རྒྱལ་སྤྱི།

དེ་རིང་ནི་དེ་སྔ་ཕྱི་ལོ་ ༡༩༩༥ ལོའི་ཟླ་ ༥ པ་ཕྱི་ཚེས་ ༡༧ ཉིན་རྒྱ་ནག་གཞུང་གིས་༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་གི་དབུས་པའི་ཡབ་ཡུམ་སྐུ་འཁོར་དང་བཅས་པ་བཙན་ཁྲིད་བྱས་ནས་གར་སོང་ཆ་མེད་དུ་གྱུར་ཏེ་མི་ལོ་ ༢༦ འཁོར་བའི་དུས་དྲན་ཡིན་པ་ལྟར། དུས་ཚིགས་འདི་དང་བསྟུན་དེ་རིང་བཀའ་སྤྱི་གཉིས་ནས་ཡོངས་ཁྱབ་བསྒྲགས་གཏམ་རེ་འདོན་སྤེལ་གནང་འདུག དེ་ཡང་དེ་རིང་བཀའ་ཤག་གི་བསྒྲགས་གཏམ་དེའི་ནང་དུ ། རྒྱ་གཞུང་གིས་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་འཛིན་བཟུང་བྱས་པའི་སྐབས་དེར་རིན་པོ་ཆེ་མཆོག་དགུང་གྲངས་དྲུག་ལས་སོན་མེད་པས། རིན་པོ་ཆེ་མཆོག་འཛམ་གླིང་ནང་གི་ཆབ་སྲིད་བཙོན་པ་ལོ་ན་ཆུང་ཤོས་ཆགས་ཀྱི་ཡོད་སྟབས། རིན་པོ་ཆེ་མཆོག་བཙན་ཁྲིད་བྱས་པ་ནི་མི་སྤྱོད་ལས་འདས་པའི་བྱ་སྤྱོད་ཡིན་པ་མ་ཟད། རྒྱ་གཞུང་གིས་བྱེད་ཕྱོགས་དེ་ནི་རྒྱལ་སྤྱིའི་འགྲོ་བ་མིའི་ཐོབ་ཐང་དང་ཁྱད་པར་བྱིས་པའི་ཐོབ་ཐང་གི་ཁྲིམས་ལུགས་ཁག་དང་འགལ་བ་ཞིག་ཆགས་ཡོད་པ་གསུངས་འདུག ལྷག་པར་རྒྱ་གཞུང་གིས་བོད་མིའི་བླ་ན་མེད་པའི་དབུ་ཁྲིད་༸སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་དང་༸ཀུན་གཟིགས་པཎ་ཆེན་རིན་པོ་ཆེ་མཆོག་རྣམ་གཉིས་ཀྱི་ཡང་སྤྲུལ་ངོས་འཛིན་གནང་ཕྱོགས་སོགས་བོད་ཀྱི་ཐུན་མིན་ཆོས་ལུགས་དང་སྲོལ་རྒྱུན་གྱི་གནང་སྒོ་གང་ཅིའི་ཐད་ཐེ་བྱུས་བྱེད་ཀྱི་ཡོད་པས་རྒྱ་གཞུང་གིས་བྱེད་ཕྱོགས་དེར་ངོ་རྒོལ་མཐའ་གཅིག་ཏུ་ཡོད་ཅེས་གསུངས་འདུག དེ་བཞིན་༸པཎ་ཆེན་རིན་པོ་ཆེ་མཆོག་བཙན་ཁྲིད་བྱས་པ་ནས་བཟུང་མཉམ་འབྲེལ་རྒྱལ་ཚོགས་དང་རྒྱལ་སྤྱིའི་ཚོགས་པ་རྣམས་ནས་རིན་པོ་ཆེ་མཆོག་གི་གནས་སྟངས་རྒྱུས་ལོན་དང་གློད་བཀྲོལ་སླད་ཞུ་གཏུག་ལན་མང་གནང་བ་དང་ལྷག་པར་རྒྱལ་ཁབ་མང་པོའི་གྲོས་ཚོགས་དང་སྲིད་གཞུང་། རྒྱབ་སྐྱོར་ཚོགས་པ་བཅས་ཀྱིས་རིན་པོ་ཆེ་མཆོག་གློད་བཀྲོལ་སླད་གྲོས་ཆོད་དང་སྙན་ཐོ་རིམ་པ་སོགས་བཏོན་གནང་བ་མ་ཟད། བོད་མིའི་སྒྲིག་འཛུགས་དང་གཞུང་འབྲེལ་མ་ཡིན་པའི་ཚོགས་སྒེར་རྣམས་ནས་ཀྱང་ལས་འགུལ་རྒྱུན་མི་ཆད་པར་སྤེལ་དང་སྤེལ་མུས་ཡིན་ནའང་། རྒྱ་གཞུང་ནས་ད་བར་རིན་པོ་ཆེ་མཆོག་གི་གནད་དོན་ཐད་དངོས་ཡོད་གནས་སྟངས་དང་མཐུན་པའི་འགན་ཁུར་གྱི་ལན་འདེབས་རྩ་བ་ནས་བྱས་མེད་པ་གསུངས་འདུག ཕྱོགས་མཚུངས་ད་རེས་ཀྱི་དུས་ཚིགས་དེ་བསྟུན་ ༸ཀུན་གཟིགས་པཎ་ཆེན་སྐུ་ཕྲེང་བཅུ་པ་ཆོས་ཀྱི་རྒྱལ་མཚན་མཆོག་གི་མཛད་པ་རྣམ་ཐར་ལའང་ཚད་མཐོའི་གུས་འདུད་དང་བཀའ་དྲིན་རྗེས་དྲན་ཞུས་གནང་འདུག་པ་མ་ཟད། རྒྱ་གཞུང་ནས་ ༸པཎ་ཆེན་སྐུ་ཕྲེང་བཅུ་གཅིག་དགེ་འདུན་ཆོས་ཀྱི་ཉི་མ་མཆོག་ དབུས་པའི་སྐུ་འཁོར་བཅས་ཆ་རྐྱེན་གང་ཡང་མེད་པའི་ཐོག་གློད་བཀྲོལ་དགོས་པའི་རེ་སྐུལ་ནན་པོ་གནང་འདུག དེ་རིང་གི་དུས་ཚིག་དང་སྟུན། དེ་རིང་རྒྱ་གར་གྱི་དགོང་དྲོའི་ཕྱག་ཚོད་༧ པའི་ཐོག་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་གོ་སྒྲིག་འོག་དྲ་ཐོག་ཐད་བསྲིང་གིས་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་རྗེས་དྲན་ལོ་རྒྱུས། སྐུ་ལ་ཤོར་བའི་བོད་ཀྱི་བྱིས་པ། ༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་གི་མཛད་རྣམ་རྗེས་དྲན་ཞེས་པའི་དཔེ་དེབ་དབུ་འབྱེད་གནང་རྒྱུ་ཡིན་འདུག་པ་དང་། ཐད་ཀར་རྒྱང་སྲིང་གི་མཛད་སྒོ་དེའི་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ དང་རྒྱ་གར་གྱི་གྲོས་ཚོགས་འཐུས་མི་སྐུ་ཞབས་ Anant Kumar Hegde ལགས་དེ་བཞིན་བཀྲིས་ལྷུན་པོའི་དགོན་པའི་མཁན་པོ་གཟིག་རྒྱབ་རིན་པོ་ཆེ་མཆོག་བཅས་ནས་གསུང་བཤད་གནང་རྒྱུ་རེད་འདུག ཡང་བོད་མི་མང་སྤྱི་འཐུས་ལྷན་ཚོགས་ཀྱི་བསྒྲགས་གཏམ་དེའི་ནང་རྒྱལ་སྤྱིའི་གཞུང་དང་གྲོས་ཚོགས། གཞུང་འབྲེལ་མ་ཡིན་པའི་ཚོགས་སྡེ་ཁག་ལ་༸པཎ་ཆེན་རིན་པོ་ཆེ་མཆོག་ཞལ་བཞུགས་ཡོད་མེད་སྐོར་ཡིད་ཆེས་འཕེར་བའི་རྩད་གཅོད་གནང་ཐབས་ཀྱི་རོགས་མགོན་སྐྱབས་འཇུག་ཡོང་བ་དང་། རིན་པོ་ཆེ་མཆོག་མི་ལོ་ ༢༦ རིང་གར་སོང་ཆ་མེད་དུ་སོང་བ་འདི་ནི་ལོ་རྒྱུས་ཐོག་བྱུང་མྱོང་མེད་པ་ལྟ་བུ་ཞིག་ཡིན་པས་འཛམ་གླིང་ལོ་རྒྱུས་ཀྱི་ཟིན་ཐོའི་ནང་འགོད་དགོས་པ་ཞིག་ཆགས་ཡོད་པས་དེ་ལུགས་མཐུན་འགྱུར་གནང་ཐབས་ཡོང་བ། དེ་བཞིན་གཞིས་བྱེས་བོད་མི་ཡོངས་ཀྱིས་རྒྱ་ནག་གཞུང་གིས་ཆེད་དུ་བསྐོ་བཞག་བྱས་པའི་རྒྱལ་མཚན་ནོར་བུར་དད་གུས་དང་བརྩི་བཀུར་བྱེད་ཀྱི་མེད་པས། རྒྱ་ནག་དམར་གཞུང་དང་འབྲེལ་ལམ་གནང་སྐབས་དེ་ལུགས་གོ་བརྡ་འཕྲོད་ངེས་གནང་སྐྱོང་དང་། ལྷག་པར་ཨ་རི་གཙོས་རྒྱལ་སྤྱིའི་ཁྱོན་ཡོངས་ཀྱི་རྒྱལ་ཁབ་མང་དག་ཅིག་གི་དབུ་ཁྲིད་རྣམ་པས། རྒྱ་གཞུང་ལ་ཀུན་གཟིགས་པཎ་ཆེན་ཆུང་སྲིད་རིན་པོ་ཆེ་སྐུ་འཚོ་བཞུགས་ཡོད་མེད་ཀྱི་གནས་ཚུལ་གསལ་སྟོན་དགོས་པའི་དགོས་འདུན་བཏོན་ཡོད་པ་མ་ཟད། འཛམ་གླིང་གི་རྒྱལ་ཁབ་མང་དག་ཅིག་གི་གྲོས་ཚོགས་ནང་ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་ཆེན་པོ་མཆོག་འཕྲད་དུ་གློད་བཀྲོལ་དགོས་པའིོ་གྲོས་ཆོད་བཞག་ཡོད་པས་དེ་འབྲེལ་རྒྱབ་སྐྱོར་གནང་མཁན་གཞུང་སྒེར་ཡོངས་ལ་བོད་མི་མང་སྤྱི་འཐུས་ལྷན་ཚོགས་ནས་ཐུགས་རྗེ་ཆེ་ཞུ་བ་དང་ཆབས་ཅིག སླད་མར་ཡང་༸པཎ་ཆེན་རིན་པོ་ཆེ་མཆོག་གློད་གྲོལ་མ་བྱུང་གི་བར་དུ་སྔར་བཞིན་རྒྱ་གཞུང་ལ་དགོས་འདུན་དང་སྐུལ་ལྕག་ངེས་གནང་ཡོང་བའི་འབོད་སྐུལ་དང་། བོད་མི་ཡོངས་ཀྱི་རེ་འདུན་ནི་རིན་པོ་ཆེ་མཆོག་རྒྱ་གཞུང་གི་བཙན་གནོན་འོག་ཐར་ཏེ་གདན་ས་བཀྲིས་ལྷུན་པོར་ཞབས་སོར་འཁོད་རྒྱུ་ཡིན་སྟབས། དེ་འབྲེལ་གྱི་སྐལ་བཟང་གི་ཉི་མ་གང་མགྱོགས་འཆར་བའི་ཆེད་རོགས་མགོན་སྐྱབས་འཇུག་ལྷོད་གཡེང་མེད་པར་གནང་རོགས་བཅས་དོན་ཚན་ལྔའི་ཐོག་ནས་ཞུ་སྐུལ་གནང་འདུག དེའི་བར་ན་དེ་རིང་༸ཀུན་གཟིགས་པཎ་ཆེན་ཆུང་སྲིད་རིན་པོ་ཆེ་མཆོག་རྒྱ་ནག་གཞུང་གིས་བཙན་ཁྲིད་ཀྱིས་གར་སོང་ཆ་མེད་དུ་གྱུར་བའི་ཉིན་མོ་དང་བསྟུན། ཉི་ཧོང་ནང་རྟེན་གཞི་བྱས་པའི་རྒྱལ་སྤྱིའི་གསར་འགོད་གླེང་སྟེགས་ཐོག་ཉི་ཧོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་དང་ཉི་ཧོང་གཙུག་ལག་སློབ་གཉེར་ཁང་གི་སློབ་དཔོན་ Hirano Satoshi ལགས། དེ་བཞིན་རྒྱལ་སྤྱིའི་ཉེས་ཡངས་ཚོགས་པའི་ཉི་ཧོང་སྡེ་ཚན་གྱི་འབྲེལ་མཐུད་པ་ Kitai Daisuke ལགས་བཅས་ལྷན་བཞུགས་ཀྱིས་ས་གནས་ཀྱི་གསར་འགོད་པའི་མདུན་སར་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ནས་འདོན་སྤེལ་གནང་བའི་ Tibet's Stolen Child ཞེས་པའི་དཔེ་དེབ་ཉི་ཧོང་གི་སྐད་ཡིག་ཐོག་སྒྱུར་བ་དེ་འདོན་སྤེལ་དང་སྦྲགས། གསུང་བཤད་ཀྱི་ལས་རིམ་ཞིག་ཚོགས་འདུག སྐབས་དེར་ཉི་ཧོང་སྐུ་ཚབ་དོན་གཅོད་མཆོག་གིས་རྒྱ་ནག་གཞུང་གིས་༸པཎ་ཆེན་ཆུང་སྲིད་རིན་པོ་ཆེ་མཆོག་འཛིན་བཟུང་བྱས་ཏེ་ད་ལྟའི་ཆར་རིན་པོ་ཆེ་མཆོག་གི་གནས་སྟངས་གང་ཡིན་གསལ་བཤད་ཙམ་ཡང་མ་བྱས་པར་དེ་མུར་བཞག་པ་དེ་ཡིས། བོད་ནང་ལ་རྒྱ་ནག་གཞུང་གི་དམ་དྲག་ཅན་གྱི་སྲིད་བྱུས་གང་འདྲ་ཞིག་ལག་བསྟར་བྱེད་ཀྱི་ཡོད་མེད་མཚོན་ཐུབ་པ་མ་ཟད། ད་ལྟའི་ཆར་རྒྱ་ནག་གཞུང་གིས་ཆོས་ཁས་ལེན་ཙམ་ཡང་བྱེད་ཀྱི་མེད་པའི་ཁར། རྒྱ་ནག་རང་ཉིད་ཀྱི་པཎ་ཆེན་ཞིག་ངོས་འཛིན་བྱས་ཏེ་ཆབ་སྲིད་དྲིལ་བསྒྲགས་སོགས་ཀྱི་ལས་དོན་ལ་བེད་སྤྱོད་གཏོང་བཞིན་པ་སོགས་འགྲེལ་བརྗོད་དང་སྦྲགས། ད་རེས་ཉི་ཧོང་གི་སྐད་ཡིག་ཐོག་འདོན་སྤེལ་ཞུས་པའི་༸པཎ་ཆེན་ཆུང་སྲིད་རིན་པོ་ཆེའི་སྐུ་ཚེ་ལོ་རྒྱུས་དང་འབྲེལ་བའི་ Tibet's Stolen Child ཞེས་པའི་དཔེ་དེབ་དེ་བརྒྱུད་དེ་ས་གནས་ཀྱི་གསར་འགོད་པ་དང་། རྒྱལ་སྤྱིའི་མང་ཚོགས་རྣམས་ནས་དངོས་ཡོད་གནས་སྟངས་ཤེས་རྟོགས་ཐུབ་རྒྱུའི་རེ་བ་ཡོད་ཅེས་གསུངས་འདུག མ་ཟད་སྐུ་ཚབ་དོན་གཅོད་མཆོག་ནས་ཐེངས་འདིའི་དུས་ཚིགས་དང་བསྟུན། རྒྱ་ནག་གཞུང་ནས་༸པཎ་ཆེན་ཆུང་སྲིད་རིན་པོ་ཆེ་མཆོག་གཙོས་པའི་ནང་མི་རྣམ་པ་དང་། རིན་པོ་ཆེ་མཆོག་གི་དགེ་བའི་བཤེས་གཉེན་བྱ་བྲལ་རིན་པོ་ཆེ་བཅས་ཀྱི་གནས་སྟངས་གང་ཡིན་ཁ་གསལ་བཟོ་དགོས་པ་དང་། དེ་བཞིན་ཁོང་རྣམ་པ་གང་མགྱོགས་གློད་བཀྲོལ་གནང་དགོས་པ། རྒྱ་ནག་གཞུང་ནས་༸གོང་ས་མཆོག་གི་༸སྐུའི་ཡང་སྲིད་ཀྱི་གནད་དོན་གཙོས་པའི་བོད་བརྒྱུད་ནང་བསྟན་གྱི་ལས་དོན་ཐོག་ཐེ་བྱུས་བྱེད་རྒྱུ་མཚམས་འཇོག་དགོས་པ། བོད་ཀྱི་ཁོར་ཡུག་གཏོར་བཤིག་བཏང་སྟེ་བོད་དེ་བཞིན་དམག་སྒར་ལྟ་བུ་བཟོ་རྒྱུའི་ལས་དོན་རྣམས་མཚམས་འཇོག་དགོས་པ། དེ་བཞིན་བོད་མིའི་སྒྲིག་འཛུགས་ཀྱི་སྐུ་ཚབ་ལྷན་དུ་གྲོས་མོལ་གནང་དགོས་པ་སོགས་ཀྱི་དགོས་འདུན་དོན་ཚན་ཁག་ཅིག་སྟོན་གནང་འདུག གཞན་ཡང་དེ་རིང་གི་དུས་ཚིགས་འདི་དང་བསྟུན་ཁ་སང་ཁེ་ན་ཊའི་ས་གནས་གཞོན་ནུ་ལྷན་ཚོགས་ཀྱི་གོ་སྒྲིག་འོག་༸པཎ་ཆེན་ཆུང་སྲིད་རིན་པོ་ཆེ་མཆོག་གློད་བཀྲོལ་དགོས་པ་སོགས་ཀྱི་དགོས་འདུན་སྟོན་པའི་ཐོག་ས་གནས་རྐང་འཁོར་སྐོར་སྐྱོད་ཀྱི་ལས་འགུལ་སྤེལ་འདུག ད་དུང་ཨོ་སི་ཀྲི་རི་ཡ་ནང་གནས་བཞུགས་བོད་མི་རྣམས་ནས་༸པཎ་ཆེན་རིན་པོ་ཆེ་མཆོག་གློད་བཀྲོལ་གྱི་ལས་འགུལ་དང་དེ་བཞིན་བོད་མིའི་ཚོགས་སྒེར་ཁག་ནས་ཀྱང་དྲ་ཐོག་བརྒྱུད་རྒྱ་ནག་གཞུང་ནས་རིན་པོ་ཆེ་མཆོག་གི་གནས་སྟངས་ཇི་ཡིན་གསལ་བཟོ་དང་རིན་པོ་ཆེ་དང་སྐུ་འཁོར་བཅས་པ་ཆ་རྐྱེན་མེད་པའི་ཐོག་གློད་བཀྲོལ་དགོས་པའི་ལས་འགུལ་སྤེལ་འདུག མ་ཟད་དེ་རིང་ཨ་རི་ནེའུ་ཡོག་ས་གནས་གཞོན་ནུའི་ངོས་ནས་ཁུལ་དེར་ཡོད་པའི་རྒྱ་ནག་གཞུང་ཚབ་ལས་ཁུངས་མདུན་དུ་ངོ་རྒོལ་སྐད་འབོད་ཀྱི་ལས་འགུལ་ཞིག་ཀྱང་གནང་གི་འདུག

རྒྱ་ནག་ནང་དུ་འཚོགས་རྒྱུའི་༢༠༢༢ལོའི་དགུན་དུས་པེ་ཅིང་ཨོ་རྩལ་འགྲན་རྩོད་ཕྱིར་འཐེན་དགོས་པའི་འབོད་སྒྲའི་འོག རྐང་འཁོར་སྟེང་བོད་ཀྱི་རྒྱལ་དར་སྒྲེང་འཛུགས་ཀྱིས་སུད་སི་རྒྱལ་ཡོངས་སུ་བོད་དོན་ཆེད་རྐང་འཁོར་སྐོར་བསྐྱོད་གནང་མཁན་ཚེ་རིང་དབང་འདུས་ལགས་ཀྱིས་ད་བར་སུད་སི་གྲོང་ཁྱེར་བཅུའི་ནང་སྐོར་བསྐྱོད་ཟིནདེ་་མུ་མཐུད་ལས་འགུལ་མདུན་སྐྱོད་གནང་བཞིན་འདུགམ་སྐུལ་དང་བླངས་ངང་བོད་དོན་རྐང་འཁོར་སྐོར་བསྐྱོད་གནང་མཁན་ཚེ་རིང་དབང་འདུས་ལགས་ཀྱིས། ཟླ་བ་འདིའི་ཕྱི་ཚེས་༨ ཉིན་སུད་སི་གྲོང་ཁྱེར་Winterthurནས་སུད་སི་རྒྱལ་ཡོངས་སུ་བོད་རྒྱལ་ཁབ་ཆེན་པོའི་རྒྱལ་དར་འཁོད་པའི་སྟོད་གོས་དང། རྐང་འཁོར་མདུན་ངོས་སུ་བོད་དང་སུད་སི་གཉིས་ཀྱི་རྒྱལ་དར་སྒྲེང་འཛུགས་དང། དེ་བཞིན་རྐང་འཁོར་རྒྱབ་ངོས་སུ་འགྲུལ་བཞུད་ཀྱི་ལམ་བར་དུ་མཁོ་བའི་ཡོ་ཆས་དང་། དེའི་སྟེང་རྒྱ་ནག་ནང་དུ་འཚོགས་རྒྱུའི་༢༠༢༢ལོའི་དགུན་དུས་པེ་ཅིང་ཨོ་རྩལ་འགྲན་རྩོད་ཕྱིར་འཐེན་དགོས་པ་དང། བོད་ནང་འགྲོ་བ་མིའི་ཐོབ་ཐང་རྡོག་རོལ་མཚམས་འཇོགས་དགོས་སོགས་ཀྱི་འབོད་སྒྲའི་འོག བོད་དོན་ཆེད་རྐང་འཁོར་སྐོར་བསྐྱོད་ཀྱིས་ལས་འགུལ་འགོ་བཙུགས་གནང་ཡོད་པ་དང་། འདས་པའི་ཉིན་གྲངས་བརྒྱད་རིང་ཁོང་གིས་སུད་སི་གྲོང་ཁྱེར་ Zurichདང། Olten སོགས་ཀྱི་མཚོན་པའི་གྲོང་ཁྱེར་བཅུའི་ནང་སྐོར་གནང་སྟེ་ཁྱོན་སྤྱི་ལོ་༥༦༧ ལྷག་སྐོར་སྐྱོད་ཟིན་འདུག སྤྱིར་སུད་སི་གནས་བཞུགས་བོད་དོན་ལས་འགུལ་བ་ཚེ་རིང་དབང་འདུས་ལགས་ཀྱིས། གོང་ས་མཆོག་བོད་དུ་གང་མགྱོགས་གདན་འདྲེན་ཞུ་དགོས་པ་དང་། རྒྱ་གཞུང་ནས་བཙན་ཁྲིད་བྱས་པའི་༸པན་ཆེན་དགེ་འདུན་ཆོས་ཀྱི་ཉི་མ་མཆོག་གང་མགྱོགས་གློད་གྲོལ་དགོས་པ། རྒྱ་གཞུང་གིས་བོད་ནང་འགྲོ་བ་མིའི་ཐོབ་ཐང་དང་ཆོས་དད་རང་དབང་རྡོག་རོལ་མཚམས་འཇོགས་དགོས་པ། ༢༠༢༢ ལོའི་དགུན་དུས་པེ་ཅིང་ཨོ་རྩལ་མགྲན་རྩོད་ཕྱིར་འཐེན་དགོས་སོགས་དགོས་འདུན་དོན་ཚན་ལྔའི་འོག་སུད་སི་རྒྱང་ཡོངས་སུ་བོད་དོན་རྐང་འཁོར་སྐོར་བསྐྱོད་གནང་བཞིན་ཡོད་པ་རེད། ཐེངས་འདིའི་ཁོང་གི་ཁེར་རྐྱང་གི་བོད་དོན་རྐང་འཁོར་སྐོར་བསྐྱོད་ལས་འགུལ་དེའི་ཁྲོད། ངོ་དེབ་ནང་ནང་དུ་འཛམ་གླིང་ས་གང་སར་གནས་སྡོད་བོད་མི་ཚོགས་སྒེར་ཁག་ནས་རྒྱབ་སྐྱོར་དང་ཡིད་རང་བསྔགས་བརྗོད་ཞུ་མཁན་ཧ་ཅང་མང་པོ་བྱུང་འདུག་ལ། དེ་བཞིན་ཁོང་སྐོར་བསྐྱོད་གནང་ཡུལ་གྱི་སུད་སི་ས་ཁུལ་གྱི་ཁག་ཡོད་པའི་བོད་རིགས་ཚོགས་སྒེར་ཁག་ནས་ཁོང་གི་ལས་འགུལ་ལ་རྒྱབ་སྐྱོར་དང་ཕེབས་སུའི་སྣེ་ལེན་ཟབ་རྒྱས་ཀྱང་ཞུས་འདུག ཕྱི་ཚེས་༡༥འི་ཕྱི་དྲོ་ཚེ་རིང་དབང་འདུས་ལགས་སུད་སི་ལྷོ་ཕྱོགས་གྲོང་སྡེ་ Luganoབདེ་འབྱོར་བྱུང་འདུག་པ་མ་ཟད། ཕྱི་ཚེས་༡༧སྟེ་༸པན་ཆེན་དགེ་འདུན་ཆོས་ཀྱི་ཉིན་མ་མཆོག་རྒྱ་གཞུང་གིས་བཙན་ཁྲིད་བྱས་སྟེ་གར་སོང་ཆད་མེད་དུ་སོང་ནས་ལོ་ངོ་༢༦འཁོར་བ་ཉིན་མ་དེར། ཁོང་ནས་ Lugano ནསརྒྱལ་སྤྱིའི་ཨོ་ལམ་སྤིག་རྩེད་འགྲན་ཚོགས་ཆུང་གི་ལས་ཁུངས་གནས་ཡུལ་སུད་སི་གྲོང་ཁྱེར་Lucsanneདང། མཐར་ཇི་ནི་ལྦར་རྟེན་གཞི་བྱས་པའི་མཉམ་འབྲེལ་རྒྱལ་ཚོགས་ལ་གོང་གསལ་བོད་དོན་དང་འབྲེལ་བའི་དགོས་འདུན་ཁག་ཞུ་གཏུགས་གནང་དེ་ལས་འགུལ་མཇུག་སྒྲིལ་གནང་རྒྱུ་ཡིན་པ་རེད་འདུག

ད་ལྟ་རྒྱ་གར་དུ་རྒྱ་ནག་གི་ཝུ་ཧན་གྲོང་ཁྱེར་ནས་མཆེད་པའི་ཏོག་དབྱིབས་གཉན་རིམས་ཀྱི་ནད་རླབས་གཉིས་པའི་འོག་དཀའ་སྡུག་ཚད་མེད་མྱོང་བཞིན་པ་དང་བསྟུན། ཉེ་ཆར་བོད་མིའི་སྒྲིག་འཛུགས་ཀྱི་འཛིན་སྐྱོང་བཀའ་ཤག་གི་ངོས་ནས་བཙན་བྱོལ་བོད་མི་ཡོངས་ནས་ཏོག་དབྱིབས་ནད་རླབས་གཉིས་པར་གདོང་ལེན་ལ་རོགས་སྐྱོང་ཆེད་ PM-cares ཞེས་རྒྱ་གར་གྱི་སྲིད་བློན་མཆོག་གི་མཚན་ཐོག་གི་ཏོག་དབྱིབས་རོགས་དངུལ་ཐེབས་རྩར་ཞལ་འདེབས་གང་ཐུབ་འབུལ་དགོས་པའི་སྐུལ་མ་གནང་བ་བཞིན། ཕྱི་རྒྱལ་ཡུལ་གྲུ་ཁག་ཏུ་བཞུགས་པའི་བཙན་བྱོལ་བོད་མི་དང་རྒྱ་བལ་འབྲུག་གསུམ། དེ་བཞིན་བོད་མིའི་སྒྲིག་འཛུགས་ཀྱི་སྲིད་ཞུ་ལས་བྱེད་རྣམས་ཀྱིས་ཉིན་གཅིག་གི་གླ་ཕོགས་བཅས་ཁྱོན་སྡོམ་སྒོར་ས་ཡ་ ༥༠ ཙམ་རོགས་དངུལ་གནང་གནང་འདུགདེ་ཡང་ཁ་སང་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས། གཞུང་འབྲེལ་བརྙན་འཕྲིན་བརྒྱུད་ལམ་ཐོག་གཏམ་བཤད་ཀྱི་བརྙན་ཐུང་ཞིག་འདོན་སྤེལ་གནང་བའི་ནང་དུ། བོད་མི་ཡོངས་ལ་ས་ག་ཟླ་བ་འགོ་བཙུགས་པར་འཚམས་འདྲི་དང་། ལྷག་པར་དུ་ཁ་སང་རྒྱལ་སྤྱིའི་སྨན་ཞབས་པའི་ཉིན་མོ་དང་བསྟུན། སྨན་ཞབས་པ་དང་འཕྲོད་བསྟེན་ལས་བྱེད་རྣམས་ལ་མཚམས་འདྲི་ཞུས་པ་དང་འབྲེལ། ཉེ་འཆར་བཀའ་ཤག་གི་འབོད་སྐུལ་ཞུས་པ་བཞིན། ཨ་རིའི་བོད་མི་མང་ཚོགས་རྣམས་ནས་ཨ་རིའི་སྐུ་ཚབ་དོན་ཁང་བརྒྱུད། རྒྱ་གར་སྲིད་བློན་གྱི་མཚན་ཐོག་གི་ཏོག་དབྱིབས་རོགས་དངུལ་ཐེབས་རྩར་ཧིན་སྒོར་ས་ཡ་ ༢༠ ཙམ་དང་སུད་སུ་བོད་མི་རྣམས་ནས་ས་ཡ་ ༡༠ ཙམ། དེ་བཞིན་ Brussels སྐུ་ཚབ་དོན་ཁང་བརྒྱུད་ཡུ་རོབ་ཁུལ་དུ་གནས་སྡོད་བོད་མི་རྣམས་ནས་ནས་འབུམ་ ༣༧ ཙམ། དེ་བཞིན་ཐེ་ཝན་སྐུ་ཚབ་དོན་ཁང་བརྒྱུད་ཧིན་སྒོར་འབུམ་ ༣༠ ཙམ། ཨོ་གླིང་དང་ New Zealand བོད་མི་རྣམས་ནས་འབུམ་ ༢༧ ཙམ་བཅས་ཁྱོན་ཕྱི་རྒྱལ་ཡུལ་གྲུ་ཁག་ཏུ་བཅའ་བཞུགས་བོད་མི་རྣམས་ནས་ས་ཡ་ ༤༠ ཙམ་དང་རྒྱ་བལ་འབྲུག་གསུམ་ནང་དུ་གནས་སྡོད་བོད་མི་རྣམས་ནས་འབུམ་ ༨༠ ཙམ་དང་བོད་མིའི་སྒྲིག་འཛུགས་ཀྱི་སྲིད་ཞུ་ལས་བྱེད་པ་རྣམས་ནས་ཉིན་གཅིག་གི་གླ་ཕོགས་དངུལ་འབོར་ཞལ་འདེབས་བཅས་ཁྱོན་ས་ཡ་ ༥༠ ཙམ་རྒྱ་གར་གཞུང་དམངས་ལ་ཞལ་འདེབས་གནང་ཡོད་པ་མངོན་གསལ་གནང་འདུག སྲིད་སྐྱོང་མཆོག་གིས་དེ་དང་ཆབས་ཅིག རྒྱ་གར་གཞུང་དམངས་གཉིས་ནས་བོད་མི་རྣམས་ཀྱི་རང་ས་ཤོར་ནས་ཉག་ཕྲག་པའི་དུས་སྐབས་སུ་ཕྱོགས་ཡོངས་ནས་གཟིགས་སྐྱོང་གང་ལེགས་གནང་བར་ཧ་ལས་པའི་དཀའ་འདྲིན་ཆེན་པོ་ཡིན་པ་ལྟར། ད་ལན་བོད་མི་རྣམས་ནས་ཐུགས་རྗེ་ལེགས་འབུལ་གྱི་རྣམ་འགྱུར་སྟོན་ཐུབ་པ་དེས་རྒྱ་གར་གཞུང་དམངས་གཉིས་ལ་ཡང་བོད་མི་རྣམས་བཀའ་དྲིན་བསམ་ཤེས་ཐུབ་མཁན་ཡིན་པ་དང་། གདུང་སེམས་མཉམ་སྐྱེད་ཀྱི་བརྡ་ལན་ཤུགས་ཆེན་པོ་ཞིག་ཆགས་རྒྱུ་ཡིན་པ་གསུངས་འདུགརྩ་བའི་ད་ལན་ཙམ་མ་ཟད། སྔར་ལོ་རྒྱ་གར་ནང་དུ་རིམས་ནད་ཀྱི་གནས་སྟངས་ཐོག་མར་བྱུང་བའི་སྐབས་སུའང་བཙན་བྱོལ་བོད་མི་ཚོགས་སྒེར་ཡོངས་ནས་རྒྱ་གར་སྲིད་བློན་གྱི་རོགས་སྐྱོར་ཐེབས་རྩར་ཧིན་སྒོར་ས་ཡ་མང་པོ་ཞལ་འདེབས་གནང་ཡོད་པ་རེད། ད་ལྟ་རྒྱ་གར་ནང་དུ་ཏོག་དབྱིབས་ནད་རླབས་གཉིས་པའི་ཁྲོད་དཀའ་ངལ་ཆེ་ཤོས་གཅིག་ནི། ནད་པ་ཛ་དྲགས་ཧ་ཅང་མང་རུ་ཕྱིན་པའི་ཁྲོད། སྲོག་རླུང་གི་མཐུན་རྐྱེན་མ་འདང་བའི་དཀའ་ངལ་ཤུགས་ཆེན་པོ་འཕྲད་བཞིན་པ་དང་སྟུན། ཁ་སང་དཔལ་རྒྱལ་བ་ཀརྨ་པ་རིན་པོ་ཆེ་མཆོག་གིས་མཚུར་ཕུ་བླ་བྲང་ཀྱི་ངོ་དེབ་དྲ་ལམ་བརྒྱུད་གནས་ཚུལ་སྤེལ་བར་གཞིགས་ན། ཉེ་ཆར་དཔལ་རྒྱལ་བ་ཀརྨ་པ་མཆོག་གི་ཀུན་སྐྱོང་དགེ་རྩ་ཚོགས་པ་ནས། རྒྱ་གར་རྒྱལ་ས་ལྡི་ལིར་རྟེན་གཞི་བྱས་པའི་ཧེམ་ཀུཎ་ཊ་དགེ་རྩ་ཚོགས་པར་སྲོག་རླུང་གི་བླུག་སྣོད ༡༠༠ ཐམ་པ་ཞལ་འདེབས་གནང་ཡོད་པ་མ་ཟད། ལྡི་ལི་ས་གནས་འགོ་འཛིན་གྱི་སྣེ་ཁྲིད་པའི་ཏོག་དབྱིབས་སྔོན་འགོག་ལས་དོན་རུ་ཁག་ལ་ PPE Kit ༡༥༠ ལྷག་ཞལ་འདེབས་གནང་ཡོད་པ་རེད་འདུག དེ་བཞིན་ཉེ་ཆར་ཕྱི་ཟླ་ ༥ པའི་ནང་དུ་ཏོག་དབྱིབས་ཀྱི་གནས་སྟངས་ཛ་དྲག་ཁྲོད། ལྡི་ལི་ནང་དུ་རྟེན་གཞི་བྱས་པའི་བོད་ཀྱི་འབྲས་ནད་ཚོགས་པ་དང་གཞོན་ནུ་ལྷན་ཚོགས་བཅས་ནས། ནད་ཡམས་ཀྱི་མནར་བའི་བོད་མི་རྣམས་ལ་སྨན་ཁང་འཚོལ་རྒྱུ་དང་སྨན་ཅོས་ཀྱི་མཐུན་རྐྱེན་སྦྱོར་རྒྱུ་སོགས་ཀྱི་ཞབས་ཞུ་སྒྲུབ་བཞིན་པའི་ཁྲོད། རྒྱ་གར་བ་དཀའ་ངལ་ཤུགས་ཆེར་འཕྲད་མཁན་ཁག་ཅིག་ལའང་སྲོག་རླུང་གི་ཕྱག་རོགས་དང་ནད་པ་མྱུར་སྐྱོབ་ཀྱི་རླང་འཁོར་གྱི་མཐུན་རྐྱེན་སོགས་ཀྱི་ཕྱག་རོགས་གང་ཐུབ་གནང་ཡོད་པ་རེད། དེ་བཞིན་བཙན་བྱོལ་བོད་མིའི་གཞུང་འབྲེལ་མ་ཡིན་པའི་ཚོགས་པ་དང་སྒེར་ཁག་ཅིག་ནས། གཉན་རིམས་ཀྱི་ཛ་དྲག་གནས་སྟངས་ཁྲོད།  འཚོ་བའི་ཡོངས་འབབ་མེད་མཁན་དང་དཀའ་འཕྲད་བཞིན་པའི་རྒྱ་གར་ཡུལ་མི་རྣམས་ལ་བཟའ་བཅའ་སོགས་ཀྱི་རོགས་སྐྱོར་གནང་བཞིན་པ་རེད། དེ་བཞིན་བལ་ཡུལ་ནང་དུའང་དགེ་འདུན་པ་བསོད་ནམས་དབང་ཆེན་ཞུ་བ་ཞིག་གིས། སྔར་ལོ་ནས་བཟུང་ད་བར་བལ་པོའི་མི་དབུལ་ཕོངས་རྣམས་ལ་བཟའ་བཅའ་དང་དངུལ། དེ་བཞིན་སྨན་བཅོས་དང་ད་ཕྲུག་ལྟ་སྐྱོང་སོགས་ཀྱི་ཞབས་ཞུ་སྒྲུབ་མུས་རེད། ཁ་སང་སྲིད་སྐྱོང་མཆོག་གིས་གསུངས་བཤད་བརྙན་པར་དེའི་ནང་ད་དུང་། ནད་ཡམས་དང་འབྲེལ་འཛིན་སྐྱོང་བཀའ་ཤག་གི་ངོས་ནས་སྔོན་ཁབ་རིན་མེད་རྒྱག་རྒྱུ་སོགས་ཀྱི་མཐུན་རྐྱེན་གང་ཐུབ་སྦྱོར་རྒྱུའི་ཆོད་སེམས་བརྟན་པོ་ཡོད་སྐོར་གསུངས་པ་དང་འབྲེལ། སྲིད་སྐྱོང་མཆོག་གི་སྣེ་ཁྲིད་པའི་བཀའ་ཤག་ལས་ཡུན་གཉིས་པ་དེ་གཙང་ལ་རན་པ་དང་བསྟུན། ད་བར་ནད་ཡམས་ལ་གདོང་ལེན་གཙོས་པའི་ལས་དོན་ཅི་རིགས་ནང་དུ་བོད་མིའི་སྒྲིག་འཛུགས་ཀྱི་དབུས་སའི་ལས་བྱེད་པ་ཚོས་སྐུ་ལས་ཧ་ཅང་ཆེན་པོ་སྐྱོན་གནང་བར་ཐུགས་རྗེ་ཆེ་ཞུས་དང་འབྲེལ།   དམའ་རིམ་ལས་བྱེད་པའི་གླ་ཕོགས་བརྒྱ་ཆ་ ༡༨ དང་ལས་བྱེད་མཐོ་རིམ་གྱི་ཕོགས་བརྒྱ་ཆ་ ༡༠ ཙམ་སྤར་ཐུབ་པ་བྱུང་ཡོད་པ་དང་། འཕྲོད་བསྟེན་ལས་བྱེད་ཁྲོད། སྨན་ཞབས་པའི་རིམ་པ་འདྲ་མིན་གསུམ་ལ་གླ་ཕོགས་བརྒྱ་ཆ་ ༡༠ དང་ ༡༥། ༢༠ དེ་བཞིན་འཕྲོད་བསྟེན་ལས་ཁུངས་ལས་བྱེད་པ་ཚོའི་གླ་ཕོགས་བརྒྱ་ཆ་ ༤༠ ཙམ་སྤར་ཐུབ་པ་བྱུང་ཡོད་སྐོར་གསུངས་སོང་། ལྷག་པར་དུ་སྨན་ཞབས་པ་ཚོར་ནད་པ་དང་ཐད་དཀར་འབྲེལ་བ་ཆགས་སྐབས་ཁོང་རྣམས་ལ་ནད་གཞི་འགོས་པའི་གནད་དོན་ཡང་བྱུང་བཞིན་ཡོད་པ་དང་། གཉན་རིམས་གྱི་ཛ་དྲག་གནས་སྟངས་འདི་མུ་མཐུད་གནས་རྒྱུ་ཡིན་སྟབས། ཁོང་རྣམས་ལ་ཐུགས་རྗེ་ལེགས་འབུལ་གྱི་ཚུལ་དུ་ཧིན་སྒོར་སྟོངས་ཕྲག་ ༥ རེ་ཐུགས་རྗེ་ལེགས་འབུལ་གྱི་ཚུལ་དུ་འབུལ་གཏན་ཁེལ་ཡོད་པ་མ་ཟད། སྨན་ཞབས་པར་མཐུན་རྐྱེན་གང་ཐུབ་མུ་མཐུད་སྦྱོར་རྒྱུ་ཡིན་པ་གསུངས་སོང་། དེ་བཞིན་ནང་སྲིད་ཀྱི་ལས་ཁུངས་ལས་བྱེད་པ་དང་ལྷག་པར་དུ་བསམ་བྷོ་ཊ་སློབ་གྲྭའི་ལས་བྱེད་དང་དགེ་རྒན་རྣམ་པའི་གླ་ཕོགས་ནང་དུ་རྒྱ་ཆ་ ༡༥ ཙམ་སྤར་ཆ་གནང་ཐུབ་པ་བྱུང་ཡོད་སྐོར་སོགས་གསུངས་པ་དང་འབྲེལ། ལས་བྱེད་པ་རྣམས་ནས་དེ་སྔ་སྐུ་ལས་སྐྱོན་པ་བཞིན་མུ་མཐུད་སྐུ་ལས་བསྐྱོན་དགོས་པའི་སྐུལ་མ་གནང་འདུག

Academy Award ཞེས་པའི་རྒྱལ་སྤྱིའི་ཁྲོད་གློག་བརྙན་དང་འབྲེལ་བའི་གཟེངས་རྟགས་ཆེ་ཤོས་བཞེས་མྱོང་མཁན་གློག་བརྙན་བཟོ་སྐྲུན་པ་གྲགས་ཅན་ Louie Psihoyos ལགས་ཀྱིས་དཀའ་སྡུག་གི་དུས་སུ་བདེ་སྐྱིད་འཚོལ་བ་ཞེས་པའི་༸གོང་ས་མཆོག་དང་ཡི་ཤུའི་ཆོས་དཔོན་ཊུ་ཊུ་གཉིས་དབར་གྱི་མཛའ་བརྩེའི་འབྲེལ་ལམ་དང་མཇལ་མོལ་སྐོར་གྱི་གློག་བརྙན་ཞིག་བཟོ་སྐྲུན་གནང་འདུག་པ་དང་། གློག་བརྙན་འདི་ནི་འདི་ལོའི་ Tribeca གློག་བརྙན་དུས་སྟོན་ཐོག་གཟིགས་འབུལ་ཞུ་རྒྱུ་རེད་འདུག དེ་ཡང་ཉེ་ཆར་ Tribeca གློག་བརྙན་བཟོ་སྐྲུན་ཁང་དང་དུས་སྟོན་གོ་སྒྲིག་པའི་དྲ་གནས་ཐོག་རིང་མིན་ཕྱི་ཟླ་ ༦ པའི་ནང་དྲ་ཐོག་བརྒྱུད་འཚོགས་འཆར་ཡོད་པའི་ལོ་འདིའི་ Tribeca གློག་བརྙན་དུས་སྟོན་ཐོག་སྐུ་ཞབས་ Louie Psihoyos ལགས་དང་། Peggy Callahan གཉིས་ཀྱི་ཟུང་འབྲེལ་ཐོག་བཟོ་བསྐྲུན་གནང་བའི་གློག་བརྙན་དེ་གཟིགས་འབུལ་གནང་རྒྱུ་ཡིན་པ་དང་། གློག་བརྙན་དེའི་ནང་དུ་དཀའ་ངལ་མང་དག་ཅིག་ལ་གདོང་ལེན་གནང་སྟེ་འཛམ་གླིང་འདིའི་ཉེ་བའི་ལོ་རྒྱུས་ཀྱི་ནང་དུ་མཛད་རྗེས་རླབས་ཆེན་འཇོག་མཁན་འཛམ་གླིང་ཞི་བདེའི་དེད་དཔོན་རྣམས་གཉིས་དབར་མཇལ་འཕྲད་བྱུང་བའི་བརྙན་པར་ཁག་ཅིག་དང་འགུལ་རིས་བརྙན་པར་གསལ་སྟོན་གནང་བ་མ་ཟད། དེ་བརྒྱུད་དབུ་ཁྲིད་གཉིས་དབར་གྱི་ཁྱད་དུ་འཕགས་པའི་མཛའ་བརྩེའི་འབྲེལ་བ་དང་ཆབས་ཅིག དབང་ཆ་གཅིག་བསྡུས་རིང་ལུགས་ཀྱི་གཞུང་ལ་གདོང་ལེན་དང་འབྲེལ་བའི་སྐུ་སྒེར་གྱི་ངལ་བ་ཁག་དང་དྲང་བདེན་གྱི་ཆེད་དུ་འཐབ་རྩོད་ཀྱི་འགན་བཞེས་པའི་ཐོག་ནས་འཛམ་གླིང་འགོ་ཁྲིད་ཀྱི་འགན་ཁུར་བཞེས་པའི་དབུ་ཁྲིད་རྣམས་ཀྱི་ལོ་རྒྱུས་བཅས་གསལ་འདོན་གནང་ཡོད་པ་རེད་འདུག Mission Joy ཞེས་པའི་གློག་བརྙན་འདིའི་ནང་དུ། དེ་སྔ་མཛའ་གྲོགས་གཉིས་བཞུགས་སྒར་རྒྱལ་བའི་ཕོ་བྲང་དུ་བདུན་ཕྲག་གཅིག་རིང་ལྷན་འཛོམས་ཀྱིས་ཕྱག་ཚོད་བཏང་བའི་བརྙན་པར་ཁག་ཅིག་གཟིགས་འབུལ་བརྒྱུད། དབུ་ཁྲིད་གཉིས་ཀྱིས་གནས་སྟངས་འདྲ་མིན་ལ་མ་ལྟོས་པར། ཐུགས་སྤྲོ་སྣང་ལྡན་པའི་སྒོ་ནས་ཕན་ཚུན་ལ་བློ་བསྐྱེད་གནང་བ་ཁག་མངོན་གསལ་གནང་ཡོད་པ་རེད་འདུག རྩ་བའི་ Tribeca གློག་བརྙན་དུས་སྟོན་དེ་བཞིན་ལོ་ལྟར་ཨ་རིའི་ནེའུ་ཡོག་གྲོང་ཁྱེར་ནང་དུ་འཚོགས་ཀྱི་ཡོད་ཀྱང་། སྔར་ལོ་གཉན་རིམས་རྐྱེན་པས་འཚོགས་མ་ཐུབ་པར། འདི་ལོའི་ཕྱི་ཟླ་ ༦ པའི་ནང་ནང་དུ་དྲ་རྒྱའི་ཐོག་ནས་འཚོགས་གཏན་ཁེལ་ཡོད་པ་རེད་འདུག Mission Joy: Finding Hapiness in Troubled Times ཞེས་པའི་གློག་བརྙན་འདི་དྲ་ཐོག་དུས་སྟོན་འདིའི་ཁྲོད་ཕྱི་ཟླ་ ༦ པའི་ཚེས་ ༡༢ ཉིན་རྒྱབ་ཕྱག་ཚོད་གཉིས་པའི་ཐོག་གཟིགས་འབུལ་གནང་རྒྱུ་རེད་འདུག

རྒྱ་ནག་གཞུང་ནས་རྒྱ་ནག་སྤྱི་དང་། ལྷག་པར་དུ་བོད་དང་ཤིན་ཅང་། ཧོང་ཀོང་དང་མེ་ཀའོ་སོགས་ཀྱི་ནང་ལ་གསལ་ཁ་མེད་པའི་ཐ་སྙད་དང་ཁྲིམས་སྒྲིག་གཏན་འབེབས་བྱས་ཏེ་ས་གནས་མང་ཚོགས་ཀྱི་གཞི་རྩའི་ཆོས་དད་རང་དབང་ལ་མུ་མཐུད་དམ་དྲག་དང་ཚོད་འཛིན་བྱས་པ་མ་ཟད། ཆོས་ཕྱོགས་ཀྱི་ལས་དོན་ནང་ཞུགས་མཁན་ཁག་ཅིག་རྒྱལ་ཁབ་ཀྱི་བདེ་འཇགས་སོགས་ལ་ཁ་གཡར་ཏེ་འཛིན་བཟུང་བཙན་ཁྲིད་དང་བཙོན་འཇུག་སོགས་ཀྱང་བྱེད་བཞིན་པ་མངོན་གསོལ་གནང་འདུག དེ་ཡང་ཁ་སང་ཕྱི་ཚེས་ ༡༢ ཉིན་ཨ་རིའི་ཕྱི་སྲིད་ལས་ཁུངས་ནས་འདས་ལོའི་ཕྱི་ཟླ་དང་པོ་ནས་ཕྱི་ཟླ་བཅུ་གཉིས་བར་རྒྱལ་སྤྱིའི་རྒྱལ་ཁབ་༢༠༠ ཙམ་གྱི་ཆོས་དད་རང་དབང་གི་གནས་བབ་ཐོག་དཔྱད་ཞིབ་གནང་སྟེ་་ཕྱི་ལོ་༢༠༢༠ ལོའི་རྒྱལ་སྤྱིའི་ཆོས་དད་རང་དབང་གི་ལོ་འཁོར་སྙན་ཐོ་བཏོན་གནང་འདུག་པ་དང་། སྙན་ཐོ་དེའི་ནང་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ནང་དུ་ས་གནས་ཀྱི་མང་ཚོགས་རྣམས་ལ་ཆོས་དད་རང་དབང་གི་ཐོབ་ཐང་ཡོད་པ་ཁ་གསལ་འཁོད་ཡོད་པ་ལྟར། རྒྱ་ནག་གི་འགོ་ཁྲིད་ཚོས་ཀྱང་ས་གནས་ཀྱི་མང་ཚོགས་རྣམས་ནས་ཆོས་དད་རང་དབང་ལོངས་སུ་སྤྱོད་བཞིན་ཡོད་སྐོར་འགྲེལ་བརྗོད་བྱེད་བཞིན་ཡོད་ཀྱང་། དོན་དངོས་ལག་བསྟར་ཐོག་རྒྱ་ནག་གཞུང་ནས་ཡུལ་དེའི་ཁྲིམས་སྒྲིག་དང་བཀའ་ཁྱབ་ཁག་གི་ནང་ལ་རྒྱུན་ལྡན་གྱི་ཆོས་ཕྱོགས་ལས་དོན་ཞེས། རྒྱུན་ལྡན་ཞེས་པའི་ཐ་སྙད་དེའི་ནང་ལ་བྱེད་སྒོ་གང་ཚུད་ཀྱི་ཡོད་མེད་དང་། དེའི་འགྲེལ་བརྗོད་གང་ཡིན་གསལ་ཁ་མེད་པར་མང་ཚོགས་ཀྱི་ཆོས་དད་རང་དབང་ལ་ཚོད་འཛིན་དམ་དྲག་བྱེད་བཞིན་པ་མ་ཟད། རྒྱལ་ཁབ་ཀྱི་བདེ་འཇགས་ཞེས་པའི་ཐ་སྙད་དེའི་འོག་རྒྱ་ནག་སྤྱི་དང་། བོད་དང་ཤིན་ཅང་སོགས་གྲངས་ཉུང་མི་རིགས་ཀྱི་ས་ཁུལ་ཁག་ཏུ་རྒྱ་ནག་གཞུང་གི་བཀའ་ཁྲོལ་དང་རྒྱབ་གཉེར་མེད་པར་ཆོས་ཕྱོགས་ཀྱི་ལས་དོན་གང་ཡང་སྤེལ་མི་ཆོག་པ་སོགས་ཀྱི་དམ་དྲག་ཤུགས་ཆེར་བྱེད་བཞིན་པ་མངོན་གསལ་གནང་འདུགལྷག་པར་དུ་སྙན་ཐོ་དེའི་ནང་གསལ་བའི་བོད་ནང་གི་ཆོས་དད་རང་དབང་གི་ཚན་པའི་ཁོངས་སུ། རྒྱ་ནག་གཞུང་ནས་བོད་ནང་ལ་བོད་ཀྱི་ནང་ཆོས་སློབ་གཉེར་དང་ དེ་འབྲེལ་འདུ་འཛོམས་ཀྱི་བྱ་བཞག དེ་བཞིན་ཆོས་ཕྱོགས་མི་སྣ་ཁག་ལ་དམིགས་བསལ་གྱི་དམ་དྲག་དང་དོགས་ཟོན་བྱས་པ།  ༧གོང་ས་མཆོག་དབུས་པའི་ཕྱི་ཕོགས་སུ་བཞུགས་པའི་ཆོས་ཕྱོགས་ཀྱི་དབུ་ཁྲིད་དང་། ཚོགས་པ་ཁག་གི་སློབ་གསོ་དང་ཤུགས་རྐྱེན་འོག་མ་ཚུད་པར། དེ་དག་ལ་གདོང་ལེན་བྱེད་དགོས་པ་སོགས་བཤད་པ་མ་ཟད། ཆོས་ཕྱོགས་ཀྱི་ལས་དོན་ཁག་ཏུ་ཞུགས་མཁན་རྣམས་ཀྱིས་རྒྱ་ནག་དམར་ཤོག་ཚོགས་པས་འགྲེལ་བརྗོད་བྱས་པའི་ཆོས་ཕྱོགས་ཀྱི་རྩ་འཛིན་ཁག་ལ་བརྩི་བཀུར་དང་། རྒྱ་ནག་དམར་ཤོག་ཚོགས་པ་དང་རྒྱ་ནག་རྒྱལ་ཁབ་གཉིས་རྒྱལ་ཞེན་གྱི་བསམ་བློ་བཅངས་དགོས་པའི་བཀའ་རྒྱ་གཏོང་བཞིན་པ་གསལ་འདུགམ་ཟད་འདས་ལོ་དེའི་ནང་རྒྱ་ནག་གཞུང་ནས་ཆོས་ཕྱོགས་དང་འབྲེལ་བའི་སྡེ་ཚན་ཁག་གི་འཛིན་སྐྱོང་ལས་དོན་དང་འབྲེལ་བའི་སྒྲིག་གཞི་ཁག་ལ་བསྐྱར་ཞིབ་བྱས་ཏེ། རྒྱ་གཞུང་གིས་དབྱེ་བའི་བོད་རང་སྐྱོང་ལྗོངས་གཙོས་པའི་བོད་ཀྱི་ས་གནས་ཁག་ཏུ་ཆོས་ཕྱོགས་ཀྱི་ལས་དོན་ནང་ཞུགས་པའི་རྐྱེན་གྱིས་ཉེས་མེད་འཛིན་བཟུང་དང་། མནར་གཅོད་བཏང་བ། དེ་བཞིན་གར་སོང་ཆ་མེད་དུ་བསྒྱུར་་བ་དང་བཀག་ཉར་བྱས་ཡོད་པ་སོགས་ཀྱི་གྲངས་འབོར་ཇེ་མང་དུ་ཕྱིན་ཡོད་པ་མ་ཟད། ས་གནས་མི་མང་ཁག་ཅིག་མནར་གཅོད་དེ་དག་ཁྲོད་ཚེ་སྲོག་ཤོར་བ་དང་། ཁག་ཅིག་གློད་བཀྲོལ་བཏང་ཡོད་ཀྱང་བཀག་ཉར་བྱེད་པའི་སྐབས་སུ་མནར་གཅོད་འདྲ་མིན་བཏང་སྟབས་སྐུ་ཚེ་མ་ཟིན་པའི་གནས་སྟངས་སོགས་བྱུང་ཡོད་པ་དང་། ལྷག་པར་དུ་འདས་ལོ་དེའི་ནང་རྒྱ་ནག་གཞུང་ནས་ལས་རིགས་སྦྱོང་བརྡར་སོགས་ཀྱི་མིང་བྱང་འོག་ས་གནས་མི་མང་རྣམས་དམག་གི་རང་བཞིན་ལྡན་པའི་ངལ་རྩོལ་གྱི་སྦྱོང་བརྡར་དང་རྒྱ་ནག་གི་ལྟ་གྲུབ་དང་མཐུན་པའི་སློབ་གསོའི་རིགས་འདྲ་མིན་སྤེལ་ཏེ་སོ་སོའི་ཕ་མེས་ནས་མཆེད་པའི་ཆོས་ཕྱོགས་ཀྱི་དད་མོས་དང་བྱེད་སྒོ་ཁག་དང་རྒྱང་ཐག་རིང་དུ་གཏོང་བཞིན་པ་ཡང་གསལ་སྟོན་གནང་འདུག  གཞན་ཡང་སྙན་ཐོ་དེའི་ནང་ལ་རྒྱ་ནག་གཞུང་ནས་བོད་ནང་གི་རྩོམ་པ་པོ་དང་། གཞས་བ་དང་སྒྱུ་་རྩལ་བ། བོད་ཀྱི་སྐད་ཡིག་དང་རིག་གཞུང་སློབ་གསོ་བ། དེ་བཞིན་༧གོང་ས་མཆོག་དབུས་པའི་ཆོས་ཕྱོགས་ཀྱི་དབུ་ཁྲིད་ཁག་གི་བཀའ་ཆོས་དང་བཀའ་སློབ་ཁག་ལ་བརྩི་བཀུར་ཞུ་མཁན་རྣམས་རྒྱལ་ཁབ་ཁ་བྲལ་གྱི་ཉེས་མིང་འོག་མུ་མཐུད་འཛིན་བཟུང་བྱེད་བཞིན་པ་མ་ཟད། བོད་ཀྱོ་དགོན་སྡེ་ཁག་གི་གྲྭ་བཙུན་གྱི་གྲངས་འབོར་ལ་ཚད་བཀག་བཟོས་ཏེ་ད་བར་བོད་ནང་གི་ཆོས་སྡེ་ཆེ་ཁག་བླ་རུང་སྒར་དང་ཡ་ཆེན་སྒར་གཉིས་ནས་གྲ་བཙུན་༡༧༠༠༠ ཙམ་ཕྱིར་ཕུད་བཏང་ཟིན་པ་མ་ཟད། དགོན་སྡེ་ཁག་ཅིག་ཏུ་༧གོང་ས་མཆོག་གི་སྐུ་པར་ཚབ་ཏུ་རྒྱ་ནག་གི་འགོ་ཁྲིད་མའོ་དང་ཞི་ཅིན་ཕིང་གི་པར་འགྲེམ་སྤེལ་བྱེད་དུ་བཅུག་པ་དང་། ལྷག་པར་དུ་ད་ལྟའི་ཏོག་དབྱིབས་རིམས་ནད་ཀྱི་གནས་སྟངས་ཁ་ལ་ཁ ལ་ཁྱེར་ཏེ་དེ་སྔ་ནས་ཆོས་སྡེ་ཁག་ལ་གསང་བའི་ལྟ་སྲུང་གི་ཡོ་ཆས་བཙུགས་ཏེ་གྲྭ་བཙུན་རྣམས་ཀྱི་ཉིན་རེའི་བྱ་བཞག་ལ་ཚོད་འཛིན་བྱེད་མུས་ཐོག ས་གནས་གཅིག་ནས་གཞན་དུ་བསྐྱོད་སྐབས་རྒྱ་གཞུང་གི་ལས་བྱེད་ཀྱིས་བཀའ་འཁྲོལ་དགོས་པ་སོགས་བཟོས་ཏེ་དམ་དྲག་རིགས་བྱེད་ཤུགས་ཆེ་རུ་བཏང་ཡོད་པ་ཐེར་འདོན་གནང་འདུགདེ་བཞིན་རྒྱ་ནག་གཞུང་ནས་འདས་ལོ་དེའི་ནང་བོད་ནང་གི་བོད་ཕྲུག་ལོ་ངོ་༡༨ མན་རྣམས་ཆོས་ཕྱོགས་ཀྱི་ལས་དོན་ལ་ཞུགས་མི་ཆོག་པ་བཟོས་པ་དང་། སློབ་གྲྭ་ཁག་ཏུ་རྒྱ་ཡིག་གཙོ་བཟུང་ཐོག་སློབ་ཁྲིད་དགོས་པ། དགོན་སྡེ་ཁག་གི་གྲ་བཙུན་རྣམས་ངེས་པར་དུ་ཆབ་སྲིད་སློབ་གསོའི་ནང་ཞུགས་དགོས་པ། ཆོས་སྡེ་ཁག་གི་འཛིན་སྐྱོང་ལས་དོན་ཁྲོད་རྒྱ་ནག་གཞུང་གི་མི་སྣ་བསྐོ་བཞག་ངེས་པར་དུ་བྱེད་དགོས་པ། རྒྱ་ནག་གི་ངོས་འཛིན་བྱས་པའི་༧པཎ་ཆེན་རིན་པོ་ཆེ་ལ་བརྩི་བཀུར་བྱེད་དགོས་པ་སོགས་ཆོས་དད་རང་དབང་གཙོས་པའི་གཞི་རྩའི་ཐོབ་ཐང་སྤྱི་ཡོངས་ཐོག་ལ་དམ་དྲག་བྱེད་བཞིན་པ་ཁག་མངོན་གསལ་དང་སྦྲགས། རྒྱ་ནག་གཞུང་ནས་མུ་མཐུད་བོད་ནང་གི་གནས་སྟངས་དེ་དག་ཐོག་ཉམས་ཞིབ་གནང་མཁན་ཕྱིའི་སྲིད་གཞུང་ཁག་གི་སྐུ་ཚབ་དང་། གསར་འགོད་པ་རྣམས་ལ་དམ་དྲག་ཆེན་པོ་བྱེད་བཞིན་ཡོད་ཀྱང་། ཨ་རི་གཞུང་ནས་རྒྱ་ནག་ལ་ཡོད་པའི་ཨ་རི་གཞུང་ཚབ་དང་། ཨ་རིའི་ཆོས་དད་རང་དབང་ལྷན་ཚོགས་སོགས་བརྒྱུད་བོད་ནང་གི་གནས་སྟངས་རྒྱུས་ལོན་བྱེད་བཞིན་པ་མ་ཟད། ཨ་རིའི་ཁྲིམས་སུ་བཅད་པ་ Reciprocal Access to Tibet Act ཞེས་བོད་ནང་ཕར་འགྲོ་ཚུར་འོང་གི་ཁྲིམས་འཆར་འོག་ཆོས་དད་རང་དབང་གཙོས་པའི་འགྲོ་བ་མིའི་ཐོབ་ཐང་རྩིས་མེད་རྡོག་རིག་གཏོང་མཁན་གྱི་རྒྱ་ནག་འགོ་ཁྲིད་རྣམས་ལ་ཉེས་ཆད་འགེལ་་རྒྱུ་དང་། ལྷག་པར་དུ་ཉེ་ཆར་གཏན་འབེབས་གནང་བའི་ཨ་རིའི་བོད་དོན་རྒྱབ་སྐྱོར་གྱི་ཁྲིམས་གཞིའི་དགོངས་དོན་འོག་བོད་ཀྱི་ཆོས་རིག་སྲུང་སྐྱོབ་དང་། ལྷག་པར་དུ་༸གོང་ས་མཆོ་གི་༸སྐུའི་ཡང་སྲིད་ཀྱི་གནད་དོན་དེ་ནི་བོད་མིའི་ཆོས་ཕྱོགས་དང་འབྲེལ་བའི་གནད་དོན་ཞིག་ཡིན་སྟབས་དེར་རྒྱ་ནག་གཞུང་ནས་ཐེ་བྱུས་བྱེད་རྒྱུའི་ཐོབ་ཐང་མེད་པ་ཁ་གསལ་འཁོད་པ་སོགས་གསལ་སྟོན་གནང་འདུགགཞི་རྩའི་ཨ་རི་ཕྱི་སྲིད་ལས་ཁུངས་ནས་ལོ་ལྟར་རྒྱལ་སྤྱིའི་ཐོག་ཆོས་དད་རང་དབང་གི་གནས་བབ་གོང་མཐོར་ཡོང་སླད་རྒྱལ་ཁབ་སོ་སོའི་ནང་གི་ཆོས་དད་རང་དབང་གི་གནས་བབ་ཐོག་སྙན་ཐོ་འདོན་སྤེལ་གནང་སྟེ། ཡུལ་དེའི་གྲོས་ཚོགས་སུ་ཕུལ་གྱི་ཡོད་པ་དང་། ད་རེས་ཡོངས་གྲགས་གནང་བའི་སྙན་ཐོའི་ནང་རྒྱ་ནག་གཞུང་ནས་བོད་ནང་ཙམ་མ་ཟད། རྒྱ་ནག་ཁྱོན་ཡོངས་སུ་ཡོད་པའི་ཡི་ཤུའི་ཆོས་དད་པ་དང་། ཁ་ཆེའི་ཆོས་དད་པ། དེ་བཞིན་རྩ་རླུང་ཆོས་འཁོར་རྒྱུད་འཛིན་མཁན་བཅས་ལ་ཡང་དེ་མཚུངས་ཀྱིས་དམ་དྲག་དང་མནར་གཅོད་གཏོང་བཞིན་པ་སོགས་གསལ་སྟོན་གནང་འདུག   མ་ཟད། སྙན་ཐོ་འདོན་སྤེལ་དང་འབྲེལ་ཨ་རིའི་ཕྱི་སྲིད་དྲུང་ཆེ་སྐུ་ཞབས་ Antony Blinken ལགས་ནས། ཆོས་དད་རང་དབང་ནི་འགྲོ་བ་མིའི་ཐོབ་ཐང་གི་ཆ་ཤས་གལ་ཆེན་པོ་ཞིག་ཆགས་ཀྱི་ཡོད་སྟབས། ཨ་རིའི་ངོས་ནས་དེའི་ཐོག་མུ་མཐུད་ལས་དོན་སྤེལ་རྒྱུ་སོགས་འགྲེལ་བརྗོད་གནང་འདུག

རྒྱལ་སྤྱིའི་ཐོག་དར་སྲོལ་དང་མིང་གྲགས་ཆེ་བའི་ཀུ་ཤུ་རྟགས་ཅན་གྱི་བཟོ་ཚོང་ཁང་ནས་ཡུ་གུར་ངལ་རྩོལ་བ་ཚོས་བཟོས་པའི་འཕྲུལ་རིགས་ཀྱི་ཆ་ཤས་ཁག་ཀུ་ཤུག་རྟགས་ཅན་གྱི་ལག་ཐོག་ཁ་པར་གྱི་གཙོས་པའི་ཐོན་རྫས་གཞན་ཁག་གི་ནང་བེད་སྤྱོད་བྱེད་བཞིན་པ་མངོན་གསལ་གནང་འདུགདེ་ཡང་ཁ་སང་ཨ་རིའི་གྲིང་ཁྱེར་ San Francisco ནང་རྟེན་གཞི་བྱས་པའི་ The Information ཞེས་པའི་གསར་ཁང་གིས་ཡོངས་གྲངས་གནང་པའི་སྙན་ཐོ་ཞིག་གི་ནང་དུ་གསར་ཁང་དེའི་ལས་བྱེད་དང་འགྲོ་བ་མིའི་ཐོབ་ཐང་ཐོག་ཕྱག་ལས་གནང་མཁན་ཁག་ཅིག་ནས་ཤིན་ཅང་ནང་རྒྱ་ནག་གཞུང་གི་ཆེད་འཛུགས་བྱས་པའི་བཀག་སྐྱིལ་ཁང་དང་། ལྷག་པར་དུ་བཀའ་སྐྱིལ་ཁང་དེ་དག་ནང་ཡོད་པའི་ཡུ་གུར་གྲངས་ཉུང་མི་རིགས་རྣམས་རང་དབང་མེད་པར་ཁུལ་དེར་ཡོད་པའི་བཟོ་ལས་ཁང་འདྲ་མིན་ནང་ངལ་རྩོལ་གྱི་ལས་རིགས་སུ་འཇུག་བཞིན་པ་སོགས་ཀྱི་གནད་དོན་ཐོག་རྒྱུས་ལོན་བྱས་སྐབས། ཤིན་ཅང་ནང་ཆེད་འཛུགས་བྱས་པའི་ Advanced-Connectek ཞེས་པའི་འཕྲུལ་རིགས་བཟོ་གྲྭ་གཙོས་པའི་བཟོ་གྲྭ་གཞན་དྲུག་ཙམ་ནས་ཡུ་གུར་བ་གཙོས་པའི་ས་གནས་ཀྱི་གྲངས་ཉུང་མི་རིགས་ཚོ་ལ་ངལ་རྩོལ་ཐོག་འཕྲུལ་རིགས་ཀྱི་ཆ་ཤས་འདྲ་མིན་བཟོ་རུ་འཇུག་བཞིན་ཡོད་པ་དང་། འཕྲུལ་ཆས་ཀྱི་ཆ་ཤས་དེ་དག་རྐང་ཚོང་འབྲེལ་ཐོག་བེད་སྤྱོད་བྱེད་བཞིན་པ་དེ་ཀུ་ཤུ་རྟགས་ཅན་གྱི་བཟོ་ཚོང་ཁང་ཡིན་པ་མངོན་གསལ་གནང་འདུག ལྷག་པར་དུ་ཀུ་ཤུ་རྟགས་ཅན་གྱི་བཟོ་ཚོང་ནས་ཐོན་པའི་ལག་ཐོག་ཁ་པར་གཙོས་པའི་ཐོན་རྫས་ཕལ་མོ་ཆེའི་ཆ་ཤས་མང་པོ་ཞིག་འདས་པའི་ལོ་ངོ་བཅུ་ཙམ་གྱི་གོང་ནས་ Advanced-Connectek ཞེས་པའི་འཕྲུལ་རིགས་བཟོ་གྲྭ་དེ་ཡིས་བཟོ་བཞིན་ཡོད་པ་དང་། འཕྲུག་རིགས་བཟོ་གྲྭ་དེ་ཡིས་འདས་པའི་ལོ་གཉིས་ཙམ་གྱི་གོང་ནས་ཤིན་ཅང་ནང་དུ་ཡན་ལག་བཟོ་གྲྭ་ཆེན་པོ་ཞིག་བཟོས་ཏེ་ཁུལ་དེར་ཡོད་པའི་གྲངས་ཉུང་མི་རིགས་རྣམས་ངལ་རྩོལ་གྱི་ལས་རིགས་སུ་འཇུག་གི་ཡོད་པ་འགྲེལ་བརྗོད་གནང་འདུག་པ་མ་ཟད། Advanced-Connectek ཞེས་པའི་འཕྲུལ་རིགས་བཟོ་གྲྭ་དེའི་མཐའ་ཚང་མ་ལ་གྱང་དང་ལྕགས་རིས་སྐོར་ཏེ་འགྲོ་འོང་བྱེད་སའི་ལམ་ཁ་ཞིག་ལས་བཞག་མེད་པ་དང་། དེའི་ཉེ་འཁྲིས་སུ་རྒྱ་ནག་གཞུང་གིས་ཆེད་འཛུགས་བྱས་པའི་ཡུ་གུར་མི་རིགས་སྡོད་སའི་བཀག་སྐྱིལ་ཁང་ཞིག་ཀྱང་ཡོད་པ་མངོན་གསལ་གནང་འདུག གནད་དོན་དེའི་ཐད་ཨོ་སི་ཀྲོ་ལི་ཡའི་ཉམས་ཞིབ་པ་ Nathan Ruser ལགས་ནས། བཟོ་གྲྭ་དེའི་ཆགས་སྟངས་དེ་ནི་ཤིང་ཅང་ནང་ཡོད་པའི་བཟོ་གྲྭ་གཞན་དང་མི་འདྲ་བ་ཞིག་ཡོད་པ་མ་ཟད། བཟོ་གྲྭ་དེའི་ཉེ་འཁྲིས་སུ་ཡོད་པའི་བཀག་སྐྱིལ་ཁང་དེ་ནི་ངལ་རྩོལ་གྱི་ལས་རིགས་བྱེད་མཁན་ཡུ་གུར་གཙོས་པའི་གྲངས་ཉུང་མི་རིགས་དེ་དག་གྱི་སྡོད་གནས་ཡིན་པར་གསུངས་འདུག འོན་ཀྱང་སྙན་ཐོ་དེ་དང་འབྲེལ་ཀུ་ཤུ་རྟགས་ཅན་གྱི་བཟོ་ལས་ཁང་གིས་གསལ་བཤད་བྱས་པའི་ནང་དུ། ཀུ་ཤུ་རྟགས་ཅན་གྱི་བཟོ་ལས་ཁང་དང་འབྲེལ་བ་ཡོད་པའི་བཟོ་གྲྭ་དེ་དག་གི་ངལ་རྩོལ་བའི་ལས་རིགས་བྱེད་དུ་འཇུག་གི་ཡོད་མེད་ཐད་དེ་སྔ་ནས་ཞིབ་འཇུག་བྱེད་ཀྱི་ཡོད་པ་དང་། ལྷག་པར་དུ་ད་ལྟའི་ཏོག་དབྱིབས་གཉན་རིམས་ཀྱི་ཛ་དྲག་གནས་སྟངས་ལ་ལྟོས་མེད་གནད་དོན་དེ་ཚོའི་ཐོག་ཞིབ་འཇུག་བྱས་ཏེ་ད་བར་ངལ་རྩོལ་ལས་རིགས་བྱེད་བཞིན་པའི་གནས་སྟངས་གང་ཡང་ར་སྤྲོད་མ་བྱུང་ཞེས་གསུངས་འདུག མ་ཟད་ད་རེས་ཡོངས་གྲགས་བྱུང་བའི་སྙན་ཐོག་དེར་གཞིགས་ན། ཤིན་ཅང་ནང་ཡོད་པའི་ Advanced-Connectek འཕྲུལ་རིགས་བཟོ་གྲྭ་གཙོས་པའི་བཟོ་གྲྭ་གཞན་ཁག་གི་ནང་དུ་ཡུ་གུར་བ་གཙོས་པའི་གྲངས་ཉུང་མི་རིགས་སྟོང་ཕྲག་མང་པོ་ངལ་རྩོལ་ཀྱི་ལས་རིགས་བྱེད་བཞིན་པ་གསུངས་འདུག་ལ། ཁུལ་དེར་ཡོད་པའི་འཕྲུལ་རིགས་ཀྱི་བཟོ་གྲྭ་ཁག་ཅིག་ཏུ་ཀུ་ཤུ་རྟགས་ཅན་གྱི་བཟོ་ལས་ཁང་གི་ཐོན་རྫས་ཁོ་ནར་དམིགས་ཏེ་ས་གནས་མི་མང་མི་ཉུང་བ་ཞིག་ངལ་རྩོལ་གྱི་ལས་ལས་ལ་ཞུགས་བཅུག་ཡོད་པ་ཡང་གསལ་འདུག གཞི་རྩའི་རྒྱ་ནག་གཞུང་ནས་ཤིན་ཅང་ནང་གྲངས་ཉུང་མི་རིགས་ས་ཡ་མང་པོ་བཀག་སྐྱིལ་ཁང་འདྲ་མིན་ནང་བཀག་ཉར་བྱེད་བཞིན་པ་རྣམས་ལ་རང་ཉིད་ཀྱི་འདོད་མོས་ལྟར་ལས་རིགས་སྦྱོང་བརྡར་སྤྲོད་བཞིན་ཡོད་སྐོར་བཤད་བཞིན་ཡོད་ཀྱང་། ད་བར་རྒྱལ་སྤྱིའི་དཔྱད་ཞིབ་པ་དང་ཉམས་ཞིབ་པ་ཁག་ནས་རྒྱ་གཞུང་གི་བྱེད་སྟངས་དེའི་ཁྲོད་ཡུ་གུར་མི་རིགས་རྣམས་ངལ་རྩོལ་དུ་སྐུལ་བཞིན་ཡོད་པ་མངོན་གསལ་བྱུང་པ་ལྟར། ཨ་རིའི་གྲོས་ཚོགས་སུ་ཡུ་གུར་ངལ་རྩོལ་འགོག་ཐབས་ཀྱི་ཁྲིམས་འཆར་ཞིག་ཀྱང་ཆེད་འདོན་གནང་པ་མ་ཟད། ཤིན་ཅང་ནང་ངལ་རྩོལ་འགུལ་སྐྱོད་ཐོག་བཟོས་པའི་ཐོན་རྫས་རྣམས་ཨ་རིའི་ཁྲོམ་རའི་ནང་ནང་འདྲེན་བྱེད་རྒྱུ་བཀག་སྡོམ་བྱེད་རྒྱུ་སོགས་ཀྱི་ཐག་གཅོད་གཏན་འབེབས་ཀྱང་གནང་ཡོད།

སྔར་ལོ་རྒྱ་གར་བྱང་ཕྱོགས་ཀྱི་གྷལ་ཝན་འཕགས་བོད་ས་མཚམས་ཁུལ་དུ་རྒྱ་དཀར་ནག་གཉིས་ཀྱི་དམག་མིའི་དབར་གདོང་ཐུག་་བྱུང་བ་དང་འབྲེལ། དེང་སྐབས་རྒྱལ་ཁབ་ཕྱོགས་གཉིས་དབར་གྱི་འབྲེལ་ལམ་ཆེས་ཇེ་སྡུག་ཏུ་ཕྱིན་ཡོད་པ་ལྟར། ཉེ་ཆར་རྒྱལ་ཚོགས་ནང་དུ་རྒྱ་ནག་གི་ཕྱི་སྲིད་བློན་ཆེན་ཝང་ཡིས་ཀྱིས་གཙོ་སྐྱོང་བྱས་པའི་རྒྱལ་ཚོགས་ཀྱི་བདེ་འཇགས་ལྷན་ཚོགས་ཐོག རྒྱ་གར་གྱི་ཕྱི་སྲིད་བློན་ཆེན་སྐུ་ཞབས་ Subrahmanyam Jaishankar མཆོག་གིས་མཉམ་ཞུགས་མ་གནང་བར་རྒྱ་ནག་ལ་ངོ་རྒོལ་གྱི་རྣམ་པ་བསྟན་འདུག དེ་ཡང་ཉེ་ཆར་རྒྱ་གར་ནང་གི་བརྒྱུད་ལམ་ཁག་གིས་གནས་ཚུལ་སྤེལ་བར་གཞིགས་ན། བདུན་ཕྲག་སྔོན་མའི་ནང་རྒྱལ་ཚོགས་སུ་རྒྱ་ནག་གི་ཕྱི་སྲིད་བློན་ཆེན་གྱི་གཙོ་སྐྱོང་འོག་དྲ་རྒྱ་བརྒྱུད་ནས་ཚོགས་པའི་རྒྱལ་ཚོགས་ཀྱི་བདེ་འཇགས་ལྷན་ཚོགས་ཐོག་ཚོགས་མི་རྒྱལ་ཁབ་གཞན་མང་ཆེ་བའི་ཕྱི་སྲིད་བློན་ཆེན་གྱིས་མཉམ་ཞུགས་གནང་ཡོད་པ་དེ་ལྟར་ཡང་། རྒྱ་གར་ཕྱི་སྲིད་བློན་ཆེན་མཆོག་ནས་མཉམ་ཞུགས་མ་གནང་བར་ཁོང་གི་ཚབ་ཏུ་རྒྱ་གར་གྱི་ཕྱི་སྲིད་དྲུང་ཆེ་སྐུ་ཞབས་ Harsh Vardhan Shringla མཆོག་གིས་མཉམ་ཞུགས་གནང་ཡོད་པ་དང་། གནད་དོན་དེ་ནི་རྒྱ་གར་གྱི་ངོས་ནས་རྒྱ་ནག་ལ་ངོ་རྒོལ་གྱི་རྣམ་པ་ཞིག་ཏུ་ངོས་འཛིན་གནང་བཞིན་འདུག བདུན་ཕྲག་སྔོན་མའི་རེས་གཟའ་པ་སངས་ཉིན་ཚོགས་པའི་ཐེངས་འདིའི་རྒྱལ་ཚོགས་ཀྱི་བདེ་འཇགས་ལྷན་ཚོགས་འདི་བཞིན་རྒྱལ་སྤྱིའི་ཞི་བདེ་དང་བདེ་འཇགས་སྲུང་སྐྱོབ། རྒྱལ་ཚོགས་དབུས་སུ་ཡོད་པའི་རྒྱལ་སྤྱིའི་འགྲོ་ལུགས་སྲུང་སྐྱོབ་ཞེས་པའི་བརྗོད་གཞིའི་ཐོག་ཚོགས་ཡོད་པ་དང་། བློན་ཆེན་རིམ་པའི་ལྷན་ཚོགས་དེའི་ཐོག་ཨ་རིའི་ཕྱི་སྲིད་དྲུང་ཆེ་དང་ཨ་རུ་སུའི་ཕྱི་སྲིད་བློན་ཆེན། དེ་བཞིན་ Saint Vincent and the Grenadines མཚོ་གླིང་རྒྱལ་ཁབ་ཀྱི་སྲིད་བློན་བཅས་ནས་མཉམ་ཞུགས་གནང་ཡོད་པ་དང། ཨིན་ཡུལ་དང་ཧྥ་རན་སི་གཉིས་ཀྱི་ཕྱི་སྲིད་བློན་ཆེན་གཞོན་པ་དང་། Kenya ཡི་བར་བརྒལ་ཕྱི་སྲིད་བློན་ཆེན་སོགས་བློན་ཆེན་གནས་རིམས་ཀྱི་མི་སྣ་ཤ་རྟགས་ཀྱིས་མཉམ་ཞུགས་གནང་ཡོད་པ་ལྟར། རྒྱ་གར་གྱི་ཕྱི་སྲིད་བློན་ཆེན་གྱི་མཉམ་ཞུགས་མ་གནང་བ་དེར་མངོན་གསལ་དོད་པོའི་དོ་སྣང་སླེབས་ཡོད་པ་རེད་འདུག རྩ་བའི་འདི་ལོའི་ཕྱི་ཟླ་དང་པོའི་ནང་རྒྱ་གར་དེ་བཞིན་རྒྱལ་ཚོགས་ཀྱི་བདེ་འཇགས་ལྷན་ཚོགས་ཀྱི་གཏན་འཇགས་མིན་པའི་ཚོགས་མིའི་ཁོངས་སུ་ཞུགས་པ་ནས་བཟུང། ཟླ་རེར་ཚོགས་མི་རྒྱལ་ཁབ་རིམ་པའི་གཙོ་སྐྱོང་གནང་བའི་ལྷན་ཚོགས་ཁྲོད། རྒྱ་གར་གྱི་ཕྱི་སྲིད་བློན་ཆེན་སྐུ་ཞབས་ Subramanyam Jaishankar མཆོག་ནས་ཕྱི་ཟླ་དང་པོ། གཉིས་པ། བཞི་པ་སོ་སོར། Tunisia དང་ ཨིན་ཡུལ། དེ་བཞིན་ཝེ་ཊི་ནམ་བཅས་ཀྱིས་གཙོ་སྐྱོང་གནང་བའི་ལྷན་ཚོགས་ནང་དུ་མཉམ་ཞུགས་གནང་ཡོད་པ་དེ་ལྟར་ཡང་། ཕྱི་ཟླ་ ༥ པའི་ནང་དུ་རྒྱ་ནག་གི་གཙོ་སྐྱོང་བྱས་པའི་ལྷན་ཚོགས་ནང་མཉམ་ཞུགས་གནང་མེད་པ་རེད། ཉེ་ཆར་རེས་གཟའ་པ་སངས་ཉིན་ཚོགས་པའི་ལྷན་ཚོགས་དེའི་ཐོག་རྒྱ་གར་གྱི་ཕྱི་སྲིད་དྲུང་ཆེ་ Harsh Vardhan Shringla མཆོག་གིས་ད་ལྟའི་ཏོག་དབྱིབས་གཉན་རིམས་ཀྱི་གནས་སྟངས་དེས་རྒྱལ་སྤྱིའི་ཁྲོད་དགོས་མཁོའི་ཅ་དངོས་མཁོ་སྤྲོད་ཀྱི་ཡོངས་ཁུངས་ངེས་གཏན་མེད་པ་དང་། སྔོན་ཁབ་བགོ་འགྲེམ་ཆ་སྙོམས་མེད་པ་སོགས་ཀྱི་ཞན་ཆ་མངོན་གསལ་གནང་བ་མ་ཟད། རྒྱལ་སྤྱིའི་ཁྲོད་གདུང་སེམས་མཉམ་སྐྱེད་ཀྱི་བློ་དང་མཉམ་འབྲེལ་གྱི་གལ་གནད་ཡང་མངོན་གསལ་གནང་བ་དང་འབྲེལ། དེང་སྐབས་རྒྱལ་སྤྱིའི་ཁྲོད་དཀའ་ངལ་འཕྲད་པའི་སྐབས་སུ་གོ་ལ་ཁྱོན་ཡོངས་ཀྱི་མཉམ་ལས་ཀྱི་ཐོག་ནས་གདོང་ལེན་གྱི་བློ་ཞན་པའི་རྐྱེན་གྱིས། ད་ལྟའི་རྒྱལ་སྤྱིའི་མཉམ་འབྲེལ་གྱི་ནུས་པ་ཞན་པ་དང་སྐྱོན་ཆ་རྣམས་མངོན་གསལ་བྱུང་ཡོད་སྐོར་དང་འབྲེལ། གནད་དོན་དེའི་ཐོག་དོན་ཕན་ལྡན་པའི་བཅོས་བསྒྱུར་དགོས་ཀྱི་ཡོད་པ་ཐེར་འདོན་གནང་འདུག

ཁ་སང་སྔ་དྲོ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གིས་བཞུགས་སྒར་༸རྒྱལ་བའི་ཕོ་བྲང་ནས་དྲྭ་ཐོག་བརྒྱུད་རྒྱལ་སྤྱིའི་ཐོག་སྙན་གྲགས་ཆེ་བའི་ཨ་རིའི་ཧར་ཝཌ་གཙུག་ལག་སློབ་གཉེར་ཁང་གི་སྨན་བཅོས་དང་གཙུག་ལག་སྡེ་ཚན་གྱི་ཚོགས་མི་རྣམས་ལ་བཀའ་སློབ་སྩོལ་སྐབས། ནད་པ་རྣམས་སྨན་ཁང་དུ་གུང་སེང་ལ་མ་ཡིན་པར་འ་ཆད་འུ་ཐུག་འོག་སླེབ་ཀྱི་ཡོད་སྟབས། སྨན་པ་དང་འཕྲོད་བསྟེན་ཞབས་ཞུ་བ་རྣམས་ཀྱིས་བརྩེ་བ་དང་སྙིང་རྗེའི་རང་བཞིན་ཐོག་ནས་སྨན་བཅོས་བརྒྱུད་ནད་པའི་རྒྱུད་ལ་གདེང་ཚོད་དང་རེ་བ་ཞིག་བསྐྲུན་དགོས་པའི་ལམ་སྟོན་བཀྲིན་མཛད་འདུགདེའང་དེ་རིང་དཔལ་ལྡན་དགའ་ལྡན་ཕོ་བྲང་ཡིག་ཚང་ནས་གོང་ས་མཆོག་གིས་ཧར་ཝཌ་གཙུག་ལག་སློབ་ཆེན་གྱི་སྨན་བཅོས་སྡེ་ཚན་ལ་ཚུལ་མཐུན་སྨན་བཅོས་འཕྲོད་བསྟེན་གོང་སྤེལ་གཏོང་བའི་ཐབས་ཚུལ་ཞེས་པའི་བརྗོད་གཞིའི་སྐོར་བཀའ་སློབ་བསྩལ་བའི་དམིགས་བསལ་ལས་རིམ་དེའི་དུམ་བུ་ཞིག་ཡོངས་ཁྱབ་འདོན་སྤེལ་གནང་ཡོད་པ་དང་། དེའི་ནང་༸གོང་ས་མཆོག་གིས་གཙུག་ལག་སློབ་ཆེན་གྱི་དགེ་སློབ་ཡོངས་ལ་དགའ་བསུའི་འཚམས་འདྲི་མཛད་པ་དང་སྦྲགས་མགོན་པོ་༸གང་ཉིད་མཆོག་གིས་དུས་རྟག་ཏུ་གཙུག་ལག་སློབ་ཆེན་འདིར་ཆེས་བསྔགས་བརྗོད་མཛད་ཀྱི་ཡོད་པ་དང་ལྷག་དོན་སློབ་གཉེར་ཁང་འདིར་བཀའ་སློབ་སྩོལ་རྒྱུའི་གོ་སྐབས་བྱུང་བར་སྤོབས་པ་ཡོད་ཅེས་བཀའ་བསྩལ་མཛད་དེ་རྒྱལ་སྤྱིའི་ཐོག་མཚན་སྙན་ཡོད་པའི་ཧར་ཝཌ་གཙུག་ལག་སློབ་གཉེར་ཁང་གི་ངོས་ནས་ད་ཆ་ཆེད་ལས་ཀྱི་སློབ་སྦྱོང་དང་ལྷན་དུ་བྱམས་བརྩེའི་སློབ་གསོའི་ཐོག་ལའང་འགན་ཁུར་ཆེ་ཙམ་བཞེས་ཏེ། སློབ་གཉེར་ཁང་དེའི་སྨན་གྱི་སློབ་གྲྭར་སློབ་ཞུགས་བྱེད་མཁན་གང་ཟག་ཁོང་ཁྲོ་ཅན་ཞིག་སློབ་མཐར་སོན་སྐབས་ཞི་བདེ་བག་ཡོད་ཅན་ཞིག་ཏུ་བསྐྲུན་ཐུབ་པའི་ཐུགས་རེ་མཛད་བཞིན་ཡོད་པ་བཀའ་སྩལ་འདུག ༧གོང་ས་མཆོག་གིས་ད་དུང་ད་ཆ་རིམས་ནད་ཀྱི་ཛ་དྲགས་གནས་སྟངས་ཁྲོད་ཉིན་མཚན་བསྟུད་མར་ནད་པའི་ཆེད་ཞབས་ཞུ་སྒྲུབ་མཁན་སྨན་པ་དང་སྨན་ཞབས་པ་སོགས་མདུན་ཐོན་ཞབས་ཞུ་བ་ཡོངས་ལ་ཡི་རངས་བསྔགས་བརྗོད་མཛད་པ་མ་ཟད།  ནད་པ་རྣམས་སྨན་ཁང་དུ་འུ་ཐུག་ཐབས་ཟས་འོག་སླེབས་པ་མ་གཏོགས་གུང་སེང་ལ་སླེབས་ཀྱི་མེད་སྟབས། སྨན་པ་དང་སྨན་ཞབས་པ་རྣམས་ཀྱིས་བྱམས་རྩེའི་ཀུན་ནས་བསླངས་བའི་སྒོ་ནས་སྨན་བཅོས་ཀྱིས་ཁོ་ཚོའི་རྒྱུད་ལ་གདེང་ཚོད་དང་རེ་བ་ཞིག་བསྐྲུན་རྒྱུ་གལ་ཆེ་ཡིན་པའི་བཀའ་སློབ་མཛད་པ་དང་ཆབས་ཅིག སྤྱི་ཚོགས་སྤྱི་ལ་ཞབས་འདེགས་རླབས་ཆེན་ཞིག་ཡིན་པའི་ཕྱག་ལས་འདི་དག་མུ་མཐུད་གནང་དགོས་པའི་གཞེན་སྐུལ་མཛད་འདུག

བོད་དོན་ལས་འགུལ་བ་ཚེ་རིང་དབང་འདུས་ལགས་ཀྱིས་ བོད་རྒྱལ་ཁབ་ཆེན་པོའི་རྒྱལ་དར་འཁོད་པའི་སྟོད་གོས་དང། རྐང་འཁོར་མདུན་ངོས་སུ་བོད་དང་སུད་སི་གཉིས་ཀྱི་རྒྱལ་དར་སྒྲེང་འཛུགས་དང།  དེ་བཞིན་རྐང་འཁོར་རྒྱབ་ངོས་སུ་འགྲུལ་བཞུད་ཀྱི་ལམ་བར་དུ་འཁོ་བའི་ཡོ་ཆས་དང། དེའི་སྟེང་རྒྱ་ནག་ནང་དུ་འཚོགས་རྒྱུའི་༢༠༢༢ལོའི་དགུན་དུས་པེ་ཅིང་ཨོ་རྩལ་འགྲན་རྩོད་ཕྱིར་འཐེན་དགོས་པ་དང་། རྒྱ་གཞུང་ནས་བོད་ནང་འགྲོ་བ་མིའི་ཐོབ་ཐང་དང་ཆོས་དད་རང་དབང་རྡོག་རོལ་མཚམས་འཇོགས་དགོས་པ་སོགས་ཀྱི་དགོས་འདུན་འཁོད་པའི་པར་རིས་ཀྱི་ཤོག་བུ་དཔྱངས་ཏེ་སུད་སིར་གནས་བཞུགས་བོད་དོན་ལས་འགུལ་ཚེ་རིང་དབང་འདུས་ལགས་ཀྱིས་སུད་སི་གྲོང་ཁྱེར་ཆེ་ཁག་ནང་དུ་བོད་དོན་རྐང་འཁོར་སྐོར་སྐྱོད་ཀྱི་ལས་འགུལ་ཞིག་སྤེལ་འགོ་བཙུགས་སོང་།ད་ཆ་འཛམ་གླིང་ཁྱོན་ཡོངས་སུ་ཏོག་དབྱིབས་ནད་ཡམས་ཀྱི་དུས་སྐབས་འདིར། བོད་དོན་ལས་འགུལ་བ་ཚེ་རིང་དབང་འདུས་ལགས་ཀྱིས་མ་སྐུལ་དང་བླངས་ཀྱིས།  ཟླ་བ་འདིའི་ཕྱི་ཚེས་༨ཉིན་གྱི་ཞོགས་པ། ཁོང་གི་སྡོད་གནས་སུད་སི་གྲོང་ཁྱེརWinterthurནས་བོད་དོན་ཆེད་རྐང་འཁོར་སྐོར་བསྐྱོད་ཀྱིས་ལས་འགུལ་དེ་འགོ་བཙུགས་གནང་ཡོད་ཅིང་།  དེ་ཡང་ལས་འགུལ་དེ་བརྒྱུད་གཙོ་བོ་༸གོང་ས་མཆོག་བོད་དུ་གང་མགྱོགས་གདན་འདྲེན་ཞུ་དགོས་པ་དང་། རྒྱ་གཞུང་ནས་བཙན་འཁྲིད་བྱས་པའི་༸པན་ཆེན་དགེ་འདུན་ཆོས་ཀྱི་ཉི་མ་མཆོག་གང་མགྱོགས་གློད་གྲོལ་དགོས་པ། རྒྱ་གཞུང་གིས་བོད་ནང་འགྲོ་བ་མིའི་ཐོབ་ཐང་དང་ཆོས་དད་རང་དབང་རྡོག་རོལ་མཚམས་འཇོགས་དགོས་པ། ༢༠༢༢ལོའི་དགུན་དུས་པེ་ཅིང་ཨོ་རྩལ་མགྲན་རྩོད་ཕྱིར་འཐེན་དགོས་སོགས་དགོས་འདུན་དོན་ཚན་ལྔའི་འོག་ཐེངས་འདིའི་བོད་དོན་རྐང་འཁོར་སྐོར་སྐྱོད་ཀྱི་ལས་འགུལ་དེ་སྤེལ་བ་ཞིག་ཡིན་ཞེས་འདི་ག་རླུང་འཕྲིན་ཁང་འགྲེལ་བརྗོད་གནང་ཡོད་པ་རེད། རྩ་བའི་བོད་དོན་ལས་འགུལ་བ་ཚེ་རིང་དབང་འདུས་ལགས་ཀྱིས། སྔ་ལོ་འཛམ་གླིང་སྤྱི་དང་ཡང་སྒོས་ཡོ་རོབ་རྒྱལ་ཁབ་ནང་དུ་རྒྱ་ནག་ནས་ལྦུ་ཧན་ནས་མཆེད་པའི་ཏོག་དབྱིབས་ནད་ཡེམས་ཀྱི་ཛ་དྲགས་དུས་སྐབས་སུ་ཉེན་ཁར་མི་འཛེམས་པར་སུད་སི་གྲོང་ཁྱེརWinterthurནས་ཇི་ནི་ལྦའི་མཉམ་འབྲེལ་རྒྱལ་ཚོགས་བར་སྤྱི་ལེ་༣༠༠ལྷག་གི་རིང་ལ་བོད་དོན་ཆེད་ཞི་བའི་གོམ་བགྲོད་དང་རྒྱལ་ཚོགས་ལ་བོད་དོན་ཞུ་གཏུགས་བཅས་ལས་འགུལ་ཡང་སྤེལ་ཡོད་པ་རེད། ད་རེས་བོད་དོན་རྐང་འཁོར་ལས་འགུལ་འདི་ནི་ཁོང་ཁེར་རྐྱང་གི་བོད་དོན་ལས་འགུལ་ཐེངས་གཉིས་པ་དེ་ཆགས་ཀྱི་ཡོད་པ་རེད། ད་ལན་ཚེ་རིང་དབང་འདུས་ལགས་ཀྱིས། ཐོག་མར་ཁོང་རང་ཉིད་ནས་ཐེངས་འདིའི་བོད་དོན་རྐང་འཁོར་སྐོར་བསྐྱོད་ཀྱི་ལས་འགུལ་དེ་བཞིན་ཡོ་རོབ་རྒྱལ་ཁབ་ཁག་ཏུ་གནང་རྒྱུའི་འཆར་གཞི་བསྒྲིགས་ཀྱང། ད་ལྟའི་ཆར་ཏོག་དབྱིབས་ནད་ཡམས་གནས་སྟངས་རྐྱེན་པས་ཡོང་ཐབས་མེད་པ་བརྟེན་མཐར་སུད་སི་གྲོང་ཁྱེར་ཆེ་ཁག་ཏུ་རྐང་འཁོར་སྐོར་སྐྱོད་གནང་རྒྱུའི་ཐག་གཅོད་གནང་བ་ཞིག་ཆགས་ཀྱི་འདུག སྤྱིར་སུད་སི་ནང་གནས་བཞུགས་བོད་དོན་ལས་འགུལ་བ་ཚེ་རིང་དབང་འདུས་ལགས་ལ་ཆ་མཚོན་ན་ཐེངས་འདིའི་རྐང་འཁོར་སྐོར་སྐྱོད་ལས་འགུལ་ཙམ་མ་ཟད། དེ་སྔ་སུད་སི་གྲོང་ཁྱེར་ཛུ་རིག་ནས་འཇར་མི་ནི་གྲོང་ཁྱེར་ Frankfurt བར་བོད་རང་དབང་རྐང་འཁོར་སྐོར་སྐྱོད་ཀྱི་ལ་འགུལ་དང་།   སུད་སི་རྒྱལ་ས་ bern ནས་ཇི་ནི་ཝ་བར་གྱི་བོད་དོན་གོམ་བགྲོད་ལས་འགུལ་བཅས་ཀྱི་ནང་དུའང་མཉམ་ཞུགས་གནང་མྱོང་ཡོད་པ་ཞིག་ཆགས་ཀྱི་ཡོད་པ་རེད།