རྒྱ་ནག

བྷེལ་ཇམ་གྱི་ཕྱི་སྲིད་བློན་ཆེན་མཆོག་གིས་བྷེལ་ཇམ་གཞུང་གི་ངོས་ནས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ལ་མུ་མཐུད་ཐུགས་སྣང་ཆེན་པོ་གནང་རྒྱུར་ཞལ་བཞེས་གནང་བ་དང་འབྲེལ། ༸གོང་ས་མཆོག་གི་༸སྐུའི་ཡང་སྲིད་གདམ་རྒྱུའི་བདག་དབང་དེ་བོད་མི་རང་ལ་མ་གཏོགས་མེད་པར་འགྲེལ་བརྗོད་གནང་འདུག དེ་རིང་བོད་མིའི་སྒྲིག་འཛུགས་ཀྱིས་གནས་ཚུལ་སྤེལ་བར་ཟླ་བ་སྔོན་མའི་ཚེས་༢༡ གྱི་ཉིན་བྷེལ་ཇམ་གྲོས་ཚོགས་ཀྱི་ཕྱི་འབྲེལ་ལས་དོན་ཚུགས་ཆུང་གི་ཚོགས་གཙོ་གཞོན་པ་སྐུ་ཞབས་ Cogolati ལགས་ཀྱིས་གྲོས་ཚོགས་ཀྱི་དབུས་སུ་རྒྱ་ནག་གིས་བོད་ནང་དུ་འགྲོ་བ་མིའི་ཐོབ་ཐང་ལ་རྡོག་རོལ་གཏོང་བཞིན་པ་དང་༸སྐུའི་ཡང་སྲིད་ལ་ཐེ་གཏོགས་བྱེད་བཞིན་པ་སོགས་ཀྱི་གནས་ཚུལ་དང་འབྲེལ་ནས་ཡུལ་དེའི་ཕྱི་སྲིད་བློན་ཆེན་ལ་དོགས་འདྲི་གནང་སྟེ་བྷེལ་ཇམ་སྲིད་གཞུང་གི་ངོས་ནས་ཨ་རིའི་གྲོས་ཚོགས་ཀྱིས་གནང་བཞིན་པ་ལྟར་༸སྐུའི་ཡང་སྲིད་ཀྱི་གནད་དོན་ཐོག་གྲོས་འཆར་གཏན་འབེབས་གནང་ཡོད་མེད་དང་། ཉེ་སྔོན་ Netherlands ཕྱི་སྲིད་བློན་ཆེན་གྱིས་དེ་གའི་གྲོས་ཚོགས་སུ་གཞུང་འབྲེལ་གྱི་ཕྱག་ཡིག་ཞིག་གནང་སྟེ་༸སྐུའི་ཡང་སྲིད་ཀྱི་གནད་དོན་ཐོག་བཞེངས་ཕྱོགས་ཁ་གསལ་བཀོད་པ་བཞིན་གནང་རྒྱུ་ཡིན་མིན་སྐོར་ལ་བཀའ་འདྲི་གནང་འདུག ཁོང་གིས་སྐབས་དེར་རྒྱ་ནག་དམར་ཤོག་སྲིད་གཞུང་གིས་བོད་ནང་དུ་བཀག་སྡོམ་དང་དམ་དྲག་ཆེན་པོ་བྱས་ནས་བོད་མིའི་སྐད་ཡིག་དང་རིག་གཞུང་རྩ་གཏོར་གཏོང་བཞིན་པ། དེ་བཞིན་བོད་ཀྱི་སྲོལ་རྒྱུན་རང་བཞིན་གྱི་དགོན་སྡེ་རྣམས་ཀྱང་གཏོར་བཅོམ་གཏོང་བཞིན་པར་ཐེར་འདོན་གནང་བ་དང་། རྒྱ་ནག་གིས་༸སྐུའི་ཡང་སྲིད་ཐད་ནས་ཐེ་གཏོགས་བྱེད་བཞིན་པར་བརྟེན་བྷེལ་ཇམ་སྲིད་གཞུང་གི་གནད་དོན་དེའི་ཐོག་བཞེངས་ཕྱོགས་གང་འཛིན་དགོས་པ་དང་། སྲིད་གཞུང་གི་ངོས་ནས་ཡོ་རོབ་མཐུན་ཚོགས་དང་ལྷན་དུ་གནད་དོན་དེའི་ཐོག་གླེང་སློང་གནང་འཆར་ཡོད་མེད་སོགས་ཀྱི་བཀའ་འདྲི་གནང་འདུག གསར་འགོད་པས་བྷེལ་ཇམ་གྱི་དོན་གཅོད་བཀྲ་ཤིས་ཕུན་ཚོགས་ལགས་སུ་བཀའ་འདྲི་ཞུས་པར་སྐུ་ཞབས་ Cogolati ལགས་ཀྱིས་བོད་དོན་འབྲེལ་དང་བའི་བཀའ་འདྲི་ཞུས་པར་བྷེལ་ཇམ་གྱི་ཕྱི་སྲིད་ལྷན་ཁང་གི་བློན་ཆེན་སྐུ་ཞབས  Philippe Goffin ལགས་ཀྱིས་བྷེལ་ཇམ་སྲིད་གཞུང་གིས་ཁོང་གིས་བརྗོད་བཞིན་པའི་བོད་ནང་གི་འགྲོ་བ་མིའི་ཐོབ་ཐང་གི་གནས་བབ་དེར་སེམས་འཚབ་གཅིག་པ་ཡོད་པར་གསུངས་བ་དང་སྦྲགས།  བྷེལ་ཇམ་སྲིད་གཞུང་གིས་རྒྱ་ནག་དང་ལྷན་དུ་གོ་སྐབས་ནམ་བྱུང་ལ་བོད་དོན་གླེང་སློང་གནང་བཞིན་ཡོད་པའི་ལན་འདེབས་གནང་ཡོད་པ་མ་ཟད། ལྷག་དོན་༸སྐུའི་ཡང་སྲིད་གདམ་རྒྱུའི་བདག་དབང་དེ་བོད་མིར་མ་གཏོགས་མེད་པའི་འགྲེལ་བརྗོད་གནང་ཡོད་པ་གསུངས་ཡོད། དེ་མཚུངས་ཁོང་གིས་བྷེལ་ཇམ་སྲིད་གཞུང་གིས་གཙོས་པའི་ཁུལ་དེའི་གྲོས་ཚོགས་གོང་འོག་གཉིས་སུ་བོད་དོན་རྒྱབ་སྐྱོར་བ་ཡོད་པ་མ་ཟད། སྤྱི་ཡོངས་ཀྱི་ཆ་ནས་བྷེལ་ཇམ་སྲིད་གཞུང་གིས་བོད་དོན་དང་འབྲེལ་བའི་ཐོག་ནས་བཞེངས་ཕྱོགས་བརྟན་པོ་ཡོད་པར་གསུངས་སོང་། རྩ་བའི་ Netherlands ཕྱི་སྲིད་བློན་ཆེན་མཆོག་གི་ངོས་ནས་དེ་སྔོན་ཕྱི་ཟླ་ ༡༡ ནང་ཡུལ་དེའི་གྲོས་ཚོགས་ལ་གཞུང་འབྲེལ་གྱི་ཕྱག་ཡིག་ཞིག་གནང་བའི་ནང་༸གོང་ས་མཆོག་གི་༸སྐུའི་ཡང་སྲིད་གདམ་རྒྱུའི་ཁེ་དབང་དེ་བོད་མི་ཚོར་ཡོད་པར་འགྲེལ་བརྗོད་གནང་ཡོད་པ་དང་། ཨ་རིའི་གྲོས་ཚོགས་འོག་མའི་ངོས་ནས་ཀྱང་ཉེ་ལམ་བོད་དོན་ལ་རྒྱབ་སྐྱོར་གྱི་གྲོས་ཆོད་ཅིག་གཏན་འབེབས་གནང་སྟེ་༸སྐུའི་ཡང་སྲིད་ཀྱི་གནད་དོན་ཐོག་རྒྱ་ནག་གཞུང་ལ་ཐེ་བྱུས་བྱེད་རྒྱུའི་ཐོབ་ཐང་མེད་པར་འགྲེལ་བརྗོད་གནང་ཡོད་པ་རེད། ཁ་སང་ཨིན་ཡུལ་གྲོས་ཚོགས་ནང་དུ་གྲོས་ཚོགས་འཐུས་མི་སྐུ་ཞབས་  Timloughton ལགས་ཀྱིས་རྒྱ་ནག་དམར་ཤོག་གཞུང་གིས་གྲངས་ཉུང་མི་རིགས་ས་ཁུལ་བོད་དང་ཤིན་ཅང་ཁུལ་དུ་འགྲོ་བ་མིའི་ཐོབ་ཐང་ལ་རྡོག་རོལ་གཏོང་བཞིན་པར་བསྒྲགས་ཏེ་ཨིན་ཡུལ་གྲོས་ཚོགས་ཀྱིས་གནད་དོན་དེ་གླེང་སློང་གནང་དགོས་བར་སྐུལ་མ་གནང་བ་དང་ཆབས་ཅིག བོད་ལ་ཕར་འགྲོ་ཚུར་འོང་གི་གྲོས་འཆར་དེར་རྒྱབ་སྐྱོར་གནང་དགོས་པའི་གཏམ་བཤད་གནང་འདུག

རྒྱ་རིགས་སྒྱུ་རྩལ་བ་གྲགས་ཅན་སྐུ་ཞབས་ Ai WeiWei ལགས་ཀྱིས་དབྱིན་ཡུལ་གཞུང་ནས་ཡུལ་དེའི་ནང་གི་ 5G དྲྭ་རྒྱའི་ཚོང་ལས་ཐད་རྒྱ་ནག་གི་འཕྲུལ་ལས་བཟོ་གྲྭ་ཆེ་ཤོས་ Huawei དང་འབྲེལ་བ་བྱེད་རྒྱུའི་ཐག་གཅོད་དེར་ཉིན་ཞིག་བློ་འགྱོད་བྱ་ངེས་ཀྱི་ཉེན་བརྡ་བཏང་འདུག འདས་པའི་ཟླ་ཤས་ནས་དབྱིན་ཡུལ་གྲོས་ཚོགས་འཐུས་མི་གཙོ་གྱུར་ཨ་རི་སོགས་ནས་དབྱིན་ཡུལ་གཞུང་ལ་གནོན་ཤུགས་སྤྲད་དེ་རྒྱ་ནག་གི་ Huawei བཟོ་ལས་ཁང་དང་འབྲེལ་ཐག་གཅོད་དགོས་པའི་ཞུ་སྐུལ་གནང་མིན་ལ་བལྟོས་མེད་གཟའ་འཁོར་སྔོན་མར་དབྱིན་ཡུལ་གྱི་སྲིད་བློན་སྐུ་ཞབས་ Boris Johnson མཆོག་གི་སྲིད་གཞུང་ནས་རྒྱ་ནག་གི་བཟོ་ཚོང་ཁང་ལ་ཡུལ་དེའི་ 5G དྲྭ་རྒྱའི་ཚོང་ལས་ཀྱི་ཆ་ཤས་ཤིག་གནང་རྒྱུར་ཐག་བཅད་ཡོད་པ་རེད། དབྱིན་ཡུལ་གྱི་དྲྭ་རྒྱ་བདེ་འཇགས་མི་སྣས་ Huawei བཟོ་ཚོང་ལ་ཡིད་ཆེས་གནང་གི་མེད་པ་ངོས་ལེན་གནང་ཡོད་ཀྱང་བཟོ་ལས་ཁང་དེའི་འཕྲུལ་ལས་བརྒྱུད་དེ་དྲྭ་རྒྱའི་བདེ་འཇགས་ཀྱི་ཉེན་ཁར་སྟངས་འཛིན་གནང་ཐུབ་རྒྱུ་ཡོད་པར་གསུངས་པ་མ་ཟད་ཡུལ་དེའི་བཟོ་ལས་མཁས་པ་ཁག་གཅིག་གིས་དབྱིན་གཞུང་གི་ཐག་བཅད་པར་དགའ་བསུ་གནང་འདུག འོན་ཀྱང་རྒྱ་རིགས་སྒྱུ་རྩལ་བ་གྲགས་ཅན་སྐུ་ཞབས་ Ai WeiWei ལགས་ཀྱིས་ཉེ་ཆར་ BBC Radio 5 Live གྱི་བཅར་འདྲིར་ཐེངས་འདིའི་དབྱིན་གཞུང་གིས་འཕྲལ་སེལ་ཁེ་ཕན་ཙམ་ལ་དམིགས་ཏེ་རྒྱལ་ཁབ་དེའི་ནང་ Huawei བཟོ་ཚོང་ཁང་གི་འཕྲུལ་ལས་མ་ལག་བརྒྱུད་དེ་ཡོང་རྒྱུའི་ཉེན་ཁར་སྣང་མེད་གཏོང་བཞིན་པར་སྐྱོན་བརྗོད་གནང་བ་དང་། དེང་སྐབས་རྒྱ་ནག་དེ་ཚད་མཐོའི་འཕྲུལ་རིགས་བཀོལ་སྤྱོད་ཐོག་མང་ཚོགས་ལ་དྲག་གནོན་དང་ལྟ་སྲུང་ན་པོས་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་ཤུགས་ཆེ་བཏང་མཁན་གྱི་རྒྱལ་ཁབ་ཆེ་སྡུག་ཤོས་གྲས་སུ་ཐེར་འདོན་གནང་ཡོད་པར་མ་ཟད། ད་ཆ་རྒྱ་གཞུང་གིས་དམ་དྲག་ཇེ་ཆེ་དང་གཞི་རྩའི་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་བཞིན་པའི་གནད་དོན་དེ་དག་ནི་བསམ་ཡུལ་ལས་འདས་པ་ཞིག་ཡིན་སྟབས། དེར་དབྱིན་ཡུལ་ཁོ་ན་མིན་པར་འཛམ་གླིང་རྒྱལ་ཁབ་གཞན་ཚོས་ཀྱང་དོགས་ཟོན་གནང་དགོས་གལ་ཡིན་པ་གསུངས་འདུག སྐབས་དེར་གསར་འགོད་པས་སྐུ་ཞབས་ Ai WeiWei ལགས་སུ་ཐེངས་འདིའི་ཐག་གཅོད་བརྒྱུད་དེ་དབྱིན་གཞུང་གིས་རྒྱ་ནག་གི་ཉེན་ཁ་ལ་མཐོང་ཆུང་གནང་བ་ཞིག་མཚོན་གྱི་ཡོད་དམ་ཞེས་དྲིས་པར་ཁོང་ནས་དབྱིན་ཡུལ་གྱི་ཐག་བཅད་པ་དེས་དོན་དངོས་ཐོག་རྒྱ་ནག་གི་ཉེན་ཁང་མཐོང་ཆུང་བྱས་པ་ཞིག་ཡིན་མིན་ཚོད་དཔག་གནང་དཀའ་ནའང་ཐག་བཅད་དེས་ཡུལ་དེའི་གཞུང་གིས་རང་ཉིད་ཀྱི་གཞི་རྩའི་རིན་ཐང་ལ་དགོངས་བཞེད་གནང་བཞིན་དུ་ཕམ་ཉེས་གཏང་བར་ངོས་འཛིན་གནང་སྲིད་པ་རེད་ཅེས་ལན་འདེབས་གནང་འདུག དེ་བཞིན་ཁོང་གིས་ནུབ་རྒྱལ་ཁབ་ཁག་གི་གཞུང་འཛིན་པ་རྣམས་ཀྱིས་རྒྱ་ནག་ལྟ་བུའི་ཐ་ཤལ་གྱི་རྒྱལ་ཁབ་དང་འབྲེལ་བ་བཞག་ནས་སྔར་ལྷག་སྟོབས་ཆེན་རྒྱལ་ཁབ་ཅིག་ཏུ་འགྱུར་རྒྱུར་རམས་འདེམས་གནང་ཚེ་དེ་འབྲེལ་གྱི་ནུབ་ཕྱོགས་རྒྱལ་ཁབ་རྣམས་མགོ་གཉིས་ཅན་གྱི་རྒྱལ་ཁབ་ལ་ངོས་འཛིན་ཆོག་པར་སྐྱོན་བརྗོད་ཀྱང་གནང་ཡོད་པ་རེད། རྩ་བའི་རྒྱལ་སྤྱིའི་སྤྱི་ཚོགས་ཁྲོད་དུ་རྒྱ་ནག་གི་འཕྲུལ་ལས་བཟོ་གྲྭ་ཆེ་ཤོས་ Huawei བཟོ་ཚོང་ཁང་ནི་རྒྱ་ནག་སྲིད་གཞུང་ལ་འབྲེལ་བ་ཆེན་པོ་ཡོད་པའི་ཁར་བཟོ་ཚོང་ཁང་དེས་རྒྱ་ནག་གཞུང་དང་ལག་འབྲེལ་གྱིས་ཕྱི་ཕྱོགས་ཀྱི་རྒྱལ་ཁབ་མང་པོའི་གནས་ཚུལ་རྐུ་འཁྱེར་བྱེད་བཞིན་པར་དོགས་སློང་མང་པོ་གནང་ཡོད་པ་མ་ཟད། བཟོ་ཚོང་ཁང་གཞན་གྱི་ཐོན་གསར་གྱི་མ་ལག་སྒྲིག་སྦྱོར་གྱི་བསམ་བློ་སོགས་ཀྱང་རྐུ་འཁྱེར་བྱེད་ཀྱི་ཡོད་པའི་ཉེས་འཛུགས་མང་པོ་བྱས་ཡོད་པར་བརྟེན་ཨ་རི་དང་ཨོ་སི་ཊོ་ལི་ཡ། ཁེ་ན་ཌ། ཉི་ཧོང་སོགས་ཀྱིས་རྒྱ་ནག་གི་ Huawei བཟོ་ཚོང་ལ་ཚོང་འབྲེལ་གནང་རྒྱུ་མཚམས་འཇོག་གནང་ཡོད་པ་རེད།

རྒྱ་ནག་ཝུ་ཧན་གྲོང་ཁྱེར་ནས་ཁྱབ་བརྡལ་བྱུང་བའི་ Coronavirus ཞེས་ཏོག་དབྱིབས་གློ་ཚད་རྐྱེན་པས་ད་ཆ་རྒྱ་ནག་ནང་མི་གྲངས་ ༡༡༨༠༠ ལྷག་ལ་ནད་གཞི་ཕོག་ཡོད་པ་མ་ཟད་འདས་གྲོངས་སུ་གྱུར་བའི་གྲངས་འབོར་ ༢༥༠ ལྷག་འཆར་ཡོད་པའི་ཁྲོད་བོད་མིའི་བླ་ན་མེད་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཞུགས་གནས་དྷརྨ་སཱ་ལཱའི་མེག་ལོཊ་གྷན་ཇ་དུ་ཏོག་དབྱིབས་ནད་རིམས་བརྟག་དཔྱད་གནང་ཡུལ་ཞིག་ཟུར་འཛུགས་གནང་རྒྱུ་རེད་འདུག དེའི་ཁྲོད་དེ་རིང་རྒྱ་གར་ Times གསར་ཁང་གིས་རེས་གཟའ་ཕུར་བུ་ཉིན་ཧི་མཱ་ཅལ་གྱི་སྤྱི་ཁྱབ་དྲུང་ཆེ་མཆོག་གིས་སིམ་ལར་ཛ་དྲག་གི་ཚོགས་འདུ་ཆེད་བསྐོང་གནང་ཐོག་འཕྲོད་བསྟེན་ལྷན་ཁང་ཁག་ནས་སྨན་ཁང་ཆེ་གྲས་སུ་ནད་གཞི་དེ་འབྲེལ་དོགས་གཞི་ཡོད་མཁན་ཚོའི་སླད་དུ་ཟུར་བཀག་གི་ལྟ་རྟོག་གནང་ཡུལ་ཞིག་ཆེད་འཛུགས་གནང་རྒྱུ་དང་། ལྷག་དོན་བཞུགས་སྒར་དུ་མང་ཚོགས་མང་པོ་ཞིག་མགོན་པོ་༸གང་ཉིད་མཆོག་གི་མཇལ་ཁ་ཞུ་བར་ཆེད་བཅར་ཞུ་ཡི་ཡོད་སྟབས། མེག་གྷན་དུའང་དེ་འབྲེལ་ནད་གཞི་བརྟག་དཔྱད་གནང་ཕྱིར་དམིགས་བསལ་ཟུར་འཛུགས་གནང་རྒྱུ་དང་ཆབས་ཅིག་ཏུ་ནད་གཞི་དེ་འབྲེལ་གོ་རྟོགས་གནང་རྒྱུའི་ལམ་སྟོན་གནང་ཡོད་པ་རེད།གནས་ཚུལ་དེ་འབྲེལ་དེ་རིང་ཉིན་རྒྱབ་རྒྱ་གར་ས་གནས་རྫོང་དཔོན་ལས་ཁུངས་ནས་ཆེད་འབོད་གནང་བ་ལྟར། བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་འབྲེལ་ཡོད་ལས་བྱེད་དང་དྷ་ས་ས་གནས་འགོ་འཛིན་སོགས་ཕེབས་ནས་ནད་གཞི་དེ་འབྲེལ་ལས་འཆར་ཐོག་ཚོགས་འདུ་ཚོགས་ཡོད་པ་རེད། གཞི་རྩའི་བཞུགས་སྒར་དྷརྨ་སཱ་ལཱ་ནི་༸གོང་ས་མཆོག་གི་བཞུགས་གནས་ཡིན་པའི་ཆ་ནས་རྣམ་ཀུན་འཛམ་གླིང་གི་ཡུལ་གྲུ་གང་ས་ནས་མགོན་པོ་༸གང་ཉིད་མཆོག་གི་གསེར་ཞལ་མཇལ་བར་ཆེད་བཅར་ཞུ་གནང་གི་ཡོད་ཀྱང་། ད་ལྟའི་ཆར་འཛམ་གླིང་སྤྱི་ལ་ཏོག་དབྱིབས་ཀྱི་ནད་གཞི་རིམ་པས་ཁྱབ་བརྡལ་འགྲོ་བཞིན་པར་བརྟེན་ཛ་དྲག་གི་དུས་ཚིགས་འདིར་༸དཔལ་ལྡན་དགའ་ལྡན་ཕོ་བྲང་ཡིག་ཚང་གིས་ཀྱང་༸གོང་ས་༸སྐྱབས་མགོན་ཆེན་པོ་མཆོག་གི་མང་མཇལ་རེ་ཞིག་མཚམས་འཇོག་གནང་ཡོད་པ་རེད། སྤྱིར་ད་ཆ་ནད་རིམས་དེའི་རྐྱེན་པས་ཨ་མི་རི་ཀས་གཙོས་པའི་ཡོ་རོབ་དང་། ཉི་ཧོང་སོགས་ཀྱི་མི་སེར་ཝུ་ཧན་ནང་ཡོད་པ་རྣམས་རྒྱལ་ཁབ་སོ་སོས་འགན་ཁུར་ཏེ་རྒྱ་ནག་ནས་ཕྱིར་འདོན་གནང་གི་ཡོད་པ་དང་། ཁ་སང་ཕྱི་ཚེས་ ༣༡ ཉིན་རྒྱ་གར་གྱི་ Air India གནམ་གྲུ་ཞབས་ཞུ་ཁང་ནས་འགྲུལ་བཞུད་པ་ ༤༢༣ ཙམ་ཤོང་པའི་ AI Boeing 747 གནམ་གྲུ་ཆེད་གཏོང་གིས་རྒྱལ་ས་ལྡི་ལི་ནས་ཉིན་དགུང་ཚོུད་ ༡༌༡༨ ཐོག་ཝུ་ཧན་ལ་ཐོན་ཡོད་པ་དང་། དེ་རིང་སྔ་དྲོ་ཚོུད་ ༧༌༣༠ ཐོག་རྒྱ་གར་གྱི་མི་སེར་ ༣༢༤  ཞིག་ལྡི་ལིར་འབྱོར་འདུག ལྡི་ལིར་འབྱོར་མ་ཐག་ས་གནས་དེར་ཡོད་པའི་བོད་ས་མཚམས་ཉེན་རྟོག་གི་སྡོད་སྒར་དང་དེ་བཞིན་རྒྱ་གར་གྱི་མངའ་སྡེ་ཧ་རི་ཡ་ནར་ Manesar ཞེས་པའི་དམག་སྒར་གཉིས་སུ་སྨན་བཅོས་ལྟ་སྐྱོང་སླད་ཁྲིད་ཡོད་པ་རེད། རྒྱ་གར་གྱི་མི་སེར་དེའི་ཁྲོད་མི་གྲངས་ ༢༡༡ ཙམ་ཞིག་ཨན་དྷ་ར་མངའ་སྡེ་དང་། ཀེ་ར་ལ་ནས་ཡིན་པ་མ་ཟད་ ༢༢ ཙམ་ཞིག་མ་ཧ་རཤྚའི་སློབ་ཕྲུག་ཆགས་ཀྱི་འདུག  ཁ་སང་རྒྱ་གར་མི་སེར་ཕྱིར་འདོན་གནང་སྐབས་རྒྱ་ནག་གི་གཞིས་སྤོས་ལས་ཁང་ནས་རྒྱ་གར་སྐྱེས་པ་ཕོ་དང་མོ་ཞིག་ཚ་བ་ཧ་ཅང་རྒྱས་རྐྱེན་ཕྱིར་འདོན་གནང་བར་བཀག་འགོག་བྱས་པ་དང་།  ཁོང་གཉིས་ཝུ་ཧན་ནང་ཟུར་བཀག་སྨན་བཅོས་བྱེད་སྲིད་པ་དང་དེ་འབྲེལ་གྱི་ནད་རྟགས་དཔྱད་སླད་ཡིན་པ་འཁོད་འདུག   གཞི་རྩའི་ད་རེས་རྒྱ་གར་མི་སེར་ཕྱིར་འདོན་སླད་བཏང་བའི་གནམ་གྲུ་དེའི་ནང་རྒྱ་གར་འཕྲོད་བསྟེན་ལས་ཁུངས་ཀྱི་སྨན་པ་ལྔ་དང་། གནམ་གྲུའི་ཁ་ལོ་བ་བཞི། འཕྲུལ་ལས་འཆར་འགོད་པ། གནམ་གྲུའི་ལས་བྱེད་བཅས་མི་གྲངས་ ༣༠ ལྷག་ཆེད་ཕེབས་གནང་ཡོད་པ་དང་། ད་ཆ་ཕྱིར་འདོན་གནང་བའི་མང་ཚོགས་རྣམས་ནད་ཕོག་པའི་དོགས་གཞི་དང་དེ་བཞིན་འདས་པའི་ཉིན་གྲངས་ ༡༤ ནང་མཚོ་ཟས་ཁྲོམ་ར། ནད་གཞི་ཕོག་པའི་རྒྱ་རིགས་དང་འབྲེལ་བ་བྱུང་བ། ནད་གཞི་དེའི་རྟགས་མཚན་མེད་པ་སོགས་སྡེ་ཚན་གསུམ་ལ་བགོས་ནས་ཟུར་བཀག་གི་སྨན་བཅོས་གནང་སར་བཏང་བ་དང་ཆབས་ཅིག་ཏུ་ཉིན་གྲངས་ ༡༤ རྗེས་སུ་མི་སོ་སོར་ཏོག་དབྱིབས་ནད་དུག་གི་རྟགས་མཚན་མེད་པ་ཐོན་ཚེ་རང་ཁྱིམ་དུ་གཏང་བ་དང་ལྷག་པར་དུ་ནད་རྟགས་ཐོན་མཁན་ཚོར་ཟུར་བཀག་གི་སྨན་བཅོས་གནང་རྒྱུ་རེད་འདུག སྤྱིར་རྒྱ་ནག་ཝུ་ཧན་ནས་དེ་རིང་རྒྱ་གར་མི་སེར་ ༣༠༠ ལྷག་ཕྱིར་འདོན་གནང་ཐུབ་པ་བྱུང་ཡོད་ཀྱང་ད་ཆ་ཡང་ཝུ་ཧན་གྲོང་ཁྱེར་ནང་མི་སེར་ཁག་གཅིག་ལུས་ཡོད་སྟབས་ཁོང་རྣམས་ཡོངས་རྫོགས་ཕྱིར་འདོན་སླད་དེ་རིང་ཉིན་རྒྱབ་ཚོུད་ ༡༢ ཡོལ་ཙམ་ལ་ Air India ཞབས་ཞུ་ཁང་གི་གནམ་གྲུ་བཏང་ཡོད་པ་རེད། རྩ་བའི་ཁ་སྔོན་རེས་གཟའ་ཕུར་བུ་ཉིན་རྒྱ་གར་ནང་ཏོག་དབྱིབས་ནད་དུག་གི་ནད་པ་གཅིག་ཡོད་པ་མངོན་གསལ་བྱུང་བ་དང་། ནད་པ་དེའང་ཝུ་ཧན་གྱི་གཙུག་ལག་སློབ་གཉེར་ཁང་གི་སློབ་ཕྲུག་དང་ཀེ་ར་ལ་ནས་ཡིན་པ་མ་ཟད། རྒྱ་གར་ནང་ཏོག་དབྱིབས་ཀྱི་ནད་པའི་གནས་ཚུལ་ཐོན་མ་ཐག་ཀེ་ར་ལ་འཕྲོད་བསྟེན་བློན་ཆེན་གྱིས་ཀེ་ར་ལ་མངའ་སྡེ་ནས་ནད་རིམས་དེར་གདོང་ལེན་གནང་ཕྱིར་གྲ་སྒྲིག་ཡིན་པ་དང་། ད་ཆ་སློབ་ཕྲུག་ནད་པ་དེ་ཟུར་འཇོག་གིས་ལྟ་རྟོག་གནང་བཞིན་ཡོད་པས་མང་ཚོགས་ནས་དེར་དངངས་སྐྲག་གནང་མི་དགོས་ཞེས་གསུངས་ཡོད་པ་རེད། གཞན་ཡང་དེ་རིང་རྒྱ་ནག་གི་ CNR རླུང་འཕྲིན་གྱིས་གནས་ཚུལ་སྤེལ་བར་རྒྱ་གཞུང་གིས་དབྱེ་བའི་བོད་ས་ཁུལ་གྱི་ཞིང་ཆེན་བཞིའི་ཁག་ཏུ་ནད་རིམས་ཕོག་མཁན་ཇེ་མང་དུ་འགྲོ་ཡོད་པ་དང་ཟི་ཁྲོན་དུ་ནད་པ་ ༢༠༧ དང་། དཀར་མཛེས་ཁུལ་དུ་ནད་པ་ ༥ དེ་བཞིན་རྔ་བ་ཁུལ་དུ་ནད་པ་ ༡ དང་། མཚོ་སྔོན་དུ་ནད་པ་ ༨ དང་། ཀན་སུའུ་ནང་ནད་པ་ ༣༥ ཡུ་ནན་དུ་ནད་པ་ ༨༣ ཡོད་པ་མངོན་གསལ་གནང་འདུག ནད་གཞི་དེ་ཁྱབ་བརྡལ་ཤུགས་ཆེ་འགྲོ་བཞིན་པའི་ཁྲོད་སྤྱི་ཚོགས་དྲྭ་རྒྱའི་ཐོག་རྒྱ་ནག་ནང་གི་བཟའ་ཆས་ཉོ་སའི་ཚོང་རར་མང་ཚོགས་ནས་བཟའ་ཆས་ཉོ་བར་འཚང་ཀ་རྒྱག་པ་དང་།  དེ་བཞིན་གྲོང་གསེབ་ཁག་ནང་ཕྱི་མི་ཡོང་བར་བཀག་འགོག་བྱས་པ་སོགས་ཀྱི་གནད་དོན་ཡང་མང་དག་ཅིག་མཐོང་རྒྱུ་འདུག

རྒྱ་ནག་གཞུང་གིས་གནོན་ཤུགས་འོག་ཕྱིའི་རྒྱལ་ཁབ་ཁག་ནས་བོད་མི་དང་ཡུ་གུར་བ་ཕྱིར་རྒྱ་ནག་ལ་རྩིས་སྤྲོད་བྱས་པ་རྣམས་དུས་ཚོད་ངེས་མེད་བར་དུ་གར་སོང་ཆ་མེད་དུ་གྱུར་སྲིད་པའི་ཉེན་ཁ་ཡོད་པ་གསུངས་འདུག ཉེ་ཆར་འཇར་མ་ནི་ཕྱི་སྲིད་ལས་ཁུངས་ཀྱིས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་དང་འབྲེལ་བའི་སྙན་ཐོ་ཕྱོགས་བསྒྲིགས་ཞུས་པའི་གསང་ཡིག་ཞིག་ཡུལ་དེའི་གསར་ཁང་ཁག་གཅིག་ཏུ་ཕྱིར་འགྱར་བྱུང་ཡོད་སྟབས་ཁ་སང་ཡུལ་དེའི་གསར་ཁང་ཆེ་གྲས་ Deutsche Welle ཞེས་པའི་དྲྭ་གནས་ཐོག་གནས་ཚུལ་སྤེལ་བར་ཕྱི་ལོ་ ༢༠༡༦ ལོ་ནས་རྒྱ་ནག་གཞུང་གིས་འཆར་གཞི་ལྡན་པའི་ཐོག་ཡུལ་དེའི་གྲངས་ཉུང་མི་རིགས་ལ་དྲག་གནོན་དང་མི་རིགས་དབྱེ་འབྱེད་སོགས་ཀྱི་སྲིད་བྱུས་འདྲ་མིན་ལག་བསྟར་བྱེད་ཤུགས་ཆེ་རུ་བཏང་ཡོད་པར་བརྟེན་ཉེ་བའི་ལོ་ཤས་ནང་རྒྱ་ནག་སྤྱི་དང་ལྷག་པར་དུ་ཤིན་ཅང་དང་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཆེས་ཇེ་ཞན་ཇེ་སྡུག་ཏུ་ཕྱིན་ཡོད་པ་མངོན་གསལ་གསུངས་འདུག སྙན་ཐོ་ནང་རྒྱ་ནག་གཞུང་གིས་ཤིན་ཅང་ཁུལ་དུ་ས་གནས་ཡུ་གུར་བ་ས་ཡ་བཅུ་ལྷག་བཀག་བསྐྱིལ་ཁང་དུ་བཀག་ཉར་བྱེད་བཞིན་པ་ཚོར་ལག་ཤེས་སྦྱོང་བསྡར་སོགས་སྤྲོད་མུས་ཡིན་སྐོར་འགྲེལ་བརྗོད་བྱེད་བཞིན་ཡོད་ཀྱང་། ཡུ་གུར་བ་ཚོར་རྒྱ་ནག་གི་ལྟ་སྤྱོད་དང་མཐུན་པའི་ཆབ་སྲིད་ཀྱི་སློབ་གསོ་སྤྲོད་པ་དང་། ངལ་རྩོལ་ཅན་གྱི་ལས་ཀ་བྱེད་འཇུག་པ། དེ་བཞིན་མང་དག་ཅིག་ལ་ཚུལ་མིན་གྱི་བྱ་སྤྱོད་སྤེལ་བའི་ཁྲོད་འདས་གྲོངས་སུ་གྱུར་བའི་གནས་སྟངས་ཡང་འབྱུང་བཞིན་པ་ཐེར་འདོན་གནང་འདུག་པ་མ་ཟད། རྒྱ་ནག་གཞུང་ནས་ཕྱིའི་རྒྱལ་ཁབ་ཁག་ཏུ་ཡོད་པའི་ཡུ་གུར་བ་ཚོར་གསང་བའི་ལྟ་སྲུང་བྱེད་དེ་ཤིན་ཅང་ནང་ཡོད་པའི་རང་ཉིད་ཀྱི་ཡུ་གུར་སྤུན་མཆེད་ཚོ་དང་འབྲེལ་བ་རིགས་བྱས་ཚེ་ཡུ་གུར་བ་དེ་དག་ལ་འདྲི་རྩད་ནན་པོ་བྱེད་ཀྱི་ཡོད་པ་ཆེད་བཀོད་གནང་འདུག ལྷག་དོན་རྒྱ་ནག་གཞུང་གི་ཉེ་བའི་ལོ་ཤས་ནང་ Egypt དང་ Kazakhstan Malaysia Pakistan དེ་བཞིན་ Thailand སོགས་ཀྱི་གཞུང་ལ་ས་གནས་སུ་ཡོད་པའི་ཡུ་གུར་བ་རྣམས་ཕྱིར་རྒྱ་ནག་ལ་རྩིས་སྤྲོད་དགོས་པའི་གནོན་ཤུགས་རིགས་སྤྲོད་བཞིན་ཡོད་པ་མངོན་གསལ་ཡིན་ཀྱང་ད་བར་རྒྱ་ནག་ལ་ཕྱིར་ལོག་བྱས་པའི་མིའི་གྲངས་འབོར་གསལ་པོ་ཤེས་རྟོགས་ཐུབ་ཀྱི་མེད་སྟབས། ཕྱིའི་རྒྱལ་ཁབ་ཁག་ནས་རྒྱ་ནག་ལ་རྩིས་སྤྲོད་བྱས་པའི་ཡུ་གུར་བ་དང་བོད་མི་རྣམས་དུས་ཚོད་ངེས་མེད་བར་དུ་གར་སོང་ཆ་མེད་དུ་གྱུར་ཉེན་ཡོད་པ་གསུངས་འདུག སྙན་ཐོ་དེ་དང་འབྲེལ་གསར་འགྱུར་སྤེལ་མཁན་ Deutsche Welle གསར་ཁང་ནས་འཇར་མ་ནི་གཞུང་ནས་རྒྱ་གཞུང་གིས་ཡུ་གུར་དང་བོད་མིའི་འགྲོ་བ་མིའི་ཐོབ་ཐང་རྡོག་རོག་གཏོང་བཞིན་པ་ཤེས་བཞིན་ཡོད་ཀྱང་། གནད་དོན་དེ་དག་ཐོག་རྒྱ་ནག་ལ་འདྲི་རྩད་དང་སྐྱོན་བརྗོད་མ་གནང་བ་དེ་ནི་འཇར་མ་ནི་ཡི་ཚོང་ལས་སྡེ་ཚན་ཆེ་གྲས་ Siemens དང་ BASF དེ་བཞིན་ Volkswagen སོགས་ཤིན་ཅང་ནང་ཚོང་ལས་གཉེར་བཞིན་པ་དེའི་རྐྱེན་གྱིས་རེད་དམ་ཞེས་དོགས་གཞི་ཆེད་འདོན་གནང་ཡོད། གཞི་རྩའི་རྒྱ་ནག་གཞུང་ནས་བོད་དང་ཡུ་གུར་གཙོས་པའི་གྲངས་ཉུང་མི་རིགས་ཐོག་ལག་བསྟར་བྱེད་བཞིན་པའི་སྲིད་བྱུས་ལ་ཨ་རི་གཙོས་པའི་རྒྱ་སྤྱིའི་གཞུང་ཁག་དང་། རྒྱལ་སྤྱིའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པ་དབུས་གཞུང་འབྲེལ་མ་ཡིན་པའི་ཚོགས་པ་ཁག་ནས་སྐྱོན་བརྗོད་ཤུགས་ཆེ་གནང་བཞིན་ཡོད་ཀྱང་། རྒྱ་ནག་གཞུང་ནས་བོད་དང་ཤིན་ཅང་སོགས་ནི་རྒྱ་ནག་རྒྱལ་ནང་གི་གནད་དོན་ཞིག་ཡིན་སྟབས་ཕྱིའི་རྒྱལ་ཁབ་དང་ཚོགས་པ་ཁག་ནས་དེར་ཐེ་བྱུས་བྱེད་དབང་མེད་སྐོར་འགྲེལ་བརྗོད་གནང་མུས་ཡིན་པ་རེད།

ཨ་རིའི་Minnesota ནང་གི་རྒྱ་རིགས་སློབ་མ་ཞིག་རྒྱ་ནག་ཏུ་ཕྱིར་ལོག་བྱས་མ་ཐག་འཛིན་བཟུང་བཙོན་འཇུག་བྱས་པའི་གནད་དོན་ཁྲོད། ད་སྐབས་རྒྱ་ནག་གཞུང་གིས་ཕྱིའི་ཡུལ་གྲུ་ཁག་ཏུ་སློབ་སྦྱོང་བྱེད་བཞིན་པའི་རྒྱ་རིགས་སློབ་མ་ཚོའི་སྨྲ་བརྗོད་རང་དབང་ལ་དམ་དྲག་བྱེད་ཕྱོགས་ཐད་སེམས་ཚབ་ཆེན་པོ་གནང་བཞིན་འདུག དེའང་སྤྱི་ལོ་ ༢༠༡༩ ལོར་ཨ་རིའི་གྲོང་ཁྱེར་ Minnesota ཡི་ནང་དུ་སློབ་སྦྱོང་བྱེད་བཞིན་པའི་རྒྱ་རིགས་སློབ་མ་ Luo Daiqing གིས་རང་གི་Twitter དྲ་གནས་ཀྱི་སྟེང་།  རྒྱ་ནག་གི་ནང་གི་བཀག་སྡོམ་རང་བཞིན་གྱི་གནས་ཚུལ་ཞིག་དང་འབྲེལ་ནས་སྲིད་འཛིན་ཞི་ཅིན་ཕེན་གྱི་ཟུར་ཟའི་པར་ཞིག་འགྲེགས་འཇོག་བྱས་ཡོད་སྟབས།  སྔ་ལོའི་ཕྱི་ཟླ་ ༧ པའི་ནང་ཁོང་ཕྱིར་རྒྱ་ནང་དུ་ལོག་མ་ཐག་རྒྱ་ནག་སྲིད་གཞུང་གིས་ཁོང་བྱེད་བབ་དེར་སྐྱོན་བརྗོད་ཀྱིས་འཛིན་བཟུང་བྱས་པ་མ་ཟད།  ཉེ་ལམ་ཕྱི་ཟླ་ ༡༡ ནང་ཟླ་བ་དྲུག་གི་རིང་བཙོན་འཇུག་ཉེས་ཆད་གསལ་སྒྲགས་བྱས་ཡོད་པ་རེད། དེ་རིང་གསར་ལམ་ཁག་ཏུ་དེའི་སྐོར་ལ་འབྲེལ་ཡོད་གནས་ཚུལ་སྤེལ་བའི་ནང་དུ།   གཞི་རྩའི་ཕྱི་ལོག་གི་སློབ་གྲྭ་ཁག་གི་ནང་དུ་རྒྱ་རིགས་སློིབ་མ་རྣམས་ལ་ཡང་རྒྱལ་ཁབ་གཞན་གྱི་སློབ་མ་ལྟར་སྨྲ་བརྗོད་རང་དབང་གཅིག་པ་ཡོད་ནའང་།  རྒྱ་ནག་སྲིད་གཞུང་གི་གནོན་ཤུགས་ཀྱི་འོག་ནས།  རྒྱ་རིགས་སློབ་མ་དང་དགེ་རྒན་རྣམས་ཀྱིས་སྨྲ་བརྗོད་རང་དབང་གི་ཐོབ་ཐང་དེ་ལོངས་སུ་སྤྱོད་ཐུབ་ཀྱི་མེད་པའི་སེམས་ཚབ་དང་གླེང་སློང་བྱེད་མཁན་མང་པོ་བྱུང་འདུག ཨོ་གླིང་གི་གཙུག་ལག་སློབ་གྲྭ་ཆེན་པོ་ཞིག་གི་སློབ་དཔོན།  Kevin Carrico ལགས་ཀྱིས་རྒྱ་ནག་གཞུང་གིས་ Luo Daiqing འཛིན་བཟུང་བཙོན་བཅུག་བྱས་པ་དེ་ནི་ཧ་ཅང་བློ་ཕམ་པའི་གནད་དོན་ཞིག་ཡིན་སྐོར་འགྲེལ་བརྗོད་བྱས་པ་དང་སྦྲགས།  རྒྱ་ནག་སྲིད་གཞུང་གིས་ཕྱི་ལོགས་སུ་ཡོད་པའི་རྒྱ་རིགས་སློབ་མ་རྣམས་ཀྱི་སྨྲ་བརྗོད་རང་དབང་ལ་སྟངས་འཛིན་བྱེད་བཞིན་པ་མ་ཟད།   སྨྲ་བརྗོད་རང་དབང་ལོངས་སུ་སྤྱོད་མཁན་གྱི་སློབ་མ་རྣམས་ཀྱི་བྱ་སྤྱོད་ལ་ཞིབ་འཇུག་མཐིལ་ཕྱིན་པ་བྱས་ཏེ་བཙོན་འཇུག་ཁྲིམས་ཐག་བཅད་པ་བརྒྱུད། དོན་དངོས་སྲིད་གཞུང་གིས་ཕྱི་ལོག་ཏུ་ཡོད་པའི་རྒྱ་རིགས་རྣམས་ལ། ཁྱེད་ཅག་སྲིད་གཞུང་ལ་དབང་གི་ཡོད་པ་རེད་ཅེས་བརྗོད་བཞིན་ཡོད་པ་ཡོངས་གྲགས་གནང་འདུག ཨ་རིའི་གསར་ཁང་ཁག་གཅིག་གིས་ Luo Daiqingལགས་སུ་གློག་འཕྲིན་བརྒྱུད་འབྲེལ་བ་ཞུས་ཡོད་པ་ལྟར། ཁོང་སྒེར་ངོས་ནས་ལན་འདེབས་གང་ཡང་གནང་མེད་ཀྱང་ཁོང་སློབ་སྦྱོང་གནང་སའི་གཙུག་ལག་སློབ་ཁང་གིས་འགྲེལ་བརྗོད་གནང་དོན་ལྟར་ན། རྒྱ་ནག་གཞུང་གིས་ Luo ལགས་སུ་ཟླ་བ་དྲུག་གི་བཙོན་འཇུག་ཉེས་ཆད་བཏང་ཡོད་པ་དེ་ལྟར་ཡང་། ཁོང་ཐོག་མར་ཕྱི་ཟླ་ ༧་པའི་ནང་འཛིན་བཟུང་གིས་ཟླ་བ་དྲུག་བཙོན་ཁང་ནང་བཅུག་ཟིན་པའི་གནད་དོན་གཞིར་བཟུང་། ཁོང་ད་ཆ་གློད་བཀྲོལ་ཐོབ་སྟེ་རྒྱ་ནག་གི་ཝུ་ཧན་གྲོང་ཁྱེར་དུ་གནས་སྡོད་གནང་བཞིན་ཡོད་པ་རེད་འདུག རྩ་བའི་རྒྱ་ནག་སྲིད་གཞུང་གིས་ཕྱི་ཕྱོགས་ཀྱི་རང་དབང་ཅན་གྱི་སློབ་སྦྱོང་གི་ཁོར་ཡུག་ལ་སྟངས་འཛིན་བྱེད་བཞིན་པའི་གནད་དོན་དང་འབྲེལ་ནས།      ཨ་རིའི་གྲོས་ཚོགས་ཀྱི་འཐུས་མི་རྣམས་ཀྱིས་ཀྱང་རྒྱ་ནག་གིས་ཨ་རིའི་རང་དབང་གི་སློབ་སྦྱོང་གི་མཁའ་དབུགས་དེར་སྟངས་འཛིན་དང་བཀག་སྡོམ་བྱས་ནས་གནོད་ཤུགས་སྤྲོད་བཞིན་པར་སེམས་ཚབ་བྱེད་མཁན་མང་པོ་བྱུང་ཡོད་པ་མ་ཟད།  ཨ་རིའི་གྲོས་ཚགས་གོང་མའི་འཐུས་མི།   ཨ་རིའི་གྲོས་ཚོགས་དང་འཛིན་སྐྱོང་གི་རྒྱ་ནག་ཐོག་གི་ཚོགས་ཆུང་གི་མཉམ་སྤྲེལ་གྱི་ཚོགས་གཙོ་སྐུ་ཞབས་Marco Rubio ལགས་ཀྱིས།   རྒྱ་ནག་སྲིད་གཞུང་གིས་ཨ་རིར་སློབ་སྦྱོང་བྱེད་མྱོང་མཁན་གྱི་རྒྱ་རིགས་སློབ་མ་ Luo Daiqing འཛིན་བཟུང་བཙོན་འཇུག་བྱས་པའི་གནད་དོན་དེ་སྒེར་གྱི་ Twitter དྲ་གནས་སུ་བཀོད་དེ།  གོང་གི་གནད་དོན་དེར་ཚང་མས་ཐུགས་ཞིབ་གནང་དགོས་གལ་ཡིན་པར་འབོད་སྐུལ་གནང་ཡོད་པ་རེད མ་ཟད་ཨ་རིའི་སྲིད་དོན་དབྱེ་ཞིབ་ཁང་། Wilson Center ཞེས་པའི་སྤྱི་ལོ་ ༢༠༡༨ ལོར་རྒྱ་ནག་གིས་ཨ་རིའི་མཐོ་རིམ་སློབ་སྦྱོང་གི་ཁོར་ཡུག་ཏུ་རྒྱ་ནག་གིས་གནོན་ཤུགས་སྤྲོད་བཞིན་པའི་ཐད་ནས་སྙན་ཐོ་ཞིག་འདོན་སྤེལ་བྱས་པའི་ནང་།  ཨ་རིར་རྟེན་གཞི་བྱས་པའི་རྒྱ་རིགས་སློབ་མ་རྣམས་ཀྱིས་རྒྱ་ནག་དང་འབྲེལ་བའི་ཚོར་རྣོ་བའི་བརྗོད་བྱ་གང་གི་སྒང་དུ་མི་སྒེར་གྱི་ལངས་ཕྱོགས་ཐད་ནས་སྐད་ཆ་བཤད་ཐུབ་ཀྱི་མེད་པ་མ་ཟད།  གལ་ཏེ་སུ་ཞིག་གིས་རྒྱ་ནག་དང་འབྲེལ་བའི་གནད་དོན་གང་ཡང་རུང་བ་ཞིག་གི་སྒང་ལ་སྐད་ཆ་བཤད་པ་ཡིན་ན།   གནས་ཚུལ་དེ་གཞན་གྱིས་རྒྱ་ནག་སྲིད་གཞུང་གི་དཔོན་རིགས་རྣམས་ལ་རྩིས་སྤྲོད་བྱེད་ངེས་བའི་དངངས་སྐྲག་བྱེད་ཀྱི་ཡོད་པར་འཁོད་ཡོད་པ་རེད། དེ་བཞིན་ Scholars at Risk ཞེས་ཉེན་ཁའི་འོག་ལྷུང་བའི་ཤེས་ལྡན་མི་སྣའི་ཚོགས་པའི་ངོས་ནས་རྒྱ་ནག་གི་སློབ་སྦྱོང་གི་ཁོར་ཡུག་རང་དབང་དང་འབྲེལ་ནས་སྙན་ཐོ་ཞིག་འདོན་སྤེལ་བྱས་པའི་ནང་།    རྒྱ་ནག་གིས་རྒྱལ་ནང་དང་ཕྱི་རྒྱལ་ཡུལ་གྲུ་གང་སར་ཤེས་ཡོན་སློབ་གསོའི་རང་དབང་ལ་ཤན་ཤུགས་སྤྲོད་བཞིན་པ་ཐེར་འདོན་བྱས་ཡོད་པ་མ་ཟད།  Finnish གཙུག་ལག་སློབ་ཁང་གི་འབུམ་རམས་པའི་ཞིབ་འཇུག་པ་Zhan Wang ཞེས་པ་ཞིག་སྒེར་གྱི་ལས་དོན་དང་འབྲེལ་ནས་རྒྱ་ནག་ཏུ་སྐྱོད་སྐབས།  སྲིད་གཞུང་གིས་ཁོང་གིས་དྲ་རྒྱའི་ཐོག་གི་གླེང་མོལ་དང་འབྲེལ་ནས་བཀག་སྡོམ་བྱས་ཡོད་པ་སོགས་ཡོངས་གྲགས་གནང་འདུག གོང་གི་གནས་ཚུལ་དེ་དང་འབྲེལ་ནས།  Scholars at Risk  ཚོགས་པའི་ངེས་སྟོན་པ། སྐུ་ཞབས་ Clare Robinson ལགས་ཀྱིས།  ད་རེས་རྒྱ་ནག་གཞུང་གིས་ Luo Daiqingལགས་འཛིན་བཟུང་བཙོན་འཇུག་བྱས་པའི་གནས་ཚུལ་དེའི་ཁྲོད་དོ་སྣང་བྱེད་དགོས་པ་ཞིག་ནི། གནས་ཚུལ་དེའི་བརྒྱུད་ཕྱི་ལོག་ཏུ་ཡོད་པའི་རྒྱ་རིགས་སློབ་མ་དང་མཁས་དབང་རྣམས་ཀྱིས་སྤྱི་ཚོགས་དྲ་རྒྱའི་ཐོག་རྒྱ་ནག་སྲིད་གཞུང་དང་སློབ་སྦྱོང་གི་གནད་དོན་སོགས་ལ་སྐྱོན་བརྗོད་ཀྱིས་གནད་དོན་བཀོད་རྒྱུ་དང་། ཡང་ན་འབྲེལ་ཡོད་ཞིབ་འཇུག་སྙན་ཐོ་སོགས་འདོན་སྤེལ་མ་བྱས་གོང་བསམ་བློ་གཉིས་བ་གཉིས་མི་གཏོང་ཀ་མེད་དུ་གྱུར་ཡོད་སྐོར་གསུང་འདུག གང་ལྟར་ Luo Daiqing ལགས་སློབ་སྦྱོང་གནང་སའི་ Minnesota ཡི་གཙུག་ལག་སློབ་ཁང་ནས་ཁོང་རྒྱ་ནག་གིས་འཛིན་བཟུང་བཙོན་འཇུག་བྱས་པའི་གནས་ཚུལ་དེ་བདུན་ཕྲག་སྔོན་མའི་ནང་གཞི་ནས་ཤེས་རྟོགས་བྱུང་ཡོད་སྐོར་གསུངས་བ་དང་ད་ཆ་ཁོང་གློད་བཀྲོལ་བྱུང་བའི་གནས་ཚུལ་ལ་དགའ་བསུ་ཞུས་ཡོད་པ་དེ་ལྟར་ཡང་། དགེ་རྒན་ཆེན་པོ་ཁག་གཅིག་གིས། གཙུག་ལག་སློབ་ཁང་དེའི་ངོས་ནས་གནད་དོན་དེའི་ཐོག་རང་ཉིད་ཀྱི་བཞེངས་ཕྱོགས་ཡོང་གྲགས་གནང་དགོས་པ་མ་ཟད། རྒྱ་ནག་གཞུང་གིས་བྱེད་སྟངས་འདིར་ངོས་ལེན་བྱེད་ཐབས་མེད་པའི་སྐྱོན་བརྗོད་ཀྱིས་གསལ་བསྒྲགས་སྤེལ་དགོས་པའི་ཞུ་སྐུལ་གནང་བཞིན་པ་རེད་འདུག

ཁ་སང་རེས་གཟའ་ཕུར་བུ་ཉིན་འཛམ་གླིང་མཉམ་འབྲེལ་རྒྱལ་ཚོགས་ཀྱིས་རྒྱ་ནག་ནས་ཁྱབ་གདལ་ཕྱིན་པའི་ཏོག་དབྱིབས་ནད་དུག་དེ་རྒྱལ་སྤྱིའི་ཐོག་ཛ་དྲག་གི་རང་བཞིན་ལྡན་པའི་རིམས་ནད་ཅིག་ཏུ་ངོས་འཛིན་གནང་ཡོད་པ་གསལ་བསྒྲགས་གནང་འདུག གསལ་བསྒྲགས་དེ་ནི་ཁ་སང་འཛམ་གླིང་འཕྲོད་བསྟེན་ལྷན་ཚོགས་ཀྱི་འགན་འཛིན་སྐུ་ཞབས་ Tedros  Adhanom Ghebreyesus ལགས་ཀྱིས་གཙོ་སྐྱོང་འོག་རྒྱལ་ཚོགས་ཀྱི་དམིགས་བསལ་ཛ་དྲག་ཚོགས་ཆུང་གིས་རིམས་ནད་དེ་ཉེན་ཚབས་ཅན་ཞིག་ཡིན་མིན་ཐོག་དཔྱད་ཞིབ་ཀྱིས་ཚོགས་འདུ་ཐེངས་གཉིས་པ་ཚོགས་ཏེ་ཐག་གཅོད་གནང་བ་ཞིག་ཆགས་ཀྱི་ཡོད་པ་ལྟར། གསར་འགོད་ལྷན་ཚོགས་ཐོག་སྐུ་ཞབས་ Tedros ལགས་ཀྱིས་རིམས་ནད་དེ་ཐོག་མར་རྒྱ་ནག་ནས་ཐོན་པ་དང་ད་ཆ་རྒྱ་ནག་རྒྱལ་ནང་ཙམ་མིན་པར་རྒྱལ་སྤྱིའི་རྒྱལ་ཁབ་ཁག་མང་པོའི་ནང་ཆེས་མྱུར་པོ་ཁྱབ་བཞིན་པར་བརྟེན་རིམས་ནད་དེ་འཛམ་གླིང་སྤྱིའི་ཐོག་ཛ་དྲག་གི་རང་བཞིན་ཅན་གྱི་རིམས་ནད་ཡིན་པར་གསལ་བསྒྲགས་གནང་བ་ཡིན་ཅེས་གསུངས་པ་དང་ཆབས་ཅིག ད་ཆ་ཁོང་རྣམས་ཀྱི་བློ་འཚབ་ཆེ་ཤོས་གནང་གཞི་ཞིག་ནི་རིམས་ནད་དེ་འཕྲོད་བསྟེན་གྱི་མཐུན་རྐྱེན་ཆེས་ཞན་པོ་ཡོད་སའི་རྒྱལ་ཁབ་ཁག་ཏུ་ཧ་ཅང་མྱུར་པོ་ཁྱབ་གདལ་འགྲོ་རྒྱུའི་ནུས་པ་དེ་ཆགས་ཡོད་པ་གསུངས་འདུག སྐབས་དེར་ཁོང་གིས་རྒྱ་ནག་གཞུང་ནས་རིམས་ནད་དེ་རྩད་གཅོད་བྱས་ཏེ་ནད་གཞི་ཁྱབ་གདལ་མི་འགྲོ་བར་ལས་དོན་སྤེལ་བ་དང་དེ་བཞིན་ནད་གཞི་ཕོག་ཟིན་པ་རྣམས་འཕྲལ་མར་ཟུར་བཅད་ཀྱིས་སྨན་བཅོས་བྱས་པ་དང་དེའི་སྐོར་རྒྱལ་ཚོགས་དང་རྒྱལ་སྤྱིའི་རྒྱལ་ཁབ་ཁག་ལ་དུས་ཐོག་ཏུ་ཡོངས་ཁྱབ་གནང་བ་དེར་བསྔགས་བརྗོད་གནང་ཡོད་ཀྱང་། ད་ལྟའི་ཆར་རྒྱ་ནག་ཕུད་པའི་འཛམ་གླིང་རྒྱལ་ཁབ་ ༡༨ ནང་རིམས་ནད་དེ་ཁྱབ་གདལ་འགྲོ་བཞིན་པའི་གནད་དོན་ ༩༨ ཙམ་བྱུང་ཡོད་པ་དང་དེ་དག་ཕལ་ཆེ་བ་རྒྱ་ནག་ཝུ་ཧན་གྲོང་ཁྱེར་ནས་ཕྱིར་སྐྱོད་མཁན་འགྲུལ་བཞུད་བ་བརྒྱུད་དེ་འགོས་པ་ཞིག་ཆགས་ཡོད་སྟབས། ཐེངས་འདིར་རྒྱལ་ཚོགས་ཀྱིས་དེ་འབྲེལ་གསལ་བསྒྲགས་བརྒྱུད་སྤེལ་གྱིས་རྒྱལ་ཚོགས་ཀྱི་ཚོགས་མི་རྒྱལ་ཁབ་ཡོངས་ལ་ད་ཆ་རྒྱལ་སྤྱིའི་ཁྱོན་དུ་ཁྱབ་གདལ་འགྲོ་བཞིན་པའི་རིམས་ནད་ཀྱི་གནད་སྟངས་དེ་ཆེས་ཛ་དྲག་གི་རང་བཞིན་ལ་ངོས་འཛིན་གནང་ཐོག་རྒྱལ་ཁབ་སོ་སོས་རང་ཐག་རང་གཅོད་ཀྱིས་རང་ཉིད་ཀྱི་ས་མཚམས་དེ་ཕྱི་ལ་སྒོ་མོ་བརྒྱབ་རྒྱུ་གཙོས་རྒྱ་ནག་ནས་སྐྱོད་མཁན་གནམ་གྲུ་ཡོངས་རྫོགས་བཀག་སྡོམ་དང་གནམ་ཐང་དུ་ནད་གཞི་དེ་ཕོག་ཡོད་མེད་ཀྱི་བརྟག་དཔྱད་གནང་རྒྱུ། དེ་བཞིན་རིམས་ནད་དེ་ཉེན་སྲུང་གི་ཐབས་ལམ་གཞན་འཚོལ་རྒྱུ་སོགས་ལ་འབད་དགོས་གལ་ཡིན་པའི་སྐུལ་མ་གནང་འདུག འཛམ་གླིང་མཉམ་འབྲེལ་རྒྱལ་ཚོགས་ཀྱི་གྲངས་ཐོ་གཞིར་བཟུང་ལྟར་ན་རྒྱ་ནག་ནང་ཁ་སང་བར་ཏོག་དབྱིབས་ནད་དུག་གློ་ཚད་རིམས་ནད་ཕོག་པའི་མི་གྲངས་ ༧༧༡༡ ཡོད་པ་དང་མི་གྲངས་ ༡༣༧༠ ཛ་དྲག་གི་གནས་སྟངས་ངང་གནས་ཡོད་པ། མི་ ༡༧༠ རྐྱེན་འདས་སུ་ཕྱིན་ཡོད་པ། དེ་མིན་འཛམ་གླིང་རྒྱལ་ཁབ་གཞན་ནང་མི་གྲངས་ ༡༢༡༦༧ ལ་ནད་གཞི་དེ་ཕོག་པའི་དོགས་གཞི་ཡོད་པ་དང་ད་བར་ནད་གཞི་ཕོག་པའི་མི་ ༡༢༤ སྐོར་ཞིག་དྲག་སྐྱེད་བྱུང་སྟེ་རང་ཁྱིམ་དུ་ལོག་ཡོད་པ་འཁོད་འདུག རྩ་བའི་རྒྱ་ནག་གཞུང་འབྲེལ་གྱིས་གནས་ཚུལ་སྤེལ་བར་ཏོག་དབྱིབས་ནད་དུག་རྐྱེན་པས་རྒྱ་ནག་ནང་དེ་རིང་བར་མི་གྲངས་ ༢༡༣ ཙམ་འདས་གྲོངས་སུ་གྱུར་ཟིན་ཡོད་པ་མ་ཟད། མི་གྲངས་ ༩༦༩༢ ལྷག་ལ་ནད་ཡམས་དེ་ཕོག་ཡོད་པའི་གནས་ཚུལ་བཀོད་ཡོད་པའི་ཁར་ཁ་སང་ཨུ་རུ་སུ་ཡིས་རྒྱ་ནག་དང་ས་འབྲེལ་ཡོད་པའི་རང་ཉིད་ཀྱི་ས་མཚམས་དང་གྲུ་ཁའི་དགག་སྒོ་ཁག་ཡོངས་རྫོགས་ཟླ་བ་རྗེས་མའི་ཚེས་ཤར་བར་བཀག་ཡོད་པ་མ་ཟད། མཱོས་ཀོ་དང་པེ་ཅིང་བར་གྱི་མེ་འཁོར་མ་གཏོགས་གཞན་རྒྱལ་ཁབ་དེ་གཉིས་དབར་སྐྱོད་མཁན་གྱི་མེ་འཁོར་ཡོངས་རྫོགས་བཀག་སྡོམ་བྱས་གནས་སྟངས་ཆགས་ཀྱི་འདུག

ཨ་རིའི་རྒྱལ་སྤྱིའི་ཉེས་ཡངས་ཚོགས་པས་ཨེ་ཤ་ཡའི་ཁུལ་གྱི་རྒྱལ་ཁབ་མང་དག་ཅིག་གིས་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པ་མ་ཟད།  སྲིད་གཞུང་ལ་སྐྱོན་བརྗོད་བྱེད་བཞིན་པ་རྣམས་ལ་སྡང་སྡུག་དྲག་པོ་སྟོན་བཞིན་པ་ཡོངས་གྲགས་གནང་འདུག དེ་རིང་ཨ་རིའི་ New York Post གསར་ཁང་གིས་གནས་ཚུལ་སྤེལ་བར་རྒྱལ་སྤྱིའི་ཉེས་ཡངས་ཚོགས་པས་ཨེ་ཤ་ཡ་དང་ཞི་བདེ་རྒྱ་མཚོའི་ས་ཁུལ་ཁག་ཅིག་གི་ལོ་འཁོར་གྱི་སྙན་ཐོའི་ནང་ཨེ་ཤ་ཡའི་མི་འབོར་མང་ཤོས་ཀྱི་རྒྱ་གར་དང་རྒྱ་ནག་གཉིས་ཀྱིས་སྲིད་གཞུང་གི་དབང་ཆ་གཅིག་ཏུ་སྒྲིལ་ཏེ་གྲངས་ཉུང་མི་རིགས་རྣམས་ནི་རྒྱལ་ཁབ་ཀྱི་བདེ་འཇགས་ལ་ཉེན་ཚབས་ཆེ་བའི་གནད་དོན་ཞིག་ལ་ངོས་འཛིན་བྱེད་ཀྱི་ཡོད་པ་ལྟར། སྲིད་གཞུང་གིས་མི་མང་ལ་དམ་དྲག་བྱེད་ཤུགས་ཆེ་རུ་སོང་བ་དང་ལྷན་དུ་གཞོན་སྐྱེས་རྣམས་ཀྱིས་དབུ་ཁྲིད་པའི་གཞུང་རྒོལ་གྱི་ལས་འགུལ་དེ་ཤུགས་ཆེ་རུ་འགྲོ་བཞིན་པ་མངོན་གསལ་གནང་འདུག དེ་བཞིན་ཐེངས་འདིའི་སྙན་ཐོ་ནང་ཞི་ཅིན་ཕིང་གིས་འགོ་ཁྲིད་པའི་རྒྱ་ནག་དམར་ཤོག་ཚོགས་པས་སྲིད་གཞུང་དང་ལྟ་བ་ཐ་དད་ཡིན་པའི་མི་སེར་རྣམས་ལ་སྡང་སྡུག་དྲག་པོས་ཕམ་ཉེས་གཏོང་བཞིན་པ་མ་ཟད་སྲིད་གཞུང་གི་དབང་ཤུགས་རྒྱ་སྐྱེད་བཏང་ནས་འགྲོ་བ་མིའི་ཐོབ་ཐང་རྩོད་ལེན་བྱེད་མཁན་རྣམས་ལ་དམ་དྲག་ཤུགས་ཆེན་བྱེད་བཞིན་ཡོད་པ་མངོན་གསལ་གནང་འདུག གཞན་ཡང་སྙན་ཐོ་དེའི་ནང་རྒྱ་ནག་གི་གཙོ་བྱས་པའི་ལྷོ་ཨེ་ཤ་ཡིའི་ཁུལ་དུ་སྲིད་གཞུང་གིས་ཐད་ཀར་གཞུང་དང་ལྟ་བ་མི་མཐུན་པའི་མི་སེར་རྣམས་ལ་བཀག་སྡོམ་བྱེད་ཀྱི་ཡོད་པ་མ་ཟད། གསར་ཁང་ཁག་ལ་ཡང་གནོད་ཤུགས་སྤྲོད་བཞིན་པ་བརྒྱུད་དེ་སྲིད་གཞུང་གི་ལངས་ཕྱོགས་ལ་རྒྱབ་འགལ་བྱེད་མཁན་རྣམས་ལ་ཁྲིམས་སྒྲིག་གསར་པ་བཟོས་ནས་ཉེས་ཆད་གཅོད་བཞིན་ཡོད་སྟབས། མི་མང་གིས་སྲིད་གཞུང་ལ་ཞི་བའི་ངོ་རྒོལ་བྱེད་རྒྱུའི་གོ་སྐབས་དེ་ཡང་ཧ་ཅང་ཉུང་དུ་དྲག་འདུག་པ་དང་། བཟོ་ཚོང་ཁང་རྣམས་ཀྱང་དཔལ་འབྱོར་མཐོར་འདེགས་ཀྱི་ཆེད་དུ་ཕྱི་གསལ་ནང་གསལ་མེད་པར་བཟོས་ཏེ་མི་སུ་ཞིག་གིས་དེར་སྐྱོན་བརྗོད་བྱས་པ་ཡིན་ན་ཁྲིམས་ཐོག་ནས་ཉེས་ཆད་ལྕི་མོ་གཅོད་བཞིན་ཡོད་པ་ཡོངས་གྲགས་གནང་ཡོད། དེ་བཞིན་ཐེངས་འདིའི་རྒྱལ་སྤྱིའི་ཉེས་ཡངས་ཚོགས་པའི་ལོ་འཁོར་གྱི་སྙན་ཐོར་རྒྱ་ནག་གི་སྤྱི་ཡོངས་ཀྱི་སྲིད་གཞུང་གི་དབང་ཤུགས་ཁྲོད་ནས་གྲངས་ཉུང་མི་རིགས་རྣམས་ཀྱི་འགྲོ་བ་མིའི་ཐོབ་ཐང་ལ་རྡོག་རོལ་གཏོང་བཞིན་པ་སོགས་མཚོན་པའི་ཧོང་ཀོང་ནང་གི་སྲིད་གཞུང་གི་དམ་དྲག་དང་རྩུབ་སྤྱོད། གཞན་ཡང་བྷར་མ་ནང་གི་ཁ་ཆེ་མི་རིགས་རྣམས་ཀྱི་གནད་དོན། ད་དུང་རྒྱ་གར་ནང་གི་འདི་ལོའི་མི་སེར་ཐོབ་ཐང་ཐད་ཀྱི་ཁྲིམས་འཆར་སོགས་ཨེ་ཤ་ཡའི་ཁུལ་གྱི་སྲིད་གཞུང་མང་དག་ཅིག་གིས་དབང་ཆ་སྒེར་གཅོད་ཀྱིས་འབངས་མི་སེར་རྣམས་ལ་སྡུག་སྦྱོང་མནར་གཅོད་གཏོང་གི་ཡོད་པ་མངོན་གསལ་གནང་འདུག རྒྱ་ནག་དམར་ཤོག་སྲིད་གཞུང་གིས་དམ་དྲག་ཆེན་པོ་བྱས་ཏེ་ཡུ་གུར་དང་ Kazakhs སོགས་མཚོན་པའི་གྲངས་ཉུང་མི་རིགས་རྣམས་གང་བྱུང་དུ་འཛིན་བཟུང་གིས་བཙོན་འཇུག་བྱེད་བཞིན་པ་མ་ཟད་བཙན་དབང་གིས་རང་གི་ཡུལ་སྲོལ་གྱི་ལྟ་སྤྱོད་རྣམས་འདོར་དུ་འཇུག་བཞིན་ཡོད་པར་བརྗོད་འདུག ལྷོ་ཨེ་ཤ་ཡིའི་ཁུལ་གྱི་རྒྱལ་སྤྱིའི་ཉེས་ཡངས་ཚོགས་པའི་ངེས་སྟོན་པ་སྐུ་ཞབས་ Nicholas Bequelin  ལགས་ཀྱིས་སྲིད་གཞུང་གིས་དམ་དྲག་ཇི་ལྟར་བྱས་ནའང་། ད་ཆ་ལྷོ་ཨེ་ཤ་ཡའི་ཁུལ་དུ་གཞོན་སྐྱེས་རྣམས་ཀྱིས་རང་གི་ཐོབ་ཐང་གཙོས་པའི་སྲིད་གཞུང་གི་ཕྱི་གསལ་ནང་གསལ་གྱི་བྱེད་ལས། དེ་བཞིན་དྲང་བདེན་དང་ཁོར་ཡུག་གི་གནད་དོན་སོགས་ཕྱོགས་ཡོངས་ནས་གཙུག་ཏུ་བཟུང་ཐོག་སྲིད་དབང་ལ་ངོ་རྒོལ་བྱེད་ཤུགས་ཆེ་རུ་འགྲོ་བཞིན་ཡོད་སྐོར་གསུངས་འདུག

རྒྱ་ནག་ཝུ་ཧན་ནང་ནས་ཐོན་པའི་ཏོག་དབྱིབས་ནད་དུག་གློ་ཚད་གསར་པའི་ནད་རིམས་དེ་རྒྱ་ནག་རྒྱལ་ཡོངས་དང་རྒྱལ་སྤྱིའི་ཡུལ་གྲུ་མང་པོ་ཞིག་ནང་ཁྱབ་གདལ་འགྲོ་བཞིན་པའི་ཁར། དེ་རིང་བརྒྱུད་ལམ་ཁག་ཏུ་དེ་འབྲེལ་སྐོར་གནས་ཚུལ་གསར་པ་ཤེས་རྟོགས་བྱུང་བའི་ནང་དུ་བོད་མདོ་སྨད་རྔ་པ་ཁུལ་དུ་ཏོག་དབྱིབས་ནད་དུག་གློ་ཚད་རིམས་ནད་ཕོག་མཁན་གཅིག་དང་དཀར་མཛེས་བོད་རིགས་རང་སྐྱོང་ཁུལ་ནང་ནད་པ་གཉིས་མང་རུ་ཕྱིན་ཡོད་པ་ར་སྤྲོད་བྱུང་འདུག རྩ་བའི་བོད་ཀྱི་རྒྱལ་ས་ལྷ་སའི་ནང་ཁ་ས་རང་ལོ་ ༣༤ ཅན་གྱི་རྒྱ་རིགས་ཤིག་ལ་རིིམས་ནད་དེ་ཕོག་ཡོད་པའི་གནས་ཚུལ་ཐོན་པ་དང་བཅས། ད་ཆ་རིམ་ནད་དེ་རྒྱ་ནག་གི་དབང་བསྒྱུར་འོག་ཡོད་པའི་ས་གནས་ཡོངས་སུ་ཁྱབ་གདལ་དུ་ཕྱིན་ཡོད་པ་ར་སྤྲོད་བྱུང་ཡོད་པ་དང་། དེ་རིང་བོད་རང་སྐྱོང་ལྗོངས་ཟེར་བའི་འཕྲོད་བསྟེན་ལས་ཁུངས་ཀྱིས་གསལ་བསྒྲགས་ཤིག་སྤེལ་སྟེ། ཟླ་བ་འདིའི་ཕྱི་ཚེས་ ༢༢ ཉིན་ཝུ་ཧན་ནས་མེ་འཁོར་བརྒྱུད་བོད་ཀྱི་རྒྱལ་ས་ལྷ་སར་འབྱོར་བའི་རྒྱ་རིགས་སྐྱེས་པ་དེ་ད་ཆ་ཟུར་བཅད་ཐོག་སྨན་བཅོས་བྱེད་བཞིན་ཡོད་སྟབས། གོང་ཞུས་ཉིན་མོ་དེར་ཝུ་ཧན་ནས་ལྷ་སར་མེ་འཁོར་བརྒྱུད་ནས་འགྲུལ་བཞུད་གནང་མཁན་མང་ཚོགས་གཞན་རྣམས་ཀྱིས་ངེས་པར་དུ་ལྷ་ས་འཕྲོད་བསྟེན་ལས་ཁུངས་ལ་འབྲེལ་བ་བྱེད་དགོས་པའི་བཀོད་ཁྱབ་ཅིག་བཏང་འདུག འདི་ག་རླུང་འཕྲིན་ཁང་ལ་ལྷ་ས་ནང་གི་ས་གནས་བོད་མི་ཞིག་གིས་གནས་ཚུལ་ངོ་སྤྲོད་གནང་བར་གཞིགས་ན། བོད་རང་སྐྱོང་ལྗོངས་ཟེར་བའི་འཕྲོད་བསྟེན་ལས་ཁུངས་ཀྱིས་ད་ཆ་ལྷ་སར་རིམས་ནད་དེ་ཕོག་པའི་མི་གཅིག་སླེབས་ཡོད་པ་མངོན་གསལ་གནང་ཡོད་ཀྱང་། དོན་དངོས་ཐོག་སྐབས་དེར་གོང་ཞུས་ནད་པ་དེ་དང་ལྷན་དོགས་གཞི་ཡོད་པའི་གཞན་འགྲུལ་བཞུད་བ་མི་བདུན་ལྷ་སར་སླེབས་ཡོད་པ་དང་ད་ཆ་ཁོང་རྣམས་ལ་རིམས་ནད་དེ་ཕོག་ཡོད་མེད་ཀྱི་བརྟག་དཔྱད་འགྲོ་མུས་ཡིན་ཡང་། ཕལ་ཆེར་མི་བདུན་པོ་དེ་དག་ལ་རིམས་ནད་དེ་ཕོག་ཡོད་པའི་དོགས་པ་གནང་བཞིན་འདུག དེའི་བར་ན་དེ་རིང་རྔ་བ་ཁུལ་འཕྲོད་བསྟེན་ལས་ཁུངས་ཀྱིས་ཟླ་བ་འདིའི་ཕྱི་ཚེས་ ༢༡ ཉིན་ཝུ་ཧན་གྱི་གྲོང་ཁྱེར་ Hankou ནས་ཁྲིན་ཏུ་བརྒྱུད་ཟི་ཁྲོན་ཞིང་ཆེན་རྔ་བ་ཁུལ་གྱི་འབར་ཁམས་རྫོང་ནང་སླེབས་པའི་སྐྱེས་མ་རང་ལོ་ ༢༡ སོན་པ་ཞིག་ལ་གློ་ཚད་ཀྱི་རིམས་ནད་དེ་ཕོག་ཡོད་པ་མངོན་གསལ་གནང་འདུག་པ་དང་ཆབས་ཅིག ཞིང་ཆེན་དེའི་མངའ་ཁོངས་ཀྱི་བོད་མི་གནས་སྡོད་ཡོད་སའི་ས་ཁུལ་དཀར་མཛེས་ཁུལ་གྱི་གསེར་རྟ་རྫོང་ནང་ནད་པ་ ༡ དང་འདབ་པ་རྫོང་ནང་ནད་པ་ ༡ དེ་བཞིན་དར་རྩེ་མདོ་ནང་ནད་པ་ ༢ དང་རྟའུ་ནང་ནད་པ་ ༡ བཅས་ཁྱོན་རིམ་ནད་དེ་ཕོག་མཁན་གྱི་མི་གྲངས་ལྔ་བྱུང་ཡོད་པ་ར་སྤྲོད་གནང་འདུག སྤྱིར་དེ་རིང་རྒྱ་ནག་དང་རྒྱལ་སྤྱིའི་བརྒྱུད་ལམ་ཁག་གིས་གནས་ཚུལ་སྤེལ་བར་གཞིགས་ན། རྒྱ་ནག་ནང་དེ་རིང་བར་ནད་རིམས་ཕོག་ཟིན་པའི་མི་ ༧༨༡༤ ཙམ་དང་རྐྱེན་འདས་སུ་ཕྱིན་པ་ ༡༧༠ ལྷག དེ་བཞིན་རིམས་ནད་དེ་ཨ་རི་དང་ཨོ་སི་ཊོ་ལི་ཡ ཉི་ཧོང་། ལྷོ་ཀོ་རི་ཡ། ཝེ་ཏི་ནམ། ཕ་རན་སི་སོགས་འཛམ་གླིང་རྒྱལ་ཁབ་ ༢༡ ནང་དུ་ཁྱབ་གདལ་སོང་ཡོད་པ་དང་ལྷག་དོན་རྒྱ་གར་ནང་མི་རེ་ཟུང་ལ་ནད་གཞི་དེ་ཕོག་ཡོད་པར་དོགས་གཞི་ཡོད་པའི་གནས་ཚུལ་ཁག་ཅིག་ཐོན་ཡོད་པའི་ཁྲོད། དེ་རིང་རྒྱ་གར་ལྷོ་ཕྱོགས་ཀེ་ར་ལ་མངའ་སྡེའི་འཕྲོད་བསྟེན་བློན་ཆེན་ལྷན་ཁང་ནས་མངའ་སྡེ་དེའི་ནང་གི་སློབ་ཕྲུག་གཅིག་ལ་ཏོག་དབྱིབས་རིམས་ནད་དེ་ཕོག་ཡོད་པ་མངོན་གསལ་གནང་འདུག རྒྱ་ནག་ནང་གི་ནད་ཡམས་དེ་དང་འབྲེལ། དེ་རིང་འགྲོ་བ་མིའི་ཐོབ་ཐང་ལྟ་ཞིབ་ཚོགས་པས་སྤྱི་བསྒྲགས་ཤིག་སྤེལ་ཏེ་རྒྱ་གཞུང་ནས་རིམས་ནད་དེ་གཅོད་ཐབས་སུ་ལག་ལེན་ཚད་ལྡན་གནང་བའི་ཐོག་ཡུལ་དེའི་མང་ཚོགས་ཀྱི་འགྲོ་བ་མིའི་ཐོབ་ཐང་སྲུང་སྐྱོབ་བྱ་དགོས་གལ་ཡིན་པར་ནན་བརྗོད་གནང་འདུག དེ་ཡང་དེ་རིང་ཨ་རིར་རྟེན་གཞི་བྱས་པའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པས་སྤྱིར་རྒྱ་ནག་ནང་ཏོག་དབྱིབས་ནད་གཞི་དེ་ཐོག་མ་ཟླ་བ་སྔོན་མའི་ཟླ་མཇུག་ཏུ་ཐོན་ཡོད་ཀྱང་རྒྱ་ནག་གཞུང་གིས་རིམས་ནད་དེའི་ཛ་དྲག་གི་ཁྱབ་གདལ་ལ་སྣང་ཆུང་གིས་དེའི་སྐོར་ཕྱི་ལ་ལམ་སྟོན་གསལ་བསྒྲགས་མ་བྱས་པ་མ་ཟད། རྒྱ་ནག་རྒྱལ་ནང་དུའང་ཡོངས་ཁྱབ་གསལ་བསྒྲགས་གང་ཡང་མ་བྱས་པར་བཞག་པའི་རྐྱེན་གྱིས་དེའི་ཁྱབ་གདལ་མུ་མཐུད་དུ་ཕྱིན་ནས་མཐར་ཟླ་བ་འདིའི་ཟླ་དཀྱིལ་ཙམ་ལ་རྒྱ་གཞུང་གིས་གཞི་ནས་ཝུ་ཧན་གྲོང་ཁྱེར་དེ་ཕྱི་ལ་སྒོ་མོ་བརྒྱབས་ཏེ་ཕྱི་བསྐྱོད་གནམ་གྲུ་ཡོངས་རྫོགས་བཀག་སྡོམ་བྱས་ཡོད་པ་དང་དེའི་ཁྲོད་རྒྱ་གཞུང་གིས་སྤྱི་ཚོགས་དྲྭ་ལམ་ཐོག་སྔར་བཞིན་དམ་དྲག་བྱས་པ་མ་ཟད། དྲྭ་རྒྱའི་ཐོག་ཝུ་ཧན་ནད་ཡམས་སྐོར་ལ་གནས་ཚུལ་སྤེལ་མཁན་མི་སྣ་ཁག་ཅིག་འཛིན་བཟུང་བྱས་ཡོད་པའི་གནས་ཚུལ་ཐོན་ཡོད་ཀྱང་། གང་ལྟར་རྒྱ་གཞུང་གིས་ནད་ཡམས་དེའི་ནད་རྟགས་ཡོད་མཁན་ཚོར་དུས་ཐོག་གིས་འོས་ཤིང་འཚམས་པའི་སྨན་བཅོས་གོ་སྐབས་སྤྲོད་ཐུབ་མེད་པར་སྐྱོན་བརྗོད་གནང་བ་དང་ཆབས་ཅིག རྒྱ་ནག་གཞུང་ནས་ནད་ཡམས་དེར་གདོང་ལེན་བྱེད་སྐབས་དྲག་གནོན་བརྒྱུད་མང་ཚོགས་ཁྲོད་གཞུང་ལ་རྡང་ཟུག་གི་བློ་བསྐྲུན་པ་ལས། ཆེས་ཛ་དྲག་གི་གནས་སྟངས་དེའི་ཁྲོད་མང་ཚོགས་དང་མཉམ་ལས་བྱེད་དགོས་པ་མ་ཟད། གསར་འགོད་པའི་ལས་དོན་ལ་རྒྱབ་སྐྱོར་གནང་དགོས་པའི་འབོད་སྐུལ་ཞུས་འདུག

ཝུ་ཧན་ནང་དུ་ Corona virus ཞེས་པའི་ཏོག་དབྱིབས་ནད་དུག་གློ་ཚད་རིམས་ནད་ཁྱབ་བརྡལ་བྱུང་བའི་རྐྱེན་གྱིས་གནས་སྟངས་ཛ་དྲག་ཆགས་པ་དང་འབྲེལ། རྒྱ་ནག་གཞུང་འབྲེལ་བརྒྱུད་ལམ་ཁག་གི་ཐོག་དེའི་སྐོར་ལ་གནས་ཚུལ་རིམ་པ་སྤེལ་བཞིན་པ་དེ་ལྟར་ཡང་། དོན་དངོས་སུ་ས་གནས་ལ་གནས་སྟངས་རྒྱ་ནག་གཞུང་གིས་བརྒྱུད་བསྒྲགས་བྱས་པ་ལས་ཧ་ཅང་ཛ་དྲག་ཆེ་བ་ཆགས་ཡོད་པ་མངོན་གསལ་གནང་འདུག་པ་དང་། ཡུལ་དེའི་ནང་གི་སྤྱི་ཚོགས་དྲྭ་ལམ་ཁག་གི་ཐོག་རྒྱ་གཞུང་གི་གནས་ཚུལ་སྦས་ཐབས་དང་། རིམས་ནད་ཁྱབ་བརྡལ་འགོག་ཐབས་སོགས་ཕྱོགས་གང་ས་ནས་འཐུས་ཤོར་ཆེན་པོ་བཏང་དང་གཏོང་བཞིན་པར་སྐྱོན་བརྗོད་ཤུགས་ཆེ་བྱེད་བཞིན་འདུག དེ་རིང་རྒྱ་ནག་གཞུང་འབྲེལ་ Xinhua གསར་ཁང་གིས་གནས་ཚུལ་སྤེལ་བར་རྒྱ་ནག་རྒྱལ་ཡོངས་འཕྲོད་བསྟེན་ལྷན་ཚོགས་ཀྱིས་དེ་རིང་བར་རྒྱ་ནག་ནང་ཏོག་དབྱིབས་ནད་དུག་གློ་ཚད་རིམས་ནད་ཕོག་པའི་མི་གྲངས་ ༤༥༡༥ ཡོད་པ་དང་མི་གྲངས་ ༩༧༦ ཛ་དྲག་གི་གནས་སྟངས་ངང་གནས་ཡོད་པ། མི་ ༡༠༦ རྐྱེན་འདས་སུ་ཕྱིན་ཡོད་པ། དེ་བཞིན་མི་གྲངས ༦༩༧༣ ལ་ནད་གཞི་ཕོག་པའི་དོགས་གཞི་ཡོད་པ། གཞན་ཡང་ད་བར་ནད་གཞི་ཕོག་པའི་མི་ ༦༠ སྐོར་ཞིག་དྲག་སྐྱེད་བྱུང་སྟེ་རང་ཁྱིམ་དུ་ལོག་ཡོད་སྟབས། ད་ལྟ་འགོག་ཐབས་བྱེད་པ་ཡིན་ན་རིམས་ནད་དེ་བཅོས་ཐུབ་རྒྱུ་ཉག་གཅིག་ཡིན་སྐོར་སོགས་ཀྱི་གནས་ཚུལ་བཀོད་ཡོད་པ་རེད། འོན་ཀྱང་ཁ་སང་རྒྱ་ནག་གི་སྤྱི་ཚོགས་དྲྭ་ལམ་ཐོག་ཝུ་ཧན་སྨན་ཁང་དུ་ཕྱག་ལས་གནང་མཁན་སྨན་ཞབས་པས་གཙོས་པའི་མང་ཚོགས་ཁག་གཅིག་གིས་ས་གནས་ཀྱི་དངོས་ཡོད་གནས་སྟངས་མངོན་གསལ་གནང་བར་རྒྱ་གཞུང་གིས་བཤད་པ་ལས་གནས་སྟངས་ཧ་ཅང་ཛ་དྲག་པོ་ཡོད་པར་གསུངས་འདུག དེའི་ཁོངས་ནས་ཝུ་ཧན་ནང་གི་སྨན་ཞབས་པ་ཞིག་གིས་ Wechat བརྒྱུད་ལམ་ཐོག་རང་གི་ཉེ་འབྲེལ་ལ་ངུ་འབོད་བྱེད་བཞིན་བཀའ་མོལ་གནང་བའི་སྒྲ་ཞིག་ཕྱིར་གྱར་བྱུང་འདུག སྨན་པ་རྣམས་ནས་ཚོད་དཔག་གནང་བར་མི་འབུམ་གཅིག་ཙམ་ལ་ནད་གཞི་དེ་ཕོག་ཟིན་ཡོད་པ་དང་། སྨན་ཁང་དེར་སྨན་པ་བཅུ་ཡོད་པ་རྣམས་ནས་ཉིན་རེར་སྨན་པ་གཅིག་གིས་ནད་པ་ ༡༠༠ ལས་ལྷག་པ་བཅོས་ཐབས་བྱེད་བཞིན་ཡོད་པའི་ཁོངས་ནས་མང་ཆེ་བ་འདས་གྲོངས་སུ་གྱུར་ཉེན་ཡོད་པ། དེ་བཞིན་སྨན་ཁང་ནང་ཉལ་ཁྲི་མ་འདང་བའི་ཁར་གཞུང་ཕྱོགས་ནས་མི་མང་ཚོར་སྨན་བཅོས་བྱེད་རྒྱུའི་ཁས་ལེན་གྱི་གསལ་བསྒྲགས་བྱས་ཡོད་སྟབས། ནད་པའི་ཉེ་འབྲེལ་རྣམས་ནས་ཡིན་གཅིག་མིན་གཅིག་སྨན་བཅོས་བྱེད་དགོས་པའི་ཨུ་ཚུགས་མཐར་སྐྱེལ་བྱེད་བཞིན་ཡོད་པ་དེ་ལྟར་ཡང་། གཞུང་གི་སྨན་ཁང་ལ་སྨན་བཅོས་ཀྱི་ཆ་རྐྱེན་སྐྲུན་མེད་པར་བརྟེན་སྨན་ཁང་ལ་ནད་པ་མང་པོ་བཞག་ནས་སྨན་བཅོས་བྱེད་རྒྱུའི་མཐུན་རྐྱེན་མེད་པ། ནད་པ་ཚོའི་ཞུ་གཏུག་དྲག་པོ་བྱས་ཡོད་ཀྱང་ཁོང་ཚོར་གང་ཡང་བྱེད་ཐབས་རྐྱེན་ནད་པ་མང་པོ་ཞིག་ཁོང་རྣམ་པའི་མིག་སྔར་འདས་གྲོངས་སུ་གྱུར་ཡོད་པ་སོགས་འགྲེལ་བརྗོད་གནང་བ་མ་ཟད། རང་ཉིད་ཀྱི་ཉེ་འབྲེལ་ཀུན་ནས་དེ་དོན་ཡིད་གཟབ་གནང་དགོས་པ་དང་། རྒྱ་གཞུང་གིས་བཤད་ཁག་ལ་ཡིད་ཆེས་རྩ་བ་ནས་གནང་རྒྱུ་མེད་སྐོར་སོགས་ཀྱང་གསུངས་འདུག དེ་བཞིན་ཁ་སང་ Asia གསར་ཁང་གིས་གནས་ཚུལ་སྤེལ་བར་ཕ་རན་སི་གསར་ཁང་ཞིག་གིས་ཝུ་ཧན་སྨན་ཁང་གི་སྨན་པ་ཞིག་ལ་བཅར་འདྲི་ཞུས་པ་ལུང་འདྲེན་གནང་འདུག་པ་དེའི་ནང་སྨན་པ་དེས་ད་ལྟའི་ཆར་ཉུང་མཐར་མི་གྲངས་ཁྲི་ ༩ ཙམ་ལ་ནད་གཞི་དེ་ཕོག་ཟིན་ཡོད་པ་གསུངས་འདུག ཝུ་ཧན་ནང་ནས་ཕྱིར་གྱར་བྱུང་བའི་བརྙན་ཐུང་མང་པོར་སྨན་ཁང་ནང་མི་གྲོངས་ཟིན་པའི་འགྲམ་དུ་ནད་པ་རྣམས་ཉལ་ཡོད་པ་སོགས་མངོན་རྒྱུ་ཡོད་པ་དང་འབྲེལ། ཁུལ་དེའི་སྨན་ཁང་དོ་དམ་པ་ཞིག་གིས་གཞུང་ནས་གང་ཡང་མི་བྱེད་པའི་གནས་སྟངས་འོག་སྨན་ཁང་དུ་སྨན་པ་དང་སྨན་ཞབས་པ་རྣམས་ཡི་ཐང་ཆད་དེ་འ་ཆད་འུ་ཐུག་གི་གནས་སུ་གྱུར་ཡོད་པར་གསུངས་འདུག དེའི་བར་ན་རྒྱ་ནག་གཞུང་གིས་ཉེ་ཆར་རྒྱལ་ཁབ་འགོས་ནད་འགོག་བཅོས་བཅའ་ཁྲིམས་ཞེས་པའི་འོག་ཝུ་ཧན་ནས་ཆེད་དུ་འཚབ་ཆེན་གྱི་ཏོག་དབྱིབས་ནད་ངན་འཁྱེར་ནས་ཕྱི་ཕྱོགས་ལ་ལྐོག་ཏུ་བྲོས་བྱོལ་འགྲོ་མཁན་ལ་ངོ་ ༧ གྱི་བཙོན་འཇུག་ཁྲིམས་ཆད་ཀྱི་བརྡ་ཁྱབ་བཏང་བ་དང་། བདུན་ཕྲག་སྔོན་མའི་ཕྱི་ཚེས་ ༢༣ ནས་ཝུ་ཧན་གྲོང་ཁྱེར་དེ་ཕྱི་ལ་སྒོ་མོ་བརྒྱབས་ཏེ་ནང་གི་མི་ཕྱི་ལ་མི་གཏོང་བ་དང་། ཕྱི་མི་ནང་དུ་མི་གཏོང་བ་སོགས་བྱེད་ཀྱི་ཡོད་སྐོར་བཤད་ཡོད་ཀྱང་། ཕྱི་ཚེས་ ༢༢ ནས་ཝུ་ཧན་གྲོང་ཁྱེར་ནས་ཕྱིར་བསྐྱོད་མཁན་གནམ་གྲུ་ཡོངས་རྫོགས་བཀག་སྡོམ་བྱས་ཡོད་སྐོར་བཤད་ཡོད་པ་རེད། འོན་ཏང་ཝུ་ཧན་ནས་བོད་དང་ཤིན་ཅང་དུ་བསྐྱོད་མཁན་གྱི་གནམ་གྲུ་རྣམས་དམ་དྲག་མེད་པར་རྒྱུན་ལྡན་བཞིན་གཏོང་མུས་ཡིན་པ་དང་འབྲེལ། བོད་ཀྱི་ས་ཁུལ་ཁག་ཏུ་དེ་སྔ་ནད་ཡམས་སླེེབས་མེད་ཅེས་བཤད་ཀྱང་མང་ཚོགས་རྣམས་དངངས་སྐྲག་ཆེན་པོ་གནང་དགོས་པའི་གནས་སྟངས་ཁྲོད། ཉེ་ཆར་བོད་དཀར་མཛེས་ཁུལ་དུ་རིམས་ནད་ཕོག་པའི་མི་གཉིས་ཡོད་པ་ཡོངས་གྲགས་ཆགས་ཡོད་པ་མ་ཟད་སྤྱི་ཚོགས་དྲྭ་ལམ་ཁག་གི་ཐོག་གནས་ཚུལ་ཐོན་ཁག་ལ་ཟི་ལིང་གྲོང་ཁྱེར་དུའང་ནད་གཞི་དེ་ཕོག་པའི་མི་གཉིས་གསུམ་ཞིག་བྱུང་ཡོད་པ་གསུངས་མཁན་འདུག རྒྱ་ནག་གཞུང་གིས་བཀོད་ཁྱབ་བཏང་བར་གཞིགས་ཁ་སང་ནས་ལྷ་ས་ནང་གི་ཕོ་བྲང་པོ་ཏ་ལ་དང་གཙུག་ལག་ཁང་སོགས་ཀྱིས་གཙོས་པའི་བོད་ཀྱི་ས་ཁུལ་གང་སར་དགོན་པ་མང་དག་ཅིག་དེ་རིང་ནས་སྒོ་བརྒྱབ་པ་དང་ཆོས་ཕྱོགས་ཀྱི་བྱེད་སྒོ་ཁག་ཡོངས་རྫོགས་སྤེལ་མཚམས་འཇོག་བཞིན་པའི་གནས་ཚུལ་ཐོན་ཡོད་པ་མ་ཟད། བོད་མདོ་སྨད་རྔ་བ་ཁུལ་གྱི་བསེ་དགོན་པ་དང་། སྒོ་མང་དགོན་པ། གཉན་རྩེ་དགོན་པ། དྷི་ཕུ་དགོན་པ། ཨ་འདུས་དགོན་པ། སྣང་ཞིག་དགོན་པ། རྩི་ནང་དགོན་པ། ཨ་མཆོག་མཚན་ཉིད་དགོན་པ། ཀིརྟི་དགོན་པ་བཅས་ཀྱིས་ཆོ་འཕྲུལ་སྨོན་ལམ་འཚོག་རྒྱུ་གནས་སྐབས་རིང་ཕྱིར་འགྱངས་བྱེད་རྒྱུ་ཡིན་པའི་བརྡ་ཁྱབ་བཏང་འདུག ད་ལྟའི་ཆར་བོད་ཀྱི་རྒྱལ་ས་ལྷ་སར་ཟ་ཁང་དང་མགྲོན་ཁང་ཡོངས་རྫོག་སྒོ་བརྒྱབས་ཡོད་པའི་གནས་ཚུལ་ཡང་འཐོན་བཞིན་འདུག་པ་ལྟར། རྣམ་ཀུན་ནས་བོད་ཀྱི་རྒྱལ་ས་ལྷ་སའི་བར་སྐོར་དུ་སྐོར་བསགས་སྡིག་སྒྲིབ་སྦྱོང་མཁན་དད་ལྡན་མང་ཚོགས་ཀྱིས་ཁེངས་ཀྱི་ཡོད་པ་དེའང་ད་ལྟའི་ཆར་མི་མེད་སྟོང་སང་གྱུར་ཡོད་པའི་བརྙན་པར་སོགས་ཀྱང་ཕྱིར་གྱར་བྱུང་ཡོད་པ་རེད། དེ་རིང་ NewYork གསར་ཁང་སོགས་རྒྱལ་སྤྱིའི་གསར་ཁང་ཁག་ཅིག་གིས་གནས་ཚུལ་སྤེལ་བར་ད་ལྟའི་ནད་ཡམས་ཀྱི་ཛ་དྲག་གནས་སྟངས་ཁྲོད་རྒྱ་ནག་གི་སྤྱི་ཚོགས་དྲྭ་ལམ་ཐོག་སྔར་བཞིན་དམ་དྲག་ཡོད་མུས་ལ་མ་བལྟོས་པར་དྲྭ་རྒྱ་སྤྱོད་མཁན་མི་རྣམས་ནས་ཐབས་ལམ་འདྲ་མིན་བརྒྱུད་དེ་རྒྱ་ནག་གཞུང་གི་བྱེད་ཕྱོགས་ཁྱོན་ཡོངས་ལ་སྐྱོན་བརྗོད་ཤུགས་ཆེ་བྱེད་བཞིན་འདུག་པ་དང་། ཁག་གཅིག་གིས་ཝུ་ཧན་གྲོང་ཁྱེར་སྤྱི་ཁྱབ་ལས་གནས་ནས་དགོངས་ཞུ་དགོས་པའི་དགོས་འདུན་ཆེད་འདོན་གནང་བ་མ་ཟད་ལ་ལས་གཞུང་ལ་ཐད་དཀར་སྐྱོན་བརྗོད་དང་དེ་བཞིན་རྒྱ་གཞུང་གིས་དམ་དྲག་དང་ལྟ་སྲུང་ན་པོ་བྱེད་མུས་ལ་འཛེམ་ཟོན་མེད་པར་ཞི་ཅིན་ཕིང་གི་ཚབ་ཏུ་ཌོ་ནལ་ཊམ་ཞེས་འབོད་ནས་སྐྱོན་འཛུག་བྱས་འདུག་པ་དང་། ནད་ཡམས་ཀྱི་ཚབ་ཏུ་ཨུ་རུ་སུ་ནང་གི་ Chernobyl དོན་རྐྱེན་གྱི་ཚིག་བརྗོད་སྦྱར་ཏེ་ནད་ཡམས་ཀྱི་ཛ་དྲག་རང་བཞིན་དང་གཞུང་ལ་སྐྱོན་བརྗོད་སོགས་གླེང་སློང་གནང་བཞིན་འདུག དེའི་ཁྲོད་སྤྱི་ཚོགས་དྲྭ་ལམ་ཁག་གི་ཐོག་གནས་ཚུལ་ཐོན་ཁག་ལ་གཞིགས་ཚེ་རྒྱ་གཞུང་གི་དྲྭ་རྒྱའི་ཐོག་ཝུ་ཧན་ནད་ཡམས་སྐོར་ལ་གནས་ཚུལ་སྤེལ་བ་དང་འབྲེལ་ཏེ་མི་ཁག་གཅིག་འཛིན་བཟུང་བྱས་ཡོད་པའང་ཡང་གསུང་མཁན་འདུག