རྒྱལ་སྤྱི།

ཁ་སང་གི་གཟའ་མཇུག་སྟེ། རྒྱ་ནག་གི་བཙན་དབང་གི་འོག་ཏུ་ཕྱི་ལོ་ ༡༩༥༡ ལོའི་ཟླ་བ་ལྔ་བའི་ཚེས་ ༢༣ ཉིན་ཆིངས་ཡིག་དོན་ཚན་བཅུ་བདུན་བཞག་པའི་ཉིན་ནག་གི་ཉིན་མོ་དང་བསྟུན། ཨ་རིའི་ཧྥི་ལ་ཌ་ཧྥེ་ཡའི་ (Philadelphia)རང་བཙན་ཚོགས་ཁང་ནས་རྒྱལ་ས་Washington DC བར་རང་བཙན་གོམ་བགྲོད་ལས་འགུལ་དབུ་འཛུགས་གནང་འདུག ལས་འགུལ་གྱི་དབུ་འབྱེད་མཛད་སྒོའི་ཐོག་ཏུ། རྒྱ་ནག་གི་བཙོན་འོག་ཏུ་མི་ལོ་བཅོ་ལྔ་ལྷག་བཙོན་དུ་ཚུད་པའི་རྒྱལ་གཅེས་དཔའ་བོ་དང་། བཙན་བྱོལ་བོད་གཞུང་གི་ཁྲིམས་ཞིབ་པ་ཟུར་པ། ཞེ་བོ་བློ་བཟང་དར་རྒྱས་ལགས་དང་ཆབ་སྲིད་བཙོན་ཟུར་རྟའུ་བློ་བཟང་སྦྱིན་པ་ལགས་གཉིས་ཀྱི་གཙོ་བྱས་པའི་ཧྥི་ལ་ཌ་ཧྥེ་ཡའི་བོད་རིགས་ཚོགས་པ་དང་། ནིའུ་ཡོག་ནིའུ་ཇར་སིའི་ས་གནས་གཞོན་ནུ། བོད་རྒྱལ་ཡོངས་རང་བཙན་ལྷན་ཚོགས དེ་བཞིན་ཨ་རི་བོད་དོན་རྒྱབ་སྐྱོར་ཚོགས་པ་སོགས་ཐུན་མོང་གིས་ཉམས་ཞུགས་གནང་ཡོད་པ་དང་། ལས་འགུལ་དེ་ནི་རྒྱ་ནག་གི་བཙན་འཛུལ་ལ་ངོ་རྒོལ་དང་བོད་རང་བཙན་ལ་རྒྱབ་སྐྱོར་ཡོང་ཐབས་ཆེད་སྤེལ་བ་ཞིག་ཡིན་པ་དང་། ཉིན་གྲངས་བཅུའི་རིང་གི་ལས་འགུལ་དེ་ནི་བོད་མི་བོད་མི་དྲུག་གིས་རྩ་འཛུསག་གནང་བ་གནང་བ་ཞིག་རེད་འདུག གོམ་བགྲོད་ཀྱི་ལས་འགུལ་དང་འབྲེལ་བའི་གསར་འགོད་གསལ་བསྒྲགས་ཀྱི་བསྒྲགས་ཡིག་ནང་དུ། ལས་འགུལ་དེ་ཨ་རིའི་ཧྥི་ལ་ཌ་ཧྥེ་ཡའི་རང་བཙན་ཚོགས་པའི་མདུན་ཐང་དུ་སྤེལ་དོན་ནི། ཨ་རིའི་རང་བཙན་འཐབ་རྩོད་ཀྱི་ནང་དུ་ས་གནས་དེར་དམིགས་བསལ་གྱི་དོན་སྙིང་ལྡན་ཡོད་པ་ལྟར། ཐེངས་འདིའི་རང་བཙན་གོམ་བགྲོད་ཀྱི་ལས་འགུལ་དེར་ཡང་ཨ་རིའི་རང་བཙན་འཐབ་རྩོད་ཀྱི་ས་ཁུལ་དམིགས་བསལ་བ་དེ་ནས་སྐུལ་སློང་ཐེབས་ཐབས་སུ་བདམས་ཡོད་སྐོར་དང་འབྲེལ་ནས། རང་བཙན་གོམ་བགྲོད་ཀྱི་ལས་འགུལ་དེའི་དམིགས་འབེན་གཙོ་བོ་ནི་ཨ་རིའི་ངོས་ནས་བོད་ཀྱི་རང་བཙན་འཐབ་རྩོད་ཀྱི་ལས་འགུལ་ལ་རྒྱབ་སྐྱོར་ཡོང་ཐབས་དང་། རྒྱ་ནག་གིས་བོད་ས་བཙན་བཟུང་བྱས་པར་སྐྱོན་བརྗོད་གནང་ཐབས་ཡིན་པར་བསྒྲགས་འདུག དེ་བཞིན་གོམ་བགྲོད་ཀྱི་ལས་འགུལ་དབུ་འཛུགས་ཀྱི་མཛད་སྒོའི་སྐབས་སུ། ལས་འགུལ་བ་དོན་འགྲུབ་ལྷ་དར་ལགས་ཀྱིས་གཏམ་བཤད་གནང་བའི་ནང་དུ། འདི་ལོ་རྒྱ་ནག་གིས་བོད་ས་ཞི་བའི་བཅིངས་གྲོལ་བཏང་ནས་མི་ལོ་བདུན་ཅུ་འཁོར་གྱི་ཡོད་པར་རྒྱལ་སྤྱིའི་སྤྱི་ཚོགས་ཀྱི་སྟེང་ལ་དྲིལ་བསྒྲགས་ཀྱིས་བོད་ཀྱི་ལོ་རྒྱུས་ལ་འཁྱོགས་བརྗོད་གནང་གི་ཡོད་པ་དེར་མཐའ་གཅིག་གི་ཏུ་ངོ་རྒོལ་ཡོད་པའི་རྣམ་འགྱུར་སྟོན་ཡ་དང་། ད་ལྟའི་ཆར་རྒྱ་ནག་གི་གྲོང་ཁྱེར་ཝུ་ཧན་ནས་མཆེད་པའི་ཏོག་དབྱིབས་རིམ་ནད་ཀྱིས་རྒྱལ་སྤྱིའི་སྤྱོ་ཚོགས་ཧྲིལ་བོར་དཀའ་ངལ་འཕྲད་བཞིན་ཡོད་པ་ལྟར། ཨ་རིའི་ནང་དུ་ཆ་མཚོན་ནའང་མི་མང་འབུམ་ཕྲག་གི་ཚེ་སྲོག་ཤོར་ཡོད་པ་དེའི་འགན་ཡོངས་རྫོགས་རྒྱ་ནག་ལ་ཡོད་པར་བསྒྲགས་པ་དང་ལྷན་དུ། རྒྱལ་སྤྱིའི་ཨོ་རྩལ་འགྲན་ཚོགས་དེ་ནི་ཞི་བདེ་དང་རང་དབང་མཚོན་བྱེད་ཅིག་ཡིན་པར་བརྟེན། ཕྱི་ལོ་ ༢༠༢༢ ལོའི་དགུན་དུས་ཀྱི་ཨོ་རྩལ་དེ་རྒྱ་ནག་ཏུ་འཚོགས་རྒྱུའི་འོས་བབ་མེད་པར་རྩེད་འགྲན་དེ་ཕྱིར་འཐེན་བྱེད་དགོས་བ་སོགས་ཀྱི་གཏམ་བཤད་གནང་འདུག  དེ་བཞིན་དོན་འགྲུབ་ལྷ་དར་ལགས་ཀྱིས་ཁ་སང་གི་གོམ་བགྲོད་ཀྱི་ཡུལ་དངོས་ཀྱི་ཉམས་མྱོང་ཟིན་བྲིས་སུ་བཏང་བའི་ནང་དུ། རྒྱ་ནད་ཀྱི་དཀའ་ངལ་སོགས་ལ་བརྟེན། རྒྱལ་སྤྱིའི་ཐོག་རྒྱ་ནག་ལ་དོ་སྣང་ཆེ་བའི་གནས་ཚུལ་དེ་ང་ཚོའི་གོ་སྐབས་ཡིན་པ་ལྟར། སྔོན་མ་ནང་བཞིན་མ་ཡིན་པར། དེ་རིང་གོམ་བགྲོད་ཀྱི་ཡིག་ཆ་བཀྲམས་སྐབས། ཨ་རིའི་མི་མང་གི་ཁྲོད་ནས། དོ་སྣང་སྔར་ལས་ཆེ་ཞིང་། ཡིག་ཆ་ལེན་སྐབས། ཕར་ཐུགས་རྗེ་ཆེ་ཞུ་དུས། ཚུར་ལ་ཐུགས་རྗེ་ཆེ་ལབ་པ་སོགས། ཡིག་ཆ་ཧ་ཅང་ཕོན་ཆེ་འགྲེམས་སྤེལ་ཐུབ་པ་བྱུང་སོང་བ་ནི། དེ་རིང་ལས་འགུལ་འདིའི་རེ་བའི་ཆ་ཤས་གལ་ཆེན་པོ་ཞིག་འགྲུབ་ཀྱི་ཡོད་པའི་དགའ་ཚོར་བྱུང་ཡོད་པར་འགྲེལ་བརྗོད་གནང་འདུག སྤྱིར་ཁ་སང་གི་ལས་འགུལ་དེའི་ཐོག ཁ་ན་ཊ་ནས་བོད་མི་ལས་འགུལ་བ་ sunny sonam ལགས་ཀྱང་མཉམ་བཞུགས་གནང་གི་ཡོད་ཀྱང་ཏོག་དབྱིབས་རྐྱེན་གྱིས་ཁོང་ཨ་རིར་ཕེབས་རྒྱུར་དཀའ་ངལ་འཕྲད་པ་ལྟར། ཁོང་གིས་ཁ་སང་ ཀེ་ན་ཀྲའི་ Niagra falls གྱི་ rainbow ཟམ་ཆེན་ནས་ Toronto གྲོང་ཁྱེར་བར་དུ་དེ་མཚུངས་ཀྱི་གོམ་བགྲོད་ལས་འགུལ་ཞིག་དབུ་འཛུགས་གནང་འདུག

རྒྱ་ནག་གཞུང་ནས་དེ་རིང་སླར་ཡང་རྒྱབ་ཤ་དཀར་པོའི་ཡིག་ཆ་ཞིག་འདོན་སྤེལ་བརྒྱུད་༡༩༥༡ནས་ད་བར་གྱི་བོད་བཅིངས་གྲོལ་དང་འཛུགས་སྐྲུན། དཔལ་འབྱོར་ཡར་རྒྱས་བཏང་ཡོད་ཚུལ་བཅས་བཤད་པ་མ་ཟད། ༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་ཡང་སྲིད་དེ་རྒྱ་ནག་དབུས་གཞུང་གིས་ངོས་འཛིན་བཀའ་འཁྲོལ་ཐོག་ནས་ཐག་གཅོད་བྱ་རྒྱུ་ཡིན་ཚུལ་གྱི་འཁྱོགས་བཤད་བྱས་འདུགདེ་ཡང་རིང་མིན་ཕྱི་ཟླ་ ༥ ཚེས་ ༢༣ ནི་དེ་སྔ་རྒྱ་གཞུང་གིས་བོད་མིར་བཙན་དབང་གི་འོག་ནས་གྲོས་མཐུན་དོན་ཚན་ ༡༧ ཞེས་པར་མིང་རྟགས་བཀོད་དུ་བཅུག་པའི་ཉིན་མོ་ཞིག་དང་རྒྱ་གཞུང་གིས་ཉིན་མོ་དེ་བོད་ལ་ཞི་བའི་བཅིངས་གྲོལ་བཏང་བར་འགྲེལ་བརྗོད་བྱེད་པའི་ཉིན་མོ་ཞིག་ལ་འཁེལ་གྱི་ཡོད་པ་དང་བསྟུན། དེ་རིང་རྒྱ་ནག་རྒྱལ་སྲིད་སྤྱི་ཁྱབ་ཁང་གི་དྲིལ་བསྒྲགས་ཚན་པས་རྒྱལ་ས་པེ་ཅིང་དུ་བོད་དོན་སྐོར་ལ་སླར་ཡང་རྒྱབ་ཤ་དཀར་པོའི་ཡིག་ཆ་ཞིག་འདོན་སྤེལ་བྱས་པ་དང་ཆབས་ཅིག དེའི་ནང་རྒྱ་ནག་གཞུང་གིས་བོད་མི་གཙོ་བྱས་པའི་རྒྱ་ནག་མི་མང་ཡོངས་ནས་རྒྱལ་ཁབ་ཀྱི་གཅིག་སྒྲིལ་དང་རང་དབང་སྲུང་སྐྱོབ་བྱེད་མུས་ཡིན་པ་མ་ཟད། ཁ་བྲལ་རིང་ལུགས་པ་དང་རྒྱ་ནག་ལ་ངོ་རྒོལ་བྱེད་མཁན་ནུབ་ཕྱོགས་དཔུང་ཤུགས་དག་ལ་སྔར་ལྷག་གདོང་ལེན་ནན་པོ་བྱ་རྒྱུ་ཡིན་ཞེས་བརྗོད་འདུག ཐེངས་འདིའི་ཡིག་ཆའི་ནང་རྒྱ་གཞུང་གིས་འདས་པའི་ལོ་ཡུན་ནང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་པའི་༸གང་ཉིད་ཀྱི་རྗེས་འཇུག་པ་རྣམས་ཀྱིས་བོད་དེ་ཡར་རྒྱས་གོང་འཕེལ་དང་ཆིག་སྒྲིལ་ཡོང་བར་བཟང་ཕྱོགས་ཀྱི་མཐུན་སྦྱོར་གང་ཡང་གནང་མེད་ལུགས་བཤད་ཡོད་པ་མ་ཟད། གལ་ཏེ་རྒྱ་ནག་དམར་ཤོག་ཚོགས་པས་རྒྱལ་ཁབ་སྲུང་སྐྱོབ་ཀྱི་དམིགས་ཡུལ་འོག་བོད་ཞི་བའི་བཅིངས་གྲོལ་བཏང་མེད་ཚེ། བོད་མི་རྣམས་ཀྱི་གཞི་རྩའི་མངོན་འདོད་རྣམས་སྲུང་སྐྱོབ་བྱ་ཐབས་བྲལ་ཡོད་པ་དང་དེ་བཞིན་སྤྱི་ཚོགས་དང་ཁོར་ཡུག་སྲ་བརྟན་ཞིག་མེད་ཚེ་ས་ཁུལ་དེའི་དཔལ་འབྱོར་དང་རིག་གཞུང་། སྣོད་བཅུད་གང་ཡང་ཡར་རྒྱས་འགྲོ་ཐབས་མེད་པའི་ཁར། མང་ཚོགས་ཀྱི་ཐོབ་ཐང་སྲ་བརྟན་དང་དེ་དག་ལ་བདེ་སྐྱིད་ལྡན་པའི་མི་ཚེ་སྤྲོད་རྒྱུར་འགན་ལེན་བྱེད་ཐབས་བྲལ་བ་ཡིན་ཚུལ་སོགས་ཀྱི་ལོག་བཤད་བྱས་ཡོད་པ་རེད། ལྷག་པར་དུ་རྒྱབ་ཤ་དཀར་པོ་དེའི་ནང་རྒྱ་ནག་གཞུང་གིས་༸སྐུའི་ཡང་སྲིད་ཀྱི་གནད་དོན་དེ་ནི་རྒྱ་ནག་དབུས་གཞུང་གི་བདག་དབང་འོག་ནས་ཁ་བྲལ་ཐབས་མེད་པའི་བོད་ཀྱི་ཆབ་སྲིད་དང་རྒྱལ་རབས་ལོ་རྒྱུས་སོགས་དང་འབྲེལ་བའི་གནད་དོན་གལ་ཆེ་ཞིག་ཡིན་སྐོར་བརྗོད་པ་དང་ཆབས་ཅིག ལོ་རྒྱུས་ནང་ཏཱ་ལའི་བླ་མ་སྐུ་ཕྲེང་ན་རིམ་གྱིས་དབུས་པའི་བོད་བརྒྱུད་ནང་བསྟན་གྱི་ཚད་མཐོའི་བླ་སྤྲུལ་ཡང་སྲིད་རྣམ་པ་གསེར་བུམ་དཀྲུགས་ཏེ་རྒྱ་ནག་དབུས་གཞུང་གིས་ངོས་འཛིན་བཀའ་འཁྲོལ་ཐོག་ནས་ཐག་གཅོད་བྱས་ཡོད་ཚུལ་བརྗོད་པ་མ་ཟད།རྒྱ་གཞུང་གིས་ཕྱི་ལོ་ ༢༠༢༠ བར་དུ་བོད་བརྒྱུད་ནང་བསྟན་གྱི་བླ་སྤྲུལ་ཡང་སྲིད་ཁྱོན་ ༩༢ ནང་པའི་རྒྱུན་སྲོལ་གྱི་ཆོ་གའི་སྒོ་ནས་ངོས་འཛིན་བཀའ་ཁྲོལ་སྤྲད་ཡོད་ཚུལ་ཡང་བཤད་འདུག འོན་ཀྱང་བཞུགས་སྒར་དུ་རྟེན་གཞི་བྱས་པའི་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་བསྟན་འཛིན་ལེགས་བཤད་ལགས་ཀྱིས་སྙན་ཐོ་དེར་དགག་ལན་ནན་པོ་བསྐྱོན་ཏེ། རྒྱ་གཞུང་ནས་རྒྱབ་ཤ་དཀར་པོ་བསྟུད་མར་བཏོན་ནས་བོད་ནང་ཡར་རྒྱས་འཛུགས་སྐྲུན་སོགས་ཀྱི་ལས་གཞི་མང་དག་བརྒྱུད་མང་ཚོགས་རྣམས་བདེ་སྐྱིད་ཀྱི་འཚོ་བ་རོལ་བ་བཞིན་པར་བསྐྱར་བཤད་ཡང་བཤད་བྱེད་ཀྱི་ཡོད་པ་འདི་ནི་འཁྱོགས་བཤད་དྲིལ་བསྒྲགས་ཙམ་ཞིག་ལས། རང་སྐྱོང་དང་ཡར་རྒྱས་བཤད་བཞིན་པ་དེ་དག་དོན་དངོས་བོད་མི་རྣམས་ལ་ཕན་ཐོགས་གང་ཡང་མེད་པ་མ་ཟད། དེའི་ནང་བོད་མིའི་མངོན་འདོད་གང་དུ་ཡོད་མེད་ཀྱི་དྲི་བ་ཆེན་པོ་ཞིག་ཆགས་ཀྱི་ཡོད་པར་ནན་བརྗོད་གནང་སོང་།དེ་བཞིན་ཁོང་གིས་རྒྱ་ནག་གཞུང་གིས་ད་བར་གྲངས་ཉུང་མི་རིགས་གཞན་དང་མི་འདྲ་བར་བོད་དོན་སྐོར་འཁྱོགས་བཤད་དྲིལ་བསྒྲགས་ཀྱིས་རྒྱབ་ཤ་དཀར་པོའི་སྙན་ཐོའམ་ཡིག་ཆ་ཐེངས་ ༡༥ འདོན་སྤེལ་བྱེད་དགོས་དོན་གནད་འགག་སྐོར་དང་འབྲེལ་མ་འོངས་པར་རྒྱ་ནག་གཞུང་ནས་བོད་དོན་ཐོག་གི་རྒྱབ་ཤ་དཀར་པོའི་ཡིག་ཆ་འདོན་སྤེལ་བྱས་ཚེ་དེའི་ནང་ངེས་པར་ཕྱོགས་གཅིག་ཁོ་ནའི་གནས་ཚུལ་ཙམ་མིན་པར་བོད་རྒྱ་ཆེའི་མང་ཚོགས་ཀྱི་མངོན་འདོད་སེལ་སྒྲུབ་ཐབས་་གལ་ཆེན་ཡིན་པའི་དགོངས་ཚུལ་བཏོན་སོང་། གཞི་རྩའི་རྒྱ་ནག་གཞུང་ནས་ཕྱི་ལོ་༡༩༩༢ནས་ད་བར་བོད་སྐོར་འཁོད་པའི་རྒྱབ་ཤ་དཀར་པོ་ཐེངས་༡༣འདོན་སྤེལ་དང་དེའི་ནས་གསར་ཤོས་དེ་ཕྱི་ལོ་ ༢༠༡༩ ཟླ་ ༣ ཚེས་ ༢༧ ཉིན་རྒྱ་ནག་རྒྱལ་སྲིད་སྤྱི་ཁྱབ་ཁང་གིས་བོད་ནང་གི་དམངས་གཙོ་བཅོས་བསྒྱུར་གྱིས་མི་ལོ་དྲུག་ཅུ་ཞེས་པའི་དོན་ཚན་བཅུ་ཅན་གྱི་རྒྱབ་ཤ་དཀར་པོའི་སྙན་ཐོ་དེ་ཆགས་ཀྱི་ཡོད་པ་རེད། བོད་མིའི་སྒྲིག་འཛུགས་ཕྱི་དྲིལ་འགྲོ་བ་མིའི་ཐོབ་ཐང་ཚན་པས་རྒྱ་ནག་གི་རྒྱབ་ཤ་དཀར་པོའི་འཁྱོགས་བཤད་ལ་དགག་ལན་གནང་བ་དང་འབྲེལ། དོན་ཚན་གསུམ་གྱི་ཐོག་ནས་རྒྱ་ནག་གི་འཁྱོག་བཤད་ལ་ལན་འདེབས་གནང་ཡོད་པ་རེད།

ཡུ་རོབ་ཀྱི་རྒྱལ་ཁབ་ལཱི་ཐོ་ནི་ཡཱ་ཡི་གྲོས་ཚོགས་ཀྱིས་རྒྱ་ནག་གཞུང་ངོས་ནས་བོད་ཁུལ་དུ་རང་དབང་གི་རྟོག་ཞིབ་པ་རྣམས་བཀག་རྒྱ་མེད་པའི་ཐོག་ནས་མངགས་གཏོང་དང་། བོད་མིའི་དབུ་ཁྲིད་༸གོང་ས་སྐྱབས་མགོན་རིན་པོ་ཆེ་མཆོག་དང་ལྷན་དུ་བོད་རྒྱ་གྲོས་མོལ་བྱེད་དགོས་བའི་སྐུལ་མ་གནང་འདུག་པ་མ་ཟད། རྒྱ་ནག་གིས་ཡུ་གུར་མི་མང་རྩ་མེད་གཏོང་བཞིན་ཡོད་པ་མངོན་གསལ་གནང་འདུགདེའང་ལཱི་ཐོ་ནི་ཡཱ་ཡི་གྲོས་ཚོགས་ནང་ཁ་ས་རེས་གཟའ་ཕུར་བུའི་ཉིན་གྲོས་ཚོགས་འཐུས་མི་ལྔ་ཆ་གསུམ་གྱིས་རྒྱབ་སྐྱོར་ཐོག་ནས་གྲོས་ཆོད་གྲོས་འཆར་ཞིག་གཏན་འབེབས་གནང་ཡོད་པ་དང་། གྲོས་ཆོད་དེ་བརྒྱུད་རྒྱ་གཞུང་ལ་༧གོང་ས་མཆོག་དང་ལྷན་གྲོས་མོལ་ཞུ་དགོས་པའི་ཞུ་སྐུལ་དང་ལྷན་དུ།་ཧོང་ཀོང་ནང་གི་བདེ་འཇགས་ཀྱི་ཁྲིམས་གཞི་ཟེར་བ་དེ་ཕྱིར་འཐེན་གནང་དགོས་པ་མ་ཟད། མཉམ་འབྲེལ་རྒྱལ་ཚོགས་ལ་ཞུ་སྐུལ་གྱིས་རྒྱ་ནག་གིས་ཡུ་གུར་མི་མི་མང་བཀག་སྐྱིལ་བྱས་ཡོད་པར་ཞིབ་འཇུག་གནང་དགོས་བ་དང་དེ་བཞིན་ཡུ་རོབ་སྤྱི་མཐུན་ལྷན་ཚོགས་ཀྱིས་རྒྱ་ནག་དང་ལྷན་དུ་འབྲེལ་ལམ་ལ་བསྐྱར་ཞིབ་བྱེད་དགོས་བའི་འབོད་བརྡ་གསལ་བོར་བསྒྲགས་འདུག གཞི་རྩའི་རྒྱ་ནག་གིས་ཡུ་གུར་མི་རིགས་ལ་མནར་གཅོད་དང་བཀག་སྐྱིལ་བྱེད་ཀྱི་ཡོད་པའི་གནད་དོན་དང་འབྲེལ་ནས། ཨ་རི་གཞུངདང་དབྱིན་ཡུལ། དེ་བཞིན་ཁ་ན་ཊ་སོགས་ཀྱི་གྲོས་ཚོགས་ཀྱིས་རྒྱ་གཞུང་གིས་ཤིན་ཅང་ནང་ཡུ་གུར་མི་རིགས་རྩ་མེད་ཀྱི་བྱ་སྤྱོད་སྤེལ་བཞིན་ཡོད་པར་མངོན་གསལ་བྱས་ཡོད་ཀྱང་། རྒྱ་ནག་གིས་ཡུ་གུར་མི་རིགས་རྩ་མེད་གཏོང་བཞིན་ཡོད་པའི་གླེང་གཞི་དེར་ངོས་ལེན་བྱས་མེད་པ་རེད། ཁ་ས ལཱི་ཐོ་ནི་ཡཱ་ཡི་གྲོས་ཚོགས་ནང་གྲོས་ཆོད་དེ་གཏན་འབེབས་གནང་སྐབས་གྲོས་ཚོགས་ཀྱི་དབུས་སུ་སྲིད་བློན་དང་ཕྱི་སྲིད་བློན་ཆེན་གཉིས་བཞུགས་ཡོད་ཀྱང་། ཁོང་རྣམས་གཉིས་ཀྱིས་གྲོས་ཆོད་དེར་འོས་ཤོག་གི་ལམ་ནས་ཆ་ཤས་བླངས་མེད་པ་རེད་འདུགགྲོས་ཚོགས་སུ་རྒྱ་ནག་དང་འབྲེལ་བའི་གྲོས་ཆོད་བསྣམས་མཁན། གྲོས་ཚོགས་འཐུས་མི་ལྕམ་ Dovile Sakaliene ལགས་ཀྱིས་ང་ཚོས་མང་གཙོ་ལ་རྒྱབ་སྐྱོར་བྱེད་དགོས། ང་ཚོ་བཙན་འཛུལ་གྱི་འོག་ཏུ་མི་ལོ་ལྔ་བཅུ་ལ་བསྡད་པའི་ཞེ་ནང་གི་མྱོང་བ་དེ་དག་ནམ་ཡང་བརྗེད་ཐབས་མེད་ཅེས་གཏམ་བཤད་གནང་འདུག རྩ་བའི་ ལཱི་ཐོ་ནི་ཡཱ་རྒྱལ་ཁབ་ནི་ཕྱི་ལོ་ ༡༩༤༠ ནས་ ༡༩༩༡ བར་དུ་ཨུ་རུ་སུ་སྤྱི་མཐུན་རྒྱལ་ཁབ་ཀྱི་དབང་བསྒྱུར་གྱི་འོག་ཏུ་གནས་མྱོང་མཁན་གྱི་རྒྱལ་ཁབ་ཅིག་ཡིན་སྟབས། དེང་སྐབས་ནུབ་གླིང་རྒྱལ་ཁབ་ཁག་གི་ཕྱི་འབྲེལ་གྱི་ཁྲོད་དུ་ཨུ་རུ་སུ་དང་རྒྱ་ནག་དམར་གཞུང་ལ་ལངས་ཕྱོགས་མཁྲེགས་འཛིན་བྱེད་མཁན་གྱི་ཡུ་རོབ་མཐུན་ཚོགས་ཀྱི་ཁྱབ་ཁོངས་ཀྱི་རྒྱལ་ཁབ་ཅིག་ཆགས་ཡོད་པ་དང་། འདི་ལོའི་ཟླ་བ་གསུམ་པའི་ནང་དུ་ལཱི་ཐོ་ནི་ཡཱ་ སྲིད་གཞུང་གིས་ཐེ་ཝན་དང་མཉམ་དུ་ཚོང་འབྲེལ་ངོ་ཚབ་ཀྱི་ལས་ཁུངས་ཤིག་འཛུགས་རྒྱུ་ཡིན་པར་བསྒྲགས་ཡོད་པ་དེ་ཡིས་རྒྱ་ནག་སྲིད་གཞུང་ལ་ཁོང་ཁྲོ་བསླངས་ཡོད་པ་རེད། ཨ་རི་དང་དབྱིན་ཡུལ་གཉིས་ཀྱི་གཙོ་བྱས་པའི་ཕྱི་ལོག་གི་རྒྱལ་ཁབ་མང་པོ་ཞིག་གིས་རྒྱ་ནག་གིས་འདས་བའི་ལོ་འགའི་རིང་ལ་ཡུ་གུར་མི་མང་ས་ཡ་གཅིག་ལྷག་བཀག་སྐྱིལ་གྱིས་མི་རིགས་རྩ་མེད་བྱེད་ཀྱི་ཡོད་པ་གྲོས་ཚོགས་རང་བཞིན་གྱི་བགྲོ་གླེང་རིམ་པའི་ཐོག་ཐག་བཅད་གནང་སྟེ་མངོན་གསལ་གྱིས་དེར་འབྲེལ་གྱི་བསྒྲགས་གཏམ་སྤེལ་ཡོད་ཀྱང་། རྒྱ་ནག་གིས་ད་དུང་ཡང་ཁུལ་དེར་ལས་རིགས་ཆེད་སྦྱོང་གི་ལྟེ་གནས་བཙུགས་ཡོད་པ་ལས་མི་རིགས་རྩ་མེད་ཀྱི་སྲིད་བྱུས་ལག་བསྟར་བྱེད་བཞིན་པ་ཁས་ལེན་བྱེད་ཀྱི་མེད་ནའང་།  ད་ཆ་རྒྱ་ནག་གིས་ཞིན་ཅང་གི་ཁུལ་དུ་མི་མང་བཀག་སྐྱིལ་གྱིས་ཡུ་གུར་མི་མང་གི་ཆོས་དད་རང་མོས་ཀྱི་མཚོན་པའི་སྲོལ་རྒྱུན་གྱི་བསམ་པའི་དཔལ་ཡོན་ལ་བཀག་རྒྱ་རིམ་པ་བཟོས་ནས་མི་མང་གི་བསམ་པའི་འཁྱེར་སོ་ལ་བསྒྱུར་བཅོས་གཏོང་ཐབས་ཀྱི་བཙན་བཀའ་གཏོང་བཞིན་པའི་གནད་དོན་དེ་རྒྱལ་སྤྱིའི་ཐོག་ཡོངས་སུ་ཇེ་གསལ་དུ་འགྲོ་བཞིན་ཡོད་པ་རེད།

རྒྱ་གཞུང་གིས་ཡུ་གུར་ཁ་ཆེ་མི་རིགས་ས་ཡ་བརྒལ་བ་ཆབ་སྲིད་སློབ་གསོ་ལྟེ་གནས་ཁང་ནང་བཀག་སྐྱིལ་བྱས་པར་ཡུ་རོབ་མཐུན་ཚོགས་ཀྱིས་རྒྱ་གཞུང་གིས་བྱུས་ངན་སྲིད་བྱུས་ལ་སྐྱོན་བརྗོད་བྱས་པ་དང་། ཡུ་རོབ་མཐུན་ཚོགས་ཀྱི་བྱེད་ཕྱོགས་དེར་འཁོན་ལན་ཚུལ་དུ་རྒྱ་གཞུང་གིས་ཡོ་རོབ་མཐུན་ཚོགས་ཀྱི་འཐུས་མི་ཁག་ཅིག་ལ་རྒྱ་ནག་ནང་འགྲོ་འོང་མི་ཆོག་པའི་སྲིད་དོན་གྱི་ཉེས་ཆད་བཅད་ཡོད་པ་རེད།  འོན་ཀྱང་ད་ཆ་ཡུ་རོབ་མཐུན་ཚོགས་ཀྱིས་རྒྱ་གཞུང་ངོས་ནས་མཐུན་ཚོགས་ཀྱི་འཐུས་མིར་བཀལ་བའི་ཉེས་ཆད་དེ་ཕྱིར་འཐེན་མ་བྱས་ཚེ་རྒྱ་ནག་དང་ཚོང་འབྲེལ་གྱི་གྲོས་མཐུན་གསར་པ་བཞག་པ་དེར་མཐུན་ཚོགས་ཀྱིས་མོས་མཐུན་བྱེད་རྒྱུ་མིན་པའི་གྲོས་ཆོད་བཞག་འདུགདེ་ཡང་དེ་རིང་བརྒྱུད་ལམ་ཁག་ནས་ཐོན་པའི་གནས་ཚུལ་ལ་གཞིགས་ན།  ཁ་སང་རེས་གཟའ་ཕུར་བུའི་ཉིན་ཡུ་རོབ་མཐུན་ཚོགས་ཀྱི་ཐག་གཅོད་དེར་འཐུས་མི་ ༥༩༩ ནས་རྒྱབ་སྐྱོར་དང་ ༣༠ ནས་དགག་པ་དེ་བཞིན་ ༥༨ ནས་བར་བཞུགས་གནང་མཁན་བྱུང་འདུག  སྤྱིར་ཡོ་རོབ་དང་རྒྱ་ནག་གཉིས་ཀྱི་ཚོང་འབྲེལ་གྱི་གྲོས་མཐུན་དེ་ལོ་ངོ་བདུན་ཙམ་གྱི་གྲོས་མོལ་རྗེས་སྔར་ལོའི་ལོ་མཇུག་ཏུ་གྲོས་མཐུན་བཞག་ཡོད་པ་རེད།  ད་རེས་ཡུ་རོབ་མཐུན་ཚོགས་ཀྱི་ཐག་གཅོད་དེ་བརྒྱུད་རྒྱ་ནག་གཞུང་ནས་སྲིད་དོན་གྱི་ཉེས་ཆད་བཅད་བ་དེ་ཕྱིར་འཐེན་བྱེད་དགོས་པའི་དགོས་འདུན་བཏོན་འདུག་ལ།   དེ་ལྟར་མ་བྱས་ཚེ་ཕྱོགས་གཉིས་ཀྱི་འབྲེལ་ལམ་སྤྱི་དང་ཚོང་འབྲེལ་སོགས་དུས་རྒྱུན་ལྟར་མུ་མཐུད་འགྲོ་བར་འགོག་རྐྱེན་བཟོ་སྲིད་པར་འཁོད་འདུགདེ་དོན་འཇར་མན་གྱི་ཡུ་རོབ་མཐུན་ཚོགས་ཀྱི་འཐུས་མི་ Reinhard Butikofer ལགས་ཀྱིས་རྒྱ་གཞུང་ནས་ཡུ་རོབ་མཐུན་ཚོགས་ཀྱི་ཚོགས་མིར་ཉེས་ཆད་བཅད་པ་ནི་ནོར་བ་ཞིག་དང་།  རྒྱ་གཞུང་ནས་རང་ཉིད་ཀྱི་ནོར་འཁྲུལ་ལས་སློབ་གསོ་ལེན་དགོས་པ་མ་ཟད།  ཐག་གཅོད་མ་བྱས་གོང་བསམ་བློ་ནན་པོ་གཏོང་དགོས་སྐོར་གསུངས་འདུག  ལྷག་པར་ཁོང་གིས་རྒྱ་ནག་གིས་དེ་གའི་འཐུས་མི་དང་ཆེད་ལས་བར་་སྲིད་དོན་ཉེས་ཆད་བཅད་པ་དེ་རྒྱལ་སྤྱིའི་ཁྲིམས་ལུགས་དང་མཐུན་པ་ཞིག་མིན་སྐོར་གསུངས་འདུག གནད་དོན་དེའི་ཐད་རྒྱ་གཞུང་གི་སྐུ་ཚབ་ནས། ཕྱོགས་གཉིས་ཀྱི་ཚོང་འབྲེལ་ཐད་གཉིས་ཀར་ཁེ་ཕན་བྱུང་ངེས་ཡིན་པ་ལས་ཕྱོགས་གཅིག་གི་གཞན་ལ་མཐུན་འགྱུར་རམ་ཡང་ན་ཕན་གྲོགས་བྱས་བ་ཞིག་མིན་པ་དང་།  རྒྱ་ནག་གིས་ཡུ་རོབ་མཐུན་ཚོགས་ཀྱི་འཐུས་མི་དང་ཆེད་ལས་བར་སྲིད་དོན་གྱི་ཉེས་ཆད་བཅད་པ་དེ་ལུགས་མཐུན་གྱི་ཡ་ལན་ཞིག་ཡིན་སྐོར་བཤད་འདུག གཞི་རྩའི་དེ་སྔ་ཡུ་རོབ་མཐུན་ཚོགས་ནས་ཨ་རི་དང་ཁེ་ན་ཌ་དེ་བཞིན་དབྱིན་ཡུལ་བཅས་དང་ལྷན་རྒྱ་ནག་གཞུང་གི་ཡུ་གུར་ཁ་ཆེ་མི་རིགས་ཐོག་ཏུ་སྤེལ་བའི་སྲིད་བྱུས་ལ་སྐྱོན་བརྗོད་དང་སྦྲགས།  རྒྱ་ནག་གི་དཔོན་རིགས་ཁག་ཅིག་གི་རྒྱུ་ནོར་ལོངས་སྤྱོད་དང་ཡུ་རོབ་ནང་འགྲུལ་སྐྱོད་ཀྱི་མཐོང་མཆན་བཀག་སྡོམ་གནང་བ་བཅས་སྲིད་དོན་གྱི་ཉེས་ཆད་བཅད་ཡོད་པ་དང་།  དེར་འཁོན་ལན་ཚུལ་དུ་རྒྱ་གཞུང་གིས་སྐུ་ཞབས་Reinhard Butikofer གཙོས་ཡུ་རོབ་མཐུན་ཚོགས་ཀྱི་འཐུས་མི་བཅུ་དང་སྲིད་བྱུས་ཉམས་ཞིབ་ཁང་གི་ཆེད་ལས་པ་དང་སྲིད་དོན་པ་སོགས་ལ་དེ་མཚུངས་ཀྱི་ཉེས་ཆད་བཅད་ཡོད་པ་རེད།

འཇར་མན་གྲོས་ཚོགས་ཀྱི་འགྲོ་བ་མིའི་ཐོབ་ཐང་ཚོགས་ཆུང་གིས་རྒྱ་ནག་གཞུང་གི་གདུག་རྩུབ་ཅན་གྱི་སྲིད་བྱུས་དང་འདས་པའི་ལོ་ངོ་ ༧༠ གོང་བོད་རང་དབང་རང་བཙན་གྱི་རྒྱལ་ཁབ་ལ་དྲག་པོའི་བཙན་འཛུལ་བྱས་པར་སྐྱོན་བརྗོད་དྲག་པོའི་བསྒྲགས་གཏམ་ཞིག་སྤེལ་བ་དང་འབྲེལ། རྒྱ་གཞུང་གིས་བོད་མིར་དྲག་གནོན་བྱེད་མཚམས་འཇོག་དགོས་པ་མ་ཟད། བོད་མིའི་ཁྲིམས་མཐུན་གྱི་སྐུ་ཚབ་ལྷན་དུ་གྲོས་མོལ་གནང་དགོས་པའི་ཞུ་སྐུལ་གནང་འདུགརྒྱལ་སྤྱིའི་བོད་དོན་ལས་འགུལ་ཁང་གིས་ Brussels ནས་གནས་ཚུལ་སྤེལ་བའི་ནང་། ཡོ་རོབ་གྲོས་ཚོགས་ཀྱི་འགྲོ་བ་མིའི་ཐོབ་ཐང་ཚོགས་ཆུང་གིས་ཁ་སང་སྤེལ་བའི་སྒྲགས་གཏམ་དེར་འཇར་མན་གཞུང་འཛིན་དང་་ཕྱོགས་འགལ་ཚོགས་པ། དེ་བཞིན་ལྗང་ཁུ་ཚོགས་པ་སོགས་ཀྱི་གྲོས་ཚོགས་འཐུས་མི་རྣམ་གྱིས་རྒྱབ་སྐྱོར་གནང་ཡོད་པ་དང་། དེའང་དེ་སྔ་ཕྱི་ལོ་ ༡༩༥༡ ཟླ་ ༥ ཚེས་ ༢༣ ཉིན་རྒྱ་གཞུང་གིས་བོད་མིར་བཙན་དབང་གི་འོག་ནས་གྲོས་མཐུན་དོན་ཚན་ ༡༧ ཞེས་པར་མིང་རྟགས་བཀོད་དུ་བཅུག་བའི་ཉིན་མོ་དྲན་གསོ་ཆེད་འདོན་སྤེལ་གནང་བ་ཞིག་རེད་འདུག རྒྱལ་སྤྱིའི་བོད་དོན་ལས་འགུལ་ཁང་གིས་ཡུ་རོབ་མཐུན་ཚོགས་ཀྱི་བསྒྲགས་གཏམ་དེར་དགའ་བསུ་ཞུས་པ་དང་འབྲེལ་བོད་ནང་གི་ཛ་དྲག་གནས་སྟངས་འགྲེལ་བརྗོད་ཀྱིས་བོད་རྒྱའི་དཀའ་རྙོག་སེལ་བར་༸གོང་ས་༸སྐྱབས་མགོན་ཆེན་པོ་མཆོག་གིས་བཏོན་གནང་མཛད་པའི་གཉིས་སྨན་དབུ་མའི་ལམ་གྱི་སྲིད་བྱུས་དེ་ལག་བསྟར་དགོས་པ་བསྐྱར་ནན་གནང་འདུག རྩ་བའི་འཇར་མ་མན་གྲོས་ཚོགས་འཐུས་མི་རྣམས་ཀྱིས་གྲོས་མཐུན་དོན་ཚན་ ༡༧ དང་འབྲེལ་ནས་སྤེལ་བའི་བསྒྲགས་གཏམ་དེའི་ནང་དུ། ཕྱི་ལོ་ ༡༩༥༡ ཟླ་ ༥ ཚེས་ ༢༣ ཉིན་པེ་ཅིང་དུ་བཞག་པའི་ཆིངས་ཡིག་དོན་ཚན་ ༡༧ ཟེར་བ་དེ་ནི་རྒྱ་གཞུང་གིས་བོད་ཀྱི་སྐུ་ཚབ་འཐུས་མི་ང་ཕོད་ངག་དབང་འཇིགས་མེད་ཀྱི་གཙོ་བྱས་པའི་སྐུ་འཁོར་རྣམས་ལ་འཇིགས་སྐུལ་བཙན་ཤེད་འོག་ནས་བཞག་པ་ཞིག་ཡིན་པ་དང་། རྒྱ་གཞུང་གིས་ཉིན་མོ་དེ་བོད་ལ་ཞི་བའི་བཅིངས་གྲོལ་བཏང་བའི་ཉིན་མོ་ཞིག་ལ་འགྲེལ་བརྗོད་བྱེད་ཀྱི་ཡོད་ཀྱང་། དོན་དངོས་གྲོས་མཐུན་དེའི་འབྲུ་དོན་ཡོངས་རྫོགས་རྡོག་རོལ་གྱིས་བོད་མི་རྣམས་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་ས་ཁུལ་གཞན་ནང་མཉམ་བསྲེས་ཀྱིས་མི་རིགས་རྩ་གཏོར་གཏོང་རྒྱུའི་སྲིད་བྱུས་མུ་ཐུད་སྤེལ་ཡོད་པར་གསལ་འདུག གྲོས་མཐུན་དེའི་ནང་བོད་མིའི་ཆོས་དང་རིག་གཞུང་། སྐད་ཡིག་བཅས་པ་སྲུང་སྐྱོབ་བྱ་རྒྱུ་སོགས་འཁོད་ཡོད་ཀྱང་ད་ལྟའི་ཆར་བོད་མིའི་ཐུན་མོང་མ་ཡིན་པའི་ཆོས་དང་རིག་གཞུང་། སྐད་ཡིག དེ་བཞིན་ཡུལ་སྲོལ་གོམ་གཤིས་དང་ངོ་བོ་སོགས་རྩ་བརླག་འགྲོ་རྒྱུའི་ཉེན་ཚབས་འོག་ལ་ཡོད་པ་མ་ཟད། བོད་མིའི་ཆབ་སྲིད་ལམ་ལུགས་དེ་མཐའ་གཅིག་ཏུ་རྩ་མེད་བཟོས་ཡོད་པ་གསུངས་འདུག མ་ཟད་གྲོས་མཐུན་དེས་བོད་ནང་ཞི་མཐུན་མཉམ་གནས་ཡོང་ཐབས་བྱ་རྒྱུ་ལས་དོན་དངོས་རྒྱ་ནག་གཞུང་གིས་དྲག་པོའི་སྟོབས་ཤུགས་རྒྱ་སྐྱེད་གཏོང་ཆེད་ཁོ་ན་ཡིན་པར་སྐྱོན་བརྗོད་ཤུགས་ཆེ་གནང་སྟེ་བོད་མིའི་ཞི་བའི་འཐབ་རྩོད་ལ་འཛམ་གླིང་ཁྱོན་ཡོངས་ནས་ཛ་དྲག་གི་དོ་སྣང་དང་སྔར་ལྷག་རྒྱབ་སྐྱོར་དགོས་པའི་དགོས་འདུན་བཏོན་འདུག བསྒྲགས་གཏམ་དེའི་ནང་གཞན་ཡང་བོད་མིའི་བླ་ན་མེད་པའི་དབུ་ཁྲིད་༸གོང་ས་༸སྐྱབས་མགོན་ཆེན་པོ་མཆོག་གིས་འདས་པའི་ལོ་ངོ་ ༧༠ ནང་རྒྱ་ནག་གི་དྲག་པོའི་སྲིད་བྱུས་དེར་ཞི་བདེའི་ལམ་བུ་གདམ་ཀ་མཛད་ཡོད་པ་དེ་ནི་དབུ་མའི་ལམ་ཆགས་ཀྱི་ཡོད་པ་དང་ཐབས་ལམ་དེ་ནི་མ་འོངས་པར་དཀའ་རྙོག་དེའི་རིགས་མི་ཡོང་བའི་གོ་སྐབས་བཟང་པོ་ཞིག་ཡིན་པར་འགྲེལ་བརྗོད་གནང་འདུག ད་རེས་ཀྱི་བསྒྲགས་གཏམ་དེ་བརྒྱུད་འཇར་མན་གྱི་འགྲོ་བ་མིའི་ཐོབ་ཐང་དང་འགྲོ་བ་མིའི་བདེ་རྩ་ལྷན་ཚོགས་ཀྱིས་བོད་མིའི་འཚེ་མེད་ཞི་བའི་ཐབས་ལམ་ལ་སྔར་ལྷག་རྒྱབ་སྐྱོར་གནང་རྒྱུ་དང་ལྷག་དོན་གྲོས་མཐུན་དོན་ཚན་ ༡༧ དང་དེ་བཞིན་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ནང་གསལ་ལྟར་རྒྱ་ནག་གཞུང་ནས་བོད་མིའི་འགྲོ་བ་མིའི་ཐོབ་ཐང་གཙོས་ཆོས་དང་རིག་གཞུང་། སྐད་ཡིག་བཅས་ལ་ངེས་པར་བརྩི་སྲུང་དགོས་པ་མ་ཟད། རྒྱ་ནག་ནང་གི་ཆོས་ལུགས་འདྲ་མིན་དང་གྲངས་ཉུང་མི་རིགས། ལྷག་དོན་བོད་མིའི་གཞི་རྩའི་འགྲོ་བ་མིའི་ཐོབ་མི་མང་ལ་རྩིས་མེད་རྡོག་རོལ་ཚབས་ཆེར་གཏོང་བཞིན་པའི་ངན་སྤྱོད་དག་འཕྲལ་དུ་མཚམས་འཇོག་གིས་བོད་རྒྱ་འབྲེལ་མོལ་བསྐྱར་གསོ་དགོས་པའི་དགོས་པའི་འབོད་སྐུལ་ཤུགས་དྲག་ཞུས་འདུག ལར་ནས་གོང་ཞུས་ཚོགས་པ་དེས་ད་ལྟའི་རྒྱ་ནག་གཞུང་གི་དྲག་པོའི་སྲིད་བྱུས་ལ་སྐྱོན་བརྗོད་ནན་མོ་དང་འབྲེལ་ཚོགས་པ་དེའི་ངོས་ནས་འགྲོ་བ་མིའི་ཐོབ་ཐང་གདལ་བཤིག་གི་གནད་དོན་ཐད་ལ་རྒྱུན་ཆད་མེད་པར་རྒྱ་གཞུང་ལ་ཞུ་འབོད་བྱ་རྒྱུའི་ཁས་ལེན་བརྟན་པོ་ཡོད་པའི་ཐོག་ནས་རྒྱ་ནག་ནང་དོན་དངོས་འགྲོ་བ་མིའི་ཐོབ་ཐང་གི་གནས་སྟངས་ཡར་རྒྱས་ཡོང་བར་གདུང་ཤུགས་དྲག་པོས་དགོས་འདུན་འདོན་བཞིན་ཡོད་པ་གསུངས་འདུག  

དེ་རིང་ཨ་རི་ཀེ་ལི་ཕོར་ནི་ཡའི་ Santa Barbara གཙུག་ལག་སློབ་གཉེར་ཁང་གི་ཕྱི་ལོ་ ༢༠༢༡ དང་ ༢༠༢༢ ལོའི་སྒྱུ་རྩལ་དང་རྩོམ་རིག་གི་མཁས་པའི་གསུང་བཤད་ཀྱི་ལས་འཆར་གྱི་ནང་ཚན་གྱི་རེ་བ་སྐྲུན་པ་ཞེས་པའི་ཆ་ཤས་སུ་བོད་མིའི་བླ་ན་མེད་པའི་དབུ་ཁྲིད་༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྩོམ་པ་པོ་གྲགས་ཅན་ Pico Iyer ལགས་དང་ལྷན་དྲ་ལམ་བརྒྱུད་གསུང་མོལ་མཛད་པ་དང་སྐབས་དེར་༸མགོན་པོ་གང་ཉིད་མཆོག་གིས་ནད་ཡམས་ཀྱི་ཛ་དྲག་གནས་སྟངས་ཁྲོད་སེམས་ཞི་བདེ་གནས་རྒྱུ་གལ་ཆེན་ཡིན་སྐོར་སོགས་ལམ་སྟོན་སྩལ་སོང་། དེ་ཡང་དེ་རིང་༸གོང་ས་༸སྐྱབས་མགོན་ཆེན་པོ་མཆོག་གིས་སྔ་དྲོ་རྒྱ་གར་གྱི་ཕྱག་ཚོད་ ༨།༤༥ ཡོལ་ཙམ་ལ་བཞུགས་སྒར་༸རྒྱལ་བའི་ཕོ་བྲང་ནས་དྲ་ལམ་བརྒྱུད་གསུང་མོལ་གྱི་མཛད་རིམ་དབུ་འཛུགས་མཛད་པ་དང་སྦྲགས།   མཛད་རིམ་གྱི་ཐོག་མར་ Pico Iyer ལགས་ཀྱིས་༸གང་ཉིད་མཆོག་ལ་ནང་པའི་ལྟ་ཕྱོགས་ངོས་ནས་རེ་བ་ཟེར་བ་དེ་གང་འདྲ་ཞིག་ལ་ངོས་འཛིན་གནང་གི་ཡོད་ཅེས་བཀའ་འདྲི་ཞུས་པ་དང་།  ༸གོང་ས་མཆོག་གིས་ང་ཚོ་མི་ཚེ་དེ་བཞིན་རེ་བར་གཞི་བཞག་གིས་འཚོ་ཐུབ་པ་ཞིག་དང་།  རེ་བ་དེ་ཡང་བཟང་ཕྱོགས་ནས་རེ་འདོད་བྱེད་རྒྱུ་དེ་གལ་ཆེན་ཡིན་པ་མ་ཟད།  ལྷག་པར་འཛམ་གླིང་གི་མི་ཐེར་འབུམ་བདུན་ལྷག་དེ་ཨ་མའི་བྱམས་སྐྱོང་ལས་འཚར་ལོངས་བྱུང་བ་ཞིག་ཡིན་པ་དང་།  བྱམས་དང་བརྩེ་བས་ང་ཚོར་རེ་བ་ཞིག་སྟེར་གྱི་ཡོད་སྟབས་སེམས་ལ་རེ་བ་བཅངས་ན་དཀའ་ངལ་ཆེ་འབྲིང་ཆུང་གསུམ་གང་འཕྲད་ཀྱང་དེར་གདོང་ལེན་གནང་ཐུབ་ངེས་ཡིན་སྐོར་བཅས་༸གང་ཉིད་མཆོག་གི་༸སྐུ་ཚེའི་མྱོང་ཚོར་དང་འབྲེལ་འདི་ལྟར་བཀའ་སྩལ་སོང་། ལྷག་པར་ཏོག་དབྱིབས་གཉན་རིམས་དང་འབྲེལ་ Pico Iyer ལགས་ཀྱིས་ད་ཆ་ནད་ཡམས་ཀྱི་རྐྱེན་གྱིས་མི་མང་ལ་དཀའ་ངལ་དང་མང་དག་ཅིག་འདས་གྲོངས་སུ་སོང་ཡོད་པས།    དཀའ་ཚེགས་ཀྱི་དུས་ཡུན་འདིར་ང་ཚོའི་གདོང་ལེན་ཇི་ལྟར་གནང་དགོས་ཀྱི་རེད་ཅེས་བཀའ་འདྲི་ཞུས་པར།  ༸མགོན་པོ་མཆོག་གིས་སྨན་པ་གཙོས་པའི་སྨན་ཞབས་པ་དང་།  ཚན་རིག་པ་སོགས་ཀྱི་མིའི་ཚེ་སྲོག་མྱུར་སྐྱོབ་ཐད་སྐུ་ལས་ཚད་མེད་བསྐྱོན་པར་བསྔགས་བརྗོད་མཛད་པ་དང་སྦྲགས།  སྤྱིར་ང་ཚོའི་ལུས་པོ་དེ་སྡུག་བསྔལ་གྱི་གཞི་རྟེན་ཆགས་ཀྱི་ཡོད་པ་དང་།  ནད་ཡམས་ཀྱི་ཛ་དྲག་གནས་སྟངས་ཁྲོད་སེམས་ཀྱི་ཞི་བདེ་གནས་རྒྱུ་དེ་གལ་ཆེན་ཆགས་ཀྱི་ཡོད་པ་དང་ཆབས་ཅིག   ནད་ཡམས་སྐབས་དངངས་སྐྲག་བྱས་ན་ཕན་ཐོགས་མེད་སྐོར་བཀའ་སྩལ་སོང་། གཞན་ཡང་Pico Iyer ལགས་ཀྱིས་ང་ཚོས་འཛམ་གླིང་གི་གོ་ལའི་ཚ་དྲོད་ཐོག་བསམ་བློ་གཏོང་སྐབས་མང་པོ་ཞིག་ལ་བློ་ཚབ་དང་སེམས་ཁྲལ་ཡོང་གི་ཡོད་པས།  དུས་ཡུན་དེའི་ཁྲོད་ང་ཚོའི་རེ་བ་མ་བརླག་པར་ཐབས་ཤེས་གང་འདྲ་གནང་དགོས་མིན་བཀའ་འདྲི་ཞུས་པར།  ༸གོང་ཉིད་མཆོག་གིས་ཤར་ནུབ་གང་སར་བཞུགས་པའི་འགྲོ་བ་མི་རྣམས་གོ་ལ་འདིར་མཉམ་རུབ་ཀྱིས་བཞུགས་དགོས་པ་དང་།  ངའི་རྒྱལ་ཁབ་དང་ངའི་ཚོགས་སྡེ་ཞེས་བསམ་བློ་གཏོང་རྒྱུ་ནི་དུས་ཚོད་ཡོལ་ཟིན་པ་དང་གནའ་སྔ་མོའི་དགོངས་པ་བཞེས་སྟངས་ཡིན་སྟབས།   ད་ལྟ་དངོས་ཡོད་ང་ཚོས་འགྲོ་མི་གཅིག་གྱུར་གྱི་འདུ་ཤེས་བཟུང་བའི་ཐོག་གདོང་ལེན་གནང་དགོས་སྐོར་བཀའ་སྩལ་སོང་། ད་དུང་མཛད་རིམ་དེའི་ཐོག་ Pico Iyer ལགས་ཀྱིས་མི་དཀྱུས་མ་ཞིག་གིས་སེམས་ལ་སྦྱོང་བརྡར་ཇི་ལྟར་གནང་དགོས་མིན་དང་།  ད་ལྟ་འཛམ་བུ་གླིང་དེ་ཡར་རྒྱས་ཕྱིན་ཡོད་པ་ཞིག་ལ་ངོས་འཛིན་གནང་གི་ཡོད་མིན་་སོགས་བཀའ་འདྲི་ཞུས་སོང་བ་དང་།   དེའི་ཁྲོད་རྒྱ་ནག་ནང་བོད་བརྒྱུད་ནང་བསྟན་དེ་དར་ཁྱབ་ཆེན་པོ་ཡོད་མིན་གྱི་བཀའ་འདྲི་ཞུས་སྐབས།   ༸གོང་ས་མཆོག་གིས་རྒྱ་ནག་གི་མཁས་དབང་ཁག་ཅིག་གིས་བོད་པའི་ཆོས་ལུགས་བཟང་པོ་དང་འབྲེལ་རིག་གཞུང་ལ་ཐུགས་སྣང་གནང་མཁན་ཡོད་ཀྱང་།     རྒྱ་ནག་གི་འགོ་ཁྲིད་མཁྲེགས་འཛིན་པ་ཚོས་དེར་དམ་དྲག་བྱེད་ཀྱི་ཡོད་སྐོར་དང་།    ལྷག་པར་ནང་པའི་རིག་གཞུང་ཟབ་མོ་དང་འབྲེལ་ཤེས་ཡོན་དེ་དམར་ཤོག་རིང་ལུགས་དང་བསྡུར་ན་གཏིང་ཟབ་མིན་ལ་ཁྱད་པར་ཤུགས་ཆེར་ཡོད་སྐོར་བཀའ་སྩལ་སོང་། རྩ་བའི་ད་ལན་གྱི་མཛད་རིམ་དེ་བཞིན་དགའ་ལྡན་ཕོ་བྲང་ཡིག་ཚང་གི་གཞུང་འབྲེལ་བརྒྱུད་ལམ་ཁག་ནས་བོད་དབྱིན་རྒྱ་སྐད་སོགས་སྐད་རིགས་སྣ་མང་ཐོག་གསུང་བསྒྱུར་གྱིས་ཐད་གཏོང་གནང་ཡོད་པ་རེད།  མཛད་འཆར་ལ་གཞིགས་ན།  ༸མགོན་པོ་གང་ཉིད་མཆོག་གིས་ས་ག་ཟླ་བའི་ཚེས་བཅོ་ལྔ་ཉིན་དྲ་ལམ་བརྒྱུད་རྗེ་ཙོང་ཁ་པ་ཆེན་པོས་མཛད་པའི་ལམ་གཙོ་རྣམ་གསུམ་དང་སེམས་བསྐྱེད་ཀྱི་ཆོས་འབྲེལ་བཀའ་དྲིན་སྩོལ་རྒྱུ་རེད་འདུག

ཁ་སང་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་ Nancy Pelosi མཆོག་གིས་ཉན་ཞིབ་ཀྱི་ཚོགས་འདུ་ཞིག་གི་ཐོག་འཛམ་གླིང་རྒྱལ་ཁབ་ཚང་མས་རང་ཉིད་ཀྱི་ཚད་མཐོའི་གཞུང་འབྲེལ་དཔོན་རིགས་རྣམས་རྒྱ་ནག་ནང་ཆེད་གཏོང་གིས་དམར་ཤོག་སྲིད་གཞུང་ལ་ཆེ་བསྟོད་བྱ་རྒྱུ་མཚམས་འཇོག་དགོས་ཞེས་ནན་བརྗོད་གནང་འདུག ཁ་སང་ཨ་རི་ Tom Lantos འགྲོ་བ་མིའི་ཐོབ་ཐང་ཚོགས་པ་དང་ཨ་རིའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་གཉིས་ཟུང་འབྲེལ་ཐོག་ཉན་ཞིབ་ཀྱི་ཚོགས་འདུ་ཞིག་ཚོགས་འདུག་པ་དང་ཚོགས་འདུ་དེའང་རིམ་པ་གཉིས་སུ་ཆ་བགོས་ཀྱིས་རིམ་པ་དང་པོའི་ཐོག་གྲོས་ཚོགས་འོག་མའི་ཚོགས་གཙོ་ལྕམ་ Nancy Pelosi མཆོག་གིས་དགོངས་ཚུལ་གཏམ་བཤད་དང་དྲི་བ་དྲིས་ལན་གནང་བ་མ་ཟད། གྲོས་ཚོགས་ཀྱིི་དམངས་གཙོ་དོན་གཉེར་ཅན་གྱི་འཐུས་མི་ཁག་ཅིག་དང་ལྷག་དོན་མགྲོན་འབོད་གནང་བའི་མང་གཙོ་དང་འགྲོ་བ་མིའི་ཐོབ་ཐང་གི་ཚོགས་སྡེ་དང་བེུད་ཀྱི་ཐོབ་ཐང་དོན་གཉེར་བའི་ཚོགས་སྡེ་བཅས་ཀྱི་མི་སྣ་གྲགས་ཅན་སོགས་ནས་ཉན་ཞིབ་ཀྱི་ཚོགས་འདུ་དེའི་ནང་ཞུགས་ཡོད་པ་རེད་འདུགཚོགས་འདུ་དེ་གཙོ་སྐྱོང་ནི་སྤྱི་མཐུན་ཚོགས་པའི་གྲོས་ཚོགས་འོག་མའི་འཐུས་མི་ Christ Smith ལགས་དང་མང་གཙོ་ཚོགས་པའི་གྲོས་ཚོགས་འོག་མའི་འཐུས་མི་ Jim Mcgovern ལགས་རྣམ་གཉིས་ཀྱིས་གནང་ཡོད་པ་དང་ཁོང་གཉིས་ཀས་རྒྱ་ནག་གཞུང་གིས་བོད་གཙོས་པའི་གྲངས་ཉུང་མི་རིགས་ཀྱི་ཆོས་དང་རིག་གཞུང་། འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་ཚབས་ཆེན་བཏང་ཡོད་པ་ཐེར་འདོན་གནང་འདུག སྐབས་དེར་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་ Pelosi མཆོག་གིས་རྒྱ་ནག་གིས་འགྲོ་བ་མིའི་ཐོབ་ཐང་གི་གནས་བབ་མཐའ་མ་ཡིན་པ་དང་ད་ཆ་ཨ་རིའི་གཞུང་གིས་ཀྱང་རྒྱ་ནག་གི་མི་མང་ལྡེབ་གསོད་དང་མི་རིགས་རྩ་གཏོར་གཏོང་བཞིན་པའི་ངན་སྤྱོད་སྤེལ་གྱི་ཡོད་པར་ངོས་འཛིན་ཐོབ་ཡོད་པ་མ་ཟད། རྒྱ་ནག་གིས་བོད་དང་ཤིན་ཅང་གཙོ་བོར་གྱུར་པའི་གྲངས་ཉུང་མི་རིགས་ཀྱི་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་བྱེད་བཞིན་པའི་ངན་སྤྱོད་དེ་སྤེལ་ཤུགས་ཇེ་ཆེར་འགྲོ་མུས་བཅས་ལ་བརྟེན་ནས་དགུན་དུས་ Olympic རྩེད་འགྲན་དེ་པེ་ཅིང་ལ་མགྲོན་བདག་བྱེད་རྒྱུར་ངོ་རྒོལ་བྱེད་ཕྱོགས་ཀྱི་ནང་ལ་རྒྱལ་ཁབ་སོ་སོའི་ཕྱི་འབྲེལ་དཔོན་རིགས་ཚོས་རྩེད་འགྲན་སྐབས་སུ་པེ་ཅིང་ལ་མི་བསྐྱོད་པའི་ཐོག་ནས་ངོ་རྒོལ་བྱེད་དགོས་ཀྱི་ཡོད་པའི་དགོངས་ཚུལ་བཏོན་འདུག དེ་བཞིན་ལྕམ་སྐུ་མཆོག་གིས་ང་ཚོས་ངོས་ནས་རྒྱ་ནག་ནང་འཚོགས་རྒྱུའི་ Olympic རྩེད་འགྲན་དེར་སྐྱོན་ཆ་གང་ཡང་མེད་པར་ངོས་འཛིན་གྱིས་མདུན་བསྐྱོད་གནང་ན་འགྲིག་གི་མེད་པ་དང་ལྷག་པར་དུ་རྒྱ་ནག་གཞུང་གིས་ཡུ་གུར་ཁ་ཆེའི་ཐོག་ལ་དྲང་བདེན་མིན་པའི་ཁྲིམས་གཏུགས་བྱེད་བཞིན་པར་སྐྱོན་བརྗོད་ཀྱིས་གནོན་ཤུགས་འཕར་མ་སྤྲོད་ཆེད་ཨ་རི་དང་འཛམ་གླིང་རྒྱལ་ཁབ་གཞན་ཚོས་རང་རྒྱལ་ཁབ་ཀྱི་ཚད་མཐོའི་སྐུ་ཚབ་རྣམ་པ་རྒྱ་ནག་ནང་ཆེད་གཏོང་བྱ་རྒྱུ་མཚམས་འཇོག་དགོས་པའི་འབོད་སྐུལ་ཞུས་པ་མ་ཟད། རྒྱ་གཞུང་གིས་འདས་པའི་ལོ་བཅུ་ཕྲག་གསུམ་ནང་སྤེལ་བའི་ངན་སྤྱོད་ལ་འགྱུར་བ་ཕྲན་བུ་གཏོང་རྒྱུའི་རེ་བ་མེད་པར་གསལ་བོ་ཆགས་ཡོད་ཅེས་གསུངས་འདུག ད་དུང་ལྕམ་སྐུ་མཆོག་གིས་ཨ་རིའི་ངོས་ནས་རྒྱ་གཞུང་གིས་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་ཚབས་ཆེན་བཏང་དང་གཏོང་བཞིན་པའི་ཐོག་ལ་ཐེར་འདོན་མ་གནང་བ་ཡིན་ན་ང་ཚོས་འཛམ་གླིང་གི་ས་ཕྱོགས་གང་དུའང་འགྲོ་བ་མིའི་ཐོབ་ཐང་ཐོག་གཏམ་བཤད་བྱེད་རྒྱུར་འོས་བབ་ལྷག་མེད་ཅེས་གསུངས་བ་མ་ཟད། ལྕམ་སྐུ་མཆོག་གི་དགོངས་ཚུལ་དེར་འགྲོ་བ་མིའི་ཐོབ་ཐང་ལྟ་ཞིབ་ཚོགས་པའི་རྒྱ་ནག་སྡེ་ཚན་གྱི་འགན་འཛིན་ལྕམ་ Sophie Richardson ལགས་ཀྱིས་ཁོང་ནི་ཨ་རིའི་གྲོས་ཚོགས་འོག་མའི་ཚོགས་གཙོ་ཡིན་ཞིང་རྒྱ་ནག་དང་འགྲོ་བ་མིའི་ཐོབ་ཐང་གི་གནད་དོན་ཐོག་ལོ་བཅུ་ཕྲག་མང་པོའི་རིང་ཕྱག་ལས་གནང་མྱོང་མཁན་ཞིག་ཀྱང་ཡིན་པས་ཁོང་གི་བཀའ་མོལ་འདི་གལ་ཆེན་པོ་ཆགས་ཀྱི་ཡོད་ཅེས་གསུངས་འདུགཉན་ཞིབ་ཀྱི་ཚོགས་འདུ་དེའི་ཐོག་གཞན་ཡང་སྤྱི་མཐུན་ཚོགས་པའི་གྲོས་ཚོགས་འོག་མའི་འཐུས་མི་ Christ Smith ལགས་ཀྱིས་དགུན་དུས་Olympic རྩེད་འགྲན་གྱི་འཚོགས་ཡུལ་དེ་རྒྱ་ནག་ནང་མ་ཡིན་པར་རྒྱལ་ཁབ་གཞན་ནང་གནང་དགོས་པའི་འདུན་པ་ཡོད་སྟབས་རྩེད་འགྲན་དེར་རོགས་སྐྱོར་གནང་མཁན་དང་འབྲེལ་བ་ཡོད་པའི་ Coca Cola སོགས་པའི་ཨ་རིའི་ཚོང་ལས་ཁག་གི་ངོས་ནས་གནད་དོན་དེའི་ཐོག་བདེན་དཔང་བྱེད་དགོས་པའི་ཞུ་སྐུལ་གནང་བ་མ་ཟད། བྱེད་ལས་དེའི་རྐྱེན་པས་གོང་ཞུས་ཚོང་ལས་ཁག་ལ་དངུལ་གྱི་གྱོང་གུད་བྱུང་སྲིད་ཀྱང་ཁོང་རྣམས་ཀྱི་ངོས་ནས་མི་རིགས་ལྡེབ་གསོད་བྱེད་མཁན་སྲིད་དབང་སྒེར་འཛིན་ལམ་ལུགས་ཤིག་ནས་མ་དངུལ་ལེན་རྒྱུ་དེ་ནི་གནོད་འཚེ་ཅན་གྱི་ཁེ་ཕན་ཞིག་ཡིན་པར་ཟུར་ཟ་བྱས་འདུག རྩ་བའི་ Financila Times ཡིས་ཉེ་དུས་གནད་དོན་དེའི་ཐད་དགུན་དུས་ Olympic རྩེད་འགྲན་ལ་རོགས་སྐྱོར་གནང་མཁན་དང་འབྲེལ་བ་ཡོད་པའི་ཚོང་ལས་སྡེ་ཁག་ ༢༤ ལྷག་ལ་འབྲེལ་བ་གནང་ཐབས་བྱས་ཀྱང་དེ་དག་ཁོངས་ནས་ཕལ་ཆེ་བས་དགོངས་ཚུལ་གསུང་རྒྱུར་ཁས་ལེན་གནང་མེད་པ་མ་ཟད། ཐེངས་འདིའི་ཉན་ཞིབ་ཚོགས་འདུའི་ཐོག་ཚང་མས་གནད་དོན་གཙོ་བོ་རྒྱ་ནག་གཞུང་གིས་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་ཚབས་ཆེན་བྱེད་བཞིན་པར་བརྟེན་ནས་ཕྱི་ལོ་ ༢༠༢༢ ལོའི་དགུན་དུས་ཨོ་རྩལ་འགྲན་ཚོགས་དེ་རྒྱ་ནག་ནང་འཚོགས་རྒྱུར་དགག་པ་བརྒྱབས་ཏེ་ངོ་རྒོལ་ངེས་པར་དུ་བྱེད་དགོས་པར་ནན་བརྗོད་གནང་འདུག

ཡུ་རོབ་གྲོས་ཚོགས་འཐུས་མི་ཁག་ཅིག་གིས་ཡོ་རོབ་མཐུན་ཚོགས་ཀྱི་ཕྱི་སྲིད་དང་བདེ་སྲུང་བློན་ཆེན་སྐུ་ཞབས Josep Borrell ལགས་ཀྱི་མཚན་ཐོག་ལ་ཟླ་བ་སྔོན་མའི་ནང་དུ་ཡིག་ཐོག་བརྒྱུད་ནས་རྒྱ་ནག་གཞུང་གིས་བོད་ནང་གི་བོད་མི་རྣམས་ལ་མི་སྤྱོད་ལས་འདས་བའི་མནར་གཅོད་གཏོང་བཞིན་པའི་སྐོར་ལ་དྲི་བ་ཁག་ཅིག་ཕུལ་བ་ལྟར། ཁ་སང་སྐུ་ཞབས་ Josep Borrell ལགས་ཀྱིས་དྲི་བ་ཁག་ལ་ལན་འདེབས་ཀྱིས་ཡུ་རོབ་མཐུན་ཚོགས་ཀྱི་ངོས་ནས་རྒྱལ་སྤྱིའི་ས་ཕྱོགས་གང་དུ་སྡུག་སྦྱོང་མནར་གཅོད་ཀྱི་ལས་ཅི་ཞིག་གཉེར་བཞིན་ཡོད་ནའང་དེར་མཐའ་གཅིག་ཏུ་ངོ་རྒོལ་ཡོད་སྐོར་དང་འབྲེལ། ཡུ་རོབ་མཐུན་ཚོགས་ཀྱི་ངོས་ནས་གོ་སྐབས་ནམ་བྱུང་ལ་རྒྱ་ནག་དང་མཉམ་དུ་བོད་ནང་གི་མི་སྤྱོད་ལས་འདས་བའི་གྱོད་དོན་རེ་རེ་གྲོས་མོལ་བྱེད་རྒྱུ་ཡིན་པར་གསུངས་འདུགདེ་ཡང་ཡུ་རོབ་གྲོས་ཚོགས་ཀྱི་འཐུས་མི་ཁག་ཅིག་གིས་ཕུལ་བའི་དྲི་བ་ཁག་གི་ནང་དུ། ཉེ་བའི་རིང་ལ་བོད་ཀྱི་ཆབ་སྲིད་བཙོན་པ་ཨ་མ་ལྷ་མོ་ལགས་དང་གྲྭ་བསྟན་འཛིན་ཉི་མ་ལགས། དེ་བཞིན་ཡུལ་སྐོར་སྣེ་ཤན་པ་དཀོན་མཆོག་སྦྱིན་པ་སོགས་ཀྱི་མཚོན་པའི་ཆབ་སྲིད་བཙོན་པ་མང་པོ་ཞིག་རྒྱ་ནག་གི་བཀག་སྐྱིལ་ཁང་དུ་མི་སྤྱོད་ལས་འདས་བའི་སྡུག་སྦྱོང་མནར་གཅོད་འོག་ཚེ་སྲོག་ཤོར་ཡོད་པ་ལུང་འདྲེན་གྱིས། ཡུ་རོབ་མཐུན་ཚོགས་ཀྱི་ངོས་ནས་ཡོངས་ཁྱབ་རང་བཞིན་གྱི་ཐོག་ནས་རྒྱ་ནག་གིས་བོད་ནང་དུ་མི་སྤྱོད་ལས་འདས་བའི་མནར་གཅོད་གཏོང་བཞིན་པ་དེར་སྐྱོན་བརྗོད་གནང་ཡོད་མེད་དང་། དེ་བཞིན་ཡུ་རོབ་དང་རྒྱ་ནག་གཉིས་ཀྱི་འགྲོ་བ་མིའི་ཐོབ་ཐང་གི་གྲོས་མོལ་སྐབས་སུ་ཡུ་རོབ་མཐུན་ཚོགས་ཀྱི་ངོས་ནས་བོད་གི་འགྲོ་མ་མིའི་ཐོབ་ཐང་རྡོག་རོལ་གྱི་གནས་བབ་དེ་མཚམས་འཇོག་ཡོང་ཐབས་སུ་ཐབས་ལམ་ཅི་ཞིག་སྤྱད་ཡོད་མིན་སོགས་ཀྱི་གནད་དོན་ཁག་ཅིག་འཁོད་འདུག གོང་གི་དོགས་འདྲི་དེ་དག་དང་འབྲེལ་ནས་སྐུ་ཞབས Josep Borrell ལགས་ཀྱིས་ཡུ་རོབ་སྤྱི་མཐུན་ལྷན་ཚོགས་ཀྱི་སྐུ་ཚབ་ཀྱི་ངོ་བོའི་ཐོག་ནས་བཀའ་ལན་གནང་བའི་ནང་དུ། ཡུ་རོབ་མཐུན་ཚོགས་ཀྱིས་གོ་སྐབས་ནམ་བྱུང་ལ་རྒྱལ་སྤྱིའི་ཁྲིམས་སྒྲིག་གཞིར་བཟུང་གིས་རྒྱ་ནག་གཞུང་དང་གཞུང་འབྲེལ་ཡིན་མིན་ཅི་རིགས་ཀྱིས་བོད་མི་རྣམས་ལ་མནར་གཅོད་ཀྱིས་གཞི་རྩའི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པ་དེར་དགག་ལན་གནང་གི་ཡོད་པར་འགྲེལ་བརྗོད་གནང་འདུག དེ་བཞིན་ཁོང་གིས། ཡུ་རོབ་མཐུན་ཚོགས་ཀྱི་ངོས་ནས་ཡང་ནས་བསྐྱར་དུ་རྒྱ་ནག་ལ་འབོད་སྐུལ་རིམ་པ་གནང་སྟེ། རྒྱ་ནག་གིས་རྒྱལ་སྤྱིའི་ཁྲིམས་སྒྲིག་ལ་བརྩི་འཇོག་གིས་བོད་དང་ཤིན་ཅང་གི་མཚོན་པའི་གྲངས་ཉུང་མི་རིགས་རྣམས་ཀྱི་འགྲོ་བ་མིའི་ཐོབ་ཐང་ལ་བརྩི་བཀུར་བྱེད་དགོས་བར་ནན་བརྗོད་ཀྱིས། སྔར་ནས་ཀྱང་ཡུ་རོབ་མཐུན་ཚོགས་ཀྱི་དཔོན་རིགས་དང་རྒྱ་ནག་གི་མཐོ་རིམ་དཔོན་རིགས་བར་འབྲེལ་བ་ནམ་བྱུང་ལ་བོད་དོན་གླེང་སློང་བྱས་ཡོད་པར་ལུང་འདྲེན་གནང་འདུག གཞན་ཡང་ཁོང་གིས། བོད་ཀྱི་སྐད་ཡིག་གི་ཐོབ་ཐང་རྩོད་ལེན་པ་ན་གཞོན་བཀྲ་ཤིས་དབང་ཕྱུག་ལགས་རྒྱ་ནག་གིས་ཕྱི་ལོ་ ༢༠༢༡ ལོའི་ཟླ་བ་ ༡ པོའི་ཚེས་ ༢༩ ཉིན་བཙོན་གྲོལ་བཏང་མཚམས་སུ་ཡང་། ཡུ་རོབ་མཐུན་ཚོགས་ཀྱི་ཆེས་མཐོ་དཔོན་རིགས་ཀྱི་མགྲིན་ཚབ་པས་རྒྱ་ནག་ལ་ཞུ་སྐུལ་གྱི་བསྒྲགས་གཏམ་ཞིག་སྤེལ་བའི་ནང་དུ་ཡང་། རྒྱ་ནག་གིས་བཙན་དབང་གི་འོག་ཏུ་བོད་མི་མང་པོ་ཞིག་བཀག་སྐྱིལ་གྱིས་ཁྲིམས་ཐག་བཅད་པ་དང་། དེ་བཞིན་བཙོན་ཁང་ནས་འདས་གྲོངས་སུ་གྱུར་བ། གཞན་ཡང་གར་སོང་ཆ་མེད་དུ་བསྒྱུར་བཞིན་པ་སོགས་ཀྱི་གནད་དོན་མང་པོ་ཞིག་དང་འབྲེལ་ནས། བོད་མི་རྣམས་ཀྱིས་གཞི་རྩའི་འགྲོ་བ་མིའི་ཐོབ་ཐང་ལོངས་སུ་སྤྱད་པ་ཙམ་གྱིས་འཛིན་བཟུང་བཙོན་འཇུག་བྱས་པ་རྣམས་འཕྲལ་དུ་ཆ་རྐྱེན་གང་ཡང་མེད་པའི་ཐོག་ནས་གློད་གྲོལ་གཏོང་དགོས་བའི་འབོད་སྐུལ་དང་སྦྲགས། རྒྱ་ནག་གིས་བོད་མི་རྣམས་ཀྱི་ཁྲིམས་གཏུགས་ཀྱི་བྱ་རིམ་ལ་དྲང་བདེན་སྐྱོང་དགོས་བ་དང་། བཀག་སྐྱིལ་བྱས་པ་རྣམས་ལ་མནར་གཅོད་མི་གཏོང་བར་བདག་གཅེས་གང་ལེགས་བྱ་དགོས་བའི་འབོད་སྐུལ་གནང་ཡོད་པ་ཡང་ཡོངས་གྲགས་གནང་འདུག མ་ཟད་སྐུ་ཞབས་ Borrell ལགས་ཀྱིས་ཡུ་རོབ་མཐུན་ཚོགས་ངོས་ནས་བོད་མི་རྣམས་གང་བྱུང་འཛིན་བཟུང་དང་གར་སོང་ཆ་མེད་དུ་བསྒྱུར་བ། གཞན་ཡང་མི་སྤྱོད་ནས་འདས་བའི་མནར་གཅོད་བཏང་བ་སོགས་ཀྱི་གནད་དོན་རྣམས་ཕྱི་འབྲེལ་འཐབ་བྱུས་ཀྱི་ལམ་ནས་སེལ་རྒྱུ་དོན་གནད་དུ་འཛིན་བཞིན་ཡོད་པ་ལྟར། འདི་ལྟ་བུའི་མི་སྒེར་སོ་སོའི་གྱོད་དོན་མཐའ་དག་མུ་མཐུད་དུ་རྒྱ་ནག་གི་དཔོན་རིགས་དང་མཉམ་དུ་གླེང་སློང་བྱ་ངེས་བ་དང་། དེ་བཞིན་མི་མང་རང་བཞིན་དང་ཕྱོགས་ངོས་མང་པོ་ནས་མཚམས་མི་ཆད་པར་གླེང་སློང་རིམ་པ་གནང་རྒྱུ་ཡིན་པར་གསུངས་འདུག གཞི་རྩའི་ཟླ་བ་སྔོན་མའི་ཟླ་མཇུག་ཏུ་ཡོ་རོབ་མཐུན་ཚོགས་ཀྱིས་འགྲོ་བ་མིའི་ཐོབ་ཐང་རྡོག་རོལ་གཏོང་མཁན་གྱི་རྒྱ་ནག་འགོ་ཁྲིད་ཁག་ཅིག་ཐོག་ཉེས་ཆད་བཏང་བར་རྒྱ་གཞུང་གིས་ཡོ་རོབ་མཐུན་ཚོགས་ལ་འཁོན་ལན་སློག་པའི་གནད་དོན་དང་འབྲེལ་ཟླ་བ་བཞི་བའི་ཚེས་ ༢༨ ཉིན་ཡོ་རོབ་གྲོས་ཚོགས་ནང་དུ་རྒྱ་ནག་ཐོག་དམིགས་བསལ་གྱི་བགྲོ་གླེང་ལས་རིམ་སྐོང་ཚོགས་བྱས་ཡོད་པ་དང། སྐབས་དེར་ཡོ་རོབ་མཐུན་ཚོགས་ཀྱི་ཕྱི་སྲིད་དང་བདེ་སྲུང་བློན་ཆེན་ Josep Borrell ལགས་གཙོས་གྲོས་ཚོགས་འཐུས་མི་ ༣༠ ལྷག་ནས་རྒྱ་གཞུང་གི་བྱ་སྤྱོད་དེ་ནི་ཡོ་རོབ་ཀྱི་མང་གཙོ་དང་སྨྲ་བརྗོད་རང་དབང་གི་རིན་ཐང་ལ་མཐོང་ཆུང་ཁྱད་གསོད་བྱས་པ་ཞིག་རེད་ཅེས་སྐྱོན་བརྗོད་ཤུགས་ཆེ་གནང་ཡོད་པ་རེད།

  ཉེ་ཆར་དབུས་འོས་བསྡུ་ལས་ཁང་ནས་ཕྱི་ལོ་ ༢༠༢༡ ལོའི་སྲིད་སྤྱི་གཉིས་ཀྱི་དངོས་གཞིའི་འོས་བསྡུའི་གྲུབ་འབྲས་གསལ་བསྒྲགས་བསྐྱངས་བ་དང་འབྲེལ།  ཚོགས་ཟུར་སྤེན་པ་ཚེ་རིང་ལགས་ལ་སྲིད་སྐྱོང་གི་རྒྱལ་ཁ་ཐོབ་ཡོད་པ་ལྟར། ད་ལྟའི་ཆར་ཁོང་ལ་ཕྱོགས་ཡོངས་ནས་འཚམས་འདྲི་གནང་མཁན་རིམ་པ་བྱུང་ཡོད་པའི་ཁྲོད། ཁ་ཉིན་ཐེ་ཝན་གྱི་ཕྱི་སྲིད་བློན་ཆེན་ Jaushieh Joseph Wu ལགས་ཀྱིས་འཚམས་འདྲིའི་ཕྱག་ཡིག་ཅིག་ཕུལ་འདུགཕྱག་ཡིག་དེའི་ནང་དུ་ཐེ་ཝན་གྱི་ཕྱི་སྲིད་བློན་ཆེན་མཆོག་གིས་སྤེན་པ་ཚེ་རིང་ལགས་ལ་འོས་བསྡུའི་རྒྱལ་ཁ་ཐོབ་པར་དགའ་བསུའི་འཚམས་འདྲི་ཞུས་པ་དང་འབྲེལ། ད་ལན་འོས་བསྡུའི་གྲུབ་འབྲས་དེ་བརྒྱུད་བོད་མི་རྣམས་ཀྱིས་རང་དབང་དང་མང་གཙོ་ལྡན་པའི་བོད་ཁམས་ཤིག་བསྐྲུན་རྒྱུའི་ཆོད་སེམས་གཡོ་བ་མེད་པ་ཡོད་པ་དེ་་གསལ་སྟོན་གནང་ཡོད་པར་གསུངས་འདུག ལྷག་པར་དུ་ཁོང་གིས་བོད་མིའི་རང་ཐག་རང་གཅོད་ཀྱི་ཐོབ་ཐང་གི་ཆེད་དུ་འཐབ་རྩོད་གནང་རྒྱུའི་ཆོད་སེམས་ལ་བསྔགས་བརྗོད་དང་སྦྲགས། ད་ལྟ་ང་ཚོར་དཀའ་ངལ་འཕྲད་བཞིན་པ་དེ་དག་གིས་གོ་ལ་སྤྱི་ཡོངས་ལ་དམངས་གཙོ་གལ་ཆེན་པོ་ཅི་ཙམ་ཡིན་པ་གསལ་སྟོན་གནང་གི་ཡོད་པ་དང་། ལྷག་པར་དུ་ཐེ་ཝན་གྱི་ངོས་ནས་བོད་མི་དང་ཐེ་ཝན་གཉིས་ནི་ཕན་ཚུན་བློས་འཁེལ་ཐུབ་པའི་མཛའ་གྲོགས་ཡིན་པར་ངོས་འཛིན་གནང་གི་ཡོད་སྐོར་དང་འབྲེལ། ཕྱོགས་གཉིས་ཀྱི་ངོས་ནས་རྩ་ཆེར་འཛིན་བཞིན་པའི་མང་་གཙོ་དང་རང་དབང་། དེ་བཞིན་འགྲོ་བ་མིའི་ཐོབ་ཐང་གི་རིན་ཐང་སྲུང་སྐྱོབ་ཐོག་མཉམ་ལས་གནང་རྒྱུ་ཡིན་སྐོར་གསུངས་འདུག ཁོང་གིས་ད་དུང་ཐེ་ཝན་དང་བོད་གཉིས་ཀྱི་འབྲེལ་ལམ་དེ་ནི་ཕན་ཚུན་གུས་བརྩི་དང་འདྲ་མཉམ་ཐོག་ལ་བརྟེན་པ་ཞིག་ཡིན་སྐོར་དང་འབྲེལ། སྤེན་པ་ཚེ་རིང་ལགས་ཀྱིས་སྣེ་ཁྲིད་པའི་གཞུང་འཛིན་འོག་ཐེ་ཝན་དང་བོད་མིའི་འབྲེལ་ལམ་བཟང་པོ་དེ་མུ་མཐུད་རྒྱུན་སྐྱོང་ཡོང་བའི་རེ་བ་ཆེན་པོ་ཡོད་པ་གསུངས་འདུག