཆོས་ལུགས་ཀྱི་ལྷ་ཁང་དག་རྩ་གཏོར་གཏོང་བཞིན་ཡོད་པ་དང་རྒྱ་ནག་གི་ཡིག་ཆ་དཀར་པོའི་ནང་ཤིན་ཅང་གི་གནས་བབས་ལ་གཞི་བཞག་ས་ནི་ས་གནས་དེའི་དཔལ་འབྱོར་འཕེལ་རྒྱས་དང་སློབ་གྲྭའི་ལམ་ལུགས་དེ་ཡག་པོ་ཡོད་ཟེར་བ་ཙམ་ལས་མེད་པ་རེད་ཅེས་བརྗོད་འདུག དེ་བཞིན་ Nikkei Asian review ཞེས་པའི་གསར་ཁང་ནས་རྒྱ་ནག་གིས་འགྲོ་བ་མིའི་ཐོབ་ཐང་དང་འབྲེལ་བའི་ཡིག་ཆ་དཀར་པོ་དེ་འདོན་སྤེལ་བྱས་པའི་ཉིན་དེ་རང་དུ་ཡུལ་དེའི་ནང་གི་དཔལ་འབྱོར་འཕེལ་རྒྱས་སོང་བ་དང་མཉམ་དུ་འགྲོ་བ་མིའི་ཐོབ་ཐང་གི་གནས་བབས་དེ་ཇེ་ཞན་ཇེ་སྡུག་ཏུ་འགྲོ་བཞིན་པའི་སྙན་ཐོ་ཞིག་འདོན་སྤེལ་གནང་སྟེ། ནུབ་ཕྱོགས་ཀྱི་འགོ་ཁྲིད་དག་གི་བསམ་གཞིགས་ནང་དཔལ་འབྱོར་འཕེལ་རྒྱས་སོང་བ་དང་མཉམ་དུ་རང་དབང་གི་གནས་སྟངས་དེ་ཇེ་ལེགས་སུ་འགྲོ་བར་དགོངས་བཞིན་པ་དེ་ནོར་འཁྲུལ་ཡིན་པར་མངོན་གསལ་གནང་འདུག རྒྱ་རིགས་འགྲོ་བ་མིའི་ཐོབ་ཐང་རྩོད་ལེན་པའི་རྒྱལ་སྤྱིའི་འབྲེལ་མཐུད་ཁང་གི་འགོ་ཁྲིད་ལྕམ་ Renee Xia ལགས་ཀྱིས་སྙན་ཐོ་དེའི་ནང་རྒྱ་ནག་གི་བཅོས་སྒྱུར་སྒོ་འབྱེད་ཆེན་མོ་ཞེས་པ་དེ་དམར་ཤོག་གཞུང་ཁོ་ནའི་འཚོ་གནས་དང་སྟོབས་ཤུགས་རྒྱ་སྐྱེད་གཏང་རྒྱུའི་ལས་དོན་ཞིག་རེད་ཅེས་པ་དང་། རྒྱ་ནག་གི་དཔལ་འབྱོར་འཕེལ་རྒྱས་ཀྱི་མིང་བྱང་ཁྲོད་དོན་དངོས་རྒྱལ་ནང་དྲག་གནོན་དང་རྒྱལ་སྤྱིའི་ཐོག་བཙན་ཤུགས་ཀྱིས་ཁུངས་སྐྱེལ་བྱེད་བཞིན་པ་ཞིག་རེད་ཅེས་བརྗོད་འདུག འགྲོ་བ་མིའི་ཐོབ་ཐང་ཚོགས་པའི་རྒྱ་ནག་ལྟ་ཞིབ་ཁང་གི་འགན་འཛིན་ Sophie Richardson ལགས་ཀྱིས་རྒྱ་ནག་གི་སྲིད་འཛིན་ཞི་ཅིན་ཕིང་གི་འགོ་ཁྲིད་འོག་དྲག་ཤུགས་རང་བཞིན་དང་རྩུབ་སྤྱོད་རང་བཞིན་དེ་རྒྱལ་སྤྱིའི་ཐོག་ངེས་པར་དུ་ཤེས་དགོས་པ་རེད་ཅེས་བརྗོད་འདུག

རེས་གཟའ་ཟླ་བའི་ཉིན་བོད་རང་ལྗོངས་ཀྱི་ལྷོ་ཤར་དུ་རྒྱ་ནག་གིས་ནང་ཆོས་དགེ་རྒན་དག་གིས་ལོ་ལྔའི་རིང་ལ་སྤྱི་ཚོགས་རིང་ལུགས་ཀྱི་ལྟ་སྤྱོད་ལ་སློབ་སྦྱོང་དང་སྦྱོང་བརྡར་བྱེད་དགོས་པའི་ལས་གཞི་གསར་པ་ཞིག་འགོ་འཛུགས་འདུག དེ་ཡང་ Global times ཞེས་པའི་དྲྭ་ཚིགས་ཐོག་གསར་འགྱུར་སྤེལ་བར་རྒྱ་ནག་གིས་བོད་ཀྱི་ནང་ཆོས་དགེ་རྒན་རྣམས་ནས་ལོ་ལྔའི་རིང་ལ་སྤྱི་ཚོགས་རིང་ལུགས་ཀྱི་སློབ་སྦྱོང་དང་སྦྱོང་བརྡར་གནང་དགོས་པའི་ལས་གཞི་འགོ་འཛུགས་བྱས་ཡོད་པ་ལྟར། གཟའ་ཟླ་བའི་ཉིན་ལྷ་ས་ཁུལ་གྱི་སྤྱི་ཚོགས་རིང་ལུགས་ཀྱི་སློབ་ཆེན་ནང་དུ་གྲྭ་བཙུན་མང་པོ་ཞིག་ནས་མཛད་སྒོར་མཉམ་ཞུགས་བྱས་འདུག རྒྱ་ནག་དམར་ཤོག་གཞུང་གི་བོད་རང་སྐྱོང་ལྗོངས་ཀྱི་འཐབ་ཕྱོགས་གཅིག་གྱུར་ཁང་གི་འགོ་གཙོ་ Danke ཟེར་བས་རྒྱ་ནག་གིས་དམིགས་བསལ་དུ་ལོ་ལྔའི་རིང་གི་བསླབ་གཞིའི་རྩ་འཛིན་གསར་པ་ཞིག་ཆེད་བཟོ་བྱས་ཏེ་གྲྭ་བཙུན་ཚོས་རྒྱ་ནག་གི་སྲིད་བྱུས་དང་ཁྲིམས་ལུགས། ལོ་རྒྱུས། རིག་གཞུང་། དེང་རབས་ཀྱི་ཤེས་བྱ་སོགས་ལ་སློབ་གཉེར་བྱེད་བཅུག་ནས་སྲིད་གཞུང་གི་དབང་ཆ་ནི་ནང་ཆོས་ཀྱི་དབང་ཆ་ལས་མཐོ་བ་ཡོད་པའི་བསམ་བློ་སྐྲུན་རྒྱུ་དང་། རྒྱལ་ཁབ་ཀྱི་ཁྲིམས་ལུགས་ནི་ཆོས་ལུགས་ཀྱི་སྒྲིག་ཡིག་ལས་མཐོ་བ་ཡོད་པ་ར་སྤྲོད་བྱེད་དགོས་ཞེས་བརྗོད་ཡོད་པའང་བཀོད་འདུག གྲྭ་བཙུན་ཚོས་དམར་ཤོག་གཞུང་གི་སྲིད་བྱུས་ལ་སློབ་སྦྱོང་བྱེད་དགོས་པའི་ལས་འགུལ་དེ་སྤེལ་བ་དང་ལྷན་དུ་ཉིན་དེར་བོད་ཀྱི་དགོན་སྡེ་ཁག་ཏུ་ཆེད་གཏོང་གི་ལས་བྱེད་ཚོས་བོད་ཀྱི་དགོན་པ་ཁག་ལ་དོ་དམ་ནན་པོ་ཡོང་བར་དམིགས་པའི་ལོ་ ༣ རིང་གི་སྦྱོང་བརྡར་གྱི་ལས་གཞི་ཞིག་ཀྱང་དུས་མཉམ་དུ་སྤེལ་ཏེ། སྲིད་གཞུང་གི་ལས་བྱེད་དག་གི་སྟངས་འཛིན་འོག་ནས་གྲྭ་བཙུན་ཚོས་རྒྱ་ནག་གི་ཁྲིམས་སྒྲིག་དང་མཐུན་པའི་ཉིན་རིའི་ཆོས་སྤྱོད་ཀྱི་བྱ་བར་ཞུགས་ཏུ་འཇུག་བཞིན་ཡོད་པ་རེད་འདུག རྒྱ་ནག་གི་འཕྲུལ་ལས་ཞིབ་འཇུག་ལྟེ་གནས་ཁང་གི་ཉམས་ཞིབ་པས་རྒྱ་ནག་ནས་བོད་ཀྱི་ནང་ཆོས་ཀྱི་དགེ་རྒན་དག་ལ་སྤྱི་ཚོགས་རིང་ལུགས་ཀྱི་ལྟ་སྤྱོད་སྦྱོང་བརྡར་སྤྲད་པ་ཡིན་ན། དགེ་རྒན་དེ་དག་ནི་རྒྱ་ནག་གི་ལས་བྱེད་དག་ལས་མང་ཚོགས་ལ་སེམས་ཐག་ཉེ་བ་ཡོད་སྟབས་སྲིད་གཞུང་གི་བཀའ་རྒྱ་དེ་དག་ཁྱབ་སྤེལ་བྱེད་སླ་བ་ཡོད་པར་བརྗོད་འདུག རླུང་འཕྲིན་ཁང་གིས་སྤྱི་ཚོགས་རིང་ལུགས་ལྟ་གྲུབ་གཞིར་བཞག་པའི་ཆོས་ལུགས་ཞེས་པའི་གནད་དོན་དང་འབྲེལ་ནས་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་ཚེ་རིང་མཚོ་མོ་ལགས་སུ་བཅར་འདྲི་ཞུས་པར་རྒྱ་ནག་གིས་རྒྱལ་གཅེས་ཆོས་གཅེས་དང་ཁྲིམས་ལུགས་སློབ་གསོ། སྤྱི་ཚོགས་རིང་ལུགས་སོགས་ཀྱི་མིང་འདྲ་མིན་འོག་ནས་བོད་ནང་གི་དགོན་སྡེ་ཁག་ལ་བཀག་སྡོམ་བྱེད་བཞིན་པ་ལས། ལས་འགུལ་དེ་གསར་པ་གང་ཡང་མ་རེད་ཅེས་ངོ་སྤྲོད་གནང་ཡོད། རྩ་བའི་རྒྱ་ནག་གིས་ ༢༠༡༧ ལོར་བཀོད་པའི་གྲངས་ཐོ་ལྟར་ན་བོད་ཁུལ་དུ་དགོན་ཁག་ ༡༧༠༠ ལྷག་ཡོད་པ་དང་། དེར་ཆོས་ཞུགས་བྱས་ཡོད་པའི་གྲྭ་བཙུན་གྲངས་ ༤༦༠༠༠ ལྷག་ཡོད་པ་རེད། རྒྱ་གཞུང་གིས་དུས་རྒྱུན་ནས་བོད་ཀྱི་དགོན་སྡེ་ཁག་ལ་དམ་དྲག་གི་ལས་འགུལ་ཤུགས་ཆེ་སྤེལ་བཞིན་ཡོད་པ་ལྟར། གྲྭར་ཞུགས་བྱེད་པར་ལོ་ཚད་གཏན་འབེབས་བྱས་ནས་ལོ་ ༡༨ ལ་མ་སོན་པར་གྲྭ་བ་གནང་མི་ཆོག་པ་དང་། སྔོན་ཆད་གྲྭ་བ་གནང་ཟིན་པ་དག་ཀྱང་སྲིད་གཞུང་གི་བཀོད་འདོམས་ལྟར་སློབ་གྲྭར་ཞུགས་རྒྱུ་སོགས་ཀྱི་ལས་གཞི་སྣ་མང་ཞིག་སྤེལ་ཏེ། བོད་ཀྱི་དགོན་སྡེ་ཡོད་ཚད་དམར་ཤོག་གཞུང་གི་སྲིད་བྱུས་འོག་དོ་དམ་དང་སྟངས་འཛིན་གནང་རྒྱུའི་ལས་གཞི་རྒྱ་ཆེར་སྤེལ་ཡོད་པ་རེད།