རྒྱལ་སྤྱི།

དེ་རིང་ཟླ་ ༨ ཚེས་ ༡༣ ཉིན་ཨིན་ཡུལ་གྱི་ Bristol གྲོང་ཁྱེར་ཡོད་པའི་འགྲོ་བ་མིའི་ཐོབ་ཐང་ལས་འགུལ་བ་དང་། ས་གནས་བོད་རིགས། བོད་དོན་རྒྱབ་སྐྱོར་བ། ཧྥ་ལུང་གོངྒ་ཆོས་བརྒྱུད་ཉམས་ལེན་བྱེད་མཁན་བཅས་ནས་གྲོང་སྡེའི་སྤྱི་ཁྱབ་པ་ Maryin Rees མཆོག་ལ་ཉེ་ལམ་རྒྱ་ནག་ Guangzhou ཞེས་པའི་ས་གནས་གཞུང་གིས་འགྲོ་གྲོན་འོག་ཉིན་གཉིས་རིང་རྒྱ་ནག་ཏུ་བསྐྱོད་པར་བློ་ཕམ་གྱི་རྣམ་པ་ཤུགས་ཆེ་བསྟན་པ་དང་འབྲེལ་དྲག་གནོན་ཅན་གྱི་གཞུང་འཛིན་པའི་སར་ནས་དངུལ་དང་མཐུན་འགྱུར་སོགས་མ་བླངས་གོང་ངེས་པར་དུ་དགོངས་བཞེས་གནང་དགོས་ཞེས་བརྗོད་འདུག ཁོང་རྣམས་ཀྱིས་གསར་འགོད་གསལ་བསྒྲགས་ཤིག་སྤེལ་བའི་ནང་ཉེ་ལམ་ Bristol གྲོང་སྡེའི་སྤྱི་ཁྱབ་པ་ Maryin མཆོག་རྒྱ་ནག་ Guangzhou ཞེས་པའི་ས་གནས་གཞུང་གིས་འགྲོ་གྲོན་འོག་ཉིན་གྲངས་གཉིས་ཀྱི་རིང་གྲོང་ཁྱེར་ བིརྶ་ཊོལ་ནང་ཚོང་གི་གོ་སྐབས་ཅི་ཞིག་ཡོང་རྒྱུ་ཡོད་མིན་ལྟ་རྟོག་སླད་བསྐྱོད་སྐོར་འགྲེལ་བརྗོད་དང་སྦྲགས། བོད་དང་ཡུ་གུར་གཙོ་གྱུར་མང་གཙོ་དོན་གཉེར་བ་རྣམས་ལ་ཆེས་དྲག་གནོན་བྱེད་མཁན་གྱི་གཞུང་ཞིག་ལས་ངོ་སོ་བླངས་པ་ནི་རང་རྒྱལ་ཁབ་ཀྱི་བཟང་སྤྱོད་དང་ཡོངས་སུ་འགལ་བ་ཞིག་ཡིན་པར་འགྲེལ་བརྗོད་གནང་འདུག སྐབས་དེར་བིརྶ་ཊོལ་ས་གནས་བོད་རིགས་ཚོགས་པའི་ཚོགས་གཙོ་བསྟན་འཛིན་ལགས་ཀྱིས་ Bristol གྲོང་ཁྱེར་གྱི་འཛུགས་སྐྲུན་ཆེད་འགྲོ་བ་མིའི་ཐོབ་ཐང་དང་། དྲང་བདེན། མི་རིགས་འདྲ་མཉམ་སོགས་ལ་བརྩི་མེད་རྡོག་རོལ་གཏོང་མཁན་གྱི་རྒྱ་གཞུང་ནས་དངུལ་བླངས་པ་དེ་ངོ་ཚ་དགོས་པ་ཞིག་ཡིན་པ་མ་ཟད་གྲོང་སྡེའི་སྤྱི་ཁྱབ་མཆོག་གིས་ས་གནས་མི་མང་ལ་ཁྱད་གསོད་བྱས་པ་ཞིག་ཀྱང་མཚོན་གྱི་ཡོད་པ་རེད། ལྷག་དོན་དེ་སྔ་སྐུ་ཞབས་ Maryin མཆོག་གྲོང་སྡེའི་སྤྱི་ཁྱབ་ཀྱི་འོས་མིར་བཞེངས་སྐབས་སུ་ཁས་ལེན་གནང་ཁག་དང་ཕྱོགས་ཡོངས་སུ་འགལ་བ་ཞིག་ཡིན་པར་སྐྱོན་བརྗོད་གནང་འདུག རྒྱལ་སྤྱིའི་བོད་དོན་འབྲེལ་མཐུད་ལས་ཁང་གི་ལས་འགུལ་འབྲེལ་མཐུད་པ་སྐུ་ཞབས་ Mandie mckeown ལགས་ཀྱིས་དྲག་གནོན་བྱེད་མཁན་གྱི་གཞུང་ཞིག་ནས་དངུལ་བླངས་པ་དེས་ད་བར་བོད་དང་ཡུ་གུར། Falun Gong ཆོས་བརྒྱུད་འཛིན་མཁན། མང་གཙོ་དོན་གཉེར་བ་བཅས་ལ་རྒྱ་ནག་གཞུང་གིས་གཞི་རྩའི་འགྲོ་བ་མིའི་ཐོབ་ཐང་བརྩི་མེད་རྡོག་རོལ་གཏོང་བཞིན་ཡོད་པར་རྒྱབ་སྐྱོར་བྱས་པ་དང་གཅིག་མཚུངས་ཡིན་པ་མ་ཟད། རྒྱལ་ཁབ་ཡར་རྒྱས་ཀྱི་ཁ་ཕྱོགས་སུ་ཁྲིད་རྒྱུ་ལས་ལྡོག་སྟེ་སྔར་གྱི་ལམ་ལུགས་རྙིང་པར་ཆས་པ་ཞིག་ཡིན་སྐོར་འགྲེལ་བརྗོད་དང་ཆབས་ཅིག་ཏུ་གྲོང་སྡེའི་སྤྱི་ཁྱབ་མཆོག་གིས་ Bristol གྲོང་སྡེ་དེ་མུན་ནག་གི་སྡུག་བསྔལ་ནང་མ་ལྷུང་བའི་སྔོན་ཚུལ་ནས་དགོངས་བཞེས་གནང་དགོས་ཞེས་ནན་བརྗོད་གནང་ཡོད་པ་རེད།

རྒྱལ་ཚོགས་ཀྱི་མི་རིགས་དབྱེ་འབྱེད་འགོག་ཐབས་ཚོགས་ཆུང་ནས་རྒྱ་གཞུང་གི་སྙན་ཐོར་བསྐྱར་ཞིབ་དང་འབྲེལ་ནས་ཡུལ་དེའི་ནང་གི་མི་རིགས་དབྱེ་འབྱེད་དང་འབྲེལ་བའི་གནད་དོན་ཐོག་དྲི་བ་ཁག་ཅིག་གནང་འདུག བཞུགས་སྒར་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་ཕེལ་རྒྱས་ལྟེ་གནས་ཁང་གིས་སྤེལ་བའི་གནས་ཚུལ་ནང་གསལ་ལྟར་ན། མི་རིགས་དབྱེ་འབྱེད་ཀྱི་རྣམ་པ་འདྲ་མིན་རྩ་འགོག་དང་འབྲེལ་བའི་རྒྱལ་ཚོགས་ཀྱི་ཁྲིམས་སྒྲིག་ལག་བསྟར་ཐོག་དཔྱད་ཞིབ་གནང་མཁན་གྱི་ཚོགས་ཆུང་ནས་དེ་སྔོན་རྒྱ་གཞུང་གིས་མི་རིགས་དབྱེ་འབྱེད་དང་འབྲེལ་བའི་ལྷན་ཚོགས་ཐེངས་ ༩༦ ཐོག་ཕུལ་བའི་སྙན་ཐོ་དེར་བསྐྱར་ཞིབ་གནང་རྗེས་ཉེ་ལམ་ཕྱི་ཟླ་ ༦ ནང་རྒྱ་གཞུང་ལ་བོད་གཙོ་གྱུར་གྲངས་ཉུང་མི་རིགས་ཀྱི་གནད་དོན་དང་འབྲེལ་བའི་དྲི་བ་ཁག་ཅིག་གནང་ཡོད་པ་རེད། རྒྱལ་ཚོགས་ཀྱི་མི་རིགས་དབྱེ་འབྱེད་ཀྱི་ཚོགས་ཆུང་ནང་མི་རིགས་དབྱེ་འབྱེད་ཐོག་གི་ཆེད་ལས་མི་སྣ་ ༡༨ ཡོད་པ་དང་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་སྐུ་ཚབ་ནས་རིང་མིན་ཟླ་ ༨ ཚེས་ ༡༠ དང་ ༡༣  བར་ཚོགས་ཆུང་དེའི་མདུན་དུ་བཅར་ནས་དྲི་བ་ཁག་ཅིག་ལ་ལན་འདེབས་གསལ་བཤད་བྱ་རྒྱུ་ཡིན་པ་རེད། ད་ལན་རྒྱལ་ཚོགས་ཀྱིས་རྒྱ་གཞུང་ལ་ཕུལ་བའི་དྲི་བ་དེ་དག་མང་ཆེ་བ་དེ་སྔ་ནས་གནང་བའི་རྒྱུན་ལྡན་གྱི་དྲི་བ་ཆགས་ཀྱི་ཡོད་ཀྱང་ཐེངས་འདིའི་དྲི་བའི་ཁོངས་སུ་བོད་ནང་གི་འགྲོ་བ་མིའི་ཐོབ་ཐང་གཙོ་བཟུང་ཐོག་སོག་པོ་དང་ཡུ་གུར་གྲངས་ཉུང་མི་རིགས་རྣམས་ཀྱི་སྤྱི་མང་དང་ཆབ་སྲིད་ཐོབ་ཐང་བཅས་ཀྱི་སྐོར་དྲི་བ་ཕུལ་ཡོད་པ་མ་ཟད། ལྷག་དོན་གྲངས་ཉུང་མི་རིགས་དེ་དག་གི་ཆོས་དད་རང་དབང་དང་སྨྲ་བརྗོད་རང་དབང་། འདུ་འཛོམས་རང་དབང་སོགས་སྲུང་སྐྱོབ་གནང་རྒྱུ་ཐད་རྒྱ་ནག་གཞུང་ཕྱོགས་ནས་ཐབས་ཤེས་གང་དང་གང་གནང་ཡོད་མེད་སྐོར་དང་། བོད་མི་གཙོས་གྲངས་ཉུང་མི་རིགས་རྣམས་ལ་གང་བྱུང་དུ་དོ་དམ་དང་། བཀག་ཉར་འོག་འདས་གྲོངས་སུ་གྱུར་བའི་གནད་དོན། དེ་བཞིན་གྲངས་ཉུང་མི་རིགས་རྣམས་ཀྱི་ས་ཞིང་བཙན་འཕྲོག་བྱས་པར་གུན་གསབ་སྤྲོད་མེད་པ་སོགས་ཀྱི་གནད་དོན་མང་དག་ཐོག་དྲི་བ་ཕུལ་འདུག བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་ཚེ་རིང་མཚོ་མོ་ལགས་ཀྱིས་རྒྱ་གཞུང་གིས་ད་བར་རྒྱལ་ཚོགས་ཀྱི་མི་རིགས་དབྱེ་འབྱེད་འགོག་ཐབས་ཚོགས་ཆུང་གི་དྲི་བ་ཁག་ལ་ལན་འདེབས་རྩ་བ་ནས་གནང་མེད་པར་སྐྱོན་བརྗོད་དང་འབྲེལ། རྒྱ་གཞུང་ནས་ངེས་པར་དུ་རྒྱལ་ཚོགས་ཀྱི་མི་རིགས་དབྱེ་འབྱེད་འགོག་ཐབས་ཚོགས་ཆུང་གིས་བོད་གཙོས་པའི་གྲངས་ཉུང་མི་རིགས་ཀྱི་གནད་དོན་ཐོག་ཕུལ་བའི་དྲི་བ་ཁག་ལ་དམིགས་བསལ་སེམས་འཚབ་བྱས་ཐོག་རྒྱལ་ཚོགས་དང་མཉམ་ལས་གནང་རྒྱུའི་དུས་ལ་བབ་ཡོད་སྐོར་གསུངས་སོང་། ལྷག་དོན་རྒྱ་གཞུང་དེ་རྒྱལ་ཚོགས་ཀྱི་ཚོགས་མི་རྒྱལ་ཁབ་ཞིག་ཡིན་པའི་ཆ་ནས་རྒྱལ་ཚོགས་ཀྱི་མི་རིགས་དབྱེ་འབྱེད་འགོག་ཐབས་ཚོགས་ཆུང་གི་འབྲུ་དོན་ཁག་ལ་བརྩི་བཀུར་ཞུས་ཐོག་ཚོགས་ཆུང་དེས་ཕུལ་བའི་དྲི་བ་ཁག་ལ་ལན་འདེབས་གསལ་པོ་གནང་དགོས་པའི་འོས་འགན་ཡོད་སྐོར་ནན་བརྗོད་གནང་འདུག གཞི་རྩའི་རྒྱལ་ཚོགས་ཀྱི་མི་རིགས་དབྱེ་འབྱེད་འགོག་ཐབས་ཚོགས་ཆུང་ལ་ད་བར་རྒྱལ་སྤྱིའི་ཁྲོད་ཀྱི་སྤྱི་མང་ཚོགས་པ་འདྲ་མིན་ནས་བོད་མི་གཙོ་གྱུར་གྲངས་ཉུང་མི་རིགས་རྣམས་རྒྱ་གཞུང་གིས་བཙན་གནོན་འོག་སོ་སོའི་མི་རིགས་ཀྱི་ཆོས་དང་རིག་གཞུང་། སྐད་ཡིག་སོགས་བེད་སྤྱོད་བྱ་རྒྱུའི་ཐད་དཀའ་ངལ་ཆེན་པོ་འཕྲད་མུས་ཡིན་པའི་དངོས་ཡོད་གནས་སྟངས་འཁོད་པའི་གནས་ཚུལ་མང་པོ་ཞིག་མགོ་འབུལ་ཞུས་ཡོད་པ་མ་ཟད། བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་ནས་ཀྱང་རྒྱལ་ཚོགས་ཀྱི་ཚོགས་ཆུང་དེར་རྒྱ་གཞུང་གིས་བོད་མི་ཞིང་འབྲོག་རྣམ་པའི་ས་ཞིང་བཙན་འཕྲོག་གིས་ཁོང་ཚོར་གུན་གསབ་སྤྲད་ཀྱི་མེད་པ་དང་ལྷག་དོན་རྒྱའི་དོ་དམ་བཀག་ཉར་འོག་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེས་གཙོས་པའི་ད་བར་བོད་མི་བདུན་ཙམ་འདས་གྲོངས་གྱུར་ཡོད་པ་སོགས་ཀྱི་གནས་ཚུལ་ཁག་ཅིག་མགོ་འབུལ་ཞུས་ཡོད་པ་རེད།

རྒྱལ་སྤྱིའི་བློན་ཆེན་རིམ་པའི་ཆོས་དད་རང་དབང་གི་ཚོགས་འདུ་ཐོག་ཨ་རིའི་སྲིད་འཛིན་གཞོན་པ་སྐུ་ཞབས་ Mike pence ལགས་ཀྱིས་རྒྱ་ནག་གཞུང་གིས་འདས་པའི་ལོ་ ༧༠ རིང་བོད་ནང་གི་བོད་མིའི་ཐོག་དྲག་གནོན་དང་མང་ཚོགས་ཀྱི་ཆོས་དད་རང་དབང་ལ་བརྩི་མེད་རྡོག་རོལ་བཏང་དང་གཏོང་མུས་ཀྱི་བྱ་སྤྱོད་ལོ་རེ་བཞིན་འཚབ་ཆེ་རུ་འགྲོ་བཞིན་ཡོད་པ་ཐེར་བཏོན་གནང་འདུགཨ་རིའི་ཕྱི་སྲིད་ལས་ཁུངས་ཀྱིས་གོ་སྒྲིག་ཞུས་པའི་རྒྱལ་སྤྱིའི་བློན་ཆེན་རིམ་པའི་ཆོས་དད་རང་དབང་གི་ཚོགས་འདུའི་ཉིན་མཐའ་མའི་ཐོག་ཨ་རིའི་སྲིད་འཛིན་གཞོན་པ་སྐུ་ཞབས་ Mike pence ལགས་ཀྱིས་གསུང་བཤད་གནང་ཡོད་པ་དང་། སྐབས་དེར་ཁོང་གིས་འཛམ་གླིང་ཁྲོད་ཀྱི་རྒྱལ་ཁབ་ཁག་སོ་སོའི་ཆོས་དད་རང་དབང་གི་གནས་སྟངས་ཁག་སྙིང་བསྡུས་སུ་འགྲེལ་བརྗོད་དང་སྦྲགས་ཏེ་འབྲེལ་ཡོད་གཞུང་འཛིན་ཁག་གིས་མང་ཚོགས་ཀྱི་ཆོས་དད་རང་དབང་ལ་གུས་བརྩི་དང་སྲུང་སྐྱོབ་གནང་དགོས་པའི་རེ་སྐུལ་གནང་འདུག ལྷག་པར་དུ་འཛམ་གླིང་ནང་མི་འབོར་མང་ཤོས་ཡིན་པའི་རྒྱ་ནག་རྒྱལ་ཁབ་ནང་མང་ཚོགས་ཀྱི་ཆོས་དད་རང་དབང་ལ་བརྩི་མེད་རྡོག་རོལ་གཏོང་བཞིན་པའི་གནས་སྟངས་འཚབ་ཆེ་རུ་འགྲོ་བཞིན་ཡོད་པ་ཐེར་བཏོན་གནང་བ་དང། ཕྱི་ལོ་ ༡༩༩༩ ལོ་ནས་བཟུང་ད་བར་ལོ་རེ་བཞིན་ཨ་རིའི་ཕྱི་སྲིད་ལས་ཁུངས་ཀྱི་རྒྱལ་སྤྱིའི་ཆོས་དད་རང་དབང་གི་ལོ་འཁོར་སྙན་ཐོ་ནང་རྒྱ་ནག་དེ་ཆོས་དད་རང་དབང་ལ་བརྩི་མེད་རྡོག་རོལ་བཏང་མཁན་རྒྱལ་ཁབ་ལ་ངོས་འཛིན་གནང་ཡོད་པ་གསུངས་འདུག སྐུ་ཞབས་ Mike pence ལགས་ཀྱིས་འདས་པའི་ལོ་ ༧༠ ཙམ་རིང་བོད་ནང་གི་བོད་མི་ཚོ་རྒྱ་གཞུང་གི་དྲག་གནོན་འོག་གནས་ཡོད་སྟབས་ཐེངས་འདིའི་ཚོགས་འདུ་ཐོག་བོད་མི་ངོ་ཚབ་ཏུ་གཏམ་བཤད་གནང་བར་བཅར་བའི་ཆབ་སྲིད་བཙོན་ཟུར་མགོ་ལོག་འཇིགས་མེད་ལགས་ཀྱི་མཚན་འབོད་གནང་ནས་ད་བར་རྒྱ་གཞུང་གིས་དྲག་གནོན་ལ་ངོ་རྒོལ་དང། ཁུལ་དེའི་ནང་གི་བོད་མིའི་ཆོས་དད་རང་དབང་དང་རིག་གཞུང་སྲུང་སྐྱོབ་ཆེད་དུ་འཐབ་རྩོད་ཀྱི་སྙིང་སྟོབས་དང་བཞེངས་ཕྱོགས་བཅས་ལ་ཆེས་བསྟོད་གནང་འདུགརྒྱ་ནག་གཞུང་གིས་ཁུལ་དེའི་ནང་གི་ནང་པ་དང་ཁ་ཆེ། དེ་བཞིན་ཡི་ཤུའི་ཆོས་ལུགས་འཛིན་མཁན་གྱི་མང་ཚོགས་དྲག་གནོན་དང་བརྩི་མེད་རྡོག་རོལ་གཏོང་བཞིན་ཡོད་པ་འགྲེལབརྗོད་གནང་བ་དང་འབྲེལ། རྒྱ་གཞུང་གིས་དེང་སྐབས་དམར་ཤོག་གི་ཆབ་སྲིད་སློབ་གསོ་ལས་འགུལ་ཤུགས་ཆེ་སྤེལ་བའི་འོག་ཡུ་གུར་གྱི་ཁ་ཆེའི་མང་ཚོགས་ས་ཡ་མང་པོའི་ཆོས་དད་རང་མོས་ལ་དོ་དམ་དང་དེ་དག་གི་ངོ་བོ་མེད་པ་བཟོ་རྒྱུའི་དམིགས་ཡུལ་འཛིན་བཞིན་ཡོད་པའང་ཐེར་བཏོན་གནང་འདུག སྤྱིར་ཁ་སང་རྒྱལ་སྤྱིའི་ཆོས་དད་རང་དབང་གི་ཚོགས་འདུ་ཉིན་མཐའ་མ་དང་འབྲེལ་ནས་རྒྱལ་སྤྱིའི་བོད་དོན་ལས་འགུལ་ཁང་གི་གནས་ཚུལ་སྤེལ་བར་ཆབ་སྲིད་བཙོན་ཟུར་མགོ་ལོག་འཇིགས་མེད་ལགས་ཀྱིས་ཨ་རིའི་སྲིད་འཛིན་གཞོན་པ་སྐུ་ཞབས་ Mike pence ལགས་དང་ཕྱི་སྲིད་དྲུང་ཆེ་སྐུ་ཞབས་ Mike Pompeo ལགས་གཉིས་དང་ལྷན་ཟུར་དུ་མཇལ་འཕྲད་ཞུས་པ་མ་ཟད་རྒྱ་གཞུང་གིས་སྟངས་འཛིན་འོག་བོད་ནང་གི་བོད་མིར་ཆོས་དད་རང་དབང་མེད་པ་དང་ཐ་ན་༸གོང་ས་མཆོག་གི་བཀའ་ཆོས་ཞུ་རྒྱར་བཀག་སྡོམ་དང་༸གང་ཉིད་མཆོག་གི་༸སྐུ་པར་ཙམ་ཡང་སྒྲིག་ཤོམ་གནང་མི་ཆོག་པའི་གནས་སྟངས་རྣམས་སྙན་སེང་ཞུས་འདུག ལྷག་པར་དུ་དབུ་ཁྲིད་རྣམ་གཉིས་ནས་རྒྱ་ནག་གི་འགོ་ཁྲིད་ཚོར་༸གོང་ས་མཆོག་དང་ལྷན་བོད་རྒྱ་དཀའ་རྙོག་སེལ་རྒྱུར་སྐུལ་འདེབས་གནང་ནས་བོད་ནང་གི་བོད་མི་ཚོར་དངོས་ཡོད་ཀྱི་ཆོས་དད་རང་དབང་གི་ཐོབ་ཐང་ལོངས་སུ་སྤྱོད་རྒྱུ་ཡོང་བར་འབོད་སྐུལ་ཡང་ཞུས་འདུག་པ་དང་ཆབས་ཅིག བོད་ནང་བོད་མི་ཚོས་དད་མོས་ཞུ་ཡུལ་གྱི་གནས་རི་རྣམས་སྲུང་སྐྱོབ་ཐུབ་ཚེ་དེས་རང་འབྱུང་ཁོར་ཡུག་ལ་སྲུང་སྐྱོབ་བྱས་པ་དང་གཅིག་མཚུངས་ཡིན་སྐོར་གསུངས་འདུག རྩ་བའི་ཐེངས་འདིའི་རྒྱལ་སྤྱིའི་བློན་ཆེན་རིམ་པའི་ཆོས་དད་རང་དབང་གི་ཚོགས་འདུ་ཐེངས་དང་པོ་ནི་ཨ་རིའི་སྲིད་འཛིན་ཌོ་ནལ་ཊམ་སྲིད་གཞུང་འོག་ཨ་རིའི་ཕྱི་སྲིད་ལས་ཁུངས་ནས་གོ་སྒྲིག་ཞུས་པ་ཞིག་ཡིན་པ་དང་། ཚོགས་ཆེན་ཐོག་འཛམ་གླིང་རྒྱལ་ཁབ་ ༨༠ ལྷག་ཙམ་ནས་འབྲེལ་ཡོད་བློན་ཆེན་ ༤༠ ཙམ་དང་ཆོས་ཕྱོགས་ཀྱི་དབུ་ཁྲིད་དང་སྐུ་ཚབ་མི་སྣ། ཆོས་དད་རང་དབང་འོག་མནར་སྤྱོད་མྱངས་པའི་མི་སྣ་སོགས་ཚོགས་བཅར་བ་ཁྱོན་ ༤༠༠ ལྷག་འདུ་འཛོམས་བྱུང་ཡོད་པ་མ་ཟད་ཚོགས་འདུའི་ཉིན་གཉིས་པར་༸གོང་ས་༸སྐྱབས་མགོན་ཆེན་པོ་མཆོག་གིས་གསུང་འཕྲིན་ཞིག་བསྩལ་ཡོད་པ་རེད།

ཁ་སང་ཨ་རིའི་གྲོས་ཚོགས་ཀྱི་ཁྲིམས་ལུགས་ཚོགས་ཆུང་ནས་ Reciprocal Access to Tibet Act ཞེས་ཨ་རིའི་མི་སེར་རྣམས་འདྲ་མཉམ་ཐོག་ནས་བོད་ལ་འགྲུལ་བསྐྱོད་ཆོག་པའི་ཁྲིམས་གཞིར་དཔྱད་ཞིབ་གནང་རྗེས་ཚོགས་ཆུང་གི་འཐུས་མི་ཡོངས་ནས་ཁྲིམས་འཆར་དེར་སྤྱི་མོས་ཐོག་རྒྱབ་སྐྱོར་ཞུས་འདུག ཁ་སང་ཨ་རིའི་གྲོས་ཚོགས་ཀྱི་ཁྲིམས་ལུགས་ཚོགས་ཆུང་ནས་་སྔ་ལོ་ཨ་རིའི་གྲོས་ཚོགས་ནང་གྲོས་ཚོགས་འཐུས་མི་ JimMcgovern ལགས་ཀྱིས་སྣེ་ཁྲིད་འོག་གྲོས་ཚོགས་འཐུས་མི་ཁག་ཅིག་ནས་ Reciprocal Access to Tibet Act ཞེས་པའི་གྲོས་འཆར་སྟོན་ཡོད་པའི་ཐོག་དཔྱད་ཞིབ་ཀྱི་ལས་རིམ་ཞིག་གནང་ཡོད་པ་དང། སྐབས་དེར་ཁྲིམས་ལུགས་ཚོགས་ཆུང་གི་ཚོགས་གཙོ་སྐུ་ཞབས་ Bob Goodlatte ལགས་ཀྱིས་ཁྲིམས་འཆར་དེས་འདས་པའི་ལོ་མང་རིང་རྒྱ་གཞུང་གི་བོད་རང་སྐྱོང་ཟེར་བ་གཙོས་པའི་བོད་ཀྱི་ས་ཁུལ་གཞན་ཁག་ཏུ་བོད་མིའི་སྨྲ་བརྗོད་རང་དབང་དང་ཆོས་དད་རང་དབང་། དེ་བཞིན་འགྲུལ་བསྐྱོད་རང་དབང་སོགས་འགྲོ་བ་མིའི་ཐོབ་ཐང་ཁག་བརྩི་མེད་རྡོག་རོལ་གྱིས་བོད་མིའི་ཐོག་དྲག་གནོན་དང་སྡུག་རྩུབ་ཀྱི་སྲིད་བྱུས་ལག་བསྟར་བྱེད་བཞིན་པའི་གནད་དོན་འབུར་འབུར་གནང་གི་ཡོད་པའི་ཁྲོད་ད་བར་གནད་དོན་དེའི་ཐོག་རྒྱལ་སྤྱིའི་དོ་སྣང་ཡོང་ཆེད་དུ་བོད་མི་ ༡༥༠ ལྷག་ནས་རང་ལུས་མེར་སྲེག་གནང་ཡོད་པ་ལྟར། རྒྱ་གཞུང་གིས་འགྲོ་བ་མིའི་ཐོབ་ཐང་བརྩི་མེད་རྡོག་རོལ་བཏང་དང་གཏོང་མུས་ཀྱི་གནས་དོན་དེ་ཕྱིར་ལ་མ་ཁྱབ་པའི་ཆེད་དུ་བོད་ནང་ཕྱིའི་མི་སྣ་འགྲུལ་བསྐྱོད་ལ་དམ་དྲག་བྱེད་བཞིན་པའི་གནད་དོན་འབུར་འདོན་གནང་འདུག རྩ་བའི་ Reciprocal Access to Tibet Act ཞེས་པའི་གྲོས་འཆར་དེའི་ནང་རྒྱ་ནག་གི་དཔོན་རིགས་དང་གསར་འགོད་པ། དེ་བཞིན་མི་སེར་རྣམས་ཨ་རིའི་ས་ཕྱོགས་གང་སར་བསྐྱོད་རྒྱུའི་མཐོང་མཆན་ཕུལ་བཞིན་ཡོད་ཀྱང་རྒྱ་ནག་གཞུང་གི་ངོས་ནས་བོད་ནང་ཨ་རི་གཙོ་གྱུར་རྒྱལ་སྤྱིའི་རང་དབང་ལྡན་པའི་རྟོག་ཞིབ་མི་སྣ་དང་གཞུང་འབྲེལ་མི་སྣ། གསར་འགོད་པ། ཡུལ་སྐོར་སྤྲོ་འཆམ་པ་བཅས་རང་དབང་ཐོག་འགྲུལ་བསྐྱོད་ཆོག་པའི་རང་དབང་འདྲ་མཉམ་དགོས་པ་དང། གལ་ཏེ་དེ་ལྟར་མ་བྱུང་ཚེ་བོད་ནང་འགྲུལ་བསྐྱོད་དམ་དྲག་དང་འབྲེལ་བའི་རྒྱ་ནག་གི་དཔོན་རིགས་རྣམས་ལ་ཨ་རིའི་ནང་བསྐྱོད་རྒྱུར་བཀག་སྡོམ་གནང་དགོས་པ། བོད་ནང་ཕྱིའི་མི་སྣ་རང་དབང་ཐོག་འགྲུལ་བསྐྱོད་ཆོག་པའི་སྲིད་བྱུས་གསར་བཟོ་བའམ་ད་ལྟ་ཕྱི་མི་བཀག་སྡོམ་གྱི་སྲིད་བྱུས་དེར་བསྒྱུར་བཅོས་མ་བྱུང་བ་ཚེ་གྲོས་ཆོད་དེའི་འོག་ད་ལྟ་ཨ་རི་ནང་བསྐྱོད་ཆོག་པའི་མཐོང་མཆན་སྤྲད་ཟིན་པའི་རྒྱ་གཞུང་འབྲེལ་ཡོད་མི་སྣ་རྣམས་ཀྱི་མཐོང་མཆན་ཕྱིར་བསྡུ་གནང་དགོས་པ་དང། ཨ་རིའི་ཕྱི་སྲིད་ལས་ཁུངས་ཀྱི་ངོས་ནས་གྲོས་ཚོགས་དང་ཁྲིམས་ལུགས་ཚོགས་ཆུང། གྲོས་ཚོགས་ཀྱི་ཕྱི་སྲིད་ལས་དོན་དང་སྲིད་བྱུས་ཚོགས་ཆུང་བཅས་ལ་ལོ་རེར་གྲོས་ཆོད་ཐོག་ལག་བསྟར་ཇི་ལྟར་གནང་ཡོད་མེད་ཀྱི་སྙན་ཐོ་འབུལ་དགོས་པ་སོགས་འཁོད་ཡོད་པ་རེད། གྲོས་འཆར་དེ་སྔ་ལོའི་ཨ་རིའི་གྲོས་ཚོགས་ཀྱི་ Tom Lantos འགྲོ་བ་མིའི་ཐོབ་ཐང་ཚོགས་ཆུང་གི་ཚོགས་གཙོ་སྐུ་ཞབས་ Jim Mcgovern ལགས་ཀྱིས་སྣེ་ཁྲིད་འོག་གྲོས་ཚོགས་འཐུས་མི་ ༥༥ ནས་རྒྱབ་སྐྱོར་གནང་ཐོག་འགོད་འབུལ་ཞུས་ཡོད་པ་དང་། ད་རེས་གྲོས་ཚོགས་ཀྱི་ཁྲིམས་ལུགས་ཚོགས་ཆུང་གིས་ཁྲིམས་འཆར་དེར་རྒྱབ་སྐྱོར་ཞུས་པ་དང་སྦྲགས་ཏེ་གྲོས་ཚོགས་འོག་མའི་ནང་ཁྲིམས་འཆར་དེར་རྒྱབ་སྐྱོར་གཏན་འབེབས་གནང་རྒྱུར་རེ་བ་ཆེན་པོ་གནང་འོས་པ་ཆགས་ཡོད་པ་རེད།

ཨ་རིའི་ཕྱི་སྲིད་ལས་ཁུངས་ཀྱིས་གོ་སྒྲིག་ཞུས་པའི་རྒྱལ་སྤྱིའི་ཆོས་དད་རང་དབང་གི་ཚོགས་ཆེན་ཐོག་ཨ་རིའི་ཆོས་དད་རང་དབང་གི་དམིགས་བསལ་སྐུ་ཚབ་སྐུ་ཞབས་ Samuel BrownBack  ལགས་ཀྱིས་རྒྱ་གཞུང་གིས་བོད་ནང་གི་བོད་མིའི་ཆོས་དད་རང་དབང་ཐོག་གང་ས་ཅི་ཐད་ནས་དམ་དྲག་ཤུགས་ཆེ་བྱེད་བཞིན་ཡོད་པར་བློ་འཚབ་ཀྱི་རྣམ་པ་ཆེད་བཏོན་གནང་འདུག ཐེངས་འདིའི་རྒྱལ་སྤྱིའི་རང་བཞིན་ལྡན་པའི་བློན་ཆེན་རིམ་པའི་ཆོས་དད་རང་དབང་གི་ཚོགས་འདུ་ཐེངས་དང་པོ་དེ་ཁ་སང་ཟླ་ ༧ ཚེས་ ༢༤ ཉིན་ནས་དབུ་འཛུགས་ཀྱིས་ཚེས་ ༢༦ བར་ཨ་རིའི་རྒྱལ་ས་ཝ་ཤིང་ཊོན་ཌི་སིར་རྟེན་གཞི་བྱས་པའི་ཨ་རིའི་ཕྱི་སྲིད་ལས་ཁུངས་ཀྱི་ཚོགས་ཁང་དུ་ཚོགས་གནང་ཡོད་ཅིང། ཚོགས་ཆེན་ཐོག་འཛམ་གླིང་རྒྱལ་ཁབ་ ༨༠ ལྷག་ཙམ་ནས་འབྲེལ་ཡོད་བློན་ཆེན་ ༤༠ ཙམ་དང་ཆོས་ཕྱོགས་ཀྱི་དབུ་ཁྲིད་དང་སྐུ་ཚབ་མི་སྣ། ཆོས་དད་རང་དབང་འོག་མནར་སྤྱོད་མྱངས་པའི་མི་སྣ་སོགས་ཚོགས་བཅར་བ་ཁྱོན་ ༤༠༠ ལྷག་འདུ་འཛོམས་བྱུང་འདུག ༸གོང་ས་མཆོག་གི་སྐུ་ཚབ་ཀྱི་ངོ་བོ་ཐོག་དེ་མོ་རིན་པོ་ཆེ་བསྟན་འཛིན་ཕུན་ཚོགས་མཆོག་དང་བོད་མིའི་སྐུ་ཚབ་ཏུ་ཆབ་སྲིད་བཙོན་ཟུར་མགོ་ལོག་འཇིགས་མེད་ལགས། དེ་བཞིན་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་བཅས་ཕེབས་འདུག ཨ་རིའི་ཆོས་དད་རང་དབང་གི་དམིགས་བསལ་སྐུ་ཚབ་སྐུ་ཞབས་ Samuel BrownBack ལགས་ཀྱིས་ཚོགས་འདུའི་དབུ་འབྱེད་གསུང་བཤད་སྐབས་ད་རེས་འདིར་འཛམ་གླིང་ནང་གི་ཆོས་དད་འདྲ་མིན་གྱི་མི་སྣ་རྣམས་ནས་ཕྱོགས་གཅིག་ཏུ་འདུ་འཛོམས་གནང་བ་འདི་གཙོ་བོ་འཛམ་གླིང་ནང་དཀའ་ཚེགས་འཕྲད་བཞིན་པའི་ཆོས་དད་རང་དབང་བརྩི་མེད་རྡོག་རོལ་གྱི་གནད་དོན་ལ་གདོང་ལེན་གྱི་རྒྱབ་སྐྱོར་མཚོན་ཆེད་ཡིན་པ་གསུངས་འདུག ལྷག་དོན་ཁོང་གིས་དེང་སྐབས་བྷར་མ་དང་ཤར་ཏུར་ཀི་སི་ཐན། ཊར་ཀི། ཨི་རན་ནང་གི་མང་ཚོགས་ཀྱི་ཆོས་དད་རང་དབང་གི་གནས་སྟངས་ཞན་པོ་ཡོད་སྐོར་འགྲེལ་བརྗོད་དང་སྦྲགས། བོད་ནང་རྒྱ་གཞུང་གིས་བོད་མིའི་ཆོས་དད་རང་དབང་གི་གནང་སྒོ་གང་ས་ཅི་ཐད་ནས་དམ་དྲག་དང་འབྲེལ་ཡོད་མི་སྣ་ཁག་ལ་དོ་དམ་ཤུགས་ཆེ་བྱེད་བཞིན་སྐོར་གླེང་སློང་གནང་སྟེ་བློ་འཚབ་ཡོད་པའི་རྣམ་པ་ཆེད་བཏོན་གནང་འདུག འདི་ག་རླུང་འཕྲིན་ཁང་ནས་ཨ་རིའི་ཕྱི་སྲིད་ལས་ཁུངས་ཀྱིས་གོ་སྒྲིག་ཞུས་པའི་རྒྱལ་སྤྱིའི་བློན་ཆེན་རིམ་པའི་ཆོས་དད་རང་དབང་གི་ཚོགས་འདུའི་གལ་གནད་རང་བཞིན་སྐོར་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་གཞོན་པ་བུ་ཆུང་ཚེ་རིང་ལགས་སུ་ཞལ་པར་བརྒྱུད་བཅར་འདྲི་ཞུས་ཡོད། རྩ་བའི་གཟའ་འཁོར་འདི་ནི་ཨ་རིའི་ཕྱི་སྲིད་ལས་ཁུངས་ཀྱི་མ་དངུལ་རོགས་རམ་ཐོག་ཨ་རིའི་ཕྱི་ཕྱོགས་སུ་ཡོད་པའི་རྒྱལ་ཁབ་ཁག་གི་ཆོས་དད་རང་དབང་གོང་འཕེལ་གཏོང་ཐབས་ཀྱི་ལས་འགུལ་འདྲ་མིན་སྤེལ་བཞིན་ཡོད་པ་ལྟར། ཁ་ཉིན་ཨ་རིའི་གྲོས་ཚོགས་ཀྱི་མདུན་ཐང་དུ་ཨེ་ཤ་ཡའི་ཆོས་དད་རང་དབང་གི་ཆིག་སྒྲིལ་འདུ་འཛོམས་ཐོག་བོད་མིའི་སྐུ་ཚབ་ནས་བོད་ནང་གི་ཆོས་དད་རང་དབང་གི་གནས་སྐོར་གསུང་བཤད་གནང་ཡོད་པ་མ་ཟད། རྒྱལ་སྤྱིའི་ཆོས་དད་རང་དབང་གི་ཚོགས་འདུ་མ་འཚོགས་པའི་ཉིན་གཅིག་གི་སྔ་རོལ་དུ་ཨ་རིའི་ཆོས་དད་རང་དབང་གི་དམིགས་བསལ་སྐུ་ཚབ་སྐུ་ཞབས་ Samuel BrownBack ལགས་དང་བོད་མི་ཆབ་སྲིད་བཙོན་ཟུར་གོ་ལོག་འཇིགས་མེད་ལགས་དང། ཁུལ་དེར་ཆོས་དད་རང་དབང་དང་འབྲེལ་བའི་དཀའ་སྡུག་མྱངས་དང་མྱོང་བཞིན་པའི་ཆབ་སྲིད་བཙོན་ཟུར་ཁག་ཅིག་བཅས་ཨ་རིའི་ Holicaust འགྲེམས་སྟོན་ཁང་དུ་འདུ་འཛོམས་ཀྱིས་ད་བར་འདས་གྲོངས་སུ་ཕྱིན་པའི་ཆོས་དད་རང་དབང་འཐབ་རྩོད་པ་རྣམས་ལ་རྗེས་དྲན་ཞུ་རྒྱུའི་ལས་རིམ་ཞིག་ཀྱང་ཚོགས་ཡོད་པ་རེད།

གཟའ་འཁོར་འདི་ནི་ཨ་རིའི་ཕྱི་སྲིད་ལས་ཁུངས་ཀྱི་མ་དངུལ་རོགས་རམ་ཐོག་ཨ་རིའི་ཕྱི་ཕྱོགས་སུ་ཡོད་པའི་རྒྱལ་ཁབ་ཁག་གི་ཆོས་དད་རང་དབང་གོང་འཕེལ་གཏོང་ཐབས་ཀྱི་ལས་འགུལ་འདྲ་མིན་སྤེལ་བཞིན་པ་ལྟར། ཁ་སང་ཨ་རིའི་རྒྱལ་ས་ Washington DC ནང་རྟེན་གཞི་བྱས་པའི་ཡུལ་དེའི་གྲོས་ཚོགས་ཀྱི་མདུན་ཐང་ཐོག་ Victims of Communism ཞེས་པའི་ཐེབས་རྩ་ཁང་གིས་ཨེ་ཤ་ཡའི་ཆོས་དད་རང་དབང་གི་ཆིག་སྒྲིལ་འདུ་འཛོམས་ཞེས་པ་ཞིག་གོ་སྒྲིག་གནང་འདུག འདུ་འཛོམས་ཐོག་ཨ་རིའི་གྲོས་ཚོགས་འཐུས་མི་ Ted Cruz ལགས་དང་ Alan Stuart Lowenthal ལགས། དེ་བཞིན་ཨ་རི་ནང་ཡོད་པའི་ཤིན་ཅང་དང་ཝི་ཏི་ནམ་སོགས་ཨེ་ཤ་ཡའི་རྒྱལ་ཁབ་འདྲ་མིན་གྱི་ཆོས་ལུགས་དང་འགྲོ་བ་མིའི་ཐོབ་ཐང་། གྲངས་ཉུང་མི་རིགས་ཀྱི་རང་དབང་སྲུང་སྐྱོབ་གནང་མཁན་སོགས་ཚོགས་པ་མི་འདྲ་བ་བཅུ་གཉིས་ཀྱི་སྐུ་ཚབ་མཉམ་ཞུགས་གནང་འདུག ལྷག་དོན་བོད་མིའི་ཆབ་སྲིད་བཙོན་ཟུར་མགོ་ལོག་འཇིགས་མེད་ལགས་དང་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་གཞོན་པ་བུ་ཆུང་ཚེ་རིང་ལགས་ནས་བོད་པའི་སྐུ་ཚབ་ཐོག་བོད་ནང་གི་ཆོས་དད་རང་དབང་གི་གནས་སྟངས་སྐོར་གསུང་བཤད་གནང་འདུག སྐབས་དེར་བུ་ཆུང་ཚེ་རིང་ལགས་ནས་བོད་མིའི་ཆོས་དད་རང་དབང་གི་གནས་སྟགས་ལ་མཚོན་ན་རྒྱ་ནག་གཞུང་གིས་བོད་ནང་གི་བོད་མི་རྣམས་ལ་རང་ཉིད་ཀྱི་འདོད་མོས་ལྟར་ཆོས་ཉམས་ལེན་གནང་རྒྱུར་ཐེ་བྱུས་དང་། བོད་ནང་གི་བོད་མི་རྣམས་རང་ཉིད་ཀྱི་ཆོས་ཕྱོགས་ཀྱི་དབུ་ཁྲིད་མཇལ་རྒྱུ་དང་། དེའི་དྲུང་ནས་ཆོས་ཞུ་རྒྱུ་སོགས་ཀྱི་གོ་སྐབས་སྤྲད་ཀྱི་མེད་སྐོར་གསུངས་པ་མ་ཟད། ཕྱི་ཕྱོགས་ལ་བཞུགས་པའི་ནང་པ་མང་པོ་ཞིག་བོད་ཀྱི་ནང་པའི་གནས་ཆེན་ཁག་མཇལ་བར་ཕེབས་རྒྱུའི་མཐོང་མཆན་མ་སྤྲད་པ་སོགས་ཀྱི་གནས་སྟངས་ཁག་མངོན་གསལ་གནང་འདུག གྲོས་མོལ་དང་ཆོས་དད་རང་ཐོག་ལ་ཡིད་ཆེས་གནང་མཁན་ཨ་རིའི་སྲིད་གཞུང་གིི་ངོས་ནས་རྒྱ་ནག་དང་ལྷན་ཚོང་འབྲེལ་གི་གནད་དོན་ཁོ་ན་ཙམ་མ་ཡིན་པར་རྒྱ་གཞུང་ལ་བོད་མིའི་ཆོས་དད་རང་དབང་ཐོག་ཐེ་བྱུས་བྱ་རྒྱུའི་ཐོབ་ཐང་མེད་པ་དང་། བོད་མི་རྣམས་ལ་རང་ཉིད་ཀྱི་རྩ་བའི་བླ་མ་༸གོང་ས་༸སྐྱབས་མགོན་ཆེན་པོ་མཆོག་གི་མཇལ་ཁ་དང་གསུང་ཆོས་ཞུ་ཆོག་པའི་རང་དབང་སྤྲོད་དགོས་ཞེས་ཞུས་པ་དང་སྦྲགས། ཨ་རི་ནང་ཡོད་པའི་ནང་པ་རྣམས་བོད་ཀྱི་ས་ཁུལ་ཁག་ཏུ་བསྐྱོད་ཐུབ་ཐབས་སུ་ Reciprocal access to Tibet act འམ་ཨ་རི་དང་རྒྱ་ནག་གཉིས་དབར་རང་དབང་འདྲ་མཉམ་ཐོག་མི་སྣ་འགྲོ་བསྐྱོད་ཆོག་པའི་གྲོས་ཆོད་དེ་གང་མགྱོགས་གཏན་འབེབས་གནང་གལ་ཡིན་པ་ནན་བརྗོད་གནང་འདུག དེ་བཞིན་མགོ་ལོག་འཇིགས་མེད་ལགས་ནས་ཁོང་དེ་སྔ་ཕྱི་ལོ་ ༢༠༠༨ ལོར་དོན་གྲུབ་དབང་ཆེན་ལགས་དང་ལྷན་བོད་ནང་གི་དངོས་ཡོད་གནས་སྟངས་གསལ་སྟོན་སླད་འཇིགས་བྲལ་ཞེས་པའི་གློག་བརྙན་བཟོ་སྐྲུན་བྱས་རྗེས་རྒྱ་གཞུང་གི་བཙོན་ཁང་ནང་མྱངས་པའི་གནས་སྟངས་དང་། རྒྱ་ནག་གཞུང་ནས་མུ་མཐུད་བོད་མིའི་ཆོས་དད་རང་དབང་གཙོ་གྱུར་གཞི་རྩའི་འགྲོ་བ་མིའི་ཐོབ་ཐང་ཁག་བརྩི་མེད་རྡོག་རོག་གཏོང་བཞིན་པ་མངོན་གསལ་གནང་བ་དང་ཆབས་ཅིག ཨ་རི་གཞུང་ནས་ད་ལྟའི་བོད་ནང་གི་གནས་སྟངས་ཐོག་ལ་ཐུགས་ཁུར་སྔར་ལྷག་བཞེས་ཏེ་རྒྱ་གཞུང་གིས་བཀག་ཉར་འོག་ཡོད་པའི་༸ཀུན་གཟིགས་པཎ་ཆེན་རིན་པོ་ཆེ་གཙོ་གྱུར་ཆབ་སྲིད་བཙོན་པ་རྣམས་གློད་བཀྲོལ་ཐུབ་ཐབས་དང་། བོད་ནང་ལག་བསྟར་བྱེད་བཞིན་པའི་དམ་དྲག་སྲིད་བྱུས་རྣམས་ཕྱིར་འཐེན་ཐུབ་ཐབས་སོགས་ཀྱི་ཐད་རོགས་རམ་སྔར་ལྷག་གནང་གལ་ཡིན་པའི་འབོད་སྐུལ་ཞུས་འདུག དེ་བཞིན་གྲོས་ཚོགས་འཐུས་མི་ Ted Cruz ལགས་ནས་ཉེ་ཆར་སྐུ་ཞབས་དམ་པ་ Liu Xiaobo ལགས་ཀྱི་བཟའ་ཟླ་ Liu Xia ལགས་རྒྱ་གཞུང་གི་དམ་དྲག་འོག་ནས་རང་དབང་ལུང་པའི་ནང་བདེ་འབྱོར་བྱུང་བར་དགའ་སྤྲོ་ཆེན་པོ་བྱུང་ཞེས་གསུངས་པ་དང་ཆབས་ཅིག ཨ་རི་གཞུང་ནས་དུས་རྒྱུན་དུ་འགྲོ་བ་མིའི་ཐོབ་ཐང་དང་ཆོས་དད་རང་དབང་ལ་གུས་བརྩི་ཡོད་པ་མ་ཟད། དམར་པོའི་རིང་ལུགས་འོག་དཀའ་སྡུག་མྱོང་བཞིན་པའི་མི་སེར་སྤྱི་ལ་གདུང་སེམ་མཉམ་བསྐྱེད་ཡོད་ཅེས་གསུངས་འདུག གཞི་རྩའི་ཁ་སང་ Victims of Communism གོ་སྒྲིག་ཞུས་པའི་ཨེ་ཤ་ཡའི་ཆོས་དད་རང་དབང་གི་ཆིག་སྒྲིལ་འདུ་འཛོམས་ཐོག་ཡུ་གུར་མང་གཙོའི་ལས་འགུལ་བ་ Dolkun Isa ལགས་དང་ཝི་ཏི་ནམ་གྱི་ཆབ་སྲིད་ཟུར་ཁག་ཅིག་ནས་ཀྱང་སོ་སོའི་ས་གནས་ཀྱི་ཆབ་སྲིད་དང་ཆོས་དད་རང་དབང་གི་གནས་སྟངས་ཐོག་གསུང་བཤད་གནང་ཡོད་པ་རེད།

ཁ་སང་ཟླ་ ༧ ཚེས་ ༡༡ ཉིན་ཨ་རིའི་རྒྱལ་ས་ Washington DC ནང་རྟེན་གཞི་བྱས་པའི་ཨ་རིའི་བོད་ཀྱི་སྐུ་ཚབ་དོན་ཁང་གིས་རྐང་འགན་བཞེས་ཐོག་ཡུལ་དེའི་གྲོས་ཚོགས་ཀྱི་ཚོགས་ཁང་ཆེན་མོར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་དགུང་གྲངས་ ༨༣ ལ་ཕེབས་པའི་༸སྐུའི་འཁྲུངས་སྐར་སྲུང་བརྩི་གཟབ་རྒྱས་ཞུས་འདུག མཛད་སྒོའི་ཐོག་དཔལ་༸རྒྱལ་དབང་ཀརྨ་པ་ཨོ་རྒྱན་འཕྲིན་ལས་རྡོ་རྗེ་མཆོག་དང་སྐུ་འབུམ་དགོན་པའི་མཁན་ཟུར་ཨ་ཀྱ་རིན་པོ་ཆེ། ཡུན་རིང་ནས་བོད་དོན་ལ་རྒྱབ་སྐྱོར་གནང་མཁན་ཨ་རིའི་མང་གཙོ་ཚོགས་པའི་དབུ་ཁྲིད་ལྕམ་ Nancy Pelosi མཆོག་གིས་གཙོས་ཨ་རིའི་གྲོས་ཚོགས་འཐུས་མི་སྐུ་ཞབས་ Jim McGovern མཆོག་དང་ལྕམ་སྐུ་ Ileana Ros-Lehtinen  མཆོག གྲོས་ཚོགས་འཐུས་མི་གཞན་ཁག་ཅིག ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱི་འགན་འཛིན་སྐུ་ཞབས་བསྟན་འཛིན་རྡོ་རྗེ་ལགས། རྒྱ་རིགས་ཁྲིམས་རྩོད་པ་དང་རང་དབང་འཐབ་རྩོད་པ་གྲགས་ཅན་སྐུ་ཞབས་ Chen Guangcheng ལགས། རྒྱལ་སྤྱིའི་བོད་དོན་ལས་འགུལ་ཁང་གི་ཚོགས་གཙོ་སྐུ་ཞབས་ Matteo Mecacci ལགས། སྐུ་ཚབ་དོན་གཅོད་དངོས་གྲུབ་ཚེ་རིང་ལགས་སོགས་གནད་ཡོད་མི་སྣ་དང་བོད་རིགས་བཅས་ནས་མཉམ་ཞུགས་གནང་འདུག སྐབས་དེར་དཔལ་༸རྒྱལ་དབང་ཀརྨ་པ་རིན་པོ་ཆེ་མཆོག་གིས་༸གོང་ས་མཆོག་གི་༸སྐུའི་འཁྲུངས་སྐར་ལ་འཚམས་འདྲི་ཞུས་པ་དང་འབྲེལ། ཚང་མས་མགོན་པོ་༸གང་ཉིད་མཆོག་གི་༸སྐུའི་འཁྲུངས་སྐར་སྲུང་བརྩི་ཞུས་པ་དང་ཆབས་ཅིག་ཏུ་༸གོང་ས་༸སྐྱབས་མགོན་ཆེན་པོ་མཆོག་གི་བླ་ན་མེད་པའི་དགོངས་བཞེས་དང་བཀའ་སློབ་ལམ་སྟོན་ཕེབས་པ་རྣམས་བསྒྲུབ་གལ་ཡིན་པ་བཀའ་བསྩལ་འདུག ཨ་རིའི་གྲོས་ཚོགས་འཐུས་མི་ལྕམ་ Ileana Ros-Lehtinen མཆོག་གིས་༸གོང་ས་༸སྐྱབས་མགོན་ཆེན་པོ་མཆོག་ནི་བོད་དང་བོད་མི་རྣམས་ཙམ་མ་ཟད་འཛམ་བུ་གླིང་འདིའི་ཐོག་ཡོད་པའི་འགྲོ་བ་ཡོངས་ཀྱི་དབུ་ཁྲིད་ཡིན་པ་དང་། ལྷག་པར་དུ་མགོན་པོ་༸གང་ཉིད་མཆོག་ནས་འཛམ་གླིང་ཞི་བདེ་དང་། མིའི་སེམས་ཁམས་ཀྱི་རིན་ཐང་གོང་འཕེལ་ཐད་ལེགས་སྐྱེས་ཆེན་པོ་འཇོག་གནང་མཛད་ཡོད་པ་སོགས་ལ་ཆེ་བསྟོད་དང་འབྲེལ་༸སྐུའི་འཁྲུངས་སྐར་ལ་འཚམས་འདྲི་ཞུས་འདུག རྒྱ་ནག་གཞུང་ནས་དྲག་པོའི་སྲིད་བྱུས་འདྲ་མིན་བརྒྱུད་བོད་མི་རིགས་ཀྱི་ངོ་བོ་རྩ་མེད་གཏོང་བཞིན་པའི་བྱ་སྤྱོད་དང་། བོད་ཀྱི་དགོན་སྡེ་གྲྭ་ཚང་ཁག་གཏོར་བཤིག བོད་མིའི་གཞི་རྩའི་འགྲོ་བ་མིའི་ཐོབ་ཐང་ཁག་བརྩི་མེད་རྡོག་རོལ་གཏོང་བཞིན་པ་རྣམས་ངེས་པར་དུ་མཚམས་འཇོག་བྱེད་དགོས་པ་མ་ཟད། ཨ་རིའི་གྲོས་ཚོགས་ཀྱི་ངོས་ནས་ཀྱང་བོད་ཀྱི་གནད་དོན་དེ་གལ་གནད་ཅན་ཞིག་ལ་ངོས་འཛིན་གནང་དགོས་པ་དང་ཨ་རིའི་གྲོས་འཐུས་མི་རྣམས་ནས་ཀྱང་བོད་མིའི་གཞི་རྩའི་འགྲོ་བ་མིའི་ཐོབ་ཐང་སྲུང་སྐྱོབ་གཙོ་གྱུར་བོད་རྒྱའི་དཀའ་རྙོག་གསལ་ཐབས་སུ་ཕྱག་ལས་གནང་བ་དེ་ནི་༸གོང་ས་མཆོག་གི་༸སྐུའི་འཁྲུངས་སྐར་ལ་ཕྱག་རྟགས་ལེགས་ཤོས་ཤིག་ཆགས་སྐོར་གསུངས་འདུག ཨ་རིའི་གྲོས་ཚོགས་འཐུས་མི་སྐུ་ཞབས་ Jim McGovern མཆོག་ནས་རྒྱ་གཞུང་གི་དྲག་པོའི་སྲིད་བྱུས་འོག་སྐྱབས་བཅོལ་དུ་གནས་བཞིན་པའི་བོད་མི་རྣམས་རང་ཉིད་ཀྱི་ཕ་ཡུལ་དུ་ཕྱིར་ལོག་ཐུབ་ནས་ཐུན་མོང་མ་ཡིན་པའི་སྐད་ཡིག་དང་རིག་གཞུང་ཁག་རང་དབང་ངང་ལོངས་སུ་སྤྱོད་རྒྱུའི་རང་དབང་གང་མགྱོགས་ཐོབ་པའི་རེ་སྨོན་དང་། རྒྱ་གཞུང་ནས་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་འདོད་ལྟར་བོད་ནང་ཆིབས་བསྒྱུར་མཛད་བཅུག་དགོས་པ་གསུངས་འདུག ཨ་རིའི་མང་གཙོ་ཚོགས་པའི་དབུ་ཁྲིད་ལྕམ་ Nancy Pelosi མཆོག་གིས་གཙོས་གྲོས་ཚོགས་འཐུས་མི་གཞན་རྣམས་དང་། རྒྱ་རིགས་ཁྲིམས་རྩོད་པ་དང་རང་དབང་འཐབ་རྩོད་པ་གྲགས་ཅན་སྐུ་ཞབས་ Chen Guangcheng ལགས་སོགས་ནས་ཀྱང་༸སྐུའི་འཁྲུངས་སྐར་དང་འབྲེལ་བའི་འཚམས་འདྲིའི་གསུང་བཤད་གནང་བ་དང་ཆབས་ཅིག ས་གནས་བོད་རིགས་ཁག་ཅིག་ནས་བོད་ཀྱི་སྲོལ་རྒྱུན་གཞས་སྣ་ཁག་ཅིག་གཟིགས་འབུལ་ཞུས་འདུག བོད་ཀྱི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ནས་སྐབས་དེར་བཅར་བའི་མང་ཚོགས་སྤྱི་དང་། ལྷག་པར་དུ་འདས་པའི་ལོ་དུས་ནས་ཨ་རིའི་སྲིད་གཞུང་དང་གྲོས་ཚོགས་གཉིས་ཀྱི་ངོས་ནས་༸གོང་ས་༸སྐྱབས་མགོན་ཆེན་པོ་མཆོག་དང་བོད་ཀྱི་གནད་དོན་ཐོག་རྒྱབ་སྐྱོར་གནང་དང་གནང་བཞིན་པར་ཐུགས་རྗེ་ཆེ་ཞུས་པ་དང་སྦྲགས། ཨ་རིའི་སྲིད་གཞུང་ནས་མུ་མཐུད་གཉིས་སྨན་དབུ་མའི་ལམ་གྱི་སྲིད་བྱུས་ལ་རྒྱབ་སྐྱོར་གནང་བའི་བརྒྱུད་བོད་རྒྱའི་གནད་དོན་ཞི་འགྲིག་ཡོང་ཐབས་སུ་རོགས་རམ་གནང་གལ་ཡིན་པར་འབོད་སྐུལ་ཞུས་འདུག གཞི་རྩའི་ཨ་རིའི་གྲོས་ཚོགས་ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་འཁྲུངས་སྐར་སྲུང་བརྩི་ཞུ་རྒྱུ་དེ་སྔ་ལོ་ནས་དབུ་འཛུགས་གནང་ཡོད་པ་དང་། སྔ་ལོའི་འཁྲུངས་སྐར་སྐབས་ཨ་རིའི་ཆབ་སྲིད་ཚོགས་པ་གཉིས་ཀའི་གྲོས་ཚོགས་འཐུས་མི་དང་གནད་ཡོད་མི་སྣ་སོགས་མཉམ་ཞུགས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་མཛད་འཕྲིན་ལ་ཆེ་བསྟོད་རྒྱ་ཆེ་ཞུས་ཡོད་པ་རེད།

སུད་སི་གྲོང་ཁྱེར་ Geneva ནང་རྒྱལ་ཚོགས་ཀྱི་ Committee on the Elimination of Racial Discrimination ཞེས་མི་རིགས་དབྱེ་འབྱེད་འགོག་ཐབས་ཀྱི་ཆེས་མཐོའི་ལྷན་ཁང་གི་ལྷན་ཚོགས་སྐབས་ ༩༦ པ་ཟླ་ ༧ ཚེས་ ༦ ནས་ ༣༠ བར་འཚོགས་གཏན་ཁེལ་བ་དང་བསྟུན། ཁ་སང་རྒྱལ་སྤྱིའི་ཉེས་ཡངས་ཚོགས་པས་རྒྱལ་ཚོགས་སུ་ད་བར་རྒྱ་གཞུང་གིས་བོད་མི་དང་ཡུ་གུར་བ་གཙོ་གྱུར་གྲངས་ཉུང་མི་རིགས་རྣམས་ལ་མི་རིགས་འབྱེ་འབྱེད་བྱེད་བཞིན་ཡོད་པའི་ཞུ་སྙན་ཞིག་ཕུལ་འདུག ཤོགས་གྲངས་ ༡༥ཅན་གྱི་ཞུ་སྙན་དེའི་ནང་རྒྱལ་སྤྱིའི་ཉེས་ཡངས་ཚོགས་པའི་ཉམས་ཞིབ་སྡེ་ཚན་ནས་འདས་པའི་ལོ་དུས་ནང་རྒྱ་གཞུང་གི་གྲངས་ཉུང་མི་རིགས་ཐོག་འཛིན་པའི་སྲིད་བྱུས་སྤྱི་དང་ལྷག་པར་དུ་ལོ་ཤས་ནང་རྒྱ་གཞུང་གིས་རྒྱ་ནག་རྒྱལ་ཁབ་ཀྱི་བདེ་འཇགས་དང་མཐུན་སྒྲིལ་སོགས་ཀྱི་མིང་བྱང་འོག་གཏན་འབེབས་བྱས་པའི་དྲྭ་རྒྱའི་ཁྲིམས་ལུགས་དང་བདེ་འཇགས་ཁྲིམས་གཞི། དེ་བཞིན་གཞུང་འབྲེལ་མ་ཡིན་པའི་ཚོགས་པ་ཁག་གི་ལས་དོན་བྱེད་ཕྱོགས་ཀྱི་ཁྲིམས། ཆོས་དད་ཁྲིམས་སྒྲིག་ལ་བསྐྱར་བཅོས་བྱས་པ་སོགས་ཀྱི་ཐོག་ཉམས་ཞིབ་བྱས་པའི་གྲུབ་དོན་ཁག་ཅིག་འགྲེལ་བརྗོད་དང་སྦྲགས། རྒྱ་གཞུང་གིས་གཏན་འབེབས་བྱས་པའི་ཁྲིམས་ལུགས་དེ་དག་ཁ་གསལ་མེད་པ་མ་ཟད། དངོས་སུ་ལག་བསྟར་སྐབས་ཞི་རྒོལ་བ་རྣམས་གང་བྱུང་འཛིན་བཟུང་དང་། ཁོང་རྣམ་པའི་སྨྲ་བརྗོད་དང་བསམ་བརྗོད་ཀྱི་རང་དབང་གཙོ་གྱུར་གཞི་རྩའི་འགྲོ་བ་མིའི་རང་དབང་ཁག་ལ་བརྩི་སྲུང་མེད་པ་མངོན་གསལ་གནང་འདུག དེ་བཞིན་སྔར་ལོ་རྒྱལ་ཚོགས་ཀྱི་སྐུ་ཚབ་ཞིག་རྒྱ་ནག་ཏུ་བསྐྱོད་སྐབས་བོད་དང་ཤིན་ཅང་ཁུལ་གྱི་གནས་སྟངས་ལ་སེམས་ཚབས་ཆེན་པོ་ཡོད་སྐོར་གསུངས་པ་ལུང་འདྲེན་དང་དང་འབྲེལ། རྒྱ་གཞུང་ནས་རྒྱ་ནག་གི་མངའ་ཁོངས་སུ་ཡོད་པའི་གྲངས་ཉུང་མི་རིགས་ ༥༦ ལས་བོད་མི་དང་ཡུ་གུར་བར་དམིགས་བསལ་གྱི་དམ་དྲག་བྱེད་བཞིན་ཡོད་པ་དང་། ལྷག་དོན་རྒྱ་གཞུང་གི་རྩ་ཁྲིམས་དོན་ཚན་བཞི་པའི་ནང་གྲངས་ཉུང་མི་རིགས་རྣམས་ལ་སོ་སོའི་སྐད་ཡིག་སྲུང་སྐྱོབ་དང་དེ་དག་སྤྱོད་རྒྱུའི་ཐོབ་ཐང་བསྐྲུན་ཡོད་ཀྱང་། བོད་མི་ཚོར་རང་ཉིད་ཀྱི་སྐད་ཡིག་སྤྱོད་པ་དང་སྲུང་སྐྱོབ་གནང་རྒྱུའི་རང་དབང་མེད་པ་མ་ཟད། དགོན་སྡེ་གྲྭ་ཚང་ཁག་ཏུ་ཆོས་ཕྱོགས་ཀྱི་འདུ་འཛོམས་དང་དེ་འབྲེལ་གནང་སྒོར་སྤེལ་བར་ཁ་བྲལ་བ་དང་ཆིག་སྒྲིལ་ལ་གནོད་པའི་བྱ་སྤྱོད་སྤེལ་བར་ངོས་འཛིན་གྱིས་ཁྲིམས་ཐག་རིགས་གཅོད་བཞིན་པ་སོགས་ཆེས་གསལ་བཏོན་གནང་འདུག རྒྱ་གཞུང་གི་བཙོན་འོག་ཏུ་ཡོད་པ་བཀྲ་ཤིས་དབང་ཕྱུག་ལགས་དང་གྲྭ་བློ་བཟང་གྲགས་པ་ལགས། གྲྭ་ཆོས་དཔལ་ཟླ་བ་ལགས་སོགས་བོད་མིའི་ཆབ་སྲིད་བཙོན་པའི་གནས་སྟངས་ཁག་ཅིག་ཟུར་འདོན་གནང་ཐོག་རྒྱ་གཞུང་ནས་བོད་མིའི་ཆབ་སྲིད་བཙོན་པའི་གནད་དོན་ལ་ཐག་གཅོད་བྱེད་སྐབས་ཁྲིམས་རྩོད་པ་གླ་གཡར་བྱ་རྒྱུ་སོགས་ཀྱི་ཐོབ་ཐང་སྤྲོད་ཀྱི་མེད་པ་མ་ཟད་བཙོན་ཁང་ནང་དུའང་བཙོན་པ་གཞན་དང་མི་འདྲ་བའི་མནར་གཅོད་རིགས་གཏོང་བཞིན་ཡོད་པ་འགྲེལ་བརྗོད་གནང་བ་དང་ཆབས་ཅིག་ཏུ་རྒྱལ་ཚོགས་ནས་ཞིབ་དཔྱད་ནན་པོ་གནང་ཐོག་ཟླ་བ་རྗེས་མའི་རྒྱལ་ཚོགས་ཀྱི་མི་རིགས་དབྱེ་འབྱེད་འགོག་རྒྱུའི་ཆེས་མཐོའི་ལྷན་ཚོགས་སྐབས་རྒྱ་ནག་གི་སྐུ་ཚབ་ལ་མི་རིགས་དབྱེ་འབྱེད་དང་འབྲེལ་བའི་གནད་དོན་སྤྱི་དང་སྒོས་རྒྱལ་ཚོགས་ཀྱི་གཏན་འབེབས་གནང་བའི་ཁྲིམས་ལུགས་དང་ལས་དོན་ཁག་ལག་ལེན་ཚུལ་དང་མཐུན་པ་ཞིག་བྱེད་ཀྱི་ཡོད་མེད་ཐད་འདྲི་རྩད་ནན་པོ་གནང་དགོས་པར་འབོད་སྐུལ་བསྐྱར་ནན་གནང་འདུག

ཁ་སང་ཕྱི་ཟླ་ ༦ ཚེས་ ༤ ཨ་རིའི་རང་བཙན་ཉིན་མོ་དང་བསྟུན་ཨ་རིའི་གྲོས་ཚོགས་ཀྱི་ Tom Lantos འགྲོ་བ་མིའི་ཐོབ་ཐང་ཚོགས་ཆུང་ནས་ཉིན་མོ་དེ་སྲུང་བརྩི་དང་འབྲེལ་རྒྱ་གཞུང་གི་བཙོན་འཇུག་འོག་ཡོད་པའི་རྒྱ་རིགས་ཡི་ཤུའི་ཆོས་དཔོན་ Zhang Shaojie དང་༸ཀུན་གཟིགས་པཎ་ཆེན་རིན་པོ་ཆེ་མཆོག་རྣམ་གཉིས་ཀྱི་གནད་དོན་བརྗེད་རྒྱུ་མེད་པའི་ཞུ་སྐུལ་གནང་འདུག ཨ་རིའི་གྲོས་ཚོགས་ཀྱི་འགྲོ་བ་མིའི་ཐོབ་ཐང་ཚོགས་ཆུང་གི་ངོས་ནས་འཕྲུལ་བྱའི་དྲྭ་ལམ་ཐོག་ཨ་རིའི་ནང་སྤྱི་དམངས་ཐོབ་ལེན་པ་གྲགས་ཅན་ Fannie Lou Hamer ལགས་ཀྱིས་མི་ཚང་མར་རང་དབང་མ་ཐོབ་བར་དུ་སུ་གང་ཞིག་རང་དབང་མ་རེད་ཅེས་གསུངས་སྐོར་ལུང་འདྲེན་དང་སྦྲགས། དེ་སྔ་ ༢༠༡༤ ལོར་ཉིན་དེའི་སྐབས་རྒྱ་རིགས་ཡི་ཤུའི་ཆོས་དཔོན་ Zhang Shaojie ལགས་ལ་རྒྱ་གཞུང་གིས་ལོ་ ༡༢ རིང་བཙོན་འཇུག་ཁྲིམས་ཐག་བཅད་པའི་ཉིན་མོ་ཞིག་ཡིན་པ་དང་བསྟུན། ཨ་རིའི་ངོས་ནས་རང་བཙན་ཉིན་མོར་སྲུང་བརྩི་ཞུ་བཞིན་ཡོད་ཀྱང་། རྒྱ་རིགས་ཡི་ཤུའི་ཆོས་དཔོན་ Zhang Shaojie དང་༸ཀུན་གཟིགས་པཎ་ཆེན་རིན་པོ་ཆེ་མཆོག་རྣམ་གཉིས་ཀྱི་གནད་དོན་བརྗེད་རྒྱུ་མེད་པའི་ཞུ་སྐུལ་གནང་འདུག སྐུ་ཞབས་ Zhang Shaojie ལགས་ནི་རྒྱ་ནག་གི་ Henan ཞིང་ཆེན་གྱི་ Nanle རྫོང་ཁོངས་ནང་ཡི་ཤུའི་རྣམ་དག་ཆོས་ལུགས་ཀྱི་ཆོས་དཔོན་ཞིག་ཡིན་པ་དང་། ཁོང་ནས་དེ་སྔ་བཙོན་པ་གཞན་ཞིག་ལ་རོགས་རམ་གནང་སྟབས་ཕྱི་ལོ་ ༢༠༡༣ ཟླ་ ༡༡ ནང་ཁོང་གི་ཆོས་གྲོགས་གཞན་ ༢༠ དང་ལྷན་འཛིན་བཟུང་བྱས་ནས་ཕྱི་ལོ་ ༢༠༡༤ ཟླ་ ༦ ཚེས་ ༤ ཉིན་ཁོང་ལ་སྤྱི་ཚོགས་གཏན་ལྷིང་དཀྲུག་པ་དང་། ངན་བྱུས་གཤམས་པའི་ནག་ཉེས་འོག་ལོ་ ༡༢ རིང་བཙོན་འཇུག་བྱས་པ་རེད། རྩ་བའི་ཉེ་སྔོན་གྲོས་ཚོགས་འཐུས་མི་ Marco Rubio ལགས་དང་ Chris Smith ལགས་གཉིས་ནས་ཡུལ་དེའི་གྲོས་ཚོགས་ནང་སྐུ་ཞབས་ Zhang Shaojie ལགས་ཀྱི་གནད་དོན་ཐོག་རྟོག་ཞིབ་དགོས་པའི་དགོས་འདུན་བཏོན་ཡོད་པ་རེད།  དེ་བཞིན་ཨ་རིའི་གྲོས་ཚོགས་ཀྱི་ Tom Lantos འགྲོ་བ་མིའི་ཐོབ་ཐང་ཚོགས་ཆུང་གི་ཚོགས་གཙོ་གྲོས་ཚོགས་འཐུས་མི་ Jim Mcgovern ལགས་དང་ཨ་རིའི་གཞུང་གི་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱི་ཚོགས་གཙོ་བསྟན་འཛིན་རྡོ་རྗེ་ལགས་རྣམ་གཉིས་ནས་ཀྱང་རྒྱ་གཞུང་ལ་༸ཀུན་གཟིགས་པཎ་ཆེན་རིན་པོ་ཆེ་མཆོག་གི་༸སྐུ་ཁམས་གསལ་ཐང་ཡིན་མིན་གྱི་བརྙན་པར་བརྒྱུད་དཔང་རྟགས་མངོན་གསལ་དགོས་པའི་རེ་སྐུལ་གནང་ཡོད་པ་རེད།