Tibetan Royal Year of 2151 | Year of the Wood Dragon

བོད།

རྒྱལ་ཚོགས་ཐོག་བོད་ནང་གི་འབྲོག་པའི་གནས་སྟངས་སྐོར་གླེང་སློང་།

ཕྱི་ཟླ་ ༦ ཚེས་ ༣༠ ཉིན་ནས་སུད་སི་གྲོང་ཁྱེར་ཇི་ནི་ཝ་ནང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༤༤ འཚོགས་བཞིན་ཡོད་པ་དང་། ཕྱི་ཚེས་ ༡༠ ཉིན་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་དང་ཚོང་འབྲེལ་སྡེ་ཁག་ཐོག་གི་དམིགས་བསལ་ཁྱད་ལས་རྟོག་ཞིབ་ཚོགས་ཆུང་གི་སྙན་ཐོ་དང་འབྲེལ་བའི་བགྲོ་གླེང་ལས་རིམ་ཐོག་བོད་ནང་རྒྱ་ནག་གི་གཞུང་འབྲེལ་མི་སྣས་ཁྲིམས་འགལ་ཐོག་འབྲོག་ས་བཙན་འཕྲོག་བྱེད་བཞིན་པའི་གནས་སྟངས་སྤྱི་དང་དེ་འབྲེལ་རྒྱ་གཞུང་ལ་ཞི་རྒོལ་གྱིས་གདོང་ལེན་གནང་མཁན་བོད་མི་རྣམས་འཛིན་བཟུང་བཙོན་འཇུག་གིས་ཁྲིམས་ཆད་གཅོད་བཞིན་པའི་གནས་སྟངས་སྙན་སེང་ཞུས་འདུག སྐབས་དེར་སུད་སི་དོན་ཁང་གི་འབྲེལ་ཡོད་ལས་བྱེད་འཕྲིན་ལས་ཆོས་སྐྱིད་ལགས་ཀྱིས་ Society  for Threatened People ཞེས་པའི་རྒྱལ་ཚོགས་ཀྱི་གཞུང་འབྲེལ་མིན་པའི་ཚོགས་པའི་མཚན་ཐོག་ནས་བོད་ནང་གི་འབྲོག་པའི་གནས་སྟངས་སྐོར་སྙན་སེང་ཞུས་པ་དང་འབྲེལ། ཉེ་བའི་ཆར་རྒྱ་ནག་གཞུང་གིས་བོད་ནང་འཛུག་སྐྲུན་དང་རྒྱུད་ཅིག་ལམ་གཅིག་གི་ལས་གཞིར་ཁ་གཡར་ནས་ མང་ཚོགས་སྤྱི་དང་སྒོས་འབྲོག་པ་ཚོའི་རྩྭ་ས་བཙན་འཕྲོག་གིས་གྲོང་ཁྱེར་ནང་གནས་སྤོས་བྱེད་བཅུག་ པའི་གནས་སྟངས་དང་། དེ་བཞིན་ས་ཆ་བཙན་འཕྲོག་གི་གནད་དོན་དང་འབྲེལ་བའི་ཐོག་ནས་རྒྱ་ནག་གཞུང་ལ་ཞི་རྒོལ་དང་གདོང་ལེན་གནང་མཁན་ཚོ་འཛིན་བཟུང་བཀག་ཉར་དང་མནར་གཅོད། བོད་མི་དེ་དག་ལ་རྒྱལ་ཁབ་ཁ་བྲལ་གྱི་ནག་ཉེས་གཡོགས་ནས་བཙོན་འཇུག་གི་ཁྲིམས་ཐག་གཅོད་བཞིན་ཡོད་པ་སྙན་སེང་ཞུས་འདུག ལྷག་པར་དུ་འདས་ལོ་ནང་བོད་མགོ་ལོག་ཁུལ་ནས་རྒྱ་གཞུང་གིས་འབྲོག་ས་བཙན་འཕྲོག་ལ་ཞི་རྒོལ་གནང་མཁན་བོད་མི་ཨ་ཉ་སེང་སྒྲ་ལགས་སུ་རྒྱ་གཞུང་གིས་སྤྱི་བདེ་ཉེན་རྟོག་དང་གཞུང་། དེ་བཞིན་ཁྲིམས་ཁང་ངན་པ་ལག་འབྲེལ་གྱིས་ཁོང་འཛིན་བཟུང་བཀག་ཉར་དང་མནར་གཅོད། དེ་བཞིན་ལོ་བདུན་གྱི་བཙོན་འཇུག་ཁྲིམས་ཐག་བཅད་ཡོད་པ་མ་ཟད། ནག་ཆེན་ས་ཁུལ་ནས་སྔ་རྗེས་སུ་རྒྱ་ནག་གཞུང་གི་རྩྭ་ས་བཙན་འཕྲོག་ལ་ཞི་རྒོལ་གནང་མཁན་བོད་མི་ ༣༠ བཙོན་འཇུག་ཁྲིམས་ཐག་བཅད་པ་སོགས་ཀྱི་གནད་དོན་ཡང་ལུང་འདྲེན་གནང་ཡོད་པ་རེད། ཁོང་གིས་ལྷན་ཚོགས་ཐོག་རྒྱལ་ཚོགས་ཀྱི་ངོས་ནས་རྒྱ་གཞུང་ལ་གནོན་ཤུགས་ཀྱིས་ཨ་ཉག་སེང་སྒྲ་ལགས་ཀྱིས་གཙོས་པའི་བོད་མི་བཙོན་པ་གཞན་རྣམས་གློད་བཀྲོལ་ཡོང་བའི་འབོད་སྐུལ་ཞུས་པ་དང་འབྲེལ། རྒྱལ་ཚོགས་ཀྱིས་རྒྱ་ནག་གི་གཞུང་འབྲེལ་སྡེ་ཁག་ནས་ངན་པ་ལག་འབྲེལ་གྱིས་བོད་ནང་གི་མང་ཚོགས་ཀྱི་ས་ཆ་འཕྲོག་བྱེད་བཞིན་པའི་བྱ་སྤྱོད་དེ་དག་འཕྲལ་མར་མཚམས་འཇོག་བྱེད་རྒྱུའི་དུས་ལ་བསླེབས་སོང་ཞེས་གསུངས་འདུགཉེ་ཆར་རྒྱལ་ཚོགས་ཁྱད་ལས་མི་སྣ་ ༤༩ ནས་རྒྱ་ནག་གཞུང་གིས་བོད་དང་ཧོང་ཀོང་། དེ་བཞིན་ཤར་ཏུ་ཀི་སི་ཐན་ནང་གི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་གནད་དོན་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་དང་ཚོགས་མི་རྒྱལ་ཁབ་ཁག་ལ་རྒྱ་ནག་ཐོག་དམིགས་བསལ་ཚོགས་དུས་བསྐོང་ཚོགས་གནང་དགོས་པའི་རེ་འདུན་གནང་ཁག་དོན་འཁྱོལ་ཕྱག་བསྟར་ཡོང་བའི་འབོད་སྐུལ་བསྐྱར་ནན་ཞུས་ཡོད་པ་རེད། རྩ་བའི་ཐེངས་འདིའ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་དེ་ཕྱི་ཟླ་ ༦ ཚེས་ ༣༠ ཉིན་ནས་ཕྱི་ཟླ་ ༧ ཚེས་ ༢༠ བར་ཚོགས་ཀྱི་ཡོད་པ་རེད། འདི་ལོ་རྒྱ་ནག་ཝུ་ཧན་ནས་ཐོག་མར་མཆེད་པའི་ཏོག་དབྱིབས་གཉན་རིམས་རྐྱེན་པས་སྔ་ལོའི་ཚོགས་དུས་ ༤༣ པ་དེ་དུས་ཚོད་གཅིག་གི་ནང་ཆ་ཚང་ཚོགས་ཐུབ་མེད་པ་དང་། ད་ལན་རྒྱལ་ཚོགས་ཀྱི་ལྷན་ཚོགས་ཐེངས་ ༤༤ པའི་ཚོགས་འདུ་འགྲོ་ལུགས་དང་ལས་རིམ་ཁག་ཀྱང་རྣམ་ཀུན་དང་མི་འདྲ་བ་གནང་དགོས་བྱུང་འདུག་པ་མ་ཟད། དེ་བཞིན་ཚོགས་་འདུ་མང་དག་ཅིག་དྲྭ་ལམ་ཐོག་ཚོགས་ཀྱི་ཡོད་པ་རེད།

རྒྱ་དཀར་ནག་དབར་སྤུན་མཆེད་ཀྱི་འདུ་ཤེས་ཡོད་ཚུལ་བརྗོད་དོན་ལྟར་ཕྱག་བསྟར་གནང་དགོས།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་དཀར་ནག་གཉིས་དབར་ལོ་རྒྱུས་ཀྱི་ཐོག་ནས་འབྲེལ་བ་ཡོད་པ་མ་ཟད་དུས་ད་ལྟའང་ཆོས་ཡོན་སོགས་ཀྱི་འབྲེལ་བ་ཆེན་པོ་ཡོད་པ་ལྟར། རྒྱལ་ཁབ་ཕྱོགས་གཉིས་ཀའི་ངོས་ནས་མཐའ་མཚམས་སྲུང་སྐྱོབ་ལ་འགྲོ་གྲོན་ཕོན་ཆེན་པོ་བཏང་བ་ལས་ཕན་ཚུན་ཞི་བདེ་མཉམ་གནས་གོང་འཕེལ་སླད་འགྲོ་གྲོན་མང་ཙམ་གཏང་དགོས་པར་ལམ་སྟོན་བསྩལ་བ་དང་སྦྲགས། Hindi Chini Bhai Bhai ཞེས་རྒྱ་གར་དང་རྒྱ་ནག་དབར་སྤུན་མཆེད་ཀྱི་འདུ་ཤེས་ཡོད་ཚུལ་བརྗོད་དོན་ལྟར་དོན་འཁྱོལ་ཕྱག་བསྟར་གནང་དགོས་གལ་ཡིན་པར་བཀའ་སློབ་བཀྲིན་ཆེ་བ་བསྩལ་འདུགཁ་སང་ Time བརྒྱུད་ལམ་གྱིས་གོ་སྒྲིགས་གནང་བའི་ Time 100 Talks ཞེས་པའི་དྲྭ་རྒྱའི་ལས་རིམ་ཐོག་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཏོག་དབྱིབས་རིམས་ནད་ཀྱི་གནས་སྟངས་ཁྲོད་སེམས་ཞི་བར་གནས་ཐབས་དང་ཨ་རི་གཙོས་འཛམ་གླིང་ནང་མི་རིགས་དབྱེ་འབྱེད་ཀྱི་དཀའ་ངལ། དེ་བཞིན་ཁོར་ཡུག་དང་རྒྱ་དཀར་ནག་གཉིས་དབར་ས་མཚམས་དང་འབྲེལ་དཀའ་རྙོག་བཅས་ཀྱི་གནད་དོན་ཐོག་བཀའ་འདྲི་དགོངས་སྐོར་ཁག་ཅིག་ཞུས་ཡོད་པ་དང་། ༸གོང་ས་མཆོག་གིས་རྒྱ་དཀར་ནག་གཉིས་དབར་ས་མཚམས་རྩོད་རྙོག་དང་འབྲེལ་བའི་བཀའ་འདྲིར་རྒྱ་གར་དང་རྒྱ་ནག་གཉིས་ཀ་འཛམ་གླིང་ནང་མི་འབོར་མང་ཤོས་ཀྱི་རྒྱལ་ཁབ་ཡིན་པ་དང་། དེ་བཞིན་གཅིག་ནི་མང་གཙོའི་རྒྱལ་ཁབ་དང་གཞན་དེ་དམར་ཤོག་རྒྱལ་ཁབ་ཡིན་པའི་ཆ་ནས་ཕན་ཚུན་འགྲན་བསྡུར་བཅས་ཀྱི་ཁྲོད་རྒྱལ་ཁབ་ནང་ཁུལ་ལ་རྩོད་རྙོག་ཕྲན་བུ་ཡོང་སྲིད་ཀྱང་། ལོ་རྒྱུས་ལ་བལྟས་ནས་རྒྱ་ནག་དེ་ནང་པའི་རྒྱལ་ཁབ་ཅིག་དང་རྒྱ་གར་ནི་བདག་ཅག་གི་སྟོན་པ་བཅོམ་ལྡན་འདས་གང་ཉིད་༸སྐུ་འཁྲུངས་སའི་ཞིང་ཁམས་ཆགས་ཀྱི་ཡོད་པ་ལྟར་སངས་རྒྱས་ཀྱི་ཆོས་བོད་སྒྱུར་མ་གནང་གོང་དུ་རྒྱ་སྐད་ནང་བསྒྱུར་ཟིན་པ་སོགས་བཀའ་བསྩལ་ཏེ་རྒྱལ་ཁབ་ཕྱོགས་གཉིས་དབར་ཡུན་རིང་ནས་ཆོས་ཡོན་སོགས་ཀྱི་འབྲེལ་བ་ཆེན་པོ་ཡོད་པ་ལྟར་དུས་ད་ལྟའང་རྒྱ་ནག་གི་ནང་པ་མང་པོ་ལོ་ལྟར་རྒྱ་གར་གྱི་གནས་མཆོག་རྡོ་རྗེ་གདན་ལ་གནས་སྐོར་དུ་ཡོང་བཞིན་ཡོད་པ་སོགས་ལུང་འདྲེན་དང་འབྲེལ། གང་ལྟར་ཕན་མཚུན་མཉམ་གནས་གནང་དགོས་གལ་ཡིན་སྟབས་རྒྱལ་ཁབ་ཕྱོགས་གཉིས་ཀའི་ངོས་ནས་ས་མཚམས་སྲུང་སྐྱོབ་ཆེད་དུ་འགྲོ་གྲོན་ཕོན་ཆེ་བཏང་བ་ལས་ཕན་མཚུན་ཞི་བདེའི་ངང་མཉམ་གནས་ཐུབ་ཐབས་དང་ཡར་རྒྱས་ཀྱི་ཆེད་དུ་འགྲོ་གྲོན་བཏང་དགོས་པ་དང་། ལྷག་པར་དུ་དེ་སྔ་ ། Hindi Chini Bhai Bhai ཞེས་རྒྱ་གར་དང་རྒྱ་ནག་དབར་སྤུན་མཆེད་ཀྱི་འདུ་ཤེས་ཡོད་ཚུལ་བརྗོད་དོན་ལྟར་དོན་འཁྱོལ་ཕྱག་བསྟར་གནང་དགོས་གལ་ཡིན་པར་བཀའ་སློབ་བཀྲིན་ཆེ་བ་བསྩལ་འདུགདེ་བཞིན་དེང་སྐབས་ཨ་རི་ནང་མི་རིགས་ནག་པོའི་གནད་དོན་དང་འབྲེལ་མི་རིགས་དབྱེ་འབྱེད་ཀྱི་ངལ་བ་འཕྲད་བཞིན་སྐོར་དང་འབྲེལ་བཀའ་འདྲི་ཞུས་པར་མི་རིགས་དབྱེ་འབྱེད་ཀྱི་དཀའ་ངལ་ཡོང་དང་མི་ཡོང་ཞེས་པ་དེ་གང་ཟག་སྒེར་གྱི་ཕྱག་ཏུ་ཡོད་པ་དང་། གཞུང་གི་ངོས་ནས་མང་ཚོགས་ཀྱི་བསམ་བློར་དོ་སྣང་གནང་སྟེ་དེ་འབྲེལ་ངལ་བ་མི་འཕྲད་པར་ཐུགས་ཁུར་བཞེས་གནད་ཡིན་པ་བཀའ་བསྩལ་བ་དང་ཆབས་ཅིག དེང་སྐབས་མང་གཙོའི་དུས་རབས་ཤིག་ཡིན་སྟབས་མང་ཚོགས་ལ་ཐག་གཅོད་གནང་རྒྱུའི་འགན་དབང་ཡོད་པ་བཞིན་ནང་སེམས་ཀྱི་སློབ་སྦྱོང་ཡོད་པའི་ཐོག་ནས་མཐར་མང་ཚོགས་ནས་ཐག་གཅོད་གནང་རྒྱུ་ཡིན་པ་བཀའ་བསྩལ་འདུག༸གོང་ས་མཆོག་གིས་མགོན་པོ་༸གང་ཉིད་མཆོག་ནས་བོད་ཀྱི་ཆབ་སྲིད་ཀྱི་ཐུགས་འགན་བཞེས་ཀྱི་མེད་ཀྱང་བོད་ཀྱི་ཐུན་མོང་མ་ཡིན་པའི་ཆོས་རིག་དང་བོད་ཀྱི་ཁོར་ཡུག་སྲུང་སྐྱོབ་ཀྱི་གནད་དོན་དེ་དག་ཐུགས་བསྐྱེད་བཞིའི་ཁོངས་ནས་གཅིག་ཡིན་པ་ལྟར་ཐུགས་འགན་བཞེས་ཀྱི་ཡོད་པར་བརྟེན་བོད་དེ་འཛམ་གླིང་སྤྱི་ཡོངས་ཀྱི་ཁོར་ཡུག་གནས་སྟངས་དང་འབྲེལ་བ་ཆེན་པོ་ཡོད་པ་མ་ཟད། ལྷག་དོན་ཨེ་ཤ་ཡའི་གླིང་ཆེན་གྱི་ཐུང་ཆུའི་མཛོད་ལྟ་བུ་ཡིན་སྟབས་འཛམ་གླིང་གི་ངོས་ནས་བོད་ཀྱི་ཁོར་ཡུག་གནད་དོན་ཐོག་ཐུགས་སྣང་ཆེ་ཙམ་གནང་དགོས་པ་བཀའ་བསྩལ་འདུགམགོན་པོ་མཆོག་གིས་ད་དུང་དེང་སྐབས་ཏོག་དབྱིབས་རིམས་ནད་ཁྱབ་གདལ་གྱི་ཆེས་ཛད་དྲག་གི་གནས་སྟངས་དང་འབྲེལ། རང་སྲོག་ལ་ལྟོས་མེད་ཀྱིས་འགྲོ་བ་མིའི་ཚེ་སྲོག་སྐྱོབ་མཁན་གྱི་སྨན་པ་དང་སྨན་ཞབས་རྣམས་ཀྱི་ཕྱག་ལས་ལ་ཡི་རང་བསྔགས་བརྗོད་མཛད་པ་དང་། དེ་སྔ་དུས་རབས་བརྒྱད་པའི་ནང་བོད་དུ་ཕེབས་པའི་རྒྱ་གར་གྱི་མཁས་གྲུབ་ཚོས་གལ་ཏེ་བཅོས་སུ་ཡོད་ན་དེར་ཧུར་བརྩོན་ཆེན་པོས་འབད་དགོས་པ་དང་། གལ་ཏེ་བཅོས་རྒྱུ་མེད་ཚེ་དེར་འབད་དོན་མེད་ཅེས་གསུངས་པ་ལྟར་དཀའ་ངལ་དེ་སེལ་རྒྱུ་ཡོད་ཚེ་ཧུར་བརྩོན་གནང་དགོས་པ་དང་དེ་ལྟར་མེད་ཚེ་དེའི་ཐོག་ངལ་བ་དང་སེམས་ཁྲལ་གནང་བ་དོན་མེད་ཡིན་པས་ཚང་མས་རེ་བ་མ་བརླག་པར་བཟང་ཕྱོགས་ཀྱི་ཐོག་ནས་དགོངས་པ་བཞེས་ནས་ངལ་བ་དག་ལ་གདོང་ལེན་གནང་དགོས་ཞེས་ལམ་སྟོན་མཛད་འདུགརྩ་བའི་ Time 100 Talks ཞེས་པའི་དྲྭ་རྒྱའི་ལས་རིམ་ཐོག་༸གོང་ས་༸སྐྱབས་མགོན་ཆེན་པོ་མཆོག་གིས་གཙོས་པའི་རྒྱལ་སྤྱིའི་ཁྲོད་ཀྱི་ཆབ་སྲིད་མི་སྣ་དང་འགྲོ་བ་མིའི་ཐོབ་ཐང་ལས་འགུལ་བ་གྲགས་ཅན། དེ་བཞིན་ཁོར་ཡུག་ལས་འགུལ་བ། མི་རིགས་འདྲ་མཉམ་གྱི་ཐོབ་ཐང་རྩོད་ལེན་པ་སོགས་མི་སྣ་གྲགས་ཅན་ ༡༠༠ ཙམ་གདན་ཞུ་ཐོག་འཛམ་གླིང་ཞི་བདེ་ལྡན་པ་དང་མཉམ་གནས་ཐུབ་ཐབས་བསྐྲུན་གནད་སོགས་ཀྱི་བརྗོད་གཞིའི་ཐད་བཀའ་བསྡུར་གནང་ཡོད་པ་རེད།

ཨ་རིས་རྒྱ་ནག་གཞུང་འབྲེལ་གྱི་ལས་ཁུངས་གཅིག་དང་དཔོན་རིགས་བཞིར་ཉེས་ཆད་འགེལ་རྒྱུ་རེད་འདུག

ཨ་རིའི་ཕྱི་སྲིད་དྲུང་ཆེ་སྐུ་ཞབས་ Mike Pompeo མཆོག་གིས་བོད་ནང་ཕར་འགྲོ་ཚུར་འོང་གི་ཁྲིམས་འཆར་དེ་ཕྱག་བསྟར་བརྒྱུད་ཨ་རིའི་གསར་འགོད་པ་དང་ཡུལ་སྐོར་སྤྲོ་འཆམ་པ། དེ་བཞིན་སྲིད་དོན་པ་དང་གཞུང་འབྲེལ་ལས་བྱེད་སོགས་བོད་ནང་ཕེབས་རྒྱུར་བཀག་སྡོམ་བྱེད་མཁན་རྒྱ་གཞུང་གི་དཔོན་རིགས་ཚོ་ཨ་རིར་ཡོང་རྒྱུར་དམ་དྲག་གནང་རྒྱུ་ཡིན་པ་ཡོངས་གྲགས་གནང་ནས་ཉིན་གཉིས་སོང་མཚམས་སུ་ཨ་རི་གཞུང་ནས་ཡུ་གུར་གྱི་གྲངས་ཉུང་མི་རིགས་ཀྱི་འགྲོ་བ་མིའི་ཐོབ་ཐང་ལ་རྡོག་རོལ་གཏོང་བཞིན་པའི་སྲིད་བྱུས་དང་འབྲེལ་བ་ཡོད་པའི་རྒྱ་ནག་གཞུང་འབྲེལ་གྱི་ལས་ཁུངས་གཅིག་དང་དཔོན་རིགས་བཞིར་ཉེས་ཆད་འགེལ་རྒྱུ་ཡིན་པ་གསལ་བསྒྲགས་གནང་འདུགཁ་སང་ཕྱི་ཚེས་ ༩ ཉིན་ཨ་རིའི་ཕྱི་སྲིད་ལས་ཁུངས་དང་ཨ་རིའི་ Department of the Treasury ཞེས་ནོར་སྲིད་སྤྱི་ཁྱབ་ལྷན་ཁང་གཉིས་ཀྱིས་དེ་སྔ་ ༢༠༡༦ ཨ་རིའི་གྲོས་ཚོགས་སུ་གཏན་འབེབས་གནང་བའི་ Global Magnitsky Human Rights Accountability Act ཞེས་རྒྱལ་སྤྱིའི་ཁྲོད་འགྲོ་བ་མིའི་ཐོབ་ཐང་ཐོག་འགན་འཁུར་ཐུབ་ཐབས་དང་འབྲེལ་བའི་ཁྲིམས་འཆར་དེ་དངོས་སུ་ཕྱག་བསྟར་བརྒྱུད་དེ་ཡུ་གུར་གྱི་ཁ་ཆེའི་མི་རིགས་ཀྱི་འགྲོ་བ་མིའི་ཐོབ་ཐང་ལ་ཁག་རྡོག་རོལ་གཏང་མཁན་རྒྱ་ནག་གི་དཔོན་རིགས་བཞི་དང་རྒྱ་ནག་གཞུང་འབྲེལ་གྱི་ལས་ཁུངས་གཅིག་བཅས་དངོས་སུ་མིང་མངོན་གསལ་གྱིས་དཔལ་འབྱོར་གྱི་ཉེས་ཆད་འགེལ་རྒྱུ་དང་ཨ་རིར་འགྲོ་ཆོག་པའི་མཐོང་མཆན་ལ་དམ་དྲག་གནང་རྒྱུ་ཡིན་པ་གསུངས་འདུག མིང་མངོན་གསལ་གནང་བའི་རྒྱ་ནག་གི་དཔོན་རིགས་བཞི་པོ་ནི་དེ་སྔ་རྒྱ་གཞུང་གིས་དབྱེ་བའི་བོད་རང་སྐྱོང་ལྗོངས་ཀྱི་རྒྱ་ནག་དམར་ཤོག་ཚོགས་པའི་དྲུང་ཆེ་བྱེད་མྱོང་ཡོད་པ་ད་ལྟ་ཤིན་ཅང་རང་སྐྱོང་ལྗོངས་ཀྱི་དམར་ཤོག་ཚོགས་པའི་དྲུང་ཆེ་ Chen Quanguo དང་ཤིན་ཅང་རང་སྐྱོང་ལྗོངས་ཀྱི་དམར་ཤོག་ཚོགས་པའི་དྲུང་ཆེ་གཞོན་པ་ Zhu Hailun དེ་བཞིན་ཤིན་ཅང་རང་སྐྱོང་ལྗོངས་ཁོངས་སུ་ཆེད་འཛུགས་བྱས་པའི་རྒྱ་ནག་དམར་ཤོག་ཚོགས་པའི་སྤྱི་བདེ་ལས་ཁུངས་ཀྱི་དམར་ཤོག་དྲུང་ཆེ་དང་འགན་འཛིན་གཅིག་ལྕོགས་ Wang Mingshan ལས་ཁུངས་དེའི་དམར་ཤོག་དྲུང་ཆེ་ཟུར་པ་ Huo Liujun བཅས་ཡིན་པ་རེད།ཨ་རིའི་ཐག་གཅོད་དེའི་འོག་ཤིན་ཅང་རང་སྐྱོང་ལྗོངས་ཁོངས་སུ་ཆེད་འཛུགས་བྱས་པའི་རྒྱ་ནག་དམར་ཤོག་ཚོགས་པའི་སྤྱི་བདེ་ལས་ཁུངས་དང་དཔོན་རིགས་བཞི་པོ་རྣམས་ཀྱི་ས་ཁང་དང་། དཔལ་འབྱོར་སོགས་ཨ་རི་ནང་ཡོད་པ་རྣམས་བེད་སྤྱོད་བྱེད་མི་ཆོག་པ་དང་། ཁོང་རྣམ་པ་དང་དངོས་ཤུགས་བརྒྱུད་གསུམ་ནས་དཔལ་འབྱོར་དང་ཚོང་སོགས་ཀྱི་འབྲེལ་བ་ཡོད་པའི་ཨ་རིའི་གཞུང་འབྲེལ་ལས་ཁུངས་དང་གང་ཟག་སྒེར་རྣམས་ནས་ཀྱང་དེ་དག་དང་འབྲེལ་བ་གནང་མི་ཆོག་པ་བཟོས་འདུག།དེ་རྣམས་ཀྱིས་གཙོས་པའི་ནང་མི་ཉེ་འབྲེལ་རྣམས་ཨ་རིར་ཡོང་རྒྱུའི་མཐོང་མཆན་ལ་དམ་དྲག་གནང་གཏན་ཁལེ་འདུག གནད་དོན་དེ་དང་འབྲེལ་ཨ་རི་ཕྱི་སྲིད་དྲུང་ཆེ་སྐུ་ཞབས་ Mike Pompeo མཆོག་གིས་ཨ་རིའི་ངོས་ནས་རྒྱ་ནག་གཞུང་གིས་ཤིང་ཅང་ནང་ལག་བསྟར་བྱེད་བཞིན་པའི་དྲག་པོའི་སྲིད་བྱུས་ཐད་ནམ་ཡང་ཁ་ཁུ་སིམ་པོ་བཞུགས་རྒྱུ་མིན་པ་དང་ལྷག་པར་དུ་དམར་ཤོག་ཚོགས་པའི་དྲུང་ཆེ་ Chen Quanguo ཡིས་ད་ལྟ་ཤིན་ཅང་ནང་ཙམ་མ་ཟད་དེ་སྔ་བོད་ནང་དྲག་པོའི་སྲིད་བྱུས་མང་དག་ཅིག་ལག་བསྟར་བརྒྱུད་བོད་མིའི་འགྲོ་བ་མིའི་ཐོབ་ཐང་སོགས་ལ་རྡོག་རོལ་མང་པོ་བཏང་མྱོང་མཁན་ཞིག་རེད་ཅེས་གསུངས་འདུགཨ་རིའི་ནོར་སྲིད་སྤྱི་ཁྱབ་ལྷན་ཁང་གི་དྲུང་ཆེ་སྐུ་ཞབས་ Steven Mnuchin ལགས་ནས་ཨ་རིའི་ངོས་ནས་དཔལ་འབྱོར་གྱི་ནུས་ཤུགས་ཡོད་ཚད་ཆེད་འདོན་གྱིས་ཤིན་ཅང་གཙོས་འཛམ་གླིང་ཁྱོན་ཡོངས་སུ་འགྲོ་བ་མིའི་ཐོབ་ཐང་རྡོག་རོག་གཏང་མཁན་རྣམས་འགན་ཁུར་ལྡན་པ་ཞིག་བཟོ་རྒྱུའི་ཆོད་སེམས་བརྟན་པོ་ཡོད་ཅེས་གསུངས་འདུག གཞི་རྩའི་ད་རེས་ཨ་རི་གཞུང་ནས་རྒྱ་ནག་གི་དཔོན་རིགས་ཐོག་ཕྱག་བསྟར་གནང་བའི་ Global Magnitsky Human Rights Accountability Act ཞེས་རྒྱལ་སྤྱིའི་ཁྲོད་འགྲོ་བ་མིའི་ཐོབ་ཐང་ཐོག་འགན་ཁུར་ཐུབ་ཐབས་དང་འབྲེལ་བའི་ཁྲིམས་འཆར་དེ་ཕྱི་ལོ་ ༢༠༡༢ ལོར་ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་ Ben Cardin ལགས་ཀྱིས་གྲོས་ཚོགས་སུ་འདོན་སྤེལ་གནང་རྗེས་ཕྱི་ལོ་ ༢༠༡༦ ཕྱི་ཟླ་ ༡༢ ནང་གྲོས་ཚོགས་སུ་གཏན་འབེབས་དང་། དེ་ནས་ཕྱི་ལོ་ ༢༠༡༧ ལོར་ཨ་རིའི་སྲིད་འཛིན་མཆོག་གིས་མཚན་རྟགས་བསྐྱོད་ནས་ཁྲིམས་སུ་བཅད་པ་ཞིག་ཡིན་པ་དང་། ཁྲིམས་གཞི་དེའི་འོག་འགྲོ་བ་མིའི་ཐོབ་ཐང་རྡོག་རོལ་གཏང་མཁན་རྒྱ་ནག་གི་དཔོན་རིགས་ཁག་ཅིག་མིང་མངོན་གསལ་གྱིས་ཉེས་ཆད་བཅད་པ་ཆེས་ཐོག་མ་ཆགས་ཀྱི་ཡོད་པ་རེད།

ཨ་རིའི་དཔོན་རིགས་དང་མི་སེར་ཚོ་རྒྱ་ནག་དང་བོད་དུ་ཕེབས་རྒྱུར་དམ་དྲག་བྱེད་ངེས་ཡིན་པ་བརྗོད་འདུག

ཁ་ཉིན་ཕྱི་ཚེས་ ༧ ཉིན་ཨ་རིའི་ཕྱི་སྲིད་དྲུང་ཆེ་སྐུ་ཞབས་ Mike Pompeo མཆོག་གིས་དེ་སྔ་ ༢༠༡༨ ལོར་ཡུལ་དེའི་གྲོས་ཚོགས་གོང་འོག་གཉིས་སུ་གཏན་འབེབས་གནང་རྗེས་སྲིད་འཛིན་སྐུ་ཞབས་ Donald Trump མཆོག་གིས་མཚན་རྟགས་བསྐྱོན་ནས་ཨ་རིའི་ཁྲིམས་སུ་གཏན་ལ་ཕབ་པའི་Reciprocal Access to Tibet Act ཞེས་བོད་ནང་ཕར་འགྲོ་ཚུར་འོང་གི་ཁྲིམས་འཆར་དེ་ཕྱག་བསྟར་བརྒྱུད་ཨ་རིའི་གསར་འགོད་པ་དང་ཡུལ་སྐོར་སྤྲོ་འཆམ་པ། དེ་བཞིན་སྲིད་དོན་པ་དང་གཞུང་འབྲེལ་ལས་བྱེད་སོགས་བོད་ནང་ཕེབས་རྒྱུར་བཀག་སྡོམ་བྱེད་མཁན་རྒྱ་གཞུང་གི་དཔོན་རིགས་ཚོ་ཨ་རིར་ཡོང་རྒྱུར་དམ་དྲག་གནང་རྒྱུ་ཡིན་པ་ཡོངས་གྲགས་གནང་ཡོད་པ་རེད།གནད་དོན་དེ་དང་འབྲེལ་ཁ་སང་རྒྱ་ནག་གཞུང་འབྲེལ་གྱི་ཉིན་རེའི་གསར་འགོད་ལྷན་ཚོགས་ཐོག་རྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་པ་ Zhao Lijian ཡིས་ཨ་རིས་བོད་དང་འབྲེལ་རྒྱ་ནག་རྒྱལ་ནང་གི་གནད་དོན་ལ་ཐད་བྱུས་གནང་རྒྱུ་ངེས་པར་དུ་མཚམས་འཇོག་བྱས་ཏེ་ཨ་རི་དང་རྒྱ་ནག་གཉིས་ཀྱི་འབྲེལ་བ་བཟང་དུ་གཏང་རྒྱུར་དོ་སྣང་གནང་དགོས་ཞེས་བརྗོད་པ་དང་ཆབས་ཅིག ཨ་རིས་བོད་ཀྱི་གནད་དོན་དང་འབྲེལ་རྒྱ་ནག་གི་དཔོན་རིགས་ཚོ་ཨ་རི་ནང་བསྐྱོད་རྒྱུའི་མཐོང་མཆན་གནང་རྒྱུ་མིན་སྐོར་བརྗོད་པ་དེར་རྒྱ་ནག་ཕྱོགས་ནས་ཀྱང་བོད་དོན་འབྲེལ་བ་དམ་ཟབ་ཡོད་པའི་ཨ་རིའི་གཞུང་འབྲེལ་མི་སྣ་དང་མི་སྒེར་རྣམས་རྒྱ་ནག་དང་བོད་ནང་ཕེབས་རྒྱུར་དམ་དྲག་བྱེད་ངེས་ཡིན་ཞེས་ལན་འདེབས་བྱས་འདུགཁོ་པས་ད་དུང་རྒྱ་ནག་གི་ངོས་ནས་བོད་འདི་རྒྱལ་སྤྱིའི་གཞུང་ཚབ་དང་ཡུལ་སྐོར་སྤྲོ་འཆམ་པ་ཚོར་དུས་རྟག་ཏུ་སྒོ་ཕྱེ་ཡོད་པ་མ་ཟད་ཕྱི་ལོ་ ༢༠༡༥ ནས་ ༢༠༡༨ བར་རྒྱ་གཞུང་གིས་དབྱེ་བའི་བོད་རང་སྐྱོང་ལྗོངས་ཁོ་ནའི་ནང་གཞུང་ཚབ་པ་དང་ཡུལ་སྐོར་སྤྲོ་འཆམ་པ་ ༡༧༦༠༠༠  ལྷག་བཏང་ཡོད་པར་འགྲེལ་བརྗོད་དང་སྦྲགས། ད་རེས་ཨ་རིས་ཕྱག་བསྟར་གནང་རྒྱུའི་ཁྲིམས་འཆར་དེ་ནི་གནང་སྟངས་ཡག་པོ་ཞིག་མིན་པ་དང་། རྒྱ་ནག་ནས་བོད་ཐོག་འགྲོ་སྐྱོད་ཆོག་མིན་དང་འབྲེལ་བའི་སྒྲིག་ཁྲིམས་གཏན་འབེབས་ཡོད་པ་དེ་བོད་ཀྱི་ས་བབས་གནས་སྟངས་ལ་གཞིགས་ཏེ་ཕྱི་མིའི་བདེ་འཇགས་ལ་ཆེད་དམིགས་ཀྱིས་བཟོས་པ་ཞིག་རེད་ཅེས་བརྗོད་འདུགརྒྱ་གཞུང་གི་ཡར་ལན་དེ་དང་འབྲེལ་ཁ་སང་གསར་འགོད་པ་ཁག་ཅིག་ནས་ཨ་རི་ཕོ་བྲང་དཀར་པོའི་གསར་འགོད་ལྷན་ཚོགས་སྐབས་གསར་འགོད་དྲུང་ཆེ་ Kayleigh McEnany ལགས་སུ་བཀའ་འདྲི་ཁག་ཅིག་ཞུ་སྐབས་སྲིད་འཛིན་སྐུ་ཞབས་ Donald Trump མཆོག་ནས་རྒྱ་ནག་གི་བྱ་སྤྱོད་ཡར་ལན་སོགས་ཀྱི་ཐད་ཕྱག་བསྟར་གནང་རྒྱུའི་སྲིད་བྱུས་དང་འཆར་གཞི་ཁག་ཅིག་གཏན་འབེབས་གནང་ཡོད་པས་དེ་དག་རིམ་པས་མཁྱེན་རྟོགས་ཡོང་གི་རེད་ཅེས་གསུངས་ཡོད་པ་ལས་དེ་མིན་ཕྱག་བསྟར་གནང་རྒྱུའི་འཆར་གཞི་གང་དག་ཡོད་མེད་ཁ་གསལ་གནང་མེད་པ་རེད།གཞི་རྩའི་རྒྱ་ནག་གཞུང་ནས་བོད་ཀྱི་ས་ཁུལ་ཁག་ཏུ་རྒྱལ་སྤྱིའི་གཞུང་ཚབ་མི་སྣ་དང་ཡུལ་སྐོར་སྤྲོ་འཆམ་པ་རྣམས་རང་དབང་ཐོག་བསྐྱོད་རྒྱུར་དམ་དྲག་བྱེད་བཞིན་པ་དེ་ནི་དངོས་ཡོད་གནས་སྟངས་ཤིག་ཡིན་པ་དང་། གལ་སྲིད་གཞུང་ཚབ་མི་སྣ་གཙོས་ཕྱི་མི་ཞིག་རྒྱ་གཞུང་གིས་དབྱེ་བའི་བོད་རང་སྐྱོང་ལྗོངས་ཀྱིས་གཙོས་པའི་བོད་ཀྱི་ས་ཁུལ་ཁག་ཏུ་བསྐྱོད་རྒྱུའི་ཆོག་མཆན་སྤྲད་དབང་དུ་བཏང་ཡང་ས་གནས་རྒྱ་གཞུང་ལས་བྱེད་ཚོས་ཁོང་ཚོར་ལྟ་སྲུང་ནན་པོ་བྱས་ནས་བོད་མི་དང་ཐུག་འཕྲད་གནང་རྒྱུར་དམ་དྲག་ཆེན་པོ་བྱེད་ཀྱི་ཡོད་པ་རེད།ཁ་ཉིན་ཨ་རིའི་ཕྱི་སྲིད་དྲུང་ཆེ་སྐུ་ཞབས་ Mike Pompeo མཆོག་གིས་བོད་ནང་ཕར་འགྲོ་ཚུར་འོང་གི་ཁྲིམས་འཆར་ཕྱག་བསྟར་བརྒྱུད་རྒྱ་གཞུང་གི་དཔོན་རིགས་ཚོ་ཨ་རིར་ཡོང་རྒྱུར་དམ་དྲག་གནང་རྒྱུ་ཡིན་པ་ཡོངས་ཁྱབ་གནང་བ་དང་འབྲེལ། དེ་སྔ་ཁྲིམས་དེ་ཨ་རིའི་གྲོས་ཚོགས་སུ་ཆེད་འདོན་གནང་མཁན་ཁོངས་སུ་ཡོད་པ་གྲོས་ཚོགས་གོང་མའི་འཐུས་མི་སྐུ་ཞབས་ Marco Rubio ལགས་ནས་དགའ་བསུ་དང་བོད་ནང་གཞི་རྩའི་འགྲོ་བ་མིའི་ཐོབ་ཐང་རྡོལ་རོལ་གཏང་མཁན་རྒྱ་ནག་གི་དཔན་རིགས་ཚོ་ཨ་རི་ནང་རང་དབང་ལོངས་སུ་སྤྱོད་རྒྱུའི་ཐོབ་ཐང་ཡོད་མ་རེད་ཅེས་ནན་བརྗོད་གནང་བ་མ་ཟད། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ཀྱང་ཁ་སང་རྒྱ་གར་གྱི་ Republic གསར་ཁང་གི་བཅར་འདྲི་ཐོག་ཨ་རིས་རྒྱ་གཞུང་གི་དཔོན་རིགས་ཚོ་ཨ་རིར་ཡོང་རྒྱུར་དམ་དྲག་གནང་རྒྱུ་ཡིན་པ་ཡོངས་ཁྱབ་གནང་བ་དེ་ནི་དགའ་བསུ་ཞུ་འོས་པ་དང་རྒྱལ་སྤྱིར་བསྒྲགས་ཆོག་པའི་བརྡ་ལན་ཞིག་ཀྱང་རེད་ཅེས་གསུངས་འདུགསྲིད་སྐྱོང་མཆོག་ནས་ད་དུང་རྒྱ་ནག་གཞུང་གིས་བོད་ནང་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པར་རྒྱལ་སྤྱིའི་མང་ཚོགས་ནས་བློ་འཚབ་ཀྱིས་དོ་སྣང་ཆེན་པོ་གནང་བཞིན་ཡོད་པ་མ་ཟད། ཉེ་ཆར་ཡོ་རོན་མཐུན་ཚོགས་དང་རྒྱ་ནག་དབར་གྱི་ཆེ་མཐོའི་ལྷན་ཚོགས་ཐོག་བོད་དོན་གླེང་བ་དང་། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཁྱད་ལས་པ་ ༥༠ ཐུན་མོང་གིས་བོད་ནང་གི་འགྲོ་བ་མིའི་ཐོབ་ཐང་གནས་སྟངས་ལ་ཞིབ་འཇུག་ཆེད་ཕེབས་འདོད་ཡོད་པའི་བསྒྲགས་གཏམ་ཞིག་སྤེལ་ཡོད་པ་སོགས་གསུངས་ཡོད། དེ་བཞིན་རྒྱ་དཀར་ནག་གཉིས་ཀྱི་གནད་དོན་དང་འབྲེལ་ལོ་རྒྱུས་ཐོག་རྒྱ་གར་དང་རྒྱ་ནག་དབར་གྱི་ས་མཚམས་ཞེས་པ་ཞིག་མེད་པ་དང་། བོད་དང་རྒྱ་གར་གཉིས་དབར་ས་མཚམས་ཞེས་པ་ཞིག་ཡོད་སྟབས། གསར་ཁང་ཁག་གིས་གཙོས་པའི་ཉམས་ཞིབ་པ་རྣམས་ནས་རྒྱ་དཀར་ནག་མིན་པར་བོད་དང་རྒྱ་གར་གྱི་ས་མཚམས་ཞེས་བེད་སྤྱོད་གནང་དགོས་པ་དང་། བོད་མི་རྣམས་དུས་རྟག་ཏུ་རྒྱ་གར་དང་ལྷན་དུ་ཡོད་ཅེས་གསུངས་འདུགགཞི་རྩའི་ད་ལྟའི་ཆ་ས་མཚམས་དང་ཚོང་འབྲེལ། དེ་བཞིན་ཏོག་དབྱིབས་རིམས་ནད་དང་འགྲོ་བ་མིའི་ཐོབ་ཐང་སོགས་གནད་དོན་དུ་མ་ཞིག་གི་ཐད་ནས་རྒྱ་ནག་ལ་གནོན་ཤུགས་ཆེན་པོ་སྤྲོད་བཞིན་པ་མ་ཟད། ལྷག་པར་དུ་ཨ་རིས་བོད་ནང་ཕར་འགྲོ་ཚུར་འོང་གི་ཁྲིམས་འཆར་དེ་ཕྱག་བསྟར་དུ་འཛུགས་གནང་མུས་ཀྱི་དུས་སྐབས་འདིར་དབྱིན་ཡུལ་གྲོས་ཚོགས་འཐུས་མི་སྐུ་ཞབས Tim Loughton ལགས་ཀྱིས་དབྱིན་ཡུལ་གྲོས་ཚོགས་ནང་འགྲོ་བ་མིའི་ཐོབ་ཐང་རྡོག་རོལ་གཏང་མཁན་རྒྱ་ནག་གི་དཔོན་རིགས་རྣམས་དབྱིན་ཡུལ་ནང་ཡོང་རྒྱུར་བཀག་སྡོམ་གནང་དགོས་པའི་གླེང་སློང་དང་། དབྱིན་ཡུལ་སྲིད་གཞུང་གིས་ཀྱང་བོད་ནང་ཕར་འགྲོ་ཚུར་འོང་གི་ཁྲིམས་འཆར་གཏན་འབེབས་གནང་དགོས་པའི་གཞེན་སྐུལ་གནང་ཡོད།

ཁེ་ན་ཌའི་གྲོས་ཚོགས་འཐུས་མི་གཉིས་ཀྱིས་བོད་དོན་ལས་འགུལ་བར་རྒྱབ་སྐྱོར་གནང་བ། 

ཁ་སང་བོད་དོན་ཞི་བའི་གོམ་བགྲོད་པ་སངས་རྒྱས་སྐྱབས་ལགས་ཁེ་ན་ཌའི་གྲོང་ཁྱེར་ཨོ་ཁྲ་བཱར་འབྱོར་ཏེ་ཁུལ་དེའི་གྲོས་ཚོགས་ཀྱི་འཐུས་མི། སྐུ་ཞབས་ Garnett Genuis དང་Arif Virani ལགས་གཉིས་སུ་མཇལ་འཕྲད་ཀྱིས་བོད་དོན་རྒྱབ་སྐྱོར་གྱི་ཞུ་སྐུལ་གནང་འདུག གཞི་རྩའི་ཁ་སྔོན་ཟླ་བ་སྔོན་མའི་ཚེས་ ༢༨ ཉིན། ནུབ་གླིང་གི་རྒྱལ་ཁབ་ཁེ་ན་ཌར་རྟེན་གཞི་བྱས་པའི་བོད་དོན་ལས་འགུལ་བ་སངས་རྒྱས་སྐྱབས་ལགས་ཀྱིས།  བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་གྱ་ལྔ་བདག་གིར་བཞེས་པའི་འཁྲུངས་སྐར་དང་བསྟུན་ཁེ་ན་ཌའི་ཁྲོ་རན་ཊོ་ནས་གྲོང་ཁྱེར་ནས་རྒྱལ་ས་ཨོ་ཁྲ་བཱ་བར་ཞི་བའི་གོམ་བགྲོད་ཀྱི་ལས་འགུལ་ཞིག་དབུ་འཛུགས་གནང་བ་ལྟར།  ཁ་སང་ ཁེ་ན་ཌའི་གྲོས་ཚོགས་འཐུས་མི་གཉིས་ཀྱིས་ཨོ་ཁྲ་བཱའི་ནང་ཁོང་དང་དངོས་སུ་མཇལ་འཕྲད་གནང་སྟེ་ཁོང་གི་བོད་དོན་གྱི་ཞི་བའི་གོམ་བགྲོད་དེར་རྒྱབ་སྐྱོར་ཡོད་པར་ཡོངས་གྲགས་གནང་འདུག སྐབས་དེར་ཁེ་ན་ཌའི་གྲོས་ཚོགས་འཐུས་མི་སྐུ་ཞབས།  Arif Virani ལགས་ཀྱིས་བརྙན་ལམ་བརྒྱུད་དེ་ལས་འགུལ་བ་སངས་རྒྱས་སྐྱབས་ལགས་ཀྱིས་འདས་བའི་ཉིན་བརྒྱད་ཀྱི་རིང་ལ་ཁེ་ན་ཌའི་ཁྲོ་རན་ཊོ་ནས་གྲོང་ཁྱེར་ནས་རྒྱལ་ས་ཨོ་ཁྲ་བཱ་བར་ཞི་བའི་གོམ་བགྲོད་གནང་ནས་ཁོང་ལ་མཇའ་འཕྲད་དུ་ཡོང་བ་ཞིག་ཡིན་སྐོར་ངོ་སྤྲོད་ཀྱིས།  ཁོང་ཉིད་གྲོས་ཚོགས་ཀྱི་འཐུས་མི་ཞིག་དང་། དམིགས་བསལ་དུ་ཁེ་ན་ཌ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ཡིན་པས་ཆ་ནས། སངས་རྒྱས་སྐྱབས་ལགས་ཀྱི་དགོས་འདུན་དོན་ཚན་ཁག    ༸གོང་ས་༸སྐྱབས་མགོན་ཆེན་པོ་མཆོག་བོད་ལ་གདན་འདྲེན་ཞུ་དགོས་པ་དང་བོད་རྒྱ་གཉིས་ཀྱི་དཀའ་རྙོག་སེལ་ཆེད་དྲང་བདེན་གྱི་ཐོག་ནས་ཞི་བའི་གྲོས་མོལ་གནང་དགོས་པ། དེ་བཞིན་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ལ་རྒྱབ་སྐྱོར་དགོས་པ། བོད་མི་ཆབ་སྲིད་བཙོན་པ་དགུང་ལོ་ཆུང་ཤོས་༸ཀུན་གཟིགས་༸པཎ་ཆེན་རིན་པོ་ཆེ་མཆོག་གིས་གཙོས་པའི་བཀྲིས་དབང་ཕྱུག་ལགས་དང་དེ་མིན་བོད་མིའི་ཆབ་སྲིད་བཙོན་པ་རྣམས་འཕྲལ་དུ་གློད་བཀྲོལ་དགོས་པ་བཅས་ཀྱི་དགོས་འདུན་ལ་རྒྱབ་སྐྱོར་བྱེད་རྒྱུ་ཡིན་པར་གསུངས་འདུག སྐབས་དེར་སྐུ་ཞབས་ Arif Virani ལགས་ཀྱིས། སངས་རྒྱས་སྐབས་ལགས་སུ་ཁོང་གིས་ཐེངས་འདིར་ཞི་བའི་གོམ་བགྲོད་གནང་བ་དེ་གལ་ཆེན་པོ་ཅི་ཙམ་ཡིན་སྐོར་བཀའ་འདྲི་ཞུས་པར་ཁོང་གིས།  འདི་ལོར་བོད་མིའི་བླ་མ་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་གྱ་ལྔ་བདག་གིར་བཞེས་པའི་འཁྲུངས་སྐར་དང་སྟབས་བསྟུན་གྱིས་ཁོང་གིས་དམིགས་བསལ་གྱི་བོད་དོན་གྱི་ལས་འགུལ་དེ་དབུ་འཛུགས་གནང་བ་ཞིག་ཡིན་སྐོར་དང་སྦྲགས། རྒྱ་ནག་གི་བཙན་དབང་གི་འོག་ཏུ་ཡོད་པའི་རང་རིགས་བོད་མི་སྤུན་ཟླ་རྣམས་ལ་གདུང་སེམས་མཉམ་སྐྱེད་བྱེད་ཆེད་དུ་ཡིན་པར་གསུངས་ཏེ། རྩ་བའི་གོམ་བགྲོད་ཀྱི་ལམ་ཐག་རིང་པོ་ཡོད་ནའང་།  ལས་འགུལ་དེ་ལེགས་འགྲུབ་བྱུང་བས་དགའ་སྤྲོ་སྐྱེ་བཞིན་ཡོད་སྐོར་གྱི་ལན་འདེབས་གནང་འདུགདེ་བཞིན་སྐབས་དེར་གྲོས་ཚོགས་འཐུས་མི། སྐུ་ཞབས་ Garnett Genuis ལགས་ཀྱིས་ཀྱང་། ཚ་གདུང་ཆེ་བའི་དུས་སྐབས་དེར། བོད་དོན་ལས་འགུལ་བ་སངས་རྒྱས་སྐྱབས་ལགས་ཀྱིས་དཀའ་སྡུག་ལ་མ་འཛེམ་པར་ལམ་ཐག་རིང་པོ་བརྒྱུད་ནས་བོད་དོན་དྲིལ་བསྒྲགས་ཀྱི་ལས་འགུལ་སྤེལ་བར་བསྔགས་བརྗོད་ཡོད་པ་དང་། ཁོང་གི་དགོས་འདུན་དོན་ཚན་ཁག་ལ་གསལ་བ་བཞིན། འཐུས་མི་ཁོང་གི་ངོས་ནས་ཀྱང་གང་མགྱོགས་བོད་རྒྱ་ཞི་མོལ་ཡོང་བ་དང་། བོད་ནང་གི་དྲང་བདེན་མ་ཡིན་པའི་དཀའ་སྡུག་ཁག་མཚམས་འཇོག་ཡོང་བར་རྒྱབ་སྐྱོར་ཞུ་རྒྱུ་ཡིན་ཞེས་གསུངས་འདུག གཞི་རྩའི་བོད་དོན་ལས་འགུལ་བ་སངས་རྒྱས་སྐྱབས་ལགས་ནི་ལོ་རབས་བརྒྱད་བཅུའི་སྨད་དུ་བོད་མདོ་སྨད་མཛོད་དགེ་རྩྭ་ཐང་དུ་སྐྱེས་བ་ཞིག་ཡིན་པ་དང་། ཕྱིས་སུ་རྒྱ་གར་དུ་འབྱོར་ནས་སུ་ཇཱ་སློབ་གྲྭར་དབྱིན་བོད་རྩིས་གསུམ་ལ་སློབ་སྦྱོང་གང་ལེགས་གནང་རྗེས་ཕ་ཡུལ་དུ་ལོག་རྩིས་བྱས་ནའང་། རྒྱ་ནག་གི་ཁོང་བོད་ནང་དུ་ལོག་ཆོག་པའི་འགྲུལ་སྐྱོད་ཀྱི་ལམ་ཡིག་མ་སྤྲད་པར་བརྟེན། ༢༠༡༥ ཡས་མས་སུ་ཁོང་ཁེ་ན་ཌའི་ནང་དུ་ཕེབས་ཡོདཔ་དང་། ད་ཆ་ཁོང་གིས་རེས་གཟའ་ལྷག་པ་ནམ་ཡིན་ལ་འཆར་ཅན་ཁུལ་དེའི་རྒྱ་ནག་གི་གཞུང་ཚབས་ཁང་གི་མདུན་དུ་བོད་དོན་གྱི་ལས་འགུལ་སྤེལ་ནས་ལོ་གསུམ་མ་ཟིན་ཙམ་འགྲོ་མུས་ཡིན་པ་ལྟར། འདི་ལོའི་འཁྲུངས་སྐར་དང་སྟབས་བསྟུན་གྱིས་ཁོང་གིས་བོད་དོན་གྱི་ཞི་བའི་གོམ་བགྲོད་ཀྱི་ལས་འགུལ་དབུ་འཛུགས་གནང་སྟེ། ཁ་སང་གྲོས་ཚོགས་ཀྱི་འཐུས་མི་གཉིས་དང་མཇལ་འཕྲད་གནང་རྗེས། རྒྱ་ནག་གི་གཞུང་ཚབ་ཁང་གི་མདུན་དུ་ཉིན་གཅིག་གི་རིང་ཟས་བཅད་ངོ་རྒོལ་གནང་ཡོད་པ་རེད།  མི་འགྱངས་བར་ཁོང་སླར་ཡང་གྲོང་ཁྱེར་ཨོ་ཁྲ་བ་ནས་གྲོང་ཁྱེར་ཁྲོ་རོན་ཊོ་རུ་མུ་མཐུད་དུ་གོམ་བགྲོད་ཀྱིས་བོད་དོན་ལས་འགུལ་མཇུག་སྐྱོང་གནང་རྒྱུ་རེད་འདུག

བོད་ནང་ཕར་འགྲོ་ཚུར་འོང་ཐོག་བཀག་སྡོམ་བྱེད་མཁན་རྒྱའི་དཔོན་རིགས་ཚོར་དམ་དྲག་གནང་རྒྱུ།

ཨ་རིའི་ཕྱི་སྲིང་དྲུང་ཆེ་སྐུ་ཞབས་ Mike Pompeo མཆོག་གིས་རྒྱ་གཞུང་གིས་ཨ་རིའི་གསར་འགོད་པ་དང་ཡུལ་སྐོར་སྤྲོ་འཆམ་པ། དེ་བཞིན་སྲིད་དོན་པ་དང་གཞུང་འབྲེལ་ལས་བྱེད་སོགས་བོད་ནང་བསྐྱོད་པར་བཀག་སྡོམ་བྱེད་མཁན་རྒྱ་གཞུང་གི་དཔོན་རིགས་ཚོ་ཨ་རིར་ཡོང་རྒྱུར་དམ་དྲག་གནང་རྒྱུ་ཡིན་པ་གསུངས་འདུགཕྱི་ལོ་ ༢༠༡༨ ལོའི་ཟླ་མཇུག་ཏུ་ཨ་རིའི་གྲོས་ཚོགས་གོང་འོག་གཉིས་ཀྱིས་བོད་ནང་ཕར་འགྲོ་ཚུར་འོང་གི་ཁྲིམས་འཆར་གཏན་འབེབས་དང་ཨ་རིའི་སྲིད་འཛིན་སྐུ་ཞབས་ Donald Trump མཆོག་གིས་དེར་མཚན་རྟགས་བསྐྱོན་པ་དེ་ལྟར་ཡང་ཨ་རིའི་སྲིད་གཞུང་ནས་ཁྲིམས་འཆར་དེ་ད་བར་ཕྱག་བསྟར་གནང་མེད་སྟབས་བོད་མི་དང་བོད་དོན་རྒྱབ་སྐྱོར་བ་ཚོས་ཁྲིམས་འཆར་དེ་ཕྱག་བསྟར་གནང་དགོས་པའི་ཞུ་གཏུག་སོགས་གནང་མུས་ཡིན་པ་རེད། དེའི་ཁྲོད་ཁ་སང་ New York Times གསར་ཁང་གིས་སྐུ་ཞབས་ Mike Pompeo མཆོག་གིས་བོད་ནང་དམ་དྲག་མེད་པའི་ཐོག་ཕར་འགྲོ་ཚུར་འོང་བྱེད་རྒྱུ་དེ་ནི་ས་གནས་དེའི་བདེ་འཇགས་དང་། ཁོར་ཡུག་གི་གནད་དོན་དང་འབྲེལ་བ་ཡོད་པ་ཞིག་ཆགས་ཡོད་སྐོར་གསུངས་པ་དང་འབྲེལ། ཨ་རིའི་ངོས་ནས་བོད་ནང་བསྐྱོད་པར་དམ་དྲག་བྱེད་མཁན་རྒྱ་གཞུང་གི་དཔོན་རིགས་ཚོར་ཨ་རི་ནང་བསྐྱོད་ཆོག་པའི་མཐོང་མཆན་གནང་རྒྱུའི་ཐད་དམ་དྲག་གནང་རྒྱུ་ཡིན་པ་དང་།  སྒོས་སུ་ཨ་རིས་རྒྱ་ནག་དང་ལྷན་དུ་མུ་མཐུད་ཕན་ཚུན་གཉིས་ཕན་གྱི་འབྲེལ་ལམ་ཞིག་ཡོང་བར་འབད་བརྩོན་གནང་རྒྱུ་ཡིན་པ་གསུངས་འདུག  རྩ་བའི་ད་ཆ་ཁོང་གིས་རྒྱ་རིགས་དཔོན་རིགས་སུའི་མཐོང་མཆན་ཐད་དམ་དྲག་གནང་རྒྱུ་ཡིན་པའི་མིང་ཁག་གསལ་ཁ་གནང་མི་འདུག དེ་བཞིན་ཁོང་གིས་ཨ་རིའི་ངོས་ནས་བོད་མི་ཚོར་མིང་དོན་མཚུངས་པའི་རང་སྲིད་རང་སྐྱོང་གི་གནས་བབས་དང་ལྷག་པར་དུ་བོད་མི་རྣམས་ཀྱི་གཞི་རྩའི་འགྲོ་བ་མིའི་ཐོབ་ཐང་དང་བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་། སྐད་ཡིག་སོགས་གཅེས་འཛིན་གྱིས་སྲུང་སྐྱོབ་གནང་བར་རྒྱབ་སྐྱོར་མུ་མཐུད་གནང་ངེས་ཡིན་པ་སོགས་གསུངས་འདུག གཞི་རྩའི་ཕྱི་ལོ་ ༢༠༡༨ ལོའི་ཟླ་མཇུག་ཏུ་ཨ་རི་ནས་ཕར་འགྲོ་ཚུར་འོང་གི་ཁྲིམས་འཆར་གཏན་འབེབས་གནང་རྗེས་བོད་ནང་པེ་ཅིན་དུ་ཡོད་པའི་ཨ་རིའི་གཞུང་ཚབ་པ་སྐུ་ཞབས་ Terry Branstad ལགས་ཀྱིས་གཙོས་པའི་ཨ་རིའི་དོན་ཁང་གི་ལས་བྱེད་མ་གཏོགས་འཚམས་གཟིགས་སུ་ཕེབས་རྒྱུ་བྱུང་མེད་པ་རེད། གནད་དོན་དེ་དག་ཐད་རྒྱལ་སྤྱིའི་བོད་དོན་ལས་འགུལ་ཁང་གི་ཚོགས་གཙོ་སྐུ་ཞབས་ Matteo Mecacci ལགས་ཀྱིས་ད་ལན་ཨ་རིའི་ཕྱོགས་ནས་རྒྱ་ནག་གི་གཞུང་འབྲེལ་ལས་བྱེད་ཚོར་དམ་དྲག་གནང་བ་དེས་རྒྱ་ནག་ནས་མུ་མཐུད་བོད་མིའི་འགྲོ་བ་མིའི་ཐོབ་ཐང་རྡོག་རོལ་དང་སྒོས་བོད་དེ་རྒྱལ་སྤྱིའི་རྒྱལ་ཁབ་དང་འབྲེལ་བ་མེད་པར་ལོགས་སུ་འཇོག་པར་བརྡ་ལན་གསལ་སྤྲོད་གནང་ཡོད་སྐོར་གསུངས་འདུག ཁོང་གིས་ད་དུང་ད་རེས་དམ་དྲག་འདི་བརྒྱུད་ཨ་རིའི་སྲིད་གཞུང་ནས་བོད་མི་ཨ་རི་མི་སེར་ཡིན་པ་དང་བོད་ནང་ཕ་མ་སྤུན་མཆེད་དང་ཐུག་འདོད་ཡོད་པ། རང་གི་ཕ་ཡུལ་ལ་ཕྱིར་འགྲོ་འདོད་ཡོད་རིགས་ཚོར་དུས་དང་རྣམ་པ་ཀུན་ཏུ་རྒྱབ་སྐྱོར་ཡོད་ཅེས་གསུངས་ཡོད་པར་ངོ་སྤྲོད་གནང་འདུགརླུང་འཕྲིན་ཁང་གིས་བོད་མིའི་སྒྲིག་འཛུགས་ཀྱི་མགྲིན་ཚབ་པ་དྲིལ་བསྒྲགས་དྲུང་ཆེ་ཨ་རྱ་ཚེ་དབང་རྒྱལ་པོ་ལགས་སུ་བཀའ་འདྲི་ཞུས་པར་རྒྱ་གཞུང་ནས་དུས་རྟག་ཏུ་བོད་ནང་ཡར་རྒྱས་འགྲོ་ཡོད་ལུགས་དང་བོད་མི་རྣམས་རང་ཡུལ་དུ་སྐྱིད་པོ་ཡོད་ཟེར་ནས་བསྒྲགས་ཀྱི་ཡོད་པ་དེ་ལྟར་ཡང་། བོད་ནང་ཕྱི་མི་གསར་འགོད་པ་གཙོས་སྲིད་དོན་གྱི་མི་སྣ་གཏང་གི་མེད་པ་དེས་རྒྱ་གཞུང་གིས་རྫུན་གཏམ་བཤད་ཀྱི་ཡོད་པ་དང་སྒོས་ད་ཆ་ཨ་རི་ཕྱི་སྲིང་དྲུང་ཆེ་མཆོག་གིས་ཁྲིམས་འཆར་དེ་ཕྱག་བསྟར་གནང་རྒྱུའི་གནད་དོནགསུངས་པ་དེ་ནི་རྒྱལ་སྤྱིའི་ཁྲོད་བོད་ཀྱི་གནད་དོན་དེ་གསལ་པོ་ཞིག་ཆགས་ཡོད་སྟབས། རྒྱ་ནག་ནས་ཁྲིམས་འཆར་དེར་བརྩི་སྲུང་དང་ལག་བསྟར་བྱེད་དགོས་པ་གསུངས་ཡོད་སྐོར་གསུངས་སོང་། རྩ་བའི་ཨ་རྒྱ་གཉིས་དབར་འདས་པའི་ཟླ་ཤས་ནས་ཚོང་གཙོས་རྒྱལ་ཁབ་གཉིས་ཀྱི་འབྲེལ་ལམ་ཐད་རྩོད་གླེང་མི་ཉུང་བ་བྱུང་ཡོད་པ་མ་ཟད། ཉེ་ལམ་ཨ་རི་གཙོས་རྒྱལ་ཁབ་མང་དག་ཅིག་གིས་རྒྱ་ནག་ནས་ཏོག་དབྱིབས་གཉན་རིམས་སྟངས་འཛིན་བྱེད་ཕྱོགས་ཐད་སྐྱོན་བརྗོད་གནང་ཡོད་པ་རེད། ཉེ་ལམ་དབྱིན་ཡུལ་གྲོས་ཚོགས་ཀྱི་འཐུས་མི་སྐུ་ཞབས Tim Loughton ལགས་ཀྱིས་དབྱིན་ཡུལ་གྲོས་ཚོགས་ནང་རྒྱ་ནག་གིས་བོད་དང་ཤིན་ཅང་། ཧོང་ཀོང་བཅས་ཀྱི་ཁུལ་དུ་འགྲོ་བ་མིའི་ཐོབ་ཐང་ལ་རྡོག་རོལ་ཤུགས་ཆེར་གཏོང་བཞིན་ཡོད་པ་མངོན་གསལ་གྱིས་རྒྱ་ནག་གི་དཔོན་རིགས་རྣམས་དབྱིན་ཡུལ་ནང་ཡོང་རྒྱུར་བཀག་སྡོམ་གནང་དགོས་བའི་གླེང་སློང་གནང་བ་དང་། དབྱིན་ཡུལ་སྲིད་གཞུང་གིས་བོད་ནང་ཕར་འགྲོ་ཚུར་འོང་གི་ཁྲིམས་འཆར་གཏན་འབེབས་གནང་དགོས་བའི་ཞུ་སྐུལ་གནང་ཡོད་པ་རེད།

རྒྱལ་ཚོགས་སུ་ཞུ་གཏུག་དང་ཞི་བའི་རྔམ་སྟོན་བརྒྱུད་བོད་དོན་ལས་འགུལ་མཇུག་སྒྲིལ།

བོད་མི་མིག་དམར་ལགས་ཀྱིས་གཙོས་པའི་སྦན་ནས་ཡིན་པ་པདྨ་ལགས། ཉེ་ཆར་བོད་དོན་གོམ་བགྲོད་ལས་འགུལ་སྣེ་ཁྲིད་གནང་མཁན་བློ་བཟང་ལགས། དེ་བཞིན་སྦར་སིལ་ནས་ཡིན་པ་བློ་བཟང་ལགས། བསོད་ནམས་ལགས་བཅས་བོད་མི་དང་བླངས་པ་ལྔས་ཟླ་ ༦ ཚེས་ ༤ ཉིན་ཛུག་ནས་རྒྱལ་སྤྱིའི་གཞུང་མང་ལ་རྒྱ་ནག་གི་ཏོག་དབྱིབས་གཉན་རིམས་རྐྱེན་པས་འཛམ་གླིང་ཀུན་ལ་དོ་ཕོག་བཏང་བའི་འགན་ཡོངས་རྫོགས་རྒྱ་གཞུང་ནས་འཁྱེར་དགོས་པ་བཟོ་རྒྱུ་གཙོས་བོད་ནང་གི་འགྲོ་བ་མིའི་ཐོབ་ཐང་གནས་སྟངས་དང། ༸ཀུན་གཟིགས་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གིས་གཙོས་པའི་བོད་ནང་གི་ཆབ་སྲིད་བཙོན་པ་གློད་བཀྲོལ། ༸གོང་ས་མཆོག་བོད་ལ་གདན་འདྲེན་ཞུ་དགོས་པ་བཅས་ཀྱི་དགོས་འདུན་དོན་ཚན་བཞི་ཅན་ཞིག་བརྒྱུད་བསྒྲགས་ཐོག་བོད་དོན་རྐང་འཁོར་སྐྱོད་ཀྱི་ལས་འགུལ་སྤེལ་ཡོད་ཅིང། ཁ་སང་ཕྱི་ཚེས་ ༧ ཉིན་རྐང་འཁོར་སྐོར་སྐྱོད་ཀྱི་ལས་འགུལ་བ་རྣམས་སྐོར་སྐྱོད་གནང་ཡུལ་ས་ཚིགས་མཐའ་མ་སུད་སིའི་གྲོང་ཁྱེར་ཇི་ནི་ཝར་བདེ་འབྱོར་དང་འབྲེལ་ཏེ་ལས་འགུལ་བ་རྣམས་ནས་ས་གནས་སུ་རྟེན་གཞི་བྱས་པའི་མཉམ་འབྲེལ་རྒྱལ་ཚོགས་ཀྱི་མདུན་ངོས་སུ་ཞི་བའི་རྔམ་སྟོན་གནང་བ་དང་ཆབས་ཅིག ཐེངས་འདིའི་བོད་དོན་རྐང་འཁོར་སྐོར་སྐྱོད་ཀྱི་ལས་འགུལ་མཇུག་སྒྲིལ་གནང་ཡོད་པ་རེད།སྐབས་དེར་རྒྱལ་ཚོགས་ཀྱི་མདུན་དུ་ཡོད་པའི་ལོ་རྒྱུས་རང་བཞིན་ལྡན་པའི་ཞབས་སྟེགས་ཞབས་ཆག་མདུན་དུ་བོད་དོན་ལས་འགུལ་བ་རྣམས་ནས་རྐང་འཁོར་བཞོན་བཞིན་བོད་དང་རྒྱ་གར། དེ་བཞིན་སུད་སི་བཅས་ཀྱི་རྒྱལ་དར་འཕྱར་ཞིང། རྒྱ་ནག་གཞུང་ནི་དྲག་སྤྱོད་པའི་གཞུང་ཡིན་པ་དང། ཏོག་དབྱིབས་གཉན་རིམས་ནི་རྒྱ་ནག་གིས་བཟོས་པ་ཞིག་རེད། རྒྱ་ནག་གི་ཚོང་ཟོག་ཉོ་ཚོང་མཚམས་འཇོག་དགོས། དེ་བཞིན་གཉན་རིམས་ཁྱབ་གདལ་གྱི་ནག་ཉེས་ཡོངས་རྫོགས་རྒྱ་གཞུང་ནས་ཁྱེར་དགོས། རྒྱལ་ཚོགས་གཉིད་སད་ཤོག བོད་མིར་དྲང་བདེན་དགོས་པ་སོགས་ཀྱི་ཞི་བའི་རྔན་སྟོན་གནང་སོང་།བོད་དོན་རྐང་འཁོར་སྐོར་སྐྱོད་ཀྱི་ལས་འགུལ་སྣེ་ཁྲིད་གནང་མཁན་མིག་དམར་ཚེ་རིང་ལགས་ཀྱིས་ཉེ་ལམ་སུད་སི་གནས་སྡོད་བོད་མི་དབང་འདུས་ཚེ་རིང་ལགས་ཀྱིས་བོད་ཀྱི་རྒྱལ་དར་འཁྱེར་ནས་ཇི་ཝའི་རྒྱལ་ཚོགས་བར་ཞི་བའི་གོམ་བགྲོད་ཀྱི་ལས་འགུལ་སྤེལ་བ་ནས་བཟུང་བོད་ཀྱི་བདེན་པའི་འཐབ་རྩོད་ཀྱི་ལས་འགུལ་ལ་མར་མེ་ཞིག་སྤར་ཡོད་པ་དང། སུད་སིར་གནས་སྡོད་བོད་མི་ཚོས་ཁོང་གིས་སྤར་བའི་བོད་དོན་ལས་འགུལ་གྱི་མར་མེ་དེ་མུ་མཐུད་རྒྱུན་སྐྱོང་གནང་དགོས་ཞེས་འབོད་སྐུལ་གནང་སོང་།སྤྱིར་ཉིན་གྲངས་བཞིའི་རིང་བོད་དོན་རྐང་འཁོར་སྐོར་སྐྱོད་ཀྱི་ལས་འགུལ་དེའི་ནང་བོད་མི་དང་བླངས་པ་མིག་དམར་ཚེ་རིང་ལགས་གཙོས་སྦན་ནས་ཡིན་པ་སྤེན་པ་ཚེ་རིང་ལགས། ཉེ་ཆར་བོད་དོན་གོམ་བགྲོད་ལས་འགུལ་སྣེ་ཁྲིད་གནང་མཁན་བློ་བཟང་ལགས། དེ་བཞིན་སྦར་སིལ་ནས་བློ་བཟང་ནོར་བུ་ལགས། བསོད་ནམས་རྣམ་རྒྱལ་ལགས་བཅས་ཀྱིས་སུད་སི་ས་གནས་ Zug ནས་དབུ་འཛུགས་ཀྱིས་ལུ་ཛན་དང། ཨརའོ།  སྦན། ཕྷིར་སྦུག ལའོ་ཛན། དེ་ནས་ཁ་སང་ཇི་ནི་ཝ་བཅས་སུད་སིའི་གྲོང་ཁྱེར་ཆེ་ཁག་དྲུག་ནང་བོད་དོན་རྐང་འཁོར་སྐོར་སྐྱོད་གནང་སྟེ་ས་གནས་གཞུང་མང་དག་ལ་བོད་ནང་གི་དངོས་ཡོད་གནས་སྟངས་དང་རྒྱ་གཞུང་གི་གདོང་རིགས་ངོ་མ་གསལ་འདོན་གྱི་ཡིག་ཆ་ཁག་ཅིག་འགྲེམས་སྤེལ་གནང་ཡོད་པ་རེད།ཁ་སང་ཁོང་རྣམས་ཇི་ནི་ཝའི་རྒྱལ་ཚོགས་མདུན་ངོས་སུ་འབྱོར་སྐབས་སུད་སི་སྐུ་ཚབ་དོན་གཅོད་གཙོས་ཇི་ནི་ཝའི་བོད་རིགས་ཚོགས་པའི་ཚོགས་གཙོ་དང་རྒྱུན་ལས་བཅས་ཀྱིས་ཕེབས་བསུའི་སྣེ་ལེན་ཞུས་པ་དང་། ཇི་ནི་ཝའི་ཚོགས་གཙོ་ཁྲོ་རྒྱལ་ལགས་ཀྱིས་ས་གནས་དང་སུད་སི་བོད་མི་རིགས་མི་མང། སུད་སི་ས་གནས་བེུད་ལྷན་ཚོགས་བཅས་ཀྱི་ཚབ་ཞུས་ནས་ཕེབས་བསུའི་མཇལ་དར་སྒྲོན་པ་དང་། སུད་སི་སྐུ་ཚབ་དོན་གཅོད་འཆི་མེད་རིག་འཛིན་ལགས་ཀྱིས་ལས་འགུལ་བ་རྣམས་ཀྱི་སེམས་ཤུགས་དང་འགན་ཁུར་ལ་བསྔགས་བརྗོད་གནང་བ་དང་འབྲེལ། བོད་དོན་ཐོག་ཕྱི་མི་ནས་རྒྱབ་སྐྱོར་གནང་མཁན་ཡོད་ཀྱང་དོན་དངོས་ཐོག་བོད་མི་རང་ཉིད་མདུན་ལ་ཐོན་ནས་འགན་ཁུར་དགོས་གལ་ཡིན་སྐོར་གསུངས་སོང་།བོད་མི་ཚོས་རྒྱུན་དུ་སྤྱི་ཚོགས་ནང་ཐོབ་ཐང་དང་རང་དབང་གཅིག་པོ་མ་རྩོད་པར་བོད་མིར་ལས་འགན་གང་ཡོད་པ་དེ་དག་མཉམ་དུ་འཁུར་དགོས་པ་དང་། ལྷག་པར་དུ་བོད་པའི་གཞོན་སྐྱེས་ཚོས་བོད་ཀྱི་གནད་དོན་ཐོག་འགན་མ་འཁུར་བར་དེ་ལས་རང་ཉིད་ཀྱི་འཚོ་རྟེན་ཁོ་ནར་བསམ་བློ་བཏང་ནས་བཞུགས་ཚེ་སླད་མར་འགྱོད་པའི་གནས་སུ་ལྷུང་ངེས་ཡིན་པ་གསུངས་ཡོད།དེ་བཞིན་ཁ་སང་ལས་འགུལ་དེར་རྒྱབ་སྐྱོར་ཚུལ་དུ་ཕེབས་པ་བོད་དོན་ལ་ཡུན་རིང་ནས་རྒྱབ་སྐྱོར་གནང་མཁན་དགུང་ལོ་ ༧༣ ལ་ཕེབས་པ་སུད་བོད་མཛའ་འབྲེལ་ཚོགས་པའི་ཚོགས་མི་པལ་ལ་སྦོ་ལོངཤ་ལགས་ཀྱིས་ངས་ཕྱི་ལོ་ ༡༩༧༠ ནས་བོད་དོན་ལ་རྒྱབ་སྐྱོར་ཞུ་འགོ་བཙུགས་པ་རེད། སྐབས་དེར་རྒྱ་ནག་གཞུང་གིས་བོད་ནང་གི་བོད་མིར་དྲང་བདེན་མེད་པར་མནར་གཅོད་ཚད་མེད་བཏང་བ་བཅས་མི་སྤྱོད་ལས་འདས་པའི་བྱ་སྤྱོད་ཁག་སེལ་བར་རྒྱབ་སྐྱོར་ཞུས་པ་ཡིན། ཕྱིས་སུ་ང་རང་ཆོས་ལུགས་དེ་བོད་བརྒྱུད་ནང་བསྟན་ལ་བརྗེ་བ་ཡིན། ད་ལྟའི་ཆར་ས་གནས་སུ་བོད་དོན་ལས་འགུལ་གང་འདྲ་ཞིག་སྤེལ་རུང་དེར་མཉམ་ཞུགས་གནང་བཞིན་ཡོད་སྐོར་སོགས་གསུངས་ཡོད། ཁ་སང་བོད་དོན་རྐང་འཁོར་སྐོར་སྐྱོད་ལས་འགུལ་བ་རྣམས་ནས་ལས་འགུལ་མཇུག་སྒྲིལ་དང་ལྷན་རྒྱ་ནག་གི་ཏོག་དབྱིབས་གཉན་རིམས་རྐྱེན་པས་འཛམ་གླིང་ཀུན་ལ་དོ་ཕོག་བཏང་བའི་འགན་ཡོངས་རྫོགས་རྒྱ་གཞུང་ནས་ཁྱེར་དགོས་པ་གཙོས་དགོས་འདུན་དོན་ཚན་བཞི་ཅན་ཞུ་སྙན་ཞིག་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་གི་གཙོ་འཛིན་མཆོག་གི་མཚན་ཐོག་ཏུ་སུད་སི་དོན་ཁང་བརྒྱུད་ཕུལ་ཡོད་པ་རེད། སྤྱིར་སུད་སི་ནང་རྒྱལ་ཡོངས་སུ་ཁྱིམ་སྡོད་བཀའ་རྒྱ་ལྷོད་ཡངས་བཏང་རྗེས་ཐོག་མར་སུད་སི་གནས་སྡོད་བོད་མི་ཚེ་རིང་དབང་འདུས་ལགས་ཀྱིས་བོད་དོན་ལས་འགུལ་དབུ་འཛུགས་གནང་བ་དང་། དེ་རྗེས་ཉེ་ཆར་བོད་མི་བློ་བཟང་ལགས་ཀྱིས་སྣེ་ཁྲིད་འོག་བོད་དོན་གོམ་བགྲོད་ཀྱི་ལས་འགུལ་སྤེལ་ཡོད་པ་མ་ཟད། དེ་བཞིན་སླར་ཡང་བོད་དོན་རྐང་འཁོར་སྐོར་སྐྱོད་ཀྱི་ལས་འགུལ་བཅས་བོད་མི་སྒེར་ནས་སྤེལ་བའི་བོད་དོན་ལས་འགུལ་ཐེངས་གསུམ་པ་དེ་ཆགས་ཀྱི་ཡོད་པ་རེད།

བོད་རང་བཙན་སློབ་ཕྲུག་ཚོགས་པས་ཧོང་ཀོང་གི་ཁྲིམས་གཞི་མེར་བསྲེགས་ཀྱིས་ངོ་རྒོལ།

དེ་རིང་སྔ་དྲོ།  བཞུགས་སྒར་གྱི་མེག་གྷན་ཁྲོམ་གཞུང་གི་བཞི་མདོ་རུ།  རྡ་སར་རྟེན་གཞི་བྱས་པའི་བོད་རང་བཙན་སློབ་ཕྲུག་ཚོགས་པའི་གོ་སྒྲིག་གི་འོག   རྒྱ་ནག་གིས་ཁ་ཉིན་ནས་ཧོང་ཀོང་གི་བདེ་འཇགས་ཁྲིམས་གཞི་ཞེས་པ་ཞིག་གསར་དུ་ལག་བསྟར་བྱེད་བཞིན་པའི་ཁྲིམས་གཞི་དེ་མེར་བསྲེགས་ཀྱིས་རྒྱ་ནག་དམར་ཤོག་གཞུང་ལ་ངོ་རྒོལ་དང་། ཧོང་ཀོང་མི་མང་ལ་གདུང་སེམས་མཉམ་སྐྱེད་གནང་སོང་།སྐབས་དེར། བཞུགས་སྒར་གྱི་བོད་རང་བཙན་སློབ་ཕྲུག་ཚོགས་པའི་ལས་འཆར་འགན་འཛིན་རྒྱལ་མཚན་ལགས་ཀྱིས་རྒྱ་ནག་གིས་གཏན་འབེབས་བྱས་པའི་ཧོང་ཀོང་གི་ཁྲིམས་གཞི་དེའི་འོག་ཏུ།  ཧོང་ཀོང་མི་མང་གི་བདེ་འཇགས་ལ་དཀའ་ངལ་ཤུགས་ཆེར་འཕྲད་ཀྱི་ཡོད་པར་ངོ་སྤྲོད་ཀྱིས། རྒྱ་ནག་གིས་བོད་ས་བཙན་བཟུང་བྱས་ནས་བོད་ཀྱི་སྣོད་བཅུད་གཉིས་ལ་དོ་ཕོག་ཆེན་པོ་བཏང་ཡོད་པ་མ་ཟད། རྒྱ་ནག་འདི་ད་ལྟའི་རྒྱལ་སྤྱིའི་དཀའ་ངལ་ལ་ཡང་ཉེན་ཁ་ཆེན་པོ་ཞིག་ཡོད་པར་བརྟེན། རྒྱ་ནག་དེ་འཛམ་གླིང་སྟེང་གི་ན་ཚ་ཞིག་ཆགས་ཡོད་པ་རེད་ཅེས་བསྒྲགས་གཏམ་སྤེལ་སོང་།བོད་རང་བཙན་སློབ་ཕྲུག་ཚོགས་པའི་གསར་འགོད་བསྒྲགས་གཏམ་གྱི་ནང་དུ། ཐེངས་འདིར་རྒྱ་ནག་གིས་གཏན་འབེབས་བྱས་པའི་ཧོང་ཀོང་གི་བདེ་འཇགས་ཁྲིམས་གཞི་ཞེས་པའི་ནང་ཁ་བྲལ་དང་འཇིགས་སྐུལ་སོགས་ལ་རྒོལ་རྡུང་ཟེར་བ་ནི་རྒྱ་ནག་གིས་ལོ་མང་གི་རིང་ནས་བོད་ཁུལ་གཙོ་བྱས་པའི་ཤིན་ཅང་དང་ནང་སོག་ཁུལ་དུ་ལག་བསྟར་བྱེད་བཞིན་པའི་དྲག་གནོན་སྲིད་བྱུས་ཀྱི་འབྲུ་དོན་དང་གཅིག་མཚུངས་ཡིན་སྟབས། རྒྱ་ནག་གི་ཁྲིམས་གཞི་འདིའི་དམིགས་ཡུལ་ནི་ཧོང་ཀོང་གི་མང་གཙོའི་ལས་འགུལ་བ་དང་འོས་བསྡུ་སོགས་ཀྱི་སྐབས་སུ་དྲག་གནོན་བྱེད་ཤུགས་ཆེ་རུ་གཏོང་རྒྱུ་དེ་ཡིན་པར་འཁོད་དེ། རྒྱ་ནག་གཞུང་གིས་དབྱིན་ཡུལ་དང་མཉམ་དུ་བཞག་པའི་མཉམ་འབྲེལ་གྱི་བསྒྲགས་གཏམ་དེར་བརྩི་བཀུར་དང་རྒྱལ་སྤྱིའི་སྤྱི་མང་གི་ཐོབ་ཐང་ལ་གོང་བཀུར། གཞན་ཡང་རྒྱལ་སྤྱིའི་མཉམ་འབྲེལ་རྒྱལ་ཚོགས་ནང་གི་རྒྱ་ནག་ཐོག་གི་ཚོགས་ཆུང་གིས་ཧོང་ཀོང་ནང་གི་འགྲོ་བ་མིའི་ཐོབ་ཐང་ལ་རྟོག་ཞིབ་བྱེད་རྒྱུ་སོགས་ཀྱི་དགོས་འདུན་ཁག་ཅིག་ཀྱང་བཏོན་འདུག དེ་རིང་གི་ལས་འགུལ་དེ་དང་འབྲེལ་ནས། འདི་གའི་གསར་འགོད་པས་ལས་འགུལ་ཁྲོད་མཉམ་ཞུགས་གནང་མཁན་གྱིི་བོད་རང་བཙན་འཐབ་རྩོད་པ་བསྟན་འཛིན་བརྩོན་འགྲུས་ལགས་སུ་ཧོང་ཀོང་གི་ཁྲིམས་གཞི་དེ་དང་འབྲེལ་བའི་བཀའ་འདྲི་ཞུས་པར་ཁོང་གིས། ཐེངས་འདིར་རྒྱ་ནག་དམར་ཤོག་གཞུང་གིས་བཙན་དབང་གི་ཐོག་ནས་ཧོང་ཀོང་གི་བདེ་འཇགས་ཀྱི་ཁྲིམས་གཞི་ཞེས་པ་དེ་ལག་བསྟར་བྱས་པ་དེ་ནི་རྒྱ་ནག་སྲིད་གཞུང་ཧོང་ཀོང་གི་རང་དབང་དང་མང་གཙོ་ལ་ཞེད་སྣང་གིས། ནམ་ཞིག་རྒྱ་ནག་གི་དབང་ཆ་ཡོད་ཚད་ཤོར་ཉེན་ཡོད་པའི་དོགས་གཞིའི་འོག་ཧོང་ཀོང་གི་བདེ་འཇགས་ཁྲིམས་གཞི་ཞེས་པ་དེ་ལག་བསྟར་བྱས་ཡོད་ནའང་། ཧོང་ཀོང་མི་མང་གིས་མུ་མཐུད་དུ་འཐབ་རྩོད་བྱེད་རྒྱུ་ཡིན་པ་ངེས་བ་རེད་ཅེས་ངོ་སྤྲོད་གནང་སོང་། གཞན་ཡང་ཁོང་གིས། ང་ཚོའི་བཙན་བྱོལ་སྤྱི་ཚོགས་ཀྱི་ནང་དུ་ཧོང་ཀོང་ནང་བཞིན་རྒྱལ་ཁབ་གཅིག་ལ་ལམ་ལུགས་གཉིས་ཀྱི་གནས་བབ་ཅིག་བྱུང་ན་སྙམ་པའི་རྨི་ལམ་ལྟ་བུ་ཞིག་ཡོད་པ་རེད། ཡིན་ནའང་དེ་རིང་གི་ཧོང་ཀོང་གི་གནད་དོན་འདིའི་ཐོག་ནས། ང་ཚོས་དེ་ལྟ་བུའི་རྨི་ལམ་དེ་མངོན་འགྱུར་འབྱུང་དུ་མེད་པ་ཞིག་ཡིན་པ་ར་འཕྲོད་ཡོད་ལུགས་ཀྱིས། རྒྱ་ནག་དམར་ཤོག་སྲིད་གཞུང་ལ་ནམ་ཡང་ཡིད་ཆེས་བྱ་རྒྱུ་མེད་པའི་འབོད་སྐུལ་གནང་སོང་། གཞི་རྩའི་རྒྱ་ནག་གིས་ཧོང་ཀོང་གི་ནང་དུ་བདེ་འཇགས་ཀྱི་ཁྲིམས་འཆར་གསར་བ་དེ་ལག་བསྟར་བྱེད་འགོ་ཚུགས་པ་ནས། ཧོང་ཀོང་གི་ནང་དུ་སྔར་བཞིན་རྒྱ་ནག་ལ་ངོ་རྒོལ་བྱེད་མཁན་མང་པོ་བྱུང་གི་ཡོད་པ་མ་ཟད། རྒྱལ་སྤྱིའི་ཚོགས་སྡེ་ཁག་གིས་ཀྱང་མཉམ་འབྲེལ་གྱི་ཐོག་ནས་རྒྱ་ནག་གིས་ཁྲིམས་གཞི་དེར་བསྐྱར་ཞིབ་བྱེད་རྒྱུའི་འབོད་སྐུལ་ཞུས་པ་བཞིན། དབྱིན་ཡུལ་དང་ཨོ་གླིང་སོགས་ཀྱིས་ཧོང་ཀོང་གི་མི་སེར་རྣམས་ཁུལ་དེའི་རང་རྒྱལ་དུ་ལེན་རྒྱུར་ཐུགས་བསམ་བཞེས་བཞིན་ཡོད་པ་ཡང་ཡོངས་གྲགས་གནང་ཡོད་པ་རེད།

རྒྱ་དཀར་ནག་གཉིས་ཀྱི་རྩོད་རྙོག་ཁྲོད་རྒྱ་ནག་གིས་བོད་རིགས་དམག་མི་ཆེད་གཏོང་མངོན་གསལ།

ཉེ་ཆར་ཟླ་གོང་མའི་ཕྱི་ཚེས་ ༡༥ དགོང་མོ་ལ་དྭགས་གྷལ་ཝན་ཡུལ་ཀླུང་དུ་ཆགས་པའི་རྒྱ་གར་དང་བོད་གཉིས་ཀྱི་ས་མཚམས་ས་ཁུལ་དུ་རྒྱ་དཀར་ནག་གཉིས་ཀྱི་དམག་མིའི་དབར་གདོང་ཐུག་ཤོར་རྐྱེན་དེང་སྐབས་རྒྱ་དཀར་ནག་གཉིས་དབར་རྩོད་རྙོག་ཇེ་ཆེར་ཕྱིན་པའི་ཁྲོད་འདིར་ཕྱོགས་གཉིས་པོའི་དབར་དམག་འཁྲུག་ལངས་སྲིད་པའི་གནས་སྟངས་ཆགས་ཡོད་པ་དང་འབྲེལ། རྒྱ་ནག་གཞུང་ཕྱོགས་ནས་རྒྱ་དཀར་ནག་གཉིས་ཀྱི་རྩོད་རྙོག་འདིའི་ཁྲོད་བོད་རིགས་དམག་མི་ཕོན་ཆེ་བཏང་དང་གཏོང་བཞིན་པ་མངོན་གསལ་གནང་སྟེ་གནད་དོན་དེ་ནི་ཆེས་བློ་འཚབ་གནང་གཞིར་གྱུར་ཡོད་པ་གསུངས་འདུགརྒྱ་གར་ལྷོ་ཕྱོགས་ Auroville ནང་དུ་བཅའ་བཞུགས་བོད་རིག་པའི་མཁས་པ་སྐུ་ཞབས་ Claude Arpi ལགས་ཀྱིས་ཁ་སང་ rediff བརྒྱུད་ལམ་ཐོག་དཔྱད་རྩོམ་ཞིག་འདོན་སྤེལ་གནང་བར་ཟླ་སྔོན་ཚེས་ ༡༥ གོང་མོ་ལ་དྭགས་གྷལ་ཝན་ཡུལ་ཀླུང་དུ་ཆགས་པའི་རྒྱ་གར་དང་བོད་གཉིས་ཀྱི་ས་མཚམས་ས་ཁུལ་དུ་རྒྱ་དཀར་ནག་གཉིས་ཀྱི་དམག་མིའི་དབར་གདོང་ཐུག་ཤོར་རྐྱེན་རྒྱ་གར་གྱི་དམག་དཔོན་ Santosh Babu ལགས་གཙོས་པའི་དམག་མི་ ༢༠ ཚེ་སྲོག་ཤོར་ཡོད་པ་ཡོངས་གྲགས་གནང་བའི་གནས་ཚུལ་སྤེལ་ཡོད་པ་དང་། རྒྱ་ནག་ཕྱོགས་ནས་དམག་མི་ཇི་ཙམ་རྐྱེན་འདས་གྲོངས་སུ་ཕྱིན་ཡོད་པ་ད་བར་ཡོངས་གྲགས་ཞུས་མེད་ཀྱང་རྗེས་སུ་ Twitter དྲྭ་ལམ་ཐོག་གནས་ཚུལ་ཞིག་ཕྱི་གྱར་བྱུང་བའི་ནང་ཚེས་ ༡༥ ཉིན་ Galwan དམག་འཁྲུག་ནང་འདས་གྲོངས་སུ་ཕྱིན་པའི་རྒྱ་ནག་གི་དམག་མི་ ༣༨  ཀྱི་མིང་ཐོ་དང་དམག་མི་དེ་དག་རྒྱ་ནག་གི་ས་ཁུལ་གང་ནས་ཡིན་པ་སོགས་མངོན་གསལ་གནང་བའི་ཁོངས་ནས་མི་ ༨ བོད་ནས་ཡིན་སྐོར་བརྗོད་པ་བཞིན་མི་བརྒྱད་པོ་དེ་དག་གི་མིང་ལ་ལྷག་པ་དང་ཚེ་རིང་། སྐལ་བཟང་སོགས་བོད་པའི་མིང་འཁོད་ཡོད་པ་དང་། ད་ལྟའི་ཆར་གནས་ཚུལ་དེ་ཁུངས་ལྡན་ཡིན་མིན་རྩད་གཅོད་གནང་དཀའ་ནའང་རྒྱ་ནག་གཞུང་གིས་བོད་དམག་ཆེད་གཏོང་གི་དམག་འཐབ་པར་ཐེ་ཚོམ་གང་ཡང་མེད་པར་རྟོགས་ཐུབ་རྒྱུ་ཡོད་པ་གསུངས་འདུག དེ་བཞིན་ཉེ་ཆར་རྒྱ་ནག་གཞུང་འབྲེལ་བརྒྱུད་ལམ་ཐོག་འདྲ་པར་ཕོན་ཆེ་དང་འབྲེལ་ནས་གནས་ཚུལ་སྤེལ་བར་བོད་ཀྱི་ས་ཁུལ་ཁག་ཏུ་རྒྱ་ནག་གི་གོ་ཚོན་དང་བཅས་དམག་སྦྱོང་ཤུགས་ཆེན་པོ་སྤེལ་བཞིན་པ་མ་ཟད། ས་གནས་བོད་རིག་མང་ཚོགས་ལས་གྲུབ་པའི་ཞོགས་འདེགས་དཔུང་དམག་རུ་ཁག་གསར་པ་ལྔ་ཙམ་ཆེད་འཛུགས་བྱས་ཡོད་པ་དང་། དེང་དུས་འཕྲུལ་ཆས་ལྡན་པའི་རུ་ཁག་གཅིག་དང་རི་འཛེགས་རུ་ཁག་གཅིག དེ་བཞིན་མྱུར་སྐྱོབ་དང་འབྲེལ་མཐུད་རུ་ཁག་བཅས་ཡོད་པ་དེ་ཉེན་ཆར་བོད་ཁུལ་གྱི་རྒྱ་ནག་བཅིངས་བཀྲོལ་དམག་གི་དམག་དཔོན་གཞོན་པ་དང་དམར་ཤོགས་ཚོགས་པའི་ངོ་ཚབ་པ་ Zhang Xiejie ཟེར་བས་སྣེ་ཁྲིད་འོག་ཞོགས་འདེགས་དཔུང་དམག་རུ་ཁག་གསར་པ་ལྔ་པོ་དེ་དག་གི་རུ་སྒྲིག་མཛད་སྒོ་ཚོགས་པ་དང་སྐབས་དེར་རྒྱ་ནག་གི་དཔོན་རིགས་མཐོ་གྲས་ཚོས་བོད་ནང་བརྟན་ལྷིང་དང་ས་མཚམས་སྲུང་སྐྱོབ་ཀྱི་ལས་དོན་སྤེལ་ཁུལ་ལ་བློ་འགུལ་ཐབས་བྱེད་བཞིན་ཡོད་པ་དང་། བོད་རིགས་དེ་དག་ལ་གླ་ཕོགས་ཡག་པོ་སྤྲད་ནས་དམག་འཐབ་ལ་ཞུགས་བཅུག་པ་གསལ་རྟོགས་བྱུང་སྐོར་མངོན་གསལ་གནང་འདུགསྐུ་ཞབས་ Claude Arpi ལགས་ཀྱིས་རྒྱ་ནག་གི་རྩ་ཁྲིམས་དོན་ཚན་ ༢༢ དང་ ༣༦ ནང་གསལ་ཞོགས་འདེགས་དཔུང་དམག་དེ་དག་གི་ལས་འགན་གཙོ་བོ་ནི་དམག་གི་གྲ་སྒྲིག་དང་རྒྱལ་སྲུང་། དེ་བཞིན་སྤྱི་ཚོགས་བདེ་འཇགས་སོགས་ཀྱི་ལས་དོན་གཉེར་དགོས་སྐོར་འཁོད་ཡོད་པ་མ་ཟད་ཕྱི་ལོ་ ༢༠༡༦ ལོ་ནས་ཟུང་ཞོགས་འདེགས་དཔུང་དམག་དེ་རྒྱ་ནག་དམར་ཤོག་གཞུང་གི་བཅིངས་བཀྲོལ་དམག་གི་ཐད་དཀར་བཏང་འཛིན་འོག་ཡོད་སྟབས་རྒྱ་ནག་ལ་ཞོགས་འདེགས་དཔུང་དམག་ས་ཡ་ ༨ ཙམ་ཡོད་པ་དང་འབྲེལ་ནས་འཛམ་གླིང་ཁྱོན་ཡོངས་སུ་གཞུང་འབྲེལ་དམག་དཔུང་ཡོད་པའི་ཐོག་ལ་ཞོགས་འདེགས་དཔུང་དམག་མང་ཤོས་ཡོད་མཁན་གྲས་ཤིག་ཡིན་པ་སོགས་མངོན་གསལ་གནང་འདུག ལྷག་པར་དུ་སྔ་ལོའི་ཕྱི་ཟླ་ ༧ དང་ ༩  ནང་ལྷ་ས་དང་པེ་ཅིང་དབར་བརྙན་འཕྲིན་བརྒྱུད་ཚོགས་འདུ་ཚོགས་པའི་ནང་བོད་ཁུལ་གྱི་བཅིངས་བཀྲོལ་དམག་དཔུང་དང་བོད་ཁུལ་གྱི་ཞོགས་འདེགས་དཔུང་དམག་ནང་དུ་དམག་མི་གསར་འཇུག་བྱེད་རྒྱུའི་ཐོག་གྲོས་བསྡུར་བྱས་ཡོད་པ་དང་འབྲེལ། རྗེས་སུ་བོད་ལྗོངས་ཉིན་རེའི་གསར་ཤོག་གིས་གནས་ཚུལ་སྤེལ་བར་རྒྱ་ནག་ཁྱོན་ཡོངས་ཀྱི་ཞོགས་འདེགས་དཔུང་དམག་ནང་འཛུལ་ཞུགས་ཀྱི་འགྲན་བསྡུར་ནང་བོད་ཁུལ་གྱི་ཞོགས་འདེགས་དཔུང་དམག་གི་ཟིན་ཐོ་གསར་པ་བཞག་ཡོད་པ་དང་། འགྲན་བསྡུར་ནང་འཛུལ་ཞུགས་ཆེད་དམར་ཤོག་ཚོགས་པའི་ལྟ་གྲུབ་གསལ་པོ་ཤེས་དགོས་པ་དང་། དམག་འཁྲུག་སྐབས་སེམས་ཞི་བར་གནས་ཐུབ་པ་སོགས་ཀྱི་ཐད་ལ་རྟོག་ཞིབ་ནན་པོ་བྱས་པ་ལྟར། བོད་ཁུལ་གྱི་ཞོགས་འདེགས་དཔུང་དམག་ནང་དུ་འཛུལ་ཞུགས་བྱེད་མཁན་རྣམས་ནས་འཇོན་ཐང་དང་སྤྱོད་ཚུལ་ཡག་པོ་ཡོད་དགོས་པའི་ཁར་ཆབ་སྲིད་ཀྱི་སློབ་གསོ་སྤྲོད་རྒྱུ་གལ་ཆེན་པོ་ཡིན་པ་སོགས་འཁོད་ཡོད་སྐོར་གསུངས་འདུགསྤྱིར་བོད་ཁུལ་གྱི་དམག་དཔུང་ནང་དམག་སྤྱི་དང་དམག་སྤྱི་གཞོན་པ། དེ་བཞིན་མདའ་དཔོན་སོགས་ཀྱི་གོ་གནས་ཡོད་མཁན་བོད་རིགས་མང་དག་ཅིག་ཡོད་པ་སོགས་གནད་དོན་ཁག་ལུང་འདྲེན་དང་འབྲེལ། མ་འོངས་པར་རྒྱ་དཀར་ནག་གཉིས་དབར་དམག་འཁྲུག་འབྱུང་ཚེ་བོད་རིགས་དམག་མི་ཕོན་ཆེ་ཞིག་དེར་མཉམ་ཞུགས་གནང་ངེས་ཡིན་པ་མ་ཟད། གནས་ཚུལ་ཐོན་ཁག་ལ་གཞིགས་ན་བོད་མི་ཁག་ཅིག་ནས་མཉམ་ཞུགས་བྱེད་བཞིན་པ་མངོན་རྒྱུ་ཡོད་སྟབས། རྒྱ་གར་གྱི་ངོས་ནས་བོད་པའི་དམག་མི་དང་ལྷན་དུ་འཁྲུག་འཛིང་གནང་བློ་རྩ་བ་ནས་མེད་པར་བརྟེན་དེ་ནི་བོད་དང་རྒྱ་གར་དབར་གྱི་འབྲེལ་ལམ་ཐད་ལ་གནོད་གཞི་ཆགས་ཡོད་སྐོར་གསུངས་པ་དང་ཆབས་ཅིག་ཏུ་བོད་མིའི་སྒྲིག་འཛུགས་ཀྱི་ངོས་ནས་དེའི་ཐོག་བཞེངས་ཕྱོགས་གང་ཡོད་དམ་ཞེས་བཀའ་འདྲི་གནང་འདུག

Latest news