Tibetan Royal Year of 2151 | Year of the Wood Dragon

བོད་མིའི་སྒྲིག་འཛུགས།

༸གོང་ས་མཆོག་གིས་ཨ་རིའི་གྲོས་ཚོགས་ཀྱི་ཚོགས་གཙོ་མཆོག་དང་མང་གཙོ་ཚོགས་པའི་འགོ་ཁྲིད་གསར་པར་འཚམས་འདྲི་མཛད་པ།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གསར་དུ་འོས་འདེམས་བྱུང་བའི་ཨ་རིའི་གྲོས་ཚོགས་འོག་མའི་ཚོགས་གཙོ་སྐུ་ཞབས་ Kevin McCarthy མཆོག་དང་། གྲོས་ཚོགས་འོག་མའི་མང་གཙོ་ཚོགས་པའི་འགོ་ཁྲིད་སྐུ་ཞབས་ Hakeem Jeffries ལགས་རྣམ་གཉིས་ལ་འཚམས་འདྲི་མཛད་འདུགཁ་སང་ཕྱི་ཚེས་ ༨ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་གནས་མཆོག་རྡོ་རྗེ་གདན་ནས་ཨ་རིའི་གྲོས་ཚོགས་ཀྱི་འགོ་ཁྲིད་གཉིས་ལ་སྩལ་བའི་འཚམས་འདྲི་དེའི་ནང་མགོན་པོ་༸གང་ཉིད་མཆོག་གིས་དུས་རྟག་ཏུ་མང་གཙོ་དང་ཁྲིམས་ཀྱི་དབང་སྒྱུར་ལྡན་པའི་ཨ་རིའི་གཞི་རྩའི་རིན་ཐང་ལ་ཡིད་སྨོན་མཛད་བཞིན་ཡོད་པ་སོགས་ཨ་རིའི་ཐུན་མོང་མ་ཡིན་པའི་མང་གཙོའི་ལམ་ལུགས་ལ་བསྔགས་བརྗོད་མཛད་པ་དང་སྦྲགས། ཨ་རིའི་ངོས་ནས་འཛམ་གླིང་འདིའི་ཐོག་དཔལ་འབྱོར་དང་སྤྱི་ཚོགས། དེ་བཞིན་གནམ་གཤིས་འགྱུར་ལྡོག་སོགས་ཀྱི་དཀའ་ཁག་སེལ་ཏེ། འཛམ་གླིང་འདི་ཞི་བདེ་དང་ལྡན་པ་ཞིག་བཟོ་རྒྱུའི་ཐད་དམིགས་བསལ་གྱི་ནུས་པ་འདོན་ཐུབ་པའི་ཐུགས་རེ་མཛད་བཞིན་ཡོད་ཅེས་བཀའ་སྩལ་མཛད་འདུགམ་ཟད་ཨ་རི་རྒྱལ་ཁབ་ནང་མི་སེར་ཚོར་རང་དབང་དང་གོ་སྐབས་འདྲ་མཉམ་ཡོད་པ་དེས་ད་ཆ་ཨ་རི་འདི་བཞིན་རྒྱལ་སྤྱིའི་ཐོག་རེ་ལྟོས་བྱེད་སའི་རྒྱལ་ཁབ་གཙོ་བོ་ཞིག་ཆགས་ཡོད་པ་སོགས་བཀའ་སྩལ་དང་འབྲེལ། ལྷག་པར་དུ་མགོན་པོ་༸གང་ཉིད་མཆོག་གིས་དེ་སྔ་ ༡༩༧༩ ལོ་ནས་ད་བར་ཨ་རིའི་ནང་ཆིབས་བསྒྱུར་ལེན་མང་མཛད་དེ་ཡུལ་དེའི་གྲོས་ཚོགས་ཀྱི་ཚོགས་གཙོ་གཙོས་པའི་གནད་ཡོད་འགོ་ཁྲིད་དང་ལྷན་དུ་ཐུག་འཕྲད་ཀྱིས་གནད་དོན་འདྲ་མིན་ཐོག་དགོངས་ཚུལ་བརྗེ་ལེན་གནང་རྒྱུའི་གོ་སྐབས་བྱུང་ཡོད་པ་མ་ཟད། སྐབས་དེར་མགོན་པོ་༸གང་ཉིད་མཆོག་ནས་བོད་ནང་གི་བོད་མིའི་མངོན་འདོད་དང་རེ་བ་ཁག་འབྲེལ་ཡོད་འགོ་ཁྲིད་ཚོ་དང་བཀའ་བསྡུར་མཛད་རྒྱུ་བྱུང་ཡོད་པ་སོགས་བཀའ་འགྲེལ་དང་སྦྲགས། བོད་མིའི་ངོས་ནས་ཨ་རིའི་ཆབ་སྲིད་ཚོགས་པ་ཐུན་མོང་ནས་ད་བར་བོད་དོན་ཐོག་རྒྱབ་སྐྱོར་གནང་དང་གནང་བཞིན་པར་བཀའ་དྲིན་རྗེས་སུ་དྲན་བཞིན་ཡོད་ཅེས་བཀའ་སྩལ་མཛད་འདུག ལྷག་པར་མགོན་པོ་༸གང་ཉིད་མཆོག་གིས་བོད་མིའི་འཐབ་རྩོད་ནི་བོད་མི་རྣམས་ལ་ཆེ་མཐོང་དང་རང་དབང་ལྡན་པའི་ཐོག་ནས་རང་ཉིད་ཀྱི་ཐུན་མོང་མ་ཡིན་པའི་རིག་གཞུང་ཁག་མི་ཉམས་རྒྱུན་འཛིན་དང་གོང་སྤེལ་ཐུབ་རྒྱུ་ཡིན་པ་དང་། དེ་བཞིན་ཞི་བདེ་དང་བྱམས་བརྩེ། འཚེ་བ་མེད་པ་བཅས་ཀྱི་གཞི་རྟེན་ཡོད་པའི་བོད་ཀྱི་ཐུན་མིན་རིག་གཞུང་དེ་དག་བོད་མི་ཙམ་མིན་པར་འཛམ་གླིང་གི་མི་སེར་སྤྱི་ལ་ཕན་པ་སྒྲུབ་རྒྱུའི་ནུས་པ་ལྡན་ཡོད་པ་སོགས་བཀའ་སྩལ་དང་སྦྲགས། གཞིས་བཞུགས་བོད་མིའི་སྙིང་སྟོབས་དང་ལྷག་བསམ་དུས་ད་ལྟ་ཡང་ཞུམ་པ་མེད་པར་གནས་ཡོད་པ་མ་ཟད། རྒྱ་ནག་ནང་མཚོན་ན། ད་ཆ་རིམ་པས་འགྱུར་བ་ཐེབས་བཞིན་པ་དེར་བཟང་ཕྱོགས་ཀྱི་འགྱུར་བ་ཞིག་འབྱུང་རྒྱུར་ཐུགས་རེ་ཆེན་པོ་མཛད་བཞིན་ཡོད་ཅེས་བཀའ་སྩལ་འདུག༸གོང་ས་༸སྐྱབས་མགོན་ཆེན་པོ་མཆོག་གིས་ད་དུང་མགོན་པོ་༸གང་ཉིད་མཆོག་གི་ཐུགས་བསྐྱེད་དམ་བཅའ་བཞིའི་སྐོར་ངོ་སྤྲོད་སོགས་མཛད་པ་དང་སྦྲགས། ཨ་རིའི་གྲོས་ཚོགས་ཀྱི་འགོ་ཁྲིད་གསར་པ་རྣམ་གཉིས་ཀྱི་མ་འོངས་ལས་དོན་ཐམས་ཅད་ཨ་རིའི་མི་མང་གི་མངོན་འདོད་དང་མཐུན་པར་སྒྲུབ་ཐུབ་པ་མ་ཟད། འཛམ་གླིང་འདི་ཞི་བདེ་དང་བདེ་སྐྱིད་ལྡན་པ་ཞིག་བཟོ་རྒྱུའི་ཐད་ནུས་པ་གང་ལེགས་སྤུངས་ཐུབ་པའི་ཐུགས་སྨོན་མཛད་བཞིན་ཡོད་ཅེས་བཀའ་སྩལ་མཛད་འདུག གཞི་རྩའི་སྔར་ལོའི་ཕྱི་ཟླ་ ༡༡ ནང་གྲུབ་པའི་ཨ་རིའི་བར་མའི་འོས་བསྡུའི་ཁྲོད་གྲོས་ཚོགས་འོག་མའི་རྒྱལ་ཁ་ཨ་རིའི་སྤྱི་མཐུན་ཚོགས་པར་ཐོབ་སྟེ། བདུན་ཕྲག་སྔོན་མའི་རེས་གཟའ་ལྷག་པའི་ཉིན་དེ་འབྲེལ་གྲོས་ཚོགས་ཀྱི་ཚོགས་གཙོ་འོས་འདེམས་ཀྱི་ལས་རིམ་དབུ་འཛུགས་གནང་ཡོད་པ་དང་། སྐབས་དེར་སྤྱི་མཐུན་ཚོགས་པའི་འགོ་ཁྲིད་སྐུ་ཞབས་ Kevin McCarthy ལགས་ལ་རང་ཉིད་ཀྱི་ཆབ་སྲིད་ཚོགས་པའི་ཚོགས་མི་ཉི་ཤུ་ཙམ་ནས་རྒྱབ་སྐྱོར་མ་ཐོབ་པར་བརྟེན། ཚོགས་གཙོའི་འོས་འདེམས་ཀྱི་ལས་རིམ་དེ་བཞིན་ཉིན་གྲངས་གསུམ་ནང་འོས་ཤོག་ཐེངས་ ༡༥ གནང་དགོས་བྱུང་ཡོད། འོག་ཤོག་རིམ་པ་ ༡༥ སྐབས་སྐུ་ཞབས་ Kevin McCarthy ལགས་སུ་འོས་གྲངས་ ༢༡༦ དང་། མང་གཙོ་ཚོགས་པའི་འགོ་ཁྲིད་གསར་པ་སྐུ་ཞབས་ Hakeem Jeffries ལགས་སུ་འོས་གྲངས་ ༢༡༢ བཅས་ཐོབ་སྟེ་སྤྱི་མཐུན་ཚོགས་པའི་འགོ་ཁྲིད་སྐུ་ཞབས་ Kevin McCarthy ལགས་ཨ་རིའི་གྲོས་ཚོགས་འོག་མའི་ཚོགས་གཙོ་སྐབས་ ༥༥ པར་བསྐོ་བཞག་བྱུང་ཡོད།སྐུ་ཞབས་ Kevin McCarthy ལགས་ཚོགས་གཙོར་བདམས་ཐོན་བྱུང་རྗེས་གསུངས་བཤད་ཐེངས་དང་པོའི་ནང་མ་འོངས་ལས་དོན་ཁག་གཅིག་ཡོངས་གྲགས་གནང་བའི་ནང་། གྲོས་ཚོགས་ཀྱི་ལས་དོན་འགོ་འཛུགས་གནང་མ་ཐག་ཆབ་སྲིད་ཚོགས་པ་གཉིས་ཀ་ལས་གྲུབ་པའི་རྒྱ་ནག་ཐོག་གི་ཚོགས་ཆུང་ཞིག་གསར་འཛུགས་གནང་སྟེ། རྒྱ་ནག་དམར་ཤོག་གཞུང་གིས་ཨ་རིའི་དཔལ་འབྱོར་གནས་བབ་ལ་གྱོང་རྒུད་གཏོང་བཞིན་པའི་གནད་དོན་ཁག་ལ་ཞིབ་འཇུག་ཚད་ལྡན་ཞིག་བྱེད་པའི་བརྒྱུད་རྒྱ་ནག་གི་བྱེད་བབ་ལ་གདོང་ལན་ནན་པོ་བྱེད་ཀྱི་ཡིན་ཞེས་གསུངས་ཡོད།ཁ་སང་སྐུ་ཞབས་ Kevin McCarthy མཆོག་གིས་གཙོས་པའི་གྲོས་ཚོགས་ཀྱི་འཐུས་མི་རྣམས་ནས་ལས་འཁུར་དམ་འབུལ་ཞུས་ཏེ་ཕྱག་ལས་དངོས་སུ་དབུ་འཛུགས་གནང་ཡོད་པ་དང་བསྟུན། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག དེ་བཞིན་ཚོགས་གཞོན་སྒྲོལ་མ་ཚེ་རིང་མཆོག་བཅས་ནས་ཀྱང་བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ་སྐུ་ཞབས་ Kevin McCarthy མཆོག་ལ་འཚམས་འདྲི་དང་སྦྲགས། ད་བར་ཨ་རི་གཞུང་དང་གྲོས་ཚོགས་ནས་བོད་དོན་ཐོག་རྒྱབ་སྐྱོར་གནང་པར་ཐུགས་རྗེ་ཆེ་ཞུ་དང་། ལྷག་པར་དུ་ད་ཆ་བོད་ནང་གི་གནས་སྟངས་ཇེ་སྡུག་ཏུ་འགྲོ་བཞིན་པའི་སྐབས་འདིར་རྒྱབ་སྐྱོར་སྔར་ལྷག་གནང་སྐྱོང་ཡོང་བའི་རེ་སྐུལ་སོགས་ཞུས་འདུག  

བོད་མི་བརྡ་འཕྲིན་འཕྲུལ་ལས་ཆེད་ལས་པའི་ཚོགས་འདུ་ཐེངས་དང་པོ་བསྐོང་ཚོགས་གནང་བ།

བོད་མིའི་སྒྲིག་འཛུགས་ཀྱི་བཀའ་ཤག་སྐབས་ ༡༦ པའི་ལམ་སྟོན་འོག་ཕྱི་དྲིལ་ཀམ་པུ་ཊར་སྡེ་ཚན་དང་སྤྱི་ཚོགས་ཡར་རྒྱས་ཐེབས་རྩའི་གོ་སྒྲིག་འོག་བཞུགས་སྒར་ཉེ་འདབས་སུ་རྟེན་གཞི་བྱས་པའི་དབུས་སྣེ་ལེན་ཁང་གི་འཛིན་སྐྱོང་སྦྱོང་བརྡར་ཁང་དུ་ཉིན་གྲངས་གཉིས་རིང་བོད་མི་བརྡ་འཕྲིན་འཕྲུལ་ལས་ཆེད་ལས་པའི་ཚོགས་འདུ་ཐེངས་དང་པོ་དེ་བསྐོང་ཚོགས་གནང་སོང་།དེ་རིང་ཚོགས་འདུའི་དབུ་འབྱེད་མཛད་སྒོའི་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་དབུས་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས། ཕྱི་དྲིལ་ཀམ་པུ་ཊར་སྡེ་ཚན་གྱི་འགན་འཛིན་བསྟན་འཛིན་ཚུལ་ཁྲིམས་ལགས། སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གི་འགན་འཛིན་དགེ་བཤེས་བློ་བཟང་སྨོན་ལམ་ལགས། དེ་བཞིན་རྒྱ་གར་རྒྱལ་ཡོངས་ཀྱི་བརྡ་འཕྲིན་འཕྲུལ་ལས་ཆེད་ལས་པ་དང་གློག་ཀླད་ཐོག་རྒྱ་གར་དང་བོད་མིའི་སྤྱི་ཚོགས་ནང་ཞབས་ཞུ་སྒྲུབ་མཁན་མི་སྣ་ ༤༧ ཙམ་ལྷན་འཛོམས་གནང་འདུགསྐབས་དེར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་མ་འོངས་པར་འཛམ་བུ་གླིང་འདི་འཕྲུལ་རིག་དང་གྲངས་རྩིས་ཐོག་ཆས་རྒྱུའི་འགྱུར་བ་ཞིག་ཡོང་རྒྱུ་ངེས་གཏན་ཡིན་སྟབས། སྒྲིག་འཛུགས་ནས་ཀྱང་རྒྱལ་ཁབ་གཞན་དང་རྗེས་སུ་སྙེག་ཐབས་སུ་བཀའ་ཤག་སྐབས་ ༡༦ ནས་འཛིན་སྐྱོང་བྱེད་སྟངས་ཀྱི་ལམ་ལུགས་དེ་ཤོག་བུ་སྟེང་ནས་མིན་པར་དྲ་ཐོག་ནས་ E-governance ལས་གཞི་ལག་བསྟར་ཆེད་བོད་མིའི་སྒྲིག་འཛུགས་ཀྱི་ལས་བྱེད་ཁག་གཅིག་ཨེསྚོ་ནི་ཡཱར་ Estonia ཁུལ་དུ་སློབ་གཉེར་ཆེད་བཏང་ཡོད་སྐོར་དང་། དེ་བཞིན་ལོ་རྒྱུས་དང་འབྲེལ་བའི་སྔར་གྱི་ཡིག་ཆ་གལ་ཆེན་རྣམས་བདག་གཉེར་བྱས་ཏེ་དྲ་ཐོག་ཏུ་འཇོག་རྒྱུའི་ལས་གཞི་སོགས་སྤེལ་མུས་ཡིན་པ་ངོ་སྤྲོད་གནང་སོང་། སྲིད་སྐྱོང་མཆོག་གིས་ད་དུང་བོད་མི་བརྡ་འཕྲིན་འཕྲུལ་ལས་ཆེད་ལས་པའི་ཚོགས་འདུ་ཐེངས་དང་པོ་དེ་ཚོགས་དགོས་དོན་ནི་རྒྱ་གར་དུ་གནས་བཞུགས་བོད་མི་བརྡ་འཕྲིན་ཆེད་ལས་པ་རྣམས་མཉམ་རུབ་བཟོ་ཐབས་གཙོས་རྒྱལ་ཁབ་འཛུགས་སྐྲུན་གྱི་བསམ་བློ་བསྐྲུན་ཐབས། སྒྲིག་འཛུགས་ཀྱི་བརྙན་ཆས་གསར་པ་བཟོ་རྒྱུའི་ལས་གཞིའི་ཐོག་བགྲོ་གླེང་། དེ་བཞིན་ཆེད་ལས་པ་ཚོས་སྒྲིག་འཛུགས་དང་གཞུང་ཁོངས་མིན་པའི་ཚོགས་སྡེ་ཁག་ལ་ཞབས་ཞུ་བསྒྲུབ་རྒྱུའི་བརྒྱུད་ལམ་ཅི་ཞིག་ཡོད་མིན་ངོ་སྤྲོད་བྱ་རྒྱུར་དམིགས་པ་ཞིག་ཡིན་པ་གསུངས་ཡོད།ཕྱི་དྲིལ་ཀམ་པུ་ཊར་སྡེ་ཚན་གྱི་འགན་འཛིན་ཚུལ་ཁྲིམས་ལགས་ཀྱིས་དེ་འབྲེལ་ཆེད་ལས་པ་རྣམས་ལ་སྐབས་ ༡༦ པའི་བཀའ་ཤག་གི་དགོངས་དོན་ལྟར་དྲ་ཐོག་འཛིན་སྐྱོང་དང་འབྲེལ་བའི་ལས་གཞི་དང་། བརྡ་འཕྲིན་བརྒྱུད་དཔྱ་ཁྲལ་གྱི་ལས་དོན་ཡོངས་རྫོགས་སྒྲུབ་ཐབས། དེ་བཞིན་ཤེས་རིག་ལས་ཁུངས་ཀྱི་ལས་གཞི་ཁག་གཅིག་སྤྱན་འབུལ་ཞུས་པའི་སྒོ་ནས་ཆེད་ལས་པའི་བསམ་ཚུལ་བསྡུ་ལེན་དང་། ཕན་ཚུན་འབྲེལ་ལམ་དམ་ཟབ་བསྐྲུན་ཐབས་སུ་དམིགས་པ་ཞིག་ཡིན་པ་གསུངས་ཡོད། འདི་ག་གསར་འགོད་པས་ཚོགས་འདུ་དེར་བཅར་མཁན་ཆེད་ལས་མི་སྣ་ཁག་གཅིག་དང་ལྷན་དུ་བཅར་འདྲི་ཞུས་སྐབས། རྒྱ་གར་ཚོང་ལས་སྡེ་ཚན་ཞིག་གི་ནང་དུ་ Andriod དང་ཀུ་ཤུ་རྟགས་ཅན་གྱི་ཁ་པར་ནང་བརྙན་ཆས་བཟོ་མཁན་བསྟན་འཛིན་བསམ་གཏན་ལགས་ཀྱིས་བོད་མིའི་སྤྱི་ཚོགས་ནང་བརྙན་ཆས་མང་དག་བཟོ་ཡི་ཡོད་ཀྱང་འཕྲུལ་ལས་པའི་ལས་དོན་ཐད་སྟོང་ཆ་ཞིག་འབྱུང་གི་ཡོད། ལྷག་པར་དུ་ཐེངས་འདིའི་ཚོགས་འདུའི་ཐོག་སྒྲིག་འཛུགས་ནང་འཕྲུལ་ལས་དང་འབྲེལ་བའི་ཞབས་ཞུ་སྒྲུབ་མཁན་གྱི་མི་སྣ་ཚོར་ལས་དོན་གཉེར་ཕྱོགས་ཀྱི་ཐད་ལ་བསམ་ཚུལ་དང་ཕྱག་རོགས་གནང་འཆར་ཡོད་པ་གསུངས་སོང་། གཞན་ཡང་ཅནདྷ་གྷི་རི་སློབ་གྲྭའི་གློག་ཀླད་དགེ་རྒན་བསྟན་འཛིན་བཟང་མོ་ལགས་ཀྱིས་དགེ་རྒན་གྱི་ཕྱག་ལས་ཁྲོད་འཕྲུལ་ལས་དང་འབྲེལ་ནས་ཚོང་ལས་སྡེ་ཚན་ནང་ལས་དོན་གཉེར་རྒྱུའི་གོ་སྐབས་དེ་ཙམ་བྱུང་གི་མེད་སྟབས། ད་ལེན་འཕྲུལ་ལས་ཀྱི་ཆེད་ལས་པ་མང་པོ་འདུ་འཛོམས་གནང་སྐབས་བློ་སྐྱེད་ཆེན་པོ་ཐོབ་ཡོད་སྐོར་གསུངས་སོང་།    

བོད་མིའི་སྒྲིག་འཛུགས་ནས་༸གོང་ས་མཆོག་ལ་བརྟན་བཞུགས་བསྟར་འབུལ་ཞུ་རྒྱུ།

བོད་རྒྱལ་ལོ་ ༢༡༥༠ བོད་ཟླ་ ༡ ཚེས་ ༢༠ རྗེས་ཀྱི་གཟའ་ཚེས་དགེ་བའི་ཉིན་བོད་མིའི་སྒྲིག་འཛུགས་ཀྱི་ངོས་ནས་བོད་གཞིས་བྱེས་ལྷ་མི་ཡོངས་ཀྱི་ཚབ་ཞུས་ཏེ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བརྟན་བཞུགས་བསྟར་འབུལ་ཞུ་གཏན་ཁེལ་འདུགཁ་ཉིན་ཕྱི་ཚེས་ ༤ ཉིན་བོད་མིའི་སྒྲིག་འཛུགས་ཀྱི་བརྟན་བཞུགས་གོ་སྒྲིག་ཚོགས་ཆུང་གིས་ཡོངས་ཁྱབ་གསལ་བསྒྲགས་ཤིག་སྤེལ་བའི་ནང་། རིང་མིན་བོད་ཟླ་ ༡ ཚེས་ ༢༠ འམ་ཕྱི་ཟླ་ ༣ པའི་ཚེས་ ༡༢ རྗེས་ཀྱི་གཟའ་ཚེས་དགེ་བའི་ཉིན་བཞུགས་སྒར་དྷ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་བོད་མིའི་སྒྲིག་འཛུགས་ཀྱི་ངོས་ནས་བོད་གཞིས་བྱེས་ལྷ་མི་ཡོངས་ཀྱི་ཚབ་ཞུས་ཏེ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བརྟན་བཞུགས་བསྟར་འབུལ་ཞུ་གཏན་ཁེལ་ཡོད་པས། བླ་སློབ་དད་དམ་དང་སྤྱི་མཐུན་དགེ་ཚོགས་རྟེན་འབྲེལ་མཚོན་ཕྱིར་བློས་བཅད་ཞལ་འདེབས་འབུལ་བློ་ཡོད་མཁན་རྣམས་ནས་རང་རང་སོ་སོའི་གནས་ཡུལ་ས་གནས་འགོ་འཛིན་ལས་ཁུངས་དང་། བོད་རིགས་ཚོགས་འམ་བོད་རིགས་སྤྱི་མཐུན་ཚོགས་པ་སོ་སོས་སྐུ་ཚབ་དོན་གཅོད་ལས་ཁུངས་བརྒྱུད་ཆོས་རིགས་ལས་ཁུངས་སུ་འབུལ་གཏོང་དགོས་པ་གསུངས་འདུག འདི་གའི་གསར་འགོད་པའི་དེ་རིང་བརྟན་བཞུགས་གོ་སྒྲིག་ཚོགས་ཆུང་གི་ཚོགས་གཙོ་བོད་མིའི་སྒྲིག་འཛུགས་ཀྱི་བཀའ་དྲུང་ཆུ་སྐྱ་སྦྲ་གཉིས་ཚེ་རྒྱལ་ལགས་སུ་དེ་འབྲེལ་བཀའ་འདྲི་ཞུ་སྐབས་ཁོང་གིས། བརྟན་བཞུགས་ཀྱི་རྡོ་རྗེ་སློབ་དཔོན་དུ་དགའ་ལྡན་ཁྲི་ཐོག་བརྒྱ་དང་བཞི་པ་རྗེ་བཙུན་བློ་བཟང་བསྟན་འཛིན་མཆོག་ལ་སྐྱབས་འཇུག་ཞུས་ཡོད་སྐོར་སོགས་གསུངས་སོང་། བོད་མིའི་སྒྲིག་འཛུགས་ཀྱི་བརྟན་བཞུགས་གོ་སྒྲིག་ཚོགས་ཆུང་གི་ནང་དུ། ཚོགས་གཙོ་བཀའ་དྲུང་ཆུ་སྐྱ་སྦྲ་གཉིས་ཚེ་རྒྱལ་ལགས་ཀྱིས་གཙོས་པའི་ལྷན་ཁང་ཁག་གི་དྲུང་ཆེ་རྣམ་པ་བཅས་ཚོགས་མི་ ༨ ཡོད་པ་དང་། བརྟན་བཞུགས་ཀྱི་ཐུགས་འགན་གཙོ་བོ་དེ་བོད་མིའི་སྒྲིག་འཛུགས་ཆོས་རིག་ལས་ཁུངས་ནས་བཞེས་རྒྱུ་ཡིན་པ་རེད་འདུག

རྒྱ་གར་དབུས་གཞུང་གི་བློན་ཆེན་དང་གྲོས་ཚོགས་འཐུས་མི་རྣམས་ལ་བོད་དོན་ཞུ་སྐུལ་གནང་བཞིན་འདུག

ཟླ་བ་འདིའི་ཕྱི་ཚེས་ ༧ ནས་ ༢༧ བར་རྒྱ་གར་གྱི་རྒྱལ་ས་ལྡི་ལིར་རྒྱ་གར་གྱི་གྲོས་ཚོགས་གོང་འོག་གཉིས་ཀྱི་དགུན་དུས་ཀྱི་གྲོས་ཚོགས་འཚོགས་བཞིན་པའི་དུས་སྐབས་དང་བསྟུན། བོད་མི་མང་སྤྱི་འཐུས་རྒྱུན་ལས་དྲུག་ལས་གྲུབ་པའི་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་ཞིག་སྡེ་ཚན་གཉིས་ལ་ཆ་བགོས་ཀྱིས་རྒྱ་གར་དབུས་གཞུང་གི་བློན་ཆེན་དང་། གྲོས་ཚོགས་གོང་འོག་གི་འཐུས་མི་རྣམས་དང་ལྷན་དུ་མཇལ་འཕྲད་ཀྱིས་བོད་དོན་ཞུ་སྐུལ་གནང་བཞིན་འདུགཉེ་ཆར་ཕྱི་ཚེས་ ༢༢ ཉིན་དབུ་འཛུགས་གནང་པའི་བོད་དོན་ཞུ་སྐུལ་གྱི་ལས་རིམ་དང་འབྲེལ་བའི་སྐུ་ཚབ་ཚོགས་ཆུང་དང་པོའི་ནང་སྤྱི་འཐུས་མཁན་པོ་ཀཿབྲག་དངོས་གྲུབ་བསོད་ནམས་ལགས་དང་། སྤྱི་འཐུས་ཚེ་རིང་དབྱངས་ཅན་ལགས། སྤྱི་འཐུས་རྒྱལ་ལྡོང་ཕུར་པ་རྡོ་རྗེ་ལགས འཕགས་བོད་འབྲེལ་མཐུད་ཚོགས་པའི་ལས་བྱེད་ཆོས་ཉིད་ཚེ་རིང་ལགས་བཅས་དང་། སྐུ་ཚབ་ཚོགས་ཆུང་གཉིས་པའི་ནང་སྤྱི་འཐུས་གསེར་རྟ་ཚུལ་ཁྲིམས་ལགས་དང་། སྤྱི་འཐུས་དགེ་བཤེས་ལྷ་རམས་པ་གོ་བོ་བློ་བཟང་ཕན་བདེ་ལགས སྤྱི་འཐུས་བློ་བཟང་ཐུབ་བསྟན་ལགས། ཚོགས་དྲུང་ལས་ཁུངས་ཀྱི་ལས་བྱེད་བསྟན་འཛིན་གསལ་སྒྲོན་ལགས་བཅས་ལྷན་ཞུགས་གནང་འདུགསྐུ་ཚབ་རྣམ་པས་རྒྱ་གར་དབུས་གཞུང་གི་བློན་ཆེན་དང་གྲོས་ཚོགས་གོང་འོག་གཉིས་ཀྱིས་འཐུས་མི་གཙོས་པའི་གནད་ཡོད་མི་སྣ་ཁག་མཇལ་འཕྲད་གནང་སྐབས། བོད་མི་མང་སྤྱི་འཐུས་ལྷན་ཚོགས་ཀྱི་དྲན་རྟེན་ཕྱག་རྟགས་དང་། དབྱིན་སྐད་ཐོག་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལྗགས་རྩོམ་མཛད་པའི་ངོས་ཀྱི་ཡུལ་དང་ངོས་ཀྱི་མི་མང་ཞེས་པའི་ཕྱག་དཔེ། དེ་བཞིན་བོད་དེ་ནམ་ཡང་རྒྱ་ནག་གི་ཆ་ཤས་མ་རེད་ཅེས་པའི་ཕྱག་དེབ་གཅིག་བཅས་ཕུལ་པ་མ་ཟད། བོད་མི་མང་སྤྱི་འཐུས་རྒྱུན་ལས་ཀྱིས་གཏན་འབེབས་གནང་བའི་བོད་དོན་དང་འབྲེལ་བའི་དོན་ཚན་བཞིའི་ཐོག་ཞུ་སྐུལ་གནང་འདུགའདི་ག་རླུང་འཕྲིན་ཁང་ནས་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་གཉིས་པའི་ནང་ཡོད་པའི་སྤྱི་འཐུས་བློ་བཟང་ཐུབ་བསྟན་ལགས་སུ་དེ་འབྲེལ་བཀའ་འདྲི་ཞུས་སྐབས་ཁོང་གིས་རྒྱ་ནག་གཞུང་གིས་བོད་ནང་ཙམ་མ་ཟད་རྒྱ་གར་གྱི་ས་མཚམས་ཁུལ་དུ་དཀའ་ངལ་བཟོས་དང་བཟོ་བཞིན་པའི་གནད་དོན་དེས་རྒྱ་གར་གྱི་བདེ་འཇགས་ལ་མུ་མཐུད་དཀའ་ངལ་འབྱུང་བཞིན་ཡོད་པར་བརྟེན། བོད་ཀྱི་གནད་དོན་དེ་ཛ་དྲག་ཅིག་ལ་ངོས་འཛིན་གྱིས་གནད་དོན་དེ་དག་ལ་དོ་སྣང་མང་ཙམ་གནང་དགོས་གལ་དང་།བོད་རྒྱའི་དཀའ་རྙོག་སེལ་ཐབས་སུ་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་དང་རྒྱ་ནག་གི་འགོ་ཁྲིད་དབར་གྲོས་མོལ་སླར་གསོ་ཐུབ་རྒྱུར་རྒྱབ་སྐྱོར་དང་ཐུགས་ཁུར་གནང་གལ་སོགས་བོད་དོན་དང་འབྲེལ་བའི་དོན་ཚན་བཞིའི་ཐོག་ཞུ་སྐུལ་གནང་བར་འགྲེལ་བརྗོད་གནང་སོང་།དེ་བཞིན་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་དང་པོ་ནང་ཡོད་པའི་སྤྱི་འཐུས་ཚེ་རིང་དབྱངས་ཅན་ལགས་སུ་བཀའ་འདྲི་ཞུས་སྐབས། བོད་མི་མང་སྤྱི་འཐུས་རྒྱུན་ལས་ནས་གཏན་འབེབས་གནང་བའི་བོད་དོན་དང་འབྲེལ་བའི་དོན་ཚན་བཞི་དང་། དེ་མིན་འདི་ཚེས་ ༢༤ ཉིན་རྒྱ་གར་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ Shri Sujeet Kumar མཆོག་དང་ལྷན་དུ་མཇལ་འཕྲད་སྐབས། བོད་མིའི་དགུན་ཚོང་བའི་ས་ཆའི་དཀའ་ངལ་དང་། ས་གནས་ཀྱི་གནས་བབ་སོགས་ལ་མཐུན་འགྱུར་གནང་སྐྱོང་ཡོང་བའི་རེ་སྐུལ་ཞུས་འདུག་པ་དང་། སྐབས་དེར་སྐུ་ཞབས་ཁོང་གིས་གནད་དོན་དེ་ཚོའི་ཐོག་གང་ཐུབ་གནང་འཆར་ཡོད་པ་མ་ཟད། ལོ་རྗེས་མའི་ཕྱི་ཟླ་ ༣ པའི་ནང་རྒྱ་གར་གྲོས་ཚོགས་འཐུས་མི་གང་མང་གདན་ཞུས་གནང་སྟེ། བོད་དོན་རྒྱབ་སྐྱོར་ཚོགས་ཆེན་ཞིག་ཀྱང་འཚོགས་འཆར་ཡོད་པ་གསུངས་འདུག ལྷག་པར་དུ་སྐུ་ཚབ་རྣམས་ནས་ཕྱི་ལོ་ ༢༠༠༩ ནས་བཟུང་གཞིས་ལུས་བོད་མི་གྲངས་ ༡༥༧ ཙམ་གྱིས་རྒྱ་ནག་གཞུང་ལ་ངོ་རྒོལ་གྱིས་རང་ལུས་མེར་སྲེག་བཏང་ཡོད་སྐོར་དང་། ད་ལྟའི་བོད་ནང་གི་ཛ་དྲག་གནད་དོན་སོགས་གླེང་སློང་གནང་བ་སོགས་འགྲེལ་བརྗོད་གནང་སོང་།གཞི་རྩའི་བོད་མི་མང་སྤྱི་འཐུས་སྐུ་ཚབ་ཚོགས་ཆུང་ནས་དེ་རིང་བར་རྒྱ་གར་གྱི་བློན་ཆེན་གཙོས་པའི་གྲོས་ཚོགས་འཐུས་མི་ ༣༠ ལྷག་མཇལ་འཕྲད་གནང་ཡོད་པ་དང་འབྲེལ། འདི་ཚེས་ ༢༨ བར་བོད་མི་མང་སྤྱི་འཐུས་སྐུ་ཚབ་རྣམ་པས་བོད་དོན་ཞུ་སྐུལ་གྱི་ལས་དོན་མུ་མཐུད་གནང་རྒྱུ་ཡིན་པ་རེད། པར་དབང་བོད་མི་མང་སྤྱི་འཐུས་ལྷན་ཚོགས་ཀྱི་དྲ་ཚིགས།

ཨ་རིའི་གྲོས་ཚོགས་གོང་མའི་ནང་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་འདོན་སྤེལ།

ཁ་སང་ཕྱི་ཚེས་ ༢༠ ཉིན་ཨ་རིའི་ཆབ་སྲིད་ཚོགས་པ་གཉིས་ཀ་ལས་གྲུབ་པའི་གྲོས་ཚོགས་གོང་མའི་འཐུས་མི་སྐུ་ཞབས་ Jeff Merkley ལགས་དང་། སྐུ་ཞབས་ Todd Young ལགས། དེ་བཞིན་སྐུ་ཞབས་ Patrick Leahy ལགས་བཅས་ནས་ཡུལ་དེའི་གྲོས་ཚོགས་གོང་མའི་ནང་ Promoting a Resolution to the Tibet-China Conflict Act ཞེས་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་ཞིག་འདོན་སྤེལ་གནང་འདུགབོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་དེ་ཐོག་མར་འདི་ལོའི་ཕྱི་ཟླ་ ༧ ཚེས་ ༡༣ ཉིན་གྲོས་ཚོགས་འོག་མའི་འཐུས་མི་སྐུ་ཞབས་ JimMcgovern ལགས་དང་སྐུ་ཞབས་ Michael McCaul ལགས་རྣམ་གཉིས་ནས་ཡུལ་དེའི་གྲོས་ཚོགས་འོག་མའི་ནང་འདོན་སྤེལ་གནང་ཡོད་པ་དང་། ཁྲིམས་འཆར་དེའི་ནང་གཙོ་བོ་ཨ་རི་གཞུང་ནས་བོད་རྒྱའི་དཀའ་རྙོག་དེ་དུས་ད་ལྟའང་ཐག་གཅོད་ཟིན་མེད་པ་ཞིག་ལ་ངོས་འཛིན་དང་། རྒྱལ་སྤྱིའི་ཁྲིམས་ཐོག་ནས་བོད་མི་རྣམས་ལ་རང་ཐག་རང་གཅོད་ཀྱི་ཐོབ་ཐང་ཡོད་པར་ངོས་འཛིན། དེ་བཞིན་བོད་རྒྱའི་དཀའ་རྙོག་སེལ་ཐབས་སུ་བོད་རྒྱ་འབྲེལ་མོལ་གྱི་གནས་བབ་སླར་གསོ་མ་ཐུབ་པ་དེ་ནི་རྒྱ་ནག་གཞུང་གི་ནོར་འཁྲུལ་ཞིག་ཡིན་པ་དང་། རྒྱ་ནག་གཞུང་གིས་ལོ་རྒྱུས་ཐོག་བོད་འདི་རྒྱ་ནག་གི་ཆ་ཤས་ཡིན་སྐོར་སོགས་དངོས་ཡོད་གནས་ཚུལ་ལ་འཁྱོག་བཤད་བྱེད་བཞིན་པ་ཁག་ངོས་ལེན་མེད་པ་མ་ཟད། དེ་འབྲེལ་གནད་དོན་ཐོག་ལ་ཨ་རིའི་ཕྱི་སྲིད་ལས་ཁུངས་གཙོས་པའི་དེའི་ཁྱབ་ཁོངས་སུ་ཡོད་པའི་ཨ་རིའི་བོད་དོན་དམིགས་བསལ་འབྲེལ་མཐུད་པའི་ངོས་ནས་རྒྱ་ནག་གཞུང་ལ་གདོང་ལེན་གནང་དགོས་པ་སོགས་ཀྱི་དོན་ཚན་ཆེ་ཁག་ལྔ་ཙམ་འཁོད་ཡོད། ཁ་སང་ཁྲིམས་འཆར་དེ་གྲོས་ཚོགས་གོང་མའི་ནང་འདོན་སྤེལ་གནང་སྐབས་ཨ་རིའི་མང་གཙོ་ཚོགས་པའི་གྲོས་ཚོགས་གོང་མའི་འཐུས་མི་སྐུ་ཞབས་ Jeff Merkley ལགས་ནས། མི་མང་གི་རང་དབང་དང་རང་ཐག་རང་གཅོད་ཀྱི་ཐོབ་ཐང་ལ་གུས་བཀུར་ཞུ་རྒྱུ་ཨ་རིའི་ཐུན་མོང་མ་ཡིན་པའི་ཁྱད་ཆོས་དེ་ནི་ཨ་རིའི་གཞུང་གིས་རྒྱལ་སྤྱིའི་རྒྱལ་ཁབ་ཁག་དང་འབྲེལ་ལམ་བཞག་སྐབས་རྨང་གཞི་གཙོ་བོ་ཞིག་ཏུ་ངོས་འཛིན་ཞུ་དགོས་པ་དང་། ལྷག་པར་དུ་རྒྱ་ནག་གཞུང་གིས་རྒྱལ་སྤྱིའི་འབྲེལ་ལམ་ཁྲོད་ལོག་བཤད་སྣ་ཚོགས་བྱེད་བཞིན་པའི་དུས་སྐབས་འདིར་ཁྲིམས་འཆར་འདི་ནི་དེ་བས་ཀྱང་གལ་ཆེན་པོ་ཞིག་ཆགས་ཡོད་པ་སོགས་འགྲེལ་བརྗོད་དང་སྦྲགས། ཁྲིམས་འཆར་འདིའི་བརྒྱུད་ཨ་རི་གཞུང་དང་མི་མང་གི་ངོས་ནས་བོད་ཀྱི་གནད་དོན་ཐོག་ལ་གཟིགས་ཕྱོགས་ཁ་གསལ་བཟོས་པ་ཙམ་མ་ཟད། རྒྱ་ནག་གཞུང་ལ་བོད་རྒྱའི་དཀའ་རྙོག་སེལ་ཐབས་སུ་བོད་རྒྱ་འབྲེལ་མོལ་གྱི་གནས་བབ་བསྐྱར་གསོ་དང་། ད་ཆ་རྒྱ་ནག་གཞུང་གིས་ལག་བསྟར་བྱེད་བཞིན་པའི་སྲིད་བྱུས་དང་ལས་དོན་ཁག་གིས་བོད་མིའི་མངོན་འདོད་གྲུབ་ཐུབ་ཀྱི་མེད་པའི་བརྡ་ལན་གསལ་པོ་ཞིག་མཚོན་ངེས་ཡིན་པ་གསུངས་འདུགམ་ཟད་ཨ་རིའི་སྤྱི་མཐུན་ཚོགས་པའི་གྲོས་ཚོགས་གོང་མའི་འཐུས་མི་སྐུ་ཞབས་ Todd Young ལགས་ནས། རྒྱ་ནག་གཞུང་གིས་བོད་རྒྱའི་དཀའ་རྙོག་སེལ་ཐབས་སུ་འབྲེལ་མོལ་གྱི་གནས་བབ་བསྐྱར་གསོ་གནང་དགོས་པ་མ་ཟད། རྒྱ་ནག་གཞུང་གིས་བོད་ནང་ཙམ་མ་ཟད། རྒྱལ་སྤྱིའི་ཁྱོན་ཡོངས་སུ་འཁྱོག་བཤད་དྲིལ་བསྒྲགས་ཀྱི་ལས་དོན་སྣ་ཚོགས་སྤེལ་བཞིན་པ་དེ་ངོས་ལེན་ཞུ་ཐབས་བྲལ་བ་རེད་ཅེས་གསུངས་འདུག གྲོས་ཚོགས་འཐུས་མི་སྐུ་ཞབས་ Patrick Leahy ལགས་ནས། རྒྱ་ནག་གཞུང་གིས་ད་བར་བོད་རྒྱའི་དཀའ་རྙོག་ཞི་སྒྲིག་ཡོང་ཐབས་ལས་ལྡོག་སྟེ། བོད་མིའི་ཐོག་དྲག་གནོན་དང་ཐུན་མིན་གྱི་རིག་གཞུང་ཁག་རྩ་མེད་གཏོང་བཞིན་ཡོད་པ་སོགས་འགྲེལ་བརྗོད་དང་སྦྲགས། ཁྲིམས་འཆར་འདིའི་བརྒྱུད་བོད་རྒྱལ་ཁབ་འདི་ཉིད་དུས་ནམ་ཡང་རྒྱ་ནག་གི་ཆ་ཤས་མིན་པའི་བརྡ་ལན་གསལ་པོ་སྤྲོད་ཀྱི་ཡོད་སྐོར་གསུངས་འདུགཐེངས་འདིའི་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་དེ་ཨ་རིའི་གྲོས་ཚོགས་གོང་མའི་ནང་འདོན་སྤེལ་གནང་མ་ཐག་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་འབྲེལ་ཡོད་གྲོས་ཚོགས་འཐུས་མི་དང་། ཨ་རིའི་གཞུང་མང་གཉིས་ནས་ད་བར་བོད་དོན་ལ་རྒྱབ་སྐྱོར་གནང་བར་ཐུགས་རྗེ་ཆེ་ཞུ་དང་སྦྲགས། རིམ་པས་ཁྲིམས་འཆར་འདི་ཉིད་གྲོས་ཚོགས་གོང་འོག་ནང་གཏན་འབེབས་གནང་བའི་ཐོག་ཨ་རིའི་སྲིད་འཛིན་མཆོག་གི་མཚན་རྟགས་དང་འབྲེལ། ཁྲིམས་སུ་གཏན་འབེབས་ཐུབ་རྒྱུར་མུ་མཐུད་རྒྱབ་སྐྱོར་གནང་སྐྱོང་ཡོང་བའི་རེ་སྐུལ་ཞུས་འདུགམ་ཟད་ཁྲིམས་འཆར་འདིའི་ཐོག་ས་གནས་སུ་ཞུ་གཏུག་སོགས་ཀྱི་ལས་དོན་སྣེ་ཁྲིད་གནང་མཁན་རྒྱལ་སྤྱིའི་བོད་དོན་ལས་འགུལ་ཁང་ནས་ཡང་དགའ་བསུ་དང་སྦྲགས། ཁྲིམས་འཆར་འདི་ནི་ཨ་རིའི་མི་མང་གི་འདོད་པ་ལྟར་བོད་ནང་རང་དབང་དང་འགྲོ་བ་མིའི་ཐོབ་ཐང་གི་གནས་བབ་སླར་གསོ་ཐུབ་རྒྱུའི་གོམ་པ་ཆེན་པོ་ཞིག་ཡིན་པ་མ་ཟད། བྱང་ཨ་རིའི་བོད་ཀྱི་སྐུ་ཚབ་དོན་གཅོད་རྣམ་རྒྱལ་མཆོག་གྲུབ་ལགས་ནས་ཀྱང་འབྲེལ་ཡོད་ཨ་རིའི་གཞུང་མང་ཡོངས་ལ་ཐུགས་རྗེ་ཆེ་ཞུ་དང་སྦྲགས། བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་དེ་རིམ་པས་ཡུལ་དེའི་གྲོས་ཚོགས་གོང་འོག་གཉིས་སུ་གཏན་འབེབས་ཐུབ་རྒྱུའི་ཡིད་ཆེས་དང་རེ་བ་ཞུ་བཞིན་ཡོད་པ་གསུངས་འདུག

འཕགས་བོད་ས་མཚམས་སུ་རྒྱ་ནག་གིས་རྩོད་རྙོག་སློང་བའི་བྱ་སྤྱོད་དེ་སུ་གང་ལ་ཕན་ཐོགས་མེད་རེད་ཅེས་གསུངས་པ། 

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ཇམ་མུ་ནང་གསར་འགོད་པར་ཉེ་ལམ་ཨ་རུ་ནཱ་ཅལ་གྱི་དོན་རྐྱེན་དང་འབྲེལ་ཏེ་འཕགས་བོད་ས་མཚམས་སུ་རྒྱ་ནག་གིས་རྩོད་རྙོག་སློང་བའི་བྱ་སྤྱོད་དེས་སུ་གང་ལ་ཕན་ཐོགས་མེད་པ་ཞིག་རེད་ཅེས་གསུངས་འདུགསྲིད་སྐྱོང་མཆོག་ Bharat Tibet Sangh ཞེས་རྒྱ་གར་བོད་དོན་རྒྱབ་སྐྱོར་ཚོགས་པ་དང་ཇམ་མུ་མཐོ་སློབ་ཀྱི་ནང་དོན་རིག་པའི་ཚན་པ་དང་ཟུང་སྦྲེལ་གྱིས་ཇམ་མུ་ནང་ཁ་སྔོན་ནས་དབུ་འཛུགས་གནང་སྟེ་ཉིན་གྲངས་གཉིས་རིང་གོ་སྒྲིག་ཞུས་པའི་ National Working Committee meet cum Seminar ཞེས་རྒྱ་གར་བོད་དོན་རྒྱབ་སྐྱོར་ཚོགས་པའི་རྒྱལ་ཡོངས་ལས་དོན་ཚོགས་ཆུང་གི་ཚོགས་འདུ་དང་བགྲོ་གླེང་གི་་དབུ་འབྱེད་མཛད་སྒོར་ལྷན་ཞུགས་གནང་ཡོད་པ་རེད།སྲིད་སྐྱོང་མཆོག་གིས་སྤྱི་ནོར་༸གོང་ས་༸སྐྱབས་མོགན་ཆེན་པོ་མཆོག་གི་དགོངས་གཞི་གཉིས་སྨན་དབུ་མའི་ལམ་ནི་བོད་རྒྱ་གཉིས་ཀྱི་དཀའ་རྙོག་སེལ་བར་བྱེད་པའི་ཐབས་ལམ་གཅིག་པོ་དེ་ཡིན་པར་འགྲེལ་བརྗོད་དང་འབྲེལ་ཏེ་རྒྱ་ནག་གིས་བོད་མིའི་རིག་གཞུང་དང་ངོ་བོ་རྩ་མེད་བཟོ་ཕྱིར་བོད་ནང་བཅའ་སྡོད་སློབ་གྲྭ་བཙུགས་ཏེ་ཆབ་སྲིད་སློབ་གསོ་སྤྲོད་བཞིན་པ་དང་བོད་མིར་དམ་བསྒྲགས་སླད་ Grid lock system ཞེས་གཞི་རིམ་མང་ཚོགས་བསྡུ་རུབ་བྱས་པའི་དྲ་མིག་ཅན་གྱི་འཛིན་སྐྱོང་ལས་གཞི་བརྒྱུད་མང་ཚོགས་ལ་ལྟ་བཤེར་དང་། བོད་མིའི་རིགས་རྫས་ DNA དང་ Iris Scan འམ་མིག་འབྲས་རིགས་རྫས་བསྡུ་ལེན་སོགས་བྱེད་ཀྱི་ཡོད་སྐོར་གསུངས་འདུགལྷག་པར་སྲིད་སྐྱོང་མཆོག་གིས་རྒྱ་ནག་གཞུང་གིས་བོད་ཀྱི་ཆུ་བོ་ཁག་ལ་ཆུ་རགས་མང་དག་ཅིག་གསར་རྒྱག་དང་ཆུ་རྒྱུན་གྱི་ཁ་ཕྱོགས་བསྒྱུར་བ་དེས་བོད་ནང་དང་ཁྱིམ་མཚེས་རྒྱལ་ཁབ་ལ་ཤུགས་རྐྱེན་ཆེན་པོ་སྤྲོད་ཀྱི་ཡོད་སྐོར་དང་ཆབས་ཅིག་རྒྱ་ནག་ནི་ཁྱིམ་མཚེས་རྒྱལ་ཁབ་དང་མང་གཙོའི་རྒྱལ་ཁབ་ཚང་མར་ཉེན་ཁ་ཆགས་ཡོད་སྟབས། དེར་དོགས་ཟོན་དང་རྒྱ་ནག་ལ་མཉམ་རུབ་ཀྱིས་གདོང་ལེན་གནང་དགོས་པ་དང་ཕྱོགས་མཚུངས་རྒྱལ་སྤྱིའི་རྒྱལ་ཁབ་ཚོས་པེ་ཅིང་ནས་ཆ་རྐྱེན་གང་ཡང་མེད་པར་༸གོང་ས་མཆོག་དང་ཡང་ན་སྐུ་ཚབ་དབར་གྲོས་མོལ་བྱེད་དགོས་པའི་གནོན་ཤུགས་སྤྲོད་རོགས་ཞེས་འབོད་སྐུལ་ཞུས་འདུགསྐུ་མགྲོན་གཙོ་བོ་སྲིད་སྐྱོང་མཆོག་གིས་དབུ་འབྱེད་མཛད་སྒོ་རྗེས་སུ་རྒྱ་གར་གྱི་གསར་ཁང་ཉི་ཤུ་ཙམ་གྱི་གསར་འགོད་པའི་བཅར་འདྲི་དང་ལེན་གནང་སྟེ་ཨ་རུ་ནཱ་ཅལ་གྱི་དོན་རྐྱེན་དང་རྒྱ་གར་གྱི་བདེ་འཇགས་སོགས་དང་འབྲེལ་ཏེ་གསུངས་པར་རྒྱ་ནག་གིས་འཕགས་བོད་ས་མཚམས་སུ་རྩོད་རྙོག་སློང་བའི་བྱ་སྤྱོད་དེ་ནི་ཡ་ཉེན་མི་བཟོད་པའི་ཚོར་བའི་རྗེས་འབྲས་དང་ཨེ་ཤ་ཡ་ནང་དབང་ཤུགས་རྒྱ་སྐྱེད་གཏོང་ཐབས་ཆེད་ཡིན་པར་གསུངས་འདུག རྒྱ་ནག་གི་བྱེད་སྟངས་དེ་ནི་རྒྱ་གར་གཞུང་བསུན་པོ་བཟོ་ཐབས་ཀྱི་ཐབས་ལམ་ཞིག་ཡིན་པས་བྱ་སྤྱོད་དེ་སུ་གཅིག་ལ་ཕན་ཐོགས་མེད་པ་དང་། ལྷག་དོན་རྒྱ་ནག་ནས་རྒྱ་གར་གཞུང་མང་གཉིས་ཀྱི་ངོས་ནས་ཡིད་ཆེས་གནང་བར་ལོ་མང་འགོར་ངེས་རེད་ཅེས་གསུངས་ཡོད། སྲིད་སྐྱོང་མཆོག་གིས་གལ་ཏེ་རྒྱ་ནག་གིས་མུ་མཐུད་ རྒྱ་གར་དེ་དེ་སྔ་ཕྱི་ལོ་ ༡༩༦༢ སྐབས་ཀྱི་རྒྱ་གར་དེ་རེད་བསམ་ཚེ་དེ་ནོར་བ་ཞིག་དང་། རྒྱ་གར་ནི་འདས་པའི་ལོ་མང་ནང་ཧ་ཅང་ཡར་རྒྱས་གོང་མཐོར་ཕྱིན་ཡོད་ཅེས་དང་། རྒྱ་གར་ནི་ཞི་བདེ་རྒྱལ་ཁབ་ཅིག་ཡིན་པར་མ་ཟད་འཕགས་བོད་གཉིས་ནི་རིག་གཞུང་གི་ཐོག་ནས་འབྲེལ་བ་དམ་ཟབ་ཡོད་སྟབས་ང་ཚོ་བོད་མི་རྣབམས་ཀྱིས་རྒྱ་གར་ལ་གུས་བརྩི་ཆེན་པོ་ཞུ་བཞིན་ཡོད་ཅེས་སོགས་ལན་འདེབས་གནང་འདུག གཞི་རྩའི་ཚོགས་འདུ་དེར་དམིགས་བསལ་སྐུ་མགྲོན་དུ་ Bharat Tibet Sangh ཚོགས་པའི་རྒྱལ་ཡོངས་ཚོགས་གཞོན་རྒྱ་གར་གྱི་སྤྱི་ཁྱབ་དམག་སྤྱི་ཟུར་པ་ Major General Nilendra Kumar Retd ལགས་དང་།  ཨ་རུ་ནཱ་ཅལ་དང་ཅན་རྡི་གྷར། གུཇ་རཱཊ། ཧར་ཡཱ་ནཱ།  ཧི་མཱ་ཅལ་མངའ་སྡེ། ཇམ་མུ་ཀ་ཤི་མིར། ལ་དྭགས། པན་ཇཱབ། རཇ་སི་ཐན། འབྲས་ལྗོངས།  ཨུཏྟར་ཁནྜའི་ Bharat Tibet Sangh  ཚོགས་པའི་ཚོགས་མི་དང་ཇམ་མུའི་མཐོ་སློབ་ཀྱི་ སློབ་ཕྲུག་སོགས་ནས་མཉམ་ཞུགས་གནང་ཡོད་པ་རེད།

༸གོང་ས་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུམ་བཞེས་མཛད་ནས་བགྲང་བྱ་ ༣༣ འཁོར་བའི་དུས་སྟོན་སྲུང་བརྩི།

དེ་རིང་སྔ་དྲོ་ཚོུད་ ༡༠ ཐོག་༸རྒྱལ་བའི་བཞུགས་སྒར་དྷརྨ་སཱ་ལཱའི་ཐེག་ཆེན་ཆོས་གླིང་གཙུག་ལག་ཁང་དུ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་ནས་བགྲང་བྱ་ ༣༣ འཁོར་བར་གཞུང་འབྲེལ་གྱི་དུས་སྟོན་སྲུང་བརྩིའི་མཛད་སྒོ་ཚོགས་སོང་།དེ་རིང་གཞུང་འབྲེལ་གྱི་མཛད་སྒོར་སྐུ་མགྲོན་གཙོ་བོ་རྒྱ་གར་གྲོས་ཚོགས་འོག་མའི་འཐུས་མི་སྐུ་ཞབས་འཇམ་དབྱངས་ཚེ་རིང་རྣམ་རྒྱལ་ལགས་དང་དམིགས་བསལ་སྐུ་མགྲོན་དུ་རྒྱ་གར་གྲོས་ཚོགས་གོང་མའི་འཐུས་མི་སྐུ་ཞབས་ Shri Sujeet Kumar ལགས། ལ་དྭགས་རི་ལྗོངས་ཡར་རྒྱས་ལྷན་ཚོགས་ཀྱི་སྡེ་དཔོན་ཁྲིམས་རྩོད་པ་སྐུ་ཞབས་བཀྲ་ཤིས་རྒྱལ་མཚན་ལགས་དང་རྒྱུན་ལས་འཐུས་མི་རྣམ་པ། བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ། སེར་སྐྱ་མང་ཚོགས། དགེ་ལས་སློབ་ཕྲུག་བཅས་ལྷན་འཛོམས་གནང་ཡོད་པ་རེད། སྐབས་དེར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་བཀའ་ཤག་གི་བསྒྲགས་གཏམ་གསུང་སྒྲོན་གནང་སྐབས་ང་ཚོ་མི་རེ་ངོ་རེ་ནས་༸གོང་ས་༸སྐྱབས་མགོན་ཆེན་པོ་མཆོག་གི་འཇིག་རྟེན་ཀུན་ཕན་གྱི་བསླབ་བྱར་གཙིགས་འཛིན་དང་ཉམས་ལེན་བྱེད་ཐུབ་པ་ཡིན་ན་ཞི་བདེའི་འགལ་རྐྱེན་དུ་འགྲོ་གཞིའི་གཡུལ་འཁྲུག་དང་བཙན་གནོན། མནར་གཅོད་མེད་པ་བཟོས་པར་ཕན་ནུས་རྨད་དུ་བྱུང་བ་ཐེ་ཚོམ་མེད་པ་དང་སྒོས་བོད་མི་རིགས་ལ་མཚོན་ནའང་མགོན་པོ་༸གང་ཉིད་མཆོག་གི་གདམས་ངག་རྣམས་ང་ཚོར་སྙིང་སྟོབས་དང་བློ་སྤོབས་འཕེལ་སྐྱེད་ཀྱི་སྨན་མཆོག་ཏུ་འཛིན་དགོས་ཤིང་། ང་ཚོས་དུས་ཆེན་སྲུང་བརྩིའི་དགོས་དོན་ངོ་མའང་འདི་ཡིན་ཅེས་གསུངས་སོང་།ལྷག་དོན་དེ་རིང་གི་ཉིན་མོ་འདི་ནི་མཉམ་འབྲེལ་རྒྱལ་ཚོགས་སུ་འཛམ་གླིང་འགྲོ་བ་མིའི་ཐོབ་ཐང་གི་ཉིན་མོར་གཏན་འབེབས་བྱས་ཏེ་མི་ལོ་ ༧༤ འཁོར་བའི་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་ཡིན་པ་དང་བསྟུན་སྲིད་སྐྱོང་མཆོག་གིས་བོད་ས་སྟོད་སྨད་བར་གསུམ་དུ་རྒྱ་གཞུང་གིས་འགྲོ་བ་མིའི་ཐོབ་ཐང་ལ་བརྩི་མེད་རྡོག་རོལ་གཏོང་བའི་གནས་ཚུལ་རྒྱུན་མ་ཆད་པར་འབྱུང་བཞིན་པའི་ཐོག་བོད་བརྒྱུད་ནང་བསྟན་རྒྱ་ནག་ཅན་དང་རྒྱ་སྐད་ཁྱབ་སྤེལ་གྱི་སྲིད་བྱུས་འོག་ནས་བོད་ཀྱི་སྐད་ཡིག་སློབ་སྦྱོང་དང་བཀོལ་སྤྱོད་ལ་བཀག་སྡོམ་བཅས་བརྒྱུད། བོད་མིར་བཙན་འགེལ་ལག་བསྟར་བྱེད་བཞིན་པ་ནི་བོད་མི་རིགས་ཀྱི་ངོ་བོ་རྒྱུན་འཛིན་ཐོག་ལོ་རྒྱུས་སུ་གྲགས་མ་མྱོང་བའི་ཉེན་ཚབས་ཆེན་པོ་ཞིག་ཡིན་པར་གསུངས་པ་དང་འབྲེལ། རྒྱ་ནག་གཞུང་ལ་དགེ་སྐྱོན་གྱི་དཔྱད་ཞིབ་ཚད་ལྡན་དང་བཅས་རྒྱལ་སྤྱིའི་ཁྲིམས་སྲོལ་དང་མཐུན་ཞིང་། མི་རིགས་མཐུན་སྒྲིལ་དང་རྒྱལ་ཁབ་བརྟན་ལྷིང་ལ་ཕན་པའི་དོན་དངོས་ཕུགས་ཕན་གྱི་ཐབས་ཚུལ་བསྟེན་དགོས་པའི་ནན་བརྗོད་གནང་ཡོད། སྲིད་སྐྱོང་མཆོག་གིས་རྒྱ་ནག་གཞུང་གིས་བོད་ཀྱི་ས་ཁུལ་ཁག་ཏུ་ Gridlock Management System ཞེས་གཞི་རིམ་མང་ཚོགས་བསྡུ་རུབ་བྱས་པའི་དྲ་མིག་ཅན་གྱི་འཛིན་སྐྱོང་ལས་གཞི་བརྒྱུད་མང་ཚོགས་ལ་ལྟ་བཤེརདང་། ཟུང་སྦྲེལ་ཁྱིམ་ཚང་ཟེར་བའི་སྒྲིག་འཛུགས་བཙུགས་ནས་བརྟན་ལྷིང་སྲུང་སྐྱོབ་བྱེད་ཚུལ། གཞན་ཡང་ལྟ་སྲུང་བརྙན་མིག་དང་། ངོ་རྟགས་བརྩད་གཅོད། གཞི་རྒྱ་ཆེ་བའི་བོད་མིའི་རིགས་རྫས་བསྡུ་ལེན་སོགས་ཀྱི་ཛ་དྲག་གནས་སྟངས་ལ་བློ་འཚབ་ཀྱི་རྣམ་པ་གསལ་སྟོན་གནང་བར་མ་ཟད། རྒྱ་ནག་གིས་བོད་མིའི་ཐོག་རྒྱ་རིགས་ཆེན་པོ་རིང་ལུགས་ཀྱི་སྲིད་བྱུས་མུ་མཐུད་འཛིན་བཞིན་པར་སྐྱོན་བརྗོད་དང་འབྲེལ་ཏེ། སྐབས་ ༡༦ པའི་བཀའ་ཤག་གི་ངོས་ནས་དངོས་ཡོད་གནས་ཚུལ་དང་མཐུན་ཞིང་། ཐབས་ལམ་ཡོད་རྒུ་རྩལ་སྤྲུགས་ཀྱིས་རྒྱ་གཞུང་ལ་མེས་འཚིགས་མེར་གཏུགས་ཀྱིས་གནད་དོན་སེལ་རྒྱུའི་རེ་བ་འཛིན་བཞིན་པ་གསུངས་སོང་།དེ་བཞིན་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཞོན་སྒྲོལ་མ་ཚེ་རིང་མཆོག་གིས་སྤྱི་འཐུས་ལྷན་ཚོགས་ཀྱི་གསུང་བཤད་སྒྲོག་སྦྱང་གནང་སྟེ་ཕྱི་ལོ་ ༡༩༨༩ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་ཀྱིས་བོད་དོན་ལ་རྒྱལ་སྤྱིའི་ནང་གོ་རྟོགས་དང་དོ་སྣང་ཇེ་ཆེར་འགྲོ་རྒྱུར་ཕན་ཐོགས་བྱུང་ཡོད་པ་དང་ཆབས་ཅིག་གཞིས་བྱེས་བོད་མི་ཚོས་སོ་སོའི་སྒོ་གསུམ་གྱི་སྤྱོད་པ་འཚེ་མེད་ཞི་བའི་ལམ་ལ་ངེས་ཤེས་རྙེད་པའི་སྒོ་ནས་ཡིད་ཆེས་དང་དམ་བཅའ་བསྐྱར་ནན་ཞིག་འཇོག་ཐུབ་ཚེ་དུས་དྲན་འདི་སྲུང་བརྩི་ཞུ་གོ་ཆོད་ངེས་ཡིན་ཅེས་གསུངས་སོང་། དེ་རིང་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་ཡིན་པ་དང་བསྟུན་བོད་ནང་རྒྱ་གཞུང་གིས་བོད་མི་རྣམས་ཀྱི་འགྲོ་བ་མིའི་ཐོབ་ཐང་བརྡལ་བཤིག་གིས་སྡུག་སྦྱོང་མནར་གཅོད་གཏོང་བཞིན་ཡོད་པས་འཛམ་གླིང་དབུ་ཁྲིད་རྣམས་ཀྱིས་རྒྱ་ནག་ལ་འགན་ཁུར་དགོས་པའི་བརྡ་ལན་གནང་དགོས་པའི་འབོད་སྐུལ་གནང་སོང་ལ། བོད་དང་རྒྱ་གར་གཉིས་དབར་རྒྱལ་རབས་ལོ་རྒྱུས་དང་ཆོས་རིག་གི་ཐོག་སྔ་མོ་ནས་འབྲེལ་འདྲིས་དམ་ཟབ་ཡོད་པར་མ་ཟད། བོད་དེ་རྒྱ་གར་གྱི་བདེ་འཇགས་ཐོག་ཧ་ཅང་གལ་གནད་ཆེ་བར་སོང་། རྒྱ་གར་གཞུང་མང་གཉིས་ནས་བོད་དོན་ཐོག་རྒྱབ་སྐྱོར་སྔར་ལྷག་ཡོང་བའི་འབོད་སྐུལ་ཞུས་སོང་།མཛད་སྒོར་དམིགས་བསལ་སྐུ་མགྲོན་ལ་དྭགས་རི་ལྗོངས་ཡར་རྒྱས་ལྷན་ཚོགས་ཀྱི་སྡེ་དཔོན་ཁྲིམས་རྩོད་པ་སྐུ་ཞབས་བཀྲ་ཤིས་རྒྱལ་མཚན་ལགས་ཀྱིས་༸གོང་ས་མཆོག་གིས་གཞན་ཕན་དང་བྱམས་སྙིང་རྗེ། འཚེ་མེད་ཞི་བ། མཐུན་སྒྲིལ་སོགས་ཀྱི་དགོངས་གཞི་ནི་ང་ཚོ་ཚང་མར་སེམས་འགུལ་ཐེབས་གཞི་ཞིག་དང་ལྷག་པར་ལ་དྭགས་ལྟ་བུར་ཆ་མཚོན་ན་༸གོང་ས་མཆོག་ཡང་ཡང་ཆིབས་བསྒྱུར་མཛད་པ་དེས་ཆོས་ལུགས་མཐུན་སྒྲིལ་དང་སྤྱི་ཚོགས་འཆམ་མཐུན་ཡོང་བའི་གཞི་མ་ལྟ་བུ་གྱུར་ཡོད་སྟབས། ༸གོང་ས་མཆོག་ནི་ལ་དྭགས་མི་མང་ལ་བཀའ་དྲིན་ཆེན་པོ་ཡིན་ཅེས་གསུངས་སོང་བ་དང་ཆབས་ཅིག ལ་དྭགས་ནང་ཡོད་པའི་བོད་མི་ཚོ་དང་ང་ཚོའི་དབར་འབྲེལ་འདྲིས་ཟབ་མོ་ཡོད། ལྷག་པར་ད་ཆ་ལ་དྭགས་དེ་བཞིན་རྒྱ་གར་དབུས་འཛིན་སྐྱོང་མངའ་ཁུལ་དུ་གྱུར་ཡོད་སྟབས། ལ་དྭགས་ཁུལ་དུ་གནས་བཞུགས་བོད་མི་ཚོར་གཞི་རྩའི་མཐུན་རྐྱེན་བསྐྲུན་ཐུབ་པ་བྱུང་ཡོད་ཅེས་གསུངས་སོང་། དམིགས་བསལ་སྐུ་མགྲོན་སྐུ་ཞབས་ Shri Sujeet Kumar ལགས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་ནང་༸སྐུ་བཞུགས་མཛད་པ་འདི་ནི་ང་ཚོའི་བསོད་ནམས་རེད་ཅེས་དང་། ལྷག་པར་དེ་རིང་འགྲོ་བ་མིའི་ཐོབ་ཐང་གི་ཉིན་མོར་སྲུང་བརྩི་ཞུ་བཞིན་ཡོད་ཀྱང་བོད་ནང་གི་བོད་མི་ཚོ་ད་དུང་རྒྱ་ནག་གཞུང་གི་བཙན་འོག་ཏུ་མནར་གཅོད་མྱོང་བཞིན་ཡོད་པས་དེ་ནི་ཧ་ཅང་གི་བློ་ཕམ་ཞིག་དང་། བོད་མི་ཚོར་གདུང་སེམས་མཉམ་བསྐྱེད་ཡོད་ཅེས་གསུངས་ཡོད།སྐུ་མགྲོན་གཙོ་བོ་རྒྱ་གར་གྲོས་ཚོགས་འོག་མའི་འཐུས་མི་འཇམ་དབྱངས་ཚེ་རིང་རྣམ་རྒྱལ་ལགས་ཀྱིས་བོད་དང་ལ་དྭགས་གཉིས་ཀྱི་རིག་གཞུང་མཐུན་པའི་ཐོག་བཀའ་མོལ་གནང་སྟེ་བོད་ཀྱི་ཡུལ་དང་བོད་ཀྱི་མི་མང་།  རིག་གཞུང་ཞེས་བཀའ་མོལ་གནང་སྐབས་ལ་དྭགས་པ་ཚོར་སེམས་ཚོར་ཆེན་པོ་ཡོང་གི་ཡོད་པ་དང་། ལྷག་པར་༸གོང་ས་མཆོག་གིས་ཀྱང་ང་ཚོར་བོད་ཀྱི་རིག་གཞུང་ཉར་ཚགས་ཐད་ཐུགས་རེ་ཆེན་པོ་མཛད་ཀྱི་ཡོད་པས་དེ་ནི་ང་ཚོའི་གཟི་བརྗིད་ཡིན་པར་ཚོར་གྱི་འདུག་ཅེས་དང་སྒོས་ང་ཚོའི་ངོས་ནས་༸གོང་ས་མཆོག་གི་དགོངས་གཞི་བསྒྲུབ་པར་འབད་རྩོན་ཞུ་བཞིན་ཡོད། བོད་ཀྱི་དགོན་སྡེ་ཁག་ཏུ་ཧི་མཱ་ལ་ཡའི་རི་རྒྱུད་ཀྱི་གྲྭ་བཙུན་བརྒྱ་ཆ་ ༦༦ ཡོད་པ་ཚོར་རིགས་གནས་བཅུའི་ཐོག་སློབ་སྦྱོང་གི་གོ་སྐབས་གཅིག་མཚུངས་ཐོབ་ཀྱི་ཡོད་པས་དེ་ནི་བཀའ་དྲིན་ཆེན་པོ་རེད་ཅེས་གསུངས་པ་དང་སྦྲགས་ཏེ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་པའི་བླ་ཆེན་རྣམས་ལ་ཐུགས་རྗེ་ཆེ་ཞེས་ཞུས་སོང་།དེ་རིང་གཞུང་འབྲེལ་མཛད་སྒོའི་སྔ་རོལ་དུ་མཛད་སྒོའི་སྐུ་མགྲོན་དང་དམིགས་བསལ་སྐུ་མགྲོན་རྣམས་ནས་༸གོང་ས་མཆོག་གི་གཟིམ་ཆུང་མཇལ་ཁ་ཞུས་ཡོད་པ་དང་། སྐུ་ཞབས་འཇམ་དབྱངས་ཚེ་རིང་རྣམ་རྒྱལ་ལགས་དང་སྐུ་ཞབས་བཀྲ་ཤིས་རྒྱལ་མཚན་ལགས་རྣམ་གཉིས་ཀྱིས་༸གོང་ས་མཆོག་ལོ་རྗེས་མའི་དབྱར་དུས་སྐབས་ལ་དྭགས་སུ་ཆིབས་བསྒྱུར་བཀའ་དྲིན་བསྐྱང་གནང་མཛད་རྒྱུའི་གསོལ་འདེབས་ཞུས་དོན་ལྟར་མགོན་པོ་༸གང་ཉིད་མཆོག་གིས་ཞལ་བཞེས་བཟང་པོ་སྨིན་སྩལ་མཛད་འདུགསྤྱིར་དེ་རིང་གི་ཉིན་མོ་འདི་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་པའི་ཉིན་མོ་དང་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་ཡིན་པར་མ་ཟད། བཞུགས་སྒར་ལ་ཆ་མཚོན་ན་ཧིན་བོད་མཛའ་འབྲེལ་ཚོགས་པའི་གོ་སྒྲིག་འོག་འདས་པའི་ལོ་མང་གོང་ནས་ཧི་མཱ་ལ་ཡའི་དུས་སྟོན་སྲུང་བརྩི་ཞུ་བཞིན་ཡོད་པ་ལྟར། དེ་རིང་ཉིན་རྒྱབ་ཏུ་བོད་ཀྱི་ཟློས་གར་ཚོགས་པའི་ཚོགས་ཁང་དུ་ས་གནས་ཡུལ་མི་དང་བོད་ཀྱི་ཐུན་མོང་མ་ཡིན་པ་རྐང་བྲོ་གླུ་གཞས་སོགས་གཟིགས་འབུལ་ཐོག་ནས་ཧི་མཱ་ལའི་དུས་སྟོན་སྲུང་བརྩི་ཞུས་ཡོད།

རྒྱ་གར་བོད་དོན་རྒྱབ་སྐྱོར་ཚོགས་པས་ཚན་རྟགས་བསྡུ་རུབ་ཀྱི་ལས་འགུལ་དང་འོས་བསྡུའི་རྒྱལ་ཁ་ཐོབ་མཁན་ཚོས་བོད་མིར་རྒྱབ་སྐྱོར་གནང་རྒྱུའི་ཞལ་བཞེས་གནང་བ།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་འཛམ་གླིང་ནང་ཆེས་སྙན་གྲགས་ཆེ་བའི་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་ནས་བགྲང་བྱ་ ༣༣ འཁོར་བའི་དུས་སྟོན་དང་འབྲེལ་ཏེ་བོད་མིའི་གནས་ཡུལ་ས་གནས་གང་སར་སྲུང་བརྩི་ཞུ་བཞིན་ཡོད་པ་ལྟར།  དེ་རིང་འདི་ག་རྒྱ་གར་གྱི་རྒྱལ་ས་ལྡི་ལིའི་བོད་སྒར་བསམ་ཡས་གླིང་གི་བོད་ཁྱིམ་སློབ་གྲྭའི་ཐང་སྟེང་གི་མཛད་སྒོ་ཐོག་སྐུ་མགྲོན་གྱི་གཙོ་བོར་ས་གནས་ཀྱི་གྲོས་ཚོགས་ཚོགས་མི་སྐུ་ཞབས་ Parlad Singh Sawnhe མཆོག་དང་ཉེ་ཆར་གྲོང་སྡེ་ལས་ཁུངས་ཀྱི་འོས་བསྡུའི་འགྲན་རྩོད་ནང་རྒྱལ་ཁ་ཐོབ་མཁན་ AamAadmi ཆབ་སྲིད་ཚོགས་པའི་འཐུས་མི་བཅས་ཆེད་ཕེབས་དང་སྦྲགས་ཏེ་མ་འོངས་པར་ས་གནས་ཀྱི་བོད་མི་ཚོར་ཉེར་མཁོའི་མཐུན་འགྱུར་ཇི་དགོས་གནང་རྒྱུའི་ཞལ་བཞེས་གནང་སོང་བ་དང་། དེ་རིང་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་དང་བསྟུན་རྒྱ་གར་བོད་དོན་རྒྱབ་སྐྱོར་ཚོགས་པ་ཞིག་གིས་ས་གནས་སུ་ཚན་རྟགས་བསྡུ་རུབ་ཀྱི་ལས་འགུལ་ཡང་སྤེལ་ཡོད།དེ་རིང་སྔ་དྲོ་བོད་སྒར་བསམ་ཡས་གླིང་གི་མཛད་སྒོ་ཚོགས་ཡུལ་བོད་ཁྱིམ་སློབ་གྲྭའི་རྒྱལ་སྒོའི་ཕྱོགས་གཅིག་ཏུ་ BTSM རྒྱ་གར་བོད་དོན་རྒྱབ་སྐྱོར་ཚོགས་པས་བོད་ལ་རང་དབང་དགོས་པའི་དྲིལ་བསྒྲགས་ཀྱི་སྦྱར་ཡིག་ཆེན་པོ་ཞིག་སྦྱར་ཡོད་པའི་སྟེང་མང་ཚོགས་ཀྱི་ཚན་རྟགས་བསྡུ་རུབ་གནང་བཞིན་འདུག་པ་ལྟར། ཚོགས་པ་དེའི་ས་གནས་ཀྱི་ཚོགས་གཙོ་ Sunil Garg མཆོག་གིས་དེ་རིང་རྒྱལ་སྤྱིའི་འགྲོ་བ་མའི་ཐོབ་ཐང་གྱི་ཉིན་མོ་འདི་བཞིན་ནོ་སྦེལ་ཞི་བདེའི་གཟེངས་རྟགས་ཉིན་མོ་དང་སྟབས་ཁེལ་ཡོད་སྟབས་ཚོགས་པའི་ངོས་ནས་རྒྱ་ནག་གིས་བོད་བཙན་བཟུང་བྱས་པར་ངོ་རྒོལ་དང་བོད་མི་ཚོར་གཞི་རྩའི་མིའི་རང་དབང་སྤྲོད་དགོས་པའི་དགོས་འདུན་འཁོད་པའི་མཚན་རྟགས་བསྡུ་རུབ་ཀྱི་ལས་འགུལ་ཞིག་ས་གནས་གང་སར་སྤེལ་བཞིན་ཡོད་པ་དང་། མཚན་རྟགས་བསྡུ་རུབ་གནང་བ་དེ་རྒྱ་གར་གྱི་སྲིད་བློན་མཆོག་ལ་ཕུལ་ཏེ་ཕྱི་སྲིད་ལས་ཁུངས་ཀྱི་ངོས་ནས་བོད་དོན་ཐད་འབྲེལ་ཡོད་ཚོར་གནོན་ཤུགས་སྤྲོད་ཐབས་ཀྱི་ལས་འགུལ་ཞིག་ཡིན་སྐོར་འགྲེལ་རྗོད་གནང་སོང་། མཛད་སྒོ་ཐོག་དབུས་བོད་མིའི་སྒྲིག་འཛུགས་ཀྱི་བཀའ་ཤག་དང་སྤྱི་འཐུས་ལྷན་ཚོགས་གཉིས་ཀྱི་དུས་སྟོན་དང་འབྲེལ་བའི་གསུང་བཤད་དེ་སྡི་ལི་དོན་གཅོད་ཀྱི་སྐུ་ཚབ་དང་ས་གནས་རང་བདེན་ཚོགས་ཆུང་གི་ཚོགས་གཙོ་རྣམ་གཉིས་ཀྱིས་སྒྲོག་སྦྱང་གནང་ཡོད་པ་དང་། དེ་བཞིན་ས་གནས་ཀྱི་གྲོས་ཚོགས་ཚོགས་མི་ Parlad Singh Sawnhe མཆོག་གིས་དབུས་པའི་ཉེ་ཆར་གྲོང་སྡེ་ལས་ཁུངས་ཀྱི་འོས་བསྡུ་ནང་རྒྱལ་ཁ་ཐོབ་མཁན་  AamAadmi ཆབ་སྲིད་ཚོགས་པའི་ ChandniChowk དང་  Civil Lines ས་ཁུལ་གཉིས་ཀྱི་འཐུས་མི་ Punardeep Singh Sawhne ལགས་དང་ Vikas Tank ལགས་གཉིས་ཆེད་ཕེབས་ཡོད་པ་བཞིན་སྐུ་ཞབས་ Parlad Singh Sawnhe ལགས་དང་གྲོང་སྡེ་ལས་ཁུངས་ཀྱི་ཚོགས་མི་རྣམ་གཉིས་ཀྱིས་བོད་མི་ཚོས་འོས་བསྡུའི་སྐབས་རྒྱབ་སྐྱོར་གནང་བར་ཐུགས་རྗེ་ཆེ་ཞེས་དང་མ་འོངས་པར་ས་གནས་ཀྱི་བོད་མི་ཚོར་ཉེར་མཁོའི་མཐུན་འགྱུར་ཇི་དགོས་གནང་རྒྱུའི་ཞལ་བཞེས་གནང་ཡོད།གཞན་ཡང་སྐུ་མགྲོན་དུ་ BTSM རྒྱ་གར་བོད་དོན་རྒྱབ་སྐྱོར་ཚོགས་པའི་རྒྱལ་ཡོངས་འབྲེལ་མཐུད་པ་སྐུ་ཞབས་ PunkajGoyal ལགས་དང་། BTSS ཚོགས་པའི་རྒྱ་གར་བྱང་ཕྱོགས་ཀྱི་ཚོགས་གཙོ་དང་དྲུང་ཆེའི་དབུས་པའི་མང་ཚོགས་བཅས་ཁྱོན་མི་གྲངས་ ༣༠༠ ལྷག་འདུ་འཛོམས་གནང་འདུགལྡི་ལི་བོད་ཁྱིམ་སློབ་ཕྲུག་དང་ས་གནས་ཀྱི་གཞུང་འབྲེལ་མ་ཡིན་པའི་ཚོགས་པ་ཁག་གིས་མང་ཚོགས་ལ་དུས་སྟོན་དང་འབྲེལ་བའི་བོད་ཀྱི་ཐུན་མིན་རྐང་བྲོ་གླུ་གཞས་གཟིགས་འབུལ་ཞུས་ཡོད་པ་རེད།

བོད་ཀྱི་ལོ་རྒྱུས་ཤེས་པ་བྱས་ཏེ་བོད་ཀྱི་འཐབ་རྩོད་ཐོག་བེད་སྤྱོད་གཏོང་དགོས་ཞེས་གསུངས་ཡོད།

ཁ་སང་ཕྱི་ཚེས་ ༩ ཉིན་གྱི་ཞོགས་པ་ཚོུད་ ༡༡ ཐོག་ཨི་ཊ་ལིར་རྟེན་གཞི་བྱས་པའི་ AREF ཚོགས་པ་དང་ཕྱི་དྲིལ་བོད་ཀྱི་འགྲེམས་སྟོན་ཁང་གཉིས་ཟུང་སྦྲེལ་གྱི་གོ་སྒྲིག་འོག་བོད་ཀྱི་འགྲེམས་སྟོན་ཁང་དུ་ The Space of Memories ཞེས་དྲན་པའི་གོ་ཡུལ་གྱི་འགྲེམས་སྟོན་དབུ་འབྱེད་གནང་སོང་།དྲན་པའི་གོ་ཡུལ་གྱི་འགྲེམས་སྟོན་དབུ་འབྱེད་མཛད་སྒོ་ཐོག་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་གཙོས་པའི་བོད་མི་མང་སྤྱི་འཐུས་ཚོགས་གཞོན་བཀྲས་ཁང་སྒྲོལ་མ་ཚེ་རིང་མཆོག བདེ་སྲུང་བཀའ་བློན་རྒྱ་རི་སྒྲོལ་མ་མཆོག ཨི་ཊ་ལིར་རྟེན་གཞི་བྱས་པའི་ AREF ཚོགས་པའི་ཚོགས་གཙོ་ལྕམ་ Marillia Bellaterra ལགས། བོད་ཕྲུག་ཁྱིམ་སྡེའི་དབུ་འཛིན་ཚུལ་ཁྲིམས་རྡོ་རྗེ་ལགས། བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ། གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་བཅས་ལྷན་ཞུགས་གནང་ཡོད།དྲན་པའི་གོ་ཡུལ་གྱི་འགྲེམས་སྟོན་ནི་དྷ་སྟེང་བོད་ཕྲུག་ཁྱམ་སྡེའི་སློབ་ཕྲུག་ཁག་གཅིག་གིས་བཞུགས་སྒར་དུ་རྟེན་གཞི་བྱས་པའི་བྱམས་པ་གླིང་རྒས་གསོ་ཁང་གི་རྒན་རབས་ཁག་གཅིག་ལ་དེ་སྔ་བོད་ནང་བཞུགས་པའི་སྐབས་ཀྱི་ཚོར་བ་དང་ཕྱིས་སུ་བཙན་བྱོལ་ནང་དུ་ཕེབས་འབྱོར་རྗེས་དཀའ་སྡུག་གང་དང་གང་མྱོངས་པ་སོགས་དང་འབྲེལ་བའི་བཅར་འདྲི་ཞུས་པ་རྣམས་བརྙན་པར་གྱི་ལམ་ནས་འགྲེམས་སྟོན་གནང་བ་ཞིག་ཡིན་པ་རེད། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་དྲན་པའི་གོ་ཡུལ་གྱི་འགྲེམས་སྟོན་དེ་གོ་སྒྲིག་གནང་བར་ཐུགས་རྗེ་ཆེ་ཞེས་གསུངས་པ་དང་འབྲེལ། བོད་པའི་མི་རབས་གཞོན་པ་རྣམས་ནས་རང་མི་རིགས་ཀྱི་ལོ་རྒྱུས་དེ་དག་ངེས་པར་དུ་ཤེས་རྟོགས་དགོས་པ་དང་། ལྷག་དོན་ལོ་རྒྱུས་ངེས་པ་བྱས་ཏེ་སོ་སོའི་རྒྱུན་ལྡན་གྱི་བོད་ཀྱི་འཐབ་རྩོད་ཐོག་བེད་སྤྱོད་གཏོང་དགོས་ཞེས་གསུངས་ཡོད།བོད་མི་མང་སྤྱི་འཐུས་ཚོགས་གཞོན་བཀྲས་ཁང་སྒྲོལ་མ་ཚེ་རིང་མཆོག་གིས་འགྲེམས་སྟོན་འདིའི་ཐོག་ནས་བོད་རིགས་གཞོན་སྐྱེས་རྣམས་ལ་ངེས་པར་དུ་ཉིན་ཐོ་བྲིས་དགོས་པའི་འབོད་སྐུལ་དང་འབྲེལ། མ་འོངས་པར་དྲན་ཐོ་དེ་དག་གིས་བོད་མིའི་ལོ་རྒྱུས་དག་ཐེར་ལ་རམས་འདེགས་ཞུ་དགོས་གལ་ཡིན་པ་སོགས་གསུངས་ཡོད། རྩ་བའི་དྲན་པའི་གོ་ཡུལ་གྱི་འགྲེམས་སྟོན་གོ་སྒྲིག་གནང་མཁན་ཨི་ཊ་ལིར་རྟེན་གཞི་བྱས་པའི་ Aref International Onlus ཚོགས་པའི་ཚོགས་གཙོ་ལྕམ་ Marillia Bellaterra ལགས་ཀྱིས་ལས་གཞི་དེ་བརྩམས་དགོས་པའི་དམིགས་ཡུལ་གཙོ་བོ་ནི་བཙན་བྱོལ་ནང་ཡོད་པའི་བོད་མིའི་མི་རབས་རྒན་པ་རྣམས་ཀྱི་ལོ་རྒྱུས་མཁོ་སྒྲུབ་གནང་སྟེ་བོད་རིགས་གཞོན་སྐྱེས་རྣམས་ལ་དེ་འབྲེལ་གོ་རྟོགས་སྤེལ་ཏེ་མི་རབས་རྒན་གཞོན་དབར་གྱི་འབྲེལ་ལམ་གོང་འཕེལ་གནང་བ་ཙམ་དུ་མ་ཟད། བོད་དོན་འཐབ་རྩོད་ལའང་སྨན་ཕྱིར་ཡིན་སྐོར་གསུངས་སོང་།

Latest news