Tibetan Royal Year of 2151 | Year of the Wood Dragon

རྒྱ་ནག

ཨ་རི་དང་དབྱིན་ཡུལ་གཉིས་ཀྱིས་རྒྱ་ནག་ལ་མཉམ་འབྲེལ་ངང་ཁ་གཏད་གཅོག་རྒྱུའི་ཞུ་སྐུལ།

རྒྱ་ནག་གཞུང་གིས་ཤིན་ཅང་མི་རིགས་ཀྱི་འགྲོ་བ་མིའི་ཐོབ་ཐང་རྡོག་རོལ་ཤུགས་ཆེར་གཏོང་བཞིན་པའི་གནད་དོན་དང་འབྲེལ་ནས་ད་ཆ་དབྱིན་ཡུལ་གཞུང་ལ། རྒྱ་ནག་གི་དཔོན་རིགས་ཁག་ཡུལ་དེའི་ནང་ཡོང་རྒྱུར་བཀག་སྡོམ་བྱེད་དགོས་པའི་གནོན་ཤུགས་སྤྲོད་བཞིན་པའི་ཁྲོད། ཁ་སང་ཨ་རིའི་ཕྱི་སྲིད་དྲུང་ཆེ། སྐུ་ཞབས་ Mike Pompeo མཆོག་གིས་དབྱིན་ཡུལ་གྱི་སྲིད་བློན། སྐུ་ཞབས་ Boris Johnson མཆོག་དང་དངོས་སུ་མཇལ་འཕྲད་ཀྱིས།  ཨ་རི་དང་དབྱིན་ཡུལ་གཉིས་ཀྱིས་མཉམ་འབྲེལ་གྱི་ཐོག་ནས་རྒྱ་ནག་ལ་ཁ་གཏད་གཅོད་རྒྱུའི་རེ་སྐུལ་ཞུས་འདུག དེའང་དེ་རིང་གསར་ལམ་ཁག་ཏུ་གནས་ཚུལ་ཐོན་པ་ལྟར་ན། ད་ལྟའི་ཆར་པེ་ཅིན་སྲིད་གཞུང་དང་ནུབ་ཕྱོགས་ཀྱི་རྒྱལ་ཁབ་དག་གི་བར་དུ་ས་ཁོངས་ཆབ་སྲིད་ཀྱི་སེམས་འཚབ་ཇེ་ཆེར་འཕེལ་བཞིན་པའི་ཁྲོད། སྐུ་ཞབས་ Pompeo མཆོག་གིས་དབྱིན་ཡུལ་གྱི་སྲིད་བློན་དང་། ཕྱི་སྲིད་དྲུང་ཆེ། དེ་བཞིན་ཕྱོགས་འགལ་ཚོགས་པའི་དབུ་ཁྲིད་ཀྱི་དབུས་པའི་གནད་ཡོད་དཔོན་རིགས་ཁག་ཅིག་དང་ལྷན་དུ་མཇལ་མོལ་གནང་བ་མ་ཟད། ཡུལ་དེའི་གྲོས་ཚོགས་འཐུས་མི་ཁག་གཅིག་དང་ལྷན་དུའང་མཇལ་འཕྲད་གནང་འདུག ཁ་སང་གི་མཇལ་མོལ་དེའི་ཐོག  སྐུ་ཞབས་ Pompeo མཆོག་གིས་ད་སྐབས་ནུབ་གླིང་གི་རྒྱལ་ཁབ་རྣམས་ཀྱིས་མཉམ་འབྲེལ་གྱི་ཐོག་ནས་རྒྱ་ནག་ལ་ཁ་གཏད་གཅོག་གི་ཡོད་པར་འགྲེལ་བརྗོད་ཀྱིས། དབྱིན་ཡུལ་ཡང་མཉམ་འབྲེལ་དེར་འཛུལ་ཞུགས་བྱེད་རྒྱུའི་རེ་སྐུལ་ཞུས་ཡོད་པ་དང་། མཇལ་མོལ་ཐོག་བཅར་བའི་དབྱིན་ཡུལ་གྱི་གྲོས་ཚོགས་མི་སྣ་ཞིག་གིས་ཀྱང་། ཕྱོགས་གཉིས་ཀྱི་མཇལ་མོལ་དེ་དག་ནི་གཙོ་བོ་རྒྱ་ནག་ལ་ཐད་ཀར་ངོ་རྒོལ་བྱེད་རྒྱུ་མིན་པར། རྒྱ་ནག་གི་ཀུན་སྤྱོད་ཀྱིས་ནུབ་གླིང་བ་དག་གིས་རྒྱ་ནག་དང་མཉམ་དུ་ཚོངའབྲེལ་བྱེད་དཀའ་བའི་བརྡ་ལན་སྤྲོད་རྒྱུའི་ཆེད་ཡིན་པ་འགྲེལ་བརྗོད་གནང་འདུག དེ་བཞིན་སྐུ་ཞབས་ Mike Pompeo ལགས་ཀྱིས་རྒྱ་ནག་གིས་ཡུ་གུར་མི་མང་ས་ཡ་གཅིག་ཙམ་བཀག་སྐྱིལ་བྱས་ཡོད་པའི་གནད་དོན་དང་འབྲེལ་ནས། དབྱིན་ཡུལ་གཞུང་གིས་ Magnitsky Act  ཞེས་པའི་ཁྲིམས་འཆར་བརྒྱུད་ནས་ཤིན་ཅང་གི་དྲག་གནོན་དང་འབྲེལ་བ་ཡོད་པའི་རྒྱ་ནག་གི་དཔོན་རིགས་རྣམས་དབྱིན་ཡུལ་དུ་ཡོང་རྒྱུར་བཀག་སྡོམ་བྱེད་རྒྱུ་སོགས་ཀྱི་གནད་དོན་ཡང་གླེང་སློང་གནང་འདུག དེ་བཞིན་སྐུ་ཞབས་ Pompeo མཆོག་གིས་རྗེས་སུ་གསར་འགོད་ལྷན་ཚོགས་ཤིག་གི་ཐོག་འགྲེལ་བརྗོད་གནང་དོན་ལྟར་ན། ཁོང་གིས་དབྱིན་ཡུལ་གྱི་ཕྱི་སྲིད་བློན་ཆེན་སྐུ་ཞབས་ Mr Raab ལགས་དང་ལྷན་དུ། རྒྱ་ནག་གིས་ཧོང་ཀོང་བདེ་འཇགས་ཀྱི་ཁྲིམས་གཞི་གཏན་འབེབས་དང་འབྲེལ་ཧོང་ཀོང་ནང་གི་ད་ལྟའི་གནས་སྟངས་དང་། རྒྱ་ནག་གིས་ད་ཆ་ཡུལ་དེའི་ཁྱིམ་མཚེས་རྒྱལ་ཁབ་རྣམས་ལ་བཙན་འཛུལ་བྱེད་བཞིན་པའི་གནད་དོན་གྱི་ཐད་ལ་གྲོས་བསྡུར་གནང་ཡོད་པ་མ་ཟད། དབྱིན་ཡུལ་གཞུང་གིས་རྒྱ་ནག་གི་Huawei བཟོ་ལས་ཁང་གི་དྲ་འབྲེལ་གྱི་ G5 ལས་གཞི་ཕྱིར་འཐེན་བྱས་ཡོད་པ་དེ་ནི་ཁྲིམས་སྒྲིག་དང་མཐུན་པའི་ཐག་གཅོད་ཅིག་རེད་ཅེས་བསྔགས་བརྗོད་གནང་འདུག མ་ཟད་རྒྱ་ནག་གིས་དབྱིན་རྒྱ་གཉིས་ཀྱི་ཆངས་ཡིག་རྩིས་མེད་བཏང་ཡོད་པར་བརྟེན། དབྱིན་ཡུལ་གཞུང་གིས་བྲོས་བྱོལ་དུ་ཡོང་བཞིན་པའི་ཀོང་ཧོང་བ་རྣམས་ལ་སྣེ་ལེན་བྱེད་བཞིན་པ་དེར་ཆེ་བསྟོད་དང་། ལྷག་པར་གནད་དོན་དེ་དང་འབྲེལ་དབྱིན་ཡུལ་གཞུང་གིས་ཧོང་ཀོང་དང་ཉེས་ཅན་རྩིས་སྤྲོད་ཀྱི་ཆིང་ཡིག་རྩིས་མེད་བཏང་བ་བཅས་ལ་ཨ་རིའི་ངོས་ནས་རྒྱབ་སྐྱོར་ཡོད་པ་འགྲེལ་བརྗོད་གནང་འདུག གོང་གི་གནད་དོན་དེ་དག་དང་འབྲེལ་ནས། འདི་གའི་གསར་འགོད་པས་དེ་རིང་དབྱིན་ཡུལ་བོད་ཀྱི་སྐུ་ཚབ་དོན་གཅོད། བསོད་ནམས་ཚེ་རིང་ཕར་སི་ལགས་སུ་ཞལ་པར་བརྒྱུད་ནས་བཀའ་འདྲི་ཞུས་པར་ཁོང་གིས་ད་ལྟའི་ཆར་རྒྱ་ནག་གི་ནད་ཡམས་དང་ཁྱིམ་མཚེས་རྒྱལ་ཁབ་སོགས་དང་འབྲེལ་བའི་ས་མཚམས་ཀྱི་རྙོག་གླེང་སོགས་ཀྱི་གནད་དོན་དང་འབྲེལ་ནས། རྒྱལ་སྤྱིཨ་རིའི་ཕྱི་སྲིད་དྲུང་ཆེ་སྐུ་ཞབས་ Pompeo མཆོག་ད་རེས་དབྱིན་ཡུལ་དུ་ཕེབས་པ་དང་བསྟུན། ཁ་སང་ཁུལ་དེའི་ནང་རྟེན་གཞི་བྱས་པའི་ཨ་རིའི་གཞུང་ཚབ་ཆེན་མོའི་གཟིམ་ཁང་དུ། ཧོང་ཀོང་དབྱིན་ཡུལ་འོག་ཡོད་པའི་སྐབས་ཀྱི་སྲིད་སྐྱོང་མཐའ་མ་སྐུ་ཞབས་ Chris Pattern ལགས་དང་། གཞན་ཡང་ཉེས་ཆར་རང་ཁུལ་དེར་བྲོས་བྱོལ་དུ་ཕེབས་པའི་ཧོང་ཀོང་གི་དམངས་གཙོའི་ལས་འགུལ་བ་གྲགས་ཅན་སྐུ་ཞབས་ Nathan Law ལགས་དང་ལྷན་དུའང་ཟུར་དུ་མཇལ་འཕྲད་གནང་འདུག སྐུ་ཞབས་ Pompeo ལགས་དང་འབྲེལ་བ་དམ་ཟབ་ཡོད་པའི་དཔོན་རིགས་མིང་མི་གསལ་བ་ཞིག་གིས་ས་གནས་བརྒྱུད་ལམ་ལ་འགྲེལ་བརྗོད་གནང་དོན་ལྟར་ན། ཨ་རིའི་གཞུང་ངོས་ནས་ད་ལྟའི་ཆར་རྒྱ་ནག་གིས་ཉེ་ལམ་གཏན་འབེབས་ལག་བསྟར་བྱས་པའི་ཧོང་ཀོང་གི་བདེ་འཇགས་དང་འབྲེལ་བའི་ཁྲིམས་གཞི་དེའི་ཐོག་ལན་འདེབས་ཇི་ལྟར་བྱེད་མིན་ལ་བསམ་ཞིབ་གནང་བཞིན་ཡོད་པ་དང་། ཁ་སང་སྐུ་ཞབས་ Nathan ལགས་ཀྱིས་སྐུ་ཞབས་ Pompeo ལགས་སུ་ཧོང་ཀོང་ནང་གི་ད་ལྟའི་གནས་བབ་དང་། ཁུལ་དེའི་ནང་གི་དམངས་གཙོའི་ལས་འགུལ་བཅས་ཀྱི་སྐོར་ལ་སྙན་གསེང་ཞིབ་ཕྲ་ཞུས་འདུགགཞི་རྩའི་ཨ་རིའི་གཞུང་ངོས་ནས་ཉེ་བའི་ཆར་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གྱི་གནད་དོན་འོག་ཤིན་ཅང་གི་དམར་ཤོག་ཚོགས་པའི་དྲུང་ཆེ་གཙོས་པའི་དཔོན་རིགས་ཁག་ཅིག་ཨ་རིའི་ནང་བསྐྱོད་རྒྱུ་བཀག་སྡོམས་བྱས་པ་མ་ཟད། གཞན་ཡང་ཉེ་ལམ་ཡུ་གུར་མང་ཚོགས་ཀྱི་གཞི་རྩའི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་མཁན་རྒྱ་ནག་སྲིད་གཞུང་དང་འབྲེལ་བ་ཡོད་པའི་རྒྱ་ནག་གི་འཕྲུལ་རིགས་དང་གྱོན་ཆས་སོགས་དང་འབྲེལ་བའི་བཟོ་ཚོང་ཁང་༡༡ དངོས་སུ་མིང་འདོན་གནང་སྟེ་ཨ་རི་གཞུང་གིས་ཆོག་མཆན་མེད་པར་མཉམ་འབྲེལ་གྱི་ཚོང་ལས་གནང་མི་ཆོག་པའི་ཉེས་ཆད་བཅད་པ་ལྟར། རྒྱ་ནག་གིས་དེ་རིང་ཨ་རིའི་བྱེད་བབ་དེ་ནི་རྒྱལ་སྤྱིའི་འབྲེལ་ལམ་སྟངས་འཛིན་གྱི་ལམ་ལུགས་དང་བརྒལ་ཞིང་། རྒྱ་ནག་གི་ནང་སྲིད་ལ་ཐེ་གཏོགས་བྱས་པ་ཞིག་ཡིན་པའི་ལན་འདེབས་བྱས་ཡོད་པ་རེད།།

ཨ་རིས་ཧོང་ཀོང་གི་དམིགས་བསལ་གནས་བབ་མཚམས་འཇོག་གནང་བ།

ཨ་རི་སྲིད་འཛིན་ Donald Trump མཆོག་གིས་རྒྱ་ནག་གཞུང་གིས་ཧོང་ཀོང་ཐོག་བྱེད་ཕྱོགས་ལ་ཡ་ལན་ཚུལ་དུ་ཁ་སང་ཧོང་ཀོང་གི་དམིགས་བསལ་གནས་བབ་མཚམས་འཇོག་དགོས་པའི་ཁྲིམས་འཆར་ལ་མཚན་རྟགས་བསྐྱོན་པ་དང་དེ་བཞིན་ཧོང་ཀོང་གི་རང་སྐྱོང་ལ་དོ་ཕོག་གཏོང་མཁན་རྒྱའི་གཞུང་འབྲེལ་ལས་བྱེད་ལ་ཉེས་ཆད་འགེལ་རྒྱུའི་ཁྲིམས་གཏན་འབེབས་གནང་འདུག ཉེ་ལམ་རྒྱ་ནག་གཞུང་གིས་ཧོང་ཀོང་མང་ཚོགས་དང་རྒྱལ་སྤྱིའི་ཚོགས་སྡེ་ཁག་གིས་དགོས་འདུན་ལ་ལྟོས་མེད་ཧོང་ཀོང་བདེ་འཇགས་ཞེས་པའི་ཁྲིམས་གཏན་འབེབས་བྱས་པ་དང་ཁ་སང་སྲིད་འཛིན་ཊམ་མཆོག་གིས་ཕོ་བྲང་དཀར་པོར་གསར་འགོད་ལྷན་ཚོགས་སྐབས་ང་ཚོ་ཚང་མས་ད་བར་ཧོང་ཀོང་ནང་གི་ཡ་ང་བའི་གནས་ཚུལ་གང་བྱུང་བ་རྣམས་ཤེས་རྟོགས་བྱུང་ཡོད་པ་དང་། ད་ཆ་རྒྱ་ནག་གཞུང་གིས་ཧོང་ཀོང་མང་ཚོགས་ཀྱི་རང་དབང་དང་ཐོབ་ཐང་ཡོངས་རྫོགས་བཙན་འཕྲོག་བྱས་ཡོད་སྟབས། ཕྱིན་ཆད་ཨ་རིའི་ངོས་ནས་ཧོང་ཀོང་ལ་རྒྱ་ནག་སྐམ་ས་ཆེན་པོའི་ཡུལ་ལུང་བཞིན་ངོས་འཛིན་གནང་རྒྱུ་ཡིན་པས་ཧོང་ཀོང་ལ་དེ་སྔ་འཕྲུལ་རིག་ཕྱི་ཚོང་དང་ཚོང་འབྲེལ། དེ་བཞིན་དཔལ་འབྱོར་མཐུན་འགྱུར་གྱི་དམིགས་བསལ་གནས་བབ་གནང་བ་དེ་དག་མཚམས་འཇོག་གནང་རྒྱུ་ཡིན་པ་གསུངས་འདུག སྲིད་འཛིན་མཆོག་གིས་ཧོང་ཀོང་གི་ཁྲིམས་འཆར་འདི་བརྒྱུད་ནས་ཁོང་གི་སྲིད་གཞུང་ལ་ཧོང་ཀོང་གི་རང་དབང་མེད་པ་བཟོ་མཁན་གྱི་སྒྲིག་འཛུགས་དང་མི་སྒེར་སུ་འདྲ་ཞིག་ཡིན་རུང་དེ་དག་འགན་ཁུར་བ་ཞིག་བཟོ་བར་དབང་ཆ་གནང་གི་ཡོད་པ་གསུངས་འདུག གཞི་རྩའི་ཧོང་ཀོང་དང་འབྲེལ་ཁྲིམས་འཆར་དེ་ཉེ་ལམ་ཨ་རིའི་གྲོས་ཚོགས་གོང་འོག་གཉིས་ནང་མང་མོས་ རྒྱབ་སྐྱོར་ཐོབ་ཡོད་པ་རེད། སྤྱིར་དེ་སྔ་ཕྱི་ལོ་ ༡༩༩༧ ལོར་དབྱིན་ཇིས་ཧོང་ཀོང་རྒྱ་ནག་ལ་རྩིས་སྤྲོད་སྐབས་ཧོང་ཀོང་ནས་ཉུང་མཐར་ཕྱི་ལོ་ ༢༠༤༧ བར་ཚད་མཐོའི་རང་སྐྱོང་གི་གནས་བབ་ལོངས་སྤྱོད་བཅུག་པ་འཁོད་ཡོད་པ་ལྟར་ད་ལན་ཨ་རིས་གཏན་འབེབས་བྱས་པའི་ཁྲིམས་འཆར་འདི་བརྒྱུད་ཕྱི་མི་སྒེར་སུ་འདྲ་ཞིག་ནས་ཕྱིའི་དངོས་པོའི་ཐོག་ནས་རྒྱ་ནག་གིས་ཧོང་ཀོང་མང་ཚོགས་ཀྱི་རང་དབང་རྡོག་རོལ་གཏོང་བཞིན་པར་རྒྱབ་སྐྱོར་དང་རོགས་འདེགས་གནང་ཚེ་མི་སྣ་དེ་ཚོར་སྲིད་དོན་གྱི་ཉེས་ཆད་འགེལ་རྒྱུ་རེད་འདུགཡང་དེའི་བར་ན་ཧོང་ཀོང་བདེ་འཇགས་ཀྱི་ཁྲིམས་འཆར་གསར་པ་གཏན་འབེབས་བྱས་པ་དང་སྦྲགས་ཏེ་ཧོང་ཀོང་ནང་གསར་འགོད་རང་དབང་གཙོས་མང་ཚོགས་ཀྱི་རང་དབང་ལ་དམ་དྲག་བྱེད་པར་ཐུགས་འཚབ་ཀྱིས་ཡུལ་དེའི་ནང་རྟེན་གཞི་བྱས་པའི་ཨ་རིའི་ནིའུ་ཡོག་དུས་བབ་གསར་ཁང་གི་ཆ་ཤས་ཁག་ཅིག་ལྷོ་ཀོ་རི་ཡའི་རྒྱལ་ས་ Seoul ནང་གནས་སྤོས་གནང་རྒྱུ་ཡོངས་གྲགས་གནང་འདུགགསར་ཁང་དེས་ཧོང་ཀོང་གི་ཆབ་སྲིད་འགྱུར་ལྡོག་དང་བསྟུན་ཧོང་ཀོང་ནང་ཁོང་ཚོའི་ལས་མི་རྣམས་ལ་ད་བར་ཕྱག་ལས་གནང་ཕྱོགས་དང་འབྲེལ་དཀའ་ངལ་མི་ཉུང་བ་འཕྲད་ཡོད་སྟབས་ད་ཆ་རྒྱ་གཞུང་གིས་ཧོང་ཀོང་བདེ་འཇགས་ཀྱི་ཁྲིམས་གཞི་གསར་པ་དེ་གཏན་འབེབས་བྱས་པ་དང་བསྟུན་ལོ་རྗེས་མའི་ནང་ཚུད་ལ་ཧོང་ཀོང་ནང་ཡོད་པའི་གསར་འགོད་པ་ཕལ་མོ་ཆེ་ Seoul  ནང་གནས་སྤོ་གནང་རྒྱུ་ཡིན་པ་གསུངས་འདུགརྩ་བའི་ཨ་རིས་བོད་ནང་ཕར་འགྲོ་ཚུར་འོང་གི་ཁྲིམས་འཆར་ཕྱག་བསྟར་གནང་རྒྱུ་ཡོངས་གྲགས་ཀྱིས་རྒྱ་གཞུང་ནས་ཨ་རིའི་གསར་འགོད་པ་དང་ཡུལ་སྐོར་སྤྲོ་འཆམ་པ། དེ་བཞིན་སྲིད་དོན་པ་དང་གཞུང་འབྲེལ་ལས་བྱེད་སོགས་བོད་ནང་ཕེབས་རྒྱུར་བཀག་སྡོམ་བྱེད་མཁན་རྒྱ་གཞུང་གི་དཔོན་རིགས་ཚོ་ཨ་རིར་ཡོང་རྒྱུར་དམ་དྲག་གནང་རྒྱུ་ཡིན་པ་གསུངས་པ་མ་ཟད། ཡུ་གུར་གྱི་གྲངས་ཉུང་མི་རིགས་ཀྱི་འགྲོ་བ་མིའི་ཐོབ་ཐང་ལ་རྡོག་རོལ་གཏོང་བཞིན་པའི་སྲིད་བྱུས་དང་འབྲེལ་རྒྱ་ནག་གཞུང་འབྲེལ་གྱི་ལས་ཁུངས་གཅིག་དང་དཔོན་རིགས་བཞིར་ཉེས་ཆད་འགེལ་རྒྱུ་ཡིན་པ་སོགས་གསལ་བསྒྲགས་ཡང་གནང་ཡོད་པ་རེད།ཕྱོགས་མཚུངས་ད་ལན་ཨ་རིས་ཧོང་ཀོང་ཐོག་སྤེལ་བའི་གསལ་བསྒྲགས་དེར་རྒྱ་ནག་གཞུང་གི་ཕྱི་སྲིད་ལས་ཁུངས་ཀྱིས་དེ་རིང་རྒྱལ་ཁབ་སུ་ཞིག་ལ་རྒྱ་ནག་ནང་མོལ་གྱི་གནད་དོན་ལ་ཐེ་བྱུས་གནང་དབང་མེད་པ་དང་། ཨ་རི་ནས་ཧོང་ཀོང་བདེ་འཇགས་ཀྱི་ཁྲིམས་འཆར་ལག་བསྟར་ཐད་འགོག་རྐྱེན་བཟོ་ཐབས་བྱེད་པ་ནི་ནམ་ཡང་ཡོང་ཐབས་ད་པར་བརྗོད་འདུག ཨ་རིས་བྱེད་ཕྱོགས་དེར་དེ་མཚུངས་ཀྱི་ཡ་ལན་སློག་རྒྱུ་ཡིན་སྐོར་བརྗོད་འདུག

རྒྱ་གཞུང་གིས་ཨ་རིའི་དཔོན་རིགས་ཁག་ཅིག་ལ་ཉེས་ཆད་འགེལ་རྒྱུ།

ཤིན་ཅང་མང་ཚོགས་ཀྱི་འགྲོ་བ་མིའི་ཐོབ་ཐང་བརྩི་མེད་རྡོག་རོལ་བཏང་བའི་གནད་དོན་དང་འབྲེལ་ཨ་རི་གཞུང་གིས་ཤིན་ཅང་ནང་གི་རྒྱ་ནག་གཞུང་འབྲེལ་ལས་ཁུངས་གཅིག་དང་ད་ལྟའི་ཤིན་ཅང་གི་དམར་ཤོག་ཚོགས་པའི་དཔོན་རིགས་ ༤ ལ་ Global Magnitsky Act ཞེས་པའི་ཁྲིམས་གཞིའི་འོག་ནས་ཉེས་ཆད་བཀལ་བར་ངན་ལན་དང་སྦྲགས་ཏེ་རྒྱ་ནག་གཞུང་གིས་ཨ་རིའི་གྲོས་ཚོགས་དང་འཛིན་སྐྱོང་གི་རྒྱ་ནག་ཐོག་གི་ཚོགས་ཆུང་དང་རྒྱལ་སྤྱིའི་ཆོས་དད་རང་དབང་གི་སྐུ་ཚབ་སྐུ་ཞབས་ Sam Brownback ལགས་དང་གྲོས་ཚོགས་འཐུས་མི་གསུམ་བཅས་ཨ་རིའི་གཞུང་གི་ལས་ཁུངས་གཅིག་དང་དཔོན་རིགས་ ༤ ལ་ཉེས་ཆད་འགེལ་རྒྱུ་ཡིན་པ་ཡོངས་གྲགས་བྱས་འདུགདེ་རིང་རྒྱལ་སྤྱིའི་བརྒྱུད་ལམ་ཁག་གིས་ཁ་སང་རྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་པ་ Hua Chunying ཡིས་གསར་འགོད་ལྷན་ཚོགས་བརྒྱུད་ནས་རྒྱ་ནག་གཞུང་གི་ངོས་ནས་རྣམ་ཀུན་རྒྱ་ནག་གི་འགྲོ་བ་མིའི་ཐོབ་ཐང་གི་གནད་དོན་ཐོག་ཚོར་ཤུགས་ཆེན་པོའི་ཐོག་ནས་གསུང་མཁན་ཨ་རིའི་གཞུང་གི་རྒྱལ་སྤྱིའི་ཆོས་དད་རང་དབང་གི་སྐུ་ཚབ་སྐུ་ཞབས་ Sam Brownback ལགས་དང་ཨ་རིའི་གྲོས་ཚོགས་ཀྱི་ Tom Lantos འགྲོ་བ་མིའི་ཐོབ་ཐང་ཚོགས་ཆུང་གི་ཚོགས་གཙོ་སྐུ་ཞབས་ Chris Smith ལགས། དེ་བཞིན་ཨ་རིའི་གྲོས་ཚོགས་དང་འཛིན་སྐྱོང་གི་རྒྱ་ནག་ཐོག་གི་ཚོགས་ཆུང་གི་ཚོགས་གཙོ་སྐུ་ཞབས་ Marco Rubio ལགས། ཨ་རིའི་གྲོས་ཚོགས་ནང་སྐུ་ཞབས་ Rubio ལགས་ཀྱི་ལྷན་དུ་ཤིན་ཅང་ནང་གི་གནད་དོན་ཐད་རྒྱ་ནག་དཔོན་རིགས་ལ་ཉེས་ཆད་འགེལ་དགོས་པའི་གྲོས་འཆར་འདོན་མཁན་གྲོས་ཚོགས་གོང་མའི་འཐུས་མི་སྐུ་ཞབས་ Ted Cruz ལགས་བཅས་ལ་རྒྱ་ནག་གཞུང་གིས་ཉེས་ཆད་འགེལ་རྒྱུ་ཡིན་པ་དང་ད་ལྟའི་ཆར་ཉེས་ཆད་གང་འགེལ་རྒྱུ་ཡིན་པ་སོགས་ཁ་གསལ་གང་ཡང་བརྗོད་མི་འདུགསྐབས་དེར་རྒྱ་ནག་གི་ཕྱི་སྲིད་ལས་ཁུངས་ཀྱི་མགྲིན་ཚབ་པ་ Hua Chunying ཡིས་ཤིན་ཅང་གི་གནད་དོན་ནི་རྒྱ་ནག་རྒྱལ་ནང་གི་གནད་དོན་ཡིན་པས་ཨ་རི་གཞུང་ལ་དེའི་ཐོག་ཐད་བྱུས་གནང་དབང་མེད་སྐོར་དང་འབྲེལ། ཨ་རི་གཞུང་གི་ངོས་ནས་ཉེ་ལམ་རྒྱ་ནག་གཞུང་འབྲེལ་གྱི་ལས་ཁུངས་གཅིག་དང་དཔོན་རིགས་བཞིར་ཉེས་ཆད་འགེལ་རྒྱུ་ཡིན་པ་ཡོངས་གྲགས་གནང་བ་དེ་ནོར་འཁྲུལ་ཡིན་སྟབས་ནོར་འཁྲུལ་ལ་ཡོ་བསྲང་གནང་དགོས་ཞེས་སྐུལ་མ་གནང་འདུགརྩ་བའི་གཟའ་འཁོར་སྔོན་མའི་ནང་ཨ་རིའི་ཕྱི་སྲིད་ལས་ཁུངས་དང་ཨ་རིའི་ Department of the Treasury ཞེས་ནོར་སྲིད་སྤྱི་ཁྱབ་ལྷན་ཁང་གཉིས་ཀྱིས་དེ་སྔ་ ༢༠༡༦ ཨ་རིའི་གྲོས་ཚོགས་སུ་གཏན་འབེབས་གནང་བའི་ Global Magnitsky Human Rights Accountability Act ཞེས་རྒྱལ་སྤྱིའི་ཁྲོད་འགྲོ་བ་མིའི་ཐོབ་ཐང་ཐོག་འགན་འཁུར་ཐུབ་ཐབས་དང་འབྲེལ་བའི་ཁྲིམས་འཆར་དེ་དངོས་སུ་ཕྱག་བསྟར་བརྒྱུད་དེ་ཡུ་གུར་གྱི་ཁ་ཆེའི་མི་རིགས་ཀྱི་འགྲོ་བ་མིའི་ཐོབ་ཐང་ལ་ཁག་རྡོག་རོལ་གཏང་མཁན་རྒྱ་ནག་གི་དཔོན་རིགས་བཞི་དང་རྒྱ་ནག་གཞུང་འབྲེལ་གྱི་ལས་ཁུངས་གཅིག་བཅས་དངོས་སུ་མིང་མངོན་གསལ་གྱིས་དཔལ་འབྱོར་གྱི་ཉེས་ཆད་འགེལ་རྒྱུ་དང་ཨ་རིར་འགྲོ་ཆོག་པའི་མཐོང་མཆན་ལ་དམ་དྲག་གནང་རྒྱུ་ཡིན་སྐོར་གསུངས་པ་མ་ཟད། དེ་སྔ་རྒྱ་གཞུང་གིས་དབྱེ་བའི་བོད་རང་སྐྱོང་ལྗོངས་ཀྱི་རྒྱ་ནག་དམར་ཤོག་ཚོགས་པའི་དྲུང་ཆེ་བྱེད་མྱོང་ཡོད་པ་ད་ལྟ་ཤིན་ཅང་རང་སྐྱོང་ལྗོངས་ཀྱི་དམར་ཤོག་ཚོགས་པའི་དྲུང་ཆེ་ Chen Quanguo དང་ཤིན་ཅང་རང་སྐྱོང་ལྗོངས་ཀྱི་དམར་ཤོག་ཚོགས་པའི་དྲུང་ཆེ་གཞོན་པ་ Zhu Hailun དེ་བཞིན་ཤིན་ཅང་རང་སྐྱོང་ལྗོངས་ཁོངས་སུ་ཆེད་འཛུགས་བྱས་པའི་རྒྱ་ནག་དམར་ཤོག་ཚོགས་པའི་སྤྱི་བདེ་ལས་ཁུངས་ཀྱི་དམར་ཤོག་དྲུང་ཆེ་དང་འགན་འཛིན་གཅིག་ལྕོགས་ Wang Mingshan ལས་ཁུངས་དེའི་དམར་ཤོག་དྲུང་ཆེ་ཟུར་པ་ Huo Liujun བཅས་ཀྱི་མིང་མངོན་གསལ་གནང་ཡོད།ཨ་རིའི་ཐག་གཅོད་དེའི་འོག་ཤིན་ཅང་རང་སྐྱོང་ལྗོངས་ཁོངས་སུ་ཆེད་འཛུགས་བྱས་པའི་རྒྱ་ནག་དམར་ཤོག་ཚོགས་པའི་སྤྱི་བདེ་ལས་ཁུངས་དང་དཔོན་རིགས་བཞི་པོ་རྣམས་ཀྱི་ས་ཁང་དང་། དཔལ་འབྱོར་སོགས་ཨ་རི་ནང་ཡོད་པ་རྣམས་བེད་སྤྱོད་བྱེད་མི་ཆོག་པ་དང་། ཁོང་རྣམ་པ་དང་དངོས་ཤུགས་བརྒྱུད་གསུམ་ནས་དཔལ་འབྱོར་དང་ཚོང་སོགས་ཀྱི་འབྲེལ་བ་ཡོད་པའི་ཨ་རིའི་གཞུང་འབྲེལ་ལས་ཁུངས་དང་གང་ཟག་སྒེར་རྣམས་ནས་ཀྱང་དེ་དག་དང་འབྲེལ་བ་གནང་མི་ཆོག་པ་བཟོས་འདུག།དེ་རྣམས་ཀྱིས་གཙོས་པའི་ནང་མི་ཉེ་འབྲེལ་རྣམས་ཨ་རིར་ཡོང་རྒྱུའི་མཐོང་མཆན་ལ་དམ་དྲག་གནང་གཏན་ཁེལ་འདུག དཔྱད་ཞིབ་པ་རྣམས་ཀྱིས་ད་ལྟ་ཨ་རི་དང་རྒྱ་ནག་གཉིས་དབར་འབྲེལ་ལམ་ཆེས་ཞན་པོ་ཆགས་ཡོད་པ་དང་། རྒྱལ་ཁབ་ཕྱོགས་གཉིས་ཀྱི་ངོས་ནས་བཞེངས་ཕྱོགས་མཁྲེགས་པོ་འཛིན་ཡོད་པ་ལྟར་དེ་ལྟར་གནང་བ་མ་གཏོགས། ཕན་ཚུན་ཉེས་ཆད་འགེལ་སའི་ལས་ཁུངས་དང་སྒེར་གྱི་དཔོན་རིགས་རྣམས་དང་ལྷན་དུ་དུས་རྒྱུན་ཚོང་སོགས་ཀྱི་འབྲེལ་བ་དེ་ཙམ་མེད་སྟབས། ཚོང་འབྲེལ་ལ་དམིགས་བསལ་དཔོ་ཕོག་གི་མེད་པ་དེ་ལྟར་ཡང་། གལ་ཏེ་ཨ་རི་གཞུང་གིས་ཧོང་ཀོང་ནང་གི་ཁྲིམས་གཞིའི་འོག་ནས་ལག་བསྟར་གནང་ཚེ་ཕྱོགས་གཉིས་ཀྱི་ཚོང་འབྲེལ་ལའང་དོ་ཕོག་ངེས་ཅན་འགྲོ་སྲིད་པར་གསུངས་འདུག

རྒྱ་དཀར་ནག་དབར་སྤུན་མཆེད་ཀྱི་འདུ་ཤེས་ཡོད་ཚུལ་བརྗོད་དོན་ལྟར་ཕྱག་བསྟར་གནང་དགོས།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་དཀར་ནག་གཉིས་དབར་ལོ་རྒྱུས་ཀྱི་ཐོག་ནས་འབྲེལ་བ་ཡོད་པ་མ་ཟད་དུས་ད་ལྟའང་ཆོས་ཡོན་སོགས་ཀྱི་འབྲེལ་བ་ཆེན་པོ་ཡོད་པ་ལྟར། རྒྱལ་ཁབ་ཕྱོགས་གཉིས་ཀའི་ངོས་ནས་མཐའ་མཚམས་སྲུང་སྐྱོབ་ལ་འགྲོ་གྲོན་ཕོན་ཆེན་པོ་བཏང་བ་ལས་ཕན་ཚུན་ཞི་བདེ་མཉམ་གནས་གོང་འཕེལ་སླད་འགྲོ་གྲོན་མང་ཙམ་གཏང་དགོས་པར་ལམ་སྟོན་བསྩལ་བ་དང་སྦྲགས། Hindi Chini Bhai Bhai ཞེས་རྒྱ་གར་དང་རྒྱ་ནག་དབར་སྤུན་མཆེད་ཀྱི་འདུ་ཤེས་ཡོད་ཚུལ་བརྗོད་དོན་ལྟར་དོན་འཁྱོལ་ཕྱག་བསྟར་གནང་དགོས་གལ་ཡིན་པར་བཀའ་སློབ་བཀྲིན་ཆེ་བ་བསྩལ་འདུགཁ་སང་ Time བརྒྱུད་ལམ་གྱིས་གོ་སྒྲིགས་གནང་བའི་ Time 100 Talks ཞེས་པའི་དྲྭ་རྒྱའི་ལས་རིམ་ཐོག་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཏོག་དབྱིབས་རིམས་ནད་ཀྱི་གནས་སྟངས་ཁྲོད་སེམས་ཞི་བར་གནས་ཐབས་དང་ཨ་རི་གཙོས་འཛམ་གླིང་ནང་མི་རིགས་དབྱེ་འབྱེད་ཀྱི་དཀའ་ངལ། དེ་བཞིན་ཁོར་ཡུག་དང་རྒྱ་དཀར་ནག་གཉིས་དབར་ས་མཚམས་དང་འབྲེལ་དཀའ་རྙོག་བཅས་ཀྱི་གནད་དོན་ཐོག་བཀའ་འདྲི་དགོངས་སྐོར་ཁག་ཅིག་ཞུས་ཡོད་པ་དང་། ༸གོང་ས་མཆོག་གིས་རྒྱ་དཀར་ནག་གཉིས་དབར་ས་མཚམས་རྩོད་རྙོག་དང་འབྲེལ་བའི་བཀའ་འདྲིར་རྒྱ་གར་དང་རྒྱ་ནག་གཉིས་ཀ་འཛམ་གླིང་ནང་མི་འབོར་མང་ཤོས་ཀྱི་རྒྱལ་ཁབ་ཡིན་པ་དང་། དེ་བཞིན་གཅིག་ནི་མང་གཙོའི་རྒྱལ་ཁབ་དང་གཞན་དེ་དམར་ཤོག་རྒྱལ་ཁབ་ཡིན་པའི་ཆ་ནས་ཕན་ཚུན་འགྲན་བསྡུར་བཅས་ཀྱི་ཁྲོད་རྒྱལ་ཁབ་ནང་ཁུལ་ལ་རྩོད་རྙོག་ཕྲན་བུ་ཡོང་སྲིད་ཀྱང་། ལོ་རྒྱུས་ལ་བལྟས་ནས་རྒྱ་ནག་དེ་ནང་པའི་རྒྱལ་ཁབ་ཅིག་དང་རྒྱ་གར་ནི་བདག་ཅག་གི་སྟོན་པ་བཅོམ་ལྡན་འདས་གང་ཉིད་༸སྐུ་འཁྲུངས་སའི་ཞིང་ཁམས་ཆགས་ཀྱི་ཡོད་པ་ལྟར་སངས་རྒྱས་ཀྱི་ཆོས་བོད་སྒྱུར་མ་གནང་གོང་དུ་རྒྱ་སྐད་ནང་བསྒྱུར་ཟིན་པ་སོགས་བཀའ་བསྩལ་ཏེ་རྒྱལ་ཁབ་ཕྱོགས་གཉིས་དབར་ཡུན་རིང་ནས་ཆོས་ཡོན་སོགས་ཀྱི་འབྲེལ་བ་ཆེན་པོ་ཡོད་པ་ལྟར་དུས་ད་ལྟའང་རྒྱ་ནག་གི་ནང་པ་མང་པོ་ལོ་ལྟར་རྒྱ་གར་གྱི་གནས་མཆོག་རྡོ་རྗེ་གདན་ལ་གནས་སྐོར་དུ་ཡོང་བཞིན་ཡོད་པ་སོགས་ལུང་འདྲེན་དང་འབྲེལ། གང་ལྟར་ཕན་མཚུན་མཉམ་གནས་གནང་དགོས་གལ་ཡིན་སྟབས་རྒྱལ་ཁབ་ཕྱོགས་གཉིས་ཀའི་ངོས་ནས་ས་མཚམས་སྲུང་སྐྱོབ་ཆེད་དུ་འགྲོ་གྲོན་ཕོན་ཆེ་བཏང་བ་ལས་ཕན་མཚུན་ཞི་བདེའི་ངང་མཉམ་གནས་ཐུབ་ཐབས་དང་ཡར་རྒྱས་ཀྱི་ཆེད་དུ་འགྲོ་གྲོན་བཏང་དགོས་པ་དང་། ལྷག་པར་དུ་དེ་སྔ་ ། Hindi Chini Bhai Bhai ཞེས་རྒྱ་གར་དང་རྒྱ་ནག་དབར་སྤུན་མཆེད་ཀྱི་འདུ་ཤེས་ཡོད་ཚུལ་བརྗོད་དོན་ལྟར་དོན་འཁྱོལ་ཕྱག་བསྟར་གནང་དགོས་གལ་ཡིན་པར་བཀའ་སློབ་བཀྲིན་ཆེ་བ་བསྩལ་འདུགདེ་བཞིན་དེང་སྐབས་ཨ་རི་ནང་མི་རིགས་ནག་པོའི་གནད་དོན་དང་འབྲེལ་མི་རིགས་དབྱེ་འབྱེད་ཀྱི་ངལ་བ་འཕྲད་བཞིན་སྐོར་དང་འབྲེལ་བཀའ་འདྲི་ཞུས་པར་མི་རིགས་དབྱེ་འབྱེད་ཀྱི་དཀའ་ངལ་ཡོང་དང་མི་ཡོང་ཞེས་པ་དེ་གང་ཟག་སྒེར་གྱི་ཕྱག་ཏུ་ཡོད་པ་དང་། གཞུང་གི་ངོས་ནས་མང་ཚོགས་ཀྱི་བསམ་བློར་དོ་སྣང་གནང་སྟེ་དེ་འབྲེལ་ངལ་བ་མི་འཕྲད་པར་ཐུགས་ཁུར་བཞེས་གནད་ཡིན་པ་བཀའ་བསྩལ་བ་དང་ཆབས་ཅིག དེང་སྐབས་མང་གཙོའི་དུས་རབས་ཤིག་ཡིན་སྟབས་མང་ཚོགས་ལ་ཐག་གཅོད་གནང་རྒྱུའི་འགན་དབང་ཡོད་པ་བཞིན་ནང་སེམས་ཀྱི་སློབ་སྦྱོང་ཡོད་པའི་ཐོག་ནས་མཐར་མང་ཚོགས་ནས་ཐག་གཅོད་གནང་རྒྱུ་ཡིན་པ་བཀའ་བསྩལ་འདུག༸གོང་ས་མཆོག་གིས་མགོན་པོ་༸གང་ཉིད་མཆོག་ནས་བོད་ཀྱི་ཆབ་སྲིད་ཀྱི་ཐུགས་འགན་བཞེས་ཀྱི་མེད་ཀྱང་བོད་ཀྱི་ཐུན་མོང་མ་ཡིན་པའི་ཆོས་རིག་དང་བོད་ཀྱི་ཁོར་ཡུག་སྲུང་སྐྱོབ་ཀྱི་གནད་དོན་དེ་དག་ཐུགས་བསྐྱེད་བཞིའི་ཁོངས་ནས་གཅིག་ཡིན་པ་ལྟར་ཐུགས་འགན་བཞེས་ཀྱི་ཡོད་པར་བརྟེན་བོད་དེ་འཛམ་གླིང་སྤྱི་ཡོངས་ཀྱི་ཁོར་ཡུག་གནས་སྟངས་དང་འབྲེལ་བ་ཆེན་པོ་ཡོད་པ་མ་ཟད། ལྷག་དོན་ཨེ་ཤ་ཡའི་གླིང་ཆེན་གྱི་ཐུང་ཆུའི་མཛོད་ལྟ་བུ་ཡིན་སྟབས་འཛམ་གླིང་གི་ངོས་ནས་བོད་ཀྱི་ཁོར་ཡུག་གནད་དོན་ཐོག་ཐུགས་སྣང་ཆེ་ཙམ་གནང་དགོས་པ་བཀའ་བསྩལ་འདུགམགོན་པོ་མཆོག་གིས་ད་དུང་དེང་སྐབས་ཏོག་དབྱིབས་རིམས་ནད་ཁྱབ་གདལ་གྱི་ཆེས་ཛད་དྲག་གི་གནས་སྟངས་དང་འབྲེལ། རང་སྲོག་ལ་ལྟོས་མེད་ཀྱིས་འགྲོ་བ་མིའི་ཚེ་སྲོག་སྐྱོབ་མཁན་གྱི་སྨན་པ་དང་སྨན་ཞབས་རྣམས་ཀྱི་ཕྱག་ལས་ལ་ཡི་རང་བསྔགས་བརྗོད་མཛད་པ་དང་། དེ་སྔ་དུས་རབས་བརྒྱད་པའི་ནང་བོད་དུ་ཕེབས་པའི་རྒྱ་གར་གྱི་མཁས་གྲུབ་ཚོས་གལ་ཏེ་བཅོས་སུ་ཡོད་ན་དེར་ཧུར་བརྩོན་ཆེན་པོས་འབད་དགོས་པ་དང་། གལ་ཏེ་བཅོས་རྒྱུ་མེད་ཚེ་དེར་འབད་དོན་མེད་ཅེས་གསུངས་པ་ལྟར་དཀའ་ངལ་དེ་སེལ་རྒྱུ་ཡོད་ཚེ་ཧུར་བརྩོན་གནང་དགོས་པ་དང་དེ་ལྟར་མེད་ཚེ་དེའི་ཐོག་ངལ་བ་དང་སེམས་ཁྲལ་གནང་བ་དོན་མེད་ཡིན་པས་ཚང་མས་རེ་བ་མ་བརླག་པར་བཟང་ཕྱོགས་ཀྱི་ཐོག་ནས་དགོངས་པ་བཞེས་ནས་ངལ་བ་དག་ལ་གདོང་ལེན་གནང་དགོས་ཞེས་ལམ་སྟོན་མཛད་འདུགརྩ་བའི་ Time 100 Talks ཞེས་པའི་དྲྭ་རྒྱའི་ལས་རིམ་ཐོག་༸གོང་ས་༸སྐྱབས་མགོན་ཆེན་པོ་མཆོག་གིས་གཙོས་པའི་རྒྱལ་སྤྱིའི་ཁྲོད་ཀྱི་ཆབ་སྲིད་མི་སྣ་དང་འགྲོ་བ་མིའི་ཐོབ་ཐང་ལས་འགུལ་བ་གྲགས་ཅན། དེ་བཞིན་ཁོར་ཡུག་ལས་འགུལ་བ། མི་རིགས་འདྲ་མཉམ་གྱི་ཐོབ་ཐང་རྩོད་ལེན་པ་སོགས་མི་སྣ་གྲགས་ཅན་ ༡༠༠ ཙམ་གདན་ཞུ་ཐོག་འཛམ་གླིང་ཞི་བདེ་ལྡན་པ་དང་མཉམ་གནས་ཐུབ་ཐབས་བསྐྲུན་གནད་སོགས་ཀྱི་བརྗོད་གཞིའི་ཐད་བཀའ་བསྡུར་གནང་ཡོད་པ་རེད།

ཨ་རིས་རྒྱ་ནག་གཞུང་འབྲེལ་གྱི་ལས་ཁུངས་གཅིག་དང་དཔོན་རིགས་བཞིར་ཉེས་ཆད་འགེལ་རྒྱུ་རེད་འདུག

ཨ་རིའི་ཕྱི་སྲིད་དྲུང་ཆེ་སྐུ་ཞབས་ Mike Pompeo མཆོག་གིས་བོད་ནང་ཕར་འགྲོ་ཚུར་འོང་གི་ཁྲིམས་འཆར་དེ་ཕྱག་བསྟར་བརྒྱུད་ཨ་རིའི་གསར་འགོད་པ་དང་ཡུལ་སྐོར་སྤྲོ་འཆམ་པ། དེ་བཞིན་སྲིད་དོན་པ་དང་གཞུང་འབྲེལ་ལས་བྱེད་སོགས་བོད་ནང་ཕེབས་རྒྱུར་བཀག་སྡོམ་བྱེད་མཁན་རྒྱ་གཞུང་གི་དཔོན་རིགས་ཚོ་ཨ་རིར་ཡོང་རྒྱུར་དམ་དྲག་གནང་རྒྱུ་ཡིན་པ་ཡོངས་གྲགས་གནང་ནས་ཉིན་གཉིས་སོང་མཚམས་སུ་ཨ་རི་གཞུང་ནས་ཡུ་གུར་གྱི་གྲངས་ཉུང་མི་རིགས་ཀྱི་འགྲོ་བ་མིའི་ཐོབ་ཐང་ལ་རྡོག་རོལ་གཏོང་བཞིན་པའི་སྲིད་བྱུས་དང་འབྲེལ་བ་ཡོད་པའི་རྒྱ་ནག་གཞུང་འབྲེལ་གྱི་ལས་ཁུངས་གཅིག་དང་དཔོན་རིགས་བཞིར་ཉེས་ཆད་འགེལ་རྒྱུ་ཡིན་པ་གསལ་བསྒྲགས་གནང་འདུགཁ་སང་ཕྱི་ཚེས་ ༩ ཉིན་ཨ་རིའི་ཕྱི་སྲིད་ལས་ཁུངས་དང་ཨ་རིའི་ Department of the Treasury ཞེས་ནོར་སྲིད་སྤྱི་ཁྱབ་ལྷན་ཁང་གཉིས་ཀྱིས་དེ་སྔ་ ༢༠༡༦ ཨ་རིའི་གྲོས་ཚོགས་སུ་གཏན་འབེབས་གནང་བའི་ Global Magnitsky Human Rights Accountability Act ཞེས་རྒྱལ་སྤྱིའི་ཁྲོད་འགྲོ་བ་མིའི་ཐོབ་ཐང་ཐོག་འགན་འཁུར་ཐུབ་ཐབས་དང་འབྲེལ་བའི་ཁྲིམས་འཆར་དེ་དངོས་སུ་ཕྱག་བསྟར་བརྒྱུད་དེ་ཡུ་གུར་གྱི་ཁ་ཆེའི་མི་རིགས་ཀྱི་འགྲོ་བ་མིའི་ཐོབ་ཐང་ལ་ཁག་རྡོག་རོལ་གཏང་མཁན་རྒྱ་ནག་གི་དཔོན་རིགས་བཞི་དང་རྒྱ་ནག་གཞུང་འབྲེལ་གྱི་ལས་ཁུངས་གཅིག་བཅས་དངོས་སུ་མིང་མངོན་གསལ་གྱིས་དཔལ་འབྱོར་གྱི་ཉེས་ཆད་འགེལ་རྒྱུ་དང་ཨ་རིར་འགྲོ་ཆོག་པའི་མཐོང་མཆན་ལ་དམ་དྲག་གནང་རྒྱུ་ཡིན་པ་གསུངས་འདུག མིང་མངོན་གསལ་གནང་བའི་རྒྱ་ནག་གི་དཔོན་རིགས་བཞི་པོ་ནི་དེ་སྔ་རྒྱ་གཞུང་གིས་དབྱེ་བའི་བོད་རང་སྐྱོང་ལྗོངས་ཀྱི་རྒྱ་ནག་དམར་ཤོག་ཚོགས་པའི་དྲུང་ཆེ་བྱེད་མྱོང་ཡོད་པ་ད་ལྟ་ཤིན་ཅང་རང་སྐྱོང་ལྗོངས་ཀྱི་དམར་ཤོག་ཚོགས་པའི་དྲུང་ཆེ་ Chen Quanguo དང་ཤིན་ཅང་རང་སྐྱོང་ལྗོངས་ཀྱི་དམར་ཤོག་ཚོགས་པའི་དྲུང་ཆེ་གཞོན་པ་ Zhu Hailun དེ་བཞིན་ཤིན་ཅང་རང་སྐྱོང་ལྗོངས་ཁོངས་སུ་ཆེད་འཛུགས་བྱས་པའི་རྒྱ་ནག་དམར་ཤོག་ཚོགས་པའི་སྤྱི་བདེ་ལས་ཁུངས་ཀྱི་དམར་ཤོག་དྲུང་ཆེ་དང་འགན་འཛིན་གཅིག་ལྕོགས་ Wang Mingshan ལས་ཁུངས་དེའི་དམར་ཤོག་དྲུང་ཆེ་ཟུར་པ་ Huo Liujun བཅས་ཡིན་པ་རེད།ཨ་རིའི་ཐག་གཅོད་དེའི་འོག་ཤིན་ཅང་རང་སྐྱོང་ལྗོངས་ཁོངས་སུ་ཆེད་འཛུགས་བྱས་པའི་རྒྱ་ནག་དམར་ཤོག་ཚོགས་པའི་སྤྱི་བདེ་ལས་ཁུངས་དང་དཔོན་རིགས་བཞི་པོ་རྣམས་ཀྱི་ས་ཁང་དང་། དཔལ་འབྱོར་སོགས་ཨ་རི་ནང་ཡོད་པ་རྣམས་བེད་སྤྱོད་བྱེད་མི་ཆོག་པ་དང་། ཁོང་རྣམ་པ་དང་དངོས་ཤུགས་བརྒྱུད་གསུམ་ནས་དཔལ་འབྱོར་དང་ཚོང་སོགས་ཀྱི་འབྲེལ་བ་ཡོད་པའི་ཨ་རིའི་གཞུང་འབྲེལ་ལས་ཁུངས་དང་གང་ཟག་སྒེར་རྣམས་ནས་ཀྱང་དེ་དག་དང་འབྲེལ་བ་གནང་མི་ཆོག་པ་བཟོས་འདུག།དེ་རྣམས་ཀྱིས་གཙོས་པའི་ནང་མི་ཉེ་འབྲེལ་རྣམས་ཨ་རིར་ཡོང་རྒྱུའི་མཐོང་མཆན་ལ་དམ་དྲག་གནང་གཏན་ཁལེ་འདུག གནད་དོན་དེ་དང་འབྲེལ་ཨ་རི་ཕྱི་སྲིད་དྲུང་ཆེ་སྐུ་ཞབས་ Mike Pompeo མཆོག་གིས་ཨ་རིའི་ངོས་ནས་རྒྱ་ནག་གཞུང་གིས་ཤིང་ཅང་ནང་ལག་བསྟར་བྱེད་བཞིན་པའི་དྲག་པོའི་སྲིད་བྱུས་ཐད་ནམ་ཡང་ཁ་ཁུ་སིམ་པོ་བཞུགས་རྒྱུ་མིན་པ་དང་ལྷག་པར་དུ་དམར་ཤོག་ཚོགས་པའི་དྲུང་ཆེ་ Chen Quanguo ཡིས་ད་ལྟ་ཤིན་ཅང་ནང་ཙམ་མ་ཟད་དེ་སྔ་བོད་ནང་དྲག་པོའི་སྲིད་བྱུས་མང་དག་ཅིག་ལག་བསྟར་བརྒྱུད་བོད་མིའི་འགྲོ་བ་མིའི་ཐོབ་ཐང་སོགས་ལ་རྡོག་རོལ་མང་པོ་བཏང་མྱོང་མཁན་ཞིག་རེད་ཅེས་གསུངས་འདུགཨ་རིའི་ནོར་སྲིད་སྤྱི་ཁྱབ་ལྷན་ཁང་གི་དྲུང་ཆེ་སྐུ་ཞབས་ Steven Mnuchin ལགས་ནས་ཨ་རིའི་ངོས་ནས་དཔལ་འབྱོར་གྱི་ནུས་ཤུགས་ཡོད་ཚད་ཆེད་འདོན་གྱིས་ཤིན་ཅང་གཙོས་འཛམ་གླིང་ཁྱོན་ཡོངས་སུ་འགྲོ་བ་མིའི་ཐོབ་ཐང་རྡོག་རོག་གཏང་མཁན་རྣམས་འགན་ཁུར་ལྡན་པ་ཞིག་བཟོ་རྒྱུའི་ཆོད་སེམས་བརྟན་པོ་ཡོད་ཅེས་གསུངས་འདུག གཞི་རྩའི་ད་རེས་ཨ་རི་གཞུང་ནས་རྒྱ་ནག་གི་དཔོན་རིགས་ཐོག་ཕྱག་བསྟར་གནང་བའི་ Global Magnitsky Human Rights Accountability Act ཞེས་རྒྱལ་སྤྱིའི་ཁྲོད་འགྲོ་བ་མིའི་ཐོབ་ཐང་ཐོག་འགན་ཁུར་ཐུབ་ཐབས་དང་འབྲེལ་བའི་ཁྲིམས་འཆར་དེ་ཕྱི་ལོ་ ༢༠༡༢ ལོར་ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་ Ben Cardin ལགས་ཀྱིས་གྲོས་ཚོགས་སུ་འདོན་སྤེལ་གནང་རྗེས་ཕྱི་ལོ་ ༢༠༡༦ ཕྱི་ཟླ་ ༡༢ ནང་གྲོས་ཚོགས་སུ་གཏན་འབེབས་དང་། དེ་ནས་ཕྱི་ལོ་ ༢༠༡༧ ལོར་ཨ་རིའི་སྲིད་འཛིན་མཆོག་གིས་མཚན་རྟགས་བསྐྱོད་ནས་ཁྲིམས་སུ་བཅད་པ་ཞིག་ཡིན་པ་དང་། ཁྲིམས་གཞི་དེའི་འོག་འགྲོ་བ་མིའི་ཐོབ་ཐང་རྡོག་རོལ་གཏང་མཁན་རྒྱ་ནག་གི་དཔོན་རིགས་ཁག་ཅིག་མིང་མངོན་གསལ་གྱིས་ཉེས་ཆད་བཅད་པ་ཆེས་ཐོག་མ་ཆགས་ཀྱི་ཡོད་པ་རེད།

རྒྱ་དཀར་ནག་གཉིས་ཀྱི་ས་མཚམས་ཀྱི་གདོང་ཐུག་ཛ་དྲག་ཏུ་འགྲོ་བཞིན་འདུག

  ཉེ་ཆར་ཟླ་བ་འདིའི་ཕྱི་ཚེས་ ༥ ཉིན་རྒྱ་གར་བྱང་ཕྱོགས་ལ་དྭགས་སྤང་སྒོང་མཚོའི་ཁུལ་དུ་རྒྱ་དཀར་ནག་གཉིས་ཀྱི་མཐའ་སྲུང་དམག་མི་ ༢༥༠ ཙམ་གྱི་དབར་ལ་གདོང་ཐུག་གི་གནད་དོན་བྱུང་སྟེ་དམག་མི་༡༠༠ ལྷག་ལ་རྨས་སྐྱོན་བྱུང་པའི་གནད་དོན་ཀྱི་རྐྱེན་གྱིས་ད་ཆ་ལ་དྭགས་ཁུལ་གྱི་རྒྱ་དཀར་ནག་གི་ས་མཚམས་ས་ཁུལ་ཁག་གི་གནས་སྟངས་ཛ་དྲག་ཏུ་འགྲོ་བཞིན་འདུག དེ་ཡང་ཁ་སང་རྒྱ་གར་དང་རྒྱ་ནག་གཞུང་འབྲེལ་གྱི་བརྒྱུད་ལམ་ཁག་ཏུ་དེ་འབྲེལ་གནས་ཚུལ་སྤེལ་བར་གཞིགས་ན། ཕྱི་ཚེས་ ༥ ཉིན་བྱུང་བའི་གདོང་ཐུག་གི་གནད་དོན་དེའི་རྐྱེན་གྱིས་ད་ཆ་ལ་དྭགས་གྷལ་ཝན་ལུང་གཤོངས་དང་། ཊེམ་ཆོག་དང་དེ་བཞིན་ Daulat Beg Oldie སོགས་རྩོད་གཞི་ཅན་གྱི་རྒྱ་དཀར་ནག་གི་ས་མཚམས་ས་ཁུལ་ཁག་གི་གནས་སྟངས་ཛ་དྲགས་ཏུ་ཕྱིན་ཏེ། རྒྱ་ནག་ཕྱོགས་ནས་ས་ཁུལ་དེ་དག་ཏུ་དམག་མི་ ༢༥༠༠ ལྷག་ཁ་སྣོན་བྱས་པ་མ་ཟད། དམག་མི་སྡོད་སའི་སྡོད་གུར་ ༡༠༠ ལྷག་ཆེད་འཛུགས་དང་དམག་དང་འབྲེལ་བའི་གོ་མཚོན་མང་དག་ཅིག་འབོར་འདྲེན་བྱས་ཡོད་འདུག གནད་དོན་དེའི་ཐད་རྒྱ་གར་བྱང་པྱོགས་ཁུལ་གི་དམག་སྤྱི་ཟུར་པ་ DS Hooda ལགས་ཀྱིས། གྷལ་ཝན་ལུང་གཤོང་དུ་རྒྱ་ནག་དམག་མིས་སིམ་འཛུལ་བྱས་པ་དེ་ནི་ད་རེས་ཐེངས་དང་པོ་ཡིན་སྟབས། གནད་དོན་འདི་ནི་སེམས་འཚབ་བྱ་ཡུལ་ཞིག་རེད་ཅེས་གསུངས་འདུག་པ་མ་ཟད། རྒྱ་གར་གྱི་དམག་ཇུས་ལྷན་ཁང་གི་སྐུ་ཚབ་ Ashok Kantha ལགས་ཀྱིས།  ཐེངས་འདིའི་གདོང་ཐུག་གི་གནད་དོན་དེ་ནི་དེ་སྔར་ལས་ཛ་དྲག་ཏུ་ངོས་འཛིན་ཞུས་པའི་ཐོག་ད་ཆ་ས་ཁུལ་དེ་དག་ཏུ་རྒྱ་གར་གི་དམག་མི་རྣམས་ནས་ལྟ་སྲུང་ནན་པོ་བྱེད་བཞིན་པ་གསུངས་འདུག འོན་ཀྱང་ཁྲིན་ཏོ་རྒྱལ་སྤྱིའི་ལས་དོན་ལྟེ་གནས་ཁང་གི་འགན་འཛིན་ Long Xingchun གྱི་རྒྱ་ནག་གཞུང་འབྲེལ་གྱི་བརྒྱུད་ལམ་Global Times བརྒྱུད། རྒྱ་གར་གཞུང་ནས་གྷལ་ཝན་ལུང་གཤོངས་དེ་རྒྱ་ནག་གི་ས་ཁུལ་ཡིན་པ་ཤེས་བཞིན་དུ་དམག་མི་བཏང་པ་དེ་ནི་རྒྱ་གར་གྱི་ནོར་འཁྲུལ་ཡིན་པ་དང་། གལ་ཏེ་རྒྱ་གར་གྱི་མུ་མཐུད་ཕྱོགས་གཉིས་ཀྱི་ས་མཚམས་ས་ཁུལ་དུ་འཁྲུག་རྐྱེན་བསླངས་བ་ཡིན་ན།  ཕྱོགས་གཉིས་ཀྱི་འབྲེལ་ལམ་ལ་དོ་ཕོག་ཆེན་པོ་ཐེབས་ཀྱི་རེད་ཅེས་བརྗོད་འདུག ཕྱོགས་གཉིས་ཀྱི་ས་མཚམས་ཀྱི་རྩོད་རྙོག་དེའི་ཁྲོད་ཁ་སང་རྒྱ་ནག་གཞུང་ནས་ཏོག་དབྱིབས་རིམས་ནད་ཀྱི་ཛ་དྲག་གནས་སྟངས་ཁྲོད་རྒྱ་གར་ནང་ཡོད་པའི་རྒྱ་རིགས་ཡུལ་སྐོར་སྤྲོ་འཆམ་པ་དང་སློབ་ཕྲུག དེ་བཞིན་ཚོང་པ་དང་གནས་མཇལ་སོགས་ལ་ཕེབས་པ་རྣམས་ཕྱིར་རྒྱ་ནག་ལ་ལོག་རྒྱུའི་གནམ་གྲུ་གྲ་སྒྲིག་བྱེད་རྒྱུ་ཡིན་སྐོར་བརྗོད་འདུག་པ་དང་། རྒྱལ་ས་ལྡི་ལིར་ཡོད་པའི་རྒྱ་ནག་གཞུང་ཚབ་ཁང་གིས་ཉེ་ཆར་ཐེ་ཝན་གྱི་སྲིད་འཛིན་ལྕམ་  Tsai Ing-wen ལགས་ཀྱི་ལས་ཡུན་གཉིས་པ་དབུ་འཛུགས་ཀྱི་དམ་འབུལ་མཛད་སྒོའི་ཐོག་རྒྱ་གར་གཞུང་འཛིན་ཚོགས་པའི་གྲོས་ཚོགས་འཐུས་མི་ Meenakshi Lekhi ལགས་དང་ Rahul Kaswan ལགས་གཉིས་དྲ་ཐོག་ནས་མཉམ་ཞུགས་གནང་པ་དེ་ནི་རྒྱ་ནག་གཅིག་གི་སྲིད་བྱུས་ལ་བརྩི་བཀུར་མ་ཞུས་པ་རེད་ཅེས་སྐྱོན་བརྗོད་བྱས་འདུག འོན་ཀྱང་རྒྱ་གྱི་གྲོས་ཚོགས་འཐུས་མི་ Rahul Kaswan ལགས་ནས། ཐེ་ཝན་གྱི་སྲིད་འཛིན་ལ་འཚམས་འདྲི་ཞུས་པ་དེ་ནི་རྒྱ་ནག་གཅིག་གི་སྲིད་བྱུས་དང་འབྲེལ་བ་མེད་པ་དང་། རྒྱ་ནག་གཞུང་ཚབ་པས་གནད་དོན་དེ་དང་འབྲེལ་བ་བཏངས་སྟེ་གནས་ཚུལ་འཁྱོག་བཤད་བྱེད་ཀྱི་འདུག་ཅེས་ལན་འདེབས་བྱས་འདུག གཞི་རྩའི་ཉེ་བའི་ཆ་ལ་དྭགས་ཁུལ་དུ་ཆགས་པའི་རྒྱ་དཀར་ནག་དབར་གྱི་ས་མཚམས་ཁུལ་ཙམ་མ་ཟད། ཉིན་ཤས་གོང་ལ་རྒྱ་གར་བྱང་ཤར་འབྲས་ལྗོངས་ཁུལ་དུ་ཆགས་པའི་རྒྱ་དཀར་ནག་གཉིས་ཀྱི་ས་མཚམས་ས་ཁུལ་དུ་མཐའ་སྲུང་དམག་མིའི་བར་ལ་འཁྲུག་འཛིང་བྱུང་སྟེ་ཕྱོགས་གཉིས་ཀྱི་དམག་མིར་རྨས་སྐྱོན་ཕོགས་པའི་གནས་སྟངས་བྱུང་ཡོད་པ་རེད།  

  རྒྱ་ནག་གི་བདེ་འཇགས་ཀྱི་ཁྲིམས་འཆར་ཁྲོད་ཧོང་ཀོང་གི་ཞི་རྒོལ་བསྐྱར་ལོག་བྱུང་བ།

དེ་རིང་གསར་ལམ་ཁག་ཏུ་གནས་ཚུལ་ཐོན་པ་ལྟར་ན། རྒྱ་ནག་གཞུང་གི་འདི་ལོའི་རྒྱལ་ཡོངས་མི་མང་འཐུས་མི་ཚོགས་ཆེན་སྐབས་ ༡༣ པའི་གྲོས་ཚོགས་ཚོགས་ཐེངས་ ༣ པ་འགོ་འཛུགས་ཀྱིས།   ཚོགས་ཐོག་ཏུ་ཧོང་ཀོང་དང་འབྲེལ་བའི་བདེ་འཇགས་ཀྱི་ཁྲིམས་ཡིག་བཏོན་པར་བརྟེན། ཁེ་ཉིན་ཕྱི་ཚེས་ ༢༤ ཉིན་ཧོང་ཀོང་གི་གྲོང་ཁྱེར་ལྟེ་བར་དམངས་གཙོ་དོན་གཉེར་བ་དང་སློབ་ཕྲུག་སྟོང་ཕྲག་མང་པོས་ཁྲིམས་འཆར་དེར་ངོ་རྒོལ་གྱི་ལས་འགུལ་གཞི་རྒྱ་ཆེ་བ་སྤེལ་ཡོད་པ་དང་། སྐབས་དེར་ཧོང་ཀོང་ཉེན་རྟོག་པས་ལས་འགུལ་བར་དྲག་རྡུང་བྱས་ཏེ་ལས་འགུལ་བ་༡༨༠ ལྷག་འཛིན་བཟུང་དང་ཁག་ཅིག་ཛ་དྲག་གི་སྨན་ཁང་དུ་སྐྱེལ་དགོས་བྱུང་འདུག ཐེངས་འདིའི་རྒྱ་ནག་གི་རྒྱལ་ཡོངས་མི་མང་འཐུས་མི་ཚོགས་ཆེན་གྱི་ཁྲིམས་འཆར་དེ་དང་འབྲེལ་ནས། རྒྱལ་སྤྱིའི་ཐོག་གི་ཆབ་སྲིད་ཀྱི་གནད་ཡོད་མི་སྣ་ ༢༠༠ ལྷག་གིས་མཉམ་རུབ་ཀྱི་བསྒྲགས་གཏམ་ཞིག་སྤེལ་བའི་ནང་། རྒྱ་ནག་གི་ཧོང་ཀོང་དང་འབྲེལ་བའི་བདེ་འཇགས་ཀྱི་ཁྲིམས་འཆར་དེ་ནི་ཕྱོགས་ཡོངས་ནས་ཧོང་ཀོང་གི་རང་སྐྱོང་གི་གནས་བབ་དང་ཁྲིམས་སྒྲིག  ད་དུང་གཞི་རྩའི་ཐོབ་ཐང་སོགས་ལ་རྒོལ་རྡུང་གཏོང་བྱེད་ཅིག་ཡིན་པར་ཡོངས་གྲགས་གནང་འདུག ཨ་རིའི་རྒྱལ་སྲུང་སློབ་སྟོན་པ་ Robert O’brien ལགས་ཀྱིས་ཁྲིམས་ཡིག་དང་འབྲེལ་ནས་ NBC གསར་ཁང་ལ་འགྲེལ་བརྗོད་བྱེད་དོན།  ཐེངས་འདིའི་ཧོང་ཀོང་དང་འབྲེལ་བའི་རྒྱ་ནག་གི་བདེའཇགས་ཀྱི་ཁྲིམས་ཡིག་དེ་ཧོང་ཀོང་རྒྱ་ནག་གི་གི་སྟངས་འཛིན་འོག་སླེབས་ཆེད་བཟོས་པ་ཞིག་རེད། གལ་ཏེ་རྒྱ་ནག་གཞུང་གིས་དེ་ལྟར་བྱས་ཚེ། ཨ་རིའི་ཕྱི་སྲིད་དྲུང་ཆེ་ Mike Pompeo ཡིས་ཧོང་ཀོང་ལ་ཚད་མཐོའི་རང་སྐྱོང་ཡོད་པར་ངོས་འཛིན་བྱེད་ཐབས་མེད་སྟབས།  ཨ་རིས་རྒྱ་ནག་དང་ཧོང་ཀོང་གཉིས་ལ་བཀག་སྡོམ་བྱེད་སྲིད་པར་བསྒྲགས་འདུག ལོ་ན་ ༣༠ ཡིན་པའི་ཞི་རྒོལ་བ་  Chan ཟེར་བ་ཞིག་གིས།  ལས་འགུལ་གྱི་ཁྲོད་ནས་ཁོང་ཧོང་ཀོང་གི་ཉེན་རྟོག་པའི་འཛིན་བཟུང་བྱེད་སྲིད་པའི་ཉེན་ཁ་ཆེན་པོ་ཡོད་ནའང་། ཁོང་ད་དུང་ཁྲོམ་གཞུང་དུ་ཐོན་ནས་ངོ་རྒོལ་བྱེད་ཀྱི་ཡོད། དབུགས་ཀྱི་རྒྱུ་བ་མ་ཆད་བར་དུ་མུ་མཐུད་ནས་རྒྱ་ནག་གི་ཁྲིམས་འཆར་དེར་ངོ་རྒོལ་བྱེད་རྒྱུ་ཡིན་པར་འགྲེལ་བརྗོད་བྱས་ཡོད་པ་དང་།  དེ་བཞིན་མིང་བརྗོད་འདོད་མེད་པའི་ལོ་ ༡༦ ཅན་གྱི་སློབ་ཕྲུག་ཅིག་གིས།   རྒྱ་ནག་གིས་ཁྲིམས་འཆར་དེ་གཏན་འབེབས་བྱས་བ་བརྒྱུད་ནས་སྔོན་ཆད་ཞུ་གཏུག་བྱས་པའི་མི་དག་རྗེས་འདེད་གཏོང་ངེས་ཡིན་པ་དང་། སྐབས་དེར་ཉེན་རྟོག་པས་བཀག་འགོག་མི་ཐུབ་པའི་གནས་སྟངས་ཤིག་ཤར་སྲིད་པར་སེམས་འཚབ་ཆེན་པོ་ཡོད་པར་འགྲེལ་བརྗོད་གནང་འདུག དེ་བཞིན་ཧོང་ཀོང་གི་ནང་དུ་རྟེན་གཞི་བྱས་པའི་རྒྱ་ནག་གི་གཞུང་གཞུང་ཚབ་ལས་ཁུངས་ཀྱི་མདུན་དུ།  ཧོང་ཀོང་གི་མང་གཙོ་དོན་གཉེར་བའི་ཚོགས་ཁག་ཅིག་གིས་ངོ་རྒོལ་བྱས་ཏེ། རྒྱ་ནག་གི་བདེ་འཇགས་ཀྱི་ཁྲིམས་འཆར་གྱིས་རྒྱལ་ཁབ་གཅིག་ལ་ལམ་ལུགས་གཉིས་ཀྱི་རྩ་འཛིན་དེ་འཕྲོ་བརླགས་སུ་གཏོང་གི་འདུག་ཅེས་སྐད་འབོད་བྱས་ཡོད་པ་མ་ཟད།  ངོ་རྒོལ་བ་ཞིག་གིས་རྒྱ་ནག་གིས་མ་འོངས་པར།  ཁྲིམས་འཆར་དེའི་མིང་ཐོག་ནས་དམར་ཤོག་ཚོགས་པའི་འདོད་མོས་ལྟར་མི་མང་འཛིན་བཟུང་དང་བཀག་སྡོམ་བྱེད་རྒྱུ་ཡིན་པར་འགྲེལ་བརྗོད་གནང་འདུག གཞི་རྩའི་སྔར་ལོའི་ཕྱི་ཟླ་ ༦ པའི་ནང་རྒྱ་ནག་གིས་དོགས་ཡོད་ཉེས་ཅན་རྩིས་སྤྲོད་ཀྱི་ཁྲིམས་འཆར་ཟེར་བ་ཞིག་གཏན་འབེབས་བྱེད་འཆར་དང་བསྟུན་ནས་ཧོང་ཀོང་གི་ནང་དུ་ཡུལ་མི་ས་ཡ་མང་པོས་དུས་གཅིག་ལ་ཞི་རྒོལ་གྱི་ལས་འགུལ་ཤུགས་ཆེར་སྤེལ་བར་བརྟེན་གནས་ཚུལ་དེ་རེ་ཞིག་ལྷིང་འཇགས་ཀྱི་ངང་གནས་ཡོད་ནའང་།   ད་ཆ་རྒྱ་ནག་གི་རྒྱལ་ཡོངས་འཐུས་མི་ཚོགས་ཆེན་ཐོག་སླར་ཡང་གནད་དོན་དེ་གླེང་སློང་བྱུང་བ་བརྒྱུད་ནས་ཧོང་ཀོང་གི་ཞི་རྒོལ་ལ་བསྐྱར་ལོག་བྱུང་ཡོད་པ་ཞིག་རེད།    

རྒྱ་ནག་གཞུང་གིས་པཎ་ཆེན་ཆུང་སྲིད་རིན་པོ་ཆེ་སློབ་མཐར་སོན་ཏེ་ལས་གནས་ལ་ཞུགས་ཡོད་པར་བརྗོད་འདུག

ཉེ་ཆར་ཟླ་བ་འདིའི་ཕྱི་ཚེས་ ༡༧ ཉིན་ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉིན་མ་མཆོག་རྒྱ་ནག་གཞུང་གིས་འཛིན་བཟུང་བཙན་ཁྲིད་བྱས་ཏེ་གར་སོང་ཆ་མེད་དུ་གྱུར་ནས་ལོ་ངོ་ ༢༥ འཁོར་བའི་དུས་ཚིག་དང་བསྟུན། བོད་མིའི་སྒྲིག་འཛུགས་དབུས་པའི་བོད་མི་མང་ཚོགས་དང་། ལྷག་པར་དུ་ཨ་རིའི་ཕྱི་སྲིད་དྲུང་ཆེ་སྐུ་ཞབས་ Mike Pompeo མཆོག་གི་དབུས་པའི་རྒྱལ་སྤྱིའི་གནད་ཡོད་མི་སྣ་མང་དག་ཅིག་གིས་ཡིག་ངག་གཉིས་ཐོག་ནས་ཆུང་སྲིད་རིན་པོ་ཆེའི་གནས་བབ་ལ་ཐུགས་འཚབ་དང་སྦྲགས། རྒྱ་ནག་གཞུང་གིས་༸པཎ་ཆེན་ཆུང་སྲིད་རིན་པོ་ཆེའི་ད་ལྟའི་གནས་བབ་གང་ཡིན་མངོན་གསལ་གནང་དགོས་པའི་ནན་སྐུལ་ཤུགས་ཆེར་གནང་ཡོད་པ་རེད། གནད་དོན་དེ་དང་འབྲེལ་ཁ་སང་རྒྱ་ནག་གི་ཕྱི་སྲིད་ལས་ཁུངས་ཀྱི་མགྲིན་ཚབ་པ་ Zhao Lijian གིས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་ཆུང་བྱིས་པའི་དུས་ནས་སློབ་སྦྱོང་གི་གོ་སྐབས་ཐོབ་ཡོད་པ་མ་ཟད། ད་ཆ་ཆུང་སྲིད་རིན་པོ་ཆེ་མཆོག་སློབ་མཐར་སོན་ཏེ་ལས་གནས་ལ་ཞུགས་ཡོད་པར་བརྗོད་འདུག མ་ཟད་ཁོང་གིས་དེ་སྔ་རིན་པོ་ཆེ་མཆོག་ད་ལྟ་ས་གནས་གང་དུ་བཞུགས་ཡོད་མེད་དང་། རིན་པོ་ཆེའི་ནང་མི་རྣམས་ཀྱི་གནས་སྟངས་གང་ཡིན་སོགས་ཀྱི་ཐོག་ལ་གསལ་བཤད་ཅུང་ཙམ་ཡང་མ་བྱས་པར། ཆུང་སྲིད་རིན་པོ་ཆེ་དབུས་པའི་ནང་མི་རྣམས་ཀྱིས་ཕྱི་ཕྱོགས་ནས་སུན་པོ་བཟོས་པར་ཐུགས་མཉེས་པོ་གནང་གི་མི་འདུག་ཅེས་བརྗོད་ཡོད་པ་རེད། རྒྱ་གཞུང་གི་གསལ་བཤད་དེ་བྱས་མ་ཐག་ཨ་རིར་རྟེན་གཞི་བྱས་པའི་རྒྱལ་སྤྱི་བོད་དོན་ལས་འགུལ་ཁང་གིས་ཡོངས་ཁྱབ་སྒྲགས་གཏམ་ཞིན་སྤེལ་ཏེ། རྒྱ་ནག་གཞུང་གིས་པཎ་ཆེན་ཆུང་སྲིད་རིན་པོ་ཆེ་མཆོག་ལ་རྒྱ་ནག་གི་རྩ་ཁྲིམས་དོན་ཚན་ ༣༣ ནས་ ༣༩ བར་གསལ་བའི་སྨྲ་བརྗོད་སོགས་ཀྱི་ཐོབ་ཐང་ཁག་ཕུལ་བའི་ཐོག རིན་པོ་ཆེའི་ད་ལྟ་གནས་བབ་གང་ཡིན་སོགས་ཀྱི་ཐད་ལ་རིན་པོ་སྐུ་སྒེར་ངོས་ནས་གསལ་བཤད་གནང་་རྒྱུའི་གོ་སྐབས་འབུལ་དགོས་པ་དང་། ལྷག་པར་དུ་ད་ལྟའི་རྒྱ་གཞུང་གི་གསལ་བཤད་དེ་དང་འབྲེལ་ཏེ་རྒྱལ་སྤྱིའི་རང་དབང་ལྡན་པའི་དཔྱད་ཞིབ་ཚོགས་ཆུང་ལ་རིན་པོ་ཆེ་མཆོག་ད་བར་གར་སོང་ཆ་མེད་ངང་ཞུགས་དགོས་བྱུང་བའི་གནས་སྟངས་ཐོག་ལ་ཞིབ་འཇུག་གནང་དུ་འཇུག་དགོས་པ་གསུངས་འདུག ལྷག་པར་དུ་ལས་འགུལ་ཁང་དེའི་ཚོགས་གཙོ་སྐུ་ཞབས་ Matteo Mecacci ལགས་ཀྱིས་ད་རེས་རྒྱ་གཞུང་གིས་ཆུང་སྲིད་རིན་པོ་ཆེའི་གནད་དོན་ཐོག་གསལ་བཤད་བྱས་པ་དེ་གསལ་བཤད་ཡང་དག་པ་ཞིག་མ་རེད་ཅེས་གསུངས་འདུག་པ་མ་ཟད། ལས་འགུལ་ཁང་གི་ཚོགས་གཙོ་གཞོན་པ་སྐུ་ཞབས་བུ་ཆུང་ཚེ་རིང་ལགས་ཀྱིས། རྒྱ་ནག་གཞུང་གིས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་སྐུ་འཚོ་བཞུགས་ཡིན་སྐོར་ཁ་ནས་བཤད་པ་ཙམ་མིན་པར། བདེན་དཔང་དང་སྦྲགས་ཏེ་རྒྱལ་སྤྱིའི་ཐོག་གསལ་བཤད་གནང་དགོས་ཀྱི་རེད་ཅེས་གསུངས་འདུག རྩ་བའི་ད་རེས་རྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་པས་ཆུང་སྲིད་རིན་པོ་ཆེའི་གནས་བབ་ཐོག་གསལ་བཤད་བྱས་པ་དེའི་ནང་གནས་ཚུལ་གསར་བ་གང་ཡང་མེད་པ་དང་། གསལ་བཤད་དེ་མཚུངས་ཤིག་སྔར་ལོའི་རྒྱལ་ཚོགས་ཀྱི་བཙན་འོག་ཏུ་གར་སོང་ཆ་མེད་དུ་གྱུར་བའི་ཐོག་རྟོག་ཞིབ་གནང་མཁན་གྱི་མཁས་བའི་ལས་དོན་ཚོགས་ཆུང་གི་ཚོགས་འདུ་ཐེངས་ ༡༡༩ སྐབས།   རྒྱ་ནག་གཞུང་གི་སྐུ་ཚབ་ཀྱི་ངོས་ནས་། ༸པཎ་ཆེན་རིན་པོ་མཆོག་རྒྱུན་ལྡན་གྱི་འཚོ་བར་རོལ་བཞིན་ཡོད་པ་མ་ཟད། གཙུག་ལག་སློབ་མཐར་སོན་ཏེ་ཕྱག་ལས་གནང་གི་ཡོད་ཅེས་བརྗོད་ཡོད་པ་རེད།  

 རྒྱ་ནག་གི་ཆུ་མཛོད་གསར་རྒྱག་གི་ཁྲོད་དུ་ནང་པའི་སྐུ་བརྙན་ལ་གཏོར་བཅོམ་ཐེབས་རྒྱུར་སེམས་འཚབ།

དེ་རིང་རྒྱ་གར་གྱི་ The Stateman ཞེས་པའི་གསར་ཁང་གིས་གནས་ཚུལ་སྤེལ་བ་ལྟར་ན། རྒྱ་ནག་གིས་པཱ་ཀི་སཱི་ཐཱན་ནང་དུ་ཆུ་མཛོད་གསར་རྒྱག་གི་ལས་གཞི་རྒྱ་བསྐྱེད་བྱེད་བཞིན་པའི་ཁྲོད།   ལོ་ངོ་སྟོང་ཕྲག་མང་པོའི་ལོ་རྒྱུས་ཀྱི་རིན་ཐང་ལྡན་པའི་ནང་པའི་རྡོ་བརྐོས་ཀྱི་སྐུ་བརྙན་མང་པོ་རྩ་གཏོར་ཐེབས་རྒྱུ་ཡིན་པ་མ་ཟད།  ཁུལ་དེར་རྟེན་གཞི་བྱས་པའི་གྲོང་ཚོ་ལྔ་བཅུ་ལྷག་ཅིག་འཕྲལ་དུ་གནས་སྤོར་བྱེད་དགོས་བར་འཁེལ་གྱི་ཡོད་པ་རེད། གསར་ཁང་གིས། པཱ་ཀི་སུ་ཐཱན་སྲིད་གཞུང་གིས་ཟླ་འདིའི་ཚེས་༡༣ ཉིན་རྒྱ་ནག་དང་ལྷན་དུ་ཧིན་སྒོར་ཐེར་འབུམ་ ༤༤༢ ལྷག་གི་གན་ཡིག་ཐོག་ཆུ་མཛོད་གསར་རྒྱག་གི་ལས་གཞི་ལ་མཚན་རྟགས་བཀོད་ཡོད་པའི་ཁྲོད་དུ།  པཱ་ཀི་སུ་ཐཱན་གྱི་ཁྱབ་ཁོངས་སུ་གཏོགས་པའི་ Kashmir མངའ་ཁུལ་གྱི་ Baltistan ནང་དུ་ཡང་ཆུ་མཛོད་གསར་རྒྱག་བྱ་རྩིས་ཡོད་པའི་ཁྲོད།   ཁུལ་དེར་སྔ་མོ་ནས་ཡོད་པའི་ནང་པའི་རྡོ་བརྐོས་ཀྱི་སྐུ་བརྙན་ཁག་མང་པོ་གཏོར་བཅོམ་ཐེབས་ངེས་ཡིན་པ་དང་། དེ་བཞིན་ཁུལ་དེའི་དུད་ཁྱིམ་མང་པོ་གནས་སྤོར་བྱེད་དགོས་བར་འཁེལ་གྱི་ཡོད་སྟབས།  ས་གནས་ཀྱི་ཡུལ་མི་རྣམས་ཀྱིས་སྲིད་གཞུང་གིས་རྒྱ་ནག་དང་ལྷན་དུ་བཞག་པའི་གན་ཡིག་དེར་སྡང་སྡུག་སྟོན་བཞིན་པ་མ་ཟད།  ནང་པའི་སྐུ་བརྙན་ལ་གཏོར་བཤིག་ཐེབས་པ་ཡིན་ན།  དེ་ནི་ཆོས་ལུགས་ཤིག་གི་གནད་དོན་ཙམ་ཞིག་མིན་པར།  ཁུལ་དེར་ཡུལ་སྐོར་སྤྲོ་འཁྱམ་པ་ས་ཡ་མང་པོ་འདྲེན་རྒྱུའི་གནའ་ཤུལ་ལ་གཏོར་བཅོམ་ཐེབས་པ་ཞིག་ཡིན་སྐོར་བརྗོད་མཁན་བྱུང་སྟེ། ས་གནས་ཀྱི་ཡུལ་མི་རྣམས་ཀྱིས་སྐུ་བརྙན་དེ་དག་སྲུང་སྐྱོབ་བྱེད་དགོས་བར་བརྗོད་བཞིན་ཡོད་སྟབས། ད་ཆ་སྲིད་གཞུང་གི་ཐག་གཅོད་དེ་ནི་རྙོག་གླེང་གི་གཞི་རྩ་ཞིག་ཏུ་གྱུར་འདུག དེ་བཞིན་ས་གནས་མང་ཚོགས་ཀྱིས་གནས་ཚུལ་དེ་སྤྱི་ཚོགས་དྲ་ལམ་ཁག་ཏུ་ཤུགས་ཆེར་གླེང་བཞིན་པའི་ཁྲོད་དུ། ནང་པའི་རྡོ་བརྐོས་ཀྱི་སྐུ་བརྙན་དེ་དག་ནི་ལོ་རྒྱུས་ཀྱི་རིན་ཐང་ལྡན་པའིི་རྡོ་བཟོ་སྒྱུ་རྩལ་རིགས་ཤིག་ཡིན་ནའང་།་སྲིད་གཞུང་གི་ཁ་ཕྱོགས་མ་ངེས་བའི་འཕེལ་རྒྱས་ཀྱི་འཆར་འགོད་དང་དེང་རབས་ཀྱི་ཚོང་ལས་ཁྲོད་ཀྱི་རི་མོ་གསར་བཟོ། དེ་བཞིན་ས་གནས་ཀྱི་ཡུལ་མིའི་ཁྲོད་ཀྱི་ཁ་ཆེ་མ་དར་བའི་སྔོན་གྱི་ནང་པའི་སྐུ་བརྙན་ལ་སྡང་སྡུག་སྟོན་མཁན་སོགས་ཀྱི་བྱེད་བབ་ཀྱིས་སྒྱུ་རྩལ་རང་བཞིན་ལྡན་པའི་གནའ་ཤུལ་འདི་དག་རྩ་གཏོར་ཐེབས་ངེས་ཡིན་པར་བརྗོད་འདུག ཁུལ་དེར་རྟེན་གཞི་བྱས་པའི་གཤའ་དངོས་རྟོག་དཔྱོད་པ། སྐུ་ཞབས་ Ahmad Hasan Dani ཟེར་བ་ཞིག་གིས།  ཁུལ་དེའི་ནང་པའི་རྡོ་བརྐོས་ཀྱི་སྐུ་བརྙན་དེ་དག་ནི་ལོ་ངོ་སྟོང་ཕྲག་མང་པོའི་ལོ་རྒྱུས་ལྡན་པའི་གནའ་ཤུལ་རྩ་ཆེན་ཞིག་ཡིན་པར་འགྲེལ་བརྗོད་ཀྱིས།  སྐུ་བརྙན་དེ་དག་རིགས་བཞིར་དབྱེ་བ་བྱས་ཡོད་པར་ལུང་འདྲེན་གནང་པ་དང་འབྲེལ།  སྔོན་ཆད་༸གོང་ས་སྐྱབས་མགོན་རིན་པོ་ཆེ་མཆོག་ལ་དྭགས་ཁུལ་དུ་ཆིབས་བསྒྱུར་མཛད་སྐབས་ཀྱང་། མགོན་པོ་གང་གིས་ལ་དྭགས་ཁུལ་གཙོ་བྱས་པའི་  Indus གཙང་བོའི་རྒྱུད་དུ་ཆགས་པའི་ནང་པའི་གནའ་ཤུལ་རྣམས་ལ་སྲུང་སྐྱོབ་བྱེད་དགོས་བའི་ལམ་སྟོན་གནང་བ་དྲན་གསོ་གནང་འདུག  

Latest news