Homepage
སྐད་ཡིག་ཐོབ་ཐང་རྩོད་ལེན་པ་བཀྲིས་དབང་ཕྱུག་ལགས་ནས་གོང་རིམ་ལ་ཞུ་གཏུག་ཟིན་འདུག
ཟླ་བ་སྔོན་མའི་ཚེས་༢༢ ཉིན་མཚོ་སྔོན་ཞིང་ཆེན་ཡུལ་ཤུལ་ཁུལ་འབྲིང་རིམ་མི་དམངས་ཁྲིམས་ཁང་གིས་རྒྱལ་ཁབ་ཁ་བྲལ་བརྒྱུད་སྐུལ་བྱས་པའི་ཉེས་མིང་འོག་ལོ་ལྔའི་ཁྲིམས་ཐག་བཅད་ཟིན་པའི་བོད་ཀྱི་སྐད་ཡིག་ཐོབ་ཐང་རྩོད་ལེན་པ་བཀྲིས་དབང་ཕྱུགས་ལགས་ཀྱིས་རང་ཉིད་ལ་ཉེས་པ་མེད་པ་ངོས་འཛིན་གྱིས་གོང་རིམ་ལ་ཞུ་གཏུག་ཟིན་ཡོད་པ་རེད་འདུག
དེའང་ཁོང་གིས་ཁྲིམས་ཙོད་པ་སྐུ་ཞབས་ Liang Xiaojun ལགས་ནས་རང་ཉིད་ཀྱི་ twitter དྲ་གནས་ཐོག་བཀྲིས་དབང་ཕྱུག་ལགས་ད་ལྟའི་འཆར་ཡུ་ཤུལ་བཀག་ཉར་ཁང་དུ་ཡོད་པ་དང། ཁོང་གི་སྐུ་གཟུགས་བདེ་ཞིང་གོང་རིམ་ལ་གཏུག་བཤེར་བྱ་རྒྱུར་སེམས་ཐག་ཆོད་པོ་ཡིན་སྐོར་འགྲེལ་བརྗོད་གནང་བ་མ་ཟད། གོང་རིམ་ལ་ཞུ་གཏུག་གི་ལས་དོན་ཟིན་པ་ལྟར་ཁོང་གི་གྱོད་གཞིའི་ཐོག་མཚོ་སྔོན་ཞིང་ཆེན་མཐོ་རིམ་ཁྲིམས་ཁང་གིས་ཞིབ་གཅོད་བྱ་རྒྱུ་ཡིན་པ་གསུངས་འདུག
གཞི་རྩའི་ཡུ་ཤུ་ནང་རྒྱུན་དུ་ཚོང་ལས་གཉེར་མཁན་བོད་མི་བཀྲིས་དབང་ཕྱུག་ལགས་ནས་རང་ཉིད་ཀྱི་ཚ་མོ་གཙོས་པའི་བོད་ས་ཁྱོན་ཡོངས་ཀྱི་བོད་ཕྲུག་རྣམས་ལ་བོད་ཀྱི་སྐད་ཡིག་སློབ་གཉེར་གྱི་གོ་སྐབས་མེད་པ་གཟིགས་ཏེ། བོད་ཀྱི་སྐད་ཡིག་བདག་དབང་རྩོད་ལེན་སླད་ས་གནས་སྲིད་གཞུང་དང། རྗེས་སུ་རྒྱ་ནག་གི་རྒྱལ་ས་པེ་ཅིང་དུ་ཕྱིན་ནས། ཁྲིམས་ཁང་དང། དབུས་བརྙན་འཕྲིན་ལས་ཁང་བཅས་ལ་ཞུ་གཏུག་ལན་མང་བྱས་པ་མ་ཟད། གནད་དོན་དེ་དང་འབྲེལ་ཨ་རིའི་ནིའུ་ཡོག་དུས་འབབ་ཀྱི་དམིགས་བསལ་བཅར་དྲིའི་ལས་རིམ་ཞིག་གི་ཐོག་ལྷན་བཞུགས་གནང་ཡོད་པ་རེད། དེ་དོན་རྒྱ་ནག་གཞུང་གིས་ཁོང་༢༠༡༦ལོའི་འགོ་སྟོད་དུ་འཛིན་བཟུང་གིས་ལོ་གཉིས་ཙམ་བཀག་ཉར་རྗེས་འདི་ལོའི་ཕྱི་ཟླ་དང་པོའི་ནང་ཁོང་གི་གྱོད་གཞིའི་ཐོག་ཞིབ་དཔྱོད་བྱས་ཏེ། ཟླ་བ་སྔོན་མའི་ནང་རྒྱལ་ཁབ་ཁ་བྲལ་བརྒྱུད་སྐུལ་གྱི་ཉེས་མིང་འོག་ལོ་ལྔའི་བཙོན་འཇུག་ཁྲིམས་ཐག་བཅད་ཡོད་པ་རེད།
ཨོ་སི་ཊོ་ལི་ཡའི་ནང་བོད་ཀྱི་སྲོལ་རྒྱུན་གྱི་མདའ་རྩལ་འགྲན་སྡུར་ཚོགས་འདུག
ཟླ་བ་འདིའི་ཕྱི་ཚེས་ ༡༨ ཉིན་ཨོ་སི་ཊོ་ལི་ཡའི་ལྷོ་ཕྱོགས་གྲོང་ཁྱེར་གནས་མཁར་གསར(New Castle) ས་གནས་བོད་རིགས་ཚོགས་པ་དང་ཨོ་གླིང་བོད་ཀྱི་མདའ་རྩལ་ཚོགས་པའི་ཕྱི་ལོ་ ༢༠༡༨ ལོའི་ཨོ་གླིང་བོད་ཀྱི་མདའ་རྩལ་འགྲན་སྡུར་ཚོགས་འདུག་པ་དང་། ཐེངས་འདིའི་བོད་ཀྱི་སྲོལ་རྒྱུན་གྱི་མདའ་རྩལ་འགྲན་སྡུར་ནང་མེལ་སྦོན་དང། སིད་ནི་ཌེ་ཝེ། གྷོ་སུ་ཧྥུ་སྒྲི། རི་སྔོན་པོ་དང་གནས་མཁར་གསར་བཅས་བོད་མི་མདའ་རྩལ་བ་ཁྱོན་མི་གྲངས་ ༢༥ ནས་མཉམ་ཞུགས་བྱས་འདུག
འདི་ག་རླུང་འཕྲིན་ཁང་ནས་ཐེངས་འདིའི་ཕྱི་ལོ་༢༠༡༨ལོའི་ཨོ་གླིང་བོད་ཀྱི་མདའ་རྩལ་འགྲན་བསྡུར་སྐོར་ཨོ་གླིང་བོད་ཀྱི་མདའ་རྩལ་ཚོགས་པའི་རྒྱུན་ལས་མགུར་འབུམ་རྒྱལ་ལགས་སུ་ཞལ་པར་བརྒྱུད་ནས་བཀའ་འདྲི་ཞུས་པ་གཤམ་ལ་གསན་རོགས་གནང་།
རྒྱ་གཞུང་ནས་རྒྱལ་ཚོགས་ཀྱི་སྐུ་ཚབ་མི་སྣ་བོད་དང་ཤིང་ཅང་ནང་ལ་འགྲོ་རྒྱུའི་ཐོབ་ཆོག་མཆན་སྤྲད་མ་སོང་།
ཟླ་བ་འདིའི་ཚེས་ ༡༨ ཉིན་སུད་སིའི་གྲོང་ཁྱེར་ཇི་ནི་ཝ་ནང་དུ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་གི་ལྷན་ཚོགས་སྐབས་ ༣༨ པ་དབུ་འཛུགས་གནང་ཡོད་པ་དང་། ལྷན་ཚོགས་དབུ་འབྱེད་ཀྱི་མཛད་སྒོའི་ཐོག་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་གི་གཙོ་འཛིན་སྐུ་ཞབས་ Zeid Raad al-Hussein ལགས་ནས་ད་བར་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་གི་ལས་དོན་སྤྱི་ཡོངས་ངོ་སྤྲོད་དང་སྦྲགས། གཙོ་འཛིན་མཆོག་ནས་འདས་པའི་ལོ་དུས་ནང་ལ་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་དང་འབྲེལ་རྒྱ་གཞུང་དང་དོན་ཕན་ལྡན་པའི་གྲོས་མོལ་གནང་རྒྱུ་དང་། རྒྱལ་ཚོགས་ཀྱི་སྐུ་ཚབ་མི་སྣ་གཟིགས་ཞིབ་ཆེད་འགྲོ་རྒྱུ་སོགས་ཀྱི་འབད་བརྩོན་རིམ་པས་བྱས་ཡོད་ཀྱང་། རྒྱ་གཞུང་ནས་ཡུལ་དེའི་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐོག་བཟང་ཕྱོགས་ཀྱི་འགྱུར་བ་གང་ཡང་མ་བཏང་པའི་ཁར། རྒྱལ་ཚོགས་ཀྱི་སྐུ་ཚབ་མི་རྣམས་ཀྱང་རྒྱ་ནག་སྤྱི་དང་། ལྷག་དོན་རྒྱ་གཞུང་གི་དབྱེ་བའི་བོད་རང་སྐྱོང་ལྗོངས་གཙོས་པའི་བོད་ཀྱི་ས་ཁུལ་ཁག དེ་བཞིན་ཤིང་ཅང་བཅས་ཀྱི་ནང་ལ་འགྲོ་རྒྱུའི་ཆོག་མཆན་ཡང་སྤྲད་མེད་པ་གསུངས་ཡོད་པ་རེད།
ད་དུང་སྐུ་ཞབས་ Zeid Raad al-Hussein ལགས་ནས་རྒྱ་ནག་ནང་གི་གཞི་རྩའི་འགྲོ་བ་མིའི་ཐོབ་ཐང་གི་གནས་སྟངས་ཇེ་སྡུག་ཏུ་འགྲོ་བཞིན་པའི་གནས་བབས་དང་། ལྷག་པར་དུ་བར་སྐབས་ནས་རྒྱ་གཞུང་གིས་རྒྱལ་ཚོགས་ཀྱི་དུས་བཀག་བསྐྱར་ཞིབ་དང་ཉན་ཞིབ་ཀྱི་ལས་རིམ་སོགས་ཀྱི་ནང་མཉམ་ཞུགས་གནང་མཁན་གྱི་མི་སྣ་སྒེར་དང་། གཞི་རིམ་གྱི་ཚོགས་པ་ཁག་ལ་གནོན་ཤུགས་འདྲ་མིན་བརྒྱུད་རྒྱལ་ཚོགས་ཀྱི་ལས་དོན་དེ་དག་ནང་མཉམ་ཞུགས་བྱེད་རྒྱུར་དམ་དྲག་བཀག་འགོག་རིགས་བྱེད་བཞིན་པར་སེམས་འཚབ་དང་སྦྲགས། རྒྱ་གཞུང་ནས་མི་སྣ་སྒེར་དང་གཞི་རིམ་གྱི་ཚོགས་པ་དེ་དག་ལ་དམ་དྲག་རིགས་བྱེད་རྒྱུ་མཚམས་འཇོག་དགོས་པ་མ་ཟད། རྒྱ་གཞུང་ནས་གཞི་རྩའི་འགྲོ་བ་མིའི་ཐོབ་ཐད་སྤྱི་དང་། ཡང་སྒོས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་བཟང་དུ་གཏོང་རྒྱུར་འབད་བརྩོན་གནང་དགོས་པ་གསུངས་འདུག
གཞི་རྩའི་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་གི་ལྷན་ཚོགས་སྐབས་ ༣༨ དེ་བཞིན་ཟླ་བ་འདིའི་ཚེས་ ༡༨ ནས་འགོ་འཛུསག་ཀྱིས་ཕྱི་ཟླ་ ༧ ཚེས་ ༡༦ བར་འཚོག་གི་ཡོད་པ་དང་། ལྷན་ཚོགས་དེ་ནི་སྐུ་ཞབས་ Zeid Ra’ad Zeid Al-Hussein ལགས་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་གི་གཙོ་འཛིན་གནང་ཐོག་གི་ལྷན་ཚོགས་མཐའ་མ་དེ་ཆགས་ཀྱི་ཡོད་སྟབས། ཁ་སང་ཚེས་ ༡༨ ཉིན་ལྷན་ཚོགས་དབུ་འབྱེད་ཀྱི་གསུངས་བཤད་ཁྲོད་སྐུ་ཞབས་ Zeid Ra’ad Zeid Al-Hussein ལགས་ནས་རང་ཉིད་ཀྱི་ཕྱག་འབྲེལ་ལས་བྱེད་རྣམས་ནས་འགྲོ་བ་མིའི་ཐོབ་ཐང་གི་གནད་དོན་ཐད་ཞུམ་པ་མེད་པར་ལུས་ངག་གཉིས་ཀའི་ཐོག་ནས་ཕྱག་ལས་གནང་དགོས་པ་དང་། ལྷག་དོན་ད་ལྟའི་དུས་སྐབས་འདིར་འགྲོ་བ་མིའི་ཐོབ་ཐང་སྲུང་སྐྱོབ་དང་འབྲེལ་བའི་ལས་དོན་ནང་མཉམ་ཞུགས་གནང་རྒྱུར་འཇིགས་སྣང་དང་འཚེར་སྣང་ནམ་ཡང་གནང་རྒྱུ་ཡོད་མ་རེད་ཅེས་ལམ་སྟོན་ཡང་གནང་ཡོད་པ་རེད།
རེས་གཟའ་མིག་དམར། ༢༠༡༨།༠༦།༡༩
ཉན་པ།: Listen
ཕབ་ལེན། Download
༸གོང་ས་མཆོག་ཡོ་རོབ་ནང་གི་མཛད་འཆར་ལེགས་གྲུབ་ཀྱིས་ལྡི་ལིར་ཞབས་སོར་བདེ་བར་འཁོད་པ།
རྒྱ་གཞུང་གིས་རྒྱལ་ཚོགས་ཀྱི་སྐུ་ཚབ་བོད་དང་ཤིང་ཅང་ནང་འགྲོ་རྒྱུའི་ཆོག་ཆེན་སྤྲད་མ་སོང་གསུངས་འདུག
སྲིད་སྐྱོང་མཆོག་ནས་ཆབ་སྲིད་བཙོན་ཟུར་དོན་གྲུབ་དབང་ཆེན་ལགས་དང་མཇལ་མོལ།
མཐོ་སློབ་ཀྱི་སློབ་མར་བོད་ཀྱི་སྐད་ཡིག་དང་རིག་གཞུང་སློབ་ཁྲིད་གནང་བཞིན་པ།
དམིགས་བསལ་ལེ་ཚན། གཞས་མ་ཨ་རིན་སྒྲོལ་མ་ལགས་ཀྱིས་བླངས་པའི་གླུ་གཞས།
Tuesday 19/06/2018
Dalai Lama concludes Europe visit, arrives in Delhi
UN rights Chief slams China for refusing access to Tibet, Xinjiang
Sikyong meets with Dhundup Wangchen in NY
Tibetan College students undergo Intensive language program at Sarah
༸གོང་ས་མཆོག་དེ་རིང་ཉིན་རྒྱབ་ལྡི་ལིར་༸ཞབས་སོར་བདེ་བར་འཁོད་འདུག
Photo by OHHDL
བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་ཡུ་རོབ་བྷལ་ཊིག་རྒྱལ་ཁབ་ནང་གི་མཛད་འཕྲིན་ཁག་ལེགས་པར་གྲུབ་སྟེ་དེ་རིང་སྔ་ཐོག་ཁུལ་དེའི་ཚོུད་ ༤.༣༠ ཡོལ་ཙམ་ལ་མཁའ་ལམ་བརྒྱུད་རྒྱ་གར་དུ་ཆིབས་ཐོན་གྱིས་ཉིན་དགུང་ཚོུད་གཉིས་པ་ཡོལ་ཙམ་ཐོག་ལྡི་ལིར་༸ཞབས་སོར་བདེ་བར་འཁོད་ཡོད་པ་རེད།
ལྡི་ལི་བོད་ཀྱི་སྐུ་ཚབ་དོན་གཅོད་བཀའ་ཟུར་འབྲོང་ཆུང་དངོས་གྲུབ་མཆོག་གིས་གསུངས་པར་གཞིགས་ན། ༸གོང་ས་མཆོག་དེ་རིང་ཉིན་རྒྱབ་ཚོུད་གཉིས་པ་ཡོལ་ཙམ་ལ་ཡོ་རོབ་ Latvia རྒྱལ་ས་རི་གྷ་ནས་མཁའ་ལམ་བརྒྱུད་ལྡི་ལིར་ཞབས་སོར་བདེ་བར་འཁོད་ཡོད་པ་དང་། མཛད་འཆར་ལྟར་ན་དེ་རིང་མགོན་པོ་མཆོག་ལྡི་ལིར་སྐུ་ངལ་གསོ་བཞུགས་གནང་སྟེ་སང་ཉིན་སྔ་དྲོ་བཞུགས་སྒར་རྡ་རམ་ས་ལར་ཞབས་སོར་འཁོད་གནང་མཛད་རྒྱུ་རེད་འདུག
Photo by OHHDL
གཞི་རྩའི་༸གོང་ས་མཆོག་ཟླ་བ་འདིའི་ཚེས་ ༡༣ ནས་དབུ་འཛུགས་ཀྱིས་ཐོག་མར་ཡོ་རོབ་རྒྱལ་ཁབ་ Lithuania རྒྱལ་ས་ Vilnius ནང་ཆིབས་བསྒྱུར་གྱིས་གསར་འགོད་ལྷན་ཚོགས་ཤིག་གི་ཐོག་དབུ་བཞུགས་མཛད་པ་དང་དེ་བཞིན་ Vilnius གཙུག་ལག་སློབ་གཉེར་ཁང་གི་སློབ་ཕྲུག་དང་མང་ཚོགས་བཅས་ཁྱོན་མི་གྲངས་ ༤༠༠༠ ཙམ་ལ་ཤེས་ཡོན་ལམ་ལུགས་ནང་བཟང་སྤྱོད་དགོས་གལ་སྐོར་བཀའ་སློབ་བཀྲིན་བསྩལ་བ་མ་ཟད། ལི་ཐོ་ན་ཡའི་མང་ཚོགས་སྟོང་ཕྲག་ལྷག་ལ་བདེ་སྐྱིད་ཀྱི་བསྟན་བཅོས་ཞེས་པའི་བརྗོད་གཞིའི་ཐོག་བཀའ་སློབ་དང་ལྷག་དོན་ལི་ཐོ་ནི་ཡའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་འཐུས་མི་དང་བོད་དོན་རྒྱབ་སྐྱོར་བ་ཁག་ཅིག་དང་མཇལ་མོལ་གནང་བ་སོགས་ཀྱི་མཛད་འཕྲིན་ཁག་ཅིག་བསྐྱངས་ཡོད་པ་རེད། དེ་རྗེས་ཟླ་བ་འདིའི་ཚེས་༡༥ ཉིན་མགོན་པོ་མཆོག་ Latvia འི་རྒྱལ་ས་རི་གྷ་ནང་ཆིབས་བསྒྱུར་མཛད་དེ། ཁུལ་དེར་ཚེས་ ༡༦ ནས་ཉིན་གྲངས་གསུམ་རིང་ས་གནས་དེའི་དད་ལྡན་མང་ཚོགས་སྤྱི་དང་ཡང་སྒོས་སུ་ནང་སོག་དང་ཨུ་རུ་སུ་ནས་ཆེད་བཅར་ཞུས་པའི་དད་ལྡན་ཆོས་ཞུ་བ་ ༤༠༠༠ ལྷག་ལ་རྡོ་རྗེ་གཅོད་པ་དང་རྟེན་འབྲེལ་བསྟོད་པའི་བཀའ་ཆོས་བཀའ་འདྲིན་སོགས་བསྐྱངས་ཡོད་པ་རེད།
རྩ་བའི་༸གོང་ས་མཆོག་latvia རྒྱལ་ས་རི་གྷ་ནང་དེ་སྔ་ཕྱི་ལོ་ ༡༩༩༡ དང་ ༢༠༠༡ དེ་བཞིན་ ༢༠༡༣ བཅས་ལོ་སོ་སོར་ཆིབས་བསྒྱུར་གནང་རྗེས་ཐེངས་འདིའི་ཆིབས་བསྒྱུར་ནི་ཐེངས་བཞི་པ་དེ་ཡིན་པ་རེད།
དགེ་བཤེས་ལྷུན་གྲུབ་དཔལ་འབར་ལགས་སེར་སྨད་གྲྭ་ཚང་གི་མཁན་ཐོག་༩༡ པར་ཁྲི་འདོན་གནང་པ།
བོད་མིའི་བླ་ན་མེད་པའི་དབུ་ཁྲིད་སྤྱི་ནོར་གོང་ས་སྐྱབས་མགོན་ཆེན་པོ་མཆོག་གིས་སེར་སྨད་ཐོས་བསམ་ནོར་གླིང་གྲྭ་ཚང་གི་མཁན་ཐོག་༩༠ པ་དགེ་བཤེས་ངག་དབང་འབྱོར་ལྡན་མཆོག་མཁན་པོའི་མཛད་འགན་ཁྱུར་བའི་ཚབ་ཏུ་དབྱིན་ཡུལ་དུ་བཞུགས་པའི་སེར་སྨད་ཐོས་བསམ་ནོར་གླིང་གྲྭ་ཚང་ཀོང་པོ་ཁང་ཚན་གྱི་དགེ་བཤེས་ལྷུན་གྲུབ་དཔལ་འབར་ལགས་སུ་འདི་ལོ་ཕྱི་ཟླ་༣ ནང་སེར་སྨད་ཐོས་བསམ་ནོར་གླིང་གྲྭ་ཚང་གིི་མཁན་ཐོག་༩༡ པར་བསྐོ་གཞག་གི་བཀའ་ཡིག་ཕེབས་ཏེ་ཁ་སང་ཕྱི་ཟླ་ ༦ ཚེས་ ༡༧ ཉིན་སེར་སྨད་ཐོས་བསམ་ནོར་གླིང་གྲྭ་ཚང་དུ་དངོས་སུ་མཁན་པོ་ཁྲི་འདོན་མཛད་སྒོ་ཟབ་རྒྱས་ངང་སྤེལ་ཡོད་པ་རེད།
ཟླ་བ་འདིའི་ཕྱི་ཚེས་༢༥ ཉིན་བཞུགས་སྒར་རྡ་རམ་ས་ལར་གོང་ས་སྐྱབས་མགོན་ཆེན་པོ་མཆོག་ལ་མཁན་པོ་གསར་པའི་མཇལ་ཁ་ཞུ་གཏན་ཁེལ་འདུག
ཨོ་སི་ཊོ་ལི་ཡ་ནང་དུ་བོད་དོན་ཞུ་གཏུག་གི་ཉིན་མོ་ཐེངས་ ༧ དེ་དབུ་འཛུགས་གནང་འདུག
ཨོ་སི་ཊོ་ལི་ཡའི་རྒྱལ་ས་ Canberra ནང་དུ་ཁུལ་དེར་གནས་སྡོད་བོད་མི་རྒན་གཞོན་བར་གསུམ་གྱི་ངོས་ནས་ཡུལ་དེའི་གཞུང་དམངས་ལ་བོད་དོན་ཞུ་གཏུག་གི་ཉིན་མོ་ཐེངས་ ༧ དེ་དབུ་འཛུགས་གནང་འདུག
དེ་ཡང་ལོ་ལྟར་ཨོ་སི་ཊོ་ལི་ཡ་ནང་དུ་བོད་དོན་ཞུ་གཏུག་གི་ཉིན་མོ་ཅེས་ཡུལ་དེའི་གཞུང་དང་གྲོས་ཚོགས་ལ་བོད་དོན་རྒྱབ་སྐྱོར་དགོས་པའི་ཞུ་གཏུག་གི་ལས་འགུལ་སྤེལ་སྲོལ་ཡོད་པ་ལྟར། འདི་ལོ་ཨོ་སི་ཊོ་ལི་ཡ་བོད་དོན་ལྷན་ཁང་ ATC དང་ས་གནས་བོད་རིག་མཐུན་ཚོགས་གཉིས་ཀྱིས་གོ་སྒྲིག་འོག་ལས་འགུལ་ཐེངས་ ༧ དེ་སྤེལ་བཞིན་ཡོད་པ་དང་། འདི་ལོའི་ལས་འགུལ་ནང་མཉམ་བཞུགས་གནང་མཁན་བོད་རིགས་རྒན་གཞོན་ཕོ་མོ་ ༡༦ ཡོད་པ་རྣམས་ལ་འདས་པའི་ཉིན་གྲངས་གཉིས་རིང་ལས་འགུལ་སྤེལ་ཕྱོགས་དང་འབྲེལ་བའི་ཟབ་སྦྱོང་གྲུབ་རྗེས། དེ་རིང་ཕྱི་དྲོ་ནས་བོད་དོན་ཞུ་གཏུག་གི་ལས་འགུལ་དངོས་སུ་དབུ་འཛུགས་ཀྱིས་སང་ཉིན་ཕྱི་དྲོ་བར་ལས་འགུལ་མུ་མཐུད་སྤེལ་རྒྱུ་རེད་འདུག
དེའི་སྐོར་ལོ་ལྟར་ལས་འགུལ་སྣེ་ཁྲིད་གནང་མཁན་ཁོངས་སུ་ཡོད་པའི་ATC བོད་དོན་རྒྱབ་སྐྱོར་ཚོགས་པའི་འབྲེལ་མཐུད་པ་སྤྱི་འཐུས་གདོང་འདུས་སྐྱིད་འཛོམས་ལགས་སུ་བཀའ་འདྲི་ཞུས་སྐབས་ཁོང་གིས། དེང་སྐབས་ཨོ་སི་ཊོ་ལི་ཡ་གཞུང་དང་ཆབ་སྲིད་ཚོགས་པ། དེ་བཞིན་ཚོང་ལས་སོགས་ཕྱོགས་གང་སྤྱིའི་ཐད་ནས་རྒྱ་ནག་གཞུང་གི་གནོན་ཤུགས་ཇེ་ཆེར་འགྲོ་བཞིན་ཡོད་སྟབས། ཨོ་སི་ཊོ་ལི་ཡའི་གྲོས་ཚོགས་ནང་དུ་གནད་དོན་དེའི་སྐོར་བགྲོ་གླེང་ཤུགས་ཆེ་བྱུང་བའི་ཁྲོད། རྒྱ་ནག་གཞུང་གི་གནོན་ཤུགས་ལ་གདོང་ལེན་གྱིས་ཁྲིམས་གསར་པ་བཟོས་དགོས་པའི་གླེང་སློང་ཤུགས་ཆེ་འགྲོ་བཞིན་པའི་དུས་སྐབས་འདིར་བོད་དོན་ཞུ་གཏུག་གི་ལས་འགུལ་སྤེལ་བ་དེ་དམིགས་བསལ་གྱི་གནད་འགག་ཆགས་ཀྱི་ཡོད་པ་དང་། འདི་ལོའི་ལས་འགུལ་ནང་དུ་བོད་མི་ལོ་ན་གཞོན་པ་དང་ལྷན་དུ་བོད་མི་ཆབ་སྲིད་བཙོན་པ་རྒན་གྲས་ཁག་ཅིག་ནས་ཀྱང་མཉམ་བཞུགས་གནང་བཞིན་ཡོད་པ་གསུངས་ཀྱི་འདུག
ཁོང་གིས་ད་དུང་། འདི་ལོའི་ལས་འགུལ་ཁྲོད་ཨོ་སི་ཊོ་ལི་ཡ་གྲོས་ཚོགས་འཐུས་མི་ ༣༠ ལྷག་ཙམ་དང་། ཡུལ་དེའི་ཕྱི་སྲིད་ལས་ཁུངས་ཀྱི་རྒྱ་ནག་སྡེ་ཚན་དང་འགྲོ་བ་མིའི་ཐོབ་ཐང་སྡེ་ཚན་བཅས་སུ་བཅར་ཏེ་རྒྱ་གཞུང་གིས་བོད་ནང་བོད་མིའི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བཞིན་པའི་ཛ་དྲག་གི་གནས་སྟངས་སྤྱིའི་སྐོར་སྙན་སེང་དང་སྦྲགས། གཙོ་བོ་དོན་ཚན་གསུམ་ཐོག་ནས་བོད་དོན་ཞུ་གཏུག་གནང་བཞིན་པ་རེད་འདུག
བཀའ་ཆོས་ཞུས་པ་དེ་ཉམས་ལེན་ཐོག་ཏུ་འཁྱེར་ཐུབ་པ་གནང་དགོས།
བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་མཆོག་གིས་ལཊ་ཝི་ཡའི་རྒྱལ་ས་རི་གྷ་ནང་གི་ཆོས་འབྲེལ་ཉིན་མཐའ་མའི་ཐོག་ཆོས་ཞུ་བ་ཚོར་འདས་པའི་ཉིན་གསུམ་རིང་བཀའ་ཆོས་ཞུས་པ་དེ་གཙོ་བོ་ཉམས་ལེན་ཐོག་ཏུ་འཁྱེར་ཐུབ་པ་གནང་དགོས་པའི་སྐུལ་ལྕགས་མཛད་འདུག
དེ་ཡང་༸གོང་ས་༸སྐྱབས་མགོན་ཆེན་པོ་མཆོག་གིས་རི་གྷ་ནང་ཟླ་བ་འདིའི་ཚེས་ ༡༦ ནས་དབུ་འཛུགས་ཀྱིས་ས་གནས་དེའི་དད་ལྡན་མང་ཚོགས་སྤྱི་དང་ཡང་སྒོས་སུ་ནང་སོག་དང་ཨུ་རུ་སུ་ནས་ཆེད་བཅར་ཞུས་པའི་དད་ལྡན་ཆོས་ཞུ་བ་བཅས་ལ་རྟེན་འབྲེལ་བསྟོད་པའི་བཀའ་ཆོས་བཀྲིན་བསྐྱངས་ཡོད་པ་མ་ཟད། དེ་རིང་མགོན་པོ་༸གང་ཉིད་མཆོག་གིས་ཆོས་འབྲེལ་མཇུག་སྒྲིལ་དང་བསྟུན་ཆོས་ཞུ་བ་༤༠༠༠ ཙམ་ལ་སྤྱན་རས་གཟིགས་ཀྱི་བཀའ་དབང་དང་༸རྗེ་བཙུན་འཇམ་དཔལ་དབྱངས་དཀར་པོའི་རྗེས་གནང་བཀའ་དྲིན་བསྩལ་ཏེ་ཆོས་འབྲེལ་རེ་ཞིག་ལེགས་གྲུབ་མཛད་ཡོད་པ་རེད།
དེ་རིང་ཆོས་འབྲེལ་གྱི་ཐོག་མར་མགོན་པོ་མཆོག་གིས་ཆོས་ཞུ་བ་ཚོར་སྤྱན་རས་གཟིགས་ཀྱི་བཀའ་དབང་གི་སྔོན་འགྲོའི་སྤྱི་བཤད་དང་འབྲེལ། ནང་པ་སངས་རྒྱས་པའི་ཆོས་ཀྱི་ནང་ཚན་ནས་གསང་སྔགས་ཀྱི་ཉམས་ལེན་ཡང་དག་ཡོང་བར་གཙོ་བོ་བསྟན་པ་སྤྱི་མཚན་གྱི་ཐབས་བྱང་ཆུབ་ཀྱི་སེམས་དང་ཤེས་རབ་སྟོད་ཉིད་རྟོག་པའི་ལྟ་བ་གཉིས་ལ་བློ་སྦྱོང་བ་དང་དེ་བཞིན་ཐོས་བསམ་སྒོམ་གསུམ་གནང་པའི་ཐོག་ནས་གསང་སྔགས་ཀྱི་ཆོས་ཉམས་ལེན་འཕར་མ་ཞིག་གནང་ཚེ་ཉམས་ལེན་ཡང་དག་པ་ཞིག་ཡོང་ངེས་ཡིན་པ་ལམ་སྟོན་བསྩལ་འདུག
ད་དུང་༸གོང་ས་མཆོག་གིས་༸གང་ཉིད་༸རྒྱལ་བ་གོང་མ་རྣམས་ཀྱི་ཐུགས་བསྐྱེད་སྨོན་ལམ་དང་འབྲེལ་བ་ཡོད་པའི་རྒྱུ་མཚན་གྱིས་འཕགས་པ་སྤྱན་རས་གཟིགས་དང་དམིགས་བསལ་ལས་འབྲས་ཡོད་པ་མ་ཟད། བོད་གངས་ཅན་ལྗོངས་ཀྱི་མི་ཚང་མ་འཕགས་པ་སྤྱན་རས་གཟིགས་དང་དམིགས་བསལ་འབྲེལ་བ་ཡོད་སྡད་པ་དེ་གསལ་པོ་རེད་ཅེས་བཀའ་བསྩལ་ཏེ། བོད་གངས་ཅན་ལྗོངས་ཀྱི་དཔལ་ནཱ་ལེནྡྲའི་ཆོས་བརྒྱུད་འཛིན་མཁན་རྣམས་ཀྱི་ཆོས་ལ་དད་པ་བྱེད་པ་ཁོ་ན་ལས་ནང་པའི་ལྟ་གྲུབ་ཐོག་སློབ་གཉེར་གནང་ནས་སངས་རྒྱས་ཀྱི་བསྟན་པ་འཛིན་སྐྱོང་སྤེལ་གསུམ་བྱེད་དགོས་གལ་ཡིན་པའི་ལམ་སྟོན་བཀྲིན་བསྩལ་འདུག
མགོན་པོ་༸གང་ཉིད་མཆོག་གི་བཀའ་དབང་བསྩལ་གྲུབ་མཚམས་ཆོས་ཞུ་བ་རྣམས་ལ་ཁྱེད་རྣམས་ས་ཐག་རྒྱང་རིང་ནས་ཆེད་མངགས་བཀའ་ཆོས་ཞུ་ཆེད་བཅར་བ་བཞིན་༸གང་ཉིད་ཀྱང་ས་ཐག་རིང་པོ་ནས་ཁྱེད་ཚོར་བཀའ་ཆོས་སྩལ་ཆེད་བཅར་ཡིན་པ་དང་སླད་མར་ཆིབས་བསྒྱུར་གནང་ཐུབ་མིན་དེ་བཤད་རྒྱུ་དཀའ་བ་ཡིན་པ་བཀའ་གནང་བ་དང་སྦྲགས་ཏེ། གང་ལྟར་དད་ལྡན་ཆོས་ཞུ་བ་ཚོའི་ངོས་ནས་འདས་པའི་ཉིན་གསུམ་རིང་བཀའ་ཆོས་ཞུས་པ་དེ་གཙོ་བོ་ཉམས་ལེན་ཐོག་ཏུ་འཁྱེར་ཐུབ་པ་གནང་དགོས་ཅེས་སྐུལ་ལྕགས་མཛད་འདུག
རྩ་བའི་ལོ་ཤས་གོང་ནས་ཨུ་རུ་སུ་དང་ཡུ་རོབ་ Baltic རྒྱལ་ཁབ་ཁག་ཏུ་ཡོད་པའི་དད་ལྡན་ཉམ་ཐག་རྣམས་གཙོ་གྱུར་ས་གནས་མི་མང་ཚོར་དཔལ་འབྱོར་དང་འགྲོ་བསྐྱོད་སོགས་ཀྱི་དཀའ་ངལ་ཆེན་པོ་འཕྲད་བཞིན་ཡོད་སྟབས། མགོན་པོ་༸གང་ཉིད་མཆོག་ནས་ཐུགས་བརྩེ་བ་ཆེན་པོས་ཕྱི་ལོ་ ༢༠༡༤ ལོ་ནས་ད་བར་ཁུལ་དེར་ཆོས་འབྲེལ་ཐེངས་བཞི་ལྷག་བསྐྱངས་གནང་མཛད་ཡོད་པ་རེད།
མཛད་འཆར་ལྟར་ན། མགོན་པོ་༸གང་ཉིད་མཆོག་ཟླ་བ་འདིའི་ཚེས་༡༩ ཉིན་རྒྱ་གར་ལ་ཆིབས་ཞལ་བསྒྱུར་གནང་གི་ཡོད་པ་རེད།
རེས་གཟའ་ཟླ་བ། ༢༠༡༨།༠༦།༡༨
ཉན་པ།: Listen
ཕབ་ལེན། Download
༸གོང་ས་མཆོག་གིས་ཆོས་ཞུ་བས་བཀའ་ཆོས་ཉམས་ལེན་གནང་དགོས་པ་བཀའ་བསྩལ་བ།
ཨོ་སི་ཊོ་ལི་ཡར་བོད་དོན་ཞུ་གཏུག་ཐེངས་བདུན་པ་དབུ་འཛུགས།
གཞོན་སྐྱེས་ཚོ་མ་འོངས་འགོ་ཁྲིད་བཟང་པོ་ཞིག་བྱ་དགོས་གལ་གསུངས་སོང་།
དགེ་བཤེས་ལྷུན་གྲུབ་དཔལ་འབར་ལགས་སེར་སྨད་མཁན་ཐོག་ ༩༡ པར་ཁྲི་འདོན་གནང་བ།
ཚོང་འབྲེལ་ཐད་རྒྱ་ནག་ལ་བསྟུན་མཁས་བྱ་དགོས་ནའང་རང་གིས་རང་ལ་དམ་དྲག་བྱ་རྒྱུ་མེད་གསུངས་འདུག
Monday 18/06/2018
Dalai Lama concludes religious teaching in Riga
2018 Tibet Lobby Day begins in Canberra
Be the catalyst for positive change: Sherig Kalon to Tibetan students
New Sermay Abbot enthroned
Don't self-censor to please China in trading relationship: Sikyong