Tibetan Royal Year of 2151 | Year of the Wood Dragon

རྒྱ་ནག

བལ་ཡུལ་གཞུང་ནས་རྒྱ་ནག་དང་ལྷན་དུ་ཉེས་ཅན་རྩིས་སྤྲོད་གནང་རྒྱུའི་གྲོས་ཆོད་མ་བཞག་རོགས།

རྒྱ་ནག་གི་སྲིད་འཛིན་ཞི་ཅིན་ཕིང་བལ་ཡལ་ནང་གཞུང་འབྲེལ་འཚམས་གཟིགས་སུ་འབྱོར་ཉེ་དང་བསྟུན་བརྒྱུད་ལམ་ཁག་ཏུ་བལ་ཡུལ་དང་རྒྱ་ནག་གཉིས་དབར་ཕན་ཚུན་དོགས་གཞི་ཡོད་པའི་མི་སྣ་རྩིད་སྤྲོད་བྱ་རྒྱུའི་  extradition treaty ཞེས་ཉེས་ཅན་རྩིས་སྤྲོད་བྱ་རྒྱུའི་གྲོས་ཆོད་ཅིག་བཞག་སྲིད་པར་ཚོད་དཔག་གནང་མཁན་འབྱུང་བཞིན་ཡོད་པ་ལྟར། བོད་མིའི་སྒྲིག་འཛུགས་ཀྱི་མགྲིན་ཚབ་པ་ཕྱི་དྲིལ་དྲུང་ཆེ་དྭགས་པོ་བསོད་ནམས་ནོར་བུ་ལགས་སུ་དེ་འབྲེལ་བཀའ་འདྲི་ཁག་གཅིག་ཞུས་པར་རྒྱ་ནག་དང་བལ་ཡུལ་དབར་ཉེས་ཅན་རྩིས་སྤྲོད་བྱ་རྒྱུའི་གྲོས་ཆོད་བཞག་པ་ཡིན་ཚེ་བལ་ཡུལ་ནང་ཡོད་པའི་བོད་མི་སྤྱི་དང་ལྷག་པར་དུ་ཁྲིམས་མཐུན་གྱི་ཡིག་ཆ་མེད་པར་བལ་ཡུལ་ནང་བཞུགས་བཞིན་པའི་བོད་མི་ཚོར་ངལ་བ་ཆེས་འཕྲད་ངེས་ཡིན་པ་འགྲེལ་བརྗོད་གནང་བ་དང་ཆབས་ཅིག་ཏུ་བལ་ཡུལ་གཞུང་ནས་རྒྱ་ནག་དང་ལྷན་དུ་གྲོད་ཆོས་དེ་འདྲ་མ་བཞག་རོགས་གནང་ཞེས་འབོད་སྐུལ་གནང་སོང་།   བལ་ཡུལ་གཞུང་ནས་ཡུལ་དེའི་ས་གནས་གང་སར་ཉེན་རྟོག་མི་སྣ་དང་གསང་བའི་མི་སྣ་གང་མང་འགྲེམས་འཇོག་གིས་བཙན་བྱོལ་བོད་མིའི་ཐོག་སྔར་ལྷག་དམ་དྲག་བྱེད་བཞིན་པ་མ་ཟད་དེ་སྔ་ས་གནས་སུ་ངོ་རྒོལ་སྐད་འབོད་སོགས་ཀྱི་ལས་འགུལ་ནང་ཞུགས་མྱོང་ཡོད་མཁན་གཙོས་པའི་བོད་མི་ཁག་གཅིག་ལ་དོགས་ཟོན་གྱིས་འདྲི་རྩད་བྱས་པའི་གནས་སྟངས་སོགས་བྱུང་འདུག བལ་ཡུལ་བོད་མིའི་སྤྱི་ཁྱབ་འབྲེལ་མཐུད་པ་ཚུལ་ཁྲིམས་རྒྱ་མཚོ་ལགས་སུ་བཅར་འདྲི་ཞུས་པར་ད་ལྟའི་ཆར་བལ་ཡུལ་ཁྱོན་ཡོངས་སུ་ལྟ་སྲུང་སླད་དམག་མི་ལྔ་སྟོང་ལྷག་འགྲེམས་འཇོག་བྱས་ཡོད་པ་དང་། འདས་པའི་ཉིན་ཤས་ཁྲོད་དུ་བོད་མི་ཁག་གཅིག་ལ་འདྲི་རྩད་སོགས་བྱས་ཡོད་ཀྱང་ད་ལྟའི་ཆར་འཛིན་བཟུང་བཀག་ཉར་བྱས་པ་དངོས་སུ་ཤེས་རྟོགས་ཐུབ་མེད་ཀྱང་། བལ་ཡུལ་གྱི་ས་གནས་སྤྱི་དང་ལྷག་པར་དུ་ས་མཚམས་ཁུལ་དུ་དམ་དྲག་ཤུགས་ཆེ་བྱེད་བཞིན་པ་གསུངས་སོང་།  རྩ་བའི་རྒྱ་ནག་གི་སྲིད་འཛིན་ཞི་ཅིན་ཕིང་སང་ཉིན་ནས་རྒྱ་གར་ནང་གི་འཚམས་གཟིགས་གྲུབ་མཚམས་སུ་ཕྱི་ཚེས་ ༡༣ ནས་ཉིན་གྲགས་གཉིས་རིང་བལ་ཡུལ་ནང་འཚམས་གཟིགས་བྱ་གཏན་འཁེལ་བ་དང་བསྟུན་བལ་ཡུལ་ནང་གི་བོད་མི་ཚོར་དམ་དྲག་བྱས་པ་ཙམ་མ་ཟད་རྒྱ་གར་ནས་བལ་ཡུལ་ནང་གཉེན་འཕྲད་དང་གནས་སྐོར་ཆེད་འགྲོ་མཁན་བོད་མི་ཁག་གཅིག་བལ་ཡུལ་ས་མཚམས་ནས་ཕྱིར་སློག་བྱས་པའི་གནས་སྟངས་ཡང་བྱུང་ཡོད་པ་རེད། དེའི་སྐོར་ཉེ་འཆར་ཕྱི་ཚེས་ ༦ ཉིན་རྒྱ་གར་ནས་བལ་ཡུལ་དུ་གཉེན་འཕྲད་དང་གནས་སྐོར་ལ་ཕེབས་སྐབས་ས་མཚམས་ནས་ཕྱིར་སློག་བྱས་པ་བསྟན་འཛིན་རབ་བརྟན་ལགས་ཀྱིས་འདི་ག་རླུང་འཕྲིན་ཁང་ལ་ས་མཚམས་སུ་བལ་པོའི་ཉེན་རྟོག་པས་བཀག་སྡོམ་དང་ཕྱིར་སློག་ཇི་ལྟར་བྱས་སྐོར་འགྲེལ་བརྗོད་གནང་སོང་། གཞི་རྩའི་རྒྱ་ནག་གཞུང་གི་གནོན་ཤུགས་འོག་བལ་ཡུལ་གཞུང་ནས་ཁུལ་དེར་༸གོང་ས་མཆོག་གི་༸སྐུའི་འཁྲུངས་སྐར་དུས་ཆེན་དང་བོད་མིའི་གསུམ་བཅུའི་དུས་དྲན་གཙོས་པའི་བོད་དོན་དང་འབྲེལ་བའི་མཛད་སྒོ་ཁག་སྲུང་བརྩི་ཞུ་རྒྱུར་དམ་དྲག་དང་། བོད་ནས་གསར་དུ་འབྱོར་བའི་བོད་མི་མི་ཉུང་བ་ཞིག་འཛིན་བཟུང་དང་ཕྱིར་སློག་བྱས་པ་སོགས་ཀྱི་གནས་ཚུལ་མི་ཉུང་བ་ཞིག་འཐོན་བཞིན་ཡོད་པ་མ་ཟད། ཡུལ་དེའི་ཆབ་སྲིད་ཚོགས་པའི་འཐུས་མི་ཁག་གཅིག་བོད་དོན་དང་འབྲེལ་བའི་ཚོགས་འདུ་སོགས་ཀྱི་ཐོག་མཉམ་ཞུགས་གནང་རྐྱེན་ལས་གནད་ནས་གནས་དབྱུང་བཏང་པ་སོགས་ཀྱི་གནས་སྟངས་བྱུང་ཡོད།

བོད་ཕྲུག་རྣམས་ཡིག་རྒྱུགས་ཁྲོད་འཛིན་བཟུང་བྱས་པར་བློ་འཚབ་གནང་བཞིན་པ།

རྒྱ་གར་ལྷོ་ཕྱོགས་ནས་ཞི་ཅིན་ཕིང་ལ་ངོ་རྒོལ་བྱ་སྲིད་པའི་དོགས་གཞིའི་འོག་བོད་མི་ལས་འགུལ་བ་དང་སློབ་ཕྲུག་བཅས་ཁྱོན་མི་ ༩ འཛིན་བཟུང་བྱས་ཏེ་བཙོན་འཇུག་ཐོག་ཁ་སང་སླར་ཅ་ནཡི་ནང་གི་བོད་རིགས་གཙུག་ལག་སློབ་དཔོན་ཞིག་འཛིན་བཟུང་བྱས་པ་མ་ཟད་ཁུལ་དེའི་བོད་རིགས་སློབ་མ་ ༢༥ ཡིག་རྒྱུགས་ཁྲོད་བཙན་འཁྲིད་བྱས་པའི་གནས་ཚུལ་ཐོན་པར་བློ་འཚབ་ཆེན་པོ་གནང་བཞིན་འདུག རྒྱ་གར་གྱི་བརྒྱུད་ལམ་ཁག་ཏུ་གནས་ཚུལ་ཐོན་པར་རྒྱ་ནག་གི་སྲིད་འཛིན་ཞི་ཅིན་ཕིང་བདུན་ཕྲག་འདིའི་རེས་གཟའ་པ་སངས་ནས་ཉིན་གྲངས་གསུམ་གྱི་རིང་རྒྱ་གར་གྱི་ལྷོ་ཕྱོགས་མངའ་སྡེ་ Tamil Nadu ནང་རྒྱ་གར་གྱི་སྲིད་བློན་མོ་དཱི་མཆོག་དང་ལྷན་ནང་མོལ་ལྷན་འཛོམས་ཆེད་ཡོང་གི་ཡོད་སྟབས། ཞི་ཅིན་ཕིང་ལ་ངོ་རྒོལ་གནང་སྲིད་པའི་དོགས་གཞིའི་འོག་ཏུ་རྒྱ་གར་གཞུང་གི་ཉེན་རྟོག་པས་འདས་པའི་ཉིན་ཤས་ནང་བོད་མི་དགུ་འཛིན་བཟུང་གིས་བཀག་བསྐྱིལ་བྱས་ཡོད་པའི་ཁྲོད་ཁ་སང་ས་གནས་ཉེན་རྟོག་པས་ཅ་ནཡི་ནང་གི་ Hindustan གཙུག་ལག་སློབ་གཉེར་ཁང་དུ་སློབ་དཔོན་ཕྱག་རོགས་ཀྱི་ཕྱག་ལས་གནང་བཞིན་པ་བསྟན་འཛིན་ནོར་བུ་ལགས་ནས་བོད་རིགས་སློབ་མ་ཁག་གཅིག་ལྷན་དུ་ཞི་ཅིན་ཕིང་ལ་དར་ཆ་ནག་པོའི་ངོ་རྒོལ་ལས་འགུལ་ཞིག་སྤེལ་འཆར་ཡོད་པར་དོགས་གཞིའི་གནང་སྟེ་འཛིན་བཟུང་བྱས་ཏེ་བཀག་ཉར་ཁང་ཞིག་ཏུ་བཏང་ཡོད་རེད་འདུག ཁ་སང་ཞོགས་པ་སླར་ས་གནས་ཉེན་རྟོག་པས་ཅ་ནཡི་གྲོང་ཁྱེར་ནང་སློབ་གཉེར་བྱེད་བཞིན་པའི་བོད་ཕྲུག་ཚོའི་སྡོད་ཁང་དུ་སྐྱོད་དེ་ཁོང་རྣམ་ཐོག་མར་ངོ་རྟགས་ཆོད་ཕྱིར་ཡིན་སྐོར་བརྗོད་ནས་ Selaiyur ཉེན་རྟོག་ཁང་དུ་འཁྲིད་ཡོད་ཀྱང་། ཕྱིས་སུ་རིམ་པས་ཁོང་ཚོའི་ཁ་པར་ཨང་གྲངས་སོགས་ཐོ་འགོད་བྱེད་བཅུག་ཏེ་ཞི་ཅིན་ཕིང་སླེབས་པའི་སྐབས་ངོ་རྒོལ་གྱི་ལས་འགུལ་རིགས་སྤེལ་རྒྱུ་མིན་པའི་ཁས་ལེན་གྱི་ཡིག་ཆར་མིང་རྟགས་བཀོད་བཅུག་འདུག ཤེས་རྟོགས་བྱུང་བར་གཞིགས་ན། ད་ལན་ཅི་ནཡི་ས་གནས་ཉེན་རྟོག་པས་འདས་པའི་ཉིན་ཤས་ནང་བོད་མི་འཛིན་བཟུང་བཀག་སྐྱིལ་བྱས་པའི་ཁོངས་ནས་ཕལ་ཆེ་བ་སློབ་ཕྲུག་ཆགས་ཀྱི་ཡོད་པ་དང་ལྷག་དོན་དེ་རིང་ནས་ཉིན་གྲངས་གསུམ་རིང་མ་རྡ་ར་སི་མཐོ་སློབ་ཁགགི་རྒྱུགས་སྤྲོད་འཁེལ་གྱི་ཡོད་སྟབས། སློབ་ཕྲུག་རྣམས་ཡིག་རྒྱུགས་ཁྲོད་སེམས་འཚབ་ཆེན་པོའི་ངང་གནས་བཞིན་འདུག འདི་ག་རླུང་འཕྲིན་ཁང་ནས་བོད་རང་བཙན་སློབ་ཕྲུག་ཚོགས་པའི་ལས་འཆར་འགན་འཛིན་བསྟན་འཛིན་གྲགས་པ་ལགས་སུ་བཅར་འདྲི་ཞུས་པར་དབུས་བོད་ཀྱི་གཞོན་ནུ་ལྷན་ཚོགས་དང་བོད་རང་བཙན་སློབ་ཕྲུག་ཚོགས་པའི་ངོས་ནས་ལྡི་ལི་ནས་ཁྲིམས་རྩོད་པ་ཞིག་མངགས་གཏོང་གིས་སློབ་ཕྲུག་གཙོ་བོར་གྱུར་པའི་བོད་མི་དེ་དག་བཙོན་གྲོལ་ཐོབ་ཐབས་སུ་ཞུ་གཏུག་གནང་བཞིན་ཡོད་སྐོར་གསུངས་སོང་། ཁོང་རྣམས་འཛིན་བཟུང་བཀག་བསྐྱིལ་བྱས་ནས་ད་ལྟའི་ཆར་ཚོུད་ ༤༨ ལྷག་འགྲོ་ཡོད་ཀྱང་ས་གནས་ཉེན་རྟོག་པས་ཁོང་རྣམས་ཀྱི་ཁྲིམས་རྩོད་པ་དང་ཐུག་འཕྲད་གནང་བར་མུ་མཐུད་བཀག་སྡོམ་བྱེད་བཞིན་པའི་ཁྲོད་ཁོང་རྣམས་ཀྱི་གནས་སྟངས་ཇི་ཆགས་སོགས་ཞིབ་ཕྲའི་གནས་ཚུལ་གང་ཡང་ཤེས་རྟོགས་མེད་པར་གྱུར་འདུག འོན་ཀྱང་དེ་རིང་འཛིན་འཛིན་ཆོས་སྒྲོན་ལགས་ཀྱིས་ཁོང་གི་ཨ་མ་ལགས་ལ་ཁོང་རྣམས་ད་ཆ་ཅ་ནཡི་དབུས་བཙོན་ཁང་ནས་བཙོན་ཁང་གཞན་ཞིག་ཏུ་གནས་སྤོས་བྱ་འཆར་ཡོད་སྐོར་ཞུས་འདུག རྒྱ་གར་གཞུང་གི་ཉེན་རྟོག་པས་ལྷོ་ཕྱོགས་ནས་ཁྱོན་བོད་མི་བཅུ་འཛིན་བཟུང་གིས་བཀག་བསྐྱིལ་བྱས་པའི་གནས་ཚུལ་ཁག་བརྒྱུད་ལམ་ཁག་ཏུ་ཐོན་སྟབས་བོད་མི་དང་བོད་དོན་རྒྱབ་སྐྱོར་བ་རྣམས་ཀྱིས་སྤྱི་ཚོགས་དྲྭ་ལམ་ཐོག་རྒྱ་གར་གཞུང་གི་བྱེད་སྟངས་དེར་སྐྱོན་བརྗོད་དང་བློ་ཕམ་གྱི་རྣམ་པ་ཤུགས་ཆེ་བསྟན་ཡོད་པ་མ་ཟད། ཁག་གཅིག་གིས་རྒྱ་གར་དེ་མང་གཙོའི་རྒྱལ་ཁབ་ཅིག་ཡིན་པས་རྒྱ་གཞུང་གི་གནོན་ཤུགས་འོག་མགོ་སྒུར་བར་ངོས་འཛིན་ཞུ་བཞིན་ཡོད་པ་དང་། རྒྱ་གར་དབུས་གཞུང་ནས་དེ་ལྟར་གནང་རྒྱུ་མེད་པའི་ཞུ་སྐུལ་གནང་མཁན་ཡང་བྱུང་འདུག

ཨ་རིས་ཤིན་ཅང་གི་གནད་དོན་དང་ངན་པ་ལག་སྦྲེལ་ཡོད་པའི་རྒྱ་གཞུང་མི་སྣར་མཐོང་མཆན་གནང་རྒྱུ་རེད་མི་འདུག

ཁ་སང་ཕྱི་ཟླ་ ༩ ཚེས་ ༨ ཉིན་ཨ་རིའི་སྲིད་གཞུང་གིས་ཤིན་ཅང་གི་ཡུ་གུར་མི་རིགས་གཙོས་གཞན་ཁ་ཆེའི་གྲངས་ཉུང་མི་རིགས་ཁྲི་ཚོ་མང་པོ་བཙོན་འཇུག་མནར་གཅོད་བཏང་ནས་འགྲོ་བ་མིའི་ཐོབ་ཐང་ལ་བརྡལ་བཤིག་གཏོང་བའི་བྱ་སྤྱོད་དང་ངན་པ་ལག་སྦྲེལ་ཡོད་པའི་རྒྱ་ནག་གཞུང་འབྲེལ་མི་སྣ་རྣམས་ཨ་རིའི་ནང་འགྲུལ་སྐྱོད་ཆོག་པའི་མཐོང་མཆན་གནང་རྒྱུ་མིན་པའི་བསྒྲགས་གཏམ་སྤེལ་འདུག ཨ་རི་ New York ནང་རྟེན་གཞི་བྱས་པའི་ Bloomberg ཞེས་པའི་དྲྭ་རྒྱ་གཙོས་དྲྭ་རྒྱ་ཁག་ཅིག་གི་ཐོག་ཏུ་གནས་ཚུལ་སྤེལ་བར་ཨ་རིའི་ཚོང་ལས་སྡེ་ཚན་གྱིས་རྒྱ་ནག་གི་འཕྲུལ་ལས་བཟོ་གྲྭ་དང་ཚོགས་པ་ཁག་ ༢༨ མིང་ཐོ་ནག་པོའི་ནང་དུ་བཅུག་ནས་ཚོགས་པ་དེ་དག་གིས་ཨ་རི་ནས་ཅ་དངོས་རིགས་ཉོ་ཚོང་དང་མཉམ་ལས་རིགས་བྱ་རྒྱུ་མེད་པ་བཟོ་རྒྱུའི་གསལ་བསྒྲགས་སྤེལ་ནས་ཉིན་གཅིག་གི་རྗེས་སུ་ཨ་རིའི་ཕྱི་སྲིད་དྲུང་ཆེ་སྐུ་ཞབས་ Michael Pompeo ལགས་ཀྱིས་ the stain of the century ཞེས་དུས་རབས་ཀྱི་དྲི་ནོག་ཅན་ཞེས་བརྗོད་དེ་ཤིན་ཅང་གི་ཡུ་གུར་མི་རིགས་གཙོས་ཁཱ་ཛཱ་ཁི་སི་དང་། གཞན་ཁ་ཆེའི་གྲངས་ཉུང་མི་རིགས་རྣམས་ལ་ཚད་འདས་རང་བཞིན་གྱི་དྲག་གནོན་དང་མི་གྲངས་ཁྲི་ཕྲག་མང་པོ་བཙོན་འཇུག་མནར་གཅོད་བཏང་ནས་འགྲོ་བ་མིའི་ཐོབ་ཐང་ལ་རྡོག་རོལ་གཏོང་བའི་བྱ་སྤྱོད་དང་ངན་པ་ལག་སྦྲེལ་ཡོད་མཁན་གྱི་རྒྱ་ནག་གཞུང་གི་འགོ་ཁྲིད་དང་རྒྱ་ནག་དམར་ཤོག་ཚོགས་པའི་གཞུང་འབྲེལ་མི་སྣ་རྣམས་ལ་ཨ་རིར་འགྲུལ་སྐྱོད་ཆོག་པའི་མཐོང་མཆན་གནང་རྒྱུ་མིན་པ་མ་ཟད། རྒྱ་ནག་གཞུང་གི་དཔོན་རིགས་དེ་དག་གི་ནང་མི་རྣམས་ལའང་མཐོང་དེ་བཞིན་དམ་དྲག་གནང་རྒྱུ་ཡིན་པ་གསུངས་འདུག ད་དུང་བརྒྱུད་ལམ་དེའི་ཐོག་རྒྱ་ནག་གཞུང་གི་དཔོན་རིགས་ཚོར་མཐོང་མཆན་གནང་རྒྱུ་མིན་པའི་ཐག་གཅོད་དེ་ནི་ Immigration and Nationality Act ཞེས་པའི་ཁྲིམས་གཞི་དེའི་འོག་ནས་བཀའ་འཁྲོལ་བྱུང་བ་ཞིག་དང་ཨ་རིའི་ཕྱི་འབྲེལ་སྲིད་བྱུས་ལ་དོ་ཕོག་གཏོང་མཁན་གྱི་གང་ཟག་སུ་འདྲ་ཞིག་ལ་མཐོང་མཆན་གནང་མི་ཆོག་པའི་ཐག་གཅོད་གནང་རྒྱུའི་དབང་ཚད་དེ་ཕྱི་དྲིལ་དྲུང་ཆེ་ལ་དབང་བ་ཞིག་ཡིན་པ་མ་ཟད། རྒྱ་ནག་གཞུང་ཀྱི་ཚོང་འབྲེལ་འཐུས་ཚབ་མི་སྣ་ཁག་གཅིག་ཨ་རིའི་ནང་སང་ཚོང་འབྲེལ་གྱི་གྲོས་མོལ་ཆེད་སླེབས་ལ་ཉེ་བའི་ཚོར་བ་རྣོ་བའི་དུས་ཚིགས་ཤིག་དང་སྟབས་ཁེལ་ཡོད་པ་རེད། རྒྱ་ནག་གཞུང་གིས་ཤིན་ཅང་གི་ཡུ་གུར་མི་རིགས་གཙོས་ཁཱ་ཛཱ་ཁི་སི་དང་ཁ་ཆེའི་གྲངས་ཉུང་མི་རིགས་རྣམས་ལ་མནར་གཅོད་ཚད་མེད་བཏང་དང་གཏོང་བཞིན་པ་དང་འབྲེལ། སྐུ་ཞབས་ Pompeo ལགས་ཀྱིས་བསྒྲགས་གཏམ་ནང་རྒྱ་ནག་གཞུང་གིས་དྲག་གནོན་དེ་འཕྲལ་དུ་མཚམས་འཇོག་དགོས་པ་དང་། འགྲོ་བ་མིའི་ཐོབ་ཐང་སྲུང་སྐྱོབ་བྱ་རྒྱུ་ནི་གལ་གནད་ཆེ་བ་ཞིག་དང་། རྒྱལ་ཁབ་ཚང་མའི་ངོས་ནས་ངེས་པར་དུ་ འགྲོ་བ་མིའི་ཐོབ་ཐང་དང་འབྲེལ་བའི་དམ་བཅའ་ལ་གུས་བརྩི་ཞུ་དགོས་པ་གསུངས་འདུག དེ་བཞིན་ཨ་རིའི་གཞུང་ནས་བསྒྲགས་གཏམ་དེ་སྤེལ་ཟིན་རྗེས་ཨ་རིར་རྟེན་གཞི་བྱས་པའི་རྒྱ་ནག་གཞུང་ཚབ་ཁང་གིས་འཕྲུལ་བྱའི་དྲྭ་ལམ་བརྒྱུད་ཨ་རིའི་གཞུང་ནས་གཞི་རྩའི་འགྲོ་བ་མིའི་ཐོབ་ཐང་ལ་ཁ་གཡར་ནས་རྒྱ་ནག་གི་འཕྲུལ་ལས་བཟོ་གྲྭ་དང་ཚོགས་པ་ཁག་ཅིག་མིང་ཐོ་ནག་པོའི་ནང་དུ་བཅུག་པའི་ཕྱི་ཉིན་དེར་རྒྱ་ནག་གི་གཞུང་འབྲེལ་མི་སྣ་ལ་མཐོང་མཆན་གནང་རྒྱུ་མིན་ཟེར་བ་ནི་རྒྱལ་སྤྱིའི་ཁྲོད་ཕྱི་འབྲེལ་སྲིད་བྱུས་ཀྱི་འབྲུ་དོན་དང་མཐའ་གཅིག་ཏུ་འགལ་བ་ཞིག་ཡིན་པ་དང་། ཤིན་ཅང་ནང་གི་གནད་དོན་ནི་རྒྱ་ནག་ནང་ཁུལ་གྱི་གནད་དོན་ཞིག་ཡིན་པ་ལས་དེར་ཕྱིའི་རྒྱལ་ཁབ་ཀྱི་ཐད་བྱུས་བྱེད་ཆོག་གི་མེད་པ་མ་ཟད། ཨ་རིའི་གཞུང་ནས་ནོར་འཁྲུལ་དེ་ཁས་བླངས་ཐོག་ནོར་འཁྲུལ་ཡོ་བསྲང་དགོས་སྐོར་རྒོལ་ལན་བྱས་འདུག གཞི་རྩའི་རེས་གཟའ་ཟླ་བའི་ཉིན་ཨ་རིའི་ཚོང་ལས་སྡེ་ཚན་གྱིས་རྒྱ་ནག་གི་འཕྲུལ་ལས་བཟོ་གྲྭ་དང་ཚོགས་པ་ཁག་ ༢༨ མིང་ཐོ་ནག་པོར་བཅུག་དོན་ནི་ཚོང་ལས་ཁང་དེ་དག་གིས་རྒྱ་ནག་གཞུང་ལ་མཉམ་འབྲེལ་བྱས་ནས་ཤིན་ཅང་གི་ཡུ་གུར་མི་རིགས་གཙོས་ཁ་ཆེའི་གྲངས་ཉུང་མི་རིགས་ལ་དྲག་གནོན་དང་འཛིན་བཟུང་འགྲོ་བ་མིའི་ཐོབ་ཐང་ལ་རྡོག་རོལ་ཚབས་ཆེན་བཏང་དང་གཏོང་བཞིན་རྐྱེན་ཡིན་པ་རེད།

ཧོང་ཀོང་གི་ལས་འགུལ་ལ་རྒྱབ་སྐྱོར་བྱས་རྐྱེན་རྒྱ་ནག་ནང་གྲགས་ཅན་NBAསིལ་སྤོལ་འགྲན་བསྡུར་རྒྱང་བསྲིང་བྱ་རྒྱུ་ཕྱིར་འཐེན།

NBA ཞེས་པའི་བྱང་ཨ་མི་རི་ཀའི་རྒྱལ་ཡོངས་སིལ་སྦོལ་མཐུན་ཚོགས་ཀྱི་གཙོ་འཛིན་སྐུ་ཞབས་ Adam Silver ལགས་ཀྱིས་ Houston ནང་རྟེན་གཞི་བྱས་པའི་Rockets སིལ་སྤོལ་རུ་ཁག་གི་འགན་འཛིན་ངོས་ནས་ཧོང་ཀོང་གི་ངོ་རྒོལ་ལས་འགུལ་ལ་རྒྱབ་སྐྱོར་བྱས་པའི་གནད་དོན་དེ་ནི་ཁོང་གི་སྨྲ་བརྗོད་རང་དབང་ཞིག་ཡིང་པར་འགྲེལ་བརྗོད་གནང་རྗེས། རྒྱ་ནག་གི་གཞུང་འབྲེལ་CCTV བརྙན་འཕྲིན་ལས་ཁང་ནས་ NBA  འི་སྔོན་འགྲོའི་རྩེད་འགྲན་ཆ་ཚང་རྒྱ་ནག་ནང་རྒྱང་བསྲིང་བྱ་རྒྱུ་ཕྱིར་འཐེན་བྱས་འདུག དེའང་NBA འི་ཚོགས་མི་ཡིན་པའི་ Houston Rockets རུ་ཁག་གི་འགན་འཛིན་ Daryl Morey ལགས་ཀྱིས་བདུན་ཕྲག་སྔོན་མའི་རེས་གཟའ་པ་སངས་ཉིན་རང་ཉིད་ཀྱི་ Twitter དྲ་གནས་ཐོག་ཧོང་ཀོང་ལ་རྒྱབ་སྐྱོར་གྱི་མཚོན་རྟགས་ཤིག་བརྒྱུད་སྤེལ་གནང་རྗེས།  རྒྱ་རིགས་མི་སེར་མང་པོས་དེར་ངོ་རྒོལ་གནང་པའི་རྐྱེན་གྱིས། སྐུ་ཞབས་ Morey ལགས་ཀྱིས་ལམ་སང་མཚོན་རྟགས་དེ་ཕྱིར་འཐེན་བྱས་ཏེ་དེ་ནི་ཁོང་སྒེར་གྱི་ལངས་ཕྱོགས་ཤིག་ཡིན་པའི་གསལ་བཤད་གནང་བ་མ་ཟད། NBA མཐུན་ཚོགས་ནས་དེའི་རྗེས་སུ་སྐུ་ཞབས་ Morey ལགས་ཀྱི་གནང་སྟངས་དེས་རྒྱ་ནག་གི་མང་ཚོགས་ལ་ཕོག་ཐུག་ཆེན་པོ་བཏང་ཡོད་སྟབས་དེའི་ཐོག་བློ་འགྱོད་ཡོད་པར་འགྲེལ་བརྗོད་གནང་ཡོད་པ་རེད། འོན་ཀྱང་རེས་གཟའ་ཟླ་བའི་ཉིན་ NBA མཐུན་ཚོགས་ཀྱི་གཙོ་འཛིན་སྐུ་ཞབས་ Adam Silver ལགས་ཀྱིས་ཉི་ཧོང་གི་ Kyodo གསར་ཁང་གི་བཅར་འདྲིར་དྭངས་ལེན་གནང་སྐབས། མཐུན་ཚོགས་དེའི་ངོས་ནས་Daryl Morey ལགས་ཀྱི་སྨྲ་བརྗོད་རང་དབང་ལ་གུས་བརྩི་ཞུ་བཞིན་ཡོད་པར་འགྲེལ་བརྗོད་གནང་བ་མ་ཟད། རེས་གཟའ་མིག་དམར་ཉིན་སླར་ཡང་སྤྱི་སྒྲགས་ཤིག་སྤེལ་བའི་ནང། NBA མཐུན་ཚོགས་ངོས་ནས་དེ་གའི་ཚོགས་མི་རྣམ་པའི་ཆབ་སྲིད་ཀྱི་ལངས་ཕྱོགས་ལ་གུས་བརྩི་ཞུ་བཞིན་པ་དང་། སྤྱིར་ཨ་རི་དང་རྒྱ་ནག་གཙོས་པའི་རྒྱལ་སྤྱིའི་མང་ཚོགས་སུ་འདྲ་ཞིག་ཡིན་རུང་གནད་དོན་འདྲ་མིན་ཐོག་བསམ་ཚུལ་འདྲ་མིན་ཡོད་པ་དེ་ཆོས་ཉིད་ཡིན་པ་བཞིན། མཐུན་ཚོགས་ངོས་ནས་དེ་གའི་རྩེད་འགྲན་པ་དང་ལས་བྱེད། དེ་བཞིན་རུ་ཁག་གི་སྦྱིན་བདག་སོགས་ཀྱི་སྨྲ་བརྗོད་རང་དབང་ལ་སྟངས་འཛིན་བྱེད་ཐུབ་ཐབས་མེད་སྐོར་འགྲེལ་བརྗོད་གནང་འདུག སྐུ་ཞབས་ Silver ལགས་ཀྱིས་བཀའ་མོལ་དེ་ལྟར་གནང་མ་ཐག    རྒྱ་ནག་གི་གཞུང་འབྲེལ་CCTV བརྙན་འཕྲིན་ལས་ཁང་དང་ tencent sports ཞེས་དྲ་རྒྱ་བརྒྱུད་རྩེད་འགྲན་ཐད་གཏོང་བྱེད་མཁན་ཚོང་ལས་ཁང་གིས་རྒྱ་ནག་ནང་ནས་རྩེད་འགྲན་དེ་རྒྱང་བསྲིངས་བྱ་རྒྱུ་ཕྱིར་འཐེན་བྱེད་རྒྱུ་གཏན་འཁེལ་ཡོད་སྐོར་བརྗོད་པ་མ་ཟད། CCTV བརྙན་འཕྲིན་ལས་ཁང་གིས། རྒྱལ་ཁབ་ཅིག་གི་ས་ཁོངས་བདག་དབང་དང་སྤྱི་ཚོགས་བརྟན་བརླིང་ལ་ཁ་གཏད་གདོང་ལེན་བྱས་པའི་གཏམ་བཤད་འདི་ལྟ་བུ་ནི་སྨྲ་བརྗོད་རང་དབང་གི་ཁྱབ་ཁོངས་སུ་རྩ་བ་ནས་གཏོགས་ཀྱི་མེད་པར་བརྗོད་དེ་སྐུ་ཞབས་ Silver ལགས་ཀྱི་བཀའ་མོལ་ལ་མཐའ་གཅིག་ཏུ་ངོ་རྒོལ་བྱས་འདུག གཞི་རྩའི་རྒྱ་ནག་ནང་དུ་སིལ་སྤོལ་རྩེད་འགྲན་ལ་དོ་དབྱིངས་ཧ་ཅང་ཆེན་པོ་ཡོད་པ་མ་ཟད། སྔར་ལོ་གཅིག་པོའི་ནང་ tencent བརྒྱུད་ NBA འི་རྩེད་འགྲན་ལྟ་མཁན་ས་ཡ་ ༥༠༠་ ལྷག་བྱུང་ཡོད་པ་དང་། NBAམཐུན་ཚོགས་ངོས་ནས་འདི་ལོའི་ཕྱི་ཟླ་ ༦ པའི་ནང་ tencent ཚོང་ལས་ཁང་དང་ལྷན་དུས་ཡུན་ལོ་ལྔ་ཅན་དང་ཨ་སྒོར་ཐེར་འབུམ་གཅིག་དང་ཕྱེད་ཀ་ལྷག་གི་ཚོང་གི་གྲོས་མཐུན་བཞག་ཡོད་པ་རེད་འདུག ད་ལྟའི་ཆར་ NBAམཐུན་ཚོགས་ཀྱི་ངོས་ ནས་ CCTV བརྙན་འཕྲིན་ལས་ཁང་གི་ཐག་གཅོད་ཐོག་འགྲེལ་བརྗོད་གང་ཡང་གནང་མི་འདུག  

བསྟན་འཛིན་བཙོན་འགྲུས་ལགས་འཛིན་བཟུང་བྱས་ཏེ་ Puzhal བཙོན་ཁང་དུ་བཀག་བསྐྱིལ།

རིང་མིན་རྒྱ་ནག་གི་སྲིད་འཛིན་ཞི་ཅིན་ཕིང་རྒྱ་གར་ལྷོ་ཕྱོགས་མངའ་སྡེ་ Tamil Nadu ནང་གཞུང་འབྲེལ་ཕྱོགས་བསྐྱོད་དུ་འབྱོར་གྱི་ཡོད་པ་དང་བསྟུན་རྩོམ་པ་པོ་དང་བོད་རང་བཙན་ལས་འགུལ་བ་བསྟན་འཛིན་བརྩོན་འགྲུས་ལགས་མངའ་སྡེ་དེའི་གྲོང་ཁྱེར་ Villupuram ནས་འཛིན་བཟུང་གིས་བཀག་ཉར་བྱས་ཡོད་པ་མ་ཟད་ཞི་ཅིན་ཕིང་གི་ལྟ་སྐོར་མཇུག་སྒྲིལ་མ་ཟིན་བར་དུ་ཁོང་ཁུལ་དེར་བཀག་བསྐྱིལ་གནང་སྲིད་པ་རེད་འདུག བརྒྱུད་ལམ་ཁག་ཏུ་ཐོན་པའི་གནས་ཚུལ་སྤེལ་གསལ་ཟླ་ ༡༠ ཚེས་ ༡༡ ནས་ ༡༣ བར་རྒྱ་གར་གྱི་ལྷོ་ཕྱོགས་གྲོང་ཁྱེར་ Mamallapuram ནང་རྒྱ་གར་གྱི་སྲིད་བློན་ Narendra Modi དང་རྒྱ་ནག་གི་སྲིད་འཛིན་ Xi Jinping གཉིས་དབར་ Sino-Indo summit ཞེས་ལོ་རྒྱུས་ཀྱི་རང་བཞིན་ལྡན་པའི་ཆེས་མཐོའི་གྲོས་མོལ་ཚང་འཛོམས་བྱ་རྒྱུ་ཡིན་པ་ལྟར་ཁ་ཉིན་གཟའ་སྤེན་པ་ཉིན་མངའ་སྡེ་དེའི་གྲོང་ཁྱེར་ Villupuram ཉེན་རྟོག་ལས་ཁང་ལ་རྒྱ་གར་གྱི་ནང་སྲིད་ལས་ཁུངས་བརྒྱུད་བོད་རང་བཙན་ལས་འགུལ་བ་བསྟན་འཛིན་བརྩོན་འགྲུས་ལགས་རྒྱ་དཀར་ནག་གཉིས་ཀྱི་ཆེས་མཐོའི་ལྷན་ཚོགས་ཚོགས་ཡུལ་གྱི་ས་ཚིགས་ཏུ་རྒྱ་ནག་གི་སྲིད་འཛིན་ལ་ངོ་རྒོལ་གནང་སྲིད་པའི་ཉེན་བརྡ་འབྱོར་ཡོད་སྟབས་སྔོན་འགོག་གི་ཆེད་དུ་བརྩོན་འགྲུས་ལགས་ཁ་ཉིན་ Villupuram མངའ་སྡེའི་མགྲོན་ཁང་ཞིག་ནས་འཛིན་བཟུང་གིས་ Kottappuram ས་གནས་ཉེན་རྟོག་ལས་ཁུངས་སུ་བཀག་ཉར་བྱས་ཡོད་པ་མ་ཟད་ཁོང་ནས་གོང་ཞུས་མགྲོན་ཁང་དེའི་ནང་ཁང་པ་ཞིག་རག་ཐབས་གནང་བཞིན་པ་དེས་ས་གནས་བདེ་འཇགས་ཉེན་རྟོག་པར་དོགས་ཟོན་སློང་ཡོད་པར་འགྲེལ་བརྗོད་གནང་ཡོད་པ་རེད། Villupuram བདེ་འཇགས་ཉེན་རྟོག་པ་ཁག་གཅིག་གིས་བརྗོད་པར་གཞིགས་ན་བརྩོན་འགྲུས་ལགས་ནས་ད་རེས་སླར་ཡང་སྲིད་འཛིན་ཞི་ཅིན་ཕིང་གི་ལྟ་སྐོར་དེའི་སྐབས་བོད་རང་དབང་འཁོད་པའི་འཕྲེད་དར་ཆེན་པོ་ཞིག་འཕྱར་རྒྱུའི་འཆར་གཞི་ ཡོད་སྟབས་ཁོང་གློ་བུར་དུ་ས་གནས་དེ་ནས་འཛིན་བཟུང་བྱས་ནས་ཁ་སང་སྔ་ཐོག་ Chennai གྱི་ Puzhal བཙོན་ཁང་དུ་གནས་སྤོས་བྱས་འདུག གནད་དོན་དེའི་ཐད་བསྟན་འཛིན་བརྩོན་འགྲུས་ལགས་ཀྱི་གྲོགས་པོ་ Friends of Tibet ཞེས་བོད་ཀྱི་གྲོགས་པོ་ཚོགས་པའི་འགན་འཛིན་སྐུ་ཞབས་ Sethu Das ལགས་ཀྱིས་སྤྱི་ཚོགས་དྲྭ་གནས་ཐོག་བརྩོན་འགྲུས་ལགས་ཁ་ཉིན་རེས་གཟའ་སྤེན་པ་ནས་འཛིན་བཟུང་གིས་བཀག་ཉར་འོག་ཡོད་པ་དང་སྲིད་འཛིན་ཞི་ཅིན་ཕིང་གི་ལྟ་སྐོར་མཇུག་སྒྲིལ་མ་བྱས་བར་དུ་གློད་བཀྲོལ་ཐོབ་ཐབས་མེད་པའི་གནས་སྟངས་ཞིག་ཆགས་ཡོད་པ་རེད་འདུག གཞི་རྩའི་བསྟན་འཛིན་བརྩོན་འགྲུས་ལགས་དེ་སྔོན་ཕྱི་ལོ་ ༢༠༠༢ དང་ ༢༠༠༥ སོ་སོར་སྐབས་དེའི་རྒྱ་ནག་གི་སྲིད་བློན་རྒྱ་གར་གྱི་གྲོང་ཁྱེར་ Mumbai དང་སྦེང་ལོར་གཉིས་ནང་ལྟ་སྐོར་ལ་འབྱོར་སྐབས་ངོ་རྒོལ་གྱིས་འཕྲེད་དར་འཕྱར་བར་བརྟེན་འཛིན་བཟུང་བཀག་ཉར་བྱས་མྱོང་ཡོད་པ་མ་ཟད། ཕྱི་ལོ་ ༢༠༠༦ ལོར་རྒྱ་ནག་གི་སྲིད་འཛིན་ Hu Jintao རྒྱ་གར་ལ་ལྟ་སྐོར་དུ་འབྱོར་སྐབས་རྒྱ་གར་གྱི་བདེ་འཇགས་ཉེན་རྟོག་ལས་ཁུངས་ནས་བསྟན་འཛིན་བརྩོན་འགྲུས་ལགས་ཀྱི་འགྲུལ་བཞུད་བཀག་སྡོམ་གྱིས་ཁོང་དྷརྨ་ས་ལར་བཞུགས་དགོས་པའི་དམ་བསྒྲགས་གནང་ཡོད་པ་བཅས་ཁོང་གིས་འདས་པའི་ལོ་ཡུན་མང་པོར་རྒྱ་གར་ལྷོ་ཕྱོགས་སྦེང་ལོར་གྲོང་ཁྱེར་གྱི་ཁྲིམས་ཁང་དུ་དེ་འབྲེལ་གནད་དོན་གྱི་ཞུ་གཏུག་སླད་འགྲིམ་འགྲུལ་གནང་དགོས་བྱུང་ཡོད་པ་རེད།

༸གོང་ས་མཆོག་གིས་དམིགས་བསལ་ཚོགས་ཆེན་ཐེངས་གསུམ་པའི་ཚོགས་བཅར་བར་བཀའ་སློབ་བསྩལ་བ།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དམིགས་གསལ་ཚོགས་ཆེན་ཐེངས་གསུམ་པའི་ཚོགས་བཅར་བ་དང་སྲིད་ཞུ་ལས་བྱེད་རྣམས་ལ་དམིགས་བསལ་མཇལ་ཁ་བསྩལ་བ་དང་སྦྲགས། བོད་མི་བཙན་བྱོལ་བ་ཚོས་ལོ་རྒྱུས་ལྡན་པའི་རླབས་ཆེན་གྱི་མི་རབས་གོང་མའི་མཇུག་མཐུད་ཐུབ་པ་བྱས་ནས་བོད་གངས་ཅན་པ་ཟེར་བ་འདི་འཛམ་གླིང་འདིའི་ཐོག་མིག་དཔེ་བྱ་འོས་ཤིག་ཏུ་བཟོས་དགོས་པའི་ལམ་སྟོན་བསྩལ་བ་མ་ཟད། ༸གོང་ས་མཆོག་སྐུ་སྒེར་གྱི་ཐོག་ནས་རྒྱ་ནག་དང་ལྷན་དུ་འབྲེལ་བ་མུ་མཐུད་མཛད་བཞིན་ཡོད་པའི་ཁར། ནམ་ཞིག་བོད་དང་རྒྱ་ནག་ནང་དུ་གཟིགས་སྐོར་ལ་ཕེབས་རྒྱུའི་ཐུགས་རེ་གནང་བཞིན་ཡོད་པ་དེ་ལྟར་ཡང། རྒྱ་གར་རང་དབང་ལུང་པའི་ནང་བཞུགས་ན་འགྲོ་བར་ཕན་རླབས་ཆེ་བ་གཟིགས་ཀྱི་ཡོད་པ་བཀའ་བསྩལ་སོང་། བཞུགས་སྒར་དྷརྨ་ས་ལར་ཟླ་ ༡༠ ཚེས་ ༣ ནས་ཁ་སང་ཚེས་ ༥ བར་བོད་མིའི་སྒྲིགས་འཛུགས་བཀའ་ཤག་དང་བོད་མི་མང་སྤྱི་འཐུས་ལྷན་ཚོགས་ཀྱིས་གོ་སྒྲིག་འོག་རྒྱལ་ཁབ་ ༢༤ ནས་བོད་མིའི་སྐུ་ཚབ་ ༣༤༠ ལྷག་ཙམ་ལྷན་ཞུགས་ཐོག་ལྔ་དང་ལྔ་བཅུའི་ལས་འཆར་དང་༸རྒྱལ་བ་སྐུ་ཕྲེང་ན་རིམ་དང་བོད་མིའི་དབར་གྱི་འབྲེལ་བའི་སྐོར་ལ་དམིགས་བསལ་ཚོགས་ཆེན་ཐེངས་གསུམ་པ་ཚོགས་ཡོད་པ་ལྟར་དེ་རིང་སྔ་དྲོ་ཚོུད་ ༩ ཐོག་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཚོགས་ཆེན་གྱི་གྲོས་ཆོད་ཁག་སྤྱན་འབུལ་ཞུས་པ་དང་འབྲེལ་ཏེ་མགོན་པོ་༸གང་ཉིད་མཆོག་ནས་ཚོགས་བཅར་བ་དང་བོད་མིའི་སྒྲིག་འཛུགས་ཀྱི་སྲི་ཞུ་བ་རྣམས་ལ་ཐུགས་བརྩེ་བ་ཆེན་པོའི་ཐོག་ནས་དུས་ཡུན་ཚོུད་གཅིག་ལྷག་ཙམ་རིང་ལ་བཀའ་སློབ་བཀྲིན་བསྩལ་སོང་། ༸གོང་ས་མཆོག་གིས་སྐབས་བོད་མི་རིགས་ཀྱི་ཐོུང་མ་ཡིན་པའི་ཆོས་དང་རིག་གཞུང་། ལེགས་བྱང་། སྐད་ཡིག་བཅས་ཀྱི་གལ་གནད་སྐོར་ལ་བཀའ་སློབ་བཀྲིན་ཆེ་བ་བསྩལ་བ་དང་འབྲེལ། གཞིས་ལུས་རྒྱ་ཆེ་མང་ཚོགས་ཀྱིས་རང་གི་གཅེས་པའི་ལུས་སྲོག་བློས་བཏང་གིས་རང་མི་རིགས་ཀྱི་ཆོས་རིག་དང་ལེགས་བྱང་། སྐད་ཡིག་སོགས་སྲུང་སྐྱོབ་གནང་བཞིན་པ་ལྟར་བྱེས་སྡོད་བོད་མི་གཞོན་སྐྱེས་རྣམས་ནས་བོད་ནང་གི་བོད་མི་རྣམས་ཀྱི་སེམས་ཤུགས་དང་ལྷག་བསམ་ཧ་ལས་པ་ཞིག་ཡོད་པ་དེ་དག་མུ་མཐུད་རྒྱུན་སྐྱོང་བྱེད་དགོས་པ་བཀའ་བསྩལ་འདུག དེ་བཞིན་༸གོང་ས་མཆོག་གིས་ཕྱི་ལོ་ ༡༩༥༩ ལོར་མགོན་པོ་༸གང་ཉིད་ཐོག་མར་ནོར་གླིང་ནས་བཙན་བྱོལ་དུ་ཆིབས་ཐོན་གནང་སྐབས་༸སྐུའི་མྱོང་བ་ཁག་གཅིག་ཐུགས་དྲན་གསོས་གནང་བ་དང་འབྲེལ། བོད་མི་རྣམས་ཀྱིས་འདས་པའི་ལོ་ངོ་ ༦༠ ནང་བཙན་བྱོལ་དུ་ལོ་རྒྱུས་ལྡན་པའི་རླབས་ཆེན་གྱི་བོད་མི་རིགས་ཀྱི་མི་ཚབ་བྱས་ནས་ད་ཆ་བཙན་བྱོལ་བོད་མིའི་སྤྱི་ཚོགས་དེ་འདྲ་འདྲའི་ནང་ནས་མི་འདྲ་བ་ཞིག་ཏུ་གྱུར་ཡོད་པ་འདིས་དེ་སྔ་རྒྱ་ནག་གིས་ ༥༩ ལོར་དྲག་གནོན་བརྒྱུད་བོད་མི་རིགས་ཞེས་པ་དེ་ནག་བསུབ་གཏོང་རྒྱུའི་ཚོད་དཔག་བྱས་པ་དེ་ད་ཆ་ནོར་བ་ཞིག་བཟོས་ཡོད་པར་བཀའ་བསྩལ་ཡོད། ༸གོང་ས་མཆོག་གིས་གཞན་ཡང་བོད་ཀྱི་ཆབ་སྲིད་ཀྱི་གནས་བབ་དང་འབྲེལ་ཏེ་ཕྱོགས་གཉིས་དབར་གྱི་གཞུང་འབྲེལ་འབྲེལ་མོལ་དེ་ཆད་ཡོད་ཀྱང་དམིགས་བསལ་སྐུ་ཚབ་ཆེད་འཛུགས་མི་དགོས་པར་མགོན་པོ་༸གང་ཉིད་མཆོག་༸སྐུ་སྒེར་གྱི་ཐོག་ནས་རྒྱ་ནག་དང་འབྲེལ་བ་མུ་མཐུད་མཛད་བཞིན་པ་བཀའ་བསྩལ་བ་དང་ཆབས་ཅིག་ཏུ་སྤྱིར་རྒྱ་ནག་ནང་གི་གནས་སྟངས་ལ་རིམ་པས་འགྱུར་བ་འགྲོ་བཞིན་པ་གསལ་པོ་ཡིན་པ་ལྟར་མགོན་པོ་༸གང་ཉིད་མཆོག་ནམ་ཞིག་རྒྱ་ནག་དང་བོད་ལ་གཟིགས་སྐོར་ལ་ཕེབས་རྒྱུའི་ཐུགས་རེ་མཛད་ཡོད་ཀྱང་། རྒྱ་གར་བཙན་བྱོལ་ལུང་པའི་ནང་བཞུགས་ན་འགྲོ་བའི་ཕན་བདེར་ཕན་རླབས་རྒྱ་ཆེ་མཛད་ཐུབ་ཀྱི་ཡོད་པ་བཀའ་བསྩལ་ཡོད་པ་རེད། ༸གོང་ས་མཆོག་གིས་ད་དུང་ད་ཆ་༸སྐུའི་འཕྲོད་བཞེས་ཀྱི་གནས་བབ་བཟང་དུ་ཕེབས་བཞིན་པ་ལྟར་རིམ་པས་ཡོ་རོབ་སོགས་ཕྱིའི་རྒྱལ་ཁབ་ཁག་ཏུ་སླར་ཆིབས་བསྒྱུར་མཛད་ཐུབ་པའི་ཐུགས་རེ་ཡོད་སྐོར་བཀའ་བསྩལ་བ་དང་འབྲེལ། བོད་མི་རྣམས་བཙན་བྱོལ་དུ་སྤོབས་པ་ཆེན་པོ་བྱེད་རྒྱུ་ཡོད་པ་དེ་ནི་གཞིས་ལུས་རྒྱ་ཆེ་མི་མང་དང་སྒྲིག་འཛུགས་ཀྱི་སྲི་ཞུ་བ་ཚོའི་བཀྲིན་ལ་བརྟེན་བྱུང་བ་ཞིག་ཡིན་སྟབས་མུ་མཐུད་ཧུར་ཐག་གནང་སྟེ་རླབས་ཆེན་གྱི་མི་རབས་གོང་མའི་མཇུག་མཐུད་དེ་བོད་གངས་ཅན་པ་ཟེར་བ་འདི་འཛམ་གླིང་འདིའི་ཐོག་མིག་དཔེ་བྱ་འོས་ཤིག་ཏུ་བཟོས་དགོས་པའི་ལམ་སྟོན་བསྩལ་ཡོད། གཞི་རྩའི་བཞུགས་སྒར་དུ་ཟླ་བ་འདིའི་ཚེས་ ༣ ནས་ ༥ བར་ཚོགས་པའི་བཙན་བྱལ་བོད་མིའི་དམིགས་བསལ་ཚོགས་ཆེན་གསུམ་པའི་ཐོག་ནས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བོད་མི་རྩམ་ཟན་ཡོངས་ཀྱི་འདི་ཕྱི་གཉིས་ཀྱི་མགོན་༸སྐྱབས་དཔུང་གཉེན་དམ་པར་མུ་མཐུད་བཞུགས་གནང་ཡོང་བ་དང་། ཇི་སྲིད་བོད་ཁ་ཅན་གྱི་འགྲོ་བ་ནམ་གནས་ཀྱི་བར་དུ་༸རྒྱལ་བའི་༸སྐུ་ཕྲེང་རིམ་བྱོན་རྣམས་ངེས་ཕེབས་ཡོང་བའི་གསོལ་བ་ཕུར་ཚུགས་སུ་འདེབས་པ་མ་ཟད་༸རྒྱལ་བའི་ཡང་སྲིད་ངོས་འཛིན་གནང་རྒྱུའི་འགན་དབང་ཆ་ཚང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཉིད་མཆོག་དང་། ༸གོང་ས་ཏཱ་ལའི་བླ་མའི་བླ་བྲང་དགའ་ལྡན་ཕོ་བྲང་ཡིད་ཆེས་དགེ་རྩའི་དབང་ལྡན་འགན་འཛིན་ཁོ་ནར་ཡོད་པ་ལས་གཞན་རྒྱལ་ཁབ་དང་གཞུང་། སྒྲིག་འཛུགས། མི་སྒེར་བཅས་སུ་ལའང་མེད་པའི་གྲོས་ཆོད་བཞག་གནང་ཡོད་པ་རེད།

ཇི་སྲིད་བོད་ཁ་བ་ཅན་གྱི་འགྲོ་བ་ནམ་གནས་ཀྱི་བར་དུ་༸རྒྱལ་བའི་༸སྐུ་ཕྲེང་རིམ་བྱོན་རྣམས་ངེས་ཕེབས་ཡོང་བར་གསོལ་འདེབས་ཞུས་ཏེ་དམིགས་བསལ་ཚོགས་ཆེན་ཐེངས་གསུམ་པ་མཇུག་སྒྲིལ།

ཉེ་ཆར་ཕྱི་ཚེས་ ༣ ཉིན་དབུ་འཛུགས་ཀྱིས་ཚེས་ ༥ བར་བཞུགས་སྒར་གངས་སྐྱིད་ཚོགས་ཁང་གསར་པའི་ནང་དུ་བཙན་བྱོལ་བོད་མིའི་བཅའ་ཁྲིམས་དོན་ཚན་ ༥༩ པའི་དགོངས་དོན་འོག་ཚོགས་དྲུང་ལས་ཁུངས་ཀྱི་རྐང་འགན་བཞེས་ཐོག་བསྐོང་ཚོགས་གནང་བའི་དམིགས་བསལ་ཚོགས་ཆེན་ཐེངས་གསུམ་པ་དེ་རིང་དངོས་སུ་མཇུག་སྒྲིལ་དང་སྦྲགས། ༸གོང་ས་༸སྐྱབས་མགོན་༸སྐུ་ཕྲེང་བཅུ་བཞི་པ་ཆེན་པོ་མཆོག་བོད་མི་རྩམ་ཟན་ཡོངས་ཀྱི་འདི་ཕྱི་གཉིས་ཀྱི་མགོན་སྐྱབས་དཔུང་གཉེན་དམ་པར་མུ་མཐུད་བཞུགས་གནང་ཡོང་བ་དང་། ཇི་སྲིད་བོད་ཁ་ཅན་གྱི་འགྲོ་བ་ནམ་གནས་ཀྱི་བར་དུ་༸རྒྱལ་བའི་༸སྐུ་ཕྲེང་རིམ་བྱོན་རྣམས་ངེས་ཕེབས་ཡོང་བའི་མགྲིན་དབྱངས་གཅིག་གྱུར་གྱི་གསོལ་འདེབས་རྒྱུ་སོགས་ཀྱི་གྲོས་ཆོད་ཁག་གཅིག་གཏན་འབེབས་གནང་སོང་། ཐེངས་འདིའི་དམིགས་བསལ་ཚོགས་ཆེན་གྱི་བརྗོད་གཞི་གཙོ་བོ་ནི་བོད་མིའི་སྒྲིག་འཛུགས་ཀྱི་ལོ་ལྔ་དང་ལྔ་བཅུའི་འཆར་གཞི་དང་། ༸རྒྱལ་དབང་༸སྐུ་ཕྲེང་ན་རིམ་དང་བོད་མི་མང་དབར་གྱི་འབྲེལ་ལམ་ཞེས་ཆགས་ཀྱི་ཡོད་པ་ལྟར། ཚོགས་དུས་རིང་ལ་ཚོགས་བཅར་བ་རྣམ་པ་ཚོགས་ཆུང་བཅུར་ཆ་བགོད་གནང་སྟེ་བརྗོད་གཞི་གཉིས་པོའི་ཐོག་ས་གནས་མི་མང་གི་དགོངས་འཆར་བསྡུ་རུ་བྱུང་ཁག་སྙན་སྒྲོན་དང་། དགོངས་ཚུལ་གསར་པ་གང་ཡོད་རྣམས་སྤུངས་ཏེ་གྲོས་བསྡུར་སྦྱང་བཤད་གནང་མཐར་དེ་རིང་ཚོགས་དུས་ཉིན་མཐའ་མའི་ཐོག་༸རྒྱལ་དབང་༸སྐུ་ཕྲེང་ན་རིམ་དང་བོད་མི་མང་དབར་གྱི་འབྲེལ་ལམ་དང་འབྲེལ། ཚོགས་བཅར་བ་རྣམ་པ་མགྲིན་དབྱངས་གཅིག་གྱུར་གྱིས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་༸སྐུ་ཕྲེང་བཅུ་བཞི་པ་ཆེན་པོ་མཆོག་༸སྐུ་ཚེ་༸ཞབས་པད་བསྐལ་པ་བརྒྱ་ཕྲག་བར་བོད་མི་རྩམ་ཟན་ཡོངས་ཀྱི་འདི་ཕྱི་གཉིས་ཀྱི་མགོན་སྐྱབས་དཔུང་གཉེན་དམ་པར་མུ་མཐུད་བཞུགས་གནང་ཡོང་བའི་གསོལ་བ་ཕུར་ཚུགས་སུ་འདེབས་རྒྱུ་དང་། ཇི་སྲིད་བོད་ཁ་ཅན་གྱི་འགྲོ་བ་ནམ་གནས་ཀྱི་བར་དུ་༸རྒྱལ་བའི་སྐུ་ཕྲེང་རིམ་བྱོན་རྣམས་ངེས་ཕེབས་ཡོང་བའི་མགྲིན་དབྱངས་གཅིག་གྱུར་གྱི་གསོལ་བ་ཕུར་ཚུགས་སུ་འདེབས་རྒྱུ། ༸རྒྱལ་བའི་ཡང་སྲིད་ངོས་འཛིན་གནང་རྒྱུའི་འགན་དབང་ཆ་ཚང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཉིད་མཆོག་དང་། ༸གོང་ས་ཏཱ་བླའི་བླ་མའི་བླ་བྲང་དགའ་ལྡན་ཕོ་བྲང་ཡིད་ཆེས་དགེ་རྩའི་དབང་ལྡན་འགན་འཛིན་ཁོ་ནར་ཡོད་པ་ལས་གཞན་རྒྱལ་ཁབ་དང་གཞུང་། སྒྲིག་འཛུགས། མི་སྒེར་བཅས་སུ་ལ་ཡང་མེད། དེ་བཞིན་རྒྱ་ནག་གཞུང་གིས་དེ་སྔོན་བོད་བརྒྱུད་ནང་བསྟན་གྱི་སྤྲུལ་སྐུ་ངོས་འཛིན་བྱས་པ་སྤྱི་དང་། ལྷག་པར་དུ་ཕྱི་ལོ་ ༢༠༠༧ ལོར་གཏན་འབེབས་གནང་བའི་བླ་སྤྲུལ་ཡང་སྲིད་ངོས་འཛིན་བྱེད་ཕྱོགས་ཀྱི་བཙན་བཀའ་ཨང་ལྔ་པའི་བརྒྱུད་༸རྒྱལ་བའི་ཡང་སྲིད་ངོས་འཛིན་བྱེད་ཕྱོགས་ཐད་བྱུས་ངན་བཏོན་དང་འདོན་བཞིན་པ་དེར་དགག་པ་མཐའ་ཅིག་ཏུ་བྱ་རྒྱུ་ཞེས་གྲོས་ཆོས་ནང་གསེས་བཞི་ཅན་ཞིག་སྤྱི་མོས་ཀྱིས་གཏན་འབེབས་གནང་ཡོད།   ཚོགས་ཆེན་གྱི་གྲོས་གཞི་ལྔ་དང་ལྔ་བཅུའི་འཆར་གཞི་དང་འབྲེལ་ཏེ་ཚོགས་ཆུང་སོ་སོའི་རྒྱབ་གཉེར་ཁག་དང་རྒྱ་ཆེའི་མང་ཚོགས་ཀྱི་དགོངས་འཆར་ཡིག་ཐོག་ཏུ་གང་ཡོད་པ་རྣམས་བཀའ་སྤྱི་གཉིས་ནས་བཀའ་བསྡུར་དཔྱད་ཞིབ་གནང་སྟེ་ཕྱག་བསྟར་གནང་རྒྱུ་ཡིན་ཞེས་སྤྱི་མོས་ཀྱིས་གྲོས་ཆོད་གཏན་འབེབས་གནང་ཡོད། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ད་རེས་༸གོང་ས་མཆོག་དང་༸སྐུའི་ཡང་སྲིད་ཀྱི་གནད་དོན་ཐོག་སྤྱི་མོས་ཀྱིས་གྲོས་ཆོད་བཞག་ཐུབ་པ་དེ་རྒྱལ་རབས་ལོ་རྒྱུས་དང་རྩ་དོན། དེ་བཞིན་ཆོས་ཕྱོགས་བཅས་ཕྱོགས་ཡོངས་ནས་རླབས་ཆེན་གྱི་བརྡ་ལན་ཞིག་བཏང་ཐུབ་ཡོད་ཅེས་གསུངས་སོང་། དེ་བཞིན་ཐེངས་འདིའི་ཚོགས་ཆེན་ཐོག་ལྔ་དང་ལྔ་བཅུའི་ལས་གཞི་དང་འབྲེལ་བའི་དགོངས་འཆར་ཕེབས་པ་ཁག་ཕྱག་བསྟར་ཇི་ཐུབ་གནང་ངེས་དང་། མ་འོངས་པར་དགོངས་འཆར་གནང་སྐབས་ཆབ་སྲིད་དང་རྩ་དོན་ཐོག་དགོངས་པ་ཆེ་ཙམ་བཞེས་རྒྱུ་གལ་ཆེན་པོ་ཆགས་ཀྱི་འདུག་ཅེས་གསུངས་པ་དང་ཆབས་ཅིག་ཏུ་ ལོ་རྗེས་མ་སྟེ་ཕྱི་ལོ་ ༢༠༢༠ ལོ་དེ་༸གོང་ས་མཆོག་ལ་ཐུགས་རྗེ་ཆེ་ཞུའི་ལོར་སྲུང་བརྩི་ཞུ་རྒྱུ་ཡིན་པ་ཡོངས་བསྒྲགས་གནང་སོང་།    གཞི་རྩའི་དམིགས་བསལ་ཚོགས་ཆེན་ཐེངས་གསུམ་པའི་ཐོག་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་དང་ལྷན་ཁང་གི་སྐུ་ཚབ། བཀའ་ཟུར་དང་སྤྱི་ཟུར། དེ་བཞིན་རྒྱ་བལ་འབྲུག་གསུམ་གྱི་ས་གནས་འགོ་འཛིན་དང་ས་གནས་འཐུས་མིའི་སྐུ་ཚབ། བོད་རང་དབང་བདེན་པའི་ལས་འགུལ་ཚོགས་ཆུང་ཁག་གི་སྐུ་ཚབ་རྣམ་པ། བོད་མི་གནས་ཡུལ་ཕྱི་རྒྱལ་ཡུལ་གྲུག་ཁག་གི་བོད་རིགས་སྤྱི་མཐུན་ཚོགས་པ་དང་བོད་རིགས་ཚོགས་པའི་སྐུ་ཚབ། གཞུང་འབྲེལ་མ་ཡིན་པའི་ཚོགས་པ་ཁག་གི་སྐུ་ཚབ་བཅས་ཁྱོན་ས་གནས་ཁག་འདྲ་མིན་ ༢༤ ལྷག་ནས་ཚོགས་བཅར་བ་ ༣༤༠ ལྷག་མཉམ་ཞུགས་གནང་ཡོད་པ་དང་། ཚོགས་བཅར་བ་རྣམས་ལ་སང་རེས་གཟའ་ཉི་མའི་ཉིན་སྔ་དྲོར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཇལ་ཁ་དང་བཀའ་སློབ་བཀའ་དྲིན་བསྩལ་གྱི་ཡོད་པ་རེད།

རྒྱལ་སྤྱིའི་ཚོགས་སྡེ་ཁག་གིས་ཧོང་ཀོང་ནང་ཛ་དྲག་གི་ཁྲིམས་གཞི་བསྡམས་པར་སྐྱོན་བརྗོད།

ཧོང་ཀོང་ས་གནས་གཞུང་གིས་ཁུལ་དེའི་ནང་འདས་པའི་ལོ་ངོ་ ༥༠ ནང་རྩ་བ་ནས་ལག་བསྟར་བྱས་མྱོང་མེད་པའི་ཛ་དྲག་གི་ཁྲིམས་གཞི་བསྡམས་ཏེ་ཁུལ་དེའི་ནང་གི་ངོ་རྒོལ་ལས་འགུལ་ནང་མཉམ་ཞུགས་བྱེད་མཁན་ཚོས་གདོང་འབག་གྱོན་མི་ཆོག་པའི་བཀའ་རྒྱ་བཏང་མ་ཐག་ཏུ་ས་གནས་སུ་སྔར་ལྷག་ཞི་རྒོལ་ཁྲོད་ཉེན་རྟོག་པས་སླར་ཡང་མང་ཚོགས་ཐོག་མེ་འདའ་བརྒྱབ་པའི་གནས་ཚུལ་ཐོན་པ་མ་ཟད་རྒྱལ་སྤྱིའི་ཚོགས་སྡེ་ཁག་ནས་ཧོང་ཀོང་གཞུང་གི་ཛྲ་དྲག་ཁྲིམས་གཞི་དེར་སྐྱོན་བརྗོད་ཤུགས་ཆེ་གནང་བཞིན་འདུག ཧོང་ཀོང་གི་སྤྱི་ཁྱབ་ཀེ་རི་ལེམ་གྱིས་ཁ་སང་རེས་གཟའ་པ་སངས་ཉིན་གསར་འགོད་གསལ་བསྒྲགས་ཤིག་བརྒྱུད་དྲག་པོའི་ཁྲིམས་གཞི་དེ་གསལ་བསྒྲགས་བྱས་པ་དང་དེར་རྩིས་འཇོག་མ་བྱེད་པར་གདོང་འབག་གྱོན་མཁན་རྣམས་ཁྲིམས་འགལ་དུ་ངོས་འཛིན་གྱིས་དོ་བདག་འཛིན་བཟུང་བྱ་རྒྱུ་ཡིན་སྐོར་གསུངས་པ་མ་ཟད་ཁུལ་དེར་ཟིང་འཁྲུག་ལ་ཞོད་འཇགས་མ་བྱུང་བ་ཡིན་ན། ས་གནས་གཞུང་གི་ངོས་ནས་དེའི་ཁྲིམས་གཞི་ཅི་འདྲ་ཞིག་ལག་བསྟར་བྱེད་དགོས་བྱུང་ཚེ་དེ་བྱ་ངེས་ཡིན་པའི་ཉེན་བརྡ་བཏང་ཡོད་པ་རེད། ཧོང་ཀོང་ནང་གི་ཛ་དྲག་གི་ཁྲིམས་གཞི་དེ་ཁྱབ་བསྒྲགས་བྱས་མ་ཐག་ཏུ་རྒྱལ་སྤྱིའི་ཚོགས་སྡེ་ཁག་ནས་དེ་ནི་དེ་སྔ་རྒྱལ་ཁབ་ཅིག་གིས་སྤྱི་ཚོགས་སམ་རྒྱལ་ཁབ་གཞན་ཞིག་ལ་དབང་སྒྱུར་བྱེད་པའི་ལམ་ལུགས་ཁྲོད་ལག་བསྟར་བྱ་རྒྱུ་ཁྲིམས་གཞི་ཞིག་ཡིན་པར་སྐྱོན་བརྗོད་དང་འབྲེལ། ཧོང་ཀོང་གི་སྤྱི་ཁྱབ་ལ་ཁྲིམས་གཞི་དེ་ཁྲིམས་མཐུན་རང་གི་ཐོག་ནས་ཆ་སྙོམས་པ་ཞིག་དགོས་པ་དང་། ཁུལ་དེའི་ནང་གི་དཀའ་ངལ་དག་གྲོས་མོལ་གྱི་ལམ་ནས་སེལ་དགོས་པའི་སྐུལ་མ་གནང་འདུག དེ་ཡང་ south china morning post ཞེས་པའི་དྲྭ་རྒྱའི་ཐོག་གནས་ཚུལ་སྤེལ་བའི་ནང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཚན་པའི་མགྲིན་ཚབ་པ་ Marta Hurtadoལགས་ཀྱིས་རྒྱལ་ཚོགས་ནས་ཧོང་ཀོང་གི་གནད་དོན་ལ་ཞིབ་ཕྲ་བརྡར་ཤ་གཅོད་ཐོག་དམ་དྲག་བྱ་རྒྱུ་དེ་དག་ཁྲིམས་མཐུན་ཞིག་དགོས་ངེས་དང་ཞི་བའི་སྒོ་ནས་ངོ་རྒོལ་བྱ་རྒྱུ་ནི་འགྲོ་བ་མིའི་ཐོབ་ཐང་ཞིག་ཡིན་པ་མ་ཟད་དེར་བཀག་འགོག་མེད་པར་ལས་འགུལ་སྤེལ་བཅུག་དགོས་པ་བརྗོད་འདུག དེ་བཞིན་ཨིན་ཡུལ་གྱི་ཕྱི་འབྲེལ་དྲུང་ཆེ་ Dominic Raab ལགས་ཀྱིས་ཧོང་ཀོང་གཞུང་གིས་མི་མང་གི་བདེ་འཇགས་དང་ངལ་སེལ་སླད་དུ་ཐུགས་འགན་བཞེས་དགོས་པ་མ་ཟད། དཀའ་ངལ་ཛ་དྲག་ཏུ་གཏོང་རྒྱུ་ལས་ལྡོག་སྟེ་མང་ཚོགས་ཀྱི་དངངས་འཚབ་སེལ་ཐབས་ལ་འབད་དགོས་པ་དང་། ཧོང་ཀོང་གི་གནད་དོན་དང་འབྲེལ་ནས་དཀའ་ངལ་སེལ་ཐབས་གཙོ་བོ་ནི་གྲོས་མོལ་གནང་རྒྱུ་དེ་ཡིན་པ་བརྗོད་འདུག ཕྱོགས་མཚུངས་ཨ་རི་གྲོས་ཚོགས་ཀྱི་ཚོགས་གཙོ་ལྕམ་ Nancy Pelosi ལགས་ཀྱིས་ཁྲིམས་གཞི་དེས་མང་ཚོགས་ཀྱི་མངོན་འདོད་སེལ་རྒྱུ་ལས་ལྡོག་སྟེ་མང་ཚོགས་དང་ཉེན་རྟོག་པའི་དབར་གདོང་ཐུག་ཆེ་རུ་གཏོང་ངེས་ཙམ་མ་ཟད་སྨྲ་བརྗོད་རང་དབང་གི་གནད་དོན་ཐོག་ཐུགས་འཚབ་ཀྱི་གཞི་ཞིག་ཆགས་ཡོད་པ་གསུངས་འདུག ཡོ་རོབ་མཐུན་ཚོགས་ཀྱི་མགྲིན་ཚབ་པས་ས་གནས་གཞུང་དང་མི་མང་གི་དབར་ངེས་པར་གྲོས་མོལ་གནང་དགོས་གལ་དང་། Germany ཕྱི་འབྲེལ་བློན་ཆེན་གྱི་མགྲིན་ཚབ་པ་ Christofer Burger ལགས་ཀྱིས་ས་གནས་ཀྱི་ཁྲིམས་གཞི་གསར་པ་དང་འབྲེལ་ནས་ཞིབ་ཕྲ་ཞིག་བརྗོད་རྒྱུ་མེད་ཀྱང་མང་ཚོགས་ལ་དྲག་ཤུགས་ཐོག་ནས་མཚམས་འཇོག་བྱེད་དགོས་ཞེས་བཀའ་རྒྱ་བསྒྲགས་ན་མི་འགྲིག་པ་དང་གནད་དེ་ཞི་འགྲིག་ཡོང་ཐབས་སུ་ཕྱོགས་གཉིས་ནས་ཐུགས་འགན་བཞེས་དགོས་པ་བརྗོད་འདུག གཞི་རྩའི་ཁ་ས་ཧོང་ཀོང་གི་སྤྱི་ཁྱབ་ནས་དྲག་པོའི་ཁྲིམས་གཞི་བསྡམས་རྗེས་ཧོང་ཀོང་ནང་ཕྱི་དྲོ་སླར་ཡང་ངོ་རྒོལ་གྱི་ལས་འགུལ་ཤུགས་ཆེ་སྤེལ་བའི་ཁྲོད་ས་གནས་ཉེན་རྟོག་པས་མང་ཚོགས་ཐོག་མེ་མདའ་བརྒྱབ་པའི་གནས་ཚུལ་ཐོན་པ་དང་དཔྱད་ཞིབ་པ་རྣམས་ཀྱིས་ཧོང་ཀོང་སྤྱི་ཁྱབ་ཀྱི་ཛ་དྲག་གི་ཁྲིམས་གཞི་བསྡམས་པ་བརྒྱུད་ཁོང་གི་དབང་ཚད་ཆེ་རུ་ཕྱིན་མེད་པ་དང། ད་ལྟའི་ཛ་དྲག་གི་ཁྲིམས་གཞི་དང་རིང་མིན་དྲག་པོའི་བཀའ་རྒྱ་བསྡམས་པའི་དུས་ལ་བབ་མི་སྲིད་པའི་སེམས་འཚབ་བྱེད་བཞིན་ཡོད་པ་རེད།

བསང་ཆུ་དང་རྨ་ཆུ་རྫོང་དུ་གཏེར་ཁ་སྔོག་འདོན་གྱི་དུག་རྫས་ཁྱབ་ཏེ་གནོད་འཚེ་འབྱུང་བཞིན་པ།

དེ་རིང་བོད་ཀྱི་འགྲོ་བ་མིའི་་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་རྒྱ་ནག་གིས་བོད་ནང་གི་ས་ཁུལ་གང་སར་མི་ལོ་བཅུ་ཕྲག་རིང་སྣོད་བཅུད་ལ་དོ་ཁུར་ཕྲན་ཙམ་མེད་པར་གང་བྱུང་གསེར་གཏེར་སྔོག་འདོན་བྱེད་བཞིན་ཡོད་པ་དང་དམིགས་བསལ་ཀན་སུའུ་ཞིང་ཆེན་ཀན་ལྷོ་བོད་རིགས་རང་སྐྱོང་ཁུལ་བསང་ཆུ་རྫོང་དང་རྨ་ཆུ་རྫོང་ཕྱོགས་ཀྱི་སྐྱེ་ཁམས་ཁོར་ཡུག་སླར་གསོ་ཡོང་ཐབས་མེད་པའི་གནོད་སྐྱོན་ཚབས་ཆེན་བཟོས་ཡོད་པར་མ་ཟད་ཡུལ་མིའི་འཐུང་ཆུ་དང་རྒྱུགས་ཆུ་ཁག་གི་ནང་དུ་སྐྱུར་ཚྭ་སྔོན་པོ་དང་དངུལ་ཆུ་ལ་སོགས་ཀྱི་དུག་རྫས་ཚབས་ཆེན་རིགས་འདྲེས་ཡོད་སྟབས། རང་བྱུང་ཁམས་ཙམ་མ་ཡིན་པར་ ས་གནས་ཀྱི་ཡུལ་མིའི་འཕྲོད་བསྟེན་དང་སྒོ་ཕྱུགས་ནོར་ལུག་སོགས་ལ་ཉེན་ཁ་ཆེན་པོ་བྱུང་ཡོད་པ་འཁོད་འདུག     ཀྲུང་དབྱང་སྐྱེ་ཁམས་ཁོར་ཡུག་སྲུང་སྐྱོང་ལྟ་ཞིབ་ཚན་ཆུང་ཟེར་བས་ཕྱི་ཟླ་༧ ཚེས་ ༢༧ ནས་ཚེས་ ༢༨ བར་ཀན་སུའུ་ཞིང་ཆེན་ཀན་ལྷོ་བོད་རིགས་རང་སྐྱོང་ཁུལ་དུ་ལྟ་ཞིབ་བྱས་སྐབས་ཞི་ཅིན་ཕིང་གིས་ནམ་ཞར་སྐྱེ་ཁམས་དཔལ་ཡོན་སྲུང་སྐྱོང་དགོས་རབས་བཤད་ཀྱང་། བསང་ཆུ་དང་རྨ་ཆུ་རྫོང་ས་ཁུལ་དེར་གཞི་རྒྱ་ཆེ་བའི་གསེར་གཏེར་སྔོག་འདོན་བྱས་ཏེ་སྐྱེ་ཁམས་ཁོར་ཡུག་ལ་གནོད་སྐྱོན་ཚབས་ཆེན་བཟོས་པའི་གནད་དོན་ཤེས་རྟོགས་བྱུང་ཡོད་པ་མ་ཟད་རྒྱ་ནག་གི་གཏེར་ཁ་སྔོག་འདོན་པ་རྣམས་ཀྱིས་དུག་རྫས་དང་གད་སྙིགས་སོགས་་བདག་གཅེས་བྱེད་རྒྱུའི་ཁྲིམས་སྒྲིག་ལག་བསྟར་བྱུང་མེད་པ་ཐེར་འདོན་བྱས་འདུག བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་བོད་གནས་ཉམས་ཞིབ་པ་པདྨ་རྒྱལ་ལགས་སུ་དེ་འབྲེལ་བཅར་འདྲི་ཞུས་པར་ཁོང་གིས་གཞི་རྩའི་རྒྱ་ནག་སྲིད་གཞུང་གི་བཀོད་སྡོམ་འོག་ཏུ་བོད་ཁུལ་གྱི་ས་གནས་གང་སར་གཏེར་ཁ་སྔོག་འདོན་གྱི་ལས་གཞི་རྒྱ་ཆེར་སྤེལ་གྱི་ཡོད་ཀྱང་། རྒྱ་ནག་གི་དམ་དྲག་དང་གསང་རྒྱ་བྱེད་བཞིན་རྐྱེན་གནས་ཚུལ་མང་པོ་ཞིག་ལ་རྒྱུས་ལོན་བྱེད་ཐབས་མེད་པར་ངོ་སྤྲོད་གནང་ཡོད་པ་དང་། ལྷག་དོན་བསང་ཆུ་དང་རྨ་ཆུའི་ཁུལ་གྱི་གཏེར་ཁ་སྔོག་འདོན་ཐད་ཀྱི་གནས་ཚུལ་དེ་སྤྱི་ལོ་ ༡༩༨༠ ནང་ནས་འགོ་འཛུགས་བྱས་པ་ཞིག་ཡིན་པ་དང་ཐེངས་འདིའི་སྙན་ཐོ་དེ་ནི་ས་གནས་ཡུལ་མི་ཞིག་གིས་དངོས་སུ་མིག་གིས་མཐོང་སྟེ་གནས་ཚུལ་མཁོ་སྤྲོད་བྱས་པ་ཞིག་ཡིན་པ་གསུངས་འདུག དེ་བཞིན་ཁོང་གིས་རྒྱ་ནག་གིས་གཏེར་ཁ་སྔོག་འདོན་གྱི་གནས་ཚུལ་ཕྱི་ལ་མི་གྱར་བའི་ཆེད་དུ་ས་གནས་ཀྱི་ཡུལ་མི་རྣམས་ལ་ཕྱོགས་གཅིག་ནས་དམ་དྲག་བྱེད་བཞིན་པ་དང་ཕྱོགས་གཞན་ཞིག་ནས་མི་མང་ལ་སྒོར་མོ་སྤྲད་དེ་གནས་ཚུལ་ཕྱི་ལ་མི་གྱར་བའི་མཐུན་རྐྱེན་བསྐྲུན་དགོས་གལ་ཡིན་པར་བརྗོད་དེ། ཁུལ་དེར་དུག་རྫས་ཀྱི་གནད་དོན་གང་བྱུང་ཡང་གཏེར་ཁ་སྔོག་འདོན་དང་འབྲེལ་བ་མེད་པར་རྫུན་བཟོ་བྱེད་དུ་འཇུག་གི་ཡོད་པ་ངོ་སྤྲོད་གནང་ཡོད། རྒྱ་ནག་གིས་འཛུགས་སྐྲུན་ལས་གཞིའི་མིང་ཐོག་ནས་ཡུལ་ལུང་གང་སར་གཏེར་ཁ་སྔོག་འདོན་བྱེད་ཀྱི་ཡོད་ཀྱང་། དོན་དུ་ས་གནས་ཀྱི་ཡུལ་མི་རྣམས་ལ་ཁེ་བཟང་སྣ་གཅིག་ཀྱང་རང་གི་མེད་པ་མ་ཟད་གཏེར་ཁ་སྔོག་འདོན་གྱི་རྡོ་སྙིགས་དང་དུག་རྫས་རིགས་ཀྱིས་བོད་རིགས་མི་མང་ལ་གནོན་སྐྱོན་ཆེན་པོ་ཐེབས་ཀྱི་ཡོད་པར་ལུང་འདྲེན་གྱིས་དེ་ལྟ་བུའི་ལས་གཞི་ནི་རྒྱ་ནག་གི་རང་བྱུང་ཁོར་ཡུག་སྲུང་སྐྱོབ་ཀྱི་ཁྲིམས་ཡིག་དང་མི་མཐུན་པ་མ་ཟད་རྒྱལ་སྤྱིའི་ཁོར་ཡུག་གི་ཁྲིམས་ཡིག་རྣམས་ལ་ཡང་འགལ་ཡོད་པ་གསུངས་སོང་།

Latest news