Tibetan Royal Year of 2151 | Year of the Wood Dragon

རྒྱལ་སྤྱི།

༸སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་སྐུ་གྲོངས་རྐྱེན་ཐོག་ཞིབ་འཇུག་མཐིལ་ཕྱིན་གནང་བའི་རེ་སྐུལ།

དེ་རིང་ཟླ་ ༦ ཚེས་ ༢༦ ཉིན་མོ་འདི་མཉམ་འབྲེལ་རྒྱལ་ཚོགས་ནས་གཏན་འབེབས་གནང་བའི་རྒྱལ་སྤྱིའི་མནར་གཅོད་འགོག་རྒོལ་ཉིན་མོ་ཡིན་པ་དང་བསྟུན་༸སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེའི་ཚ་མོ་ཉི་མ་ལྷ་མོ་ལགས་ཀྱིས་བརྙན་ཐུང་བརྒྱུད་དེ་རྒྱལ་སྤྱིའི་ཚོགས་སྡེ་ཁག་ལ་ཁོ་མོའི་ཨ་ཞང་བཙོན་ཁང་ནང་གློ་བུར་དུ་དགོངས་པ་རྫོགས་པའི་གནད་དོན་ཐད་ཞིབ་འཇུག་མཐིལ་ཕྱིན་གནང་ཕྱིར་རྒྱ་གཞུང་ལ་གནོན་ཤུགས་སྤྲོད་དགོས་པའི་རེ་སྐུལ་ཞུས་འདུགརྒྱལ་ཚོགས་ནས་ལོ་ལྟར་ཕྱི་ཟླ་ ༦ ཚེས་ ༢༦ ཉིན་མོ་དེ་རྒྱལ་སྤྱིའི་མནར་གཅོད་འགོག་རྒོལ་གྱི་དུས་ཚིགས་སུ་སྲུང་བརྩི་ཞུས་ནས་འཛམ་གླིང་ས་ཕྱོགས་གང་སར་སྡུག་སྦྱོང་མནར་གཅོད་མྱངས་དང་མྱོང་བཞིན་པ་རྣམས་ལ་གདུང་སེམས་མཉམ་བསྐྱེད་དང་མནར་གཅོད་ཀྱི་བྱ་སྤྱོད་ལ་ཁྲིམས་འགལ་ཡིན་པར་ངོས་འཛིན་གྱིས་མཐའ་གཅིག་ཏུ་ངོ་རྒོལ་གནང་བཞིན་ཡོད་པ་ལྟར་བཞུགས་སྒར་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་༸སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་དམ་པའི་ཚ་མོ་ཉི་མ་ལགས་ཀྱིས་རྒྱལ་སྤྱིའི་ཚོགས་སྡེ་ཁག་ལ་རིན་པོ་ཆེ་སྐུ་གྲོངས་རྐྱེན་ཐད་ཞིབ་འཇུག་མཐིལ་ཕྱིན་པ་གནང་དགོས་པའི་རེ་སྐུལ་གནང་བའི་བརྙན་ཐུང་ཞིག་འདོན་སྤེལ་གནང་བ་བརྒྱུད་ནས་རྒྱ་གཞུང་གིས་བོད་ནང་ངན་བྱུས་ཀྱི་རྣམ་པ་འདྲ་མིན་ཐོག་ནས་བོད་མིར་མི་སྤྱོད་ལས་འདས་པའི་མནར་གཅོད་བཏང་དང་གཏོང་བཞིན་པར་སྐྱོན་བརྗོད་ཤུགས་ཆེ་གནང་འདུག ལྷག་པར་དུ་རྒྱ་གཞུང་གིས་བོད་ནང་གི་འགྲོ་བ་མིའི་ཐོབ་ཐང་རྡོག་རོལ་དང་འབྲེལ་བོད་མི་གང་བྱུང་འཛིན་བཟུང་བཀག་ཉར་དང་དུས་ཡུན་རིང་པོར་ཁྲིམས་འགལ་བཀག་སྐྱིལ་བྱས་ཏེ་བཙན་དབང་གིས་ཉེས་འཛུགས་ཁས་ལེན་འཇུག་གི་ཡོད་པ་མ་ཟད་བོད་མི་ཆབ་སྲིད་བཙོན་པ་རྣམས་ལ་དྲང་བདེན་གྱི་ཁྲིམས་ཞིབ་མེད་པའི་ཁར་མི་སྤྱོད་ལས་འདས་པའི་ཉེས་རྡུང་ཚད་མེད་བཏང་བའི་དབང་གིས་མཐར་གཟུགས་པོ་ནད་གཅོང་དུ་གྱུར་ནས་འདས་གྲོངས་སུ་གྱུར་བ་དང་མང་ཆེ་བ་ཛ་དྲག་གནས་སྟངས་འོག་བཙོན་འཇུག་དུས་ཡུན་མ་ཚང་གོང་དུ་བཙོན་གྲོལ་བཏང་ཡོད་པ་མངོན་གསལ་གནང་འདུགདེ་རིང་རྒྱལ་སྤྱིའི་མནར་གཅོད་འགོག་རྒོལ་ཉིན་མོ་དང་བསྟུན་ཉི་མ་ལྷ་མོ་ལགས་ཀྱིས་འདོན་སྤེལ་གནང་བའི་བརྙན་ཐུང་ནང་ཁོང་གིས་༸སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་ནི་མི་མང་པོས་དད་གུས་ཞུ་ཡུལ་གྱི་བླ་མ་ཞིག་ཡིན་པ་དང་། ཁོང་ནི་རྒྱ་གཞུང་གིས་ཚེ་བཙོན་ཁྲིམས་ཐག་བཅད་དེ་བཙོན་ཁང་དུ་མི་ལོ་ ༡༣ རིང་བཞུགས་སྐབས་གློ་བུར་དུ་སྐུ་གྲོངས་ཡོད་པ་དང་ཕྱིས་སུ་རིན་པོ་ཆེའི་སློབ་མ་བློ་བཟང་དོན་གྲུབ་ལགས་ཀྱང་གནད་དོན་དེ་འབྲེལ་ཐོག་ཟླ་བ་བརྒྱད་ཙམ་རིང་དོ་དམ་བཀག་ཉར་གྱིས་སྡུག་སྦྱོང་མནར་གཅོད་མང་དག་ཅིག་བཏང་ནས་མཐར་སྲོག་ཐོག་བཏང་ཡོད་པ་མ་ཟད། གནད་དོན་དེ་འབྲེལ་རྐྱེན་པས་བོད་མི་མང་དག་ཅིག་བཙོན་ལ་ཚུད་པ་དང་དེ་བཞིན་མང་དག་ཅིག་གིས་རྒྱ་གཞུང་ལ་དྲང་བདེན་གྱི་ཁྲིམས་བཤེར་ཡོང་སླད་འབོད་སྐུལ་ཞུ་གང་ཐུབ་གནང་ཡོད་ཀྱང་རྒྱ་གཞུང་གིས་དེར་ངོས་ལེན་མེད་པར་རིན་པོ་ཆེ་དགོངས་པ་རྫོགས་རྐྱེན་ལ་བརྟག་དཔྱད་གནང་དབང་སྤྲད་མེད་པ་མ་ཟད་སྐུ་གྲོངས་པའི་དཔང་ཡིག་ཚད་ལྡན་མེད་ཀྱང་། ཚང་མས་རིན་པོ་ཆེ་མཆོག་སྐུ་གྲོངས་རྐྱེན་ཐད་ཞིབ་འཇུག་མཐིལ་ཕྱིན་གནང་བར་རྒྱ་གཞུང་ལ་གནོན་ཤུགས་སྤྲོད་དགོས་པའི་རེ་སྐུལ་ཞུས་འདུགལྷག་དོན་ལོ་ངོ་ ༢༥ ལྷག་གི་རིང་ལ་རྒྱ་གཞུང་གིས་འཛིན་བཟུང་བཙན་ཁྲིད་བྱས་ནས་གར་སོང་ཆ་མེད་དུ་གྱུར་བའི་བོད་མིའི་ཆབ་སྲིད་བཙོན་པ་༸ཀུན་གཟིགས་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གིས་གཙོས་པའི་བོད་མི་ཆབ་སྲིད་བཙོན་པ་རྒྱ་ནག་གཞུང་གི་བཙན་དབང་འོག་ནས་གང་མགྱོགས་གློད་བཀྲོལ་ཡོང་ཐབས་སུ་ཚང་མས་ཤུགས་གནོན་འཕར་མ་གནང་དགོས་པ་གསུངས་འདུག

ཨ་རིའི་རྒྱལ་ཚོགས་ཀྱི་སྐུ་ཚབ་ཟུར་པ་ལྕམ་སྐུ་ Nikki Haley མཆོག་དེ་སྔ་ཕྱི་ལོ་ ༢༠༡༨ ལོར་༸གོང་ས་མཆོག་དང་མཇལ་འཕྲད་གནང་རྒྱུར་བཀག་སྡོམ་བྱས་འདུག

ཨ་རིའི་རྒྱལ་སྲུང་སློབ་སྟོན་པ་སྐུ་ཞབས་ John Bolton ལགས་ཀྱིས་རྩོམ་བྲིས་གནང་བའི་ཕྱག་དེབ་གསར་པ་ The Room Where It Happened ཞེས་པའི་ནང་ཨ་རིའི་རྒྱལ་ཚོགས་ཀྱི་སྐུ་ཚབ་ཟུར་པ་ལྕམ་སྐུ་ Nikki Haley མཆོག་ནས་དེ་སྔ་ཕྱི་ལོ་ ༢༠༡༨ ཟླ་ ༦ པའི་ནང་༸གོང་ས་མཆོག་དང་མཇལ་འཕྲད་ཞུ་བློ་འདོད་ཡོད་ཀྱང་། སྐབས་དེར་ཨ་རིའི་སྲིད་འཛིན་ Donald Trump མཆོག་གིས་རྒྱ་ནག་གཞུང་ལ་དོ་ཕོག་འགྲོ་བར་དོགས་ཟོན་གྱིས་བཀག་སྡོམ་གནང་བར་བརྟེན་ཕྱོགས་གཉིས་དབར་གྱི་མཇལ་འཕྲད་གནང་ཐུབ་མེད་ཅེས་སྐྱོན་བརྗོད་གནང་འདུགདེའང་སྐུ་ཞབས་ John Bolton ལགས་ཀྱིས་རེས་གཟའ་མིག་དམར་ཉིན་དབུ་འབྱེད་གནང་བའི་ཕྱག་དེབ་ལས་དོན་ཚན་ཞིག་ཟུར་འདོན་གྱིས་དེ་སྔ་ཕྱི་ལོ་ ༢༠༡༨ ཟླ་ ༦ ནང་དུ་ལྕམ་སྐུ་ Nikki Haley མཆོག་རྒྱ་གར་དུ་ཕེབས་ཏེ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་གསེར་ཞལ་མཇལ་ཞུ་གནང་འདོད་ཡོད་ཀྱང་། ཨ་རིའི་སྲིད་འཛིན་ Donald Trump མཆོག་གིས་དེར་བཀག་སྡོམ་གནང་ཡོད་པ་མངོན་གསལ་དང་སྦྲགས། སྐུ་ཞབས་ John Bolton ལགས་ཀྱིས་ཕྱག་དེབ་དེའི་ནང་སྐབས་དེར་ལྕམ་སྐུ་ Nikki Haley མཆོག་གིས་༸གོང་ས་མཆོག་དང་ལྷན་དུ་སྐུ་པར་སྒྲོན་རྒྱུ་ཙམ་ལས་དེ་མིན་མཇལ་མོལ་དེ་ཞུ་དགོས་པའི་རྒྱུ་མཚན་གང་ཡིན་ཁ་གསལ་གནང་མེད་ཀྱང་། ལྕམ་སྐུ་ Nikki Haley མཆོག་ནི་རྣམ་ཀུན་ནས་རྒྱ་ནག་དང་འབྲེལ་བའི་ཚོང་འབྲེལ་གྱི་སྲིད་བྱུས་ཐོག་ལ་བཀའ་མོལ་ནན་པོ་གནང་མཁན་ཞིག་ཡིན་སྟབས། ཕྱོགས་གཉིས་ཀྱི་མཇལ་མོལ་དེ་རྐྱེན་ཨ་རི་དང་རྒྱ་ནག་དབར་གྱི་འབྲེལ་ལམ་ལ་དོ་ཕོག་འགྲོ་བར་དོགས་ཟོན་གྱིས་སྲིད་འཛིན་ Trump མཆོག་གིས་མཇལ་འཕྲད་དེར་བཀག་སྡོམ་གནང་ཡོད་པ་གསུངས་འདུགགཞན་ཡང་སྐུ་ཞབས་ John Bolton ལགས་ཀྱིས་འདས་ལོ་ནང་བྱང་ཤར་ཨེ་ཤི་ཡའི་གླིང་ཕྲན་རྒྱལ་ཁབ་ཉི་ཧོང་དུ་  G20 Summit ཞེས་པའི་སྟོབས་ཆེན་རྒྱལ་ཁབ་ཉི་ཤུ་ཐམ་པའི་ལྷན་ཚོགས་དང་འབྲེལ་དགོང་ཚིགས་ཤིག་གི་སྐབས་རྒྱ་ནག་གི་སྲིད་འཛིན་ཞི་ཅིན་ཕིང་ལ་ཌོ་ནལྜ་ཊམ་མཆོག་གིས་སླར་ཡང་འོས་བསྡུའི་རྒྱལ་ཁ་འཐོབ་པར་རོགས་རམ་གནང་རོགས་ཞེས་དང་དེ་ལྟར་རྒྱལ་ཁ་འཐོབ་ཚེ་རྒྱ་ནག་གི་ངོས་ནས་ཨ་རི་ནང་གི་སོ་ནམ་གྱི་ཐོན་སྐྱེད་སྲན་མ་དང་གྲོ་ལ་སོགས་པ་རྣམས་ཉོ་ཆོག་སྐོར་གླེང་མོལ་བྱས་ཡོད་པ་དང་། ཆབས་ཅིག་ཏུ་སྲིད་འཛིན་ཊམ་མཆོག་གིས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་དབང་བསྒྱུར་འོག་ཡོད་པའི་ཡུ་གུར་བའི་ཁ་ཆེའི་གྲངས་ཉུང་མི་རིགས་རྣམ་པའི་ཐོག་མི་སྤྱོད་ལས་འདས་པའི་དྲག་གནོན་དང་བཙོན་འཇུག་སོགས་ཀྱི་ལས་དོན་མུ་མཐུན་བློ་འདོད་ལྟར་སྤེལ་ན་འགྲིག་སྐོར་བཤད་པའང་ཆེད་བཀོད་གནང་འདུགགཞི་རྩའི་ The Room Where It Happened ཞེས་ཤོག་གྲངས་ ༥༩༢ བདག་ཉིད་ཅན་གྱི་ཕྱག་དེབ་གསར་པ་དེ་སྐུ་ཞབས་ John Bolton ལགས་ཀྱིས་དེ་སྔ་ཕྱི་ལོ་ ༢༠༡༨ ཕྱི་ཟླ་ ༤ པ་ནས་ཕྱི་ལོ་ ༢༠༡༩ ཕྱི་ཟླ་ ༩ བར་སྲིད་འཛིན་ Donald Trump མཆོག་གི་སྲིད་གཞུང་འོག་ཨ་རིའི་རྒྱལ་སྲུང་སློབ་སྟོན་པའི་ཐུགས་འགན་བཞེས་རིང་རྒྱལ་སྲུང་སྲིད་བྱུས་དང་འབྲེལ་བའི་མཆན་འགོད་ལས་ཕྱོགས་བསྒྲིགས་གནང་བ་ཞིག་ཡིན་པ་དང་། དེ་ཡང་ཝ་ཤིན་ཊོན་ནང་རྟེན་གཞི་བྱས་པའི་ཆེས་མཐོའི་ཁྲིམས་ཞིབ་ཁང་གི་བཀའ་འཁྲོལ་ཡོད་པའི་ཐོག་ནས་པར་སྐྲུན་གནང་བ་ཞིག་ཡིན་པ་མ་ཟད། ཁོང་གིས་ཨ་རིའི་སྲིད་འཛིན་ཊམ་མཆོག་ནི་ཨ་རིའི་སྲིད་འཛིན་གྱི་ཞབས་སྟེགས་ཐོག་ཏུ་འོས་འཚམས་ཤིག་མིན་པར་སྐྱོན་བརྗོད་གནང་ཡོད་པར་སྲིད་འཛིན་ཊམ་མཆོག་གིས་སྐུ་ཞབས་ Bolton ལགས་ཀྱི་ཕྱག་དེབ་དེའི་ནང་དོན་ཡོངས་རྫོགས་གཡོ་རྫུན་དང་འབྲེལ་ཡོད་པར་ལན་འདེབས་གནང་འདུག

རྟ་དབང་ས་མཚམས་ས་ཁུལ་ལ་བོད་དང་རྒྱ་གར་གྱི་ས་མཚམས་ཞེས་གསུངས་འདུག

རྒྱ་གར་བྱང་ཤར་ཨ་རུ་ནཱ་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་མངའ་སྡེ་དེའི་མོན་རྟ་དབང་གི་འབུམ་ལ་ས་མཚམས་ས་ཁུལ་དུ་ཆེད་ཕེབས་གནང་བ་དང་འབྲེལ་ཁོང་གི་ Twitter ཐོག་གནས་ཚུལ་སྤེལ་བར་ས་ཁུལ་དེར་རྒྱ་གར་དང་བོད་ཀྱི་ས་མཚམས་ས་ཁུལ་ཞེས་གསུངས་འདུག་པ་དང་། རྒྱ་གར་གྱི་བརྒྱུད་ལམ་ཁག་ཏུ་རྒྱ་དཀར་ནག་གཉིས་དབར་གདོང་ཐུག་ཁྲོད་ད་ལྟ་ཁོང་གིས་བཀའ་མོལ་དེ་ལྟར་གནང་བ་དེ་གནད་འཕིགས་ཤིག་ལ་ངོས་འཛིན་གནང་བཞིན་འདུགཉེ་ཆར་ལ་དྭགས་གྷལ་ཝན་ཡུལ་དུ་ཆགས་པའི་རྒྱ་གར་དང་བོད་གཉིས་ཀྱི་ས་མཚམས་ས་ཁུལ་དུ་རྒྱ་དཀར་ནག་གཉིས་ཀྱི་དམག་མིའི་དབར་གདོང་ཐུག་ཤོར་རྐྱེན་རྒྱ་གར་གྱི་དམག་མི་ ༢༠ ཙམ་ཞིག་རྐྱེན་འདས་སུ་ཕྱིན་པའི་གནས་དོན་དང་འབྲེལ་ཚོར་བ་སྣོ་བའི་གནས་སྟངས་ཁྲོད་འདིར་ཁ་སང་ཨ་རུ་ནཱ་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་མོན་རྟ་དབང་ཁུལ་གྱི་ས་མཚམས་ཁུལ་དུ་ཆེད་ཕེབས་གནང་སྟེ་རྒྱ་གར་གྱི་མཐའ་མཚམས་དམག་མི་རྣམས་དང་ལྷན་དུ་མཇལ་འཕྲད་གནང་རྗེས་ཁོང་གི་ Twitter ཐོག་དམག་མི་རྣམས་དང་ལྷན་སྒྲོན་སྐུ་པར་ཁག་ཅིག་ཆེད་སྤེལ་དང་འབྲེལ། རྒྱ་གར་ལ་རང་བཙན་ཐོབ་པ་ནས་བཟུང་ང་ཚོའི་རེ་བ་ཆ་ཚང་རྒྱ་གར་གྱི་དམག་མིར་བཅོལ་ཡོད་པ་དང་ད་རེས་རང་ཉིད་འབུམ་ལ་ཁུལ་དུ་ཆགས་པའི་རྒྱ་གར་དང་བོད་ཀྱི་ས་མཚམས་ཁུལ་དུ་ཕེབས་ཏེ་དམག་མི་དག་དང་ལྷན་དུ་མཇལ་འཕྲད་ཀྱི་གོ་སྐབས་བྱུང་དོན་བཞིན་དམག་མི་རྣམས་ཀྱི་དཔའ་ངར་དང་ཞུམ་པ་མེད་པའི་སེམས་ཤུགས་ཡོད་པ་ལྟར་མཐའ་མཚམས་སྲུང་སྐྱོབ་ཐོག་ང་ཚོ་བློ་བདེ་ངང་བཞུགས་ཆོག་པ་འདུག་ཅེས་གསུངས་འདུགབློན་ཆེན་མཆོག་གིས་ Twitter ཐོག་གནས་ཚུལ་སྤེལ་བར་དྲྭ་རྒྱའི་མི་སྣ་མང་དག་ཅིག་ནས་ཁོང་ལ་ཡི་རངས་བསྔགས་བརྗོད་ཞུ་བཞིན་པ་དང་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ཀྱང་རང་ཉིད་ཀྱི་ Twitter ཐོག་གནད་དོན་དེར་དགའ་བསུ་ཞུས་འདུགཟླ་བ་འདིའི་ཚེས་ ༡༥ ཉིན་རྒྱ་དཀར་ནག་གཉིས་ཀྱི་དམག་མིའི་དབར་དྲག་པོའི་གདོང་ཐུག་གི་གནད་དོན་ཁྲོད་རྒྱ་གར་གྱི་དམག་མི་ ༢༠ ཙམ་དང་རྒྱ་ནག་གི་དམག་མི་ ༤༠ ཙམ་འདས་གྲོངས་སུ་ཕྱིན་ཏེ་ཕྱོགས་གཉིས་དབར་ས་མཚམས་ཀྱི་རྩོད་རྙོག་ཤུགས་ཆེ་རུ་ཕྱིན་པ་དང་འབྲེལ། རྒྱ་གར་མ་ཧཱ་རཱཤྚ་མངའ་སྡེའི་གཞུང་འབྲེལ་མི་སྣས་བརྒྱུད་ལམ་ཁག་ལ་དེང་སྐབས་རྒྱལ་ཁབ་ཕྱོགས་གཉིས་དབར་རྩོད་རྙོག་རྐྱེན་པས་མངའ་སྡེས་རྒྱ་ནག་དང་ལྷན་དེ་སྔོན་ཨ་སྒོར་ས་ཡ་ ༦༠༠ ཙམ་གྱི་ཚོང་འབྲེལ་ལས་འཆར་ཡོད་པ་དེ་ད་ཆ་རྒྱུན་མ་མཐུད་པར་བཞག་ཡོད་པ་མངོན་གསལ་གནང་འདུག དེ་བཞིན་རྒྱ་གར་གྱི་མངའ་སྡེ་གཞན་ནས་ཀྱང་རྒྱ་ནག་དང་ལྷན་ཚོང་འབྲེལ་ལ་བསྐྱར་ཞིབ་བྱེད་བཞིན་པ་དང་ཁག་ཅིག་གིས་ཚོང་འབྲེལ་མཚམས་འཇོག་གནང་བའི་གནས་ཚུལ་ཡང་འཐོན་བཞིན་འདུགདེ་རིང་རྒྱ་གར་གྱི་བརྒྱུད་ལམ་ཁག་གིས་ Core Group for Tibetan Cause ཞེས་རྒྱ་གར་བོད་དོན་རྒྱབ་སྐྱོར་ཚོགས་པ་ནང་མའི་ངོས་ནས་རྒྱ་ནག་གཞུང་གིས་ཉེ་སྔོན་ཕྱི་ཚེས་ ༡༥ དང་། ༡༦ གཉིས་ལ་གྷ་ཝན་རི་གཤོངས་སུ་དྲག་པོའི་གདོང་ཐུག་གི་གནད་དོན་ལ་སྐྱོན་བརྗོད་དང་གནད་དོན་དེའི་འོག་འདས་གྲོངས་སུ་གྱུར་བའི་རྒྱ་གར་དམག་མི་རྣམས་ལ་གདུང་སེམས་མཉམ་བསྐྱེད་དང་འབྲེལ། གནད་དོན་དེ་ནས་རྒྱ་ནག་སྲིད་གཞུང་གིས་ངན་སེམས་ཇི་ཙམ་འཆང་བཞིན་ཡོད་པ་གསལ་པོ་མངོན་རྒྱུ་ཡོད་པ་དང་། ༸ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་རིན་པོ་ཆེ་མཆོག་གི་གནད་དོན་དང་རྒྱ་ནག་ཝུ་ཧན་གྲོང་ཁྱེར་ནས་མཆེད་པའི་ཏོག་དབྱིབས་རིམས་ནད་ཀྱིས་འཛམ་གླིང་ཁྱོན་ཡོངས་སུ་མི་རྒྱུ་གཉིས་ཀར་གནོད་འཚེ་དཔག་མེད་བཟོས་པའི་གནད་དོན་སོགས་ལུང་འདྲེན་དང་ཆབས་ཅིག རྒྱ་གཞུང་གིས་ལོ་ངོ་བཅུ་ཕྲག་མང་པོའི་རིང་ལ་ངན་སེམས་དང་ངན་བྱུས་དེ་ལྟར་བྱེད་བཞིན་པ་འཐེར་འདོན་གྱིས་འཛམ་གླིང་ཁྱོན་ཡོངས་ཀྱིས་དེ་ལྟར་མི་ཡོང་བར་བཀག་སྡོམ་ནན་པོ་གནང་གནད་ཡིན་པ་དང་། རྒྱ་ནག་གི་དངོས་ཆས་རྣམས་ཉོ་ཚོང་མཚམས་འཇོག་བྱེད་དགོས་པའི་གཞེན་སྐུལ་བསྐྱར་ནན་གནང་འདུགརྩ་བའི་ཉེ་ཆར་དྲག་པོའི་གདོང་ཐུག་གི་གནད་དོན་དང་འབྲེལ་རྒྱལ་ཁབ་ཕྱོགས་གཉིས་ཀྱི་ས་མཚམས་ཀྱི་རྩོད་རྙོག་སྔར་དང་མི་འདྲ་བར་ཤུགས་ཆེ་རུ་ཕྱིན་པ་དང་འབྲེལ། དེ་རིང་གནས་ཚུལ་ཐོན་ཁག་ལ་གཞིགས་ཚེ་ཕྱི་ཚེས་ ༢༢ ཉིན་རྒྱ་དཀར་ནག་གཉིས་ཀྱི་བདེ་སྲུང་དང་དམག་གི་འབྲེལ་ཡོད་དཔོན་རིགས་རྣམས་ཀྱི་དབར་ཁ་པར་དང་དྲྭ་རྒྱ་བརྒྱུད་དེ་ཚོགས་འདུ་རིམ་པ་ཚོགས་རྗེས་སུ་གྷལ་ཝན་ཁུལ་དུ་ཕྱོགས་གཉིས་ཀྱི་ངོས་ནས་དམག་གི་སྐོར་སྲུང་ལས་དོན་དང་འཛུགས་སྐྲུན་གྱི་ལས་གཞི་ཁག་རིམ་བཞིན་མཚམས་འཇོག་བྱེད་རྒྱུའི་གྲོས་མཐུན་བྱུང་འདུག

སུད་སི་སྦན་ནས་ཇི་ནི་ཝ་བར་བོད་དོན་གོམ་བགྲོད་ཀྱི་ལས་འགུལ་དབུ་འཛུགས།

དེང་སྐབས་འཛམ་གླིང་ཁྲོད་རྒྱ་ནག་ཝུ་ཧན་ནས་ཐོག་མར་མཆེད་པའི་ཏོག་དབྱིབས་གཉན་རིམས་རྐྱེན་པས་མང་ཚོགས་སྟོང་ཕྲག་མང་པོའི་ཚེ་སྲོག་ཤོར་བ་དང་། རྒྱ་དཀར་ནག་གཉིས་དབར་ས་འཚམས་ཀྱི་དོན་རྐྱེན་གནད་དོན་བྱུང་ཁག་བཅས་དང་འབྲེལ་ནས་ཉེ་ཆར་འཛམ་གླིང་གང་སར་གནས་སྡོད་བོད་མི་ཚོགས་སྒེར་ཁག་གིས་གཅིག་རྗེས་གཉིས་མཐུད་ཀྱིས་ལས་འགུལ་འདྲ་མིན་སྤེལ་བཞིན་ཡོད་པ་ལྟར། དེ་རིང་ཕྱི་ཚེས་ ༢༥ ཉིན་གྱི་སྔ་དྲོ་སླར་ཡང་སུད་སིར་གནས་སྡོད་བོད་མི་དང་བླངས་པ་བཞིས་སུད་སི་རྒྱལ་ས་སྦན་ནས་གྲོང་ཁྱེར་ཇི་ནི་ཝ་བར་བོད་དོན་ཞི་བའི་གོམ་བགྲོད་ཀྱི་ལས་འགུལ་དབུ་འཛུགས་གནང་སོང་།ཐེངས་འདིའི་བོད་དོན་ལས་འགུལ་ནི་སུད་སི་རྒྱལ་ས་སྦན་ནས་ཡིན་པ་བོད་མི་བློ་བཟང་དར་རྒྱས་ལགས་དང་རྡོ་རྗེ་དངོས་གྲུབ་ལགས། ཛུ་རིག་གནས་སྡོད་བསྟན་རྣམ་ལགས། དེ་བཞིན་ཨ་རའོ་གནས་སྡོད་བཀྲིས་ལགས་བཅས་བོད་མི་དང་བླངས་པ་བཞིས་ རྒྱལ་ས་སྦན་དུ་རྟེན་གཞི་བྱས་པའི་རྒྱལ་ཡོངས་གྲོས་ཚོགས་ཀྱི་མདུན་ངོས་ནས་དེ་རིང་སྔ་དྲོར་དབུ་འཛུགས་གནང་ཡོད་པ་རེད།ལས་འགུལ་གྱི་དམིགས་ཡུལ་གཙོ་བོ་ནི་ཉིན་གྲངས་ལྔའི་རིང་གོམ་བགྲོད་དུས་ཡུན་རིང་བོད་དོན་གོམ་བགྲོད་པ་རྣམས་ནས་རྒྱལ་སྤྱིའི་མང་ཚོགས་ལ་བོད་ནང་གི་དངོས་ཡོད་གནས་ཚུལ་སྤྱི་དང་སྒོས་སུད་སི་དང་རྒྱལ་སྤྱིའི་རྒྱལ་གཞུང་སྒེར་ཚོགས་སྡེ་ཁག་ལ་རྒྱ་ནག་ཝུ་ཧན་ནས་ཁྱབ་གདལ་སོང་བའི་ཏོག་དབྱིབས་གཉན་རིམས་རྐྱེན་པས་གོ་ལའི་ཁྱོན་ཡོངས་སུ་འགྲོ་བ་མི་སྟོང་ཕྲག་མང་པོའི་ཚེ་ཤོར་བའི་འགན་ཡོངས་རྫོགས་རྒྱ་གཞུང་ལ་འཁུར་བཅུག་ནས་རྒྱ་ནག་གི་ཅ་དངོས་ཉོ་ཚོང་མཚམས་འཇོག་གནང་དགོས་པ་མ་ཟད། རྒྱ་ནག་གཞུང་གིས་སིམ་འཛུལ་ངང་སུད་སི་རྒྱལ་ཁབ་ཀྱི་མང་གཙོ་དང་འགྲོ་བ་མིའི་ཐོབ་ཐང་གི་ལྟ་གྲུབ་རྡོག་རོལ་གཏོང་བཞིན་པར་སུད་སི་གཞུང་ནས་དེར་ཐུགས་སྣང་གང་གཟབ་གནང་དགོས་པ་བཅས་དོན་ཚན་བཞི་ཅན་དགོས་འདུན་ཐོག་ནས་གནང་ཡོད་པ་རེད།ཐེངས་འདིའི་ཉིན་གྲངས་ལྔའི་རིང་བོད་དོན་གོམ་བགྲོད་ཀྱི་ལས་འགུལ་ཁྲོད་ལས་འགུལ་བ་རྣམས་ནས་སུད་སི་རྒྱལ་ས་སྦན་ནས་གྲོང་ཁྱེར་ཕྷིར་སྦུ་དང་ལུ་ཛན། དེ་བཞིན་ཇི་ནི་ཝ་བཅས་གྲོང་ཁྱེར་ཆེ་ཁག་བཞིར་གོམ་བགྲོད་གནང་སྟེ་མཐར་ཕྱི་ཚེས་ ༣༠ ཉིན་ཇི་ཝའི་རྒྱལ་ཚོགས་མདུན་དུ་མཇུག་སྒྲིལ་གནང་རྒྱུ་ཡིན་པ་རེད། རྩ་བའི་ད་ལན་རྒྱ་ནག་ཝུ་ཧན་ནས་ཐོག་མར་མཆེད་པའི་ཏོག་དབྱིབས་གཉན་རིམས་དང་འབྲེལ་ཟླ་བ་སྔོན་མར་སུད་སི་ནང་གནས་སྡོད་ཚེ་རིང་དབང་འདུས་ལགས་ཀྱིས་སུད་སི་གྲོང་ཁྱེར་ཝུན་ཐ་ཐུར་ནས་ཇི་ཝ་བར་བོད་དོན་གོམ་བགྲོད་ཀྱི་ལས་འགུལ་སྤེལ་གནང་རྗེས་ད་ལན་སླར་ཡང་བོད་དོན་གོམ་བགྲོད་ཀྱི་ལས་འགུལ་སྤེལ་བ་འདི་བོད་མི་སྒེར་གྱིས་གོམ་བགྲོད་ཀྱི་ལས་འགུལ་ཐེངས་གཉིས་པ་ཆགས་ཀྱི་ཡོད་པ་རེད།

ཕྱི་ལོ་ ༢༠༢༡ ལོའི་འོས་བསྡུ་ཚད་དང་ལྡན་པ་ཡོང་ཆེད་རྣམ་དཔྱོད་ལྡན་པའི་བོད་མིའི་འོས་ཞེས་པའི་ལས་འཆར་སྤེལ་རྒྱུ།

ཕྱི་ལོ་ ༢༠༢༡ ལོའི་བཙན་བྱོལ་བོད་མིའི་སྒྲིག་འཛུགས་ཀྱི་སྲིད་སྐྱོང་དང་སྤྱི་འཐུས་གཉིས་ཀྱི་འོས་བསྡུ་ཆེན་མོ་སླེབས་ཉེ་དང་བསྟུན། དེ་རིང་ཉིན་རྒྱབ་སུད་སི་ཆོུད་ ༡ སྟེང་དྲྭ་ཐོག་ནས་བོད་མི་དང་བླངས་པ་ཁག་ཅིག་ལས་གྲུབ་པའི་རུ་ཁག་ཞིག་གིས་གསར་འགོད་ལྷན་ཚོགས་གནང་སྟེ་རིང་མིན་ ༢༠༢༡ ལོའི་བོད་མིའི་འོས་བསྡུ་ཆེན་མོ་དེ་ཚད་དང་ལྡན་པ་ཞིག་ཡོང་ཕྱིར་ SmartVote Tibet འམ་བོད་ཀྱི་རྣམ་དཔྱོད་ལྡན་པའི་འོས་ཞེས་པའི་ལས་འཆར་ཞིག་སྤེལ་རྒྱུུ་ཡིན་པ་ཡོངས་གྲགས་གནང་སོང་། རྣམ་དཔྱོད་ལྡན་པའི་བོད་མིའི་འོས་ཞེས་པ་ནི་མང་གཙོའི་ལས་འཆར་ཞིག་གི་ཐོག་ནས་སྣེ་ཁྲིད་བྱས་པ་དང་། ཚོགས་པ་དེ་ཆབ་སྲིད་ཚན་རིག་དང་ལོ་རྒྱུས། སེམས་ཁམས་རིག་པ། གློག་ཀླད་འཕྲུལ་ཆས། འགྲོ་བ་མིའི་ཐོབ་ཐང་སོགས་ཤེས་ཡོན་གྱི་རྒྱབ་ལྗོངས་ཕུན་ཚོགས་དང་ལྡན་པའི་ཤེས་ལྡན་བོད་མིས་མཉམ་ཞུགས་ཀྱིས་སྣེ་ཁྲིད་བྱས་པའི་ལས་གཞི་ཡིན་པ་དང་། ལས་འཆར་དེ་གཙོ་བོ་དེང་དུས་ཀྱི་དྲྭ་རྒྱའི་ཐབས་ལམ་མ་ལག་བརྒྱུད་མང་ཚོགས་ལ་འོས་མིའི་ལོ་རྒྱུས་དང་ཤེས་ཡོན་རྒྱབ་ལྗོངས། དེ་བཞིན་བཞེངས་ཕྱོགས་དང་སྲིད་བྱུས་སོགས་ཆ་ཚང་བ་ཞིག་ཚན་རིག་དང་མཐུན་པར་ངོ་སྤྲོད་ཞུ་རྒྱུ་དང་། དེ་བཞིན་བོད་མི་འོས་འཕེན་མཁན་རྣམས་ཀྱིས་འོས་བསྡུའི་ཉིན་མོར་གནས་ཚུལ་རྟོགས་ཐོག་འོས་འདེམས་གནང་ཕྱིར་མཐུན་འགྱུར་གནང་མཁན་གྱི་སྤྱོད་ལམ་བསླབ་པའི་མ་ལག་ཞིག་ཆགས་ཀྱི་འདུག རྩ་བའི་རྣམ་དཔྱོད་ལྡན་པའི་འོས་ཞེས་པའི་སྡིངས་ཆ་འདི་ཐོག་མར་སུད་སི་པོ་ལི་ཀྲུལས་བཟོ་ལས་ཁང་ Polittool Assoc. གིས་གསར་སྐྲུན་གནང་བ་ཞིག་ཡིན་འདུག་ཅིང་། ད་བར་འོས་ཤོག་ཐབས་ལམ་མ་ལག་དེ་བཞིན་སུད་སི་དང་། ཨོས་ཀྲི་ལི་ཡ། ལུཀ་ཙམ་བཀ།ཨོས་ཀྲི་ཡ། སི་ཀོཌ་ལེཌ། དེ་བཞིན་ཡུ་རོབ་མཉམ་འབྲེལ་ལ་སོགས་ཀྱི་ལག་བསྟར་བྱས་ཏེ་ལེགས་གྲུབ་ཆེན་པོ་བྱུང་ཡོད་པ་ཞིག་ཆགས་ཀྱི་འདུག ད་ལན་སུད་སི་ Polittool མཉེན་ཆས་བཟོ་ལས་ཁང་གིས་མཉེན་ཆས་མ་ལག་རིང་མིན་བཙན་བྱོལ་བོད་མིའི་འོས་བསྡུའི་ལས་རིམ་ཐོག་བེད་སྤྱོད་གནང་རྒྱུའི་ཆོག་མཆན་གནང་བ་བརྒྱུད་བོད་མི་དང་བླངས་རུ་ཁག་གིས་མཉེན་ཆས་མ་ལག་སྒྲོམ་གཞི་འདིར་གཞིར་བཞག་དེ་རིང་ཁོང་རྣམས་ནས་ https://www.smartvote-tibet.org/ དྲྭ་རྒྱ་གསར་པ་ཞིག་དབུ་འབྱེད་གནང་ཡོད་པ་རེད། རླུང་འཕྲིན་ཁང་གིས་རྣམ་དཔྱོད་ལྡན་པའི་བོད་མིའི་འོས་མི་ཞེས་པའི་ལས་འཆར་དེའི་རྒྱབ་ལྗོངས་དང་དགོས་དམིགས། དགེ་མཚན་སོགས་དང་འབྲེལ་བའི་སྐོར་ལ་སུད་སིར་གནས་བཞུགས་ལས་འཆར་གྱི་ཚོགས་མི་བཀྲས་མཐོང་དབང་པོ་ལགས་སུ་བཅར་འདྲི་ཞུས་ཡོད།

འགྲོ་བ་མི་གཅིག་གྱུར་གྱི་འདུ་ཤེས་ཐོག་དགོངས་པ་བཞེས་དགོས།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འགྲོ་བ་མིའི་སྤྱི་ཚོགས་ཁྲོད་དུ་འཕྲད་བཞིན་པའི་དབྱེ་འབྱེད་ཀྱི་དཀའ་ངལ་རྣམས་མིའི་དགོངས་པ་བཞེས་སྟངས་ཆེས་གུ་དོག་དྲག་པའི་དབང་གིས་ཡིན་པ་དང་། དཀའ་ངལ་དེ་དག་ལ་གདོང་ལེན་གནང་ཐབས་སུ་འགྲོ་བ་མི་གཅིག་གྱུར་གྱི་འདུ་ཤེས་ཐོག་དགོངས་པ་བཞེས་དགོས་པར་ལམ་སྟོན་མཛད་འདུགཁ་སང་ཨ་མི་རི་ཀའི་ CBS གསར་ཁང་གི་ཨེ་ཤ་ཡའི་སྡེ་ཚན་གྱི་གསར་འགོད་པ་ Ramy Inocencio ལགས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་ལ་ཏོག་དབྱིབས་རིམས་ཀྱི་ཛ་དྲག་གནས་སྟངས་དང་ཨ་རི་ནང་འཕྲད་བཞིན་པའི་མི་རིགས་དབྱེ་འབྱེད་དང་འབྲེལ་བའི་ལས་འགུལ་སོགས་ཀྱི་ཐོག་སྐར་མ་ ༩༠ ཙམ་ཡོད་པའི་བཀའ་འདྲི་ཞུས་པའི་ལེ་ཚན་ཞིག་རྒྱང་བསྲིངས་གནང་འདུག སྐབས་དེར་མགོན་པོ་༸གང་ཉིད་མཆོག་གིས་ནང་ཆོས་ཉམས་ལེན་གནང་མཁན་ཞིག་ཡིན་པའི་ཆ་ནས་ཏོག་དབྱིབས་རིམས་ནད་ཀྱི་ཛ་དྲག་གནས་སྐབས་སུ་མིའི་དགོངས་པ་བཞེས་ཕྱོགས་དེ་ཕྱི་ལུས་པོའི་བྱ་སྤྱོད་ལས་གལ་འགངས་ཆེ་བ་ཞིག་ཏུ་ངོ་འཛིན་མཛད་བཞིན་ཡོད་པ་བཀའ་སྩལ་འདུག དེ་བཞིན་ཨ་རི་ནང་འཕྲད་བཞིན་པའི་མི་རིགས་དབྱེ་འབྱེད་དང་འབྲེལ་བའི་ངོ་རྒོལ་ལས་འགུལ་སོགས་དང་འབྲེལ། དཀའ་ངལ་དེ་དག་མིའི་དགོངས་པ་བཞེས་སྟངས་གུ་དོག་དྲག་པའི་དབང་གིས་བྱུང་བ་ཞིག་ཡིན་པ་དང་། དེ་ཡང་ངོ་དཀར་ནག་སོགས་གང་ཡིན་ལ་བལྟོས་མེད་དང་ཐོག་དེར་ང་ཚོ་ཚང་མ་འགྲོ་བ་མི་ཞིག་ཡིན་པ་གཅིག་མཚུངས་ཡིན་པ་མ་ཟད་རིགས་རུས་དང་ཆོས་དད། དེ་བཞིན་རྒྱལ་ཁབ་སོགས་ཀྱི་ཐོག་ནས་མིའི་རིགས་ལ་དབྱེ་འབྱེད་གནང་རྒྱུའི་དགོངས་པ་བཞེས་པ་དེ་དུས་ཚོད་ཡོལ་ཟིན་པའི་ཆ་ལུགས་རྙིང་པ་ཞིག་རེད་ཅེས་ལམ་སྟོན་བསྩལ་བ་དང་ཆབས་ཅིག རིགས་རུས་སོགས་དབྱེ་འབྱེད་དང་འབྲེལ་བའི་དཀའ་ངལ་དེ་དག་མི་ཡོང་བ་དང་གདོང་ལེན་གནང་ཐབས་སུ་ང་ཚོ་ཚང་མ་འགྲོ་བ་མི་གཅིག་གྱུར་གྱི་འདུ་ཤེས་ཐོག་དགོངས་པ་བཞེས་དགོས་གལ་ཡིན་པ་ལམ་སྟོན་བཀའ་དྲིན་ཆེ་བ་མཛད་འདུག   ༸གོང་ས་མཆོག་གིས་ཨ་མི་རི་ཀའི་སྲིད་འཛིན་ལས་ཐོག་དང་འབྲེལ་བའི་བཀའ་འདྲི་ཁག་ལ་བཀའ་ལན་མཛད་སྐབས་དེ་སྔ་སྐུ་ཞབས་ Trump མཆོག་ཨ་རིའི་སྲིད་འཛིན་ཆགས་མཚམས་སུ་ America First ཞེས་ཨ་རིའི་གནད་དོན་ཨང་དང་པོ་ཡིན་སྐོར་ཡང་ཡང་གསུང་བཤད་སོགས་གནང་བར་དགོངས་པར་བདེ་པོ་མ་བྱུང་ཞེས་བཀའ་བསྩལ་བ་དང་། གསར་འགོད་པས་གལ་སྲིད་སྲིད་འཛིན་ཊམ་མཆོག་གིས་མགོན་པོ་༸གང་ཉིད་མཆོག་ཨ་རིར་གདན་ཞུ་གནང་ཚེ་ཐུག་འཕྲད་མཛད་འདོད་ཡོད་དམ་ཞེས་བཀའ་འདྲི་ཞུས་པར་ད་ལྟའི་ངོས་ལུས་པོའི་གནས་སྟངས་ལ་གཞིགས་ཏེ་ས་ཐག་རིང་པོར་འགྲུལ་བཞུད་བྱེད་རྒྱུ་དེ་ལས་སླ་པོ་ཞིག་མིན་པ་དང་གལ་སྲིད་སྲིད་འཛིན་ཊམ་མཆོག་རྒྱ་གར་ལ་ཕེབས་ན་གནས་སྟངས་ཤིག་འགྲིག་ཀྱང་། བདེན་པར་བརྗོད་ན་སྐབས་རེ་སྲིད་འཛིན་ཊམ་མཆོག་གི་གནང་སྟངས་དེ་ཚོ་མགོ་རྙོག་པོ་རེད་འདུག་ཅེས་བཀའ་བསྩལ་འདུག  རྩ་བའི་ཏོག་དབྱིབས་རིམས་ནད་ཀྱི་ཛ་དྲག་གནས་སྟངས་ཁྲོད་༸གོང་ས་༸སྐྱབས་མགོན་ཆེན་པོ་མཆོག་གིས་དྲྭ་ལམ་ཐད་གཏོང་བརྒྱུད་བཀའ་ཆོས་བཀའ་དྲིན་བསྐྱངས་པ་མ་ཚད་རྒྱལ་སྤྱིའི་རང་བཞིན་ལྡན་པའི་ཚོགས་འདུ་དང་ལྷན་ཚོགས་ཁག་ལ་དབུ་བཞུགས། དེ་བཞིན་གསར་ཁང་ཁག་གི་བཀའ་འདྲིར་བཀའ་ལན་སོགས་མཛད་མུས་ལྟར། གནངས་ཕྱི་ཚེས་ ༢༦ ཉིན་རྒྱ་གར་ Haryana མངའ་སྡེའི་གྲོང་ཁྱེར་ Gurgaon ནང་རྟེན་གཞི་བྱས་པའི་ Amity གཙུག་ལག་སློབ་གཉེར་ཁང་གི་སློབ་མ་རྣམས་ལ་འཛམ་གླིང་ཞི་བདེ་དང་བྱམས་བརྩེ་ལྡན་པ་ཞིག་སྐྲུན་ཐབས་ཀྱི་འཆར་སྣང་ཞེས་པའི་བརྗོད་གཞིའི་ཐོག་ལམ་སྟོན་མཛད་རྒྱུའི་མཚད་འཆར་ཡོད་པ་རེད།

བོད་མི་དང་ཧོང་ཀོང་སོགས་ཀྱི་མང་ཚོགས་ཐོག་དྲག་གནོན་བྱེད་མཁན་རྒྱ་ནག་གི་དཔོན་རིགས་དག་ལ་ཁྲིམས་ལྟར་ཉེས་ཆད་གཅོད་དགོས།

ཁེ་ན་ཌའི་གྲོས་ཚོགས་གོང་མའི་འཐུས་མི་ ༡༣ ཡིས་ཡུལ་དེའི་སྲིད་བློན་ Justin Trudeau མཆོག་གིས་མཚན་ཐོག་ལ་ཕྱག་ཡིག་ཞིག་ཕུལ་བ་བརྒྱུད་བོད་མི་དང་ཧོང་ཀོང་། ཡུ་གུར་བའི་ཐོག་དྲག་གནོན་བྱེད་མཁན་རྒྱ་ནག་གི་དཔོན་རིགས་རྣམས་ལ་ Global Magnitsky Act ཞེས་པའི་ཁྲིམས་གཞི་ལག་བསྟར་གནང་དགོས་གསུངས་འདུག རྩ་བའི་ Global Magnitsky Act ཞེས་པའི་ཁྲིམས་འཆར་དེ་དེ་སྔ་ཨུ་རུ་སུ་ནང་མང་ཚོགས་ཀྱི་འགྲོ་བ་མིའི་ཐོབ་ཐང་བརྩི་མེད་རྡོག་རོལ་དང་ལྐོག་ས་རུལ་སུངས་དང་དེ་བཞིན་མང་ཚོགས་ཀྱི་དངུལ་རྐུ་འཁྱེར་གྱི་བྱ་སྤྱོད་ཐེར་འདོན་གནང་མཁན་ཡུལ་དེའི་ཁྲལ་བསྡུའི་སློབ་སྟོན་པ་ Sergei Magnitsky ལགས་ཕྱི་ལོ་ ༢༠༠༨ ལོར་འཛིན་བཟུང་རྗེས་ ༢༠༠༩ ལོར་ཁོང་བཙོན་ཁང་ནང་དུ་སྐུ་གྲོངས་བའི་གནད་དོན་དང་འབྲེལ། དེ་ལྟར་བྱེད་མཁན་ཨ་རིའི་དཔོན་རིགས་རྣམས་ལ་ཉེས་ཆད་གཅོད་ཕྱིར་སྲིད་འཛིན་གོང་མ་ Obama མཆོག་གིས་ཕྱི་ལོ་ ༢༠༡༢ ལོར་ཁྲིམས་གཞིར་གཏན་འབེབས་གནང་བ་ཞིག་དང་ཕྱི་ལོ་ ༢༠༡༦ རྗེས་སུ་ཁྲིམས་གཞི་དེ་རྒྱལ་སྤྱི་ཁྱོན་ཡོངས་སུ་འགྲོ་བ་མིའི་ཐོབ་ཐང་བརྩི་མེད་རྡོག་རོལ་བཏང་མཁན་དཔོན་རིགས་ཀུན་ལ་ཁྱབ་ཡོད་པ་རེད་འདུགཁ་སང་ཕྱི་ཚེས་ ༢༣ ཉིན་ཁེ་ན་ཌའི་གྲོས་ཚོགས་གོང་མའི་འཐུས་མི་ ༡༣ ནས་ཡུལ་དེའི་སྲིད་བློན་མཆོག་གིས་མཚན་ཐོག་ལ་ཕུལ་བའི་ཕྱག་ཡིག་ནང་རྒྱ་ནག་གཞུང་གིས་ཧོང་ཀོང་ཞི་རྒོལ་བ་རྣམས་ཀྱི་འགྲོ་བ་མིའི་ཐོབ་ཐང་དང་དྲང་བདེན་གྱི་རིན་ཐང་བཅས་ལ་བརྩི་མེད་བཏང་བ་མ་ཟད། ཤིན་ཅང་ནང་དུ་ཁ་ཆེའི་གྲངས་ཉུང་མི་རིགས་ཐོག་དྲག་གནོན་ཁྲོད་མི་ས་ཡ་ ༢ ནས་ ༣ བར་འཛིན་བཟུང་བཀག་ཉར་བྱས་པ། དེ་བཞིན་ལོ་ངོ་བཅུ་ཕྲག་མང་པོའི་སྔོན་ནས་བོད་མིའི་ཐོག་དྲག་གནོན་བྱེད་བཞིན་པའི་བྱ་སྤྱོད་རྣམས་ལུང་འདྲེན་གྱིས་རྒྱ་ནག་གཞུང་གིས་ལོ་ངོ་བཅུ་ཕྲག་མང་པོའི་རིང་མང་ཚོགས་ཀྱི་འགྲོ་བ་མིའི་ཐོབ་ཐང་དང་རང་དབང་ཁྲིམས་ཀྱི་དབང་སྒྱུར་བཅས་ལ་བརྩི་མེད་བཏང་བ། དེ་སྔ་ཧོང་ཀོང་ཐད་ཨིན་ཡུལ་དང་ལྷན་དུ་བཞག་པའི་ཆིངས་ཡིག་དང་རྒྱལ་ཚོགས་ཀྱི་གཏན་འབེབས་གནང་བའི་རྒྱལ་སྤྱིའི་ཁྲིམས་བཅས་ལ་བརྩི་མེད་རྡོག་རོལ་གཏོང་བཞིན་ཡོད་པ་བཅས་ལུང་འདྲེན་གནང་འདུག ལྷག་པར་དུ་རྒྱ་གཞུང་གིས་ཁེ་ན་ཌའི་མི་སེར་འཛིན་བཟུང་གིས་ཁོང་རྣམས་ལ་གསང་ཉུང་བའི་ཉེས་མིང་འོག་ཁྲིམས་ཐག་བཅད་པ་དང་ཁེ་ན་ཌའི་ནང་དུའང་ཁུང་རྩིས་སློབ་གླིང་སོགས་རྒྱ་ནག་འཐབ་ཕྱོགས་གཅིག་གྱུར་ལས་ཁུངས་དང་འབྲེལ་བའི་སྒྲིག་འཛུགས་ཁག་གིས་ཁེ་ན་ཌའི་སྤྱི་ཚོགས་དང་མང་ཚོགས་ལ་སྡིགས་ར་སྐུལ་བ་དང་སུན་གཙེར་བཟོ་བ་སོགས་མང་ཚོགས་ཀྱི་ཐོབ་ཐང་བརྩི་མེད་གཏོང་བཞིན་པ་བཅས་ལ་གཞིགས་ནས་ཁེ་ན་ཌ་དེ་རྒྱལ་སྤྱིའི་སྤྱི་ཚོགས་དང་རྒྱལ་ཚོགས་ཀྱི་ཚོགས་མི་རྒྱལ་ཁབ་ཅིག་ཡིན་པ་དང་། རྒྱལ་སྤྱིའི་ཁྲིམས་དང་འགྲོ་བ་མིའི་རིན་ཐང་། དེ་བཞིན་རང་དབང་དང་མང་གཙོ། ཁྲིམས་ཀྱི་དབང་སྒྱུར་བཅས་སྲུང་སྐྱོབ་གནང་དགོས་པ། གཞུང་གི་ངོས་ནས་ Global Magnitsky Act ཞེས་པའི་ཁྲིམས་གཞི་ལག་བསྟར་བརྒྱུད་ཧོང་ཀོང་དང་བོད་བཅས་ཀྱི་མང་ཚོགས་ཀྱི་འགྲོ་བ་མིའི་ཐོབ་ཐང་བརྩི་མེད་རྡོག་རོལ་གྱི་དྲག་གནོན་བྱེད་མཁན་རྒྱ་ནག་གི་དཔོན་རིགས་རྣམས་ཁེ་ན་ཌའི་ནང་ཡོང་མི་ཆོག་པ་དང་ཡུལ་དེའི་ནང་ཡོད་པའི་དཔོན་རིགས་དེ་དག་གི་རྒྱུ་ནོར་རྣམས་གཞུང་བཞེས་གནང་དགོས་པ་གསུངས་འདུག དེའི་ནང་ད་དུང་ཉེ་སྔོན་ཁེ་ན་ཌའི་གྲོས་ཚོགས་ཚོགས་དུས་ ༤༣ པ་དབུ་འབྱེད་ཐོག་སྲིད་སྐྱོང་ལྕམ་ Julie Payette མཆོག་གིས་ཨིན་ཡུལ་རྒྱལ་མོའི་གསུང་འཕྲིན་སྒྲོག་སྦྱང་གནང་བའི་ནང་ཁེ་ན་ཌ་གཞུང་དེ་ཁྲིམས་ཀྱི་སྐྱོང་བའི་རྒྱལ་སྤྱིའི་སྒྲིག་འཛུགས་དེར་དཀའ་ངལ་འཕྲད་སྐབས་ངལ་བ་ལས་སྲུང་སྐྱོབ་ཆེད་དུ་བཞེངས་རྒྱུའི་དམ་བཅའ་ཡོད་པ་ལྟར་ད་ལྟའི་ཆར་རྒྱ་ནག་གི་ངོས་ནས་ཁྲིམས་ཀྱི་སྐྱོང་བའི་རྒྱལ་སྤྱིའི་སྤྱི་ཚོགས་ལ་གནོད་འཚེ་ཆེས་ཆེར་བཟོ་བཞིན་པ་མ་ཟད་རྒྱལ་སྤྱིའི་བདེ་འཇགས་དང་འགྲོ་བ་མིའི་རིགས་ཀུན་ལ་ཉེན་ཁ་བཟོ་བཞིན་ཡོད་སྟབས། ང་ཚོའི་འབོད་སྐུལ་དེ་བཞིན་གཞུང་གི་ལས་འགན་དང་མཐུན་པ་མ་ཟད་ལོ་རྒྱུས་ཐོག་ཁེ་ན་ཌ་འདི་འགྲོ་བ་མིའི་ཐོབ་ཐང་དང་གཞི་རྩའི་རང་དབང་། མང་གཙོ་དང་ཁྲིམས་ཀྱི་དབང་སྒྱུར་སྲུང་སྐྱོབ་བྱེད་མཁན་གྱི་རྒྱལ་ཁབ་ཅིག་ཡིན་པའི་གནས་བབ་དང་འབྲེལ་གསུངས་ཡོད་སྐོར་དང་ཆབས་ཅིག ད་ཆར་ཁེ་ན་ཌ་གཞུང་རང་གི་བཞེངས་ཕྱོགས་རྒྱུན་འཛིན་གྱིས་རྒྱ་ནག་ཐོག་ Magnitsky ཁྲིམས་གཞི་ལག་བསྟར་གནང་རྒྱུའི་དུས་ལ་བབ་ཡོད་པ་གསུངས་འདུག ཁ་སང་ཁེ་ན་ཌའི་སྲིད་བློན་མཆོག་ལ་ཕྱག་ཡིག་ཕུལ་མཁན་གཙོ་བོ་ནི་གྲོས་ཚོགས་གོང་མའི་འཐུས་མི་སྐུ་ཞབས་ Thanh Hai Ngo ལགས་དང་ Leo Housakos ལགས་གཉིས་ཡིན་པ་དང་གྲོས་ཚོགས་འཐུས་མི་ ༡༡ ནས་རྒྱབ་སྐྱོར་གྱི་མཚན་རྟགས་བསྐྱོན་འདུག དེའི་བར་ན་ཁ་ཉིན་ཕྱེ་ཚེས་ ༢༢ ཉིན་ཡུ་རོབ་མཐུན་ཚོགས་དང་རྒྱ་ནག་དབར་གྱི་འབྲེལ་མོལ་ཚོགས་འདུ་ཐེངས་ ༢༢ པ་དེ་ཏོག་དབྱིབས་རིམས་ནད་ཀྱི་གནས་སྟངས་ཁྲོད་དྲྭ་རྒྱ་བརྒྱུད་ཚོགས་ཡོད་པ་དང་། ལྷན་ཚོགས་དེ་རྒྱ་ནག་གི་སྲིད་བློན་ལི་ཁེ་ཆང་དང་སྲིད་འཛིན་ཞི་ཅིན་ཕིང་གཉིས་དང་། ཡུ་རོབ་སྤྱི་མཐུན་ལྷན་ཁང་གི་གཙོ་འཛིན་ Charles Michel མཆོག་དང་ཡུ་རོབ་མཐུན་ཚོགས་ཀྱི་ཚོགས་གཙོ་ Ursula von der Leyen མཆོག ཡུ་རོབ་སྤྱི་མཐུན་ཚོགས་པའི་ཕྱི་འབྲེལ་ལས་ཁུངས་ཀྱི་འགན་འཛིན་གཞོན་པ་་ Josep Borrell མཆོག་བཅས་གཙོས་ཡུ་རོབ་མཐུན་ཚོགས་ཀྱི་འགོ་ཁྲིད་མི་སྣ་ ༢༧ ནས་ལྷན་ཚོགས་གནང་འདུག ཚོགས་འདུའི་ཐོག་ཡུ་རོབ་མཐུན་ཚོགས་ཀྱི་འགོ་ཁྲིད་རྣམས་ཀྱིས་བོད་ནང་གི་ཆེས་ཞན་པའི་འགྲོ་བ་མིའི་ཐོབ་ཐང་གི་གནས་སྟངས་དང་འགྲོ་བ་མའི་ཐོབ་ཐང་སྲུང་སྐྱོབ་བྱེད་མཁན། དེ་བཞིན་མང་ཚོགས་ཀྱི་གཞི་རྩའི་རང་དབང་ལ་དམ་དྲག་བྱེད་བཞིན་པ་བཅས་ཀྱི་ཐོག་ཐུགས་འཚབ་ཆེན་པོ་ཡོད་པར་འགྲེལ་བརྗོད་གནང་བ་དང་འབྲེལ། རྒྱ་གཞུང་གིས་བཙོན་འཇུག་བྱས་ཡོད་པའི་བོད་མི་འགྲོ་བ་མིའི་ཐོབ་ཐང་ལས་འགུལ་བ་ཁག་ཅིག་གི་གནད་དོན་ཐེར་འདོན་གནང་སྟེ་རིང་མིན་ཏོག་དབྱིབས་རིམས་ནད་ཀྱི་ངལ་བ་སེལ་རྗེས་ཡུ་རོབ་མཐུན་ཚོགས་དང་རྒྱ་ནག་གཉིས་དབར་འགྲོ་བ་མིའི་ཐོབ་ཐང་གི་གྲོས་མོལ་ཚོགས་འདུ་དེ་འཚོགས་ཐུབ་པའི་རེ་བ་ཡོད་ཅེས་གསུངས་འདུག

ཕྱིའི་རྒྱལ་ཁབ་གི་གཞུང་ཚབ་མི་སྣ་ཁག་ཅིག་བོད་ཀྱི་ས་ཁག་གཉིས་ལ་འཚམས་གཟིགས་ཕེབས་འདུག

ཁ་ཉིན་ཕྱི་ཚེས་ ༢༢ ཉིན་རྒྱ་ནག་གི་བརྒྱུད་ལམ་ཁག་ཏུ་རྒྱ་ནག་ཏུ་ཡོད་པའི་ཡོ་རོབ་རྒྱལ་ཁབ་ཁག་ཅིག་གཙོས་ཨེ་ཤ་ཡའི་རྒྱལ་ཁབ་ཁག་ཅིག་དང་ཨ་རི་སོགས་ཀྱི་གཞུང་ཚབ་མི་སྣ་ ༢༡ ཟི་ཁྲོན་ཞིང་ཆེན་གྱི་ཁྱབ་ཁོངས་ཟུང་ཆུ་དང་གཟི་ཚ་སྡེ་དགུ་གཉིས་ལ་འཚམས་གཟིགས་སུ་བསྐྱོད་པའི་གནས་ཚུལ་སྤེལ་འདུག།ཨ་རིའི་ནང་རྟེན་གཞིར་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གིས་འཚམས་གཟིགས་སུ་ཕེབས་མཁན་དག་ལ་དགའ་བསུ་ཞུ་ཡི་སྐོར་གསུངས་པ་དང་ཆབས་ཅིག ཐེངས་འདིའི་འཚམས་གཟིགས་དེ་བོད་མི་རིགས་ཀྱི་གནས་སྟངས་རྟོབ་ཞིབ་སླད་དུ་ཡིན་སྲིད་ཀྱང་བོད་མི་རིགས་ཀྱི་དངོས་ཡོད་ཀྱི་བདེ་སྡུག་ཤེས་རྟོགས་ཐུབ་རྒྱུ་དཀའ་བའི་གནས་ཡིན་པ་གསལ་པོ་རེད། འཚམས་གཟིགས་སུ་ཕེབས་མཁན་དག་གིས་རྒྱ་ནག་གཞུང་གིས་བོད་ནང་དུ་གཞི་རྩའི་འགྲོ་བ་མིའི་ཐོབ་ཐང་ལ་རྡོག་རོལ་གཏོང་བཞིན་པར་གླེང་སློང་མ་གནང་ཚེ་འཚམས་གཟིགས་དེ་དོན་དམ་གྱི་འཚམས་གཟིགས་ཤིག་ཆགས་ཀྱི་མེད་པར་བརྗོད་འདུགརྒྱལ་སྤྱིའི་བོད་དོན་ལས་འགུལ་ཁང་གིས་ཕྱིའི་རྒྱལ་ཁབ་ཁག་གི་གཞུང་ཚབ་མི་སྣ་བསྐྱོད་སའི་ས་ཁུལ་གཉིས་པོ་ནི་བོད་རང་སྐྱོངས་ལྗོངས་ཟེར་བའི་ཁྱབ་ཁོངས་ཤིག་མིན་པར་ངོ་སྤྲོད་གནང་བ་དང་འབྲེལ། བོད་རང་སྐྱོངས་ལྗོངས་ཟེར་བའི་ས་ཁུལ་དེ་དག་ལ་རྒྱ་ནག་གཞུང་གིས་ཕར་འགྲོ་ཚུར་འོང་ཐད་ལ་བཀག་སྡོམ་ནན་པོ་བྱེད་ཀྱི་ཡོད་པ་མ་ཟད་རྒྱ་ནག་རང་གི་ས་ཁུལ་གཞན་ཁག་ལས་ཆེས་བཀག་སྡོམ་ཆེ་བ་ཡོད་སྐོར་དང་། ཅི་སྟེ་བོད་རང་སྐྱོངས་ལྗོངས་ཟེར་བའི་ཁྱབ་ཁོངས་སུ་ཕྱི་འབྲེལ་དཔོན་རིགས་ཀྱིས་གཙོས་གནད་ཡོད་མི་སྣ་དང་། རྒྱ་ནག་ཏུ་ཡོད་པའི་ཕྱིའི་རྒྱལ་ཁབ་ཁག་གི་གསར་འགོད་པ་ཚོ་རྒྱ་ནག་གཞུང་གིས་ཆོག་མཆན་མེད་པར་བསྐྱོད་ཐུབ་ཀྱི་མེད་པ་མ་ཟད། ཡུལ་སྐོར་བའི་ངོ་བོའི་ཐོག་ནས་བསྐྱོད་ཐབས་བྱེད་ཀྱང་ཆོག་མཆན་ཐོབ་རྒྱུ་ཤིན་ཏུ་ནས་དཀའ་བ་ཞིག་ཡིན་པ་དང་། ཅི་སྟེ་ཆོག་མཆན་ཞིག་ཐོབ་དབང་བྱས་ཀྱང་ཁོང་ཚོར་བལྟ་སྲུང་དང་དམ་དྲག་ནན་པོ་བྱེད་ཀྱི་ཡོད་པར་འགྲེལ་བརྗོད་གནང་འདུག རྩ་བའི་ཟླ་བ་འདིའི་ཚེས་ ༢༢ ཉིན་རྒྱ་ནག་གཞུང་འབྲེལ་བརྒྱུད་ལམ་ཐོག་གནས་ཚུལ་སྤེལ་བ་ལྟར་རྒྱ་ནག་དམར་ཤོག་ཚོགས་པའི་ཕྱི་འབྲེལ་ཚོགས་ཆུང་གི་སྣེ་ཁྲིད་འོག་རྒྱ་ནག་ཏུ་ཡོད་པའི་ཨོ་སི་ཊི་ལི་ཡ་དང་ཨོ་སི་ཊྲི་ཡ། ཕ་རན་སི། འཇར་མ་ནི། ཨིས་རེལ། པ་ཀིས་ཏཱན། པོ་ལན་ཌི། སིངྒྷ་པུར། སུསད་ཛ་ལན་ཌི། དེ་བཞིན་ཨ་རི་སོགས་ཀྱི་གཞུང་ཚབ་མི་སྣ་ ༢༡ ཟླ་བ་འདིའི་ཕྱི་ཚེས་ ༡༧ དང་ ༡༨ ཉིན་ཟི་ཁྲོན་ཞིང་ཆེན་གྱི་ཁྱབ་ཁོངས་ཟུང་ཆུ་དང་གཟི་ཚ་སྡེ་དགུ་གཉིས་ལ་འཚམས་གཟིགས་སུ་སྐྱོད་སྐབས་ཚན་རིག་གི་བསྟི་གནས་དང་། ཡུལ་སྐོར་སྤྲོ་འཆམ་པའི་མྱུར་སྐྱོབ་སྨན་ཁང་། དེ་བཞིན་ཐང་གའི་འགྲེམས་སྟོན་ཁང་སོགས་ལ་འཚམས་གཟིགས་སུ་ཕེབས་ཀྱི་ཡོད་པ་རེད་འདུག འོན་ཀྱང་རྒྱལ་སྤྱིའི་བོད་དོན་ལས་འགུལ་ཁང་གིས་འཚམས་གཟིགས་སུ་བསྐྱོད་པའི་གཞུང་ཚབ་མི་སྣ་དག་གོང་གི་ས་ཚིགས་དེ་དག་ལ་ཕེབས་པ་དེས་བོད་ཀྱི་དངོས་ཡོད་གནས་སྟངས་ཏེ་ཆོད་དད་རང་དབང་གྱི་དཀའ་སྡུག་གཙོས་འགྲོ་འདུག་གི་རང་དབང་དང་། འགྲོ་བ་མིའི་ཐོབ་ཐང་དང་འབྲེལ་བའི་བོད་མི་རྣམས་ནས་མྱོང་བཞིན་པའི་ངལ་ཁག་ཤེསརྟོགས་ཐུབ་ཀྱི་མ་རེད་ཅེས་གསུངས་པ་དང་ཆབས་ཅིག ལས་འགུལ་ཁང་གིས་ཐེངས་འདིའི་འཚམས་གཟིགས་དང་འབྲེལ་གཞུང་ཚབ་མི་སྣ་དག་གི་སྙན་ཐོ་ལ་ངང་སྒུག་གནང་ནས་བཞུགས་ཡོད་ཅེས་འགྲེལ་བརྗོད་གནང་འདུག དེ་བཞིན་རྒྱ་ནག་གཞུང་གིས་འདེམས་སྒྲུག་བྱས་པའི་འཚམས་གཟིགས་སུ་ཕེབས་མཁན་གྱི་གཞུང་ཚབ་མི་སྣ་དག་ནི་རྒྱ་ནག་གཞུང་གི་ལྟ་སྐྱོང་གི་འོག་ཏུ་ཕྱིན་ཡོད་པ་ལས་དངོས་སུ་དཀའ་སྡུག་མྱོང་བཞིན་པའི་བོད་མི་དག་ལ་བཀའ་བསྡུར་གནང་རྒྱུ་གཙོས་བོད་ནང་གི་དངོས་ཡོད་གནས་སྟངས་ལ་རྟོག་ཞིབ་གནང་རྒྱུའི་གོ་སྐབས་མེད་པ་ཞིག་རེད་ཅེས་གསུངས་པ་དང་སྦྲགས། ཐེངས་འདིའི་འཚམས་གཟིགས་དེ་ལས་འགུལ་ཁང་ནས་ཡོ་རོབ་ཀྱི་མི་སེར་རྣམས་བོད་དུ་རང་དབང་གི་སྒོ་ནས་འགྲུལ་སྐྱོད་ཆོག་པའི་སྐོར་ལ་སྙན་ཐོ་ཞིག་འདོན་སྤེལ་ཟིན་རྗེས་བདུན་ཕྲག་གཉིས་ཀྱི་རྗེས་སུ་བྱུང་བ་ཞིག་ཡིན་པ་དང་། སླད་མར་རྒྱལ་ཁབ་གཞན་རྣམས་ཀྱི་འཐུས་ཚབ་རྣམས་འཚམས་གཟིགས་སུ་ཕེབས་སྐབས་བོད་ཀྱི་གནས་སྟངས་ངོ་མ་དེ་ཤེས་རྟོགས་ཐུབ་ཐབས་གནང་དགོས་པ་དང་བོད་ཀྱི་ས་ཁུལ་ནས་རྔ་བ་ལྟ་བུ་མཚོན་ན་རྒྱ་ནག་གཞུང་གིས་དྲག་གནོན་ཆེས་ཆེར་བྱ་ཡུལ་ཞིག་ཆགས་ཡོད་སྟབས་འཚམས་གཟིགས་སུ་ཕེབས་མཁན་དག་གིས་བོད་ནང་གི་ཆོས་དད་རང་དབང་གི་གནས་བབས་གཙོས་འགྲོ་བ་མིའི་ཐོབ་ཐང་གི་གནས་སྟངས་སོགས་ཀྱི་ཐད་གླེང་སློང་གནང་དགོས་པ་མ་ཟད་རྒྱ་ནག་གཞུང་གིས་བོད་མིར་མི་སྤྱོད་ལས་འདས་པའི་མནར་གཅོད་ཇི་ལྟར་བཏང་དང་གཏོང་བཞིན་པའི་སྙན་ཐོ་འདོན་སྤེལ་གནང་དགོས་པ་བརྗོད་འདུག

ཀུ་ཤུ་རྟགས་ཅན་ཚོང་ལས་ཁང་གིས་རྒྱ་ནག་དང་ལག་སྦྲེལ་ཐོག་འགྲོ་བ་མིའི་ཐོབ་ཐང་རྡོག་རོལ་བཏང་ཡོད།

རྒྱ་ནག་གཞུང་གིས་བོད་མིས་གཙོས་པའི་ཡུ་གུར་མི་རིགས་སོགས་ལ་གསང་མྱུལ་ལྟ་ཞིབ་ཀྱིས་མང་ཚོགས་ཀྱི་འགྲོ་འདུག་སྤྱོད་གསུམ་ལ་དམ་དྲག་བྱེད་ཀྱི་ཡོད་པ་དང་སྒོས་རྒྱལ་སྤྱིའི་སྟེང་སྙན་གྲགས་ཡོད་པའི་ཀུ་ཤུ་རྟགས་ཅན་ཚོང་ལས་ཁང་ལྟ་བུ་ནས་དཔལ་འབྱོར་ཁོ་ནར་དམིགས་ཏེ་རྒྱ་ནག་དང་ལག་སྦྲེལ་ཐོག་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་ཡོད་པ་རྒྱ་ནག་ཐོག་གི་ཉམས་ཞིབ་པ་དང་འགྲོ་བ་མིའི་ཐོབ་ཐང་དོན་གཉེར་བ་ཚོས་གསུངས་འདུག ཀུ་ཤུ་རྟགས་ཅན་གྱི་བཟོ་ཚོང་ཁང་གིས་ཁ་སང་ནས་ Worldwide Developers Conference ཞེས་དྲྭ་ལམ་བརྒྱུད་མཉེན་ཆས་བཟོ་སྐྲུན་གྱི་ལྷན་ཚོགས་ཚོགས་རྒྱུའི་གསལ་བསྒྲགས་སྤེལ་ཡོད་པ་དང་དུས་ཚིགས་དེ་དང་བསྟུན་བོད་དོན་ལས་འགུལ་བསྟི་གནས་ཁང་གིས་རྒྱ་ནག་ནང་དེ་སྔ་དང་ད་ལྟའི་དམ་དྲག ཀུ་ཤུ་ཚོང་ལས་ཁང་དང་བསམ་བརྗོད་རང་དབང་སོགས་བརྗོད་གཞིའི་ཐོག་འགྲོ་བ་མིའི་ཐོབ་ཐང་དོན་གཉེར་བ་དང་མཉེན་ཆས་བཟོ་སྐྲུན་གནང་མཁན། འཕྲུལ་རིགས་ཆེད་ལས་པ་གདན་ཞུས་ཀྱིས་དྲྭ་ཐོག་བརྒྱུད་བགྲོ་གླེང་རིམ་པ་གསུམ་གནང་ཡོད་པ་རེད། བགྲོ་གླེང་དེ་དག་ཐོག་རྒྱ་གཞུང་དང་ལག་སྦྲེལ་བྱེད་མཁན་གྱིས་ཀུ་ཤུ་བཟོ་ཚོང་ཁང་གཙོས་ ཚོང་ལས་ཁང་གཞན་ནས་རྒྱ་ནག་གཞུང་ལ་མི་སྒེར་གྱི་གསང་བ་བསྡུ་ལེན་དང་དྲྭ་རྒྱའི་རང་དབང་། བསམ་བརྗོད་རང་དབང་སོགས་ལ་དམ་དྲག་བྱེད་རྒྱུར་རོགས་རམ་གནང་གི་ཡོད་སྐོར་དང་ལྷག་པར་དུ་རྒྱ་གཞུང་ནས་དྲྭ་རྒྱ་ལོངས་སྤྱོད་མཁན་ཚོར་སྟངས་འཛིན་བྱེད་ཕྱོགས་དང་ཕྱི་ཕྱོགས་ཀྱི་གནས་ཚུལ་མཁོ་བསྡུ་བྱེད་རྒྱུར་བཀག་སྡོམ་སླད་ངོ་དེབ་གཙོས་ཡུ་ཊུབ་སོགས་སྤྱོད་པར་དམ་དྲག་བྱེད་ཀྱི་ཡོད་སྐོར་སོགས་ཀྱི་ཐད་བགྲོ་བསྡུར་གནང་བ་དང་། ཏོག་དབྱིབས་གཉན་རིམས་ཀྱི་དུས་ཚིགས་ཁྲོད་རྒྱ་གཞུང་གིས་རིམས་ནད་དེ་སྟངས་འཛིན་ལེགས་པོ་བྱེད་ཀྱི་མེད་པ་སོགས་དང་འབྲེལ་བཀའ་མོལ་གནང་མཁན་རྣམས་ལ་དམ་དྲག་བྱེད་ཕྱོགས་སོགས་ཀྱི་སྲིད་བྱུས་ལྟག་བསྟར་བྱས་པ་མ་ཟད་འཕྲུལ་རིགས་སོགས་ཀྱི་ཐོག་ནས་མང་ཚོགས་ཀྱི་བསམ་བརྗོད་རང་དབང་ལ་དམ་དྲག་བྱས་དང་བྱེད་མུས་ཁག་གིས་འཛམ་གླིང་སྤྱིར་གནོད་འཚེ་བཟི་བཞིན་ཡོད་པ་གསུངས་ཡོད།ཕྱོགས་མཚུངས་རྒྱ་གཞུང་དང་ལག་སྦྲེལ་གྱིས་འགྲོ་བ་མིའི་ཐོབ་ཐང་རྡོག་རོལ་གཏོང་མཁན་གྱི་ཚོང་ལས་ཁང་དེ་དག་ངེས་པར་དུ་འགན་ཁུར་ཡོད་པ་བཟོ་དགོས་པ་གསུངས་སོང་། བགྲོ་གླེང་དེ་དང་འབྲེལ་རླུང་འཕྲིན་ཁང་ནས་བོད་དོན་ལས་འགུལ་བསྟི་གནས་ཁང་གི་བརྡ་འཕྲིན་སྲུང་སྐྱོབ་ལས་གཞིའི་འགན་འཛིན་བློ་བཟང་རྒྱ་མཚོ་སྲིད་མཐར་ལགས་སུ་བཅར་འདྲི་ཞུས་པར་བགྲོ་གླེང་དེ་ཚོགས་པའི་དམིགས་ཡུལ་གཙོ་བོ་ནི་ཁ་སང་ཀུ་ཤུ་རྟགས་ཅན་གྱི་མཉེན་ཆས་བཟོ་སྐྲུན་གནང་མཁན་གྱི་ཚོགས་འདུར་ཁ་གཏད་སླད་བོད་དོན་ལས་འགུལ་བསྟི་གནས་ཁང་གིས་ཀུ་ཤུ་རྟགས་ཅན་ཚོང་ལས་ཁང་ནས་མང་ཚོགས་ཀྱི་བདེ་འཇགས་དང་མི་མཐུན་པའི་ཐོག་རྒྱ་གཞུང་དང་ལག་སྦྲེལ་གྱིས་མཉེན་ཆས་མང་དག་ཅིག་མེད་པ་བཟོ་ཡི་ཡོད་པས་དེ་ནོར་འཁྲུལ་ཞིག་ཡིན་པས་དེ་ལྟར་ཚོགས་པ་དང་། བགྲོ་གླེང་འདི་བརྒྱུད་ཀུ་ཤུ་རྟགས་ཅན་ཚོང་ལས་ཁང་ནས་མང་ཚོགས་ཀྱི་བསམ་བརྗོད་རང་དབང་ལ་གུས་བརྩི་དང་དེ་བཞིན་ཕྱི་གསལ་ནང་གསལ་གྱི་ལས་དོན་གནང་རྒྱུའི་རེ་བ་གནང་གི་ཡོད་སྐོར་གསུངས་སོང་། དེ་བཞིན་རྒྱ་གཞུང་གིས་དམ་དྲག་དེ་ད་ཆ་བོད་དང་ཡུ་གུར་རྒྱ་རིགས་སོགས་ཁོ་ན་མ་ཡིན་པར་ཕྱི་ཕྱོགས་སུའང་དེ་འབྲེལ་གྱི་དམ་དྲག་བྱ་ཉེན་ཡོད་པ་དང་སྒོས་ཀུ་ཤུ་རྟགས་ཅན་ཚོང་ལས་ཁང་གིས་རྒྱ་གཞུང་དང་ལག་སྦྲེལ་གནང་ཐོག་ཚོང་ལས་ཁང་དེས་མང་ཚོགས་ཀྱི་བདེ་འཇགས་སྲུང་སྐྱོབ་གནང་གི་ཡོད་པ་བརྗོད་པ་དེ་དང་འགལ་ཟླ་ཆགས་ཡོད་སྐོར་སོགས་གསུངས་ཡོད།གཞི་རྩའི་རྒྱ་ནག་གཞུང་གིས་བཀོད་ཁྱབ་ལྟར་ཀུ་ཤུ་རྟགས་ཅན་ནས་མཉེན་ཆས་མང་དག་ཅིག་རྒྱ་ནག་ནང་མེད་པ་བཟོས་ཡོད་པ་དེ་ལྟར་ཡང་ད་ཆ་འཛམ་གླིང་སྤྱིར་ཏོག་དབྱིབས་གཉན་རིམས་ཀྱི་ངལ་བ་འཕྲད་ཐོག་འགྲོ་བ་མིའི་ཐོབ་ཐང་དོན་གཉེར་བ་དང་ལས་འགུལ་བས་རྒྱ་གར་གཙོས་ཕྱིའི་རྒྱལ་ཁབ་ཏུ་གནས་བཞུགས་གནང་མཁན་ཚོས་རྒྱ་ནག་གི་མཉེན་ཆས་སྐད་འཕྲིན་དང་། Tiktok ལ་སོགས་པ་སྤྱོད་མཚམས་འཇོག་དགོས་ཞེས་གསུང་བཞིན་ཡོད་པ་རེད།

Latest news