རྒྱལ་སྤྱི།

སི་པཱན་ནང་དུ་རྟེན་གཞི་བྱས་པའི་ Safeguard Defenders ཞེས་འགྲོ་བ་མིའི་ཐོབ་ཐང་ཚོགས་པའི་སྔ་ལོར་ Patrol and Persuade ཞེས་པའི་ཞིབ་འཇུག་སྙན་ཐོ་ཞིག་བཏོན་པའི་ནང་རྒྱལ་སྤྱིའི་ཡུལ་གྲུ་ཁག་ཏུ་དེ་སྔོན་རྒྱ་ནག་གིས་ཁྲིམས་འགལ་ཐོག་ཉེན་རྟོག་ལས་ཁང་ ༥༤ དང་ད་དུང་དེའི་ཐོག་ཉེན་རྟོག་ལས་ཁང་ ༤༨ གསར་དུ་བཙུགས་ཡོད་པ་མངོན་གསལ་གནང་ཡོད་པ་དང་སྦྲགས། ཁ་སྔོན་ཨ་རི་ནིའུ་ཡོག་ནང་རྒྱ་ནག་དེ་བཞིན་ཨ་རིའི་བདེ་འཇགས་ལ་ཉེན་ཁ་ཆགས་ཡོད་སྟབས། Biden བྷཡེ་ཌན་གྱི་གཞུང་འཛིན་ནས་རྒྱ་ནག་ལ་ཡ་ལན་ནན་པོ་སྤྲོད་དགོས་པའི་དགོས་འདུན་འོག་ས་གནས་སུ་རྒྱ་ནག་གི་ཁྲིམས་འགལ་ཉེན་རྟོག་ལས་ཁང་བཙུགས་པར་ངོ་རྒོལ་གྱིས་གསར་འགོད་ལྷན་ཚོགས་ཤིག་བསྐོང་ཚོགས་གནང་འདུག ཁ་སྔོན་ཕྱི་ཚེས་ ༢༥ ཉིན་ཨ་རིའི་གྲོས་ཚོགས་འོག་མའི་ཨ་རི་དང་རྒྱ་ནག་ཐོག་གི་ཐབས་བྱུས་ཚོགས་ཆུང་གི་ཚོགས་གཙོ་ Mike Gallagher ལགས་ཀྱིས་ཨ་རིའི་ནིའུ་ཡོག་གི་ China Town East broad way ནང་རྒྱ་ནག་གིས་ཁྲིམས་འགལ་ཐོག་ནས་ཉེན་རྟོག་ལས་ཁང་བཙུགས་པའི་ས་ཚིགས་ཀྱི་མདུན་དུ་གསར་འགོད་ལྷན་ཚོགས་ཞིག་བསྐོང་ཚོགས་གནང་ཡོད་པ་དང་། སྐབས་དེར་ཁོང་གིས་རྒྱ་ནག་སྲིད་གཞུང་གིས་རང་དབང་ལུང་པའི་ནང་ཡོད་པའི་མང་ཚོགས་ལ་སུན་གཙེར་བཟོ་ཡི་ཡོད་དང་ཆབས་ཅིག ཨ་རིའི་རྒྱལ་ཁབ་ནང་རྒྱ་ནག་གིས་གདུག་རྩུབ་དང་ཁྲིམས་འགལ་གྱི་བྱ་སྤྱོད་རིགས་སྤེལ་གྱི་ཡོད་པ་དེ་གང་དུ་འཐུས་ཤོར་འགྲོ་བཞིན་ཡོད་པ་དང་། ལྷག་པར་དུ་རྒྱ་ནག་གིས་ཨ་རིའི་སྲིད་དོན་པ་དང་། ཚོགས་སྡེ་ཁག བཟོ་ཚོང་ཁང་སོགས་ལ་ཐེ་བྱུས་བྱེད་བཞིན་ཡོད་པ་ཐེར་འདོན་གྱིས་རྒྱ་ནག་གི་བྱེད་ཕྱོགས་ལ་སྐྱོན་བརྗོད་ཤུགས་ཆེར་གནང་འདུག གསར་འགོད་ལྷན་ཚོགས་ཐོག་གཞན་ཡང་གྲོས་ཚོགས་འཐུས་མི་ Neal Dunn ལགས་དང་ Ritchie Torres ལགས། གནམ་སྡེ་སྒོ་མོ་ཆེའི་ངོ་རྒོལ་སྐབས་སློབ་ཕྲུག་གི་འགོ་ཁྲིད་ཡིན་པ། འགྲོ་བ་མིའི་ཐོབ་ཐང་གི་ལས་འགུལ་བ་ Fengsuo Zhou ལགས། དེ་བཞིན་ས་གནས་བོད་མི་སོགས་ནས་མཉམ་ཞུགས་གནང་བའི་ཐོག་ཨ་རིའི་སྤྱི་མཐུན་ཚོགས་པའི་གྲོས་ཚོགས་འཐུས་མི་རྣམས་ནས་ནིའུ་ཡོག་ནང་རྒྱ་ནག་གིས་ཁྲིམས་འགལ་ཐོག་ཉེན་རྟོག་ལས་ཁང་བཙུགས་པའི་གནད་དོན་ཐད་ཨ་རི་གཞུང་འཛིན་ནས་དེར་བརྡ་ལེན་ངེས་པར་དུ་གནང་དགོས་གལ་ཡིན་པ་གསུངས་འདུགརྒྱ་ནག་གིས་རྒྱལ་སྤྱིའི་ཁྲོད་ཁྲིམས་འགལ་གྱི་ཉེན་རྟོག་ལས་ཁང་བཙུགས་པའི་ཁྲོད། ཨ་རིའི་རྒྱལ་ས་ནིའུ་ཡོག་ནང་གཉིས་དང་ Los Angeles ལོས་ཨེནྗེལིས་ནང་གཅིག དེ་བཞིན་ཨ་རིའི་ས་གནས་གཞན་ལའང་གཅིག་བཅས་ཁྱོན་སྡོམ་ཉེན་རྟོག་ལས་ཁང་བཞི་ཡོད་པ་རེད་འདུག ཁྲིམས་འགལ་གྱི་ཉེན་རྟོག་ལས་ཁང་དང་འབྲེལ་ཏེ་རེས་གཟའ་པ་སངས་ཉིན་གྲོས་ཚོགས་འཐུས་མི་ Mike Gallagher ལགས་ཀྱིས་ FBI ཞེས་ཨ་རིའི་གསང་བའི་ལས་ཁུངས་ཀྱི་འགན་འཛིན་སྐུ་ཞབས་ Christopher Wray ལགས་སུ་ཕྱག་ཡིག་ཅིག་བཏང་ཏེ། རྒྱ་ནག་གིས་དེ་ལྟ་བུའི་ཉེན་རྟོག་ལས་ཁང་བརྒྱུད་མང་ཚོགས་ལ་བཙན་སྐུལ་བྱེད་པ་དེས་ཨ་མི་རི་ཀའི་མི་སེར་དང་དེར་གནས་བཞུགས་མི་མང་གིས་ཐོབ་ཐང་ལ་རྡོག་རོལ་བཏང་ཡོད་སྐོར་ཙམ་མ་ཟད། ཨ་རིའི་ནང་དེ་འབྲེལ་ཉེན་རྟོག་ལས་ཁང་ག་ཚོད་ཡོད་མིན་ཅེས་དྲི་བ་ནན་པོ་བཏང་ཡོད་པ་རེད་འདུགཡང་རྒྱ་ནག་གིས་འགྲོ་བ་མིའི་ཐོབ་ཐང་རྡོག་རོལ་གྱི་གནད་དོན་ཐོག་འདས་པའི་གཟའ་མཇུག་ལ་རྒྱལ་ཚོགས་ཀྱིས་ Twitter དྲ་གནས་ཐོག་རྒྱ་ནག་ནས་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལས་དོན་ལ་རྒྱབ་སྐྱོར་ཆེད་ཨ་སྒོར་འབུམ་བརྒྱད་ཀྱི་ཞལ་འདེབས་སྤྲད་ཡོད་སྐོར་བཀོད་འདུག་པ་དང་། དེར་འགྲོ་བ་མིའི་ཐོབ་ཐང་དོན་གཉེར་བ་ཚོས་ཟུར་ཟ་དང་སྐྱོན་བརྗོད་བྱས་པ་དང་སྦྲགས། རྒྱལ་ཚོགས་གནང་ཕྱོགས་དེར་ཨ་རིའི་ངོས་ནས་རྒྱལ་ཚོགས་ལ་རོགས་དངུལ་གྱི་རྒྱབ་སྐྱོར་གནང་མཚམས་བཞག་དགོས་ཅེས་གསུངས་འདུགདེའི་ཁྲོད་ཨ་རིའི་གྲོས་ཚོགས་འཐུས་མི་སྐུ་ཞབས་ Marco Rubio ལགས་ཀྱིས་རྒྱ་ནག་དམར་ཤོག་ཚོགས་པས་འགྲོ་བ་མིའི་ཐོབ་ཐང་ལ་རྒྱབ་སྐྱོར་བྱེད་པ་དེ་ནི་གད་མོ་ཤོར་བའི་གནས་ཤིག་ཡིན་སྐོར་གསུངས་པ་དང་ཆབས་ཅིག རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་ནས་རྒྱ་གཞུང་གིས་ཤིན་ཅང་ནང་འགྲོ་བ་མིའི་ཐོབ་ཐང་རྡོག་རོལ་གཏོང་བར་ཐུགས་སྣང་མ་གནང་བ་དེར་སྐྱོན་བརྗོད་ནན་པོ་གནང་འདུགམ་ཟད་དབྱིན་ཡུལ་ནང་རྟེན་གཞི་བྱས་པའི་རྒྱལ་སྤྱིའི་ཉེས་ཡངས་ཚོགས་པའི་གསར་འགོད་ལས་ཁང་གིས་རྒྱ་གཞུང་གི་རྒྱལ་ཚོགས་ལ་སྤྲད་པའི་ཞལ་འདེབས་ཀྱི་དངུལ་དེས་རྒྱ་ནག་ནང་འགྲོ་བ་མིའི་ཐོབ་ཐང་གི་གནས་སྟངས་ལ་རྟོག་ཞིབ་དང་དེ་བཞིན་ཤིན་ཅང་ནང་འགྲོ་བ་མིའི་ཐོབ་ཐང་རྡོག་རོལ་ཐད་ཞིབ་འཇུག་སླད་བེད་སྤྱོད་གཏང་དགོས་སྐོར་གྱི་དགོངས་ཚུལ་སོགས་བཏོན་འདུག

ཟླ་བ་འདིའི་ཕྱི་ཚེས་ ༡༤ ནས་ཕྱི་ཟླ་ ༣ པའི་ཚེས་ ༣ བར་རྒྱལ་ཚོགས་ཀྱི་དཔལ་འབྱོར་དང་སྤྱི་ཚོགས། རིག་གཞུང་ཐོབ་ཐང་ཚོགས་ཆུང་གི་བསྐྱར་ཞིབ་ཚོགས་ཐེངས་ ༧༣ པ་འཚོགས་བཞིན་པ་ལྟར་འདི་ཚེས་ ༡༥ དང་ ༡༦ བཅས་ཉིན་གཉིས་ཀྱི་རིང་ཚོགས་ཆུང་དེས་རྒྱ་ནག་ཐོག་དེ་འབྲེལ་བསྐྱར་ཞིབ་ལས་རིམ་ཚོགས་ཡོད་པ་དང་། སྐབས་དེར་རྒྱ་གཞུང་གིས་བོད་ནང་འབྲོག་པ་གཙོས་བོད་མི་རྣམས་བཙན་གྱིས་གནས་སྤོའི་སྲིད་བྱུས་དང་། བོད་ཕྲུག་རྣམས་བཅའ་སྡོད་སློབ་གྲྭར་བཙན་འཇུག་བྱེད་པའི་གནད་གླེང་སློང་གིས་འདྲི་རྩད་ནན་པོ་གནང་འདུག རྩ་བའི་རྒྱལ་ཚོགས་ཀྱི་ཚོགས་ཆུང་དེས་རྒྱ་ནག་ཐོག་གི་བསྐྱར་ཞིབ་ལས་རིམ་མ་ཚོགས་གོང་དུ་ཨ་རིར་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་དང་ Loyola ཁྲིམས་ཀྱི་སློབ་གྲྭ་གཉིས་ཟུང་སྦྲེལ་དང་། དེ་བཞིན་ Tibet Advocacy Coalition  ཞེས་བོད་དོན་ཞུ་གཏུག་ཐུན་མོང་ཚོགས་པས་རྒྱ་གཞུང་གིས་བོད་ནང་རྒྱལ་ཚོགས་ཀྱི་ཚོགས་ཆུང་དེའི་ཁྲིམས་སྒྲིག་ལག་བསྟར་ལུགས་མཐུན་བྱེད་ཀྱི་མེད་པའི་བློ་འཚབ་ཀྱི་རྣམ་པ་མངོན་གསལ་དང་སྦྲགས། རྒྱལ་ཚོགས་ཀྱི་དེ་འབྲེལ་ཚོགས་ཆུང་གི་ཁྲིམས་སྒྲིག་དོན་ཚན་ཁག་ལུང་འདྲེན་གྱིས་བོད་དོན་ཞུ་ཡིག་ཕུལ་ཡོད་པ་རེད། ཁ་སང་ཨེ་རིར་རྟེན་གཞི་བྱས་པའི་རྒྱལ་སྤྱི་བོད་དོན་ལས་འགུལ་ཁང་གིས་གསར་དུ་སྤེལ་བའི་གནས་ཚུལ་ལ་གཞིགས་ན། རྒྱལ་ཚོགས་ཀྱི་དཔལ་འབྱོར་དང་། སྤྱི་ཚོགས། རིག་གཞུང་ཐོབ་ཐང་ཚོགས་ཆུང་གི་ཚོགས་མི་རྒྱལ་སྤྱིའི་རང་དབང་ཅན་གྱི་ཆེད་མཁས་པ་ ༡༨ ནས་རྒྱ་ནག་གིས་བོད་ནང་དུ་དྲག་གནོན་ཅན་གྱི་སྲིད་བྱུས་ལག་བསྟར་ཁྲོད་ངལ་བ་འཕྲད་པའི་བོད་མི་རྣམས་ལ་མནར་གཅོད་སོགས་ཞེད་སྣང་གང་ཡང་མེད་པའི་ཐོག་ཁྲིམས་གཏུག་བྱེད་པའི་གོ་སྐབས་ཡོད་མེད་སོགས་ཀྱི་འདྲི་རྩད་བྱེད་སྐབས་རྒྱ་གཞུང་གི་འཐུས་མིས་ལན་འདེབས་གསལ་བཤད་བྱེད་ཐུབ་མེད་པ་དང་འབྲེལ། རྒྱ་གཞུང་གིས་བོད་ནང་ཆོས་དད་རང་མོས་རྡོག་རོལ་གྱིས་དྲ་གནོན་ཤུགས་ཆེར་བྱེད་ཀྱི་ཡོད་པའི་སྐྱོན་བརྗོད་ནན་པོ་གནང་ཡོད་པ་འཁོད་འདུག རྒྱལ་ཚོགས་ཀྱི་ཆེད་མཁས་པས་བོད་ནང་གི་བཅའ་སྡོད་སློབ་གྲྭའི་ལམ་ལུགས་དང་འབྲེལ་ནས་སློབ་གྲྭ་དེ་དག་གི་ནང་དུ་རྒྱ་གཞུང་གིས་གཏན་འབེབས་སློབ་ཚན་དང་སྐད་ཡིག་གཅིག་གི་སྲིད་བྱུས་ལག་བསྟར་གྱིས་བོད་པའི་ངོ་བོ་རྩ་གཏོར་གཏོང་བཞིན་ཡོད་པའི་བློ་འཚབ་ཀྱི་རྣམ་པ་མངོན་གསལ་དང་སྦྲགས། འདྲི་རྩད་བྱས་སྐབས། རྒྱ་གཞུང་གི་འཐུས་མིས་བོད་ནང་དེ་འབྲེལ་བཅའ་སྡོད་སློབ་གྲྭ་ཡོད་སྐོར་བཤད་ཡོད་པ་དེ་ལྟར་ཡང་། སློབ་གྲྭ་དེ་དག་བོད་ཀྱི་སྐད་ཡིག་དང་རིག་གཞུང་རྩ་མེད་བཟོ་ཆེད་དམིགས་པ་ཞིག་མིན་པ་སོགས་བཤད་ཡོད་པ་དང་ཆབས་ཅིག སྦེལ་ཇམ་སྐུ་ཚབ་གིས་རྒྱ་གཞུང་ནས་མི་རིགས་མཐུན་སྒྲིལ་གྱི་སྲིད་བྱུས་ཐོག་བསྐྱར་དུ་བསམ་ཞིབ་བྱ་དགོས་ངེས་ཡིན་པ་དང་། གལ་ཏེ་དེ་ལྟར་མ་བྱས་ཚེ་དེ་ནི་འགྲོ་བ་མིའི་ཐོབ་ཐང་རྡོག་རོལ་དང་ཁེ་ཕན་གང་ཡང་མེད་སྐོར་གསུངས་འདུག དེ་བཞིན་ཁོང་གིས་རྒྱ་གཞུང་ལ་བོད་པ་དང་ཡུ་གུར་མི་རིགས་ཐོག་དྲག་གནོན་ཅན་གྱི་སྲིད་བྱུས་ལ་རྒྱུ་མཚན་དང་ཆ་འཇོག་བྱེད་པར་འོས་པའི་སྐྱོན་འཛུགས་མང་པོ་ཡོད་པ་དེར་རང་དབང་ཅན་གྱི་རྟོག་ཞིབ་སོགས་ཀྱི་བརྒྱུད་ནས་ཞིབ་འཇུག་མཐིལ་ཕྱིན་པ་བྱེད་ཀྱི་ཡོད་མེད་སྐོར་འདྲི་རྩད་བྱེད་སྐབས་རྒྱ་གཞུང་གི་འཐུས་མི་རྣམས་ནས་ལེན་འདེབས་གང་ཡང་བྱས་མེད་པ་རེད་འདུག བསྐྱར་ཞིབ་ཀྱི་ཚོགས་འདུའི་ཐོག་རྒྱ་གཞུང་གི་འཐུས་མིས་བོད་ཀྱི་སྐད་ཡིག་འདི་བཞིན་ཚན་རིག་དང་མཐུན་པ་ཞིག་མིན་པར་ལོག་བཤད་བྱེད་སྐབས་ Spain སི་པན་སྐུ་ཚབ་ཀྱིས་གནད་དོན་དེར་སྐྱོན་བརྗོད་ནན་པོ་གནང་ཡོད་པ་དང་འབྲེལ། རྒྱལ་སྤྱིའི་བོད་དོན་ལས་འགུལ་ཁང་གི་རྒྱལ་ཚོགས་ཀྱི་འབྲེལ་མཐུད་པ་སྐུ་ཞབས། Kai Müller ལགས་ཀྱིས་རྒྱ་གཞུང་གིས་བོད་ཀྱི་རིག་གཞུང་འདི་རྗེས་ལུས་པ་ཞིག་ཡིན་སྐོར་བཤད་པ་དེ་རྒྱལ་ཚོགས་ནང་སླར་ཡང་བོད་ཐོག་དངོས་བདེན་མིན་པའི་འཁྱོག་བརྗོད་དང་དབྱེ་འབྱེད་ཀྱི་བྱ་སྤྱོད་ཅིག་ཡིན་པ་སྐྱོན་བརྗོད་དང་ཆབས་ཅིག རྒྱ་གཞུང་གི་འཐུས་མིས་བོད་དོན་ཐོག་གི་འདྲི་རྩད་བྱས་པ་དེར་ལན་འདེབས་བྱེད་མི་ཐུབ་པ་དང་ཡང་ན་ལན་འདེབས་མ་བྱེད་པའི་གནས་སྟངས་བྱུང་ཡོད་པ་མ་ཟད།  རང་དབང་ཅན་གྱི་སྙན་ཐོ་དེ་དག་གི་ནང་དོན་འགྲོ་བ་མིའི་ཐོབ་ཐང་རྡོག་རོལ་སོགས་བདེན་པ་མིན་པ་ལོག་བཤད་བྱེད་ཀྱི་ཡོད་པ་གསུངས་འདུག རྒྱལ་ཚོགས་ཀྱི་བསྐྱར་ཞིབ་ཀྱི་ལས་རིམ་དེའི་ཐོག་སུད་སི་བོད་ཀྱི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་དང་། རྒྱལ་སྤྱིའི་བོད་དོན་ལས་འགུལ་ཁང་གིས་སྐུ་ཚབ་ Kai Müller དེ་བཞིན་རྒྱ་གཞུང་གིས་བོད་ནང་བཅའ་སྡོད་སློབ་གྲྭ་ལག་བསྟར་བྱེད་བཞིན་པའི་སྲིད་བྱུས་མཐོང་ཐོས་མྱོང་གསུམ་ཡོད་མཁན་འབུམ་རམས་པ་རྒྱལ་ལོ་ལགས་དང་བོད་ཀྱི་ཆབ་སྲིད་བཙོན་ཟུར་མགོ་ལོག་འཇིགས་མེད་ལགས། Tibet Advocacy Coalition  ཞེས་བོད་དོན་ཞུ་གཏུག་ཐུན་མོང་ཚོགས་པས་སྐུ་ཚབ་སོགས་ལྷན་ཞུགས་གནང་ཡོད་འདུག གཞི་རྩའི་རྒྱལ་ཚོགས་ཀྱི་དེ་འབྲེལ་ཚོགས་ཆུང་ནས་བསྐྱར་ཞིབ་ལས་རིམ་གྱི་མཇུག་སྡོམ་ཞིབ་རྟོགས་དེ་ཕྱི་ཟླ་ ༣ ཚེས་ ༦ ཉིན་གདོན་རྒྱུ་ཡིན་པ་དང་འབྲེལ། དེའི་ནང་རྒྱ་གཞུང་གིས་དཔལ་འབྱོར་དང་སྤྱི་ཚོགས། དེ་བཞིན་རིག་གཞུང་ཐོབ་ཐང་གི་ཁྲིམས་སྒྲིག་ལག་བསྟར་དེ་བཞིན་་ལུགས་མཐུན་བྱེད་ཡོད་མེད་ཀྱི་གནད་དོན་གསལ་རྒྱུ་ཡིན་པ་རེད་འདུག

ཉེ་ལམ་ཡོ་རོབ་མཐུན་ཚོགས་དང་རྒྱ་ནག་གཉིས་དབར་ལོ་ཤས་རིང་ཆད་པའི་འགྲོ་བ་མིའི་ཐོབ་ཐང་གི་གྲོས་མོལ་དེ་སླར་གསོ་གནང་འཆར་ཡོད་པའི་གནས་ཚུལ་ཐོན་ཡོད་པ་ལྟར་རྒྱལ་སྤྱིའི་བོད་དོན་ལས་འགུལ་ཁང་གིས་གཙོས་པའི་འགྲོ་བ་མིའི་ཐོབ་ཐང་གི་ཚོགས་པ་བཅུས་ཡོ་རོབ་མཐུན་ཚོགས་ནས་རྒྱ་ནག་དང་གྲོས་མོལ་དེ་ཕྱིར་འཐེན་དགོས་པའི་ཞུ་སྐུལ་གནང་འདུག གཞི་རྩའི་ཡོ་རོབ་མཐུན་ཚོགས་དང་རྒྱ་ནག་གཉིས་དབར་གྱི་འགྲོ་བ་མིའི་ཐོབ་ཐང་གི་གྲོས་མོལ་དེ་འགྲོ་བ་མིའི་ཐོབ་ཐང་དང་འབྲེལ་ཏེ་ཕན་ཚུན་སྲིད་དོན་གྱི་ཉེས་ཆད་བཀལ་བའི་རྐྱེན་དབང་གིས་ཕྱི་ལོ་ ༢༠༡༩ ལོ་ནས་རེ་ཞིག་ཆད་ཡོད་པ་རེད།  ཟླ་བ་འདིའི་ཕྱི་ཚེས་ ༡༥ ཉིན་རྒྱལ་སྤྱིའི་བོད་དོན་ལས་འགུལ་ཁང་གཙོས་རྒྱལ་སྤྱིའི་ཉེས་ཡངསཚོགས་པ་དང་འཛམ་གླིང་ཡུ་གུར་ཚོགས་པ། འགྲོ་བ་མིའི་ཐོབ་ཐང་ལྟ་ཞིབ་སོགས་ཚོགས་པ་བཅས་ཀྱིས་ཡོ་རོབ་མཐུན་ཚོགས་ཀྱི་ཕྱི་སྲིད་དང་རྒྱལ་སྲུང་སྲིད་བྱུས་ཀྱི་ཆེས་མཐོའི་སྐུ་ཚབ་སྐུ་ཞབས་ Josep Borell Fontelles ལགས་ཀྱི་མཚན་ཐོག་ཏུ་ཞུ་སྙན་ཕུལ་འདུག་པ་དང་། ཁ་སང་རྒྱལ་སྤྱིའི་བོད་དོན་ལས་འགུལ་ཁང་གིས་དེ་འབྲེལ་གནས་ཚུལ་སྤེལ་གསལ་ཚོགས་པ་བཅུ་པོས་ཡོ་རོབ་མཐུན་ཚོགས་ནས་རྒྱ་ནག་དང་ལྷན་གྲོས་མོལ་དེ་འགྲོ་བ་མིའི་ཐོབ་ཐང་གི་གནས་སྟངས་ལ་བཟང་ཕྱོགས་ནས་འགྱུར་བ་གང་ཡང་མ་འགྲོ་བར་དུ་མུ་མཐུད་གྲོས་མོལ་གནང་རྒྱུ་མེད་པའི་ཞུ་སྐུལ་གནང་འདུག ཡོ་རོབ་མཐུན་ཚོགས་ཀྱིས་རྒྱ་ནག་དང་ལྷན་འབྲེལ་མོལ་ནམ་གནང་ཚེ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱིས་ཤིན་ཅང་ནང་གི་སྙན་ཐོ་བཏོན་པར་མཇུག་སྐྱོང་གནང་སྟེ་རྒྱ་གཞུང་གིས་ཡུ་གུར་དང་ཁ་ཆེའི་མི་རིགས་ཀྱི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་ཐད་རང་དབང་ཅན་གྱི་རྟོག་ཞིབ་ཆེད་འཛུགས་ཐོག་ནས་དེ་འབྲེལ་སྙན་ཐོ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ལ་འགོད་འབུལ་ཞུ་དགོས་པའི་གཞེན་སྐུལ་གནང་ཡོད།   ཡོ་རོབ་མཐུན་ཚོགས་ཀྱིས་ཡོངས་གྲགས་ཐོག་རྒྱ་ནག་ནས་བོད་དང་ཤིན་ཅང་། ཧོང་ཀོང་ནང་གི་གདུག་རྩུབ་ཅན་གྱི་སྲིད་བྱུས་ལག་བསྟར་བྱེད་རྒྱུ་མཚམས་འཇོག་དགོས་པ་དང་། བོད་མི་རྡོ་རྗེ་བཀྲ་ཤིས་ལགས་དང་།  Ilham Tohti ལགས།  Gui Minhai  ལགས་སོགས་འཛིན་བཟུང་བྱས་པའི་འགྲོ་བ་མིའི་ཐོབ་ཐང་དོན་གཉེར་བ་དང་ལས་འགུལ་བ་རྣམས་ཀྱི་མཚན་ཆེད་འདོན་གནང་སྟེ་ཁོང་རྣམས་འཕྲལ་མར་གློད་བཀྲོལ་གཏོང་དགོས་པ་སོགས་ཀྱི་དགོས་འདུན་མངོན་གསལ་གནང་འདུག

ཨོ་སི་ཊི་ལི་ཡའི་གྲོས་ཚོགས་གོང་མའི་འཐུས་མི་ལྕམ་སྐུ་ Janet Rice ལགས་ཀྱིས་ཡུལ་དེའི་གྲོས་ཚོགས་ནང་ཕྱི་སྲིད་ཀྱི་གནད་དོན་སྐོར་གསུང་བཤད་གནང་སྐབས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཇེ་ཞན་ཇེ་སྡུག་ཏུ་འགྲོ་བཞིན་པར་ཐུགས་འཚབ་དང་འབྲེལ་ཨོ་སི་ཊི་ལི་ཡ་གཞུང་གི་ངོས་ནས་བོད་ནང་གི་འགྲོ་བ་མིའི་ཐོབ་ཐང་སྲུང་སྐྱོབ་གནང་དགོས་པའི་འབོད་སྐུལ་ཞུས་འདུག ཉེ་ཆར་ཕྱི་ཚེས་ ༧ ཉིན་ལྕམ་སྐུ་ Janet Rice ལགས་ཀྱིས་ཡུལ་དེའི་གྲོས་ཚོགས་ནང་ཕྱི་སྲིད་ཀྱི་གནད་དོན་སྐོར་གསུང་བཤད་གནང་སྐབས་རྒྱལ་སྤྱིའི་ཐོག་གི་འགྲོ་བ་མིའི་ཐོབ་ཐང་གི་གནས་བབ་སོགས་དང་འབྲེལ་ཏེ་གསུང་བཤད་གནང་ཡོད་པ་དང་། སྐབས་དེར་ཁོང་གིས་ཕྱི་ལོ་ ༡༩༥༩ ལོར་རྒྱ་ནག་གཞུང་གིས་བོད་ནང་ལ་བཙན་འཛུལ་གྱིས་དབང་བསྒྱུར་བྱས་རྗེས་བོད་མི་རྣམས་རྒྱ་ནག་གི་དབང་བསྒྱུར་འོག་གནས་མུས་ཡིན་པ་མ་ཟད། ཕྱི་ལོ་ ༡༩༥༩ ལོའི་ཕྱི་ཟླ་ ༣ ཚེས་ ༡༠ ཉིན་བོད་མི་རྣམས་ཀྱིས་རྒྱ་གཞུང་གི་དྲག་གནོན་དང་བཙན་འཛུལ་ལ་སྒེར་ལངས་གནང་སྐབས་རྒྱ་ནག་གཞུང་གིས་དྲག་གནོན་ཤུགས་ཆེས་ཆེར་བྱས་སྟབས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་པའི་བོད་མི་མང་དག་ཅིག་བཙན་བྱོལ་དུ་ཕེབས་དགོས་བྱུང་ཡོད་པ་སོགས་བོད་ཀྱི་ལོ་རྒྱུས་ཁག་དྲན་གསོ་གནང་འདུག རྒྱ་ནག་གཞུང་གིས་བོད་ནང་བོད་མི་དམར་གསོད་བཏང་བ་མ་ཟད་བོད་ཀྱི་ས་ཁུལ་ཁག་ཏུ་རྒྱ་རིགས་གནས་སྤོས་བྱས་ཏེ་བོད་མི་རྣམས་སོ་སོའི་སྲོལ་རྒྱུན་དང་འཚོ་གནས་གནང་ཡུལ་ས་ཁག་ནས་གཞིས་སྤོས་བྱེད་དུ་བཅུག་པར་བརྟེན་ད་ཆ་བོད་མི་རྣམས་གྲངས་ཉུང་མི་རིགས་ལྟ་བུར་གྱུར་ཡོད་པ་གསུངས་འདུག ལྷག་པར་དུ་ལྕམ་སྐུ་ Janet Rice ལགས་ཀྱིས་རྒྱ་ནག་གཞུང་གིས་བོད་མིའི་རིག་གཞུང་རྩ་གཏོར་སླད་བོད་པའི་ཕྲུ་གུ་ས་ཡ་གཅིག་ལྷག་བཙན་དབང་གི་ཐོག་ནས་སོ་སོའི་ཕ་མ་དང་ཁ་བྲལ་དུ་བཏང་སྟེ་རྒྱ་གཞུང་གི་ཆེད་འཛུགས་བྱས་པའི་མི་སེར་སྤེལ་ཡུལ་གྱི་གཏན་འཇགས་སློབ་གྲྭ་ཁག་ཏུ་གཏོང་བཞིན་ཡོད་པ་སོགས་འགྲེལ་བརྗོད་དང་སྦྲགས། ཨོ་སི་ཊི་ལི་ཡ་གཞུང་གིས་བོད་ནང་གི་གཏན་འཇགས་སློབ་གྲྭའི་གནས་སྟངས་ལ་ཐུགས་སྣང་དང་བོད་མིའི་གཞི་རྩའི་འགྲོ་བ་མིའི་ཐོབ་ཐང་གི་གནས་བབ་སྲུང་སྐྱོབ་གནང་དགོས་པའི་འབོད་སྐུལ་ཞུས་འདུག རྩ་བའི་ཨོ་སི་ཊི་ལི་ཡའི་གྲོས་ཚོགས་གོང་མའི་འཐུས་མི་ལྕམ་སྐུ་ Janet Rice ལགས་ཀྱིས་དབུས་པའི་ཡུལ་དེའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་རིང་མིན་ཕྱི་ཟླ་བཞི་པའི་ནང་བོད་མིའི་སྒྲིག་འཛུགས་ཀྱི་བསྟི་གནས་བཞུགས་སྒར་དྷ་སར་ཆེད་ཕབས་ཀྱིས་བོད་མིའི་སྒྲིག་ལ་གཟིགས་ཞིབ་དང་། ༸གོང་ས་༸སྐྱབས་མགོན་ཆེན་པོ་མཆོག་དང་མཇལ་མོལ་ཞུ་རྒྱུ་འཆར་ཡོད་པ་རེད།

ཁ་སང་རེས་གཟའ་ཕུར་བུ་ཉིན་ཨ་རིའི་གྲོས་ཚོགས་འོག་མར་རྒྱ་ནག་གིས་ཨ་རིའི་བར་སྣང་ཁུལ་དུ་མྱུལ་ཞིབ་ལྒང་ཕུག་ཞིག་ཆེད་གཏོང་བྱས་པའི་གནད་དོན་ལ་འཛེམ་ཟོན་མེད་པར་སྐྱོན་བརྗོད་གནང་བ་དང་འབྲེལ་ཏེ་སྤྱི་མོས་ཀྱིས་གྲོས་ཆོད་ཅིག་གཏན་འབེབས་གནང་འདུག གཟའ་འཁོར་སྔོན་མའི་ནང་ཨ་རིའི་རྒྱལ་སྲུང་ལྷན་ཁང་གིས་རྒྱ་གཞུང་ནས་ཨ་རིའི་ Montana མངའ་སྡེའི་བར་སྣང་ཁུལ་དུ་གསང་བའི་གནས་ཚུལ་བསྡུར་རུབ་སླད་ལྒང་ཕུག་ཆེད་གཏོང་བྱས་ཡོད་པ་རྩད་གཅོད་གནང་རྗེས་ཨ་རིའི་མཁའ་དམག་དཔུང་སྡེས་སྲིད་འཛིན་ Joe Biden མཆོག་གི་བཀའ་འཁྲོལ་འོག་རྒྱ་ནག་གི་མྱུལ་ཞིབ་ལྒང་ཕུག་དེ་གཏོར་བཤིག་བཏང་སྟེ་ད་ལྟའི་ཆར་ལྒང་ཕུག་དེའི་ཆ་ཤས་ཁག་བསྡུ་རུབ་གནང་བཞིན་ཡོད་པའི་ཐོག་ལྒང་ཕུག་གི་གསང་བའི་ལས་དོན་གྱི་འཕྲུལ་ཆས་ཁག་གི་ཐོག་ལའང་ལྟ་ཞིབ་གནང་མུས་ཡིན་པ་དང་། གནད་དོན་དེའི་རྐྱེན་གྱིས་ཨ་རིའི་ཕྱི་སྲིད་དྲུང་ཆེ་མཆོག་གི་རྒྱ་ནག་གི་འཚམས་གཟིགས་དེ་ཕྱིར་འགྱངས་གནང་དགོས་བྱུང་བ་མ་ཟད། ཁ་ཉིན་ཨ་རིའི་ཕྱི་སྲིད་ལས་ཁུངས་ཀྱིས་འདས་པའི་ལོ་ཤས་ནང་འཛམ་གླིང་གི་གླིང་ཆེན་ཉུང་མཐར་ལྔའི་ནང་རྒྱ་ནག་གི་གསང་མྱུལ་ལྒང་ཕུག་དེ་རིགས་ཕུར་བསྐྱོད་བྱས་ཡོད་པར་གསལ་བཏོན་གནང་ཡོད་པ་རེད། ཨ་རིའི་བར་སྣང་ཁུལ་དུ་རྒྱ་ནག་གི་མྱུལ་ཞིབ་ལྒང་ཕུག་འཕུར་སྐྱོད་ཀྱིས་རྒྱལ་ཁབ་དེའི་ས་ཁོངས་བདག་དབང་ལ་བརྟན་ལྷིང་མེད་པ་བཟོ་ཐབས་ཀྱི་གནད་དོན་དང་འབྲེལ། ཁ་སང་ཨ་རིའི་གྲོས་ཚོགས་འོག་མར་གྲོས་ཚོགས་འཐུས་མི་ ༤༡༩ ཡིས་རྒྱ་ནག་གིས་མྱུལ་ཞིབ་ལྒང་ཕུག་ཆེད་གཏོང་བྱས་པའི་བྱ་སྤྱོད་ལ་མཐའ་གཅིག་ཏུ་སྐྱོན་བརྗོད་དང་འབྲེལ་སྤྱི་མོས་ཀྱི་གྲོས་ཆོད་གཏན་འབེབས་གནང་འདུག སྐབས་དེར་ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་ Michael McCaul ལགས་ཀྱིས་རྒྱ་གཞུང་ནས་མྱུལ་ཞིབ་ལྒང་ཕུག་བརྒྱུད་ཨ་རིའི་ས་ཁོངས་བདག་དབང་ལ་ངོ་ཚ་མེད་པར་གདལ་བཤིག་གི་བྱེད་བབ་སྐྱོན་བརྗོད་ནན་པོ་གནང་ཡོད། ད་ཆ་རྒྱ་ནག་གི་མྱུལ་ཞིབ་ལྒང་ཕུག་གི་གནད་དོན་ཐད་ཨ་རིའི་གྲོས་ཚོགས་འཐུས་མི་རྣམས་ཀྱིས་རྒྱ་གཞུང་ལ་འཛེམ་ཟོན་མེད་པར་སྐྱོན་བརྗོད་གནང་བཞིན་པ་དང་ཨ་རིའི་རྒྱལ་སྲུང་ལྷན་ཁང་ལ་དེ་འབྲེལ་གྱི་གནས་ཚུལ་ཞིབ་ཕྲ་ཕྱིར་བསྒྲགས་གནང་དགོས་པའི་རེ་འདུན་བཏོན་པའི་ཁྲོད་འདིར་ཁ་སང་ཨ་རིའི་ཕྱི་སྲིད་ལས་དོན་ཚོགས་ཆུང་གི་ཉན་ཞིབ་ལས་རིམ་ཐོག་ཕྱི་སྲིད་དྲུང་ཆེ་གཞོན་པ་ལྕམ་ Wendy Sherman ལགས་སུ་དེ་འབྲེལ་གནད་དོན་ཐད་འདྲི་རྩད་གནང་འདུག

ཨ་རིའི་རྒྱལ་ས་ Washington DC ནང་སྐབས་ ༡༡༨ པའི་ཨ་རིའི་གྲོས་ཚོགས་གསར་པའི་ཚོགས་དུས་ཀྱི་ལས་རིམ་འཚོགས་བཞིན་པའི་དུས་སྐབས་འདིར་ཡུལ་དེའི་ཆབ་སྲིད་ཚོགས་པ་གཉིས་ཀ་ལས་གྲུབ་པའི་གྲོས་ཚོགས་འཐུས་མི་ཁག་ཅིག་ནས་ Promoting a Resolution to the Tibet-China Conflict Act ཞེས་པའི་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་དེ་གྲོས་ཚོགས་གོང་འོག་གཉིས་ཀའི་ནང་བསྐྱར་དུ་ཆེད་བཏོན་གནང་འདུགཁ་སང་ཕྱི་ཚེས་ ༨ ཉིན་ཨ་རིའི་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་གི་ཚོགས་གཙོ་གྲོས་ཚོགས་འོག་མའི་འཐུས་མི་སྐུ་ཞབས་ Michael McCaul ལགས་དང་། ཡུན་རིང་ནས་བོད་དོན་རྒྱབ་སྐྱོར་གནང་མཁན་གྲོས་ཚོགས་འོག་མའི་འཐུས་མི་སྐུ་ཞབས་ JimMcgovern ལགས་གཉིས་ནས་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་དེ་གྲོས་ཚོགས་འོག་མའི་ནང་བསྐྱར་དུ་ཆེད་བཏོན་གནང་ཡོད་པ་དང་། སྐབས་དེར་སྐུ་ཞབས་ Michael McCaul ལགས་ནས་རྒྱ་ནག་དམར་ཤོག་གཞུང་གིས་བོད་མི་རྣམས་ལ་མུ་མཐུད་བཙན་གནོན་དང་། ལྟ་སྲུང་དང་དམ་བསྒྲགས་སོགས་ཐབས་བྱུས་སྣ་ཚོགས་ཐོག་ནས་གཞི་རྩའི་འགྲོ་བ་མིའི་ཐོབ་ཐང་ལོངས་སུ་སྤྱོད་མཁན་གྱི་བོད་མི་རྣམས་གང་བྱུང་འཛིན་བཟུང་བཀག་ཉར་དང་བཙོན་འཇུག་སོགས་ཀྱི་ཁྲིམས་ཐག་བཅད་བཞིན་པ་སོགས་འགྲེལ་བརྗོད་དང་སྦྲགས། ད་རེས་གྲོས་ཚོགས་ནང་རྒྱ་ནག་གཞུང་གིས་བོད་བཙན་བཟུང་བྱས་པའི་གནས་སྟངས་དེ་ཁྲིམས་མཐུན་ཡིན་སྐོར་བཤད་བཞིན་པ་དེ་ལ་ངོས་ལེན་མེད་པ་སོགས་འཁོད་པའི་ཁྲིམས་འཆར་དེ་བསྐྱར་དུ་ཆེད་འདོན་ཞུ་རྒྱུའི་གོ་སྐབས་བྱུང་བར་སྤོབས་པ་ཆེན་པོ་ཡོད་ཅེས་གསུངས་འདུག སྐུ་ཞབས་ JimMcgovern ལགས་ནས་ད་བར་རྒྱ་ནག་གཞུང་དང་རྒྱལ་སྤྱིའི་སྤྱི་ཚོགས་ཀྱི་ངོས་ནས་བོད་མིའི་རང་ཐག་རང་གཅོད་གཙོས་པའི་རྒྱལ་སྤྱིའི་ཁྲིམས་ལུགས་རང་དབང་ནང་གསལ་གཞི་རྩའི་རང་དབང་དང་ཐོབ་ཐང་ཁག་ལ་བརྩི་བཀུར་ཞུས་མེད་པ་སོགས་འགྲེལ་བརྗོད་དང་སྦྲགས། ད་རེས་ཆབ་སྲིད་ཚོགས་པ་ཐུན་མོང་གིས་ཆེད་བཏོན་གནང་པའི་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་འདིས་བོད་རྒྱའི་དཀའ་རྙོག་འདི་བཞིན་གྲོས་མོལ་གྱི་ལམ་ནས་སེལ་ཐབས་སུ་ནུས་པ་ཞིག་འཐོན་ངེས་ཡིན་པ་སོགས་གསུངས་འདུགགཞི་རྩའི་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་འདི་འདས་ལོའི་ཕྱི་ཟླ་ ༧ དང་། ༡༢ སོ་སོའི་ནང་གྲོས་ཚོགས་གོང་འོག་གཉིས་སུ་ཆེད་བཏོན་གནང་ཡོད་ཀྱང་། སྔ་ལོའི་ལོ་མཇུག་ཏུ་ཨ་རིའི་གྲོས་ཚོགས་ཀྱི་བར་མའི་འོས་བསྡུ་དང་སྦྲགས། གྲོས་ཚོགས་སྐབས་ ༡༡༨ པའི་ལས་དོན་དབུ་འཛུགས་གནང་ཡོད་སྟབས་ཁྲིམས་འཆར་དེ་ད་རེས་བསྐྱར་དུ་ཆེད་བཏོན་གནང་བ་ཞིག་ཆགས་ཀྱི་ཡོད་པ་རེད། ཁ་སང་ཁྲིམས་འཆར་དེ་གྲོས་ཚོགས་གོང་མའི་ནང་ཆེད་འདོན་གནང་མཁན་གྲོས་ཚོགས་གོང་མའི་འཐུས་མི་སྐུ་ཞབས་ Jeff Merkley ལགས་ནས། ཁྲིམས་འཆར་འདིས་ཨ་རི་གཞུང་གི་ངོས་ནས་བོད་རྒྱའི་དཀའ་རྙོག་འདི་དུས་ད་ལྟའང་སེལ་མེད་པའི་གནས་དོན་ཞིག་ལ་ངོས་འཛིན་བྱེད་བཞིན་ཡོད་ཅེས་རྒྱ་ནག་གཞུང་ལ་བརྡ་ལན་གསལ་པོ་ཆགས་རྒྱུ་ཙམ་མ་ཟད། རྒྱ་ནག་གཞུང་ནས་བོད་མིའི་མངོན་འདོད་དང་མཐུན་པའི་ཐོག་ནས་བོད་རྒྱའི་དཀའ་རྙོག་སེལ་རྒྱུའི་ཐོག་ངེས་པར་དུ་གོམ་པ་སྤོ་དགོས་པ་གསུངས་འདུག མ་ཟད་ཁྲིམས་འཆར་དེ་ལ་རྒྱབ་སྐྱོར་གནང་མཁན་གྲོས་ཚོགས་གོང་མའི་འཐུས་མི་སྐུ་ཞབས་ Todd Young ལགས་ནས་རྒྱ་ནག་གཞུང་གིས་བོད་མིར་གཉའ་གནོན་དང་བོད་ཀྱི་གནས་བབ་ཐོག་ལ་འགྲེལ་འོག་བྱེད་བཞིན་པ་དེ་དག་དོན་དངོས་ཐོག་རྒྱ་ནག་རང་ཉིད་ལ་གནོད་པའི་བྱ་བ་ཞིག་ཆགས་ཀྱི་ཡོད་པ་འགྲེལ་བརྗོད་དང་སྦྲགས། ཁྲིམས་འཆར་འདིས་ཨ་རིའི་ངོས་ནས་རྒྱ་ནག་གཞུང་གིས་ད་ལྟའི་བོད་ཀྱི་གནས་བབ་ཐོག་བཤད་བཞིན་པའི་འགྲེལ་བརྗོད་དེ་ལ་ངོས་ལེན་མེད་པ་གསལ་པོ་ཆགས་ཀྱི་ཡོད་ཅེས་གསུངས་འདུག རྩ་བའི་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་དེའི་ནང་རྒྱལ་སྤྱིའི་ཁྲིམས་ཐོག་ནས་བོད་ཀྱི་གནད་དོན་འདི་དུས་ད་ལྟའང་ཐག་གཅོད་མ་ཟིན་པའི་གནད་དོན་ཞིག་ཡིན་པ་དང་། བོད་མི་རྣམས་ལ་རང་ཐག་རང་གཅོད་ཀྱི་ཐོབ་ཐང་ཡོད་པར་ངོས་འཛིན། དེ་བཞིན་༸གོང་ས་མཆོག་གམ་མགོན་པོ་༸གང་ཉིད་མཆོག་གི་སྐུ་ཚབ་དང་ལྷན་དུ་གྲོས་མོལ་བསྐྱར་གསོ་མ་གནང་བ་དེ་རྒྱ་ནག་གི་ནོར་འཁྲུལ་ཞིག་ཡིན་པ་དང་། རྒྱ་ནག་གི་ལོ་རྒྱུས་ཁྲོད་བོད་ཐོག་བདག་དབང་ཡོད་སྐོར་བརྗོད་བཞིན་པ་དེ་འཁྱོག་བཤད་འབའ་ཞིག་ཡིན་པ་སོགས་འཁོད་ཡོད་པ་མ་ཟད། ད་རེས་ཁྲིམས་འཆར་དེ་གྲོས་ཚོགས་གོང་འོག་གཉིས་སུ་ཆེད་འདོན་གནང་སྐབས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ཨ་རིའི་ནང་གཞུང་འབྲེལ་འཚམས་གཟིགས་དང་སྦྲགས། ཁྲིམས་འཆར་འདོན་སྤེལ་གནང་མཁན་གྱི་གྲོས་ཚོགས་གོང་འོག་གཉིས་ཀྱི་འཐུས་མི་གཙོས་པའི་གྲོས་ཚོགས་འཐུས་མི་གཞན་མི་ཉུང་བ་ཞིག་དང་དངོས་སུ་ཐུག་འཕྲད་ཀྱིས་ཁྲིམས་འཆར་དེ་གཏན་འབེབས་ཐུབ་རྒྱུས་གཙོས་པའི་བོད་ཀྱི་གནད་དོན་སྤྱི་ཡོངས་ཐོག་མུ་མཐུད་རྒྱབ་སྐྱོར་གནང་སྐྱོང་ཡོང་བ་སོགས་ཀྱི་ཞུ་སྐུལ་གནང་ཡོད་པ་རེད།  

དེ་རིང་བཞུགས་སྒར་དུ་བོད་ཁམས་བྲག་མགོ་ནང་དུ་རྒྱ་ནག་གཞུང་གིས་དགོན་པའི་སློབ་གྲྭ་དང་སྐུ་བརྙན། མ་ཎིའི་འཁོར་ལོ་སོགས་གཏོར་བཤིག་བཏང་བ་མ་ཟད། དུས་ད་ལྟའང་བོད་མི་གང་བྱུང་འཛིན་བཟུང་དང་ས་གནས་སུ་གནས་སྟངས་ཛ་དྲག་ཡིན་པའི་སྙན་ཐོའི་སྐོར་བགྲོ་གླེང་གི་ལས་རིམ་ཞིག་ཚོགས་གནང་སོང་།དེ་རིང་གི་བགྲོ་གླེང་ལས་རིམ་འདིའི་ཐོག་ཨིན་ཡུལ་ནང་གི་ Tibet Society དང་ Free Tibet བོད་དོན་རྒྱབ་སྐྱོར་ཚོགས་པའི་སྤྱི་ཁྱབ་འགན་འཛིན་སྐུ་ཞབས་ Sam Walton ལགས་ཆེད་ཕེབས་གནང་ཡོད་པ་ལྟར། འདི་གའི་གསར་འགོད་པས་ཁོང་ལ་བཅར་འདྲི་ཞུས་སྐབས་ཁོང་གིས། ཉེ་འཆར་ Free Tibet དང་བོད་གནས་ལྟ་ཞིབ་ཁང་། དེ་བཞིན་ Tibet Society གསུམ་ནས་ཨིན་ཡུལ་གྲོས་ཚོགས་ནང་ཁམས་བྲག་མགོའི་སྐོར་གྱི་སྙན་མཐོ་འདོན་སྤེལ་གནང་བའི་སྐབས་ཨིན་ཡུལ་སྲིད་བློན་གྱི་ཆོས་དད་རང་དབང་གི་དམིགས་བསལ་སྐུ་ཚབ་གྲོས་ཚོགས་འཐུས་མི་ལྕམ་སྐུ་ Fiona Bruce ལགས་ཆེད་ཕེབས་གནང་ཡོད་པ་དང་འབྲེལ། སྐབས་དེར་ཁོང་གིས་རྒྱ་ནག་གིས་བོད་ནང་དུ་བོད་མིའི་ཆོས་དད་རང་དབང་ཐོག་དྲག་གནོན་བྱེད་བཞིན་པའི་ཁུངས་ལྡན་གནས་ཚུལ་དང་ཟུང་སྐར་གྱི་འདྲ་པར་དང་འབྲེལ་བའི་སྙན་མཐོ་འདི་ལྟ་བུ་ལག་སོན་བྱུང་བ་དེ་ཧ་ཅང་ཕན་ཐོགས་བྱུང་ཡོད་སྐོར་གསུངས་པ་དང་ཆབས་ཅིག རང་འགུལ་ཐོག་ཨིན་ཡུལ་གྱི་ཆབ་སྲིད་གླེང་སྟེགས་འདྲ་མིན་དང་སྒེར་གྱི་ Twitter དྲ་ལམ་ཐོག་སྙན་མཐོ་དེའི་སྐོར་གླེང་སློང་གནང་ཡོད་པ་གསུངས་སོང་། དེ་བཞིན་ཨིན་ཡུལ་ཕྱི་སྲིད་ལས་ཁུངས་ཀྱི་ Common Wealth ལས་ཁུངས་ནས་ཀྱང་སྙན་མཐོ་དེའི་སྐོར་བོད་དོན་རྒྱབ་སྐྱོར་ཚོགས་པ་རྣམས་ལ་འབྲེལ་བ་གནང་ཡོད་སྐོར་དང་འབྲེལ། ཨིན་ཡུལ་གཞུང་གིས་སྙན་ཐོ་དེ་རྒྱ་ནག་དང་བོད་ཐོག་གི་སྲིད་བྱུས་འཛིན་ཕྱོགས་ལ་ཕན་ཐོགས་ཆེན་པོ་ཡོང་རྒྱུ་ཡིན་པ་གསུངས་ཡོད་འདུགSam Walton ལགས་ཀྱིས་ད་དུང་། དེང་སྐབས་བྱང་ཀོ་རི་ཡ་ལས་བོད་ནང་གི་གནས་ཚུལ་མཁོ་སྒྲུབ་བྱ་རྒྱུ་དཀའ་ཁག་ཡོད་པ་དང་། ཐེངས་འདིའི་སྙན་མཐོ་དེ་བོད་ནང་གི་ཁུངས་ལྡན་གནས་ཚུལ་ཕྲན་བུ་ཕྱིར་འགྱར་བྱུང་བ་དེ་དག་ཡིན་པ་དེ་ལྟར་ཡང་། རྒྱལ་སྤྱིའི་བརྒྱུད་ལམ་ཁག་གི་དོ་སྣང་དེ་ཙམ་མ་བྱེད་པར། བོད་མིའི་འཐབ་རྩོད་དང་དཀའ་སྡུག་མྱོང་བཞིན་པར་མཐོང་ཆུང་བཏང་བ་ལྟ་བུ་མངོན་རྒྱུ་ཡོད་སྟབས། རྒྱལ་སྤྱིའི་བརྒྱུད་ལམ་ཁག་ནས་བོད་ནང་གི་གནས་ཚུལ་ཐོག་དོ་སྣང་ཆེ་ཙམ་བྱ་དགོས་པ་གཟིགས་ཀྱི་ཡོད་སྐོར་སོགས་གསུངས་སོང་། བགྲོ་གླེང་གྲུབ་མཚམས་སུ་འདི་གའི་གསར་འགོད་པས་གཏམ་བཤད་པ་ཁམས་བྲག་མགོ་ནས་ཡིན་པ་བྷོ་ཊི་འོད་སྣང་ལགས་སུ་ད་ལྟ་བྲག་མགོ་ནང་གི་གནས་སྟངས་སྐོར་ལ་བཅར་འདྲི་ཞུས་སྐབས། ཁོང་གིས་སྤྱིར་ད་ལྟའི་ཆར་ཁུལ་དེར་དམ་བསྒྲགས་ཀྱིས་འབྲེལ་བ་བྱེད་རྒྱུ་ཧ་ཅང་དཀའ་ཁག་ཡོད་སྐོར་དང་འབྲེལ། དེ་སྔ་བྲག་མགོ་ནང་གི་གནས་ཚུལ་ཐོག་མར་ཕྱིར་འགྱར་བྱུང་བའི་རྗེས་བཙན་བྱོལ་ནང་གི་བོད་མི་རྣམས་ནས་གདུང་སེམས་མཉམ་བསྐྱེད་ཀྱི་ལས་འགུལ་རིམ་པ་སྤེལ་ཡོད་པ་ལྟར། སྐབས་དེར་ལས་འགུལ་ཐོག་གཏམ་བཤད་གནང་མཁན་བོད་མི་ཞིག་གི་ནང་མི་སྤུན་མཆེད་གཉིས་རྒྱ་གཞུང་གིས་ཉེས་འཛུགས་སྣ་ཚོགས་འོག་འཛིན་བཟུང་བྱས་ཡོད་པ་མ་ཟད། སྔ་ལོའི་ཕྱི་ཟླ་ ༡༠ པའི་ནང་བོད་མི་ཆབ་སྲིད་བཙོན་པ་དགེ་བཤེས་བསྟན་འཛིན་དཔལ་བཟང་ལགས་དགོངས་པ་རྫོགས་སྟེ་སྐུ་ཕུང་ཞུགས་འབུལ་གནང་བའི་སྐབས་རྒྱ་མི་ཉེན་རྟོག་པ་འཕོན་ཆེན་བསླེབས་ཏེ་དམ་བསྒྲགས་བྱས། སྐབས་དེར་སྐུ་ཕུང་ཞུགས་འབུལ་གྱི་སྐུ་པར་སྒྲོན་མཁན་བོད་མི་གཞོན་སྐྱེས་ཤིག་ལ་བཅར་རྡུང་དྲག་པོ་བཏང་སྟེ་བཀག་ཉར་དང་སུན་གཙེར་བཟོས་ཡོད་པ་འགྲེལ་བརྗོད་གནང་སོང་།

ཁ་སང་ཁེ་ན་ཌའི་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་གིས་བོད་ནང་གི་བཅའ་སྡོད་སློབ་གྲྭའི་སྐོར་ཉན་ཞིབ་ཀྱི་ལས་རིམ་ཞིག་བསྐོང་ཚོགས་གནང་འདུགཉན་ཞིབ་ཀྱི་ལས་རིམ་ཐོག་རྒྱ་གཞུང་གིས་བོད་ནང་བཅའ་སྡོད་སློབ་གྲྭ་ལག་བསྟར་བྱེད་བཞིན་པའི་སྲིད་བྱུས་མཐོང་ཐོས་མྱོང་གསུམ་ཡོད་མཁན་འབུམ་རམས་པ་རྒྱལ་ལོ་ལགས་དང་བོད་དོན་ལས་འགུལ་བསྟི་གནས་ཁང་གི་འགན་འཛིན་བཀྲེས་མཐོང་ལྷ་སྒྲོན་ལགས།  བོད་དོན་ལས་འགུལ་བ་འཆི་མེད་ལྷ་མོ་ལགས་བཅས་མཉམ་ཞུགས་གནང་འདུག ཁེ་ན་ཌའི་གྲོས་ཚོགས་འཐུས་མི་ Heather Mcpherson ལགས་ཀྱིས་ Twitter དྲ་ལམ་ཐོག་ཉན་ཞིབ་ལས་རིམ་བརྒྱུད་ནས་བོད་ནང་གི་བཅའ་སྡོད་སློབ་གྲྭའི་སྐོར་ཐོས་སྐབས་ཧ་ཅང་ཡིད་སྐྱོ་བ་དང་ཁེ་ན་ཌའི་གཞུང་མང་ཡོངས་ཀྱི་ངོས་ནས་རྒྱ་ནག་གིས་བོད་མིའི་ངོ་བོ་དང་རིག་གཞུང་རྩ་མེད་གཏོང་བཞིན་ཡོད་པའི་ཁར་བོད་དེ་བཞིན་རྒྱ་ནག་ཅན་དུ་བསྒྱུར་རྒྱུའི་སྲིད་བྱུས་ལ་ཡོངས་གྲགས་ཀྱིས་ངོ་རྒོལ་སྐྱོན་བརྗོད་ཤུགས་ཆེ་གནང་དགོས་པ་གསུངས་འདུག གཞི་རྩའི་ཁ་སྔོན་ཕྱི་ཚེས་ ༦ ཉིན་རྒྱལ་ཚོགས་ཀྱི་རང་དབང་ཅན་གྱི་དམིགས་བསལ་ཆེད་མཁས་པ་ཁག་གཅིག་གིས་རྒྱ་གཞུང་གིས་བོད་ནང་མི་སེར་སྤེལ་ཡུལ་གྱི་བཅའ་སྡོད་སློབ་གྲྭ་ཆེད་འཛུགས་བརྒྱུད་དེ་བོད་ཕྲུག་ས་ཡ་ ༡ ལྷག་རང་ཉིད་ཀྱི་ཁྱིམ་དང་ཁ་བྲལ་བཏང་སྟེ་བོད་ཀྱི་ཆོས་དང་རིག་གཞུང་།  སྐད་ཡིག་སོགས་རྒྱ་ནག་ཅན་དུ་བསྒྱུར་ཐབས་ཀྱི་སྲིད་བྱུས་ལག་བསྟར་བྱེད་བཞིན་པར་བློ་འཚབ་ཆེས་ཆེར་བསྟན་པ་དང་སྦྲགས། རྒྱ་ནག་གི་བྱེད་ཕྱོགས་དེ་ནི་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཁྲིམས་སྒྲིག་དང་ཡོངས་སུ་འགལ་བ་ཞིག་ཆགས་ཡོད་པར་སྐྱོན་བརྗོད་ནན་པོ་གནང་ཡོད།

བོད་དང་ཐེ་ཝན་འགྲོ་བ་མིའི་ཐོབ་ཐང་འབྲེལ་མཐུད་ཁང་གིས་གོ་སྒྲིག་འོག་དེ་རིང་སྔ་དྲོ་ཐེ་ཝན་གྱི་རྒྱལ་ས་ Taipei ནང་གི་ ༢༢༨ ཞེས་པའི་དྲན་རྟེན་སྐྱེད་མོས་ཚལ་ནས་དབུ་འཛུགས་ཀྱིས་ Zhongzheng རྫོང་ནང་རྟེན་གཞི་བྱས་པའི་ཐེ་ཝན་གྲོས་ཚོགས་བར་བོད་རང་དབང་གི་ཆེད་དུ་རྐང་འཁོར་སྐོར་སྐྱོད་ཀྱི་ལས་འགུལ་སྤེལ་གནང་ཡོད་པ་དང། ལས་འགུལ་དེའི་ཐོག་བོད་མི་དང་ཐེ་ཝན་གྲོས་ཚོགས་འཐུས་མི། ཐེ་ཝན་དང་ཧོང་ཀོང་གི་བོད་དོན་རྒྱབ་སྐྱོར་བ་བཅས་མི་སྣ་ཁག་གཅིག་མཉམ་ཞུགས་ཐོག་གསར་འགོད་ལྷན་ཚོགས་གནང་སྟེ་བོད་དོན་དྲིལ་བསྒྲགས་དང་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐད་གཏམ་བཤད་གནང་བ་དང་ཆབས་ཅིག རྒྱ་ནག་གི་བཙོན་འཇུག་འོག་དཀའ་སྡུག་མྱོང་བཞིན་ཡོད་པའི་བོད་ཀྱི་ཆབ་སྲིད་བཙོན་པ་སྒོ་ཤེས་རབ་རྒྱ་མཚོ་ལགས་འཕྲལ་དུ་གློད་བཀྲོལ་དགོས་པའི་འབོད་སྐུལ་དང་སྦྲགས། ཐེ་ཝན་གྱི་གྲོས་ཚོགས་ནང་ཁོང་གི་གནད་དོན་ཐོག་དམིགས་བསལ་གྲོས་ཆོད་གཏན་འབེབས་དགོས་པ་དང་དེ་བཞིན་ཐེ་ཝན་དང་འབྲེལ་བ་ཡོད་པའི་རྒྱལ་སྤྱིའི་སྤྱི་ཚོགས་ཏུའང་ངེས་པར་དུ་དེ་འབྲེལ་བཀའ་མོལ་གནང་དགོས་གལ་ཡིན་པ་སྐོར་སོགས་གསུངས་འདུགལས་འགུལ་འདི་གོ་སྒྲིག་གནང་མཁན་བོད་དང་ཐེ་ཝན་གྱི་འགྲོ་བ་མིའི་ཐོབ་ཐང་འབྲེལ་མཐུད་ཁང་གི་འགན་འཛིན་བཀྲིས་ཚེ་རིང་ལགས་ཀྱིས་བོད་དོན་ལས་འགུལ་གང་འདྲ་ཞིག་སྤེལ་ཡང་རྒྱ་སྐད་ཀྱི་ཐོག་ནས་གཏམ་བཤད་སོགས་གནང་གི་ཡོད་པ་ནི་རྒྱ་ནག་ལ་ཐད་ཀར་གནོན་ཤུགས་འགྲོ་ཡི་ཡོད་པ་གསལ་པོ་ཡིན་སྐོར་གསུངས་པ་དང་འབྲེལ། བོད་དོན་རྐང་འཁོར་སྐོར་སྐྱོད་ཀྱི་ལས་འགུལ་དེ་ཕྱི་ལོ་ ༢༠༡༡ ལོར་ཐོག་མ་སྒེར་གྱི་དབུ་འཛུགས་གནང་བ་ཞིག་ཡིན་ཅིང་། དེའི་དམིགས་ཡུལ་གཙོ་བོ་ནི་ཐེ་ཝན་ནང་གི་རྒྱ་རིགས་ཡུལ་སྐོར་སྤྲོ་འཆམ་པ་དང་སློབ་མ་སོགས་ལ་རྒྱ་ནག་གི་གདུག་རྩུབ་འོག་གཞིས་ལུས་རྒྱ་ཆེ་མི་མང་ལ་རང་དབང་མེད་པ་དང་བཙན་གྱིས་རིགས་རྫས་བསྡུ་ལེན་བྱེད་བཞིན་པ་གཙོས་བོད་ནང་གི་ཛ་དྲག་གནས་སྟངས་ངོ་སྤྲོད་དང་འབྲེལ། བོད་མིའི་སྒྲིག་འཛུགས་ཀྱི་སྲིད་བྱུས་སོགས་མདོར་ན་བོད་དོན་དྲིལ་བསྒྲགས་ཀྱི་ལས་འགུལ་ཞིག་ཆགས་ཀྱི་ཡོད་པར་འགྲེལ་བརྗོད་གནང་ཡོད།བོད་དོན་རྐང་འཁོར་སྐོར་སྐྱོད་ལས་འགུལ་ལ་རྒྱབ་སྐྱོར་གནང་མཁན་ཐེ་ཝན་དང་ཧོང་ཀོང་གི་གཞོན་སྐྱེས་རྣམས་ཀྱིས་རྒྱ་ནག་ནང་འགྱུར་བ་ཡོང་བའི་རེ་འདུན་བཏོན་པ་དང་འབྲེལ། བོད་གཙོས་རྒྱ་ནག་གི་གདུག་རྩུབ་འོག་མནར་གཅོད་མྱོང་བཞིན་པའི་མི་རིགས་དག་ལ་རྒྱལ་སྤྱིའི་སྤྱི་ཚོགས་ཁྲོད་ནས་གདུང་སེམས་མཉམ་བསྐྱེད་ཞུས་པ་ཙམ་མིན་པར་དོན་དམ་ཐོག་ནས་རྒྱབ་སྐྱོར་གནང་གལ་ཆགས་སྐོར་གསུངས་འདུག གཞི་རྩའི་ཐེ་ཝན་ནང་ལོ་ལྟར་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་སྲུང་བརྩི་ཞུ་ཉེའི་ཟླ་བ་གཅིག་གི་སྔོན་ཚུད་ནས་རྐང་འཁོར་སྐོར་སྐྱོད་ཀྱི་ལས་འགུལ་དབུ་འཛུགས་གནང་གི་ཡོད་ཅིང་། བོད་མིའི་གསུམ་བཅུའི་དུས་དྲན་གྱི་ཉིན་མོའི་བར་གྱི་རེས་གཟའ་ལྷག་པ་ནམ་ཡིན་ལ་བསྟུད་མར་སྤེལ་གནང་གི་ཡོད་པ་དང་། གཙོ་བོ་རྒྱ་ནག་སྐམ་ས་ཆེན་པོའི་མི་མང་གནས་ཡུལ་གྱི་ས་ཁུལ་དང་རྒྱ་ནག་གི་དངུལ་ཁང་གི་ས་ཚིགས། དེ་བཞིན་གྲོང་ཁྱེར་ཆེ་ཁག་ལ་ཆེད་ཕེབས་ཀྱིས་བོད་དོན་དྲིལ་བསྒྲགས་གནང་རྒྱུ་རེད་འདུག