Tibetan Royal Year of 2151 | Year of the Wood Dragon

རྒྱལ་སྤྱི།

   བོད་ཀྱི་སོན་རྩ་ཚོས་བོད་ཀྱི་ཁོར་ཡུག་གི་གནས་བབ་ཤེས་རྟོགས་བྱེད་དགོས།

སུད་ཌེན་རྒྱལ་ཁབ་ཀྱི་རང་ལོ་བཅུ་དྲུག་ཡིན་པའི་ཁོར་ཡུག་གི་ལས་འགུལ་བ་གྲགས་ཅན་བུ་མོ་ Greta Thunberg ལགས་ཀྱིས་སྣེ་ཁྲིད་པའི་འོག་ཁ་སང་རྒྱལ་སྤྱིའི་སློབ་ཕྲུག་ས་ཡ་མང་པོས་རང་བྱུང་ཁོར་ཡུག་སྲུང་སྐྱོབ་དང་འབྲེལ་བའི་ལས་འགུལ་རྒྱ་ཆེ་སྤེལ་བའི་ཁྲོད་བོད་མི་རྣམས་ནས་ཀྱང་རང་ཉིད་ཀྱི་གནས་ཡུལ་ས་གནས་སོ་སོའི་ལས་འགུལ་ནང་མཉམ་ཞུགས་དང་གོ་རྟོགས་ཀྱི་ཟབ་སྦྱོང་གོ་སྒྲིག དེ་བཞིན་བརྙན་པར་དང་བརྙན་ཐོག་སོགས་འདོན་སྤེལ་བརྒྱུད་བོད་ནང་གི་ཁོར་ཡུག་དང་འབྲེལ་བའི་ཛ་དྲག་གི་དཀའ་ངལ་གསལ་འདོན་གནང་འདུག རྒྱལ་སྤྱིའི་བོད་དོན་འབྲེལ་མཐུད་ལས་ཁང་ནས་ཁ་སང་སྐར་མ་གཅིག་ཅན་གྱི་བརྙན་ཐུང་ཞིག་འདོན་སྤེལ་གནང་བ་བརྒྱུད་ནས་བོད་མཐོ་སྒང་གི་ཚ་དྲོད་འཕར་ཚད་དེ་གོ་ལ་སྤྱི་ཡོངས་ལས་ལྡབ་གསུམ་མང་བ་འཕར་བཞིན་ཡོད་སྐོར་གསུངས་ཏེ་རྒྱལ་སྤྱིའི་ཚོགས་སྡེ་ཁག་གནས་བོད་ནང་གི་ཛ་དྲག་གི་དཀའ་ངལ་དེ་སེལ་རྒྱུའི་དུས་ལ་བབ་ཡོད་པ་གསུངས་འདུག  བོད་རང་བཙན་སློབ་ཕྲུག་ཚོགས་པ་དང་དབུས་བོད་ཀྱི་གཞོན་ནུ་ལྷན་ཚོགས། རྒྱལ་སྤྱིའི་བོད་དོན་འབྲེལ་མཐུད་ལས་ཁང་། དབུས་བོད་ཀྱི་བུད་མེད་ལྷན་ཚོགས་སོགས་གཞུང་འབྲེལ་མིན་པའི་ཚོགས་པ་ལྔས་ཁ་སང་ཉིན་རྒྱབ་ཏུ་དྷ་ཤོད་བོད་ཁྱིམ་གྱི་ཚོགས་ཁང་དུ་རྒྱལ་སྤྱིའི་ཁོར་ཡུག་གི་ལས་འགུལ་ཞེས་པའི་བརྗོད་གཞིའི་ཐོག་གཏམ་བཤད་གནང་བ་བརྒྱུད་བོད་ནང་གི་གཏེར་ཁ་སྔོག་འདོན་དང་ཤིང་ནགས་གཅོད་འབྲེག་སོགས་ཀྱི་པར་རིས་འགྲེམས་སྟོན་གནང་སྟེ་སློབ་ཕྲུག་རྣམས་ལ་ཟབ་སྦྱོང་ཞིག་གོ་སྒྲིག་གནང་སོང་། ཟབ་སྦྱོང་ཐོག་ཏུ་དྷ་ཤོད་བོད་ཁྱིམ་གྱི་དབུ་འཛིན་མཆོག་གིས་གཙོས་པའི་ལས་བྱེད་ཡོངས་དང་གཞུང་འབྲེལ་མིན་པའི་ཚོགས་ཁག་ལྔའི་སྐུ་ཚབ། འཛིན་གྲྭ་དྲུག་པ་ནས་བཅུ་པའི་བར་གྱི་སློབ་མ་ཚོ་ཟབ་སྦྱོང་དེར་མཉམ་ཞུགས་ཀྱིས་འཛམ་གླིང་གི་རང་བྱུང་ཁོར་ཡུག་ཉམས་ཉེས་ཀྱི་གློག་བརྙན་སྤྱི་དང་སྒོས་བོད་ནང་རྒྱ་ནག་གིས་རང་བྱུང་ཁོར་ཡུག་ལ་གཏོར་བཅོམ་གྱིས་ཤིང་ནགས་གཅོད་འབྲེག་དང་གཏེར་ཁ་སྔོག་འདོན། གཙང་ཆུ་ཁ་བསྒྱུར་དང་ཆུ་མཛོད་གསར་རྒྱག་སོགས་ཀྱི་ཤུགས་རྐྱེན་ཇི་ཐེབས་ཀྱི་པར་རིས་འགྲེམས་སྟོན་དང་གཏམ་བཤད་གནང་སོང་། དབུས་བོད་ཀྱི་གཞོན་ནུ་ལྷན་ཚོགས་ཀྱི་རྒྱུན་ལས་སྤེན་པ་ལགས་ཀྱིས་རྒྱལ་སྤྱིའི་ཁྱོན་ཡོངས་སུ་བདུན་གཅིག་རིང་གི་ཁོར་ཡུག་གི་ལས་འགུལ་དེ་འགྲེལ་བརྗོད་གནང་བ་དང་སྦྲགས། བོད་ཀྱི་གཞོན་ནུ་རྣམས་ནི་མ་འོངས་པའི་བོད་ཀྱི་སོན་རྩ་ཡིན་ཞེས་པ་ལྟར་ཆུང་དུས་ནས་བོད་ཀྱི་རང་བྱུང་ཁོར་ཡུག་གི་གནས་བབ་སྐོར་ལ་ཤེས་རྟོགས་ཐུབ་པར་འབད་དགོས་གལ་ཡིན་པ་གསུངས་སོང་། དེ་བཞིན་དབུས་བོད་ཀྱི་བུད་མེད་ལྷན་ཚོགས་ཀྱི་འཐུས་ཚབ་དབང་མོ་ལགས་ཀྱིས་བོད་ནང་གི་ཁོར་ཡུག་གི་གནས་བབ་དང་འབྲེལ་ཏེ་བོད་མཐོ་སྒང་ནི་ཨེ་ཤ་ཡིའི་ཁྱིམ་མཚེས་རྒྱལ་ཁབ་ཁག་བརྒྱད་ལྷག་གི་འཚོ་རྟེན་བཅོལ་སའི་ཆུ་བོ་ཀུན་གྱི་འགོ་ཁོངས་ཡིན་སྟབས་ཨེ་ཤ་ཡའི་རྒྱལ་ཁབ་ཀུན་གྱི་སྲོག་རྩ་ཡིན་ཚུལ་དང་། དེ་བཞིན་གངས་རི་ར་བས་ཡོངས་སུ་སྐོར་ཡོད་པའི་ཆ་ནས་འཛམ་གླིང་གི་སྣེ་གསུམ་པར་འབོད་བཞིན་པའི་འཛམ་གླིང་གི་འཁྱགས་རོམ་གྱི་ས་ཁུལ་དམིགས་བསལ་བ་ཞིག་ཆགས་ཡོད་པ་ངོ་སྤྲོད་གནང་སྟེ་ད་ཆ་རྒྱ་ནག་གིས་བོད་ཀྱི་རང་བྱུང་ཁོར་ཡུག་ལ་ཚད་བརྒལ་གྱིས་གཏོར་བཅོམ་གཏོང་གི་ཡོད་པའི་པར་རིས་སོགས་ཀྱང་འགྲེམས་སྟོན་གནང་ཡོད། སྐབས་དེར་གཞན་ཡང་རྒྱལ་སྤྱིའི་བོད་དོན་འབྲེལ་མཐུད་ལས་ཁང་གི་འཐུས་ཚབ་འབུམ་རམས་པ་བློ་བཟང་དབྱངས་མཚོ་ལགས་ཀྱིས་གསར་འགོད་པར་ཁ་སང་ནས་བཟུང་བདུན་གཅིག་གི་རིང་ལ་རྒྱལ་སྤྱིའི་ཁྱོན་ཡོངས་ནས་སློབ་ཕྲུག་རྣམས་ཀྱིས་འགོ་ཁྲིད་ཐོག་རང་བྱུང་ཁོར་ཡུག་གཅེས་སྲུང་དགོས་པའི་རྔམ་སྟོན་ཁྲོམ་སྐོར་གཞི་རྒྱ་ཆེ་བ་ཞིག་གནང་གི་ཡོད་སྟབས་བོད་པའི་སློབ་ཕྲུག་རྣམས་ཀྱིས་ཀྱང་ལས་འགུལ་དེ་དང་འབྲེལ་ནས་བོད་ནང་གི་གནས་བབ་སོགས་གླེང་སློང་གནང་བ་བརྒྱུད་ནས་ཐེངས་འདིའི་རྔམ་སྟོན་ཁྲོམ་སྐོར་དེར་མཉམ་ཞུགས་ཡག་པོ་ཡོང་ཐབས་ལ་དམིགས་ཏེ་ཟབ་སྦྱོང་དེ་གོ་སྒྲིག་གནང་ཡོད་སྐོར་གསུངས་སོང་། རྩ་བའི་ཁ་ས་རེས་གཟའ་པ་སངས་ནས་དབུ་འཛུགས་ཀྱིས་བདུན་གཅིག་རིང་གི་གཞི་རྒྱ་ཆེ་བའི་རྒྱལ་སྤྱིའི་ཁོར་ཡུག་གི་ལས་འགུལ་དེ་ནི་རྒྱལ་སྤྱིའི་ཁོར་ཡུག་གི་ལས་འགུལ་དེ་ནི་ Sweden རྒྱལ་ཁབ་ཀྱི་རང་ལོ་བཅུ་དྲུག་ཡིན་པའི་ཁོར་ཡུག་གི་ལས་འགུལ་བ་གྲགས་ཅན་བུ་མོ་ Greta Thunberg ལགས་ཀྱིས་སྣེ་ཁྲིད་པའི་ Friday for future ཞེས་པའི་རེས་གཟའ་པ་སངས་ནི་མ་འོངས་པའི་ཆེད་དུ་ཡིན་པའི་འབོད་ཚིག་གི་འོག་ནས་འགོ་བརྩམས་པ་ཞིག་ཡིན་སྟབས་ཁ་སང་ནས་རྒྱལ་སྤྱིའི་སློབ་ཕྲུག་ས་ཡ་མང་པོས་ཁོར་ཡུག་གི་ལས་འགུལ་འདིར་མཉམ་ཞུགས་ཀྱིས་ལས་འགུལ་སྤེལ་བཞིན་ཡོད་པ་ལྟར། བཞུགས་སྒར་མེག་གྷན་གྱི་བཞི་མདོར་ཡང་རྒྱ་གར་དང་དབྱིན་ཇི་སོགས་གཙོས་པའི་མི་མང་མཉམ་འཛོམས་ཀྱིས་ཁོར་ཡུག་སྲུང་དགོས་པའི་རྔམ་སྟོན་ཁྲོམ་སྐོར་ཞིག་གནང་བའི་ཁྲོད་དུ་ཡང་བོད་མི་མང་པོས་ཡང་མཉམ་ཞུགས་གནང་བ་མ་ཟད། རྒྱལ་ས་རྒྱ་གར་རྒྱལ་ས་ལྡི་ལི་དང་།  Australia ཨ་རི། དེ་བཞིན་ཡོ་རོབ་ཀྱི་རྒྱལ་ཁབ་གང་སར་གནས་སྡོད་བོད་མི་རྣམས་ནས་ས་གནས་སོ་སོའི་ལས་འགུལ་ནང་ཆ་ཤས་བླངས་ཡོད་པ་རེད། དེ་དང་ཕྱོགས་མཚུགས་སུ་ཨ་རིར་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གིས་ཁ་སང་ཉིན་མོ་དང་བསྟུན་བོད་ནང་གི་གཙང་ཆུ་དང་འཛམ་གླིང་གི་གནམ་གཤིས་འགྱུར་ལྡོག་དང་འབྲེལ་བའི་དམིགས་བསལ་སྙན་ཐོ་ཞིག་འདོན་སྤེལ་གནང་སྟེ་བོད་ཀྱི་ཁོར་ཡུག་གི་གལ་གནད་ཆེ་བའི་རང་བཞིན་དང་རྒྱ་ནག་གི་ནོར་འཁྲུལ་ཅན་གྱི་སྲིད་བྱུས་ཁག་གསལ་འདོན་གནང་འདུག  

ཡོ་རོབ་བོད་མི་ཚོས་ཇི་ནི་ཝར་གཞི་རྒྱ་ཆེ་བའི་རྔམ་སྟོན་ལས་འགུལ་སྤེལ་བ།

སུད་སི་གྲོང་ཁྱེར་ཇི་ནི་ཝ་ནང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༤༢ པ་འཚོགས་བཞིན་པ་དང་བསྟུན་དེ་རིང་རྒྱལ་ཚོགས་ཀྱི་མདུན་ཐང་དུ་ཡོ་རོབ་ཁུལ་དུ་གནས་སྡོད་བོད་མི་དང་ཡུ་གུར་བ།བོད་དོན་རྒྱབ་སྐྱོར་བ་བཅས་འདུ་འཛོམས་ཀྱིས་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་གཙོ་འཛིན་མཆོག་གིས་རྒྱ་གཞུང་ནས་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཁྲིམས་སྒྲིག་ཁག་དོན་འཁྱོལ་ལག་བསྟར་བྱེེད་རྒྱུར་ནུས་ལྡན་གནོན་ཤུགས་སྤྲོད་རོགས་ཞེས་པའི་དགོས་འདུན་འོག་གཞི་རྒྱ་ཆེ་བའི་རྔམ་སྟོན་ལས་འགུལ་སྤེལ་གནང་འདུག སྐབས་དེར་སུད་སི་སྐུ་ཚབ་དོན་གཅོད་འཆི་མེད་རིག་འཛིན་ལགས་ཀྱིས་༸གོང་ས་མཆོག་གི་དབུ་ཁྲིད་དང་གཞིས་ལུས་བོད་མིའི་འགྱུར་བ་མེད་པའི་སྙིང་སྟོབས། དེ་བཞིན་བཙན་བྱོལ་བོད་མིའི་སྒྲིག་འཛུགས་དང་རྒྱལ་སྤྱིའི་རྒྱབ་སྐྱོར་བཅས་ལ་བརྟེན་ནས་བོད་མིའི་བདེན་པའི་འཐབ་རྩོད་དེ་ནག་སུབ་གཏང་ཐུབ་ཀྱི་མ་རེད་ཅེས་གསུངས་ཡོད་པ་རེད། རླུང་འཕྲིན་ཁང་གི་གསར་འགོད་པའི་བཅར་འདྲིར་རྒྱལ་ཚོགས་ཀྱི་ཚོགས་ཆེན་ཐེངས་ ༤༢ པ་བརྒྱུད་ནས་བོད་དང་རྒྱ་ནག་ནང་མང་གཙོ་དང་རང་དབང་དགོས་ཀྱི་འདུག་ཅེས་གསུངས་སོང་བ་དང་། ཁོང་རྣམས་ནས་ད་རེས་ཀྱི་ལས་འགུལ་དང་བསྟུན་ཏེ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་གཙོ་འཛིན་ལྕམ་སྐུ་ Michelle Bachelet མཆོག་གི་མཚན་ཐོག་ཏུ་དོན་ཚན་ལྔ་ཅན་གྱི་ཞུ་སྙན་ཞིག་ཀྱང་ཕུལ་ཡོད་པ་དང། གཙོ་འཛིན་མཆོག་གིས་རྒྱ་ནག་གཞུང་ལ་ནུས་ལྡན་ཐོག་རྒྱལ་སྤྱིའི་འགྲོ་བ་མིའི་ཐོབ་ཐང་གི་འབྲུ་དོན་ཁག་ལག་བསྟར་གནང་བར་གནོན་ཤུགས་སྤྲད་དགོས་པ་དང་། བོད་ནང་ཡར་རྒྱས་འཛུགས་སྐྲུན་གྱི་ལས་གཞི་རྣམས་རྒྱ་གཞུང་ནས་མང་ཚོགས་ཀྱི་འགྲོ་བ་མིའི་ཐོབ་ཐང་དང་མངོན་འདོད་གཙོ་བོར་འཛིན་ཐོག་སྤེལ་དགོས་པར་ནན་སྐུལ་གནང་སྐྱོང་ཡོང་བའི་འབོད་སྐུལ་ཞུས་འདུག རྒྱ་གཞུང་ནས་ཡ་ཆེན་སྒར་དང་བླ་རུང་སྒར་སྟོར་བཤིག་དང་གྲྭ་བཙུན་ཕྱིར་ཕུད་ཀྱི་ལས་གཞི་འཕྲལ་མར་མཚམས་འཇོག་བྱེད་དགོས་པ། དེ་བཞིན་རྒྱལ་ཚོགས་ཀྱི་གཙོ་འཛིན་མཆོག་ནས་བོད་ཀྱི་ས་ཁུལ་དུ་རྒྱ་གཞུང་གིས་བཀག་འགོག་གང་ཡང་མེད་པར་བསྐྱོད་རྒྱུར་འབད་བརྩོན་གནང་རོགས་ཞེས་དང་། ལྷག་དོན་རྒྱ་ནག་གཞུང་ལ་༸གོང་ས་མཆོག་གི་སྐུ་ཚབ་དང་ལྷན་དུ་བོད་རྒྱ་འབྲེལ་མོལ་སླར་གསོ་ཡོང་རྒྱུར་སྐུལ་འདེད་གནང་བའི་འབོད་སྐུལ་བསྐྱར་ནན་ཞུ་རྒྱུ་ཡིན་ཞེས་འཁོད་འདུག

རྒྱ་ནག་གི་འགྲོ་བ་མིའི་ཐོབ་ཐང་གི་གནས་བབ་ཡར་རྒྱས་ཕྱིན་མི་འདུག

རྒྱལ་ཚོགས་ཀྱི་འགྲོ་བ་མིའི་ཐོབ་ལྷན་ཚོགས་ཐེངས་༤༢ ཐོག རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནད་དོན་ཐོག་རྒྱལ་ཚོགས་ཀྱི་ཚོགས་མི་རྒྱལ་ཁབ་ཁག་བརྒྱད་ནས་སེམས་འཚབ་གནང་ཡོད་པ་སྤྱི་དང་།  ཡང་སྒོས་དེའི་ནང་ཚན་ནས་ཅེཀ་སྤྱི་མཐུན་རྒྱལ་ཁབ་དང། འཇར་མན།  ཧྥ་རན་སི། སུའི་ཀྲན་བཅས་རྒྱལ་ཚོགས་ཀྱི་ཚོགས་མི་རྒྱལ་ཁབ་༤དང། དེ་བཞིན་ཡོ་རོབ་མཐུན་ཚོགས་བཅས་ནས་བོད་ནང་གི་འགྲོ་བ་མིའི་ཐོབ་ཐང་གི་གནས་བབ་ཡར་རྒྱས་ཕྱིན་མེད་སྐོར་གླེང་སློང་གནང་བ་དང་འབྲེལ། རྒྱ་གཞུང་གིས་བོད་དང་ཡུ་གུར་ནང་གི་མང་ཚོགས་ཀྱི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་བྱ་སྤྱོད་ངེས་པར་དུ་འཕྲལ་མར་མཚམས་འཇོག་བྱེད་དགོས་པར་བརྗོད་འདུག དེ་ཡང། ཟླ་བ་འདིའི་ཕྱི་ཚེས་ ༩ ནས་སུད་སི་གྲོང་ཁྱེར་ཇི་ནི་ལྦའི་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལྷན་ཚོགས་ ཐེངས་ ༤༢ འཚོགས་བཞིན་ཡོད་པ་དང། ཕྱི་ཚེས་༡༧་ཉིན་འཛམ་གླིང་རྒྱལ་ཁབ་ཁག་གི་འགྲོ་བ་མིའི་ཐོབ་ཐང་གི་གནས་བབ་ཐོག་ཚོགས་མི་རྒྱལ་ཁབ་ཁག་གི་ཐུགས་སྣང་དགོས་པའི་རྒྱལ་ཚོགས་ཀྱི་ཚོགས་དུས་ ༡༧ པའི་སྐབས། འཇར་མན་གྱི་སྐུ་ཚབ་ཀྱིས་རྒྱ་ནག་གཞུང་གིས་ད་ལྟའི་ཆར་བོད་དང་ཡུ་གུར་ནང་མང་ཚོགས་ཕོན་ཆེན་བཀག་ཉར་དོ་དམ་དང་མནར་གཅོད་གཏོང་བཞིན་པའི་བྱ་སྤྱོད་དེ་ཁྲིམས་མཐུན་མིན་པ་ཐེར་འདོན་བྱས་པ་དང་ལྷན་དུ། མང་ཚོགས་ཀྱི་སྤྱི་འབངས་དང་ཆབ་སྲིད། དེ་བཞིན་ཆོས་དད་རང་དབང་ཐོབ་ཐང་རྡོག་རོལ་ཚབ་ཆེར་གཏོང་བཞིན་པའི་གནས་བབ་བཅས་ལ་ཧ་ཅང་གི་སེམས་འཚབ་ཡོད་ཅེས་གསུངས་བ་དང་འབྲེལ། ལྷན་ཚོགས་དེ་བརྒྱུད་ནས་རྒྱ་ནག་གཞུང་ལ་བྱ་སྤྱོད་དེ་དག་འཕྲལ་མ་ཉིད་དུ་མཚམས་འཇོགས་དགོས་ཞེས་གསུངས་སོང་། ཡང་ལྷན་ཚོགས་ཐོག་ཅེཀ་སྤྱི་མཐུན་རྒྱལ་ཁབ་ཀྱི་སྐུ་ཚབ་ཀྱིས་རྒྱ་ནག་ནང་དཔལ་འབྱོར་ཡར་རྒྱས་ཚད་མཐོན་པོ་ཕྱིན་ཡོད་ནའང་། མང་ཚོགས་ཀྱི་འགྲོ་བ་མིའི་ཐོབ་ཐང་དང་མང་གཙོ། དེ་བཞིན་ཁྲིམས་ལུགས་དབང་འཛིན་གྱི་གནས་བབ་ད་དུང་ཡར་རྒྱས་ཕྱིན་མེད་པ་དང་། བོད་དང་ཡུ་གུར་ནང་དུ་ཞི་བདེ་དང་ཡར་རྒྱས་ཀྱི་གྲུབ་འབྲས་ཐོན་པར་རྒྱ་གཞུང་གི་ངོས་ནས་ཁུལ་དེའི་ནང་གི་མང་ཚོགས་ཀྱི་ཆོས་དད་རང་དབང་དང་འདུ་འཛོམས་རང་དབང་། དེ་བཞིན་མང་ཚོགས་ཀྱི་ཆེ་མཐོང་ལ་གུས་བརྩི་བྱེད་དགོས་པ་གསུངས་འདུག ལྷག་པར་དུ་ཅེཀ་སྤྱི་མཐུན་རྒྱལ་ཁབ་ཀྱི་སྐུ་ཚབ་ཀྱིས་ད་ལྟའི་ཆར་རྒྱ་ནག་གཞུང་གིས་བཙོན་འཇུག་བཀག་ཉར་བྱས་པའི་མི་སྣ་ཁག་གི་གནད་དོན་གླེང་བའི་ཁྲོད། བོད་མིའི་སྐད་ཡིག་ལས་འགུལ་བ་བཀྲིས་དབང་ཕྱུགས་ལགས་ཀྱི་གནས་སྟངས་ཐོག་སེམས་འཚབ་དང་ཁོང་གློད་བཀྲོལ་དགོས་པའི་བསྐྱར་ནན་ཞུས་འདུག  དེ་དང་ཕྱོགས་མཚུངས། སྐབས་དེར་Sweden སྐུ་ཚབ་ཀྱིས་རྒྱ་ནག་གཞུང་གི་ངོས་ནས་སྤྱིར་མང་ཚོགས་ཀྱི་ཆོས་དད་རང་དབང་དང་གོམས་སྲོལ། དེ་བཞིན་འདུ་འཛོམས་རང་དབང་ལ་གུས་བརྩི་དགོས་པ་དང་། ལྷག་པར་དུ་བོད་དང་ཡུ་གུར་མང་ཚོགས་ཀྱི་རང་དབང་དང་ཐོབ་ཐང་ལ་གུས་བརྩི་ཞུ་དགོས་ཞེས་གསུངས་བ་དང་ཆབས་ཅིག ས་ཁུལ་དེ་གཉིས་ནང་དུ་འགྲོ་བ་མིའི་ཐོབ་ཐང་གི་གནས་བབ་ལ་ཕྱིའི་རང་དབང་ཅན་གྱི་རྟོག་ཞིབ་བྱེད་མཁན་མི་སྣ་ལ་རྒྱ་གཞུང་གི་བཀག་འགོག་བྱས་མི་ཆོག་པར་ནན་བརྗོད་བྱས་འདུག ཡང་སྐབས་དེར་ལྷན་ཚོགས་ཐོག་ Finland སྐུ་ཚབ་ཀྱིས་ཡོ་རོབ་མཐུན་ཚོགས་ཀྱི་ཚབ་ཞུས་ཏེ། ཡོ་རོབ་མཐུན་ཚོགས་ཀྱི་སྤྱི་བསྒྲགས་སྒྲོག་སྦྱང་གནང་བ་དང་།  ཡོ་རོབ་མཐུན་ཚོགས་ཀྱི་ངོས་ནས་ཐེངས་འདིའི་ལྷན་ཚོགས་དེའི་ཐོག་སླར་ཡང་རྒྱ་ནག་གཞུང་གིས་བོད་དང་ཡུ་གུར་མང་ཚོགས་ཀྱི་འགྲོ་བ་མིའི་ཐོབ་ཐང་ལ་གུས་བརྩི་ཞུ་དགོས་པའི་ནན་བརྗོད་གནང་བ་མ་ཟད། དེ་བཞིན་ཧྥ་རན་སའི་སྐུ་ཚབ་ཀྱིས་ཀྱང་ཡོ་རོབ་མཐུན་ཚོགས་ཀྱི་ལྷན་ཚོགས་ཀྱི་སྤྱི་བསྒྲགས་ལ་རྒྱབ་སྐྱོར་ཞུས་པ་དང་འབྲེལ། བོད་དང་ཡུ་གུར་ནང་གི་འགྲོ་བ་མིའ་ཐོབ་ཐང་གི་གནས་སྟངས་ལ་སེམས་འཚབ་བསྟན་པ་དང་ཆབས་ཅིག   རྒྱ་ནག་གཞུང་གིས་ཁུལ་དེ་དག་ནང་མང་ཚོགས་མང་པོ་བཀག་ཉར་དོ་དམ་བྱེད་བཞིན་པའི་བྱ་སྤྱོད་མཚམས་འཇོག་དགོས་པ་བརྗོད་འདུག ལྷན་ཚོགས་ཐོག་གཞན་ཡང་། དབྱིན་ཡུལ་དང་། Australia དང་ finland དེ་བཞིན་ནོར་ཝེ་བཅས་ཀྱི་སྐུ་ཚབ་ཀྱིས་ཀྱང་རྒྱ་ནག་གཞུང་གིས་མང་ཚོགས་ཀྱི་འགྲོ་བ་མིའི་ཐོབ་ཐོང་མུ་མཐུད་ནས་རྡོག་རོལ་དང་ཁྲིམས་སྒྲིག་རྡོག་རོལ་གཏོང་མཁན་དང་འབྲེལ་བའི་དཔོན་རིགས་ཚོར་ཉེས་མེད་གུ་ཡངས་གཏོང་བཞིན་པའི་བྱ་སྤྱོད་ལ་སེམས་འཚབ་ཡོད་པ་བསྟན་འདུག རྩ་བའི་ཐེངས་འདིའི་རྒྱལ་ཚོགས་ཀྱི་ལྷན་ཚོགས་ཐེངས་༤༢ པའི་འདས་པའི་ཚོགས་དུས་དེའི་ཁྲོད། རྒྱལ་སྤྱིའི་འགྲོ་བ་མིའི་ཐོབ་ཐང་དང་འབྲེལ་གཞུང་འབྲེལ་མིན་པའི་ཚོགས་པ་ཁག་གིས་ཀྱང། རྒྱ་གཞུང་གིས་བོད་ནང་གི་བོད་མིའི་ཆོས་དད་རང་དབང་དང་།  འདུ་འཛོམས་རང་དབང་། དེ་བཞིན་སྐད་ཡིག་རང་དབང་། སྤྱི་འབངས་ཐོབ་ཐང་བཅས་རྡོག་རོལ་མུ་མཐུད་ནས་གཏོང་བཞིན་ཡོད་པ་དང་། འཛུགས་སྐྲུན་དང་དཔལ་འབྱོར།  ཁོར་ཡུག་དང་མང་ཚོགས་བཅས་ལ་དོ་ཕོག་ཆེན་པོ་དང་གཏོར་སྐྱོན་གཏོང་བཞིན་ཡོད་པ་ཐེར་འདོན་ཡང་བྱས་འདུག

ཨ་རིའི་གྲོས་ཚོགས་ནང་ཧོང་ཀོང་གི་གནད་དོན་ཐོག་ཉན་ཞིབ་ལས་རིམ་ཞིག་ཚོགས་པ།

ཁ་སང་ཨ་རིའི་གྲོས་ཚོགས་གོང་མའི་ཚོགས་ཁང་ཨང་ ༤༡༩ ནང་ CECC ཞེས་ཨ་རིའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་གིས་ཧོང་ཀོང་གི་གནད་དོན་དང་ཨ་རིའི་སྲིད་བྱུས་ཞེས་པའི་བརྗོད་གཞིའི་ཐོག་ཉན་ཞིབ་ཀྱི་ལས་རིམ་ཞིག་ཚོགས་ཐོག་འདས་པའི་ཟླ་བ་བཞི་ལྷག་གི་གོང་ནས་ཧོང་ཀོང་ནང་འབྱུང་བཞིན་པའི་ཧོང་མི་མང་གི་ཞི་བའི་ལས་འགུལ་ཁྲོད་རྒྱ་ནག་གཞུང་གིས་ཐེ་བྱུས་བྱས་པའི་གནས་སྟངས་དང་ཧོང་གཞུང་འབྲེལ་ཉེན་རྟོག་པས་ལས་འགུལ་བར་དྲག་སྤྱོད་སྤེལ་པའི་གནས་སྟངས་སོགས་གསལ་འདོན་གནང་འདུག ཉན་ཞིབ་ཀྱི་ལས་རིམ་ཐོག་ཨ་རིའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་གི་ཚོགས་གཙོ་ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་ Jim McGovern ལགས་དང་མཉམ་འབྲེལ་ཚོགས་གཙོ་ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་ Marco Rubio ལགས་དབུས་གྲོས་ཚོགས་འཐུས་མི་སྐུ་ཞབས་ Christopher H. Smith ལགས་དང་སྐུ་ཞབས་ Tom Suozzi ལགས། སྐུ་ཞབས་ Todd Youngལགས། སྐུ་ཞབས་ Angus King སྐུ་ཞབས་ McAdams ལགས། གནད་ཡོད་མི་སྣ་ཁག་གཅིག་དང་ཧོང་ཀོང་མང་གཙོའི་ལས་འགུལ་བ་ Joshua Wong ལགས། ཧོང་ཀོང་གི་མང་གཙོ་དོན་གཉེར་བ་གཞས་མ་ Denise Ho ལགས། དེ་བཞིན་ཧོང་ཀོང་རྒྱལ་སྤྱིའི་ཤེས་ཡོན་ལྟེ་གནས་ཁང་གི་མགྲིན་ཚབ་པ་ Sunny Cheung ལགས། རྒྱ་ནག་ནང་གི་འགྲོ་བ་མིའི་ཐོབ་ཐང་ཐོག་སློབ་སྟོན་གནང་མཁན་ཨ་རིའི་ New York གཙུག་ལག་སློབ་གྲྭ་ཆེན་མོའི་སློབ་དཔོན་ Sharon Hom ལགས་དང་དཔྱད་ཞིབ་པ་ Dan Garrett ལགས་བཅས་ལྷན་ཞུགས་གནང་འདུག སྐབས་དེར་སྐུ་ཞབས་ Jim McGovern ལགས་ནས་ཧོང་ཀོང་མི་མང་གི་ཞི་བའི་ལས་འགུལ་དེར་རྒྱལ་སྤྱིའི་ཐོག་ནས་དོ་སྣང་ཆེན་པོ་གནང་བ་མ་ཟད་ལྷག་པར་དུ་རྒྱལ་ཚོགས་དང་ཨིན་ཡུལ་གཞུང་། དེ་བཞིན་ཨ་རི་གྲོས་ཚོགས་བཅས་ནས་ཉེ་ཆར་ཧོང་ཀོང་མི་མང་གི་ལས་འགུལ་ལ་ཐེ་བྱུས་བྱེད་མཁན་གྱི་ཚོང་ལས་ཁང་ཁག་དང་ཚོང་འབྲེལ་གནང་རྒྱུ་མིན་པའི་སྲིད་བྱུས་གཏན་འབེབས་དང་། ཧོང་ཀོང་སྲུང་སྐྱོབ་དགོས་ཞེས་པའི་ཁྲིམས་འཆར་སོགས་ཆེད་འདོན་གནང་ཡོད་པར་འགྲེལ་བརྗོད་གནང་བ་དང་འབྲེལ་ཏེ་ཨ་མི་རི་ཀའི་གཞུང་ནས་དེ་སྔ་ཕྱི་ལོ་ ༡༩༩༢ ལོར་ཧོང་ཀོང་དང་ཨ་རི་དབར་བཞག་པའི་ཁྲིམས་གཞིའི་དགོངས་དོན་ལྟར་ཧོང་ཀོང་དེ་རང་སྐྱོང་ཚད་ལྡན་ཞིག་ཏུ་ངོས་འཛིན་ཞུ་བཞིན་ཡོད་ཀྱང་། འདས་པའི་ལོ་ཤས་ནང་ཧོང་ཀོང་རང་སྐྱོང་གི་གནས་བབས་དང་ཚོང་འབྲེལ་གྱི་གནས་སྟངས་སོགས་ཀྱི་ཐད་ཉམས་གུད་ཆེན་པོ་འགྲོ་བཞིན་པ་ནི་རྒྱ་ནག་གཞུང་ནས་ཧོང་ཀོང་གི་ཁྲིམས་ལུགས་དབང་འཛིན་དང་འཛིན་སྐྱོང་གི་ལས་དོན་སོགས་ལ་ཐེ་བྱུས་བྱེད་བཞིན་པ་དེ་ཆགས་ཡོད་སྟབས། རྒྱ་ནག་ནས་མུ་མཐུད་དེ་ལྟར་ཐེ་བྱུས་རིགས་བྱེད་ཚེ་ཨ་རི་དང་རྒྱ་ནག་དབར་གྱི་ཚོང་འབྲེལ་གཙོས་གནད་དོན་མང་དག་ཐོག་དོ་ཕོག་འགྲོ་སྲིད་པ་གསུངས་འདུག དེ་བཞིན་སྐུ་ཞབས་ Christopher H. Smith ལགས་ཀྱིས་ཧོང་ཀོང་མི་མང་གི་ཞི་བའི་ལས་འགུལ་དེས་མང་གཙོའི་ལམ་ལུགས་དང་དབང་ཆ་གཅིག་སྡུད་རིང་ལུགས་གཉིས་མཉམ་དུ་ཡོང་ཐབས་མེད་པ་དང་ལྷག་དོན་རྒྱ་ནག་གཞུང་ནས་རྒྱལ་སྤྱིའི་ཁྲིམས་ལུགས་ཁག་ལ་རྩིས་སྲུང་མེད་པར་ཧོང་ཀོང་རང་སྐྱོང་གི་གནས་བབས་ལ་ཐེ་བྱུས་བྱས་པ་ཙམ་མ་ཟད། བོད་དང་ཡུ་གུར་མི་མང་གི་གཞི་རྩའི་ཐོབ་ཐང་ཁག་རྩིས་མེད་རྡོག་རོལ་གཏོང་བཞིན་པའི་གནས་སྟངས་དང་། འགྲོ་བ་མིའི་ཐོབ་ཐང་ལས་འགུལ་བ་དང་ཁྲིམས་རྩོད་པ། དེ་བཞིན་གསར་འགོད་པ་ཚོར་དམ་དྲག་དང་འཛིན་བཟུང་བཙན་ཁྲིད་བྱེད་བཞིན་པའི་བྱ་སྤྱོད་རྣམས་རྒྱལ་སྤྱིའི་ཐོག་མངོན་གསལ་གནང་ཐུབ་པ་བྱུང་ཡོད་ཅེས་གསུངས་འདུག ཧོང་ཀོང་མང་གཙོའི་ལས་འགུལ་བ་ Joshua Wong ལགས་ནས་ཧོང་ཀོང་ནང་གི་ཞི་བའི་ལས་འགུལ་གྱི་བྱུང་རིམ་ཁག་ངོ་སྤྲོད་དང་སྦྲགས་ཏེ་ལས་འགུལ་ཁྲོད་སྤྱི་ཁྱབ་ཀེ་རི་ལེམ་གྱིས་ཉེས་ཅན་རྩིས་སྤྲོད་ཀྱི་ཁྲིམས་འཆར་དེ་ཕྱིར་འཐེན་གནང་ཡོད་ཀྱང་ཧོང་ཀོང་མི་མང་གི་མངོན་འདོད་དེ་ནི་ཁྲིམས་འཆར་གཅིག་དང་གང་ཟག་ཅིག་གི་འཐབ་རྩོད་མིན་པར་གཙོ་བོ་ཧོང་ཀོང་གི་ཆབ་སྲིད་སྒྲོམ་གཞི་ལ་བསྒྱུར་བཅོས་བརྒྱུད་མི་མང་ལ་མང་གཙོ་དང་རང་དབང་ལྡན་པའི་འོས་བསྡུའི་ཐོབ་ཐང་གནང་རྒྱུ་དེ་ཡིན་པ་འགྲེལ་བརྗོད་དང་སྦྲགས། ཧོང་ཀོང་མང་གཙོ་དོན་གཉེར་རྣམས་ནས་ལས་འགུལ་དི་མུ་མཐུད་རྒྱུན་འཁྱོངས་གནང་རྒྱུ་ཡིན་པ་དང་། དེའི་མཇུག་འབྲས་གང་འདྲ་ཞིག་ཡོང་མིན་སུས་ཀྱང་དཔོག་དཀའ་ཐུབ་ཀྱི་མ་རེད་ཅེས་གསུངས་འདུག ཁོང་གིས་རྒྱ་གཞུང་ནས་ཧོང་ཀོང་གི་ལས་འགུལ་ཁྲོད་ཐེ་བྱུས་བྲས་པའི་གནས་སྟངས་དང་། བོད་དང་ཐེ་ཝན། ཤིན་ཅང་སོགས་ཀྱི་ནང་དྲག་པོའི་སྲིད་བྱུས་འདྲ་མིན་ལག་བསྟར་བྱེད་བཞིན་པ་དེ་ནི་རྒྱ་ནག་གཞུང་ནས་མཇུག་འབྲས་གང་ཡིན་ལ་ལྟོས་མེད་སོ་སོའི་ཁེ་ཕན་བསྒྲུབ་ཐབས་ཁོ་ནར་འབད་བརྩོན་བྱེད་བཞིན་པ་གསལ་པོ་རེད་ཅེས་གསུངས་འདུག དེ་བཞིན་ཧོང་ཀོང་གི་མང་གཙོ་དོན་གཉེར་བ་གཞས་མ་ Denise Ho ལགས་ནས་ཧོང་ཀོང་ནང་རྟེན་གཞི་བྱས་པའི་ཚོང་གི་སྡེ་ཚན་དང་གཞུང་འབྲེལ་མ་ཡིན་པའི་ཚོགས་པ་མང་དག་ཅིག་རྒྱ་ནག་དང་ལག་འབྲེལ་བྱས་ཏེ་ཧོང་ཀོང་ཞི་བའི་ལས་འགུལ་བ་དང་།སྒྱུ་རྩལ་བ་རྣམས་ལ་ཚོད་འཛིན་དམ་དྲག་འདྲ་མིན་བྱེད་བཞིན་པ་སོགས་ཐེར་འདོན་གནང་བ་མ་ཟད། ཧོང་ཀོང་རྒྱལ་སྤྱིའི་ཤེས་ཡོན་ལྟེ་གནས་ཁང་གི་མགྲིན་ཚབ་པ་ Sunny Cheung ལགས་ཀྱིས་ཀྱང་ཧོང་ཀོང་ནང་གི་ཞི་བའི་ལས་འགུལ་དེ་ནི་ཧོང་ཀོང་མི་མང་གི་གཞི་རྩའི་ཐོབ་ཐང་དང་། རྒྱལ་ཁབ་ཀྱི་ཁྲིམས་ལུགས་དབང་འཛིན་སྲུང་སྐྱོབ་གནང་རྒྱུ་དེ་ཡིན་སྟབས་མང་ཚོགས་ཀྱིས་ལས་འགུལ་དེ་མུ་མཐུད་ནས་སྤེལ་རྒྱུ་ཡིན་པ་སོགས་གསུངས་འདུག མ་ཟད་སློབ་དཔོན་Sharon Hom ལགས་དང་དཔྱད་ཞིབ་པ་ Dan Garrett ལགས་ནས་ཀྱང་ཧོང་ཀོང་ཞི་བའི་ལས་འགུལ་དེ་ནི་ཧོང་ཀོང་མི་མང་གཅིག་པོའི་གནས་དོན་མིན་པར་རྒྱལ་སྤྱིའི་ཐོག་རྒྱ་ནག་གཞུང་གིས་འགྲོ་བ་མིའི་ཐོབ་ཐང་གི་གནས་སྟངས་འགྲེལ་བརྗོད་ལོག་པར་བྱེད་པའི་བྱ་སྤྱོད་ཐེར་འདོན་རྒྱུད། མང་གཙོ་དང་འགྲོ་བ་མིའི་ཐོབ་ཐང་སྲུང་སྐྱོབ་བྱེད་རྒྱུ་དང་འབྲེལ་བ་ཡོད་པ་ཡིན་པ་སོགས་གསུངས་འདུག ཉན་ཞིབ་ཀྱི་ལས་རིམ་དེའི་ཁྲོད་ཨ་རིའི་གྲོས་ཚོགས་འཐུས་མི་རྣམས་ནས་ཧོང་ཀོང་གི་གནད་དོན་ཐོག་ཐུགས་འཚབ་དང་འབྲེལ་གསུང་བཤད་གནང་ཡོད་པ་དང་། སྐབས་དེར་སྐུ་ཞབས་ Marco Rubio ལགས་ཀྱིས་རྒྱ་ནག་གཞུང་ནས་ཧོང་ཀོང་གི་གནད་དོན་དེ་རྒྱ་ནག་རྒྱལ་ནང་གི་གནད་དོན་ཡིན་སྐོར་བརྗོད་བཞིན་པ་དེ་ནི་བདེན་པ་མིན་པ་དང་ཧོང་ཀོང་མི་མང་གི་རང་དབང་སྲུང་སྐྱོབ་གནང་རྒྱུའི་འགན་དེ་ཨ་རིས་གཙོས་པའི་རྒྱལ་སྤྱིའི་རྒྱལ་ཁབ་ཚང་མར་ཡོད་པ་ནན་པོ་གསུངས་འདུག ཉན་ཞིབ་ཀྱི་མཐའ་མར་ཧོང་ཀོང་གི་སྐུ་ཚབ་རྣམས་ནས་ཨ་རིའི་གྲོས་ཚོགས་སུ་ཧོང་ཀོང་གི་གནད་དོན་གླེང་སློང་གནང་རྒྱུའི་གོ་སྐབས་གནང་བར་ཐུགས་རྗེ་ཆེ་ཞུས་དང་སྦྲགས། ཨ་རིའི་སྲིད་གཞུང་ནས་ཧོང་ཀོང་གི་གནད་དོན་ཐོག་མུ་མཐུད་རྒྱབ་སྐྱོར་དང་ཨ་རིའི་གྲོས་ཚོགས་ནང་ཧོང་ཀོང་མི་མང་གི་མངོན་འདོད་དང་མང་གཙོ། འགྲོ་བ་མིའི་ཐོབ་ཐང་སོགས་ཀྱི་ཐོག་རྒྱབ་སྐྱོར་ཡོད་པའི་ཁྲིམས་འཆར་ཞིག་ངེས་པར་དུ་གཏན་འབེབས་གནང་སྐྱོང་ཡོང་བ་ཞུ་ཞེས་འབོད་སྐུལ་ཞུས་འདུག

འཇར་མི་ནི་གྲོས་ཚོགས་ཀྱི་འགྲོ་བ་མིའི་ཐོབ་ཐང་ཚོགས་ཆུང་གི་སྐུ་ཚབ་ཁག་གཅིག་བཞུགས་སྒར་དུ་འཚམས་གཟིགས།

དེ་རིང་སྔ་ཐོག་འཇར་མ་ནིའི་གྲོས་ཚོགས་འཐུས་སྐུ་ཞབས་ Frank Heinrich ལགས་ཀྱིས་སྣེ་ཁྲིད་པའི་གྲོས་ཚོགས་ཀྱི་འགྲོ་བ་མིའི་ཐོབ་ཚོགས་ཆུང་གི་སྐུ་ཚབ་མི་སྣ་དྲུག་བཞུགས་སྒར་དུ་འཚམས་གཟིགས་སུ་ཕེབས་འབྱོར་བྱུང་སོང་། འཇར་མ་ནི་གྲོས་ཚོགས་འཐུས་མི་ Frank Heinrich ལགས་དང་ལྕམ་ Ute Vogi ལགས། དེ་བཞིན་ལྕམ་ Margareta Bause ལགས་གཙོས་པའི་ཚོགས་མི་གཞན་གསུམ་པོ་དེ་དག་དེ་རིང་སྔ་ཐོག་བཞུགས་སྒར་དུ་ཕེབས་འབྱོར་གྱིས་བོད་མིའི་སྒྲིག་འཛུགས་ཀྱི་ལྷན་ཁང་ཁག་ཏུ་འཚམས་གཟིགས་གནང་ཡོད་པ་ལྟར་ཉིན་རྒྱབ་ཏུ་སྐུ་ཚབ་ཚོགས་ཆུང་དེས་བོད་མི་མང་སྤྱི་འཐུས་ལྷན་ཚོགས་སུ་འཚམས་གཟིགས་གནང་སྐབས་ཚོགས་གཙོ་མཆོག་གིས་སྐུ་མགྲོན་རྣམ་པར་བོད་ཀྱི་འདས་མ་ད་གསུམ་གྱི་ལོ་རྒྱུས་དང་བཙན་བྱོལ་ནང་གི་མང་གཙོའི་འཕེལ་རིམ་ད་ལྟའི་གནས་སྟངས་སོགས་ཀྱི་སྐོར་ལ་ངོ་སྤྲོད་གནང་འདུག སྐབས་དེར་གསར་འགོད་པས་འཇར་མན་གྲོས་ཚོགས་འཐུས་མི་ཁོངས་སུ་ཡོད་པ་ལྕམ་ Ute Vogi ལགས་དང་ལྕམ་ Margareta Bause ལགས་གཉིས་ལ་བཞུགས་སྒར་དུ་འཚམས་གཟིགས་སུ་ཕེབས་དོན་གང་ཡིན་སྐོར་ལ་བཅར་འདྲི་ཞུས་པར་བོད་ནང་གི་གནས་སྟངས་ཐར་ཀར་རྒྱུས་ལོན་ཞུ་དཀའ་སྟབས་བོད་ནང་གི་དོན་དམ་གྱི་གནས་སྟངས་གང་ཡིན་ཤེས་རྟོགས་ཡོང་ཆེད་དང་བཙན་བྱོལ་བོད་མིའི་གནས་སྟངས་དང་བོད་ནང་གི་གནས་སྟངས་ངོ་མ་གང་ཡིན་ཤེས་ཐབས་སུ་འདིར་བཅར་བ་ཡིན་པ་དང་ཕྱིར་རང་ཡུལ་དུ་ཕེབས་རྗེས་གྲོས་ཚོགས་ནང་གནས་སྟངས་དེ་དག་སྙན་སེང་ཞུ་ངེས་ཡིན་པ་སོགས་གསུངས་སོང་། ཤེས་རྟོགས་བྱུང་བར་གཞིགས་ན་ཚོགས་པ་དེའི་ཚོགས་མི་རྣམས་བཞུགས་སྒར་དུ་ཚེས་ ༡༩ བར་འཚམས་གཟིགས་གནང་གི་འདུག་པ་དང་། དེ་རིང་ཕྱི་དྲོ་སྐུ་ཚབ་རྣམས་ལ་བོད་མིའི་སྒྲིག་འཛུགས་ཀྱི་བཀའ་ཤག་ཏུ་སྲིད་སྐྱོང་མཆོག་གིས་དབུས་པའི་བཀའ་བློན་རྣམ་པ་དང་ལྷན་དུ་གསོལ་ཚིགས་འདེགས་འབུལ་ཞུ་གྱི་ཡོད་པ་མ་ཟད། ཁོང་རྣམས་ནས་སང་ཉིན་སྔ་དྲོ་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་གཙོས་པའི་བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག དེ་བཞིན་བོད་ཀྱི་གཞོན་ནུ་ལྷན་ཚོགས་དང་བེུད་ལྷན་ཚོགས་ཀྱི་སྐུ་ཚབ་རྣམ་པ་བཅས་ལ་ཐུག་འཕྲད་གནང་གནང་རྒྱུ་རེད་འདུག གཞི་རྩའི་ཟླ་བ་སྔོན་མའི་ནང་རྒྱ་ནག་གཞུང་གིས་འཇར་མ་ནིའི་གྲོས་ཚོགས་ཀྱི་འགྲོ་བ་མིའི་ཐོབ་ཐང་གི་ཚོགས་ཆུང་ལ་རྒྱ་ནག་ཏུ་ཕེབས་རྒྱུའི་མཐོང་མཆན་སྤྲད་མེད་པའི་གནས་ཚུལ་བྱུང་བ་མ་ཟད། གྲོས་ཚོགས་ཀྱི་ digital affairs ཚོགས་ཆུང་གི་ཚོགས་མི་ཁག་གཅིག་ཀྱང་རྒྱ་ནག་ཏུ་ཕེབས་འཆར་ལ་འགོག་རྐྱེན་བཟོས་ཏེ་ཚོགས་ཆུང་དེའི་ནང་རྒྱུན་དུ་རྒྱ་ནག་གི་འགྲོ་བ་མིའི་ཐོབ་ཐང་གི་གནས་སྟངས་ལ་སྐྱོན་བརྗོད་གནང་མཁན་ལྕམ་སྐུ་ Margareta Bause ལགས་ཡོད་སྟབས་ཁོང་ལ་མཐོང་མཆན་སྤྲད་མིན་སྐོར་བཤད་པར་བརྟེན་ཚོགས་ཆུང་དེའི་ཚོགས་མི་ཡོངས་རྒྱ་ནག་ཏུ་ཕེབས་རྒྱུ་ཕྱིར་འཐེན་གནང་ཡོད་པ་རེད།

ཨ་རིའི་བོད་དོན་ཁྲིམས་འཆར་གསར་པས་རྒྱ་གཞུང་ལ་ཆབ་སྲིད་ཀྱི་སྔོན་བརྡ་ཞིག་སྤྲད་པ།

ཨ་རིའི་གྲོས་ཚོགས་འོག་མའི་ཚོགས་དུས་ ༡༡༦ པ་འཚོགས་བཞིན་པ་དང་བསྟུན་ཕྱི་ཚེས་ ༡༣ ཉིན་ CECC ཞེས་ཨ་རིའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་གི་ཚོགས་གཙོ་ཨ་རའི་གྲོས་ཚོགས་འཐུས་མི་སྐུ་ཞབས་ Jim McGovern ལགས་ནས་དེ་སྔ་ཕྱི་ལོ་ ༢༠༠༢ ལོར་ཡུལ་དེའི་གྲོས་ཚོགས་སུ་གཏན་འབེབས་གནང་བའི་ Tibet Policy Act 2002 ཞེས་ཨ་རི་བོད་ཐོག་འཛིན་པའི་སྲིད་བྱུས་དེ་ནུས་ཤུགས་ལྡན་པ་ཞིག་བཟོ་རྒྱུ་དང་འབྲེལ། Tibetan Policy and Support Act of 2019 ཞེས་པའི་ཨ་རིའི་བོད་དོན་ཁྲིམས་འཆར་གསར་པ་ཞིག་ཆེད་འདོན་གནང་བ་མ་ཟད། ཁྲིམས་འཆར་དེར་ཨ་རིའི་ཆབ་སྲིད་ཚོགས་པ་གཉིས་ཀ་ལས་གྲུབ་པའི་གྲོས་ཚོགས་འཐུས་མི་བདུན་ནས་རྒྱབ་སྐྱོར་གནང་ཡོད་པ་རེད། ཨ་རིའི་བོད་དོན་ཁྲིམས་འཆར་གསར་པ་དེ་དང་འབྲེལ་ཏེ་ཨ་རིར་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་གཞོན་པ་བུ་ཆུང་ཚེ་རིང་ལགས་སུ་ཞལ་པར་བརྒྱུད་བཀའ་འདྲི་ཁག་གཅིག་ཞུས་པར་ཨ་རིའི་གྲོས་ཚོགས་འོག་མའི་ནང་བོད་དོན་དང་འབྲེལ་བའི་ཁྲིམས་འཆར་གསར་པ་ཞིག་ཆེད་འདོན་གནང་བ་དེས་ཨ་རི་གྲོས་ཚོགས་ནས་བོད་དོན་ཐོག་ཐུགས་འཁུར་མུ་མཐུད་བཞེས་ཐོག་རྒྱ་ནག་གཞུང་ལ་ཆབ་སྲིད་ཀྱི་སྔོན་བརྡ་ཞིག་སྤྲད་པ་མཚོན་ཐུབ་པ་མ་ཟད་ཁྲིམས་འཆར་དེ་རིམ་པས་གཏན་འབེབས་ཐུབ་ཚེ་བོད་འདི་ཨ་རི་དང་རྒྱ་ནག་དབར་གྱི་འབྲེལ་ལམ་ཁྲོད་གནད་དོན་གལ་ཆེ་ཞིག་ཆགས་ཡོད་པའི་དཔང་རྟགས་ཐུབ་ཀྱི་རེད་ཅེས་གསུངས་སོང་། གཞི་རྩའི་ཨ་རིའི་བོད་དོན་ཁྲིམས་འཆར་གསར་པ་དེའི་ནང་ལ་དེ་སྔ་ ༢༠༠༢ ལོར་གཏན་འབེབས་གནང་བའི་ Tibet Policy Act 2002 ཞེས་ཨ་རིའི་བོད་ཐོག་འཛིན་པའི་སྲིད་བྱུས་ནང་གསལ་བའི་དོན་ཚན་ཁག་ལ་རྒྱས་བཤད་དང་༸གོང་ས་མཆོག་གིས་དབུས་པའི་བོད་ཀྱི་བླ་སྤྲུལ་ཡང་སྲིད་ཀྱི་གནད་དོན། དེ་བཞིན་བོད་ཀྱི་རང་བྱུང་ཁོར་ཡུག་སྲུང་སྐྱོབ་དགོས་པ། ཨ་རི་གཞུང་ནས་བོད་མིར་རོགས་སྐྱོར་མུ་མཐུད་གནང་དགོས་པ་སོགས་དོན་ཚན་ཆེ་ཁག་ལྔ་ཆེད་བཀོད་གནང་འདུག ༸གོང་ས་མཆོག་གིས་དབུས་པའི་བོད་ཀྱི་བླ་སྤྲུལ་ཡང་སྲིད་ཀྱི་གནད་དོན་དང་འབྲེལ་བའི་ནང་བླ་སྤྲུལ་ཡང་སྲིད་ཀྱི་གནད་དོན་དེ་ནི་བོད་མིའི་གཞི་རྩའི་ཆོས་དད་རང་དབང་དང་འབྲེལ་ཡོད་སྟབས། རྒྱ་ནག་གཞུང་ལ་དེའི་ཐོག་ཐེ་བྱུས་བྱ་རྒྱུའི་ཐོབ་ཐང་མེད་པ་དང་། ལྷག་པར་དུ་རྒྱ་ནག་གཞུང་གིས་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་ཡང་སྲིད་ཀྱི་གནད་དོན་ལ་ཐེ་བྱུས་བྱེད་ཚེ་རྒྱ་ནག་གཞུང་འབྲེལ་གྱི་གང་ཟག་དེ་ཨ་རི་ནང་འགྲོ་སྐྱོད་བྱ་རྒྱུའི་ཐོབ་ཐང་སྤྲད་རྒྱུ་མིན་པ་མ་ཟད། ཨ་རི་ནང་ཡོད་པའི་གང་ཟག་དེའི་རྒྱུ་དངོས་རྣམས་བེད་སྤྱོད་མི་ཆོག་པའི་བཀག་རྒྱ་གཏང་དགོས་པ། ཨ་རི་ཕྱི་སྲིད་ལས་ཁུངས་སུ་ཡོད་པའི་ཨ་རིའི་བོད་དོན་དམིགས་བསལ་འབྲེལ་མཐུད་པས་རྒྱལ་སྤྱིའི་ཆབ་སྲིད་ཀྱི་འབྲེལ་ལམ་བརྒྱུད་རྒྱ་གཞུང་གིས་༸སྐུའི་ཡང་སྲིད་ཀྱི་གནད་དོན་ཐོག་ཐེ་བྱུས་བྱེད་བཞིན་པར་སྐྱོན་བརྗོད་ནན་པོ་གནང་དགོས་དགོས་ཞེས་བཀོད་འདུག དེ་བཞིན་ཨ་རི་གཞུང་ནས་བོད་དོན་ཐོག་རྒྱབ་སྐྱོར་སྔར་ལྷག་གནང་གལ་དང་འབྲེལ་བའི་དོན་ཚན་ཁོངས་སུ་དེ་སྔ་ ༢༠༠༢ ལོར་གཏན་འབེབས་གནང་བའི་སྲིད་བྱུས་ཀྱི་དགོངས་དོན་ལྟར་ཨ་རི་ཕྱི་སྲིད་ལས་ཁུངས་སུ་ཨ་མི་རི་ཀའི་བོད་དོན་དམིགས་བསལ་འབྲེལ་མཐུད་པ་ངེས་པར་དུ་བསྐོ་གཞག་དགོས་པ་མ་ཟད། དམིགས་བསལ་འབྲེལ་མཐུད་པའི་ལས་ཁུངས་ནང་རྒྱུན་དུ་བོད་དོན་ཐོག་ཕྱག་ལས་གནང་མཁན་ལས་བྱེད་གསུམ་ལས་མི་ཉུང་བ་ཞིག་བསྐོ་གཞག་གནང་དགོས་ཞེས་འབུར་འདོན་དང་སྦྲགས། ཨ་མི་རི་ཀའི་བོད་དོན་དམིགས་བསལ་འབྲེལ་མཐུད་པ་མཆོག་ནས་རྒྱ་ནག་གཞུང་ལ་བོད་མིའི་གཞི་རྩའི་ཐོབ་ཐང་ཁག་སྲུང་སྐྱོབ་དགོས་པའི་དགོས་འདུན་ཆེད་བཏོན་དགོས་པ། ཆ་རྐྱེན་གང་ཡང་མེད་པར་རྒྱ་ནག་གཞུང་དང་༸གོང་ས་མཆོག་གམ་མགོན་པོ་༸གང་ཉིད་མཆོག་གི་སྐུ་ཚབ། ཡང་ན་བོད་མིའི་སྒྲིག་འཛུགས་ཀྱི་སྐུ་ཚབ་བཅས་དང་ལྷན་དུ་གྲོས་མོལ་བསྐྱར་གསོ་ཐུབ་ཐབས་གནང་དགོས་པ་སོགས་བཀོད་འདུག བོད་ཀྱི་རྒྱལ་ས་ལྷ་སར་ཨ་རིའི་གཞུང་ཚབ་ལས་ཁུངས་ཆེད་འཛུགས་གནང་གལ་དང་འབྲེལ་ཏེ་གལ་སྲིད་རྒྱ་གཞུང་ནས་བོད་ནང་ཨ་རིའི་གཞུང་ཚབ་ཆེད་འཛུགས་གནང་རྒྱུར་བཀག་སྡོམ་བྱེད་ཚེ་ཨ་རིའི་ཕྱི་སྲིད་ལས་ཁུངས་ནས་ཨ་རིར་རྒྱ་ནག་གི་གཞུང་ཚབ་ཁང་གསར་པ་གསར་འཛུགས་བྱ་རྒྱུའི་ཐོབ་ཐང་སྤྲད་རྒྱུ་མེད་པ་དང་། རྒྱ་ནག་གི་རྒྱལ་ས་པེ་ཅིང་ནང་རྟེན་གཞི་བྱས་པའི་ཨ་རིའི་གཞུང་ཚབ་ཁང་དུ་བོད་ཐོག་དཔྱད་ཞིབ་དང་ཐུགས་འཁུར་བཞེས་མཁན་གྱི་ཚན་པ་ཞིག་ལོགས་སུ་ཆེད་འཛུགས་དགོས་པ་གསལ་འདུག དེ་བཞིན་བོད་ཀྱི་ཁོར་ཡུག་གནད་དོན་ཁོངས་སུ་བོད་འདི་ཨེ་ཤ་ཡའི་རྒྱལ་ཁབ་ཁག་གི་ཆུའི་འབྱུང་ཁུངས་གཙོ་བོ་དེ་ཡིན་སྟབས། བོད་ནང་གི་གནམ་གཤིས་གནས་སྟངས་སྤྱི་དང་ལྷག་དོན་ཆུའི་གནས་བབས་ཉམས་ཉེས་སུ་ཕྱིན་ཚེ་ཨེ་ཤ་ཡའི་མི་འབོར་ཐེར་འབུམ་གཅིག་ལྷག་གི་འཚོ་བར་དཀའ་ངལ་འཕྲད་ངེས་ཡིན་པ་སོགས་འགྲེལ་བརྗོད་དང་སྦྲགས། ཨ་རིའི་ཕྱི་སྲིད་ལས་ཁུངས་ཀྱིས་བོད་ནང་གི་རྒྱུག་ཆུ་དང་གཙང་པོ་ཁག་སྲུང་སྐྱོབ་ཐུབ་ཐབས་སུ་ལམ་སྟོན་རྩ་འཛིན་ངེས་ཅན་ཞིག་གཏན་འབེབས་དགོས་པ་མ་ཟད། རྒྱ་གཞུང་དང་གཞུང་འབྲེལ་མ་ཡིན་པའི་ཚོགས་པ་ཁག་ལ་བོད་ཀྱི་རྩྭ་ཐང་དང་འབྲོག་པའི་སྲོལ་རྒྱུན་འཚོ་ཐབས་སྲུང་སྐྱོབ་དགོས་པའི་སྐུལ་མ་ཡང་ཡང་གནང་དགོས་པ་མ་ཟད་བོད་ནང་ཡོད་པའི་ཨ་རིའི་བཟོ་ལས་ཁང་དེ་དག་ཁོར་ཡུག་དང་འགྲོ་བ་མིའི་ཐོབ་ཐང་ལ་མི་གནོད་པ་ཞིག་དགོས་ངེས་སོགས་ཆེད་བཀོད་གནང་ཡོད་པ་རེད། གཞན་ཡང་ཨ་རིའི་བོད་དོན་གྱི་ཁྲིམས་འཆར་གསར་པའི་ནང་༸གོང་ས་མཆོག་གིས་བོད་མིའི་མང་གཙོའི་ལམ་སྲོལ་གསར་གཏོད་མཛད་པའི་བརྒྱུད་རིམ་ཁག་འགྲེལ་བརྗོད་དང་སྦྲགས། ཨ་རི་གཞུང་ནས་ད་ཡོད་བཞུགས་སྒར་དུ་རྟེན་གཞི་བྱས་པའི་བོད་མིའི་སྒྲིག་འཛུགས་འདི་རྒྱལ་སྤྱིའི་ཁྱོན་ལ་བཞུགས་པའི་བོད་མི་མང་གི་མངོན་འདོད་མཚོན་པའི་ཁྲིམས་མཐུན་གྱི་སྒྲིག་འཛུགས་ཤིག་ཏུ་ངོས་འཛིན་གནང་ཐོག་བོད་མིའི་འཚོ་ཐབས་དང་བོད་ཀྱི་ཐུན་མོང་མ་ཡིན་པའི་རིག་གཞུང་སྲུང་སྐྱོབ་སོགས་ཀྱི་ཐད་ལ་དཔལ་འབྱོར་གྱི་རོགས་རམ་གནང་དགོས་པ་དང་། ལྷག་པར་དུ་བལ་ཡུལ་ནང་བཞུགས་པའི་བོད་མི་ཚོར་ཁྲིམས་མཐུན་གྱི་ཡིག་ཆ་ཁག་ཐོབ་ཐབས་སུ་བལ་ཡུལ་གཞུང་ལ་ངེས་པར་དུ་འབོད་སྐུལ་གནང་དགོས་པ་སོགས་ཀྱང་ཆེད་བཀོད་གནང་འདུག གཞི་རྩའི་ད་ལྟའི་ཆར་ཨ་རིའི་བོད་དོན་གྱི་ཁྲིམས་འཆར་གསར་པ་དེའི་ཐོག་ཨ་མི་རི་ཀའི་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་དང་ཁྲིམས་ལུགས་ཚོགས་ཆུང་གཉིས་སུ་ཕུལ་ཏེ་དོན་ཚན་ཁག་རེ་རེའི་ཐོག་གྲོས་བསྡུར་དང་དཔྱད་ཞིབ་གནང་གི་ཡོད་པ་དང་། གཟའ་འཁོར་འདིའི་ནང་ཁྲིམས་འཆར་གསར་པ་དེ་ CECC ཞེས་ཨ་རིའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་གི་མཉམ་འབྲེལ་ཚོགས་གཙོ་ཨ་རིའི་གྲོས་ཚོགས་འཐུས་མི་སྐུ་ཞབས་ Marco Rubio ལགས་ནས་ཡུལ་དེའི་གྲོས་ཚོགས་གོང་མར་ཆེད་བཏོན་གནང་གི་ཡོད་པ་རེད།

ཨ་རིའི་ཕྱི་སྲིད་དྲུང་ཆེས་ཧོ་ལི་ཝུ་ཌི་གློག་བརྙན་ལས་ཁང་ནས་རྒྱ་ནག་གི་གནོན་ཤུགས་ལ་མགོ་སྒུར་རྒྱུ་མེད་པའི་རེ་སྐུལ།

ཟླ་བ་འདིའི་ཕྱི་ཚེས་ ༡༣ ཉིན་ Motion Picture Association of America ཞེས་པའི་ཨ་རིའི་གློག་བརྙན་བཟོ་སྐྲུན་ལྷན་ཚོགས་ཤིག་གི་ཐོག་ཨ་རིའི་ཕྱི་སྲིད་དྲུང་ཆེ་སྐུ་ཞབས་ Mike Pompeo མཆོག་གིས་ Hollywood གློག་བརྙན་བཟོ་ལས་ཁང་གིས་རང་ཉིད་ཀྱི་ཚོང་གི་ཁེ་ཕན་ལ་བརྟེན་ནས་རྒྱ་ནག་གཞུང་གི་གནོན་ཤུགས་འོག་མི་འགྲོ་བར་འགོག་རྒོལ་གནང་དགོས་པ་བརྗོད་འདུག སྐུ་ཞབས་ Mike Pompeo མཆོག་གིས་ Hollywood གློག་བརྙན་བཟོ་སྐྲུན་ལས་ཁང་ནི་ཨ་རིའི་རང་དབང་དང་གསར་གཏོད་ཀྱི་མཚོན་རྟགས་ཤིག་ཡིན་ཀྱང་། ཉེ་བའི་ཆར་ཨ་རིའི་གློག་བརྙན་མང་དག་ཅིག་གིས་རྒྱ་ནག་གི་ཁྲོམ་རའི་ནང་རང་ཉིད་ཀྱི་གློག་བརྙན་འགྲེམས་ཚོང་ཐུབ་ཆེད་རྒྱ་ནག་གཞུང་གི་གནོན་ཤུགས་ལ་མགོ་བོ་སྒུར་བའི་གནས་ཚུལ་མང་པོ་འཐོན་བཞིན་ཡོད་པ་འགྲེལ་བརྗོད་དང་འབྲེལ་ཏེ་ཧོ་ལི་ཝུ་ཌི་གློག་བརྙན་བཟོ་སྐྲུན་པ་རྣམས་ནས་དེ་ལྟ་བུའི་བྱ་སྤྱོད་མཚམས་འཇོག་གིས་རང་ཉིད་ཀྱི་གློག་བརྙན་ནང་རྒྱ་ནག་གི་གནས་སྟངས་ངོ་མ་གང་ཡིན་པ་དེ་དག་གསལ་འདོན་གནང་དགོས་པ་གསུངས་འདུག རྩབའི་ཉེ་ལམ་རྒྱལ་སྤྱིའི་ཁྲོམ་རའི་ནང་ Red Dawn དང་ Top Gun ཞེས་པའི་གློག་བརྙན་གཉིས་འགྲེམས་སྤེལ་གནང་རྗེས་གློག་བརྙན་དེ་དག་ནང་རྒྱ་ནག་གི་དམག་མའི་ཚབ་ཏུ་བྱང་ཀོ་རི་ཡའི་དམག་མི་འཇོག་རྒྱུ་མཚོན་ཐེ་ཝན་གྱི་རྒྱལ་དར་སྒྲེངས་འཛུགས་ཚབ་ཏུ་ཉི་ཧོང་གྱི་རྒྱལ་དར་སྒྲེངས་རྒྱུ་སོགས་གནད་དོན་མང་དག་ཅིག་བྱུང་ཡོད་སྟབས་རྒྱལ་སྤྱིའི་གསར་ལམ་ཁག་ཏུ་གླེང་སློང་ཤུགས་ཆེ་བྱུང་ཡོད་པ་རེད། སྐུ་ཞབས་ Mike Pompeo མཆོག་གིས་ཨ་རིའི་གློག་བརྙན་བཟོ་སྐྲུན་ལས་ཁང་ནས་རྒྱ་ནག་གཞུང་གི་གནོན་ཤུགས་ལ་གདོང་ལེན་དང་འགོག་རྒོལ་མ་གནང་བ་དེས་རྒྱ་ནག་གཅིག་བསྡུས་རིང་ལུགས་དང་འཇམ་པོའི་སྟོབས་ཤུགས་ཀྱི་ནུས་པ་ཆེ་རུ་གཏོང་བཞིན་ཡོད་སྐོར་གསུངས་པ་མ་ཟད། དེ་སྔ་ Seven years in Tibet འམ་བོད་ནང་ལོ་ངོ་བདུན་ཞེས་པའི་གློག་བརྙན་ལྟ་བུ་ད་ལྟའི་དུས་སྐབས་འདིར་འགྲེམས་སྤེལ་གནང་ཐུབ་བམ་ཞེས་དོགས་འདྲིའི་ཚུལ་དུ་གསུངས་འདུག Heritage Foundation ཞེས་པའི་ཐེབས་རྩ་ཁང་གི་མགྲིན་ཚབ་པ་སྐུ་ཞབས་ Mike Gonzalez ལགས་ཀྱིས་ཐེངས་འདིའི་གནས་ཚུལ་དང་འབྲེལ་ཏེ་ freebeacon གསར་ལམ་ལ་འགྲེལ་བརྗོད་གནང་བར་རྒྱ་ནག་རྒྱལ་ཁབ་ཀྱི་ནང་འདོན་སྤེལ་བྱ་རྒྱུའི་གློག་བརྙན་ཡིན་ཚེ་དེའི་ནང་ངེས་པར་དུ་རྒྱ་ནག་དམར་ཤོག་ཚོགས་པའི་ལྟ་ སྤྱོད་དང་མཐུན་པ་ཞིག་དགོས་ཡོད་པ་མ་ཟད། ལྷག་པར་དུ་བོད་དང་ཐེ་ཝན། ཤིན་ཅང་སོགས་ཀྱི་གནད་དོན་ནི་དམ་དྲག་ཅན་ཞིག་ཡིན་པ་བརྗོད་འདུག ཁོང་གིས་ཨ་རིའི་གློག་བརྙན་ལས་ཁང་རྣམས་ནས་རང་ཉིད་ཀྱི་གློག་བརྙན་ཅི་འདྲ་ཞིག་ལ་རྒྱ་ནག་གི་ཤུགས་རྐྱེན་ནམ་ཡང་ན་བཀག་སྡོམ་བྱས་པའི་གནས་ཚུལ་རིགས་བྱུང་ཡོད་ཚེ་གློག་བརྙན་ནང་གནད་དོན་དེ་ངེས་པར་དུ་གསལ་འདོན་གནང་དགོས་སྐོར་གསུངས་པ་དང་འབྲེལ། ཨ་རིའི་མང་ཚོགས་ནས་གནད་དོན་དེ་ཤེས་པའི་རང་དབང་ཡོད་པའང་གསུངས་འདུག

ཨ་རིའི་གྲོས་ཚོགས་འོག་མར་བོད་ཐོག་གྲོས་ཆོད་གྲོས་འཆར་གསར་པ་ཞིག་ཆེད་འདོན།

ཨ་རིའི་རྒྱལ་ས་ Washington DC ནང་ཨ་རིའི་གྲོས་ཚོགས་འོག་མའི་ནང་གྲོས་ཚོགས་ཀྱི་ཚོགས་དུས་ ༡༡༦ འཚོགས་བཞིན་པ་དང་བསྟུན་དེ་སྔ་ཕྱི་ལོ་ ༢༠༠༢ ལོར་ཡུལ་དེའི་གྲོས་ཚོགས་སུ་གཏན་འབེབས་གནང་བའི་ Tibet Policy Act 2002 ཞེས་ཨ་རི་བོད་ཐོག་འཛིན་པའི་སྲིད་བྱུས་དེ་ནུས་ཤུགས་ལྡན་པ་ཞིག་བཟོ་རྒྱུའི་གྲོས་ཆོད་གྲོས་འཆར་གསར་པ་ཞིག་ཆེད་འདོན་གནང་འདུག ཨ་རི་བོད་ཐོག་འཛིན་པའི་སྲིད་བྱུས་དེ་ནུས་ཤུགས་ལྡན་པ་ཞིག་བཟོ་རྒྱུའི་གྲོས་ཆོད་གྲོས་འཆར་གསར་པ་དེ་བདུན་ཕྲག་སྔོན་མའི་རེས་གཟའ་པ་སངས་ཟླ་ ༩ ཕྱི་ཚེས་ ༡༣ ཉིན་ཡུལ་དེའི་གྲོས་ཚོགས་འོག་མའི་ནང་ CECC ཞེས་ཨ་རིའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་གི་ཚོགས་གཙོ་ཨ་རིའི་གྲོས་ཚོགས་འཐུས་མི་སྐུ་ཞབས་ Jim McGovern ལགས་ནས་ཆེད་འདོན་གནང་ཡོད་པ་དང་། སྐབས་དེར་གྲོས་ཚོགས་འཐུས་མི་སྐུ་ཞབས་ Christopher H. Smith ལགས་དང་ལྕམ་ Marcy Kaptur ལགས། སྐུ་ཞབས་ Brad Sherman ལགས། སྐུ་ཞབས་ Mark Meadows ལགས། སྐུ་ཞབས་ Tom Suozzi ལགས། སྐུ་ཞབས་ Tom Malinowski ལགས། དེ་བཞིན་སྐུ་ཞབས་ Ben McAdams ལགས་བཅས་ཨ་རིའི་ཆབ་སྲིད་ཚོགས་པ་གཉིས་ཀ་ལས་གྲུབ་པའི་གྲོས་ཚོགས་འཐུས་མི་བདུན་ནས་རྒྱབ་སྐྱོར་གནང་འདུག ད་ལྟའི་ཆར་གྲོས་ཆོད་གྲོས་འཆར་གསར་པའི་ཐོག་ཨ་རིའི་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་དང་ཁྲིམས་ལུགས་ཚོགས་ཆུང་གཉིས་སུ་ཕུལ་ནས་གྲོས་བསྡུར་དང་དཔྱད་ཞིབ་གནང་མུས་ཡིན་པ་རེད། གཞི་རྩའི་ Tibet Policy Act 2002 ཞེས་ཨ་རི་བོད་ཐོག་འཛིན་པའི་སྲིད་བྱུས་དེ་ནུས་ཤུགས་ལྡན་པ་ཞིག་བཟོ་རྒྱུའི་གྲོས་ཆོད་གྲོས་འཆར་གསར་པ་དེ་དངོས་སུ་ཨ་་རིའི་གྲོས་ཚོགས་གོང་འོག་གཉིས་སུ་གཏན་འབེབས་ཐུབ་ཐབས་སུ་རྒྱལ་སྤྱིའི་བོད་དོན་ལས་འགུལ་ཁང་དང་ཨ་རི་བོད་ཀྱི་སྐུ་ཚབ་དོན་གཅོད་སོགས་ས་གནས་སུ་ཞུ་གཏུག་ལས་འགུལ་འདྲ་མིན་སྤེལ་མུས་ཡིན་པ་མ་ཟད། ཉེ་ཆར་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ཀྱང་ཨ་རི་ནང་གཞུང་འབྲེལ་འཚམས་གཟིགས་བརྒྱུད་ཡུལ་དེའི་གྲོས་ཚོགས་འཐུས་མི་ཁག་གཅིག་དང་མཇལ་འཕྲད་ཀྱིས་གྲོས་ཆོད་གྲོས་འཆར་གསར་པར་རྒྱབ་སྐྱོར་གནང་སྐྱོང་ཡོང་བའི་འབོད་སྐུལ་ཡང་ཞུས་ཡོད།

ཧོང་ཀོང་གི་ཡུལ་སྐོར་སྤྲོ་འཁྱམ་པ་བོད་དུ་འགྲོ་མི་ཆོག་པའི་གསལ་བསྒྲགས་སྤེལ་བ།  

རྒྱ་ནག་གཞུང་གི་སྟངས་འཛིན་བྱེད་བཞིན་པའི་བྷན་མ་ཡུལ་སྐོར་སྤྲོ་འཁྱམ་ཁང་གིས་ཧོང་ཀོང་གི་ཡུལ་སྐོར་སྤྲོ་འཁྱམ་པ་རྣམས་རྒྱ་ནག་གིས་ས་བགོས་བྱས་པའི་བོད་རང་སྐྱོང་ལྗོངས་དང་བོད་ཤར་ཕྱོགས་ཀྱི་མཚོ་སྔོན་ཞིང་ཆེན་དང་ཟི་ཁྲོན་ཞིང་ཆེན་སོགས་སུ་འགྲོ་སྐྱོད་བྱེད་མི་ཆོག་པའི་གཞུང་འབྲེལ་གྱི་གསལ་བསྒྲགས་སྤེལ་འདུག ཁ་སང་ཨ་རིར་རྟེན་གཞི་བྱས་པའི་ Free Tibet ཞེས་བོད་དོན་ལས་འགུལ་ཁང་གིས་པད་མ་རྫོང་བོད་ཀྱི་རིག་གཞུང་སྤྲོ་འཆམ་ལས་ཁང་གིས་ཟླ་ ༨ ཚེས་ ༢༦ ཉིན་གསལ་བསྒྲགས་ཞིག་སྤེལ་བ་གནས་ཚུལ་སྤེལ་ཏེ་བོད་རང་སྐྱོང་ལྗོངས་ཀྱིས་གཙོས་པའི་མཚོ་སྔོན་ཞིང་ཆེན་དང་ཟི་ཁྲོན་ཞིང་ཆེན་སོགས་སུ་འགྲོ་སྐྱོད་བྱེད་མཁན་ཧོང་ཀོང་གི་ཡུལ་སྐོར་སྤྲོ་འཆམ་པ་སུ་ལའང་སྤྲོ་འཆམ་ལས་ཁང་དེས་དང་ལེན་ཞུ་རྒྱུ་མིན་པའི་ཉེན་བརྡ་བཏང་ཡོད་པ་དང་། བོད་གནས་ལྟ་ཞིབ་ཁང་གིས་གསལ་བསྒྲགས་དེར་ཞིབ་འཇུག་གནང་རྗེས་གསལ་བསྒྲགས་དེ་རྒྱ་ནག་གི་གཞུང་འབྲེལ་གྱིས་སྤེལ་བའི་ཡིག་ཆ་ཞིག་ཡིན་པ་ཤེས་རྟོགས་བྱུང་སྐོར་བཀོད་འདུག རྩ་བའི་རྒྱ་ནག་གཞུང་འབྲེལ་གྱི་གསལ་བསྒྲགས་དེ་ནི་རྒྱ་ནག་གཞུང་དང་ཧོང་ཀོང་གི་མང་གཙོའི་ཡར་ལངས་པའི་བར་དུ་འགལ་འདུ་དྲག་པོ་འགྲོ་བཞིན་པའི་གནས་སྐབས་སུ་སྤེལ་བ་ཞིག་ཡིན་པ་རེད། ཧོང་ཀོང་གི་ནང་འདི་ལོའི་སྤྱི་ཟླ་དྲུག་པ་ནས་བཟུང་ཉེས་ཅན་རྩིས་སྤྲོད་དགོས་པའི་ཁྲིམས་འཆར་ལ་ངོ་རྒོལ་གྱིས་རྔམ་སྟོན་ཁྲོམ་སྐོར་རབ་དང་རིམ་པ་འབྱུང་བཞིན་པའི་ཁྲོད་ཉེ་བའི་ཆར་ཧོང་ཀོང་གི་གཙུག་ལག་སློབ་གྲྭ་བཅུ་གྲངས་ཤིག་གི་སློབ་མ་ཁག་གཅིག་རི་བོ་ཇོ་མོ་གླང་མར་ལྟ་སྐོར་ཏུ་ཕྱིན་ནས་ཀོང་ཧོང་ལ་བཅིངས་ཀྲོལ་དགོས་པའི་སྐད་འབོད་གནང་བར་བརྟེན་ཁོང་རྣམས་རྒྱ་ནག་སྲིད་གཞུང་གིས་འཛིན་བཟུང་བཀག་ཉར་བྱས་པའི་གནས་ཚུལ་བྱུང་ཡོད་པ་རེད། འདི་ལོའི་ཟླ་བ་བརྒྱད་པའི་མགོ་སྟོད་དུ་རྒྱ་གཞུང་གིས་བོད་ཁུལ་དུ་སྐད་འཕྲིན་ལ་དམ་དྲག་དང་འབྲེལ་བའི་གསལ་བསྒྲགས་ཤིག་སྤེལ་བར་རྒྱ་གཞུང་གིས་ཧོང་ཀོང་ནང་གི་གནད་དོན་དང་འབྲེལ་བའི་གསལ་བསྒྲགས་ཕྱི་ལ་མ་སྤེལ་བའི་སྔོན་དུ་སྐད་འཕྲིན་ནང་ཧོང་ཀོང་གི་གནད་དོན་དང་འབྲེལ་བའི་ཡིག་ངག་གི་གནས་ཚུལ་འདོན་སྤེལ་བྱ་ཚེ་ལོ་བརྒྱད་ཀྱི་ཁྲིམས་ཐག་གཅོད་ངེས་ཡིན་པའི་ཉེན་བརྡ་བཏང་བ་ཡང་འཁོད་ཡོད་པ་རེད།

Latest news