རྒྱལ་སྤྱི།

ཌེན་མགྷ་གཞུང་ནས་ཕྱི་ལོ་ ༢༠༡༢ ལོར་རྒྱ་ནག་གི་སྲིད་འཛིན་ཧུ་ཅིན་ཐའོ་ཡུལ་དེའི་ནང་བསྐྱོད་སྐབས་ས་གནས་ཉེན་རྟོག་པས་བོད་དོན་ལས་འགུལ་བར་དམ་དྲག་བྱེད་ཕྱོགས་དང་འབྲེལ་བའི་གྱོད་གཞི་ཐོག་ཞིབ་འཇུག་གཏིང་ཟབ་ཏུ་བཏང་ནས་ད་ཆ་ཕྱི་ལོ་ ༢༠༡༢ ལོའི་གནད་དོན་དེ་གཅིག་པོ་མིན་པར་འདས་པའི་ལོ་ ༢༣ ནང་རྒྱ་ནག་གི་དཔོན་རིགས་ཚོ་ཡུལ་དེའི་ནང་ཕེབས་སྐབས་དང་འབྲེལ་ཡོད་གནད་དོན་ཡོངས་རྫོགས་ལ་ཞིབ་འཇུག་གནང་རྒྱུ་ཡིན་པ་གསུངས་འདུག དེ་སྔ་ཕྱི་ལོ་ ༢༠༡༢ ལོར་རྒྱ་ནག་གི་སྲིད་འཛིན་ Hu jintao ཡོ་རོབ་རྒྱལ་ཁབ་ཌེན་མག་གི་གྲོང་ཁྱེར་ Copenhagen ནང་འབྱོར་བསྟུན་ས་གནས་ཀྱི་བོད་དོན་ལས་འགུལ་བ་ཁག་ཅིག་གིས་བོད་ཀྱི་རྒྱལ་དར་འཁྱེར་ནས་རྒྱ་ནག་སྲིད་འཛིན་ལ་ངོ་རྒོལ་གནང་སྐབས་ཌེན་མག་ས་གནས་ཀྱི་ཉེན་རྟོག་པས་ལས་འགུལ་བ་དེ་དག་གི་ལག་ནས་བོད་ཀྱི་རྒྱལ་དར་བཙན་འཕྲོག་བྱས་ཡོད་སྟབས། སྐབས་དེར་བོད་དོན་ལས་འགུལ་བ་མི་སྣ་བརྒྱད་ནས་ས་གནས་ཀྱི་ཁྲིམས་ཁང་དུ་རྒྱལ་དར་བཙན་འཕྲོག་གནང་མཁན་ཉེན་རྟོག་པ་དེ་དག་ཁྲིམས་གཏུགས་བྱས་པར་བརྟེན་ས་གནས་ཁྲིམས་ཁང་ནས་དེ་སྔོན་ Denmark ས་གནས་ཉེན་རྟོག་པས་བོད་དོན་ལས་འགུལ་བའི་ཐོག་སྤེལ་བའི་བྱ་སྤྱོད་དེ་དག་ཁྲིམས་འགལ་ཡིན་པའི་བཅད་ཁྲ་བཏང་བ་དང་འབྲེལ། ཉེན་རྟོག་པ་གཉིས་ས་གནས་གཞན་དུ་གནས་སྤོ་བཏང་བ་དང་བོད་དོན་ལས་འགུལ་བ་མི་སྣ་བརྒྱད་པོ་དེ་དག་ལ་ས་གནས་ཀྱི་ཉེན་རྟོག་ལས་ཁང་ནས་ཌེན་མག་གི་སྒོར་མོ་ཁྲི་ ༢ རེ་གུན་གསབ་སྤྲོད་དགོས་པའི་བཀོད་ཁྱབ་བཏང་ཡོད་པ་རེད། ཌེན་མག་གི་ཁྲིམས་ཞིབ་བློན་ཆེན་སྐུ་ཞབས་ Soeren Pape Poulson ལགས་ཀྱིས་ཁ་སང་གསར་འགོད་གསལ་བསྒྲགས་ཤིག་སྤེལ་བའི་ནང་གྱོད་གཞི་དེར་ཞིབ་འཇུག་གནང་བའི་བརྒྱུད་རིམ་ཁྲོད། དེ་སྔ་ཕྱི་ལོ་ ༡༩༩༥ དང་། ༢༠༠༢ དེ་བཞིན་ ༢༠༡༡ ལོ་སོ་སོར་རྒྱ་ནག་གི་དཔོན་རིགས་ཁག་ཅིག་ཡུལ་དེའི་ནང་འབྱོར་སྐབས་ས་གནས་ཉེན་རྟོག་པ་རྣམས་ཀྱིས་སྐབས་དེར་བོད་དོན་ལས་འགུལ་བ་རྣམས་ཀྱི་ཐོག་བྱ་སྤྱོད་གང་འདྲ་སྤེལ་ཡོད་མེད་སྐོར་ལ་ཡང་དྲི་བ་ཡོང་གི་ཡོད་པ་གསུངས་འདུག གནད་དོན་འདིའི་ཐོག་ཌེན་མག་གི་སྲིད་བློན་སྐུ་ཞབས་ Lars Loekke Rasmussen ལགས་ཀྱིས་ཀྱང་ཞིབ་འཇུག་གི་བརྒྱུད་རིམ་ལས་གནས་ཚུལ་གསར་པ་ཁག་ཅིག་ཐོན་ཡོད་པ་དང།  གནས་ཚུལ་དེ་དག་བཟང་པོ་ཞིག་མིན་སྐོར་གསུངས་འདུག་པ་ལས་ཞིབ་ཕྲ་གང་ཡང་འགྲེལ་བརྗོད་གནང་མི་འདུག ཌེན་མག་བོད་དོན་རྒྱབ་སྐྱོར་ཚོགས་པའི་སྐུ་ཞབས་ Anders Hoejmark Andersen ལགས་ཀྱིས་ད་རེས་ཌེན་མག་གཞུང་གིས་ས་གནས་ཉེན་རྟོག་པས་བོད་དོན་ལས་འགུལ་བར་བྱ་སྤྱོད་སྤེལ་ཕྱོགས་དང་འབྲེལ་བའི་གྱོད་གཞིར་ཞིབ་འཇུག་གཏིང་ཟབ་ཏུ་གཏོང་འཆར་ཡོད་པ་དེར་འཚམས་འདྲི་ཞུས་པ་འབྲེལ། ཌེན་མག་ཉེན་རྟོག་པས་རང་རྒྱལ་ཁབ་ཀྱི་མེ་སེར་སྲུང་སྐྱོབ་གནང་རྒྱུའི་ཚབ་ཏུ་དེ་ལས་ལྡོག་པའི་ཕྱག་ལས་ཡོད་པ་དང།  ང་ཚོས་འདས་པའི་ལོ་མང་རིང་ནས་བོད་དོན་རྔམ་སྟོན་གནང་སྐབས་ཉེན་རྟོག་པས་འགོག་རྐྱེན་བཟོ་བའི་སྐོར་ལ་ལན་མང་ཞུས་ཡོད་ཀྱང་གནད་དོན་དེའི་ཐོག་ཁུངས་སྐྱེལ་ར་སྤྲོད་མེད་སྟབས། ད་རེས་ཌེན་མག་གཞུང་ནས་གནད་དོན་དེ་ཡིག་ཐོག་ཏུ་བཀོད་པ་དེ་ནི་ང་ཚོར་ཧ་ཅང་ཡག་པོ་བྱུང་སོང་ཞེས་གསུང་འདུག རྩ་བའི་དེ་སྔ་རྒྱ་ནག་གི་སྲིད་འཛིན་ཟུར་པ་ Hu Jintao ཌེན་མག་ནང་བསྐྱོད་སྐབས་བོད་དོན་ལས་འགུལ་བ་རྣམས་ཀྱིས་རྔམ་སྟོན་ཞི་རྒོལ་གནང་བ་དང།  ཌེན་མག་ཉེན་རྟོག་པས་སྐབས་དེར་ཞི་རྒོལ་བ་རྣམས་སྤྱི་སྤྱོད་རླངས་འཁོར་གྱིས་བཀག་ནས་རྒྱ་ནག་གི་སྲིད་འཛིན་མིག་མཐོང་ས་མེད་པ་བཟོས་པར་མ་ཟད་ལག་ནས་བོད་ཀྱི་རྒྱལ་དར་ཀྱང་འཕྲོག་ཡོད་པ་རེད། ཌན་མག་གི་ཁྲིམས་ཞིབ་བློན་ཆེན་སྐུ་ཞབས་ Soeren Pape Poulson ལགས་ཀྱིས་ཟླ་བ་འདིའི་མགོ་སྟོད་དུ་ཡུལ་དེའི་གྲོས་ཚོགས་སུ་ཕྱི་ལོ་༢༠༡༢ ལོའི་གནས་ཚུལ་དེའི་ཁྲོད་བོད་དོན་ལས་འགུལ་བར་དམ་དྲག་གི་བཀོད་ཁྱབ་གཏོང་མཁན་སུ་ཡིན་མིན་སོགས་ཀྱི་གནས་ཚུལ་ཁག་ཅིག་གསལ་པོ་ཆགས་ཡོད་པ་སྙན་གསེང་ཞུས་རྗེས་གྲོས་ཚོགས་ཀྱི་ངོས་ནས་སྐུ་ཞབས་ Poulson ལགས་ཀྱི་ཞིབ་འཇུག་ལས་དོན་དེར་རྒྱབ་སྐྱོར་ཤུགས་ཆེ་གནང་ཡོད་པ་རེད་འདུག

ཟླ་ ༦ ཚེས་ ༡༡ ཉིན་ནས་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ཁེ་ན་ཌའི་གཞུང་མང་གཉིས་ལ་ཐུགས་རྗེ་ཆེ་ཞུའི་མཛད་སྒོར་མཉམ་ཞུགས་གནང་རྒྱུ་གཙོས་ས་གནས་ཀྱི་གནད་ཡོད་མི་སྣ་ཚོར་བོད་དོན་ཞུ་སྐུལ་སོགས་གནང་བཞིན་ཡོད་པ་དང་བསྟུན། ཁ་སང་ཁེ་ན་ཌའི་གྲོས་ཚོགས་སུ་སྲིད་སྐྱོང་བློ་བཟང་སེང་གེ་མཆོག་གིས་གཙོས་པའི་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་གི་ཚོགས་མི་སྤྱི་འཐུས་ཁག་ཅིག དེ་བཞིན་བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་དང་ཁེ་ན་ཌའི་གྲོས་ཚོགས་ཀྱི་ཕྱི་སྲིད་ལས་དོན་ཚོགས་ཆུང་གི་ཚོགས་གཙོ་སྐུ་ཞབས་ Robert Nault ལགས་སོགས་ལྷན་ཞུགས་ཐོག་གྲོས་ཚོགས་ཀྱི་ཕྱི་སྲིད་ལས་དོན་ཚོགས་ཆུང་མདུན་དུ་བོད་དོན་ཉན་ཞིབ་ཀྱི་ལས་རིམ་ཞིག་ཚོགས་འདུག སྲིད་སྐྱོང་བློ་བཟང་སེང་གེ་མཆོག་གིས་ཉེ་དུས་སུ་རྒྱ་གཞུང་གིས་དབྱེ་བའི་བོད་རང་སྐྱོང་ལྗོངས་ཁུལ་གྱི་སྐུ་ཚབ་རུ་ཁག་ཞིག་ཁེ་ན་ཌར་གཞུང་འབྲེལ་འཚམས་གཟིགས་སུ་འབྱོར་ནས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་སོགས་ཀྱི་ཐོག་གཏམ་བཤད་བྱས་པ་དེ་དག་ཆེད་མངགས་རྒྱ་གཞུང་གི་དྲིལ་བསྒྲགས་ལས་དོན་སྤེལ་རྒྱུ་དང་། ལྷག་པར་དུ་རྒྱ་ནག་གཞུང་གིས་མུ་མཐུད་བོད་ནང་འགྲོ་བ་མིའི་ཐོབ་ཐང་བརྩི་མེད་རྡོག་རོལ་གཏོང་བཞིན་པའི་གནས་སྟངས་རྣམས་སྦས་གསང་བྱེད་ཆེད་ཡིན་པ་གསུངས་པ་དང་སྦྲགས། ད་རེས་འདིར་ཕེབས་པའི་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་གཙོས་པའི་སྐུ་ཚབ་དོན་གཅོད་རྣམ་པ་བོད་ཆོལ་གསུམ་མི་མང་གི་སྐུ་ཚབ་ངོ་མ་ཡིན་ཞེས་ངོ་སྤྲོད་གནང་འདུག དེ་བཞིན་ཉེ་ཆར་རྒྱ་ནག་གི་སྐུ་ཚབ་རྣམས་ནས་བོད་ནང་རང་དབང་ཆེན་པོ་ཡོད་སྐོར་བཤད་ཡོད་ཀྱང་ལོ་ལྟར་ཨ་རིའི་རང་དབང་ཁང་པས་འདོན་སྤེལ་གནང་བཞིན་པའི་བོད་ནང་གི་འགྲོ་བ་མའི་ཐོབ་ཐང་གི་སྙན་ཐོའི་ནང་བོད་ནང་གྱི་བོད་མི་ཚོར་གཞི་རྩའི་འགྲོ་བ་མིའི་ཐོབ་ཐང་མེད་པ་མ་ཟད། ལྷག་དོན་ཕྱི་ལོ་ ༢༠༡༦༌༌༡༧ ལོའི་སྙན་ཐོའི་ནང་བོད་འདི་འཛམ་གླིང་ཐོག་རང་དབང་མེད་པའི་རྒྱལ་ཁབ་ཆེས་སྡུག་ཤོས་ཀྱི་གྲས་སུ་ཐེར་བཏོན་གནང་ཡོད་པ་སོགས་ལུང་འདྲེན་དང་སྦྲགས། བོད་ནང་ཡོད་པའི་བོད་མི་ཚོར་གཞི་རྩའི་འགྲོ་བ་མིའི་ཐོབ་ཐང་མེད་པའི་དབང་གིས་ད་བར་རྒྱ་གཞུང་གི་སྲིད་བྱུས་ལ་མ་བཟོད་པར་བོད་མི་ ༡༥༢ ལྷག་གིས་རང་ལུས་མེར་བསྲེགས་གནང་ཡོད་པ་དང་། ཁོང་རྣམ་པའི་ནང་མིའི་གནས་སྟངས་གཙོས་བོད་ནང་གི་དངོས་ཡོད་གནས་སྟངས་ཕྱིར་གྱར་མི་ཡོང་བའི་ཆེད་མུ་མཐུད་རྒྱལ་སྤྱིའི་གསར་འགོད་པ་དང་གཞུང་འབྲེལ་གྱི་སྐུ་ཚབ་མི་སྣ། ཡུལ་སྐོར་སྤྲོ་འཆམ་པ་སོགས་བོད་དུ་རང་དབང་ཐོག་བསྐྱོད་རྒྱུར་དམ་དྲག་ཤུགས་ཆེ་བྱེད་བཞིན་ཡོད་པ་མངོན་གསལ་གནང་འདུག སྐབས་དེའི་སྲིད་སྐྱོང་མཆོག་གི་གསུང་བཤད་གྲུབ་མ་ཐག་ཁེ་ན་ཌའི་གྲོས་ཚོགས་འཐུས་མི་སྐུ་ཞབས་ Garnett Genius ལགས་ནས་རྒྱ་ནག་གཞུང་གིས་བར་སྐབས་ཤིག་ནས་ཁོར་ཡུག་སྲུང་སྐྱོབ་ཐོག་ཤུགས་སྣོན་བྱ་རྒྱུ་ཡིན་སྐོར་བརྗོད་པ་དེ་བདེན་པ་ཇི་ཙམ་རེད་དམ་ཞེས་བཀའ་འདྲི་གནང་བར་སྲིད་སྐྱོང་མཆོག་གིས་བར་སྐབས་ནས་ཞི་ཅིང་ཕིང་གིས་གཙོས་པའི་རྒྱ་ནག་གི་འགོ་ཁྲིད་ཁག་ཅིག་ནས་ཁོར་ཡུག་སྲུང་སྐྱོབ་སྐོར་བཤད་ཡོད་ཀྱང་། འདས་པའི་ལོ་དུས་ནས་རྒྱ་གཞུང་གིས་བོད་ནང་གཏེར་ཁ་སྔོག་འདོན་དང་ས་གནས་མི་མང་གི་སྲོལ་རྒྱུན་དང་མི་མཐུན་པའི་འཛུགས་སྐྲུན་ཀྱི་ལས་གཞི་རྒྱ་ཆེ་སྤེལ་ནས་བོད་མིའི་ཆོས་ཕྱོགས་ཀྱི་རང་དབང་ལའང་དོ་ཕོག་ཆེན་པོ་གཏོང་བཞིན་པ་གསུངས་འདུག གྲོས་ཚོགས་འཐུས་མི་སྐུ་ཞབས་ Arif Virani  ལགས་དང་སྐུ་ཞབས་ Raj Saini ལགས་རྣམ་གཉིས་ཀྱིས་གཙོས་པའི་གྲོས་ཚོགས་འཐུས་མི་ཁག་ཅིག་ནས་བོད་མིའི་སྐད་ཡིག་ལས་འགུལ་བ་བཀྲ་ཤིས་དབང་ཕྱུག་ལགས་དང་། ༸ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་མཆོག དེ་བཞིན་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་ཡང་སྲིད་ཀྱི་གནད་དོན་དང་འབྲེལ་བའི་བཀའ་འདྲི་ཁག་ཅིག་ཞུས་པར་སྲིད་སྐྱོང་མཆོག་ནས་བཀྲ་ཤིས་དབང་ཕྱུག་ལགས་ཀྱིས་སྐད་ཡིག་ཐོག་ལས་འགུལ་སྤེལ་བ་དེ་དག་རྒྱ་ནག་གཞུང་གི་རྩ་ཁྲིམས་དང་ཡོངས་སུ་མཐུན་པ་ལས་ཁྲིམས་འགལ་གང་ཡང་མ་རེད། འོན་ཀྱང་རྒྱ་གཞུང་གིས་རང་ཉིད་ཀྱི་རྩ་ཁྲིམས་ལ་བརྩི་སྲུང་མ་བྱས་པར་བཀྲ་ཤིས་དབང་ཕྱུག་ལགས་ལ་ཁྲིམས་ཐག་བཅད་པ་དེས་རྒྱ་གཞུང་གི་བོད་མིའི་ངོ་བོ་རྩ་མེད་གཏོང་བཞིན་པའི་རྣམ་པ་གསལ་པོ་ཞིག་རེད་ཅེས་གསུངས་ཡོད་པ་རེད། རྒྱ་གཞུང་ནས་༸ཀུན་གཟིགས་པཎ་ཆེན་རིན་པོ་ཆེའི་གནད་དོན་ཐོག་མུ་མཐུད་ཁ་གསལ་གང་ཡང་མེད་པར་བཞག་པ་དེ་ནི་བོད་མིའི་ཆོས་དད་རང་དབང་ལ་དམ་དྲག་བྱེད་བཞིན་པའི་རྣམ་པ་མངོན་གསལ་ཞིག་དང་། ལྷག་དོན་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་ཡང་སྲིད་ཀྱི་གནད་དོན་དང་འབྲེལ་བའི་ཐག་གཅོད་ཀྱི་འགན་དབང་དེ་༸གོང་ས་མཆོག་༸སྐུ་སྒེར་ལ་ཡོད་པ་མ་གཏོགས་རྒྱ་གཞུང་ལ་ཐེ་བྱུས་བྱ་རྒྱུའི་ཐོབ་ཐང་མེད་སྐོར་གསུངས་པ་དང་ཆབས་ཅིག་ཏུ་ཉེ་ཆར་ཨ་རིའི་གྲོས་ཚོགས་ནས་༸གོང་ས་མཆོག་གི་༸སྐུའི་ཡང་སྲིད་གནད་དོན་ཐོག་རྒྱ་ནག་གཞུང་ནས་ཐེ་བྱུས་བྱ་རྒྱུའི་ཐོབ་ཐང་དང་རང་དབང་མེད་ཅེས་གྲོས་ཆོད་བཞག་པ་ལྟར་ཁེ་ན་ཌའི་གྲོས་ཚོགས་ནས་ཀྱང་དེ་ལྟར་གནང་ཐུབ་རྒྱུར་འབད་བརྩོན་གནང་རོགས་ཞེས་འབོད་སྐུལ་ཞུས་འདུག གཞི་རྩའི་ཉན་ཞིབ་ཀྱི་ལས་རིམ་ཐོག་སྲིད་སྐྱོང་བློ་བཟང་སེང་གེ་མཆོག་ནས་རྒྱ་གཞུང་གིས་བོད་ནང་འགྲོ་བ་མིའི་ཐོབ་ཐང་བརྩི་མེད་རྡོག་རོལ་གཏོང་བཞིན་པའི་གནས་སྟངས་ཙམ་མ་ཟད་བཙན་བྱོལ་བོད་མིའི་མང་གཙོའི་འཕེལ་རིམ་དང་། གཞིས་ཆགས་དང་མི་མང་གི་ཤེས་ཡོན་གནས་སྟངས། ལྷག་པར་དུ་བོད་མིའི་སྒྲིག་འཛུགས་ནས་གཉིས་སྨན་དབུ་མའི་ལམ་གྱི་སྲིད་བྱུས་ཀྱི་ཐོག་ནས་བོད་རྒྱ་གཉིས་ཀར་ཕན་པའི་མིང་དོན་མཚུངས་པའི་རང་སྲིད་རང་སྐྱོང་གི་གནས་བབ་རྩོད་བཞིན་ཡོད་པ་སོགས་ནན་བརྗོད་གནང་འདུག

ཁ་སང་ཨ་རིའི་ཕྱི་སྲིད་ལས་ཁུངས་ཀྱི་དྲྭ་གནས་ཐོག་གནས་ཚུལ་སྤེལ་བར་གཞིགས་ཚེ་ཨ་རིའི་གྲོས་ཚོགས་གོང་མའི་ཕྱི་འབྲེལ་ལས་དོན་ཚོགས་ཆུང་ནས་ཕྱི་སྲིད་དྲུང་ཆེ་སྐུ་ཞབས་ Mike Pompeo ལགས་སུ་བོད་དོན་དང་འབྲེལ་བའི་དྲི་བ་ཁག་ཅིག་ཡིག་ཐོག་ནས་ཕུལ་ཡོད་པ་ལྟར་ཁོང་གིས་དེ་དག་ལ་ལན་འདེབས་གནང་བའི་ཁྲོད་ཨ་རི་གཞུང་ནས་ཡོངས་གྲགས་སུ་རྒྱ་གཞུང་ལ་༸གོང་ས་མཆོག་དང་ཡང་ན་༸གང་ཉིད་མཆོག་གི་སྐུ་ཚབ་དང་ལྷན་ཆ་རྐྱེན་གང་ཡང་མེད་པར་བོད་རྒྱ་གཉིས་ཀྱི་དཀའ་རྙོག་སེལ་བར་གྲོས་མོལ་དོན་ལྡན་གནང་དགོས་པའི་ནན་སྐུལ་ཞུ་རྒྱུ་མ་ཟད། རྒྱ་གཞུང་གི་ལས་བྱེད་དང་ཐུག་འཕྲད་ཀྱི་གོ་སྐབས་ནམ་བྱུང་ལ་རྒྱ་གཞུང་ནས་བོད་རང་སྐྱོང་ལྗོངས་ནང་ཨ་རིའི་གསར་འགོད་པ་དང།  གྲོས་ཚོགས་འཐུས་མི། ཤེས་ཡོན་ཅན་ལ་སོགས་པ་ཁུལ་དེའི་ནང་བསྐྱོད་རྒྱུར་དམ་དྲག་བྱེད་བཞིན་པའི་སྐོར་གླེང་སློང་གནང་རྒྱུ་ཡིན་པ་གསུངས་འདུག སྐུ་ཞབས་ Mike ལགས་ནས་ཕྱི་ལོ་ ༢༠༠༢ ལོར་གཏན་འབེེབས་གནང་བའི་ Tibetan Policy Act འམ་ཨ་རི་གཞུང་གིས་བོད་ཐོག་འཛིན་པའི་སྲིད་བྱུས་ཀྱི་འབྲུ་དོན་ཆ་ཚང་ལག་བསྟར་གནང་རྒྱུ་དང།  ལྷག་དོན་རྒྱ་གཞུང་ལ་བོད་མིའི་ཆོས་དད་རང་དབང་དང་།  སྐད་ཡིག  རིག་གཞུང་ཉམས་ལེན་སོགས་འགྲོ་བ་མིའི་ཐོབ་ཐང་ཐོག་དམ་དྲག་མཚམས་འཇོག་དང་བརྩི་སྲུང་དགོས་པ། དེ་བཞིན་བོད་ཀྱི་ཆབ་སྲིད་བཙོན་པ་རྣམས་གློད་བཀྲོལ་དགོས་པའི་གནོན་ཤུགས་སྤྲད་རྒྱུ་ཡིན་པར་ཁས་ལེན་གནང་འདུག  དེ་མཚུངས་ཨ་རིའི་གྲོས་ཚོགས་གོང་མའི་ཕྱི་འབྲེལ་ལས་དོན་ཚོགས་ཆུང་གི་འཐུས་མིས་༸སྐུའི་ཡང་སྲིད་ཀྱི་གནད་དོན་དང་འབྲེལ་བའི་དྲི་བ་ཞིག་གི་ལན་འདེབས་གནང་སྐབས་ཕྱི་སྲིད་དྲུང་ཆེ་ནས་རྒྱ་གཞུང་གིས་འདས་པའི་དུས་ཡུན་ནང་བོད་ཀྱི་བླ་སྤྲུལ་ཡང་སྲིད་ངོས་འཛིན་གནང་ཕྱོགས་ལ་ཐེ་བྱུས་བྱེད་རྒྱུ་མཚམས་འཇོག་དགོས་པ་དང།  བོད་བརྒྱུད་ནང་བསྟན་ཆོས་བརྒྱུད་ཀྱི་བྱེད་སྒོ་ཁག་ལ་གུས་བརྩི་ཞུ་དགོས་པ། ༸གོང་ས་མཆོག་གིས་གཙོས་བོད་ཀྱི་བླ་སྤྲུལ་ངོས་འཛིན་དང།  ཁོང་རྣམས་ཀྱི་བསླབ་པ་སློབ་གཉེར་སོགས་ཀྱི་ཐོག་ཐེ་བྱུས་གནང་རྒྱུ་མེད་པར་གནོན་ཤུགས་སྤྲད་ངེས་ཡིན་སྐོར་གསུངས་འདུག གྲོས་ཚོགས་གོང་མའི་ཕྱི་འབྲེལ་ལས་དོན་ཚོགས་ཆུང་གི་འཐུས་མིས་མ་འོངས་པར་༸གོང་ས་མཆོག་དང་མཇལ་ཕྲད་གནང་རྒྱུ་སྐོར་ཕྱི་སྲིད་དྲུང་ཆེ་མཆོག་ལ་བཀའ་འདྲི་ཞུས་པར་ཁོང་གིས་དུས་ཚོད་རན་འཚམ་ཞིག་ལ་བོད་ཀྱི་དབུ་ཁྲིད་ཁག་དང་དེ་བཞིན་༸གོང་ས་མཆོག་ཆོས་ཕྱོགས་ཀྱི་དབུ་ཁྲིད་ཡིན་པའི་ཆ་ནས་མཇལ་རྒྱུ་ཡིན་པ་གསུངས་འདུག རྩ་བའི་ཨ་རིའི་སྲིད་འཛིན་ Donald Trump མཆོག་དང་ཨ་རིའི་ཕྱི་སྲིད་དྲུང་ཆེ་ཟུར་པ་  Rex Tillerson རྣམ་གཉིས་ནས་རྒྱ་གཞུང་གི་འགོ་ཁྲིད་དང་མཇལ་འཕྲད་ཐེངས་མང་བྱས་ཡོད་ཀྱང་། བོད་དོན་སྐོར་གླེང་སློང་གཅིག་ཀྱང་གནང་མེད་པ་རེད། འོན་ཀྱང་ཁ་སང་ཨ་རིའི་ཕྱི་སྲིད་ལས་ཁུངས་ནས་བོད་རྒྱ་འབྲེལ་མོལ་གྱི་གནས་བབ་དང་འབྲེལ་བའི་སྙན་ཐོ་ཞིག་འདོན་སྤེལ་གནང་བའི་ནང་བོད་ནང་མིང་དོན་མཚུངས་པའི་རང་སྲིད་རང་སྐྱོང་གི་གནས་བབ་མེད་པ་དང་། ཨ་རི་གཞུང་ནས་དེའི་ཐོག་ཐུགས་འཚབ་ཆེན་པོ་ཡོད་སྐོར་འགྲེལ་བརྗོད་དང་འབྲེལ་ཏེ་རྒྱ་གཞུང་ནས་བོད་མི་ཚོར་མིང་དོན་མཚུངས་པའི་རང་སྲིད་རང་སྐྱོང་གི་གནས་བབ་སྤྲད་དེ་  རང་ཉིད་ཀྱི་ཆོས་དང་སྐད་ཡིག་བཅས་པ་ཉམས་ལེན་ཆོག་པའི་ཁོར་ཡུག་བསྐྲུན་དགོས་གལ་ཡིན་པ་གསལ་བཏོན་གནང་ཡོད་པ་རེད།

ཨ་རིའི་གཞུང་ནས་བོད་མིར་མིང་དོན་མཚུངས་པའི་རང་སྲིད་རང་སྐྱོང་གི་གནས་འབབ་མེད་པའི་ཐད་ལ་ཐུགས་འཚབ་དང་སྦྲགས་ཏེ་བོད་ནང་དོན་དངོས་ཐོག་རྒྱུན་གནས་ཐུབ་པའི་ཞི་བདེ་སྤེལ་དགོས་ཚེ་བོད་མིར་རང་དབང་ཐོག་རང་ཉིད་ཀྱི་ཆོས་དང་རིག་གཞུང་། སྐད་ཡིག་བཅས་ཉམས་ལེན་ཆོག་པའི་ཁོར་ཡུག་ཞིག་བསྐྲུན་དགོས་པར་ནན་བརྗོད་གནང་འདུག ཨ་རིའི་སྲིད་འཛིན་སྐུ་ཞབས་ཌོ་ནལ་ཊམ་མཆོག་སྲིད་འཛིན་གནང་བཞིན་པའི་ལས་ཡུན་ཁྲོད་ཁ་སང་ཐེངས་དང་པོ་ཨ་རིའི་གྲོས་ཚོགས་སུ་ཨ་རི་གཞུང་ནས་བོད་རྒྱའི་དཀའ་རྙོག་སེལ་ཐབས་སླད༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་དང་རྒྱ་ནག་གཞུང་དབར་གྲོས་མོལ་ཡོང་ཐབས་སུ་འབད་བརྩོན་གང་གནང་ཡོད་མེད་ཀྱི་སྐོར་ཞིབ་ཕྲའི་སྙན་ཐོ་ཞིག་འགོད་འབུལ་ཞུས་འདུག ཨ་རིའི་ཕྱི་སྲིད་ལས་ཁུངས་ཀྱིས་འདོན་སྤེལ་གནང་བའི་སྙན་ཐོ་ནང་བོད་ནང་གི་བོད་མི་ཚོར་མིང་དོན་མཚུངས་པའི་རང་སྐྱོང་གི་གནས་བབ་མེད་པ་དང། ལྷག་དོན་རྒྱ་གཞུང་གིས་བོད་མིའི་འགྲོ་བ་མིའི་ཐོབ་ཐང་ལ་བརྩི་མེད་རྡོག་རོལ་ཤུགས་ཆེ་གཏོང་བཞིན་པ་མ་ཟད། བོད་ཀྱི་ཆོས་དང་རིག་གཞུང་། སྐད་ཡིག་སོགས་རྩ་མེད་བཟོ་ཐབས་བྱེད་བཞིན་པར་ཨ་རིའི་གཞུང་ནས་ཐུགས་འཚབ་ཆེན་པོ་ཡོད་སྐོར་འགྲེལ་བརྗོད་གནང་བ་དང་ཆབས་ཅིག རྒྱ་གཞུང་ནས་གནད་དོན་དེ་དག་ཐོག་དམིགས་བསལ་དགོངས་པ་བཞེས་ཏེ་བོད་དུ་རྒྱུན་གནས་ཐུབ་པའི་ཞི་བདེ་སྤེལ་ཐབས་སླད་ཐབས་ལམ་ཡག་ཤོས་ནི་བོད་མི་ཚོར་མིང་དོན་མཚུངས་པའི་རང་སྐྱོང་གི་གནས་བབ་ཞིག་སྤྲོད་དེ་རང་དབང་ལྡན་པའི་ཐོག་ནས་རང་ཉིད་ཀྱི་ཆོས་རིག་དང་སྐད་ཡིག་བཅས་པ་ཉམས་ལེན་ཆོག་པའི་ཁོར་ཡུག་ཞིག་བསྐྲུན་དགོས་གལ་ཡིན་པ་གསལ་བཏོན་གནང་འདུག རྒྱ་ནག་ཁྲན་ཏུ་ནང་ཡོད་པའི་ཨ་རིའི་གཞུང་ཚབ་པའི་ངོས་ནས་བོད་རང་སྐྱོང་ལྗོངས་ཟེར་བའི་ནང་གི་རྒྱ་གཞུང་གི་ལས་བྱེད་དང་མཉམ་དུ་གདོང་ཐུག་གི་གོ་སྐབས་ནམ་བྱུང་ལ་བོད་ནང་གི་ཛ་དྲག་གནས་སྟངས་ཐོག་སེམས་འཚབ་ཀྱི་རྣམ་པ་ཆེད་བཏོན་གྱིས་བོད་མིར་གཞི་རྩའི་ཐོབ་ཐང་རྣམས་ལོངས་སུ་སྤྱོད་བཅུག་དགོས་པར་རེ་འདུན་བཏོན་མུས་ཡིན་པ་གསུངས་པ་མ་ཟད། ཨ་རིའི་གཞུང་ནས་ད་བར་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་གིས་དབུས་པའི་ཆབ་སྲིད་ཀྱི་དབུ་ཁྲིད་ཁག་ཅིག་དང་འབྲེལ་བ་གནང་ཡོད་པ་དང་། ལྷག་དོན་ཨ་རིའི་ཕྱི་སྲིད་ལས་ཁུངས་ནས་བོད་མིའི་ཆོས་ཕྱོགས་ཀྱི་དབུ་ཁྲིད་རྣམ་པས་གཙོས་བྱང་ཨ་རིའི་སྐུ་ཚབ་དོན་གཅོད་དང་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་སོགས་དང་མཇལ་འཕྲད་གནང་མུས་ཡིན་པ་དང་། ཨ་རིའི་ཕྱི་སྲིད་ལས་ཁུངས་ཀྱི་དམིགས་བསལ་བོད་དོན་འབྲེལ་མཐུད་ལས་ཁུངས་ནས་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་དང་རྒྱ་ནག་གཞུང་དབར་བོད་རྒྱའི་དཀའ་རྙོག་སེལ་ཐབས་སུ་གྲོས་མོལ་དོན་སྙིང་ལྡན་པ་ཞིག་ཡོང་ཕྱིར་སྔ་རྗེས་སུ་འབད་བརྩོན་ཞུ་མུས་ཡིན་ལུགས་སོགས་བཀོད་འདུག འོན་ཀྱང་ཨ་རིར་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གིས་ད་རེས་སྙན་ཐོའི་ནང་སྲིད་འཛིན་ Trump མཆོག་གིས་ད་བར་རྒྱ་ནག་གི་སྲིད་འཛིན་ཞི་ཅིང་ཕིང་དང་ལྷན་མཇལ་འཕྲད་ཐེངས་གཉིས་དང་དེ་བཞིན་ཨ་རིའི་ཕྱི་སྲིད་བློན་ཆེན་ནས་རྒྱ་ནག་གི་དཔོན་རིགས་གཞན་ཁག་ཅིག་དང་མཉམ་དུ་གདོང་ཐུག་སོགས་ཀྱི་གོ་སྐབས་ནམ་བྱུང་ལ་བོད་དོན་གླེང་སློང་གནང་ཡོད་མེད་སྐོར་གང་ཡང་གསལ་མེད་པ་མ་ཟད། བོད་དོན་དམིགས་བསལ་སྐུ་ཚབ་ལས་ཁུངས་ཀྱི་ངོས་ནས་བོད་རྒྱ་ཞི་འགྲིག་ཡོང་ཐབས་དང་བོད་ཕྱི་ནང་གཉིས་ལ་རོགས་སྡེ་གནང་ཕྱོགས་སྐོར་བཀོད་པ་མ་གཏོགས་བོད་དོན་དམིགས་བསལ་འབྲེལ་མཐུད་པ་ཞིག་བསྐོ་གཞག་གནང་རྒྱུའི་ཐད་ལ་གང་ཡང་བཀོད་མེད་པ་དེ་འབུར་བཏོན་གནང་འདུག རྩ་བའི་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་ནས་གོ་སྐབས་ནམ་བྱུང་ལ་ཨ་རིའི་གྲོས་ཚོགས་འཐུས་མི་རྣམ་པར་བོད་དོན་དམིགས་བསལ་འབྲེལ་མཐུད་པ་གང་མགྱོགས་བསྐོ་གཞག་ཡོང་བར་འབོད་སྐུལ་ཞུ་མུས་ཡིན་པ་མ་ཟད། སྔ་ལོ་ཕྱི་ཟླ་ ༦ ནང་ཨ་རིའི་གྲོས་ཚོགས་འཐུས་མི་ ༣༧ ནས་སྲིད་འཛིན་ཊམ་མཆོག་ལ་བོད་མིའི་ཛ་དྲག་གནས་སྟངས་ལ་གཞིགས་པའི་བོད་དོན་དམིགས་བསལ་འབྲེལ་མཐུད་པ་གང་མགྱོགས་བསྐོ་གཞག་གནང་དགོས་པར་འབོད་སྐུལ་གྱི་ཕྱག་ཡིག་ཕུལ་ཡོད་པ་རེད།

རྒྱལ་ཚོགས་ཀྱི་སྐུ་ཚབ་ཁག་ཅིག་ནས་བོད་མིའི་སྐད་ཡིག་ལས་འགུལ་བ་བཀྲ་ཤིས་དབང་ཕྱུག་ལགས་སུ་རྒྱ་གཞུང་ནས་ལོ་ལྔའི་བཙོན་འཇུག་ཁྲིམས་ཐག་བཅད་པར་སྐྱོན་བརྗོད་ཤུགས་ཆེ་དང་འབྲེལ་ཏེ་ཁོང་འཕྲལ་མར་གློད་བཀྲོལ་དགོས་པའི་བསྐྱར་ནན་གནང་འདུག རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་ནས་ཟླ་ ༦ ཚེས་ ༡ ཉིན་དེ་གའི་ཚན་པ་འདྲ་མིན་ཁག་ཅིག་གི་དམིགས་བསལ་སྐུ་ཚབ་དྲུག་གི་མཚན་རྟགས་ཡོད་པའི་སྤྱི་བསྒྲགས་ཤིག་སྤེལ་བའི་ནང་རྒྱལ་ཚོགས་ཀྱི་ངོས་ནས་རྒྱ་གཞུང་ལ་འབོད་སྐུལ་ཐེངས་མང་གནང་བར་ལྟོས་མེད་ཀྱིས་བཀྲ་ཤིས་དབང་ཕྱུག་ལགས་སུ་ལོ་ལྔའི་བཙོན་འཇུག་ཁྲིམས་བཅད་པ་དེར་བློ་ཕམ་ཆེན་པོ་བྱུང་སྐོར་འགྲེལ་བརྗོད་དང་འབྲེལ།  རྒྱ་གཞུང་ནས་རྒྱལ་ཁབ་ཀྱི་བདེ་འཇགས་དང་སྤྱི་ཚོགས་བརྟན་ལྷིང་། དེ་བཞིན་འཇིགས་སྐུལ་ལ་གདོང་ལེན་ཞེས་པའི་མིང་བྱང་འོག་འགྲོ་བ་མིའི་ཐོབ་ཐང་གི་ལས་འགུལ་བ་རྣམས་ལ་དྲག་གནོན་བྱ་རྒྱུ་མཚམས་འཇོག་དགོས་པའི་དགོས་འདུན་ཆེད་བཏོན་གནང་འདུག རྒྱལ་ཚོགས་ཀྱི་སྐུ་ཚབ་དེ་དག་ནས་རྒྱ་གཞུང་ལ་བོད་མི་གྲངས་ཉུང་མི་རིགས་ཀྱི་སྐད་ཡིག་སྲུང་སྐྱོབ་དང་།  སྐད་ཡིག་གོང་འཕེལ་སླད་ལས་གཞི་གང་སྤེལ་མིན་སྐོར་གནས་ཚུལ་མཁོ་སྤྲོད་དགོས་སྐོར་གསུངས་ཡོད་ཀྱང་ད་བར་བརྡ་ལན་བློ་ཡིད་འཚིམ་པ་ཞིག་རག་མེད་པ་གསུངས་པ་དང་ཆབས་ཅིག རྒྱ་གཞུང་གི་རྒྱལ་སྤྱིའི་འགྲོ་བ་མིའི་ཐོབ་ཐང་གི་སྒྲིག་གཞི་ལ་བརྩི་སྲུང་ཞུས་ནས་བཀྲ་ཤིས་དབང་ཕྱུག་ལགས་འཕྲལ་མར་གློད་བཀྲོལ་དགོས་པ་དང་གུན་གསབ་ཡང་སྤྲོད་དགོས་པའི་འབོད་སྐུལ་ནན་པོ་གནང་འདུག རྩ་བའི་བོད་ཀྱི་སྐད་ཡིག་ལས་འགུལ་བ་་བཀྲ་ཤིས་དབང་ཕྱུག་ལགས་ཕྱི་ལོ་ ༢༠༡༦ ཟླ་བ་ ༡ པོའི་ནང་འཛིན་བཟུང་བྱས་པ་དང།  འདི་ལོའི་ཕྱི་ཟླ་ ༡ པོའི་ནང་ཡུ་ཤུ་འབྲིང་རིམ་མི་མང་ཁྲིམས་ཁང་ནས་ཁོང་གི་གནད་དོན་ཐད་ལ་ཁྲིམས་བཤེར་དང་ཕྱི་ཟླ་ ༥ ཚེས་ ༢༢ ཉིན་རྒྱལ་ཁབ་ཁྲ་བྲལ་བའི་ཉེས་མིང་འོག་ལོ་ལྔའི་བཙོན་འཇུག་ཁྲིམས་ཐག་བཅད་ཡོད་པ་རེད། ཁོང་གི་གནད་དོན་ཐོག་བོད་མི་དང་བོད་དོན་རྒྱབ་སྐྱོར་བ། དེ་བཞིན་འགྲོ་བ་མིའི་ཐོབ་ཐང་གི་ཚོགས་པ་ཁག་འདྲ་མིན་ནས་སྐྱོན་བརྗོད་ཤུགས་ཆེ་བྱས་དང་བྱེད་མུས་་ཡིན་པ་མ་ཟད། རྒྱལ་ཚོགས་ཀྱི་ཚན་པ་འདྲ་མིན་ཁག་གི་སྐུ་ཚབ་ནས་ནང་ཁོང་གློད་བཀྲོལ་དགོས་པའི་སྤྱི་བསྒྲགས་ཐེངས་གཉིས་སྤེལ་ཡོད་པ་རེད། ཐེངས་འདིའི་སྤྱི་བསྒྲགས་ཐོག་རྒྱལ་ཚོགས་ཀྱི་མི་རིགས་དབྱེ་འབྱེད་དང། འགྲོ་བ་མིའི་ཐོབ་ཐང་རྩོད་ལེན་པའི་གནས་བབ་ལ་གཟིགས་རྟོག་གནང་མཁན། རིག་གནས་ཐོབ་ཐང་དང་གྲངས་ཉུང་མི་རིགས་ཀྱི་ཚན་པ། དེ་བཞིན་གང་བྱུང་བཀག་ཉར་ལས་དོན་ལ་ཉམས་ཞིབ་དང་སྨྲ་བརྗོད་རང་དབང་སྲུང་སྐྱོབ་བཅས་ཀྱི་ཚན་པ་འདྲ་མིན་དྲུག་གི་དམིགས་བསལ་སྐུ་ཚབ་ནས་མཚན་རྟགས་བཀོད་འདུག  

ཁ་སང་ཟླ་ ༦ ཚེས་ ༤ ཉིན་ཧོང་ཀོང་ Victoria སྐྱེད་ཚལ་དུ་དེ་སྔ་ཕྱི་ལོ་ ༡༩༨༩ ལོར་རྒྱ་ནག་གི་རྒྱལ་ས་པེ་ཅིང་གི་གནམ་སྡེ་སྒོར་མོ་ཆེ་ཐང་ཆེན་དུ་རྒྱ་ནག་གི་མཐོ་རིམ་སློབ་མ་སྟོང་ཕྲག་མང་པོས་རྒྱ་ནག་གཞུང་ལ་ངོ་རྒོལ་གནང་ནས་རྒྱ་ནག་རང་དབང་དང་མང་གཙོའི་ལམ་དུ་བསྐྱོད་དགོས་པའི་དགོས་འདུན་བཏོན་པར་རྒྱ་གཞུང་གིས་གོ་མཚོན་དམག་མི་ཆེད་གཏོང་གིས་སློབ་ཕྲུག་སྟོང་ཕྲག་མང་པོ་དམར་བསད་བཏང་བའི་གནད་དོན་དེ་བྱུང་ནས་ལོ་ངོ་ ༢༩ ཧྲིལ་པོ་འཁོར་བའི་དུས་ཚིགས་དང་བསྟུན། ཧོང་ཀོང་མང་ཚོགས་འབུམ་གཅིག་ལྷག་མཉམ་ཞུགས་ཐོག་གདུང་སེམས་མཉམ་བསྐྱེད་ཀྱི་ལས་འགུལ་སྤེལ་བའི་བརྒྱུད་དུས་ཚིགས་དེ་དྲན་གསོ་ཞུས་འདུག ལས་འགུལ་དེའི་བརྒྱུད་འདས་པོ་རྣམས་ལ་གདུང་སེམས་མཉམ་བསྐྱེད་མཚོན་ཆེད་དུ་མར་མེ་སྟོང་ཕྲག་མང་པོ་ཕུལ་ནས་ལོ་ངོ་ ༢༩ གོང་དུ་གནམ་སྡེ་སྒོར་མོ་ཆེ་ཐང་ཆེན་དུ་མི་གསོད་ཁྲག་སྦྱོར་བྱས་སྐོར་གཏམ་བཤད་གནང་བ་དང་ལྷན་མྱ་ངན་གུས་བཏུད་ཞུས་འདུག འདས་པོ་དེ་དག་གི་བློ་སྟོབས་ལ་ཡི་རང་བསྔགས་བརྗོད་ཞུས་འདུག་པ་མ་ཟད་སྐབས་དེར་ TANK MAN ཞེས་གྱང་སྦྱར་པར་རིས་ཆེན་པོ་ཞིག་འགྲེམས་སྟོན་ཐོག་དྲུག་བཞིའི་དོན་རྐྱེན་གྱི་གཟུགས་མཐོང་བརྙན་པར་ཁག་ཅིག་གཟིགས་འབུལ་ཞུས་ནས་དྲན་གསོ་གནང་ཡོད་པ་རེད། ཁ་སང་ཨ་རིའི་ཕྱི་སྲིད་དྲུང་ཆེ་ Mike Pompeo ལགས་ཀྱིས་ཕྱི་ལོ་ ༡༩༨༩ ལོར་རྒྱ་ནག་གནམ་སྡེ་སྒོར་མོ་ཆེ་ཐང་ཆེན་དུ་རྒྱ་ནག་གི་མཐོ་རིམ་སློབ་མ་སྟོང་ཕྲག་མང་པོ་དམར་བསད་བཏང་བའི་གནད་དོན་དེར་གདུང་སེམས་མཉམ་བསྐྱེད་ཞུ་དགོས་པ་དང་། རྒྱ་ནག་གི་ངོས་ནས་དྲུག་བཞིའི་དོན་རྐྱེན་ཁྲོད་སློབ་མ་ཇི་ཙམ་རྐྱེན་འདས་སུ་ཕྱིན་ཡོད་པ།  གར་སོང་ཆ་མེད་དུ་འགྱུར་བ། འཛིན་བཟུང་དོ་དམ་བྱས་པའི་གནས་ཚུལ་ཁ་གསལ་དགོས་པ་སོགས་ཀྱི་འབོད་སྐུལ་འཁོད་པའི་བསྒྲགས་གཏམ་ཞིག་ཀྱང་སྤེལ་འདུག འོན་ཀྱང་རྒྱ་ནག་གི་ཕྱི་སྲིད་ལྷན་ཁང་གི་མགྲིན་ཚབ་པས་ཨ་རིའི་ཕྱི་སྲིད་དྲུང་ཆེར་སྐྱོན་བརྗོད་དང་འབྲེལ་རྒྱ་ནག་ནང་སྲིད་ཀྱི་གནད་དོན་ལ་ཐེ་གཏོགས་བྱ་རྒྱུ་མཚམས་འཇོག་དགོས་པ་དང་།  རྒྱལ་ཁབ་ཕྱོགས་གཉིས་ཀྱི་འབྲེལ་ལམ་ལ་དོ་ཕོག་མི་ཡོང་བའི་ཆེད་དུ་ཤུགས་སྣོན་གནང་དགོས་པ་བཤད་འདུག རྩ་བའི་འཛམ་གླིང་ས་ཕྱོགས་གང་སར་གནས་པའི་རྒྱ་རིགས་མང་གཙོ་དོན་གཉེར་བ་རྣམས་ནས་ཕྱི་ཟླ་ ༦ ཚེས ༤ ཉིན་དྲུག་བཞིའི་དོན་རྐྱེན་གྱི་ཉིན་མོ་ཞེས་ལོ་ལྟར་དྲན་གསོ་གནང་བཞིན་ཡོད་པ་དང་། ཨ་རི་དང་རྒྱ་གར་ནང་ཡོད་པའི་རྒྱལ་སྤྱིའི་བོད་རང་བཙན་སློབ་ཕྲུག་ཚོགས་པ་དང་བོད་མིའི་ཚོགས་སྡེའི་ཁག་ནས་ཀྱང་དེ་འབྲེལ་གདུང་སེམས་མཉམ་བསྐྱེད་ཀྱི་ལས་འགུལ་མང་དག་ཞིག་སྤེལ་ཡོད་པ་རེད།

ཁ་སང་ཟླ་ ༥ ཚེས་ ༢༩ ཉིན་ཨ་རི་གྲོང་ཁྱེར་ལོས་ཨེན་ཇལ་དུ་ཡོད་པའི་རྒྱ་རིགས་མང་གཙོ་དོན་གཉེར་བ་རྣམས་ཀྱིས་ཆེད་འཛུགས་གནང་བའི་ Visual Artists Guild  ཞེས་པའི་མཐུན་ཚོཊ་ཀྱིས་བོད་མི་ཆབ་སྲིད་བཙོན་ཟུར་དོན་གྲུབ་དབང་ཆེན་ལགས་ལ་རང་དབང་ཐོབ་པར་ཆེ་བསྟོད་གཟེངས་རྟགས་ཤིག་ཕུལ་འདུག མཐུན་ཚོཊ་དེས་ལོ་ལྟར་དྲུག་བཞི་དོན་རྐྱེན་སྲུང་བརྩི་དང་འབྲེལ་སྨྲ་བརྗོད་རང་དབང་གི་ཐོབ་ཐང་རྩོད་ལེན་པ་རྣམས་ལ་ཆེ་བསྟོད་གཟེངས་རྟགས་འབུལ་ལམ་ཞུ་སྲོལ་ཡོད་པ་ལྟར། འདི་ལོའི་ཐེངས་ ༢༩ པའི་དྲུག་བཞི་དོན་རྐྱེན་སྲུང་བརྩི་དང་བསྟུན་འཇིགས་བྲལ་གློག་བརྙན་བཟོ་སྐྲུན་པ་བོད་མི་ཆབ་སྲིད་བཙོན་ཟུར་དོན་གྲུབ་དབང་ཆེན་ལགས་དང་། རྒྱ་རིགས་མང་གཙོའི་ལས་འགུལ་བ་ཀྲང་ལི་ལགས་དང་། རྒྱ་རིགས་ཁྲིམས་རྩོད་པ་ཝང་ཆོན་ཀྲང་གི་བཟའ་ཟླ་ལི་ཝུའེ་ཀྲུ་བཅས་རྒྱ་ནག་གི་བཙོན་ཁང་དུ་དཀའ་སྡུག་དུ་མ་མྱངས་མཐར་རང་དབང་ཐོབ་པ་ཁོང་གསུམ་ལ་སྨྲ་བརྗོད་རང་དབང་གི་ཆེ་བསྟོད་གཟེངས་རྟགས་ཤིག་ཕུལ་ཡོད་པ་རེད། དེ་སྔ་ཕྱི་ལོ་ ༢༠༡༣ ལོར་དོན་གྲུབ་དབང་ཆེན་ལགས་རྒྱ་གཞུང་གིས་བཙོན་འཇུག་འོག་ཏུ་སྡུག་སྦྱོང་མྱོང་བཞིན་སྐབས་ཚོགས་པ་དེས་དོན་གྲུབ་དབང་ཆེན་ལགས་སུ་སྨྲ་བརྗོད་རང་དབང་གི་གཟེངས་རྟགས་ཤིག་ཁོང་གི་སྐུ་ཟླ་ལྷ་མོ་མཚོའི་ཕྱག་ཏུ་ཕུལ་གནང་བ་དེ་མཛད་སྒོའི་ཐོག་ལྷ་མོ་མཚོ་ལགས་ཀྱིས་དོན་གྲུབ་དབང་ཆེན་ལགས་སུ་དངོས་སུ་འབུལ་ལམ་ཞུས་ཡོད་པ་མ་ཟད། དོན་གྲུབ་དབང་ཆེན་ལགས་ནས་བོད་ནང་ཀྱི་དཀའ་སྡུག་དང་འབྲེལ་བའི་གནས་སྟངས་ངོ་སྤྲོད་དང་འཇིགས་བྲལ་གྱི་གློག་བརྙན་གཟིགས་འབུལ་ཞུས་ཡོད་པ་རེད། སྐབས་དེར་ཚོགས་པ་དེའི་གཙོ་འཛིན་རྒྱ་རིགས་སྐུ་ཞབས་ཨེན་ལའོ་ལགས་གཙོས་ཁེ་ལི་ཕོ་ནི་ཡ་བོད་ཀྱི་གྲོགས་པོ་ཚོགས་པའི་ཚོགས་གཙོ། དོན་གྲུབ་དབང་ཆེན་ལགས་ཀྱི་ནང་མིར་རོགས་རམ་གནང་མཁན། ས་གནས་བོད་རིགས་བཅས་ཁྱོན་མི་གྲང་བརྒྱ་ལྷག་འདུ་འཛོམས་གནང་འདུག གཞི་རྩའི་བོད་མི་གློག་བརྙན་བཟོ་བསྐྲུན་པ་དོན་གྲུབ་དབང་ཆེན་ལགས་ཀྱིས་ཕྱི་ལོ་ ༢༠༠༨ ལོར་བོད་ནང་གི་བོད་མི་ཚོར་དངོས་སུ་ཐུག་འཕྲད་ཀྱིས་འཇིགས་བྲལ་ཞེས་པའི་གློག་བརྙན་ཞིག་བཟོ་སྐྲུན་གནང་རྗེས་རྒྱ་ནག་གཞུང་གིས་ཁོང་ལ་རྒྱལ་ཁབ་ཁ་བྲལ་གྱི་བྱ་སྤྱོད་སྤེལ་བའི་ཉེས་མིང་འོག་འཛིན་བཟུང་བྱས་ཏེ། ཕྱི་ལོ་ ༢༠༠༨ ནས་ ༢༠༡༤ བར་མི་ལོ་དྲུག་གི་རིང་བཙོན་འཇུག་ཁྲིམས་ཐག་བཅད་ཡོད་པ་དང་། ཕྱི་ལོ་ ༢༠༡༤ ལོ་མཇུག་ཏུ་ཁོང་བཙོན་གྲོལ་ཐོབ་ཡོད་ཀྱང་རྒྱ་གཞུང་གི་ལྟ་སྲུང་འོག་ལོ་གསུམ་རིང་ཆབ་སྲིད་ཀྱི་ཐོབ་ཐང་གང་ཡང་མེད་པར་གནས་དགོས་བྱུང་ཡོད་པ་རེད། ཕྱི་ལོ་ ༢༠༡༧ ཟླ་ ༡༢ ཚེས་ ༢༥ ཉིན་བོད་ནས་བྲོས་བྱོལ་གྱིས་ཨ་རིའི་ California མངའ་སྡེའི་ San Fransicco གྲོང་ཁྱེར་དུ་བདེ་འབྱོར་བྱུང་ཡོད་པ་རེད།

རྒྱ་ནག་ཏུ་གཞུང་འབྲེལ་འཚམས་གཟིགས་གནང་བཞིན་པའི་འཇར་མ་ནི་རྒྱལ་ཁབ་ཀྱི་སྲིད་བློན་ལྕམ་ Angela Merkel མཆོག་ནས་ཡུལ་དེའི་ནང་གི་འགྲོ་བ་མིའི་ཐོབ་ཐང་གི་གནད་དོན་གལ་ཆེ་འཛིན་བཞིན་པ་མངོན་གསལ་གནང་ཆེད་ཟླ་ ༥ ཚེས་ ༢༤ ཉིན་དུས་ཚོད་དམིགས་བསལ་བཀོད་སྒྲིག་མ་གནང་པར་རྒྱ་ནག་གི་བཙོན་ཁང་ཏུ་ཡོད་པའི་འགྲོ་བ་མིའི་ཐོབ་ཐང་གི་ཁྲིམས་རྩོད་པ་སྐུ་ཞབས་ Wang Quanzhang ལགས་ཀྱི་ལྕམ་ Li Wenzu ལགས་དང་སྐུ་ཞབས་ Yu Wensheng ལགས་ཀྱི་ལྕམ་ Xu Yan ལགས་དང་ཐུག་འཕྲད་གནང་འདུག ཉི་ཧོང་གི་ The Asahi Shimbum གྱི་དྲྭ་གནས་ཐོག་གནས་ཚུལ་སྤེལ་བར་གཞིགས་ན། ལྕམ་ Merkel མཆོག་ནས་འགྲོ་བ་མིའི་ཐོབ་ཐང་གི་ཁྲིམས་རྩོད་པའི་བཟའ་ཟླ་རྣམ་གཉིས་དང་མཇལ་འཕྲད་གནང་སྐབས་ཁོང་རྣམ་གཉིས་ནས་ལྕམ་ Merkel མཆོག་ལ་རང་ཉིད་ཀྱི་བཟའ་ཟླ་དང་ནང་མི་རྣམས་ཀྱི་གནས་སྟངས་ཐོག་ཐུགས་སྣང་གནང་བར་ཐུགས་རྗེ་ཆེ་ཞུས་པ་དང་འབྲེལ་རྒྱབ་སྐྱོར་གནང་སྐྱོང་ཡོང་བར་འབོད་སྐུལ་ཞུས་འདུག རྩ་བའི་ལོ་ན་ ༤༢ སོན་པའི་སྐུ་ཞབས་ Wang Quanzhang ལགས་ལ་མཚོན་ན་ཕྱི་ལོ་ ༢༠༡༥ ཟླ་ ༧ པའི་ནང་རྒྱ་གཞུང་གིས་ཡུལ་དེའི་ཁྲིམས་རྩོད་པ་རྣམས་ལ་དྲག་གནོན་ཤུགས་ཆེ་བྱས་པའི་ཁྲོད་རྒྱལ་ཁབ་མགོ་རྟིང་སློག་པའི་ཉེས་མིང་འོག་འཛིན་བཟུང་བྱས་པ་དང་། དེ་བཞིན་ལོ་ན་ ༥༠ ལ་སོན་པའི་སྐུ་ཞབས་ Yu Wensheng ལགས་ནི་ཕྱི་ལོ་ ༢༠༡༨ ཟླ་ ༡ པོའི་ནང་རྒྱ་ནག་ནང་ཆབ་སྲིད་བཅོས་བསྒྱུར་དགོས་པའི་བསྒྲགས་གཏམ་ཞིག་འགྲེམས་སྤེལ་གནང་རྐྱེན་འཛིན་བཟུང་བྱས་པ་དང་ཟླ་ ༤ པའི་ནང་རྒྱལ་ཁབ་མགོ་རྟིང་སློག་རྒྱུའི་དོགས་ཟོན་འོག་འཛིན་བཟུང་བྱས་ཡོད་པ་རེད། ད་རེས་ལྕམ་ Merkel མཆོག་ནས་རྒྱ་རིགས་ཁྲིམས་རྩོད་པ་རྣམ་གཉིས་ཀྱི་བཟའ་ཟླ་དང་ལྷན་ཐུག་འཕྲད་གནང་རྗེས། རྒྱལ་སྤྱིའི་ཁྲོད་དེ་སྔོན་རྒྱ་ནག་གི་དོ་དམ་འོག་འདས་གྲོངས་སུ་གྱུར་བའི་རྒྱ་ནག་གི་འགྲོ་བ་མིའི་ཐོབ་ཐང་གི་ལས་འགུལ་བ་དང་ནོ་སྦེལ་ཞི་བདེ་གཟེངས་རྟགས་བཞེས་མྱོང་མཁན་སྐུ་ཞབས་ Liu Xiaobo ལགས་ཀྱི་བཟའ་ཟླ་ལྕམ་ Liu Xia ལགས་སུ་བྱ་སྤྱོད་ཇི་ལྟར་སྤེལ་ཚུལ་ཐོག་ཐུགས་སྣང་ཆེན་པོ་གནང་གཞི་ཞིག་ཆགས་ཡོད་པ་རེད། གནས་ཚུལ་ཐོན་ཁག་ལ་གཞིགས་ན་ལྕམ་ Liu Xia ལགས་ཀྱི་འཕྲོད་བསྟེན་གྱི་གནས་བབ་ཇེ་སྡུག་ཏུ་ཕྱིན་ཡོད་པ་དང། ཁོང་གིས་རང་ཉིད་འཇར་མ་ནི་ལ་གཞིས་སྤོ་བྱ་རྒྱུའི་མངོན་འདོད་ཡོད་པ་གསལ་བཏོན་གནང་ཡོད་པ་རེད་འདུག གཞི་རྩའི་ལྕམ་ Merkel མཆོག་ནས་དེ་སྔ་རྒྱ་ནག་ཏུ་འཚམས་གཟིགས་སྐབས་ Liu Xia ལགས་དང་ཐུག་འཕྲད་གནང་མྱོང་ཡོད་པ་དང། ཁོང་གིས་ད་རེས་ཀྱི་འཚམས་གཟིགས་དེའི་ཁྲོད་རྒྱ་ནག་གི་སྲིད་འཛིན་ཞི་ཅིང་ཕིང་དང་སྲིད་བློན་ Li Keqiang གཉིས་དང་མཇལ་འཕྲད་གནང་ཡོད་ཀྱང་། Liu Xia ལགས་ཀྱི་གནད་དོན་སྐོར་གླེང་མོལ་གནང་ཡོད་མེད་གསལ་བཏོན་གང་ཡང་གནང་མི་འདུག འོན་ཀྱང་ཟླ་བ་འདིའི་ཚེས་ ༢༤ ཉིན་ཚོགས་པའི་གསར་འགོད་ལྷན་ཚོགས་ཐོག་གསར་འགོད་པས་རྒྱ་ནག་གི་སྲིད་བློན་ Le Keqiang ལ་ Liu Xia ལགས་ཀྱི་གནད་དོན་སྐོར་དྲིས་སྐབས་ Le Keqiang ཡིས་ང་ཚོས་འཇར་མ་ནི་དང་ལྷན་དུ་ཁྲིམས་ཀྱི་ཚད་གཞི་སྒོ་ནས་འགྲོ་བ་མིའི་ཐོབ་ཐང་གི་ལངས་ཕྱོགས་གཞིར་བཟུང་བཀའ་མོལ་གནང་རྒྱུ་དང་འབྲེལ། མི་སྒེར་གྱི་གནད་དོན་ཐོག་ཕན་ཚུན་དབར་གུས་བརྩི་དང་དཔུང་པ་མཉམ་གཤིགས་ཐོག་གྲོས་བསྡུར་ཞུ་རྒྱུ་ཡིན་ཞེས་བཤད་འདུག

ཁ་སང་རྒྱ་ནག་གཞུང་གིས་བོད་མི་སྐད་ཡིག་ལས་འགུལ་བ་བཀྲིས་དབང་ཕྱུག་ལགས་སུ་ལོ་༥ བཙོན་འཇུག་ཁྲིམས་ཐག་བཅད་པ་དེར་འཛམ་གླིང་ཡུལ་གྲུ་གང་སའི་གྲོས་ཚོགས་འཐུས་མི་དང་འགྲོ་བ་མིའི་ཐོབ་ཐང་གི་རྒྱལ་སྤྱིའི་ཚོགས་སྡེ་ཁག་བཅས་ནས་སྐྱོན་བརྗོད་ཤུགས་ཆེ་བྱས་མུས་ཁྲོད། ཨ་རིའི་ཕྱི་སྲིད་ལས་ཁུངས་ནས་རྒྱ་གཞུང་ལ་བཀྲིས་དབང་ཕྱུག་ལགས་འཕྲད་མར་གློད་བཀྲོལ་དགོས་པའི་འབོད་སྐུལ་ཞུས་འདུག དེ་ཡང་ཨ་རིའི་ཕྱི་སྲིད་ལས་ཁུངས་ཀྱི་མགྲིན་ཚབ་པ་ལྕམ་ Heather Nauert ལགས་ཀྱིས་གསར་འགོད་བསྒྲགས་གཏམ་ཞིག་སྤེལ་ནས། བཀྲིས་དབང་ཕྱུག་ལགས་ཀྱིས་རང་གི་སྨྲ་བརྗོད་རང་དབང་ལོངས་སྤྱོད་པའི་ཐོག་རྒྱ་གཞུང་ལ་བོད་ཀྱི་སྐད་ཡིག་ཐོག་ཐུགས་ཁུར་བཞེས་དགོས་པའི་དགོས་འདུན་བཏོན་པ་དེར་ཁ་བྲལ་བའི་ཉེས་མིང་འོག་ལོ་ ༥ ཡི་ཁྲིམས་ཆད་སྐྱེལ་བ་དེར་ཧ་ཅང་བློ་ཕམ་ཡོད་གསུངས་ཏེ། རྒྱ་གཞུང་ལ་བཀྲིས་དབང་ཕྱུག་ལགས་གང་མགྱོགས་གློད་བཀྲོལ་དགོས་པ་དང་ལྷག་དོན་བོད་མིའི་ཐུན་མོང་མ་ཡིན་པའི་ཆོས་དང་རིག་གཞུང་སྐད་ཡིག་བཅས་ངེས་པར་སྲུང་སྐྱོབ་བྱ་དགོས་པའི་རེ་འདུན་བཏོན་འདུག བཀྲིས་དབང་ཕྱུག་ལགས་སུ་ལོ་ལྔའི་བཙོན་འཇུག་ཁྲིམས་ཆད་སྐྱེལ་བའི་གནས་ཚུལ་དེ་ཐོན་མ་ཐག་ཁ་སང་ཡུ་རོབ་གྲོས་ཚོགས་ཀྱི་འགྲོ་བ་མིའི་ཐོབ་ཐང་ཚོགས་ཆུང་གི་ཚོགས་གཙོ་སྐུ་ཞབས་Antonio Panzeri ལགས་ནས་ཀྱང་། རྒྱ་གཞུང་གིས་བོད་མི་སྐད་ཡིག་ལས་འགུལ་བ་བཀྲིས་དབང་ཕྱུག་ལགས་ལ་དེ་འདྲའི་གདུག་རྩུབ་ཅན་གྱི་ཉེས་ཆད་སྐྱེལ་བ་དེར་ཐུགས་ཚབ་ཡོད་སྐོར་གསུངས་པ་དང་འབྲེལ། ཁོང་གིས་འཐབ་རྩོད་དེ་ནི་རྒྱ་ནག་གི་རྩ་ཁྲིམས་དང་མཐུན་པའི་གཞི་རིམ་འགྲོ་བ་མིའི་ཐོབ་ཐང་གི་ཆ་རྐྱེན་ཞིག་ཡིན་པས་དེར་རྒྱ་གཞུང་ནས་ཁ་བྲལ་གྱི་ཉེས་མིང་འོག་ཁྲིམས་ཐག་དེ་ལྟར་གཅད་རྒྱུ་མེད་པའི་ནན་བརྗོད་གནང་བ་མ་ཟད། ད་རེས་རྒྱ་གཞུང་གིས་བཀྲིས་དབང་ཕྱུག་ལགས་སུ་སྐྱེལ་བའི་ཉེས་ཆད་དེ་ནི་དྲང་བདེན་གྱི་ཐག་གཅོད་ཞིག་གཏན་ནས་ཆགས་ཀྱི་མེད་པ་མངོན་གསལ་གནང་སྟེ། རྒྱ་གཞུང་ངོས་ནས་གཞི་རིམ་གྱི་ལྟ་གྲུབ་ལ་བརྩི་སྲུང་གནང་ཐོག་བཀྲིས་དབང་ཕྱུག་ལགས་ཀྱི་ཁྲིམས་གཏུགས་ཁག་ལ་དྲང་བདེན་དང་ཕྱི་གསལ་ནང་གསལ། དེ་བཞིན་དོན་སྙིང་ལྡན་པ་ཞིག་ཡོང་བར་ཞུ་གཏུགས་རིམ་པའི་སྐབས་བསམ་བཞེས་བྱ་དགོས་པའི་འབོད་སྐུལ་ཞུས་འདུག དེ་དེ་བཞིན་རྒྱལ་སྤྱིའི་ཉེས་ཡང་ཚོགས་པའི་ངོས་ནས་ཀྱང་བཀྲིས་དབང་ཕྱུག་ལགས་ཀྱི་ཁྲིམས་ཆད་དེ་ནི་བསམ་ཡུལ་ལས་འདས་པའི་ཐག་གཅོད་ཞིག་ཡིན་པར་རྒྱ་གཞུང་ལ་ཡོངས་བསྒྲགས་སྐྱོན་བརྗོད་གནང་འདུག རྩ་བའི་འདི་ལོའི་ཕྱི་ཟླ་ ༡ པོའི་ཚེས་ ༤ ཉིན་ཡུ་ཤུ་འབྲིང་རིམ་མི་མང་ཁྲིམས་ཁང་ནང་དུ་བཀྲིས་དབང་ཕྱུག་ལགས་ཀྱི་གྱོད་གཞིའི་ཐད་ཁྲིམས་བཤེར་བྱས་ཡོད་ཀྱང་ཁ་སང་བར་དཔྱད་ཁྲ་གང་ཡང་མ་བཏང་བར་བཞག་ཡོད་པ་རེད། ཁོང་གི་ཁྲིམས་བཤེར་སྐབས་རྒྱ་ནག་རྒྱལ་ས་པེ་ཅིང་དུ་ཡོད་པའི་ཨ་རི་དང་ཁེ་ན་ཌ། ཨིན་ཡུལ། འཇར་མ་ནི། དེ་བཞིན་ཡུ་རོབ་མཐུན་ཚོགས་བཅས་ཀྱི་གཞུང་ཚབ་མི་སྣ་ཡུ་ཤུ་ཁྲིམས་ཁང་དུ་ཆེད་མངགས་བསྐྱོད་ཡོད་ཀྱང། ཁོང་རྣམས་ལ་ཁྲིམས་གཏུགས་སྐབས་ཁྲིམས་ཁང་ནང་བཞུགས་རྒྱུའི་ཆོག་མཆན་སྤྲད་མེད་པ་རེད། ཁ་སང་ཁོང་ལ་ལོ་ལྔའི་བཙོན་འཇུག་ཁྲིམས་ཆད་བཏང་བའི་གནས་ཚུལ་ཐོན་མ་ཐག་འཛམ་གླིང་ཡུལ་གྲུ་གང་སའི་གྲོས་ཚོགས་འཐུས་མི་དང་འགྲོ་བ་མིའི་ཐོབ་ཐང་གི་རྒྱལ་སྤྱིའི་ཚོགས་སྡེ་ཁག་ནས་སྐྱོན་བརྗོད་ཤུགས་ཆེ་བྱེད་མུས་ཡིན་པ་རེད།