Tibetan Royal Year of 2151 | Year of the Wood Dragon

Homepage

བཞུགས་སྒར་དུ་༸གོང་ས་མཆོག་གི་དགུང་ཀེག་སྔ་བསུར་དང་བསྟུན་ཞབས་རིམ་གསོག་སྒྲུབ་གནང་བ།

འདི་ལོ་བོད་ལུགས་ལྟར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༨༤ འི་དགུང་ཀེག་སྔར་བསུར་ཁེལ་གྱི་ཡོད་པ་དང་བསྟུན། ༸དཔལ་ལྡན་དགའ་ལྡན་ཕོ་བྲང་གིས་གོ་སྒྲིག་གནང་ཐོག་དེ་རིང་དང་སང་ཉིན་བཅས་ཉིན་གཉིས་རིང་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་གི་རྟེན་མཆོག་སྤྱན་སྔར་མཆོད་སྤྲིན་སྟོང་ཚར་འབུལ་གཤོམ་དང་འབྲེལ་སེར་སྐྱ་མང་ཚོགས་འདུ་འཛོམས་ཀྱིས་ཞབས་རིམ་རྒྱས་པ་གསོག་སྒྲུབ་གནང་བཞིན་འདུག ཞབས་རིམ་གྱི་ཚོགས་མགོན་དུ་སྔགས་འཆང་འཛིན་པ་འོད་ཟེར་རིན་པོ་ཆེ་མཆོག་དབུ་བཞུགས་ཐོག་བཞུགས་སྒར་གྱི་དགོན་སྡེ་ཁག་གི་གྲྭ་བཙུན་རྣམ་པ་དང། མང་ཚོགས་བཅས་འདུ་འཛོམས་ཐོག་ལྷ་བླ་མའི་ཐུགས་དམ་དགོངས་དོན་བཞིན་༸རྒྱལ་བའི་བཀའ་འགྱུར་རིན་པོ་ཆེ་དག་འདོན་དང་། འཕགས་མཆོག་ཐུགས་རྗེ་ཆེན་པོའི་བསྟོད་ཆེན། པཎ་གྲུབ་བཅུ་བདུན་གྱི་གསོལ་འདེབས་བཅས་གསོག་སྒྲུབ་གནང་བཞིན་འདུག ཞབས་རིམ་གོ་སྒྲིག་ཞུ་མཁན་༸དཔལ་ལྡན་དགའ་ལྡན་ཕོ་བྲང་གི་སྐུ་ཤོག་བྱམས་བསྟན་ལགས་ཀྱིས་དུས་ཚིགས་འདིའི་བརྒྱུད་ནས་འཛམ་གླིང་ས་ཕྱོགས་གང་སར་གནས་པའི་བོད་མི་ཚོའི་ངོས་ནས་༸གོང་ས་མཆོག་གི་༸སྐུ་ཕྱྭའི་སླད་དེ་རིང་ནས་དབུ་བཛུགས་ཀྱིས་མ་ཎི་དང་བཛྲ་གུ་རུ་དུང་ཕྱུར་གསོག་སྒྲུབ་གནང་དགོས་པར་རེ་སྐུལ་གནང་སོང་། སྤྱིར་༸དཔལ་ལྡན་དགའ་ལྡན་ཕོ་བྲང་གི་ངོས་ནས་དེ་རིང་བཞུགས་སྒར་དུ་ཞབས་རིམ་གསོག་སྒྲུབ་གོ་སྒྲིག་གནང་བ་ཙམ་མིན་པར་ཞབས་རིམ་གསོག་སྒྲུབ་གནང་དགོས་ཁག་གཞན་རྣམས་གདན་ས་གསུམ་གཙོ་གྱུར་ཆོས་བརྒྱུད་ཁག་གི་དགོན་སྡེ་དང་། གཞིས་ཆགས་ཁག་བཅས་ལ་འཆར་འགོད་ཀྱིས་རྒྱ་གང་ཆེ་གནང་དང་གནང་མུས་རེད་འདུག

ཡོ་རོབ་མཐུན་ཚོགས་ནས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་མངོན་གསལ་དོད་པོས་གླེང་སློང་གནང་དགོས།

འགྲོ་བ་མིའི་ཐོབ་ཐང་ལྟ་ཞིབ་ཚོགས་པ་གཙོས་གཞུང་འབྲེལ་མིན་པའི་ཚོགས་པ་ ༢༣ ནས་འཚོགས་ལ་ཉེ་བའི་ཡོ་རོབ་མཐུན་ཚོགས་དང་རྒྱ་ནག་གི་ཆེས་མཐོའི་ལྷན་ཚོགས་དེའི་སྐབས་རྒྱ་ནག་ནང་གི་ཆེས་ཞན་པའི་འགྲོ་བ་མིའི་ཐོབ་ཐང་གི་གནས་སྟངས་ཐེར་བཏོན་དང་རྒྱ་གཞུང་གི་དོ་དམ་བཀག་ཉར་འོག་ཡོད་པའི་བོད་མིའི་སྐད་ཡིག་ལས་འགུལ་བ་བཀྲིས་དབང་ཕྱུག་ལགས་ཀྱིས་གཙོས་རྒྱ་ནག་གི་ཁྲིམས་རྩོད་པ་དང་རྒྱ་རིགས་འགྲོ་བ་མིའི་ཐོབ་ཐང་རྩོད་ལེན་པ་ཁག་ཅིག་བཅས་གློད་བཀྲོལ་ཡོང་བར་རྒྱ་གཞུང་ལ་གནོན་ཤུགས་སྤྲོད་དགོས་པར་རེ་སྐུལ་ཞུས་འདུག དེའང་ཟླ་བ་རྗེས་མའི་ནང་རྒྱ་ནག་གི་རྒྱལ་ས་པེ་ཅིང་དུ་ཡོ་རོབ་མཐུན་ཚོགས་དང་རྒྱ་ནག་རྒྱལ་ཁབ་ཕྱོགས་གཉིས་དབར་ལོ་འཁོར་ལྷན་ཚོགས་ཐེངས་ ༢༠ ཚོགས་ཀྱི་ཡོད་པ་ལྟར་ཁ་སང་ཨ་རིར་རྟེན་གཞི་བྱས་པའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པ་གཙོས་རྒྱལ་སྤྱིའི་ཉེས་ཡང་ཚོགས་པ་དང་ཡུ་གུར་འགྲོ་བ་མིའི་ཐོབ་ཐང་ལས་འཆར་བཅས་རྒྱལ་སྤྱིའི་ཁྲོད་ཀྱི་འགྲོ་བ་མིའི་ཐོབ་ཐང་རྩོད་ལེན་དང་འབྲེལ་བའི་གཞུང་འབྲེལ་མིན་པའི་ཚོགས་པ་ཆེ་གྲས་ཁག་ ༢༣ ཙམ་ནས་མཉམ་རུབ་ཐོག་ཡུ་རོབ་མཐུན་ཚོགས་ལ་ཞུ་ཡིག་ཞིག་ཕུལ་ཏེ་མཐུན་ཚོགས་ཀྱི་ངོས་ནས་རྒྱ་གཞུང་དང་ལྷན་དུ་བཞུགས་མོལ་དང་ཡོངས་བསྒྲགས་སོགས་ཀྱི་གླེང་སྟེགས་ཚང་མའི་ཐོག་རྒྱ་ནག་གི་ཆེས་ཞན་པའི་འགྲོ་བ་མིའི་ཐོབ་ཐང་གི་གནས་སྟངས་སྐོར་ཐེར་བཏོན་གནང་དགོས་པར་མ་ཟད་གླེང་མོལ་དེའི་ཐོག་ནས་བཟང་ཕྱོགས་ཀྱི་འགྱུར་བ་ཞིག་ཡོང་དགོས་གནད་ཡིན་པ་གསུངས་འདུག ཡོ་རོབ་འགྲོ་བ་མིའི་ཐོབ་ཐང་ལྟ་ཞིབ་ཚོགས་པའི་ངེས་སྟོན་པ་ལྕམ་ Lotte Leicht ལགས་ཀྱིས་ཞུ་ཡིག་དེའི་ནང་ ཡུ་རོབ་མཐུན་ཚོགས་ཀྱི་སྐུ་ཚབ་རྣམ་པས་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་འདྲ་མིན་ཐོག རྒྱ་ནག་དང་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐོག་གླེང་སློང་གནང་བ་དང་། ཐུགས་འཚབ་ཡོད་པའི་གསུང་བཤད་སྤེལ་བ་ཁོ་ནས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཡར་རྒྱས་འགྲོ་རྒྱུ་མེད་པ་འགྲེལ་བརྗོད་དང་སྦྲགས།  ཡུ་རོབ་མཐུན་ཚོགས་ཀྱི་ངོས་ནས་གཏན་འབེབས་གནང་བའི་འགྲོ་བ་མིའི་ཐོབ་ཐང་དང་མང་གཙོའི་ལྟ་གྲུབ་གཞིར་བཟུང་དངོས་ཡོད་གནས་སྟངས་ཇི་ཡིན་ཕྱི་གསལ་ནང་གསལ་ཐོག་ནས་རྒྱ་ནག་གཞུང་ལ་འགྲོ་བ་མིའི་ཐོབ་ཐང་གི་གནས་སྟངས་ཡར་རྒྱས་གཏོང་རྒྱུའི་ཚད་གཞི་སྐྲུན་དགོས་པར་མ་ཟད་ད་བར་རྒྱ་གཞུང་ནས་འཛིན་བཟུང་བྱས་པའི་བོད་མིའི་སྐད་ཡིག་ལས་འགུལ་བ་བཀྲིས་དབང་ཕྱུགས་ལགས་ཀྱི་གཙོས་པའི་རྒྱ་རིགས་ནོ་སྦེལ་ཞི་བདེའི་གཟེངས་རྟགས་བཞེས་མྱོང་མཁན་སྐུ་ཞབས་ Liu Xiaobo ལགས་དམ་པ་དེ་ཉིད་ཀྱི་ལྕམ་ Liu Xia ལགས་དང་རྒྱ་རིགས་ཁྲིམས་རྩོད་པ། དེ་བཞིན་འགྲོ་བ་མིའི་ཐོབ་ཐང་སྲུང་སྐྱོབ་གནང་མཁན་དང་གྲངས་ཉུང་མི་རིགས་ཀྱི་རང་དབང་རྩོད་ལེན་པ་སོགས་འཕྲལ་དུ་གློད་བཀྲོལ་དགོས་པའི་རེ་འདུན་ཆེད་བཏོན་གནང་འདུག དེ་བཞིན་ལྕམ་ Lotte Leicht ལགས་ཀྱིས་རྒྱ་ནག་གཞུང་ནས་ཡུལ་དེའི་འགྲོ་བ་མིའི་ཐོབ་ཐང་བརྩི་མེད་རྡོག་རོལ་གཏོང་བཞིན་པའི་གནད་དོན་དེར་ཡོ་རོབ་མཐུན་ཚོགས་ནས་གདོང་ལེན་གནང་མ་ཐུབ་པ་དེས་རྒྱ་ནག་མི་མང་ཙམ་མ་ཟད་མ་འོངས་པར་རྒྱ་ནག་དང་དཀའ་ངལ་འཕྲད་སྲིད་པའི་ཡོ་རོབ་མི་སེར་ཚོའི་རང་དབང་ལའང་སྲུང་སྐྱོབ་གནང་མ་ཐུབ་པ་ཞིག་མཚོན་གྱི་ཡོད་པར་སྐྱོན་བརྗོད་དང་སྦྲགས། ཡོ་རོབ་མཐུན་ཚོགས་ཀྱི་རྩ་ཆེར་འཛིན་བཞིན་པའི་འགྲོ་བ་མིའི་ཐོབ་ཐང་གི་རྩ་འཛིན་ལ་རྒྱ་གཞུང་གིས་མུ་མཐུད་ཁྱད་གསོད་བྱེད་བཞིན་ཡོད་པ་དེ་གསལ་པོ་ཡིན་པ་དེ་ལྟར་ཡང་། ཡོ་རོབ་མཐུན་ཚོགས་ཀྱི་ངོས་ནས་དེར་གདོང་ལེན་ཇིལྟར་གནང་ཡོད་མེད་ཀྱི་དྲི་བ་ཞིག་རེད་ཅེས་གསུངས་འདུག  

ཌེན་མག་གཞུང་ནས་ཡུལ་དེའི་་ཉེན་རྟོག་པ་དང་བོད་དོན་ལས་འགུལ་བ་དབར་གྱི་གྱོད་གཞིར་ཞིབའཇུག་གཏིང་ཟབ་ཏུ་བཏང་འདུག

ཌེན་མགྷ་གཞུང་ནས་ཕྱི་ལོ་ ༢༠༡༢ ལོར་རྒྱ་ནག་གི་སྲིད་འཛིན་ཧུ་ཅིན་ཐའོ་ཡུལ་དེའི་ནང་བསྐྱོད་སྐབས་ས་གནས་ཉེན་རྟོག་པས་བོད་དོན་ལས་འགུལ་བར་དམ་དྲག་བྱེད་ཕྱོགས་དང་འབྲེལ་བའི་གྱོད་གཞི་ཐོག་ཞིབ་འཇུག་གཏིང་ཟབ་ཏུ་བཏང་ནས་ད་ཆ་ཕྱི་ལོ་ ༢༠༡༢ ལོའི་གནད་དོན་དེ་གཅིག་པོ་མིན་པར་འདས་པའི་ལོ་ ༢༣ ནང་རྒྱ་ནག་གི་དཔོན་རིགས་ཚོ་ཡུལ་དེའི་ནང་ཕེབས་སྐབས་དང་འབྲེལ་ཡོད་གནད་དོན་ཡོངས་རྫོགས་ལ་ཞིབ་འཇུག་གནང་རྒྱུ་ཡིན་པ་གསུངས་འདུག དེ་སྔ་ཕྱི་ལོ་ ༢༠༡༢ ལོར་རྒྱ་ནག་གི་སྲིད་འཛིན་ Hu jintao ཡོ་རོབ་རྒྱལ་ཁབ་ཌེན་མག་གི་གྲོང་ཁྱེར་ Copenhagen ནང་འབྱོར་བསྟུན་ས་གནས་ཀྱི་བོད་དོན་ལས་འགུལ་བ་ཁག་ཅིག་གིས་བོད་ཀྱི་རྒྱལ་དར་འཁྱེར་ནས་རྒྱ་ནག་སྲིད་འཛིན་ལ་ངོ་རྒོལ་གནང་སྐབས་ཌེན་མག་ས་གནས་ཀྱི་ཉེན་རྟོག་པས་ལས་འགུལ་བ་དེ་དག་གི་ལག་ནས་བོད་ཀྱི་རྒྱལ་དར་བཙན་འཕྲོག་བྱས་ཡོད་སྟབས། སྐབས་དེར་བོད་དོན་ལས་འགུལ་བ་མི་སྣ་བརྒྱད་ནས་ས་གནས་ཀྱི་ཁྲིམས་ཁང་དུ་རྒྱལ་དར་བཙན་འཕྲོག་གནང་མཁན་ཉེན་རྟོག་པ་དེ་དག་ཁྲིམས་གཏུགས་བྱས་པར་བརྟེན་ས་གནས་ཁྲིམས་ཁང་ནས་དེ་སྔོན་ Denmark ས་གནས་ཉེན་རྟོག་པས་བོད་དོན་ལས་འགུལ་བའི་ཐོག་སྤེལ་བའི་བྱ་སྤྱོད་དེ་དག་ཁྲིམས་འགལ་ཡིན་པའི་བཅད་ཁྲ་བཏང་བ་དང་འབྲེལ། ཉེན་རྟོག་པ་གཉིས་ས་གནས་གཞན་དུ་གནས་སྤོ་བཏང་བ་དང་བོད་དོན་ལས་འགུལ་བ་མི་སྣ་བརྒྱད་པོ་དེ་དག་ལ་ས་གནས་ཀྱི་ཉེན་རྟོག་ལས་ཁང་ནས་ཌེན་མག་གི་སྒོར་མོ་ཁྲི་ ༢ རེ་གུན་གསབ་སྤྲོད་དགོས་པའི་བཀོད་ཁྱབ་བཏང་ཡོད་པ་རེད། ཌེན་མག་གི་ཁྲིམས་ཞིབ་བློན་ཆེན་སྐུ་ཞབས་ Soeren Pape Poulson ལགས་ཀྱིས་ཁ་སང་གསར་འགོད་གསལ་བསྒྲགས་ཤིག་སྤེལ་བའི་ནང་གྱོད་གཞི་དེར་ཞིབ་འཇུག་གནང་བའི་བརྒྱུད་རིམ་ཁྲོད། དེ་སྔ་ཕྱི་ལོ་ ༡༩༩༥ དང་། ༢༠༠༢ དེ་བཞིན་ ༢༠༡༡ ལོ་སོ་སོར་རྒྱ་ནག་གི་དཔོན་རིགས་ཁག་ཅིག་ཡུལ་དེའི་ནང་འབྱོར་སྐབས་ས་གནས་ཉེན་རྟོག་པ་རྣམས་ཀྱིས་སྐབས་དེར་བོད་དོན་ལས་འགུལ་བ་རྣམས་ཀྱི་ཐོག་བྱ་སྤྱོད་གང་འདྲ་སྤེལ་ཡོད་མེད་སྐོར་ལ་ཡང་དྲི་བ་ཡོང་གི་ཡོད་པ་གསུངས་འདུག གནད་དོན་འདིའི་ཐོག་ཌེན་མག་གི་སྲིད་བློན་སྐུ་ཞབས་ Lars Loekke Rasmussen ལགས་ཀྱིས་ཀྱང་ཞིབ་འཇུག་གི་བརྒྱུད་རིམ་ལས་གནས་ཚུལ་གསར་པ་ཁག་ཅིག་ཐོན་ཡོད་པ་དང།  གནས་ཚུལ་དེ་དག་བཟང་པོ་ཞིག་མིན་སྐོར་གསུངས་འདུག་པ་ལས་ཞིབ་ཕྲ་གང་ཡང་འགྲེལ་བརྗོད་གནང་མི་འདུག ཌེན་མག་བོད་དོན་རྒྱབ་སྐྱོར་ཚོགས་པའི་སྐུ་ཞབས་ Anders Hoejmark Andersen ལགས་ཀྱིས་ད་རེས་ཌེན་མག་གཞུང་གིས་ས་གནས་ཉེན་རྟོག་པས་བོད་དོན་ལས་འགུལ་བར་བྱ་སྤྱོད་སྤེལ་ཕྱོགས་དང་འབྲེལ་བའི་གྱོད་གཞིར་ཞིབ་འཇུག་གཏིང་ཟབ་ཏུ་གཏོང་འཆར་ཡོད་པ་དེར་འཚམས་འདྲི་ཞུས་པ་འབྲེལ། ཌེན་མག་ཉེན་རྟོག་པས་རང་རྒྱལ་ཁབ་ཀྱི་མེ་སེར་སྲུང་སྐྱོབ་གནང་རྒྱུའི་ཚབ་ཏུ་དེ་ལས་ལྡོག་པའི་ཕྱག་ལས་ཡོད་པ་དང།  ང་ཚོས་འདས་པའི་ལོ་མང་རིང་ནས་བོད་དོན་རྔམ་སྟོན་གནང་སྐབས་ཉེན་རྟོག་པས་འགོག་རྐྱེན་བཟོ་བའི་སྐོར་ལ་ལན་མང་ཞུས་ཡོད་ཀྱང་གནད་དོན་དེའི་ཐོག་ཁུངས་སྐྱེལ་ར་སྤྲོད་མེད་སྟབས། ད་རེས་ཌེན་མག་གཞུང་ནས་གནད་དོན་དེ་ཡིག་ཐོག་ཏུ་བཀོད་པ་དེ་ནི་ང་ཚོར་ཧ་ཅང་ཡག་པོ་བྱུང་སོང་ཞེས་གསུང་འདུག རྩ་བའི་དེ་སྔ་རྒྱ་ནག་གི་སྲིད་འཛིན་ཟུར་པ་ Hu Jintao ཌེན་མག་ནང་བསྐྱོད་སྐབས་བོད་དོན་ལས་འགུལ་བ་རྣམས་ཀྱིས་རྔམ་སྟོན་ཞི་རྒོལ་གནང་བ་དང།  ཌེན་མག་ཉེན་རྟོག་པས་སྐབས་དེར་ཞི་རྒོལ་བ་རྣམས་སྤྱི་སྤྱོད་རླངས་འཁོར་གྱིས་བཀག་ནས་རྒྱ་ནག་གི་སྲིད་འཛིན་མིག་མཐོང་ས་མེད་པ་བཟོས་པར་མ་ཟད་ལག་ནས་བོད་ཀྱི་རྒྱལ་དར་ཀྱང་འཕྲོག་ཡོད་པ་རེད། ཌན་མག་གི་ཁྲིམས་ཞིབ་བློན་ཆེན་སྐུ་ཞབས་ Soeren Pape Poulson ལགས་ཀྱིས་ཟླ་བ་འདིའི་མགོ་སྟོད་དུ་ཡུལ་དེའི་གྲོས་ཚོགས་སུ་ཕྱི་ལོ་༢༠༡༢ ལོའི་གནས་ཚུལ་དེའི་ཁྲོད་བོད་དོན་ལས་འགུལ་བར་དམ་དྲག་གི་བཀོད་ཁྱབ་གཏོང་མཁན་སུ་ཡིན་མིན་སོགས་ཀྱི་གནས་ཚུལ་ཁག་ཅིག་གསལ་པོ་ཆགས་ཡོད་པ་སྙན་གསེང་ཞུས་རྗེས་གྲོས་ཚོགས་ཀྱི་ངོས་ནས་སྐུ་ཞབས་ Poulson ལགས་ཀྱི་ཞིབ་འཇུག་ལས་དོན་དེར་རྒྱབ་སྐྱོར་ཤུགས་ཆེ་གནང་ཡོད་པ་རེད་འདུག

རེས་གཟའ་ཕུར་བུ། ༢༠༡༨།༠༦།༡༤

ཉན་པ།: Listen ཕབ་ལེན། Download ༸གོང་ས་མཆོག་གིས་ལི་ཐོ་ན་ཡའི་མང་ཚོགས་ལ་བདེ་སྐྱིད་ཀྱི་བསྟན་བཅོས་སྐོར་བཀའ་སློབ་བསྩལ་བ། ༸གོང་ས་མཆོག་གིས་ཨ་རི་དང་བྱང་ཀོ་རི་ཡའི་དབུ་ཁྲིད་གཉིས་ཀྱི་མཇལ་མོལ་ལ་དགའ་བསུའི་འཚམས་འདྲི་མཛད་པ། Arif Virani ལགས་ཀྱི་ཁེ་ན་ཌའི་གྲོས་ཚོགས་སུ་བོད་མིར་རྒྱབ་སྐྱོར་གནང་རྒྱུ་ཡིན་པ་གསུངས་འདུག བོད་ཀྱི་བདེ་རྩ་ཚོགས་པས་རྒྱལ་སྤྱིའི་ཟུངས་ཁྲག་སྦྱིན་གཏོང་ཉིན་མོ་སྲུང་བརྩི་ཞུས་པ། དམིགས་བསལ་ལས་རིམ། བེུད་དང་འབྲེལ་བའི་དབུགས་སྦྱོང་རྩེད་ཚུལ། Thursday 14/06/2018 Dalai Lama speaks on the Art of Happiness in Vilnius Dalai Lama welcomes Trump-Kim Singapore summit Canadian MP welcomes Tibet delegation to Parliament Hill Tibet Charity marks World Blood Donor Day Health and Wellness: Yoga for Women

༸གོང་ས་མཆོག་གིས་ལི་ཐོ་ན་ཡའི་མང་ཚོགས་སྟོང་ཕྲག་ལྷག་ལ་བདེ་སྐྱིད་ཀྱི་བསྟན་བཅོས་སྐོར་བཀའ་སློབ་བསྩལ་བ།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཟླ་ ༦ ཚེས་ ༡༡ ཉིན་བཞུགས་༸རྒྱལ་བའི་ཕོ་བྲང་ནས་ཕེབས་ཐོན་གྱིས་ཡོ་རོབ་ Baltic རྒྱལ་ཁབ་ནང་མང་ཚོགས་ལ་བཀའ་སློབ་དང་ཆོས་འབྲེལ་སོགས་ཀྱི་མཛད་འཕྲིན་ཁག་ཅིག་སྐྱོང་བཞིན་ཡོད་པ་ལྟར། དེ་རིང་ཚེས་ ༡༤ ཉིན་སྔ་ཐོག་མགོན་པོ་༸གང་ཉིད་མཆོག་ནས་ཡོ་རོབ་ Lithuania རྒྱལ་ས་ Vilnius ནང་རྟེན་གཞི་བྱས་པའི་ Siemens Arena ཚོགས་ཁང་ཆེན་མོར་མང་ཚོགས་སྟོང་ཕྲག་བརྒལ་བར་བདེ་སྐྱིད་ཀྱི་བསྟན་བཅོས་ཞེས་པའི་བརྗོད་གཞིའི་ཐོག་བཀའ་སློབ་དང་བཀའ་འདྲིར་བཀའ་ལན་བསྩལ་འདུག སྐབས་དེར་༸གོང་ས་མཆོག་གིས་འཛམ་གླིང་ཐོག་ཡོད་པའི་འགྲོ་བ་ཀུན་བདེ་སྐྱོད་འདོད་མཁན་གཅིག་མཚུངས་ཡིན་པ་དང་། ཉེ་དུས་ནས་ཚན་རིག་མཁས་པ་མང་པོས་འགྲོ་བ་མིའི་རང་བཞིན་དེ་བྱམས་སྙིང་རྗེའི་རང་བཞིན་ཡིན་པ་ར་འཕྲོད་བྱུང་ཡོད་སྟབས། འགྲོ་བ་ཀུན་གྱིས་དུས་རྟག་ཏུ་སེམས་པ་བཟང་པོ་དང་འགྲོ་བ་མིའི་རང་བཞིན་ལ་ཡོད་པའི་བྱམས་བརྩེའི་བསམ་པ་དེ་གོང་འཕེལ་གཏོང་གལ་ཡིན་པ་བཀའ་བསྩལ་འདུག ལྷག་དོན་འགྲོ་བ་མི་རྣམས་ནས་རང་གཅེས་འཛིན་གྱི་བསལ་བློ་དང་ཁོང་ཁྲོའི་གཞན་དབང་དུ་འགྲོ་ཚེ་རང་ཉིད་ཀྱི་འཕྲོད་བསྟེན་དང་སེམས་ཀྱི་ཞི་བདེ་ལ་གནོད་པར་མ་ཟད་འགྲོ་བ་གཞན་ལའང་ཕན་ཐོགས་ཞུ་རྒྱུ་དཀའ་བ་སོགས་བཀའ་བསྩལ་དང་སྦྲགས། འགྲོ་བ་མི་རྣམས་གཅིག་ལ་གཅིག་བརྟེན་ཐོག་འཚོ་གནས་བྱེད་བཞིན་པའི་སྤྱི་ཚོགས་སེམས་ཅན་ཞིག་ཡིན་སྟབས། འགྲོ་བ་མི་རྣམས་གཅིག་གྱུར་གྱི་བསམ་བློའི་ཐོག་ནས་རང་ཉིད་ཀྱི་ནང་མི་དང་སྤྱི་ཚོགས། དེ་ནས་རིམ་པས་རྒྱལ་ཁབ་དང་འཛམ་གླིང་སྤྱིའི་བདེ་དོན་ཐོག་ཕྱག་ལས་གནང་དགོས་པ་དང་། དེ་ལྟར་བྱུང་ཚེ་རིམ་བཞིན་དུས་རབས་ ༢༡ པ་འདི་བཞིན་ཞི་བདེ་དང་ལྡན་པ་ཞིག་བཟོ་ཐུབ་ངེས་ཡིན་པའི་ལམ་སྟོན་མཛད་འདུག ༸གོང་ས་༸སྐྱབས་མགོན་ཆེན་པོ་མཆོག་གིས་དེ་སྔ་དུས་རབས་ཉི་ཤུའི་འགོ་སྟོད་ལ་ཡོ་རོབ་ཁུལ་དུ་དཀའ་རྙོག་ཆེན་པོ་ཡོད་ཀྱང་བར་སྐབས་ནས་ཡོ་རོབ་མཐུན་ཚོགས་གསར་འཛུགས་གནང་རྗེས་ཡུ་རོབ་ཁུལ་གྱི་དཀའ་རྙོག་མང་པོ་ཞིག་སེལ་ཐུབ་ཡོད་པ་ལྟར་རིམ་པས་ཨ་ཕི་རི་ཀའི་ཁུལ་དུ་ཡང་དེ་ལྟ་བུའི་མཐུན་ཚོགས་ཤིག་གསར་འཛུགས་ཐུབ་ཚེ་ཕན་ཐོགས་ཆེན་པོ་བྱུང་ངེས་ཡིན་པ་སོགས་བཀའ་བསྩལ་འདུག ཡུ་རོབ་ Lithuania འི་རྒྱལ་ཁབ་འདི་ཆུང་ཆུང་ཡིན་ནའང་འཛམ་གླི་ཞི་བདེ་དང་འགྲོ་བ་མིའི་བདེ་དོན་ཐོག་ཞབས་འདེགས་ཞུ་རྒྱུའི་ནུས་པ་ཆེན་པོ་ཡོད་པ་ལམ་སྟོན་བསྩལ་འདུག སྐབས་དེར་ཆེད་བཅར་ཞུས་པའི་མི་མང་ཁག་ཅིག་ནས་༸གོང་ས་མཆོག་ལ་ཤེས་ཡོན་སློབ་ཁྲིད་གནང་སྟངས་དང་། བདག་འཛིན་གྱི་བསམ་བློ་ལ་གཉེན་པོ་བསྟན་ཚུལ་སོགས་དང་འབྲེལ་བའི་བཀའ་འདྲི་ཞུས་ཁག་ལ་མགོན་པོ་༸གང་ཉིད་མཆོག་ནས་དེང་དུས་ཀྱི་ཤེས་ཡོན་སློབ་གསོའི་ཁྲོད་དུ་འགྲོ་བ་མིའི་རིན་ཐང་ཐོག་དོ་སྣང་དེ་ཙམ་གནང་གི་མེད་སྟབས། ཆོས་སོགས་ཀྱི་སྐད་ཆ་གང་ཡང་མེད་པར་འགྲོ་བ་མིའི་རིན་ཐང་དང་འབྲེལ་བའི་སེམས་རྒྱུད་བཟང་པོ་བྱ་རྒྱུ། གཞན་ཕན་གྱི་བློ་སྦྱོང་རྒྱུ་རྣམས་སློབ་གསོའི་ཁྲོད་སློབ་འཁྲིད་གནང་ཚེ་དགེ་མཚན་ཆེན་པོ་བྱུང་ངེས་ཡིན་པ་དང་། འདས་པའི་ལོ་ཤས་ནང་ཨ་རའི་གྲོང་ཁྱེར་ཁག་ཅིག་ནས་གྲོང་ཁྱེར་གྱི་མིང་ལ་བྱམས་བརྩེའི་གྲོང་ཁྱེར་ཞེས་སློབ་མ་དང་མང་ཚོགས་ཁྲོད་བྱམས་བརྩེའི་གོ་རྟོགས་སྤེལ་བཞིན་པ་ལྟར། ལི་ཐོ་ནི་ཡ་གཙོས་གྱུར་བྷལ་ཊིཀ་རྒྱལ་ཁབ་ནང་དེ་ལྟར་གནང་ཐུབ་ཚེ་ཕན་ཐོགས་ཆེན་པོ་ཡོང་ངེས་ཡིན་པའི་ལམ་སྟོན་རྒྱ་ཆེ་མཛད་འདུག ༸གོང་ས་མཆོག་གིས་བར་སྐབས་ཤིག་ནས་ཡུ་རོབ་ཁུལ་དུ་སྐྱབས་བཅོལ་བ་མང་དུ་འགྲོ་བཞིན་པའི་སྐོར་བཀའ་ལན་གནང་པར་འཛམ་གླིང་ཐོག་འགྲོ་བ་མིའི་སྤྱི་ཚོགས་ཤིག་ལ་དཀའ་ངལ་འཕྲད་སྐབས་མིའི་སྤྱིའི་ཚོགས་གཞན་ཞིག་ནས་རོགས་རམ་གནང་གལ་ཡིན་པ་དང་། ལྷག་པར་དུ་བར་སྐབས་ཤིག་ནས་ཡུ་རོབ་རྒྱལ་ཁབ་ཁག་ཅིག་གིས་ Syria སོགས་ཀྱི་སྐྱབས་བཅོལ་བ་མང་དག་ལ་རོགས་རམ་གནང་བཞིན་པར་དགའ་བསུ་དང་ཡི་རང་ཡོད་པའི་བཀའ་བསྩལ་དང་ཆབས་ཅིག་ཏུ་སྐྱབས་བཅོལ་བ་དེ་དག་ལ་ཤེས་ཡོན་ཐོག་རོགས་ཕན་མང་གནང་དགོས་གནད་ཡིན་པ་དང་དེ་ལྟར་བྱུང་ཚེ་ཁོང་རྣམས་རང་ཉིད་ཀྱི་རྒྱལ་ཁབ་སླར་གསོ་གནང་རྒྱུ་དང་འགྲོ་བ་མིའི་སྤྱི་ཚོགས་ཁྱོན་ལ་ཕན་ངེས་ཡིན་པར་ལམ་སྟོན་མཛད་ཡོད། ༸གོང་ས་༸སྐྱབས་མགོན་ཆེན་པོ་མཆོག་གིས་ང་ཚོ་ཚང་མ་སྡུག་བསྔལ་མི་འདོད་པར་ཞི་བདེ་དང་བདེ་སྐྱིད་འདོད་མཁན་གཅིག་མཚུངས་ཡིན་སྟབས། ང་ཚོ་ཚང་མའི་ངོས་ནས་གོ་ལ་སྤྱིའི་བདེ་སྐྱིད་དང་ཞི་བདེ་སྐྲུན་རྒྱུའི་འགན་དེ་མཉམ་འཁུར་གནང་ཚེ་དུས་རབས་ ༢༡ པ་འདི་ཞི་བདེ་དང་ལྡན་པ་ཞིག་བཟོ་ཐུབ་ངེས་ཡིན་པའི་ལམ་སྟོན་མཛད་འདུག  

Arif Virani ལགས་ཀྱིས་ཁེ་ན་ཌའི་གྲོས་ཚོགས་སུ་བོད་མིར་ལྷག་བསམ་གཡོ་བ་མེད་པའི་ཐོག་ནས་རྒྱབ་སྐྱོར་གནང་རྒྱུ་ཡིན་པ་གསུངས་འདུག

ཁེ་ན་ཌ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ Arif Virani ལགས་ཀྱིས་ཡུལ་དེའི་གྲོས་ཚོགས་སུ་སྲིད་སྐྱོང་མཆོག་གིས་གཙོས་པའི་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་ཞིག་ཁེ་ན་ཌའི་གྲོས་ཚོགས་སུ་ཆེད་ཕེབས་གནང་བར་དགའ་བསུ་དང་འབྲེལ། ཁོང་གིས་ལྷག་བསམ་གཡོ་བ་མེད་པའི་ཐོག་ནས་བོད་མིའི་འཚེ་མེད་ཞི་བའི་འཐབ་རྩོད་ལ་མུ་མཐུད་རྒྱབ་སྐྱོར་གནང་རྒྱུ་ཡིན་པ་གསུངས་འདུག ཁེ་ན་ཌའི་རྒྱལ་ས་ཨོ་ཊ་ཝར་ཟླ་བ་འདིའི་ཚེས་ ༡༢ ཉིན་དབུ་འཛུགས་ཀྱིས་བོད་མིའི་ཚོས་ཁེ་ན་ཌའི་གཞུང་མང་གཉིས་ལ་ཐུགས་རྗེ་ཆེ་ཞུའི་ལས་རིམ་ཁག་ཅིག་གོ་སྒྲིག་གནང་བཞིན་པའི་ཁྲོད་ཁ་སང་ཚེས་ ༡༣ ཉིན་ཁེ་ན་ཌའི་རྒྱལ་ས་ Ottawa ནང་རྟེན་གཞི་བྱས་པའི་ཡུལ་དེའི་གྲོས་ཚོགས་སུ་སྲིད་སྐྱོང་བློ་བཟང་སེང་གེ་མཆོག་གིས་གཙོས་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་གི་ཚོགས་མི་སྤྱི་འཐུས་ཁག་ཅིག དེ་བཞིན་བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་བཅས་ཆེད་ཕེབས་ཀྱིས་གྲོས་ཚོགས་འཐུས་མི་ཁག་ཅིག་དང་མཇལ་མོལ་གྱིས་བོད་དོན་ཞུ་གཏུག་དང་ལྷག་དོན་རྒྱ་གཞུང་ནས་༸གོང་ས་མཆོག་གི་སྐུ་ཚབ་དང་ལྷན་དུ་གྲོས་མོལ་བསྐྱར་གསོ་ཡོང་བར་ཁེ་ན་ཌའི་གྲོས་ཚོགས་ནས་ཀྱང་རྒྱ་གཞུང་ལ་གནོན་ཤུགས་སྤྲད་པའི་བརྒྱུད་འབད་བརྩོན་གནང་རོགས་ཞེས་འབོད་སྐུལ་ཞུས་འདུག ཁེ་ན་ཌ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ Arif Virani ལགས་ཀྱིས་ཁ་སང་ཡུལ་དེའི་གྲོས་ཚོགས་སུ་སྲིད་སྐྱོང་མཆོག་གིས་གཙོས་པའི་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་འཐུས་མི་ཁག་ཅིག་ཁེ་ན་ཌར་ཡུལ་དེའི་གཞུང་མང་གཉིས་ཀྱི་ངོས་ནས་ད་བར་བོད་དོན་ལ་རྒྱབ་སྐྱོར་དང་སྐྱབས་བཅོལ་བ་བོད་མི་མང་པོར་མཐུན་འགྱུར་གང་ཐུབ་སྦྱར་ཡོད་པ་སོགས་ལ་ཐུགས་རྗེ་ཆེ་ཞུ་ཆེད་ཕེབས་པར་དགའ་བསུ་ཞུས་པ་དང་འབྲེལ། བོད་མིའི་ངོས་ནས་ཁེ་ན་ཌའི་གཞུང་ལ་ཐུགས་རྗེ་ཆེ་ཞེས་གསུངས་པ་ལས་དོན་དངོས་ཐོག་ཁེ་ན་ཌར་གནས་བཞུགས་བོད་རིགས་ཚོའི་སྐུ་དྲིན་ལ་བརྟེན་ནས་ཡུལ་དེའི་ནང་བོད་ཀྱི་ཐུན་མོང་མ་ཡིན་པའི་རིག་གཞུང་དང་ནང་ཆོས། ལྷག་དོན་དབུ་མའི་ལམ་གྱི་སྐོར་ལ་གོ་རྟོགས་གཞན་ལས་བཟང་བ་ཡོད་པར་མ་ཟད། ཁེ་ན་ཌར་ཆ་མཚོན་ན་རྩ་ཁྲིམས་གཅིག་གི་འོག་མི་རིགས་དང་རིག་གཞུང་འདྲ་མིན་འཆམ་མཐུན་དང་ཞི་བདེ་མཉམ་གནས་གནང་བཞིན་པའི་རྒྱལ་ཁབ་ཞིག་ཆགས་ཡོད་སྟབས་བོད་མི་ཚོ་ལའང་དམིགས་བསལ་ཐུགས་རྗེ་ཆེ་ཞེས་ཚོར་ཤུགས་ཆེན་པོས་གསུངས་འདུག དེ་བཞིན་སྐུ་ཞབས་ Arif ལགས་ཀྱིས་ཁོང་ཁེ་ན་ཌའི་གྲོས་ཚོགས་འཐུས་མི་གནང་བའི་རིང་ལྷག་བསམ་གཡོ་བ་མེད་པའི་ཐོག་ནས་བོད་མི་དང་བོད་དོན་ལ་རྒྱབ་སྐྱོར་གནང་རྒྱུ་ཡིན་པར་མ་ཟད་སླད་མར་དེ་ལྟར་གནང་རྒྱུར་ཆོད་སེམས་བརྟན་པོ་ཡོད་པ་བསྐྱར་ནན་གནང་འདུག རྩ་བའི་ཁ་སང་སྲིད་སྐྱོང་བློ་བཟང་སེང་གེ་མཆོག་གིས་གཙོས་པའི་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་ནས་ཁེ་ན་ཌའི་གྲོས་ཚོགས་ཀྱི་ཕྱི་སྲིད་ལས་དོན་མདུན་དུ་བོད་དོན་ཉན་ཞིབ་ཀྱི་ལས་རིམ་གནང་འདུག་པ་མ་ཟད། བོད་མིའི་སྒྲིག་འཛུགས་ཀྱི་དྲ་གནས་ཐོག་གནས་ཚུལ་སྤེལ་གསལ་ལྟར་ན། ཁ་སང་སྤྱི་འཐུས་ལྷན་ཚོགས་ཀྱི་འཐུས་མི་དྲུག་ལས་གྲུབ་པའི་སྐུ་ཚབ་ཚོགས་ཆུང་དེས་ཁེ་ན་ཌའི་གྲོས་ཚོགས་ཀྱི་རྒྱལ་སྤྱིའི་འགྲོ་བ་མིའི་ཐོབ་ཐང་ཚོགས་ཆུང་གི་ཚོགས་མི་ཁག་ཅིག་དང་ཁེ་ན་ཌ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་གཞན་སྐུ་ཞབས་ Randall Garrison ལགས་བཅས་མཇལ་མོལ་གནང་སྟེ་གཙོ་བོ་ཨ་རིའི་གྲོས་ཚོགས་སུ་ Reciprocal Access to Tibet ཞེས་ཨ་རིའི་མི་སེར་བོད་ནང་འགྲོ་བསྐྱོད་དང་འབྲེལ་བའི་གྲོས་འཆར་སོགས་ཁྲིམས་སྒྲིག་ཁག་ཅིག་འདོན་སྤེལ་གནང་བ་དེ་དག་གཏན་འབེབས་ཐོག་ཕྱག་བསྟར་གང་མགྱོགས་གནང་སྐྱོང་ཡོང་བར་ཁེ་ན་ཌའི་གྲོས་ཚོགས་འཐུས་མི་རྣམས་ལ་རེ་སྐུལ་ཞུས་འདུག

བོད་ཀྱི་བདེ་རྩ་ཚོགས་པས་རྒྱལ་སྤྱིའི་ཟུངས་ཁྲག་སྦྱིན་གཏོང་ཉིན་མོ་སྲུང་བརྩི་ཞུས་པ།

དེ་རིང་ཟླ་ ༦ ཚེས་ ༡༤  ཉིན་སྔ་དྲོ་ཚོུད་ ༡༠༌༣༠ ཐོག་བཞུགས་སྒར་དུ་རྟེན་གཞི་བྱས་པའི་ Tibet Charity འམ་བོད་ཀྱི་བདེ་རྩ་ཚོགས་པས་རྒྱལ་སྤྱིའི་ཟུངས་ཁྲག་སྦྱིན་གཏོང་ཉིན་མོ་སྲུང་བརྩི་ཞུས་གནང་ཡོད་པ་དང་། མཛད་སྒོའི་ཐོག་༸སྐུའི་ཕྱི་ལུགས་བླ་སྨན་པ་ས་འདུ་ཚང་ཚེ་བརྟན་རྡོ་རྗེ་ལགས་དབུ་བཞུགས་ཐོག་ཚོགས་པའི་ལས་བྱེད་དང་སློབ་ཕྲུག་བཅས་ལྷན་འཛོམས་གནང་ཡོད་པ་རེད། བོད་ཀྱི་བདེ་རྩ་ཚོགས་པའི་འགན་འཛིན་ཚེ་རིང་དོན་གྲུབ་ལགས་ཀྱིས་རྒྱལ་སྤྱིའི་ཁྲོད་ཟུངས་ཁྲག་སྦྱིན་གཏོང་ཉིན་མོ་བྱུང་རབས་ལོ་རྒྱུས་ངོ་སྤྲོད་གནང་བ་དང་འབྲེལ་བོད་ཀྱི་བདེ་རྩས་ཕྱི་ལོ་ ༢༠༡༢ ལོ་ནས་ལས་གཞི་དེ་དབུ་འཛུགས་གནང་ཡོད་པ་དང་། སྐབས་དེར་ཟུངས་ཁྲག་སྦྱིན་གཏོང་གནང་མཁན་གྱི་ཚོགས་མི་༣༦༠ ལྷག་ཙམ་ནས་ཐོ་འགོད་གནང་ཡོད་ཀྱང་ད་ལྟའི་ཆར་ཚོགས་མི་ ༩༠ ཙམ་ལས་མེད་པས་ཟུངས་ཁྲག་དགོས་མཁོ་ཆེ་བའི་ཛ་དྲག་རིགས་བྱུང་སྐབས་ནད་པར་ཟུངས་ཁྲག་སྤྲད་མ་ཐུབ་པའི་དཀའ་ངལ་འཕྲད་བཞིན་ཡོད་སྐོར་གསུངས་སོང་། སྐབས་དེར་༸སྐུའི་ཕྱི་ལུགས་བླ་སྨན་པ་ས་འདུ་ཚང་ཚེ་བརྟན་རྡོ་རྗེ་ལགས་ཀྱིས་ཟུངས་ཁྲག་སྦྱིན་གཏོང་གནང་རྒྱུ་དེ་སྦྱིན་པ་བཞི་ལས་ཟང་ཟིང་གི་སྦྱིན་པ་ཞིག་ཡིན་ནའང་དོན་དངོས་ཐོག་གཞན་སྲོག་བསྐྱབས་པའི་སྦྱིན་པ་ཞིག་ཡིན་པ་གསུངས་ཡོད། དེ་བཞིན་བོད་ཀྱི་བདེ་རྩ་ཚོགས་པའི་འཕྲོད་བསྟེན་ཚན་པའི་འགན་ཁུར་བ་འཇིགས་མེད་ཆོས་སྐྱིད་ལགས་ཀྱིས་ང་ཚོའི་སྤྱི་ཚོགས་ཁྲོད་གལ་སྲིད་ཟུངས་ཁྲག་སྦྱིན་གཏོང་གནང་ཚེ་རང་ཉིད་ཀྱི་ལུས་ཁམས་ལ་གནོད་འཚེ་བྱུང་ངེས་ཡིན་པའི་དོགས་གཞི་ཆེན་པོ་ཞིག་ཡོད་པ་དེ་དག་སེལ་ཆེད་དུ་ཟུངས་ཁྲག་སྦྱིན་གཏོང་གནང་ཐུབ་ན་རང་ཉིད་ཀྱི་འཕྲོད་བསྟེན་ལ་ཕན་ཐོགས་ཆེ་བ་ཡོད་སྐོར་སོགས་གསུངས་སོང་། རྩ་བའི་རྒྱལ་སྤྱིའི་ཟུངས་ཁྲག་སྦྱིན་གཏོང་ཉིན་མོ་དེ་དང་བླངས་ཟུངས་ཁྲག་སྦྱིན་མཁན་རྣམས་ལ་ཆེ་མཐོང་དང་ཐུགས་རྗེ་ཆེ་ཞུ་མཚོན་སླད་ཕྱི་ལོ་ ༢༠༠༤ ལོར་དབུ་འཛུགས་གནང་བ་ཞིག་ཡིན་པ་རེད། བོད་ཀྱི་བདེ་རྩ་ཚོགས་པའི་ངོས་ནས་ཕྱི་ལོ་ ༢༠༡༢ ལོ་ནས་ད་བར་ནད་པ་ཁྱོན་ ༢༣༣ ལ་ཟུངས་ཁྲག་གནང་ཐུབ་ཡོད་པ་དང་། དེའི་ཁོངས་སུ་ ༢༠༡༧ ལོ་ནས་ད་བར་ནད་པ་ཁྱོན་ ༢༥ ལ་ཟུངས་ཁྲག་གནང་ཐུབ་པ་བྱུང་འདུག

༸གོང་ས་མཆོག་གིས་ཨ་རི་དང་བྱང་ཀོ་རི་ཡའི་དབུ་ཁྲིད་གཉིས་ཀྱི་མཇལ་མོལ་ལ་དགའ་བསུའི་འཚམས་འདྲི་མཛད་པ།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཉེ་ཆར་ཨ་རིའི་སྲིད་འཛིན་དང་བྱང་ཀོ་རི་ཡའི་འགོ་ཁྲིད་རྣམ་གཉིས་དབར་མཇལ་མོལ་གནང་བར་འཚམས་འདྲི་གནང་བ་དང་འབྲེལ། མཇལ་མོལ་དེའི་བརྒྱུད་ཀོ་རི་ཡའི་ཉེ་བའི་གླིང་ཕྲན་ཁྱོན་ཡོངས་སུ་རྡུལ་ཕྲན་མཚོན་ཆ་རྩ་མེད་བཟོ་རྒྱུར་ཐུགས་རེ་ཡོད་པ་བཀའ་བསྩལ་འདུག གཟའ་འཁོར་འདིའི་རེས་གཟའ་མིག་དམར་ཕྱི་ཚེས་ ༡༢ ཉིན་ཨེ་ཤ་ཡའི་རྒྱལ་ཁབ་སིངྒ་པུར་ Sentosa གླིང་ཕྲན་ཐོག་ཨ་རིའི་སྲིད་འཛིན་སྐུ་ཞབས་ Donald Trump མཆོག་དང་བྱང་ཀོ་རི་ཡའི་འགོ་ཁྲིད་ Kim Jong-un གཉིས་དབར་ལོ་རྒྱུས་རང་བཞིན་ལྡན་པའི་མཇལ་འཕྲད་གནང་ཡོད་པ་དང་། མཇལ་མོལ་དེ་འཛམ་གླིང་རྒྱལ་ཁབ་ཁག་གི་གཞུང་དང་དེ་བཞིན་གསར་འགྱུར་བརྒྱུད་ལམ་སོགས་ནས་དོ་སྣང་ཆེན་པོ་གནང་ཡུལ་ཞིག་ཆགས་ཡོད་པ་རེད། ཁ་སང་ཟླ་ ༦ ཚེས་ ༡༣ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་དབུ་ཁྲིད་རྣམ་གཉིས་ཀྱི་མཇལ་མོལ་ལ་དགའ་བསུའི་གསུང་འཕྲིན་ཞིག་བསྩལ་བའི་ནང་གྲོས་མོལ་ནི་རྒྱལ་ཁབ་དང་མི་སྒེར་སོ་སོའི་དབར་ཡོད་པའི་དཀའ་ངལ་སེལ་ཐབས་བྱ་རྒྱུའི་ཐབས་ལམ་གཅིག་པོ་དེ་ཡིན་པ་དང་དེ་ལ་༸གང་ཉིད་མཆོག་ནས་ཡིད་ཆེས་བརྟན་པོ་ཡོད་ཅེས་བཀའ་བསྩལ་བ་དང་འབྲེལ། སྤྱིར་མགོན་པོ་༸གང་ཉིད་མཆོག་ནི་འཛམ་གླིང་འདིའི་ནང་གོ་མཚོན་མེད་པ་བཟོ་རྒྱུ་དང་རྡུལ་ཕྲན་མཚོན་ཆ་རྩ་མེད་བཟོ་ཐབས་ལ་ཡོངས་གྲགས་ཐོག་རྒྱབ་སྐྱོར་གནང་མཁན་ཞིག་ཡིན་སྟབས། ད་རེས་རྒྱལ་ཁབ་ཕྱོགས་གཉིས་དབར་ལོ་རྒྱུས་རང་བཞིན་ལྡན་པའི་ངོ་ཐུག་མཇལ་མོལ་དེར་དགའ་ཚོར་ཆེན་པོས་འཚམས་འདྲི་ཡོད་ཅེས་བཀའ་བསྩལ་བ་དང་ཆབས་ཅིག་ཏུ་མཇལ་མོལ་དེའི་བརྒྱུད་ཀོ་རི་ཡའི་ཉེ་བའི་གླིང་ཕྲན་ཁྱོན་དུ་རྡུལ་ཕྲན་མཚོན་ཆ་རྩ་མེད་བཟོ་བའི་བརྒྱུད་ཞི་བདེ་རྒྱུན་གནས་ཐུབ་པར་ཐུགས་རེ་ཡོད་སྐོར་བཀའ་བསྩལ་འདུག ༸གོང་ས་མཆོག་གིས་གསུང་འཕྲིན་དེའི་ནང་ད་དུང་རྒྱལ་ཁབ་ཕྱོགས་གཉིས་པོའི་དབུ་ཁྲིད་ནས་ད་རེས་གོམ་སྟབས་ཆེན་པོ་དེ་འདྲ་ཞིག་སྤོ་གནང་བར་ཆེ་བསྟོད་དང་འབྲེལ། དབུ་ཁྲིད་རྣམ་གཉིས་ཀྱིས་འབད་བརྩོན་གནང་བ་དེས་མ་འོངས་པར་འགྲོ་བ་མིའི་ཚེ་སྲོག་ལ་གནོད་པའི་འཇིགས་སྣང་ཆེ་བའི་གོ་མཚོན་དེ་དག་མེད་པ་བཟོ་རྒྱུར་གཞན་ལའང་སེམས་ཤུགས་འཕར་མ་ཞིག་སྦྱིན་པ་དང་། རིང་མིན་གོ་ལའི་ཐོག་དོན་དམ་པའི་ཞི་བདེ་ཡུན་གནས་ཐུབ་རྒྱུར་ཐུགས་རེ་ཡོད་པར་མ་ཟད་༸གང་ཉིད་མཆོག་ནས་མཇལ་མོལ་དེ་ནས་བཟང་ཕྱོགས་ཀྱི་གྲུབ་འབྲས་ཤིག་ཐོན་རྒྱུར་ཐུགས་སྨོན་ཡོད་པ་བཀའ་བསྩལ་འདུག

བྷལ་ཊིཀ་མང་ཚོགས་ཚོར་དུས་རབས་ཉེར་གཅིག་པ་འདི་གྲོས་མོལ་གྱི་དུས་རབས་ཤིག་ཡོང་བར་འགན་ཡོད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་ Lithuania རྒྱལ་ས་ Vilnius གཙུག་ལག་སློབ་གཉེར་ཁང་དུ་སློབ་ཕྲུག་དང་མང་ཚོགས་ལ་ཤེས་ཡོན་ལམ་ལུགས་ནང་བཟང་སྤྱོད་དགོས་གལ་སྐོར་བཀའ་སློབ་བསྩལ་སྐབས་དུས་རབས་ཉེར་གཅིག་པ་འདི་ཞི་བདེ་དང་གྲོས་མོལ་གྱི་དུས་རབས་ཤིག་ཡོང་བར་ Baltic མང་ཚོགས་ཚོས་འགན་བཞེས་དགོས་པར་བཀའ་བསྩལ་འདུག དེ་ཡང་ Lithuania བོད་ཁང་གིས་གནད་ཞུས་ལྟར་༸གོང་ས་མཆོག་ལི་ཐོ་ནི་ཡར་ཆིབས་བསྒྱུར་བསྐྱངས་ཡོད་པ་དང་འབྲེལ་མགོན་པོ་༸གང་ཉིད་མཆོག་ཁ་སང་ལི་ཐོ་ནི་ཡའི་རྒྱལ་ས་ Vilnius ནང་༸ཞབས་སོར་བདེ་བར་འཁོད་ཡོད་པ་རེད། དེ་རིང་སྔ་དྲོ་བཞུགས་གནས་གསོལ་མགྲོན་ཁང་དུ་གསར་འགོད་ལྷན་ཚོགས་ཤིག་གི་ཐོག་དབུ་བཞུགས་མཛད་པ་དང་སྦྲགས་ཡུལ་དེའི་ནང་གི་མཛད་འཆར་ཁག་དབུ་འཛུགས་བསྐྱངས་འདུག དེ་རྗེས་ཉིན་གུང་ཚོུད་  ༡༢༌༣༠ ཐོག་༸གོང་ས་མཆོག་ Vilnius གཙུག་ལག་སློབ་གཉེར་ཁང་དུ་ཆིབས་བསྒྱུར་གྱིས་སློབ་གཉེར་ཁང་གི་དགེ་ལས་སློབ་མ་དང་མང་ཚོགས་བཅས་ཁྱོན་མི་གྲངས་ ༤༠༠༠ ཙམ་ཞིག་ལ་ Human Values in Education འམ་ཤེས་ཡོན་ལམ་ལུགས་ནང་བཟང་སྤྱོད་ཞེས་པའི་བརྗོད་གཞིའི་ཐོག་བཀའ་སློབ་དང་མང་ཚོགས་ཀྱི་དོགས་དྲི་ཁག་ལ་བཀའ་ལན་བསྩལ་གནང་འདུག སྐབས་དེར་༸གོང་ས་མཆོག་གིས་མགོན་པོ་༸གང་ཉིད་མཆོག་ནས་དུས་རྟག་ཏུ་ལམ་སྟོན་མཛད་བཞིན་པའི་འགྲོ་བ་མི་གཅིག་གྱུར་གྱི་འདུ་ཤེས་གོང་འཕེལ་སྐོར་བཀའ་ནན་བསྩལ་བ་དང་སྦྲགས། འཛམ་གླིང་ནང་ཞི་བདེ་གོང་འཕེལ་དང་ཆོས་ལུགས་མཐུན་སྒྲིལ། དེ་བཞིན་བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་སྲུང་སྐྱོབ་གནང་རྒྱུ་བཅས་ནི་༸གང་ཉིད་མཆོག་གི་ཐུགས་བསྐྱེད་དམ་བཅའ་ཆེན་པོ་གསུམ་དང་ཐུགས་བསྐྱེད་དམ་བཅའ་བཞི་པ་རྒྱ་གར་གྱི་གནའ་བོའི་རིག་གནས་སླར་གསོ་མཛད་རྒྱུ་སོགས་ཀྱི་སྐོར་བཀའ་བསྩལ་ཞིབ་རྒྱས་མཛད་ཡོད་པ་མ་ཟད་ང་ཚོའི་ངོས་ནས་དུས་རབས་ ༢༡ པ་འདི་ཞི་བདེ་དང་གྲོས་མོལ་གྱི་དུས་རབས་ཤིག་ཏུ་སྐྲུན་དགོས་གལ་ཡིན་པ་དང་། ལྷག་དོན་བྷལ་ཊིཀ་རྒྱལ་ཁབ་ལྟ་བུར་ཆ་མཚོན་ན་དམག་གི་ནུས་པ་ལས་འདས་པའི་ནུས་པ་གཞན་ཤུགས་ཆེ་བ་ཡོད་པ་ཚོར་མྱོང་མཁན་གྱི་རྒྱལ་ཁབ་ཡིན་པ་བཞིན་མང་ཚོགས་ཚོས་ནས་ཀྱང་ཞི་བདེ་དང་གྲོས་མོལ་གྱི་དུས་རབས་ཤིག་ཡོང་བར་འགན་བཞེས་དགོས་གནད་ཡིན་པ་སོགས་ཀྱི་ཐད་ལམ་སྟོན་བཀྲིན་ཆེ་བ་བསྩལ་འདུག ཝིལ་ནཱས་བཙུག་ལག་སློབ་གཉེར་ཁང་དུ་བཀའ་སློབ་ཀྱི་མཛད་རིམ་གྲུབ་རྗེས་མགོན་པོ་མཆོག་ནས་སྔ་ལོ་ Vilnius གྲོང་ཁྱེར་སྤྱི་ཁྱབ་སྐུ་ཞབས་ Remigijus Simasius མཆོག་གིས་དབུ་འབྱེད་གནང་བའི་ Tibet Square ས་ཚིགས་སུ་ཆིབས་བསྒྱུར་གྱིས་ལྗོན་ཤིང་འདེབས་འཛུགས་གནང་བའི་བརྒྱུད་ Lithuania ལ་རང་བཙན་ཐོབ་ནས་ལོ་ངོ་ ༡༠༠ ཧྲིལ་པོ་འཁོར་བའི་དུས་ཚིགས་རྗེས་དྲན་གནང་འདུག རྩ་བའི་༸གོང་ས་མཆོག་ Baltic རྒྱལ་ཁབ་ནང་དེ་སྔ་ཕྱི་ལོ་ ༡༩༩༡ དང་ ༢༠༠༡ དེ་བཞིན་ ༢༠༡༣ བཅས་ལོ་སོ་སོར་ཆིབས་བསྒྱུར་གནང་རྗེས་ཐེངས་འདིའི་ཆིབས་བསྒྱུར་ནི་ཆིབས་བསྒྱུར་ཐེངས་བཞི་པ་དེ་ཡིན་པ་རེད། མཛད་འཆར་ལྟར་ན་སང་ཉིན་༸གོང་ས་མཆོག་ནས་རྒྱལ་ས་ Vilnius གྲོས་ཚོགས་དུ་ཆིབས་བསྒྱུར་མཛད་ནས་ཡུལ་དེའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་འཐུས་མི་ཁག་ཅིག་དང་མཇལ་མོལ་གནང་གི་འདུག་པ་དང་།  Siemens Arena ཚོགས་ཁང་ནང་ The Art of Happiness འམ་བདེ་སྐྱིད་ཀྱི་བསྟན་བཅོས་ཞེས་པའི་བརྗོད་གཞིའི་ཐོག་བཀའ་སློབ་སོགས་ཀྱི་མཛད་འཕྲིན་ཁག་བསྐྱངས་རྗེས་ཚེས་ ༡༥ ཉིན་ཡོ་རོབ་རྒྱལ་ཁབ་ལ་ཊི་ཝི་ཡ་ནང་ཆིབས་ཞལ་བསྒྱུར་གནང་སྟེ་ཁུལ་དེར་ཆོས་འབྲེལ་གྱི་མཛད་འཆར་བསྐྱང་རྒྱུའི་ཐུགས་གཏན་ཁེལ་ཡོད་པ་རེད།

Latest news