Tibetan Royal Year of 2151 | Year of the Wood Dragon

རྒྱ་ནག

ཏོག་དབྱིབས་རིམས་ནད་ཁྱབ་བརྡལ་གྱི་འགན་ཡོངས་རྫོགས་རྒྱ་ནག་ལ་ཡོད།

རྒྱ་ནག་གི་ཝུ་ཧན་གྲོང་ཁྱེར་ནས་ཁྱབ་བརྡལ་བྱུང་བའི་ COVID19 དེའི་འོག་ད་བར་འཛམ་གླིང་ཁྱོན་ཡོངས་སུ་མི་ས་ཡ་གཉིས་ལྷག་ལ་ནད་གཞི་དེ་ཕོག་པ་དང་མི་འབུམ་གཅིག་དང་ཁྲི་གསུམ་ལྷག་རྐྱེན་འདས་སུ་ཕྱིན་པའི་ཛ་དྲག་གནས་སྟངས་ཁྲོད། རྒྱལ་སྤྱི་ཁྱོན་ཡོངས་ཀྱི་གཞུང་ཚོགས་ཁག་གིས་རྒྱ་ནག་གཞུང་ལ་རིམས་ནད་ཐོག་མར་བྱུང་སྐབས་ལྷོད་ཡངས་བཏང་བ་དང་དངོས་ཡོད་གནས་ཚུལ་སྦས་བསྐུངས་ཀྱིས་རྫུན་གཏམ་ཁོ་ན་བཤད་རྐྱེན་ད་ལྟའི་ཆར་རྒྱལ་སྤྱིའི་ཁྲོད་མིའི་ཚེ་སྲོག་ཤོར་བ་དང་དཔལ་འབྱོར་གྱི་གྱོང་གུད་ཤུགས་ཆེ་ཕོག་པ་ལ་སོགས་པའི་ཆེས་ཛ་དྲག་གནས་སྟངས་སུ་གྱུར་ཡོད་པར་སྐྱོན་བརྗོད་གནང་མུས་ཡིན་པ་ལྟར། དེ་རིང་ Raoul Wallenberg འགྲོ་བ་མིའི་ཐོབ་ཐང་ལྟེ་གནས་ཁང་གིས་ད་ལྟའི་རྒྱལ་སྤྱིའི་ཛ་དྲག་རང་བཞིན་གྱི་གནས་སྟངས་དེའི་འགན་ཡོངས་རྫོགས་རྒྱ་ནག་གཞུང་ལ་ཡོད་པར་གསུངས་འདུག དེ་རིང་ 2GB ཞེས་པའི་ཨོ་སི་ཊོ་ལི་ཡའི་རླུང་འཕྲིན་ཁང་གིས་དེ་རིང་ཁེ་ན་ཌར་རྟེན་གཞི་བྱས་པའི་ Raoul Wallenberg འགྲོ་བ་མིའི་ཐོབ་ཐང་ལྟེ་གནས་ཁང་གི་ཚོགས་གཙོ་དང་ཡུལ་དེའི་ཁྲིམས་དོན་སྤྱི་ཁྱབ་ཟུར་པ་སྐུ་ཞབས་ Irwin Cotler ལགས་ཀྱིས་བཅར་འདྲི་དང་ལེན་དང་འབྲེལ་བཀའ་མོལ་ཁག་ཅིག་གསུངས་ཡོད་པ་རེད། རྒྱ་ནག་དམར་ཤོག་ཚོགས་པའི་ངོས་ནས་ཡུ་གུར་དང་བོད་མི། ཧྥ་ལུང་གྷོང་། ཧོང་ཀོང་། དེ་བཞིན་ཐེ་ཝན་བཅས་ཀྱི་ཐོག་དྲག་གནོན་བྱེད་བཞིན་པ་མ་ཟད་རྒྱལ་སྤྱིའི་ཁྲོད་བཙན་དབང་ཐོག་ཆབ་སྲིད་བཙོན་པའི་ཐད་ཁྲིམས་འགལ་གྱི་བྱ་སྤྱོད་ཤུགས་ཆེ་སྤེལ་བཞིན་པ་མ་ཟད་རྒྱ་ནག་དེ་བཞིན་འཛམ་གླིང་ནང་གསར་འགོད་པ་འཛིན་བཟུང་བྱེད་མཁན་རྒྱལ་ཁབ་ཆེས་སྡུག་ཤོས་ཆགས་ཡོད་པ་དེ་ལྟར་ཡང་། གནད་དོན་དེ་དག་ཐོག་ད་བར་རྒྱལ་སྤྱིའི་ཐོག་ནས་དོ་སྣང་དེ་ཙམ་མ་གནང་བ་མ་ཟད། རྒྱ་ནག་ལ་འགན་འཁྲིད་མ་སྤྲད་པར་བཞག་ཡོད་སྐོར་གསུངས་པ་དང་འབྲེལ་ཏེ་ད་ལྟའི་ཏོག་དབྱིབས་རིམས་ནད་ཀྱི་གནད་དོན་ཐོག་ལའང་རྒྱ་ནག་གཞུང་གིས་རྫུན་གཏམ་འབའ་ཞིག་བཤད་པ་དང་གནས་ཚུལ་སྦས་བསྐུངས་བྱས་པ་སོགས་ཀྱི་རྐྱེན་པས་རྒྱལ་སྤྱིའི་ཁྲོད་ཛ་དྲགས་ཀྱི་གནས་སྟངས་འདི་ལྟ་བུ་གྱུར་ཡོད་པ་དང་། དེའི་ཐོག་འཛམ་གླིང་འཕྲོད་བསྟེན་ལྷན་ཚོགས་ཀྱིས་རྒྱ་ནག་གི་རིམས་ནད་དེའི་ཐོག་རྟོག་ཞིབ་ནན་པོ་བྱེད་རྒྱུ་ལས་རྒྱ་ནག་གི་འཁྱོག་བཤད་དྲིལ་དྲིལ་བསྒྲགས་ནང་ལག་འབྲེལ་གྱིས་རྒྱའི་གཞུང་ཚོགས་ཁག་ལ་ཚུལ་མཐུན་ལམ་སྟོན་མ་གནང་རྐྱེན་གྱིས་ད་ལྟའི་ཆར་ཛ་དྲག་གི་གནས་སྟངས་འདི་བྱུང་ཡོད་པ་དང་། དེ་བཞིན་རྒྱ་གཞུང་ལ་འདྲི་གཅོད་ནན་པོ་གནང་རྒྱུ་ལས་ལྡོག་ཏེ་ཉེ་ཆར་རྒྱ་ནག་གི་སྐུ་ཚབ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཚོགས་ཆུང་ནང་བསྐོ་གཞག་བྱས་པ་སོགས་ཀྱི་གནད་དོན་ལུང་འདྲེན་དང་སྦྲགས། གལ་སྟེ་རྒྱ་ནག་གཞུང་གིས་རིམས་ནད་ཐོག་མར་བྱུང་སྐབས་སུ་འགོག་ཐབས་དོན་འཁྱོལ་བྱས་ཡོད་ཚེ་ཁྱབ་བརྡལ་གྱི་ཚད་གཞི་དེ་བརྒྱ་ཆ་ ༩༥ ཙམ་ཉུང་དུ་གཏང་ཐུབ་ཀྱི་ཡོད་པར་མངོན་གསལ་གནང་བ་དང་ཆབས་ཅིག་ཏུ་རིམས་ནད་སྐོར་ཉེན་བརྡ་གནང་མཁན་གྱི་སྨན་པ་རྣམས་འཛིན་བཟུང་གིས་གནས་ཚུལ་སྦས་བསྐུངས་བྱས་ཡོད་པར་བརྟེན་ཁྱབ་གདལ་ཤུགས་ཆེར་སོང་བ་མ་ཟད། རིམས་ནད་ཁྱབ་གདལ་གྱི་འགན་འཁྲི་དེ་གཞན་པ་གཡོགས་ཐབས་བྱེད་བཞིན་ཡོད་པ་མངོན་གསལ་དང་སྦྲགས། ཐེངས་འདིའི་གཉན་རིམས་ཞི་བའི་རྗེས་སུ་རྒྱལ་སྤྱིའི་སྤྱི་ཚོགས་ཀྱི་འགན་ཁུར་བླངས་ཕྱོགས་ཐོག་བཟང་ཕྱོགས་ཀྱི་འགྱུར་བ་ཐེབས་པའམ་རྒྱ་ནག་གི་འགན་ལ་གཞིགས་པའི་དེ་ལྟར་བྱེད་འཇུག་དགོས་པའི་ཕྱོགས་སུ་བསྐྱོད་རེའི་འདུན་པ་ཤུགས་ཆེ་ཡོད་པ་གསུངས་ཡོད། ཡང་དེའི་བར་ན་ཁ་ཉིན་ཕྱི་ཚེས་ ༡༤ ཉིན་རྒྱལ་སྤྱིའི་བརྒྱུད་ལམ་ཁག་ཏུ་རྒྱ་ནག་ནས་ཁྱབ་བརྡལ་བྱུང་བའི་རིམས་ནད་ཀྱི་ཛ་དྲག་གནས་སྟངས་ཁྲོད་ཨ་རིའི་སྲིད་འཛིན་སྐུ་ཞབས་ཌོ་ནལ་ཌ་ཊམ་མཆོག་གིས་དེ་སྔོན་རྒྱ་ནག་ལ་སྐྱོན་བརྗོད་བྱས་ཡོད་པ་མ་ཟད་འཛམ་གླིང་འཕྲོད་བསྟེན་ལྷན་ཚོགས་ལ་ཡང་རང་ཉིད་ཀྱི་འགན་ཁུར་ལྟར་ཕྱག་ལས་མ་གནང་བར་རྒྱ་ནག་གི་འཁྱོག་བཤད་དྲིལ་བསྒྲགས་ཀྱི་ལག་ཆ་ལྟ་བུ་བྱེད་བཞིན་པར་སྐྱོན་བརྗོད་ཤུགས་ཆེ་དང་སྦྲགས། ཨ་རིའི་ངོས་ནས་ལོ་ལྟར་འཛམ་གླིང་འཕྲོད་བསྟེན་ལྷན་ཚོགས་ལ་རོགས་དངུལ་སྤྲོད་བཞིན་པ་དེ་མཚམས་འཇོག་གནང་རྒྱུ་ཡིན་སྐོར་གསུངས་པ་ལྟར། ཚེས་ ༡༤ ཉིན་སྲིད་འཛིན་ཊམ་མཆོག་གི་ངོས་ནས་ཡོངས་ཁྱབ་གསར་འགོད་ལྷན་ཚོགས་ཐོག་འདི་ལོར་ཨ་རིའི་གཞུང་གིས་འཛམ་གླིང་འཕྲོད་བསྟེན་ལྷན་ཚོགས་ལ་རོགས་དངུལ་ཨ་སྒོར་ས་ཡ་ ༥༠༠ ཙམ་དབུལ་འཆར་ཡོད་པ་དེ་ཕྱིར་འཐེན་གནང་རྒྱུ་ཡིན་པ་ཡོངས་ཁྱབ་གནང་འདུག སྐབས་དེར་ཊམ་མཆོག་གིས་འཛམ་གླིང་འཕྲོད་བསྟེན་ལྷན་ཚོགས་ཀྱི་ངོས་ནས་རང་གི་གཞི་རྩའི་ལས་འགན་བསྒྲུབ་རྒྱུའི་ཐད་འཐུས་ཤོར་བཏང་ཡོད་པ་བཞིན་དེ་ལྟར་འགན་འཁུར་དགོས་པ་དང་ཨ་རིའི་ངོས་ནས་ལྷན་ཚོགས་ཀྱི་རིམས་ནད་འགོག་ཐབས་ཐོག་ཕྱག་ལས་གནང་ཕྱོགས་ལ་ཞིབ་དཔྱོད་མཐིལ་ཕྱིན་གནང་རྗེས་སླད་མར་དེ་ལྟར་རོགས་དངུལ་གནང་དགོས་མིན་གཟིགས་རྒྱུ་ཡིན་སྐོར་གསུངས་འདུག རྩ་བའི་ཨ་རི་ནི་ལོ་ལྟར་འཛམ་གླིང་འཕྲོད་བསྟེན་ལྷན་ཚོགས་ཀྱི་ལས་དོན་ཆེད་དུ་རོགས་དངུལ་ཤུགས་ཆེ་གནང་མཁན་ཞིག་ཆགས་ཀྱི་ཡོད་པའི་ཁྲོད་སྔ་ལོ་ ༢༠༡༩ ལོར་ཨ་རིས་ལྷན་ཚོགས་ལ་ཨ་སྒོར་ས་ཡ་ ༤༥༢ ཙམ་གྱི་རོགས་རམ་གནང་ཡོད་པ་དང་། ༢༠༡༨ ལོར་ཨ་སྒོར་ས་ཡ་ ༩༠༠ ཙམ་གནང་ཡོད་པ་རེད། ཨ་རིའི་རོགས་དངུལ་མཚམས་འཇོག་གནང་རྒྱུ་ཐོག་འཛམ་གླིང་འཕྲོད་བསྟེན་ལྷན་ཚོགས་ཀྱི་སྤྱི་ཁྱབ་འགན་འཛིན་ Tedros ལགས་ཀྱི་ད་བར་འགྲེལ་བརྗོད་གང་ཡང་གནང་མེད་ཀྱང་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་སྐུ་ཞབས་ Antonio Guterres ལགས་དང་རྒྱལ་སྤྱིའི་ཁྲོད་སྤྱི་ཚོགས་ཡར་རྒྱས་དང་འཕྲོད་བསྟེན་སྲུང་སྐྱོབ་ཐད་རོགས་དངུལ་ཕོན་ཆེན་པོ་གནང་མཁན་སྐུ་ཞབས་ Bill Gates ལགས་སོགས་ཀྱིས་ཨ་རིའི་སྲིད་འཛིན་མཆོག་གི་གནང་ཕྱོགས་དེར་བློ་ཕམ་གནང་འདུག

རྒྱ་གར་རྒྱལ་ཡོངས་ཐེམ་སྤངས་ཀྱི་དུས་བཀག་ཕྱི་ཟླ་ ༥ ཚེས་ ༣ བར་ཕར་འགྱངས་གནང་བ།

དེ་རིང་སྔ་དྲོ་ཆུ་ཚོད་ ༡༠ ཐོག་རྒྱ་གར་གྱི་སྲིད་བློ་སྐུ་ཞབས་མོ་དཱི་མཆོག་གིས་ཏོག་དབྱིབས་རིམས་ནད་དང་འབྲེལ་བའི་རྒྱལ་ཡོངས་གསུང་བཤད་ཐེངས་གསུམ་པ་དེ་གནང་སྟེ་རྒྱ་གར་གྱི་མི་སེར་ཡོངས་ནས་འདས་པའི་ཉིན་གྲངས་ ༢༡ རིང་ཐེམ་སྤངས་ཀྱི་བཀའ་རྒྱར་བརྩི་སྲུང་གང་ལེགས་ཞུས་པའི་དབང་གིས་ད་ཆ་རྒྱ་གར་ནང་དུ་རྒྱ་ཁབ་གཞན་ལྟར་རིམས་ནད་ཁྱབ་གདལ་ཆེས་ཆེར་འགྲོ་བའི་ཛ་དྲག་གི་ངལ་བ་དེ་འདྲ་འཕྲད་མེད་པར་ཡི་རངས་བསྔགས་བརྗོད་གནང་བ་དང་སྦྲགས། གཉན་རིམས་ཀྱི་གནས་སྟངས་དེ་དུས་ད་ལྟའང་རྒྱལ་སྤྱིའི་ཁྱོན་ཡོངས་སུ་ཚོད་དཔག་དཀའ་བའི་ཆེས་ཉེན་ཚབས་ཆེ་བའི་ཛ་དྲག་གི་རང་བཞིན་ཞིག་ཏུ་གྱུར་ཡོད་སྟབས། མུ་མཐུད་སྔོན་འགོག་གནང་ཕྱིར་རྒྱ་གར་རྒྱལ་ཡོངས་སུ་དེ་རིང་ནས་དབུ་འཛུགས་ཀྱིས་ཕྱི་ཟླ་ ༥ ཚེས་ ༣ བར་ཁྱོན་ཉིན་གྲངས་ ༡༩ རིང་ཐེམ་སྤངས་ཀྱི་དུས་བཀག་འོག་གནས་དགོས་པའི་བཀའ་རྒྱ་ཡོངས་གྲགས་གནང་སོང་། སྲིད་བློན་མཆོག་གིས་ཐེངས་འདིའི་ཐེམ་སྤངས་ཀྱི་བཀའ་རྒྱ་ཕར་འགྱངས་གནང་རྒྱུ་འདི་ནི་མངའ་སྡེ་ཁག་གི་སྤྱི་ཁྱབ་བློན་ཆེན་དང་ལྷག་པར་དུ་འཕྲོད་བསྟེན་ཐོག་ཕྱག་ལས་གནང་མཁན་གྱི་སྨན་པ་དང་ཆེད་ལས་མཁས་པ་སོགས་དང་ལྷན་གོ་བསྡུར་རིམ་པ་གནང་ནས་ཐུགས་ཐག་བཅད་རྒྱུ་ཡིན་པར་འགྲེལ་བརྗོད་གནང་བ་དང་ཆབས་ཅིག ཐེམ་སྤངས་ཀྱི་དུས་ཡུན་རིང་ལ་མི་མང་ནས་དགོས་ངེས་ཅན་གྱི་སྨན་དང་བཟའ་ཆས་ཐོག་སེམས་འཚབ་གནང་མི་དགོས་པ་མ་ཟད་འཕྲོད་བསྟེན་གྱི་ཆ་ནས་ད་བར་རྒྱ་གར་རྒྱལ་ཡོངས་སུ་ཏོག་དབྱིབས་རིམས་ནད་དང་འབྲེལ་བའི་བརྟག་དཔྱད་གནང་ས་བརྟག་དཔྱད་ཁང་ ༢༠༠༠ ལྷག་དང་ཛ་དྲག་གི་ནད་པ་བཞུགས་ས་ཉལ་ཁྲི་འབུམ་གཅིག་ལྷག དེ་བཞིན་ཏོག་དབྱིབས་རིམས་ནད་ལ་དམིགས་པའི་སྨན་ཁང་ ༤༠༠ ལྷག་གྲ་སྒྲིག་གནང་ཟིན་སྐོར་གསུངས་ཡོད། ལྷག་པར་དུ་སྲིད་བློན་མོ་དཱི་མཆོག་གིས་ཐེངས་འདིའི་རྒྱལ་ཡོངས་གསུང་བཤད་བརྒྱུད་རིམས་ནད་འདི་འགོག་སྲུང་ཐུབ་ཐབས་སུ་མི་སེར་ཡོངས་ནས་ཐེམ་སྤེངས་ཀྱི་བཀའ་རྒྱ་ལ་བརྩི་སྲུང་ནན་པོ་ཞུ་དགོས་པ་དང་ཐེམ་སྤངས་ཀྱི་དུས་སྐབས་སུ་ནང་མི་རྒན་གྲས་ཚོར་ལྟ་རྟོག་གང་ལེགས་གནང་དགོས་པ། བཟོ་གྲྭ་དང་ཚོགས་པ་ཁག་གིས་ལས་བྱེད་ཕྱིར་འབུད་གཏང་རྒྱུ་མེད་པ། དགོས་ངེས་ཅན་ཚོར་གང་ནུས་ཀྱིས་རོགས་རམ་གནང་དགོས་པ་སོགས་འབོད་སྐུལ་གྱི་དོན་ཚན་བདུན་ཅན་ཞིག་ཡོངས་གྲགས་གནང་སོང་བ་མ་ཟད། རིམ་བཞིན་ཛ་དྲག་གི་གནས་སྟངས་ལ་གཞིགས་ཏེ་ཟླ་བ་འདིའི་ཕྱི་ཚེས་ ༢༠ ནས་མངའ་སྡེའི་གྲོང་ཁྱེར་ཆེ་ཁག་ཅིག་ལ་གུ་ཡངས་གནང་རྒྱུའི་དགོངས་གཞི་ཡོད་པ་གསུངས་ཡོད། གཞི་རྩའི་ཏོག་དབྱིབས་རིམས་ནད་ཀྱི་ཛ་དྲག་གནས་སྟངས་ཁྲོད་རྒྱལ་སྤྱིའི་མི་སེར་སྟོང་ཕྲག་མང་པོའི་ཚེ་སྲོག་ཤོར་བཞིན་ཡོད་པ་ལྟར་རྒྱ་གར་ལ་ཆ་མཚོན་ན་ད་བར་རིམས་ནད་ཕོག་མཁན་ཆིག་ཁྲི་ལྷག་དང་འདས་གྲོངས་སུ་གྱུར་བ་ ༣༣༩ ཆགས་ཀྱི་འདུག

རྒྱ་ནག་རྒྱལ་ཚོགས་ཀྱི་ལས་དོན་ཚོགས་མིར་བསྐོས་པར་སྐྱོན་བརྗོད།

ཁ་ཉིན་ཚེས་ ༦ ཉིན་ཨ་རིའི་གྲོས་ཚོགས་གོང་མའི་སྤྱི་མཐུན་ཚོགས་པའི་གྲོས་ཚོགས་འཐུས་མི་བདུན་གྱིས་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་སྐུ་ཞབས་ Antonio Guterres མཆོག་གི་མཚན་ཐོག་ཏུ་ཕྱག་ཡིག་ཅིག་ཕུལ་ཏེ་རྒྱ་ནག་མཉམ་འཐུས་ཚབ་པ་ Jiang Duan རྒྱལ་ཚོགས་ཀྱི་ལས་དོན་ཚོགས་ཆུང་དུ་བསྐོ་གཞག་བྱས་པར་སྐྱོན་བརྗོད་ནན་པོ་གནང་འདུགཁོང་ཚོའི་ཕྱག་བྲིས་དེའི་ནང་རྒྱ་ནག་ནི་རང་རྒྱལ་གྱི་ཕྱི་ནང་གཉིས་སུ་འགྲོ་བ་མིའི་ཐོབ་ཐང་གི་གནས་བབས་ཆེས་ཞན་ཤོས་ཀྱི་རྒྱལ་ཁབ་ཅིག་ཡིན་པར་བརྟེན་ཐེངས་འདིར་རྒྱ་ནག་མཉམ་འབྲེལ་རྒྱལ་ཚོགས་ཀྱི་ཤུགས་རྐྱེན་ཆེ་བའི་ལས་དོན་ཚོགས་ཆུང་དུ་བསྐོ་བཞག་བྱས་པར་ངོས་ལེན་རྩ་བ་ནས་མེད་པ་མ་ཟད་རྒྱལ་ཚོགས་ཀྱིས་རྒྱ་ནག་དེ་ལས་དོན་ཚོགས་ཆུང་ནས་ཕྱིར་ཕུད་གནང་དགོས་པའི་དགོས་འདུན་ཆེད་བཏོན་གནང་འདུགདེ་བཞིན་ཞུ་སྙན་དེའི་ནང་ཐེངས་འདིར་རྒྱ་ནག་གི་སྐུ་ཚབ་འགྲོ་བ་མིའི་ཐོབ་ཐང་གི་ལས་དོན་ཚོགས་ཆུང་དུ་བསྐོ་གཞག་བྱས་པ་དེས་སྤྱི་ཡོངས་ཀྱི་འགྲོ་བ་མིའི་ཐོབ་ཐང་དུ་འབྲེལ་ནས་རང་དབང་གི་རྟོག་ཞིབ་པ་ ༡༧ ལྷག་འདེམས་སྒྲུག་གནང་གི་ཡོད་ལུགས་ལུང་འདྲེན་གྱིས་ས་མིག་དེ་དག་གི་ཁྲོད་རྒྱ་ནག་གིས་དུས་རྒྱུན་ནས་ལག་བསྟར་བྱེད་བཞིན་པའི་སྨྲ་བརྗོད་རང་དབང་ལ་དམ་དྲག་དང་གང་བྱུང་དུ་འཛིན་བཟུང་། གར་སོང་ཆ་མེད་དུ་གྱུར་བ་སོགས་ཀྱི་གནད་དོན་ལ་རྟོག་ཞིབ་གནང་མཁན་མི་སྣ་མང་པོར་དམ་དྲག་ཤུགས་ཆེ་བྱས་པར་བརྟེན་རྒྱལ་ཚོགས་ཀྱིས་རྒྱ་ནག་གི་འཐུས་པ་པ་ལས་དོན་ཚོགས་ཆུང་དུ་བསྐོ་གཞག་བྱས་པར་བློ་ཕམ་ཆེན་པོ་ཡོད་པ་འཁོད་འདུགདེ་བཞིན་གྲོས་ཚོགས་འཐུས་མི་རྣམས་ཀྱིས་རྒྱ་ནག་གིས་འདི་ལོའི་རྒྱ་ནག་གི་གྲོང་ཁྱེར་ཝུ་ཧྲན་ནས་ཁྱབ་བརྡལ་བྱུང་བའི་ཉེན་ཚབས་ཀྱི་ཐད་ནས་འཛམ་གླིང་ཧྲིལ་པོར་མགོ་སྐོར་བཏང་ཡོད་པར་མ་ཟད་ནད་ཡམས་ཁྱབ་བརྡལ་གྱི་སྐབས་སུ་སྤྱི་ཡོངས་ཀྱི་འགྲོ་བ་མིའི་ཐོབ་ཐང་ལ་རྡོག་རོལ་བཏང་སྟེ་གཉན་རིམས་ཁྱབ་བརྡལ་ལ་གསལ་འདེབས་བྱེད་མཁན་གྱི་སྨན་པ་རྣམས་ལ་ཉེས་ཆད་བཅད་པ་དང་རིམས་ནད་ཀྱི་གནས་ཚུལ་ཡོད་ཚད་ལ་དྲྭ་ཐོག་ནས་བཀག་སྡོམ་བྱས་ཏེ་ད་ཆ་འཛམ་གླིང་ཡོངས་ལ་ནད་ཡམས་ཁྱབ་བརྡལ་འགྲོ་བཞིན་པ་སོགས་མངོན་གསལ་གནང་བ་དང་ཆབས་ཅིག་ཏུ་རྒྱ་ནག་གི་འཐུས་ཚབ་པ་མཉམ་འབྲེལ་རྒྱལ་ཚོགས་ཀྱི་ལས་དོན་ཚོགས་ཆུང་དུ་བསྐོ་གཞག་གནང་རྒྱུ་རྩིས་མེད་གཏོང་དགོས་པའི་འབོད་སྐུལ་གནང་འདུག  གནས་ཚུལ་དེ་དང་འབྲེལ་ཏེ་རྒྱ་ནག་གིས་ཡུ་གུར་མི་མང་ས་ཡ་གཅིག་ལྷག་བཀག་བསྐྱིལ་གྱིས་གྲངས་ཉུང་མི་རིགས་གཙང་བཟོ་བྱེད་རྒྱུའི་སྲིད་བྱུས་ལག་བསྟར་བྱེད་ཀྱི་ཡོད་པ་གསལ་པོ་ཆགས་ཡོད་པ་དང་ཁ་ཆེ་མི་རིགས་ནི་རྒྱ་ནག་གི་ནང་མི་སེར་རིམ་པ་གཉིས་ལ་ལྟ་བུའི་ངོ་བོར་གནས་ཡོད་ལུགས་ལུང་འདྲེན་གནང་སྟེ་དེ་ལྟ་བུའི་བྱེད་བབ་དེ་ནི་འགྲོ་བ་མིའི་རིགས་སྤྱིར་གནོད་འཚབ་ཆེ་བའི་ནག་ཉེས་ཤིག་ཡིན་པ་གསུངས་བ་མ་ཟད་རྒྱ་ནག་དེ་རྒྱལ་ཚོགས་ཀྱི་ལས་དོན་ཚོགས་ཆུང་དུ་བསྐོ་གཞག་བྱེད་ཐབས་མེད་པ་ཡོངས་གྲགས་གནང་འདུགམཉམ་འབྲེལ་རྒྱལ་ཚོགས་ནི་འགྲོ་བ་མིའི་རིགས་ཀྱི་དཀའ་རྙོག་བསྐྱར་བཟློས་མི་ཡོང་བ་དང་མིའི་རིགས་ཀྱི་བདེ་རྩར་དམིགས་ནས་ཆེད་འཛུགས་བྱས་པ་ཞིག་ཡིན་པ་གསལ་འདེབས་གནང་བ་དང་ལྷན་དུ་ང་ཚོས་ངེས་པར་དུ་མཉམ་འབྲེལ་རྒྱལ་ཚོགས་ཀྱི་དབུ་ཁྲིད་དང་ཚོགས་མིའི་རྒྱལ་ཁབ་ཁག་ནས་ལེགས་ཕྱོགས་ལ་རེ་བ་བྱས་ཏེ་ང་ཚོའི་ཐུན་མོང་གི་རིན་ཐང་དང་ཆེ་མཐོང་གཙུག་ཏུ་བཟུང་ཐོག་འགྲོ་བ་མིའི་ཐོབ་ཐང་ལ་རྡོག་རོལ་གཏོང་མཁན་གྱི་རྒྱ་ནག་གི་འཐུས་ཚབ་པ་ལས་དོན་ཚོགས་ཆུང་ནས་ཕྱིར་ཕུད་གཏོང་དགོས་པའི་འབོད་སྐུལ་ནན་བརྗོད་གནང་འདུགགཞི་རྩའི་ཕྱི་ཟླ་ ༤ ཚེས་ ༡ ཉིན་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལས་དོན་ཚོང་ཆུང་གི་ནང་རྒྱ་ནག་ཨེ་ཤ་ཡའི་ཞི་བདེ་རྒྱ་མཚོའི་ཁུལ་གྱི་འཐུས་མིར་བསྐོས་ཡོད་པར་བརྟེན་ཨ་རིའི་གྲོས་ཚོགས་འཐུས་མི་དང་རྒྱལ་ཚོགས་གནད་དོན་ལྟ་ཞིབ་ཁང་སོགས་ནས་སྨྲ་བརྗོད་རང་དབང་དང་ཆོས་དད་རང་དབང་སོགས་རྡོག་རོལ་གཏོང་མཁན་ཆེས་སྡུག་ཤོས་ཀྱི་རྒྱ་ནག་གི་འཐུས་ཚབ་པ་རྒྱལ་ཚོགས་ཀྱི་ལས་དོན་ཚོགས་ཆུང་ནང་བསྐོ་གཞག་བྱུང་བར་སྐྱོན་བརྗོད་ཤུགས་ཆེ་གནང་ཡོད་པ་རེད། ལྷག་པར་དུ་བོད་མིའི་སྒྲིག་འཛུགས་དྲིལ་བསྒྲགས་དྲུང་ཆེ་ཚེ་དབང་རྒྱལ་པོ་ཨརྱ་ལགས་ཀྱིས་རྒྱ་ནག་དམར་པོའི་སྲིད་གཞུང་ནི་འཛམ་གླིང་ནང་འགྲོ་བ་མིའི་ཐོབ་ཐང་དང་ཆོས་དད་རང་དབང་ཐོག་དམ་དྲག་ཤུགས་ཆེ་ཤོས་བྱེད་མཁན་དང་བསམ་ཚུལ་བརྗེ་ལེན་དང་སྨྲ་བརྗོད་རང་དབང་བརྡལ་བཤིག་གཏོང་མཁན་གྱི་རྒྱལ་ཁབ་གཙོ་བོ་ཞིག་ཡིན་པ་ཡོངས་གྲགས་ཡིན་བཞིན་དུ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་ལམ་སྟོན་ཚོགས་ཆུང་གི་ཚོགས་མིའི་ཁོངས་སུ་བསྐོ་གཞག་བྱས་པ་དེ་ནི་བློ་ཕམ་གྱི་གནས་ཤིག་ཡིན་པ་དང་། གནང་བབས་དེས་རང་དབང་དང་དྲང་བདེན་ལ་དགའ་བའི་རྒྱལ་སྤྱིའི་སྤྱི་ཚོགས་ནང་བརྡ་ལན་ལོག་པ་ཞིག་བཏང་བ་མ་ཟད་རྒྱལ་སྤྱིའི་ཐོག་འགྲོ་བ་མིའི་ཐོབ་ཐང་གི་གནས་སྟངས་ཐོག་འགྲེལ་བརྗོད་བྱེད་སྟངས་ལའང་ཤུགས་རྐྱེན་ངན་པ་ཐེབས་རྒྱུ་ཡིན་པ་སོགས་འགྲེལ་བརྗོད་གནང་བ་དང་སྦྲགས། ད་ཆ་དཀའ་སྡུག་མྱོང་བཞིན་པའི་མི་རིགས་དེ་དག་གི་ངོས་ནས་རེ་བ་བཅོལ་ཡུལ་རྒྱལ་སྤྱིའི་སྒྲིག་འཛུགས་ནང་ཉེས་ཅན་པ་རང་ཉིད་སྒྲིག་འཛུགས་སྲུང་མིར་བསྐོས་པ་ནི་སྤྱང་ཀི་ལུག་རྫིར་བསྐོས་པའི་དཔེ་ལྟར་རེད་ཅེས་གསུངས་འདུག

བོད་མི་མང་ཚོགས་ཀྱིས་རིམས་ནད་ལ་གདོང་ལེན་གྱིས་རྒྱ་གར་གཞུང་མང་ལ་དངུལ་དངོས་ཀྱི་ཞལ་འདེབས་གནང་བ།

རྒྱ་ནག་ཝུ་ཧན་ནས་ཁྱབ་བརྡལ་བྱུང་བའི་ཏོག་དབྱིབས་རིམས་ནད་རྐྱེན་གྱིས་འཛམ་གླིང་གང་སར་གཞུང་མང་གཉིས་ལ་དཀའ་ངལ་རབས་དང་རིམ་པ་འཕྲད་མུས་ཡིན་པ་ལྟར་བཙན་བྱོལ་བོད་མིའི་གནས་ཚང་རྒྱལ་ཁབ་རྒྱ་གར་ལ་མཚོན་ནའང་ད་ཆ་རིམས་ནད་རྐྱེན་པས་མི་མང་གི་ཉིན་རེའི་བྱེད་ལས་ཁག་ལ་བཀག་སྡོམ་བྱས་ཏེ་རང་ཁྱིམ་དུ་སྡོད་མུས་ཡིན་པའི་སྐབས་འདིར་བོད་མི་མང་ཚོགས་སྤྱི་དང་དགོན་སྡེ་གྲྭ་ཚང་སོགས་ཀྱིས་རང་རང་སྡོད་སའི་ཉེ་འཁོར་གྱི་རྒྱ་གར་ཡུལ་མི་རྣམས་ལ་ཟས་སྦྱིན་གནང་བ་དང་དེ་བཞིན་རྒྱ་གར་སྲིད་བློན་མཆོག་གི་དབུལ་ཕོངས་ལ་དམིགས་པའི་ངལ་སེལ་གྱི་རོགས་དངུལ་ཐེབས་རྩ་བཅས་ལ་ཞལ་འདེབས་གནང་མཁན་མང་པོ་བྱུང་འདུག གཡུང་དྲུང་བོན་འཛིན་སྐྱོང་ལྷན་ཚོགས་ཀྱིས་གནས་ཚུལ་སྤེལ་བར་ད་ཆ་རྒྱ་ནག་གི་ཏོག་དབྱིབས་རིམས་ནད་ཁྱབ་བརྡལ་རྐྱེན་པས་རྒྱལ་སྤྱིའི་ཁྱོན་འདིར་འགྲོ་བ་མིའི་རིགས་ལ་དཀའ་ངལ་ཆེན་པོ་འཕྲད་བཞིན་པ་མ་ཟད་མི་མང་པོ་ཞིག་རིམས་ནད་འདིའི་རྐྱེན་གྱིས་འདས་གྲོངས་སུ་གྱུར་ཡོད་པར་ཡོངས་གྲགས་གནང་སྟེ་རྒྱ་གར་དབུས་གཞུང་དང་མངའ་སྡེ་གཞུང་། དེ་བཞིན་སྨན་ཁང་ཁག་དང་ཉེན་རྟོག་རུ་ཁག་བཅས་ཀྱིས་རྒྱ་གར་ནང་རིམས་ནད་ཁྱབ་བརྡལ་ལ་གདོང་ལེན་གནང་བཞིན་པར་བཀའ་དྲིན་ཆེ་ཞུས་པ་དང་སྦྲགས། གཡུང་དྲུང་བོན་གྱི་སྨན་རི་ཁྲི་འཛིན་མཆོག་གིས་ལམ་སྟོན་ཕེབས་པ་བཞིན་གཡུང་དྲུང་བོན་གྱི་འཛིན་སྐྱོང་ལྷན་ཚོགས་ཀྱིས་རྒྱ་གར་སྲིད་བློན་མཆོག་གི་དབུལ་ཕོངས་ལ་དམིགས་པའི་ངལ་སེལ་གྱི་རོགས་དངུལ་ཐེབས་རྩ་ཧིན་སྒོར་འབུམ་གཉིས་དང་དེ་བཞིན་ཧི་མཱ་ཅལ་མངའ་སྡེ་གཞུང་གི་རིམས་ནད་ངལ་སེལ་ཐེབས་རྩར་ཧིན་སྒོར་འབུམ་གསུམ་བཅས་གནང་བ་མ་ཟད། ས་གནས་ཀྱི་ཡུལ་མིའི་ཁྱིམ་ཚང་ ༢༠༠ མ་ཟིན་ཙམ་ལ་ཉེར་མཁོའི་ཟས་རིགས་ཀྱི་སྦྱིན་པ་གནང་འདུག དེ་བཞིན་ཧི་མཱ་ཅལ་གྱི་མངའ་ཁོངས་སུ་གནས་པའི་དཔལ་སྤུངས་ཤེས་རབ་གླིང་དགོན་པས་ཀྱང་རྒྱ་གར་དབུས་གཞུང་དང་མངའ་སྡེ་གཞུང་གི་རིམས་ནད་ཀྱི་ངལ་སེལ་ཚོགས་པར་ཞལ་འདེབས་ཧིན་སྒོར་འབུམ་བཅོ་ལྔ་གནང་ཡོད་པ་ཟད་ནད་ཡམས་དོགས་གཞིའི་ཟུར་བཀག་གི་ལྟེ་གནས་སུ་ཡང་ཉེར་མཁོའི་བཟའ་བཅའ་རིགས་གནང་བ་དང་། གལ་ཏེ་ཛ་དྲག་ཆགས་པ་ཡིན་ན་དགོན་པའི་ངོས་ནས་རང་ལོ་སུམ་ཅུའི་འོག་གི་ན་གཞོན་དང་བླངས་པ་ ༣༠ ལྷག་གྲ་སྒྲིག་གིས་དགོས་ངེས་ཀྱི་རོགས་རམ་གནང་རྒྱུ་ཡིན་པར་ཡོངས་གྲགས་གནང་འདུག དེ་བཞིན་སྦིར་ཚོགས་པ་ཁག་གིས་ཀྱང་ཞལ་འདེབས་བསྡུ་རུབ་ཀྱིས་རྒྱ་གར་གཞུང་ལ་ཧིན་སྒོར་འབུམ་བཞིའི་ཞལ་འདེབས་གནང་འདུག གཞན་ཡང་ཧི་མཱ་ཅལ་མངའ་ཁོངས་ཀྱི་ཁམས་སྒར་གྲྭ་ཚང་། བཤད་གྲྭ། བྱང་ཆུབ་ལྗོངས་རྡོ་རྫོང་དགོན། བཙུན་དགོན་དོན་བརྒྱུད་གླིང་། བཀྲ་ཤིས་ལྗོངས་ཀྱི་གཞིས་ཆགས་ལས་ཁུངས་བཅས་མཉམ་རུབ་ཀྱིས་རྒྱ་གར་དབུས་དང་མངའ་སྡེ་གཞུང་ལ་ཧིན་སྒོར་འབུམ་དྲུག་གི་ཞལ་འདེབས་གནང་བ་མ་ཟད། མགོན་མེད་ཉམ་ཐག་གི་རིགས་ལ་ཉིན་རེའི་བཟའ་བཅའ་བཅས་ཀྱི་ཞལ་འདེབས་གནང་སྟེ་ཐེངས་འདིའི་རིམས་ནད་དོན་རྐྱེན་ཁྲོད་མདུན་བསྐྱོད་ཀྱིས་ཕྱག་ལས་གནང་མཁན་སྤྱི་དང་དེ་བཞིན་འཛིན་སྐྱོང་གི་ཐོག་ནས་རིམས་ནད་སྔོན་འགོག་གི་ཕྱག་ལས་གནང་མཁན་ཡོངས་ལ་ཐུགས་རྗེ་ཆེ་ཞུས་འདུག དེ་བཞིན་ལྷོ་ཕྱོགས་བཀྲ་ཤིས་ལྷུན་པོ་དགོན་པས་ཀྱང་རྒྱ་གར་སྲིད་བློན་མཆོག་གི་དབུལ་ཕོངས་ལ་དམིགས་པའི་ངལ་སེལ་གྱི་རོགས་དངུལ་ཐེབས་རྩར་ཧིན་སྒོར་འབུམ་གཅིག་དང་ཕྱེད་ཀ་དང་ཀ་ན་ཊ་ཀའི་མངའ་སྡེ་གཞུང་ལ་ཧིན་སྒོར་འབུམ་གཅིག་བཅས་ཀྱི་ཞལ་འདེབས་གནང་བ་མ་ཟད་ཁུལ་དེའི་ཉམ་ཐག་པ་རྣམས་ལ་བཟའ་བཅའ་རིགས་ཀྱི་རོགས་རམ་གནང་འདུག རྒྱ་གར་བྱང་ཕྱོགས་ཀྱི་བོད་རིགས་འདུས་སྡོད་ཀྱི་ས་ཁུལ་ལྡེ་ར་ལྡུན་ཁུལ་དུ་ས་སྐྱ་མཐོ་སློབ། ས་སྐྱ་སྨོན་ལམ་ཐེབས་རྩ་ཁང་། དེ་བཞིན་སྒྲོལ་མ་ཕོ་བྲང་ཚོགས་པ་དང་ས་སྐྱ་དབུས་ལྟེ་གནས་ཁང་སོགས་ཀྱིས་མཉམ་རུབ་ཀྱི་ཐོག་ནས་ཨོ་ཊྲར་ཁཱན་ཌ་མངའ་སྡེ་གཞུང་གི་བློན་ཆེན་གྱི་མཚན་ཐོག་ཏུ་ཧིན་སྒོར་འབུམ་ ༢༣ ལྷག་གི་ཞལ་འདེབས་གནང་སྟེ་མངའ་སྡེ་གཞུང་གི་འབྲེལ་ཡོད་ཀུན་གྱིས་རིམས་ནད་སྔོན་འགོག་གི་ཕྱག་ལས་རྒྱ་ཆེར་གནང་བཞིན་པར་བཀའ་དྲིན་ཆེ་ཞུས་འདུག དེ་མཚུངས་སུ་རྡོར་གདན་བཀའ་བརྒྱུད་སྨོན་ལམ་ཆེན་མོའི་ཐེབས་རྩ་ཚོགས་པའི་ངོས་ནས་བི་ཧཱར་མངའ་སྡེའི་བློན་ཆེན་མཆོག་གི་ཐེབས་རྩ་བརྒྱུད་དེ་ཧིན་སྒོར་བུམ་ལྔ་དང་རྒྱ་གར་གྱི་སྲིད་བློན་མཆོག་གི་ཐེབས་རྩར་ཧིན་སྒོར་འབུམ་ལྔ་ཕུལ་འདུག དེ་བཞིན་དྷ་སར་རྟེན་གཞི་བྱས་པའི་ནོར་བུ་བཀྲ་ཤིས་ལགས་ཀྱིས་ཀྱང་རྒྱ་གར་གྱི་ཡུལ་མི་བརྒྱ་ལྷག་ལ་གྲོ་ཕྱེ་དང་འབྲས། དེ་བཞིན་སྣུམ་དང་ཚལ་རིགས་བཅས་ཀྱི་རོགས་རམས་གནང་བཞིན་འདུག ཁོང་གིས་གསར་འགོད་པར་མི་ཚང་མར་མང་ཉུང་ལ་མ་བལྟས་པར་གཞན་ལ་རོགས་རམ་བྱེད་རྒྱུའི་ནུས་པ་ཡོད་སྟབས་ཛ་དྲག་གི་སྐབས་སུ་རོགས་བྱེད་རྒྱུ་དེ་ནི་རང་ཉིད་ནང་པ་ཞིག་ཡིན་པ་དང་༸གོང་ས་མཆོག་གི་དགོངས་གཞི་ཡིན་པར་འགྲེལ་བརྗོད་གནང་སོང་། གཞན་ཡང་ལ་དྭགས་ཁུལ་གྱི་ཀརྨ་སྒྲུབ་བརྒྱུད་དགོན་གྱིས་ཀྱང་རྒྱ་གར་དབུས་གཞུང་གི་ཐད་གར་སྟངས་འཛིན་འཛིན་སྐྱོང་ལས་ཁུངས་སུ་ཧིན་སྒོར་འབུམ་གཅིག་གི་ཞལ་འདེབས་གནང་སྟེ་གང་མགྱོགས་རིམས་ནད་ཞི་བའི་སྨོན་འདུན་ཡོད་པར་གསུངས་འདུག གཞི་རྩའི་རྒྱ་ནག་ཝུ་ཧན་གྱི་རིམས་ནད་དེ་འཛམ་གླིང་གི་ས་ཁུལ་གང་སར་ཁྱབ་བརྡལ་ཕྱིན་པ་དང་ལྷན་དུ་གཞུང་དང་མི་མང་ཡོངས་ཀྱིས་ནུས་ཤུགས་གཅིག་ཏུ་སྒྲིལ་ནས་རིམས་ནད་ལ་སྔོན་འགོག་གནང་བཞིན་པའི་ཁྲོད། བོད་མི་མང་ཚོགས་ཀྱིས་ཀྱང་རང་གི་འཇོག་ནུས་ལ་དཔག་པའི་ཞལ་འདེབས་དང་བཟའ་བཅའ་སོགས་ཀྱི་རོགས་རམ་གནང་མཁན་མང་པོ་བྱུང་གི་ཡོད་པ་ལྟར། རླུང་འཕྲིན་ཁང་གིས་མང་ཚོགས་ཀྱིས་འགན་རང་འཁུར་གྱིས་དངུལ་དངོས་ཀྱི་ཞལ་འདེབས་གནང་བ་དང་དེ་བཞིན་དཔལ་འབྱོར་གྱི་འཁོས་ཁ་ཞན་པའི་ཉམ་ཐག་རིགས་ལ་སྡོད་གནས་མཁོ་སྤྲོད་བྱེད་བཞིན་པ་སོགས་ཀྱི་གནད་དོན་ཁག་ཅིག་དེ་སྔ་ནས་བཏང་ཟིན་པ་བཞིན་དེ་རིང་བསྐྱར་དུ་བོད་རིགས་འདུས་སྡོད་ཀྱི་ས་ཁུལ་ཁག་ཅིག་གིས་རོགས་རམས་གནང་བཞིན་པའི་གནས་ཚུལ་ཕྱོགས་བསྡུས་ཞུས་ཡོད།

རྒྱ་ནག་དེ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཤུགས་རྐྱེན་ཆེ་བའི་སློབ་སྟོན་རུ་ཁག་གི་ཚོགས་མིར་བསྐོ་གཞག་བྱུང་བར་ངོ་རྒོལ།

རེས་གཟའ་ལྷག་པའི་ཉིན་རྒྱ་ནག་དེ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཤུགས་རྐྱེན་ཆེ་བའི་སློབ་སྟོན་རུ་ཁག་ཏུ་བསྐོ་གཞག་བྱས་ཡོད་པ་དང་འབྲེལ་ཏེ་ཐེངས་འདིའི་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་སློབ་སྟོན་རུ་ཁག་ལ་བསྐོ་གཞག་བརྒྱུད་འཛམ་གླིང་གི་སྨྲ་བརྗོད་རང་དབང་དང་འཕྲོད་བསྟེན། གར་སོང་ཆ་མེད་དུ་གྱུར་བ། དོ་དམ་བཀག་བསྐྱིལ་སོགས་ཀྱི་གནད་དོན་ཐད་རྒྱལ་སྤྱིའི་འགྲོ་བ་མིའི་ཐོབ་ཐང་གི་རྟོག་ཞིབ་པ་འདེམས་སྒྲུག་གི་ལས་དོན་གཙོ་བོ་གཉེར་དགོས་སྟབས་རྒྱལ་སྤྱིའི་འགྲོ་བ་མིའི་ཐོབ་ཐང་དོན་གཉེར་བ་ཚོས་དེར་ངོ་རྒོལ་གནང་བཞིན་འདུགདེ་རིང་བརྒྱུད་ལམ་ཁག་གིས་ད་ལན་རྒྱ་ནག་དེ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་སློབ་སྟོན་རུ་ཁག་ཁོངས་སུ་བསྐོ་གཞག་བྱས་པ་བརྒྱུད་རྒྱ་ནག་ནས་ཉུང་མཐར་རྒྱལ་ཁབ་སོ་སོའི་སྨྲ་བརྗོད་དང་ཆོས་དད་རང་དབང་གཙོས་པའི་འགྲོ་བ་མིའི་གཞི་རྩའི་ཐོབ་ཐང་ཁག་གི་གནས་སྟངས་ཐད་རྟོག་ཞིབ་གནང་མཁན་གྱི་མི་སྣ་ ༡༧ ལྷག་འདེམས་སྒྲུག་བྱེད་རྒྱུའི་ཐོག་ཤུགས་རྐྱེན་སྤྲད་རྒྱུ་ཡིན་པར་བརྟེན་སུད་སི་གྲོང་ཁྱེར་ཇི་ནི་ཝར་རྟེན་གཞི་བྱས་པའི་རྒྱལ་ཚོགས་ལྟ་ཞིབ་ཚོགས་པའི་འགྲོ་བ་མིའི་ཐོབ་ཐང་གི་ཚོགས་པའི་འགན་འཛིན་སྐུ་ཞབས་ Hillel Neuer ལགས་ཀྱིས་དེར་ངོ་རྒོལ་གནང་བ་དང་འབྲེལ། དྲག་གནོན་དང་མི་སྤྱོད་ལས་འདས་པའི་སྲིད་བྱུས་སྤེལ་མཁན་རྒྱ་ནག་ལྟ་བུ་འཛམ་གླིང་གི་འགྲོ་བ་མིའི་ཐོབ་ཐང་ཐད་རྟོག་ཞིབ་པ་འདེམས་སྒྲུག་བྱ་རྒྱུའི་དབང་ཚད་སྤྲད་པ་ནི་མེར་བསྲེག་གཏང་རྒྱུར་དགའ་བའི་སྨྱོན་སྤྱོད་བྱེད་མཁན་གྱི་མི་སྣ་གྲོང་སྡེའི་མེ་གསོད་རུ་ཁག་གི་གཙོ་འཛིན་བསྐོ་གཞག་བྱས་ཡོད་པ་དང་གཅིག་མཚུངས་ཡིན་པ་གསུངས་པ་མ་ཟད། ལྷག་པར་དུ་རྒྱལ་ཚོགས་ནས་ད་ལན་རྒྱ་ནག་དེ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་སློབ་སྟོན་རུ་ཁག་ལ་བསྐོ་གཞག་བྱས་པར་མོས་མཐུན་གནང་བ་ནི་ཁུངས་མེད་དང་ཚུལ་མིན་གྱི་བྱ་སྤྱོད་ཁོ་ན་ཡིན་པར་གསུངས་འདུག དེ་བཞིན་སྐུ་ཞབས་ Hillel Neuer ལགས་ཀྱིས་རྒྱ་ནག་ནས་འགྲོ་བ་མིའི་ཐོབ་ཐང་གི་ལས་འགུལ་བ་ Zhang Baocheng ལགས་དང་། Wang Binzhang ལགས་གཉིས་གཙོས་འགྲོ་བ་མིའི་ཐོབ་ཐང་གི་དོན་གཉེར་བ་མང་དག་ཅིག་ལ་དོ་དམ་བཀག་བསྐྱིལ་བྱས་ཡོད་པ་མ་ཟད་རྒྱ་ནག་ཝུ་ཧན་ནས་ཐོག་མར་མཆེད་པའི་ཏོག་དབྱིབས་རིམས་ནད་ཐད་རྒྱ་རིགས་ཁག་གཅིག་གིས་རྒྱ་གཞུང་གི་དཔོན་རིགས་ཚོས་དེར་འགོག་ཐབས་བྱེད་ཀྱི་མེད་པ་སོགས་ཀྱི་གནད་དོན་དང་འབྲེལ་བའི་གཏམ་བཤད་གནང་མཁན་ཚོ་གར་སོང་ཆ་མེད་དུ་གྱུར་བའི་གནས་སྟངས་བཟོས་ཡོད་པ་དང་ལྷག་པར་དུ་ཡུ་གུར་ཁ་ཆེའི་མི་རིགས་དང་གཞན་གྲངས་ཉུང་མི་རིགས་དུ་གྱུར་བའི་མི་གྲངས་ས་ཡ་གཅིག་ལྷག་བཀག་བསྐྱིལ་ཁང་དུ་བཙན་དབང་གིས་བཅུག་ཡོད་སྟབས་རྒྱལ་ཚོགས་ནས་རྒྱ་ནག་དེ་འགྲོ་བ་མིའི་ཐོབ་ཐང་ལྷན་ཚོགས་ཀྱི་སློབ་སྟོན་རུ་ཁག་ཁོངས་སུ་བསྐོ་གཞག་གནང་བར་མོས་མཐུན་གནང་བ་དེ་ནི་རྒྱུ་མཚན་དང་མི་ལྡན་པ་ཞིག་ཡིན་པར་གསུངས་འདུགསྐུ་ཞབས་ Hillel ལགས་ཀྱིས་ད་དུང་རྒྱ་ནག་གིས་སྨྲ་བརྗོད་དང་བསམ་བརྗོད་རང་དབང་ཐད་རྒྱལ་ཚོགས་ཀྱི་དམིགས་བསལ་སྐུ་ཚབ་ཇི་ལྟར་འདེམས་སྒྲུག་བྱ་རྒྱུ་ཡིན་པ་དང་ད་ཆ་ཛ་དྲག་གི་དུས་ཚིགས་འདིར་ཁྱབ་གདལ་ཤུགས་ཆེ་འགྲོ་བཞིན་པའི་ཏོག་དབྱིབས་རིམས་ནད་ཐོག་རྒྱ་ནག་གི་སྨན་པ་གཙོས་གསར་འགོད་པ་དང་མི་སེར་ཚོས་དེ་འབྲེལ་བཀའ་མོལ་གནང་བར་དམ་དྲག་དང་ཁྲིམས་སྒྲིག་དམ་པོ་ལག་བསྟར་བྱེད་བཞིན་ཡོད་པས་རྒྱ་ནག་ནས་འཛམ་གླིང་གི་འཕྲོད་བསྟེན་སོགས་ཀྱི་ཐད་རྟོག་ཞིབ་པ་ཇི་ལྟར་འདེམས་སྒྲུག་བྱ་རྒྱུའི་ཡིན་པ་སོགས་ཀྱི་དྲི་བ་ཁག་གཅིག་གནང་ཡོད། སྤྱིར་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་སློབ་སྟོན་རུ་ཁག་ནང་རྒྱ་ནག་གཙོས་པའི་ Venezuela དང་པ་ཀིས་ཐན། Eritrea དེ་བཞིན་ Qatar བཅས་ཚོགས་མི་ལྔ་ཡོད་པ་དང་ད་ལན་རུ་ཁག་དེའི་ནང་རྒྱ་ནག་བསྐོ་གཞག་བྱས་པ་དེས་སློབ་སྟོན་རུ་ཁག་དེས་གནང་ཕྱོགས་ལ་ཉེན་ཚབས་ཆེན་པོ་འགྱུར་ངེས་ཡིན་པ་གསུངས་འདུག རྒྱལ་ཚོགས་ཀྱི་ལྟ་ཞིབ་ཚོགས་པས་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་སྐུ་ཞབས་ Antonio Guterres མཆོག་དང་འགྲོ་བ་མིའི་ཐོབ་ཐང་གི་གཙོ་འཛིན་ Michelle Bachelet མཆོག་རྣམ་གཉིས་ནས་རྒྱ་ནག་དེ་འགྲོ་བ་མིའི་ཐོབ་ཐང་ལྷན་ཚོགས་ཀྱི་སློབ་སྟོན་རུ་ཁག་ལ་བསྐོ་གཞག་བྱས་པར་ཡོངས་གྲགས་ཐོག་སྐྱོན་བརྗོད་གནང་དགོས་པར་མ་ཟད་རྒྱ་ནག་གཙོས་པའི་འཛམ་གླིང་ཁྲོད་འགྲོ་བ་མིའི་ཐོབ་ཐང་དང་འབྲེལ་དཀའ་སྡུག་མྱོང་བཞིན་པའི་གནོད་འཚེ་ཕོག་ཡུལ་གྱི་གང་ཟག་རྣམས་ལ་རྒྱབ་སྐྱོར་གནང་དགོས་པའི་འབོད་སྐུལ་ཞུས་འདུག ད་ལན་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱིས་རྒྱ་ནག་དེ་འགྲོ་བ་མིའི་ཐོབ་ཐང་ལྷན་ཚོགས་ཀྱི་སློབ་སྟོན་རུ་ཁག་ཁོངས་བསྐོ་གཞག་གིས་མོས་མཐུན་གནང་བ་དེ་ནི་ཁྲིམས་མཐུན་གི་རང་བཞིན་ལ་སྣང་ཆུང་བྱས་ཡོད་པར་སྐྱོན་བརྗོད་གནང་ཡོད། གཞི་རྩའི་རྒྱ་ནག་གིས་དཔལ་འབྱོར་སྟོབས་ཤུགས་སྒོ་ནས་འཛམ་གླིང་སྤྱི་ཡོངས་ཙམ་མ་ཟད་རྒྱལ་ཚོགས་ལའང་དེ་འབྲེལ་གྱི་ཤུགས་རྐྱེན་སྤྲོད་ཐབས་བྱེད་བཞིན་ཡོད་པ་ཡོངས་གྲགས་ཡིན་པ་རེད། ལྷག་དོན་རྒྱ་ནག་ནས་ཐོག་མར་ཏོག་དབྱིབས་རིམས་ནད་ཁྱབ་གདལ་འགྲོ་སྐབས་རྒྱལ་ཚོགས་ནས་དེར་ཛ་དྲག་གི་རང་བཞིན་ཞིག་ཏུ་ངོས་འཛིན་གནང་མེད་སྟབས་ད་ཆ་རིམས་ནད་དེ་གོ་ལའི་རྒྱལ་ཁབ་ ༡༩༠ ལྷག་ནང་ཁྱབ་གདལ་ཆེས་ཆེར་གྲོ་མུས་ཁྲོད་རྒྱལ་ཁབ་དང་ཚོགས་སྒེར་ཁག་གིས་རྒྱལ་ཚོགས་ལ་སྐྱོན་བརྗོད་ཤུགས་ཆེ་གནང་ཡོད་པ་རེད།

རྒྱ་གཞུང་གིས་བཙན་དབང་ཐོག་ལྟ་སྲུང་འཕྲུལ་ཆས་བརྒྱུད་གཉན་རིམས་འགོག་ཐབས་བྱེད་བཞིན་པ་མངོན་གསལ།

རྒྱ་ནག་གཞུང་གིས་མང་ཚོགས་ཀྱི་གསང་རྒྱའི་ཐོབ་ཐང་དང་རང་དབང་ལ་གུས་བརྩི་རྩ་བ་ནས་མེད་པར་བཙན་དབང་གིས་ལྟ་སྲུང་འཕྲུལ་ཆས་བརྒྱུད་དེ་ཏོག་དབྱིབས་རིམས་ནད་འགོག་ཐབས་བྱེད་བཞིན་པ་མངོན་གསལ་གནང་འདུག ཁ་སང་ཕྱི་ཟླ་ ༤ ཚེས་ ༡ ཉིན་ཨ་རིར་རྟེན་གཞི་བྱས་པའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པས་རྒྱ་ནག་གཞུང་དེ་བཞིན་དུས་རྒྱུན་ནས་མང་ཚོགས་ཀྱི་སྒེར་གྱི་གསང་རྒྱའི་རང་དབང་དང་གསར་འགོད་རང་དབང་། རང་དབང་ཅན་གྱི་ཁྲིམས་རྩོད་ཐོབ་ཐང་། དེ་བཞིན་རང་དབང་ལྡན་པའི་སྤྱི་ཚོགས་སོགས་གང་ལ་ཡང་བརྩི་སྲུང་མེད་པར་མང་ཚོགས་ཐོག་ལྟ་སྲུང་ནན་པོ་བྱེད་མཁན་ཞིག་ཡིན་པར་མ་ཟད་ཤིན་ཅང་དུ་འདས་པའི་ལོ་ཤས་ནང་རྒྱ་གཞུང་གིས་མང་ཚོགས་ཀྱི་མོས་མཐུན་མེད་པར་ Biometrics སོགས་སྒེར་གྱི་གནས་ཚུལ་གསོག་འཇོག་བརྒྱུད་དེ་མང་ཚོགས་ནས་གཞུང་ལ་དགའ་ཞེན་ཇི་ཙམ་ཡོད་མེད་དང་འགྲུལ་བསྐྱོད་ཀྱི་རང་དབང་ཇི་ཙམ་སྤྲོད་དགོས་མིན་གྱི་ཐག་གཅོད་བྱེད་བཞིན་ཡོད་པ་སོགས་ལུང་འདྲེན་དང་སྦྲགས་ཏེ། ད་ལྟའི་ཆར་ཏོག་དབྱིབས་རིམས་ནད་ཀྱི་གནས་སྟངས་ཁྲོད་རྒྱ་གཞུང་གིས་ Health Code འམ་མང་ཚོགས་ཀྱི་འཕྲོད་བསྟེན་དང་འབྲེལ་བའི་ཚོན་ཁྲ་གསུམ་ཅན་གྱི་བརྙན་ཆས་སྤྱོད་དེ་གཉན་རིམས་ཀྱི་གནས་སྟངས་འོག་གང་ཟག་སུ་ཞིག་ཕྱིར་བསྐྱོད་ནས་ལས་ཀ་བྱེད་ཆོག་པ་དང་། སུ་ཞིག་ཟུར་འཇོག་བྱེད་དགོས་པ། དེ་བཞིན་བརྙན་ཆས་བརྒྱུད་མི་དེ་ས་ཚིགས་གང་དུ་ཡོད་པ་སོགས་ཀྱི་གནས་ཚུལ་ཁག་ཉེན་རྟོག་པར་སྤྲད་པ་སོགས་སྒེར་གྱི་རང་དབང་ལ་གུས་བརྩི་མེད་པ་དང་། དེ་བས་ལྟ་སྲུང་འཕྲུལ་ཆས་ཀྱི་ཐོག་ནས་གཉན་རིམས་འགོག་ཐབས་བྱེད་བཞིན་ཡོད་པ་གསུངས་འདུག འགྲོ་བ་མིའི་ཐོབ་ཐང་ལྟ་ཞིབ་ཚོགས་པས་ད་དུང་རྒྱ་ནག་གིས་དྲྭ་རྒྱའི་མང་ཚོགས་ཁྲོད་གཞུང་གི་བྱེད་ཕྱོགས་དེར་བསམ་ཚུལ་ཇི་ཡོད་སྐོར་དང་འབྲེལ་ཏེ་ Zhihu ཞེས་པའི་རྒྱ་ནག་ནང་གི་སྤྱི་ཚོགས་གླེང་སྟེགས་ཐོག་མི་ཞིག་གིས་འཕྲུལ་ཆས་ཀྱི་ཐོག་ནས་མིར་དབང་བསྒྱུར་བྱེད་རྒྱུའི་དུས་དེ་ད་དུང་ཡང་ཉུང་མཐར་ལོ་ལྔ་བཅུ་འགོར་སྲིད་པ་དྲན་གྱི་ཡོད་ཀྱང་། རིམས་ནད་དེ་རྐྱེན་དུས་དེ་ཡང་མགྱོགས་པོ་བསླེབས་སོང་ཞེས་གསུངས་པ་དང་འབྲེལ། རྒྱ་གཞུང་གིས་འཕྲོད་བསྟེན་བརྙན་ཆས་དེ་ལྟར་སྤྱོད་བཞིན་པར་སྐྱོན་བརྗོད་གནང་བཞིན་པ་མངོན་གསལ་གནང་འདུག རྩ་བའི་བརྙན་ཆས་དེ་ནང་ད་བར་མི་ས་ཡ་ ༧༠༠ ཙམ་གྱི་གནས་ཚུལ་མཁོ་སྒྲུབ་བྱས་ཟིན་པ་རྣམས་ཀྱི་སྒེར་གྱི་གསང་བའི་ཨང་གྲངས་དང་ལྷན་དུ་ས་གནས་གང་དུ་བཞུགས་ཀྱི་ཡོད་པ། རིམས་ནད་ཕོག་པའི་མི་དང་མཉམ་གནས་གནང་མིན། ད་བར་ནད་རྟགས་འཐོན་ཡོད་མེད་སོགས་ཀྱི་གནས་ཚུལ་མཁོ་སྒྲུབ་བྱས་རྗེས། ཚོན་ཁྲ་ལྗང་ཁུ་དང་སེར་པོ། དེ་བཞིན་དམར་པོ་གང་རུང་ཤར་གྱི་ཡོད་པ་དང་། ཅི་སྟེ་ལྗང་ཁུ་ཤར་ཚེ་མི་དེ་ཕྱི་ལ་བསྐྱོད་ཆོག་པ་དང་། སེར་པོ་དང་དམར་པོ་ཤར་ཚེ་རང་ཁྱིམ་དུ་ཟུར་བཀག་ཐོག་བཞག་གི་ཡོད་པ་རེད་འདུག བརྙན་ཆས་དེས་མི་ས་ཡ་ ༧༠༠ ཙམ་ཡོད་པ་རྣམས་ལ་རང་དབང་ཇི་ཙམ་རག་གི་ཡོད་མེད་ཐོག་ཐག་གཅོད་བཞིན་ཡོད་པ་མ་ཟད་ས་ཁུལ་ཁག་ཅིག་ཏུ་མིའི་གདོང་རིས་ར་འཕྲོད་ཐུབ་པའི་འཕྲུལ་ཆས་སྤྱོད་དེ་རང་ཁྱིམ་དུ་བཞུགས་ཆོག་མིན་གྱི་ཐག་གཅོད་བཞིན་ཡོད་པ་རེད་འདུག

དྷ་སར་ཕྱིའི་རྒྱལ་ཁབ་ཀྱི་མི་སེར་ཡིན་པ་ཚོས་ཐོ་འགོད་གནང་དགོས་པའི་འབོད་སྐུལ།

ད་ལྟའི་ཆར་འཛམ་གླིང་ས་ཕྱོགས་གང་སར་ཏོག་དབྱིབས་རིམས་ནད་ཁྱབ་གདལ་རྐྱེན་པས་ཛ་དྲག་གི་གནས་སྟངས་ཁྲོད་འདིར་གཉན་རིམས་འགོག་ཐབས་ཡག་ཤོས་ནི་ Social Distancing ཞེས་མི་ཚོགས་འདུ་འཛོམས་ཀྱི་བྱ་བ་སྤངས་ཏེ་རང་ཉིད་སོ་སོའི་ཁྱིམ་དུ་བཞུགས་རྒྱུ་དེ་ཡིན་སྟབས། རྒྱ་གར་གཙོས་འཛམ་གླིང་རྒྱལ་ཁབ་ཕལ་མོ་ཆེར་ཟླ་བ་འདིའི་ཕྱི་ཚེས་ ༡༤ བར་ Lockdown ཞེས་ཐེམ་སྤངས་ཀྱི་ཁྲིམས་སྒྲིག་ལག་བསྟར་གནང་མུས་ཡིན་པ་ལྟར་བཞུགས་སྒར་དྷརྨ་སཱ་ལཱའི་ས་གནས་སྲིད་གཞུང་གིས་བཀའ་རྒྱ་བསྒྲགས་དོན་བཞིན་ཉེ་སྔོན་ཕྱི་ཟླ་ ༣ ཚེས་ ༢༣ ཉིན་དབུ་འཛུགས་ཀྱིས་ཐེམ་སྤངས་ཀྱི་ཁྲིམས་སྒྲིག་ལག་བསྟར་གནང་སྟེ་ད་བར་ཉིན་གྲངས་ ༡༡ ཙམ་སོང་ཡོད་པ་རེད། རླུང་འཕྲིན་ཁང་གི་དྷ་སཱའི་ས་གནས་ཉེན་རྟོག་ཁང་གི་ཉེན་རྟོག་འགན་འཛིན་སྐུ་ཞབས་ Neeraj Rana ལགས་སུ་ས་གནས་བོད་རིགས་མང་ཚོགས་ནས་ཐེམ་སྤངས་ཀྱི་ཁྲིམས་སྒྲིག་ལག་བསྟར་གནང་རྒྱུའི་བཀའ་རྒྱར་དང་ལེན་གང་འདྲ་གནང་གི་ཡོད་མེད་སོགས་དང་འབྲེལ་བའི་བཀའ་འདྲི་ཁག་གཅིག་ཞུས་པར་ཁོང་གིས་མེག་ལོཊ་ཁུལ་གྱི་བོད་མི་ཚོས་ད་བར་གཞུང་གི་བཀའ་རྒྱར་བརྩི་སྲུང་དང་ལེན་གང་ལེགས་གནང་གི་འདུག་པ་ལྟར་སླད་མར་དེ་ལྟར་གནང་བའི་རེ་བ་ཡོད་ཅེས་གསུངས་སོང་། ས་གནས་ཉེན་རྟོག་པ་རྣམས་ནས་རང་གི་ལས་དོན་གང་ལེགས་གནང་བཞིན་པ་རེད། ཕྱིའི་རྒྱལ་ཁབ་འདྲ་མིན་ནས་ཕེབས་པའི་མི་སྣ་ཁག་གཅིག་ས་གནས་མང་ཚོགས་ཀྱི་ཁྱིམ་དུ་བཞག་ཡོད་པ་དང་ཕྱི་མི་དེ་དག་གི་ངོས་ནས་ CForm ཞེས་པའི་འགེངས་ཤོག་བསྐང་དགོས་པ་བཞིན་ཁག་གཅིག་ནས་དེ་ལྟར་ཐོ་འགོད་གནང་མེད་སྟབས། དྷ་སར་བཞུགས་པའི་ཕྱིའི་རྒྱལ་ཁབ་ཀྱི་མི་སེར་ཡིན་པ་ཚོས་ངེས་པར་དུ་ཐོ་འགོད་གནང་དགོས་པའི་འབོད་སྐུལ་དང་སྦྲགས། དེའང་ས་གནས་གཞུང་དང་ཐད་ཀར་འབྲེལ་བ་གནང་སའི་ཞལ་པར་ཨང་གྲངས་ ༡༠༤ དང་ ༡༠༧༧ གཉིས་ཀྱི་ཐོག་གནང་ཆོག་གི་ཡོད་པ་གསུངས་སོང་བར་མ་ཟད། དེ་ལྟར་གནང་ཚེ་སོ་སོའི་རྒྱལ་ཁབ་དང་ཁྱིམ་ཚང་། དེ་བཞིན་རང་ཉིད་ཀྱི་བདེ་འཇགས་བཅས་པ་སྲུང་སྐྱོབ་ཐུབ་པའི་དགེ་མཚན་ལྡན་ཡོད་པ་གསུངས་ཡོད། དེ་བཞིན་ཁོང་གིས་མང་ཚོགས་ནས་ཐེམ་སྤངས་ཀྱི་ཁྲིམས་སྒྲིག་ལག་བསྟར་མ་གནང་ཚེ་ཁྲིམས་སྒྲིག་ལྟར་ཕྱག་བསྟར་གནང་རྒྱུ་ཡིན་པ་གསུངས་སོང་བ་དང་། རང་ཁྱིམ་དུ་བཞུགས་ཏེ་རང་གི་བདེ་འཇགས་ཐད་སྲུང་སྐྱོབ་གནང་གནད་ཡིན་པ་མ་ཟད་ལྷག་དོན་བཟའ་ཆས་གཙོས་མཁོ་ཆས་ཉོ་ཁག་རྣམས་ངེས་པར་དུ་གཙང་བཟོ་གནང་སྟེ་ཁྱིམ་དུ་འཁྱེར་དགོས་པར་ལམ་སྟོན་གནང་ཡོད། རྒྱ་ནག་གི་ཝུ་ཧན་གྲོང་ཁྱེར་ནས་ཁྱབ་བརྡལ་བྱུང་བའི་ཏོག་དབྱིབས་རིམས་དེའི་འོག་རྒྱ་ནག་ནང་མི་ཁྲི་ ༨ ལྷག་ལ་རིམས་ནད་དེ་ཕོག་པ་དང་མི་ ༣༠༠༠ ལྷག་འདས་གྲོངས་སུ་ཕྱིན་ཡོད་པ་གཙོས་འཛམ་གླིང་ཁྱོན་ལ་ད་བར་མི་འབུམ་ ༡༠ མ་ཟིན་ཙམ་ཞིག་ལ་རིམས་ནད་དེ་འགོས་ཁྱབ་བྱུང་སྟེ་ད་བར་མི་ ༤༥༠༠༠ ཙམ་རྐྱེན་འདས་སུ་གྱུར་ཡོད་པ་རེད། དེ་བཞིན་ད་བར་རྒྱ་གར་ནང་རིམས་ནད་དེ་ཕོག་པ་མང་ཚོགས་ ༢༠༠༠ ལྷག་བྱུང་ཡོད་པའི་ཁྲོད་ནས་མི་ ༥༠ འདས་གྲོངས་སུ་གྱུར་ཡོད་པ་རེད།

ཆབ་སྲིད་བཙོན་ཟུར་བཀྲ་ཤིས་ཕུན་ཚོགས་ལགས་སྐུ་གྲོངས་འདུག

ཁ་ཉིན་ཟླ་ ༣ ཚེས་ ༡༦ ཉིན་ཕ་ཡུལ་ལི་ཐང་ནས་ཡིན་པའི་བོད་ཀྱི་ཆབ་སྲིད་བཙོན་ཟུར་བཀྲ་ཤིས་ཕུན་ཚོགས་ལགས་རྒྱ་ནག་གིས་མནར་གཅོད་ཚད་མེད་བཏང་པར་བརྟེན་ནད་གཅོང་དུ་གྱུར་ནས་ཁ་སང་སྐུ་གྲོངས་འདུགབཀྲ་ཤིས་ཕུན་ཚོགས་ལགས་དང་ཡུལ་ལུང་གཅིག་པའི་འབྲས་སྤུངས་སྒོ་མང་གྲྭ་ཚང་གི་ཆབ་སྲིད་བཙོན་ཟུར་དགེ་བཤེས་ཚེ་རིང་རྡོ་རྗེ་ལགས་ཀྱིས་རླུང་འཕྲིན་ཁང་ལ་གནས་ཚུལ་མཁོ་སྤྲོད་གནང་བར་བཀྲ་ཤིས་ཕུན་ཚོགས་ལགས་ནི་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་དམ་པ་མཆོག་གིས་ཕྱག་བཏབ་པའི་ཁམས་ནཱ་ལེན་དྲ་ཐེག་ཆེན་བྱང་ཆུབ་ཆོས་གླིང་གི་དགོན་པའི་དགེ་བསྐོས་ཡིན་པ་དང་། ཕྱི་ལོ་ ༢༠༠༢ ཟླ་ ༤ ཙམ་ལ་སྤྲུལ་སྐུ་བསྟན་འཛིན་བདེ་ལེགསས་མཆོག་རྒྱ་ནག་གིས་མ་ཉེས་ཁག་གཡོགས་ཀྱིས་འབར་རྫས་གས་གཏོར་དང་འབྲེལ་ནས་འཛིན་བཟུང་བྱེད་སྐབས་བཀྲ་ཤིས་ཕུན་ཚོགས་ལགས་དོན་རྐྱེན་དེ་དང་བྲེལ་བ་ཡོད་པར་བསྙད་དེ་དཀར་མཛེས་བོད་རིགས་རང་སྐྱོང་ཁུལ་འབྲིང་རིམ་ཁྲིམས་ཁང་གིས་ཁོང་སྨན་ཁང་ནས་ཁོང་འཛིན་བཟུང་བྱས་ཏེ་ལོ་བདུན་གྱི་རིང་བཙོན་འཇུག་ཁྲིམས་ཐག་བཅད་དེ་སྡུག་སྦྱོང་མནར་གཅོད་མང་དག་ཅིག་བཏང་ཡོད་པར་བརྟེན་མཐར་ནད་གཅོང་དུ་གྱུར་ནས་སྨན་ཁང་ནས་ཤི་གྲབས་བྱེད་སྐབས་ཕྱིར་ཡུལ་མིར་རྩིས་སྤྲོད་བྱས་ཡོད་ལུགས་གསུངས་སོང་། བཀྲ་ཤིས་ཕུན་ཚོགས་ལགས་རྒྱ་ནག་གིས་འཛིན་བཟུང་བྱེད་དགོས་པའི་རྒྱུ་རྐྱེན་གང་ཡིན་གསུངས་པར་ཕྱི་ལོ་ ༡༩༩༣ ལོ་ཉག་ཆུ་རྫོང་ནག་ནགས་ལས་ཁང་གིས་གཞུང་གི་ཐོབ་དབང་ཟེར་བའི་ཤིང་ནགས་གཅོད་འབྲེག་གི་ལས་འགུལ་ཞིག་ཨོ་ཐོག་སྡེ་དྲུག་གི་ས་གནས་སུ་སྤེལ་སྐབས་ཁོང་གིས་དབུ་ཁྲིད་པའི་ཡུལ་མི་རྣམས་ཀྱིས་བཀག་འགོག་ངོ་རྒོལ་གྱི་ལས་འགུལ་སྤེལ་ཡོད་པ་དང་། དུས་དེ་ནས་བཟུང་རྒྱ་ནག་གིས་ཁོང་འཛིན་བཟུང་བྱེད་རྩིས་བྱས་ཡོད་པ་བཞིན་ཕྱིས་སུ་སྤྲུལ་སྐུ་བསྟན་འཛིན་བདེ་ལེགས་དམ་པ་མཆོག་དང་འབྲེལ་ཡོད་ཀྱི་མི་མང་པོ་རྒྱ་ནག་གིས་འཛིན་བཟུང་བྱས་པ་ལྟར་བཀྲ་ཤིས་ཕུན་ཚོགས་ལགས་ཀྱང་གས་རྫས་ཀྱི་དོན་རྐྱེན་དང་འབྲེལ་བ་ཡོད་པར་བསྙེད་ནས་འཛིན་བཟུང་བྱས་པ་ཞིག་ཡིན་སྐོར་ངོ་སྤྲོད་གནང་ཡོད།

དྲྭ་ཐོག་བརྒྱུད་དེ་ཨ་རི་ནང་བོད་དོན་ཞུ་གཏུག་ལས་འགུལ་སྤེལ་རྒྱུ།  

ཨ་རིའི་ནང་ལོ་ལྟར་ Tibet lobby day འམ་ཨ་རི་གྲོས་ཚོགས་འཐུས་མིར་བོད་དོན་ཞུ་གཏུག་ལས་འགུལ་ཞིག་གོ་སྒྲིག་གནང་བཞིན་པ་ལྟར་ཉེ་ལམ་ཕྱི་ཚེས་ ༡༢ ཉིན་རྒྱལ་སྤྱིའི་བོད་དོན་ལས་འགུལ་ཁང་དང་བོད་རང་བཙན་སློབ་ཕྲུག་ཚོགས་པ། རྒྱལ་སྤྱིའི་བོད་དོན་འབྲེལ་ཁང་བཅས་ཀྱིས་གསལ་བསྒྲགས་ཤིག་སྤེལ་བར་འདི་ལོའི་བོད་དོན་ཞུ་གཏུག་ཉིན་མོ་དེ་བདུན་ཕྲག་རྗེས་མའི་ཕྱི་ཚེས་ ༢༣ དང་ ༢༤ བཅས་ཉིན་གྲངས་གཉིས་ཀྱི་རིང་ཨ་རིའི་རྒྱལ་ས་ Washington DC དུ་གྲོས་ཚོས་འཐུས་མི་དང་འབྲེལ་ཡོད་ལས་བྱེད་རྣམས་ལྷན་འཛོམས་ཐོག་འཚོགས་གཏན་འཁེལ་ཡོད་ཀྱང་ཨ་རི་གཞུང་གིས་ཕྱི་ཟླ་ ༤ ཚེས་ ༡ བར་ཨ་རི་གྲོས་ཚོགས་ཀྱི་གཙོས་གྲོས་ཚོགས་ཀྱི་ལས་ཁུངས་ཁག་ཏུ་མི་མང་བཅར་རྒྱུ་རེ་ཞིག་སྒོ་རྒྱག་པའི་གནས་ཚུལ་ཐོན་ཡོད་སྟབས། དྲྭ་ལམ་བརྒྱུད་དེ་བོད་དོན་ཞུ་གཏུག་ལས་འགུལ་འཚོགས་རྒྱུ་ཡིན་པར་གནས་ཚུལ་སྤེལ་འདུགའཕྲོད་བསྟེན་སྔོན་འགོག་དང་བདེ་འཇགས་སྲུང་སྐྱོབ་ཐོག་ནས་བོད་དོན་ཞུ་གཏུག་ཉིན་མོ་དེ་ཨ་རིའི་རྒྱལ་ས་ Washington DC ནང་འཚོགས་མི་དགོས་པར་ཨ་རིའི་རྒྱལ་ཡོངས་གྲོས་ཚོགས་ཀྱི་འཐུས་མི་དང་འབྲེལ་ཡོད་ལས་བྱེད་དང་ལྷན་དུ་དྲྭ་ལམ་བརྒྱུད་དེ་འཚོགས་རྒྱུ་ཡིན་པ་བཀོད་འདུག་པ་དང་། ཐེངས་འདིའི་ཞུ་གཏུག་ཉིན་མོར་གཙོ་བོ་དོན་ཚོན་གསུམ་ཅན་གྱི་དགོས་འདུན་ཞིག་ཆེད་བཏོན་གནང་རྒྱུ་ཡིན་སྐོར་དང་། དེ་ཡང་འདི་ལོའི་ཕྱི་ཟླ་དང་པོའི་ནང་ཨ་རི་གྲོས་ཚོགས་འོག་མའི་ནང་ Tibetan Policy and Support Act ཞེས་ཨ་རི་བོད་དོན་རྒྱབ་སྐྱོར་གྱི་ཁྲིམས་འཆར་གསར་པ་དེ་མང་མོས་ཀྱིས་གཏན་འབེབས་གནང་བ་ལྟར་ཁྲིམས་འཆར་དེ་གང་མགྱོགས་གྲོས་ཚོགས་གོང་མར་གཏན་འབེབས་གནང་དགོས་པ་དང་། ཨ་རི་སྲིད་འཛིན་མཆོག་གིས་དེར་མཚན་རྟགས་བསྐྱོན་ཏེ་ཁྲིམས་གཞིར་གཏན་འབེབས་ཡོང་ཐབས་གནང་དགོས་པའི་འབོད་སྐུལ་ཞུ་དགོས་པ། དེ་བཞིན་ཨ་རི་ཕྱི་སྲིད་ལས་ཁུངས་ཀྱི་འགྲོ་བ་མིའི་ཐོབ་ཐང་གིས་འདོན་སྤེལ་གནང་བའི་སྙན་ཐོར་གཞིགས་ཏེ་བོད་མིའི་ཆོས་དད་རང་དབང་གཙིགས་ཆེར་འཛིན་ཐོག་བོད་ཀྱི་ཆབ་སྲིད་བཙོན་པ་དག་ལ་རྒྱབ་སྐྱོར་གནང་རྒྱུ་གཙོས་ཨ་རིའི་གྲོས་ཚོགས་འཐུས་མི་རྣམས་ནས་རྒྱ་ནག་གི་སྲིད་བྱུས་དང་འབྲེལ་བའི་བགྲོ་གླེང་གི་གོ་སྐབས་ནམ་བྱུང་ལ་བོད་དོན་གླེང་སློང་གནང་རྒྱུ་དང་ལྷག་པར་དུ་རྒྱ་ནག་གཞུང་གི་གཞུང་འབྲེལ་མི་སྣ་ནམ་ཐུག་ལ་བོད་དོན་གླེང་སློང་གནང་དགོས་པའི་ཞུ་སྐུལ་གནང་དགོས་པ། གཞན་ཡང་ཨ་རིའི་སྲིད་གཞུང་གིས་བོད་ཀྱི་གནད་དོན་དང་འབྲེལ་བའི་བྱ་གཞག་གི་ཆེད་དུ་ད་བར་རོགས་དངུལ་མུ་མཐུད་གནང་བཞིན་ཡོད་པ་ལྟར། ཕྱི་ལོ་༢༠༢༠ ལོར་གནང་བའི་རོགས་དངུལ་གྱི་ཚད་གཞི་ལྟར་ཕྱི་ལོ་ ༢༠༢༡ ལོར་དེ་ལྟར་མུ་མཐུད་གནང་སྐྱོང་ཡོང་བའི་རེ་སྐུལ་བཅས་དོན་ཚན་གསུམ་ཆེད་འབུལ་ཞུས་འདུགའདི་ལོའི་བོད་དོན་ཞུ་གཏུག་ཉིན་མོ་འཆར་ཉེ་དང་བསྟུན་ཉེ་ཆར་ཨ་རིའི་གྲོས་ཚོགས་གོང་མའི་འཐུས་མི་སྐུ་ ཞབས་ Jim Mcgovern ལགས་དང་སྐུ་ཞབས་ Marco Rubio ལགས་རྣམ་གཉིས་ནས་བརྙན་ཐུང་བརྒྱུད་བསྒྲགས་གནང་འདུག་པ་དང་། ཨ་རིའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་གི་ཚོགས་གཙོ་དང་ཨ་རིའི་གྲོས་ཚོགས་ཀྱི་ Tom Lantos འགྲོ་བ་མིའི་ཐོབ་ཐང་ཚོགས་ཆུང་ཚོགས་གཙོ་སྐུ་ཞབས་ Jim Mcgovern ལགས་ཀྱིས་བོད་དོན་ཞུ་གཏུག་ཉིན་མོ་དེ་ནི་བོད་དོན་ཞུ་གཏུག་གནང་རྒྱུའི་ཆེས་གོ་སྐབས་བཟང་ཤོས་ཤིག་ཡིན་པར་ངོ་སྤྲོད་གནང་བ་དང་འབྲེལ། ལོ་ཤས་ནས་བཟུང་བོད་དོན་ཞུ་གཏུག་བརྒྱུད་དེ་བོད་མིར་ཐུགས་ཕན་ཆེན་པོ་གསོས་ཡོད་པ་དང་། ལྷག་པར་དུ་ཕྱི་ལོ་ ༢༠༡༨ ལོར་དེ་སྔ་ཁོང་གིས་ཆེད་བཏོན་གནང་བའི་ Reciprocal Access to Tibet Act ཞེས་པའི་ཁྲིམས་འཆར་དེ་ཁྲིམས་གཞིར་གཏན་འབེབ་གནང་བ་ལྟར་བདུན་ཕྲག་ཁ་ཤས་གོང་དུ་ཨ་རི་གྲོས་ཚོགས་འོག་མའི་ནང་གཏན་འབེབས་གནང་བའི་ Tibetan Policy and Support Act ཞེས་ཨ་རི་བོད་དོན་རྒྱབ་སྐྱོར་གྱི་ཁྲིམས་འཆར་གསར་པ་དེ་ཡང་གཏན་འབེབས་གནང་བ་བཞིན་བོད་དོན་ལ་རྒྱབ་སྐྱོར་དང་བོད་མིའི་འགྲོ་བ་མིའི་ཐོབ་ཐང་ལ་སྲུང་སྐྱོབ། དེ་བཞིན་བོད་མིའི་ཆོས་དད་རང་དབང་སྲུང་སྐྱོབ་སླད་དུ་གྲོས་ཚོགས་གོང་མ་དང་ཨ་རིའི་གཞུང་ནས་ཁྲིམས་འཆར་དེ་ཁྲིམས་གཞིར་གཏན་འབེབས་གནང་རྒྱུ་དུས་ལ་བབ་ཡོད་སྟབས་ང་ཚོ་ལ་རྒྱབ་སྐྱོར་དགོས་པའི་རེ་སྐུལ་གནང་འདུགདེ་བཞིན་སྐུ་ཞབས་ Rubio ལགས་ཀྱིས་ཕྱི་ཟླ་གསུམ་པའི་ཟླ་མཇུག་ཏུ་ཆེས་གནད་ཆེ་བའི་བོད་ཀྱི་གནད་དོན་ཐོག་ཞུ་གཏུག་ལས་འགུལ་ཞིག་འཚོགས་ཀྱི་ཡོད་པ་ལྟར་ད་བར་རྒྱ་ནག་དམར་ཤོག་གཞུང་གིས་དྲག་གནོན་འོག་བོད་མི་ཁྲི་ཚོ་མང་པོ་སྡུག་བསྔལ་མྱོང་བཞིན་པ་དང་། ལྷག་པར་དུ་རྒྱ་ནག་གཞུང་དང་རྒྱ་ནག་དམར་ཤོག་ཚོགས་པས་བཙན་གནོན་ཤུགས་ཆེར་གཏོང་བཞིན་ཡོད་སྟབས། ང་ཚོ་རྡོག་རྩ་གཅིག་ཏུ་སྒྲིལ་ནས་བོད་ཕྱི་ནང་གཉིསཀྱི་བོད་མིའི་ཆོས་དང་རིག་གཞུང་སྐད་ཡིག་བཅས་ལ་སྲུང་སྐྱོབ་གནང་རྒྱུར་བཞེངས་དགོས་པ་གསུངས་འདུགདེ་བཞིན་སྔ་ལོར་ཁོང་གིས་ངོ་སྤྲོད་གནང་བའི་ Tibetan Policy and Support Act ཞེས་ཨ་རི་བོད་དོན་རྒྱབ་སྐྱོར་གྱི་ཁྲིམས་འཆར་གསར་པ་དེ་གང་མགྱོགས་གྲོས་ཚོགས་གོང་མར་གཏན་འབེབས་ཀྱིས་ཁྲིམས་གཞིར་གཏན་འབེབ་ཡོང་རྒྱུར་རེ་བ་དང་ཚོགས་ཞུགས་པ་ཡོངས་ནས་བོད་དོན་ལ་སྔར་ལྷག་རྒྱབ་སྐྱོར་དང་ཞི་བདེར་སྲུང་སྐྱོབ་གནང་བར་ཐུགས་རྗེ་ཆེ་ཞེས་གསུངས་འདུགཨ་རིའི་གྲོས་ཚོགས་འཐུས་མི་གཉིས་ནས་ཞུ་སྐུལ་གནང་བའི་བརྙན་ཐུང་དང་འབྲེལ་ནས་རྒྱལ་སྤྱིའི་བོད་དོན་ལས་འགུལ་ཁང་གི་ཚོགས་གཙོ་སྐུ་ཞབས་ Matteo Mecacci ལགས་ཀྱིས་གྲོས་ཚོགས་འཐུས་མི་རྣམ་གཉིས་ནི་བོད་དོན་ལ་རྒྱབ་སྐྱོར་ཤུགས་ཆེར་གནང་མཁན་གྱི་མི་སྣ་གཙོ་བོ་གཉིས་ཡིན་སྐོར་དང་། ཁོང་རྣམ་པ་གཉིས་ནས་ཚོགས་ཞུགས་པ་ཡོངས་ལ་བོད་དོན་རྒྱབ་སྐྱོར་དང་འབྲེལ་བའི་དགོངས་ཚུལ་གནང་བར་ཐུགས་རྗེ་ཆེ་ཞེས་གསུངས་ཏེ་ད་ཆ་ཏོག་དབྱིབས་རིམས་ནད་རྐྱེན་པས་ལྷན་འཛོམས་ཀྱི་ཚོགས་འདུ་འཚོགས་རྒྱུར་འགོག་རྐྱེན་བཟོས་ཡོད་ཀྱང་། བདུན་ཕྲག་རྗེས་མར་ Tibet lobby day འམ་ཨ་རི་གྲོས་ཚོགས་འཐུས་མིར་བོད་དོན་ཞུ་གཏུག་ཉིན་མོ་དེ་དྲྭ་ཐོག་ནས་ཚགས་ཚུད་ངང་འཚོགས་ཐུབ་རྒྱུར་ཐུགས་རེ་ཡོད་ཅེས་གསུངས་འདུག

Latest news