རྒྱ་ནག

ཕ་རན་སི་ལྷོ་ཕྱོགས་གྲོང་ཁྱེར་ Pau ནང་རྒྱ་གཞུང་གི་ཁུང་རྩི་སློབ་གླིང་སྒོ་འབྱེད་གཉེར་བའི་ཉིན་མོར་ཕ་རན་སི་བོད་རང་བཙན་སློབ་ཕྲུག་ཚོགས་པ་དང་བོད་དོན་རྒྱབ་སྐྱོར་བས་ཁུལ་དེའི་གྲོང་ཁྱེར་སྤྱི་ཁྱབ་དང་ཆེས་སྡུག་རྩུབ་ཆེ་བའི་དབང་ཆ་གཅིག་བསྡུས་རིང་ལུགས་རྒྱ་ནག་གཉིས་དབར་གྱི་ལག་འབྲེལ་གྱིས་བྱ་སྤྱོད་སྤེལ་བར་ངོ་རྒོལ་གྱི་ལས་འགུལ་ཤུགས་ཆེ་གནང་འདུག ཁ་སང་ཕྱི་ཚེས་ ༢༨ ཉིན་གྱི་ཕྱི་དྲོ་ཕ་རན་སི་ལྷོ་ཕྱོགས་གྲོང་ཁྱེར་ Pau ནང་རྒྱ་ནག་གཞུང་ཚབ་པ་ Lu Shaye དང་ Pau གྲོང་ཁྱེར་སྤྱི་ཁྱབ་པ་ Francois Bayrou ལྷན་འཛོམས་ཐོག་གྲོང་ཁྱེར་དེར་རྟེན་གཞི་བྱས་པའི་ Pau གཙུག་ལག་སློབ་གཉེར་ཁང་དུ་ཁུང་རྩི་སློབ་གཉེར་སྒོ་འབྱེད་གཉེར་འདུག་པ་དང། སྐབས་དེར་བོད་རང་བཙན་སློབ་ཕྲུག་ཚོགས་པ་དང། France Tibet ཞེས་པའི་བོད་དོན་རྒྱབ་སྐྱོར་ཚོགས་པ། དེ་བཞིན་འགྲོ་བ་མིའི་ཐོབ་ཐང་རྩོད་ལེན་པའི་ཚོགས་པ་བཅས་ཀྱིས་བོད་ཀྱི་རྒྱལ་དར་དང། རྒྱ་གཞུང་གི་བྱ་སྤྱོད་ལ་སྐྱོན་བརྗོད་ཀྱི་ཕྲེད་དར་སོགས་བསྣམས་ཏེ་ཁུང་རྩི་སློབ་གླིང་ནི་རྒྱ་ནག་བཙན་རྒྱལ་རིང་ལུགས་ཀྱི་ལག་ཆ་གཙོ་བོ་རེད་ཅེས་ངོ་རྒོལ་གནང་འདུག སྐབས་དེར་འདི་ག་རླུང་འཕྲིན་ཁང་ནས་ཕ་རན་སི་བོད་རང་ཙན་སློབ་ཕྲུག་ཚོགས་པའི་ལས་འགུལ་བ་བསྟན་རྣམ་ལགས་ལ་གནས་འདྲི་ཞུས་པར་ཉེ་བའི་ལོ་ཤས་ནང་དུ་ཨ་མི་རི་ཀ་གཙོས་མང་གཙོའི་རྒྱལ་ཁབ་ཆེས་གྲས་ཁག་ཏུ་ཁུང་རྩི་སློབ་གླིང་དོག་ཟོན་གྱི་སྒོ་རྒྱག་བཞིན་པའི་གནས་སྟངས་འབྱུང་བཞིན་ཡོད་པ་དེ་ལྟར་ཡང། ཕ་རན་སི་ནང་དུ་ཆ་མཚོན་ན་ཉེ་བའི་ལོ་ཤས་ནང་ཁུང་རྩི་སློབ་གླིང་ལྟེ་གནས་ཁང་མང་དུ་འགྲོ་བཞིན་འདུག་ཅེས་ངོ་སྤྲོད་གནང་སོང་། རྩ་བའི་རྒྱ་ནག་གཞུང་འབྲེལ་གྱི་ཁུང་རྩི་སློབ་གླིང་ཞེས་པ་དེ་ནི་ཕྱིའི་རྒྱལ་ཁབ་ཁག་གི་མཐོ་སློབ་ཁག་ཏུ་རྒྱ་སྐད་དང་རྒྱ་ཡིག་སློབ་ཁྲིད་བྱེད་ཚུལ་གྱི་མིང་ཐོག་ནས་མཐོ་སློབ་ཁག་གི་ཤེས་ཡོན་སློབ་གསོའི་རང་དབང་ལ་ཐེ་གཏོགས་དང་འབྲེལ་རྒྱ་ནག་དམར་ཤོག་གི་ལྟ་སྤྱོད་དར་སྤེལ་དང་རྒྱལ་སྤྱིའི་ཁྲོད་རྒྱ་ནག་ལ་ལྟ་ཕྱོགས་འགྱུར་བ་གཏོང་ཐབས་བྱེད་བཞིན་པའི་རྒྱ་ནག་གི་འཇམ་པོའི་སྟོབས་ཤུགས་ལག་ཆ་གཙོ་བོ་ཞིག་ཆགས་ཀྱི་ཡོད་པ་རེད། བརྒྱུད་ལམ་ཁག་ཏུ་ཐོན་པར་གཞིགས་ན་ཁ་སང་སྒོ་འབྱེད་བྱས་པའི་ཁུང་རྩི་སློབ་གླིང་ཁང་དེ་ཕ་རན་ནང་དུ་ཁུང་རྩི་སློབ་གླིང་ ༢༠ པ་དེ་ཆགས་ཀྱི་ཡོད་པ་རེད་འདུག ད་རེས་གྲོང་ཁྱེར་ Pau ནང་དུ་ཁུང་རྩི་སློབ་གླིང་སྒོ་འབྱེད་ཀྱི་ཉིིན་གཉིས་ཀྱི་སྔ་རོལ་དུ་ལས་འགུལ་སྤེལ་མཁན་འབྲེལ་ཡོད་ཚོགས་པ་ཁག་ནས་མཉམ་འབྲེལ་གྱིས་ཐེངས་དེའི་ཤེས་ཡོན་མཉམ་འབྲེལ་གྱི་ལས་དོན་ལ་ངོ་རྒོལ་ཀྱིས་གསར་འགོད་གསལ་བསྒྲགས་ཤིག་ཀྱང་སྤེལ་འདུག གྲོང་ཁྱེར་ Pau ནང་དུ་ཁུང་རྩི་སློབ་གླིང་སྒོ་འབྱེད་བྱས་པའི་ཉིན་མོ་དེ་ནས་ཁུལ་དེའི་ནང་གི་ཤེས་ཡོན་གྱི་རང་དབང་ལ་དོ་ཕོག་འགྲོ་ཉེན་ཡོད་པ་དང། ལྷག་པར་དུ་ལན་ཁུང་རྩི་སློབ་ཁང་དང་ལག་འབྲེལ་བྱས་པ་འདིས་རྒྱ་ནག་གི་བཙན་གནོན་འོག་ཡོད་པའི་བོད་དང་ཡུ་གུར་སོགས་ཀྱི་མང་ཚོགས་ཀྱི་རང་དབང་དང་ཐོབ་ཐང་ལ་ཁྱད་གསོད་བྱས་པ་ཞིག་ཡིན་སྐོར་འགྲེལ་བརྗོད་གནང་འདུག གཞི་རྩའི་ཁུང་རྩི་སློབ་གླིང་ཞེས་པའི་ལས་འཆར་འདི་ནི་རྒྱ་ནག་གཞུང་འབྲེལ་ཤེས་ཡོན་ལྷན་ཁང་འོག་ཕྱི་ལོ་༢༠༠༤ ལོར་དངོས་སུ་ཆེད་བཙུགས་བྱས་ནས་ད་ལྟའི་ཆར་ལྷོ་བྱང་ཨ་མི་རི་ཀ་དང་ཡོ་རོབ། ཨ་ཕི་རི་ཀ། དེ་བཞིན་ཨོ་སི་ཊོ་ལི་ཡ་བཅས་འཛམ་གླིང་གི་གླིང་ཆེན་དྲུག་ནང་དུ་ =ཁུང་རྩི་སློབ་གླིང་ལྟེ་གནས་ཁང་ ༥༣༠ ལྷག་ཆེད་བཙུགས་བྱས་ཟིན་འདུག་པ་དང། རྒྱ་ནག་གཞུང་གི་འཆར་གཞི་ལྷར་ཕྱི་ལོ་ ༢༠༢༠ ནང་ཚུད་ལ་འཛམ་གླིང་ནང་དུ་ཁུང་རྩི་སློབ་གླིང་ལྟེ་གནས་ཁང་ ༡༠༠༠ ཆེད་འཛུགས་བྱ་འཆར་ཡོད་པ་རེད་འདུག འོན་ཀྱང་འདས་པའི་ལོ་ཤས་ནང་དུ་ཨ་རི་དང་ཁེ་ན་ཌ་སོགས་ཀྱི་མཐོ་སློབ་ཁག་ནས་རྒྱ་ནག་གི་ཁུང་རྩི་སློབ་གླིང་ལས་དོན་ལ་དོག་ཟོན་གྱིས་སྒོ་བརྒྱབ་པའི་གནས་ཚུལ་བྱུང་ཡོད་པ་རེད། དེ་བཞིན་ཨ་རིའི་ནང་ནང་རྟེན་གཞི་བྱས་པའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པས་འདི་ལོའི་ཕྱི་ཟླ་གསུམ་པའི་ནང་རྒྱ་ནག་གིས་ཐབས་བརྒྱ་བྱུས་སྟོང་གིས་ཁུང་རྩི་ཤེས་ཡོན་ལྟེ་གནས་ཆེད་འཛུགས་ཀྱིས་ཕྱི་ཕྱོགས་སུ་རྒྱ་ནག་གི་གནོད་ཤུགས་ཁྱབ་སྤེལ་དང་ཤེས་ཡོན་གྱི་རང་དབང་ཉམ་དམས་སུ་གཏོང་བཞིན་ཡོད་པ་གསལ་འདོན་དང་སྦྲགས། ཕྱི་ཕྱོགས་ཀྱི་མཐོ་སློབ་དང་གཙུག་ལག་སློབ་ཆེན་སོགས་ཀྱིས་ལག་བསྟར་བྱེད་དགོས་པའི་སྒྲིག་ཡིག་དོན་ཚན་བཅུ་གཉིས་ཅན་ཞིག་ཁྱབ་བསྒྲགས་ཀྱིས་རྒྱ་ནག་གི་གནོད་ཤུགས་ལ་བཀག་འགོག་བྱེད་དགོས་པ་ཡང་གསུངས་ཡོད་པ་རེད།

བོད་ཀྱི་ཟློས་གར་ཚོགས་པ་དབུ་བརྙེས་ནས་མི་ལོ་ ༦༠ འཁོར་བ་དང་བསྟུན་དུས་ཆེན་སྲུང་བརྩིའི་ཆ་ཤས་སུ་དེ་རིང་ཕྱི་ཟླ་ ༡༠ ཚེས་ ༢༨ ཉིན་གྱི་སྔ་དྲོ་ཚོུད་ ༡༠ པ་ཡོལ་ཙམ་ལ་བོད་ཀྱི་ཟློས་གར་ཚོགས་པའི་ཚོགས་ཁང་གསར་པར་བོད་ཀྱི་སྲིད་བྱུས་ཉམས་ཞིབ་ཁང་དང་ ཨ་མྱེས་རྨ་ཆེན་བོད་ཀྱི་རིག་གཞུང་ཞིབ་འཇུག་ཁང་གི་འགན་འཛིན་ལོ་རྒྱུས་སྨྲ་བ་མཁས་དབང་བཀྲིས་ཚེ་རིང་ལགས་ཀྱིས་གོ་སྒྲིག་གནང་ཐོག་རྒྱལ་སྤྱིའི་བོད་ཀྱི་ཟློས་གར་སྒྱུ་རྩལ་ཞིབ་འཇུག་བགྲོ་གླེང་ཚོགས་ཆེན་ཐེངས་དང་པོའི་དབུ་འབྱེ་མཛད་སྒོ་ཞིག་བསྐོང་ཚོགས་གནང་སོང་བ་དང་། སྐབས་དེར་སྐུ་མགྲོན་གཙོ་བོ་ཨ་རིའི་རྒྱལ་སྤྱིའི་ཆོས་དད་རང་དབང་གི་སྐུ་ཚབ་སྐུ་ཞབས་ Sam Brownback མཆོག་གིས་གཙོས་པའི་སྲིད་སྐྱོང་མཆོག་དང་ཕྱག་སྦྲེལ་བཀའ་བློན་རྣམ་པ། བོད་ཀྱི་ཟློས་གར་ཚོགས་པའི་སློབ་ཟུར་བཅས་ཁྱོན་མི་གྲངས་བརྒྱ་ཕྲག་ཁ་ཤས་ཤིག་འདུ་འཛོམས་གནང་སོང་། སྐབས་དེར་ཨ་རིའི་རྒྱལ་སྤྱིའི་ཆོས་དད་རང་དབང་གི་སྐུ་ཚབ་སྐུ་ཞབས་ Sam Brownback མཆོག་གིས་ཐེངས་འདིའི་མཛད་སྒོའི་སྐུ་མགྲོན་གཙོ་བོ་དང་སྔ་དྲོ་༸གོང་ས་༸སྐྱབས་མགོན་ཆེན་པོ་མཆོག་གི་མཇལ་ཁ་ཞུ་རྒྱུ་སྐལ་བཟང་གོ་སྐབས་བྱུང་ཞེས་གསུངས་ཏེ་སྐབས་དེར་༸གོང་ས་མཆོག་གིས་བྱམས་པ་དང་བརྩེ་བ། དྲང་བདེན་གྱི་ཐོག་ནས་སྤྱི་ཚོགས་ནང་གི་སེམས་ཅན་རྣམས་ཕན་ཚུན་གཅིག་ལ་གཅིག་བརྟེན་ཐོག་ནས་གནས་དགོས་གལ་གྱི་བཀའ་བསྩལ་སྐོར་གསུངས་པ་དང་འབྲེལ། མགོན་པོ་མཆོག་ནི་འཛམ་གླིང་སྤྱིར་མིག་ལྟོས་བཟང་ཤོས་ཤིག་དང་འཛམ་གླིང་འདིའི་ནང་༸གོང་ས་མཆོག་ལས་སྙིང་སྟོབས་ཆེ་བ་སུ་གང་ཡང་མེད་པ་མ་ཟད་བོད་ཀྱི་གནད་དོན་དང་འབྲེལ་བའི་མ་འོངས་བོད་ཀྱི་མདུན་ལམ་ཐད་ལའང་༸གོང་ས་༸སྐྱབས་མགོན་ཆེན་པོ་མཆོག་ལས་ལྷག་པའི་དབུ་ཁྲིད་གཞན་མེད་པ་གསུངས་སོང་། ཁོང་གིས་བོད་ཀྱི་ཆོས་དང་རིག་གཞུང་། སྐད་ཡིག་བཅས་ནི་དམིགས་བསལ་ཞིག་ཡིན་པ་དང་བོད་ཀྱི་རིག་གཞུང་ལ་རྒྱ་ནག་གཞུང་ནས་དོ་ཕོག་ཤུགས་ཆེར་གཏོང་བཞིན་པར་ཨ་རིའི་གཞུང་ནས་གདུང་སེམས་མཉམ་བསྐྱེད་དང་འབྲེལ་ཏེ་རྒྱ་ནག་གཞུང་ནས་གཞི་རྩའི་འགྲོ་བ་མིའི་ཐོབ་ཐང་ལ་གུས་བརྩིས་རང་ཉིད་ཀྱི་ཁྲིམས་ལ་བརྩི་སྲུང་བྱས་ནས་ཆོས་དད་རང་དབང་ལ་སྲུང་སྐྱོབ་བྱེད་དགོས་པ་དང་། ༸ཀུན་གཟིགས་པཎ་ཆེན་དགེན་འདུན་ཆོས་ཀྱི་ཉི་མ་མཆོག་གློད་བཀྲོལ་དགོས་པ། རིན་པོ་ཆེ་མཆོག་གི་ད་ལྟའི་གནས་བབས་རྣམས་ཇི་ལྟར་ཡིན་པ་ཁ་གསལ་འགྲེལ་བརྗོད་དགོས་པ་གསུངས་སོང་བ་མ་ཟད་རྒྱལ་སྤྱིའི་ཁྲོད་ཀྱི་ནང་པའི་ཡུལ་ལུང་སྟེ་ཐེ་ཝན་དང་ཝི་ཏི་ནམ། ཤྲི་ལངྒ་དང་སོག་པོ་བཅས་ནས་བོད་ནང་གི་ཆོས་དད་རང་དབང་ལ་དམ་དྲག་ཤུགས་ཆེར་བྱེད་བཞིན་པ་དང་དེའི་རྐྱེན་པས་གཞིས་བཞུགས་བོད་རིགས་ཚོར་དཀའ་ངལ་ཤུགས་ཆེར་འཕྲད་བཞིན་པ་ལ་གཟིགས་རྟོག་གནང་དགོས་པའི་སྐུལ་མ་གནང་སོང་། དེ་བཞིན་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ཨ་རིའི་རྒྱལ་སྤྱིའི་ཆོས་དད་རང་དབང་གི་སྐུ་ཚབ་སྐུ་ཞབས་ Sam Brownback མཆོག་གིས་གཙོས་པའི་ཕྱག་སྦྲེལ་རྣམས་བོད་ཀྱི་ཟློས་སྒར་ཚོགས་པར་ཕེབས་མཁན་གྱི་སྐུ་མགྲོན་ཆེས་ཐོག་མ་ཙམ་མ་ཟད་དྷ་རྨ་ས་ལར་ཨ་རིའི་གཞུང་འབྲེལ་གྱི་ཆེས་མཐོ་མི་སྣ་དང་པོ་གྲས་སུ་ཕེབས་མཁན་ཞིག་ཡིན་པར་དགའ་བསུའི་འཚམས་འདྲི་ཞུས་པ་དང་འབྲེལ། ༸གོང་ས་མཆོག་གི་བཀའ་དགོངས་ལམ་སྟོན་འོག་བོད་ཀྱི་ཟློས་གར་ཚོགས་པ་ཐོག་མར་དབུ་བརྙེས་སྟངས་དང་རིམ་བཞིན་རྒྱལ་སྤྱིའི་ཁྲོད་ཁྱབ་སྤེལ་ཆེན་པོ་ཕྱིན་ཚུལ་སོགས་རྒྱབ་ལྗོངས་ཀྱི་ལོ་རྒྱུས་ཁག་ངོ་སྤྲོད་གནང་ཡོད། སྲིད་སྐྱོང་མཆོག་གིས་ཐེངས་འདིའི་དབུ་འབྱེད་མཛད་སྒོའི་ཐོག་ཨ་རིའི་རྒྱལ་སྤྱིའི་ཆོས་དད་རང་དབང་གི་སྐུ་ཚབ་ཆེད་དུ་ཕེབ་ས་པ་ནི་ཆོས་དད་རང་དབང་ཞེས་པ་ནི་རྒྱལ་སྤྱིའི་རང་བཞིན་ཞིག་མཚོན་གྱི་ཡོད་པ་དང་། ལྷག་པར་དུ་རྒྱ་ནག་གཞུང་ལ་ཨ་རིའི་གཞུང་དེ་བོད་དང་མཉམ་དུ་ཡོད་པའི་བརྡ་ལན་ཞིག་སྤྲོད་ཀྱི་ཡོད་པ་རེད། བོད་ནང་གི་བོད་མི་ཚོས་དུས་རྟག་ཏུ་གཏམ་བཟང་ལ་ངང་སྒུག་གནང་དང་གནང་བཞིན་པར་རེ་བ་སྐྲུན་མཁན་ཞིག་དང་། བོད་མིར་གདུང་སེམས་མཉམ་བསྐྱེད་ཀྱི་མཚོན་དོན་ནམ་བརྡ་ལན་རླབས་པོ་ཆེ་ཞིག་ཡིན་སྐོར་གསུངས་སོང་། རྩ་བའི་རྒྱལ་སྤྱིའི་བོད་ཀྱི་ཟློས་གར་སྒྱུ་རྩལ་ཞིབ་འཇུག་བགྲོ་གླེང་ཚོགས་ཆེན་ཐེངས་དང་པོ་དེ་ཉིན་གསུམ་གྱི་རིང་ གནང་གི་ཡོད་པ་དང་། སྐབས་དེར་བརྗོད་གཞི་མི་འདྲ་བ་དགུའི་ཐོག་དུ་མཁས་དབང་མི་སྣ་ ༢༣ ཙམ་ནས་གཏམ་བཤད་གནང་རྒྱུ་ཡིན་པ་དང་། སང་ཉིན་༸གོང་ས་སྐྱབསམགོན་ཆེན་པོ་མཆོག་ཆིབས་བསྒྱུར་གྱིས་བོད་ཀྱི་ཟློས་གར་ཚོགས་པའི་ཚོགས་ཁང་གསར་པ་དབུ་འབྱེད་རབ་གནས་མཛད་ཀྱི་ཡོད་པ་རེད།

ཐེ་ཝན་མི་མང་ཆབ་སྲིད་ཚོགས་པའི་ཚོགས་གཙོ་དང་ཐེའི་པའི་གྲོང་སྡེའི་སྤྱི་ཁྱབ་པ་ Ko Wen-je ཡིས་ཉེ་ལམ་སྤྱི་ཚོགས་ནང་རང་ཤི་རྒྱག་མཁན་མང་དུ་འགྲོ་བཞིན་པའི་གནད་དོན་དང་འབྲེལ། རང་སྲོག་བཅད་མཁན་ཚོར་ཁྱད་གསོད་ལྟ་བུའི་བཀའ་མོལ་གནང་སྟངས་ཤིག་གི་འགྲོས་ལ་འབྲེལ་ཡོད་ཚོགས་སྡེ་ཁག་གཅིག་ནས་སྐྱོན་བརྗོད་ཤུགས་ཆེ་གནང་འདུག་པ་མ་ཟད་ཁོང་གིས་སྐབས་དེར་ད་དུང་བོད་ནང་རང་ལུས་མེར་བསྲེགས་ཀྱི་གནད་དོན་འབྱུང་བཞིན་པའི་ཐོག་བཀའ་མོལ་གནང་སྟངས་ཤིག་ལ་ས་གནས་བོད་མི་རྣམས་ནས་ཀྱང་སྐྱོན་བརྗོད་ཤུགས་ཆེ་གནང་འདུག སྐུ་ཞབས་ཀོ་ལགས་ཀྱིས་དེ་རིང་རང་ཉིད་ཀྱི་རྒྱབ་སྐྱོར་བ་ཁག་གཅིག་དང་ཐུགས་འཕྲད་སྐབས་སུ་ཐེའི་པའི་གྲོང་སྡེའི་ནང་ལོ་ཤས་གོང་ནས་རང་ལུས་མེར་བསྲེགས་གནང་བའི་རྐྱེན་གྱིས་ཁང་པར་མེར་འཚིག་པའི་གནས་ཚུལ་མང་དག་ཅིག་འཐོན་བཞིན་སྐོར་གསུངས་པ་དང་སྦྲགས། གལ་ཏེ་གང་ཟག་སུ་ཞིག་རང་བསྲེག་གནང་འདོད་ཡོད་ཚེ་རྒྱུག་ཆུའི་ཟུར་གྱི་གླིང་ཁ་ལྟ་བུ་མི་མེད་གནས་དབེན་པར་གནང་བ་ལས་འདུ་ཚོགས་ཆེ་སར་མ་གནང་རོགས་ཞེས་གསུངས་པ་མ་ཟད། ཁང་པའི་ནང་རང་ལུས་མེར་བསྲེག་གཏང་བ་ལས་གཉིད་སྨན་སྤྱོད་ནས་རང་སྲོག་བཅད་ན་ལེགས་པའི་འབོད་སྐུལ་ཡང་གནང་ཡོད་པ་རེད། མ་ཟད་ཁོང་གིས་སྐབས་དེར་གཏམ་བཤད་ཀྱི་ཞོར་ལ་བོད་ནང་གི་རང་ལུས་མེར་བསྲེགས་གནང་བའི་གནད་དོན་ལུང་འདྲེན་དང་འབྲེལ་ཏེ་བོད་ནང་ལ་དགེ་འདུན་པ་མང་དག་ཅིག་གིས་བོད་དོན་ཆེད་དུ་རང་བསྲེགས་གནང་སྟེ་རང་ཤི་རྒྱག་གི་ཡོད་པ་དེ་རིམ་བཞིིན་དར་སྲོལ་ལྟ་བུར་གྱུར་ཡོད་ཅེས་གསུངས་ཏེ་ད་ལྟའི་ཆར་བོད་མི་བརྒྱ་ལྷག་གིས་རང་བསྲེགས་གནང་ཡོད་པ་དེས་རྒྱ་ནག་གཞུང་ལ་དཀའ་རྙོག་ཧ་ཅང་ཆེན་པོ་བཟོས་ཡོད་པ་དང་། རང་སྲེག་ནི་རང་ཤི་རྒྱག་རྒྱུའི་ཐབས་ལམ་ཡག་ཤོས་དེ་མ་རེད་ཅེས་གསུངས་འདུག སྐུ་ཞབས་ཀོ་ལགས་ཀྱིས་བཀའ་མོལ་དེ་ལྟར་གནང་མ་ཐག་ཏུ་ཐེ་ཝན་གྱི་ Society of Suicidology དང་ Society of Psychiatry དེ་བཞིན་ཐེ་ཝན་སེམས་ངལ་འགོག་པའི་ཚོགས་པ་གསུམ་གྱིས་ཁོང་ནས་བཀའ་མོལ་གནང་ཕྱོགས་དེར་སྐྱོན་བརྗོད་ཤུགས་ཆེ་དང་འབྲེལ། ཆབ་སྲིད་པ་དང་མི་མང་ཚོས་རང་ཤི་རྒྱག་མཁན་ཚོར་སྐྱོན་བརྗོད་དང་ཁོ་ཚོར་ཁྱད་གསོད་རིགས་མ་གནང་བར་དེའི་ཚབ་ཏུ་བྱམས་བརྩེའི་ཐོག་ནས་རང་ཤི་རྒྱག་རྒྱུའི་ལས་དོན་འགོག་ཐབས་གནང་དགོས་པའི་ནན་སྐུལ་གནང་འདུག ཚོགས་པ་དེ་དག་གིས་ད་དུང་ཐེ་ཝན་ནང་ The Suicide Prevention Act ཞེས་པ་རང་ཤི་རྒྱག་རྒྱུར་སྔོན་འགོག་གི་ཁྲིམས་གཞི་དེ་ལག་བསྟར་བྱས་ནས་ལོ་ངོ་ ༡༤ ཕྱིན་ཡོད་སྐོར་གསུངས་ཏེ་རང་ཤི་རྒྱག་རྒྱུའི་གནད་དོན་དེ་འཛམ་གླིང་སྤྱིའི་གནས་དོན་ཞིག་ཡིན་པ་དང་། དེས་ན་དབུས་གཞུང་དང་འཛིན་སྐྱོང་། སྤྱི་ཚོགས་བདེ་འཇགས། འཕྲོད་བསྟེན་གྱི་སྡེ་ཁག དེ་བཞིན་མང་ཚོགས་སོགས་ཁྱོན་ཡོངས་ཀྱིས་ཐུགས་འཁུར་ཆེ་བཞེས་ཀྱིས་གནད་དོན་དེ་རིགས་སྔོན་འགོག་གནང་དགོས་གལ་ཡིན་པ་གསུངས་མ་ཟད། སྐབས་རེ་རང་ཤི་རྒྱག་པའི་གནད་དོན་བྱུང་སྐབས་མང་ཚོགས་ཀྱི་བདེ་འཇགས་ལ་བརྡབས་སིག་འགྲོ་ཡོད་ཀྱང་གཞུང་དང་མང་ཚོགས་ནས་དེ་འབྲེལ་ཐོག་བྱམས་སྐྱོང་གི་རྣམ་པ་མང་བ་ཆེད་འདོན་གནང་སྟེ་ཁོ་ཚོར་རྒྱབ་སྐྱོར་དང་ལས་དོན་དེ་རིགས་སྔོན་ཚུད་ནས་འགོག་ཐབས་གནང་བ་ལས་སྐྱོན་བརྗོད་རིགས་གནང་རྒྱུ་མེད་པའི་གཞེན་སྐུལ་གནང་འདུག དེ་བཞིན Human Rights Network for Tibet and Taiwan ཞེས་བོད་དང་ཐེ་ཝན་གྱི་འགྲོ་བ་མིའི་ཐོབ་ཐང་འབྲེལ་མཐུད་ཁང་གི་ངོས་ནས་ཀྱང་ཐེའི་པའི་གྲོང་སྡེའི་སྤྱི་ཁྱབ་པ་ Ko Wen-je ལ་སྐྱོན་བརྗོད་ཤུགས་ཆེ་གནང་བ་དང་ཆབས་ཅིག བོད་ནང་གི་བོད་མི་ཚོས་རྒྱ་ནག་གཞུང་གིས་བོད་མི་དག་ལ་དྲག་གནོན་བཟོད་པར་དཀའ་བ་བྱས་དང་བྱེད་པའི་གནས་སྟངས་དེ་དག་ལ་མི་འདོད་པའི་རྣམ་པ་མངོན་གསལ་གནང་ཆེད་དུ་རང་ཉིད་ཀྱི་གཅེས་པའི་ལུས་སྲོག་བློས་བཏང་གིས་རང་སྲེག་གི་ཐབས་ལམ་སྤྱོད་པ་ལས་དེ་དར་སྲོལ་ལམ་དཔེ་གསར་གྱི་གནད་དོན་གང་ཡང་མིན་པའི་འགྲེལ་བརྗོད་གནང་འདུག གང་ལྟར་ཐེའི་པའི་ས་གནས་གཞུང་གི་མགྲིན་ཚབ་པ་གཞོན་པ་ Tai Yu-wen ཡིས་ད་རེས་ཚོགས་པ་ཁག་གིས་སྐུ་ཞབས་ Ko Wen-je  ནི་སྨན་པ་ཞིག་ཡིན་པས་རྣམ་ཀུན་ནས་གྲངས་ཉུང་མི་རིགས་དག་གི་གནས་བབས་ལ་ཐུགས་སྣང་གནང་མཁན་ཞིག་ཡིན་སྐོར་འགྲེལ་བརྗོད་གནང་བ་དང་འབྲེལ། ཁོང་གི་ངོས་ནས་ཚོགས་པ་དེ་དག་གི་ལམ་སྟོན་ལ་དགོངས་བཞེས་དང་ལྷག་པར་དུ་སྤྱི་ཚོགས་ཁྲོད་གནད་དོན་དེ་འབྲེལ་ངལ་བ་སེལ་བར་ས་གནས་ཀྱི་འབྲེལ་ཡོད་ཚོགས་པ་ཁག་དང་འབྲེལ་བ་འཛུགས་ཐབས་ངེས་པར་དུ་གནང་གི་རེད་ཅེས་གསུངས་འདུག གཞི་རྩའི་སྐུ་ཞབས་ཀོ་ལགས་ཀྱིས་ཐེའི་པའི་ནང་ཕྱི་ལོ་ ༢༠༡༧ ལོར་འགྲིམ་འགྲུལ་གྱི་དོན་རྐྱེན་ཁྲོད་གྲོངས་པའི་བརྒྱ་ཆ་དེ་ཧ་ཅང་ཉུང་ཉུང་ཆགས་ཡོད་པ་དེ་ལྟར་ཡང་། ལོ་སྔོན་མ་དང་འདི་ལོར་གྲངས་འབོར་དེ་ཧ་ཅང་འཕར་བ་དང་། དེའང་སྤྱི་ཚོགས་ཁྲོད་ནས་མཐའ་ཟུར་གནས་པའི་གང་ཟག་དང་མྱོས་རྫས་ངན་གོམས་སྤྱོད་མཁན་འབའ་ཞིག་གི་རྐྱེན་པས་ཡིན་སྐོར་བཤད་པ་དང་ཆབས་ཅིག་ཏུ་ཁོང་གིས་རང་སྲེག་གི་གནད་དོན་སྐོར་གྱི་བཀའ་མོལ་དེ་ནི་གཙོ་བོ་རང་ཤི་རྒྱག་སྟངས་ཀྱི་ཐབས་ལམ་དེས་གཞན་ལ་དོ་ཕོག་ཚབས་ཆེན་བཏང་གི་ཡོད་རྐྱེན་གསུངས་ཡོད་པ་ཞིག་ཡིན་སྐོར་དག་སེལ་གནང་འདུག  

དེ་རིང་གསར་ལམ་ཁག་ཏུ་གསར་འགྱུར་ཐོན་པ་ལྟར་ན།   FIFA  ཞེས་པའི་རྒྱལ་སྤྱིའི་རྐང་སྤོལ་འགྲན་ཚོགས་ཆེ་ཤོས་ཀྱི་འཛིན་སྐྱོང་སྡེ་ཚན་གྱིས་བདུན་ཕྲག་སྔོན་མའི་རེས་གཟའ་ཕུར་བུའི་ཉིན་སྤྱི་ལོ་  ༢༠༢༡ ལོར།  FIFA club world cup ཞེས་པའི་གླིང་ཕྲན་སོ་སོའི་རྐང་སྤོལ་རུ་ཁག་རྩེ་ཕུད་ཀྱི་འགྲན་ཚོགས་དེ་རྒྱ་ནག་ཏུ་འཚོགས་རྒྱུ་ཡིན་སྐོར་གསལ་བསྒྲགས་བསྐྱངས་བ་ལྟར།   ཁ་སང་རྒྱལ་སྤྱིའི་ཉེས་ཡང་ཚོགས་པའི་ངོས་ནས་རྒྱ་ནག་དུ་རྐང་སྤོལ་འགྲན་བསྡུར་དེ་འཚོགས་ན་འོས་བབ་མེད་པར་བརྟེན་ཐག་གཅོད་དེ་ཕྱིར་འཐེན་བྱེད་དགོས་བའི་ཞུ་སྐུལ་གནང་འདུག རྒྱལ་སྤྱིའི་ཉེས་ཡང་ཚོགས་པའི་དབྱིན་ཡུལ་གྱི་སྲིད་བྱུས་དང་འཛིན་སྐྱོང་གི་འགན་འཛིན།  སྐུ་ཞབས་ Allan Hogarth ལགས་ཀྱིས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་བབ་དེ་ཡ་ང་བའི་གནས་སྟངས་ཀྱི་འོག་ཏུ་ཡོད་པར་བརྟེན།  སྤྱི་ལོ་ ༢༠༢༡ ལོའི་རྒྱལ་སྤྱིའི་རྐང་སྤོལ་འགྲན་ཚོགས་ཏེ་རྒྱ་ནག་ཏུ་འཚོགས་གཏན་འཁེལ་ཚེ། རྒྱ་ནག་གིས་གོ་སྐབས་དེ་འཇུས་བའི་ཐོག་རྒྱལ་སྤྱིའི་ཐོག་ནས་རྒྱ་ནག་ལ་གཟིགས་ཕྱོགས་ཡག་པོ་མེད་པ་དེར་འགྱུར་བ་གཏོང་རྒྱུ་ཡིན་སྐོར་འགྲེལ་བརྗོད་བྱས་ཏེ།  རྒྱ་ནག་ལ་རྒྱལ་སྤྱིའི་རྐང་སྤོལ་འགྲན་ཚོགས་གོ་སྒྲིག་ཞུ་རྒྱུའི་ཆ་རྐྱེན་ཚང་མེད་སྐོར་ཡོངས་གྲགས་གནང་འདུག ཁོང་གིས་ད་དུང་།  རྩ་བའི་རྒྱ་ནག་ནང་གི་དངོས་ཡོད་གནས་སྟངས་ནི་མུན་ནག་རང་བཞིན་ཀྱི་བཀག་སྡོམ་དང་། སྲིད་གཞུང་གི་ལྟ་བ་དང་མི་མཐུན་པ་རྣམས་འཛིན་བཟུང་།  དེ་བཞིན་ཡུ་གུར་བ་སྟོང་ཕྲག་མང་པོ་བཀག་སྐྱིལ་བྱས་ཡོད་ནའང་། ཐེངས་འདིའི་རྐང་སྤོལ་རྩེད་འགྲན་གྱི་གོ་སྐབས་དེ་བརྒྱུད་ནས་རྒྱ་ནག་གི་དཔོན་རིགས་རྣམས་ཀྱིས་རྒྱ་ནག་གི་རྒྱལ་ཁབ་ནི་བཟོད་བསྲན་དང་གུ་ཡངས་ཀྱི་སྤྱི་ཚོགས་ཤིག་ཡིན་པའི་རྣམ་པ་ཕྱིར་སྟོན་རྒྱུ་ཡིན་སྐོར་ཡང་འགྲེལ་བརྗོད་བྱས་ཏེ།   རྒྱ་ནག་ནང་གི་འགྲོ་བ་མིའི་ཐོབ་ཐང་གི་ཟིན་ཐོ་ནི་ཡ་ང་བའི་གནས་བབ་ཀྱི་འོག་ཏུ་ཡོད་པར་བརྟེན།  FIFA རྐང་སྤོལ་རྩེད་འགྲན་གྱི་འཛིན་སྐྱོང་གིས་ངེས་བར་དུ་རྒྱ་ནག་ལ་གནོད་ཤུགས་སྤྲད་པའི་ཐོག་ནས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་བབ་ཡར་རྒྱས་གོང་འཕེལ་དུ་གཏོང་དགོས་བར་བརྗོད་འདུག དེ་བཞིན་ཨ་རིའི་གྲོས་ཚོགས་གོང་མའི་འཐུས་མི།   སྐུ་ཞབས་ Rick Scott  ལགས་ཀྱིས་ཀྱང་ཐེངས་འདིའི་རྐང་སྤོལ་འགྲན་ཚོགས་རྒྱ་ནག་ཏུ་སྐོང་རྒྱུ་ཡིན་པའི་གནས་ཚུལ་དང་འབྲེལ་ནས། FIFA ཚོགས་པ་ལ་སྐྱོན་བརྗོད་བྱས་པ་མ་ཟད།  རྒྱལ་སྤྱའི་ཨོ་རྩལ་འགྲན་ཚོགས་ཀྱི་ཚོགས་གཙོའི་མཚན་ཐོག་ཏུའང་ཞུ་ཡིག་ཅིག་ཕུལ་ཏེ།   རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཆེས་ཉམ་ང་བའི་གནས་བབ་ཅིག་ཏུ་ཡོད་པ་མ་ཟད།  རྒྱ་ནག་གིས་ཉེ་སྔོན་ NBA ཞེས་པའི་བྱང་ཨ་མི་རི་ཀའི་རྒྱལ་ཡོངས་སིལ་སྤོལ་མཐུན་ཚོགས་ཀྱི་ཚོགས་མི་ཡིན་པ་Houston Rockets རུ་ཁག་གི་འགན་འཛིན་སྐུ་ཞབས་ Daryl Morey ལགས་ཀྱི་ཚིག་བརྗོད་དང་འབྲེལ་བའི་རྙོག་གླེང་བསླངས་ཡོད་པར་བསྒྲགས་ཏེ།  རྒྱ་ནག་གིས་ཁྲིམས་མཐུན་གྱི་ཐོག་ནས་འགྲོ་བ་མིའི་ཐོབ་ཐང་ལ་བརྩི་བཀུར་ཞུ་རྒྱུའི་ཆ་རྐྱེན་མ་ཚང་བར་དུ།  སྤྱི་ལོ་ ༢༠༢༢ ལོའི་དགུན་དུས་ཀྱི་ ཨོ་རྩལ་འགྲན་ཚོགས་དེ་རྒྱ་ནག་ཏུ་འཚོགས་པར་འོས་བབ་མེད་སྐོར་འགྲེལ་བརྗོད་གནང་འདུག གསར་ཁང་གི་ངོས་ནས་ཀྱང་། རྒྱལ་སྤྱིའི་རྐང་སྤོལ་རྩེད་འགྲན་དེ་རྒྱ་ནག་ཏུ་སྐོང་འཚོགས་བྱེད་རྒྱུའི་ཁྱབ་བསྒྲགས་དང་ལྷན་དུ།  རྒྱ་ནག་གི་འགྲོ་བ་མིའི་ཐོབ་ཐང་གི་གནས་བབ་སྤྱི་དང་། སྒོས་སུ་རྒྱ་ནག་གིས་ཡུ་གུར་བ་བཀག་སྡོམ་དང་ཧོང་ཀོང་གི་མང་གཙོའི་ལས་འགུལ་བར་དམ་དྲག་སོགས་ཀྱི་ཐད་ནས་རྒྱ་ནག་ལ་སྐྱོན་བརྗོད་བྱེད་མཁན་མང་པོ་བྱུང་ཡོད་པར་འཁོད་འདུག རྩ་བའི་སྤྱི་ལོ་ ༢༠༢༡ ལོའི་རྒྱལ་སྤྱིའི་རྐང་སྤོལ་འགྲན་ཚོགས་ཏུ་རུ་ཁག་ ༢༤ ཞུགས་རྩིས་ཡོད་པ་དང་།  དེ་དག་ལས་རུ་ཁག་བརྒྱད་ནི་སྔོན་ཆད་རྐང་སྤོལ་འགྲན་བསྡུར་ལས་རྣམ་པར་རྒྱལ་བའི་རུ་ཁག་རྐྱང་ཡིན་པ་མ་ཟད།   ཡོ་རོབ་ནང་གི་རྐང་སྤོལ་རུ་ཁག་གྲགས་ཅན། Liverpool དང་Chelsea གཉིས་ཀྱང་ཐེངས་འདིའི་རྒྱལ་སྤྱིའི་རྐང་རྩེད་འགྲན་བསྡུར་ལ་ཞུགས་རྩིས་ཡོད་པ་རེད་འདུག

བདུན་ཕྲག་སྔོན་མའི་རེས་གཟའ་ལྷག་པའི་ཉིན་ཨ་མི་རི་ཀའི་སྲིད་འཛིན་སྐུ་ཞབས་ Donald Trump མཆོག་གིས་སྣེ་ཁྲིད་པའི་ཨ་རིའི་སྲིད་གཞུང་གི་ངོས་ནས་ཨ་རི་ནང་ཡོད་པའི་རྒྱ་ནག་གཞུང་གི་གཞུང་འབྲེལ་སྐུ་ཚབ་གཙོས་པའི་ཕྱི་འབྲེལ་མི་སྣ་རྣམས་ནས་ཨ་རིའི་དབུས་དང་ས་གནས་། དེ་བཞིན་མངའ་སྡེ་བཅས་ཀྱི་གཞུང་འབྲེལ་མི་དང་ཨ་རིའི་ས་ཐོག་ཏུ་ཡོད་པའི་ཤེས་ཡོན་དང་ཉམས་ཞིབ་ལྟེ་གནས་ཁག་གི་ལས་བྱེད་སོགས་དང་འབྲེལ་བ་རིགས་མ་གནང་བའི་གོང་དུ་ཨ་རིའི་ཕྱི་སྲིད་ལས་ཁུངས་ལ་སྙན་སེང་ཞུ་དགོས་པའི་སྒྲིག་ཁྲིམས་གསར་པ་ཞིག་ཡོངས་ཁྱབ་གནང་ཡོད་པ་རེད།  ཨ་རི་སྲིད་གཞུང་གི་སྒྲིག་གཞི་གསར་པ་དེ་ཡོངས་ཁྱབ་གནང་མཚམས་སུ་ཨ་རིའི་རྒྱལ་ས་ Washington DC ནང་ཡོད་པའི་རྒྱ་ནག་གཞུང་ཚབ་པ་ Cui Tiankai ཡིས་ཨ་རིའི་སྒྲིག་གཞི་དེ་ནི་ཝྭི་ཡ་ནའི་རྒྱལ་སྤྱིའི་ཆིངས་ཡིག་གི་དགོངས་དོན་དང་འགལ་ཟླ་ཆགས་ཀྱི་ཡོད་པ་སོགས་སྐྱོན་བརྗོད་རིམ་པ་བྱས་ཡོད་ཀྱང་ཁ་སང་རྒྱ་ནག་ནང་ཡོད་པའི་ཨ་རིའི་གཞུང་ཚབ་པ་སྐུ་ཞབས་ Terry Branstad ལགས་ཀྱིས་ཨ་རིས་རྒྱ་ནག་གི་ཕྱི་འབྲེལ་མི་སྣའི་ཐོག་བཟོས་པའི་སྒྲིག་ཁྲིམས་གསར་པ་དེ་ནི་ཚུལ་དང་མཐུན་པ་ཞིག་ཡིན་པ་དང་། སྒྲིག་ཁྲིམས་དེ་ནི་གཙོ་བོ་རྒྱ་ནག་གཞུང་གི་དམ་དྲག་ལམ་ལུགས་འོག་ཕྱག་ལས་གནང་བཞིན་པའི་ཨ་རིའི་གཞུང་ཚབ་པ་དང་ཕྱི་འབྲེལ་མི་སྣ་ཚོར་ཅུང་གུ་ཡུངས་ཐོབ་རྒྱུར་དམིགས་པ་ཞིག་ཡིན་སྟབས་རྒྱ་གཞུང་ནས་ཨ་རིའི་ཕྱི་འབྲེལ་མི་སྣར་དམ་དྲག་བྱེད་བཞིན་པ་དག་ལྷོད་དུ་གཏང་རྒྱུར་རེ་བ་ཡོད་ཅེས་གསུངས་འདུག སྐུ་ཞབས་ Terry Branstad ལགས་ཀྱིས་ད་དུང་དེ་སྔ་རྒྱ་ནག་གཞུང་ནས་ཁོང་བོད་ནང་བསྐྱོད་རྒྱུར་ཆོག་མཆན་མ་སྤྲད་པའི་གནས་སྟངས་ཐེངས་གཉིས་བྱུང་ཡོད་པ་དང་ཕྱི་ལོ་ ༢༠༡༨ ལོར་བོད་ནང་བསྐྱོད་རྒྱུའི་ཆོག་མཆན་སྤྲད་ཡོད་ཀྱང་བོད་མཚོ་སྔོན་དུ་འབྱོར་སྐབས་རྒྱ་ནག་གཞུང་འབྲེལ་མི་སྣ་ཚོས་ས་གནས་ཀྱི་ཇ་ཁང་དང་མི་མང་རྣམས་ལ་སྔོན་ཚུད་ནས་ཨ་རིའི་གཞུང་འབྲེལ་མི་སྣ་དང་གླེང་སློང་བྱ་མི་ཆོག་པའི་དམ་དྲག་བྱས་ཡོད་པ་དང་། ཉེ་ཆར་ཁོང་རྒྱ་ནག་ནང་ཡོད་པའི་ཨ་རིའི་ཤེས་ཡོན་དང་ཉམས་ཞིག་ལྟེ་ཁང་དུ་བསྐྱོད་རྒྱུའི་ཆོག་མཆན་ཡང་སྤྲོད་མེད་པ་སོགས་འགྲེལ་བརྗོད་དང་སྦྲགས། རྒྱ་ནག་གི་གཞུང་ཚབ་དང་ཕྱི་འབྲེལ་མི་སྣ་རྣམས་ཨ་རིའི་ཕྱི་སྲིད་ལས་ཁུངས་ལ་སྙན་སེང་ཙམ་ཡང་ཞུ་དགོས་ཀྱི་མེད་ཀྱང་ཨ་རིའི་ཕྱི་འབྲེལ་མི་སྣ་ཚོ་རྒྱ་ནག་གཞུང་འབྲེལ་ལས་ཁུངས་ལ་སྙན་སེང་ཞུ་དགོས་པ་མ་ཟད་ལས་དོན་ཐོག་ཞུགས་ཆོག་པའི་ཆོག་མཆན་ཀྱང་ཞུ་དགོས་ཀྱི་ཡོད་སྟབས། ཨ་རི་ནང་ཡོད་པའི་རྒྱ་ནག་གཞུང་ཚབ་དང་ཕྱི་འབྲེལ་མི་སྣ་ཚོ་ལས་རྒྱ་ནག་ནང་ཡོད་པའི་ཨ་རིའི་གཞུང་ཚབ་དང་ཕྱི་འབྲེལ་མི་སྣ་ཚོར་དམ་དྲག་ཆེ་བ་ཡོད་པ་མངོན་གསལ་གྱིས་གསུངས་འདུག ལྷག་པར་དུ་ཨ་རིའི་གཞུང་ཚབ་པ་སྐུ་ཞབས་ Terry Branstad ལགས་ནས་ཨ་རིར་ཡོད་པའི་རྒྱ་ནག་གི་གཞུང་ཚ་བ་ Cui Tiankai ཡིས་ Tweeter དྲྭ་གནས་ཐོག་ཨ་རིའི་ཁྲིམས་སྒྲིག་གསར་པར་སྐྱོན་བརྗོད་བྱས་པ་དེ་ནི་ཆེས་མི་འོས་པའི་བྱེད་སྟངས་ཤིག་ཡིན་པ་དང་ཁོང་ཨ་རི་རང་དབང་ལུང་པའི་ནང་ཡོད་སྟབས་ Tweeter སྤྱོད་ཐུབ་པ་ལས་རྒྱ་ནག་ནང་གཞུང་གིས་དམ་དྲམ་རྐྱེན་པས་ Tweeter གཙོས་པའི་ངོ་དེབ་དང་ Youtube སོགས་བཀག་བསྡོམ་བྱེད་བཞིན་ཡོད་པ་གསུངས་འདུག གཞི་རྩའི་ཉེ་དུས་སུ་ཨ་རི་གཞུང་གིས་རྒྱ་ནག་གི་ཕྱི་འབྲེལ་མི་སྣའི་ཐོག་བཟོས་པའི་སྒྲིག་ཁྲིམས་གསར་པ་དེ་ནི་འདས་པའི་ལོ་དུས་མང་པོའི་རིང་ལ་རྒྱ་ནག་གཞུང་གིས་ཡུལ་དེའི་ནང་ཡོད་པའི་ཨ་མི་རི་ཀའི་གཞུང་ཚབ་དང་ཕྱི་འབྲེལ་མི་སྣའི་ལས་དོན་ཐོག་དམ་དྲག་བྱེད་བཞིན་པར་ཡར་ལན་ཞིག་ཆགས་ཀྱི་ཡོད་པ་དང་། ཁ་སང་ཨ་རིའི་གཞུང་ཚབ་པ་སྐུ་ཞབས་ Terry Branstad ལགས་ཀྱི་འགྲེལ་བརྗོད་གནང་བར་ཨ་རི་གཞུང་ནས་རྒྱ་ནག་གི་ཕྱི་འབྲེལ་མི་སྣའི་ཐོག་བཟོས་པའི་སྒྲིག་ཁྲིམས་འདི་ཙམ་མ་ཟད་ད་ལྟའི་ཆར་ཨ་རི་ནང་ལ་རྒྱ་ནག་གཞུང་གི་བདག་དབང་འོག་ཡོད་པའི་ལྟེ་གནས་ཁག་དང་། ཚོང་ལས་སྡེ་ཚན། དེ་བཞིན་རྒྱ་ནག་གཞུང་འབྲེལ་གྱི་གསར་ཁང་བཅས་པ་སྲིད་གཞུང་གི་གསང་བའི་ལས་དོན་མི་སྣའི་ཁོངས་སུ་བཅུག་རྒྱུའི་ཁྲིམས་སྒྲིག་གསར་པ་ཞིག་ཀྱང་གཏན་འབེབས་གནང་འཆར་ཡོད་པ་རེད་འདུག རྩ་བའི་ཨ་རི་ཙམ་མ་ཟད་སྔར་ལོའི་ཕྱི་ཟླ་ ༡༢ ནང་ལ་ Australia སྲིད་གཞུང་ནས་རྒྱ་ནག་གཞུང་གི་གསང་བའི་ལས་གཞི་རྣམས་ཡུལ་དེར་དར་ཁྱབ་མི་ཡོང་བའི་སླད་དུ་ Australia ནང་ཡོད་པའི་རྒྱ་ནག་གཞུང་འབྲེལ་གྱི་མི་སྣ་དང་ཚོང་གི་ལྟེ་གནས་ཁག་ཐོ་འགོད་དང་དེབ་སྐྱེལ་བྱེད་དགོས་པའི་སྒྲིག་ཁྲིམས་གསར་བཟོ་གནང་ཡོད་པ་རེད།

League of Legends ཞེས་དྲྭ་ཐོག་གི་རྩེད་འགྲན་ཞིག་གི་ནང་རྩེད་འགྲན་པ་ཚོས་གླེང་མོལ་བྱེད་སྐབས་ཡུ་གུར་ཞེས་པའི་ཐ་སྙད་ལ་བཀག་བསྡོམ་བྱེད་ཀྱི་ཡོད་པ་མངོན་གསལ་གནང་འདུག BBC གསར་ཁང་གིས་གནས་ཚུལ་སྤེལ་བར་ League of Legends ཞེས་ཧ་ཅང་གྲགས་ཆེ་བའི་དྲྭ་ཐོག་གི་རྩེད་འགྲན་ནང་ཡུ་གུར་ཞེས་པའི་ཐ་སྙད་བཀག་བསྡོམ་བྱེད་བཞིན་པ་མངོན་གསལ་བྱུང་བ་དང་འབྲེལ། མཉེན་ཆས་བཀོལ་སྤྱོད་གནང་མཁན་ཁག་གཅིག་གིས་དེར་ཞུ་གཏུགས་བྱས་ཀྱང་རྩེད་འགྲན་གྱི་སྒྲིག་གཞི་ནང་དུ་མི་རིགས་ཀྱི་གནད་དོན་དང་འབྲེལ་བའི་གླེང་སློང་བྱ་རྒྱུར་བཀག་བསྡོམ་གནང་ངེས་ཡིན་པ་གསལ་ཡོད་སྟབས་མཉེན་ཆས་དེ་བཟོ་མཁན་ riot games ཚོང་ལས་ཁང་ནས་ཐོག་མའི་འཆར་རྩེད་འགྲན་པ་ཚོའི་ཞུ་གཏུགས་དེ་དག་སྣང་མེད་དུ་འཇོག་ཡོད་པ་མ་ཟད་ཞུ་གཏུག་དེ་དག་མཉེན་ཆས་དེ་ནས་ཕྱིར་འཐེན་བྱས་འདུག འོན་ཀྱང་མཉེན་ཆས་བཀོལ་སྤྱོད་གནང་མཁན་ཚོས་རྗེས་སུ་ Reddit  ཞེས་པའི་དྲྭ་གནས་ཐོག་གནས་ཚུལ་དེའི་སྐོར་ཡང་བསྐྱར་བཀོད་རྗེས་ Riot Games ཚོང་ལས་ཁང་གི་འབྲེལ་ཡོད་ལས་བྱེད་ Ryan Rigney ལགས་ཀྱིས་ twitter བརྒྱུད་གནས་ཚུལ་དེར་ངོས་ལེན་ཞུས་པ་དང་འབྲེལ་ཏེ་དྲྭ་ཐོག་གི་རྩེད་འགྲན་ནང་དུ་མི་རིགས་བྱེ་བྲག་པ་ཞིག་གི་མིང་བཀག་བསྡོམ་བྱས་པ་དེ་ནི་བྱབ་ཆུང་གི་ལས་ཀ་ཞིག་ཡིན་པར་འགྲེལ་བརྗོད་གནང་བ་དང་ཆབས་ཅིག ཚོང་ལས་ཁང་གི་ངོས་ནས་གནད་དོན་དེར་ཞིབ་གཅོད་དང་ཁ་སྐོང་ཇི་དགོས་ཞུ་ངེས་ཡིན་པར་བརྗོད་འདུག གཞི་རྩའི་རྒྱ་ནག་ནང་དྲྭ་ཐོག་གྱི་རྩེད་འགྲན་དང་འབྲེལ་བའི་མཉེན་ཆས་བཀོལ་སྤྱོད་བྱེད་སྐབས་བོད་རང་བཙན་དང་ཐེ་ཝན། གནམ་སྡེ་སྒོར་མོ་ཆེའི་དོན་རྐྱེན། ༸གོང་ས་མཆོག་གི་མཚན་སོགས་ཐ་སྙད་མང་དག་ཅིག་ལ་དམ་དྲག་བྱས་དང་བྱེད་བཞིན་པ་དེ་ནི་རྒྱུན་ལྡན་གྱི་བྱེད་སྟངས་ཤིག་ཡིན་ཀྱང་། དེང་སྐབས་ Tencent ལྟ་བུ་དྲྭ་ཐོག་གི་རྩེད་འགྲན་བཟོ་མཁན་རྒྱ་ནག་གི་ཚོང་ལས་ཁང་ཆེ་གྲས་དེའི་ཤུགས་རྐྱེན་ལ་བརྟེན་རྒྱ་ནག་གཞུང་གི་དབང་ཤུགས་དེ་རྒྱ་ནག་རྒྱལ་ནང་ཙམ་མ་ཟད་རང་དབང་ལྡན་པའི་རྒྱལ་ཁབ་གཞན་ནང་ལའང་ཁྱབ་བརྡལ་ཆེན་པོ་འགྲོ་བཞིན་ཡོད་པ་རེད། ཉེ་ལམ་ NBA ཞེས་ཨ་མི་རི་ཀའི་རྒྱལ་ཡོངས་སིལ་སྦོལ་ལྷན་ཚོགས་ཀྱི་ཚོགས་མི་ཡིན་པའི་ houston rockets  རུ་ཁག་གི་འགན་འཛིན་སྐུ་ཞབས་ Morey ལགས་ཀྱིས་ཧོང་ཀོང་ནང་གི་ལས་འགུལ་ལ་རྒྱབ་སྐྱོར་གྱི་བཀའ་མོལ་གནང་རྗེས་རྒྱ་ནག་དབུས་བརྙན་འཕྲིན་ལས་ཁང་དང་ Tencent ཚོང་ལས་ཁང་ནས་ NBA སིས་སྦོལ་རྩེད་འགྲན་རྒྱ་ནག་ནང་ཐད་ཀར་རྒྱང་སྲིང་གནང་བར་བཀག་བསྡོམ་བྱས་ཡོད་པ་རེད། བི་བི་སི་བརྙན་འཕྲིན་ལས་ཁང་གིས་ཐེངས་འདིའི་གནད་དོན་དང་འབྲེལ་ཏེ་ Tencent ཚོང་ལས་ཁང་དང་དེ་བཞིན་ཨ་རིའི་ནང་རྟེན་གཞི་བྱས་པའི་ Riot Games ཚོང་ལས་ཁང་གཉིས་ལ་འབྲེལ་བ་ཞུས་ཀྱང་ད་ལྟའི་ཆར་ཚོང་ལས་ཁང་དེ་དག་ནས་འགྲེལ་བརྗོད་གང་ཡང་གནང་མི་འདུག

ཉེ་ལམ་རྒྱ་ནག་གི་སྲིད་འཛིན་ཞི་ཅིན་ཕིང་བལ་ཡུལ་ནང་མ་འབྱོར་གོང་དུ་བལ་ཡུལ་གྱི་ཉེན་རྟོག་པས་མི་སྣ་མང་དག་ཅིག་འཛིན་བཟུང་བྱས་ཡོད་པའི་ཁོངས་སུ་བལ་ཡུལ་གྱི་སྒོར་ཁཱའི་མི་རིགས་ཡིན་པའི་ན་ཆུང་བུ་མོ་ལོ་ ༡༤ ཅན་ཞིག་དང་།  བགྲས་སོང་དགུང་ལོ་ ༦༥ ཡིན་པའི་ཨ་མ་ལགས་ཤིག་ཀྱང་བོད་མི་ཡིན་པར་དོགས་ནས་འཛིན་བཟུང་བྱས་ཡོད་པ་དང་། ཁོང་གཉིས་འཛིན་བཟུང་བྱེད་དགོས་དོན་ནི་བུ་མོ་ལོ་ཆུང་དེའི་སྟོད་གོས་སྟེང་དུ་ Free Tibet ཞེས་བོད་རང་བཙན་གྱི་འབོད་ཚིག་འཁོད་ཡོད་པ་དང་། ཨ་མ་ལགས་དེ་ཉིད་ཀྱི་རྒྱབ་ཁུག་སྟེང་དུ་བོད་ཡིག་བྲིས་ཡོད་པར་བརྟེན་ནས་བཀག་བསྐྱིལ་ཁང་དུ་ཁྲིད་ཡོད་ནས་འདྲི་གཅོད་བྱས་འདུག   ན་ཆུང་བུ་མོ་དེའི་དགེ་རྒན་ཕུར་བུ་ཤར་པ་ལགས་ཀྱིས་ the japan news ཞེས་པའི་གསར་ལམ་ལ་འགྲེལ་བརྗོད་གནང་དོན་ལྟར་་ན་བལ་ཡུལ་གྱི་ཉེན་རྟོག་པས་ཉིན་དེར་བུ་མོ་དེ་ཉེན་རྟོག་ཁང་དུ་འདྲི་གཅོད་ཆེད་ཁྲིད་པ་མ་ཟད། དེའི་ཕྱི་ཉིན་ཡང་ཉེན་རྟོག་པ་གཉིས་ཆེད་གཏོང་གིས་ཁོང་མོ་སློབ་གྲྭ་ནས་བཙན་ཁྲིད་བྱས་ཡོད་པ་དང་ཕུར་བུ་ཤར་པ་ལགས་ཀྱིས་ནར་མ་སོན་པའི་བུ་མོ་ལོ་ཆུང་ཁོང་ལྟ་བུ་ཉེན་རྟོག་ཁང་དུ་དོ་དམ་བྱེད་ན་ཁོང་གི་བསམ་བློར་དཀའ་ངལ་འཕྲད་མི་སྲིད་པ་མེད་སྟབས་ཉེན་རྟོག་པས་སྔོན་ཚུད་ནས་ཡིད་གཟབ་བྱེད་རྒྱུ་གལ་ཆེན་ཡིན་པར་སྐྱོན་བརྗོད་གནང་འདུག གནས་ཚུལ་དེ་དང་འབྲེལ་ནས་བལ་ཡུལ་ནང་གི་སྤྱི་མང་གི་ཐོང་ཐང་ཚོགས་པ་ Freedom Forum ཞེས་པའི་ཚོགས་གཙོ་ Taranath Dahal ལགས་ཀྱིས་བལ་ཡུལ་གྱི་ནང་དུ་བོད་དོན་སོགས་དང་འབྲེལ་བའི་གནད་དོན་གླེང་བ་དེས་བལ་ཡུལ་རྒྱལ་ཁབ་ཀྱི་བདག་དབང་ལ་ཐེ་གཏོག་གང་ཡང་བྱེད་ཀྱི་མེད་སྟབས་བལ་ཡུལ་གྱི་ནང་དུ་ཡུལ་མིའི་ཅི་ཞིག་གྱོན་པ་དང་ཅི་ཞིག་བརྗོད་བཞིན་པར་ཐེ་གཏོག་བྱས་ཏེ་བཀག་བསྐྱིལ་ཁང་དུ་བཅུག་པ་དེ་ནི་སྲིད་གཞུང་གི་ནོར་འཁྲུལ་ཞིག་རེད་ཅེས་སྐྱོན་བརྗོད་གནང་ཡོད་པ་མ་ཟད་མི་མང་གིས་བལ་ཡུལ་སྲིད་གཞུང་གི་ཕྱི་སྲིད་ཀྱི་ཐད་ལ་སྐྱོན་བརྗོད་དང་ངོ་རྒོལ་བྱེད་ཆོག་པ་ནི་རྩ་ཁྲིམས་ཀྱི་ནང་དུ་འཁོད་ཡོད་པ་ཞིག་ཡིན་པས་ཐེངས་འདིར་བལ་ཡུལ་གཞུང་གིས་ཞི་ཅིན་ཕིང་གི་སྐོར་སྐྱོད་སྐབས་སུ་བལ་ཡུལ་དུ་ཡོད་པའི་བོད་མི་སྐྱབས་བཅོལ་བ་དང་བལ་ཡུལ་གྱི་མི་སེར་རྣམས་འཛིན་བཟུང་བྱས་པ་ནི་སྲིད་གཞུང་གིས་བོད་མི་སྐྱབས་བཅོལ་བ་དག་གི་ཐོག་ལ་བཟུང་བའི་གནས་སྟངས་དེ་ཇེ་སྡུག་ཏུ་འགྲོ་བཞིན་པའི་རྣམ་པ་ཞིག་ཡིན་ཚུལ་འགྲེལ་བརྗོད་གནང་འདུག   རྩ་བའི་བལ་ཡུལ་གྱི་མཆོད་རྟེན་ཁུལ་གྱི་ཉེན་རྟོག་རུ་ཁག་གི་ཉེན་རྟོག་སྤྱི་ཁྱབ་གཞོན་པ་རཱ་མེཤ་ཡིས་རང་ལོ་ ༡༤ ཡིན་པའི་བུ་མོ་དེ་གྱོན་པའི་སྟོད་གོས་དེ་ལྟ་བུ་ནི་ཞི་ཅིན་ཕིང་བལ་ཡུལ་དུ་ཡོང་སྐབས་རྒྱ་ནག་སྲིད་གཞུང་ལ་ངོ་རྒོལ་གྱི་རྣམ་འགྱུར་ཞིག་རེད་ཅེས་འགྲེལ་བརྗོད་བྱས་ཏེ་ཉེན་རྟོག་པས་གནས་ཚུལ་དེའི་རིགས་ལ་སྔ་ས་ནས་ཉེན་བརྡ་བཏང་ཡོད་པ་དང་། ཞི་ཅིན་ཕིང་བལ་ཡུལ་དུ་འབྱོར་སྐབས་བུ་མི་དེ་གཅིག་པོ་མིན་པར་མི་ ༢༥ ཙམ་འཛིན་བཟུང་བྱས་ཡོད་སྐོར་བརྗོད་འདུག   རླུང་འཕྲིན་ཁང་གིས་བལ་ཡུལ་བོད་མིའི་སྤྱི་ཁྱབ་འབྲེལ་མཐུད་ལས་ཁུངས་སུ་ཞལ་པར་བརྒྱུད་ནས་གནས་ཚུལ་རྒྱུས་ལོན་ཞུས་པར་ཞི་ཅིན་ཕིང་གི་འཚམས་གཟིགས་སྐབས་སུ་བལ་ཡུལ་སྲིད་གཞུང་གིས་བདེ་སྲུང་གི་ཆ་ནས་ལྟ་རྟོག་ནན་མོ་བྱས་ཏེ་སྐབས་དེར་གྱོན་གོས་སྟེང་དུ་བོད་ཡིག་དང་བོད་དོན་གྱི་འབོད་ཚིག་བྲིས་ཡོད་པའི་བོད་མི་དང་བལ་ཡུལ་གྱི་ཡུལ་མི་མང་ ༣༠ ལྷག་འཛིན་བཟུང་བྱས་ཡོད་ཀྱང་ད་ཆ་ཁོང་རྣམས་གློད་བཀྲོལ་བཏང་ཡོད་པ་གསུངས་སོང་། གཞན་ཡང་དེ་རིང་ The news in minute ཞེས་པའི་གསར་ཁང་གིས་འབྲེལ་ཡོད་གནས་ཚུལ་སྤེལ་བ་ལྟར་ན་  རྒྱ་ནག་གི་སྲིད་འཛིན་བལ་ཡུལ་དུ་མ་འབྱོར་གོང་རྒྱ་གར་ལྷོ་ཕྱོགས་ Chennai ཁུལ་དུ་རྒྱ་གར་གྱི་སྲིད་བློན་དང་ནང་མོལ་མཇལ་འཕྲད་སླད་འབྱོར་ཡོད་པ་ལྟར་ཟླ་འདིའི་ཚེས་ ༡༡ ཉིན་ས་གནས་ཉེན་རྟོག་པས་རྒྱ་གར་བྱང་ཤར་གྱི་སློབ་མ་དང་ལས་མི་ ༤༠ ཙམ་བོད་རིགས་ཡིན་པའི་དོགས་གཞིའི་ཁྲོད་འཛིན་བཟུང་བྱས་ཏེ་ཉིན་གང་བཀག་བསྐྱིལ་བྱས་པའི་གནས་ཚུལ་ཐོན་འདུག  བྱང་ཤར་གྱི་མི་དེ་དག་གིས་རང་གི་ངོ་སྤྲོད་ལག་འཁྱེར་སོགས་ཉེན་རྟོག་པར་བསྟན་ཡོད་ཀྱང་ཁས་ལེན་མ་བྱས་པར་བཀག་བསྐྱིལ་བྱས་པའི་གནས་ཚུལ་ཐོན་ཡོད་སྟབས་ཅ་ནཡིའི་ཁུལ་གྱི་རྒྱ་གར་བྱང་ཤར་གྱི་མི་རྣམས་ཀྱིས་གནས་ཚུལ་དེར་བློ་ཕམ་གནང་ཡོད་པ་མ་ཟད་ཁུལ་དེར་ཡོད་པའི་རྒྱ་གར་བྱང་ཤར་གྱི་སྐྱིད་སྡུག་ཚོགས་པའི་སྤྱི་ཁྱབ་དྲུང་ཆེ་སྐུ་ཞབས   luanga Colney ལགས་ཀྱིས་རྒྱ་གར་ལ་རང་བཙན་ཐོབ་ནས་མི་ལོ་ཧྲིལ་བོ་ ༧༢ འགྲོ་བཞིན་ཡོད་པ་མ་ཟད་རྒྱ་གར་བྱང་ཤར་བ་རྣམས་རྒྱ་གར་གྱི་ས་དམག་དང་མཁའ་དམག་ལ་ཞུགས་ནས་རྒྱ་གར་གྱི་ཆེད་དུ་དམག་འཐབ་ལ་ཞུགས་ཡོད་ཀྱང་། དེ་རིང་རྒྱ་གར་བྱང་ཤར་བ་རྣམས་ནི་རྒྱུས་མེད་ཀྱི་མི་ཞིག་ཏུ་བརྩིས་ནས་བཀག་སྡོམ་བྱས་པ་དེ་ནི་ནག་ཉེས་ཤིག་ཡིན་པར་བརྗོད་དེ་ཐེངས་འདིའི་གནས་ཚུལ་རྐྱེན་པས་རྒྱ་གར་བྱང་ཤར་བའི་སྤྱི་ཚོགས་ཀྱི་ནང་དུ་བློ་ཕམ་ཆེན་པོ་བྱུང་ཡོད་སྐོར་གསར་ཁང་ལ་འགྲེལ་བརྗོད་གནང་འདུག

NBA ཞེས་བྱང་ཨ་རིའི་རྒྱལ་ཡོངས་སིལ་སྦོལ་མཐུན་ཚོགས་ཀྱི་ཚོགས་མི་ Houston Rockets རུ་ཁག་གི་འགན་འཛིན་སྐུ་ཞབས་ Daryl Morey ལགས་ཀྱིས་ Twitter ཐོག་ཧོང་ཀོང་ལ་རྒྱབ་སྐྱོར་མཚོན་པའི་བརྗོད་ཚིག་ཞིག་བརྒྱུད་སྤེལ་གནང་བ་ནས་བཟུང་སྟེ་འདས་པའི་གཟའ་སྐོར་གསུམ་ལྷག་གི་གོང་ནས་ཨ་མི་རི་ཀའི་རྒྱལ་ཡོངས་སིལ་སྦོལ་མཐུན་ཚོགས་དང་རྒྱ་ནག་གཞུང་གིས་གཙོས་པའི་རྒྱ་ནག་གི་ཚོང་ལས་སྡེ་ཚན་ཁག་གཅིག་དབར་འགྲོ་བ་མིའི་ཐོབ་ཐང་དང་ཚོང་འབྲེལ་སོགས་ཀྱི་གནད་དོན་ཐོག་གླེང་སློང་མི་ཉུང་བ་ཞིག་འབྱུང་བཞིན་པའི་ཁྲོད་ཕྱི་ཚེས་ ༡༨ ཉིན་གྱི་དགོང་མོ་ཨ་རིའི་གྲོང་ཁྱེར་ནིའུ་ཡོག་གི་སིལ་སྤོལ་རུ་ཁག་ Brooklyn Nets དང་ཁེ་ན་ཌའི་ Toronto Raptors རུ་ཁག་གཉིས་དབར་རྩེད་འགྲན་གནང་སྐབས་བོད་མི་དང་ཧོང་ཀོང་བ། དེ་བཞིན་བོད་དང་ཧོག་ཀོང་གི་རང་དབང་ལ་རྒྱབ་སྐྱོར་གནང་མཁན་བཅས་ནས་བོད་རང་བཙན་དང་ཧོང་ཀོང་ལ་རྒྱབ་སྐྱོར་ཡོད་པའི་སྟོད་གོས་དང་རྒྱལ་དར་སོགས་འཆར་ཏེ་ལས་འགུལ་སྤེལ་འདུག ཐེངས་འདིའི་རྩེད་འགྲན་དེ་ནི་ཨ་རིའི་གྲོང་ཁྱེར་ནིའུ་ཡོག་གི་སིལ་པོལ་རུ་ཁག་ Brooklyn Nets རྒྱ་ནག་ནང་རྩེད་འགྲན་སྐོར་སྐྱོད་ཟིན་ཏེ་ཨ་རི་ནང་གི་རྩེད་འགྲན་གནང་བ་དང་པོ་དེ་ཆགས་ཀྱི་ཡོད་པ་དང་། སྐབས་དེར་བོད་རང་བཙན་སློབ་ཕྲུག་ཚོགས་པའི་ཚོགས་མི་དང་བོད་དོན་རྒྱབ་སྐྱོར་བ་མི་ཉུང་བ་ཞིག་ནས་ལག་ཏུ་བོད་ཀྱི་རྒྱལ་དར་བསྣམས་པ་དང་ལུས་ལ་ཨ་རིའི་རྒྱལ་ཡོངས་སིལ་སྤོལ་མཐུན་ཚོགས་ནས་འགྲོ་བ་མིའི་ཐོབ་ཐང་ལ་རྒྱབ་སྐྱོར་བྱེད་དགོས་པ་དང་། ཧོང་ཀོང་མི་མང་གི་ཞི་བའི་ལས་འགུལ་ལ་རྒྱབ་སྐྱོར་ཡོད་པ་སོགས་འཁོད་པའི་སྟོད་གོས་དཀར་པོ་གྱོན་ཏེ་སྐད་འབོད་གནང་འདུག ལས་འགུལ་བ་ཁག་གཅིག་ནས་ Brooklyn Nets རུ་ཁག་གི་སྦྱིན་བདག་ Joe Tsai དང་ LA Lakers རུ་ཁག་གི་རྩེད་འགྲན་པ་ LeBron James གཉིས་ནས་དེ་སྔ་ Houston Rockets རུ་ཁག་གི་འགན་འཛིན་སྐུ་ཞབས་ Daryl Morey ལགས་ཀྱིས་ཧོང་ཀོང་ལ་རྒྱབ་སྐྱོར་མཚོན་པའི་བརྗོད་ཚིག་སྤེལ་སྐབས་མི་འདོད་པའི་རྣམ་པ་ཆེད་བཏོན་གནང་བ་དང་ངོ་ཚ་ཁྲེལ་གཞུང་མེད་པའི་ Joe Tsai དང་ LeBron James ཞེས་འཁོད་པའི་ཕྲེད་དར་ནག་པོ་འཕྱར་ཏེ་ངོ་རྒོལ་གནང་འདུག སྐབས་དེར་བོད་མི་དང་བོད་དོན་རྒྱབ་སྐྱོར་བ་ཙམ་མ་ཟད་ཧོང་ཀོང་གི་མང་གཙོ་དོན་གཉེར་བ་དང་གྲོས་ཚོགས་འཐུས་མི་ཟུར་པ་སྐུ་ཞབས་ Nathan Law ལགས་ཀྱིས་གཙོས་པའི་ལས་འགུལ་བ་དང་རྒྱབ་སྐྱོར་བ་སུམ་བཅུ་ལྷག་གིས་ཧོང་ཀོང་ལ་རྒྱབ་སྐྱོར་ཡོད་ཅེས་པའི་སྟོད་གོས་ནག་པོ་གྱོན་ཏེ་ངོ་རྒོལ་གྱི་ལས་འགུལ་གནང་ཡོད་པ་དང་། བོད་མི་དང་ཧོང་ཀོང་བའི་ལས་འགུལ་ཁྲོད་ཤར་ཏུར་ཀིས་ཐན་གྱི་ཡུ་གུར་ཁ་ཆེའི་མི་རིགས་ཁག་གཅིག་ནས་ཀྱང་མཉམ་ཞུགས་གནང་བ་མ་ཟད་ལས་འགུལ་བ་རྣམས་ཉེན་རྟོག་པས་རྩེད་འགྲན་གནང་ཡུལ་ནས་སྐད་འབོད་གནང་རྐྱེན་ཕྱིར་འབུད་བཏང་འདུག གཞི་རྩའི་སྐབས་དེའི་ལས་འགུལ་དང་འབྲེལ་གསར་འགོད་བསྒྲགས་གཏམ་ཞིག་ཡོངས་ཁྱབ་གནང་ཡོད་པ་དང་། ལས་འགུལ་ནང་དངོས་སུ་ཞུགས་མཁན་བོད་དོན་ལས་འགུལ་ལྟེ་གནས་ཁང་གི་ཉམས་ཞིབ་པ་བསྟན་འཛིན་རྡོ་རྗེ་ལགས་ནས་ རྒྱ་གཞུང་གི་དྲགསཔོའི་སྲིད་བྱུས་འོག་དཀའ་སྡུག་མྱོང་བཞིན་པའི་ཧོང་ཀོང་དང་བོད། དེ་བཞིན་ཤིན་ཅང་བཅས་ཀྱི་འགྲོ་བ་མིའི་ཐོབ་ཐོབ་ཐང་ཐོག་རྒྱལ་སྤྱིའི་མང་ཚོགས་ནས་རྒྱབ་སྐྱོར་གནང་རྒྱུ་གལ་ཆེན་པོ་ཡིན་པར་འགྲེལ་བརྗོད་དང་སྦྲགས་ཏེ་ཉེ་དུས་སུ་ Houston Rockets སིལ་སྤོལ་རུ་ཁག་གི་སྤྱི་ཁྱབ་འགན་འཛིན་ནས་ཧོང་ཀོང་མི་མང་ལ་རྒྱབ་སྐྱོར་གནང་བ་དེ་ནི་འགྲིག་པ་ཞིག་ཡིན་པ་དང་། དེར་ཨ་རིའི་རྒྱལ་ཡོངས་སིལ་སྤོལ་མཐུན་ཚོགས་ཀྱིས་རྒྱབ་སྐྱོར་གནང་བར་ཡི་རང་བསྔགས་བརྗོད་ཡོད་ཅེས་གསུངས་ཏེ་རྩེད་འགྲན་པ་ LeBron James དང་ Brooklyn Nets རུ་ཁག་གི་སྦྱིན་བདག་ Joe Tsai གཉིས་ཀྱིས་མི་མང་གི་རང་དབང་ལས་ཚོང་དང་སྒེར་གྱི་ཁེ་བཟང་གལ་འགངས་ཆེ་བར་ངོས་འཛིན་པ་དེར་བློ་འཚབ་ཆེན་པོ་ཡོད་ཅེས་གསུངས་འདུག

རྒྱ་ནག་གཞུང་གིས་བོད་དང་ཤིན་ཅང་། ཧོང་ཀོང་དང་ཐེ་ཝན་བཅས་ཀྱི་ནང་དུ་གཞི་རྩའི་འགྲོ་བ་མིའི་ཐོབ་ཐང་གཙོས་གནས་ཚུལ་རྒྱུས་ལོན་རང་དབང་ལ་རྡོག་རོལ་ཚད་མེད་གཏོང་རྒྱུའི་སླད་དུ་ཀུ་ཤུ་རྟགས་ཅན་གྱི་ཚོང་ལས་ཁང་དེའི་ངོས་ནས་རོགས་འདེགས་དང་ངན་པ་ལག་སྦྲེལ་བྱེད་བཞིན་པ་དེ་དག་མཚམས་འཇོག་དགོས་པའི་ངོ་རྒོལ་གྱི་ལས་འགུལ་ཞིག་སྤེལ་འདུག དེ་ཡང་ཁ་སང་ཕྱི་ཟླ་ ༡༠ ཚེས ༡༧ ཉིན་ཨ་རི་New York ནང་རྟེན་གཞི་བྱས་པའི་ཀུ་ཤུ་རྟགས་ཅན་གྱི་ཚོང་ལས་ཁང་གི་ལྟེ་གནས་མཐོ་ཤོས་ཏེ་ Apple’s Grand Central Station store ཞེས་པའི་མདུན་དུ་བོད་དོན་ལས་འགུལ་ལྟེ་གནས་ཁང་གི་གཙོས་ཡུ་གུར་དང་། ཧོང་ཀོང་། ཐེ་ཝན་བཅས་ཀྱི་འཐུས་ཚབ་མི་སྣ་དང་ལས་འགུལ་བ་ཁག་ཅིག་འདུ་འཛོམས་གནང་ནས་ཀུ་ཤུ་རྟགས་ཅན་གྱི་གཙོ་འཛིན་ Tim Cook ལགས་སུ་རྒྱ་ནག་གཞུང་གིས་བོད་དང་ཧོང་ཀོང་། ཤིང་ཅང་དང་ཐེ་ཝན་བཅས་ཀྱི་གཞི་རྩའི་འགྲོ་བ་མིའི་ཐོབ་ཐང་གཙོས་རང་དབང་ཁག་ལ་རྡོག་རོལ་ཚད་མེད་གཏོང་བཞིན་པ་ལ་ཀུ་ཤུ་རྟགས་ཅན་གྱི་ངོས་ནས་རོགས་འདེགས་ཞུ་རྒྱུ་མཚམས་འཇོག་དགོས་པ་མ་ཟད། གོང་སྨྲོས་ཡུལ་ལུང་དེ་དག་ལ་རྒྱ་ནག་གཞུང་ནས་སོ་ཉུལ་བྱ་རྒྱུའི་སླད་དུ་ཚོང་ལས་ཁང་དེའི་ངོས་ནས་ངན་པ་ལག་སྦྲེལ་བྱ་རྒྱུ་ཆེ་རུ་སོང་བ་དེ་དག་རྐྱེན་གྱིས་གནས་ཚུལ་རྒྱུས་ལོན་རང་དབང་དང་། སྨྲ་བརྗོད་རང་དབང་སོགས་ལ་རྡོག་རོལ་ཤུགས་ཆེར་འགྲོ་བཞིན་ཡོད་སྟབས་རྒྱ་ནག་གཞུང་ལ་རོགས་འདེགས་དང་ངན་པ་ལག་སྦྲེལ་བྱ་རྒྱུ་འཕྲལ་དུ་མཚམས་འཇོག་དགོས་པའི་ངོ་རྒོལ་གྱི་ལས་འགུལ་ཞིག་སྤེལ་འདུག སྐབས་དེར་ལས་འགུལ་བའི་ཕྱག་ལ་ཀུ་ཤུ་རྟགས་ཅན་གྱི་མཚོན་རྟགས་བཀོད་པའི་སྦྱར་ཡིག་བསྣམས་ཏེ་མཚོན་རྟགས་དེའི་ནང་དུ་ཡི་གེ་དམར་པོ་དང་ནག་པོ་བྲིས་ཏེ།  རྒྱ་ནག་གཞུང་གིས་རང་དབང་ལ་རྡོག་རོལ་གཏོང་བཞིན་པར་བརྟེན་ཚོང་ལས་ཁང་ནས་རོགས་འདེགས་བྱ་རྒྱུ་མཚམས་འཇོག་དགོས་པ་དང་། ཚོང་ལས་ཁང་དེ་རང་དབང་གི་ཆེད་དུ་ལངས་དགོས་པ། དེ་བཞིན་ཚོང་ལས་ཁང་དེའི་ངོས་ནས་མི་མང་ལ་རོགས་འདེགས་ཞུ་དགོས་པ་ལས་རྒྱ་ནག་གཞུང་ལ་རོགས་འདེགས་བྱ་རྒྱུ་མཚམས་འཇོག་དགོས་པ་སོགས་ཡིག་ངག་གཉིས་ཀྱི་ཐོག་ནས་ངོ་རྒོལ་དང་། དེ་བཞིན་མང་ཚོགས་ཀྱི་ཁྲོད་ཚོང་ལས་ཁང་དེའི་ངོས་ནས་རྒྱ་ནག་གཞུང་དང་ལྷན་དུ་མཉམ་འབྲེལ་གྱི་ཐོག་ནས་གཞི་རྩའི་འགྲོ་བ་མིའི་ཐོབ་ཐང་ཁག་ལ་ཇི་ལྟར་རྡོག་རོལ་གཏོང་གི་ཡོད་མིན་འཁོད་པའི་ཡིག་ཆ་འགྲེམས་སྤེལ་དང་མང་ཚོགས་ཀྱི་བསམ་ཚུལ་བསྡུ་ལེན་སོགས་ཀྱི་ལས་འགུལ་སྤེལ་འདུག སྐབས་དེར་བོད་དོན་ལས་འགུལ་ལྟེ་གནས་ཁང་གི་འགན་འཛིན་ལྷ་སྒྲོན་བཀྲས་མཐོང་ལགས་ཀྱིས་འཛམ་གླིང་རྒྱལ་སྤྱིའི་ཁྲོད་ཀུ་ཤུ་རྟགས་ཅན་གྱི་ཚོང་ལས་ཁང་དེས་ཚོང་གི་བྱ་བཞག་ལས་གཞན་པའི་གཞན་བྱ་སྤྱོད་དེ་དག་ཕྱིར་མངོན་རྒྱུའི་ཆེད་དུ་ལས་འགུལ་སྤེལ་བ་ཞིག་ཡིན་སྐོར་དང་། བོད་གཙོས་ཤིང་ཅང་དང་རྒྱ་ནག   ཧོང་ཀོང་བཅས་ཀྱི་ནང་དུ་གནས་ཚུལ་མཁོ་སྒྲུབ་བྱ་རྒྱུར་ཆེས་དམ་དྲག་དང་།  མང་ཚོགས་ནས་སྤྱོད་བཞིན་པའི་མཉེན་ཆས་མང་དག་ཅིག་ལ་ཚོང་ལས་ཁང་དེས་རྒྱ་ནག་གཞུང་ལ་རམ་འདེགས་བྱས་ཏེ་བཀག་འགོག་བྱས་པ་ནི་གཞི་རྩའི་འགྲོ་བ་མིའི་ཐོབ་ཐང་ལ་རྡོག་རོལ་བཏང་བ་ཞིག་ཡིན་པར་སྐྱོན་བརྗོད་ནན་པོ་བྱས་ཏེ་ཚོང་ལས་ཁང་དེའི་ངོས་ནས་རྒྱ་ནག་གཞུང་དང་ངན་པ་ལག་སྦྲེལ་བྱ་རྒྱུ་མཚམས་འཇོག་དགོས་པ་དང་། རང་དབང་གི་གནས་ཚུལ་མཁོ་གཏོང་དང་མཁོ་སྒྲུབ་བྱ་རྒྱུ་ཙམ་མ་ཟད། མཉེན་ཆས་བཀག་སྡོམ་བྱས་པ་དང་ཕྱིར་འཐེན་བྱས་པ་རྣམས་རང་དབང་གི་ཐོག་ནས་བཀོལ་སྤྱོད་བྱ་རྒྱུ་ཡོད་པ་བཟོ་དགོས་ཞེས་བརྗོད་འདུག ཕྱོགས་མཚུངས་བོད་རང་བཙན་སློབ་ཕྲུག་ཚོགས་པའི་ལས་འགུལ་དང་འབྲེལ་མཐུད་ཀྱི་ངེས་སྟོན་པ་བསོད་ནམས་མཚོ་ལགས་ཀྱིས་ཚོང་ལས་ཁང་དེའི་ངོས་ནས་རྒྱ་ནག་གཞུང་དང་ངན་པ་ལག་སྦྲེལ་བྱས་ནས་བོད་དང་ཤིན་ཅང་། ཧོང་ཀོང་དང་ཐེ་ཝན་བཅས་ལ་མུ་མཐུད་བཙན་གནོན་བྱས་པ་ཡིན་ན་ཚོང་ལས་ཁང་དེའི་ཚོང་ཟོག་སྤྱོད་མཁན་ཚོས་དུས་ནམ་ཡང་རྒྱབ་སྐྱོར་གནང་གི་མ་རེད་ཅེས་བརྗོད་འདུག དེ་བཞིན་བོད་དོན་ལས་འགུལ་ལྟེ་གནས་ཁང་གི་ཉམས་ཞིབ་པ་བསྟན་འཛིན་རྡོ་རྗེ་ལགས་ཀྱིས་ཕྱི་ལོ ༢༠༡༧ ལོར་ཀུ་ཤུ་རྟགས་ཅན་གྱི་མཉེན་ཆས་ ༡༠༠༠ ཙམ་ཞིག་རྒྱ་ནག་གི་མཉེན་ཆས་ཚོང་ལས་ཁང་ནས་ཕྱིར་འཐེན་བྱས་པའི་རྐྱེན་གྱིས་བོད་དང་ཡུ་གུར། རྒྱ་རིགས་མང་གཙོ་དོན་གཉེར་བ་ཚོས་རང་དབང་གི་གནས་ཚུལ་མཁོ་གཏོང་བྱ་རྒྱུར་གདོང་ལེན་ཆེན་པོ་གནང་དགོས་ཀྱི་ཡོད་པ་དང་།  ལྷག་པར་དུ་༸གོང་ས་མཆོག་གི་མཚན་དང་། བོད་རང་བཙན། དེ་བཞིན་ཡུ་གུར་བའི་རང་དབང་དང་དྲུག་བཞི་དོན་རྐྱེན་སོགས་ཀྱི་ཐ་སྙད་ལ་དོགས་ཟོན་ཆེན་པོ་བྱ་དགོས་ཀྱི་ཡོད་པ་མ་ཟད། ཉེ་ལམ་ཚོང་ལས་ཁང་དེའི་ངོས་ནས་རྒྱ་ནག་གཞུང་གི་གནོན་ཤུགས་འོག་ HKmap.live ཞེས་པའི་མཉེན་ཆས་ཤིག་ཕྱིར་འཐེན་བྱས་པའི་རྐྱེན་གྱིས་ཧོང་ཀོང་གི་མང་གཙོའི་ལས་འགུལ་བ་ཚོར་ཉེན་ཚབ་ཆེན་པོར་གྱུར་ཡོད་པ་མ་ཟད།  རྒྱ་ནག་གཞུང་གིས་སོ་ཉུལ་བྱ་རྒྱུའི་མཚོན་པའི་རང་དབང་དང་གཞི་རྩའི་འགྲོ་བ་མིའི་ཐོབ་ཐང་ཐད་གླེང་སློང་བྱས་པ་ཡིན་ན་གང་བྱུང་འཛིན་བཟུང་དང་མནར་གཅོད་ཚད་མེད་གཏོང་བཞིན་ཡོད་སྟབས། ཚོང་ལས་ཁང་དེའི་ངོས་ནས་མཉེན་ཆས་ཕྱིར་བསྡུ་བྱ་རྒྱུ་ནི་ཐད་ཀར་རྒྱ་གཞུང་ལ་རོགས་འདེགས་བྱས་པ་ཙམ་དུ་མ་ཟད། རྒྱ་ནག་གཞུང་གིས་བོད་གཙོས་གཞན་རྒྱལ་ཁབ་ཁག་གི་རང་དབང་ལ་རྩིས་མེད་རྡོག་རོལ་གཏོང་བཞིན་པ་ལ་བློ་སྤོབས་སྤྲོད་པ་དང་གཅིག་མཚུངས་རེད་ཅེས་སྐྱོན་བརྗོད་གནང་འདུག