རྒྱལ་སྤྱི།

དེ་རིང་གསར་ལམ་ཁག་ཏུ་གནས་ཚུལ་ཐོན་པ་ལྟར་ན། བོད་ཀྱི་གློག་བརྙན་བཟོ་སྐྲུན་པ་ཟོན་ཐར་རྒྱལ་གྱི་གློག་བརྙན་གསར་པ་ལྷ་མོ་དང་སྐལ་བྷེ་ཞེས་པ་འདི་ལོའི་སེ་པན་རྒྱལ་ཁབ་ཀྱི་རྒྱལ་སྤྱིའི་གློག་བརྙན་དུས་སྟོན་ཐེངས་ ༦༧ པ་ཐོག་བདམས་ཐོན་བྱུང་བ་ལྟར་ཕྱི་ཟླ་ ༩ ཚེས་ ༢༠ ཉིན་དངོས་སུ་གཟིགས་འབུལ་ཞུ་རྒྱུ་རེད་འདུག ལྷ་མོ་དང་སྐལ་བྷེ་ཞེས་པའི་གློག་བརྙན་འཁྲབ་གཞུང་གི་ནང་དོན་གཙོ་བོ་བོད་ཁུལ་གྱི་ཕོ་མོའི་བར་གྱི་བརྩེ་དུང་དང་བརྩེ་དུང་གི་གུད་ཆག་ཁྲོད་ཀྱི་སེམས་ཀྱི་རྨ་ཁ་སོགས་ཕྱིར་མངོན་པར་བྱས་པའི་གློག་བརྙན་ཞིག་རེད། ལྷ་མོ་དང་སྐལ་བྷེ་གཉིས་གཉེན་སྒྲིག་བྱེད་གྲབས་ཡོད་སྐབས་ལྷ་མོས་རང་གི་མཛའ་བོ་སྐལ་བྷེ་ལགས་སྔོན་ཆད་ཡང་གཉེན་སྒྲིག་ཐེངས་ཤིག་བྱེད་མྱོང་ཡོད་པ་ཤེས་རྟོགས་བྱུང་བར་བརྟེན་ཁོང་དང་ལྷན་དུ་གཉེན་སྒྲིག་གི་འདུན་པར་འགྱུར་བ་ཐེབས་ཏེ་རེ་ཞིག་ཕྱིར་འཐེན་བྱས་ཡོད་སྟབས་སྐལ་བྷེ་ལགས་ཀྱིས་ སྔར་གྱི་ཆུང་མ་མཚོ་ཡག་ལགས་འཚོལ་དུ་ཕྱིན་ཀྱང་། མཚོ་ཡག་ལགས་བཟའ་འཐོར་བྱུང་རྗེས་ཡིད་སེམས་སྐྱོ་བས་རབ་ཏུ་མནར་ནས་མཐར་དབེན་པའི་དགོན་གྲོང་ཞིག་ཏུ་བཙུན་མ་གནང་ཟིན་པ་རེད། དེ་བཞིན་ལྷ་མོ་ལགས་ཀྱིས་གནས་ཚུལ་དེ་ཤེས་རྟོགས་བྱུང་ནས་གཉེན་སྒྲིག་གནང་བར་དངངས་སྐྲག་སྐྱེ་བཞིན་པའི་བརྩེ་དུང་གི་གདུང་བ་ཕྱིར་མངོན་པའི་གློག་བརྙན་ཞིག་རེད། རྩ་བའི་བོད་ཀྱི་གློག་བརྙན་སྒྲིག་སྦྱོར་བ་ཟོན་ཐར་རྒྱལ་ལགས་ནི་ལོ་རབས་བདུན་ཅུ་པའི་སྟོད་དུ་བོད་མདོ་སྨད་ཐུན་ཏེ་རུ་སྐྱེས་ཤིང་། བོད་ཁུལ་ནས་སློབ་གྲྭ་ཆེ་འབྲིང་ཆུང་གསུམ་ཐོན་རྗེས་ཕྱིར་ཕ་ཡུལ་དུ་ལོག་ནས་ལོ་འགའི་རིང་ལ་དགེ་རྒན་གྱི་ཕྱག་ལས་གནང་ཡོད་པ་དང་། རྗེས་སུ་ཁོང་གི་གྲོགས་པོ་པདྨ་ཚེ་བརྟན་ལགས་ཀྱི་ལམ་སྟོན་དང་རོགས་འདེགས་འོག་པེ་ཅིན་གྱི་གློག་བརྙན་སྒྲིག་སྦྱོར་གྱི་སློབ་གླིང་དུ་སློབ་ཞུགས་བྱས་ཡོད་པ་ལྟར་ཉེ་བའི་ལོ་ཤས་རིང་ཁོང་གིས་པདྨ་མ་ཚེ་བརྟན་དང་མཉམ་དུ་བོད་སྐད་ཀྱི་གློག་བརྙན་དབུས་ལམ་གྱི་ཉི་མ་དང་གཙང་བོ། དེ་བཞིན་ཁྱི་རྒན། ལྷིང་འཇགས་ཀྱི་མ་ཎི་རྡོ་འབུམ་སོགས་སྒྲིག་སྦྱོར་བྱས་ཏེ་རྒྱལ་སྤྱིའི་གློག་བརྙན་དུས་སྟོན་མང་པོའི་ཐོག་གཟིགས་འབུལ་ཞུས་ཡོད་པ་རེད། ཐེངས་འདིར་ཁོང་གིས་ལྷ་མོ་དང་སྐལ་བྷེ་ཞེས་པའི་གློག་བརྙན་སེ་པན་གྱི་རྒྱལ་སྤྱིའི་གློག་བརྙན་དུས་སྟོན་དུ་གཟིགས་འབུལ་ཞུ་རྒྱུ་རེད་འདུག  དེ་མཚུངས་སུ་བོད་ཀྱི་གློག་བརྙན་སྒྲིག་སྦྱོར་བ་དང་འཁྲབ་གཞུང་རྩོམ་པ་པོ་པདྨ་མ་ཚེ་བརྟན་ལགས་ཀྱི་གློག་བརྙན་དབུགས་ལྒང་ཞེས་པ་དེ་འདི་ལོའི་རྒྱལ་སྤྱིའི་གློག་བརྙན་དུས་སྟོན་རྙིང་གྲས་ Venice གློག་བརྙན་དུས་སྟོན་ཐེངས་ ༧༦ ཐོག་བདམས་ཐོན་བྱུང་ཡོད་པ་རེད།

ཉེ་ལམ་བོད་ནང་ཧོང་ཀོང་མཐོ་སློབ་ཀྱི་སློབ་ཕྲུག་བརྒྱད་དང་གཞན་ཧོང་ཀོང་གི་ཚན་རིག་དང་འཕྲུལ་རིག་མཐོ་སློབ་དང་གྲོང་ཁྱེར་མཐོ་སློབ་ནས་ཡིན་པའི་སློབ་ཕྲུག་གཉིས་བཅས་སློབ་ཕྲུག་བཅུ་ཙམ་ཞིག་རི་བོ་ཇོ་མོ་གླང་མའི་སྡོད་སྒར་རུ་དོ་དམ་བཀག་སྐྱིལ་བྱས་ཡོད་པ་དང་། བརྒྱུད་ལམ་ཁག་ཏུ་གནས་ཚུལ་སྤེལ་བར་གཞིགས་ན། སློབ་ཕྲུག་དེ་དག་བཀག་སྐྱིལ་བྱས་པའི་རྒྱུ་མཚན་ནི་ཁོང་ཚོའི་རང་ཉིད་ཀྱི་སྤྱི་ཚོགས་དྲྭ་ལམ་ཐོག་ཧོང་ཀོང་གི་ཉེས་ཅན་རྩིས་སྤྲོད་ཀྱི་ལས་འགུལ་ལ་རྒྱབ་སྐྱོར་བྱས་རྐྱེན་ཡིན་པར་བརྗོད་འདུག རྒྱ་གཞུང་གི་ཉེན་རྟོག་པ་ཞིག་གིས་སློབ་ཕྲུག་དེ་དག་ཁོངས་ནས་གཅིག་གིས་ཤོག་བུའི་སྟེང་ཧོང་ཀོང་བཅིངས་འགྲོལ་གཏོང་དགོས་ཞེས་འབོད་ཚིག་འཁོད་པའི་ཤོག་བྱང་བསྣམས་ནས་སློབ་ཕྲུག་གཞན་གྱིས་འདྲ་པར་ལེན་རྩིས་བྱས་སྟབས་ཁོང་རྣམས་ཉིན་གཉིས་རིང་དོ་དམ་བཀག་སྐྱིལ་དང་འདྲི་རྩད་བྱས་རྗེས་གློད་བཀྲོལ་བཏང་ཡོད་པ་བརྗོད་འདུག གནད་དོན་དེ་འབྲེལ་སློབ་ཕྲུག་དེ་དག་གི་འབྲེལ་ཡོད་མཐོ་སློབ་ཀྱི་ངེས་སྟོན་པ་ Zhang Xiang ལགས་ཀྱིས་ཁོང་ནས་རྒྱ་ནག་སྐམ་ས་ཆེན་པོའི་འབྲེལ་ཡོད་འཛིན་སྐྱོང་ལ་གློག་འཕྲིན་བཏང་ཐོག་གནས་ཚུལ་གང་བྱུང་མིན་གྱི་ཞིབ་ཕྲའི་གནད་དོན་དྲིས་པ་དང་། དེ་བཞིན་འདྲི་རྩད་སོགས་མགྱོགས་མྱུར་བྱེད་རྒྱུའི་རེ་སྐུལ་ཞུ་བཞིན། ད་ཆ་སློབ་ཕྲུག་རྣམས་གློད་བཀྲོལ་བཏང་ཟིན་པ་གསུངས་འདུག རྩ་བའི་ཧོང་ཀོང་ནང་ཉེས་ཅན་རྩིས་སྤྲོད་ཀྱི་ཁྲིམས་འཆར་འདོན་སྤེལ་བྱས་པ་ནས་བཟུང་དེའི་མང་ཚོགས་ནས་གཞུང་ལ་ངོ་རྒོལ་རབ་དང་རིམ་པ་བྱས་ཡོད་པ་མ་ཟད། ངོ་རྒོལ་གྱི་དུས་ཡུན་དེའི་རིང་ཧོང་ཀོང་ཉེན་རྟོག་པའི་ལས་འགུལ་བའི་ཐོག་མིག་ཆུ་དུག་རླངས་སོགས་ཀྱི་མཚོན་ཆ་རིགས་བེད་སྤྱོད་ཀྱིས་ལས་འགུལ་བར་རྨས་སྐྱོན་དང་ཡང་ཁག་གཅིག་འཛིན་བཟུང་བྱས་པ་སོགས་གནས་ཚུལ་བྱུང་སྟབས། རྒྱལ་སྤྱིའི་ཚོགས་སྐྱིད་ཁག་དང་འགྲོ་བ་མིའི་ཐོབ་ཐང་རྩོད་ལེན་པ་སོགས་ནས་ཧོང་ཀོང་ལ་སྐྱོན་བརྗོད་ཤུགས་ཆེན་བྱས་པ་དེ་ལྟར་ཡང་། ཁ་སང་རེས་གཟའ་ཉི་མའི་ཉིན་ལས་འགུལ་བས་ངོ་རྒོལ་གནང་སྐབས་ཉེན་རྟོག་པའི་ཆུའི་ཡུར་བ་གཏོར་བའི་ཐོག་ཉེན་བརྡའི་ཚུལ་དུ་ནམ་མཁར་མེ་མདའ་བརྒྱབ་པའི་གནས་ཚུལ་བྱུང་ཡོད་པ་རེད། དེ་ནི་ཕྱི་ཟླ་ ༦ པ་ནས་སྤེལ་བའི་ལས་འགུལ་དེའི་ཁྲོད་ཉེན་རྟོག་པའི་ཕྱོགས་ནས་དེ་ལྟར་བྱ་སྤྱོད་སྤེལ་བ་ཐེངས་དང་པོ་ཆགས་ཀྱི་ཡོད་པ་དང་ཆབས་ཅིག་ཏུ་རྒྱ་གཞུང་གིས་དེ་གའི་གཞུང་འབྲེལ་གསར་ཁང་ Xinhua ཐོག་པེ་ཅིང་ནས་ཧོང་ཀོང་ནང་ཞི་བདེ་ལྷིང་འཇགས་བཟོ་སླད་འགན་ཁུར་དང་དབང་ཆ་ཡོད་པས་གལ་ཏེ་ཧོང་ཀོང་ནང་འཁྲུག་ཟིང་ལངས་ན་རྒྱ་གཞུང་ནས་དེ་མ་ཐག་ཏུ་ཐེ་བྱུས་བྱ་རྒྱུ་ཡིན་པའི་ཉེན་བརྡ་བཏང་འདུག

ཨོ་སི་ཊོ་ལི་ཡ་གཞུང་གིས་འཛིན་སྐྱོང་གནང་བཞིན་པའི་སློབ་གྲྭ་ ༡༣ ནང་རྒྱ་ནག་གིས་མ་དངུལ་བཏང་ཐོག་ཁུང་ཙི་སློབ་གླིང་བརྒྱུད་རྒྱ་སྐད་དང་རྒྱ་ཡིག་སློབ་ཁྲིད་ཀྱི་ལས་འཆར་སྤེལ་བ་དེ་དག་ཕྱིར་བསྡུ་གནང་འདུག རྒྱ་ནག་གཞུང་གིས་ཕྱི་རྒྱལ་རྒྱལ་ཁབ་ཁག་ལས་དེ་སྔ་རྒྱ་ནག་དང་འབྲེལ་ལམ་ཡོད་པ་དེ་དག་སླར་སྲ་བརྟན་དང་གོང་མཐོར་གཏོང་དགོས་པ་དང་མེད་པ་རྣམས་ལ་འབྲེལ་ལམ་གསར་དུ་བཟོ་རྒྱུར་བསྙད་ནས་ཡུལ་གྲུ་དེ་དག་ཏུ་གཞུང་སྒེར་གང་རུང་ནས་གཉེར་བཞིན་པའི་སློབ་གྲྭ་དང་མཐོ་སློབ། དེ་བཞིན་གཙུག་ལག་སློབ་གཉེར་ཁང་འདྲ་མིན་ནང་དུ་རྒྱ་ནག་གི་ཁུང་ཙི་སློབ་གླིང་ཆེད་འཛུགས་བྱེད་བཞིན་ཡོད་པའི་ཁྲོད། ཉེ་བའི་ལོ་ཤས་ནས་ཨ་རི་དང་ཡོ་རོབ་རྒྱལ་ཁབ་གཙོས་པའི་རྒྱལ་ཁབ་མང་དག་ཅིག་གི་ནང་ལས་དོན་དེ་འཕྲལ་མར་མཚམས་འཇོག་གནང་བཞིན་པ་ལྟར་ཨོ་སི་ཊོ་ལི་ཡའི་ New South Wales མངའ་སྡེའི་གཞུང་གིས་གཉེར་བཞིན་པའི་ཁུལ་དེའི་ཤེས་ཡོན་ལྟེ་གནས་ཁང་ ༡༣ ནང་གི་ཁུང་ཙི་སློབ་གླིང་ཡོངས་རྫོགས་སྒོ་བརྒྱབ་འདུག ཁ་སང་ཨོ་སི་ཊོ་ལི་ཡའི་ནང་གི་གསར་ཁང་རྙིང་གྲས་ the sunday morning herald གསར་ཁང་གིས་གནས་ཚུལ་སྤེལ་བར་གཞིགས་ན།ཨོ་སི་ཊོ་ལི་ཡའི་ New South Wales མངའ་སྡེའི་ཤེས་ཡོན་ཚན་པས་རྒྱ་ནག་གི་ཁུང་ཙི་སློབ་གླིང་གིས་ཡུལ་དེའི་ཤེས་ཡོན་སློབ་གསོར་ཇི་ལྟར་གནོན་ཤུགས་སྤྲད་མིན་ཐོག་ཉམས་ཞིབ་གནང་སྐབས་ད་ལྟའི་ཆར་དངོས་སུ་ཤུགས་རྐྱེན་སྤྲད་པའི་དཔང་རྟགས་ཁུངས་བཙན་རག་མེད་ཀྱང་། ལས་འཆར་དེའི་བརྒྱུད་ཆབ་སྲིད་ཀྱི་ཐོག་ནས་ཤེས་ཡོན་སློབ་གསོའི་ནང་མ་འོངས་པར་ཤུགས་རྐྱེན་ངེས་ཅན་ཞིག་སྤྲད་ཉེན་ཡོད་པ་ར་སྤྲོད་བྱུང་ཡོད་པ་དང་། ལྷག་དོན་New South Wales མངའ་སྡེའི་ཤེས་ཡོན་ཚན་པ་དེ་ནི་རྒྱ་ནག་གཞུང་གི་མ་དངུལ་རོགས་རམ་བརྒྱུད་དེ་གའི་ཤེས་ཡོན་གྱི་ལྟེ་གནས་ཁང་ཁག་གི་ནང་ཁུང་རྩི་སློབ་གླིང་འཛུགས་མཁན་གཞུང་འབྲེལ་གྱི་ཚན་པ་གཅིག་པོ་དེ་ཆགས་ཡོད་སྟབས་དེ་ནི་བློ་འཚབ་བྱ་གཞི་ཞིག་ཆགས་ཡོད་པ་གསུངས་འདུག New South Wales མངའ་སྡེའི་ཤེས་ཡོན་ཚན་པས་ཉམས་ཞིབ་ཁྲོད་ད་དུང་ཨོ་གླིང་གཞུང་གིས་གཉེར་བའི་ཤེས་ཡོན་ལྟེ་གནས་སུ་ཕྱིའི་རྒྱལ་ཁབ་གྱི་གཞུང་འབྲེལ་མི་སྣ་ཆེད་འཛུགས་བྱས་པའི་གནད་དོན་དེར་སེམས་འཚབ་གནང་དགོས་པ་ཞིག་དང་། རང་གི་རྒྱལ་ནང་མང་ཚོགས་ལ་དྲག་གནོན་བྱེད་མཁན་དབང་ཆ་གཅིག་བསྡུས་རིང་ལུགས་ཀྱི་གཞུང་ཞིག་གི་མི་སྣས་མང་གཙོའི་རྒྱལ་ཁབ་ཅིག་གི་གཞུང་འབྲེལ་ཚན་པར་ཆེད་འཛུགས་བྱས་པ་ནི་དེ་བས་ཀྱང་བློ་འཚབ་གནང་གཞི་ལས་མ་འདས་ཞེས་གསུངས་འདུག དཔྱད་ཞིབ་ཁྲོད་གཞན་ཡང་ཨོ་གླིང་གཞུང་གིས་གཉེར་བཞིན་པའི་ཤེས་ཡོན་ལྟེ་གནས་ཁང་གི་འགན་འཛིན་ལྷན་ཚོགས་ཀྱི་ཚོགས་མིའི་ཁོངས་སུ་རྒྱ་ནག་གི་ངོ་ཚབ་མང་དག་ཅིག་ཡོད་པར་བརྟེན་ཕྱིའི་གནོན་ཤུགས་མངོན་སུམ་དུ་མཐོང་རྒྱུ་ཡོད་པ་མ་ཟད། རྒྱ་ནག་གི་ Hanban བརྒྱུད་ནས་ NSW ཤེས་ཡོན་ལྟེ་གནས་ཁང་གི་སློབ་གྲྭ་དང་ལས་བྱེད་བགྲེསས་པའི་གསོལ་ཕོགས་བཅས་ཀྱི་ཆེད་དཔལ་འབྱོར་གྱི་མཐུན་རྐྱེན་སྦྱོར་བཞིན་པ་དེའི་རྐྱེན་གྱིས་སློབ་གྲྭའི་ངོས་ནས་སྐབས་རེར་གནད་དོན་ཁ་ཤས་ཐོག་རྒྱ་ནག་ནས་གང་བཤད་ལས་དེ་མིན་སྣང་མེད་དུ་སྐྱུར་པའི་ཉེན་ཁ་ཆེན་པོ་ཡོད་པར་ངེས་ཤེས་རྙེད་ཐུབ་ཡོད་སྐོར་གསུངས་འདུག་པ་དང་ཆབས་ཅིག Hanban ནས་བཏང་འཛིན་བྱེད་བཞིན་པར་བརྟེན་ཨོ་གླིང་གཞུང་གི་ངོས་ནས་ཤེས་ཡོན་ལྟེ་གནས་ཁང་དུ་སྐབས་རེར་དགེ་རྒན་བསྐོ་གཞག་གནང་རྒྱུ་ཡང་དཀའ་ངལ་ཆེན་པོ་འཕྲད་མུས་ཡིན་པ་མངོན་གསལ་གནང་འདུག New South Wales མངའ་སྡེའི་ཤེས་ཡོན་ཚན་པའི་ཞིབ་དཔྱད་གནང་འབྲས་སུ་དགོངས་འཆར་དོན་ཚན་དྲུག་ཅན་ཞིག་ཕུལ་བ་ལྟར་དེར་ངོས་བཞེས་དང་མ་འོངས་པར་ཕྱིའི་གཞུང་དང་ཚོགས་སྡེ་གང་རུང་ནས་ཐད་བྱུས་གང་བྱེད་ལ་བཏང་འཛིན་གྱི་ལམ་སྟོན་སྒྲིག་གཞི་གཏན་འེབས་དང་། དེ་འབྲེལ་ཚོགས་ཆུང་ཆེད་འཛུགས་ཀྱིས་འདི་ལོའི་ལོ་མཇུག་ཏུ་གནང་ཟིན་པ་དགོས་ལུགས་གསུངས་འདུག གཞི་རྩའི་ཨོ་གླིང་གཞུང་གི་ཤེས་ཡོན་ལྟེ་གནས་ཁང་དེའི་ངོས་ནས་ཁུང་ཙི་སློབ་གླིང་དང་འབྲེལ་བའི་ཞིབ་དཔྱད་ཀྱི་ལས་འཆར་དེ་སྔ་ལོའི་ཕྱི་ཟླ་ ༥ ནང་དབུ་འཛུགས་གནང་ཡོད་པ་དང་། རེས་གཟའ་པ་སངས་ཉིན་རིང་མིན་ཕྱི་ཟླ་ ༡༢ ནང་ Hanban དང་གྲོས་མཐུན་གྱི་དུས་ཚེས་ཟིན་སྐབས་དངོས་སུ་ལས་འཆར་དེ་བཀག་སྡོམ་བྱ་རྒྱུ་གསལ་བསྒྲགས་ཞུ་རྒྱུ་དང་། ལྟེ་གནས་ཁང་གི་ལས་བྱེད་ཚོས་དུས་ཡུན་དེའི་བར་དུ་སློབ་ཁྲིད་ཀྱི་ལས་དོན་དེ་དག་བཏང་འཛིན་གནང་ངེས་ཡིན་པ་གསུངས་འདུག ཨོ་སི་ཊོ་ལི་ཡའི་ NSW ཤེས་ཡོན་ལྟེ་གནས་ཁང་གི་དྲུང་ཆེ་སྐུ་ཞབས་ Mark Scott ལགས་ཀྱིས་ཁོང་གི་ཚན་པ་དེའི་ཁུང་རྩི་སློབ་གླིང་གི་ལས་དོན་ལ་ཉམས་ཞིབ་ཀྱི་དགོངས་འཆར་དོན་ཚན་ཡོངས་རྫོགས་ཁས་ལེན་ཞུས་པ་དང་འབྲེལ་གནད་དོན་དེའི་ཐོག་ལག་བསྟར་གནང་མགོ་བཙུགས་ཡོད་པ་དང་། NSW མངའ་སྡེའི་ཤེས་ཡོན་ལྟེ་གནས་ཁང་གིས་འགྲོ་གྲོན་ཨ་སྒོར་ས་ཡ་ ༡༌༢ བཏང་ནས་དེའི་ཁྱབ་ཁོངས་གཞི་རིམ་སློབ་གྲྭ་བཞི་དང་མཐོ་སློབ་དགུའི་ནང་རྒྱ་ཡིག་སློབ་ཁྲིད་ཀྱི་ལས་གཞི་གཞན་ཞིག་སྤེལ་རྒྱུ་ཡིན་པ་གསུངསའདུག NSW ཤེས་ཡོན་ལྟེ་གནས་ཁང་གི་ཤེས་རིག་བློན་ཆེན་ལྕམ་སྐུ་ Sarah Mitchell ལགས་ཀྱིས་ཀྱང་ལྟེ་གནས་ཁང་གི་ངོས་ནས་ཐག་གཅོད་གནང་ཁག་ལ་རྒྱབ་སྐྱོར་གནང་བ་དང་འབྲེལ། ད་ལྟའི་ཆར་རྒྱ་གཞུང་གི་ཁུང་ཙི་སློབ་གླིང་ལག་བསྟར་བརྒྱུད་ནས་དངོས་སུ་ཤུགས་རྐྱེན་ཇི་སྤྲད་དཔང་རྟགས་ཁུངས་བཙན་རག་མེད་ཀྱང་། ལས་འཆར་དེའི་བརྒྱུད་ཆབ་སྲིད་ཀྱི་ཐོག་ནས་ཤེས་ཡོན་སློབ་གསོའི་ནང་སླད་མར་དབང་སྒྱུར་གྱི་ཤུགས་རྐྱེན་ངེས་ཅན་ཞིག་ཡོང་གི་ཡོད་པ་མངོན་གསལ་རེད་ཅེས་གསུངས་འདུག གཞི་རྩའི་སྔ་ལོ་ ༢༠༡༨ ལོར་ཨ་རི་ནང་རྒྱ་ནག་གི་ཁུང་ཙི་སློབ་གླིང་ ༩༠ ཙམ་ཡོད་ཀྱང་ཉེ་བའི་ལོ་ཤས་ནས་བཟུང་རྒྱལ་སྤྱིའི་སྟེང་རྒྱ་ནག་གི་ཁུང་ཙི་སློབ་གླིང་དང་འབྲེལ་ཐག་གཅོད་དགོས་པའི་ཞུ་གཏུག་དང་ངོ་རྒོལ་དུ་མ་གནང་ཡོད་པ་དང་། འདི་ལོ་ནང་ཨ་རིའི་གཙུག་ལག་སློབ་གཉེར་ཁང་གསུམ་ནས་ཁུ་ཙི་སློབ་གླིང་དང་འབྲེལ་བ་ཡོངས་སུ་མཚམས་འཇོག་བྱས་ཡོད་པ་རེད། བོད་རང་བཙན་སློབ་ཕྲུག་ཚོགས་པ་གཙོ་གྱུར་བོད་དོན་རྒྱབ་སྐྱོར་ཚོགས་པ་ཚོས་ཁུང་ཙི་སློབ་གླིང་དེས་ཤེས་ཡོན་རང་དབང་ལ་དོ་ཕོག་གཏོང་བཞིན་པར་སྐྱོན་བརྗོད་ཀྱིས་དྲིལ་བསྒྲགས་དང་གོ་རྟོགས་ཀྱི་ལས་འགུལ་མང་པོ་སྤེལ་དང་སྤེལ་མུས་ཁྲོད་ད་ཆ་ཨ་རི་དང་ཡོ་རོབ་སོགས་སུ་ཁུང་ཙི་སློབ་གླིང་གི་བསྟི་གནས་ཁང་མང་དག་ཅིག་སྒོ་རྒྱག་བཞིན་ཡོད་པ་དང། ཐེངས་འདིིར་ NSW མངའ་སྡེའི་ཤེས་ཡོན་ལྟེ་གནས་ཁང་ཁག་གི་ཁུང་རྩི་སློབ་གླིང་སྒོ་རྒྱག་རྒྱུའི་ཐག་གཅོད་དེ་ཡོངས་བསྒྲགས་བྱུང་བར་Australia འི་བོད་དོན་ལས་འགུལ་ཁང་གིས་དགའ་བསུ་ཞུས་པ་དང་འབྲེལ་ཚོགས་པ་དེའི་ངོས་ནས་འདས་པའི་ལོ་གཅིག་གི་གོང་ནས་གནད་དེའི་ཐོག་ལས་འགུལ་རིམ་པ་སྤེལ་བར་རྒྱལ་ཁ་ཐོབ་ཡོད་པར་འགྲེལ་བརྗོད་གནང་འདུག

UNPO ཞེས་རྒྱལ་ཚོགས་སུ་སྐུ་ཚབ་མེད་པའི་རྒྱལ་ཁབ་དང་མི་མང་གི་ཚོགས་པའི་ཚོགས་མི་འཛམ་གླིང་ཡུ་གུར་ལྷན་ཚོགས་ཀྱིས་རྒྱ་ནག་ཏུ་འཚོགས་ལ་ཉེ་བའི་ ༢༠༢༢ ལོའི་རྒྱལ་སྤྱིའི་དགུན་དུས་ཨོ་རྩེད་འགྲན་བསྡུར་དང་བསྟུན་རྒྱ་ནག་གཞུང་གིས་ཡུ་གུར་མི་མང་གི་འགྲོ་བ་མིའི་ཐོབ་ཐང་ལ་གུས་བརྩི་དགོས་པ་དང་ཡང་ན་ཕྱི་ལོ་ ༢༠༢༢ ལོའི་རྒྱལ་སྤྱིའི་དགུན་དུས་ཨོ་རྩེད་གཙོ་གཉེར་གྱི་བདག་དབང་བཞག་དགོས་པའི་དྲྭ་ཐོག་ཞུ་གཏུག་གི་ལས་འགུལ་ཞིག་དབུ་འཛུགས་གནང་བ་དང་འབྲེལ། རྒྱལ་སྤྱིའི་ཨོ་རྩེད་ལྷན་ཚོགས་ཀྱི་ངོས་ནས་ཨོ་རྩེད་གཙོ་གཉེར་བྱེད་མཁན་རྒྱལ་ཁབ་གང་རུང་དེས་ཨོ་རྩེད་གྱི་བཅའ་ཁྲིམས་སྒྲིག་དོན་ཁས་ལེན་དང་སྒྲིག་གཞིའི་འབྲུ་དོན་དག་དང་མཐུན་པའི་ཐོག་ནས་གནང་མིན་འགན་དབང་འཐུང་ཚང་བཞེས་དགོས་གལ་ཡིན་པའི་ཞུ་སྐུལ་གནང་འདུག འཛམ་གླིང་གི་ལས་འགུལ་བ་ཚོས་མཉམ་འབྲེལ་གྱིས་སྤེལ་བའི་ #Norightsnogames2022 ཞེས་པའི་དྲྭ་ཐོག་ཞུ་གཏུག་གི་ལས་འགུལ་དེ་བརྒྱུད་རྒྱ་གཞུང་གི་ངོས་ནས་ཡུ་གུར་མང་ཚོགས་དང་ཊར་ཀིའི་ཁ་ཆེ་གྲངས་ཉུང་མི་རིགས་ས་ཡ་གཅིག་བརྒལ་བ་ཡུ་གུར་ས་གནས་སུ་བཀག་བསྐྱིལ་བྱས་པའི་ལས་དོན་འཕྲལ་མར་མཚམས་འཇོག་གིས་བཀག་བསྐྱིལ་ཁང་སྒོ་བརྒྱབ་དགོས་པ་དང་། ཡུ་གུར་མང་ཚོགས་ཀྱི་ཐོབ་ཐང་ལ་གུས་བརྩི་ཞུ་དགོས་པའི་ཞུ་སྐུལ་གནང་བ་མ་ཟད། གལ་ཏེ་རྒྱ་གཞུང་གིས་རྒྱལ་སྤྱིའི་རྩ་ཁྲིམས་དང་ཡོངས་སུ་འགལ་བའི་ལས་དོན་དེ་མཚམས་འཇོག་མ་བྱེད་ཚེ་རྒྱ་ནག་ལ་ཕྱི་ལོ་ ༢༠༢༢ ལོའི་དགུན་དུས་ཨོ་རྩེད་གོ་སྒྲིག་ཞུ་རྒྱུའི་འོས་འགན་ཚང་མེད་པར་སྐྱོན་བརྗོད་གནང་འདུག ལྷག་པར་དུ་རྒྱལ་སྤྱིའི་ཨོ་རྩེད་ལྷན་ཚོགས་ཀྱི་གཞི་རྩའི་བཅའ་ཁྲིམས་ཀྱི་དོན་གནད་ཆེ་ཤོས་གཅིག་ནི་སྤྱི་ཚོགས་སུ་ཞི་བདེ་བག་ཕེབས་ཀྱི་ཁོར་ཡུག་བསྐྲུན་པ་བརྒྱུད་ནས་འགྲོ་བ་མིའི་གཞི་རྩའི་རིན་ཐང་གོང་འཕེལ་གནང་རྒྱུ་ཞེས་བཀོད་ཡོད་ཀྱང་། རྒྱ་ནག་གཞུང་གིས་རྒྱལ་ནང་དུ་ཡུ་གུར་གྲངས་ཉུང་མི་རིགས་ཀྱི་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་བཞིན་པ་དེས་རྒྱལ་སྤྱིའི་ཨོ་རྩེད་ལྷན་ཚོགས་ཀྱི་བཅའ་ཁྲིམས་དང་དངོས་འགལ་གྱུར་ཡོད་པ་གསུངས་འདུག དེ་བཞིན་རྒྱལ་སྤྱིའི་ཨོ་རྩེད་གོ་སྒྲིག་གི་གཙོ་གཉེར་བྱེད་པར་ཉེར་བ་མཁོ་བའི་ཆ་རྐྱེན་གཙོ་བོ་ནི་རྒྱལ་ཁབ་གང་ཡིན་ལ་ལྟོས་མེད་དེ་དག་གི་ཆབ་འབངས་ཡིན་ནོ་ཅོག་གི་གཞི་རྩའི་འགྲོ་བ་མིའི་ཐོབ་ཐང་ལ་སྲུང་སྐྱོབ་ཀྱི་ལས་འགན་འཐུས་ཚང་བསྒྲུབ་དགོས་པ་དང་། གལ་ཏེ་རྒྱལ་ཁབ་གང་རུང་དེས་རྒྱ་ནག་ལྟ་བུར་འགྲོ་བ་མིའི་ཐོབ་ཐང་གདལ་བཤིག་དང་རྩིས་མེད་རྡོག་རོལ་གཏང་མཁན་ཞིག་ཡིན་ཚེ་དེར་ཨོ་རྩེད་གཙོ་གཉེར་གྱི་འོས་བབ་མེད་སྐོར་གསུངས་འདུག འཛམ་གླིང་ཡུ་གུར་ལྷན་ཚོགས་ཀྱིས་ད་དུང་ཕྱི་ལོ་ ༢༠༢༢ ལོའི་ཨོ་རྩེད་འགྲན་བསྡུར་འཚོགས་ལ་ཉེ་བའི་ཉིན་གྲངས་ ༩༠༠ ཙམ་ཡོད་པའི་དུས་འདིར་གདམ་ག་གཉིས་དེ་མུར་ལྷག་ཡོད་པ་དང་། དེའང་རྒྱ་ནག་གཞུང་གིས་ཡུ་གུར་གྲངས་ཉུང་མི་རིགས་ཀྱི་འགྲོ་བ་མིའི་ཐོབ་ཐང་ལ་གུས་བརྩི་དང་བཀག་བསྐྱིལ་ཁང་ཕྱིར་བསྡུ་བྱེད་རྒྱུ་དང་། ཡང་ན་རྒྱལ་སྤྱིའི་ཨོ་རྩེད་ལྷན་ཚོགས་ཀྱིས་དེ་གའི་གཞི་རྩའི་བཅའ་ཁྲིམས་ཀྱི་སྒྲིག་དོན་ལྟར་རྒྱ་ནག་གཞུང་ནས་ཨོ་རྩེད་གཙོ་གཉེར་གྱི་བདག་དབང་འཕྲོག་དགོས་པ་དེ་རེད་ཅེས་གསུངས་འདུག ལྷག་པར་དུ་རྒྱལ་ཚོགས་སུ་སྐུ་ཚབ་མེད་པའི་རྒྱལ་ཁབ་དང་མི་མང་གི་ཚོགས་པའི་ངོས་ནས་ཀྱང་ད་ཐེངས་ཀྱི་ལས་འགུལ་ལ་རྒྱབ་སྐྱོར་དང་སྦྲགས། རྒྱ་ནག་གཞུང་ལ་བཀག་བསྐྱིལ་ཁང་དེ་དག་སྒོ་བརྒྱབ་ཏེ་ཡུ་གུར་མང་ཚོགས་ལ་དྲག་གནོན་མཚམས་འཇོག་དགོས་པ་དང་། རྒྱལ་སྤྱིའི་ཨོ་རྩེད་ལྷན་ཚོགས་ཀྱིས་འགྲོ་བ་མིའི་ཐོབ་ཐང་གོང་འཕེལ་དང་འབྲེལ་བའི་བཅའ་ཁྲིམས་ཀྱི་འབྲུ་དོན་དག་ལ་བརྩི་བཀུར་ཞུ་དགོས་གལ་ཡིན་པ་མངོན་གསལ་གནང་བ་དང་ཆབས་ཅིག རྒྱ་ནག་གིས་ ༢༠༢༢ ནང་ཚུད་ལ་དེ་ལྟར་མ་བྱེད་ཚེ་ཨོ་རྩེད་གཙོ་གཉེར་བྱེད་དབང་མེད་པ་ནན་བརྗོད་གནང་ཡོད་པ་རེད། གཞི་རྩའི་རྒྱ་ནག་གཞུང་གིས་འདས་པའི་ལོ་ཤས་ནས་ཡུ་གུར་གྲངས་ཉུང་མི་རིགས་ཐོག་མི་སྤྱོད་ལས་འདས་པའི་དྲག་གནོན་དང་གནའ་གནོན་གྱི་སྲིད་བྱུས་སྤེལ་བཞིན་པར་རྒྱལ་སྤྱིའི་ཁྱོན་ནས་དེར་སྐྱོན་བརྗོད་དང་སྲིད་བྱུས་དེ་འཕྲལ་མར་མཚམས་འཇོག་དགོས་པའི་ཞུ་སྐུལ་དང་ལས་འགུལ་རྣམ་པ་འདྲ་མིན་སྤེལ་ཡོད་ཀྱང་། Saudi Arabia དང་། Pakistan གཙོས་པའི་ཁ་ཆེའི་རྒྱལ་ཁབ་སོ་བདུན་ལྷག་གིས་སྲིད་འཛིན་ཞི་ཅིང་ཕིང་གི་གཞུང་ལ་རྒྱབ་སྐྱོར་བྱས་ཡོད་པ་རེད། དེ་རིང་ Bloomberg གསར་ཁང་གིས་གནས་ཚུལ་སྤེལ་བར་གཞིགས་ན། དེ་སྔ་ཕྱི་ཟླ་ ༧ པའི་ནང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཚོགས་ཆུང་གི་ཚོགས་གཙོ་སྐུ་ཞབས་ Coly Seck ལགས་ཀྱི་མཚན་ཐོག་ཏུ་ཕྱག་བྲིས་ཤིག་ཕུལ་ཏེ་རྒྱ་ནག་གི་འགྲོ་བ་མིའི་ཐོབ་ཐང་ཐོག་ལ་རྒྱབ་སྐྱོར་གྱི་མིང་རྟགས་བཀོད་མཁན་ཁ་ཆེའི་ཡུལ་གྲུ་དེ་དག་ཁོངས་སུ་ཡོད་པ་ Qatar གཞུང་གི་སྐུ་ཚབ་ནས་ད་ཆ་ཕྱག་བྲིས་དེ་ནས་མཚན་རྟགས་ཕྱིར་འཐེན་གནང་འདུག རྒྱལ་ཚོགས་སུ་ཡོད་པའི་ Qatar རྒྱལ་ཁབ་ཀྱི་གཞུང་ཚབ་ Ali Al Mansouri ལགས་ཀྱིས་གསུངས་པར་ཁོང་རྣམས་ཀྱིས་དེ་སྔ་ཐག་གཅོད་གནང་བ་དེས་ Qater ཕྱི་སྲིད་ལས་དོན་ལ་དོགས་གཞི་འགྲོ་སྲིད་པ་དང་ཁོང་རྣམས་ད་ཆ་བར་གནས་བསྡད་རྒྱུ་མ་ཟད། ཁོང་རྣམ་པའི་ངོས་ནས་དགོས་ངེས་ཀྱི་རོགས་རམ་ཞུ་དགོས་ཚེ་དེ་ལྟར་ཞུ་ངེས་ཡིན་པ་གསུངས་འདུག རྩ་བའི་རྒྱལ་སྤྱིའི་བོད་དོན་འབྲེལ་མཐུད་ལས་ཁང་ངོས་ནས་ཀྱང་བོད་ནང་གི་འགྲོ་བ་མིའི་ཐོབ་ཐང་གི་དངོས་ཡོད་གནས་སྟངས་མཚོན་པའི་འགུལ་རིས་བརྙན་ཐུང་བརྒྱུད་རྒྱ་ནག་ཏུ་འཚོགས་རྒྱུའི་ ༢༠༢༢ ལོའི་རྒྱལ་སྤྱིའི་དགུན་དུས་ཨོ་རྩེད་འགྲན་བསྡུར་ལ་ཟུར་ཟ་དང་། དེ་སྔ་རྒྱ་ནག་གཞུང་གིས་ ༢༠༠༨ ལོའི་ཨོ་རྩེད་འགྲན་བསྡུར་སྐབས་ཁུལ་དེའི་ནང་གི་འགྲོ་བ་མིའི་ཐོབ་ཐང་གནས་སྟངས་ཡར་རྒྱས་འགྲོ་བར་ཁས་ལེན་བྱས་པ་དང་། དེ་བཞིན་ཨོ་རྩེད་ཀྱི་ཚོགས་མི་རྒྱལ་ཁབ་ཁག་ནས་རེ་བ་དང་ཡིད་ཆེས་གནང་བ་ལྟར་རྒྱ་ནག་ཏུ་བཟང་ཕྱོགས་ཀྱི་འགྱུར་བ་གང་ཡང་ཕྱིན་མེད་པ་མངོན་གསལ་གནང་བ་མ་ཟད། རྒྱ་ནག་ནང་འགྲོ་བ་མིའི་ཐོབ་ཐང་གི་གནས་བབས་དེ་ཆེས་ཞན་པོ་ཡོད་པ་དང་ལྷག་དོན་རྒྱལ་སྤྱིའི་ཨོ་ལམ་པིག་ཚོགས་ཆུང་ལ་དེ་སྔའི་ཚོགས་ཆུང་གི་གྲོས་ཆོད་དང་ཆ་རྐྱེན་ནང་གསལ་བཞིན་ད་བར་རྒྱ་གཞུང་ནས་དོན་འཁྱོལ་ལག་བསྟར་ཇི་བྱེད་ཁ་གསལ་དགོས་པར་རེ་འདུན་ཆེད་བཏོན་གནང་ཐོག་རྒྱ་ནག་ལ་ཨོ་རྩེད་གོ་སྒྲིག་གཙོ་གཉེར་གྱི་བདག་དབང་མེད་པར་སྐྱོན་བརྗོད་གནང་ཡོད་པ་རེད།

ཉེ་སྔོན་ཟླ་བ་གཉིས་ལྷག་ཙམ་གྱི་གོང་ནས་ཧོང་ཀོང་མི་མང་གིས་ཞི་བའི་ལས་འགུལ་སྤེལ་བར་གདུང་སེམས་མཉམ་བསྐྱེད་ཀྱི་མར་མེ་ཁྲོམ་སྐོར་གནང་སོང་།  ཁ་སང་ཟླ་ ༨ ཚེས་ ༡༩ ཉིན་ཕྱི་དྲོ་ཚོུད་ ༦ ཐོག་བཞུགས་སྒར་དུ་རྟེན་གཞི་བྱས་པའི་བོད་ཀྱི་དགུ་བཅུ་གསུམ་ལས་འགུལ་ཚོགས་པས་རྐང་འགན་བཞེས་ཐོག་བཞུགས་སྒར་དུ་བོད་མི་གཙོས་པའི་ས་གནས་རྒྱ་གར་ཡུལ་མི་དང་ཕྱི་རྒྱལ་བ་བཅས་ཀྱིས་ཕྱག་ཏུ་སྒྲོན་མེ་བསྣམས་ནས་བྱང་ཆུབ་སེམས་མཆོག་གི་སྔོན་སྨོན་གསུང་འདོན་གནང་ཐོག་དྷ་ས་མེག་གྷན་ཁྲོམ་གཞུང་ནད་དབུ་འཛུགས་ཀྱིས་ཐེག་ཆེན་ཆོས་གླིང་གཙུག་ལག་ཁང་གི་ཉེ་འདབས་སུ་ཡོད་པའི་ཆོལ་གསུམ་བོད་ཀྱི་རྒྱལ་གཅེས་དཔའ་བོ་དཔའ་མོའི་རྗེས་དྲན་རྡོ་རིང་གི་མདུན་ཐང་བར་མར་མེ་ཁྲོམ་སྐོར་གནང་སོང་།   བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ངོས་ནས་ལས་འགུལ་དེ་དང་འབྲེལ་བའི་ཡོངས་ཁྱབ་གསལ་བསྒྲགས་ཤིག་སྤེལ་བའི་ནང་ཧོང་ཀོང་ནང་ཉེས་ཅན་པ་རྒྱ་ནག་སྐམ་ས་ཆེན་པའི་ཁྲིམས་ཁང་ལ་རྩིས་སྤྲོད་བྱེད་པའི་ཁྲིམས་འཆར་ཟེར་བ་དེ་གལ་ཏེ་ཁྲིམས་འཆར་དེ་ལམ་ལྷོང་ལྡན་པ་ཞིག་བྱུང་ཚེ་སླད་མར་ཧོང་ཀོང་གི་ཆབ་སྲིད་གནས་སྟངས་དང་འགྲོ་བ་མིའི་གཞི་རྩའི་ཐོབ་ཐང་ཁག་ཇེ་ཞན་ཇེ་སྡུག་ཏུ་འགྲི་རྒྱུ་ཡིན་པའི་བློ་འཚབ་ཆེན་པོ་བྱུང་བ་ལྟར་ཁྲིམས་འཆར་དེ་དག་ཕྱིར་འཐེན་བྱེད་དགོས་པའི་གནས་སྟངས་གྱུར་སྟབས། དེ་ནི་ཧོང་ཀོང་མི་མང་གི་ངོ་རྒོལ་ལས་འགུལ་ལ་ཐོབ་པའི་རླབས་ཆེན་གྱི་གྲུབ་འབྲས་ཤིག་རེད་ཅེས་གསུངས་འདུག ལྷག་དོན་འདི་ག་བོད་ཀྱི་དགུ་བཅུ་གསུམ་ལས་འགུལ་ཚོགས་པས་ཧོང་ཀོང་མི་མང་གི་ཞི་བའི་ལས་འགུལ་དང་ཁོ་ཚོའི་དྲང་བེན་གྱི་འཐབ་བརྩོད་ལ་རྒྱབ་སྐྱོར་ཞུ་རྒྱུ་དང་རྒྱ་ནག་གཞུང་གིས་ཐོག་མའི་ཁས་ལེན་དང་དམ་བཅའ་ཡིད་ལ་བཅངས་ནས་ཧོང་ཀོང་ནང་མང་གཙོ་ཡང་དག་པ་ཞིག་ལག་ལེན་བྱེད་དགོས་པ་མ་ཟད་ཧོང་ཀོང་མི་མང་གི་གཞི་རྩིའི་མངོན་འདོད་ཁག་ལ་བརྩི་སྲུང་ཞུ་དགོས་པའིའབོད་སྐུལ་ཞུ་བཞིན་ཡོད་པའང་ཆེད་བཀོད་གནང་འདུག སྐབས་དེར་བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ཚོགས་གཙོ་བོད་མི་མང་སྤྱི་འཐུས་ལྷ་རྒྱ་རི་རྣམ་རྒྱལ་སྒྲོལ་དཀར་ ལགས་ཀྱིས་གསར་འགོད་པར་ཧོང་ཀོང་ནང་གི་མི་མང་ཚོས་ཞི་བའི་ཐོག་ནས་རྒྱ་ནག་གི་གནོན་ཤུགས་སྤྲོད་བཞིན་པར་མི་འདོད་པའི་རྣམ་པ་ཆེད་བཏོན་གནང་བ་དེར་བོད་མི་ངོས་ནས་རྒྱབ་སྐྱོར་ཡོད་པ་གསུངས་སོང་། ད་དུང་ཁོང་གིས་ང་ཚོ་བོད་ཀྱི་བདེན་དོན་སེལ་བར་ང་ཚོ་ལྟ་བུའི་རྒྱ་ནག་གཞུང་གིས་བཙན་གནོན་འོག་ཏུ་དཀའ་སྡུག་མྱོང་བཞིན་པ་ཚོར་དཀའ་ངལ་འཕྲད་སྐབས་རྒྱབ་སྐྱོར་གནང་ཐུབ་ཚེ་ང་ཚོ་ལའང་གྲུབ་འབྲས་སོན་པར་ཕན་ཐོགས་ཆེན་པོ་ཡོད་སྐོར་གསུངས་སོང་། གཞི་རྩའི་འདས་པའི་ཟླ་ཤས་རིང་ཧོང་ཀོང་མང་ཚོགས་ནས་མི་མང་གི་འདུ་འཛོམས་ཆེ་ས་ཡོད་སའི་ས་ཁུལ་དུ་ཉེས་ཅན་རྩིས་སྤྲོད་ཀྱི་ཁྲིམས་འཆར་ཡོངས་ནས་ཕྱིར་འཐེན་དགོས་པ་དང་། ཧོང་ཀོང་གི་སྤྱི་ཁྱབ་ཀེ་རི་ལེམ་རང་གི་ལས་གནས་ནས་རྩ་དགོངས་ཞུ་དགོས་པ། དེ་བཞིན་ཧོང་ཀོང་གི་སྤྱི་ཁྱབ་མང་གཙོའི་ལམ་ལུགས་ཐོག་འདེམས་སྒྲུག་བྱེད་དགོས་པ་སོགས་དགོས་འདུན་ཆེད་བཏོང་གྱིས་ལས་འགུལ་རབ་དང་རིམ་པ་སྤེལ་བའི་ཁར། ཉེ་ལམ་དེ་འབྲེལ་ལས་འགུལ་ཞིག་ཧོང་ཀོང་གི་གནམ་ཐང་ནང་སྤེལ་ཡོད་པ་དང་། ལས་འགུལ་དེའི་ཁྲོད་ཉེན་རྟོག་པས་མིག་ཆུ་དུག་རླངས་སོགས་མཚོན་ཆ་སྤྱོད་ནས་ངོ་རྒོལ་བ་དང་ཉེན་རྟོག་པའི་དབར་འཁྲུག་རྩོད་ཤོར་བའི་གནས་སྟངས་ཆགས་ཡོད་པ་མ་ཟད། ཧོང་ཀོང་དང་རྒྱ་ནག་གཉིས་ཀྱི་ས་མཚམས་སུ་ཆགས་པའི་རྒྱ་ནག་གི་གྲོང་ཁྱེར་ Shenzhen ནང་རྒྱ་ནག་གི་དམག་མིའི་འགྲུལ་འཁོར་མང་དག་ཅིག་ཆེད་བསྐོང་གིས་ཧོང་ཀོང་མི་མང་ལས་འགུལ་བར་འཇིགས་སྐུལ་བྱས་པ་སོགས་ཀྱི་ཛ་དྲག་གནས་སྟངས་གྱུར་ཡོད་པ་ལྟར་རྒྱལ་སྤྱིའི་སྤྱི་ཚོགས་ནས་ཀྱང་རྒྱ་ནག་གིས་དྲག་གནོན་གྱི་སྲིད་བྱུས་སྤེལ་བཞིན་པར་སེམས་ཁུར་གནང་དང་གནང་མུས་ཡིན་པ་རེད།  

དབྱིན་ཡུལ་ནང་གནས་སྡོད་བོད་མི་ཚོས་རྒྱལ་སྤྱིའི་ཧོང་ཀོང་གདུང་སེམས་མཉམ་བསྐྱེད་ལས་འགུལ་ནང་མཉམ་ཞུགས་ཀྱིས་ཧོ་ཀོང་མང་ཚོགས་ཀྱི་ལས་འགུལ་དང་མངོན་འདོད་ལ་རྒྱབ་སྐྱོར་གྱི་གདུང་སེམས་མཉམ་བསྐྱེད་ཞུས་འདུག སྤྱིར་འདི་ལོ་ཧོང་ཀོང་སྤྱི་ཁྱབ་ཀེ་རི་ལེམ་གྱིས་ཧོང་ཀོང་ནས་རྒྱ་ནག་སྐམ་ས་ཆེན་པོ་དང་ལྷན་དུ་ཉེས་ཅན་རྩིས་སྤྲོད་ཀྱི་ཁྲིམས་འཆར་འདོན་ནས་ད་བར་འདས་པའི་ཟླ་བ་གཉིས་ལྷག་གི་རིང་ལ་ཧོང་ཀོང་མི་མང་ས་ཡ་མང་པོས་པེ་ཅིང་གཞུང་དང་ཧོང་ཀོང་ད་ཡོད་གཞུང་འཛིན་ལ་ངོ་རྒོལ་གྱི་ལས་འགུལ་རྒྱུན་མི་མི་ཆད་པ་སྤེལ་བཞིན་པ་དང་། ཧོང་ཀོང་གི་ཉེན་རྟོག་པ་ཚོས་མི་མང་ངོ་རྒོལ་གནང་མཁན་ཚོར་དྲག་གནོན་དང་འཛིན་བཟུང་སོགས་བྱེད་འགོ་བཙུགས་ཏེ་ད་ཆ་ཉིན་རེ་བཞིན་ཧོང་ཀོང་ནང་གནས་སྟངས་ཆེས་ཛ་དྲག་ཏུ་འགྱུར་བཞིན་ཡོད་པ་རེད། ཟླ་ ༨ ཚེས་ ༡༦ ནས་ ༡༩ བར་འཛམ་གླིང་ས་ཕྱོགས་གང་སར་གནས་སྡོད་ཧོང་ཀོང་མང་ཚོགས་དང་ཧོང་ཀོང་ལ་རྒྱབ་སྐྱོར་གནང་མཁན་མི་མང་ནས་ GLOBAL: Solidarity with HK Rally ཞེས་རྒྱལ་སྤྱིའི་ཁྱོན་ཀྱི་རྒྱལ་ཁབ་ ༣༠ ལྷག་གི་ནང་ཧོང་ཀོང་མང་ཚོགས་ཀྱི་ལས་འགུལ་ལ་གདུང་སེམས་མཉམ་བསྐྱེད་ཀྱི་རྔམ་སྟོན་གཞི་རྒྱ་ཆེ་བའི་ལས་འགུལ་སྤེལ་འགོ་བརྩམས་ཡོད་པ་དང་། ཕྱི་ཚེས་ ༡༧ ཉིན་དབྱིན་ཡུལ་གྱི་རྒྱལ་ལོན་ཊན་དུ་སྤེལ་བའི་རྒྱལ་སྤྱིའི་ཧོང་ཀོང་གདུང་སེམས་མཉམ་བསྐྱེད་ལས་འགུལ་ནང་ཁུལ་དེར་གནས་སྡོད་བོད་མི་ཚོས་མཉམ་ཞུགས་ཀྱིས་བོད་མི་ཚོ་ཧོང་ཀོང་མང་ཚོགས་དང་མཉམ་དུ་ཡོད་ཅེས་དང་། ཧོང་ཀོང་མང་ཚོགས་ལ་གཉའ་གནོན་མཚམས་འཇོག་དགོས་ཞེས་པའི་ཕྲད་དར་དང་ཤོག་སྦྱང་སོགས་ཀྱི་སྟེང་ལ་དགོས་འདོན་ཆེད་བཀོད་ཀྱིས་རྔམ་སྟོན་ཁྲོམ་སྐོར་དང་ཧོང་མང་ཚོགས་ཀྱི་ཞི་རྒོལ་ལ་གདུང་སེམས་མཉམ་བསྐྱེད་ཞུས་འདུག སྐབས་དེའི་མང་ཚོགས་ཆིག་སྟོང་ལྷག་འདུ་འཛོམས་བྱུང་བའི་ལས་འགུལ་དེ་ལོན་ཊན་རྒྱལ་ས་ Trafalgar Square ཞེས་མང་ཚོགས་འདུ་འཛོམས་ཆེ་བའི་ཐང་ཆེན་ནས་དབྱིན་ཡུལ་སྲིད་བློན་བཞུགས་གནས་དང་། དེ་བཞིན་དབྱིན་ཡུལ་གྲོས་ཚོགས་ཐང་ཆེན་བར་རིམ་པས་ལས་འགུལ་སྤེལ་འདུག་ཅིང་། སྐབས་དེར་ཧོང་ཀོང་མང་ཚོགས་ཀྱི་གདུང་སེམས་མཉམ་བསྐྱེད་ཀྱི་ལས་འགུལ་ལ་གདོང་ལེན་གྱི་ཚུལ་དུ་རྒྱ་ནག་གཞུང་ཚབ་ཁང་ནས་རྒྱ་རིགས་སློབ་ཕྲུག་ངོ་རྒོལ་བ་གྲ་སྒྲིག་གིས་ལས་འགུལ་ཡང་སྤེལ་འདུག རྩ་བའི་རྒྱལ་སྤྱིའི་ཧོང་ཀོང་གདུང་སེམས་མཉམ་བསྐྱེད་ཀྱི་ལས་འགུལ་དེ་ཡོ་རོབ་རྒྱལ་ཁབ་འཇར་མི་ནི་དང་ཕ་རན་སི། དེ་བཞིན་ཌེན་མཀ བྱང་ཨ་རི། ཨོ་སི་ཊོ་ལི་ཡ། ཨེ་ཤ་ཡ་བཅས་ཀྱི་རྒྱལ་ཁབ་ཁག་ ༣༠ ལྷག་གི་ནང་དུའང་ལས་འགུལ་གྱི་རྣམ་པ་འདྲ་མིན་བརྒྱུད་ནས་ཧོང་ཀོང་མང་ཚོགས་ལ་གདུང་སེམས་མཉམ་བསྐྱེད་ཞུས་ཡོད་པ་རེད།

ཨོ་སི་ཊོ་ལི་ཡའི་སྲིད་བློན་ཟུར་པས་ད་ཆ་འཛམ་གླིང་ཁྱོན་དུ་འཕེལ་བཞིན་པའི་རྒྱ་ནག་གི་དབང་ཆ་གཅིག་སྡུས་རིང་ལུགས་དང་སྲིད་དབང་སྒེར་འཛིན་ལ་སྐྱོན་བརྗོད་དང་འབྲེལ་ཏེ་ཨོ་སི་ཊོ་ལི་ཡའི་མང་ཚོགས་ནས་རྒྱ་གཞུང་གི་བྱེད་སྟངས་དེར་ཡིད་དབང་འཕྲོག་རྒྱུ་མེད་པའི་ཉེན་བརྡ་བཏང་བ་མ་ཟད། ད་ལྟའི་ཧོང་ཀོང་ནང་གི་གཞི་རྒྱ་ཆེ་བའི་རྔམ་སྟོན་གྱི་རྣམ་པ་དེ་མ་འོངས་པར་རྒྱ་ནག་ནང་བྱུང་སྲིད་པ་རེད་ཅེས་ནན་བརྗོད་གནང་འདུག ཁ་སང་ཨོ་སི་ཊོ་ལི་ཡའི་ Financial Review ཞེས་པའི་གསར་ལམ་ཐོག་གནས་ཚུལ་སྤེལ་བར་གཞིགས་ན། ཉེ་ཆར་ཡུལ་དེའི་སྲིད་བློན་ཟུར་པ་སྐུ་ཞབས་ John Howard ལགས་ཀྱིས་སྲིད་འཛིན་ཞི་ཅིན་ཕིང་གིས་སྣེ་ཁྲིད་པའི་ད་ལྟའི་རྒྱ་ནག་དམར་ཤོག་ཚོགས་པ་དེ་འདས་པའི་ལོ་ངོ་བཅུའི་ནང་སྲིད་དབང་སྒེར་གཅོད་ཀྱི་ལམ་ལུགས་ལག་བསྟར་བྱེད་མཁན་ཆེས་སྡུག་ཤོས་འགྱུར་བཞིན་པའི་མཚམས་འདིར་ཨོ་སི་ཊོ་ལི་ཡ་གཞུང་གིས་རྒྱ་ནག་དང་ཨ་རི་ལྷན་དུ་གནད་ཆེའི་འབྲེལ་ལམ་ཁག་ཆ་སྙོམས་གནང་རྒྱུར་དཀའ་ངལ་འཕྲད་བཞིན་ཡོད་ཀྱང་ཨོ་སི་ཊོ་ལི་ཡ་ནས་རྒྱ་ནག་ལས་ཨ་རི་དང་འབྲེལ་ཉེ་ཆེ་བ་བྱེད་བཞིན་ཡོད་པ་དང་དེ་ནི་གཙོ་བོ་རྒྱལ་ཁབ་གཉིས་པོའི་དབར་རྣམ་ཀུན་ནས་ འགྲོ་བ་མིའི་གཞི་རྩའི་རིན་ཐང་གི་གནད་དོན་ཐོག་གླེང་མོལ་གནང་གི་ཡོད་པ་མངོན་གསལ་གནང་འདུག ལྷག་དོན་ཁོང་སྐུ་སྒེར་ནས་ཧོང་ཀོང་ནང་གི་ཞི་རྒོལ་དེའི་ནང་མཉམ་ཞུགས་གནང་བའི་ལས་འགུལ་བའི་རྒྱ་ཁྱོན་ལ་སེམས་འགུལ་ཐེབས་པ་མ་ཟད། ད་ཆ་ཧོང་ཀོང་ནང་གི་ལྷིང་འཇགས་མེད་པའི་གནས་སྟངས་དེ་མ་འོངས་པར་རྒྱ་ནག་ནང་བྱུང་སྲིད་པའི་མངོན་དཔག་ཡིན་པར་འགྲེལ་བརྗོད་གནང་སྟེ་རྒྱ་གཞུང་ནས་ད་ཆ་ཧོང་ཀོང་ནང་འབྱུང་བཞིན་པའི་གཞི་རྒྱ་ཆེ་བའི་ལས་འགུལ་དེ་སྔར་ལས་རྒྱ་ཁྱབ་མི་ཡོང་བར་ཕུགས་རྒྱང་རིང་བའི་བསམ་བློ་གཏང་དགོས་པར་ནན་སྐུལ་གནང་འདུག སྐུ་ཞབས་ Howard ལགས་ཀྱི་གསུང་བཤད་དེ་ནི་ཁ་སང་ཨོ་སོ་ཊོ་ལི་ཡའི་གྲོང་ཁྱེར་ Kalgoorlie ནང་དབུ་འཛུགས་གནང་བའི་ Diggers and dealers ཞེས་གཏེར་ལས་ཀྱི་གླེང་སྟེགས་དབུ་འབྱེད་དང་བསྟུན་གནང་བ་ཞིག་ཡིན་པ་དང་། ཁོང་གིས་ད་དུང་ད་རེས་ཧོང་ཀོང་ནང་བྱུང་བའི་དོན་རྐྱེན་དེ་ནི་དཔལ་འབྱོར་རྒྱ་སྐྱེད་དང་སྲིད་དབང་སྒེར་འཛིན་གྱི་ལམ་ལུགས་གཉིས་མཉམ་དུ་སྐྱོད་བཞིན་པའི་དུས་ཤིག་ལམ་ལྷོང་ཡོང་རྒྱུ་མེད་པའི་དྲན་སྐུལ་ཞིག་ཆགས་ཡོད་སྐོར་གསུངས་ཏེ་རྒྱ་གཞུང་གི་ངོས་ནས་དེ་ལྟར་བྱེད་རྒྱུ་ནི་གདོང་ལེན་གནད་ཆེ་ཞིག་རེད་ཅེས་གསུང་འདུག

རྒྱ་གཞུང་གིས་ཉེ་ཆར་འཇར་མ་ནིའི་གྲོས་ཚོགས་ཀྱི་འགྲོ་བ་མིའི་ཐོབ་ཐང་ཚོགས་ཆུང་དང་འཕྲུལ་ལས་ཚོགས་ཁག་གཉིས་རྒྱ་ནག་ཏུ་སྐྱོད་རྒྱུར་བཀག་སྡོམ་བྱས་འདུག འཇར་མ་ནི་གྲོས་ཚོགས་ཀྱི་འགྲོ་བ་མིའི་ཐོབ་ཐང་ཚོགས་ཆུང་གི་མགྲིན་ཚབ་པ་སྐུ་ཞབས་ Micheal Brand ལགས་ཀྱིས་ཡུལ་དེའི་བརྒྱུད་ལམ་ཁག་ཏུ་འཇར་མ་ནིའི་གྲོས་ཚོགས་ཀྱི་འགྲོ་བ་མིའི་ཐོབ་ཐང་ཚོགས་ཆུང་གིས་ཟླ་ཤས་གོང་ནས་གྲ་སྒྲིག་གནང་འགོ་ཚུགས་ཏེ་རྒྱ་ནག་གི་གྲངས་ཉུང་མི་རིགས་རྣམས་ཀྱི་ཆོས་དད་རང་དབང་གནས་སྟངས་གཙོ་བཟུང་གིས་རིང་མིན་ཕྱི་ཟླ་ ༩ པ་ནང་རྒྱ་ནག་གི་རྒྱལ་ས་པེ་ཅིང་དང་བོད་ཀྱི་རྒྱལ་ས་ལྷ་ས། དེ་བཞིན་ཤིན་ཅང་གི་རྒྱལ་ས་ Urumchi བཅས་ནང་འཚམས་གཟིགས་གནང་རྒྱུའི་འཆར་གཞི་ཡོད་ཀྱང་རྒྱ་གཞུང་གིས་དེར་བཀག་སྡོམ་བྱས་ཡོད་པ་གསུངས་འདུག སྐུ་ཞབས་ Micheal Brand ལགས་ནས་རྒྱ་གཞུང་གི་བྱ་སྤྱོད་དེ་ནི་འགྲོ་བ་མིའི་ཐོབ་ཐང་དང་འབྲེལ་བའི་ཚོར་བ་རྣོ་བའི་གནད་དོན་ཁག་གི་ཐོག་ཞལ་གསང་པོས་གླེང་སློང་གནང་མཁན་ཚོར་ཁ་གཏད་ཇི་ལྟར་གཅོད་གི་ཡོད་མེད་མངོན་གསལ་ཆགས་ཡོད་པར་རྒྱ་གཞུང་ལ་སྐྱོན་བརྗོད་གནང་འདུག ད་རེས་རྒྱ་གཞུང་གིས་འཇར་མ་ནིའི་གྲོས་ཚོགས་ཀྱི་འགྲོ་བ་མིའི་ཚོགས་ཆུང་ཙམ་མ་ཟད་ཡུལ་དེའི་གྲོས་ཚོགས་ཀྱི་འཕྲུལ་ལས་ཚོགས་ཆུང་གི་རྒྱ་ནག་ནང་སྐོར་སྐྱོད་ཐད་ལའང་བཀག་སྡོམ་བྱས་ཡོད་པ་དང་ཚོགས་ཆུང་གི་ཐོག་མའི་འཆར་གཞིར་གཞིགས་ཚེ་ཁོང་རྣམས་རྒྱ་ནག་གི་གྲོང་ཁྱེར་ Shanghai དང་རྒྱལ་ས་པེ་ཅིང་གཉིས་སུ་སྐོར་སྐྱོད་ཀྱིས་གཏམ་བཤད་དང་ལྷག་དོན་ཡུལ་དེའི་ནང་གི་ཚོང་ལས་གསར་པ་དང་ Artificial Intelligence འམ་མིས་བཟོས་པའི་འཕྲུལ་རིགས་ཐོག་ཤེས་རྟོགས་ཡོང་ཐབས་གནང་རྒྱུ་ཡིན་ཀྱང་། ཕྱིས་སུ་རྒྱ་གཞུང་གིས་ཚོགས་ཆུང་དེའི་ནང་ཡུ་གུར་ཁ་ཆེ་བར་རྒྱབ་སྐྱོར་ཤུགས་ཆེ་གནང་མཁན་གྱི་གྲོས་ཚོགས་འཐུས་མི་ལྕམ་ Margarete Bause ལགས་ཡོད་སྟབས་འགྲུལ་བཞུད་དེར་བཀག་སྡོམ་བྱས་འདུག ལྕམ་ Margarete ལགས་ནི་ཡུན་རིང་ནས་ཡུ་གུར་ཁ་ཆེ་གྲངས་ཉུང་མི་རིགས་ཀྱི་འགྲོ་བ་མིའི་ཐོབ་ཐང་ལ་རྒྱབ་སྐྱོར་ཤུགས་ཆེ་གནང་མཁན་འཇར་མ་ནིའི་ལྗང་ཁུ་ཚོགས་པའི་ཚོགས་མི་ཡིན་ཞིང་། ཁོང་གིས་རེས་གཟའ་སྤེན་པ་ཉིན་བརྒྱུད་ལམ་ཁག་ལ་ཁོང་ད་རེས་རྒྱ་ནག་ཏུ་སྐྱོད་རྒྱུའི་འགྲུལ་བཞུད་དེའི་ནང་རང་གི་ཕྱག་རོགས་གྲོས་ཚོགས་འཐུས་མི་སྐུ་ཞབས་ Dieter Janecek ལགས་ཀྱི་ངོ་ཚབ་ཐོག་ནས་གནས་སྐབས་རིང་མཉམ་ཞུགས་གནང་རྒྱུའི་འཆར་གཞི་ཡོད་ཀྱང་། རྒྱ་གཞུང་གིས་དེ་འབྲེལ་གསལ་བསྒྲགས་ཤིག་སྤེལ་བའི་ནང་ཁོང་རྒྱ་ནག་ཏུ་སྐྱོད་རྒྱུའི་ཚོགས་ཆུང་གི་ཐོ་གཞུང་ནང་ཡོད་ཚེ་རུ་ཁག་དེ་རྒྱ་ནག་ནང་སྐྱོད་ཆོག་གི་མེད་སྐོར་ནན་བརྗོད་གནང་ཡོདཔ་རེད། ལྕམ་སྐུ་མཆོག་གིས་གྲོས་ཚོགས་འཐུས་མི་རྣམ་པར་ཕྱག་བྲིས་ཤིག་ཕུལ་ཐོག་རྒྱ་གཞུང་གིས་བྱེད་སྟངས་དེ་ནི་འགྲོ་བ་མིའི་ཐོབ་ཐང་ལ་མངོན་གསལ་དོད་པོས་རྒྱབ་སྐྱོར་གནང་མཁན་གྱི་གྲོས་ཚོགས་འཐུས་མི་རྣམ་པར་དཀག་འགོག་བྱས་པ་ཞིག་ཡིན་པ་དང་། ཁོང་རྒྱ་ནག་ཏུ་སྐྱོད་རྒྱུའི་ཚོགས་ཆུང་ནང་མཉམ་ཞུགས་གནང་འདོད་ཡོད་པ་དང་འགྲུལ་བཞུད་དེ་དོར་རྒྱུའི་རྒྱུ་མཚན་གང་ཡང་གཟིགས་ཀྱི་མེད་པར་སྐྱོན་བརྗོད་གནང་བ་མ་ཟད། ཁོང་གིས་ Twitter དྲྭ་གནས་ཐོག་རྒྱ་གཞུང་གིས་ཁོང་ལ་བཀག་སྡོམ་བྱས་པ་དེས་ཁོང་སྐུ་སྒེར་གྱི་འགྲོ་བ་མིའི་ཐོབ་ཐང་ཐོག་ཕྱག་ལས་སྔར་ལྷག་གནང་རྒྱུར་ཕན་ཐོགས་ཡོད་པ་གསུངས་ཡོད་པ་རེད། འཇར་མ་ནིའི་ལྗང་ཁུ་ཚོགས་པའི་གྲོས་ཚོགས་ཀྱི་འཛིན་སྐྱོང་འགན་འཛིན་ Britta Hasselmann ལགས་ཀྱིས་ཀྱང་རང་ཉིད་ཀྱི་ Twitter ཐོག་གང་ཟག་སུས་ཀྱང་རྒྱ་ནག་སྐོར་གླེང་ཚེ་ངེས་པར་དུ་ཡུལ་དེའི་འགྲོ་བ་མིའི་ཐོབ་ཐང་སྐོར་གྲོས་བསྡུར་གནང་དགོས་གལ་ཡིན་པར་ནན་བརྗོད་དང་སྦྲགས། ད་ལན་ལྕམ་ Margarete ལགས་ཀྱིས་གཙོས་པའི་ཆབ་སྲིད་ཚོགས་པ་ཁག་གི་གྲོས་ཚོགས་འཐུས་མི་ཚོས་གནང་བཞིན་པའི་ཕྱག་ལས་འདི་ནི་ཡི་རངས་བསྔགས་བརྗོད་ཞུ་འོས་ཤིག་རེད་ཅེས་གསུངས་འདུག རྩ་བའི་འཇར་མ་ནིའི་གྲོས་ཚོགས་ཀྱི་འཕྲུལ་ལས་ཚོགས་ཆུང་གི་ཐོག་མའི་འཆར་གཞིར་གཞིགས་ཚེ་ཁོང་རྣམས་ཟླ་ ༨ ཚེས་ ༢༣ ནས་ཕྱི་ཟླ་ ༩ ཚེས་ ༡ བར་རྒྱ་ནག་ཏུ་ཕེབས་འཆར་ཡོད་པ་རེད།

ཨ་རིའི་གྲོས་ཚོགས་ཀྱི་མང་གཙོ་མཉམ་འབྲེལ་ཚོགས་ཆུང་གི་ཚོགས་གཙོ་གྲོས་ཚོགས་འཐུས་མི་སྐུ་ཞབས་ David Price ལགས་ཀྱིས་དབུ་ཁྲིད་པའི་གྲོས་ཚོགས་འཐུས་མི་དྲུག་ལས་གྲུབ་པའི་ཨ་རིའི་གྲོས་ཚོགས་ཀྱི་ཆེས་མཐོའི་སྐུ་ཚབ་རྣམ་པ་བདུན་ཕྲག་སྔོན་མའི་རེས་གཟའ་པ་སངས་དང་སྤེན་པ་གཉིས་ཀྱི་རིང་བཞུགས་སྒར་དུ་རྟེན་གཞི་བྱས་པའི་བོད་མིའི་སྒྲིག་འཛུགས་ཀྱི་ལྟེ་གནས་ཁག་ལ་འཚམས་གཟིགས་དང་བཙན་བྱོལ་བོད་མིའི་མང་གཙོའི་ལམ་སྲོལ་ཐོག་རྒྱུས་ལོན་སོགས་གནང་ཡོད་པ་རེད། ཁ་ཉིན་རེས་གཟའ་སྤེན་པའི་དགོང་དྲོ་ཆུ་ཚོད་ ༥༌༣༠ ཐོག་ཨ་རིའི་གྲོས་ཚོགས་ཀྱི་ཆེས་མཐོའི་སྐུ་ཚབ་ཚོགས་ཆུང་ནས་གངས་སྐྱིད་ཚོགས་ཁང་གསར་པའི་ནང་བོད་མིའི་སྒྲིག་འཛུགས་ཀྱི་སྲི་ཞུ་བ་དང་། བཞུགས་སྒར་ཁུལ་གྱི་གཞུང་འབྲེལ་མ་ཡིན་པའི་ཚོགས་པ་ཁག་གི་སྐུ་ཚབ་ཚོར་མཇལ་འཕྲད་ཀྱིས་གསུང་བཤད་གནང་ཡོད་པ་དང་། སྐབས་དེར་ཆེས་མཐོའི་སྐུ་ཚབ་ཚོགས་ཆུང་གི་སྣེ་ཁྲིད་པ་ཨ་རིའི་གྲོས་ཚོགས་ཀྱི་མང་གཙོ་མཉམ་འབྲེལ་ཚོགས་ཆུང་གི་ཚོགས་གཙོ་གྲོས་ཚོགས་འཐུས་མི་སྐུ་ཞབས་ David Price ལགས་ནས་འཚམས་གཟིགས་འདིའི་ཁྲོད་༸གོང་ས་༸སྐྱབས་མགོན་ཆེན་པོ་མཆོག་དང་མཇལ་མོལ་གནང་སྐབས་མགོན་པོ་༸གང་ཉིད་མཆོག་གི་༸སྐུ་ཚེའི་མཛད་རྣམ་ཙམ་མ་ཟད། བོད་ཀྱི་ལོ་རྒྱུས་ཐོག་ལའང་རྒྱུས་ལོན་གསར་པ་མང་པོ་བྱུང་སོང་བས་མཇལ་མོལ་གྱི་མྱོང་ཚོར་དེ་ནི་དུས་ནམ་ཡང་བརྗེད་ཐབས་མེད་པ་ཞིག་རེད་ཅེས་གསུངས་འདུག ལྷག་པར་དུ་ཁོང་གིས་བོད་མི་ཚོས་དཀའ་ངལ་མང་པོར་གདོང་ལེན་གནང་སྟེ་མུ་མཐུད་རང་ཉིད་ཀྱི་ཆོས་དང་རིག་གཞུང་། སྐད་ཡིག་སོགས་མི་ཉམས་རྒྱུན་འཛིན་དང་། བོད་མིའི་སྒྲིག་འཛུགས་དེ་བཞིན་མང་གཙོའི་ལམ་སྲོལ་ཐོག་སྐྱོད་བཞིན་པར་ཡི་རངས་བསྔགས་བརྗོད་དང་སྦྲགས། ཨ་རིའི་གཞུང་ནས་ཨ་རིའི་རོགས་ཚོགས་ USAID དང་། ཨ་རིའི་ཕྱི་སྲིད་ལས་ཁུངས་བརྒྱུད་བོད་མིའི་ངོ་བོ་སྲུང་སྐྱོབ་དང་། འཚོ་ཐབས་སོགས་ཀྱི་ཐད་རྒྱབ་སྐྱོར་མུ་མཐུད་ཞུ་མུས་ཡིན་པ་མ་ཟད། ཨ་རིའི་གྲོས་ནང་ལ་མཚོན་ན་བོད་ཀྱི་རིག་གཞུང་དང་འགྲོ་བ་མིའི་ཐོབ་ཐང་གི་གནད་དོན་ལ་ཐུག་སྐབས་ཆབ་སྲིད་ཚོགས་པ་གཉིས་ཀས་ཞལ་གཅིག་གྲག་ཐོག་ནས་རྒྱབ་སྐྱོར་ཞུ་མུས་ཡིན་ཞེས་གསུངས་འདུག སྐུ་ཞབས་ David Price ལགས་ནས་གསུང་བཤད་མ་གནང་གོང་དུ་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ཆེས་མཐོའི་སྐུ་ཚབ་རྣམ་པར་འཚམས་འདྲི་ཞུ་པ་དང་སྦྲགས། ད་རེས་སྐུ་ཚབ་རྣམ་པ་བཞུགས་སྒར་དུ་ཕེབས་པ་འདི་ནི་རྒྱ་ནག་ལ་གཞུང་ལ་མང་གཙོའི་རིང་ལུགས་ལ་མཐའ་མའི་རྒྱལ་ཁ་ཐོབ་རྒྱུ་ཡིན་པའི་བརྡ་ལན་ཞིག་མཚོན་པ་དང་། ལྷག་པར་དུ་བོད་ནང་གི་བོད་མི་ཚོའི་ལྷག་བསམ་དང་ཞུམ་པ་མེད་པའི་སྙིང་སྟོབས། གཡོ་བ་མེད་པའི་དྲང་བདེན་གྱི་མངོན་འདོད་ལ་རྒྱབ་སྐྱོར་ཡོད་པའི་བརྡ་ལན་བཟང་པོ་ཞིག་གནང་ཐུབ་པ་བྱུང་ཡོད་ཅེས་གསུངས་འདུག གཞི་རྩའི་ཆེས་མཐོའི་སྐུ་ཚབ་རྣམ་པ་བཞུགས་སྒར་དུ་ཉིན་གྲངས་གཉིས་ཀྱི་རིང་བཞུགས་གཞག་གནང་སྐབས་བོད་མིའི་སྒྲིག་འཛུགས་ཀྱི་བཀའ་ཤག་ལྷན་རྒྱས་དང་མཇལ་མོལ་དང་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་སྦྲེལ་པོས་དབུས་པའི་སྤྱི་འཐུས་རྒྱུན་ལས་རྣམས་དང་ལྷན་ནང་མོལ་ལྷན་འཛོམས་ཤིག་གནང་ཡོད། ཁྱད་པར་དུ་བཞུགས་སྒར་༸རྒྱལ་བའི་ཕོ་བྲང་དུ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ལྷན་མཇལ་མོལ་དང་ཉིན་དགུང་ལྗགས་སྨིན་ལྷན་བཞེས་གནང་ཡོད་པ་རེད། བོད་མིའི་སྒྲིག་འཛུགས་ཀྱི་སྲི་ཞུ་བ་དང་བཞུགས་སྒར་ཁུལ་གྱི་གཞུང་འབྲེལ་མ་ཡིན་པའི་ཚོགས་པ་ཁག་གི་མི་སྣར་གསུང་བཤད་བཅས་གནང་སྒོ་ཁག་ལེགས་གྲུབ་དང་བསྟུན། ཁ་སང་སྔ་ཐོག་བཞུགས་སྒར་ནས་ཕྱིར་ཕེབས་ཐོན་གནང་ཡོད།