རྒྱལ་སྤྱི།

རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་ལྷན་ཚོགས་ཀྱི་ཚོགས་གཙོ་སྐུ་ཞབས་ Richard Gere  ལགས་ཀྱིས་དྲྭ་ཐོག་བརྒྱུད་ཨ་རིའི་གྲོས་ཚོགས་གོང་མའི་རྒྱལ་སྤྱིའི་ཚོང་འབྲེལ་གྱི་ཉན་ཞིབ་ལས་རིམ་ཐོག་ལྷན་ཞུགས་ཀྱིས་རྒྱ་ནག་གཞུང་གིས་ཡུལ་དེ་དང་ལྷག་པར་དུ་བོད་ནང་ལ་དམ་དྲག་ཤུགས་ཆེ་བྱེད་བཞིན་པ་དེས་ཨ་རིའི་ཁེ་ཕན་ལ་དོ་ཕོག་ཆེན་པོ་བཏང་དང་གཏོང་མུས་ཡིན་པར་ནན་བརྗོད་གནང་བ་དང་འབྲེལ། ཨ་རིའི་གྲོས་ཚོགས་ཀྱི་ངོས་ནས་བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་འཆར་ལ་རྒྱབ་སྐྱོར་གནང་དགོས་པའི་ཞེན་སྐུལ་གནང་འདུགཁ་སང་ཕྱི་ཟླ་ ༦ ཚེས་ ༣༠ ཉིན་ཚོགས་པའི་ཉན་ཞིབ་ལས་རིམ་དེ་ནི་ཨ་རིའི་གྲོས་ཚོགས་གོང་མའི་རྒྱལ་སྤྱིའི་ཚོང་འབྲེལ་ལས་དོན་ཚོགས་ཆུང་གི་ཚོགས་གཙོ་སྐུ་ཞབས་ John Cornyn ལགས་དང་སྐུ་ཞབས་ Bob Casy ལགས་གཉིས་ཀྱིས་གཙོ་སྐྱོང་གནང་སྟེ་གོ་སྒྲིག་གནང་འདུག་པ་དང་། ལས་རིམ་ཐོག་སྐུ་ཞབས་ Richard Gere ལགས་ཀྱིས་རྒྱ་ནག་གཞུང་ནས་བོད་ནང་གི་བོད་མི་ཚོར་དམ་དྲག་དང་དྲག་གནོན་རིགས་བྱས་པ་ཙམ་མ་ཟད་བོད་མིར་རྒྱབ་སྐྱོར་གནང་མཁན་གྱི་འགྲོ་བ་མིའི་ཐོབ་ཐང་ཐོག་ཕྱག་ལས་གནང་མཁན་ཚོ་ལའང་དྲག་གནོན་བྱེད་བཞིན་པ་དང་། ལྷག་དོན་རྒྱ་ནག་གི་མི་སེར་རྣམས་རང་དབང་ཐོག་ནས་ཨ་རིར་འགྲོ་འོང་གནང་བཞིན་ཡོད་ཀྱང་། ཨ་རིའི་གསར་འགོད་པ་དང་གཞུང་འབྲེལ་མི་སྣ། དེ་བཞིན་མང་ཚོགས་དཀྱུས་མ་རྣམས་རྒྱ་ནག་སྤྱི་དང་སྒོས་བོད་ཀྱི་ས་ཁུལ་ཁག་ཏུ་རང་དབང་ཐོག་འགྲོ་འོང་གནང་རྒྱུའི་ཐོབ་ཐང་སྤྲད་ཀྱི་མེད་སྟབས་ཨ་རིའི་གྲོས་ཚོགས་གོང་འོག་གཉིས་ཀྱི་གྲོས་ཚོགས་འཐུས་མིས་རྒྱབ་སྐྱོར་གནང་རྗེས་ཕྱི་ལོ་ ༢༠༡༨ ལོར་ཨ་རིའི་སྲིད་འཛིན་གྱིས་མཚན་རྟགས་བསྐྱོན་ཏེ་གཏན་འབེབས་ཟིན་པའི་བོད་ནང་འདྲ་མཉམ་ཐོག་འགྲུལ་སྐྱོད་ཆོག་པའི་ཁྲིམས་འཆར་དེར་དགའ་བསུ་དང་དོན་དངོས་ཐོག་ལག་བསྟར་གནང་དགོས་པར་འབོད་སྐུལ་གནང་འདུག ད་དུང་ཉན་ཞིབ་ལས་རིམ་དེའི་ཐོག་སྐུ་ཞབས་ Richard Gere ལགས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་ཡང་སྲིད་གནད་དོན་འབྲེལ་ཏེ་ཨ་རིའི་གྲོས་ཚོགས་གོང་མས་གཏན་འབེབས་གནང་བའི་བོད་དོན་རྒྱབ་སྐྱོར་གྱི་ཁྲིམས་འཆར་གསར་པ་འདིས་ཨ་རི་གཞུང་ནས་བོད་དོན་དང་བོད་མིའི་མངོན་འདོད་ལ་རྒྱབ་སྐྱོར་ཡོད་པ་མངོན་གསལ་གནང་ཡོད་ཅེས་གསུངས་པ་དང་ཆབས་ཅིག ཁྲིམས་འཆར་དེ་རིམ་པས་གྲོས་ཚོགས་འོག་མ་དང་ཨ་རི་སྲིད་འཛིན་བརྒྱུད་དེ་ཡུལ་དེའི་ཁྲིམས་སུ་གཏན་འབེབས་ཡོང་བའི་ཞུ་སྐུལ་གནང་བ་མ་ཟད། ཁྲིམས་འཆར་དེ་བརྒྱུད་༸གོང་ས་མཆོག་གིས་དབུས་པའི་བོད་ཀྱི་བླ་སྤྲུལ་ཡང་སྲིད་ཀྱི་གནད་དོན་ཐོག་རྒྱ་གཞུང་ལ་ཐེ་བྱུས་བྱེད་དབང་མེད་པ་དང་ཨ་རིའི་ཕྱི་སྲིད་ལས་ཁུངས་ཀྱིས་བོད་ཀྱི་རྒྱལ་ས་ལྷ་སར་ཨ་རིའི་གཞུང་ཚབ་ལས་ཁུངས་ཆེད་འཛུགས་གནང་ཐུབ་ངེས་ཡིན་པ་སོགས་ཀྱི་དགེ་མཚན་ལྡན་ཡོད་པ་གསུངས་འདུག ཉན་ཞིབ་ཐོག་ཚོགས་ཆུང་ངོས་ནས་སྐུ་ཞབས་གྷེ་རི་ལགས་སུ་རྒྱ་ནག་གི་དམ་དྲག་ལ་གདོང་ལེན་གནང་རྒྱའི་ཐབས་ལམ་ཐད་ཨ་རིའི་ཕོ་བྲང་དཀར་པོར་གཞེན་སྐུལ་གང་ཡོད་དམ་ཞེས་བཀའ་འདྲི་ཞུས་པར་ཁོང་གིས་ཨ་རིའི་གཞུང་ནས་རྒྱ་ནག་ཐོག་འདྲ་མཉམ་གི་སྲིད་བྱུས་ལག་བསྟར་གནང་གལ་ཡིན་པའི་ལམ་སྟོན་གནང་བ་མ་ཟད། དེ་བཞིན་རྒྱལ་སྤྱིའི་གློག་བརྙན་ཁག་གི་ནང་ལ་དེང་སྐབས་རྒྱ་ནག་གི་ཤུགས་རྐྱེན་ཆེ་རུ་འགྲོ་བཞིན་པའི་གནད་དོན་སྐོར་དང་འབྲེལ། ཁོང་ནས་ད་བར་རྒྱལ་སྤྱིའི་གློག་བརྙན་དུས་སྟོན་སོགས་ཀྱི་ཐོག་བོད་དོན་ལ་རྒྱབ་སྐྱོར་གྱིས་བོད་དང་འགྲོ་བ་མིའི་ཐོབ་ཐང་སྐོར་གཏམ་བཤད་གནང་བ་དེས་ཁོང་རང་ཉིད་ཀྱི་མི་ཚེའི་མདུན་ལམ་ལ་ཐད་ཀར་ཤུགས་རྐྱེན་ཐེབས་ཡོད་པར་གསུང་ཚོད་དཀའ་ཡང་རྒྱལ་སྤྱིའི་གློག་བརྙན་བཟོ་སྐྲུན་ཁང་དང་ལྷག་པར་དུ་དབྱིན་ཇིའི་གློག་བརྙན་སྡེ་ཚོགས་སོགས་ནས་ཁོང་གློག་བརྙན་འཁྲབ་སྟོན་པའི་ཁོངས་སུ་འདེམས་སྒྲུག་གནང་རྒྱུར་ཐེ་ཚོམ་དང་འཛེམས་ཟོན་ཆེན་པོ་གནང་བཞིན་འདུག་ཅེས་གསུངས་པ་མ་ཟད། ལྷག་དོན་རྒྱ་ནག་གི་གློག་བརྙན་བཟོ་སྐྲུན་ཁང་མང་པོ་ཞིག་ནས་རྒྱ་གཞུང་གི་གནོན་ཤུགས་འོག་རང་ཉིད་ཀྱི་འཚོ་བར་ངལ་བ་ཆེན་པོ་འཕྲད་སྲིད་པར་ཞེད་སྣང་འོག་ཁོང་དང་ལྷན་དུ་ཕྱག་ལས་གནང་ཐུབ་ཐབས་མེད་ཅེས་གསུངས་ཡོད་སྐོར་ལུང་འདྲེན་གནང་འདུག

ཨ་རིའི་གློག་བརྙན་བཟོ་སྐྲུན་པ་ལྕམ་ Rosemary Rawcliffe ལགས་ཀྱིས་བཟོ་སྐྲུན་ཞུས་པའི་ The Great 14th : Tenzin Gyatso འམ་༸རྒྱལ་བ་༸སྐུ་ཕྲེང་བཅུ་བཞི་པ་ཆེན་པོ་བསྟན་འཛིན་རྒྱ་མཚོ་མཆོག་ཅེས་པའི་གློག་བརྙན་འདི་ཉེ་ཆར་ཕྱི་ཚེས་ ༢༧ ཉིན་༸སྐུའི་འཁྲུངས་སྐར་དུས་ཆེན་སླེབས་ཉེ་དང་བསྟུན་རིན་མེད་ཐོག་དྲྭ་ལམ་བརྒྱུད་རྒྱལ་སྤྱིའི་ཁྱོན་ཡོངས་སུ་གཟིགས་འབུལ་ཞུས་ཡོད་པ་དང་སྐབས་དེར་གློག་བརྙན་འདིར་གཟིགས་མཁན་ཁྱོན་མང་ཚོགས་ཁྲི་དྲུག་ལྷག་བྱུང་ཡོད་པ་རེད།གློག་བརྙན་འདི་ནི་ལྕམ་ Rosemary Rawcliffe ལགས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་༸སྐུ་ཚེའི་མཛད་རྣམ་སྤྱི་དང་ལྷག་པར་དུ་མགོན་པོ་༸གང་ཉིད་མཆོག་གི་ཆོས་ཕྱོགས་དང་ཆབ་སྲིད། མང་གཙོ་སོགས་ཀྱི་ཐོག་མཛད་འཕྲིན་རླབས་པོ་ཆེ་རྒྱ་ཆེ་བསྐྱངས་ཁག་མངོན་གསལ་གནང་བ་ཞིག་ཡིན་པ་དང་། གློག་བརྙ་ནང་དེ་སྔ་མང་ཚོགས་ནས་མཇལ་མྱོང་མེད་པའི་༸གོང་ས་མཆོག་༸སྐུ་གཞོན་དུས་སྐབས་ཀྱི་བརྙན་པར་མང་དག་ཅིག་མཇལ་རྒྱུ་འདུག དེ་རིང་རླུང་འཕྲིན་ཁང་གིས་ལྕམ་ Rosemary Rawcliffe ལགས་སུ་ཞལ་པར་བརྒྱུད་ཁོང་གི་གློག་བརྙན་དང་འབྲེལ་བཀའ་འདྲི་ཁག་ཅིག་ཞུས་པར་གློག་བརྙན་འདི་ནི་འདས་པའི་ལོ་བརྒྱད་ཀྱི་རིང་༸གོང་ས་མཆོག་གི་༸སྐུ་ཚེའི་མཛད་རྣམ་རྒྱུས་ལོན་དང་ལྷག་དོན་༸གོང་ས་མཆོག་དང་ལྷན་དུ་ཡང་ཡང་བཀའ་འདྲི་དགོངས་སྐོར་སོགས་ཞུ་རྒྱུའི་གོ་སྐབས་དམིགས་བསལ་བ་ཞིག་བྱུང་བར་འགྲེལ་བརྗོད་དང་ཆབས་ཅིག ཁྱད་པར་དུ་༸གོང་ས་༸སྐྱབས་མགོན་ཆེན་པོ་མཆོག་གིས་ཆེས་བཟོད་བཞེས་ཀྱིས་དུས་ཚོད་གནང་བར་བརྟེན་ཁོང་གིས་གློག་བརྙན་འདི་བཟོ་སྐྲུན་ཞུས་ཡོད་སྐོར་གསུངས་པ་མ་ཟད་མགོན་པོ་༸གང་ཉིད་མཆོག་ལ་བཀའ་དྲིན་བླ་མེད་དུ་ཆེ་ཞེས་ཞུས་སོང་།ཁོང་གིས་གློག་བརྙན་འདི་བཟོ་སྐྲུན་གྱི་རྒྱུད་རིམ་ཁྲོད་༸གོང་ས་མཆོག་གི་མཛད་རྗེས་མང་པོ་དྲན་གསོ་ཞུ་སྐབས་རང་བཞིན་གྱིས་སེམས་ནང་ལ་སྤྲོ་སྣང་དང་སེམས་འགུལ་ཐེབས་པའི་གནས་སྟངས་མང་པོ་བྱུང་སོང་བ་དང་། དེ་དག་ཁྲོད་ནས་མགོན་པོ་༸གང་ཉིད་མཆོག་གིས་བོད་ནས་ཕེབས་པའི་བོད་མི་ཚོ་ལ་དམིགས་བསལ་མང་མཇལ་སྐབས་ཀྱི་ཁོར་ཡུག་དང་དེ་བཞིན་མགོན་པོ་༸གང་ཉིད་མཆོག་གིས་འགྲོ་བ་སྤྱི་ལ་ཉེ་རིང་མེད་པར་བྱམས་བརྩེའི་ཐོག་ནས་དགོངས་བཞེད་གནང་སྟངས་དང་དེ་བཞིན་༸གོང་ས་མཆོག་གིས་༸སྐུའི་ཡོངས་འཛིན་གླིང་རིན་པོ་ཆེ་༸སྐུ་ཐོག་གོང་མའི་སྐོར་ལ་བཀའ་བསྩལ་བའི་མཛད་རྣམ་དེ་ཚོས་སེམས་འགུལ་ཆེན་པོ་ཐེབས་སོང་ཞེས་གསུངས་སོང་། དེ་བཞིན་གློག་བརྙན་འདིའི་ནང་དེ་སྔ་མང་ཚོགས་ནས་མཇལ་དཀའ་བའི་༸གོང་ས་མཆོག་༸སྐུ་ན་གཞོན་དུས་སྐབས་སུ་རྒྱ་ནག་ལ་ཕེབས་པ་དང་། གངས་རྩེད་མཛད་པ། དེ་བཞིན་དྷ་སའི་རི་ཁྲོད་དུ་༸སྐུ་སེང་ལ་ཕེབས་པ་སོགས་ཀྱི་བརྙན་པར་མང་པོ་ཞིག་སྤྱོད་འདུག་པ་དང་འབྲེལ་བཀའ་འདྲི་ཞུས་པར་བརྙན་པར་དེ་དག་༸གོང་ས་མཆོག་གི་༸སྐུ་སྒེར་ཡིག་ཚང་ནས་གསོལ་བསྩལ་གནང་བ་ཞིག་ཡིན་པ་དང་། དེ་དག་མཇལ་སྐབས་རང་བཞིན་གྱིས་སེམས་ནང་སྤྲོ་སྣང་བྱུང་བ་མ་ཟད་དེ་བྱུང་གི་ཆ་ནས་བརྙན་པར་དེ་ཚོ་གལ་ཆེན་པོ་དང་རྩ་ཆེན་ཞིག་རེད་འདུག་བཅས་གསུངས་ཡོད།ཁོང་གིས་ད་དུང་ཉེ་ཆར་གློག་བརྙན་འདི་རིན་མེད་ཐོག་གཟིགས་འབུལ་ཞུ་སྐབས་བོད་མི་ཁག་ཅིག་གིས་ཆོག་མཆན་གང་ཡང་མི་ཞུ་བར་ཁོང་གིས་བཟོ་སྐྲུན་ཞུས་པའི་གློག་བརྙན་དེ་ཕབ་ལེན་བྱས་པ་མ་ཟད། བརྙན་པར་དུམ་གཏུམ་གནང་སྟེ་སྤྱི་ཚོགས་དྲྭ་ལམ་ཁག་ཏུ་སྤེལ་བ་དེ་ནི་གློག་བརྙན་གྱི་བདག་དབང་ལ་གུས་བརྩི་མེད་པའི་རྣམ་པ་ཞིག་འདུག་པ་དེར་བློ་ཕམ་གྱི་གནས་ཡིན་པར་གསུངས་སོང་། གཞི་རྩའི་ལྕམ་ Rosemary Rawcliffe ལགས་ཀྱིས་དེ་སྔ་བོད་ཀྱི་བེུད་དང་༸རྒྱལ་ཡུམ་ཆེན་མོ་ཞེས་པའི་གློག་བརྙན་གཉིས་ཀྱང་བཟོ་སྐྲུན་གནང་ཡོད་པ་དང་། དེ་རེས་ཁོང་གིས་བཟོ་སྐྲུན་ཞུས་པའི་ The Great 14th : Tenzin Gyatso འམ་༸རྒྱལ་བ་༸སྐུ་ཕྲེང་བཅུ་བཞི་པ་ཆེན་པོ་བསྟན་འཛིན་རྒྱ་མཚོ་མཆོག་ཅེས་པའི་གློག་བརྙན་འདི་སྔ་ལོའི་ཕྱི་ཟླ་ ༡༠ ནང་བཟོ་སྐྲུན་ཁག་ལེགས་གྲུབ་བྱུང་མཚམས་སུ་ Mill Valley དང་ Sedona སོགས་རྒྱལ་སྤྱིའི་གློག་བརྙན་དུས་སྟོན་ཆེ་ཁག་ཐོག་གཟིགས་འབུལ་ཞུས་ཡོད་པ་དང་། གློག་བརྙན་དེར་མང་ཚོགས་ནས་དགའ་མོས་ཆེ་ཤོས་གནང་ས་དང་དངོས་བྱུང་གློག་བརྙན་ཡག་ཤོས། དེ་བཞིན་ཆེས་མཐོའི་ Telly གསེར་གྱི་གཟེངས་རྟགས་སོགས་ཐོབ་ཡོད་པ་རེད། ༸རྒྱལ་བ་༸སྐུ་ཕྲེང་བཅུ་བཞི་པ་ཆེན་པོ་བསྟན་འཛིན་རྒྱ་མཚོ་མཆོག་ཅེས་པའི་གློག་བརྙན་འདི་ད་ལྟའི་ཆར་དབྱིན་སྐད་ཐོག་གཟིགས་འབུལ་ཞུ་བཞིན་ཡོད་ཀྱང་། རིམ་པས་བོད་རྒྱ་གཙོས་རྒྱལ་སྤྱིའི་སྐད་ཡིག་མི་འདྲ་བ་ ༡༤ ཙམ་གྱི་ནང་ Subtitle འམ་མཆན་ཡིག་སྦྱོར་ཏེ་གཟིགས་འབུལ་ཞུ་འཆར་འདུག

སུད་སི་རྒྱལ་ས་སྦན་ནས་ཇིི་ནི་ཝར་གྲོང་འཁྱེར་བར་རྒྱལ་སྤྱིའི་མང་ཚོགས་ལ་བོད་ནང་གི་དངོས་ཡོད་གནས་ཚུལ་དང་རྒྱ་ནག་གི་གདོང་རིགས་ངོ་མ་ར་སྤྲོད་གནང་རྒྱུ་འབོད་སྒྲའི་འོག་བོད་དོན་ཞི་བའི་གོམ་བགྲོད་གནང་མཁན་བོད་མི་དང་བླངས་རྣམས་ཁ་སང་ཕྱི་ཚེས་ ༣༠ ཉིན་ཇི་ནི་ཝར་བདེ་འབྱོར་ཡོད་པ་དང་། ས་གནས་སུ་རྟེན་གཞི་བྱས་པའི་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་གི་ལྷན་ཁང་ལ་བོད་དོན་ཞུ་གཏུག་གནང་བ་དང་འབྲེལ། ཐེངས་འདིའི་བོད་དོན་ཞི་བའི་གོམ་བགྲོད་ལས་འགུལ་མཇུག་སྒྲིལ་གནང་སོང་།ཁ་སང་བོད་དོན་ལས་འགུལ་བ་རྣམས་རྒྱལ་ཚོགས་ཀྱི་འགྲོ་མིའི་ཐོབ་ཐང་གི་ལྷན་ཁང་དུ་བོད་དོན་ཞུ་སྐུལ་སླད་བཅར་སྐབས་ལམ་བར་ལ་ས་གནས་ཉེན་རྟོག་པས་ཁོང་རྣམས་བཀག་པ་མ་ཟད་ཁོང་གི་རྣམ་པས་བསྣམས་པའི་བོད་ཀྱི་རྒྱལ་དར་དང་དགོས་འདུན་འཁོད་པའི་ཤོག་བྱང་བསྡུ་དགོས་པའི་བཙན་བཀའ་བཏང་བ་དང་། ལས་འགུལ་བ་རྣམས་ཀྱི་ངོ་སྤྲོད་ལག་འཁྱེར་ཐོ་འགོད་དང་འདྲི་རྩད་བྱས་པའི་གནས་ཚུལ་བྱུང་ཡོད་པ་རེད། བོད་དོན་གོམ་བགྲོད་ལས་འགུལ་སྣེ་ཁྲིད་གནང་མཁན་བློ་བཟང་དར་རྒྱས་ལགས་ལ་མཚོན་ན་ད་རེས་ཀྱི་ལས་འགུལ་ཙམ་མ་ཟད་དེ་སྔོན་རྒྱ་ནག་གི་སྲིད་འཛིན་ཞི་ཅིང་ཕིང་སུད་སིར་འབྱོར་སྐབས་རྒྱལ་ཚོགས་ཀྱི་མདུན་དུ་ཡོད་པའི་ལོ་རྒྱུས་རང་བཞིན་ལྡན་པའི་ཞབས་སྟེགས་ཞབས་ཆག་སྟེངས་ཐེངས་གཉིས་ཙམ་འཛེགས་ནས་ངོ་རྒོལ་གནང་རྐྱེན་བར་བརྟེན་ཉེན་རྟོག་པས་འཛིན་བཟུང་གིས་བཀག་སྐྱིལ་གནང་མྱོང་མཁན་ཞིག་ཆགས་ཀྱི་འདུགཟླ་བའི་འདིའི་ཕྱི་ཚེས་ ༢༥ ཉིན་སུད་རྒྱལ་ས་སྦན་ནས་ཡིན་པའི་བོད་མི་བློ་བཟང་དར་རྒྱས་ལགས་ཀྱིས་སྣེ་ཁྲིད་གནང་སྟེ་སུད་སི་རྒྱལ་ས་སྦན་ནས་ཡིན་པ་བོད་མི་རྡོ་རྗེ་དངོས་གྲུབ་ལགས། ཛུ་རིག་གནས་སྡོད་བསྟན་རྣམ་ལགས། དེ་བཞིན་ཨ་རའོ་གནས་སྡོད་བཀྲིས་ལགས་བཅས་བོད་མི་དང་བླངས་པ་བཞིས་རྒྱལ་ས་སྦན་དུ་རྟེན་གཞི་བྱས་པའི་རྒྱལ་ཡོངས་གྲོས་ཚོགས་ཀྱི་མདུན་ངོས་ནས་དབུ་འཛུགས་གནང་ཡོད་ཅིང་། ལས་འགུལ་གྱི་དམིགས་ཡུལ་གཙོ་བོ་ནི་ཉིན་གྲངས་ལྔའི་རིང་གོམ་བགྲོད་དུས་ཡུན་རིང་བོད་དོན་གོམ་བགྲོད་པ་རྣམས་ནས་རྒྱལ་སྤྱིའི་མང་ཚོགས་ལ་བོད་ནང་གི་དངོས་ཡོད་གནས་ཚུལ་སྤྱི་དང་སྒོས་སུད་སི་དང་རྒྱལ་སྤྱིའི་རྒྱལ་གཞུང་སྒེར་ཚོགས་སྡེ་ཁག་ལ་རྒྱ་ནག་ཝུ་ཧན་ནས་ཁྱབ་གདལ་སོང་བའི་ཏོག་དབྱིབས་གཉན་རིམས་རྐྱེན་པས་གོ་ལའི་ཁྱོན་ཡོངས་སུ་འགྲོ་བ་མི་སྟོང་ཕྲག་མང་པོའི་ཚེ་ཤོར་བའི་འགན་ཡོངས་རྫོགས་རྒྱ་གཞུང་ལ་འཁུར་བཅུག་ནས་རྒྱ་ནག་གི་ཅ་དངོས་ཉོ་ཚོང་མཚམས་འཇོག་གནང་དགོས་པ་མ་ཟད། རྒྱ་ནག་གཞུང་གིས་སིམ་འཛུལ་ངང་སུད་སི་རྒྱལ་ཁབ་ཀྱི་མང་གཙོ་དང་འགྲོ་བ་མིའི་ཐོབ་ཐང་གི་ལྟ་གྲུབ་རྡོག་རོལ་གཏོང་བཞིན་པར་སུད་སི་གཞུང་ནས་དེར་ཐུགས་སྣང་གང་གཟབ་གནང་དགོས་པ་བཅས་དོན་ཚན་བཞི་ཅན་དགོས་འདུན་ཐོག་ནས་གནང་ཡོད་པ་རེད།ཁ་སང་གོམ་བགྲོད་པ་རྣམས་ཇི་ནི་ཝའི་མཉམ་འབྲེལ་རྒྱལ་ཚོགས་ཀྱི་མདུན་ཐང་དུ་འབྱོར་སྐབས་སུད་སི་སྐུ་ཚབ་དོན་གཅོད་འཆེ་མེད་རིག་འཛིན་ལགས་དང་ཇི་ནི་ཝའི་བོད་རིགས་ཚོགས་པའི་ཚོགས་གཙོ་དང་རྒྱུན་ལས། སུད་སི་ས་གནས་བེུད་ཀྱི་སྐུ་ཚབ། ཝེ་ལྡན་སི་ལྦན་ཚོགས་ཆུང་གི་སྐུ་ཚབ། སུད་སི་ས་ཁག་གཞན་ནས་འབྱོར་བའི་བོད་མི་བཅས་ཀྱིས་ལས་འགུལ་ལ་རྒྱབ་སྐྱོར་དང་ཕེབས་བསུའི་སྣེ་ལེན་གཟབ་རྒྱས་ཞུས་སོང། རླུང་འཕྲིན་ཁང་གི་བཅར་འདྲི་དང་ལེན་དང་འབྲེལ་ལས་འགུལ་བ་ཚོས་ཛ་དྲག་གི་དུས་སྐབས་འདིར་བོད་མི་ཚོས་གོ་སྐབས་དམ་འཛིན་གྱིས་ལས་འགུལ་སྤེལ་དགོས་གལ་ཡིན་པ་མ་ཟད་བོད་ཀྱི་གནད་དོན་ཐོག་བོད་མི་ཚང་མར་འགན་ཁུར་ཡོད་པ་དེ་ཤེས་དགོས་ཞེས་ཐུགས་ཚོར་ཆེན་པོས་གཞེན་སྐུལ་སོང་།དེ་བཞིན་ལས་འགུལ་བ་རྣམས་དང་ལམ་བར་དུ་མཉམ་ཞུགས་གནང་མཁན་སུད་བོད་མཛའ་འབྲེལ་ཚོགས་པའི་ཚོགས་མི་ཇག་ཨར་ནལ་ལགས་སུ་བཅར་འདྲི་ཞུས་པར་བོད་མི་ཚོས་བོད་དོན་དང་འབྲེལ་བའི་ལས་འགུལ་འདི་ལྟར་སྤེལ་བར་བསྔགས་བརྗོད་དང་དུས་ཚོད་དང་འཚམས་པ་ཞིག་རེད། རྒྱ་ནག་ནས་མཆེད་པའི་ཏོག་དབྱིབས་གཉམ་རིམས་རྐྱེན་པས་འཛམ་གླིང་སྤྱི་ཡོངས་ལ་མང་ཚོགས་ཧ་ཅང་མང་པོའི་ཚེ་སྲོག་ཤོར་བ་རེད། ད་ལྟ་འཛམ་གླིང་ཡོངས་ཀྱི་རྒྱ་ནག་ལ་དོ་སྣང་བྱེད་བཞིན་པའི་དུས་སྐབས་ཤིག་རེད། རྒྱ་ནག་གཞུང་གིས་མང་ཚོགས་ཀྱི་འགྲོ་བ་མིའི་ཐོབ་ཐང་ལ་གུས་བརྩི་མེད་པའི་ཀར་འཛམ་གླིང་སྤྱིའི་བདེ་དོན་ལ་གུས་བརྩི་བྱེད་ཀྱི་མེད་པ་ནི་ད་ཆ་འཛམ་གླིང་མི་མང་ཀུན་གྱིས་ཤེས་གསལ་རེད། དེས་ན་ང་ཚོ་རྒྱ་ནག་ལ་གདོང་ལེན་གྱི་ལས་འགུལ་འདི་ལྟ་བུ་ཤུགས་ཆེ་ཙམ་སྤེལ་དགོས་གལ་ཡིན་པ་སོགས་གསུངས་སོང་།རྩ་བའི་ད་ལན་རྒྱ་ནག་ཝུ་ཧན་ནས་ཐོག་མར་མཆེད་པའི་ཏོག་དབྱིབས་གཉན་རིམས་དང་འབྲེལ་ཟླ་བ་སྔོན་མར་སུད་སི་ནང་གནས་སྡོད་ཚེ་རིང་དབང་འདུས་ལགས་ཀྱིས་སུད་སི་གྲོང་ཁྱེར་ཝུན་ཐ་ཐུར་ནས་ཇི་ཝ་བར་བོད་དོན་གོམ་བགྲོད་ཀྱི་ལས་འགུལ་སྤེལ་གནང་རྗེས་ད་ལན་སླར་ཡང་བོད་དོན་གོམ་བགྲོད་ཀྱི་ལས་འགུལ་སྤེལ་བ་འདི་བོད་མི་སྒེར་གྱིས་གོམ་བགྲོད་ཀྱི་ལས་འགུལ་ཐེངས་གཉིས་པ་ཆགས་ཀྱི་ཡོད་པ་རེད།

དབྱིན་ཡུལ་གཞུང་གིས་ཧོང་ཀོང་རྒྱ་ནག་ལ་རྩིས་སྤྲོད་བྱས་ནས་མི་ལོ་ ༢༣ འཁོར་བའི་དེ་རིང་གི་དུས་དྲན་དང་བསྟུན་ནས། རྒྱ་ནག་རྒྱལ་ཡོངས་མི་མང་འཐུས་མི་ཚོགས་ཆེན་གྱི་རྒྱུན་ལས་ཚོགས་ཆུང་གིས་སྤྱི་མོས་ཐོག་ཧོང་ཀོང་གི་བདེ་འཇགས་ཞེས་པའི་ཁྲིམས་གཞི་དངོས་སུ་གཏན་འབེབས་དང་འབྲེལ། ཁ་སང་ཁྲིམས་གཞི་དེ་ཧོང་ཀོང་གི་རྨང་གཞིའི་ཁྲིམས་ལུགས་ནང་ཡར་འཇུག་བྱས་པར།  རྒྱལ་སྤྱིའི་ཐོག་རྒོལ་ལན་སློག་མཁན་མང་པོ་བྱུང་བཞིན་འདུག གསར་ལམ་ཁག་ཏུ་གནས་ཚུལ་ཐོན་པ་ལྟར་ན།  ཁ་སང་ཨོ་གླིང་དང་དབྱིན་ཡུལ། དེ་བཞིན་ཡོ་རོབ་རྒྱལ་ཁབ་ཁག་སོགས་རྒྱལ་ཁབ་ཉེར་བདུན་གྱིས་ཡོ་རོབ་ཀྱི་སུད་སི་རྒྱལ་སར། མཉམ་རུབ་ཀྱི་ཐོག་ནས་བསྒྲགས་གཏམ་ཞིག་སྤེལ་ཡོད་པ་རེད། སྐབས་དེར་དབྱིན་གཞུང་གི་སུད་ཝི་སུའི་གཞུང་ཚབ་པ།  སྐུ་ཞབས་ Julian Braithwaiteལགས་ཀྱིས་ཚང་མའི་ཚབ་བྱས་ཏེ་སྒྲོག་སྦྱངས་ཞུས་པའི་བསྒྲགས་གཏམ་གྱི་ནང་དུ།  རྒྱ་ནག་གིས་ཁ་སང་ཀོང་ཧོང་རྒྱལ་ཁབ་བདེ་འཇགས་ཀྱི་ཁྲིམས་གཞི་ཞེས་པ་ཞིག་གཏན་འབེབས་བྱས་པ་དེས་ཧོང་ཀོང་མི་མང་གི་རང་དབང་ལ་དོ་ཕོག་འགྲོ་ངེས་ཡིན་པར་བརྟེན། རྒྱ་ནག་གཞུང་གིས་བསྐྱར་དུ་ཁྲིམས་གཞི་དེར་བསམ་གཞིགས་བྱེད་དགོས་ཞེས་ཡོངས་གྲགས་ཀྱི་འབོད་སྐུལ་གནང་འདུག གཞན་ཡང་བསྒྲགས་གཏམ་ནང་དུ།   རྒྱ་ནག་གིས་ཧོང་ཀོངགི་ཁྲིམས་བཟོ་དང་ཁྲིམས་ཞིབ་ཁང་གི་འཐུས་མིའི་འཛུལ་ཞུགས་གཅིག་ཀྱང་མེད་པར་ཧོང་ཀོང་གི་བདེ་འཇགས་ཁྲིམས་གཞི་ཟེར་བ་ཞིག་གཏན་འབེབས་བྱས་པ་དེ་ཡིས།  རྒྱ་ནག་གི་རྒྱལ་ཁབ་གཅིག་ལ་་ལམ་ལུགས་གཉིས་ཀྱི་གཞི་རྩའི་སྲིད་བྱུས་ལ་སྣང་ཆུང་བཏང་ཡོད་ལུགས་འགྲེལ་བརྗོད་གནང་བ་དང་ཆབས་ཅིག   གཞི་རྩའི་རྒྱལ་ཁབ་གཅིག་ལ་ལམ་ལུགས་གཉིས་ཀྱི་སྲིད་བྱུས་ཀྱིས་ཧོང་ཀོང་མི་མང་ལ་ཚད་མཐོའི་རང་སྐྱོང་དང་ཐོབ་ཐང་འགན་ལེན་བྱས་ཡོད་པ་མངོན་གསལ་གནང་སྟེ། རྒྱ་ནག་དང་ཧོང་ཀོང་སྲིད་གཞུང་གིས་མི་མང་གིས་ལོ་མང་གི་རིང་ལ་ལོངས་སུ་སྤྱད་པའི་ཐོབ་ཐང་ཁག་ལ་བརྡབ་གསུག་མི་གཏོང་བའི་རེ་སྐུལ་དང་ལྷན་དུ། ཁྲིམས་གཞི་དེར་བསྐྱར་དུ་བསམ་གཞིགས་གཏོང་དགོས་བར་བསྐྱར་ནན་ཞུས་འདུག གཞན་ཡང་བསྒྲགས་གཏམ་དེའི་སྐབས་སུ། རྒྱ་ནག་གིས་ད་ཆ་ཤིན་ཅང་གི་ནང་དུ་དྲག་གནོན་བྱེད་བཞིན་པ་ཡོངས་གྲགས་ཀྱིས།   རྒྱ་ནག་གིས་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་གི་གཙོ་འཛིན།  ལྕམ་Michelle Bachelet ཤིན་ཅང་གི་ནང་དུ་དོན་ཕན་ལྡན་པའི་གཟིགས་སྐོར་གནང་དུ་འཇུག་དགོས་བའི་འབོད་སྐུལ་དང་ལྷན་དུ། རྒྱ་ནག་སྲིད་གཞུང་གིས་ཁུལ་དེར་དྲག་གནོན་གྱིས་མི་མང་གང་བྱུང་འཛིན་བཟུང་དང་དམ་དྲག་ཆེན་པོ་བྱེད་བཞིན་པར་བློ་འཚམ་ཆེན་པོ་ཡོད་པར་མངོན་གསལ་གྱིས། རྒྱལ་སྤྱིའི་ཁྲིམས་ལུགས་ཀྱིས་མི་མང་གི་ཐོབ་ཐང་ལ་འགན་ལེན་ཡོད་པ་གཞིར་བཞག་གིས།  ལྕམ་ Michelle Bachelet ལགས་ཀྱིས་ཧོང་ཀོང་དང་ཤིན་ཅང་ཁུལ་གྱི་འགྲོ་བ་མིའི་ཐོབ་ཐང་གི་གནས་བབ་ཐད་ནས་དུས་རྒྱུན་སྙན་ཐོ་འདོན་སྤེལ་གནང་དགོས་བར་བསྒྲགས་འདུག དེ་བཞིན་ཀོང་ཧོང་དབྱིན་གཞུང་གི་དབང་བསྒྱུར་འོག་ཏུ་ཡོད་དུས་ཀྱི་སྲིད་སྐྱོང་མཐའ་མ། སྐུ་ཞབས་Chris Patten ལགས་ཀྱིས་ཨ་རིར་རྟེན་གཞི་བྱས་པའི་ Bloomberg  བརྙན་འཕྲིན་ཁང་དུ། ཧོང་ཀོང་གི་ནང་དུ་རྒྱ་ནག་གི་སྲིད་འཛིན་ཞི་ཅིང་ཕིང་གིས་ཆེས་སྡང་སའི་མང་གཙོའི་ཁྱད་ཆོས་ཡོངས་སུ་མངོན་ཡོད་དུས།   ཐེངས་འདིར་རྒྱ་ནག་གིས་ཧོང་ཀོང་བདེ་འཇགས་ཀྱི་ཁྲིམས་གཞི་གཏན་འབེབས་བྱས་པ་དེ་ཡིས་ཧོང་ཀོང་གི་ནང་དུ་བཟོད་ཐབས་བྲལ་བའི་རྙོག་གླེང་གི་རིགས་མང་དུ་བཟོ་རྒྱུ་ཡིན་པ་ཡོངས་གྲགས་གནང་འདུག ཧོང་ཀོང་གི་བདེ་འཇགས་ཁྲིམས་གཞི་གཏན་འབེབས་དང་འབྲེལ་ནས། འདི་གའི་གསར་འགོད་པས་བཞུགས་སྒར་དུ་རྟེན་གཞི་བྱས་པའི་བོད་རང་བཙན་སློབ་ཕྲུག་ཚོགས་པའི་ལས་འཆར་འགན་འཛིན། རྒྱལ་མཚན་ལགས་སུ་ཁྲིམས་གཞི་དེའི་སྐོར་བཀའ་འདྲི་ཞུས་པར་ཁོང་གིས་རྒྱ་ནག་གིས་ཁྲིམས་གཞི་དེའི་ནང་དུ་དོན་ཚན་ཆེན་པོ་བཞི་ཡོད་པའི་ནང་ནས་རྒྱལ་ཁབ་ཁ་བྲལ་དང་ཕྱི་ལོག་གི་རྒྱལ་ཁབ་དང་འབྲེལ་བ་སོགས་ཡོངས་སུ་ནག་ཉེས་ཅན་དུ་བསྒྱུར་རྒྱུ་ཡིན་པར་གསལ་བོར་བརྗོད་ཡོད་སྟབས། མ་འོངས་བར། ཧོང་ཀོང་མི་མང་གི་སྔར་ཡོད་ཀྱི་མང་གཙོ་རང་དབང་ཐོབ་ཐང་དེར་གནོད་སྐྱོན་ཆེན་པོ་ཐེབས་རྒྱུ་ཡིན་པར་ངོ་སྤྲོད་གནང་སོང་།

རྒྱ་གར་གཞུང་གིས་རྒྱ་ནག་གི་ WeChat འམ་སྐད་འཕྲིན་གཙོས་མཉེན་ཆས་ལྔ་བཅུ་ང་དགུ་བཀག་སྡོམ་གནང་འདུགཁ་སང་རྒྱ་གར་གཞུང་གིས་རྒྱ་གར་ནང་བཀོལ་སྤྱོད་བྱེད་བཞིན་པའི་རྒྱ་ནག་གི་མཉེན་ཆས་ང་དགུ་ཆེད་འདོན་གྱིས་མཉེན་ཆས་དེ་དག་གིས་རྒྱ་གར་གྱི་ས་ཁོངས་ཀྱི་བདག་དབང་དང་བདེ་འཇགས། དེ་བཞིན་རྒྱལ་སྲུང་སོགས་ལ་གནོད་འཚེ་བཟོ་ཡི་ཡོད་སྐོར་གསུངས་ནས་མཉེན་ཆས་དེ་དག་བཀག་སྡོམ་གནང་རྒྱུའི་སྤྱི་བསྒྲགས་ཤིག་སྤེལ་འདུག གཞི་རྩའི་རྒྱ་གར་ཕྱོགས་ནས་རྒྱ་ནག་གི་མཉེན་ཆས་བཀག་སྡོམ་གནང་བ་དེ་ཉེ་ལམ་རྒྱ་གར་བྱང་ཕྱོགས་ལ་དྭགས་སྤང་གོང་མཚོའི་ཁུལ་དུ་ཆགས་པའི་བོད་དང་རྒྱ་གར་གཉིས་ཀྱི་ས་མཚམས་སུ་རྒྱ་དཀར་ནག་གཉིས་ཀྱི་དམག་མིའི་དབར་གདོང་ཐུག་བྱུང་རྐྱེན་རྒྱ་གར་གྱི་དམག་མི་ཉི་ཤུའི་ཚེ་སྲོག་ཤོར་བའི་གནད་དོན་ལ་འཁོན་ལན་ཚུལ་དུ་དེ་ལྟར་གནང་བ་ཞིག་ལ་ངོས་འཛིན་གནང་གི་འདུག དཔྱད་ཞིབ་པ་ཁག་ཅིག་གིས་རྒྱ་གར་དང་རྒྱ་ནག་དབར་གྱི་གནས་སྟངས་ཛ་དྲག་ཏུ་འགྲོ་མུས་ལ་ལྟོས་མེད་མཉེན་ཆས་དེ་དག་རྒྱ་གར་ནང་བཀོལ་སྤྱོད་གནང་འཇུག་རྒྱུ་མེད་ཅེས་གསུངས་འདུག རྩ་བའི་མཉེན་ཆས་དེ་དག་བཀག་སྡོམ་གནང་བ་དེས་རྒྱ་ནག་གི་དཔལ་འབྱོར་ལ་གྱོང་གུན་གཏང་གི་ཡོད་སྟབས་སྤྱི་ཚོགས་དྲྭ་ལམ་བརྒྱུད་མང་ཚོགས་དུ་མས་དགའ་བསུ་ཞུས་ཡོད་ཀྱང་། སྐད་འཕྲིན་ལྟ་བུ་ནི་བོད་ཕྱི་ནང་གཉིས་སུ་བཞུགས་པའི་བོད་མིའི་དབར་འབྲེལ་མཐུད་མ་ལག་གཙོ་བོ་ཞིག་ཆགས་ཡོད་པར་བརྟེན་བོད་མི་ཁག་ཅིག་གིས་དེ་འབྲེལ་ཐད་ཐུགས་འཚབ་གནང་གི་འདུག རླུང་འཕྲིན་ཁང་གིས་རྣམ་ཀུན་ནས་སྐད་འཕྲིན་བརྒྱུད་བོད་ནང་ཕ་མ་གཙོས་སྤུན་མཆེད་དང་འབྲེལ་བ་གནང་མཁན་ཁག་ཅིག་ལ་མཉེན་ཆས་བཀག་སྡོམ་ཐོག་དགོངས་འཆར་གང་ཡོད་བཅར་འདྲི་ཞུས་པར་ཁོང་རྣམ་པས་སྤྱིར་བཏང་སྐད་འཕྲིན་འདི་བོད་ནང་འབྲེལ་ལམ་ཞུ་རྒྱུའི་མཉེན་ཆས་སྟབས་བདེ་ཞིག་ཆགས་ཀྱི་ཡོད་པ་རེད། འོན་ཀྱང་ཕྱོགས་གཅིག་ནས་རྒྱ་ནག་གིས་མཉེན་ཆས་དེ་དག་བརྒྱུད་སྒེར་གྱི་གནས་ཚུལ་ཁག་གསང་ཁྱེར་བྱེད་ཀྱི་ཡོད་སྟབས་དེས་སྐབས་རེ་སོ་སོའི་ནང་མི་ཚོར་དཀའ་ངལ་འཕྲད་སྲིད་པར་དོགས་ནས་དངངས་སྐྲག་ཡོང་གི་འདུག་པ་མ་ཟད། ད་རེས་རྒྱ་གར་གཞུང་གིས་རྒྱ་ནག་གི་མཉེན་ཆས་དེ་དག་བཀག་སྡོམ་གནང་རྐྱེན་གཞིས་བཞུགས་ནང་མི་དང་སྤུན་མཆེད་དག་དང་རྒྱང་ཐག་རིང་དུ་འགྲོ་ངེས་ཡིན་པར་བརྟེན་བློ་མི་བདེ་བ་བྱུང་སྐོར་སོགས་གསུངས་ཡོད། དེ་བཞིན་མཉེན་ཆས་བཀག་སྡོམ་གྱི་གནད་དོན་ཐད་བོད་ནང་གནས་བཞུགས་རྩོམ་པ་པོ་ཚེ་རིང་འོད་ཟེར་ལགས་ཀྱིས་ཀྱང་སྤྱི་ཚོགས་དྲྭ་ལམ་ཐོག་བློ་འཚབ་ཀྱི་རྣམ་པ་ཆེད་བཏོན་གནང་འདུག རླུང་འཕྲིན་ཁང་ནས་བོད་དོན་ལས་འགུལ་བསྟི་གནས་ཁང་གི་བརྡ་འཕྲིན་སྲུང་སྐྱོབ་ལས་གཞིའི་འགན་འཛིན་བློ་བཟང་རྒྱ་མཚོ་ལགས་སུ་མཉེན་ཆས་བཀག་སྡོམ་ཐད་དགོངས་འཆར་དང་བྱེས་བཞུགས་བོད་མི་རྣམས་ནས་བོད་ནང་འབྲེལ་བ་གནང་ཕྱོགས་ཐད་ལམ་སྟོན་གང་ཡོད་བཅར་འདྲི་ཞུས་པར་ད་ལན་རྒྱ་གར་གཞུང་གིས་བདེ་འཇགས་ལ་དགོངས་ཏེ་རྒྱ་ནག་གི་མཉེན་ཆས་དེ་དག་བཀག་སྡོམ་གནང་རྒྱུར་ཐུགས་ཐག་བཅད་པ་དེ་འོས་འཚམས་ཤིག་ཡིན་པ་དེ་ལྟར་ཡང་།  སྒོས་སྐད་འཕྲིན་དེའང་བཀག་སྡོམ་གནང་བར་བརྟེན་བཙན་བྱོལ་དུ་གནས་བཞུགས་བོད་མིས་བོད་ནང་འབྲེལ་བ་གནང་རྒྱུར་ངལ་བ་འཕྲད་ཆེར་འགྲོ་རྒྱུ་ཡིན་སྐོར་སོགས་གསུངས་སོང་། རྩ་བའི་རྒྱ་ནག་གི་མཉེན་ཆས་དེ་དག་བརྒྱུད་རྒྱ་ནག་ལ་རྒྱ་གར་ཁོ་ན་ནས་བརྒྱ་ཆ་ ༣༠ དང་ ༤༠ ཙམ་གྱི་དཔལ་འབྱོར་གྱི་ཡོང་འབབ་བྱུང་གི་ཡོད་པ་མ་ཟད།   རྒྱ་ནག་གིས་སྙན་གྲགས་ཆེ་བའི་ Tiktok མཉེན་ཆས་བརྒྱུད་རྒྱ་གར་ནས་ཡོང་འབབ་ཕོན་ཆེ་བྱུང་རྒྱུ་དམིགས་ཡུལ་ཀྱང་ཡོད་པ་རེད།  འོན་ཀྱང་ད་ཆ་རྒྱ་གར་དབུས་གཞུང་ནས་མཉེན་ཆས་དེ་དག་བཀག་སྡོམ་བྱེད་པས་ཐག་གཅོད་དེས་རྒྱ་ནག་གི་དཔལ་འབྱོར་ལ་གྱོང་གུད་ཆེན་པོ་བྱུང་ངེས་ཡིན་པ་བརྗོད་ཀྱི་ཡོད་པ་རེད།  

སང་ཉིན་ཚེས་ ༡ ཉིན། དབྱིན་ཡུལ་གཞུང་གིས་ཧོང་ཀོང་ཕྱིར་རྒྱ་ནག་ལ་རྩིས་སྤྲོད་བྱས་ནས་མི་ལོ་ ༢༣ འཁོར་གྱི་ཡོད་པའི་དུས་དྲན་ལ་འཁེལ་གྱི་ཡོད་པ་དང་བསྟུན།  དེ་རིང་རྒྱ་ནག་རྒྱལ་ཡོངས་མི་མང་འཐུས་མི་ཚོགས་ཆེན་གྱི་རྒྱུན་ལས་ཚོགས་ཆུང་གིས་སྤྱི་མོས་ཐོག་ཧོང་ཀོང་གི་བདེ་འཇགས་ཞེས་པའི་ཁྲིམས་གཞི་དེ་དངོས་སུ་གཏན་འབེབས་དང་དང་འབྲེལ། དེ་རིང་ཁྲིམས་གཞི་དེ་ཧོང་ཀོང་གི་རྨང་གཞིའི་ཁྲིམས་ལུགས་ནང་ཡར་འཇུག་བྱེད་རྒྱུ་ཡིན་པ་རེད་འདུགཧོང་ཀོང་མང་ཚོགས་ཐོག་རྒྱ་ནག་གཞུང་གིས་སྟངས་འཛིན་བྱེད་ཤུགས་ཆེ་རུ་གཏོང་རྒྱུར་དམིགས་པའི་ཧོང་ཀོང་བདེ་འཇགས་ཀྱི་ཁྲིམས་འཆར་དེ་འདི་ལོའི་ཟླ་བ་ལྔ་བའི་ནང་དུ་རྒྱ་ནག་གི་རྒྱལ་ཡོངས་མི་མང་འཐུས་མི་ཚོགས་ཆེན་གྱི་ཐོག་གཏན་འབེབས་བྱས་ཡོད་པ་དང་། བྷི་བྷི་སི་གསར་ལམ་གྱིས་གནས་ཚུལ་སྤེལ་བ་ལྟར་ན། ཐེངས་འདིར་ཁྲིམས་འཆར་དེ་དངོས་སུ་ཁྲིམས་ལ་བཅད་པ་དེ་ལྟར་ཡང་། དེའི་ནང་གསེས་ཁག་ཡོངས་གྲགས་ཀྱིས་ཕྱིར་བསྒྲགས་གནང་མེད་པ་དང་། སྤྱི་ཡོངས་ཀྱི་ཆ་ནས།  ཁྲིམས་གཞི་དེ་བརྒྱུད་ཧོང་ཀོང་གི་ནང་དུ་རྒྱལ་ཁབ་ཁ་བྲལ་དང་ངོ་ལོག་གི་ལས་འགུལ། དེ་བཞིན་འཇིགས་སྐུལ་རིང་ལུགས་དང་ཕྱི་རྒྱལ་དང་འབྲེལ་བ་སོགས་ཀྱི་བྱ་སྤྱོད་རྣམས་ནག་ཉེས་ཅན་དུ་བརྩིས་ནས་ཁྲིམས་ལྟར་ཐག་གཅོད་བྱེད་ཉེན་ཡོད་པ་ཞིག་ཆགས་ཡོད་པ་རེད། དེ་རིང་ཁྲིམས་གཞི་དེ་དངོས་སུ་གཏན་འབེབས་བྱུང་བའི་གསར་འགྱུར་ཐོན་མ་ཐག ཧོང་ཀོང་ནང་གི་མང་གཙོའི་ལུས་འགུལ་བ་གྲགས་ཅན། ན་གཞོན་ Joshua Wong དང་ Nathan Law གཉིས་ཀྱིས་འཕྲད་དུ་རང་ཉིད་ཀྱིས་གསར་འཛུགས་ཞུས་པའི་Demosisto ཞེས་པའི་ཧོང་ཀོང་གི་མང་གཙོ་ཚོགས་པ་ནས་དགོངས་པ་ཞུས་ཏེ་ཕྱིར་ཐོན་འདུག  སྐབས་དེར་ན་གཞོན་ Wong ལགས་ཀྱིས་ད་ནི་ཧོང་ཀོང་དེ་ཉེན་རྟོག་པའི་གསང་གནས་ཤིག་གམ། འཇིགས་སྐུལ་གྱི་བཙན་རྫོང་ཞིག་ཏུ་གྱུར་ཡོད་ཅེས་བརྗོད་ཡོད་པ་དང་། དེ་བཞིན་སྐུ་ཞབས་ Nathan Law ལགས་ཀྱིས་ཀྱང་། ད་ནི་ཧོང་ཀོང་གི་ནང་དུ་ཁྲག་དྲི་བྲོ་བའི་རིག་གནས་གསར་བརྗེ་ཞིག་གི་འགོ་ཚུགས་སོང་ཞེས་བརྗོད་དེ། ཁོང་ཉིད་མང་གཙོ་ཚོགས་པ་ནས་དགོངས་པ་ཞུས་ཟིན་ནའང་། མི་སྒེར་གྱི་ནུས་ཚོད་ཀྱི་ད་དུང་དམངས་གཙོའི་འཐབ་རྩོད་བྱེད་ཀྱི་ཡིན་པར་བསྒྲགས་ཏེ། ཧོང་ཀོང་མི་མང་བློ་སེམས་བརྟན་པོར་བཞུགས་རོགས་ཞེས་ཕྱིར་བསྒྲགས་གནང་འདུག གཞི་རྩའི་ཉེ་སྔོན་རྒྱ་ནག་གི་རྒྱལ་ཡོངས་འཐུས་མི་ཚོགས་ཆེན་ཐོག་ཧོང་ཀོང་རྒྱལ་ཁབ་ཀྱི་བདེ་འཇགས་ཁྲིམས་འཆར་གསར་པ་བཏོན་མ་ཐག་ཧོང་ཀོང་མང་ཚོགས་བརྒྱ་ཕྲག་ཁག་ཅིག་འདུ་འཛོམས་ཀྱིས་རྒྱ་གཞུང་ལ་ངོ་རྒོལ་གནང་བ་དང་།  ངོ་རྒོལ་དེའི་ཁྲོད་ཉེན་རྟོག་པས་ལས་འགུལ་བ་ ༣༠༠ ཙམ་ཞིག་འཛིན་བཟུང་བྱས་ཡོད་པ་རེད། སྐབས་དེར་ཨ་རིའི་ཕྱི་སྲིད་དྲུང་ཆེ་སྐུ་ཞབས་ Mike Pompeo མཆོག་གིས་ཧོང་ཀོང་དེ་ད་ནས་བཟུང་རྒྱ་ནག་གི་རང་སྐྱོང་ས་ཁུལ་ཞིག་མིན་པ་དང་།  ཨ་རིས་ཧོང་ཀོང་མང་ཚོགས་ལ་རྒྱབ་སྐྱོར་ཡོད་ཅེས་སྤྱི་ཚོགས་དྲ་ལམ་དུ་ཕྱིར་བསྒྲགས་གནང་ཡོད་པ་རེད། མ་ཟད་ཧོང་ཀོང་མི་མང་གིས་ངོ་རྒོལ་གྱི་ལས་འགུལ་སྤེལ་ཏེ། ཁྲིམས་གཞི་དེ་ནི་ཀོང་ཧོང་གི་ཁྲིམས་བཟོ་དང་འབྲེལ་བ་མེད་པར། ཐད་ཀར་རྒྱ་ནག་མི་མང་འཐུས་མི་ཚོགས་ཆེན་གྱིས་གསར་དུ་བཟོས་པ་ནི་འགྲོ་ལུགས་དང་མི་མཐུན་པ་ཞིག་ཡིན་པ་མ་ཟད།  ཁྲིམས་འཆར་འདི་བརྒྱུད་ནས་ཧོང་ཀོང་ནང་གི་ཁྲིམས་བཟོ་རང་དབང་ལ་ཉེན་ཁ་འཕྲད་རྒྱུ་ཡིན་དང་སྤྱི་ཡོངས་ཀྱི་མི་མང་གི་རང་དབང་རྡོག་རོལ་ཐེབས་རྒྱུ་ཡིན་པར་ཕྱིར་བསྒྲགས་བྱས་ཡོད་པ་རེད།ཧོང་ཀོང་གི་སྤྱི་ཁྱབ་ Carrie Lam གྱིས།  རྒྱ་ནག་གི་ཧོང་ཀོང་བདེ་འཇགས་ཀྱི་ཁྲིམས་འཆར་ཞེས་པ་དེ་ཡིས་མི་མང་གི་གཞི་རྩའི་ཐོབ་ཐང་ལ་གནོད་སྐྱོན་གང་ཡང་ཐེབས་རྒྱུ་མིན་པ་མ་ཟད། ཧོང་ཀོང་མི་མང་གི་ཐོབ་ཐང་ཁག་སྔར་སྲོལ་ལྟར་གནས་རྒྱུ་ཡིན་པར་བསྒྲགས་ཡོད་ནའང་། ཁྲིམས་གཞི་དེར་སྐྱོན་བརྗོད་བྱེད་མཁན་རྣམས་ཀྱིས།  ཐེངས་འདིའི་ཁྲིམས་གཞི་དེ་ཡིས་ཧོང་ཀོང་གི་མང་གཙོའི་ལས་འགུལ་བ་རྣམས་ལ་འབུར་འཇོམ་གྱིས། ཧོང་ཀོང་གི་ཁུལ་དུ་རྒྱ་ནག་དམར་ཤོག་གཞུང་གི་ཤན་ཤུགས་ཆེ་རུ་གཏོང་ཆེད་དུ་ཡིན་པར་བསྒྲགས་ཡོད་པ་རེད།རྒྱལ་སྤྱིའི་ཉེས་ཡང་ཚོགས་པས།  ཧོང་ཀོང་གི་བདེ་འཇགས་ཞེས་པའི་ཁྲིམས་གཞི་དེ་ནི་སྲིད་གཞུང་ལ་ཁ་གཏད་གཅོག་མཁན་རྣམས་ལ་འབུར་འཇོམ་གཏོང་བྱེད་ཀྱི་མཚོན་ཆ་ཞིག་ཡིན་པར་འགྲེལ་བརྗོད་དང་སྦྲགས།  ཁྲིམས་གཞི་དེ་ཧོང་ཀོང་གི་ཉེ་བའི་ལོ་རྒྱུས་ནང་གི་འགྲོ་བ་མིའིཐོབ་ཐང་གི་ཉེན་ཁ་ཆེ་ཤོས་ཤིག་རེད་ཅེས་བསྒྲགས་འདུག དེ་བཞིན། ཐེ་ཝན་གཞུང་གིས། རྒྱ་ནག་གིས་ལག་བསྟར་བྱེད་རྩིས་ཀྱི་ཧོང་ཀོང་གི་བདེ་འཇགས་ཞེས་པའི་ཁྲིམས་གཞི་དེ་ཡིས་ཧོང་ཀོང་ནང་གི་རང་དབང་དང་འགྲོ་བ་མིའི་ཐོབ་ཐང་ལ་གནོད་སྐྱོན་ཆེན་པོ་ཐེབས་རྒྱུ་ཡིན་སྟབས།  ཐེ་ཝན་གྱི་མི་སེར་རྣམས་ཧོང་ཀོང་གི་ནང་དུ་འགྲོ་སྐྱོད་བྱས་ན་ཉེན་ཁ་ཆེན་པོ་ཡོད་པར་ཡོངས་གྲགས་ཀྱིས། མི་མང་ཧོང་ཀོང་དུ་འགྲོ་སྐྱོད་བྱེད་རྒྱུ་མེད་པའི་རེ་སྐུལ་བྱས་ཡོད་པ་རེད་འདུག གཞི་རྩའི་ཐེངས་འདིར་རྒྱ་ནག་གིས་གཏན་འབེབས་བྱས་པའི་ཧོང་ཀོང་རྒྱལ་ཁབ་བདེ་འཇགས་ཀྱི་ཁྲིམས་གཞི་ཞེས་པ་དེ་བརྒྱུད་ནས་སྤྱི་ཡོངས་ཀྱི་ཧོང་ཀོང་གི་བདེ་འཇགས་ཙམ་མ་ཟད། སློབ་གྲྭ་སོགས་ཤེས་ཡོན་གྱི་ལྟེ་གནས་སུ་ཡང་ཧོང་ཀོང་གི་བདེ་འཇགས་སོགས་ཀྱི་དབང་ཚད་འདིའི་འོག་ཏུ་བསྡུས་ཡོད་པ་ལྟར།  རྒྱ་ནག་པེ་ཅིན་གྱི་སློབ་སྟོན་པ་ཞིག་གི་རོགས་འདེགས་འོག    ཧོང་ཀོང་སྤྱི་ཁྱབ་པར་བདེ་འཇགས་ཀྱི་ཆེད་མཁས་པ་བསྐོ་བཞག་བྱེད་རྒྱུའི་ཐོབ་ཐང་ཡང་སྤྲད་ཡོད་པ་ལྟར། སྤྱི་ཡོངས་ཀྱི་ཆ་ནས་པེ་ཅིན་སྲིད་གཞུང་གིས་ཁྲིམས་གཞི་དེ་ཅི་ལྟར་འགྲེལ་བརྗོད་བྱེད་རྒྱུའི་དབང་ཚད་ཀྱང་ཡོད་པར་བཟོས་ཡོད་འདུག

མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་དམིགས་བསལ་ཁེ་ལས་རྟོག་ཞིབ་སྡེ་ཚན་ ༣༠ ནས་རྒྱ་ནག་གཞུང་གིས་བོད་དང་ཧོང། དེ་བཞིན་ཤར་ཏུར་ཀི་སི་ཐན་བཅས་ནང་མང་ཚོགས་ཐོག་དྲག་གནོན་དང་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་གནས་སྟངས་ལ་བློ་འཚབ་ཀྱི་རྣམ་པ་ཆེས་ཆེར་ཆེད་འདོན་དང་འབྲེལ། རྒྱལ་ཚོགས་ཀྱི་ངོས་ནས་རྒྱ་ནག་ཐོག་ཕྱོགས་ལྷུང་མེད་པའི་རང་དབང་ཅན་གྱི་ཞིབ་འཇུག་ཚོགས་ཆུང་ཆེད་འཛུགས་དགོས་ཞེས་གསུངས་འདུགསུད་སི་ཇི་ནི་ཝར་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལྷན་ཚོགས་ཐེངས་ ༤༤ པ་འཚོགས་ལ་ཉེ་བ་དང་བསྟུན་ཟླ་བ་འདིའི་ཕྱི་ཚེས་ ༢༦ ཉིན་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་དམིགས་བསལ་ཁེ་ལས་རྟོག་ཞིབ་སྡེ་ཚན་ ༣༠ ཡི་ཁེ་ལས་རྟོག་ཞིབ་མི་སྣ་ ༥༠ མན་མཉམ་འཐུས་ཀྱིས་རྒྱ་ནག་ཐོག་དམིགས་བསལ་སྤྱིར་བསྒྲགས་སྤེལ་འདུག་པ་དང། སྤྱིར་བསྒྲགས་ཐོག་དམིགས་བསལ་ཁེ་ལས་རྟོག་ཞིབ་མི་སྣ་རྣམས་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་དང་ཚོགས་མི་རྒྱལ་ཁབ་ཁག་ལ་རྒྱ་ནག་གཞུང་གི་མངའ་འོག་ཏུ་ཡོད་པའི་བོད་རང་སྐྱོང་ལྗོངས་མངའ་ཁུལ་དང་ཤར་ཏུར་ཀི་སི་ཐན་རང་སྐྱོང་ལྗོངས་མངའ་ཁུལ། དེ་བཞིན་ཧོང་ཀོང་བཅས་ཀྱི་མང་ཚོགས་ཀྱི་གཞི་རྩའི་འགྲོ་བ་མིའི་ཐོབ་ཐང་དང་རང་དབང་སྲུང་སྐྱོབ་ཆེད་དུ་དགོས་འདུན་དོན་ཚན་གསུམ་ཅན་ཞིག་ཆེད་འདོན་གནང་འདུག དགོས་འདུན་དོན་ཚན་གསུམ་ཅན་དེའི་ནང་རྒྱ་གཞུང་གིས་གོང་གསལ་ས་ཁུལ་དེ་དག་ནང་གི་མང་ཚོགས་ཀྱི་འགྲོ་བ་མིའི་ཐོབ་ཐང་དང་རང་དབང་རྡོག་རོལ་གཏོང་བཞིན་པའི་གནད་དོན་ཐོག་རྒྱལ་ཚོགས་ཀྱིས་བསྐྱར་ཞིབ་གནང་སྟེ་རྒྱ་ནག་རང་གི་ཐོག་དམིགས་བསལ་གྱི་ཚོགས་དུས་རྒྱལ་ཚོགས་ཀྱི་ངོས་ནས་བསྐོང་ཚོགས་གནང་དགོས་པ་དང། རྒྱལ་ཚོགས་ནས་རྒྱ་ནག་ཐོག་ཕྱོགས་ལྷུང་མེད་པའི་རང་དབང་ཅན་གྱི་ཞིབ་འཇུག་ཚོགས་ཆུང་ཆེད་འཛུགས་བྱེད་དགོས་པ། དམིགས་བསལ་ཁེ་ལས་རྟོག་ཞིབ་མི་སྣ་འམ་དམིགས་བསལ་ཁེ་ལས་རྟོག་ཞིབ་ཚོགས་ཆུང། དེ་བཞིན་དམིགས་བསལ་ཁེ་ལས་སྐུ་ཚབ་བཅས་ཀྱི་ཆེད་འཛུགས་ཀྱིས་རྒྱ་ནག་ནང་གི་འགྲོ་བ་མིའི་ཐོབ་ཐང་སྤྱི་དང་རྒྱ་ནག་གིས་དབྱེ་བའི་བོད་རང་ལྗོངས་དང་ཤར་ཏུར་ཀི་སི་ཐན་མངའ་ཁུལ། དེ་བཞིན་ཧོང་ཀོང་བཅས་ཀྱི་འགྲོ་བ་མིའི་ཐོབ་ཐང་གི་གནས་སྟངས་ཛ་དྲག་ཡོད་པའི་ས་ཁུལ་ཐོག་ལྟ་ཞིབ་དང་ཞིབ་འཇུག་གྱི་ལོ་འཁོར་སྙན་ཐོ་འདོན་སྤེལ་དགོས་པ། རྒྱལ་ཚོགས་ཀྱི་ཚོགས་མི་རྒྱལ་ཁབ་དང་འབྲེལ་ཡོད་ལས་ཁུངས་ཁག་གི་རྒྱ་ནག་དང་ལྷན་དུ་འབྲེལ་མོལ་བྱེད་པའི་སྐབས་རྒྱ་ནག་གི་ངོས་ནས་དེ་སྔ་འགྲོ་བ་མིའི་ཐོབ་ཐང་སྲུང་སྐྱོབ་ཞུ་རྒྱུར་ཁས་ལེན་གྱི་འབྲུ་དོན་ཁག་ལག་བསྟར་བྱེད་བཅུག་དགོས་ཞེས་འཁོད་འདུག སྤྱིར་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་དམིགས་བསལ་ཁེ་ལས་རྟོག་ཞིབ་མི་སྣའི་སྡེ་ཚན་ཁག་ཤས་ཀྱིས་རྒྱུན་དུ་རྒྱ་ནག་གཞུང་ལ་འགྲོ་བ་མིའི་ཐོབ་ཐང་གནས་སྟངས་ཐོག་འདྲི་རྩད་དང་སེམས་འཚབ་དང་འབྲེལ་བའི་སྤྱིར་བསྒྲགས་རིགས་སྤེལ་གྱི་ཡོད་ཀྱང་། གནད་དོན་དབྱེ་ཞིབ་པ་ཚོས་ཐེངས་འདིའི་རྒྱལ་ཚོགས་ཀྱི་དམིགས་བསལ་ཁེ་ལས་དམིགས་བསལ་རྟོག་ཞིབ་སྡེ་ཚན་ཁག་ ༣༠ ནས་རྒྱ་ནག་ཐོག་མཉམ་འཐུས་ཀྱིས་སྤྱིར་བསྒྲགས་སྤེལ་ཏེ་དགོས་འདུན་བཏོན་པ་འདི་ནི་བྱུང་མྱོང་མེད་པའི་གནས་ཚུལ་ཞིག་ཆགས་ཡོད་པར་འགྲེལ་བརྗོད་གནང་བཞིན་འདུག དེ་བཞིན་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཁེ་ལས་རྟོག་ཞིབ་པ་རྣམས་ནས་སྤེལ་བའི་སྤྱིར་བསྒྲགས་ནང་རྒྱ་ནག་གཞུང་གིས་བོད་དང་ཧོ་ཀོང་ཤར་ཏུར་ཀི་སི་ཐན་ནང་མང་ཚོགས་ཐོག་དྲག་གནོན་དང་ཆོས་དད་རང་དབང་རྡོག་རོལ། འགྲོ་བ་མིའི་ཐོབ་ཐང་སྲུང་སྐྱོབ་བྱེད་མཁན་རྣམས་འཛིན་བཟུང་བཀག་ཉར། དེ་བཞིན་རྒྱ་གཞུང་གིས་རྒྱ་ནག་ནས་ཐོན་པའི་ཏོག་དབྱིབས་གཉན་རིམས་ ༡༩ དང་འབྲེལ་དངོས་ཡོད་གནས་ཚུལ་ཕྱིར་གྱར་བྱེད་མཁན་གྱི་སྨན་པ་དང་གསར་འགོད་པའི་སྨྲ་བརྗོད་རང་དབང་རྡོག་རོལ་བཏང་བའི་གནད་དོན་ཁག་དང་རྒྱལ་ཚོགས་ཁེ་ལས་རྟོག་ཞིབ་མི་སྣས་རྒྱ་ནག་གི་འགྲོ་བ་མིའི་ཐོབ་ཐང་གནས་སྟངས་ཐོག་ད་བར་འདྲི་རྩད་བྱས་པ་ཁག་ལ་ཁས་ལེན་བྱེད་ཀྱི་མེད་པ་སོགས་མངོན་གསལ་གྱིས་རྒྱ་གཞུང་གི་བྱ་སྤྱོད་ཁག་ཐེར་འདོན་གནང་འདུགལྷག་པར་དུ་རྒྱལ་ཚོགས་ཀྱི་དམིགས་བསལ་ཁེ་ལས་རྟོག་ཞིབ་སྡེ་ཚན་ཁག་ནས་རྒྱལ་ཚོགས་ལ་རྒྱ་ནག་སྤྱི་དང་སྒོས་རྒྱ་ནག་གི་མངའ་འོག་ཏུ་ཡོད་པའི་བོད་དང་ཧོང་ཀོང། དེ་བཞིན་ཤར་ཏུར་ཀི་སི་ཐན་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐོག་བསྐྱར་ཞིབ་གནང་རྒྱུའི་དུས་ལ་བབ་འདུག་ཅེས་བརྗོད་པ་མ་ཟད། རྒྱལ་ཚོགས་དང་རྒྱལ་སྤྱིའི་གཞུང་སྒེར་ཚོགས་སྡེ་ཁག་ནས་རྒྱ་ནག་གཞུང་གི་ངོས་ནས་ཁས་ལེན་བྱས་པའི་རྒྱལ་སྤྱིའིའགྲོ་བ་མིའི་ཐོབ་ཐང་སྲུང་སྐྱོབ་ཀྱི་འབྲུ་དོན་ཁག་དོན་འཁྱོལ་ལག་བསྟར་བྱེད་དགོས་ཞེས་ནན་བརྗོད་ཀྱང་གནང་འདུགཐེངས་འདིའི་རྒྱལ་ཚོགས་ཀྱི་དམིགས་བསལ་ཁེ་ལས་རྟོག་ཞིབ་སྡེ་ཚན་ ༣༠ ཡིས་རྒྱ་ནག་ཐོག་སྤེལ་བའི་བསྒྲགས་གཏམ་འདིར་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་རྒྱབ་སྐྱོར་དང་འབྲེལ་དགའ་བསུའི་བསྒྲགས་གཏམ་ཞིག་སྤེལ་དང་འབྲེལ། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ངོས་ནས་རྒྱ་ནག་གཞུང་གིས་འགྲོ་བ་མིའི་ཐོབ་ཐང་ལ་རྡོག་རོལ་བཏང་བའི་གནད་དོན་ཐོག་དམིགས་བསལ་ཚོགས་དུས་ཤིག་འཚོགས་དགོས་པའི་རེ་འདུན་གནང་འདུག

འཇར་འཁོད་བོད་རིགས་ཚོགས་པའི་ངོས་ནས་འཇར་མི་ནི་གཞུང་མང་གཉིས་ཀྱིས་ལ་བོད་ནང་གི་དངོས་ཡོད་གནས་སྟངས་ར་སྤྲོད་དང་རྒྱ་གཞུང་གིས་གདོང་རིས་དང་བྱ་སྤྱོད་ངོ་མ་ཐེར་འདོན་གནང་རྒྱུ་དང་འབྲེལ་དགོས་འདུན་དོན་ཚན་དྲུག་ཅན་ཞིག་གི་ཐོག་དེ་རིང་ཕྱི་ཚེས་༢༩  སྔ་དྲོ་ཡོ་རོབ་རྒྱལ་ཁབ་འཇར་མན་གྱི་རྒྱལ་ས་རྙིང་པ་ Bonn ནས་འཇར་མཱ་ནི་རྒྱལ་ས་ Berlin བར་བོད་དོན་གོ་རྟོགས་ཀྱི་རྐང་འཁོར་སྐོར་སྐྱོད་ཀྱི་ལས་འགུལ་ཞིག་དབུ་འཛུགས་གནང་འདུག འཇར་འཁོད་བོད་རིགས་ཚོགས་པའི་ཚོགས་གཙོ་བློ་བཟང་ཕུན་ཚོགས་ཀྱིས་རླུང་འཕྲིན་ཁང་ལ་འགྲེལ་བརྗོད་གནང་གསལ་ད་ལན་བོད་དོན་རྐང་འཁོར་སྐྱོད་ལས་འགུལ་ཁྲོད་ཁུལ་དེའི་ནང་བོད་མི་རྣམས་ནས་འཇར་མན་གཞུང་མང་གཉིས་ལ་ཞུ་གཏུག་གནང་རྒྱུའི་དགོས་དོན་དྲུག་ནི་བོད་ཀྱི་བླ་སྤྲུལ་ཡང་སྲིད་ངོས་འཛིན་གནང་རྒྱུའི་ལམ་སྲོལ་དང་དེ་བཞིན་བོད་མིའི་ཆོས་དད་རང་དབང་ཐོག་རྒྱ་གཞུང་ལ་ཐེ་བྱུས་བྱ་རྒྱུའི་ཐོབ་ཐང་མེད་པའི་གྲོས་ཆོད་ཅིག་འཇར་མན་གྲོས་ཚོགས་ནང་གཏན་འབེབས་གནང་དགོས་པ་དང། རྒྱ་ནག་གཞུང་ནས་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་༸སྐུ་དངོས་གང་དུ་བཞུགས་ཡོད་མེད་ཡོངས་ཁྱབ་ཞུ་དགོས་པ། བོད་ཀྱི་ཆབ་སྲིད་བཙོན་པ་རྣམས་གློད་བཀྲོལ་དགོས་པ། འཇར་མན་གྲོས་ཚོགས་ནས་རྒྱ་ནག་ནང་ཕར་འགྲོ་ཚུར་འོང་གི་ཁྲིམས་གཞི་གཏན་འབེབས་གནང་དགོས་པ། གཉིས་སྨན་དབུ་མའི་ལམ་གྱི་ཐོག་༸གོང་ས་མཆོག་གི་སྐུ་ཚབ་ལྷན་དུ་གྲོས་མོལ་གནང་བར་རྒྱ་ནག་གཞུང་ལ་ཤུགས་གནོན་སྤྲོད་དགོས་པ། རྒྱ་གཞུང་གིས་བོད་ནང་བཟང་ཕྱོགས་ཀྱི་འགྱུར་བ་མ་གཏང་ཚེ་རྒྱ་ནག་དང་མཉམ་དུ་ཚོང་འབྲེལ་མཚམས་འཇོག་དགོས་པ། དེ་བཞིན་རྒྱ་ནག་ནས་བྱུང་བའི་ཏོག་དབྱིབས་གཉན་རིམས་རྐྱེན་གྱིས་འཛམ་གླིང་ཡོངས་ལ་གོད་ཆག་ཕོག་པའི་རྒྱུ་རྐྱེན་རྒྱ་ནག་ཡིན་པ་ར་སྤྲོད་གནང་དགོས་པ་བཅས་ཆེད་བཀོད་གནང་འདུགཐེངས་འདི་འཇར་མན་གྲོང་ཁྱེར་ Bonn ནས་རྒྱལ་ས་ Berlin བར་རྒྱང་ཐག་སྤྱི་ལེ་༧༠༠ མན་ཙམ་གྱི་སྐོར་སྐྱོད་ཁྲོད་བོད་དོན་རྐང་འཁོར་སྐོར་སྐྱོད་བ་རྣམས་ནས་ཁུལ་དེའི་མངའ་སྡེ་ཆེ་ཁག་བཞི་དང་གྲོང་ཁྱེར་ཆེ་ཁག་གསུམ། དེ་བཞིན་གྲོང་རྡལ་ཁག་ ༢༥ ལྷག་དང་གྲོང་སྡེ་ལས་ཁུངས། འཇར་མན་གྱི་སྲིད་བློན་གཙོས་གནད་ཡོད་མི་སྣ་དང་བློན་ཆེན་ལས་ཁུངས། གྲོས་ཚོགས་ཚོགས་གཙོ་གཙོས་འཐུས་མི་རྣམས་ལ་གོང་གསལ་དགོས་འདུན་དོན་ཚན་དྲུག་ལ་རྒྱབ་སྐྱོར་གྱི་ཞུ་གཏུག་ཞུ་རྒྱུ་རེད་འདུག སྤྱིར་ཁོང་རྣམས་ནས་བོད་དོན་རྐང་འཁོར་སྐྱོད་ཀྱི་ལས་འགུལ་དེ་དེ་རིང་ཕྱི་ཚེས་ ༢༩ ནས་དབུ་འཛུགས་ཀྱིས་རིང་མིན་ཕྱི་ཟླ་ ༧ ཚེས་ ༦ ༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༥ བདག་གིར་བཞེས་པའི་༸སྐུའི་འཁྲུངས་སྐར་ཉིན་མོར་འཇར་མན་གྱི་རྒྱལ་ས་ Berlin སྲིད་བློན་ལས་ཁུངས་ཀྱི་མདུན་དུ་ལས་ལས་འགུལ་མཇུག་སྒྲིལ་གནང་རྒྱུ་དང་འདི་བཞིན་ཉིན་མོར་དེར་མགོན་པོ་༸གང་ཉིད་མཆོག་གི་༸སྐུའི་འཁྲུངས་སྐར་དུས་ཆེན་སྲུང་བརྩི་ཞུ་གཏན་འཁེལ་འདུག    

དེ་རིང་ཟླ་ ༦ ཚེས་ ༢༦ ཉིན་མོ་འདི་མཉམ་འབྲེལ་རྒྱལ་ཚོགས་ནས་གཏན་འབེབས་གནང་བའི་རྒྱལ་སྤྱིའི་མནར་གཅོད་འགོག་རྒོལ་ཉིན་མོ་ཡིན་པ་དང་བསྟུན་༸སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེའི་ཚ་མོ་ཉི་མ་ལྷ་མོ་ལགས་ཀྱིས་བརྙན་ཐུང་བརྒྱུད་དེ་རྒྱལ་སྤྱིའི་ཚོགས་སྡེ་ཁག་ལ་ཁོ་མོའི་ཨ་ཞང་བཙོན་ཁང་ནང་གློ་བུར་དུ་དགོངས་པ་རྫོགས་པའི་གནད་དོན་ཐད་ཞིབ་འཇུག་མཐིལ་ཕྱིན་གནང་ཕྱིར་རྒྱ་གཞུང་ལ་གནོན་ཤུགས་སྤྲོད་དགོས་པའི་རེ་སྐུལ་ཞུས་འདུགརྒྱལ་ཚོགས་ནས་ལོ་ལྟར་ཕྱི་ཟླ་ ༦ ཚེས་ ༢༦ ཉིན་མོ་དེ་རྒྱལ་སྤྱིའི་མནར་གཅོད་འགོག་རྒོལ་གྱི་དུས་ཚིགས་སུ་སྲུང་བརྩི་ཞུས་ནས་འཛམ་གླིང་ས་ཕྱོགས་གང་སར་སྡུག་སྦྱོང་མནར་གཅོད་མྱངས་དང་མྱོང་བཞིན་པ་རྣམས་ལ་གདུང་སེམས་མཉམ་བསྐྱེད་དང་མནར་གཅོད་ཀྱི་བྱ་སྤྱོད་ལ་ཁྲིམས་འགལ་ཡིན་པར་ངོས་འཛིན་གྱིས་མཐའ་གཅིག་ཏུ་ངོ་རྒོལ་གནང་བཞིན་ཡོད་པ་ལྟར་བཞུགས་སྒར་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་༸སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་དམ་པའི་ཚ་མོ་ཉི་མ་ལགས་ཀྱིས་རྒྱལ་སྤྱིའི་ཚོགས་སྡེ་ཁག་ལ་རིན་པོ་ཆེ་སྐུ་གྲོངས་རྐྱེན་ཐད་ཞིབ་འཇུག་མཐིལ་ཕྱིན་པ་གནང་དགོས་པའི་རེ་སྐུལ་གནང་བའི་བརྙན་ཐུང་ཞིག་འདོན་སྤེལ་གནང་བ་བརྒྱུད་ནས་རྒྱ་གཞུང་གིས་བོད་ནང་ངན་བྱུས་ཀྱི་རྣམ་པ་འདྲ་མིན་ཐོག་ནས་བོད་མིར་མི་སྤྱོད་ལས་འདས་པའི་མནར་གཅོད་བཏང་དང་གཏོང་བཞིན་པར་སྐྱོན་བརྗོད་ཤུགས་ཆེ་གནང་འདུག ལྷག་པར་དུ་རྒྱ་གཞུང་གིས་བོད་ནང་གི་འགྲོ་བ་མིའི་ཐོབ་ཐང་རྡོག་རོལ་དང་འབྲེལ་བོད་མི་གང་བྱུང་འཛིན་བཟུང་བཀག་ཉར་དང་དུས་ཡུན་རིང་པོར་ཁྲིམས་འགལ་བཀག་སྐྱིལ་བྱས་ཏེ་བཙན་དབང་གིས་ཉེས་འཛུགས་ཁས་ལེན་འཇུག་གི་ཡོད་པ་མ་ཟད་བོད་མི་ཆབ་སྲིད་བཙོན་པ་རྣམས་ལ་དྲང་བདེན་གྱི་ཁྲིམས་ཞིབ་མེད་པའི་ཁར་མི་སྤྱོད་ལས་འདས་པའི་ཉེས་རྡུང་ཚད་མེད་བཏང་བའི་དབང་གིས་མཐར་གཟུགས་པོ་ནད་གཅོང་དུ་གྱུར་ནས་འདས་གྲོངས་སུ་གྱུར་བ་དང་མང་ཆེ་བ་ཛ་དྲག་གནས་སྟངས་འོག་བཙོན་འཇུག་དུས་ཡུན་མ་ཚང་གོང་དུ་བཙོན་གྲོལ་བཏང་ཡོད་པ་མངོན་གསལ་གནང་འདུགདེ་རིང་རྒྱལ་སྤྱིའི་མནར་གཅོད་འགོག་རྒོལ་ཉིན་མོ་དང་བསྟུན་ཉི་མ་ལྷ་མོ་ལགས་ཀྱིས་འདོན་སྤེལ་གནང་བའི་བརྙན་ཐུང་ནང་ཁོང་གིས་༸སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་ནི་མི་མང་པོས་དད་གུས་ཞུ་ཡུལ་གྱི་བླ་མ་ཞིག་ཡིན་པ་དང་། ཁོང་ནི་རྒྱ་གཞུང་གིས་ཚེ་བཙོན་ཁྲིམས་ཐག་བཅད་དེ་བཙོན་ཁང་དུ་མི་ལོ་ ༡༣ རིང་བཞུགས་སྐབས་གློ་བུར་དུ་སྐུ་གྲོངས་ཡོད་པ་དང་ཕྱིས་སུ་རིན་པོ་ཆེའི་སློབ་མ་བློ་བཟང་དོན་གྲུབ་ལགས་ཀྱང་གནད་དོན་དེ་འབྲེལ་ཐོག་ཟླ་བ་བརྒྱད་ཙམ་རིང་དོ་དམ་བཀག་ཉར་གྱིས་སྡུག་སྦྱོང་མནར་གཅོད་མང་དག་ཅིག་བཏང་ནས་མཐར་སྲོག་ཐོག་བཏང་ཡོད་པ་མ་ཟད། གནད་དོན་དེ་འབྲེལ་རྐྱེན་པས་བོད་མི་མང་དག་ཅིག་བཙོན་ལ་ཚུད་པ་དང་དེ་བཞིན་མང་དག་ཅིག་གིས་རྒྱ་གཞུང་ལ་དྲང་བདེན་གྱི་ཁྲིམས་བཤེར་ཡོང་སླད་འབོད་སྐུལ་ཞུ་གང་ཐུབ་གནང་ཡོད་ཀྱང་རྒྱ་གཞུང་གིས་དེར་ངོས་ལེན་མེད་པར་རིན་པོ་ཆེ་དགོངས་པ་རྫོགས་རྐྱེན་ལ་བརྟག་དཔྱད་གནང་དབང་སྤྲད་མེད་པ་མ་ཟད་སྐུ་གྲོངས་པའི་དཔང་ཡིག་ཚད་ལྡན་མེད་ཀྱང་། ཚང་མས་རིན་པོ་ཆེ་མཆོག་སྐུ་གྲོངས་རྐྱེན་ཐད་ཞིབ་འཇུག་མཐིལ་ཕྱིན་གནང་བར་རྒྱ་གཞུང་ལ་གནོན་ཤུགས་སྤྲོད་དགོས་པའི་རེ་སྐུལ་ཞུས་འདུགལྷག་དོན་ལོ་ངོ་ ༢༥ ལྷག་གི་རིང་ལ་རྒྱ་གཞུང་གིས་འཛིན་བཟུང་བཙན་ཁྲིད་བྱས་ནས་གར་སོང་ཆ་མེད་དུ་གྱུར་བའི་བོད་མིའི་ཆབ་སྲིད་བཙོན་པ་༸ཀུན་གཟིགས་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གིས་གཙོས་པའི་བོད་མི་ཆབ་སྲིད་བཙོན་པ་རྒྱ་ནག་གཞུང་གི་བཙན་དབང་འོག་ནས་གང་མགྱོགས་གློད་བཀྲོལ་ཡོང་ཐབས་སུ་ཚང་མས་ཤུགས་གནོན་འཕར་མ་གནང་དགོས་པ་གསུངས་འདུག