Tibetan Royal Year of 2151 | Year of the Wood Dragon

རྒྱལ་སྤྱི།

ཨ་མ་བོད་པ་ཡིན་པའི་ཕོ་གསར་ཞིག་ཨ་རིའི་གྲོས་ཚོགས་འཐུས་མིའི་འོས་མིར་བཞེངས་པ།

ཨ་རིའི་ Ohio མངའ་སྡེ་ནང་སྐྱེས་འཚར་བྱེད་བཞིན་པའི་ཕ་རྒྱ་གར་དང་ཨ་མ་བོད་པ་ཡིན་པའི་ཕོ་གསར་ Aftab Karma Singh Pureval ལགས་འདི་ལོའི་ཨ་མི་རི་ཀའི་གྲོས་ཚོགས་འོག་མའི་ འཐུས་མིའི་འོས་མིར་བཞེང་རྒྱུ་ཡིན་པ་ཡོངས་བསྒྲགས་གནང་འདུག དེ་ཡང་ཟླ་བ་ ༡༢ ཚེས་ ༣༡ ཉིན་ཨ་རིའི་ Ohio མངའ་སྡེའི་གྲོང་ཁྱེར་ Cincinnati ནང་ Aftab Karma Singh Pureval ལགས་ཀྱིས་ས་གནས་མང་ཚོགས་རྣམས་ལ་འཚམས་འདྲིའི་གསུང་བཤད་དང་སྦྲགས། ཁོང་འདི་ལོ་ཨ་རིའི་མང་གཙོ་ཚོགས་པའི་མིང་ཐོག་བརྒྱུད་ཨོ་ཧེ་ཧོ་མངའ་སྡེ་ནས་ཨ་མི་རི་ཀའི་གྲོས་ཚོགས་འོག་མའི་འཐུས་མིའི་འོས་མིར་བཞེང་རྒྱུ་ཡིན་པ་ཡོངས་བསྒྲགས་གནང་ཡོད་པ་དང་། སྐབས་དེར་ཁོང་ནས་ཐེསང་འདིའི་གྲོས་ཚོགས་འཐུས་མིའི་འོས་མིར་བཞེང་རྒྱུར་ཐག་གཅོད་ལས་སླ་པོ་ཞིག་དང་སྔར་ནས་དམིགས་ཡུལ་ཡོད་པ་ཞིག་མིན་ནའང་དེང་སྐབས་སྲིད་འཛིན་སྐུ་ཞབས་ Donald Trump མཆོག་གི་སྲིད་གཞུང་ནས་མང་ཚོགས་ཀྱི་འཕྲོད་བསྟེན་ལྟ་སྐྱོང་གཙོས་མང་ཚོགས་ཀྱི་བདེ་དོན་ཐོག་ཕྱག་ལས་གནང་སྟངས་ལ་བསྒྱུར་བཅོས་གཏང་རྒྱུ་དང་། ལྷག་པར་དུ་ཨ་རིའི་ཆེ་མཐོང་ཁག་སྲུང་སྐྱོབ་གནང་རྒྱུ་རྒྱལ་ཁབ་འདིའི་མི་རབས་གསར་པ་ཚོས་འགན་བཞེས་ཐོག་ཁ་ཕྱོགས་གསར་བ་ཞིག་གི་ཐོག་བསྐྱོད་དགོས་གལ་ཡིན་སྟབས། ཁོང་གྲོས་ཚོགས་འཐུས་མིའི་འོས་མིར་བཞེངས་པ་ཡིན་ཞེས་གསུངས་འདུག གཞི་རྩའི་ད་ལྟ་རང་ལོ་ ༣༥ ཡིན་པ་ Aftab Karma Singh Pureval ལགས་ཀྱི་ཨ་མ་ལགས་ནི་བོད་ནས་རྒྱ་གར་ལ་སྐྱབས་བཅོལ་དུ་ཕེབས་རྗེས་རང་ཉིད་ཀྱི་བཟའ་ཟླ་རྒྱ་གར་བ་ཞིག་དང་ལྷན་དུ་ལོ་ངོ་ ༤༠ གོང་ཨ་རིའི་ Ohio མངའ་སྡེར་གནས་སྡོད་བྱེད་བཞིན་ཡོད་པ་དང་། Aftab Karma Singh Pureval ལགས་འདས་པའི་ལོ་དུས་ནང་ཨོ་ཧེ་ཧོ་མངའ་སྡེའི་མི་མང་སློབ་གྲྭ་དང་གཙུག་ལག་སློབ་གཉེར་ཁང་སོགས་སུ་ཆབ་སྲིད་ཚན་རིག་དང་། ཁྲིམས་ལུགས་རིག་པའི་ཐོག་སློབ་སྦྱོང་གནང་ཡོད་པ་མ་ཟད། ཕྱི་ལོ་ ༢༠༡༦ ལོར་ཁོང་ Ohio མངའ་སྡེའི་སྲིད་གཞུང་གི་ཁྲིམས་ཁང་དུ་ཕྱག་ལས་ཀྱང་གནང་མྱོང་འདུག བརྒྱུད་ལམ་ཁག་ཏུ་གནས་ཚུལ་སྤེལ་བར་ Aftab Karma Singh Pureval ལགས་ཀྱི་ཁ་གཏད་འོས་མི་དེ་ནི་རང་ལོ་ ༦༥ ཡིན་པ་ཨ་རིའི་སྤྱི་མཐུན་ཚོགས་པའི་ Steve Chabot ལགས་ཡིན་པ་དང་། ཨ་རི་མང་གཙོ་ཚོགས་པས་ Aftab Karma Singh Pureval ལགས་ལ་རྒྱབ་སྐྱོར་གནང་སྟངས་དང་འོས་བསྡུའི་གྲ་སྒྲིག་གི་ལས་རིམ་ལ་གཞིགས་ན་ Aftab Karma Singh Pureval ལགས་ལ་འོས་བསྡུའི་རྒྱལ་ཁ་ཐོབ་རྒྱུར་ཚོད་དཔག་ཆེན་པོ་གནང་བཞིན་འདུག རྩ་བའི་དངོས་གཞིའི་འོས་བསྡུ་དེའདི་ལོའི་ཟླ་ ༡༡ ཚེས་ ༦ ཉིན་ཡིན་པ་དང་། གལ་སྲིད་ Aftab Karma Singh Pureval ལ་རྒྱལ་ཁ་ཐོབ་ཚེ་ཁོང་ནི་བོད་ཀྱི་མི་རྒྱུད་ཡིན་པ་ཨ་རིའི་གྲོས་ཚོགས་འཐུས་མི་ཆགས་པ་ལོ་རྒྱུས་ཁྲོད་ཀྱི་ཆེས་ཐོག་མ་དེ་ཡིན་པ་རེད།

བཀྲིས་དབང་ཕྱུག་ལགས་ལ་རྒྱལ་སྤྱིའི་ཁྲིམས་དང་མཐུན་པའི་ཁྲིམས་བཤེར་དགོས།

ཡོ་རོབ་ Baltic རྒྱལ་ཁབ་ལ་ཊི་ཝི་ཡའི་གྲོས་ཚོགས་བོད་དོན་རྒྱབ་སྐྱོབ་ཚོགས་པའི་འཐུས་མི་གཙོས་གྲོས་ཚོགས་འཐུས་མི་ ༢༠ ནས་རྒྱ་གཞུང་ལ་བོད་མི་སྐད་ཡིག་ལས་འགུལ་བ་བཀྲིས་དབང་ཕྱུག་ལགས་ལ་རྒྱལ་སྤྱིའི་ཁྲིམས་དང་མཐུན་པའི་ཁྲིམས་བཤེར་དགོས་པའི་རེ་སྐུལ་གནང་འདུག དེ་ཡང་ཁ་ཉིན་ཚེས་ ༦ ཉིན་རྒྱལ་སྤྱིའི་བོད་དོན་ལས་འགུལ་ཁང་གི་དྲ་གནས་ཐོག་གནས་ཚུལ་སྤེལ་བར་ཉེ་ཆར་ཕྱི་ཟླ་ ༡ ཚེས་ ༢༥ ཉིན་ Saeima འམ་ལ་ཊི་ཝི་ཡའི་གྲོས་ཚོགས་འཐུས་མི་ ༡༠༠ ཡོད་པའི་ཁོངས་ནས་བོད་དོན་རྒྱབ་སྐྱོར་ཚོགས་པའི་ཚོགས་མི་གཙོས་གྲོས་འཐུས་ ༢༠ ཐུན་མོང་ཐོག་བཀྲིས་དབང་ཕྱུག་ལགས་ཀྱི་གནད་དོན་དང་འབྲེལ་རྒྱ་གཞུང་ལ་མཚན་རྟགས་བཀོད་པའི་ཞུ་ཡིག་ཞིག་ཕུལ་འདུག་པ་དང་། དེའི་ནང་གྲོས་ཚོགས་འཐུས་མི་རྣམས་ཀྱིས་བཀྲིས་དབང་ཕྱུག་ལགས་ལ་ཕྱི་གསལ་ནང་གསལ་དང་དྲང་བདེན་གྱི་ཁྲིམས་བཤེར་དགོས་པ། རྒྱ་གཞུང་གི་ངོས་ནས་བཀྲིས་དབང་ཕྱུག་ལགས་ལ་རྒྱལ་སྤྱིའི་ཁྲིམས་ལུགས་དང་མཐུན་པའི་ཁྲིམས་གཏུག་སྐབས་ཟུར་ཉན་བཞུགས་ཆོག་པ་སོགས་རྒྱལ་སྤྱིའི་ཁྲིམས་བཤེར་གྱི་བརྒྱུད་རིམ་དང་མཐུན་པ་གནང་དགོས་པའི་རེ་སྐུལ་གནང་ཡོད། དེ་བཞིན་གྲོས་ཚོགས་འཐུས་མི་རྣམས་ནས་སྤེལ་བའི་བསྒྲགས་གཏམ་ནང་ཉེ་སྔོན་ཡོ་རོབ་མཐུན་ཚོགས་དང་ཧྥ་རན་སི། འཇར་མ་ནི་གྲོས་འཐུས་ཚོས་ཀྱང་བཀྲིས་དབང་ཕྱུག་ལགས་ཀྱི་གནད་དོན་ཐོག་གྲོས་ཆོད་བཞག་པ་རྣམས་ལུང་འདྲེན་གནང་ཐོག་རྒྱ་གཞུང་ལ་གནོན་ཤུགས་ཇེ་ཆེར་བཏང་ཐབས་གནང་འདུག རྩ་བའི་ Latvia གྲོས་ཚོགས་བོད་དོན་རྒྱབ་སྐྱོར་ཚོགས་པས་རྣམ་ཀུན་བོད་མིའི་འགྲོ་བ་མིའི་ཐོབ་ཐང་གི་གནད་དོན་ཐད་ལ་རྒྱ་གཞུང་ལ་འབོད་སྐུལ་དང་གནོན་ཤུགས་རིམ་པ་སྤྲོད་ཐབས་གནང་བའི་ཁྲོད།ཕྱི་ལོ་ ༢༠༠༥ དང་ ༢༠༡༦ སོ་སོར་རྒྱ་གཞུང་ལ་བོད་མིའི་འགྲོ་བ་མིའིཐོབ་ཐང་ལ་བརྩི་སྲུང་ཞུ་དགོས་པ་དང། གྲོས་མོལ་གྱི་ཐོག་ནས་བོད་རྒྱའི་དཀའ་རྙོག་སེལ་དགོས་པ་སོགས་ཞུ་མཁན་བོད་དོན་ལ་རྒྱབ་སྐྱོར་ཤུགས་ཆེ་གནང་མཁན་ཞིག་ཡིན་པ་རེད།

ཐེ་ཝན་ནང་བོད་རང་དབང་ཆེད་རྐང་འཁོར་སྐོར་བསྐྱོད་ལས་འགུལ་སྤེལ་བ།

བོད་དང་ཐེ་ཝན་འགྲོ་བ་མིའི་ཐོབ་ཐང་འབྲེལ་མཐུད་ཁང་གིས་གོ་སྒྲིག་འོག་ཐེ་ཝན་གྱི་རྒྱལ་ས་ Taipei ནང་དུ་བོད་རང་དབང་ཆེད་རྐང་འཁོར་སྐོར་བསྐྱོད་ཀྱི་ལས་འགུལ་ཞིག་སྤེལ་དབུ་འཛུགས་གནང་འདུག འདི་ལོའི་བོད་མིའི་རང་དབང་སྒེར་ལངས་གནང་བའི་གསུམ་བཅུའི་དུས་དྲན་ཐེངས་ ༥༩ པ་དྲིལ་བསྒྲགས་ཀྱི་ལས་དོན་ཆེད། དེ་རིང་ཟླ་ ༢ ཚེས་ ༧ སྟེ་རེས་གཟའ་ལྷག་པ་ལྷག་དཀར་གྱི་ཉིན་མོ་དང་བསྟུན་ནས་ལས་འགུལ་བ་རྣམས་ཀྱིས་ལུས་ལ་བོད་ཀྱི་རྒྱལ་དར་གྱོན་པ་དང་།  བོད་ལ་རང་དབང་དགོས། ༸པཎ་ཆེན་རིན་པོ་ཆེ་གློད་བཀྲོལ་དགོས། ༸གོང་ས་མཆོག་བོད་ལ་གདན་འདྲེན་ཞུ་དགོས་པ་སོགས་ཀྱི་དགོས་འདུན་བཏོན་ཏེ་ཞི་བའི་སྐད་འབོད་གནང་བཞིན་ཐེ་ཝན་གྱི་རྒྱལ་ས་ཐེ་པའི་ནང་བོད་རང་དབང་ཆེད་རྐང་འཁོར་སྐོར་བསྐྱོད་ཀྱི་ལས་འགུལ་སྤེལ་འདུག དེའང་ལས་འགུལ་བ་རྣམས་ནས་དེ་རིང་ཐེ་ཝན་གྱི་རྒྱལ་ས་ Taipei ནང་གནམ་གཤིས་གྲང་ངར་ཆེ་བའི་ཁར་ཆར་རླུང་ཤུགས་ཆེ་ལྡང་བཞིན་ཡོད་མེད་ལ་ལྟོས་མེད་ཐོག་རྐང་འཁོར་སྐོར་བསྐྱོད་གནང་བཞིན་ཡོད་པ་མ་ཟད། ཁུལ་དེའི་ཡུལ་མི་དང་ལྷག་པར་དུ་རྒྱ་ནག་སྐམ་ས་ཆེན་མོ་ནས་ཡིན་པའི་ཡུལ་འཁོར་སྤྲོ་འཆམ་པ་ཚོར་ད་ལྟའི་བོད་ནང་གི་ཆེས་ཞན་པའི་འགྲོ་བ་མིའི་ཐོབ་ཐང་གི་གནས་སྟངས་ངོ་སྤྲོད་དང་ཉེ་ཆར་རྒྱ་གཞུང་གི་བཙོན་འཇུག་འོག་ཡོད་པའི་བོད་མི་སྐད་ཡིག་སྲུང་སྐྱོབ་ལས་འགུལ་བ་བཀྲིས་དབང་ཕྱུག་ལགས་གློད་བཀྲོལ་དགོས་པ་དང། ད་ལྟའི་རྒྱ་གཞུང་གིས་བོད་མིའི་ཐོག་འཛིན་བཞིན་པའི་སྲིད་བྱུས་ཁག་ལ་ངོ་རྒོལ་གྱི་རྣམ་པ་ཆེད་བཏོན་གནང་འདུག རྩ་བའི་བོད་དང་ཐེ་ཝན་འགྲོ་བ་མིའི་ཐོབ་ཐང་འབྲེལ་མཐུད་ཁང་གི་ངོས་ནས་ཐེངས་འདིའི་རྐང་འཁོར་སྐོར་བསྐྱོད་ཀྱི་ལས་འགུལ་དེ་དེ་རིང་ཟླ་ ༢ ཚེས་ ༧ སྟེ་ལྷག་དཀར་གྱི་ཉིན་མོ་ནས་དབུ་འཛུགས་ཀྱིས་ཟླ་ ༣ ཚེས་ ༡༠ བོད་མིའི་རང་དབང་སྒེར་ལངས་ཉིན་མོ་བར་རེས་གཟའ་ལྷག་པ་ནམ་ཡིན་ལ་མུ་མཐུད་ལས་འགུལ་སྤེལ་རྒྱུ་རེད་འདུག

རྒྱ་གཞུང་གིས་དབྱེ་བའི་ཞིང་ཁག་གི་འགོ་ཁྲིད་ཚོས་ཆབ་སྲིད་ཀྱི་གནད་དོན་ཐོག་ཕྱག་ལས་གནང་མ་ཐུབ་ཀྱང་མི་མང་དང་སྤྱི་ཚོགས་ཀྱི་བདེ་དོན་ཆེད་ཕྱག་ལས་གནང་དགོས།

ཉེ་ཆར་ཟླ་བ་སྔོན་མའི་ཕྱི་ཚེས་ ༢༣ ནས་ཟླ་བ་འདིའི་ཕྱི་ཚེས་ ༡ བར་ཁྱོན་ཉིན་གྲངས་བཅུའི་ནང་རྒྱ་གཞུང་གིས་དབྱེ་བའི་བོད་རང་སྐྱོང་ལྗོངས་དང་། མཚོ་སྔོན། དེ་བཞིན་ཟི་ཁྲོན། ཀན་སུ། ཡུ་ནན་བཅས་ཀྱི་ནང་འདི་ལོའི་ཞིང་ཆེན་རིམ་པའི་མི་མང་འཐུས་མི་ཚོགས་ཆེན་དང་། རྒྱལ་ཡོངས་མི་མང་ཆབ་སྲིད་གྲོས་ཚོགས་ཀྱི་ཚོགས་འདུ་གཉིས་ཚོགས་ཡོད་པ་ལྟར་ཐེངས་འདིའི་ཚོགས་འདུའི་ཐོག་གཙོ་བོ་ཞིང་ཆེན་ཁག་གི་མི་མང་འཐུས་མི་ཚོགས་དང་རྒྱལ་ཡོངས་མི་མང་ཆབ་སྲིད་གྲོས་ཚོགས་གཉིས་ཀྱི་འགོ་ཁྲིད་ཁག་བསྐོ་བཞག་བྱས་ཡོད་པ་རེད། རྒྱ་ནག་གི་ཞིང་ཆེན་རིམ་པའི་ཚོགས་འདུ་དང་འབྲེལ་ཁ་ཉིན་ཨ་རིར་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་གཞོན་པ་བུ་ཆུང་ཚེ་རིང་ལགས་ཀྱིས་ཞིང་ཆེན་རིམ་པའི་བོད་མིའི་འགོ་ཁྲིད་ལ་ལྟ་བ་ཞེས་པའི་དཔྱད་གཏམ་ཞིག་སྤེལ་འདུག དེའི་ནང་ཡུ་ནན་ཞིང་ཆེན་ཁོངས་ཀྱི་འགོ་ཁྲོད་འཕོ་འགྱུར་ཁྲོད་བོད་མི་ཇི་ཙམ་སླེབས་ཡོད་མེད་སོགས་ཁ་གསལ་བྱུང་མི་འདུག་ཀྱང་། བོད་རང་སྐྱོང་ལྗོངས་ཁུལ་གྱི་མི་མང་འཐུས་ཚོགས་ཀྱི་ཚོགས་གཙོ་བློ་བཟང་རྒྱལ་མཚན་ལགས་བསྐྱར་དུ་ཚོགས་གཙོར་བསྐོ་བཞག་བྱས་འདུག་པ་དང་། བོད་རང་སྐྱོང་ལྗོངས་ཁོངས་སུ་ཁྱོན་བོད་མི་ ༣༥ ད་རེས་འགོ་ཁྲིད་རིམ་པའི་གནས་རིམ་དུ་བསྐོ་བཞག་བྱས་ཡོད་པ་གངོན་གསལ་གནང་ཡོད། དེ་བཞིན་མཚོ་སྔོན་ཞིང་ཆེན་གྱི་མི་མང་འཐུས་ཚོགས་ཀྱི་ཚོགས་གཞོན་གྲས་སུ་བོད་མི་གཉིས་དང་། རྒྱལ་ཡོངས་མི་མང་ཆབ་སྲིད་གྲོས་ཚོགས་ཀྱི་ཚོགས་གཙོ་དང་ཚོགས་གཞོན་གཞོན་གྲས་སུ་བོད་མི་གསུམ་བཅས་ཁྱོན་བོད་མི་ ༦ འགོ་ཁྲིད་རིམ་པའི་གནས་རིམ་དུ་བསྐོ་བཞག་བྱས་ཡོད་པ་མ་ཟད། ཟི་ཁྲོན་ཞིང་ཆེན་ཁོངས་སུ་བོད་མི་གཅིག དེ་བཞིན་ཀན་སུ་ཞིང་ཆེན་ཁོངས་སུ་བོད་མི་གཉིས་བཅས་བསྐོ་བཞག་བྱས་ཡོད་པ་གསལ་འདུག འདི་ག་རླུང་འཕྲིན་ཁང་གིས་བུ་ཆུང་ཚེ་རིང་ལགས་སུ་ཁོང་གིས་སྤེལ་བའི་དཔྱད་གཏམ་དང་། ལྷག་པར་དུ་རྒྱ་ནག་གི་ཞིང་ཆེན་རིམ་པའི་ཚོགས་འདུ་མི་འདྲ་བ་དེ་དག་གི་ཐོག་དམིགས་བསལ་བཅར་འདྲི་ཁག་ཅིག་ཞུས་པར་རྒྱ་ནག་གཞུང་གི་རྩ་ཁྲིམས་དང་རང་སྐྱོང་ས་ཁུལ་གྱི་སྒྲིག་གཞིའི་དགོངས་དོན་ལྟར་ན། རང་སྐྱོང་ས་ཁུལ་གྱི་འགོ་ཁྲིད་རྣམས་ནས་ཆབ་སྲིད་ཀྱི་གནད་དོན་ཐོག་ཕྱག་ལས་གནང་མ་ཐུབ་ཀྱང་མི་མང་དང་སྤྱི་ཚོགས་ཀྱི་བདེ་དོན་ཆེད་ཕྱག་ལས་གནང་དགོས་པ་གསུངས་སོང་།  

བོད་དོན་རྒྱབ་སྐྱོར་བ་ལྕམ་ Grace Spring ལགས་ལ་བདེན་པའི་སྒྲོན་མེ་གཟེངས་རྟགས་འབུལ་རྒྱུ།

ཨ་རི་ནང་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་ནས་ཕྱི་ལོ་ ༡༩༩༥ ལོ་ནས་འགོ་འཛུགས་ཀྱིས་རྒྱལ་སྤྱིའི་ཐོག་བོད་དོན་ལ་རྒྱབ་སྐྱོར་གཟེངས་སུ་ཐོན་པ་གནང་མཁན་གྱི་ཚོགས་སྒེར་ཁག་ལ་ཆེ་བསྟོད་དང་སྦྲགས། Light of Truth འམ་བདེན་པའི་སྒྲོན་མེ་ཞེས་པའི་གཟེངས་རྟགས་ཤིག་ཕུལ་སྲོལ་ཡོད་པ་ལྟར། འདི་ལོའི་གཟེངས་རྟགས་འདི་ཡུན་རིང་ནས་བོད་དོན་ལ་ཐུགས་འཁུར་བཞེས་མཁན་ལྕམ་ Grace Spring ལགས་ལ་འབུལ་གཏན་འཁེལ་འདུག དེ་ཡང་ཁ་སང་རྒྱལ་སྤྱིའི་བོད་དོན་ལས་འགུལ་ཁང་གི་དྲ་གནས་ཐོག་གནས་ཚུལ་སྤེལ་བར་ཚོགས་པ་དེའི་འགན་འཛིན་ལྷན་ཚོགས་རྣམས་ནས་འདི་ལོའི་བདེན་པའི་སྒྲོན་མེ་ཞེས་པའི་གཟེངས་རྟགས་དེ་འདས་པའི་ལོ་ངོ་བཅུ་ཕྲག་མང་པོའི་རིང་ནས་བོད་དོན་ཐོག་ཐུགས་འཁུར་ཆེ་བཞེས་ཀྱིས་བོད་དོན་དང་འབྲེལ་བའི་ལས་འགུལ་ནང་མཉམ་ཞུགས་གནང་མཁན་ལྕམ་ Grace Spring ལགས་ལ་འབུལ་རྒྱུ་ཡིན་པ་ཡོངས་བསྒྲགས་གནང་འདུག རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་ལྷན་ཚོགས་ཀྱི་ཚོགས་གཙོ་སྐུ་ཞབས་ Richard Gere ལགས་ཀྱིས་ལྕམ་ Grace Spring ལགས་ནི་དུས་རྒྱུན་དུ་འཇིགས་སྣང་མེད་པར་ལྷག་བསམ་རྣམ་དག་ཐོག་ནས་བོད་དོན་ལ་རྒྱབ་སྐྱོར་ཤུགས་ཆེ་གནང་མཁན་ཞིག་ཡིན་པ་སོགས་འགྲེལ་བརྗོད་དང་སྦྲགས། འདི་ལོའི་བདེན་པའི་སྒྲོན་མེ་ཞེས་པའི་གཟེངས་རྟགས་དེ་ཁོང་གིས་ད་བར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་པའི་བོད་མིའི་བདེན་དོན་ཐོག་ཕྱག་ལས་བསྟུད་མར་གནང་བར་ཡི་རངས་བསྔགས་བརྗོད་ཀྱི་ཆེད་བསྟོད་མཚོན་ཕྱིར་འབུལ་རྒྱུ་ཡིན་ཞེས་གསུངས་འདུག གཞི་རྩའི་ལྕམ་ Grace Spring ལགས་དེ་སྔ་ཨ་རིའི་རྒྱལ་ས་ Washington DC ནང་བཞུགས་སྐབས་རྒྱལ་སྤྱིའི་བོད་དོན་ལས་འགུལ་ཁང་ཨ་བོད་མཐུན་ཚོགས་ནང་བོད་དོན་དང་འབྲེལ་བའི་ཕྱག་ལས་མང་དག་ཞིག་གནང་མྱོང་ཡོད་པ་དང་། ཁུལ་དེར་ཚོགས་པའི་བོད་དོན་ལས་འགུལ་ནང་མཉམ་ཞུགས་གནང་བ་དང་ལྷག་པར་དུ་ཕྱི་ལོ་ ༡༩༨༧ ལོར་བོད་ནང་ཞི་བའི་སྒེར་ལངས་གནང་རྗེས། རེས་གཟའ་པ་སངས་ནམ་ཡིན་ལ་རྒྱལ་ས་ཝ་ཤིང་ཊོན་ཌི་སིར་རྟེན་གཞི་བྱས་པའི་རྒྱ་ནག་གཞུང་ཚབ་ལས་ཁུངས་མདུན་དུ་བོད་ཀྱི་རྒྱལ་དར་དང་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་༸སྐུ་པར་སོགས་བསྣམས་ནས་ལོ་ངོ་བཅུ་ལྷག་བསྟུད་མར་ཁེར་རྐྱང་གི་མར་མེ་ཁྲོམ་སྐོར་གྱི་ལས་འགུལ་སྤེལ་ཡོད་པ་རེད། ལས་འགུལ་དེ་དག་དང་འབྲེལ་དེ་སྔ་ཕྱི་ལོ་ ༡༩༨༩ ལོར་༸གོང་ས་༸སྐྱབས་མགོན་ཆེན་པོ་མཆོག་གིས་ལྕམ་ Grace Spring ལགས་ལ་འཚམས་འདྲི་ཞིག་གནང་བའི་བརྒྱུད་ཁོང་མོས་ད་བར་བོད་དོན་ཐོག་མུ་མཐུད་ལས་འགུལ་རིགས་སྤེལ་བཞིན་པར་ཐུགས་རྗེ་ཆེ་ཞུའི་བསྔགས་བརྗོད་དང་། ཁོ་མོ་ཁེར་རྐྱང་གིས་མར་མེ་ཁྲོམ་སྐོར་གནང་བ་དེས་ཨ་རིའི་མི་སེར་རྣམས་ནས་དུས་རྟག་ཏུ་བོད་མི་ཚོར་རྒྱབ་སྐྱོར་དང་གདུང་སེམས་མཉམ་བསྐྱེད་གནང་བ་ཞིག་མཚོན་གྱི་ཡོད་པ་བཀའ་བསྩལ་ཡོད། བོད་དོན་རྒྱབ་སྐྱོར་བ་ལྕམ་ Grace Spring ལགས་ལ་འདི་བོད་ཀྱི་ལོ་གསར་གྱི་ཚེས་ ༢ ཉིན་ Vermont བོད་རིགས་ཚོགས་པའི་ལོ་གསར་གྱི་འདུ་འཛོམས་སྐབས་དངོས་སུ་འབུལ་བཞེས་གནང་རྒྱུ་རེད་འདུག རྩ་བའི་རྒྱལ་སྤྱིའི་བོད་དོན་ལས་འགུལ་ཁང་ནས་ཕྱི་ལོ་ ༡༩༩༥ ལོ་ནས་བཟུང་ད་བར་གཟེངས་རྟགས་དེ་ བོད་དོན་དང་འབྲེལ་བའི་དངོས་ཀྱི་གནས་ཚུལ་ཁྱབ་སྤེལ་གནང་མཁན་ཨ་རི་ New York Times གསར་ཁང་གི་སྤྱི་ཁྱབ་རྩོམ་སྒྲིག་པ་སྐུ་ཞབས་དམ་པ་ Abraham Michael Rosenthal ལགས་དང་། མགོན་པོ་༸གང་ཉིད་མཆོག་དང་ཐུགས་ཉེ་བའི་བོད་དོན་རྒྱབ་སྐྱོར་གནང་མཁན་ཡི་ཤུའི་ཆོས་དཔོན་ Desmond Tutu མཆོག ཅེཀ་སྤྱི་མཐུན་རྒྱལ་ཁབ་ཀྱི་སྲིད་འཛིན་དམ་པ་ Vaclav Havel ལགས། དེ་བཞིན་རྒྱ་གར་མི་མང་དང་རྒྱ་རིགས་བོད་དོན་རྒྱབ་སྐྱོར་བ་སོགས་ཚོགས་སྒེར་ཁག་ཅིག་ལ་ཕུལ་མྱོང་ཡོད་པ་རེད།

ཧོང་ཀོང་མང་གཙོའི་ལས་འགུལ་བ་ Joshua Wong ལགས་གཙོས་ཕྱག་སྦྲེལ་ཚོ་འདི་ལོའི་ནོ་བེལ་ཞི་བདེའི་གཟེངས་རྟགས་བཞེས་མཁན་གྱི་འོས་མིར་བཏོན་པ།

ཕྱི་ལོ་ ༢༠༡༤ ལོར་ཧོང་ཀོང་ནང་ Umbrella Movement འམ་ཆར་གདུགས་ཀྱི་ལས་འགུལ་ཞེས་མང་གཙོའི་ལས་འགུལ་འགོ་ཁྲིད་བ་ན་གཞོན་རང་ལོ་ ༢༡ ཡིན་པ་ Joshua Wong ལགས་དང་། ཁོང་གི་ཕྱག་རོགས་རང་ལོ་ ༢༤ ཡིན་པ་ Alex Chow ལགས། རང་ལོ་ ༢༧ སོན་པ་ Nathan Law ལགས་བཅས་འདི་ལོ་ ༢༠༡༨ ལོའི་ནོ་བེལ་ཞི་བདེའི་གཟེངས་རྟགས་བཞེས་མཁན་གྱི་འོས་མིའི་ཁོངས་སུ་མིང་བཏོན་གནང་འདུག   དེ་ཡང་ཁ་སང་ CECC ཞེས་ཨ་མི་རི་ཀའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་གི་ཚོགས་གཙོ་སྐུ་ཞབས་ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་ Chris Smith ལགས་དང་ཚོགས་གཞོན་ཨ་རི་གྲོས་ཚོགས་གོང་མའི་འཐུས་མི་སྐུ་ཞབས་ Marco Rubio ལགས་རྣམ་གཉིས་གཙོས་པའི་ཡུལ་དེའི་ཆབ་སྲིད་ཚོགས་པ་གཉིས་དང་། གྲོས་ཚོགས་གོང་འོག་གཉིས་ལས་གྲུབ་པའི་གྲོས་ཚོགས་འཐུས་མི་ ༡༢ ཐུན་མོང་གིས་ཡོ་རོབ་རྒྱལ་ཁབ་ Norway ནང་རྟེན་གཞི་བྱས་པའི་ནོ་བེལ་ཞི་བདེ་ལྷན་ཚོགས་ཀྱི་ཚོགས་གཙོ་ལྕམ་ Berit Reiss-Anderson ལགས་ཀྱི་མཚན་ཐོག་ཏུ་འདི་ལོའི་ནོ་བེལ་ཞི་བདེ་གཟེངས་རྟགས་ཀྱི་འོས་མི་དང་འབྲེལ་བའི་ཕྱག་བྲིས་ཕུལ་བའི་ནང་གཞོན་སྐྱེས་ Joshua Wong ལགས་དང་ཁོང་གྱི་ཕྱག་སྦྲེལ་ Alex Chow ལགས་དང་ Nathan Law ལགས་གསུམ་ནས་ཕྱི་ལོ་ ༢༠༡༤ ལོར་ཧོང་ཀོང་གི་མང་གཙོ་དང་རང་དབང་། དེ་བཞིན་འགྲོ་བ་མིའི་ཐོབ་ཐང་། ཁྲིམས་ལུགས་དབང་བསྒྱུར་ལ་བཅོས་བསྒྱུར་དགོས་པ་དང་གཞི་རྒྱ་ཆེ་བའི་ཆར་གདུགས་ཀྱི་ལས་འགུལ་སྤེལ་བ་མ་ཟད། ལྷག་ཏུ་འདས་པའི་ལོ་དུས་ནང་རྒྱ་གཞུང་གི་གནོནན་ཤུགས་སོགས་ལ་ལྟོས་མེད་ཀྱིས་ཧོང་ཀོང་རང་སྐྱོང་གི་གནས་བབ་དང་། ཆབ་སྲིད་ཀྱི་རང་དབང་། དེ་བཞིན་རང་ཐག་རང་གཅོད་ཀྱི་ཐོབ་ཐང་སོགས་ཀྱི་ཐོག་ཕྱག་ལས་བསྟུད་མར་སྤེལ་བར་ངོས་འཛིན་ཏེ་འདི་ལོ་ ༢༠༡༨ ལོའི་ནོ་བེལ་ཞི་བདེའི་གཟེངས་རྟགས་ཕུལ་དགོས་པ་གསུངས་འདུག ཕྱག་བྲིས་དེའི་ནང་ན་གཞོན་ལས་འགུལ་བ་གསུམ་གྱི་ལོ་རྒྱུས་ངོ་སྤྲོད་དང་སྦྲགས། ཁོང་གསུམ་ནས་སྣེ་ཁྲིད་འོག་སྤེལ་བའི་ཆར་གདུགས་ཀྱི་ལས་འགུལ་དེ་ལྟ་བུ་ཞིག་ཧོང་ཀོང་གི་ལོ་རྒྱུས་ནང་ལ་བྱུང་མྱོང་མེད་པ་དང་། ལྷག་པར་དུ་ཁོང་རྣམ་པའི་ལས་འགུལ་དེ་དག་ཞི་བའི་ལས་འགུལ་འབའ་ཞིག་ཡིན་སྟབས། ནོ་བེལ་ཞི་བདེའི་གཟེངས་རྟགས་ཕུལ་ཐུབ་ཚེ་འོས་ཤིང་འཚམ་པ་ཞིག་རེད་སོགས་བཀོད་འདུག ལྷག་པར་དུ་ CECC ཚོགས་ཆུང་གི་ཚོགས་གཙོ་སྐུ་ཞབས་ Chris Smith ལགས་ནས་འདས་པའི་ལོ་དུས་ནང་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་མང་ཆེ་བ་དྲག་པོའི་སྲིད་གཞུང་འོག་མགོ་བོར་མ་སྒུར་བར་འགྲོ་བ་མིའི་ཐོབ་ཐང་དང་མང་གཙོ། དེ་བཞིན་མང་ཚོགས་ཀྱི་མངོན་འདོད་དང་མཐུན་པའི་ཐོག་ཕྱག་ལས་གནང་མཁན་ཤ་སྟག་ཡིན་པ་སོགས་འགྲེལ་བརྗོད་དང་སྦྲགས། ད་བར་ཁོང་གསུམ་ནས་ཞི་བའི་ལས་འགུལ་སྤེལ་བར་རྒྱལ་སྤྱི་མང་ཚོགས་ནས་བཀའ་དྲིན་བསམ་ཤེས་གནང་པ་ཞིག་མཚོན་ཐུབ་ཀྱི་རེད་ཅེས་གསུངས་འདུག དེ་བཞིན་ཁོང་ནས་སྔར་ལོ་རྒྱ་གཞུང་གི་དྲག་གནོན་འོག་མང་གཙོ་དོན་གཉེར་བ་དང་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་སྐུ་ཞབས་ Liu Xiaobo ལགས་སྐུ་འདས་གྲོངས་སུ་ཕྱིན་པའི་འཚམས་དེར་མང་གཙོའི་ལས་འགུལ་བ་གསུམ་པོར་གཟེངས་རྟགས་དེ་ཕུལ་ཐུབ་པ་ཡིན་ན། ནོ་བེལ་ཞི་བདེ་ལྷན་ཚོགས་ཀྱི་གཟི་བརྗོད་མཚོན་པ་མ་ཟད། སྐུ་ཞབས་ Liu Xiaobo ལགས་དམ་པ་ཁོང་ལ་ཡང་རྗེས་དྲན་དང་། རྒྱ་ནག་ནང་ཡོད་པའི་མང་གཙོ་དོན་གཉེར་བ་ཚོ་ལ་རྒྱབ་སྐྱོར་གྱི་རྣམ་པ་ཞིག་ཀྱང་མཚོན་ཐུབ་ངེས་ཡིན་པ་གསུངས་འདུག གཞན་ཡང་ཚོགས་ཆུང་དེའི་ཚོགས་གཞོན་སྐུ་ཞབས་ Marco Rubio ལགས་ཀྱིས་ཀྱང་ཁོང་གཞོན་སྐྱེས་གསུམ་པོ་ནི་ཧོང་ཀོང་མི་མང་ལ་རང་སྐྱོང་གི་གནས་བབ་ཚད་ལྡན་ཞིག་ཐོབ་ཐབས་སུ་ཕྱག་ལས་བསྟུད་མར་གནང་མཁན་ཞིག་ཡིན་པ་མ་ཟད། ཁོང་གསུམ་གྱི་ལས་འགུལ་སྤེལ་སྟངས་དེ་དག་ཧོང་ཀོང་ནང་ཙམ་མ་ཟད། རྒྱལ་སྤྱིའི་ཁྱོན་་ཡོངས་ལ་དམིགས་དཔེ་འོས་པ་ཞིག་ཡིན་སྟབས། ད་རེས་ཁོང་རྣམས་ལ་འདི་ལོའི་ནོ་བེལ་ཞི་བདེའི་གཟེངས་རྟགས་བཞེས་མཁན་གྱི་འོས་མིའི་ཁོངས་སུ་མིང་བཏོན་གནང་རྒྱུ་དེ་དུས་ཀྱི་ཆ་ནས་འོས་ཤིང་འཚམ་པ་ཞིག་རེད་ཅེས་ནན་བརྗོད་གནང་འདུག གཞི་རྩའི་བརྒྱུད་ལམ་ཁག་ཏུ་གནས་ཚུལ་ཐོན་པར་གཞིགས་ན། འདི་ལོའི་ནོ་བེལ་ཞི་བདེའི་གཟེངས་རྟགས་བཞེས་མཁན་གྱི་འོས་མིའི་ཁོངས་སུ་ཧོང་ཀོང་མང་གཙོའི་ལས་འགུལ་བ་གསུམ་དང་ UNHCR ཞེས་རྒྱལ་ཚོགས་ཀྱི་སྐྱབས་བཅོལ་ཐོག་ཕྱག་ལས་གནང་མཁན་གྱི་ལྷན་ཚོགས། དེ་བཞིན་ White Helmets ཞེས་སིརྱ་ནང་མི་མང་སྲུང་སྐྱོབ་གནང་མཁན་གྱི་ཚོགས་པ། གཞན་ཡང་ཨ་རིའི་སྲིད་འཛིན་སྐུ་ཞབས་ཌོ་ནལ་ཊམ་སོགས་ཚོགས་སྒེར་ཁག་ཅིག་ཡོད་པ་དང་། དེ་དག་ཁྲོད་ནས་ད་རེས་མང་གཙོའི་ལས་འགུལ་བ་ Joshua Wong ལགས་ལ་ཐོབ་ཚེ་ཁོང་ནི་ད་བར་ནོ་བེལ་གཟེངས་རྟགས་བཞེས་མཁན་ཆུང་ཤོས་གཉིས་པ་དེ་ཆགས་ཀྱི་ཡོད་པ་རེད།

ཨ་རིའི་གྲོས་ཚོགས་ནས་རྒྱ་གཞུང་གིས་བོད་གསེར་རྟ་བླ་རུང་སྒར་ལ་བཏང་འཛིན་བྱེད་ཤུགས་ཆེ་རུ་གཏོང་བཞིན་པའི་ཐོག་དོ་སྣང་སྔར་ལྷག་གནང་དགོས།

དེ་ཡང་ཉེ་ཆར་ཟླ་ ༡ ཚེས་ ༢༤ ཉིན་ཨ་རིར་རྟེན་གཞི་བྱས་པའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པར་རྒྱ་ནག་གཞུང་འབྲེལ་ཡིག་ཆ་ཞིག་ལག་སོན་བྱུང་བའི་ནང་བླ་རུང་སྒར་དུ་གྲྭ་ཤག་གཏོར་བཤིག་དང་གྲྭ་བཙུན་ཕྱིར་ཕུད་ཀྱི་ལས་རིམ་ཡོངས་མཇུག་སྒྲིལ་རྗེས། མ་འོངས་པར་དགོན་པའི་འཛིན་སྐྱོང་དང་བདེ་འཇགས། དཔལ་འབྱོར། སློབ་ཁྲིད། སློབ་ཞུགས། དེ་བཞིན་སློབ་ཁྲིད་ཀྱི་ནང་དོན་གཏན་འབེབས་བཅས་ཀྱི་ལས་དོན་ཡོངས་རྫོགས་ཐོག་ལ་བཏང་འཛིན་བྱ་སླད་རྒྱ་ནག་དམར་ཤོག་ཚོགས་པའི་ལས་བྱེད་ ༢༠༠ ཙམ་བསྐོ་བཞག་བྱས་ཡོད་པའི་གནས་ཚུལ་ཡོངས་བསྒྲགས་བྱས་ཡོད་པ་རེད། གནད་དོན་དེ་དང་འབྲེལ་ཁ་ཉིན་ཨ་རིའི་གྲོས་ཚོགས་ཀྱི་ Tom lantos འགྲོ་བ་མིའི་ཐོབ་ཐང་ཚོགས་ཆུང་གི་ཚོགས་གཙོ་གྲོས་ཚོགས་འཐུས་མི་རྒན་གྲས་སྐུ་ཞབས་ Jim McGovern ལགས་ཀྱིས་གྲོས་ཚོགས་ཀྱི་ལས་རིམ་ཞིག་གི་ཐོག་གླེང་སློང་གནང་འདུག་པ་དང་། སྐབས་དེར་ཁོང་གིས་རྒྱ་གཞུང་གིས་རྒྱ་ནག་དམར་ཤོག་ཚོགས་པའི་ལས་བྱེད་ ༢༠༠ ཙམ་བསྐོ་བཞག་བརྒྱུད་དམ་དྲག་དང་བཏང་འཛིན་གྱི་ལས་དོན་བྱེད་ཤུགས་ཆེ་རུ་བཏང་པ་ནི་རྒྱ་ནག་སྤྱི་དང་། ལྷག་པར་དུ་བོད་ནང་གི་ཆོས་དད་རང་དབང་གི་གནས་སྟངས་ཇེ་སྡུག་ཏུ་གཏང་རྒྱུའི་བྱ་སྤྱོད་སྤེལ་བ་ཞིག་རེད་ཅེས་གསུངས་འདུག ད་དུང་ཁོང་གིས་ད་ལྟའི་རྒྱ་ནག་གཞུང་གིས་མངོན་གསལ་མིན་པའི་བྱ་སྤྱོད་མང་དག་ཞིག་སྤེལ་བའི་བརྒྱུད་གསེར་རྟ་བླ་རུང་སྒར་གཙོས། བོད་ཀྱི་དགོན་སྡེ་ཁག་གཏོར་བཤིག་དང་། བོད་མི་མང་ཚོགས་ཀྱི་ཆོས་དད་རང་དབང་ལ་དམ་དྲག་སྔར་ལྷག་བྱེད་བཞིན་པའི་དུས་སྐབས་འདིར་ཨ་རིའི་སྲིད་འཛིན་སྐུ་ཞབས་ཌོནལ་ཊམ་མཆོག་གིས་རང་ཉིད་ཀྱི་བཞེངས་ཕྱོགས་ངེས་གཏན་ཞིག་དང་དེ་འབྲེལ་གླེང་སློང་མ་གནང་ཚེ་ཨ་རིའི་ཆབ་སྲིད་ཚོགས་པ་གཉིས་ཀྱི་གྲོས་ཚོགས་འཐུས་མི་རྣམས་ནས་རྒྱ་གཞུང་གི་བྱ་སྤྱོད་དེ་དག་གི་མཇུག་འབྲས་གང་ཡོང་ཐོག་གླེང་སློང་གནང་དགོས་གལ་ཡིན་པ་གསུངས་ཡོད། རྩ་བའི་བོད་གསེར་རྟ་བླ་རུང་སྒར་དུ་རྒྱ་ནག་གཞུང་གིས་ཕྱི་ལོ་ ༢༠༡༦ ལོའི་ཕྱི་ཟླ་ ༧ པ་ནས་བཟུང་གྲྭ་ཤག་གཏོར་བཤིག་དང་གྲྭ་བཙུན་ཕྱིར་ཕུད་ཀྱི་ལས་གཞི་སྤེལ་བའི་ཁྲོད། བླ་རུང་ཆོས་སྒར་གྱི་གྲྭ་ཤག་ ༤༧༠༠ ལྷག་གཏོར་བཤིགས་བཏང་ཟིན་པ་དང་། བླ་རུང་སྒར་དང་ཡར་ཆེན་སྒར་གཉིས་ནས་གྲྭ་བཙུན་དང་སློབ་གཉེར་བ་ཁྱོན་ ༤༨༠༠ ལྷག་ཕྱིར་ཕུད་བཏང་ཡོད་པ་མ་ཟད། རྒྱ་གཞུང་གིས་ད་དུང་ཡང་བླ་རུང་སྒར་དུ་ཟི་ཁྲོན་ཞིང་ཆེན་ཁོངས་ནས་ཡིན་པ་མ་གཏོགས་ཕྱི་ཕྱོགས་ནས་སློབ་མ་འཛུལ་ཞུགས་མི་ཆོག་པ་དང་། ནང་བསྟན་སློབ་གླིང་དུ་འཛིན་གྲྭ་ཁྱོན་ཡོངས་ཀྱི་བརྒྱ་ཆ་ ༤༠ ཆབ་སྲིད་དང་ཆོས་ཐོག་འབྲེལ་མེད་གནད་དོན་གཞན་གྱི་ཐོག་སློབ་ཁྲིད་བྱ་རྒྱུ་དང་། དེ་བཞིན་སློབ་གཉེར་བ་གསར་ཞུགས་སྐབས་ཆབ་སྲིད་ཀྱི་ལངས་ཕྱོགས་དང། རྒྱལ་ཁབ་ལ་ཞེན་ཁོགས། རྒྱ་ནག་གི་རིག་གཞུང་དང་དམར་ཤོག་ཚོགས་པའི་ལྟ་གྲུབ་ལ་ངོས་ལེན་གནང་མིན་དེ་ཆ་རྐྱེན་གལ་ཆེ་ཞིག་ཆགས་རྒྱུ་ཡིན་པ་སོགས་འཁོད་འདུག

ཁེ་ན་ཌ་གཞུང་ནས་རྒྱ་གཞུང་ལ་༸པཎ་ཆེན་རིན་པོ་ཆེ་མཆོག་དང་མཇལ་འཕྲད་ཞུ་བཅུག་དགོས་པ་གསུངས་འདུག

ཁེ་ན་ཌའི་གཞུང་གིས་རྒྱ་ནག་དང་ལྷན་དུ་རྒྱུན་རིང་འབྲེལ་བ་གནང་བའི་ཁྲོད་ཁུལ་དེའི་ནང་གི་འགྲོ་བ་མིའི་ཐོབ་ཐང་སྲུང་སྐྱོབ་དང་གོང་འཕེལ་བྱ་རྒྱུ་ནི་ཁེ་ན་ཌའི་ཕྱི་འབྲེལ་གྱི་སྲིད་བྱུས་གལ་ཆེ་ཞིག་ཏུ་ངོས་འཛིན་ཞུ་བཞིན་ཡོད་པ་དང་། ཁྱད་པར་དུ་ཁེ་ན་ཌའི་གཞུང་ནས་རྒྱ་ནག་གཞུང་ལ་ཡུལ་དེའི་སྐུ་ཚབ་མི་སྣར་བཙོན་འོག་ཏུ་ཡོད་པའི་༸པཎ་ཆེན་རིན་པོ་ཆེ་མཆོག་དང་མཇལ་འཕྲད་ཞུ་བཅུག་དགོས་པ་གསུངས་འདུག དེ་ཡང་དེ་སྔ་ཁེ་ན་ཌའི་གྲོས་ཚོགས་སུ་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ Grarrison ལགས་ཀྱིས་ཁེ་ན་ཌའི་གཞུང་ལ་བོད་ནང་གི་ཆབ་སྲིད་བཙོན་པའི་གནས་སྟངས་དང་། རྒྱ་ནག་གིས་བོད་ནང་གི་བོད་མིའི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་གནས་སྟངས་ཐོག་གྲོས་ཚོགས་བརྒྱུད་ནས་གཞུང་ལ་ཞུ་གཏུགས་གནང་ཡོད་པ་རེད། ཟླ་འདིའི་ཕྱི་ཚེས་ ༢༩ ཉིན་ཁེ་ན་ཌའི་ཕྱི་སྲིད་བློན་ཆེན་ Chrystia freeland ལགས་ཀྱིས་བོད་དོན་ཞུ་གཏུགས་གནད་དོན་ཐོག་ཡིག་ལམ་ནས་ལན་འདེབས་གནང་བ་དང་འབྲེལ། ཁེ་ཌའི་གཞུང་གི་ངོས་ནས་ད་བར་རྒྱ་གཞུང་ལ་ཁུལ་དེའི་ནང་གི་མང་ཚོགས་ཀྱི་འགྲོ་བ་མིའི་ཐོབ་ཐང་ལ་གུས་བརྩི་ཞུ་དགོས་པར་ནན་སྐུལ་རྒྱུན་ཆད་མེད་པ་གནང་བ་བཞིན་ཡོད་པ་དང། ཁྱད་པར་དུ་ཁེ་ན་ཌའི་གཞུང་གིས་བོད་ནང་གི་འགྲོ་བ་མིའི་ཐོབ་ཐང་གི་གནད་དོན་ཐོག་དམིགས་བསལ་དོ་སྣང་བྱེད་བཞིན་ཡོད་མོས་ལྟར། ཟླ་བ་སྔོན་མའི་ཕྱི་ཟླ་ ༡༢ ནང་ཁེ་ན་ཌའི་སྲིད་བློན་མཆོག་རྒྱ་ནག་ཏུ་འཚམས་གཟིགས་ཕེབས་སྐབས་རྒྱ་ནག་གི་འགོ་ཁྲིད་དང་ལྷན་དུ་བོད་ནང་གི་བོད་མིའི་གནས་སྟངས་དང་བོད་མིའི་ཆོས་དད་རང་དབང་སྐོར་གླེང་སློང་གནང་ཡོད་སྐོར་གསུངས་པ་མ་ཟད། ཁེ་ན་ཌའི་གཞུང་གིས་རྣམ་ཀུན་རྒྱ་གཞུང་ལ་༸གོང་ས་མཆོག་གི་སྐུ་ཚབ་ལྷན་དུ་འབྲེལ་མོལ་གྱི་ལམ་ནས་བོད་རྒྱའི་དཀའ་རྙོག་སེལ་དགོས་པར་ནན་སྐུལ་གནང་བཞིན་ཡོད་པའང་གསུངས་ཡོད། དེ་བཞིན་ལྕམ་སྐུ་ Chrystia freeland ལགས་ཀྱིས་ཀྱང་འདས་ལོའི་ཕྱི་ཟླ་ ༡༡ ནང་དུ་བོད་རང་སྐྱོང་ལྗོངས་ཀྱི་ཆབ་སྲིད་གྲོས་མོལ་ཁང་གི་ཚོགས་གཞོན་ཁེ་ཌར་གཞུང་འབྲེལ་འཚམས་སྐོར་འབྱོར་བསྟུན་རྒྱ་ནག་གི་བཙོན་འོག་ཏུ་ཡོད་པའི་བོད་མི་བཀྲིས་དབང་ཕྱུག་ལགས་དང་ཞོགས་ལྗང་ལགས་ཀྱི་གནད་དོན་ཐོག་གླེང་སློང་གནང་ཡོད་པ་མ་ཟད།  ལྷག་པར་དུ་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་སྐོར་གླེང་སློང་གནང་བ་དང་འབྲེལ་རིན་པོ་ཆེ་མཆོག་གིས་དབུས་པའི་སྐུ་འཁོར་ནང་མི་ལྷན་རྒྱས་ཆ་རྐྱེན་གང་ཡང་མེད་པར་གློད་བཀྲོལ་དགོས་པ་མ་ཟད། ཁེ་ན་ཌའི་གཞུང་སྐུ་ཚབ་མི་སྣར་རིན་པོ་ཆེ་མཆོག་དང་ཐུགས་འཕྲད་བྱེད་བཅུག་དགོས་པ་བསྐྱར་ནན་གསུངས་ཡོད་པ་རེད། ཕྱི་སྲིད་བློན་ཆེན་མཆོག་གིས་བོད་དོན་ཞུ་གཏུགས་གནང་བའི་ལན་འདེབས་དེའི་ནང་ཁེ་ན་ཌའི་གཞུང་གི་ངོས་ནས་མུ་མཐུད་རྒྱ་ནག་གཞུང་ལ་ཁུལ་དེའི་ནང་གི་མང་ཚོགས་ཀྱི་འགྲོ་བ་མིའི་ཐོབ་ཐང་ལ་གུས་བརྩི་ཞུ་དགོས་པ་དང། བོད་ནང་འགྲོ་བ་མིའི་ཐོབ་ཐང་རྩོད་ལེན་གནང་མཁན་བོད་མི་གཙོས་བཙོན་འོག་ཏུ་བཀག་སྐྱིལ་བྱས་པའི་ཆབ་སྲིད་བཙོན་པའི་གནས་སྟངས་ཐོག་མུ་མཐུད་ཐུགས་སྣང་གནང་ངེས་ཡིན་པ་གསུངས་ཡོད།

ཨིན་ཡུལ་སྲིད་བློན་མཆོག་ལ་རྒྱ་ནག་གི་བརྙས་བཅོས་འོག་མགོ་སྒུར་རྒྱུ་མེད་པའི་ཞུ་འབོད།

ཨིན་ཡུལ་གྱི་སྲིད་བློན་ལྕམ་ Theresa May མཆོག་དེ་རིང་ནས་ཉིན་གྲངས་གསུམ་རིང་རྒྱ་ནག་ཏུ་གཞུང་འབྲེལ་འཚམས་གཟིགས་ཕེབས་ཀྱི་ཡོད་པ་དང་བསྟུན། ཁ་སང་ཨིན་ཡུལ་ནང་རྟེན་གཞི་བྱས་པའི་ Tibet Society དང་ Free Tibet བོད་དོན་རྒྱབ་སྐྱོར་ཚོགས་པ་གཉིས་ཀྱིས་གཙོས་ཨིན་ཡུལ་བོད་རིག་ཚོགས་པ། ཨ་རིར་ཡོད་པའི་རྒྱལ་སྤྱིའི་བོད་དོན་འབྲེལ་མཐུད་ལས་ཁང་དང་རྒྱལ་སྤྱིའི་བོད་དོན་ལས་འགུལ་ཁང། དེ་བཞིན་བོད་རང་བཙན་སློབ་ཕྲུག་ཚོགས་པ་བཅས་ཀྱིས་ཨིན་ཡུལ་སྲིད་བློན་མཆོག་གི་མཚན་ཐོག་ཏུ་ཞུ་སྙན་ཞིག་ཕུལ་བའི་བརྒྱུད་རྒྱ་ནག་གཞུང་གི་བརྙས་བཅོས་འོག་མགོ་སྒུར་རྒྱུ་མེད་སྐོར་ཞུས་འདུག དེ་ཡང་ཁ་སང་རྒྱལ་སྤྱིའི་བོད་དོན་འབྲེལ་མཐུད་ལས་ཁང་གི་དྲ་གནས་ཐོག་བོད་དོན་རྒྱབ་སྐྱོར་ཚོགས་པ་དེ་དག་གིས་ཨིན་ཡུལ་སྲིད་བློན་མཆོག་གི་མཚན་ཐོག་ལ་ཕུལ་བའི་ཕྱག་བྲིས་དེ་འདོན་སྤེལ་གནང་འདུག་པ་དང། དེའི་ནང་བོད་དོན་རྒྱབ་སྐྱོར་ཚོགས་པ་རྣམས་ནས་བོད་ནང་གི་ཆེས་ཞན་པའི་འགྲོ་བ་མིའི་ཐོབ་ཐང་གི་གནས་སྟངས་དང། རྒྱ་ནག་གཞུང་གི་ངོས་ནས་རྒྱལ་སྤྱིའི་གཞུང་ཚོགས་ཁག་ལ་གནད་དོན་དེ་དག་ཐོག་གླེང་སློང་མི་གནང་བར་གནོན་ཤུགས་ཆེས་སྤྲོད་བཞིན་ཡོད་པར་བློ་འཚབ་ཡོད་པ་འགྲེལ་བརྗོད་དང་སྦྲགས། ཨིན་ཡུལ་ནི་རྒྱ་ནག་གི་ཚོང་འབྲེལ་ཤུགས་ཆེ་བྱ་ཡུལ་རྒྱལ་ཁབ་ཡིན་པའི་ཆ་ནས་རྒྱ་ནག་ཐོག་གནོན་ཤུགས་སྤྲོད་ཐུབ་མཁན་གྱི་རྒྱལ་ཁབ་ཡིན་སྟབས། ལྕམ་སྐུ་མཆོག་ནས་གནས་བབ་དང་ནུས་པ་དེ་དག་དམ་འཛིན་གྱིས་སྲིད་འཛིན་ཞི་ཅིང་ཕིང་དབུས་པའི་རྒྱ་ནག་གི་འགོ་ཁྲིད་ཚོ་དང་ལྷན་འགྲོ་བ་མིའི་ཐོབ་ཐང་དང་བོད་ཀྱི་གནད་དོན་ཐོག་ལ་གླེང་སློང་ངེས་པར་དུ་གནང་དགོས་གལ་ཡིན་པ་མ་ཟད། དེ་ལྟར་མ་གནང་ཚེ་ཨིན་ཡུལ་རྒྱལ་ཁབ་ཀྱི་གཞི་རྩའི་རིན་ཐང་དང་མང་གཙོའི་ལངས་ཕྱོགས་ཀྱི་ཆེ་མཐོང་ལ་གནོད་རྒྱུ་ཡིན་པ་གསུངས་འདུག བོད་དོན་རྒྱབ་སྐྱོར་ཚོགས་པའི་ཕྱག་བྲིས་དེའི་ནང་ད་དུངསྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་དང་རྒྱ་རིགས་སྐུ་ཞབས་ Liu Xiaobo ལགས་གཉིས་རྒྱ་ནག་གི་བཙོན་འཇུག་འོག་སྐུ་གྲོངས་པ་དང། རྒྱལ་ཁབ་ཀྱི་རྩ་ཁྲིམས་ནང་འཁོད་པའི་བོད་མིའི་སྐད་ཡིག་རང་དབང་ཐོག་ཕྱག་ལས་གནང་མཁན་བཀྲིས་དབང་ཕྱུག་ལགས་ལ་ཉེས་མེད་ཉེས་འཛུགས་ཀྱིས་ཁྲིམས་བཤེར་བྱས་པའི་གནད་དོན་ཁག་འབུར་བཏོན་གྱིས་བོད་དང་ཤིན་ཅང་། རྒྱ་ནག་རྒྱལ་ནང་གི་འགྲོ་བ་མིའི་ཐོབ་ཐང་དང་སྨྲ་བརྗོད་རང་དབང་ལ་བརྩི་མེད་རྡོག་རོལ་ཤུགས་ཆེ་གཏོང་བཞིན་ཡོད་པ་མངོན་གསལ་གནང་ཡོད་པ་རེད། ལྷག་ཏུ་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཁྲིམས་ཀྱི་འབྲུ་དོན་རྣམས་ཚོང་འབྲེལ་རྒྱལ་ཁབ་ཙམ་མ་ཟད་ཚོང་འབྲེལ་བྱ་ཡུལ་ས་གནས་ས་ཐོག་གི་མང་ཚོགས་ཡོངས་ལ་ཁྱབ་ཀྱི་ཡོད་སྟབས། ཨིན་ཡུལ་གཞུང་གི་ངོས་ནས་རྒྱ་ནག་དང་ལྷན་ཚོང་འབྲེལ་གནང་སྐབས་བོད་དང་ཤིན་ཅང་སོགས་ཀྱི་འགྲོ་བ་མིའི་ཐོབ་དང་སྤྱི་དམངས་ཀྱི་ཐོབ་ཐང་ལ་ཤུགས་རྐྱེན་ཇི་ལྟར་ཐེབས་ཀྱི་ཡོད་མེད་ལ་ཞིབ་འཇུག་གནང་རྒྱུའི་འོས་འགན་ཡོད་པ་ནན་བརྗོད་གནང་འདུག

Latest news