རྒྱལ་སྤྱི།

ཉེ་ཆར་ཟླ་གོང་མའི་ཕྱི་ཚེས་ ༡༥ དགོང་མོ་ལ་དྭགས་གྷལ་ཝན་ཡུལ་ཀླུང་དུ་ཆགས་པའི་རྒྱ་གར་དང་བོད་གཉིས་ཀྱི་ས་མཚམས་ས་ཁུལ་དུ་རྒྱ་དཀར་ནག་གཉིས་ཀྱི་དམག་མིའི་དབར་གདོང་ཐུག་ཤོར་རྐྱེན་དེང་སྐབས་རྒྱ་དཀར་ནག་གཉིས་དབར་རྩོད་རྙོག་ཇེ་ཆེར་ཕྱིན་པའི་ཁྲོད་འདིར་ཕྱོགས་གཉིས་པོའི་དབར་དམག་འཁྲུག་ལངས་སྲིད་པའི་གནས་སྟངས་ཆགས་ཡོད་པ་དང་འབྲེལ། རྒྱ་ནག་གཞུང་ཕྱོགས་ནས་རྒྱ་དཀར་ནག་གཉིས་ཀྱི་རྩོད་རྙོག་འདིའི་ཁྲོད་བོད་རིགས་དམག་མི་ཕོན་ཆེ་བཏང་དང་གཏོང་བཞིན་པ་མངོན་གསལ་གནང་སྟེ་གནད་དོན་དེ་ནི་ཆེས་བློ་འཚབ་གནང་གཞིར་གྱུར་ཡོད་པ་གསུངས་འདུགརྒྱ་གར་ལྷོ་ཕྱོགས་ Auroville ནང་དུ་བཅའ་བཞུགས་བོད་རིག་པའི་མཁས་པ་སྐུ་ཞབས་ Claude Arpi ལགས་ཀྱིས་ཁ་སང་ rediff བརྒྱུད་ལམ་ཐོག་དཔྱད་རྩོམ་ཞིག་འདོན་སྤེལ་གནང་བར་ཟླ་སྔོན་ཚེས་ ༡༥ གོང་མོ་ལ་དྭགས་གྷལ་ཝན་ཡུལ་ཀླུང་དུ་ཆགས་པའི་རྒྱ་གར་དང་བོད་གཉིས་ཀྱི་ས་མཚམས་ས་ཁུལ་དུ་རྒྱ་དཀར་ནག་གཉིས་ཀྱི་དམག་མིའི་དབར་གདོང་ཐུག་ཤོར་རྐྱེན་རྒྱ་གར་གྱི་དམག་དཔོན་ Santosh Babu ལགས་གཙོས་པའི་དམག་མི་ ༢༠ ཚེ་སྲོག་ཤོར་ཡོད་པ་ཡོངས་གྲགས་གནང་བའི་གནས་ཚུལ་སྤེལ་ཡོད་པ་དང་། རྒྱ་ནག་ཕྱོགས་ནས་དམག་མི་ཇི་ཙམ་རྐྱེན་འདས་གྲོངས་སུ་ཕྱིན་ཡོད་པ་ད་བར་ཡོངས་གྲགས་ཞུས་མེད་ཀྱང་རྗེས་སུ་ Twitter དྲྭ་ལམ་ཐོག་གནས་ཚུལ་ཞིག་ཕྱི་གྱར་བྱུང་བའི་ནང་ཚེས་ ༡༥ ཉིན་ Galwan དམག་འཁྲུག་ནང་འདས་གྲོངས་སུ་ཕྱིན་པའི་རྒྱ་ནག་གི་དམག་མི་ ༣༨  ཀྱི་མིང་ཐོ་དང་དམག་མི་དེ་དག་རྒྱ་ནག་གི་ས་ཁུལ་གང་ནས་ཡིན་པ་སོགས་མངོན་གསལ་གནང་བའི་ཁོངས་ནས་མི་ ༨ བོད་ནས་ཡིན་སྐོར་བརྗོད་པ་བཞིན་མི་བརྒྱད་པོ་དེ་དག་གི་མིང་ལ་ལྷག་པ་དང་ཚེ་རིང་། སྐལ་བཟང་སོགས་བོད་པའི་མིང་འཁོད་ཡོད་པ་དང་། ད་ལྟའི་ཆར་གནས་ཚུལ་དེ་ཁུངས་ལྡན་ཡིན་མིན་རྩད་གཅོད་གནང་དཀའ་ནའང་རྒྱ་ནག་གཞུང་གིས་བོད་དམག་ཆེད་གཏོང་གི་དམག་འཐབ་པར་ཐེ་ཚོམ་གང་ཡང་མེད་པར་རྟོགས་ཐུབ་རྒྱུ་ཡོད་པ་གསུངས་འདུག དེ་བཞིན་ཉེ་ཆར་རྒྱ་ནག་གཞུང་འབྲེལ་བརྒྱུད་ལམ་ཐོག་འདྲ་པར་ཕོན་ཆེ་དང་འབྲེལ་ནས་གནས་ཚུལ་སྤེལ་བར་བོད་ཀྱི་ས་ཁུལ་ཁག་ཏུ་རྒྱ་ནག་གི་གོ་ཚོན་དང་བཅས་དམག་སྦྱོང་ཤུགས་ཆེན་པོ་སྤེལ་བཞིན་པ་མ་ཟད། ས་གནས་བོད་རིག་མང་ཚོགས་ལས་གྲུབ་པའི་ཞོགས་འདེགས་དཔུང་དམག་རུ་ཁག་གསར་པ་ལྔ་ཙམ་ཆེད་འཛུགས་བྱས་ཡོད་པ་དང་། དེང་དུས་འཕྲུལ་ཆས་ལྡན་པའི་རུ་ཁག་གཅིག་དང་རི་འཛེགས་རུ་ཁག་གཅིག དེ་བཞིན་མྱུར་སྐྱོབ་དང་འབྲེལ་མཐུད་རུ་ཁག་བཅས་ཡོད་པ་དེ་ཉེན་ཆར་བོད་ཁུལ་གྱི་རྒྱ་ནག་བཅིངས་བཀྲོལ་དམག་གི་དམག་དཔོན་གཞོན་པ་དང་དམར་ཤོགས་ཚོགས་པའི་ངོ་ཚབ་པ་ Zhang Xiejie ཟེར་བས་སྣེ་ཁྲིད་འོག་ཞོགས་འདེགས་དཔུང་དམག་རུ་ཁག་གསར་པ་ལྔ་པོ་དེ་དག་གི་རུ་སྒྲིག་མཛད་སྒོ་ཚོགས་པ་དང་སྐབས་དེར་རྒྱ་ནག་གི་དཔོན་རིགས་མཐོ་གྲས་ཚོས་བོད་ནང་བརྟན་ལྷིང་དང་ས་མཚམས་སྲུང་སྐྱོབ་ཀྱི་ལས་དོན་སྤེལ་ཁུལ་ལ་བློ་འགུལ་ཐབས་བྱེད་བཞིན་ཡོད་པ་དང་། བོད་རིགས་དེ་དག་ལ་གླ་ཕོགས་ཡག་པོ་སྤྲད་ནས་དམག་འཐབ་ལ་ཞུགས་བཅུག་པ་གསལ་རྟོགས་བྱུང་སྐོར་མངོན་གསལ་གནང་འདུགསྐུ་ཞབས་ Claude Arpi ལགས་ཀྱིས་རྒྱ་ནག་གི་རྩ་ཁྲིམས་དོན་ཚན་ ༢༢ དང་ ༣༦ ནང་གསལ་ཞོགས་འདེགས་དཔུང་དམག་དེ་དག་གི་ལས་འགན་གཙོ་བོ་ནི་དམག་གི་གྲ་སྒྲིག་དང་རྒྱལ་སྲུང་། དེ་བཞིན་སྤྱི་ཚོགས་བདེ་འཇགས་སོགས་ཀྱི་ལས་དོན་གཉེར་དགོས་སྐོར་འཁོད་ཡོད་པ་མ་ཟད་ཕྱི་ལོ་ ༢༠༡༦ ལོ་ནས་ཟུང་ཞོགས་འདེགས་དཔུང་དམག་དེ་རྒྱ་ནག་དམར་ཤོག་གཞུང་གི་བཅིངས་བཀྲོལ་དམག་གི་ཐད་དཀར་བཏང་འཛིན་འོག་ཡོད་སྟབས་རྒྱ་ནག་ལ་ཞོགས་འདེགས་དཔུང་དམག་ས་ཡ་ ༨ ཙམ་ཡོད་པ་དང་འབྲེལ་ནས་འཛམ་གླིང་ཁྱོན་ཡོངས་སུ་གཞུང་འབྲེལ་དམག་དཔུང་ཡོད་པའི་ཐོག་ལ་ཞོགས་འདེགས་དཔུང་དམག་མང་ཤོས་ཡོད་མཁན་གྲས་ཤིག་ཡིན་པ་སོགས་མངོན་གསལ་གནང་འདུག ལྷག་པར་དུ་སྔ་ལོའི་ཕྱི་ཟླ་ ༧ དང་ ༩  ནང་ལྷ་ས་དང་པེ་ཅིང་དབར་བརྙན་འཕྲིན་བརྒྱུད་ཚོགས་འདུ་ཚོགས་པའི་ནང་བོད་ཁུལ་གྱི་བཅིངས་བཀྲོལ་དམག་དཔུང་དང་བོད་ཁུལ་གྱི་ཞོགས་འདེགས་དཔུང་དམག་ནང་དུ་དམག་མི་གསར་འཇུག་བྱེད་རྒྱུའི་ཐོག་གྲོས་བསྡུར་བྱས་ཡོད་པ་དང་འབྲེལ། རྗེས་སུ་བོད་ལྗོངས་ཉིན་རེའི་གསར་ཤོག་གིས་གནས་ཚུལ་སྤེལ་བར་རྒྱ་ནག་ཁྱོན་ཡོངས་ཀྱི་ཞོགས་འདེགས་དཔུང་དམག་ནང་འཛུལ་ཞུགས་ཀྱི་འགྲན་བསྡུར་ནང་བོད་ཁུལ་གྱི་ཞོགས་འདེགས་དཔུང་དམག་གི་ཟིན་ཐོ་གསར་པ་བཞག་ཡོད་པ་དང་། འགྲན་བསྡུར་ནང་འཛུལ་ཞུགས་ཆེད་དམར་ཤོག་ཚོགས་པའི་ལྟ་གྲུབ་གསལ་པོ་ཤེས་དགོས་པ་དང་། དམག་འཁྲུག་སྐབས་སེམས་ཞི་བར་གནས་ཐུབ་པ་སོགས་ཀྱི་ཐད་ལ་རྟོག་ཞིབ་ནན་པོ་བྱས་པ་ལྟར། བོད་ཁུལ་གྱི་ཞོགས་འདེགས་དཔུང་དམག་ནང་དུ་འཛུལ་ཞུགས་བྱེད་མཁན་རྣམས་ནས་འཇོན་ཐང་དང་སྤྱོད་ཚུལ་ཡག་པོ་ཡོད་དགོས་པའི་ཁར་ཆབ་སྲིད་ཀྱི་སློབ་གསོ་སྤྲོད་རྒྱུ་གལ་ཆེན་པོ་ཡིན་པ་སོགས་འཁོད་ཡོད་སྐོར་གསུངས་འདུགསྤྱིར་བོད་ཁུལ་གྱི་དམག་དཔུང་ནང་དམག་སྤྱི་དང་དམག་སྤྱི་གཞོན་པ། དེ་བཞིན་མདའ་དཔོན་སོགས་ཀྱི་གོ་གནས་ཡོད་མཁན་བོད་རིགས་མང་དག་ཅིག་ཡོད་པ་སོགས་གནད་དོན་ཁག་ལུང་འདྲེན་དང་འབྲེལ། མ་འོངས་པར་རྒྱ་དཀར་ནག་གཉིས་དབར་དམག་འཁྲུག་འབྱུང་ཚེ་བོད་རིགས་དམག་མི་ཕོན་ཆེ་ཞིག་དེར་མཉམ་ཞུགས་གནང་ངེས་ཡིན་པ་མ་ཟད། གནས་ཚུལ་ཐོན་ཁག་ལ་གཞིགས་ན་བོད་མི་ཁག་ཅིག་ནས་མཉམ་ཞུགས་བྱེད་བཞིན་པ་མངོན་རྒྱུ་ཡོད་སྟབས། རྒྱ་གར་གྱི་ངོས་ནས་བོད་པའི་དམག་མི་དང་ལྷན་དུ་འཁྲུག་འཛིང་གནང་བློ་རྩ་བ་ནས་མེད་པར་བརྟེན་དེ་ནི་བོད་དང་རྒྱ་གར་དབར་གྱི་འབྲེལ་ལམ་ཐད་ལ་གནོད་གཞི་ཆགས་ཡོད་སྐོར་གསུངས་པ་དང་ཆབས་ཅིག་ཏུ་བོད་མིའི་སྒྲིག་འཛུགས་ཀྱི་ངོས་ནས་དེའི་ཐོག་བཞེངས་ཕྱོགས་གང་ཡོད་དམ་ཞེས་བཀའ་འདྲི་གནང་འདུག

དབྱིན་ཡུལ་གྱིས་ཧོང་ཀོང་རྒྱ་ནག་ལ་རྩིས་སྤྲོད་བྱས་ནས་མི་ལོ་ ༢༣འཁོར་བའི་དུས་དྲན་གྱི་ཉིན་གཅིག་སྔ་རོལ་དུ་རྒྱ་ནག་གཞུང་ངོས་ནས་ཧོང་ཀོང་རྒྱལ་ཁབ་ཀྱི་བདེ་འཇགས་ཁྲིམས་གཞི་དངོས་སུ་གཏན་འབེབས་བྱས་པ་ལྟར། ཨ་རིའི་གྲོས་ཚོགས་ནས་ཁྲིམས་གཞི་དེའི་ཐོག་སེམས་འཚབ་དང་བཅས་ཁྲིམས་འཆར་གསར་པ་ཞིག་སྤྱི་མོས་ཀྱིས་གཏན་འབེབས་གནང་བ་བརྒྱུད། ཧོང་ཀོང་གི་རང་སྐྱོང་གནས་བབ་རྩིས་མེད་རྡོག་རོལ་བྱེད་མཁན་དང་ཁུལ་དེར་དྲག་གནོན་གྱི་བྱ་སྤྱོད་སྤེལ་མཁན་དང་ལྷན་དུ་ངན་པ་ལག་འབྲེལ་བྱེད་མཁན་གྱི་དངུལ་ཁང་རྣམས་ལ་ཉེས་ཆད་གཅོད་རྒྱུ་ཡིན་པ་བཟོས་འདུགདེ་རིང་གསར་ལམ་ཁག་ཏུ་གནས་ཚུལ་ཐོན་པ་ལྟར་ན། ཨ་རིའི་གྲོས་ཚོགས་གོང་འོག་གཉིས་ཀས་ཕྱི་ཚེས་ ༡ ཉིན་ཧོང་ཀོང་གི་རང་སྐྱོང་ཁྲིམས་འཆར་ཞེས་པ་ཞིག་སྤྱི་མོས་ཀྱི་ཐོག་ནས་གཏན་འབེབས་གནང་བ་དང་སྦྲགས། ཨ་རིའི་སྲིད་འཛིན་མཆོག་གི་མཚན་རྟགས་བཀོད་ཆེད་སྲིད་འཛིན་ལས་ཁུངས་སུ་ཕུལ་ཟིན་འདུགཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་ Nancy Pelosi ལགས་ཀྱིས་དེ་འབྲེལ་སྤྱི་བསྒྲགས་ཤིག་སྤེལ་ཏེ། རྒྱ་ནག་གིས་ཧོང་ཀོང་རྒྱལ་ཁབ་ཀྱི་བདེ་འཇགས་ཁྲིམས་གཞི་ཞེས་པ་གཏན་འབེབས་བྱས་པ་དེ་ཡིས། སྤྱི་ལོ་ ༡༩༩༧ ལོར་དབྱིན་ཡུལ་གཞུང་གིས་ཧོང་ཀོང་རྒྱ་ནག་ལ་རྩིས་སྤྲོད་བྱེད་དུས་མི་ལོ་ལྔ་བཅུའི་རིང་ལ་ཧོང་ཀོང་ལ་ཚད་མཐོའི་རང་སྐྱོང་གི་གནས་བབ་ཅིག་སྤྲོད་རྒྱུར་འགན་ལེན་བྱས་པ་དང་ཡོངས་སུ་འགལ་ཡོད་པ་དང་། རྒྱ་ནག་གི་ཁྲིམས་གཞི་དེ་ཡིས་ད་ཡོད་ཀྱི་ཧོང་ཀོང་མི་མང་གི་གཞི་རྩའི་རང་དབང་ལ་རྡོག་རོལ་ཐེབས་ངེས་ཡིན་པར་འགྲེལ་བརྗོད་གནང་བ་མ་ཟད། ཨ་རིའི་སྲིད་འཛིན་ཀྱིས་ཐེངས་འདིའི་ཧོང་ཀོང་གི་རང་སྐྱོང་ཁྲིམས་འཆར་གཙོས་ཧོང་ཀོང་གི་གནད་དོན་དང་འབྲེལ་བའི་ཁྲིམས་གཞི་གཏན་འབེབས་ཟིན་པ་རྣམས་ཀྱི་འབྲུ་དོན་ཡོངས་སུ་ལག་བསྟར་བྱས་ཏེ། རྒྱ་ནག་ཐོག་ཐབས་ཇུས་ལྡན་པའི་ལངས་ཕྱོགས་བརྟན་པོ་ཞིག་འཛིན་དགོས་པའི་གཞེན་སྐུལ་གནང་འདུགརྩ་བའི་ཨ་རིའི་གྲོས་ཚོགས་ཀྱིས་ཧོང་ཀོང་དང་འབྲེལ་བའི་ཁྲིམས་འཆར་དེ་མ་བཏོན་སྔོན། ཧོང་ཀོང་རྒྱལ་ཁབ་ཀྱི་བདེ་འཇགས་ཁྲིམས་གཞི་གཟེར་བར་ངོ་རྒོལ་སླད་ཧོང་ཀོང་གི་དམིགས་བསལ་གྱི་གནས་བབ་མེད་པར་བཟོ་འགོ་བཙུགས་ཏེ་ཧོང་ཀོང་གི་ཁུལ་དུ་རྒྱལ་སྲུང་བ་ཕྱིར་གཏོང་བྱེད་རྒྱུ་མཚམས་འཇོག་དང་། དེ་བཞིན་ཁུལ་དེར་ཚན་རྩལ་མཐོ་བའི་ཐོན་རྫས་ཀྱི་རིགས་མཁོ་འདོན་བྱེད་རྒྱུར་ཡང་ཚད་བཀག་བྱས་ཡོད་པ་རེད་འདུག དེ་བཞིན་དབྱིན་ཡུལ་གྱི་སྲིད་བློན་ Boris Johnson ལགས་ཀྱིས་ཀྱང་ཁ་སང་། རྒྱ་ནག་གིས་ཐེངས་འདིར་བཙན་དབང་གིས་ཧོང་ཀོང་བདེ་འཇགས་ཀྱི་ཁྲིམས་གཞི་ཞེས་པ་ལག་བསྟར་བྱས་པ་དེ་ནི་དབྱིན་ཡུལ་དང་རྒྱ་ནག་གཉིས་ཀྱིས་སྤྱི་ལོ་ ༡༩༨༥ ལོར་མཉམ་འབྲེལ་གྱིས་བསྒྲགས་གཏམ་སྤེལ་བའི་འབྲུ་དོན་དང་འགལ་བ་མ་ཟད། རྒྱ་ནག་གིས་སྐབས་དེར་ཧོང་ཀོང་ལ་འགན་ལེན་བྱེད་རྒྱུའི་ཁྲིམས་སྒྲིག་ཁག་ལ་ཡང་འགལ་ཡོད་སྟབས། དབྱིན་ཡུལ་གྱིས་ཧོང་ཀོང་མི་སེར་ས་ཡ་གསུམ་ཙམ་དབྱིན་ཡུལ་དུ་བླངས་ནས་རིམ་བཞིན་མི་སེར་ལག་འཁྱེར་སྤྲོད་རྒྱུ་ཡིན་པ་ཡང་གསལ་བསྒྲགས་གནང་ཡོད་མ་ཟད།  ཨོ་གླིང་རྒྱལ་ཁབ་ཀྱིས་ཀྱང་ཧོང་ཀོང་མི་སེར་ལ་བསམ་གཞིགས་ཀྱིས།  ཧོང་ཀོང་བ་རྣམས་ཨོ་གླིང་རྒྱལ་ཁབ་ཏུ་ནང་འདྲེན་བྱེད་རྒྱུར་བསམ་བློ་གཏོང་གི་ཡོད་པ་ཕྱིར་བསྒྲགས་གནང་འདུགདེ་བཞིན་ཧོང་ཀོང་གི་མང་གཙོ་འཐབ་རྩོད་པ། སྐུ་ཞབས་ Simon Cheng ལགས་ཀྱིས་དབྱིན་ཡུལ་གྱི་གསར་ཁང་། The Guardian  ལ་གནས་ཚུལ་མཁོ་སྤྲོད་བྱས་པ་ལྟར་ན། ད་ཆ་རྒྱ་ནག་གིས་ཧོང་ཀོང་གི་ནང་དུ་བདེ་འཇགས་ཀྱི་ཁྲིམས་གཞི་ཞེས་པ་ལག་བསྟར་བྱེད་བཞིན་ཡོད་པའི་དུས་སྐབས་འདིར། ཧོང་ཀོང་གི་མང་གཙོ་དོན་གཉེར་བ་རྣམས་ཀྱིས་རྒྱལ་ཁབ་གཞན་གྱི་ནང་དུ་བཙན་བྱོལ་གྱི་གྲོས་ཚོགས་ཤིག་འཛུགས་རྒྱུར་གྲོས་བསྡུར་བྱེད་ཀྱི་ཡོད་ཚུལ་ངོ་སྤྲོད་དང་བཅས། རྒྱ་ནག་རྒྱལ་ཁབ་ལ་མང་གཙོ་ནི་སུས་ཀྱང་འགོག་ཐབས་མེད་པ་ཞིག་ཡིན་པའི་བརྡ་ལན་སྤྲོད་རྒྱུ་ཡིན་པར་མངོན་གསལ་གནང་འདུག ཁོང་གིས་ད་དུང་དབྱིན་ཡུལ་གྱི་ངོས་ནས་ཧོང་ཀོང་གི་མི་སེར་མང་པོ་གཏད་སྡོད་ཀྱི་ལག་འཁྱེར་སྤྲོད་རྒྱུ་ཡིན་པར་བརྟེན། ཧོང་ཀོང་གི་མི་མང་སྟོང་ཕྲག་མང་པོ་དབྱིན་ཡུལ་དུ་ཡོང་རྒྱུ་ངེས་བ་ཞིག་ཡིན་པར་འགྲེལ་བརྗོད་ཀྱིས། ཧོང་ཀོང་གི་མང་གཙོ་དོན་གཉེར་བ་རྣམས་ཀྱིས་བཙན་བྱོལ་གྱི་གྲོས་ཚོགས་ཤིག་བཙུགས་པ་ཡིན་ན་དེས་ཧོང་ཀོང་མི་མང་གི་ངོ་ཚབ་མཚོན་ཐུབ་པ་ཞིག་ཡིན་པ་མ་ཟད། སྲིད་དབང་སྒེར་གཅོད་ཀྱི་རྒྱ་ནག་སྲིད་གཞུང་ལ་བརྡ་ལན་གསལ་བོ་ཞིག་སྤྲོད་ཐུབ་རྒྱུ་རེད་ཅེས་ངོ་སྤྲོད་གནང་འདུགགཞི་རྩའི་ད་ལྟ་ཆའི་ཧོང་ཀོང་གི་ནང་དུ་རྒྱ་ནག་གི་ཁྲིམས་གཞི་དེར་ངོ་རྒོལ་བྱེད་མཁན་མང་པོ་བྱུང་གི་ཡོད་པར་བརྟེན།་ ཧོང་ཀོང་གི་ཉེན་རྟོགས་པས་མི་མང་པོ་འཛིན་བཟུང་བྱེད་ཀྱི་ཡོད་པའི་ཁྲོད། ཧོང་ཀོང་གི་མང་གཙོ་དོན་གཉེར་གྱི་ལས་འགུལ་བ་རྣམས་ཕྱི་ཕྱོགས་སུ་བྲོས་བྱོལ་དུ་འགྲོ་བཞིན་པའི་གནས་སྟངས་ཤིག་ཆགས་ཡོད་པ་ལྟར།  ཀོང་ཧོང་གི་མང་གཙོ་ཚོགས་པ་ཆེད་འཛུགས་གནང་མཁན་གྱི་ན་གཞོན། Nathan Law ལགས་ཀྱང་ཕྱི་ཕྱོགས་སུ་བྲོས་བྱོལ་དུ་ཕྱིན་ཡོད་པ་དང་། ཁོང་གིས་གསར་ལམ་ཁག་ཏུ། ད་ཆ་རྒྱ་ནག་གི་ཁྲིམས་གཞི་དེའི་རྐྱེན་གྱིས་ཧོང་ཀོང་གི་ནང་དུ་ཁྲག་དྲི་བྲོ་བའི་རིག་གནས་གསར་བརྗེ་ཞིག་གི་འགོ་ཚུགས་ཡོད་པར་ངོ་སྤྲོད་ཀྱིས།  ཧོང་ཀོང་མི་མང་གིས་ནམ་ཡང་མང་གཙོའི་འཐབ་རྩོད་ལ་མགོ་བོ་སྒུར་རྒྱུ་མིན་ཞེས་ཡོངས་གྲགས་གནང་འདུག

ཁ་སང་དབྱིན་ཡུལ་གཞུང་གིས་ཧོང་ཀོང་རྒྱ་ནག་ལ་རྩིས་སྤྲོད་བྱས་ནས་མི་ལོ་ ༢༣ འཁོར་བའི་དུས་དྲན་དང་བསྟུན་ནས། རྒྱ་ནག་གཞུང་གིས་བཙན་དབང་གི་ཐོག་ནས་ཧོང་ཀོང་བདེ་འཇགས་ཀྱི་ཁྲིམས་གཞི་ཞེས་པ་ཞིག་ཧོང་ཀོང་གི་གཞི་རྩའི་ཁྲིམས་ཁོངས་སུ་བཅུག་པར་བརྟེན། ཧོང་ཀོང་གི་ནང་གི་མི་སེར་མང་པོའི་རྒྱ་ནག་གི་ཁྲིམགས་གཞི་དེར་ངོ་རྒོལ་སྐད་འབོད་རྒྱག་བཞིན་ཡོད་པ་མ་ཟད། ཕྱི་ལོག་གི་རྒྱལ་ཁབ་མང་པོས་ཀྱང་རྒྱ་ནག་གིས་ཁྲིམས་གཞི་དེ་བརྒྱུད་ནས་ཧོང་ཀོང་མི་མང་གི་འགྲོ་བ་མིའི་ཐོབ་ཐང་དང་མང་གཙོ་སོགས་ལ་དོ་ཕོག་ཆེན་པོ་གཏོང་ངེས་ཡིན་པར་སྐྱོན་བརྗོད་ཀྱིས། རྒྱ་ནག་གིས་ཁྲིམས་གཞི་དེར་བསྐྱར་ཞིབ་བྱེད་དགོས་བའི་འབོད་སྐུལ་གནང་ཡོད་པ་རེད།དེ་རིང་གསར་ལམ་ཁག་ཏུ་གནས་ཚུལ་ཐོན་པ་ལྟར་ན། ཁ་སང་དབྱིན་ཡུལ་གྱི་སྲིད་བློན་ Boris Johnson ལགས་ཀྱིས་ཡོངས་གྲགས་ཀྱིས་གསར་ལམ་དུ། རྒྱ་ནག་གིས་ཧོང་ཀོང་གི་ནང་དུ་བདེ་འཇགས་ཀྱི་ཁྲིམས་གཞི་ཞེས་པ་དེ་ལག་བསྟར་བྱས་པ་ཡིན་ན། རྒྱལ་ཁབ་གཅིག་ལ་ལམ་ལུགས་གཉིས་ཀྱི་གཞི་རྩའི་ཧོང་ཀོང་གི་རང་སྐྱོང་གི་གནས་བབ་ལ་དོ་ཕོག་ཆེན་པོ་འགྲོ་རྒྱུ་ཡིན་སྟབས། དབྱིན་ཡུལ་གཞུང་གིས་ཧོང་ཀོང་གི་མི་སེར་ས་ཡ་གསུམ་མ་ཟིན་ཙམ་ལ་འདོད་པ་ཡོད་ཚེ། དབྱིན་ཡུལ་ནང་གཏན་སྡོད་བྱེད་ཆོག་པ་དང་རིམ་བཞིན་ཡུལ་དེའི་མི་སེར་བཞེས་རྒྱུའི་ཐོབ་ཐང་འབུལ་རྒྱུ་ཡིན་པ་གསུངས་འདུག དེ་ཡང་སྲིད་བློན་མཆོག་གིས་འཆར་གཞི་དེའི་ཁྲོད། ཧོང་ཀོང་དུ་གནས་སྡོད་བྱེད་བཞིན་པ་གང་ཞིག་ལ་དབྱིན་ཡུལ་གྱི་Passport འམ་འགྲུལ་བསྐྱོད་ལག་འཁྱེར་ཡོད་མཁན་ཧོང་ཀོང་གི་མི་སེར་འབུམ་གསུམ་དང་ཕྱེད་ཀ་ཙམ་དང་། དེ་བཞིན་འགྲུལ་བསྐྱོད་ལག་འཁྱེར་བཞེས་རྒྱུའི་ཆ་རྐྱེན་ཚང་བའི་ཧོང་ཀོང་གི་མི་སེར་གཞན་ས་ཡ་ ༢།༥ ལྷག་དབྱིན་ཡུལ་དུ་ལེན་རྩིས་ཡོད་པ་མ་ཟད།   དབྱིན་ཡུལ་གྱིས་ལོ་རྒྱུས་ཀྱི་ནང་དུ་བྱུང་མ་མྱོང་བའི་མཐོང་མཆན་གྱི་ལམ་ལུགས་ལ་བསྒྱུར་བཅོས་ཀྱིས་ག་ལེར་ཁོང་ཚོར་དབྱིན་ཡུལ་དུ་གཏན་སྡོད མི་སེར་ཡང་ཆགས་ངེས་པར་འགྲེལ་བརྗོད་གནང་འདུག གཞི་རྩའི་དབྱིན་ཡུལ་གཞུང་གིས་གྱིས་ཧོང་ཀོང་རྒྱ་ནག་ལ་རྩིས་སྤྲོད་གནང་རྗེས། དབྱིན་ཡུལ་གྱི་འགྲུལ་བསྐྱོད་ལག་འཁྱེར་ཡོད་མཁན་རྣམས་ལོ་རབས་བརྒྱད་ཅུའི་ནང་དབྱིན་ཡུལ་དུ་མཐོང་ཆེན་ཞུ་མི་དགོས་པར་ཟླ་བ་དྲུག་རིང་བསྐྱོད་ཆོག་པ་སོགས་ཀྱི་དམིགས་བསལ་གྱི་གནས་བབ་ཅིག་ཕུལ་ཡོད་པ་དང་། ད་ལྟའི་དབྱིན་ཡུལ་གཞུང་གི་འཆར་གཞི་ལྟར་བྱས་ན།  ཧོང་ཀོང་གི་མི་སེར་དེ་དག་ལོ་ལྔའི་རིང་དབྱིན་ཡུལ་ནང་སློབ་སྦྱོང་དང་ཕྱག་ལས་སོགས་གནང་ཆོག་པ་མ་ཟད། རིམ་པའི་ཁུལ་དེའི་ནང་གཏན་སྡོད་ཆོག་པ་མ་ཟད་ལོ་གཅིག་གི་རྗེས་སུ་མི་སེར་གྱི་ཐོབ་ཐང་འབུལ་འཆར་ཡོད་པ་རེད་འདུག དབྱིན་ཡུལ་གཞུང་གིས་ཧོང་ཀོང་གི་མི་སེར་མང་པོ་དུས་གཅིག་ཏུ་དབྱིན་ཡུལ་དུ་ལེན་རྩིས་ཡོད་ལུགས་ཀྱི་གསར་འགྱུར་ཐོན་མ་ཐག རྒྱ་ནག་གི་ཕྱི་སྲིད་ལས་ཁུངས་ཀྱི་མགྲིན་ཚབ་པ་ Zhao Lijian གྱིས་དབྱིན་ཡུལ་གཞུང་གིས་རྒྱ་ནག་གི་རྒྱལ་ཁབ་གཅིག་ལ་ལམ་ལུགས་གཉིས་ཀྱི་སྲིད་བྱུས་ལ་ཐེ་གཏོགས་མ་བྱེད་རོགས། ཧོང་ཀོང་གི་གནད་དོན་དེ་ནི་རྒྱ་ནག་ནང་ཁུལ་གྱི་གནད་དོན་ཞིག་ཡིན་སྟབས་ཕྱིའི་རྒྱལ་ཁབ་ཀྱིས་ཐེ་གཏོགས་བྱས་མི་ཆོག་ཅེས་ལན་འདེབས་གནང་བ་མ་ཟད། ཕྱོིགས་གཉིས་ཀྱི་གྲོས་མཐུན་ནང་དབྱིན་ཡུལ་གཞུང་ངོས་ནས་ཡུལ་དེའི་འགྲུལ་བསྐྱོད་ལག་འཁྱེར་ཡོད་མཁན་ཧོང་ཀོང་གི་མི་སེར་རྣམས་ལ་དབྱིན་ཡུལ་དུ་གཏན་སྡོད་ཐོབ་ཐང་སྤྲོད་རྒྱུ་མིན་པའི་ཁས་ལེན་བྱས་ཡོད་པ་ལྟར། ད་རེས་སྲིད་བློན་ Johnson ལགས་ཀྱི་ཐག་གཅོད་དེ་ནི་དབྱིན་ཡུལ་གཞུང་རང་ཉིད་ཀྱི་ལང་ཕྱོགས་དང་རྒྱལ་སྤྱིའི་ཁྲིམས་ལུགས་ཀྱི་འབྲུ་དོན་དང་འགལ་གྱི་ཡོད་པར་སྐྱོན་འཛུགས་བྱས་འདུག དེ་བཞིན་ཁ་སང་། མཉམ་འབྲེལ་རྒྱལ་ཚོགས་ཁྲོད་ཀྱི་རྒྱ་གར་གྱི་གཞུང་ཚབ་པ། སྐུ་ཞབས་ Rajiv Kumar Chander ལགས་ཀྱིས་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་གི་ལྷན་ཚོགས་དབུས་སུ། རྒྱ་གར་གྱི་ངོས་ནས་ད་ལྟའི་ཧོང་ཀོང་ནང་གི་རྒྱ་ནག་གི་བྱེད་བབ་དེར་ཞིབ་ཚགས་པོས་དོ་སྣང་བྱས་ཡོད་ལུགས་འགྲེལ་བརྗོད་གནང་བ་དང་འབྲེལ། རྒྱལ་སྤྱིའི་ཚོགས་སྡེ་ཁག་གིས་ད་ལྟའི་ཧོང་ཀོང་གི་གནད་དོན་དེར་དམིགས་ཚད་དང་ལྡན་ཞིང་དོ་དམ་པའི་ངང་ནས་བལྟ་དགོས་བའི་ཞུ་སྐུལ་གནང་འདུག གཞི་རྩའི་ཁ་སང་ཚེས་ ༡ སྟེ་དབྱིན་ཡུལ་གྱིས་ཧོང་ཀོང་རྒྱ་ནག་ལ་རྩིས་སྤྲོད་བྱས་པའི་དུས་དྲན་གྱི་ཉིན་མོ་དང་བསྟུན་ནས་རྒྱ་ནག་གིས་ཧོང་ཀོང་གི་བདེ་འཇགས་ཞེས་པའི་ཁྲིམས་གཞི་ལག་བསྟར་བྱེད་འགོ་ཚུགས་མ་ཐག    ཧོང་ཀོང་མི་མང་སྟོང་ཁྲག་མང་མོས་ཁ་སང་ཡུལ་དེའི་ནང་རྒྱ་ནག་གཞུང་ལ་ངོ་རྒོལ་ལས་འགུལ་རྒྱ་ཆེར་སྤེལ་ཡོད་པ་དང་། སྐབས་དེར་ཁུལ་དེའི་ཉེན་རྟོག་པས་ཧོང་ཀོང་གི་མི་སེར་ ༣༧༠  ལྷག་འཛིན་བཟུང་བྱས་ཡོད་པ་རེད་འདུག    ད་ལྟའི་འཆར་རྒྱ་ནག་གིས་ཧོང་ཀོང་གི་བདེ་འཇགས་ཞེས་པའི་ཁྲིམས་དེའི་ནང་དོན་ཆ་ཚང་ཡོངས་གྲགས་གནང་མེད་ནའང་། ཁྲིམས་གཞི་དེའི་ཁྲོད་དུ་རྒྱལ་ཁབ་ཁ་བྲལ་དང་ཕྱི་འབྲེལ་སོགས་ཀྱི་ལས་དོན་དང་འབྲེལ་བའི་རིགས་ཉེས་ཅན་དུ་བརྩིས་ནས་མི་ཚེ་གང་བོར་བཙོན་འཇུག་བྱེད་རྒྱུ་ཡིན་པའི་དོན་ཚན་བཞི་མངོན་གསལ་གནང་ཡོད་སྟབས།  ད་ཆ་ཧོང་ཀོང་གི་མེ་སེར་རྣམས་ཀྱིས་སྔར་ཡོད་ཀྱི་ཚད་མཐོའི་རང་སྐྱོང་གི་གནས་བབ་དེར་དོ་ཕོག་ཆེན་པོ་ཐེབས་རྒྱུར་སེམས་ཁྲལ་ཆེན་བྱེད་བཞིན་པ་རེད།    

རྒྱ་ནག་གིས་རྒྱུན་དུ་དངོས་ཤུགས་བརྒྱུད་གསུམ་ནས་ཕྱི་རྒྱལ་གྱི་ཤེས་ཡོན་ལྟེ་གནས་གང་སར་རྒྱ་ནག་གི་ཁུང་ཙི་སློབ་གླིང་གི་ཡན་ལག་མང་པོ་ཆེད་འཛུགས་བྱེད་ཐབས་བྱས་ཏེ། ཕྱོགས་གཅིག་ནས་རྒྱ་ནག་གི་འཁྱོགས་བཤད་དྲིལ་བསྒྲགས་ཁྱབ་སྤེལ་དང་ཕྱོགས་གཞན་ཞིག་ནས་རྒྱལ་སྤྱིའི་སྟེང་དུ་རྒྱ་ནག་དང་འབྲེལ་བའི་ཚོར་རྣོ་བའི་གནད་དོན་ཁག་ལ་གླེང་སློང་བྱེད་རྒྱུར་འགོག་རྐྱེན་བཟོ་ཐབས་བྱེད་ཀྱི་ཡོད་ནའང་། འདས་བའི་ལོ་འགའི་རིང་ནས་བཟུང་ཕྱི་རྒྱལ་གྱི་རྒྱལ་ཁབ་མང་པོའི་ནང་ནས།  རྒྱ་ནག་གི་ཆབ་སྲིད་ཀྱི་གཡོ་ཇུས་ལྡན་པའི་ཁུང་ཙི་སློབ་གླིང་གི་ཡན་ལག་ཁང་མང་པོ་ཞིག་སྒོ་རྒྱག་བཞིན་ཡོད་པ་རེད།དེ་རིང་གསར་ལམ་ཁག་ཏུ་གནས་ཚུལ་ཐོན་པ་ལྟར་ན། ཨ་རིའི་གྲོས་ཚོགས་གོང་མའི་འཐུས་མི། ལྕམ་ Blackburn  ལགས་ཀྱིས་འདི་ལོའི་ཟླ་བ་གསུམ་པའི་ནང་ཨ་རིའི་གྲོས་ཚོགས་ཀྱི་དབུས་སུ་རྒྱ་ནག་གི་ཁུང་ཙི་སློབ་གླིང་ལ་ཕྱི་གསལ་ནང་གསལ་དགོས་བའི་ཁྲིམས་འཆར་ཞིག་བཏོན་པ་མ་ཟད། ཁོང་གིས་གྲོས་ཚོགས་འཐུས་མི་ཁག་ཅིག་དང་ལྷན་དུ་ཨ་རིའི་ཤེས་ཡོན་ལྷན་ཁང་གི་དྲུང་ཆེ། ལྕམ་ Betsy DeVos ལགས་ཀྱིས་རྒྱ་ནག་གི་ཁུང་ཙི་སློབ་གླིང་དང་འབྲེལ་བའི་སྤྱི་ཡོངས་ཀྱི་དགོས་ངེས་ཀྱི་གནད་དོན་ཁག་ཅིག་ལག་བསྟར་གནང་དགོས་བའི་སྐུལ་མ་གནང་ཡོད་པ་ལྟར།  ཁེ་ཉིན་ཚེས་༣༠ ཉིན་ཨ་རིའི་མངའ་སྡེ་ Tennessee རུ་རྟེན་གཞི་བྱས་པའི་Memphis གཙུག་ལག་སློབ་ཁང་གི་ནང་དུ་ཡོད་པའི་རྒྱ་ནག་གི་ཁུང་ཙི་སློབ་གླིང་གི་ཡན་ལག་དེ་སྒོ་རྒྱབ་འདུག ཁུལ་དེའི་ཁུང་ཙི་སློབ་གླིང་སྒོ་རྒྱབ་པ་དང་བསྟུན་ནས། ལྕམ་ Blackburn  ལགས་ཀྱིས་དུས་རྒྱུན་ནས་ཁུང་ཙི་སློབ་གླིང་གི་ནང་དུ་རྒྱ་ནག་གི་སྐད་ཡིག་དང་རིག་གཞུང་ལ་སློབ་སྦྱོང་བྱེད་བཞིན་པ་རྣམས་ཀྱིས་རྒྱ་ནག་གིས་ཨ་རིའི་ཤེས་ཡོན་ལྟེ་གནས་ཁག་ཏུ་སིམ་འཛུལ་བྱེད་བཞིན་པ་ཤེས་རྒྱུ་གལ་ཆེན་པོ་ཡིན་པ་དང་། Memphis གཙུག་ལག་སློབ་ཁང་གིས་རྒྱ་ནག་གི་ཁུང་ཙི་སློབ་གླིང་སྒོ་རྒྱག་ཏུ་བཅུག་པར་དགའ་བསུ་ཞུས་ཏེ།  ད་ནས་བཟུང་ཨ་རིའི་ཤེས་ཡོན་ལྟེ་གནས་ཀྱི་ནང་དུ་རྒྱ་ནག་གི་ཁུང་ཙི་སློབ་གླིང་གི་དྲིལ་བསྒྲགས་ཀྱི་རིགས་སྤེལ་དུ་འཇུག་རྒྱུ་མིན་པར་ཕྱིར་བསྒྲགས་ཀྱིས།  ཨ་རིའི་ངོས་ནས་རྒྱ་ནག་གི་གཉའ་གནོན་རང་བཞིན་གྱི་དྲིལ་བསྒྲགས་ལ་ནམ་ཡང་མགོ་སྒུར་རྒྱུ་མིན་ཞེས་གསུངས་འདུགཁོང་གིས་ད་དུང་། དབྱིན་ཡུལ་ནང་གི་ཤེས་ཡོན་ལྟེ་གནས་ཁག་ཅིག་གིས་ཀྱང་རྒྱ་ནག་སྲིད་གཞུང་དང་མཉམ་དུ་གན་ཡིག་བཞག་པའི་ཐོག་ནས་རྒྱ་ནག་གི་ཆབ་སྲིད་དང་འབྲེལ་བའི་ཚོར་རྣོ་བའི་བརྗོད་བྱ་དང་རྒྱ་ནག་རྒྱལ་ཁབ་ཀྱི་ཆེ་མཐོང་ལ་གནོད་པའི་བྱ་འགུལ་གང་ཡང་མི་སྤེལ་རྒྱུའི་ཁས་ལེན་བྱས་ཡོད་པ་ཡོངས་གྲགས་ཀྱིས། ད་ཆ་རྒྱ་ནག་གིས་ག་ལེར་ཕྱི་ལོག་གི་རྒྱལ་ཁབ་ཁག་གི་ནང་དུ་ཡང་རྒྱ་ནག་གི་ཆབ་སྲིད་དང་འབྲེལ་བའི་བགྲོ་གླེང་གི་རིགས་འགོག་ཐབས་བྱེད་བཞིན་ཡོད་པ་མ་ཟད། སྤྱི་ཡོངས་ཀྱི་རང་དབང་ལྡན་པའི་ཤེས་ཡོན་གྱི་ལྟེ་གནས་ཁག་ལ་ཡང་གནོད་ཤུགས་ཐེབས་བཞིན་པ་མངོན་གསལ་གནང་འདུག དེ་བཞིན་ཁང་གིས་སྤྱི་ལོ་ ༢༠༠༧ ནས་བཟུང་། ཨ་རིའི་ཁུལ་དུ་རྒྱ་ནག་གི་སློབ་མ་དང་ཉམས་ཞིབ་པ་༣༥༠༠༠༠ལྷག་འབྱོར་ཡོད་པ་མ་ཟད། དམིགས་བསལ་དུ་རྒྱ་ནག་བཅིངས་གྲོལ་དམག་མིའི་འཕྲུལ་ལས་བ་དང་ཚན་རིག་པ་༢༥༠༠ ལྷག་ལ་སློབ་ཡོན་སྤྲད་ནས་ཕྱི་ཕྱོགས་སུ་སློབ་སྦྱོང་བྱེད་ཀྱི་ཡོད་པ་མངོན་གསལ་དང་སྦྲགས།  མི་དེ་དག་ཡོད་ཚད་ནི་རྒྱ་ནག་དམར་ཤོག་གཞུང་ལ་བློ་སེམས་དཀར་བའི་མི་རྐྱང་རྐྱང་ཡིན་པ་དང་། ཨ་རིའི་ངོས་ནས་རྒྱ་ནག་གི་བཅིངས་གྲོལ་དམག་མིས་སློབ་ཡོན་གནང་བའི་སློབ་མ་དེ་དག་གིས་གསང་ཉུལ་གྱི་ལས་ཀ་བྱེད་ཀྱི་ཡོད་པ་མ་ཟད།  ཕྱི་ཕྱོགས་ཀྱི་རྒྱལ་ཁབ་ཀྱི་ཤེས་བྱ་ཐོན་དངོས་རྐུ་འཁྱེར་བྱེད་ཀྱི་ཡོད་པ་ཡང་ཕྱིར་བསྒྲགས་གནང་འདུག དེ་བཞིན་ཨ་རིའི་གསང་བའི་ལས་ཁུངས་ཀྱིས་ཤེས་རྟོག་བྱུང་བ་ལྟར་ན། རྒྱ་ནག་གིས་ཐབས་བརྒྱ་ཇུས་སྟོང་གིས་ཨ་རིའི་རང་དབང་ལྡན་པའི་སློབ་སྦྱོང་གི་ཁོར་ཡུག་དེར་གཏོར་བཅོམ་གཏོང་རྒྱུར་དམིགས་ཡོད་པ་མ་ཟད། ཨ་རིའི་དེང་རབས་འཕྲུལ་ལས་གསར་བ་ཁག་རྐུ་འཁྱེར་བྱེད་བཞིན་ཡོད་པར་ཕྱིར་བསྒྲགས་གནང་བ་དང་འབྲེལ། ད་ཆ་ཨ་རིའི་གསང་བའི་ལས་ཁུངས་ཀྱི་ངོས་ནས་དཔལ་འབྱོར་དང་འབྲེལ་བའི་རྒྱ་ནག་གི་གསང་ཉུལ་གྱི་དོན་རྐྱེན་ ༡༠༠༠ དང་རྒྱལ་ཡོངས་འཕྲོད་བསྟེན་དང་འབྲེལ་བའི་དོན་རྐྱེན་ ༡༨༠ བཅས་ལ་ཞིབ་འཇུག་བྱེད་བཞིན་ཡོད་པར་མངོན་གསལ་གནང་འདུག གཞི་རྩའི་སྔ་ལོ་ ༢༠༡༨ ལོར་ཨ་རི་ནང་རྒྱ་ནག་གི་ཁུང་ཙི་སློབ་གླིང་ ༩༠ ཙམ་ཡོད་ཀྱང་ཉེ་བའི་ལོ་ཤས་ནས་བཟུང་བོད་རང་བཙན་སློབ་ཕྲུག་ཚོགས་པ་གཙོས་བོད་དོན་རྒྱབ་སྐྱོར་ཚོགས་པ་ཚོས་ཁུང་ཙི་སློབ་གླིང་དེས་ཤེས་ཡོན་རང་དབང་ལ་དོ་ཕོག་གཏོང་བཞིན་པར་སྐྱོན་བརྗོད་ཀྱིས་དྲིལ་བསྒྲགས་དང་གོ་རྟོགས་ཀྱི་ལས་འགུལ་མང་པོ་སྤེལ་དང་སྤེལ་མུས་ཁྲོད་ད་ཆ་རྒྱལ་སྤྱིའི་སྟེང་རྒྱ་ནག་གི་ཁུང་ཙི་སློབ་གླིང་དང་འབྲེལ་ཐག་གཅོད་དགོས་པའི་ཞུ་གཏུག་དང་ངོ་རྒོལ་གནང་མཁན་མང་པོ་བྱུང་ཡོད་པར་བརྟེན་རྒྱ་ནག་གི་ཁུང་ཙི་སློབ་གླིང་མང་པོ་སྒོ་རྒྱག་བཞིན་པ་རེད

གྷལ་ཝན་རི་གཤོངས་སུ་ཆགས་པའི་རྒྱ་བོད་ས་མཚམས་སུ་རྒྱ་དཀར་ནག་གཉིས་ཀྱི་དམག་མིའི་དབར་དྲག་པོའི་གདོང་ཐུག་བྱུང་སྟེ་དེང་སྐབས་རྒྱ་དཀར་ནག་གཉིས་དབར་རྩོད་རྙོག་ཇེ་ཆེར་ཕྱིན་པའི་ཁྲོད་འདིར་རྒྱ་གཞུང་གིས་བཀྲིས་དང་རྡོ་རྗེ་ཟེར་བའི་བོད་རིག་གསང་ཉུལ་བ་གཉིས་རྒྱ་གར་གཞུང་ལ་གསང་ཉུལ་བྱེད་རྒྱུའི་བྱ་འགུལ་སྤེལ་ཆེད་བལ་ཡུལ་བརྒྱུད་རྒྱ་གར་ནང་ཆེད་གཏོད་བྱས་ཡོད་པ་མངོན་གསལ་གནང་འདུགཁ་སང་ Defencenews ཞེས་པའི་རྒྱ་གར་གྱི་བདེ་སྲུང་དང་འབྲེལ་བའི་བརྒྱུད་ལམ་གྱིས་གནས་ཚུལ་སྤེལ་བར་རྒྱ་ནག་གི་ཆེད་གཏོང་བྱས་པའི་བོད་རིགས་གཉིས་པོ་ལས་བཀྲིས་ཟེར་བ་དེ་བོད་སྟག་རྩེ་ཁུལ་ནས་ཡིན་པ་དང་དེ་སྔ་ལྷ་སར་བཅའ་སྡོད་བྱས་རྗེས་རྒྱ་ནག་བཅིངས་བཀྲོལ་དམག་གི་མདའ་ཤོག་གཉིས་པར་འཛུལ་ཞུགས་ཀྱིས་ཕྱི་ལོ་ ༢༠༡༧ ལོར་ཁྲིན་ཏུ་ཁུལ་དུ་དམིགས་བསལ་སྦྱོང་བརྡར་ཆེད་ཕྱིན་ཡོད་པའི་སྐོར་ཆེད་བཀོད་གནང་འདུག དེ་བཞིན་རྡོ་རྗེ་ཟེར་བ་དེ་ Torfi ཞེས་ཁ་གསལ་གང་ཡང་མེད་པའི་བོད་ཀྱི་ས་ཁུལ་ཞིག་ནས་ཡིན་སྐོར་བཀོད་འདུག་པ་དང་ཕྱི་ལོ་ ༢༠༡༥ ནས་བཟུང་བོད་ཁུལ་གྱི་བཙོན་ཁང་ཞིག་ཏུ་ལས་ཀ་བྱས་འདུག ཁོ་རྒྱ་གར་བྱང་ཤར་ཨ་རུ་ནཱ་ཅལ་དང་འབྲས་ལྗོངས་ཁུལ་དུ་འབྲེལ་བ་ཡག་པོ་ཡོད་སྟབས་ཁོ་བརྒྱུད་ནས་རྒྱ་གར་ནང་གི་དགོན་སྡེ་ཁག་ཡོད་སར་རྒྱ་ནག་གི་གསང་ཉུལ་འཛུགས་ཐབས་བྱེད་བཞིན་ཡོད་པ་ཤེས་རྟོགས་བྱུང་ལུགས་བཀོད་འདུག ད་ལྟའི་ཆར་བོད་རིག་གཉིས་པོ་དེ་དག་བལ་ཡུལ་བརྒྱུད་རྒྱ་གར་ནང་བཏང་ཡོད་པ་མ་གཏོགས་ཁོང་གཉིས་ས་ཆ་གང་དུ་འགྲོ་འཆར་ཡོད་མེད་དང་དམིགས་ཡུལ་ག་རེ་ཡོད་མེད་སོགས་ཀྱི་ཞིབ་ཕྲའི་གནས་ཚུལ་ཤེས་རྟོགས་མེད་སྟབས་འདྲི་རྩད་གནང་མུས་ཡིན་པ་བཀོད་འདུགདེའི་བར་ན་དེ་རིང་རྒྱ་གར་གྱི་བརྒྱུད་ལམ་ཐོག་ཏུ་དེ་སྔ་གྷལ་ཝན་དུ་རྒྱ་དཀར་ནག་གཉིས་ཀྱི་དམག་མིའི་དབར་གདོང་ཐུག་ཁྲོད་རྒྱ་གར་གྱི་དམག་མི་ ༢༠ ཙམ་འདས་གྲོངས་སུ་ཕྱིན་ཡོད་པ་ཡོངས་གྲགས་ཆགས་ཡོད་ཀྱང་རྒྱ་ནག་ཕྱོགས་ནས་དམག་མི་ཇི་ཙམ་རྐྱེན་འདས་སུ་ཕྱིན་སྐོར་གནས་ཚུལ་ཁ་གསལ་སྤེལ་མེད་ཀྱང་། རྗེས་སུ་རིམ་པས་གནས་ཚུལ་ཤེས་རྟོགས་བྱུང་བ་ལྟར་ན་སྐབས་དེར་རྒྱ་ནག་གི་དམག་མི་ ༣༨ ཙམ་འདས་གྲོངས་སུ་ཕྱིན་ཡོད་པ་དང་། ཁག་ཅིག་གིས་དམག་མི་ ༥༠ འདས་གྲོངས་སུ་ཕྱིན་ཡོད་པ་གསུང་མཁན་ཡོད་པ་མ་ཟད། ཁག་ཅིག་གི་མིང་ལ་ལྷག་པ་དང་ཚེ་རིང་། དེ་བཞིན་སྐལ་བཟང་སོགས་བོད་ནང་གི་བོད་རིགས་མིང་ཡོད་པ་བརྒྱད་ཙམ་ཡོད་པ་འཁོད་འདུགད་བར་གནས་ཚུལ་དེ་དག་བརྒྱ་ཆ་བརྒྱ་ཐམ་པ་ཁུངས་ལྡན་ཡིན་མིན་རྩད་གཅོད་ཐུབ་མེད་ཀྱང་། རྒྱ་ནག་གཞུང་གིས་གྷལ་ཝན་ས་ཁུལ་དུ་དམག་མི་བཏང་བའི་ནང་བོད་རིགས་ཁག་ཅིག་ཆེད་གཏོང་བྱས་ཡོད་པ་མ་ཟད། རྒྱ་ནག་གཞུང་གིས་བོད་ཀྱི་ས་ཁུལ་ཁག་ཏུ་དམག་གི་སྦྱོང་བརྡར་སྤེལ་བཞིན་པ་དང་། དེའི་ཁོངས་སུ་ས་གནས་ཀྱི་བོད་རིགས་ཁ་ཤས་ལ་དེ་མཚུངས་སྦྱོང་བརྡར་སྤྲད་ནས་རིམ་པས་རྒྱ་གར་ལ་གདོང་ཐུག་ཁྲོད་བོད་དམག་གཏོང་འཆར་ཡོད་པར་ཚོད་དཔག་གནང་བཞིན་འདུག    

རེས་གཟའ་ཟླ་བའི་ཉིན་རྒྱ་གར་གཞུང་ནས་རྒྱ་ནག་གི་མཉེན་ཆས་ WeChat གཙོས་མཉེན་ཆས་ ༥༩ བཀག་སྡོམ་བྱས་ཡོད་ཀྱང་རྒྱ་ནག་གཞུང་གིས་དེར་དགག་པ་དང་སྦྲགས་ཏེ་བློ་འཚབ་ཤུགས་ཆེ་བྱས་འདུགརྒྱ་གར་དབུས་གཞུང་གིས་རྒྱལ་ཁབ་ཀྱི་ས་ཁོངས་བདག་དབང་དང་བདེ་འཇགས་གཞི་རྩར་འཛིན་ཐོག་ཁ་སྔོན་རྒྱ་གར་ནང་བཀོལ་སྤྱོད་བྱེད་བཞིན་པའི་རྒྱ་ནག་གི་མཉེན་ཆས་ ༥༩ ཙམ་ཞིག་བཀའ་སྡོམ་བྱས་པའི་གསལ་བསྒྲགས་སྤེལ་ཡོད་པ་དང་། རྒྱ་གཞུང་གིས་ཁ་སང་གནད་དོན་དེར་ངོ་རྒོལ་དང་སྦྲགས་ཏེ་རྒྱ་གར་ནས་རྒྱ་ནག་ལ་དེ་ལྟར་དབྱེ་འབྱེད་གནང་རྒྱུ་མཚམས་འཇོག་དགོས་པར་བརྗོད་འདུག རྒྱལ་ས་ལྡི་ལིར་ཡོད་པའི་རྒྱ་ནག་གི་གཞུང་ཚབ་པས་ད་ལན་རྒྱ་གར་གྱི་བྱེད་ཕྱོགས་དེས་འཛམ་གླིང་གི་ཚོང་འབྲེལ་ལྷན་ཚོགས་ཀྱི་རྩ་འཛིན་ལམ་སྟོན་ལ་བརྩི་མེད་བཏང་བར་དོགས་གཞི་དང་སྒོས་རྒྱ་གར་དབུས་གཞུང་གི་ཐག་གཅོད་དེ་གསལ་ཁ་མེད་པ་ཞིག་དང་གོ་རྒྱུ་མེད་པར་ངོས་འཛིན་གྱིས་སྐྱོན་བརྗོད་བྱས་འདུགདེ་བཞིན་རྒྱ་གཞུང་ནས་རྒྱ་གར་གཞུང་གིས་མཉེན་ཆས་བཀག་སྡོམ་དེས་མཉེན་ཆས་གསར་གཏོད་བྱེད་མཁན་དང་འབྲེལ་ཡོད་ལས་མི། དེ་བཞིན་ཁེ་ལས་པ་སོགས་ཀྱི་འཚོ་བར་ཤུགས་རྐྱེན་སྤྲད་ངེས་ཡིན་པ་དང་། ལྷག་པར་དུ་མཉེན་ཆས་དེ་དག་རྒྱ་གར་རྒྱལ་ཁབ་ཀྱི་རྩ་ཁྲིམས་དང་མཐུན་པའི་ཐོག་ནས་བཀོལ་སྤྱོད་བྱེད་ཀྱི་ཡོད་སྟབས་རྒྱ་གར་ནས་རྒྱ་དཀར་ནག་གཉིས་ཀྱི་དཔལ་འབྱོར་དང་ཚོང་འབྲེལ་མཉམ་ལས་བརྒྱུད་ཕན་ཚུན་གྱི་ཁེ་ཕན་ལ་ངོས་ལེན་ཞུས་ཏེ་ལས་གཞིར་བཅོས་དགོས་པ་དང་ཆབས་ཅིག རྒྱ་གར་ཕྱོགས་ནས་གུ་ཡངས་དང་དྲང་བདེན་གྱི་ཚོང་རའི་ཁོར་ཡུག་སྐྲུན་ནས་ཕྱོགས་གཉིས་ཀྱི་འབྲེལ་ལམ་དང་ཁེ་ཕན་ལ་དགོངས་གནད་ཡིན་པ་བརྗོད་འདུག རྩ་བའི་རྒྱ་གར་གཞུང་ནས་རྒྱ་ནག་གི་མཉེན་ཆས་བཀག་སྡོམ་གྱི་ཐག་གཅོད་དེ་ཉེ་ལམ་རྒྱ་གར་བྱང་ཕྱོགས་ལ་དྭགས་ཁུལ་དུ་ཡོད་པའི་རྒྱ་བོད་གཉིས་ཀྱི་ས་མཚམས་སུ་རྒྱ་དཀར་ནག་གཉིས་ཀྱི་མཐའ་མཚམས་དམག་མིའི་དབར་གདོང་ཐུག་བྱུང་ནས་རྒྱ་གར་གྱི་དམག་མི་ཉི་ཤུ་རྐྱེན་ལམ་དུ་ཤོར་བའི་དོན་རྐྱེན་ལ་འཁོན་ལན་ཚུལ་དུ་བྱས་པ་ཞིག་དང་། ད་ལན་རྒྱ་གར་གཞུང་གིས་རྒྱ་གར་ནང་བཀོལ་སྤྱོད་བྱེད་བཞིན་པའི་རྒྱ་ནག་གི་མཉེན་ཆས་བཀག་སྡོམ་བྱས་པར་མང་ཚོགས་མང་པོས་དགའ་བསུ་ཞུས་ཡོད་པ་དེ་ལྟར་ཡང་། མཉེན་ཆས་བཀག་སྡོམ་ཁྲོད་བོད་ཕྱི་ནང་གཉིས་ཀྱི་འབྲེལ་བ་གནང་སའི་བརྒྱུད་ལམ་གཙོ་བོ་ WeChat འམ་སྐད་འཕྲིན་ཡང་བཀག་སྡོམ་བྱས་ཡོད་སྟབས་བོད་མི་ཁག་ཅིག་ནས་ཐུགས་འཚབ་གནང་བཞིན་འདུག འོན་ཀྱང་ཁ་སང་སྤྱི་ཚོགས་དྲྭ་ལམ་ཐོག་འཕྲུལ་ལས་ཐད་ལ་དོ་དབྱིངས་ཡོད་མཁན་རྣམས་ནས་བོད་མི་ཚོར་ VPN མཉེན་ཆས་ཕབ་ལེན་གྱིས་མཉེན་ཆས་དེ་ཇི་ལྟར་སྤྱོད་ཚུལ་སོགས་ལམ་སྟོན་གནང་བའི་བརྙན་ཐུང་ཡང་མཇལ་རྒྱུ་འདུག ལྷག་དོན་རྒྱ་གར་ནང་གཙོས་ཕྱིའི་རྒྱལ་ཁབ་ཁག་ལ་སྐད་འཕྲིན་བརྒྱུད་འབྲེལ་བ་གནང་མཁན་ཚོས་ད་ཆ་ Whatsapp དང་ Telegram སོགས་འཕྲིན་སྟེགས་ཕབ་ལེན་གནང་བཞིན་འདུག

རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་ལྷན་ཚོགས་ཀྱི་ཚོགས་གཙོ་སྐུ་ཞབས་ Richard Gere  ལགས་ཀྱིས་དྲྭ་ཐོག་བརྒྱུད་ཨ་རིའི་གྲོས་ཚོགས་གོང་མའི་རྒྱལ་སྤྱིའི་ཚོང་འབྲེལ་གྱི་ཉན་ཞིབ་ལས་རིམ་ཐོག་ལྷན་ཞུགས་ཀྱིས་རྒྱ་ནག་གཞུང་གིས་ཡུལ་དེ་དང་ལྷག་པར་དུ་བོད་ནང་ལ་དམ་དྲག་ཤུགས་ཆེ་བྱེད་བཞིན་པ་དེས་ཨ་རིའི་ཁེ་ཕན་ལ་དོ་ཕོག་ཆེན་པོ་བཏང་དང་གཏོང་མུས་ཡིན་པར་ནན་བརྗོད་གནང་བ་དང་འབྲེལ། ཨ་རིའི་གྲོས་ཚོགས་ཀྱི་ངོས་ནས་བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་འཆར་ལ་རྒྱབ་སྐྱོར་གནང་དགོས་པའི་ཞེན་སྐུལ་གནང་འདུགཁ་སང་ཕྱི་ཟླ་ ༦ ཚེས་ ༣༠ ཉིན་ཚོགས་པའི་ཉན་ཞིབ་ལས་རིམ་དེ་ནི་ཨ་རིའི་གྲོས་ཚོགས་གོང་མའི་རྒྱལ་སྤྱིའི་ཚོང་འབྲེལ་ལས་དོན་ཚོགས་ཆུང་གི་ཚོགས་གཙོ་སྐུ་ཞབས་ John Cornyn ལགས་དང་སྐུ་ཞབས་ Bob Casy ལགས་གཉིས་ཀྱིས་གཙོ་སྐྱོང་གནང་སྟེ་གོ་སྒྲིག་གནང་འདུག་པ་དང་། ལས་རིམ་ཐོག་སྐུ་ཞབས་ Richard Gere ལགས་ཀྱིས་རྒྱ་ནག་གཞུང་ནས་བོད་ནང་གི་བོད་མི་ཚོར་དམ་དྲག་དང་དྲག་གནོན་རིགས་བྱས་པ་ཙམ་མ་ཟད་བོད་མིར་རྒྱབ་སྐྱོར་གནང་མཁན་གྱི་འགྲོ་བ་མིའི་ཐོབ་ཐང་ཐོག་ཕྱག་ལས་གནང་མཁན་ཚོ་ལའང་དྲག་གནོན་བྱེད་བཞིན་པ་དང་། ལྷག་དོན་རྒྱ་ནག་གི་མི་སེར་རྣམས་རང་དབང་ཐོག་ནས་ཨ་རིར་འགྲོ་འོང་གནང་བཞིན་ཡོད་ཀྱང་། ཨ་རིའི་གསར་འགོད་པ་དང་གཞུང་འབྲེལ་མི་སྣ། དེ་བཞིན་མང་ཚོགས་དཀྱུས་མ་རྣམས་རྒྱ་ནག་སྤྱི་དང་སྒོས་བོད་ཀྱི་ས་ཁུལ་ཁག་ཏུ་རང་དབང་ཐོག་འགྲོ་འོང་གནང་རྒྱུའི་ཐོབ་ཐང་སྤྲད་ཀྱི་མེད་སྟབས་ཨ་རིའི་གྲོས་ཚོགས་གོང་འོག་གཉིས་ཀྱི་གྲོས་ཚོགས་འཐུས་མིས་རྒྱབ་སྐྱོར་གནང་རྗེས་ཕྱི་ལོ་ ༢༠༡༨ ལོར་ཨ་རིའི་སྲིད་འཛིན་གྱིས་མཚན་རྟགས་བསྐྱོན་ཏེ་གཏན་འབེབས་ཟིན་པའི་བོད་ནང་འདྲ་མཉམ་ཐོག་འགྲུལ་སྐྱོད་ཆོག་པའི་ཁྲིམས་འཆར་དེར་དགའ་བསུ་དང་དོན་དངོས་ཐོག་ལག་བསྟར་གནང་དགོས་པར་འབོད་སྐུལ་གནང་འདུག ད་དུང་ཉན་ཞིབ་ལས་རིམ་དེའི་ཐོག་སྐུ་ཞབས་ Richard Gere ལགས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་ཡང་སྲིད་གནད་དོན་འབྲེལ་ཏེ་ཨ་རིའི་གྲོས་ཚོགས་གོང་མས་གཏན་འབེབས་གནང་བའི་བོད་དོན་རྒྱབ་སྐྱོར་གྱི་ཁྲིམས་འཆར་གསར་པ་འདིས་ཨ་རི་གཞུང་ནས་བོད་དོན་དང་བོད་མིའི་མངོན་འདོད་ལ་རྒྱབ་སྐྱོར་ཡོད་པ་མངོན་གསལ་གནང་ཡོད་ཅེས་གསུངས་པ་དང་ཆབས་ཅིག ཁྲིམས་འཆར་དེ་རིམ་པས་གྲོས་ཚོགས་འོག་མ་དང་ཨ་རི་སྲིད་འཛིན་བརྒྱུད་དེ་ཡུལ་དེའི་ཁྲིམས་སུ་གཏན་འབེབས་ཡོང་བའི་ཞུ་སྐུལ་གནང་བ་མ་ཟད། ཁྲིམས་འཆར་དེ་བརྒྱུད་༸གོང་ས་མཆོག་གིས་དབུས་པའི་བོད་ཀྱི་བླ་སྤྲུལ་ཡང་སྲིད་ཀྱི་གནད་དོན་ཐོག་རྒྱ་གཞུང་ལ་ཐེ་བྱུས་བྱེད་དབང་མེད་པ་དང་ཨ་རིའི་ཕྱི་སྲིད་ལས་ཁུངས་ཀྱིས་བོད་ཀྱི་རྒྱལ་ས་ལྷ་སར་ཨ་རིའི་གཞུང་ཚབ་ལས་ཁུངས་ཆེད་འཛུགས་གནང་ཐུབ་ངེས་ཡིན་པ་སོགས་ཀྱི་དགེ་མཚན་ལྡན་ཡོད་པ་གསུངས་འདུག ཉན་ཞིབ་ཐོག་ཚོགས་ཆུང་ངོས་ནས་སྐུ་ཞབས་གྷེ་རི་ལགས་སུ་རྒྱ་ནག་གི་དམ་དྲག་ལ་གདོང་ལེན་གནང་རྒྱའི་ཐབས་ལམ་ཐད་ཨ་རིའི་ཕོ་བྲང་དཀར་པོར་གཞེན་སྐུལ་གང་ཡོད་དམ་ཞེས་བཀའ་འདྲི་ཞུས་པར་ཁོང་གིས་ཨ་རིའི་གཞུང་ནས་རྒྱ་ནག་ཐོག་འདྲ་མཉམ་གི་སྲིད་བྱུས་ལག་བསྟར་གནང་གལ་ཡིན་པའི་ལམ་སྟོན་གནང་བ་མ་ཟད། དེ་བཞིན་རྒྱལ་སྤྱིའི་གློག་བརྙན་ཁག་གི་ནང་ལ་དེང་སྐབས་རྒྱ་ནག་གི་ཤུགས་རྐྱེན་ཆེ་རུ་འགྲོ་བཞིན་པའི་གནད་དོན་སྐོར་དང་འབྲེལ། ཁོང་ནས་ད་བར་རྒྱལ་སྤྱིའི་གློག་བརྙན་དུས་སྟོན་སོགས་ཀྱི་ཐོག་བོད་དོན་ལ་རྒྱབ་སྐྱོར་གྱིས་བོད་དང་འགྲོ་བ་མིའི་ཐོབ་ཐང་སྐོར་གཏམ་བཤད་གནང་བ་དེས་ཁོང་རང་ཉིད་ཀྱི་མི་ཚེའི་མདུན་ལམ་ལ་ཐད་ཀར་ཤུགས་རྐྱེན་ཐེབས་ཡོད་པར་གསུང་ཚོད་དཀའ་ཡང་རྒྱལ་སྤྱིའི་གློག་བརྙན་བཟོ་སྐྲུན་ཁང་དང་ལྷག་པར་དུ་དབྱིན་ཇིའི་གློག་བརྙན་སྡེ་ཚོགས་སོགས་ནས་ཁོང་གློག་བརྙན་འཁྲབ་སྟོན་པའི་ཁོངས་སུ་འདེམས་སྒྲུག་གནང་རྒྱུར་ཐེ་ཚོམ་དང་འཛེམས་ཟོན་ཆེན་པོ་གནང་བཞིན་འདུག་ཅེས་གསུངས་པ་མ་ཟད། ལྷག་དོན་རྒྱ་ནག་གི་གློག་བརྙན་བཟོ་སྐྲུན་ཁང་མང་པོ་ཞིག་ནས་རྒྱ་གཞུང་གི་གནོན་ཤུགས་འོག་རང་ཉིད་ཀྱི་འཚོ་བར་ངལ་བ་ཆེན་པོ་འཕྲད་སྲིད་པར་ཞེད་སྣང་འོག་ཁོང་དང་ལྷན་དུ་ཕྱག་ལས་གནང་ཐུབ་ཐབས་མེད་ཅེས་གསུངས་ཡོད་སྐོར་ལུང་འདྲེན་གནང་འདུག

ཨ་རིའི་གློག་བརྙན་བཟོ་སྐྲུན་པ་ལྕམ་ Rosemary Rawcliffe ལགས་ཀྱིས་བཟོ་སྐྲུན་ཞུས་པའི་ The Great 14th : Tenzin Gyatso འམ་༸རྒྱལ་བ་༸སྐུ་ཕྲེང་བཅུ་བཞི་པ་ཆེན་པོ་བསྟན་འཛིན་རྒྱ་མཚོ་མཆོག་ཅེས་པའི་གློག་བརྙན་འདི་ཉེ་ཆར་ཕྱི་ཚེས་ ༢༧ ཉིན་༸སྐུའི་འཁྲུངས་སྐར་དུས་ཆེན་སླེབས་ཉེ་དང་བསྟུན་རིན་མེད་ཐོག་དྲྭ་ལམ་བརྒྱུད་རྒྱལ་སྤྱིའི་ཁྱོན་ཡོངས་སུ་གཟིགས་འབུལ་ཞུས་ཡོད་པ་དང་སྐབས་དེར་གློག་བརྙན་འདིར་གཟིགས་མཁན་ཁྱོན་མང་ཚོགས་ཁྲི་དྲུག་ལྷག་བྱུང་ཡོད་པ་རེད།གློག་བརྙན་འདི་ནི་ལྕམ་ Rosemary Rawcliffe ལགས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་༸སྐུ་ཚེའི་མཛད་རྣམ་སྤྱི་དང་ལྷག་པར་དུ་མགོན་པོ་༸གང་ཉིད་མཆོག་གི་ཆོས་ཕྱོགས་དང་ཆབ་སྲིད། མང་གཙོ་སོགས་ཀྱི་ཐོག་མཛད་འཕྲིན་རླབས་པོ་ཆེ་རྒྱ་ཆེ་བསྐྱངས་ཁག་མངོན་གསལ་གནང་བ་ཞིག་ཡིན་པ་དང་། གློག་བརྙ་ནང་དེ་སྔ་མང་ཚོགས་ནས་མཇལ་མྱོང་མེད་པའི་༸གོང་ས་མཆོག་༸སྐུ་གཞོན་དུས་སྐབས་ཀྱི་བརྙན་པར་མང་དག་ཅིག་མཇལ་རྒྱུ་འདུག དེ་རིང་རླུང་འཕྲིན་ཁང་གིས་ལྕམ་ Rosemary Rawcliffe ལགས་སུ་ཞལ་པར་བརྒྱུད་ཁོང་གི་གློག་བརྙན་དང་འབྲེལ་བཀའ་འདྲི་ཁག་ཅིག་ཞུས་པར་གློག་བརྙན་འདི་ནི་འདས་པའི་ལོ་བརྒྱད་ཀྱི་རིང་༸གོང་ས་མཆོག་གི་༸སྐུ་ཚེའི་མཛད་རྣམ་རྒྱུས་ལོན་དང་ལྷག་དོན་༸གོང་ས་མཆོག་དང་ལྷན་དུ་ཡང་ཡང་བཀའ་འདྲི་དགོངས་སྐོར་སོགས་ཞུ་རྒྱུའི་གོ་སྐབས་དམིགས་བསལ་བ་ཞིག་བྱུང་བར་འགྲེལ་བརྗོད་དང་ཆབས་ཅིག ཁྱད་པར་དུ་༸གོང་ས་༸སྐྱབས་མགོན་ཆེན་པོ་མཆོག་གིས་ཆེས་བཟོད་བཞེས་ཀྱིས་དུས་ཚོད་གནང་བར་བརྟེན་ཁོང་གིས་གློག་བརྙན་འདི་བཟོ་སྐྲུན་ཞུས་ཡོད་སྐོར་གསུངས་པ་མ་ཟད་མགོན་པོ་༸གང་ཉིད་མཆོག་ལ་བཀའ་དྲིན་བླ་མེད་དུ་ཆེ་ཞེས་ཞུས་སོང་།ཁོང་གིས་གློག་བརྙན་འདི་བཟོ་སྐྲུན་གྱི་རྒྱུད་རིམ་ཁྲོད་༸གོང་ས་མཆོག་གི་མཛད་རྗེས་མང་པོ་དྲན་གསོ་ཞུ་སྐབས་རང་བཞིན་གྱིས་སེམས་ནང་ལ་སྤྲོ་སྣང་དང་སེམས་འགུལ་ཐེབས་པའི་གནས་སྟངས་མང་པོ་བྱུང་སོང་བ་དང་། དེ་དག་ཁྲོད་ནས་མགོན་པོ་༸གང་ཉིད་མཆོག་གིས་བོད་ནས་ཕེབས་པའི་བོད་མི་ཚོ་ལ་དམིགས་བསལ་མང་མཇལ་སྐབས་ཀྱི་ཁོར་ཡུག་དང་དེ་བཞིན་མགོན་པོ་༸གང་ཉིད་མཆོག་གིས་འགྲོ་བ་སྤྱི་ལ་ཉེ་རིང་མེད་པར་བྱམས་བརྩེའི་ཐོག་ནས་དགོངས་བཞེད་གནང་སྟངས་དང་དེ་བཞིན་༸གོང་ས་མཆོག་གིས་༸སྐུའི་ཡོངས་འཛིན་གླིང་རིན་པོ་ཆེ་༸སྐུ་ཐོག་གོང་མའི་སྐོར་ལ་བཀའ་བསྩལ་བའི་མཛད་རྣམ་དེ་ཚོས་སེམས་འགུལ་ཆེན་པོ་ཐེབས་སོང་ཞེས་གསུངས་སོང་། དེ་བཞིན་གློག་བརྙན་འདིའི་ནང་དེ་སྔ་མང་ཚོགས་ནས་མཇལ་དཀའ་བའི་༸གོང་ས་མཆོག་༸སྐུ་ན་གཞོན་དུས་སྐབས་སུ་རྒྱ་ནག་ལ་ཕེབས་པ་དང་། གངས་རྩེད་མཛད་པ། དེ་བཞིན་དྷ་སའི་རི་ཁྲོད་དུ་༸སྐུ་སེང་ལ་ཕེབས་པ་སོགས་ཀྱི་བརྙན་པར་མང་པོ་ཞིག་སྤྱོད་འདུག་པ་དང་འབྲེལ་བཀའ་འདྲི་ཞུས་པར་བརྙན་པར་དེ་དག་༸གོང་ས་མཆོག་གི་༸སྐུ་སྒེར་ཡིག་ཚང་ནས་གསོལ་བསྩལ་གནང་བ་ཞིག་ཡིན་པ་དང་། དེ་དག་མཇལ་སྐབས་རང་བཞིན་གྱིས་སེམས་ནང་སྤྲོ་སྣང་བྱུང་བ་མ་ཟད་དེ་བྱུང་གི་ཆ་ནས་བརྙན་པར་དེ་ཚོ་གལ་ཆེན་པོ་དང་རྩ་ཆེན་ཞིག་རེད་འདུག་བཅས་གསུངས་ཡོད།ཁོང་གིས་ད་དུང་ཉེ་ཆར་གློག་བརྙན་འདི་རིན་མེད་ཐོག་གཟིགས་འབུལ་ཞུ་སྐབས་བོད་མི་ཁག་ཅིག་གིས་ཆོག་མཆན་གང་ཡང་མི་ཞུ་བར་ཁོང་གིས་བཟོ་སྐྲུན་ཞུས་པའི་གློག་བརྙན་དེ་ཕབ་ལེན་བྱས་པ་མ་ཟད། བརྙན་པར་དུམ་གཏུམ་གནང་སྟེ་སྤྱི་ཚོགས་དྲྭ་ལམ་ཁག་ཏུ་སྤེལ་བ་དེ་ནི་གློག་བརྙན་གྱི་བདག་དབང་ལ་གུས་བརྩི་མེད་པའི་རྣམ་པ་ཞིག་འདུག་པ་དེར་བློ་ཕམ་གྱི་གནས་ཡིན་པར་གསུངས་སོང་། གཞི་རྩའི་ལྕམ་ Rosemary Rawcliffe ལགས་ཀྱིས་དེ་སྔ་བོད་ཀྱི་བེུད་དང་༸རྒྱལ་ཡུམ་ཆེན་མོ་ཞེས་པའི་གློག་བརྙན་གཉིས་ཀྱང་བཟོ་སྐྲུན་གནང་ཡོད་པ་དང་། དེ་རེས་ཁོང་གིས་བཟོ་སྐྲུན་ཞུས་པའི་ The Great 14th : Tenzin Gyatso འམ་༸རྒྱལ་བ་༸སྐུ་ཕྲེང་བཅུ་བཞི་པ་ཆེན་པོ་བསྟན་འཛིན་རྒྱ་མཚོ་མཆོག་ཅེས་པའི་གློག་བརྙན་འདི་སྔ་ལོའི་ཕྱི་ཟླ་ ༡༠ ནང་བཟོ་སྐྲུན་ཁག་ལེགས་གྲུབ་བྱུང་མཚམས་སུ་ Mill Valley དང་ Sedona སོགས་རྒྱལ་སྤྱིའི་གློག་བརྙན་དུས་སྟོན་ཆེ་ཁག་ཐོག་གཟིགས་འབུལ་ཞུས་ཡོད་པ་དང་། གློག་བརྙན་དེར་མང་ཚོགས་ནས་དགའ་མོས་ཆེ་ཤོས་གནང་ས་དང་དངོས་བྱུང་གློག་བརྙན་ཡག་ཤོས། དེ་བཞིན་ཆེས་མཐོའི་ Telly གསེར་གྱི་གཟེངས་རྟགས་སོགས་ཐོབ་ཡོད་པ་རེད། ༸རྒྱལ་བ་༸སྐུ་ཕྲེང་བཅུ་བཞི་པ་ཆེན་པོ་བསྟན་འཛིན་རྒྱ་མཚོ་མཆོག་ཅེས་པའི་གློག་བརྙན་འདི་ད་ལྟའི་ཆར་དབྱིན་སྐད་ཐོག་གཟིགས་འབུལ་ཞུ་བཞིན་ཡོད་ཀྱང་། རིམ་པས་བོད་རྒྱ་གཙོས་རྒྱལ་སྤྱིའི་སྐད་ཡིག་མི་འདྲ་བ་ ༡༤ ཙམ་གྱི་ནང་ Subtitle འམ་མཆན་ཡིག་སྦྱོར་ཏེ་གཟིགས་འབུལ་ཞུ་འཆར་འདུག

སུད་སི་རྒྱལ་ས་སྦན་ནས་ཇིི་ནི་ཝར་གྲོང་འཁྱེར་བར་རྒྱལ་སྤྱིའི་མང་ཚོགས་ལ་བོད་ནང་གི་དངོས་ཡོད་གནས་ཚུལ་དང་རྒྱ་ནག་གི་གདོང་རིགས་ངོ་མ་ར་སྤྲོད་གནང་རྒྱུ་འབོད་སྒྲའི་འོག་བོད་དོན་ཞི་བའི་གོམ་བགྲོད་གནང་མཁན་བོད་མི་དང་བླངས་རྣམས་ཁ་སང་ཕྱི་ཚེས་ ༣༠ ཉིན་ཇི་ནི་ཝར་བདེ་འབྱོར་ཡོད་པ་དང་། ས་གནས་སུ་རྟེན་གཞི་བྱས་པའི་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་གི་ལྷན་ཁང་ལ་བོད་དོན་ཞུ་གཏུག་གནང་བ་དང་འབྲེལ། ཐེངས་འདིའི་བོད་དོན་ཞི་བའི་གོམ་བགྲོད་ལས་འགུལ་མཇུག་སྒྲིལ་གནང་སོང་།ཁ་སང་བོད་དོན་ལས་འགུལ་བ་རྣམས་རྒྱལ་ཚོགས་ཀྱི་འགྲོ་མིའི་ཐོབ་ཐང་གི་ལྷན་ཁང་དུ་བོད་དོན་ཞུ་སྐུལ་སླད་བཅར་སྐབས་ལམ་བར་ལ་ས་གནས་ཉེན་རྟོག་པས་ཁོང་རྣམས་བཀག་པ་མ་ཟད་ཁོང་གི་རྣམ་པས་བསྣམས་པའི་བོད་ཀྱི་རྒྱལ་དར་དང་དགོས་འདུན་འཁོད་པའི་ཤོག་བྱང་བསྡུ་དགོས་པའི་བཙན་བཀའ་བཏང་བ་དང་། ལས་འགུལ་བ་རྣམས་ཀྱི་ངོ་སྤྲོད་ལག་འཁྱེར་ཐོ་འགོད་དང་འདྲི་རྩད་བྱས་པའི་གནས་ཚུལ་བྱུང་ཡོད་པ་རེད། བོད་དོན་གོམ་བགྲོད་ལས་འགུལ་སྣེ་ཁྲིད་གནང་མཁན་བློ་བཟང་དར་རྒྱས་ལགས་ལ་མཚོན་ན་ད་རེས་ཀྱི་ལས་འགུལ་ཙམ་མ་ཟད་དེ་སྔོན་རྒྱ་ནག་གི་སྲིད་འཛིན་ཞི་ཅིང་ཕིང་སུད་སིར་འབྱོར་སྐབས་རྒྱལ་ཚོགས་ཀྱི་མདུན་དུ་ཡོད་པའི་ལོ་རྒྱུས་རང་བཞིན་ལྡན་པའི་ཞབས་སྟེགས་ཞབས་ཆག་སྟེངས་ཐེངས་གཉིས་ཙམ་འཛེགས་ནས་ངོ་རྒོལ་གནང་རྐྱེན་བར་བརྟེན་ཉེན་རྟོག་པས་འཛིན་བཟུང་གིས་བཀག་སྐྱིལ་གནང་མྱོང་མཁན་ཞིག་ཆགས་ཀྱི་འདུགཟླ་བའི་འདིའི་ཕྱི་ཚེས་ ༢༥ ཉིན་སུད་རྒྱལ་ས་སྦན་ནས་ཡིན་པའི་བོད་མི་བློ་བཟང་དར་རྒྱས་ལགས་ཀྱིས་སྣེ་ཁྲིད་གནང་སྟེ་སུད་སི་རྒྱལ་ས་སྦན་ནས་ཡིན་པ་བོད་མི་རྡོ་རྗེ་དངོས་གྲུབ་ལགས། ཛུ་རིག་གནས་སྡོད་བསྟན་རྣམ་ལགས། དེ་བཞིན་ཨ་རའོ་གནས་སྡོད་བཀྲིས་ལགས་བཅས་བོད་མི་དང་བླངས་པ་བཞིས་རྒྱལ་ས་སྦན་དུ་རྟེན་གཞི་བྱས་པའི་རྒྱལ་ཡོངས་གྲོས་ཚོགས་ཀྱི་མདུན་ངོས་ནས་དབུ་འཛུགས་གནང་ཡོད་ཅིང་། ལས་འགུལ་གྱི་དམིགས་ཡུལ་གཙོ་བོ་ནི་ཉིན་གྲངས་ལྔའི་རིང་གོམ་བགྲོད་དུས་ཡུན་རིང་བོད་དོན་གོམ་བགྲོད་པ་རྣམས་ནས་རྒྱལ་སྤྱིའི་མང་ཚོགས་ལ་བོད་ནང་གི་དངོས་ཡོད་གནས་ཚུལ་སྤྱི་དང་སྒོས་སུད་སི་དང་རྒྱལ་སྤྱིའི་རྒྱལ་གཞུང་སྒེར་ཚོགས་སྡེ་ཁག་ལ་རྒྱ་ནག་ཝུ་ཧན་ནས་ཁྱབ་གདལ་སོང་བའི་ཏོག་དབྱིབས་གཉན་རིམས་རྐྱེན་པས་གོ་ལའི་ཁྱོན་ཡོངས་སུ་འགྲོ་བ་མི་སྟོང་ཕྲག་མང་པོའི་ཚེ་ཤོར་བའི་འགན་ཡོངས་རྫོགས་རྒྱ་གཞུང་ལ་འཁུར་བཅུག་ནས་རྒྱ་ནག་གི་ཅ་དངོས་ཉོ་ཚོང་མཚམས་འཇོག་གནང་དགོས་པ་མ་ཟད། རྒྱ་ནག་གཞུང་གིས་སིམ་འཛུལ་ངང་སུད་སི་རྒྱལ་ཁབ་ཀྱི་མང་གཙོ་དང་འགྲོ་བ་མིའི་ཐོབ་ཐང་གི་ལྟ་གྲུབ་རྡོག་རོལ་གཏོང་བཞིན་པར་སུད་སི་གཞུང་ནས་དེར་ཐུགས་སྣང་གང་གཟབ་གནང་དགོས་པ་བཅས་དོན་ཚན་བཞི་ཅན་དགོས་འདུན་ཐོག་ནས་གནང་ཡོད་པ་རེད།ཁ་སང་གོམ་བགྲོད་པ་རྣམས་ཇི་ནི་ཝའི་མཉམ་འབྲེལ་རྒྱལ་ཚོགས་ཀྱི་མདུན་ཐང་དུ་འབྱོར་སྐབས་སུད་སི་སྐུ་ཚབ་དོན་གཅོད་འཆེ་མེད་རིག་འཛིན་ལགས་དང་ཇི་ནི་ཝའི་བོད་རིགས་ཚོགས་པའི་ཚོགས་གཙོ་དང་རྒྱུན་ལས། སུད་སི་ས་གནས་བེུད་ཀྱི་སྐུ་ཚབ། ཝེ་ལྡན་སི་ལྦན་ཚོགས་ཆུང་གི་སྐུ་ཚབ། སུད་སི་ས་ཁག་གཞན་ནས་འབྱོར་བའི་བོད་མི་བཅས་ཀྱིས་ལས་འགུལ་ལ་རྒྱབ་སྐྱོར་དང་ཕེབས་བསུའི་སྣེ་ལེན་གཟབ་རྒྱས་ཞུས་སོང། རླུང་འཕྲིན་ཁང་གི་བཅར་འདྲི་དང་ལེན་དང་འབྲེལ་ལས་འགུལ་བ་ཚོས་ཛ་དྲག་གི་དུས་སྐབས་འདིར་བོད་མི་ཚོས་གོ་སྐབས་དམ་འཛིན་གྱིས་ལས་འགུལ་སྤེལ་དགོས་གལ་ཡིན་པ་མ་ཟད་བོད་ཀྱི་གནད་དོན་ཐོག་བོད་མི་ཚང་མར་འགན་ཁུར་ཡོད་པ་དེ་ཤེས་དགོས་ཞེས་ཐུགས་ཚོར་ཆེན་པོས་གཞེན་སྐུལ་སོང་།དེ་བཞིན་ལས་འགུལ་བ་རྣམས་དང་ལམ་བར་དུ་མཉམ་ཞུགས་གནང་མཁན་སུད་བོད་མཛའ་འབྲེལ་ཚོགས་པའི་ཚོགས་མི་ཇག་ཨར་ནལ་ལགས་སུ་བཅར་འདྲི་ཞུས་པར་བོད་མི་ཚོས་བོད་དོན་དང་འབྲེལ་བའི་ལས་འགུལ་འདི་ལྟར་སྤེལ་བར་བསྔགས་བརྗོད་དང་དུས་ཚོད་དང་འཚམས་པ་ཞིག་རེད། རྒྱ་ནག་ནས་མཆེད་པའི་ཏོག་དབྱིབས་གཉམ་རིམས་རྐྱེན་པས་འཛམ་གླིང་སྤྱི་ཡོངས་ལ་མང་ཚོགས་ཧ་ཅང་མང་པོའི་ཚེ་སྲོག་ཤོར་བ་རེད། ད་ལྟ་འཛམ་གླིང་ཡོངས་ཀྱི་རྒྱ་ནག་ལ་དོ་སྣང་བྱེད་བཞིན་པའི་དུས་སྐབས་ཤིག་རེད། རྒྱ་ནག་གཞུང་གིས་མང་ཚོགས་ཀྱི་འགྲོ་བ་མིའི་ཐོབ་ཐང་ལ་གུས་བརྩི་མེད་པའི་ཀར་འཛམ་གླིང་སྤྱིའི་བདེ་དོན་ལ་གུས་བརྩི་བྱེད་ཀྱི་མེད་པ་ནི་ད་ཆ་འཛམ་གླིང་མི་མང་ཀུན་གྱིས་ཤེས་གསལ་རེད། དེས་ན་ང་ཚོ་རྒྱ་ནག་ལ་གདོང་ལེན་གྱི་ལས་འགུལ་འདི་ལྟ་བུ་ཤུགས་ཆེ་ཙམ་སྤེལ་དགོས་གལ་ཡིན་པ་སོགས་གསུངས་སོང་།རྩ་བའི་ད་ལན་རྒྱ་ནག་ཝུ་ཧན་ནས་ཐོག་མར་མཆེད་པའི་ཏོག་དབྱིབས་གཉན་རིམས་དང་འབྲེལ་ཟླ་བ་སྔོན་མར་སུད་སི་ནང་གནས་སྡོད་ཚེ་རིང་དབང་འདུས་ལགས་ཀྱིས་སུད་སི་གྲོང་ཁྱེར་ཝུན་ཐ་ཐུར་ནས་ཇི་ཝ་བར་བོད་དོན་གོམ་བགྲོད་ཀྱི་ལས་འགུལ་སྤེལ་གནང་རྗེས་ད་ལན་སླར་ཡང་བོད་དོན་གོམ་བགྲོད་ཀྱི་ལས་འགུལ་སྤེལ་བ་འདི་བོད་མི་སྒེར་གྱིས་གོམ་བགྲོད་ཀྱི་ལས་འགུལ་ཐེངས་གཉིས་པ་ཆགས་ཀྱི་ཡོད་པ་རེད།