བོད།

ཁ་སང་ཡུ་རུབ་མཐུན་ཚོགས་ཀྱི་གྲོས་ཚོགས་འཐུས་མི་དང་ཕ་རན་སི། འཇར་མ་ནི། ལཊ་ཝི་ཡ། བྷལ་ཇམ། སུད་སི། ཨི་ཊ་ལི། པོར་ཆཱུ་གྷལ། དེ་བཞིན་སུད་ཌན། དབྱིན་ཡུལ་སོགས་ཡུ་རོབ་རྒྱལ་ཁབ་༡༩ ཡི་གྲོས་ཚོགས་འཐུས་མི་མཁྱོན་ ༥༧ གྱི་མཚན་རྟགས་བཀོད་པའི་དགོས་འདུན་ཡིག་ཆ་ཞིག་ཡུ་རོབ་བརྒྱུད་ལམ་ཁག་གི་ཐོག་ཡོངས་གྲགས་གནང་བའི་ནང་ཡུ་རོབ་རྒྱལ་ཁབ་རྣམས་ནས་རྒྱ་ནག་གི་དཔོན་རིགས་དང་སྐུ་ཚབ་རུ་ཁག དེ་བཞིན་མང་ཚོགས་སྒེར་བཅས་ལ་ཡུ་རོབ་ནང་བསྐྱོད་རྒྱུའི་ཐོངས་མཆན་སྤྲད་པ་མ་ཟད། ཡུ་རོབ་ནང་ཁོང་རྣམས་ཀྱི་འགྲུལ་སྐྱོད་ལ་དམ་དྲག་རིགས་གང་ཡང་བྱེད་ཀྱི་མེད་པ་ལྟར། རྒྱ་ནག་གཞུང་གི་ངོས་ནས་ཀྱང་ཡུ་རོབ་ཀྱི་གཞུང་འབྲེལ་མི་སྣ་དང་གསར་འགོད་པ། དེ་བཞིན་ཡུ་རོབ་ཁུལ་དུ་གནས་བཞུགས་བོད་མི་རྣམས་ལ་བཀག་སྡོམ་དང་དམ་དྲག་མེད་པར་བོད་ནང་རང་དབང་ཐོག་བསྐྱོད་འཇུག་དགོས་པ་གསུངས་འདུགཁ་སང་ཡུ་རོབ་རྒྱལ་ཁབ་འདྲ་མིན་གྱི་བརྒྱུད་ལམ་ཁག་གི་དྲ་གནས་ཐོག་གྲོས་ཚོགས་འཐུས་མི་རྣམས་ཀྱི་མཚན་རྟགས་བཀོད་པའི་དགོས་འདུན་ཡིག་ཆ་དེ་འདོན་སྤེལ་གནང་འདུག་པ་དང་རྒྱ་ནག་གཞུང་གིས་འཁྱོག་བཤད་དྲིལ་བསྒྲགས་དང་གནས་ཚུལ་དམ་དྲག་རྐྱེན་པས་ད་ལྟའི་ཆར་འཛམ་གླིང་ཁྱོན་ཡོངས་ལ་ཏོག་དབྱིབས་རིམས་ནད་ཀྱི་དཀའ་ངལ་ཧ་ཅང་ཆེན་པོ་འཕྲད་མུས་ཡིན་པ་བཞིན་རྒྱ་ནག་གཞུང་གིས་བོད་དེ་ཕྱི་ལ་སྒོ་མོ་རྒྱག་ནས་ཁེར་རྐྱང་བཞག་པ་དེས་མ་འོངས་པར་གོ་ལ་སྤྱི་ལ་གནོད་པའི་ཛ་དྲག་གནས་སྟངས་ཤིག་ཆགས་ཉེན་ཡོད་སྟབས། རྒྱལ་སྤྱིའི་སྤྱི་ཚོགས་ཀྱི་ངོས་ནས་རྒྱ་གཞུང་གི་བྱ་སྤྱོད་དེར་ངོས་ལེན་བྱེད་ཐབས་མེད་པ་གསུངས་འདུག དེ་བཞིན་ཡུ་རོབ་རྒྱལ་ཁབ་ཕལ་མོ་ཆེས་རྒྱ་ནག་གི་མི་སེར་རྣམས་ལ་ཡུ་རོབ་ནང་དུ་རང་དབང་ཐོག་བསྐྱོད་འཇུག་བཞིན་ཡོད་ཀྱང་། ཡུ་རོབ་ཀྱི་མེ་སེར་བོད་ནང་བསྐྱོད་པར་དམ་དྲག་ཆེན་པོ་བྱེད་ཀྱི་ཡོད་པ་ཐེར་འདོན་དང་འབྲེལ།  རྒྱ་ནག་གིས་བོད་ཀྱི་གནད་དོན་ལ་ཐུག་སྐབས་ཡུ་རོབ་དང་ལྷན་ཕན་ཚུན་རང་དབང་འདྲ་མཉམ་གྱི་གནས་བབ་ཐོག་འབྲེལ་བ་རྩ་བ་ནས་བྱེད་ཀྱི་མེད་པ་མ་ཟད་རྒྱ་གཞུང་གི་གཞུང་འབྲེལ་མི་སྣ་ཡུ་རོབ་ཁུལ་དུ་སླེབས་སྐབས་’ཁྱོག་བཤད་དྲིལ་བསྒྲགས་མང་དག་ཅིག་མཉམ་དུ་ཁྱེར་ནས་ཡོང་གི་ཡོད་པ་དང་། ཡུ་རོབ་ནང་དུ་ཡོད་པའི་རྒྱ་ནག་གཞུང་གི་སྟངས་འཛིན་བྱས་ནས་བརྒྱུད་ལམ་ཁག་གི་ངོས་ནས་ཁོ་ཚོར་མཐུན་འགྱུར་ཡང་སྦྱོར་འཇུག་གི་ཡོད་པ་རེད། འོན་ཀྱང་ཡུ་རོབ་ཀྱི་གསར་འགོད་པ་སོགས་བོད་ནང་བསྐྱོད་དགོས་ན་དམིགས་བསལ་ཆོག་མཆན་ཞུ་དགོས་པ་དང་དེའང་ཧ་ཅང་རག་དཀའ་བ་ཡོད་པ་སོགས་ལུང་འདྲེན་གནང་འདུག དེ་བཞིན་བོད་ནང་ནང་མི་ཉེ་འབྲེལ་ཡོད་པའི་བཙན་བྱོལ་བོད་མི་རྣམས་རང་གི་ཕ་མ་རྒན་གྲས་དང་སྤུན་མཆེད་ཐུག་པར་འགྲོ་བར་ཐོངས་མཆན་ཞུ་བར་བསྐྱོད་སྐབས་རྒྱ་ནག་གཞུང་ཚབ་མི་སྣས་ཆེས་དབྱེ་འབྱེད་དང་མཐོང་ཆུང་སོགས་བྱེད་ཀྱི་ཡོད་པ་མངོན་གསལ་དང་སྦྲགས། མང་ཆེ་བར་ཐོངས་མཆན་རྩ་བ་ནས་སྤྲད་ཀྱི་མེད་པ་ལུང་འདྲེན་དང་རྒྱ་གཞུང་གིས་བོད་དེ་ཕྱི་ལ་སྒོ་མོ་རྒྱག་པ་དེ་རྩ་བ་ནས་འགྲིག་ཀྱི་མེད་པ་མ་ཟད་ལྷག་པར་དུ་བོད་མི་རྣམས་ལ་དམིགས་བསལ་གྱི་དཀའ་ངལ་འཕྲད་བཞིན་ཡོད་སྐོར་དང་འབྲེལ། གོ་ལ་སྤྱི་ལ་གནོད་པའི་གནད་དོན་ཞིག་མ་ཆགས་པའི་སྔོན་ལ་གསང་རྒྱ་དང་དབང་ཆ་གཅིག་བསྡུས་རིང་ལུགས་ཀྱི་རྒྱ་ནག་དམར་ཤོག་གཞུང་ལ་གདོང་ལེན་བྱེད་དགོས་པ་གསུངས་འདུག དེ་བཞིན་༸གོང་ས་༸སྐྱབས་མགོན་ཆེན་པོ་མཆོག་གིས་ད་བར་འཚེ་མེད་ཞི་བའི་འཐབ་རྩོད་ཀྱི་ལམ་སྟོན་འོག་ནས་བོད་མི་རྣམས་ཀྱི་ཞི་བའི་ཐོག་རང་གི་རྩ་དོན་རྩོད་བཞིན་ཡོད་སྟབས། ད་ཆ་༸གོང་ས་མཆོག་དགུང་ལོ་ ༨༥ ཕེབས་པ་དང་བསྟུན་རྒྱ་ནག་གི་༸སྐུའི་ཡང་སྲིད་ལ་ཐད་བྱུས་བྱེད་བཞིན་པ་ལྟར་མ་འོངས་པར་བོད་ནང་ཟིང་ཆ་ཆེན་པོ་ལངས་ཉེན་ཡོད་པ་དང་། དེས་བོད་ཙམ་མ་ཟད་དེ་ལས་རྒྱ་ཆེ་བའི་ས་ཁོངས་ཀྱི་བརྟན་ལྷིང་ལ་གནོད་འཚེ་བཟོ་ཉན་ཡོད་པ་ལྟར་བོད་ཀྱི་གནད་དོན་འདིས་ཏོག་དབྱིབས་རིམས་ནད་ལྟ་བུའི་གནོད་འཚེ་བཟོ་མི་སྲིད་ཀྱང་། དེས་འགྲོ་བ་མིའི་གཞི་རྩའི་ཐོབ་ཐང་གི་རིན་ཐང་ལ་ཉེན་ཆ་ཆགས་པ་སོགས་གསུངས་ཏེ་ང་ཚོའི་ངོས་ནས་དབང་ཆ་གཅིག་བསྡུས་དང་གསང་རྒྱ་ལྡན་པའི་རྒྱ་ནག་དམར་པོའི་གཞུང་གིས་གོ་ལ་སྤྱི་ལ་ཁྱབ་པའི་གནོད་འཚེ་མ་བཟོ་བའི་སྔོན་ལ་བཀག་འདོད་ཡོད་ཚེ་དེ་སྔོན་ཡུ་རོབ་མཐུན་ཚོགས་ཀྱི་དམིགས་བསལ་སྐུ་ཚབ་ལྕམ་ Federica Mogherini ལགས་ཀྱིས་རྒྱ་ནག་ལ་བོད་ནང་འདྲ་མཉམ་འགྲུལ་སྐྱོད་ཀྱི་ཐོབ་ཐང་དགོས་པའི་དགོན་འདུན་ཆེད་བཏོན་གནང་བ་ལྟར་ཡུ་རོབ་རྒྱལ་ཁབ་ཡོངས་ནས་དེ་ལྟར་གནང་དགོས་པ་གསུངས་འདུག ལྷག་པར་དུ་ཉེ་སྔོན་ཨ་རིའི་གཞུང་གིས་བོད་ནང་འདྲ་མཉམ་འགྲུལ་སྐྱོད་ཀྱི་ཐོབ་ཐང་དགོས་པའི་ཁྲིམས་གཞི་གཏན་འབེབས་གནང་བ་དང་དེས་འབྲུ་དོན་རྣམས་ལུང་འདྲེན་དང་འབྲེལ། དེ་ནི་རྒྱ་ནག་གཞུང་གི་མཁྲེགས་འཛིན་གྱི་སྲིད་བྱུས་ལ་རྒྱུན་ཤེས་ཀྱི་ལན་འདེབས་ཤིག་ཆགས་ཡོད་སྟབས་ཡུ་རོབ་རྒྱལ་ཁབ་རྣམས་ནས་ཀྱང་དེ་བཞིན་གནང་དགོས་པ་དང་། བོད་དེ་སྒོ་མོ་རྒྱག་ནས་ཁེར་རྐྱང་བཞག་པ་དེར་ངོས་ལེན་མེད་པའི་བརྡ་ལན་ནན་པོ་ཞིག་སྤྲད་དགོས་པ་མ་ཟད། བོད་ནང་བསྐྱོད་རྒྱུའི་རང་དབང་དགོས་པའི་དགོས་འདུན་ཆེད་བཏོན་དང་འབྲེལ། ཡུ་རོབ་དང་རྒྱ་ནག་དབར་འབྲེལ་ལམ་བསྐྱར་གཟོ་བྱེད་དགོས་པ་གསུངས་འདུགཁ་སང་རྒྱལ་སྤྱིའི་བོད་དོན་ལས་འགུལ་ཁང་གིས་ Access Denied ཞེས་པའི་སྙན་ཐོ་ཞིག་འདོན་སྤེལ་གནང་བ་དང་དེའི་ནང་རྒྱ་གཞུང་གིས་རྒྱལ་སྤྱིའི་རྒྱལ་ཁབ་ཁག་དང་ལྷན་དུ་འབྲེལ་ལམ་བྱེད་མུས་ཁྲོད་བོད་ནང་འགྲུལ་སྐྱོད་ལ་དམ་དྲག་བྱེད་བཞིན་པ་འཐེར་འདོན་དང་འབྲེལ། ཨ་རིའི་གཞུང་གིས་བོད་ནང་འདྲ་མཉམ་འགྲུལ་སྐྱོད་ཀྱི་ཁྲིམས་གཞི་གཏན་འབེབས་གནང་བ་བཞིན་ཡུ་རོབ་གཞུང་མང་ཁྲོད་ལ་ཡང་དེ་ལྟར་ཡོང་བར་དགོས་འདུན་ཤུགས་ཆེ་གནང་བཞིན་ཡོད་པ་མངོན་གསལ་གནང་འདུག དེ་ཡང་རྒྱལ་སྤྱི་བོད་དོན་ལས་འགུལ་ཁང་གིས་དེ་སྔ་ཕྱི་ལོ་ ༡༩༨༨ ཕྱི་ ༦ ཚེས་ ༡༥ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ Strasbourg ནང་ཡུ་རོབ་གྲོས་ཚོགས་ཀྱི་འདུན་དུ་ མ་འོངས་བོད་ཀྱི་གནས་བབ་སྐོར་བཀའ་སློབ་བསྩལ་བ་དྲན་གསོ་དང་འབྲེལ། རྒྱ་གཞུང་གིས་བོད་ནང་ཚད་ལས་འགལ་བའི་དྲག་གནོན་གྱི་སྲིད་བྱུས་ལག་བསྟར་བྱེད་བཞིན་པ་དེ་སྦས་ཐབས་དང་ བོད་ནང་ཕྱིའི་གཞུང་དང་མི་སྒེར་སོགས་བསྐྱོད་རྒྱུར་དམ་དྲག་ཆེན་པོ་བྱེད་བཞིན་ཡོད་པ་ལྟར་ཁྲིམས་གཞི་དེ་བརྒྱུད་ནས་བོད་དེ་སྒོ་མོ་ཕྱེ་ཚེ་ས་གནས་ས་ཐོག་གི་གནས་སྟངས་གང་ཡིན་ཕྱི་གསལ་ནང་གསལ་ཆགས་རྒྱུ་དང་རྒྱ་གཞུང་ནས་རྒྱལ་སྤྱིར་ལན་འདེབས་ཤིག་བྱེད་ཀྱི་ཡོད་པ་ཆགས་རྒྱུ་ཡིན་སྟབས་འགྲོ་བ་མིའི་ཐོབ་ཐང་བརྩི་མེད་རྡོག་རོལ་གྱི་གནད་དོན་ཡང་བཀག་སྡོམ་བྱེད་ཐུབ་རྒྱུ་ཡིན་པར་མངོན་གསལ་གནང་འདུག ལྷག་པར་དུ་འདས་པའི་ལོ་ ༡༠ ནང་ནུབ་ཕྱོགས་ཀྱི་སྐུ་ཚབ་རུ་ཁག་ཁག་ཅིག་རྒྱ་གཞུང་གི་སྟངས་འཛིན་ནན་པོའི་འོག་བོད་ནང་ཕེབས་རྒྱུ་བྱུང་ཡང་དེ་ལས་ལྡབ་གསུམ་གྱིས་མང་བ་བོད་རང་སྐྱོང་ལྗོང་ཟེར་བའི་སྐུ་ཚབ་ཕྱིའི་རྒྱལ་ཁབ་ལ་བསྐྱོད་དེ་རྒྱ་གཞུང་གི་འཁྱོག་བཤད་དྲིལ་བསྒྲགས་དང་༸གོང་ས་མཆོག་ལ་མཚན་སྨད་ཞུས་པ་ལུང་འདྲེན་དང་འབྲེལ། དེ་སྔོན་ཡུ་རོབ་མཐུན་ཚོགས་ཀྱི་སྐུ་ཚབ་ Federica Mogherini མཆོག་དང་དེ་རྗེས་ཡུ་རོབ་མཐུན་ཚོགས་ཀྱི་ཕྱི་སྲིད་བློན་ཆེན་སྐུ་ཞབས་ Josep Borrell ལགས་གཉིས་ཀྱིས་རྒྱ་ནག་ལ་བོད་ནང་འདྲ་མཉམ་འགྲུལ་སྐྱོད་ཀྱི་ཐོབ་ཐང་དགོས་པའི་དགོས་འདུན་ཆེད་བཏོན་དང་འབྲེལ། དེང་སྐབས་ཡུ་རོབ་ནང་དུ་བོད་ནང་འདྲ་མཉམ་འགྲུལ་སྐྱོད་ཀྱི་ཁྲིམས་འཆར་དགོས་པ་གསུང་མཁན་ཇེ་མང་དུ་འགྲོ་བཞིན་ཡོད་པ་འཐེར་འདོན་གནང་འདུག རྒྱལ་སྤྱིའི་བོད་དོན་ལས་འགུལ་ཁང་གི་ཡུ་རོབ་སྡེ་ཚན་འགན་འཛིན་ཚེ་རིང་བྱམས་པ་ལགས་ཀྱིས་ སྙན་ཐོའི་ནང་གི་འབྲུ་དོན་ལུང་འདྲེན་དང་སྦྲགས། འདྲ་མཉམ་གྱི་གནས་བབ་དེ་ཚོང་འབྲེལ་གཅིག་པོའི་ནང་མིན་པར་རང་དབང་དང་ཐོབ་ཐང་གི་ཐོག་ལ་དེ་ལྟར་དགོས་གནད་ཡིན་སྟབས་ཡུ་རོབ་རྒྱལ་ཁབ་རྣམས་ནས་རྒྱ་གཞུང་དང་ལྷན་དུ་འདྲ་མཉམ་མེད་པའི་འབྲེལ་ལམ་དེ་ཡོ་བསྲང་བྱ་ཕྱིར་ལོ་ངོ་དྲུག་ཅུ་ཙམ་གྱི་རིང་ལ་སྒོ་མོ་རྒྱག་པའི་བོད་ཙམ་མ་ཟད་རང་རྒྱལ་ཁབ་ཀྱི་སྤྱི་ཚོགས་ཀྱི་རང་དབང་ཆེད་དུ་ཕན་ཚུན་འབྲེལ་ལམ་ཐོག་འདྲ་མཉམ་གྱི་རང་དབང་དགོས་པ་གསུངས་འདུག

དེ་རིང་ཉིན་རྒྱབ་ཏུ། བཞུགས་སྒར་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་སྤྱི་ལོ་ ༢༠༡༩ ལོའི་བོད་ནང་གི་འགྲོ་བ་མིའི་ཐོབ་ཐང་གི་ལོ་འཁོར་སྙན་ཐོ་ཤོག་གྲངས་བརྒྱ་ལྷག་ཡོད་པ་ཞིག་འདོན་སྤེལ་བྱས་ཏེ། རྒྱ་ནག་གིས་ཕྱོགས་ཡོངས་ནས་བོད་པའི་ཆོས་རིག་དང་སྐད་ཡིག་སོགས་སྤྱི་ཡོངས་ནས་རྒྱ་བསྒྱུར་བྱེད་བཞིན་ཡོད་པ་གསལ་འདོན་གནང་འདུག ཐེངས་འདིའི་ལོ་འཁོར་སྙན་ཐོའི་བསྒྲགས་ཡིག་གི་ནང་དུ། རྒྱ་ནག་དམར་ཤོག་སྲིད་གཞུང་གིས་དེ་སྔ་མོས་མཐུན་མིང་རྟགས་དང་ལག་བསྟར་ཆོག་མཆན་བཀོད་ཟིན་པའི་རྒྱལ་སྤྱིའི་གྲོས་ཆོད་ཁག་བརྩིས་མེད་གདལ་བཤིག་བཏང་ནས། བོད་ནང་དུ་དྲག་གནོན་དབང་སྒྱུར་གྱི་བསམ་སྦྱོར་དང་དེ་འབྲེལ་རྒྱལ་སྤྱི་རིམ་པའི་འགན་འཁྲི་ཁག་སྣང་མེད་དུ་དོར་ཏེ།  བོད་ཀྱི་ཆབ་དཔལ་རིག་གསུམ་ངོ་བོ་དང་བཅས་པ་རྩ་གཏོར་གཏོང་ཐབས་སུ་དུས་རྒྱུན་དུ་སྲིད་ཁྲིམས་བེད་སྤྱད་ནས་རྒྱ་གཞུང་རང་གི་ཆབ་སྲིད་ཀྱི་ལྟ་སྤྱོད་དང་འགལ་བ་ཚང་མར་ཡ་ང་བའི་དྲག་གནོན་བྱས་དང་བྱེད་བཞིན་པའི་གནས་སྟངས་འཁོད་འདུག སྙན་ཐོ་དེ་སྤྱི་ཡོངས་ཀྱི་ཆ་ནས་ཆབ་སྲིད་སློབ་གསོ་དང་སྐད་ཡིག་གི་རང་དབང་། ཆོས་ལུགས་དད་མོས་ཀྱི་རང་དབང་དང་ཁོར་ཡུག་གནད་དོན། གཞན་ཡང་སྨྲ་བརྗོད་དང་འགྲོ་འདུག་རང་དབང་བཅས་དོན་ཚན་ཆེན་པོ་ལྔ་ཡི་ནང་དུ་བསྡུས་ཡོད་པ་རེད།  འདི་ག་རླུང་འཕྲིན་ཁང་ནས་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་ཕེལ་རྒྱས་ལྟེ་གནས་ཁང་གི་བོད་གནས་ཉམས་ཞིབ་པ་པདྨ་རྒྱལ་ལགས་སུ་བཅར་དྲི་ཞུ་སྐབས། ཁོང་གིས་རྒྱ་ནག་གིས་རྒྱལ་སྤྱིའི་ཁྲིམས་ལུགས་དང་རྒྱ་ནག་རང་གི་རྩ་ཁྲིམས་སུ་འཁོད་པའི་གཞི་རྩའི་འགྲོ་བ་མིའི་ཐོབ་ཐང་ཁག་རྡོག་རོལ་ཚབ་ཆེན་གཏོང་གི་ཡོད་པ་ར་སྤྲོད་བྱས་ཏེ། རྒྱ་ནག་གི་ཁྲིམས་ཡིག་དང་ལག་ལེན་གཉིས་ལྡོག་ཕྱོགས་སུ་གྱུར་ཡོད་ལུགས་ངོ་སྤྲོད་གནང་སོང་། དེ་བཞིན་པདྨ་རྒྱལ་གྱིས།  སྔར་ལོ་རྒྱ་ནག་གིས་རྒྱལ་ཡོངས་རིམ་པའི་ལས་འགུལ།  ནག་སེལ་གཤེད་བཅོམ་གྱི་ཆེད་དོན་འཐབ་རྩོད་ཟེར་བའི་རྡུང་རྡེག་ཚ་ནན་གཏོང་ཐབས་བེད་སྤྱད་ནས། བོད་དོན་ཞི་རྒོལ་བ་དང་འགྲོ་བ་མིའི་ཐོབ་ཐང་དོན་གཉེར་གནང་མཁན་ཚོར་ཁྱབ་ཆེ་ཞིང་འཆར་གཞི་དང་དམིགས་ཡུལ་ལྡན་པའི་ཐོག་ནས་དབང་ཡོད་གཉའ་གནོན་དང་སྡུག་སྦྱོང་མནར་གཅོད་བཏང་སྟེ་དྲག་རྡུང་འཐབ་རྩོད་ལས་འགུལ་ཤུགས་ཆེར་བཏང་བའི་ཁྲོད་དུ་བོད་ནང་གི་འགྲོ་བ་མིའི་ཐོབ་ཐང་སྲུང་སྐྱོབ་བྱ་འགུལ་རིགས་ཚང་མ་ཁྲིམས་འགལ་ཉེས་གསོག་གི་ངོ་བོར་བཙན་སྒྱུར་བྱས་པར་ངོ་སྤྲོད་ཀྱིས།  མཚོ་སྔོན་དང་བོད་རང་སྐྱོང་ལྗོངས་ཟེར་བ་སོགས་སུ་བོད་མི་༦༠༠ ཙམ་འཛིན་བཟུང་བཀག་ཉར་བྱས་ཡོད་པ་ཡང་ངོ་སྤྲོད་གནང་སོང་། དེ་བཞིན་ཁོང་གིས་སྤྱི་ཡོངས་ནས་སྔར་ལོའི་ལོ་འཁོར་སྙན་ཐོར་སྡོམ་རྒྱབ་པ་ཡིན་ན། གཅིག་ནས་རྒྱ་ནག་གིས་བོད་ཁུལ་དུ་བཟོ་ལས་འཛུགས་སྐྲུན་གྱི་ལས་གཞི་རྒྱ་ཆེར་སྤེལ་ནས་བོད་མི་མང་ཚོགས་ཀྱི་རྩ་བའི་འཚོ་ཐབས་ལ་གཏོར་བཅོམ་ཐེབས་པ་དང་། ཕྱོགས་གཞན་ཞིག་ནས་བོད་ཁུལ་དུ་ཆབ་སྲིད་ཀྱི་སློབ་གསོ་རྒྱ་ཆེར་སྤེལ་ནས་བོད་མིའི་ཆོས་རིག་སྐད་ཡིག་དང་བཅས་བ་རྒྱ་བསྒྱུར་གྱི་ལས་འགུལ་སྤེལ་ཏེ་བོད་མིའི་བསམ་བློ་རྒྱ་བསྒྱུར་བྱེད་ཀྱི་ཡོད་པར་ཐེར་འདོན་གནང་བ་དང་སྤྲགས། སྤྱི་ཡོངས་ནས་བོད་ནང་གི་འགྲོ་བ་མིའི་ཐོབ་ཐང་གི་གནས་བབ་ཇེ་ཞན་ཇེ་སྡུག་ཏུ་གྱུར་ཡོད་པར་གསུངས་སོང་།

ཁ་སང་རྒྱལ་སྤྱིའི་བོད་དོན་འབྲེལ་མཐུད་ལས་ཁང་གིས་དེ་རིང་མགོ་ལོག་དགའ་བདེ་ཁུལ་གྱི་བོད་ཀྱི་ཁོར་ཡུག་གི་ལས་འགུལ་བ་ཨ་ཉག་སེང་སྒྲ་ལགས་ལགས་སུ་ལོ་བདུན་གྱི་ཁྲིམས་ཐག་བཅད་པའི་ཐོག་ནས་ཁྲིམས་བཤེར་བྱེད་ཀྱི་ཡོད་པར་བརྟེན་རྒྱ་ནག་སྲིད་གཞུང་གིས་ཁོང་ལ་དྲང་བདེན་གྱི་ཁྲིམས་བཤེར་བྱེད་དགོས་པའི་རེ་སྐུལ་གནང་འདུག མགོ་ལོག་དགའ་བདེ་ཁུལ་ནས་ཡིན་པའི་ཨ་ཉག་སང་སྒྲ་ལགས་ཀྱིས་སྲིད་གཞུང་གིས་ལྐོག་ཟ་རུལ་སུངས་དང་རྒྱ་ནག་གི་ཁྲིམས་དང་མི་མཐུན་པའི་གཏེར་ཁ་སྔོག་འདོན་བྱས་ཏེ་རང་བྱུང་ཁོར་ཡུག་ལ་གཏོར་བཅོམ་ཐེབས་བཞིན་ཡོད་ལུགས་ཕྱིར་བསྒྲགས་བྱས་ཡོད་པ་ལྟར་རྒྱ་ནག་གཞུང་གིས་སྔ་ལོའི་ཕྱི་ཟླ་ ༡༢ ནང་ཁོང་གིས་ལྐོག་ཟ་རུལ་སུངས་ལ་རྒོལ་རྡུང་དང་ཁོར་ཡུག་སྲུང་སྐྱོབ་ཞེས་པའི་སྐད་འཕྲིན་གྱི་ཚོགས་པ་གཉིས་བཙུགས་ནས་མི་མང་བསྡུ་སྐོང་བརྒྱུད་སྲིད་གཞུང་གི་བཀའ་རྒྱ་ལ་གཏོར་བཤིག་དང་དེ་བཞིན་མང་ཚོགས་ཁྲོད་དཀྲོག་རྐྱེན་བཟོས་པའི་ཉེས་མིང་གི་འོག་ལོ་བདུན་གྱི་བཙོན་འཇུག་ཁྲིམས་ཐག་བཅད་ཡོད་པ་རེད། རྒྱལ་སྤྱིའི་བོད་དོན་འབྲེལ་མཐུད་ལས་ཁང་གིས་རྒྱ་ནག་གཞུང་གིས་ཁོང་ལ་འཛུགས་པའི་ཉེས་འཛུགས་དེ་དག་ནི་དུས་རྒྱུན་ནས་བོད་མིའི་ལས་འགུལ་བ་དང་ཁོར་ཡུག་སྲུང་སྐྱོབ་པ་རྣམས་ལ་འབུར་འཇོམས་གཏོང་ཆེད་བེད་སྤྱོད་བྱེད་སྲོལ་ཡོད་པ་མངོན་གསལ་གནང་བ་མ་ཟད། འདི་ལོའི་ཕྱི་ཟླ་ ༥ ཚེས་ ༡༩ ཉིན་མཉམ་འབྲེལ་རྒྱལ་ཚོགས་ཀྱི་ཆེད་མཁས་པ་ལྔས་རྒྱ་ནག་གིས་ཨ་ཉག་སེང་སྒྲ་ལགས་ཀྱི་ཁྲིམས་མཐུན་གྱི་བྱེད་ལས་དེ་ནག་ཉེས་ཅན་དུ་བསྒྱུར་བར་སྐྱོན་བརྗོད་ཀྱིས་རྒྱ་ནག་གིས་རྒྱལ་སྤྱིའི་ཁྲིམས་ལུགས་བརྩི་སྲུང་བྱས་པའི་ཐོག་ཁོང་ལ་ཉེས་འདོགས་བྱས་པ་རྣམས་འཕྲལ་དུ་ཕྱིར་འཐེན་བྱེད་དགོས་ལུགས་འགྲེལ་བརྗོད་གནང་བ་དང་ཆབས་ཅིག ཁོང་གི་འཕྲོད་བསྟེན་གྱི་གནས་བབ་ཧ་ཅང་ཞན་པོ་ཡོད་པར་སེམས་འཚབ་ཀྱི་རྣམ་པ་ཆེད་བཏོན་གནང་ཡོད་པ་རེད།རྒྱལ་སྤྱིའི་བོད་དོན་འབྲེལ་མཐུད་ཁང་གི་བློ་བཟང་གཡང་མཚོ་ལགས་ཀྱིས་རྒྱ་ནག་གིས་དུས་རྒྱུན་ལས་གཡོ་བྱུས་ལྡན་ཐོག་གཞིས་ལུས་བོད་མི་རྣམས་ལ་ཉེས་འཛུགས་བྱེད་ཀྱི་ཡོད་ལུགས་དང་། དམིགས་བསལ་ཕྱི་ལོ་ ༢༠༡༨ ལོ་ནས་བཟུང་རྒྱ་ནག་སྲིད་གཞུང་གིས་བོད་ཁུལ་གྱི་བོད་མི་མང་པོ་ཉེས་འཛུགས་སྣ་མང་འོག་འཛིན་བཟུང་བྱེད་ཆོག་པའི་ཁྲིམས་སྒྲིག་ཅིག་ལག་བསྟར་བྱས་པ་དངསྔ་ལོར་རྒྱ་ནག་གིས་ནག་ཉེས་ཀྱི་དཔང་རྟགས་གཅིག་ཀྱང་སྟོན་རྒྱུ་མེད་པར་བོད་མི་ ༤༠༠ ལྷག་འཛིན་བཟུང་བྱས་པའི་ཁྲོད་ནས་ཨ་ཉག་སེང་སྒྲ་ལགས་ཡོད་པར་ཕྱིར་བསྒྲགས་གནང་འདུག དེ་བཞིན་ཁོང་གིས་རྒྱ་ནག་གིས་ཕྱི་ལོ་ ༢༠༡༨ ཟླ་ ༢ པ་ནས་བཟུང་བོད་ཁུལ་དུ་ནག་ཚོགས་གཙང་བཟོ་ཟེར་བའི་ལས་འགུལ་ཞིག་སྤེལ་བཞིན་ཡོད་པ་ལྟར་ནག་ཚོགས་ཞེས་པའི་ནང་བོད་ཀྱི་ཁོར་ཡུག་སྲུང་སྐྱོབ་ཀྱི་ལས་འགུལ་བ་དང་རྒྱ་ནག་སྲིད་གཞུང་དང་ལྟ་བ་མི་མཐུན་མཁན། དེ་བཞིན་བོད་མིའི་སྐད་ཡིག་དང་ཡུལ་སྲོལ་གོམས་གཤིས་སྲུང་སྐྱོབ་པ་ཚང་མ་ཚུད་ཡོད་པ་ཡང་ཕྱིར་བསྒྲགས་གནང་ཡོད། དབྱིན་ཡུལ་དུ་རྟེན་གཞི་བྱས་པའི་ Free TIbet ཞེས་པའི་བོད་དོན་ལས་འགུལ་ཁང་གི་དྲིལ་བསྒྲགས་དོ་དམ་པ་སྐུ་ཞབས་ John Jones ལགས་ཀྱིས་ཨ་ཉག་སེང་སྒྲ་ལགས་ཀྱི་ཁྲིམས་བཤེར་དང་འབྲེལ་ནས་རྒྱ་ནག་གི་དབང་སྒྱུར་འོག་ཏུ་ད་ཆ་བོད་ནི་དྲང་བདེན་གྱིས་སྟོང་བའི་གནས་བབ་ཅིག་ཏུ་ལྷག་ཡོད་སྐོར་བསྒྲགས་པ་དང་འབྲེལ། རྒྱ་ནག་གིས་བོད་ཁུལ་དུ་ཁོར་ཡུག་གཏོར་བཅོམ་དང་དབང་ཆ་ལོག་སྤྱོད་བྱེད་ཀྱི་ཡོད་པ་མ་ཟད། རྒྱ་ནག་གིས་ཨ་ཉག་སེང་སྒྲ་ལགས་ལ་གཞི་རྩ་གང་ཡང་མེད་པར་འཛིན་བཟུང་བྱས་པ་དེ་ནི་ངོ་ཚ་དགོས་བ་ཞིག་ཡིན་པར་མངོན་གསལ་གནང་བ་དང་། ཆབས་ཅིག་ཏུ་ཨ་ཉག་སེང་སྒྲ་ལགས་འཕྲལ་དུ་གློད་བཀྲོལ་བཏང་ནས་ཁོང་ཉིད་སྔར་འཇིགས་སྣང་མེད་པའི་ཐོག་ནས་རང་གི་སྤྱི་ཚོགས་ཀྱི་ཕྱག་ལས་དེར་འཇུག་ཐུབ་པ་བཟོ་དགོས་པའི་འབོད་སྐུལ་གནང་འདུག གཞི་རྩའི་ཨ་ཉག་སེང་སྒྲ་ལགས་ནི་མཚོ་སྔོན་ཞིང་ཆེན་མགོ་ལོག་དགའ་བདེ་རྫོང་རྐྱང་ཆད་ནས་ཡིན་པ་དང་ཕྱི་ལོ་ ༢༠༡༩ ཟླ་ ༡༢ ཚེས་ ༦ ཉིན་རྒྱ་ནག་སྲིད་གཞུང་གིས་ཁོང་གིས་སྤྱི་ཚོགས་དཀྲུག་པའི་ཉེས་མིང་འོག་ལོ་བདུན་གྱི་བཙོན་འཇུག་ཁྲིམས་ཐག་བཅད་ཡོད་པ་རེད།

འདས་ལོར་ཧོང་ཀོང་སྤྱི་ཁྱབ་ཀེ་རི་ལེམ་གྱིས་རྩོད་རྙོག་ཅན་གྱི་ཉེས་ཅན་རྩིས་སྤྲོིད་ཀྱི་ཁྲིམས་འཆར་འདོན་སྤེལ་བྱས་པ་དང་སྦྲགས་ཏེ་ཧོང་ཀོང་མང་ཚོགས་སྟོང་ཕྲག་མང་པོས་ཟླ་ཤས་རིང་དེར་ངོ་རྒོལ་གནང་བ་དང་ཕྱིས་སུ་ཁྲིམས་འཆར་དེ་ཕྱིར་འཐེན་བྱས་ཡོད་ཀྱང་། མང་ཚོགས་ཀྱིས་བསྟུད་མར་དགོས་འདུན་ཁག་ཅིག་ཆེད་འདོན་གྱིས་གཞུང་ལ་ངོ་རྒོལ་གནང་ཡོད་པ་རེད།ཉེ་ལམ་ཟླ་ ༦ ཚེས་ ༡༢ ཉིན་ཁྲིམས་འཆར་དེ་འདོན་སྤེལ་དང་མང་ཚོགས་ཀྱིས་ལོ་རྒྱུས་རང་བཞིན་ལྡན་པའི་ངོ་རྒོལ་གནང་ནས་ལོ་འཁོར་མོ་གཅིག་འཁོར་བར་ཧོང་ཀོང་མང་ཚོགས་ཀྱིས་དུས་ཚིགས་དེ་རྗེས་དྲན་ཞུས་པའི་ཐོག་བོད་མི་རྣམས་ཀྱིས་ལས་འགུལ་དེར་མཉམ་ཞུགས་གནང་འདུག ཕྱི་ཚེས་ ༡༢ ཉིན་ཧོང་ཀོང་གི་ Mong Kok ཁྲོམ་ར་དང་ Causeway Bay ཁུལ་དེ་བཞིན་ས་ཁུལ་གཞན་ཁག་ཏུ་དགོང་མོ་མང་ཚོགས་སྟོང་ཕྲག་འདུ་འཛོམས་ཀྱིས་ངོ་རྒོལ་གྱི་གླུ་གྱེར་ནས་ཉེས་ཅན་རྩིས་སྤྲོད་ཀྱི་ཁྲིམས་འཆར་འདོན་སྤེལ་བྱས་ཏེ་ལོ་འཁོར་མོ་འཁོར་བའི་དུས་ཚིགས་དྲན་གསོ་ཞུས་ཡོད་པ་མ་ཟད། ལས་འགུལ་བ་རྣམས་ཀྱིས་རྒྱ་ནག་གཞུང་ལ་ངོ་རྒོལ་གྱི་འབོད་སྒྲ་སྣ་མིན་འཁོད་པའི་སྦྱར་པང་བསྣམས་ཏེ་ངོ་རྒོལ་གནང་ཡོད་ཀྱང་། ཉེན་རྟོག་པས་འདུ་འཛོམས་དེ་ཁྲིམས་འགལ་ཡིན་པར་ཉེན་བརྡ་བཏང་བ་དང་ཆབས་ཅིག་ལས་འགུལ་བ་ ༣༥ ལྷག་འཛིན་བཟུང་བྱས་འདུག དེ་ཉིན་ཉིན་དགུང་ཙམ་ལ་མི་བརྒྱ་ལྷག་འདུ་འཛོམས་ཀྱིས་ཧོང་ཀོང་ལ་རང་བཙན་དགོས་ཞེས་པའི་དར་ཆ་བསྣམས་འདུག་པ་དང་མང་ཚོགས་ནས་འཆི་རྒྱུར་ཞེད་སྣང་མེད་པས་གཞུང་ནས་དེ་འབྲེལ་གྱི་འཇིགས་སྐུལ་ཅི་ཕྱིར་བྱེད་ཀྱི་ཡོད་ཅེས་པའི་འཕྲེད་དར་སོགས་བསྣམས་ཏེ་ངོ་རྒོལ་བྱས་ཡོད་པ་རེད། གཞི་རྩའི་ཧོང་ཀོང་གི་ལས་འགུལ་ལ་བོད་མི་གཙོས་པའི་ཐེ་ཝན་དང་རྒྱལ་སྤྱིའི་གཞུང་དང་གཞུང་འབྲེལ་མིན་པའི་ཚོགས་པ་ཁག་ནས་རྒྱ་གཞུང་ལ་སྐྱོན་བརྗོད་དང་འབྲེལ། ཧོང་ཀོང་གི་འཐབ་རྩོད་ལ་རྒྱབ་སྐྱོར་མུ་མཐུད་གནང་ཡོད་པ་དང་ཉེ་ལམ་ཡང་ཉེས་ཅན་རྩིས་སྤྲོད་ཀྱི་ཁྲིམས་འཆར་འདོན་སྤེལ་གྱིས་ལོ་གཅིག་འཁོར་བའི་དུས་ཚིགས་སུ་ཐེ་ཝན་གྱི་རྒྱལ་ས་ཐེ་པེ་ནང་བོད་མི་གཙོས་ཚོགས་པ་འདྲ་མིན་ནས་ཉིན་མོ་དེ་རྗེས་དྲན་ཞུས་ཡོད་པ་དང་། ལས་འགུལ་ནང་མཉམ་ཞུགས་གནང་མཁན་བོད་མིས་བོད་ཀྱི་རྒྱལ་དར་བསྣམས་ཏེ་བོད་དང་ཤིན་ཅང་། ཧོང་ཀོང་། དེ་བཞིན་རྒྱ་ནག་ལ་རང་དབང་དགོས་ཞེས་པའི་སྦྱར་པང་སོགས་བསྣམས་འདུག  ལས་འགུལ་གོ་སྒྲིག་གནང་མཁན་ནས་དགོས་འདུན་བཞིའི་སྒོ་ནས་གསར་འགོད་བསྒྲགས་གཏམ་སྤེལ་འདུག་པ་དང་དེ་བརྒྱུད་ཧོང་ཀོང་ནི་ཧོང་ཀོང་གི་མི་རིགས་ལ་བདག་གི་ཡོད་པས་རྒྱ་གཞུང་ལ་ངེས་པར་དུ་ངོ་རྒོལ་བྱེད་དགོས། ཐེ་ཝན་ནས་ཧོང་ཀོང་གི་ཉེན་རྟོག་པར་ཐེ་ཝན་ནང་ཡོང་རྒྱུར་བཀག་འགོག་དང་དེ་བཞིན་ཐེ་ཝན་ནས་ཧོང་ཀོང་གི་ཡུལ་མི་ཁུལ་དེར་གནས་སྤོ་སླད་ད་ལྟ་ནས་གྲ་སྒྲིག་གནང་དགོས་ཞེས་བཤད་འདུག ཨོ་གླིང་གི་བྷིར་སི་བྷན་ནང་ཧོང་ཀོང་རྒྱབ་སྐྱོར་བ་ཨོ་གླིང་གི་མི་རིགས་དང་བོད་མི། དེ་བཞིན་ཡུ་གུར། ཝེ་ཏི་ནམ་སོགས་ནས་ཉིན་མོ་དེ་དྲན་གསོ་དང་སྦྲགས། རྒྱལ་སྤྱིའི་གཞུང་ཁག་ནས་རྒྱ་གཞུང་ནས་རྡོག་རོལ་གཏོང་བཞིན་པའི་བྱ་སྤྱོད་དེ་དག་ཐད་གང་ཡང་མ་གསུང་པར་བཞུགས་ན་འགྲིག་ཐབས་མེད་པ་དང་།  ད་ཆ་འགྲོ་བ་མིའི་ཐོབ་ཐང་རྡོག་རོལ་གཏོང་མཁན་རྒྱ་གཞུང་གི་འབྲེལ་ཡོད་ལས་བྱེད་རྣམས་ངེས་པར་དུ་འགན་ཁུར་བ་ཞིག་བཟོ་དགོས་པས་དེ་འབྲེལ་ཐད་ཨོ་གླིང་ནས་ Magnitsky Act ཞེས་པའི་ཁྲིམས་འཆར་གཏན་འབེབས་གནང་དགོས་ཞེས་གསུངས་ཏེ་དགོས་འདུན་ཆེད་བཏོན་གྱིས་ལས་འགུལ་སྤེལ་འདུག རྩ་བའི་ཧོང་ཀོང་མང་ཚོགས་ནས་འདས་ལོའི་ཟླ་བ་ ༦ པའི་ནང་ཉེས་ཅན་རྩིས་སྤྲོད་ཀྱི་ཁྲིམས་འཆར་ལ་ངོ་རྒོལ་གནང་སྟེ་རིམ་པས་ངོ་རྒོལ་དེ་དགོས་འདུན་བཞི་ཆེད་བཏོན་ཐོག་ངོ་རྒོལ་བསྟུད་མར་སྤེལ་ཀྱང་འདས་ལོར་ཟླ་མཇུག་ནས་རྒྱ་ནག་ཝུ་ཧན་གྲོང་ཁྱེར་ལས་ཏོག་དབྱིབས་གཉན་རིམས་ཁྱབ་གདལ་དུ་སོང་བ་དང་བསྟུན་བར་ལམ་ལས་འགུལ་མཚམས་འཇོག་བྱེད་དགོས་བྱུང་ཡོད་པ་རེད།  འོན་ཀྱང་ཉེ་ལམ་རྒྱ་ནག་གཞུང་ནས་ཧོང་ཀོང་བདེ་འཇགས་ཟེར་བའི་ཁྲིམས་འཆར་དེ་འདོན་སྤེལ་སྐབས་སླར་ཡང་ཧོང་ཀོང་ནང་མི་མང་གིས་ངོ་རྒོལ་ལས་འགུལ་དེ་དབུ་འཛུགས་གནང་ཡོད། སྤྱིར་རྒྱ་ནག་གི་ཁྲིམས་འཆར་གསར་པ་དེའི་ཐོག་རྒྱལ་སྤྱིའི་གཞུང་དང་ཚོགས་སྡེ་ཁག་ནས་སྐྱོན་བརྗོད་ཤུགས་ཆེ་བྱས་ཡོད་པ་དང་། རྒྱ་ནག་ནས་དུས་རྟག་ཏུ་ཧོང་ཀོང་གི་གནད་དོན་དེ་རྒྱ་ནག་ནང་མོལ་གྱི་གནད་དོན་ཡིན་པས་དེར་ཕྱི་ཕྱོགས་ནས་ཐེ་བྱུས་བྱེད་ཆོག་གི་མེད་ཅེས་བརྗོད་ཀྱི་ཡོད་པ་རེད། དེའི་ཁྲོད་བྱེས་བཞུགས་བོད་མི་ལས་འགུལ་བ་ཁག་ཅིག་གིས་རྒྱ་གཞུང་ནས་ཏོག་དབྱིབས་གཉན་རིམས་ཀྱི་དུས་ཚིགས་དམ་འཛིན་གྱིས་ཧོང་ཀོང་ཐོག་དབང་ཆ་དྲག་ཏུ་གཏང་རྒྱུ་བྱེད་བཞིན་ཡོད་པ་གསུངས་འདུག རྒྱ་གར་དུ་ཡོད་པའི་བོད་རང་བཙན་སློབ་ཕྲུག་ཚོགས་པའི་འགན་འཛིན་རིག་འཛིན་ཆོས་སྒྲོན་ལགས་ཀྱིས་རྒྱ་གཞུང་ནས་ཧོང་ཀོང་ཐོག་བཀོད་ཁྱབ་གཏོང་བའི་སྲིད་བྱུས་དེ་དག་བོད་ལྟ་བུའི་ནང་དེ་སྔ་ནས་བཀོལ་སྤྱོད་བྱས་ཡོད་པ་དང་། ད་ལྟའི་ཧོང་ཀོང་ནང་གི་གནས་སྟངས་དེ་དག་ང་ཚོའི་ངོས་ནས་ཡག་པོ་ཞིག་ཤེས་ཀྱི་ཡོད་སྟབས་ང་ཚོས་དུས་རྟག་ཏུ་ཧོང་ཀོང་གི་ལས་འགུལ་བ་ཚོར་རྒྱབ་སྐྱོར་བྱེད་ཀྱི་ཡོད་ཅེས་གསུངས་འདུགད་དུང་ཁོང་གིས་རྒྱ་གཞུང་ནས་བོད་མི་མང་གཙོ་དོན་གཉེར་བ་དང་ཁོར་ཡུག་སྲུང་སྐྱོབ་གནང་མཁན་ཡོངས་ཀྱི་འབོད་སྒྲ་ལ་སྣང་མེད་བཏང་དང་གཏོང་མུས་ཡིན་པ་དང་ཆབས་ཅིག་ཏུ་ད་ཆ་རྒྱ་གཞུང་ནས་གཉན་རིམས་ཀྱི་དུས་ཚིགས་དམ་འཛིན་གྱིས་ཧོང་ཀོང་གཙོས་བོད་དང་ཤར་ཏུར་ཀི་སི་ཏན་སོགས་ལ་དྲག་གནོན་ཇེ་ཆེར་བྱེད་བཞིན་ཡོད་པ་སོགས་གསུངས་འདུག དེ་མཚུངས་སུ་བོད་མིའི་ལས་འགུལ་ཁག་ཅིག་གིས་རྒྱ་ནག་ནས་ཧོང་ཀོང་བདེ་འཇགས་ཀྱི་ཁྲིམས་འཆར་གསར་པ་གཏན་འབེབས་བྱས་པ་དེ་རྒྱ་ནག་གི་སྲིད་འཛིན་ཞི་ཅིན་ཕིང་གིས་རིམ་བཞིན་རྒྱལ་ཁབ་གཞན་དབང་སྒྱུར་ཐབས་ཀྱི་སྲིད་བྱུས་འཛིན་པར་ངོས་འཛིན་དང་ལྷག་པར་དུ་ཐབས་བྱུས་འདི་ལྟ་བུ་ཞིག་གི་འོག་ནས་མང་གཙོ་དོན་གཉེར་བར་སྔར་ལྷག་དམ་དྲག་བྱེད་ངེས་ཡིན་པར་སེམས་ཚབས་ཆེན་པོ་གནང་བཞིན་འདུག

འདས་པའི་ལོ་འགའི་སྔོན་ནས་བཟུང་རྒྱ་ནག་གིས་རྨ་འབྲུ་རྫ་གསུམ་གྱི་མགོ་ཁུངས་སྲུང་སྐྱོབ་ཅེས་པའི་མིང་ཐོག་ནས་བོད་ཁུལ་གྱི་ཞིང་འབྲོག་མང་པོ་བཙན་ཤེད་ཀྱིས་གནས་སྤོ་བྱེད་དུ་འཇུག་བཞིན་པ་ལྟར་ད་ལྟའི་ཆར་བོད་མདོ་སྨན་ཁུལ་གྱི་མཚོ་སྔོན་པའི་ཉེ་འགྲམ་གྱི་འབྲོག་ཁྱིམ་མང་པོ་ཡང་རྒྱལ་ཁབ་རིམ་པའི་བཀའ་རྒྱ་བཏང་ནས་ས་གནས་ཀྱི་ཡུལ་མི་རྣམས་མཚོ་ཁ་ནས་གནས་སྤོ་བྱེད་དུ་འཇུག་བཞིན་པ་མ་ཟད་ཡུལ་སྐོར་སྤྲོ་འཁྱམ་གྱི་གནས་སུ་གྱུར་བའི་མཚོ་སྔོན་པོའི་ཉེ་འགྲམ་གྱི་ས་ཆ་མང་པོ་ཞིག་རྒྱ་ནག་སྲིད་གཞུང་གིས་བཙན་འཕྲོག་བྱས་ཏེ་རྒྱ་ནག་གི་ཚོང་པ་ཆེ་གྲས་ཚོར་ཚོང་བསྒྱུར་བྱེད་བཞིན་པ་ཡོད་པ་རེད།རླུང་འཕྲིན་ཁང་གིས་ཉེ་ཆར་བོད་ནས་གསར་དུ་ཕེབས་པའི་བོད་མི་ཞིག་ལ་དམིགས་བསལ་བཅར་འདྲི་ཞུས་པར་ ཁོང་གིས་ད་ལྟའི་བོད་མཚོ་སྔོན་ཁུལ་གྱི་འབྲོག་པ་རྣམས་ལ་ཕྱོགས་མང་པོ་ནས་དཀའ་ངལ་འཕྲད་བཞིན་ཡོད་པའི་ཁྲོད་ནས་ཁོར་ཡུག་སྲུང་སྐྱོབ་ཀྱི་དཀའ་ངལ། དཔལ་འབྱོར་གྱི་དཀའ་ངལ། ས་ཆའི་བདག་དབང་སོགས་ཀྱི་ཐད་ནས་དཀའ་ངལ་མང་པོ་འཕྲད་ཀྱི་ཡོད་པ་ངོ་སྤྲོད་དང་འབྲེལ།  ཁོར་ཡུག་སྲུང་སྐྱོབ་ཀྱི་ཐད་ནས་ས་གནས་ཀྱི་བོད་རིགས་ཡུལ་མི་རྣམས་ཀྱིས་རང་གི་ས་ཆར་བདག་གཅེས་ཀྱི་ཚོགས་པ་གསར་འཛུགས་བྱས་པར་རྒྱབ་ཁབ་ཀྱི་རྒྱབ་སྐྱོར་མེད་པ་དང་ཁུལ་དེར་རྒྱ་རིགས་མང་པོའི་ཁྲིམས་འགལ་གྱིས་ས་གནས་ཀྱི་ཉེན་རྟོག་པ་དང་ངན་པ་ལག་འབྲེལ་བྱས་ཡོད་སྟབས་བོད་རིགས་མང་ཚོགས་ཀྱིས་རྒྱ་ནག་མི་མང་ལ་རྒོལ་ལན་སློག་ཐུབ་ཀྱི་མེད་པ་དང་། གནས་ཚུལ་དེ་དང་འབྲེལ་ནས་མཚོ་སྔོན་པའི་ཆུ་ལ་འབག་བཙོག་ཤོར་བ་ཡིན་ན་རང་བཞིན་གྱིས་མཚོ་སྔོན་པོའི་ཁུལ་གྱི་རྩྭ་དང་རྩི་ཤིང་ལའང་གནོད་སྐྱོན་གྱིས་ས་བཅུད་ཉམས་ངེས་ཡིན་སྟབས། རྩྭ་ཐང་ལ་བརྟེན་པའི་ཕྱུགས་ཟོག་འཚོ་སྐྱོང་གི་ཐོག་ནས་ཀྱང་གནད་དོན་འབྱུང་གི་ཡོད་སྟབས་འབྲོག་པ་མང་ཚོགས་ལ་དཀའ་ངལ་འཕྲད་ཀྱི་ཡོད་སྐོར་ངོ་སྤྲོད་གནང་སོང་།དེ་བཞིན་ཁོང་གིས་མཚོ་སྔོན་པའི་འགྲམ་རྒྱུད་དེ་ད་ཆ་ཡུལ་སྐོར་སྤྲོ་འཁྱམ་གྱི་ལྟེ་གནས་གལ་ཆེན་ཞིག་ཏུ་གྱུར་ཡོད་རྐྱེན་རྒྱ་ནག་གིས་བཙན་དབང་གིས་ས་གནས་སུ་མཚོ་ངོས་ལས་ས་ཁྱོན་གང་འཚམས་ཤིག་ལ་ཕྱུགས་ཟོག་འཚོ་སྐྱོང་དང་སྒེར་གྱི་ཚོང་ལས་ཀྱི་ངོ་བོར་བསྒྱུར་མི་ཆོག་པའི་བཀའ་རྒྱ་བཏང་ནས་འབྲོག་པ་མང་ཚོགས་ཀྱི་རྩྭ་ས་བཙན་འཕྲོག་བྱས་ཏེ་མཚོ་སྔོན་པོའི་བྱ་གླིང་སོགས་ཀྱི་ས་ཚུགས་འདྲ་མིན་དུ་རྒྱ་ནག་སྲིད་གཞུང་རང་གི་ཡུལ་སྐོར་ལྟེ་གནས་གསར་འཛུགས་ཀྱིས་ཁུལ་དེར་ཡུལ་སྐོར་སྤྲོ་འཁྱམ་པ་སྟོང་ཕྲག་མང་པོ་ཉིན་རེ་བཞིན་ནང་འདྲེན་བྱས་པ་མ་ཟད། མི་གཅིག་ལ་སྒོར་ཉིས་བརྒྱ་ནས་སུམ་བརྒྱ་དང་དམིགས་བསལ་དུ་ཕྱི་གླིང་པ་རྣམས་ལ་རྒྱ་སྒོར་ལྔ་བརྒྱ་ནས་དྲུག་བརྒྱ་བྱས་ཏེ་འཛིན་བྱང་མང་པོ་བཙོང་བཞིན་ཡོད་པ་རེད་འདུག འོན་ཀྱང་བོད་མི་ས་བདག་རྣམས་ལ་དཔལ་འབྱོར་གྱི་ཐོན་ཁུངས་དེ་ལས་ཁེ་བཟང་གཅིག་ཀྱང་རག་གི་མེད་པ་དང་ས་བདག་རང་ཉིད་ཁུལ་དེར་ལྟ་སྐོར་དུ་སོང་ན་ངེས་པར་དུ་མི་གཞན་ལྟར་འཛིན་བྱང་ཉོ་དགོས་པ་མ་ཟད། གལ་ཏེ་བོད་རིགས་མང་ཚོགས་ཀྱིས་ཀྱང་ཡུལ་སྐོར་སྤྲོ་འཁྱམ་གྱི་གུར་སོགས་ཕུགས་ནས་དཔལ་འབྱོར་འཚོལ་སྒྲུབ་བྱས་པ་ཡིན་ན་ས་གནས་ཉེན་རྟོག་པས་ཡུལ་སྐོར་སྤྲོ་འཁྱམ་གྱི་འཛུགས་སྐྲུན་གྱི་ཆ་རྐྱེན་ཚང་མེད་པར་བསྙད་ནས་དཔལ་འབྱོར་འཚོལ་སྒྲུབ་བྱེད་དུ་འཇུག་གི་མེད་སྟབས་ས་གནས་ཀྱི་བོད་མི་རྣམས་ཀྱིས་རང་གི་ས་ཐོག་ནས་རྟ་དང་གཡག་རེ་ཟུང་ཡུལ་སྐོར་སྤྲོ་འཁྱམ་པ་རྣམས་ལ་པར་ལེན་པ་ལྟ་བུ་ལས་རང་གི་ས་ཆའི་ཐོན་ཁུངས་དང་འབྲེལ་བའི་གནད་འགག་ཆེ་བའི་ཚོང་ལས་གཅིག་ཀྱང་གཉེར་ཐུབ་ཀྱི་མེད་པ་ངོ་སྤྲོད་གནང་སོང་། ལྷག་དོན་ས་ཆའི་བདག་དབང་དང་འབྲེལ་བའི་དཀའ་ངལ་ཆེན་པོ་འཕྲད་བཞིན་པ་ཡོད་པ་ལྟར་མཚོ་སྔོན་པོའི་ཉེ་འགྲམ་ནས་ཡུལ་སྐོར་སྤྲོ་འཁྱམ་གྱི་ལྟེ་གནས་མང་པོ་ཡོད་ནའང་བོད་མི་ཞིག་གིས་ས་ཆ་བདག་བཟུང་བྱས་ནས་ཚོང་ལས་འཛུགས་སྐྲུན་བྱེད་ན་ངེས་པར་དུ་རྒྱ་ནག་སྲིད་གཞུང་གི་ཆོག་མཆན་དགོས་པར་བརྟེན་འཛུགས་སྐྲུན་གྱི་ལས་གཞི་གཉེར་ཐུབ་ཀྱི་མེད་པ་དང་། ཡུལ་སྐོར་ལྟེ་གནས་ཀྱི་ས་ཚུགས་གལ་ཆེན་ཁག་རྒྱ་ནག་གི་ཚོང་པ་ཆེན་པོ་རྣམས་ཀྱིས་སྲིད་གཞུང་དང་མཉམ་འབྲེལ་གྱིས་ཉོས་ཟིན་སྟབས་བོད་མི་རྣམས་ཀྱིས་རང་གི་ས་ཆའི་བདག་དབང་ཡོངས་རྫོགས་ཤོར་ཟིན་པར་བརྟེན་རང་བཞིན་གྱི་མཚོ་མཐའི་ས་ཆ་རྣམས་རྒྱ་ནག་གིས་བདག་བཟུང་བྱས་ཏེ་བོད་མི་རྣམས་མཐར་བགྲོད་གཏོང་གི་ཡོད་པ་ངོ་སྤྲོད་གནང་ཡོད།ཁོང་གིས་ད་དུང་ད་ལྟའི་ཆར་ཆོས་ལུགས་ཀྱི་ཤུགས་རྐྱེན་འོག་ནས་རྒྱ་ནག་གི་ཚོང་པ་ཆེན་པོ་རྣམས་ཀྱིས་མཚོ་ནང་དུ་གཏེར་མང་པོ་འཕེན་གྱི་ཡོད་པ་དང་། གཏེར་འཕེན་པ་དེ་ཚོང་རྫས་ཀྱི་ངོ་བོར་གྱུར་དུས་ས་རྡོ་སོགས་ཀྱིས་མཚོན་པའི་རྫས་འདྲ་མིན་ཆུ་ནང་དུ་ཤོར་གྱི་ཡོད་སྟབས་མཚོ་ལ་མི་གཙང་བ་ཆགས་ཀྱི་ཡོད་པ་དང་མཚོ་ལ་རྟེན་པའི་ཉ་རིགས་མང་པོ་ཤི་རྨས་སུ་འགྱུར་བཞིན་ཡོད་པ་མ་ཟད་མཚོ་འགྲམ་དུ་དྲི་ངན་དྲོ་བ་སོགས་ཀྱི་གནོད་པ་ཆེན་པོ་ཐེབས་བཞིན་ཡོད་པ་ངོ་སྤྲོད་གནང་སོང་།འདས་པའི་ལོ་ཤས་རིང་ནས་རྒྱ་ནག་གིས་བོད་ཁུལ་དུ་ཕྱུགས་སྐྱུར་རྩྭ་འདེབས་ཀྱི་སྲིད་བྱུས་ལག་བསྟར་གྱིས་འབྲོག་པ་མང་ཚོགས་ཀྱི་ཕྱུག་ཟོག་འཚོ་སྐྱོང་བྱེད་སའི་རྩྭ་ས་མང་པོ་ཁོར་ཡུག་སྲུང་སྐྱོབ་ཀྱི་མིང་ཐོག་ནས་བདག་བཟུང་བྱས་ཏེ་འབྲོག་པ་མང་ཚོགས་ལ་གུབ་གསབ་ཉུང་ངུ་སྤྲད་དེ་གྲོང་བརྡལ་དུ་གནས་སྤོ་བྱེད་བཞིན་ཡོད་སྟབས། བོད་ཁུལ་སྤྱི་ཡོངས་ནས་འབྲོག་ལས་ཀྱིས་མཚོན་པའི་རིག་གནས་ཀྱི་རྒྱབ་ལྗོངས་མང་པོ་ཞིག་རང་བཞིན་གྱིས་རྩ་བརླག་ཏུ་འགྲོ་བཞིན་པ་མ་ཟད་བོད་མིའི་སྲོལ་རྒྱུན་གྱི་འཚོ་བ་དང་སེམས་ཁམས། ཐ་ན་སྐད་ཡིག་ཚུན་ཆད་ཀྱང་རྒྱ་མིའི་ངོ་བོར་འགྱུར་བཞིན་ཡོད་པ་ཚོར་ཤུགས་ཆེན་པོས་ངོ་སྤྲོད་གནང་ཡོད།

རྒྱ་ནག་དམར་ཤོག་སྲིད་གཞུང་གིས།   ལོ་རབས་དགུ་བཅུ་བ་ནས་བཟུང་བོད་ཁུལ་དུ་བཙན་ཤེད་ཀྱིས་༼ ཕྱུག་སྐྱུར་རྩྭ་འདེབས།༽ ༼ འབྲོག་པ་གྲོང་སྙེགས། ༽ དང་༼ ནུབ་རྒྱུད་གསར་གཏོད།༽ སོགས་ཀྱི་དྲིལ་བསྒྲགས་འདྲ་མིན་གྱི་འོག་ནས་བོད་ཁུལ་གང་སར་འདུས་སྡོད་ཀྱི་ཁང་པ་མང་པོ་གསར་རྒྱག་བྱས་ཏེ།   ཁ་འཐོར་གྱི་འབྲོག་ཁྱིམ་པང་པོ་གྲོང་བརྡལ་དུ་གནས་སྤོེར་བྱེད་ཀྱི་ཡོད་པ་རེད། གོང་གི་གནས་ཚུལ་དེ་དང་འབྲེལ་ནས། མིང་བརྗོད་འདོད་མེད་པའི་འབྲེལ་ཡོད་ཅིག་གིས་ཁ་སང་འདི་གའི་རྒྱ་ཡིག་སྡེ་ཚན་ལ་གནས་ཚུལ་མཁོ་སྤྲོད་བྱས་པའི་ནང་།   འདི་ལོའི་ཟླ་བ་དང་པོའི་ནང་རྒྱ་ནག་གི་ཆིན་ཧཱ་སློབ་ཆེན་གྱི་ནང་དུ་བོད་ཁུལ་གྱི་༼ དབུལ་སྒྲོལ་འགག་སྒྲོལ་དང་གྲོང་གསེབ་བཅོས་སྒྱུར།༽ ཞེས་པའི་བརྗོད་གཞིའི་ཐོག་ཚོགས་འདུ་འཚོགས་སྐབས། བོད་ཁུལ་གྱི་ཞིབ་འཇུག་པ་དང་རྒྱ་ནག་གི་ཆེད་མཁས་པ་མང་པོས་རྒྱ་ནག་གིས་བོད་ཁུལ་དུ་འབྲོག་ཁྱིམ་གནས་སྤོར་བྱེད་དུ་བཅུག་སྟེ།  བོད་ཡུལ་གྱི་འབྲོག་པའི་ཕྱུགས་འཚོ་སྟངས་རྩིས་སྤྲོད་དོ་དམ་གྱི་སྲིད་བྱུས་སྤེལ་བཞིན་པ་དེས་བོད་ཀྱི་རིག་གཞུང་རྩ་གཏོར་དང་སྣོད་བཅུད་དོ་མཉམ་མེད་པར་བཟོ་བཞིན་པའི་གཅིག་གྱུར་གྱིས་སྡོམ་རྒྱབ་ཡོད་འདུག ཡིན་ནའང་། གནས་ཚུལ་མཁོ་སྤྲོད་པས་བརྗོད་པ་ལྟར་ན།  ད་ལྟའི་བར་རྒྱ་ནག་གིས་ཉེ་སྔོན་ཚོགས་པའི་ཞིབ་འཇུག་གི་སྙན་ཐོ་དེ་གཞུང་འབྲེལ་གྱི་དྲ་གནས་གང་དུ་ཡང་བཀོད་མེད་པ་མ་ཟད། ད་དུང་ཡང་བོད་ཁུལ་གྱི་ས་གནས་གང་སར་འབྲོག་པ་གནས་སྤོར་གྱི་ལས་གཞི་རྒྱ་ཆེར་སྤེལ་བཞིན་པ་དང་སྦྲགས།  ལས་གཞི་དེ་ནི་རྩྭ་ཐང་སྲུང་སྐྱོང་དང་འབྲོག་པའི་འཚོ་བའི་ཆུ་ཚད་མཐོ་རུ་གཏོང་ཆེད་ཡིན་པར་དྲིིལ་བསྒྲགས་བྱེད་བཞིན་ཡོད་པར་ངོ་སྤྲོད་གནང་འདུག དེ་བཞིན་ན་ནིང་རྒྱ་ནག་གི་ནང་དུ་སློབ་གྲྭ་ཆེན་མོ་འགྲིམ་བཞིན་པའི་བོད་རིགས་སློབ་མ་ཞིག་གིས་ཀྱང་འདི་ག་རླུང་འཕྲིན་ཁང་ལ་མཚོ་སྔོན་འབའ་རྫོང་གི་འབྲོག་ཁུལ་དུ་ཡང་རྒྱ་ནག་གིས་འབྲོག་ཁྱིམ་གནས་སྤོར་གྱི་སྲིད་བྱུས་ལག་བསྟར་བྱེད་བཞིན་པའི་གནས་ཚུལ་མཁོ་སྤྲོད་བྱས་པའི་ནང་།   བོད་ཀྱི་འབྲོག་པ་གནས་སྤོར་གྱི་སྲིད་བྱུས་དེའི་འོག་ན་མི་མངོན་པའི་རལ་གྲི་ཞིག་སྦས་ཡོད་ཅེས་ངོ་སྤྲོད་གནང་སྟེ།  ད་ལྟའི་ཆར་བོད་ཁུལ་དུ་འབྲོག་པ་གནས་སྤོར་གྱི་སྲིད་བྱུས་ལག་བསྟར་བྱས་པ་ནས།    ཞིང་འབྲོག་མང་ཚོགས་མང་པོ་གྲོང་བརྡལ་དུ་གནས་སྤོར་བྱས་ཡོད་པ་དང་སྔོན་ཆད་རྩེད་དགའ་དང་འདུ་འཛི་ཆེ་བའི་འབྲོག་ཐང་དུ་ད་ལྟའི་ཆར་རྒན་རྒོན་འགའ་ལས་ལྷག་མེད་པར་མ་ཟད། འབྲོག་ཁུལ་གྱི་རིག་གཞུང་དང་སྔོན་ཆད་ཀྱི་འབྲེལ་འདྲིས་ཟབ་པའི་འཚོ་བ་དེ་ད་ལྟ་ཛ་དྲག་ཅན་དུ་གྱུར་ཡོད་པར་བརྗོད་པ་དང་ལྷན་དུ།  རྒྱ་ནག་གིས་འབྲོག་ཁུལ་གྱི་རྩ་སར་བདག་བཟུང་བྱས་ནས་མ་འོངས་པར་གཏེར་ཁ་སྔོག་འདོན་བྱེད་རྩིས་ཡོད་པ་དང་།   དེ་བཞིན་འབྲོག་པ་མང་ཚོགས་ཀྱི་མི་རིགས་ཀྱི་བསམ་བློར་བསྒྱུར་བཅོས་གཏོང་རྒྱུའི་དམིགས་ཡུལ་ཡོད་པར་ངོ་སྤྲོད་གནང་ཡོད། དེ་བཞིན་བཞུགས་སྒར་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་བོད་གནས་ཉམས་ཞིབ་པ་པདྨ་རྒྱལ་ལགས་ཀྱིས་ཀྱང་ཉེ་སྔོན་འདི་ག་རླུང་འཕྲིན་ཁང་ལ་འབྲོག་ཁྱིམ་གནས་སྤོར་དང་འབྲེལ་ནས།རྒྱ་ནག་གི་སྲིད་བྱུས་དེའི་དམིགས་འབེན་གཙོ་བོ་ནི་ཞིང་འབྲོག་མང་ཚོགས་གནས་སྤོར་དུ་བཅུག་ནས་ཐོན་ཁུངས་སྐྱེལ་འདྲེན་དང་ཆུ་གློག་འཛུགས་སྐྲུན་སོགས་ཀྱིས་མཚོན་པའི་རྒྱ་ནག་རང་གི་ཁེ་ཕན་འབའ་ཞིག་གི་ཆེད་དུ་སྲིད་བྱུས་དེ་ལག་བསྟར་བྱེད་བཞིན་ཡོད་པ་དང་།   དམིགས་བསལ་དུ་ཉེ་བའི་ལོ་འགའི་རིང་ལ་བོད་ཁུལ་གྱི་སྙི་མོ་རྫོང་དང་ཅོ་ནེ་ཁུལ། དེ་བཞིན་འཇོ་མདའ་རྫོང་སོགས་སུ་འབྲོག་པ་གནས་སྤོར་གྱི་སྲིད་བྱུས་ལག་བསྟར་ནན་མོ་བྱས་ཡོད་པ་ཡོངས་གྲགས་ཀྱིས།    ད་སྐབས་ས་ཁུལ་དེ་དག་གི་ཞིང་འབྲོག་མི་མང་གི་མིག་སྔའི་འཚོ་གནས་ལ་དཀའ་ངལ་ཆེས་ཆེར་འཕྲད་བཞིན་ཡོད་པར་ངོ་སྤྲོད་གནང་ཡོད།

ཁ་ཉིན་ཡོ་རོབ་གྲོང་ཁྱེར་སྦར་སིལ་ནང་དུ་ཡོ་རོབ་མཐུན་ཚོགས་དང་རྒྱ་ནག་གཉིས་དབར་ཐབས་བྱུས་གྲོས་མོལ་ཐེངས་ ༡༠ སྟ་གོན་གྱི་གྲོས་སྡུར་ཐོག་ཡོ་རོབ་མཐུན་ཚོགས་ཀྱི་ཕྱི་འབྲེལ་དང་བདེ་འཇགས་ཀྱི་གཙོ་འཛིན་གྱིས་རྒྱ་ནག་ནང་ཆེས་ཇེ་སྡུག་ཏུ་འགྲོ་བཞིན་པའི་འགྲོ་བ་མིའི་ཐོབ་ཐང་གི་གནས་སྟངས་དང་འབྲེལ་ཏེ་བོད་ཀྱི་གནད་དོན་གླེང་སློང་གནང་འདུགད་ཆ་རྒྱལ་སྤྱིའི་ཁྱོན་དུ་ Covid19 འམ་ཏོག་དབྱིབས་གཉན་རིམས་ཁྱབ་བརྡལ་འགྲོ་མུས་རྐྱེན་པས་ཛ་དྲག་གི་གནས་སྟངས་ཁྲོད་ཁ་ཉིན་ཕྱི་ཚེས་ ༩ ཉིན་ཡོ་རོབ་རྒྱལ་ཁབ་སྦེལ་འཇམ་གྱི་རྒྱལ་ས་དང་ཡོ་རོབ་མཐུན་ཚོགས་ཀྱི་བསྟི་གནས་སྦར་སིལ་ནང་ཡོ་རོབ་མཐུན་ཚོགས་ཀྱི་ཕྱི་འབྲེལ་དང་བདེ་འཇགས་ཀྱི་ཚོགས་གཙོ་སྐུ་ཞབས་ Josep Borrell ལགས་དང་རྒྱ་ནག་གི་ཕྱི་སྲིད་བློན་ཆེན་ Wang Yi དབར་དྲྭ་ལམ་བརྒྱུད་རྒྱལ་ཁབ་གཉིས་དབར་ཐབས་བྱུས་གྲོས་མོལ་ཐེངས་བཅུ་པའི་གྲ་སྒྲིག་དང་འབྲེལ་གྲོས་བསྡུར་གནང་སྟེ་ཕྱོགས་གཉིས་དབར་གྱི་གནད་དོན་འདྲ་མིན་ཐོག་འབྲེལ་ལམ་ཇེ་བཟང་དུ་གཏང་རྒྱུའི་ཐབས་ཤེས་བྱ་རྒྱུར་ཞལ་བཞེས་གནང་ཡོད་པ་རེད། རྒྱལ་ཁབ་ཕྱོགས་གཉིས་ཀྱི་གྲོས་མོལ་དེ་གྲུབ་རྗེས་སྐུ་ཞབས་ Josep Borell ལགས་ཀྱིས་གསར་འགོད་ལྷན་ཚོགས་བསྐོང་ཚོགས་གནང་སྟེ་སྔ་ལོ་རྒྱ་གཞུང་གིས་ཡོ་རོབ་མཐུན་ཚོགས་དང་རྒྱ་ནག་དབར་གྱི་ལོ་འཁོར་ལྷན་ཚོགས་ཐོག་ཁས་ལེན་ཞུས་ཁག་ལག་བསྟར་དོན་འཁྱོལ་གནང་ནས་ཕྱོགས་གཉིས་དབར་དབྱེ་འབྱེད་མེད་པར་དྲང་བདེན་དང་ཕྱི་གསལ་ནང་གསལ། དེ་བཞིན་ཞལ་གསང་ཐུགས་དྲང་གི་འབྲེལ་ལམ་གནང་དགོས་པའི་གཞེན་བསྐུལ་གནང་ཡོད་སྐོར་གསུངས་པ་མ་ཟད། འགྲོ་བ་མིའི་ཐོབ་ཐང་གི་གནད་དོན་དང་འབྲེལ་ཏེ་སྐུ་ཞབས་ཁོང་གིས་ཡོ་རོབ་མཐུན་ཚོགས་ཀྱིས་དུས་དང་རྣམ་པ་ཀུན་ཏུ་རྒྱ་ནག་གཞུང་ལ་གྲངས་ཉུང་མི་རིགས་ཁག ལྷག་དོན་བོད་དང་ཡུ་ཡུར་མི་རིགས་ཀྱི་ཆོས་དད་རང་དབང་དང་འགྲོ་བ་མིའི་ཐོབ་ཐང་སོགས་ལ་ཐུགས་ཚབས་ཆེན་པོ་གནང་བཞིན་ཡོད་པ་དང་ཆབས་ཅིག དེ་འབྲེལ་དམིགས་བསལ་གྱི་གནད་དོན་ཁག་ཅིག་ཐེར་འདོན་གྱིས་གླེང་ཡོད་པ་གསུངས་འདུགདེ་བཞིན་ཁོང་གིས་གྲོས་མོལ་དེའི་ཐོག་ཧོང་ཀོང་ནང་གི་ཆེས་ཛ་དྲག་གནས་སྟངས་སྐོར་གླེང་སློང་གནང་སྟེ་རྒྱ་ནག་གཞུང་ནས་རྒྱལ་སྤྱིའི་ཐོག་ཁས་ལེན་ཞུས་ཁག་དང་ལྷག་ཧོང་ཀོང་གི་གཞི་རྩའི་ཁྲིམས་ལ་བརྩི་བཀུར་ཞུ་ཐོག་ཧོང་ཀོང་ནང་གི་ད་ལྟའི་ཆེས་ཛ་དྲག་གནས་སྟངས་དེ་ཞི་འཇམ་བརྟན་ལྷིང་ཡོང་བའི་ཐབས་ཤེས་གང་ཐུབ་གནང་དགོས་པའི་རེ་སྐུལ་གནང་བ་མ་ཟད། ཏོག་དབྱིབས་གཉེན་རིམས་ཁྱབ་གདལ་རྐྱེན་པས་འགྲུལ་བཞུད་སོགས་བཀག་སྡོམ་བྱས་དང་བྱེད་མུས་ཀྱི་ལས་དོན་ཁག་ལྷོད་ཡངས་རྗེས་ཡོ་རོབ་མཐུན་ཚོགས་དང་རྒྱ་ནག་དབར་འགྲོ་བ་མིའི་ཐོབ་ཐང་གི་བགྲོ་གླེང་དེ་རྒྱུན་ལྡན་བཞིན་འཚོགས་ཐུབ་པའི་རེ་བ་ཡོད་ཅེས་གསུངས་འདུག

རྒྱ་ནག་ནས་ཁྱབ་གདལ་སོང་བའི་ཏོག་དབྱིབས་རིམས་ནད་རྐྱེན་གྱིས་ད་ཆ་རྒྱལ་སྤྱིའི་ཁྱོན་ཡོངས་ལ་དཀའ་ངལ་དང་། ལྷག་པར་དུ་ཉེ་ཆར་རྒྱ་གར་འབྲས་ལྗོངས་དང་ལ་དྭགས་ཁུལ་དུ་ཆགས་པའི་རྒྱ་དཀར་ནག་གཉིས་ཀྱི་ས་མཚམས་ས་ཁུལ་དུ་རྩོད་རྙོག་ཆེན་པོ་འཕྲད་བཞིན་པའི་ཁྲོད་འདིར་རྒྱ་གར་ལ་དྭགས་ནས་ཡིན་པ་ཤེས་ཡོན་སློབ་གསོ་བ་དང་གསར་གཏོད་པ། དེ་བཞིན་ཁོར་ཡུལ་སྲུང་སྐྱོབ་ལས་འགུལ་བ་བསོད་ནམས་དབང་ཕྱུག་ལགས་ཀྱིས་ Boycott China ཞེས་རྒྱ་ནག་གི་དངོས་ཟོག་ཉོ་ཚོང་དང་བེད་སྤྱོད་གནང་རྒྱུ་མིན་ཞེས་རྒྱ་གར་མང་ཚོགས་ལ་འབོད་སྐུལ་གྱི་ལས་འགུལ་ཞིག་དབུ་འཛུགས་གནང་ཡོད་པ་རེད།རྩ་བའི་རྒྱ་ནག་གི་དངོས་ཟོག་ཉོ་ཚོང་དང་བེད་སྤྱོད་གནང་རྒྱུ་མིན་ཞེས་པའི་ལས་འགུལ་འདི་ནི་བཙན་བྱོལ་བོད་མིའི་རང་དབང་འཐབ་རྩོད་ཁྲོད་དེ་སྔ་སྤེལ་ཟིན་པའི་གནས་སྟངས་ཤིག་ཆགས་ཀྱི་ཡོད་ཀྱང་། ད་ཆ་བསོད་ནམས་དབང་ཕྱུག་ལགས་ཀྱིས་ལས་འགུལ་དེའི་འབོད་སྒྲ་དང་མེ་ལྕེ་སླར་གསོ་གནང་སྟེ་རྒྱ་གར་གཙོ་བོར་གྱུར་པའི་རྒྱལ་སྤྱིའི་མང་ཚོགས་རྣམས་ནས་ལས་འགུལ་འདིར་མཉམ་ཞུགས་གནང་དགོས་པའི་འབོད་སྐུལ་གནང་བཞིན་པ་ལྟར་ལས་འགུལ་དེ་དེང་སྐབས་རྒྱ་གར་མང་ཚོགས་ཁྲོད་ལ་ཚོར་ཤུགས་ཆེན་པོའི་ཐོག་ནས་ཁྱབ་འཕེལ་འགྲོ་བཞིན་པ་རེད། བསོད་ནམས་དབང་ཕྱུག་ལགས་སུ་རླུང་འཕྲིན་ཁང་གིས་ད་རེས་ Boycott China ཞེས་རྒྱ་ནག་གྱི་ཅ་ལག་ཉོ་ཚོང་དང་བེད་སྤྱོད་གནང་རྒྱུ་མིན་པའི་ལས་འགུལ་སྤེལ་བའི་རྒྱུ་མཚན་སོགས་དང་འབྲེལ་བའི་བཀའ་འདྲི་ཁག་ཅིག་ཞུས་ཡོད། ཐོག་མར་ངས་ད་རེས་བོད་སྐད་ཐོག་ནས་བཤད་མ་ཐུབ་པ་དེར་དགོངས་གསལ་ཞུ་རྒྱུ་དང་། མ་འོངས་པར་བོད་སྐད་ཐོག་ནས་ཞུ་རྒྱུར་འབད་བརྩོན་ཞུ་ཡི་ཡིན། ད་རེས་ཀྱི་ལས་འགུལ་འདི་རྒྱ་ནག་གིས་བོད་བཙན་འཛུལ་བྱས་པ་དང་དེ་ནས་རིམ་པས་ ༡༩༦༢ ནས་ད་བར་ལ་དྭགས་ཀྱི་ས་མཚམས་ས་ཁུལ་དུ་ཡང་ཡང་རྩོད་རྙོག་བླངས་ཏེ་རྒྱ་གར་མི་མང་རྣམས་ལ་སུན་པོ་བཟོས་པ་མ་ཟད་ལྷག་པར་ལ་དྭགས་ཡུལ་མི་དང་སྒོ་ཕྱུག་སེམས་ཅན་གསོ་སྐྱོང་ཐོག་འཚོ་བ་སྐྱེལ་བཞིན་པའི་མི་མང་གི་འཚོ་བར་དཀའ་ངལ་བསྟུད་མར་སྤྲོད་བཞིན་པ། དེ་བཞིན་རྒྱལ་སྤྱིའི་ཁྱོན་ཡོངས་སུ་ཏོག་དབྱིབས་རིམས་ནད་ཁྱབ་སྤེལ་བཏང་བའི་འགན་འཁུར་རྩ་བ་ནས་མ་འཁུར་བ་སོགས་ཀྱི་བྱ་སྤྱོད་ལ་གཞིགས་ཏེ་ད་རེས་རྒྱ་ནག་ལ་དཔལ་འབྱོར་གྱི་གྱོང་གུད་བཏང་ནས་གདོང་ལན་གནང་རྒྱུའི་ལས་འགུལ་འདི་དབུ་འཛུགས་གནང་བ་ཞིག་ཡིན་སྐོར་ངོ་སྤྲོད་གནང་སོང་བ་དང་ཆབས་ཅིག ལས་འགུལ་འདི་དང་ཐོག་རྒྱ་གར་མི་མང་ལ་འབོད་སྐུལ་ཞུས་ནས་དབུ་འཛུགས་གནང་རྒྱུ་དང་དེ་ནས་རིམས་པས་རྒྱལ་སྤྱིའི་སྡིངས་ཆའི་ཐོག་སྤེབས་ཏེ་རྒྱལ་སྤྱི་ཁྱོན་ཡོངས་ནས་རྒྱ་ནག་གྱི་དངོས་ཟོག་ཉོ་ཚོང་དང་བེད་སྤྱོད་གནང་རྒྱུ་མེད་པ་བཟོ་ཐབས་ཤིག་ཡིན་པ་སོགས་གསུངས་ཡོད།ཁོང་གིས་ལས་འགུལ་འདིར་རྐང་རྒྱ་གར་གྱི་མི་མང་རྣམས་ནས་ཆ་ཤས་བཞེས་དགོས་པའི་འབོད་སྐུལ་ཞུ་དགོས་དོན་ནི་མི་མང་གི་ལས་འགུལ་དེར་ཆ་ཤས་ཆེན་པོ་བཞེས་ཚེ་རིམ་པས་གཞུང་ལ་གནོན་ཤུགས་སྤྲོད་རྒྱུ་ལས་པོ་ཆགས་པ་མ་ཟད་གཞུང་གི་ངོས་ནས་ཀྱང་མི་མང་གི་མངོན་འདོད་དང་མཐུན་པས་སྲིད་བྱུས་གཏན་འབེབས་གནང་ངེས་ཡིན་སྟབས། ངའི་ལས་འགུལ་གྱི་ཐབས་བྱུས་དེ་གོང་མས་དམངས་ལ་བཀའ་བཏང་རྒྱུ་མིིན་པར་འོག་མའི་ནུས་སྟོབས་ཀྱིས་གཞུང་ལ་རང་དབང་མེད་པར་མཉམ་ཁྲིད་ཐུབ་པ་ཞུ་རྒྱུ་དེ་རེད་ཅེས་གསུངས་སོང་། དེ་བཞིན་བསོད་ནམས་དབང་ཕྱུག་ལགས་སུ་ Boycott China ཞེས་རྒྱ་ནག་གི་དངོས་ཟོག་ཉོ་ཚོང་བྱེད་རྒྱུ་མེད་ཅེས་པའི་ལས་འགུལ་འདི་བཙན་བྱོལ་བོད་མིའི་མང་ཚོགས་ནང་དེ་སྔ་ནས་སྤེལ་བཞིན་པའི་གནས་སྟངས་ལུང་འདྲེན་དང་སྦྲགས། ལས་འགུལ་འདི་ལྟ་བུ་སྤེལ་བ་བརྒྱུད་རྒྱ་ནག་གྱི་དཔལ་འབྱོར་ཐོག་དོན་དམ་པའི་དོ་ཕོག་གང་འདྲ་ཞིག་གཏང་ཐུབ་དམ་ཞེས་བཀའ་འདྲི་ཞུས་བོད་མིའི་ལས་འགུལ་དེ་དག་གི་མང་ཉུང་དང་ཆེ་ཆུང་ལ་མ་བལྟོས་པར་རྒྱ་ནག་གི་དཔལ་འབྱོར་ལ་དོ་ཕོག་བཏང་ཐུབ་ཡོད་པ་དེ་གསལ་པོ་རེད། འོན་ཀྱང་ད་ལྟའི་རྒྱ་ནག་གི་གནས་བབས་དེ་ལ་བོད་པ་གཅིག་པོ་དང་ཡང་ན་རྒྱ་གར་གཅིག་པོས་ལས་འགུལ་སྤེལ་བས་འདངས་ཀྱི་མ་རེད། ང་ཚོས་རྒྱལ་སྤྱིའི་མི་མང་དང་ད་ལྟ་ཚོར་བ་རྣོ་བའི་དུས་སྐབས་འདིར་རྒྱ་ནག་ལ་སྡང་ཟུག་ཆེན་པོ་བྱེད་བཞིན་པའི་རྒྱལ་ཁབ་ཁག་གི་མི་སེར་ལ་ Boycott China ཞེས་རྒྱ་ནག་གི་དངོས་ཟོག་ཉོ་ཚོང་བྱེད་རྒྱུ་མེད་ཅེས་པའི་ལས་འགུལ་འདིའི་ནང་མཉམ་ཞུགས་གནང་རོགས་ཞེས་འབོད་སྐུལ་ཞུ་དགོས་པ་དང་འདི་ནི་དུས་ཚོད་ཀྱི་ཆ་ནས་འོས་འཚམས་ཤིག་ཀྱང་རེད་ཅེས་གསུངས་ཡོད། ད་དུང་ལས་འགུལ་འདི་ནི་མི་མང་གི་རང་དབང་རྡོག་རོལ་བཏང་མཁན་རྒྱ་ནག་སྲིད་གཞུང་ལ་དམིགས་པ་ཞིག་ཡིན་སྟབས་སྲིད་གཞུང་དེའི་འོག་ཐད་ཀར་དཀའ་སྡུག་མྱོང་བཞིན་པའི་རྒྱ་རིགས་རྣམས་ལ་གདུང་སེམས་མཉམ་བསྐྱེད་དང་། ཁོང་རྣམ་པ་ཚོ་ལ་ཐེ་ཝེན་དང་སིངྒྷ་པུར་ལྟ་བུ་དབང་ཆ་གཅིག་བསྡུས་རིང་ལུགས་ཀྱི་གཞུང་འོག་ལ་མིན་པར་མང་གཙོ་དང་རང་དབང་ལྡན་པའི་གཞུང་འཛིན་འོག་ལ་དཔལ་འབྱོར་གྱི་གནས་བབས་ཚད་མཐོ་པོ་ཆགས་ཐུབ་རྒྱུ་ཡོད་པའི་རེ་བ་དང་ཡིད་ཆེས་དེ་བསྐྲུན་དགོས་པ་དང་། དེ་ལྟར་ཐུབ་ཚེ་རྒྱ་ནག་མི་མང་གི་ངོས་ནས་ཀྱང་རྒྱ་ནག་སྲིད་གཞུང་གི་བྱེད་སྟངས་ལ་མི་འདོད་པའི་འགྱུར་དང་ངོ་རྒོལ་གྱི་རྣམ་པ་ཆེ་རུ་འགྲོ་ངེས་རེད་ཅེས་གསུངས་སོང་།བསོད་ནམས་དབང་ཕྱུག་ལགས་སུ་དོན་ངོ་མའི་ཐོག་ལ་ Boycott China ཞེས་རྒྱ་ནག་གྱི་ཅ་ལག་ཉོ་ཚོང་དང་བེད་སྤྱོད་གནང་རྒྱུ་མིན་ཞེས་པའི་ལས་འགུལ་འདི་དངོས་སུ་ཡོང་སྲིད་པ་ཞིག་རེད་དམ་ཞེས་བཀའ་འདྲི་ཞུས་པར་དུས་ཚོད་གང་འཚམས་ཤིག་འགོར་སྲིད་ཀྱང་། ང་ཚོས་དང་ཐོག་དེར་བྱེད་ཐུབ་པ་དེ་ནི་རྒྱ་ནག་གྱི་མཉེན་ཆས་ཁག་སོ་སོའི་ལག་ཐོགས་ཁ་པར་ནས་ཕྱིར་འཐེན་བྱེད་རྒྱུ་དང་། རིམ་པས་དངོས་སུ་སྤྱི་ཚོགས་ནང་ཡོད་པའི་ཅ་ལག་ཁག་མེད་པ་བཟོ་ཚེ་དེ་ལྟར་རྩ་བ་མེད་པ་བཟོ་ཐུབ་རྒྱུ་ཡོད་པའི་ལས་འགུལ་ཞིག་ཡིན་པ་དང་། རྒྱ་གར་གྱི་ཁྲོམ་རའི་འཁོར་ཡུག་ཀྱང་མི་མང་གི་འདོད་མོས་ལ་གཞིགས་ཏེ་རང་བཞིན་གྱིས་འགྱུར་བ་འགྲོ་ངེས་རེད་ཅེས་གསུངས་སོང་། གཞི་རྩའི་བསོད་ནམས་དབང་ཕྱུག་ལགས་ནི་ལ་དྭགས་ཀྱི་ཡུལ་མི་ཞིག་དང་རང་ཉིད་ཀྱི་སློབ་སྦྱོང་ཁག་གནང་གྲུབ་མཚམས་ས་གནས་ཀྱི་སློབ་མ་དང་། ཞིང་པའི་བདེ་དོན། དེ་བཞིན་འཁོར་ཡུལ་སྲུང་སྐྱོབ་སོགས་ཀྱི་ཐོག་ཕྱག་ལས་སྣ་མང་གནང་ཡོད་པ་མ་ཟད། ཁོང་གི་ཕྱག་ལས་དེ་དག་ལ་རྒྱལ་སྤྱིའི་ཚོགས་སྡེ་འདྲ་མིན་ནས་ཆེ་བསྟོན་ཀྱི་གཟེངས་རྟགས་ཀྱང་ཕུལ་ཡོད་པ་རེད། ད་རེས་ཁོང་གིས་ Boycott China ཞེས་རྒྱ་ནག་གྱི་ཅ་ལག་ཉོ་ཚོང་དང་བེད་སྤྱོད་གནང་རྒྱུ་མིན་ཞེས་པའི་ལས་འགུལ་གྱི་འབོད་སྒྲ་སླར་གསོ་གནང་སྟེ་བདུན་ཕྲག་གཉིས་ཙམ་འགྲོ་བཞིན་པའི་ཁྲོད་དེར་རྒྱ་གར་གྱི་གློག་བརྙན་ཁྲབ་རྩེད་པ་དང་། ཤེས་ལྡན་མི། དེ་བཞིན་མང་ཚོགས་མང་དག་ཅིག་ནས་རྒྱབ་སྐྱོར་གྱིས་ལག་ཐོགས་ཁ་པར་ནས་རྒྱ་ནག་གི་མཉེན་ཆས་ཕྱིར་འཐེན་དང་། ཅ་ལག་བེད་སྤྱོད་མི་གནང་བའི་ཁས་ལེན་གནང་བཞིན་འདུག ལྷག་པར་དུ་བརྒྱུད་རིམ་འདིའི་ཁྲོད་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་དབུས་པའི་བོད་མིའི་རང་དབང་འཐབ་རྩོད་པ་ཁག་ཅིག་རྒྱ་གར་རྒྱལ་ཡོངས་ཀྱི་བརྙན་འཕྲིན་བགྲོ་གླེང་ལས་རིམ་ཁག་ཅིག་གི་ཐོག་ལྷན་ཞུགས་གནང་ཡོད་པ་དང་། སྲིད་སྐྱོང་མཆོག་གིས་ད་ཆ་རྒྱ་ནག་གིས་ས་མཚམས་ས་ཁུལ་ཁག་ཏུ་བཙན་འཛུལ་བྱེད་བཞིན་པ་དེ་ནི་དེ་སྔ་ལོ་ ༦༠ ལྷག་གི་གོང་ལ་བོད་ནང་ལག་བསྟར་བྱས་ཟིན་པ་ཞིག་ཡིན་སྟབས། རྒྱ་གར་གཙོས་པའི་ཉེ་འཁོར་ཁྱིམ་མཚེས་རྒྱལ་ཁབ་ཁག་ནས་བོད་ཀྱི་གནད་དོན་ཐོག་ནས་སློབ་གསོ་བླངས་དགོས་པ་དང་། ད་ཆ་རྒྱ་གར་ནང་ཚོར་ཤུགས་ཆེན་པོས་སྤེལ་བཞིན་པའི་ Boycott China ཞེས་རྒྱ་ནག་གྱི་ཅ་ལག་ཉོ་ཚོང་དང་བེད་སྤྱོད་གནང་རྒྱུ་མིན་ཞེས་པའི་ལས་འགུལ་ཐད་རྒྱ་གར་གཞུང་ནས་དེ་འབྲེལ་སྲིད་བྱུས་གཏན་འབེབས་སོགས་གནང་ཆོག་ཀྱང་། དང་ཐོག་དེར་རྒྱ་གར་གྱི་གློག་བརྙན་ཁྲབ་རྩེད་པ་སོགས་ སྙན་གྲགས་ཡོད་པའི་མི་སྣ་ཚོས་རྒྱ་ནག་གི་ཅ་ལག་ཁྱབ་བསྒྲགས་གནང་མཚམས་འཇོག་དགོས་པ་སོགས་གསུངས་ཡོད།མཐར་བསོད་ནམས་དབང་ཕྱུག་ལགས་ཀྱིས་ཐེངས་འདིའི་བཀའ་འདྲི་ལེ་ཚན་བརྒྱུད་དེ་བོད་མིའི་འཐབ་རྩོད་འདི་ནི་འཛམ་གླིང་ཐོག་དངོས་སུ་མཐོང་རྒྱུ་ཡོད་པའི་འཐབ་རྩོད་ངོ་མ་ཞིག་ཆགས་ཀྱི་ཡོད་པ་སྟབས། བོད་མི་རྣམས་ནས་སེམས་ཤུགས་མ་ཆག་པར་འཐབ་རྩོད་མུ་མཐུད་རྒྱུན་སྐྱོང་གནང་དགོས་པའི་སྐུལ་མ་གནང་བ་མ་ཟད། ད་ལྟའི་ཆར་རྒྱ་ནག་སྲིད་གཞུང་ལ་ངོམས་རྒྱུ་གཅིག་ཡོད་པ་དེ་ནི་དཔལ་འབྱོར་ཆགས་ཀྱི་ཡོད་པར་བརྟེན་བོད་མི་གཙོས་རྒྱལ་སྤྱིའི་མང་ཚོགས་ནས་ Boycott China ཞེས་རྒྱ་ནག་གྱི་ཅ་ལག་ཉོ་ཚོང་དང་བེད་སྤྱོད་གནང་རྒྱུ་མིན་པའི་ལས་འགུལ་འདི་ཁྱབ་སྤེལ་དང་ལག་བསྟར་ནན་པོ་གནང་ཐུབ་ཚེ་རྒྱ་ནག་ལ་འགྱུར་བ་ཞིག་གཏང་ཐུབ་ངེས་རེད་ཅེས་གསུངས་ཡོད།  

གསར་ལམ་ཁག་ཏུ་གནས་ཚུལ་ཐོན་པ་ལྟར་ན།  ཨ་རི་དང་འཇར་མན། དབྱིན་ཡུལ་དང་ཉི་ཧོང་། དེ་བཞིན་ཁ་ན་ཌ་དང་ནོར་ཝེ་སོགས་ཀྱི་མཚོན་པའི་སྟོབས་འབྱོར་ཆེ་བའི་རྒྱལ་ཁབ་བརྒྱད་ཀྱི་གྲོས་ཚོགས་འཐུས་མི་རྒན་གྲས་ཁག་ཅིག་གིས་མཉམ་འབྲེལ་གྱི་ཐོག་ནས་ཚོགས་པ་ཞིག་བཙུགས་ཏེ། ད་ལྟའི་ཆར་རྒྱ་ནག་ནི་རྒྱལ་སྤྱིའི་སྟེང་གི་དཔལ་འབྱོར་འཕེལ་རྒྱས་དང་བདེ་འཇགས། དེ་བཞིན་འགྲོ་བ་མིའི་ཐོབ་ཐང་གི་གནད་དོན་སོགས་ཀྱི་ཉེན་ཁ་ཞིག་ཡིན་པའི་གཅིག་གྱུར་གྱི་ངོས་འཛིན་དང་འབོད་སྒྲ་བསྒྲགས་ཏེ།  མཉམ་རུབ་ཀྱི་ཐོག་ནས་རྒྱ་ནག་ལ་ཁ་གཏད་གཅོག་རྒྱུ་ཡིན་པར་ཡོངས་གྲགས་གནང་འདུག གཞི་རྩའི་རྒྱ་ནག་གི་ནང་དུ་ཏོག་དབྱིབས་རིམས་ནད་ཐོག་མར་མཆེད་པ་ནས་བཟུང་། རྒྱལ་སྤྱིའི་སྤྱི་ཚོགས་ནང་ཁྱབ་བརྡལ་ཆེན་པོ་ཕྱིན་ཡོད་པ་ལྟར། ཨ་རིའི་ངོས་ནས་རྒྱ་ནག་ནས་ཁྱབ་བརྡལ་བྱུང་བའི་རིམས་ནད་དེ་ནི་རྒྱ་ནག་གིས་ཆེད་དུ་རྫས་འགྱུར་ཁང་ནས་གསར་བཟོ་བྱས་ཏེ་ཨ་རིར་ཁ་གཏོར་རྒོལ་གཏོང་བྱེད་དུ་བཟོས་བ་ཞིག་ཡིན་པར་ངོས་འཛིན་གནང་གི་ཡོད་པའི་དུས་སྐབས་དང་བསྟུན་ནས།  ཐེངས་འདིའི་རྒྱལ་ཁབ་བརྒྱད་ཀྱི་གྲོས་ཚོགས་ཀྱི་འཐུས་མིས་གོ་སྐབས་དམ་འཛིན་གྱིས་ཚོགས་པ་ཆེད་འཛུགས་བྱས་ཏེ་རྒྱལ་སྤྱིའི་སྟེང་རྒྱ་ནག་གི་དཔལ་འབྱོར་དང་ཕྱི་འབྲེལ་གྱི་ཤུགས་རྐྱེན་ཆེ་རུ་འགྲོ་བཞིན་པར་ཁ་གཏད་གཅོག་ཆེད་དུ་ཡིན་པར་འགྲེལ་བརྗོད་གནང་འདུག ཐེངས་འདིའི་མཐུན་ཚོགས་དེར་ཨ་རིའི་གྲོས་ཚོགས་གོང་མའི་འཐུས་མི། སྐུ་ཞབས་ Marco Rubio དང་ Bob Menendez ལགས། གཞན་ཡང་ཉི་ཧོང་གི་བདེ་སྲུང་གི་བློན་ཆེན་ཟུར་བ་སྐུ་ཞབས་ Gen Nakatani ལགས། དེ་བཞིན་ཡོ་རོབ་གྲོས་ཚོགས་ཀྱི་ཕྱི་འབྲེལ་ལྷན་ཚོགས་ཀྱི་ཚོགས་མི་ Miriam Lexmann སོགས་ཀྱིས་ལྷན་ཞུགས་གནང་ཡོད་པ་དང་།  སྐུ་ཞབས་ Marco Rubio ལགས་ཀྱིས་ཁོང་གི་ Twitter དྲ་གནས་ཐོག་བརྙན་ལམ་ནས་བརྡ་ལམ་ཞིག་ཕུལ་བའི་ནང་། ད་ལྟའི་རྒྱ་ནག་དམར་ཤོག་སྲིད་གཞུང་དེ་ནི་རྒྱལ་སྤྱིའི་སྤྱི་ཚོགས་ཀྱི་དཀའ་ངལ་ཞིག་ཡིན་པར་ཡོངས་གྲགས་གནང་ཡོད་པ་རེད། མཉམ་འབྲེལ་གྱི་ཚོགས་པ་དེས།  དེང་སྐབས་རྒྱ་ནག་གི་དཔལ་འབྱོར་འཕེལ་ཕྱོགས་དེས་རྒྱལ་སྤྱིའི་སྤྱི་ཚོགས་འདིར་སྒྲིག་གཞི་རང་བཞིན་ལྡན་པའི་གནོད་ཤུགས་ཆེན་པོ་སྤྲོད་ཀྱི་ཡོད་པས། རྒྱལ་ཁབ་གཅིག་གིས་རྒྱ་ནག་ལ་ཁ་གཏད་གཅོག་དགོས་ན་བློས་བཏང་ཆེན་པོ་བྱེད་དགོས་པར་བརྟེན། གྲོས་ཚོགས་མི་སྣའི་ཚོགས་པ་དེའི་ཆེད་དུ་རྒྱ་ནག་དང་འབྲེལ་བའི་གནད་དོན་ཁག་ལ་མཉམ་ལས་བྱེད་རྒྱུ་ཡིན་པར་བསྒྲགས་འདུག དེ་བཞིན་ཁ་ཉིན་རྒྱ་ནག་ནང་དུ་སྤྱི་ལོ་ ༡༩༨༩ ལོར་པེ་ཅིན་ཏུ་སློབ་ཕྲུག་སྟོང་ཕྲག་མང་པོ་དམར་གསོད་བཏང་ནས་མི་ལོ་ ༣༡ ཕྱིན་པའི་དྲུག་བཞིའི་དོན་རྐྱེན་གྱི་དུས་དྲན་དང་འབྲེལ་ནས།   སི་པན་དུ་རྟེན་གཞི་བྱས་པའི་རྒྱ་ནག་གི་རྐང་རྩེད་སྤོལ་བ་གྲགས་ཅན་ Hao Haidong  ལགས་ཀྱིས་ད་ལྟའི་རྒྱ་ནག་གི་སྲིད་དབང་སྒེར་གཅོད་ཀྱི་བྱེད་བབ་དེར་སྐྱོན་བརྗོད་དྲག་པོ་གནང་བ་དང་སྦྲགས།  ཁོང་གིས་བོད་དང་ཧོང་ཀོང་། དེ་བཞིན་ཐེ་ཝན་སོགས་ཀྱི་རང་སྐྱོང་གི་དགོས་འདུན་དེར་རྒྱབ་སྐྱོར་བྱེད་རྒྱུ་ཡིན་པར་ཡོངས་གྲགས་གནང་བ་མ་ཟད།  ཨ་རིར་རྟེན་གཞི་བྱས་པའི་རྒྱ་ནག་གི་ཕྱུག་བདག་ཆེན་མོ། Guo Wengui ཡིས་ད་ཡོད་ཀྱི་རྒྱ་ནག་དམར་ཤོག་ཚོགས་པར་ངེས་ལེན་མེད་པར།  རྒྱ་ནག་གསར་བའི་མཉམ་འབྲེལ་གྱི་རྒྱལ་ཁབ་ཟེར་བ་ཞིག་གསར་འཛུགས་བྱེད་རྒྱུའི་བསྒྲགས་གཏམ་དེར་རྒྱབ་སྐྱོར་ཡོད་པར་ཕྱིར་བསྒྲགས་གནང་བ་དང་སྦྲགས། ད་ལྟའི་རྒྱ་ནག་དམར་ཤོག་སྲིད་གཞུང་དེ་འཇིགས་སྐུལ་ཚོགས་པས་སྐྱོང་གི་ཡོད་པར་བརྟེན་རྒྱ་ནག་གི་ཁྲིམས་ལུགས་ལྡན་པའི་སྲིད་གཞུང་མགོ་རྟིང་བསློགས་ཡོད་པ་ཅེས་སྐྱོན་བརྗོད་ཚ་ནན་བྱས་འདུག གཞན་ཡང་ཁ་ཉིན་ Italy ཡི་དཔལ་འབྱོར་བློན་ཆེན་ཟུར་བ་དང་། ཨ་རིའི་གཞུང་ཚབ་པ་སྐུ་ཞབས་ Giulio Terz ལགས་ཀྱིས་དྲུག་བཞི་དོན་རྐྱེན་གྱི་དུས་དྲན་མཛད་སྒོ་དང་འབྲེལ་ནས།  བོད་ནི་རྒྱ་ནག་གི་དམར་གསོད་དང་རྩ་གཏོར་གཏོང་ཡུལ་གྱི་དུས་དྲན་སྲུང་བརྩི་ཞུ་ཡུལ་དང་པོ་ཆགས་ཡོད་པར་འགྲེལ་བརྗོད་ཀྱིས། རྒྱ་ནག་གིས་བོད་མི་ས་ཡ་མང་པོ་དམར་གསོད་བཏང་ཡོད་པ་དང་།  བོད་ཁུལ་གྱི་དགོན་པ་དྲུག་སྟོང་ལྷག་དང་སྒྱུ་རྩལ་རང་བཞིན་ལྡན་པའི་གནའ་ཤུལ་བརྒྱ་ཆ་ ༩༠ ལྷག་ཀྱང་རྩ་གཏོར་བཏང་ཡོད་པ་མ་ཟད། ད་ཆ།  རྡུལ་ཕྲན་མཚོན་ཆའི་སྙིགས་རོ་མང་པོ་བོད་ཁུལ་དུ་གཡུགས་ནས་བོད་ཀྱི་རང་བྱུང་ཁོར་ཡུག་ལ་ཚད་ལས་འདས་པའི་གཏོར་བཤིག་བཏང་ཡོད་པར་སྐྱོན་བརྗོད་བྱས་ཏེ། ཡོ་རོབ་ཀྱི་རྒྱལ་ཁབ་རྣམས་ཀྱིས་རྒྱ་ནག་གི་བྱེད་བབ་དེར་མཁྱེན་རྟོགས་དགོས་བའི་འབོད་སྐུལ་གནང་འདུག   པར་དང་པོ་དེ་བོད་མིའི་སྒྲིག་འཛུགས་ནས་བླངས།