རྒྱལ་སྤྱི།

ཨོ་སི་ཊོ་ལི་ཡའི་ནང་གནས་བཞུགས་བོད་པའི་སྒྱུ་རྩལ་བ་བསྟན་འཛིན་ཆོས་རྒྱལ་ལགས་ཀྱིས་ལོ་ལྟར་གོ་སྒྲིག་གནང་བའི་ Festival of Tibet འམ་བོད་ཀྱི་དུས་སྟོན་དེ་ད་ལྟའི་ཆར་རྒྱ་ནག་ཝུ་ཧན་ནས་ཆེས་ཐོག་མར་མཆེད་པའི་ཏོག་དབྱིབས་ནད་ཡམས་ཀྱི་ཁྱབ་གདལ་ཆེས་ཆེར་འགྲོ་བཞིན་པའི་ཛ་དྲག་གི་གནས་སྟངས་རྐྱེན་གྱིས་ Brisbane གྲོང་ཁྱེར་ནང་ཚོགས་ཐུབ་མེད་ཀྱང་ད་ཆ་དུས་སྟོན་ཐེངས་ ༡༣ པ་དེ་དྲྭ་ལམ་བརྒྱུད་འཚོགས་བཞིན་འདུགཐེངས་འདིའི་བོད་ཀྱི་དུས་སྟོན་ཐེངས་ ༡༣ པ་དེ་ཁ་ཉིན་རེས་གཟའ་སྤེན་པ་སྟེ་ཚེས་ ༢༤ ནས་དབུ་འཛུགས་ཀྱིས་ཟླ་ ༥ ཚེས་ ༤ བར་འཚོགས་ཀྱི་ཡོད་པ་དང་དུས་སྟོན་ཐོག་བོད་པའི་གློག་བརྙན་གཟིགས་འབུལ་དང་བགྲོ་གླེང་། གླུ་གཞས། སྙན་ངག་གྱེར་འདོན། སྒྲུང་བཤད། ཟབ་སྦྱོང་། དེ་བཞིན་བོད་ཀྱི་གནམ་གཤིས་འགྱུར་ལྡོག་གི་ཤུགས་རྐྱེན་དང་ད་ལྟའི་བོད་ཀྱི་གནས་སྟངས་སོགས་ཀྱི་ལས་རིམ་མང་དག་ཅིག་གོ་སྒྲིག་གནང་འདུགསྒྱུ་རྩལ་བ་བསྟན་འཛིན་ཆོས་རྒྱལ་ལགས་ཀྱི་ཐེངས་འདིའི་བོད་ཀྱི་དུས་སྟོན་དང་འབྲེལ་ནས་༸གོང་ས་༸སྐྱབས་མགོན་ཆེན་པོ་མཆོག་གིས་འཚམས་འཕྲིན་ཞིག་སྩལ་འདུག་པའི་ནང་། ཐེངས་འདིའི་ Prayers for Peace ཞེས་པའི་བརྗོད་གཞིའི་ཐོག་ནས་བོད་ཀྱི་དུས་སྟོན་གོ་སྒྲིག་ཞུས་པ་དེར་ཨོ་གླིང་ཁུལ་གྱི་སྒྱུ་རྩལ་བ་མང་པོ་ཞིག་ནས་མཉམ་ཞུགས་གནང་བར་ཐུགས་དགྱེས་ཚོར་ཆེན་པོ་བྱུང་ཞེས་བཀའ་སྩལ་བ་དང་འབྲེལ། རོལ་དབྱངས་ནི་མང་ཚོགས་ཀྱི་ཚོར་ཤེས་འདྲེན་ནུས་ལྡན་པ་དང་། དུས་སྟོན་འདིའི་ཐོག་ནས་རྒྱལ་སྤྱིའི་ཁྲོད་བོད་ནང་གི་དངོས་ཡོད་གནས་སྟངས་ཇི་ཆགས་ཀྱི་གོ་རྟོགས་སྤེལ་རྒྱུ་དང་། དེ་བཞིན་བོད་ཀྱི་ཐུན་མིན་ཆོས་རིག་དང་སྐད་ཡིག་སོགས་གསོན་པོ་གནས་པར་མཐུན་རྐྱེན་དུ་གྱུར་ཡོད་པར་བཀའ་སྩལ་འདུགདེ་བཞིན་༸གོང་ས་མཆོག་གིས་བོད་ཀྱི་ལེགས་བྱང་ནི་ཞི་བདེ་དང་བྱམས་བརྩེའི་བདག་ཉིད་ཆགས་ཡོད་སྟབས་དེ་སྲུང་སྐྱོབ་གནང་འོས་པ་དང་། མགོན་པོ་མཆོག་ནས་ནང་ཆོས་ཁྱབ་སྤེལ་མཛད་རྒྱུའི་དགོངས་པ་མེད་ཀྱང་། རང་གཞན་ཀུན་ལ་ཕན་པའི་ཚན་རིག་དང་མཐུན་པ་གང་ཞིག་རིགས་པས་དཔྱད་བཟོད་དུ་གྲུབ་པའི་ནང་ཆོས་ལས་གསུངས་པ་སེམས་ཀྱི་ཞི་བདེ་འཚོལ་ཐབས་སྐོར་བཀའ་སྩལ་མཛད་ཀྱི་ཡོད་སྐོར་བཀའ་སྩལ་འདུག༸གོང་ས་༸སྐྱབས་མགོན་ཆེན་པོ་མཆོག་གིས་ད་དུང་སྐུ་ཞབས་ཆོས་རྒྱལ་ལགས་ཀྱིས་བོད་ཀྱི་དུས་སྟོན་དེ་ལྟ་བུ་གཉེར་ནས་བོད་དོན་ཐོག་སེམས་འཁུར་གྱི་རྣམ་པ་བསྟན་པར་བསྔགས་བརྗོད་མཛད་པ་དང་སྦྲགས། ཕན་ཚུན་ལྟོས་གྲུབ་བམ་རྟེན་འབྲེལ་གྱི་རྣམ་གཞག་དེ་ནི་ལྷན་སྐྱེས་དང་འགྲོ་བ་མི་གཅིག་གྱུར་གྱི་འདུ་ཤེས་གོང་འཕེལ་གྱི་རྨང་གཞི་ཡིན་སྐོར་བཀའ་སྩལ་བ་མ་ཟད། ང་ཚོའི་ངོས་ནས་རང་ཉིད་ཀྱི་སྒེར་དང་ཁྱིམ་གཞིས། དེ་བཞིན་རྒྱལ་ཁབ་གཅིག་པོའི་དོན་དུ་མིན་པར་འགྲོ་བ་ཡོངས་ཀྱི་བདེ་ཐབས་ལ་སྨན་པའི་ཕྱག་ལས་གནང་གནད་ཡིན་པ་སོགས་ཀྱི་གནད་དོན་ཐོག་ལམ་སྟོན་བཀྲིན་ཆེ་བ་མཛད་འདུགམགོན་པོ་༸གང་ཉིད་མཆོག་གིས་མཇུག་ཏུ་ཐེངས་འདིའི་བོད་ཀྱི་དུས་སྟོན་ཐོག་མཉམ་ཞུགས་གནང་མཁན་ཡོངས་ལ་དགའ་བསུའི་འཚམས་འདྲི་སྩལ་བ་དང་ཆབས་ཅིག སླད་མར་དུས་སྟོན་དེ་མཛའ་གྲོགས་དང་མཐུན་སྒྲིལ་གོང་འཕེལ་དང་ལྷག་དོན་གོ་ལ་ཁྱོན་དུ་གནས་པའི་གཅེན་གཅུང་ཕོ་མོའི་དབར་བསམ་ཤེས་ཀྱི་གོ་རྟོགས་རྒྱ་གང་ཆེ་ཡོང་བར་ཐུགས་སྨོན་སྩལ་འདུགགཞི་རྩའི་ཆོས་རྒྱལ་ལགས་ཀྱིས་འདས་པའི་ལོ་ངོ་བཅུ་གསུམ་རིང་བོད་བརྒྱུད་ནང་བསྟན་དང་བོད་ཟས་རིགས། བོད་དོན་དང་འབྲེལ་གློག་བརྙན་གཟིགས་འབུལ། སྒྱུ་རྩལ་སོགས་ཀྱི་སྒོ་ནས་བོད་ཀྱི་ཐུན་མིན་རིག་གཞུང་དང་ཡུལ་སྲོལ་གོམས་གཤིས། དེ་བཞིན་བོད་དོན་དྲིལ་བསྒྲགས་སོགས་གནང་གི་ཡོད་པ་དང་། དུས་སྟོན་དེ་ཐོག་མར་ཁོང་གིས་ཕྱི་ལོ་ ༢༠༠༨ ལོར་བོད་ཀྱི་ས་ཕྱོགས་གང་སར་བོད་མི་རྣམས་ནས་རྒྱ་ནག་གི་དྲག་པོའི་སྲིད་བྱུས་ལ་ངོ་རྒོལ་གྱིས་གཞི་རྒྱ་ཆེ་བའི་ལས་འགུལ་སྤེལ་བ་དང་བསྟུན། རང་དབང་ཅན་གྱི་ཡུལ་ལུང་ནང་གནས་བཞུགས་བོད་མི་ཡོད་དོ་ཅོག་གི་སེམས་ནང་བརྗོད་པར་དཀའ་བའི་སེམས་ཚོར་དྲག་པོ་ཞིག་བསྐྲུན་ཕྱིར་གོ་སྒྲིག་གནང་བ་ཞིག་ཆགས་ཀྱི་ཡོད་པ་རེད།

ཟླ་འདིའི་ཚེས་༢༥ ཉིན་རྒྱལ་སྤྱིའི་ཐོག་འཛམ་གླིང་གི་ཆབ་སྲིད་བཙོན་པ་ཆུང་ཤོས་སུ་གྲགས་པའི་བོད་ཀྱི་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་དགུང་ལོ་ ༣༢ ཀྱི་འཁྲུངས་སྐར་ལ་འཁེལ་གྱི་ཡོད་སྟབས། ཨ་རིའི་ཕྱི་སྲིད་ལྷན་ཁང་གི་མགྲིན་ཚབ་པ་སྐུ་ཞབས་ Ned Price ལགས་ཀྱིས། རྒྱ་ནག་གིས་པཎ་ཆེན་ཆུང་སྲིད་རིན་པོ་ཆེ་མཆོག་གང་དུ་ཡོད་མེད་གང་མགྱོགས་གསལ་བཤད་བྱ་དགོས་པའི་འབོད་སྐུལ་གནང་འདུག དེའང་ཁ་སང་ཚེས་ ༢༢ ཉིན་གོ་སྒྲིག་གནང་བའི་གསར་འགོད་ལྷན་ཚོགས་ཞིག་གི་ཐོག སྐུ་ཞབས་ Ned Price ལགས་ཀྱིས་རྒྱ་ནག་གིས་པཎ་ཆེན་ཆུང་སྲིད་མཆོག་བོད་པའི་སྤྱི་ཚོགས་ལས་བཙན་ཁྲིད་ཀྱིས་ད་བར་གར་སོང་ཆ་མེད་དུ་གྱུར་ཡོད་པའི་གནས་སྟངས་ལུང་འདྲེན་གནང་བ་དང་སྦྲགས། ཨ་རིའི་ངོས་ནས་བོད་ཀྱི་ཆོས་ལུགས་དད་མོས་རང་དབང་དང་། ཐུན་མོང་མ་ཡིན་པའི་བོད་ཀྱི་རིག་གཞུང་དང་སྐད་ཡིག དེ་བཞིན་བོད་མིའི་ངོ་བོ་བཅས་ལ་རྒྱབ་སྐྱོར་བྱེད་བཞིན་ཡོད་པར་གསུངས་ཡོད་པ་མ་ཟད། ཨ་རིས་བོད་མི་རྣམས་ཀྱིས་རང་ཉིད་ཀྱི་དད་མོས་གཞིར་བཞག་དང་། སྲིད་གཞུང་གི་ཐེ་གཏོགས་མེད་པའི་ཐོག་ནས་༸གོང་ས་ཏཱ་ལའི་བླ་མ་དང་པཎ་ཆེན་བླ་མ་ལྟ་བུའི་དབུ་ཁྲིད་ཁག་གདམ་གསེས་བྱེད་རྒྱུའི་ཐོབ་ཐང་ལ་གུས་བརྩི་ཞུ་བཞིན་ཡོད་པར་བསྒྲགས་འདུག གཞི་རྩའི་འདི་ལོའི་བོད་ཀྱི་གསུམ་བཅུའི་དུས་དྲན་སྐབས་སུའང་། ཨ་རིའི་ཕྱི་སྲིད་ལས་ཁུངས་ཀྱི་མགྲིན་ཚབ་པ་སྐུ་ཞབས་ Ned Price ལགས་ཀྱིས་རྒྱ་ནག་གཞུང་གིས་ལོ་ངོ་ཉེར་ལྔའི་གོང་དུ་བོད་ཀྱི་པཎ་ཆེན་རིན་པོ་ཆེའི་ཡང་སྲིད་ངོས་འཛིན་གྱི་གནད་དོན་ལ་ཐེ་གཏོགས་བྱས་ཏེ། ༸གོང་ས་མཆོག་གིས་ངོས་འཛིན་མཛད་པའི་ཆུང་སྲིད་རིན་པོ་ཆེ་གར་སོང་ཆ་མེད་དུ་བཏང་བ་མ་ཟད། རྒྱ་ནག་མི་མང་སྤྱི་མཐུན་རྒྱལ་ཁབ་རང་ཉིད་ཀྱི་འདོད་མོས་ལྟར་གྱི་པཎ་ཆེན་རིན་པོ་ཆེའི་ཡང་སྲིད་ཅིག་བཙན་དབང་གིས་བསྐོ་གཞག་བྱས་པ་དེ་ནི། ཆོས་དད་རང་དབང་ལ་་རྡོག་རོལ་ཚབ་ཆེ་ཞིག་ཡིན་པ་འགྲེལ་བརྗོད་གནང་ཡོད་པ་རེད། ཁོང་གིས་ཁ་སའི་གསར་འགོད་ལྷན་ཚོགས་ཐོག་སླར་ཡང་པཎ་ཆེན་རིན་པོ་ཆེའི་གནད་དོན་བསྐྱར་ནན་དང་འབྲེལ། རྒྱ་ནག་གཞུང་གིས་པཎ་ཆེན་ཆུང་སྲིད་མཆོག་གར་ཡོད་གསལ་བཟོ་བྱེད་དགོས་སྐོར་གསུངས་བ་མ་ཟད། ཆུང་སྲིད་རིན་པོ་ཆེ་མཆོག་དང་ལྷན་དུ་མཇལ་འཕྲད་གནང་རྒྱུའི་གོ་སྐབས་འཕྲལ་དུ་གོ་སྒྲིག་ཞུ་དགོས་བའི་དགོས་འདུན་བཏོན་འདུག བཙན་བྱོལ་བོད་མིའི་སྤྱི་ཚོགས་སུ་ཆ་མཚོན་ན། དུས་རྒྱུན་ནས་ཆུང་སྲིད་རིན་པོ་ཆེ་ཡི་འཁྲུངས་སྐར་གྱི་ཉིན་མོར་བོད་མི་རྣམས་ཀྱིས་ལས་འགུལ་གྱི་རྣམ་གྲངས་མང་པོ་ཞིག་བརྒྱུད་ནས་སྲུང་བརྩི་བྱེད་སྲོལ་ཡོད་པ་ལྟར། གནངས་ཉིད་བོད་ཀྱི་དབུས་གཞོན་ནུ་ལྷན་ཚོགས་དང་བོད་རང་བཙན་སློབ་ཕྲུག་ཚོགས་པ། དེ་བཞིན་རྒྱ་གར་གྱི་ཧི་མ་ལའི་ཨེ་ཤ་ཡའི་སློབ་སྦྱོང་ལྟེ་གནས་ཁང་སོགས་ཀྱི་ཚོགས་པ་ཁག་ཅིག་མཉམ་འབྲེལ་གྱི་ཐོག་ནས། རྒྱ་ནག་གིས་པཎ་ཆེན་ཆུང་སྲིད་མཆོག་བཙན་ཁྲིད་དང་བོད་མིར་དེའི་གལ་གནད་ཅེས་པའི་བགྲོ་གླེང་གི་ལས་རིམ་ཞིག་གོ་སྒྲིག་གནང་འཆར་འདུག བགྲོ་གླེང་གི་ལས་རིམ་དེའི་ཐོག་ཏུ། རྒྱ་གར་གྱི་རྩོམ་པ་པོ་དང་གསར་འགོད་པ་སྐུ་ཞབས། Vijay Kranti ལགས་ཀྱི་གཙོ་སྐྱོང་གི་འོག ཕྱི་ལོ་ ༢༠༢༡ ལོའི་བདམས་ཐོན་སྲིད་སྐྱོང་ངམ། ཚོགས་ཟུར་སྤེན་པ་ཚེ་རིང་མཆོག་གི་གནད་ཚིག་གི་གསུངས་བཤད་གནང་རྒྱུ་ཡིན་པ་དང་། དེའི་འཕྲོར། རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་བུ་ཆུང་ཚེ་རིང་ལགས་དང་། དེ་བཞིན་ལྡི་ལིར་རྟེན་གཞི་བྱས་པའི་རྒྱ་ནག་འཐབ་ཇུས་ཞིབ་འཇུག་ལྟེ་གནས་ཁང་གི་འགན་འཛིན་སྐུ་ཞབས། Jaidev Ranade ལགས་སོགས་ཀྱི་གཏམ་བཤད་གནང་རྒྱུ་རེད་འདུག རྩ་བའི་༸གོང་ས་སྐྱབས་མགོན་ཆེན་པོ་མཆོག་ནས་ཀུན་གཟིགས་༸པཎ་ཆེན་སྐུ་ཕྲེང་ ༡༠ བའི་ཡང་སྲིད་དུ་ངོས་འཛིན་གནང་ནས་ཉིན་གསུམ་གྱི་རྗེས་ཏེ། ཕྱི་ལོ་ ༡༩༩༥ ཟླ་ ༥ ཚེས་༡༧ ཉིན་རྒྱ་ནག་དམར་ཤོག་སྲིད་གཞུང་གིས་༸པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་དགུང་ལོ་༦ གི་སྟེང་ཁོང་དང་ཁོང་གི་ཡབ་ཡུམ་དང་བཅས་པ་བཙན་དབང་གིས་གར་སོང་ཆ་མེད་བཟོས་ཏེ། འདི་ལོ་མི་ལོ་ཧྲིལ་བོ་ ༢༦ འཁོང་གྱི་ཡོད་པ་དང་། རྒྱལ་སྤྱིའི་གཞུང་དང་ལྷག་པར་རྒྱལ་ཚོགས་ཀྱི་དམིགས་བསལ་སྐུ་ཚབ་མང་པོའི་གནོད་ཤུགས་ལ་ལྟོས་མེད། རྒྱ་ནག་གཞུང་གིས་ད་བར་རིན་པོ་ཆེ་མཆོག་ནི་རང་ཉིད་ཀྱི་སློབ་སྦྱོང་མཐར་ཕྱིན་ཏེ་ལས་ཀ་བྱེད་བཞིན་པའི་མི་སེར་དཀྱུས་མ་ཞིག་ཡིན་པའི་འགྲེལ་བརྗོད་བྱས་པ་མ་གཏོགས་རིན་པོ་ཆེ་གར་ཡོད་སོགས་ཀྱི་གནས་ཚུལ་རྩ་བ་ནས་གསལ་བཟོ་བྱས་མེད་པ་རེད།

ཁ་སང་ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱི་ཕྱི་ལོ་ ༢༠༢༡ ལོའི་རྒྱལ་སྤྱིའི་ཆོས་དད་རང་དབང་གི་གནས་བབ་དང་འབྲེལ་བའི་སྙན་ཐོ་འདོན་སྤེལ་གནང་བར་རྒྱ་ནག་དེ་སླར་ཆོས་དད་རང་དབང་གི་གནས་བབ་ཐད་སེམས་འཚབ་ཡོད་པའི་རྒྱལ་ཁབ་གྲས་སུ་མིང་འདོན་བྱས་པ་མ་ཟད། ཨ་རིའི་གཞུང་འཛིན་གསར་པས་བོད་དོན་དམིགས་བསལ་འབྲེལ་མཐུད་པ་གང་འགྱོགས་བསྐོ་བཞག་དགོས་པའི་ཞུ་སྐུལ་གནང་འདུགལྷན་ཚོགས་ཀྱི་དྲ་གནས་ཐོག་ལོ་འདིའི་སྙན་ཐོ་འདོན་སྤེལ་གནང་བའི་ནང་འདས་ལོ་ནང་གཙོ་བོ་ཏོག་དབྱིབས་གཉན་རིམས་ཁྱབ་གདལ་གྱི་གནས་སྟངས་ཁྲོད་རྒྱལ་སྤྱིའི་ཆོས་དད་རང་དབང་གི་གནས་བབ་ལ་རྟོག་ཞིབ་གནང་བ་ལས་རྒྱ་ནག་གཞུང་གིས་བོད་བརྒྱུད་ནང་བསྟན་ཆོས་བརྒྱུད་འཛིན་མཁན་གྱི་བོད་མི་དང་ཁ་ཆེ། ཡི་ཤུའི་ཆོས་བྱེད་མཁན་ཚོར་དམིགས་བསལ་གྱི་སྡང་ཟུག་ བྱེད་ཀྱི་ཡོད་པའི་གནད་དོན་མངོན་གསལ་དང་སྦྲགས། རྒྱ་ནག་དེ་བྷར་མ་དང་ཀོ་རི་ཡ། Eritrea སོགས་རྒྱལ་ཁབ་གཞན་བཅུ་དང་ལྷན་དུ་སླར་བློ་འཚབ་ཡོད་པའི་རྒྱལ་ཁབ་ཀྱི་གྲས་སུ་མིང་འདོན་གནང་འདུག ཁ་སང་སྙན་ཐོ་དབུ་འབྱེད་དང་འབྲེལ་ནས་ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱི་ཚོགས་གཙོ་གཞོན་པ་སྐུ་ཞབས་ Tony Perkins ལགས་ཀྱིས་རྒྱ་གཞུང་གིས་ཆོས་དད་རང་དབང་བརྩི་མེད་རྡོག་རོལ་གཏོང་བཞིན་པ་མ་ཟད། ཨ་རི་གཙོས་རྒྱལ་སྤྱིའི་ཚོང་ལས་སྡེ་ཚན་རྣམས་ལ་འགྲོ་བ་མིའི་ཐོབ་ཐང་རྡོག་རོལ་གྱི་གནད་དོན་གླེང་སློང་གནང་རྒྱུ་མེད་པར་གནོན་ཤུགས་སྤྲོད་ཐབས་ཀྱི་བྱ་སྤྱོད་སྤེལ་ཁག་ནི་འདས་ལོ་ནང་ཆེས་བློ་འཚབ་གནང་དགོས་པའི་གནད་དོན་ཞིག་ཆགས་སྐོར་གསུངས་འདུག དེ་བཞིན་སྔ་ལོར་བོད་སྐོར་གྱི་བཞུགས་མོལ་ཚོགས་འདུ་ཐོག་རྒྱ་ནག་གི་སྲིད་འཛིན་ཞི་ཅིན་ཕིང་གིས་བོད་བརྒྱུད་ནང་བསྟན་ཀྲུང་གོ་ཅན་དུ་བཟོར་ཤུགས་སྣོན་རྒྱག་དགོས་སྐོར་གཏམ་བཤད་སྤེལ་བ་དང་། ཚོགས་འདུ་རྗེས་སུ་བོད་ཁུལ་གྱི་དགོན་སྡེ་ཁག་ཏུ་གྲྭ་བཙུན་རྣམས་ལ་ཆབ་སྲིད་ཀྱི་སློབ་གསོ་སྤེལ་ཆེད་དམིགས་བསལ་ཚོགས་འདུ་བསྐོང་ཡོད་པ་དང་། དགོན་སྡེ་ཁག་གི་ཐོག་དམ་དྲག་ཆེས་ཆེར་བྱེད་བཞིན་པའི་ཁྲོད་ཡར་ཆེན་སྒར་སོགས་ཀྱི་ནང་དུ་མང་ཚོགས་མཆོད་མཇལ་ལ་ཕེབས་པར་བཀག་སྡོམ། བོད་པའི་སློབ་ཕྲུག་དང་གཞུང་གི་སྲི་ཞུ་བ་དེ་དག་གི་ནང་མི་རྣམས་ལ་བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་གི་གནང་སྒོ་ཁག་ཏུ་མཉམ་ཞུགས་གནང་མ་བཅུག་པ། ༸གོང་ས་མཆོག་གི་བཀའ་སློབ་ཉན་རྒྱུ་དང་ཐ་ན་༸སྐུ་པར་ཉར་རྒྱུ་སོགས་ལ་དམ་དྲག་མུ་མཐུད་བྱེད་ཀྱི་ཡོད་པའི་གནད་དོན་ཁག་ལུང་འདྲེན་དང་ཆབས་ཅིག འདས་ལོ་ ༢༠༢༠ ལོར་ རྒྱ་གཞུང་གིས་བོད་ནང་ནང་པའི་ཆོས་བརྒྱུད་འཛིན་མཁན་རྣམས་ལ་དམ་དྲག་དང་བཏང་འཛིན་བྱེད་ཐབས་གྱི་བྱ་སྤྱོད་ཁག་སྤེལ་མུས་ཡིན་པར་མངོན་གསལ་གནང་འདུག སྔ་ལོར་ཨ་རིའི་ཉེན་རྟོག་པའི་ལས་ཀ་བྱེད་མཁན་ཞིག་ལ་ཡུལ་དེའི་བོད་པའི་སྤྱི་ཚོགས་ཐོག་གསང་ཉུལ་བྱེད་དུ་བཅུག་པའི་གནད་དོན་གཙོས་ཁེ་ན་ཌ་དང་སུད་ཌེན། དེ་བཞིན་སུ་ཛར་ལན་ཌི་བཅས་ཀྱི་ནང་བོད་མིའི་སྤྱི་ཚོགས་ཁྲོད་རྒྱའི་གསང་ཉུལ་བ་ཡོད་པ་ར་ཁྲོད་བྱུང་བའི་གནད་དོན་ཁག་ལུང་འདྲེན་གྱིས་རྒྱ་གཞུང་གིས་བོད་མིའི་ཆོས་དད་རང་དབང་ལ་དམ་དྲག་གི་བྱ་འགུལ་སྤེལ་བ་དེ་དག་དང་བོད་ཙམ་མིན་པར་རྒྱལ་སྤྱིའི་རྒྱལ་ཁབ་དུ་མར་དེ་ལྟར་སྤེལ་བར་ཐེར་འདོན་གནང་སྟེ། རྒྱ་གཞུང་གིང་བོད་དང་ཤིན་ཅང་ཡུ་གུར་མང་ཚོགས་ཐོག་དྲག་གནོན་གྱི་བྱ་འགུལ་སྤེལ་བ་དེ་དག་བརྒྱུད་རྒྱལ་སྤྱིའི་ཁྲོད་དེ་ལྟར་སྤེལ་བཞིན་པའི་དམིགས་དཔེ་ངན་པའི་ཤུགས་རྐྱེན་ཇེ་ཆེར་འགྲོ་ཉེན་ཡོད་པར་ཐུགས་འཚབ་ཡོད་སྐོར་འགྲེལ་བརྗོད་གནང་འདུག དེའི་ཁྲོད་སྔ་ལོར་རྒྱལ་ཚོགས་ཀྱི་ཚོགས་མི་རྒྱལ་ཁབ་ ༣༩ ཡིས་རྒྱ་གཞུང་ལ་བོད་མི་དང་ཤིན་ཅང་མང་ཚོགས་ཀྱི་འགྲོ་བ་མིའི་ཐོབ་ཐང་ཁག་ལ་བརྩི་སྲུང་ཞུ་དགོས་པའི་རེ་སྐུལ་དང་། སྔ་ལོར་ཨ་རི་གཞུང་གིས་བོད་དོན་རྒྱབ་སྐྱོར་གྱི་ཁྲིམས་འཆར་གཏན་འབེབས་གནང་བ་སོགས་རྒྱལ་སྤྱིའི་རྒྱལ་ཁབ་ཁག་ཅིག་གིས་རྒྱ་ནག་ནས་བོད་མི་དང་མང་ཚོགས་གཞན་རྣམས་ཀྱི་ཐོག་དྲག་གནོན་གྱི་གནད་དོན་སྤེལ་ཁག་ལ་གདོང་ལེན་གནང་བའི་བཟང་ཕྱོགས་ཀྱི་གནད་དོན་ཁག་ཅིག་ལུང་འདྲེན་དང་འབྲེལ་ཏེ་ཨ་རི་གཞུང་གི་ངོས་ནས་བོད་དོན་ཁྲིམས་འཆར་གྱི་འགྲུ་དོན་བཞིན་ནུས་པ་ལྡན་པའི་བོད་དོན་དམིགས་བསལ་འབྲེལ་མཐུད་པ་ཞིག་གང་མགྱོགས་བསྐོ་བཞག་གནང་དགོས་པའི་སྐུལ་མ་གནང་འདུག དེའི་བར་ན་ཉེ་ཆར་རྒྱལ་མཚམས་མེད་པའི་གསར་འགོད་པའི་མཐུན་ཚོགས་ཀྱིས་ཕྱི་ལོ་ ༢༠༢༡ ལོའི་རྒྱལ་སྤྱིའི་གསར་འགོད་རང་དབང་གི་སྙན་ཐོ་འདོན་སྤེལ་གནང་བར་དངོས་ཡོད་གནས་ཚུལ་བཀག་སྡོམ་ཐད་སྔོན་ཁབ་ལྟ་བུའི་ནུས་པ་ཡོད་མཁན་གྱི་གསར་འགོད་ལས་རིགས་ལ་རྒྱལ་སྤྱི་ཁྱོན་ཡོངས་སུ་དམ་དྲག་ཤུགས་ཆེ་རུ་བཏང་དང་གཏོང་བཞིན་པ་དང་། མཐུན་ཚོགས་ཀྱིས་འཛམ་གླིང་རྒྱལ་ཁབ་ ༡༨༠ ནང་གི་གནས་སྟངས་རྒྱུས་ལོན་གནང་བར་རྒྱལ་ཁབ་ ༡༣༠ ཙམ་གྱི་ནང་དུ་གསར་འགོད་རང་དབང་ལ་དམ་དྲག་བྱེད་བཞིན་པའི་ངལ་བ་འཕྲད་བཞིན་ཡོད་པ་ལྟར་དེའི་ཁོངས་ནས་རྒྱ་ནག་དེ་རྒྱལ་ཁབ་ ༡༨༠ ཁོངས་ནས་གསར་འགོད་དབང་ལ་དམ་དྲག་ཆེས་ཆེར་བྱེད་མཁན་གྱི་རྒྱལ་ཁབ་ ༡༧༧ པར་མིང་འདོན་གནང་བ་དང་དེའི་རྗེས་སུ་ཨེ་ཤ་ཡའི་རྒྱལ་ཁབ་ Turkmenistan དང་བྱང་ Korea གཉིས་དང་། གནས་སྟངས་ཆེས་སྡུག་ཤོས་ Africa རྒྱལ་ཁབ་ Eritrea བཅས་མིང་མངོན་གསལ་གནང་འདུག  

ཨོ་སི་ཊི་ལི་ཡའི་གཞུང་ངོས་ནས་ཡུལ་དེའི་མངའ་སྡེ་ Victoria ཡིས་དེ་སྔོན་རྒྱ་ནག་དང་ལྷན་དུ་བཞག་པའི་རྒྱུད་གཅིག་ལམ་གཅིག་གི་གྲོས་མཐུན་གཉིས་ཕྱིར་འཐེན་གནང་བ་མ་ཟད། ཨ་རབ་དང་སུ་རི་ཡ་ལྷན་དུ་བཞག་པའི་གྲས་ཆོད་གཉིས་ཀྱང་ཕྱིན་འཐེན་གནང་འདུགདེའང་སྔར་ལོ་ཨོ་གླིང་གཞུང་གིས་རྒྱལ་ཁབ་ཀྱི་བདེ་འཇགས་གཙོ་བཟུང་ཐོག་ Foreign Relations Act ཞེས་པའི་ཕྱི་འབྲེལ་ཁྲིམས་གཞི་ཞིག་གི་ཐོག་ནས་དེ་གའི་མངའ་སྡེ་སོ་སོའི་གཞུང་དང་ཕྱི་རྒྱལ་གྱི་སྲིད་གཞུང་ཁག་དབར་བཞག་པའི་གྲོས་མཐུན་རྣམས་ཕྱིར་འཐེན་བྱ་ཆོག་པ་བཟོས་ཡོད་པ་ལྟར། ཁ་སང་ཕྱི་དྲོར་ཨོ་གླིང་གི་ཕྱི་སྲིད་བློན་ཆེན་ལྕམ་ Marise Payne ལགས་ཀྱིས་ Victoria མངའ་སྡེའི་གཞུང་གིས་དེ་སྔ་ཕྱི་ལོ་ ༢༠༡༨ དང་ ༢༠༡༩ ལོའི་གནང་རྒྱ་ནག་དང་ལྷན་བཞག་པའི་རྒྱུད་གཅིག་ལམ་གཅིག་གི་གྲོས་མཐུན་དེ་ཕྱིར་འཐེན་གནང་ཡོད་པ་ཡོངས་གྲགས་གནང་བ་མ་ཟད། རྒྱ་ནག་དང་ལྷན་དུ་བཞག་པའི་གྲོས་མཐུན་དེ་དག་ཨོ་གླིང་གི་ཕྱི་སྲིད་ལ་གནོད་སྐྱོན་འགྲོ་གཞི་ཞིག་ཆགས་ཡོད་སྐོར་གསུང་བ་དང་འབྲེལ། ཨོ་གླིང་གིས་མང་གཙོའི་ལམ་ལུགས་གཙོར་འཛིན་གྱིས་མཐུན་ཕྱོགས་ཀྱི་རྒྱལ་ཁབ་ཁག་དང་ལྷན་དུ་འབྲེལ་ལམ་ཇེ་ཟབ་ཏུ་གཏོང་རྒྱུ་ཡིན་པར་འགྲེལ་བརྗོད་གནང་འདུག ཨོ་གླིང་གིས་རྒྱ་ནག་དང་ལྷན་དུ་བཞག་པའི་གྲོས་མཐུན་དེ་དག་ཕྱིར་འཐེན་བྱས་ཡོད་པར་ཕྱིར་བསྒྲགས་བྱས་མ་ཐག  ཁུལ་དེར་ཡོད་པའི་རྒྱ་ནག་གི་གཞུང་ཚབ་ཁང་གིས་ཨོ་གླིང་གི་བྱེད་བབ་དེ་ནི་རྒྱལ་ཁབ་ཕན་ཚུན་གྱི་འབྲེལ་ལམ་རྒྱུན་སྲིང་བྱེད་རྒྱུར་ལྷག་བསམ་རྣམ་དག་མིན་པར་ཕྱིར་མངོན་པ་ཞིག་ཡིན་པ་དང་། གནད་དོན་དེ་ཨོ་གླིང་གི་ངོས་ནས་རྒྱུ་མཚན་དང་མི་མཐུན་ཞིང་ཁྲོང་ཁྲོ་སློང་གཞིའི་འགུལ་སྐྱོད་ཅིག་ཡིན་པར་འགྲེལ་བརྗོད་ཀྱིས།  ཐེངས་འདིའི་ཨོ་གླིང་གི་བྱེད་བབ་དེ་ཡིས་རྒྱལ་ཁབ་ཕན་ཚུན་བར་གྱི་འབྲེལ་ལམ་ལ་དོ་ཕོག་བཏང་བ་ཞིག་ཡིན་པ་མ་ཟད། མི་འགྱངས་བར་བྱེད་བབ་དེ་ཡིས་ཨོ་གླིང་གི་རྒྱལ་ཁབ་རང་ཉིད་ལ་གནོད་གཞི་བྱས་པ་ཞིག་ཆགས་ཡོད་པའི་སྐྱོན་བརྗོད་བྱས་འདུག གཞི་རྩའི་ཕྱི་ལོ་ ༢༠༡༨ ལོར། ཨོ་གླིང་གི་མངའ་སྡེ་ Victoria ཡི་བློན་ཆེན་ Daniel Andrews ལགས་ཀྱིས་རྒྱ་ནག་གོང་སྤེལ་དང་བཅོས་བསྒྱུར་ལྷན་ཁང་དང་མཉམ་དུ་བཞག་པའི་གྲོས་མཐུན་གྱི་ནང་དུ། མངའ་སྡེ་དེ་ཡིས་རྒྱ་ནག་གི་སྲིད་འཛིན་ཞི་ཅིན་ཕིང་གི་རྒྱུད་གཅིག་ལམ་གཅིག་གི་འཛུགས་སྐྲུན་གྱི་ལས་གཞིར་མཉམ་ལས་བྱེད་རྒྱུར་འཁོད་ཡོད་པ་ཞིག་ཆགས་ཡོད་པ་རེད།ཨོ་གླིང་གི་རྒྱལ་སྲུང་གི་མཐོ་སློབ་ཀྱི་འགོ་གཙོ།  སྐུ་ཞབས་ Rory Medcalf  ལགས་ཀྱིས་དེ་སྔོན་ནས་མངའ་སྡེ་Victoria སྲིད་གཞུང་གིས་རྒྱ་ནག་དང་ལྷན་དུ་བཞག་པའི་གྲོས་མཐུན་དེ་ཡིས་ཨོ་གླིང་གི་རྒྱལ་ཁབ་ཀྱི་མངོན་འདོན་ལ་རྩིས་མེད་དང་ཁུལ་དེའི་ཕྱི་སྲིད་འབྲེལ་ལམ་གསར་བ་ཞིག་འཛུགས་རྒྱུའི་ནུས་བ་ཉམས་དམས་སུ་བཏང་ཡོད་པའི་སྐྱོན་བརྗོད་ཀྱིས། རྒྱ་ནག་དང་ལྷན་དུ་བཞག་པའི་གྲོས་མཐུན་དེར་འཛིན་སྐྱོང་གི་སྐད་ཡིག་དང་ཁོར་ཡུག་གི་ཚད་གཞི། དེ་བཞིན་ངལ་རྩོལ་གྱི་ཐོབ་ཐང་སོགས་གང་ཡང་ཚུད་མེད་པ་དེ་ནི་རྒྱ་ནག་གི་དྲིལ་བསྒྲགས་ལ་ཞབས་འདེགས་ཞུས་པ་ལྟ་བུ་ཞིག་ཆགས་ཡོད་པར་མངོན་གསལ་གནང་འདུག གཞི་རྩའི་རྒྱ་ནག་གིས་ཨོ་གླིང་དང་ལྷན་བཞག་པའི་རྒྱུད་གཅིག་ལམ་གཅིག་གི་འཛུགས་སྐྲུན་ལས་གཞི་དེ་ནི་ཁུལ་དེའི་དཔལ་འབྱོར་ཡར་རྒྱས་དང་མི་མང་གི་བདེ་རྩ་ལ་ཕན་ཐོགས་ཡོད་པ་ཞིག་ཡིན་པའི་འོག་ནས་བཞག་ཡོད་ནའང་། ཁ་སང་ཕྱི་སྲིད་བློན་ཆེན་མཆོག་གིས་ལས་གཞི་དེ་ཕྱིར་འཐེན་བྱས་མཚམས་སུ། Victoria མངའ་སྡེར་གནད་དོན་དེ་དང་འབྲེལ་ནས་འབྲེལ་བ་བྱས་སྐབས་གྲོས་མཐུན་དེ་ཕྱིར་འཐེན་གནང་བར་སྐྱོན་བརྗོད་སོགས་གང་ཡང་བྱས་མེད་པ་མ་ཟད། ཕྱི་སྲིད་ཀྱི་གནོད་དོན་དེ་ནི་རྒྱལ་ཡོངས་ཀྱི་གནད་དོན་ཞིག་ཡིན་པར་ངོས་འཛིན་གྱིས། མངའ་སྡེའི་ངོས་ནས་མུ་མཐུད་དེ་ཁུལ་དེའི་མང་ཚོགས་ཀྱི་དཔལ་འབྱོིར་གནས་བབ་གོང་མཐོར་གཏོང་ཐབས་སུ་འབད་བརྩོན་བྱེད་རྒྱུ་ཡིན་པར་བརྗོད་འདུག  

ཁ་ཉིན་དྲྭ་ལམ་བརྒྱུད་བོད་དོན་ཞུ་གཏུགས་ཀྱི་ཉིན་མོ་ཞེས་དམིགས་བསལ་ཚོགས་འདུ་ཞིག་ཚོགས་པའི་ཐོག་མཉམ་ཞུགས་བ་རྣམས་ཀྱིས་ཡུ་རོབ་གྲོས་ཚོགས་ལ་བོད་མིར་རྒྱབ་སྐྱོར་སྔར་ལྷག་གནང་དགོས་པའི་ཞུ་སྐུལ་གནང་འདུགཉིན་གཅིག་གི་དྲྭ་ཐོག་ཚོགས་འདུ་དེ་ཡུ་རོབ་རྒྱལ་སྤྱིའི་བོད་དོན་ལས་འགུལ་ཁང་དང་ཡུ་རོབ་གྲོས་ཚོགས་བོད་དོན་རྒྱབ་སྐྱོར་ཚོགས་པ་ཟུང་འབྲེལ་གྱི་གོ་སྒྲིག་གནང་བ་ཞིག་ཆགས་ཡོད་པ་དང་། ལས་རིམ་དེའི་ཐོག་ Sweden,Poland,France,Belgium ,Netherland དང་ Ireland བཅས་ཀྱི་ཡུ་རོབ་ཁུལ་གྱི་བོད་མི་གཞོན་སྐྱེས་དྲུག་གིས་མཉམ་ཞུགས་ཀྱིས་ཁོང་རྣམ་པར་སྔ་དྲོའི་ཚོགས་འདུའི་ཐོག་ཡུ་རོབ་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་ཚེ་རིང་བྱམས་པ་ལགས་དང་གཞན་ལས་བྱེད་ཁག་ཅིག་གིས་བོད་དོན་ཞུ་གཏུགས་དང་འབྲེལ་བའི་ངོ་སྤྲོད་དང་སྦྱོང་བརྡར་བཅས་གནང་བ་མ་ཟད། སྦེལ་ཇམ་སྐུ་ཚབ་དོན་གཅོད་བཀྲིས་ཕུན་ཚོགས་ལགས་ཀྱིས་བོད་མིའི་སྒྲིག་འཛུགས་ཀྱི་ཕྱི་འབྲེལ་དང་དབུ་མའི་ལམ་གྱི་སྲིད་བྱུས་བཅས་ཀྱི་སྐོར་ལ་ངོ་སྤྲོད་གསུང་བཤད་གནང་འདུག ཉིན་གང་གི་རིང་ཚོགས་པའི་དྲྭ་ཐོག་ལས་རིམ་དེའི་ཁྲོད། ཉིན་རྒྱབ་ཏུ་རྒྱལ་སྤྱིའི་བོད་དོན་ལས་འགུལ་ཁང་གི་ཡུ་རོབ་སྲིད་བྱུས་ངེས་སྟོན་པ་སྐུ་ཞབས་ Vincent Metten ལགས་ཀྱིས་གཙོ་སྐྱོང་གནང་བའི་ཐོག་བོད་རིགས་ན་གཞོན་རྣམས་ཀྱིས་ཡུ་རོབ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་དང་ལྷན་དུ་བགྲོ་གླེང་གནང་ཡོད་པ་དང་སྐབས་དེར་ཚོགས་བཅར་བ་རེ་རེའི་ངོས་ནས་རྒྱ་གཞུང་གིས་བོད་མིའི་ཐོག་སྤེལ་བཞིན་པའི་གདུག་རྩུབ་གཉའ་གནོན་གྱི་སྲིད་བྱུས་འོག་བོད་མི་ཚོར་ཆོས་དད་རང་དབང་དང་སྐད་ཡིག་རང་དབང་མེད་པ། ཁོར་ཡུག་གཏོར་བཤིག་དང་བཙོན་འཇུག་སོགས་བོད་ནང་གི་བོད་མིའི་འགྲོ་བ་མིའི་ཐོབ་ཐང་གི་གནས་སྟངས་ཁག་དང་ལྷག་དོན་བོད་ནང་གི་རང་ལུས་མེར་བསྲེགས་དང་༸སྐུའི་ཡང་སྲིད་ཀྱི་གནད་དོན་སོགས་སྙན་སེང་ཞུས་ཏེ། ཡུ་རོབ་གྲོས་ཚོགས་ངོས་ནས་བོད་མིར་སྔར་ལྷག་རྒྱབ་སྐྱོར་གནང་བའི་ཐོག་བོད་དོན་ཐོག་དམིགས་བསལ་གྲོས་ཆོད་ཅིག་འཇོག་གནང་ཡོང་བའི་ཞུ་སྐུལ་གནང་འདུག བགྲོ་གླེང་ཐོག་མཉམ་ཞུགས་གནང་བའི་ཡུ་རོབ་གྲོས་ཚོགས་ཀྱི་འཐུས་མི་རྣམ་པས་ཐེངས་འདིའི་ལས་རིམ་བརྒྱུད་བོད་མིར་ཐད་ཀར་དགོངས་ཚུལ་བརྗེ་རེས་གནང་རྒྱུའི་གོ་སྐབས་བྱུང་བར་དགའ་བསུ་ཞུས་པ་དང་སྦྲགས། ད་ཆ་བཙན་བྱོལ་ནང་གི་བོད་རིགས་གཞོན་སྐྱེས་ཚོས་བོད་ཀྱི་རྩ་དོན་སླད་སེམས་ཚོར་དྲག་པོའི་ངང་དམིགས་བསལ་འགན་བཞེས་བཞིན་པ་དེ་ནི་དོན་ཕན་ཅན་ཞིག་ཡིན་པས་ལས་དོན་མཐའ་དག་ལམ་ལྷོང་ཡོང་བའི་སྨོན་འདུན་ཞུས་པ་མ་ཟད། ཡུ་རོབ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་Mikulas Peksa ལགས་ཀྱིས་ཡུ་རོབ་གྲོས་ཚོགས་ངོས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མ་འོངས་ཡང་སྲིད་ངོས་འཛིན་དེ་བོད་མི་ཚོས་ཐག་གཅོད་བྱེད་རྒྱུ་ལས་རྒྱ་གཞུང་གིས་ཐེ་གཏོགས་བྱ་མི་ཆོག་པའི་གྲོས་ཆོད་གཏན་འབེབས་བྱ་རྒྱུ་དེ་འབྱུང་འགྱུར་གྱི་དུས་ཡུན་ནང་དངོས་ཡོད་གནས་ཚུལ་དང་མཐུན་པ་ཞིག་ཡིན་པར་གསུངས་འདུག རྩ་བའི་ཡུ་རོབ་ Belgium ཀྱི་རྒྱལ་ས་ Brussels ནང་ལོ་ལྟར་ Tibet Lobby Day འམ་ཡུ་རོབ་གྲོས་ཚོགས་འཐུས་མིར་བོད་དོན་ཞུ་གཏུགས་ལས་འགུལ་ཞིག་གོ་སྒྲིག་གནང་སྲོལ་ཡོད་ཀྱང་། ད་ལན་ཏོག་དབྱིབས་གཉན་རིམས་རྐྱེན་གྱིས་འཕྲོད་བསྟེན་སྔོན་འགོག་དང་བདེ་འཇགས་སྲུང་སྐྱོབ་ཐོག་ནས་འདི་ལོའི་བོད་དོན་ཞུ་གཏུགས་ཉིན་མོ་ཡོངས་རྫོགས་ Brussels ནང་འཚོགས་མི་དགོས་པར་ཡུ་རོབ་གྲོས་ཚོགས་འཐུས་མི་ཁག་དང་ལྷན་དུ་དྲྭ་ལམ་བརྒྱུད་དེ་ཚོགས་ཡོད་པ་རེད།

ཨི་རིའི་སྲིད་འཛིན་སྐུ་ཞབས་ Joe Biden མཆོག་གིས་སྣེ་ཁྲིད་པའི་ཨ་རི་སྲིད་གཞུང་གི་གལ་ཆེའི་ལས་གནས་ཁག་ཏུ་མི་སྣ་བསྐོ་གཞག་གི་ལས་རིམ་འགྲོ་བཞིན་ཡོད་པ་ལྟར་སྲིད་འཛིན་མཆོག་མཆོག་ནས་དེ་སྔ་ Obama སྲིད་གཞུང་སྐབས་ཨ་རིའི་མང་གཙོ་དང་འགྲོ་བ་མིའི་ཐོབ་ཐང་། ལས་རྩོལ་བཅས་ཀྱི་དྲུང་ཆེའི་ལས་རོགས་གནང་མྱོང་ཡོད་པ་ལྕམ་ Uzra Zeya ལགས་ལས་གནས་དེའི་དྲུང་ཆེའི་གནས་རིམ་དུ་བསྐོ་གཞག་གནང་རྒྱུའི་འོས་མིར་མིང་འདོན་གནང་ཡོད་པ་དང་། དེ་ནི་ཨ་རིའི་བོད་དོན་དམིགས་བསལ་འབྲེལ་མཐུད་པའི་ཐུགས་འགན་བཞེས་མཁན་ཆགས་ཀྱི་ཡོད་པ་རེད།ཁ་སང་ཨ་རིའི་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་མདུན་དུ་སྲིད་འཛིན་ Biden མཆོག་གིས་མིང་འདོན་གནང་བ་ལྕམ་ Uzra Zeya ལགས་བསྐོ་གཞག་དང་འབྲེལ་བའི་ཉན་ཞིབ་ཀྱི་ལས་རིམ་ཞིག་གནང་ཡོད་པ་ལྟར་ལྕམ་ Uzra Zeya ལགས་ཀྱིས་སྔོན་འགྲོའི་གསུང་བཤད་ཁྲོད་ད་ཆ་འཛམ་གླིང་ཐོག་དབང་ཆ་གཅིག་བསྡུས་རིང་ལུགས་དང་འཚེ་བ། དྲག་སྤྱོད། དེ་བཞིན་འཐེན་ཁྱེར་སོགས་བརྒྱུད་མང་གཙོའི་གནས་བབ་ལ་དོ་ཕོག་ཆེན་པོ་ཐེབས་སྐབས་འདིར་ཨ་རིའི་ཕྱི་སྲིད་ལས་ཁུངས་སུ་ཡོད་པའི་མང་གཙོ་དང་འགྲོ་བ་མིའི་ཐོབ་ཐང་། ལས་རྩོལ་བཅས་ཀྱི་ལས་གནས་དེ་གལ་ཆེར་ངོས་འཛིན་གནང་གི་ཡོད་པ་དང་། ལྷག་པར་དུ་རྒྱ་ནག་གཞུང་ནས་ཤིན་ཅང་ནང་དུ་མི་སེར་སྡེབ་གསོད་དང་། ཧོང་ཀོང་རང་སྐྱོང་གི་གནས་བབ་ལ་དོ་ཕོག་བཏང་བ། དེ་བཞིན་བོད་མི་གཙོས་རྒྱ་ནག་གི་ས་གནས་ཁག་ཏུ་ཡོད་པའི་ནང་པ་དང་ཡི་ཤུའི་ཆོས་དད་པ་སོགས་གྲངས་ཉུང་མི་རིགས་ཚོར་དམ་དྲག་བྱེད་བཞིན་མངོན་གསལ་གནང་འདུག ལྕམ་ Uzra Zeya ལགས་ནས་ད་དུང་གལ་སྲིད་ཨ་རིའི་མང་གཙོ་དང་འགྲོ་བ་མིའི་ཐོབ་ཐང་། དེ་བཞིན་ལས་རྩོལ་བཅས་ཀྱི་དྲུང་ཆེར་བསྐོ་གཞག་གནང་བ་ཡིན་ན། གཞི་རྩའི་འགྲོ་བ་མིའི་ཐོབ་ཐང་གི་རིན་ཐང་རྣམས་གཞི་རྩར་བཞག་ནས་རྒྱ་ནག་གི་བྱེད་ཕྱོགས་ཁག་ལ་གདོང་ལེན་ནན་པོ་གནང་རྒྱུ་དང་། ཨ་རིའི་མཐུན་གྲོགས་རྒྱལ་ཁབ་ཁག་དང་ཟུང་འབྲེལ་ཐོག་མང་གཙོའི་གནས་བབ་ལ་དོ་ཕོགས་གཏང་མཁན་རྒྱ་ནག་གཙོས་ཨུ་རུ་སུའི་བྱེད་ཕྱོགས་ལ་ཁ་གཏད་ནན་པོ་གཅོག་རྒྱུ། ཨ་རིའི་ཕྱི་འབྲེལ་སྲིད་བྱུས་ཁག་སྔར་ལྷག་ནུས་པ་ལྡན་པ་བཟོ་རྒྱུ་བཅས་དོན་ཚན་གཙོ་བོ་གསུམ་གྱི་ཐོག་ཤུགས་སྣོན་རྒྱག་ངེས་ཡིན་པར་གསུངས་འདུག གཞི་རྩའི་ལྕམ་ Uzra Zeya ལགས་དེ་སྔ་ Obama སྲིད་གཞུང་སྐབས་སུ་འགྲོ་བ་མིའི་ཐོབ་ཐང་གི་གནད་དོན་དང་འབྲེལ་བའི་ལས་གནས་དང་དེ་བཞིན་ཨ་རིའི་སྐུ་ཚབ་ཐོག་ནས་ Arab དང་ Egypt རྒྱ་ནག་སོགས་སུ་ཞི་བདེ་དང་ཆོས་དད་རང་དབང་སོགས་ཀྱི་ཐད་ཕྱག་ལས་གནང་མྱོང་ཡོད་པ་མ་ཟད། དེ་སྔ་ ༢༠༡༣ ལོར་ཁོང་རྒྱ་ནག་ནང་ཕེབས་སྐབས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་བབ་ལ་སྐྱོན་བརྗོད་དང་། རྒྱ་ནག་གཞུང་ནས་ཆ་རྐྱེན་གང་ཡང་མེད་པར་༸གོང་ས་མཆོག་དང་གྲོས་མོལ་ཞུ་དགོས་པ་སོགས་གསུངས་ཡོད་པ་དང་། གལ་ཏེ་ད་རེས་ཁོང་ཨ་རིའི་མང་གཙོ་དང་འགྲོ་བ་མིའི་ཐོབ་ཐང་། ལས་རྩོལ་བཅས་ཀྱི་དྲུང་ཆེའི་ལས་གནས་སུ་བསྐོ་གཞག་བྱུང་ཚེ་ཨ་རིའི་བོད་དོན་དམིགས་བསལ་འབྲེལ་མཐུད་པའི་ཐུགས་འགན་བཞེས་མཁན་དེ་ཆགས་ཀྱི་ཡོད་པ་རེད།

རྒྱ་ནག་གི་བདེ་སྲུང་བློན་ཆེན་ཡུ་རོབ་རྒྱལ་ཁབ་ཁག་ཅིག་ཏུ་གཞུང་འབྲེལ་སྐོར་སྐྱོད་བྱེད་བཞིན་པ་དང་བསྟུན་བདུན་ཕྲག་སྔོན་མའི་རེས་གཟའ་ལྷག་པའི་ཉིན་ Hungary ཡི་རྒྱལ་ས་ Budapest ནང་དུ་འབྱོར་སྐབས་ཡུལ་དེའི་ཕྱོགས་འགལ་ཚོགས་པའི་ཚོགས་མི་ཁག་ཅིག་གིས་རྒྱ་ནག་གི་བློན་ཆེན་ཕྱོགས་སྐྱོད་ལ་ངོ་རྒོལ་གྱི་རྣམ་པ་ཆེད་བཏོན་གནང་བའི་ཁྲོད་ Budapest གྲོང་ཁྱེར་སྤྱི་ཁྱབ་གཞོན་པ་སྐུ་ཞབས་ Ference Garencser ལགས་ཀྱིས་གྲོང་ཁྱེར་ཚོགས་ཁང་མདུན་དུ་བོད་ཀྱི་རྒྱལ་དར་སྒྲེང་འཛུགས་ཀྱིས་རྒྱ་ནག་གི་བློན་ཆེན་ལ་ངོ་རྒོལ་གྱི་རྣམ་པ་བསྟན་འདུགདེ་རིང་བོད་མིའི་སྒྲིག་འཛུགས་ཀྱི་དྲ་གནས་ཐོག་གནས་ཚུལ་སྤེལ་བར་ཉེ་ཆར་ཕྱི་ཟླ་ ༣ ཚེས་ ༢༤ ཉིན་རྒྱ་ནག་གི་བདེ་སྲུང་བློན་ཆེན་ Wei Fenghe Hungary ཡི་རྒྱལ་ས་ Budapest ནང་དུ་གཞུང་འབྲེལ་སྐོར་སྐྱོད་དང་འབྲེལ་ནས་ Hungary ཡི་སྲིད་འཛིན་ Janos Ader དང་སྲིད་བློན་གཞན་པ། དེ་བཞིན་བདེ་སྲུང་བློན་ཆེན་བཅས་དང་ལྷན་དུ་ཐུག་འཕྲད་བྱས་ཡོད་སྐོར་བཀོད་འདུག སྐབས་དེར་ཡུལ་དེའི་ཕྱོགས་འགལ་ཚོགས་པའི་ཚོགས་མི་ཁག་ཅིག་གིས་སྲིད་འཛིན་གྱི་ལས་ཁུངས་ཉེ་འགྲམ་དུ་ཆགས་པའི་གྲོང་ཁྱེར་ཚོགས་ཁང་མདུན་དུ་ཤིན་ཅང་ནང་གདུག་རྩུབ་ཀྱི་མནར་གཅོད་མྱོང་བཞིན་པ་རྣམ་ལ་དྲང་བདེན་དགོས་ཞེས་འཁོད་པའི་ཕྲེད་དར་འཕྱར་ཏེ་རྒྱ་ནག་གི་བདེ་སྲུང་བློན་ཆེན་ལ་ངོ་རྒོལ་བྱས་ཡོད་པ་མ་ཟད་སྐབས་དེར་གྲོང་ཁྱེར་སྤྱི་ཁྱབ་གཞོན་པ་ Ference Garencser ལགས་ཀྱིས་ཚོགས་ཁང་གི་སྒེའུ་ཁུང་ཕྱོགས་སུ་བོད་ཀྱི་རྒྱལ་དར་སྒྲེང་འཛུགས་ཀྱིས་ Hungary གཞུང་ནས་རྒྱ་ནག་དང་ལྷན་དུ་འབྲེལ་བ་གནང་བར་ངོ་རྒོལ་གནང་འདུག སྐུ་ཞབས་ Ference ལགས་ཀྱིས་ Hungary གཞུང་གིས་རྒྱ་ནག་དམར་ཤོག་ཚོགས་པའི་དཔོན་རིགས་ལ་དགའ་བསུ་ཞུས་པར་བློ་ཕམ་ཡོད་སྐོར་དང་འབྲེལ་ནས་ དམར་ཤོག་རྒྱལ་ཁབ་ཁག་དང་ལྷན་དུ་འབྲེལ་མོལ་སྐབས་ཐིག་དམར་པོའི་ཚད་འཛིན་ཞིག་དགོས་ངེས་ཡིན་པ་དང་རྒྱ་གཞུང་གིས་འགྲོ་བ་མིའི་ཐོབ་ཐང་བརྩི་མེད་རྡོག་རོལ་གཏོང་བཞིན་པར་རྒྱལ་ཁབ་སུས་ཀྱང་སྣང་མེད་དུ་བཞག་རྒྱུ་མེད་པར་གསུངས་འདུག Budapest གྲོང་ཁྱེར་སྤྱི་ཁྱབ་གཞོན་པ་སྐུ་ཞབས་ Ference Garenscer ལགས་དེ་སྔ་ཕྱི་ལོ་ ༢༠༡༣ ལོར་བཞུགས་སྒར་དྷརྨ་ས་ལར་ཕེབས་མྱོང་ཡོད་པ་དང་སྐབས་དེར་ཁོང་གིས་བོད་ཀྱི་ཆོས་དང་རིག་གཞུང་། ལོ་རྒྱུས་དང་དཀའ་སྡུག་བཅས་ཀྱི་ཐོག་མཁྱེན་རྟོགས་བྱུང་ཡོད་པ་ལྟར་བོད་དོན་ལ་གདུང་སེམས་མཉམ་བསྐྱེད་སླར་ལྷག་གནང་མཁན་ཞིག་ཏུ་གྱུར་ཡོད་པ་རེད།ཡུ་རོབ་ཁུལ་གྱི་བརྒྱུད་ལམ་ཁག་གིས་རྒྱ་ནག་གི་བདེ་སྲུང་བློན་ཆེན་གྱི་ངོས་ནས་ཐེངས་འདིའི་འཚམས་གཟིགས་དེ་ཙོ་བོ་རྒྱལ་ཁབ་ཕྱོགས་གཉིས་དབར་དམག་གི་འབྲེལ་ལམ་ཤུགས་ཆེ་རུ་གཏང་རྒྱུར་ཆེད་དམིགས་བྱས་ཡོད་པ་བཀོད་འདུག Hungary གཞུང་འཛིན་ཚོགས་པས་བརྒྱུད་ལམ་ཁག་ལ་ཐེངས་འདིའི་རྒྱ་ནག་གི་བློན་ཆེན་སྐོར་སྐྱོད་དང་འབྲེལ་བའི་གནས་ཚུལ་གང་ཡང་འགྲེལ་བརྗོད་བྱས་པ་དེ་ལྟར་ཡང་ཉེ་ཆར་ Hungary གཞུང་གིས་རྒྱ་ནག་གི་ཏོག་དབྱིབས་སྔོན་ཁབ་གཉིས་པ་དེ་ངོས་ལེན་བྱས་པ་དང་འབྲེལ། ད་ལན་གྱི་ཐུག་འཕྲད་དེའི་ཐོག་རྒྱ་ནག་གི་ཏོག་དབྱིབས་སྔོན་ཁབ་ཚོང་འགྲེམས་དང་འབྲེལ་བའི་གླེང་མོལ་བྱ་རྒྱུ་ཡིན་པར་ཚོད་དཔག་གནང་བཞིན་འདུག རྩ་བའི་ Hungary ཡིས་རྒྱ་ནག་དང་ཨུ་རུ་སུའི་ཏོག་དབྱིབས་སྔོན་ཁབ་ལ་ངོས་བཞེས་གནང་བ་དང་འབྲེལ་ནས་ཡུལ་དེའི་མང་ཚོགས་ཁྲོད་སྔོན་ཁབ་རྒྱག་རྒྱུའི་ལས་གཞི་དེ་ཡུ་རོབ་རྒྱལ་ཁབ་གཞན་ལས་ཚགས་ཚུད་པ་དང་མགྱོགས་པ་འགྲོ་བཞིན་ཡོད་པ་བརྗོད་ཀྱི་ཡོད་ཀྱང་། ཁ་ཉིན་ཚེས་ ༣༡ ཉིན་ Hungary ནང་ད་བར་ཉིན་མ་གཅིག་གི་ནང་དུ་ཏོག་དབྱིབས་གཉན་རིམས་འོག་འདས་གྲོངས་སུ་གྱུར་མཁན་གྱི་གྱི་གྲངས་འབོར་ཆེ་ཤོས་ཆགས་ཡོད་པ་དང་དེ་ཉིན་མི་ ༣༠༢ གཉན་རིམས་རྐྱེན་གྱིས་འདས་གྲོངས་སུ་གྱུར་ཡོད་པ་རེད།  ད་བར་ཧང་གྷི་རིར་ཏོག་དབྱིབས་གཉན་རིམས་རྐྱེན་གྱིས་འདས་གྲོངས་སུ་གྱུར་བའི་གྲངས་འབོར་དེ་ ༢༠༧༠༠ ལྷག་ཆགས་ཡོད་པ་རེད།

ཨི་ཊ་ལི་བོད་དོན་རྒྱབ་སྐྱོར་ཚོགས་པ་དང་ Italy ནང་དུ་རྟེན་གཞི་བྱས་པའི་ Bitter Winter ཞེས་པའི་གསར་ཁང་། དེ་བཞིན་ Heritage of Tibet དང་ AREF International བཅས་ཚོགས་པ་བཞིས་ཟུང་འབྲེལ་ཐོག་དྲྭ་རྒྱ་བརྒྱུད་ཨི་ཊ་ལིའི་གྲོས་ཚོགས་འཐུས་མི་ཁག་ཅིག་གདན་འདྲེན་ཞུས་ཏེ་རྒྱ་གཞུང་གིས་བོད་དང་ཤིན་ཅང་ནང་འགྲོ་བ་མིའི་ཐོབ་ཏང་དང་ཁོར་ཡུག་རྩ་མེད་བཏང་བའི་གནད་དོན་ཐོག་གླེང་མོལ་གྱི་ལས་རིམ་ཞིག་གོ་སྒྲིག་གནང་འདུག ཕྱི་ཟླ་ ༣ ཚེས་ ༢༩ ཉིན་ Heritage of Tibet   ཞེས་ཨི་ཊ་ལི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ Claudio Cardelli ལགས་ཀྱིས་གཙོ་སྐྱོང་གནང་བའི་གླེང་མོལ་གྱི་ལས་རིམ་དེའི་ཐོག་ཨི་ཊི་ལིའི་གྲོས་ཚོགས་འཐུས་མི་ Luciano Nobili ལགས་དང་ Roberto Rampi ལགས། Paolo Formentini ལགས། Piero Verni ལགས། Antonella Incerti ལགས། དེ་བཞིན་འཛམ་གླིང་ཡུ་གུར་ལྷན་ཚོགས་ཀྱི་ཚོགས་གཙོ་ Dolkun Isa ལགས་དང་སུད་སི་སྐུ་ཚབ་དོན་གཅོད་ཁང་གི་འབྲེལ་ཡོད་ལས་བྱེད་འཕྲིན་ལས་ཆོས་སྐྱིད་ལགས་བཅས་མཉམ་ཞུགས་གནང་འདུགདྲྭ་ཐོག་གི་གླེང་མོལ་དེའི་ཐོག་བོད་ཀྱི་གཅེས་ནོར་ཚོགས་པའི་ཚོགས་གཙོ་ Piero Verni ལགས་ཀྱིས་རྒྱ་ནག་གཅིག་གི་སྲིད་བྱུས་སྐོར་གསུངས་པ་དང་སྦྲགས། རྒྱ་ནག་གིས་ཧོང་ཀོང་ཐོག་བཞག་པའི་རྒྱལ་སྤྱིའི་ཁྲིམས་སྒྲིག་ལ་བརྩི་མེད་བཏང་བའི་གནད་དོན་ལུང་འདྲེན་གྱིས་རྒྱ་ནག་གི་དགུན་དུས་ཨོ་རྩེད་འཚོགས་རྒྱུར་ངོ་རྒོལ་གནང་དགོས་གལ་གསུངས་འདུག དེ་བཞིན་ Luciano Nobili ལགས་ཀྱིས་ཉེ་ཆར་ཨ་རིའི་སྲིད་འཛིན་མཆོག་གིས་མཚན་རྟགས་བཀོད་པ་དང་འབྲེལ་ནས་ཁྲིམས་སུ་བཅས་པའི་ནང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ༸འི་ཡང་སྲིད་ངོས་འཛིན་བྱ་རྒྱུའི་འགན་དབང་དང་ཨ་རི་གཞུང་གིས་བོད་མིའི་སྒྲིག་འཛུགས་ནི་ཁྲིམས་མཐུན་གྱི་སྒྲིག་འཛུགས་ཤིག དེ་བཞིན་བོད་མིའི་སྒྲིག་འཛུགས་ཀྱི་འགོ་ཁྲིད་སྲིད་སྐྱོང་མཆོག་ཡིན་པ་ངོས་འཛིན་གནང་གནང་དགོས་པ་སོགས་ཀྱི་འབྲུ་དོན་འཁོད་པའི་བོད་དོན་ཁྲིམས་གཞིར་དགའ་བསུའི་འཚམས་འདྲི་གནང་བ་དང་སྦྲགས། ཁོང་གིས་སྐབས་དེར་རྒྱལ་སྤྱིའི་ཨོ་ལམ་པིག་རྩེད་འགྲན་ཚོགས་པར་རྒྱ་ནག་ཏུ་ཨོ་རྩེད་གོ་སྒྲིག་གནང་རྒྱུའི་མཆན་གནང་རྒྱུ་མེད་པར་ངོ་རྒོལ་གནང་དགོས་པའི་འབོད་སྐུལ་གནང་འདུགསྐབས་དེར་ Roberto Rampi ལགས་ཀྱིས་བོད་ཀྱི་གནད་དོན་ཐད་ལ་གདུང་སེམས་མཉམ་བསྐྱེད་གནང་བ་དང་འབྲེལ་ནས་མུ་མཐུད་རྒྱབ་སྐྱོར་གནང་ངེས་ཀྱི་ཞལ་བཞེས་གནང་བ་མ་ཟད།གལ་ཏེ་ང་ཚོས་རྒྱ་ནག་གཞུང་གིས་བོད་དང་ཤིན་ཅང་། ཧོང་ཀོང་བཅས་ཀྱི་ནང་དུ་ཁྲིམས་འགལ་གྱི་རང་བཞིན་ཐོག་ནས་གཞི་རྩའི་འགྲོ་བ་མིའི་ཐོབ་ཐང་རྡོག་རོལ་བརྩི་མེད་བཏང་བའི་གནད་དོན་ཐད་གང་ཡང་མ་བཤད་ཚེ་དེས་འགྲོ་བ་མིའི་ཐོབ་ཐང་གདལ་བཤིག་གི་བྱ་སྤྱོད་ལ་རྒྱབ་སྐྱོར་བྱེད་པ་མཚོན་སྐོར་གསུངས་འདུག དེ་མཚུངས་སུ་ Antonella Incerti ལགས་ཀྱིས་ཁོང་དེ་སྔོན་བཞུགས་སྒར་དྷརྨ་ས་ལར་ཆེད་བཅར་གྱིས་༸གོང་ས་མཆོག་དང་མཇལ་མོལ་ཞུས་པ་དང་སྦྲགས། རྒྱ་ནག་གཞུང་གིས་འཛམ་གླིང་གི་སྣེ་གསུམ་པར་གྲགས་པའི་བོད་ཀྱི་ཁོར་ཡུག་གཏོར་བཤིག་བཏང་བའི་གནད་དོན་ཐོག་བཀའ་བསྡུར་ཞུ་རྒྱུའི་གོ་སྐབས་བྱུང་སྐོར་དྲན་གསོ་དང་ཆབས་ཅིག བོད་ནང་ལ་ཆེས་རྒྱ་ཆེ་བའི་ཆུ་རག་གསར་རྒྱག་གི་ལས་དོན་སྤེལ་བ་དེས་རང་བྱུང་ཁོར་ཡུག་ལ་ཚོད་དཔག་དཀའ་བའི་ངལ་བ་འཕྲད་གཞིར་གྱུར་ཡོད་པ་གསུངས་འདུགདེ་བཞིན་ཨི་ཊ་ལིའི་གྲོས་ཚོགས་ཀྱི་ཕྱི་སྲིད་ལས་དོན་ཚོགས་ཆུང་གི་ཚོགས་གཞོན་ Paolo Formentini ལགས་ཀྱིས་ཀྱང་རྒྱ་ནག་གིས་རང་ཉིད་ཀྱི་དྲག་ཤུགས་ཆེ་བའི་སྲིད་བྱུས་ཁག་འཁྱོག་བཤད་དྲིལ་བསྒྲགས་དང་གོ་ལར་འཇིགས་སྐུལ་བྱེད་ཀྱི་ཡོད་པ་མ་ཟད། ཨ་རི་དང་ཁེ་ན་ཌས་དེ་སྔོན་རྒྱ་ནག་གི་ཡུ་གུར་མི་རིགས་རྩ་མེད་གཏོང་བའི་སྲིད་བྱུས་ལ་འགོག་ཐབས་ཀྱི་བཞེངས་ཕྱོགས་གསལ་པོ་བཟུང་དོན་ལྟར་རྒྱལ་ཁབ་གཞན་ཚོས་དེའི་ཐོག་ཁ་གསལ་གྱི་བསྒྲགས་གཏམ་སྤེལ་དགོས་པའི་གཞེན་སྐུལ་གནང་འདུག་པ་དང་། གཞན་ཡང་འཛམ་གླིང་ཡུ་གུར་ལྷན་ཚོགས་ཀྱི་ཚོགས་གཙོ་ Dolkun Isa ལགས་ཀྱི་ངོས་ནས་ཚོར་ཤུགས་ཆེན་པོས་ཡུ་གུར་མི་རིགས་རྩ་མེད་བཟོ་བའི་སྲིད་བྱུས་ལག་བསྟར་བྱེད་མུས་འགོག་ཐབས་སླད་དུ་འཚོགས་ལ་ཉེ་བའི་ ༢༠༢༢ ལོའི་རྒྱ་ནག་གི་དགུན་དུས་ཨོ་ལམ་པིག་རྩེད་འགྲན་འཚོགས་རྒྱུར་ངོ་རྒོལ་གནང་དགོས་པ་གསུངས་འདུག Bitter Winter  གསར་ཁང་གི་ངེས་སྟོན་པ་སྐུ་ཞབས་ Marco Respinti ལགས་ཀྱིས་རྒྱ་ནག་གཞུང་གིས་ཁྲིམས་འགལ་གྱི་ཐོག་ནས་བོད་བརྒྱུད་ནང་བསྟན་གྱིས་གཙོས་པའི་ཡུ་གུར་གྱི་ཁ་ཆེ་བ་ཚོ་དང་ཧྥ་ལུང་གྷོང་། ཡི་ཤུ་བཅས་ཀྱི་ཆོས་བརྒྱུད་ཉམས་བཞེས་གནང་མཁན་ཚོར་སྡང་འཛིན་བྱེད་བཞིན་པ་མ་ཟད་ལྷག་དོན་བོད་མི་དང་ཡུ་གུར་བ་ཚོའི་ངོ་བོ་རྩ་མེད་བཟོ་ཐབས་ཀྱི་སྲིད་བྱུས་འདྲ་མིན་སྤེལ་མུས་ཡིན་པའི་གནད་དོན་ཁག་མངོན་གསལ་གནང་བ་དང་ཆབས་ཅིག རྒྱ་ཁབ་གཞན་ཚོས་ཀྱང་གོང་གི་གནད་དོན་དེ་དག་ཐད་ལ་དགོངས་བཞེས་ཀྱིས་རྒྱ་ནག་གི་དགུན་དུས་ཨོ་རྩེད་འཚོགས་རྒྱུར་འགོག་ཐབས་གནང་དགོས་པའི་འབོད་སྐུལ་བསྐྱར་ནན་གནང་འདུགསྐབས་དེར་སུད་སི་སྐུ་ཚབ་དོན་གཅོད་ཁང་གི་འབྲེལ་ཡོད་ལས་བྱེད་འཕྲིན་ལས་ཆོས་སྐྱིད་ལགས་ཀྱིས་རྒྱ་ནག་གཞུང་གིས་བོད་ནང་ལ་འགྲོ་བ་མིའི་ཐོབ་ཐང་བརྩི་མེད་རྡོག་རོལ་དང་བོད་མིར་མི་སྤྱོད་ལས་འདས་པམནར་གཅོད། མི་རིགས་དབྱེ་འབྱེད་སོགས་འཆར་ལྡན་གྱི་སྲིད་བྱུས་ལག་བསྟར་བྱེད་བཞིན་ཡོད་པ་ངོ་སྤྲོད་དང་། ལྷག་དོན་རྒྱལ་སྤྱིའི་གཞུང་ཚོགས་ཁག་ལ་བོད་དང་ཤིན་ཅང་། ཧོང་ཀོང་། རྒྱ་ནག་སྐམ་ས་ཆེན་མོ་བཅས་ཀྱི་འགྲོ་བ་མིའི་ཐོབ་ཐང་གི་གནད་དོན་ཐད་ལ་མུ་མཐུད་རྒྱབ་སྐྱོར་དང་གླེང་སློང་གནང་དགོས་པའི་རེ་སྐུལ་ནན་པོ་ཞུས་འདུག གསར་འགོད་པ་དང་རྩོམ་པ་པོ་ Antonio Selvatici ལགས་ཀྱིས་ཨི་ཊ་ལི་གཞུང་གིས་རྒྱ་ནག་གི་བརྒྱུད་གཅིག་ལམ་གཅིག་གི་ཐབས་བྱུས་ཐོག་མིང་རྟགས་བཀོད་པའི་གྲུབ་འབྲས་སུ་རྒྱ་ནག་གིས་ཨི་ཊ་ལིའི་མཚོ་དམག་མཁོ་ཆས་འཇོག་སའི་ལྟེ་གནས་གཉིས་ཀྱི་ཐོག་དམ་དྲག་ཆེས་ཆེར་བྱས་ཡོད་པ་ངོ་སྤྲོད་གནང་བ་དང་། རྒྱ་ནག་གིས་འཛུགས་སྐྲུན་གྱི་ལས་གཞིར་ཁ་གཡར་ནས་བརྒྱུད་གཅིག་ལམ་གཅིག་གི་སྲིད་བྱུས་སྤེལ་བ་དེ་ནི་དོན་དམ་ཐོག་དམག་བྱུས་ཤིག་ཡིན་པར་མངོན་གསལ་གནང་འདུག

རྒྱ་གར་གྱི་སྲིད་འཛིན་སྐུ་ཞབས་RamNathKovindམཆོག་ཉེ་ལམ་བྲང་ཁོག་བདེ་མིན་གྱི་རྐྱེན་གྱིས་སྨན་ཁང་ཁག་ལ་བསྟེན་གཏུགས་གནང་འབྲས་སུ་སྙིང་རྩར་གཤག་བཅོས་གནང་རྒྱུའི་ལམ་སྟོན་ཕེབས་པ་ལྟར། ཁ་སང་ཞོགས་པ་AIIMSསྨན་ཁང་དུ་སྙིང་རྩར་གཤག་བཅོས་གནང་ནས་གཤག་བཅོས་ལེགས་གྲུབ་བྱུང་བའི་གནས་ཚུལ་ཐོན་པ་དང་འབྲེལ། དེ་རིང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གིས་twitterདྲྭ་ལམ་བརྒྱུད་སྲིད་འཛིན་མཆོག་གི་སྨན་བཅོས་ལེགས་གྲུབ་བྱུང་བར་མགོན་པོ་༸གང་ཉིད་མཆོག་ཐུགས་བདེ་བོ་བྱུང་ཞེས་སྲིད་འཛིན་གྱི་མཚན་ཐོག་ཏུ་འཚམས་འདྲི་ཞིག་སྩལ་གནང་མཛད་འདུགམགོན་པོ་༸གང་ཉིད་མཆོག་གིས་སྲིད་འཛིན་མཆོག་སྙུང་གཞི་ལས་མགྱོགས་མྱུར་དྲག་སྐྱེད་ཡོང་རྒྱུའི་ཐུགས་སྨོན་མཛད་པ་དང་ཆབས་ཅིགསྲིད་འཛིན་ཁོང་ནི་ལོ་མང་ནས་ཡིད་ཆེས་གནང་སའི་གྲོགས་པོ་རྙིང་པ་ཞིག་ཡིན་པ་བཀའ་སྩལ་འདུག གཞི་རྩའི་སྲིད་འཛིན་RamNathKovindམཆོག་བདུན་ཕྲག་སྔོན་མའི་རེས་གཟའ་པ་སངས་ཉིན་བྲང་ཁོག་བདེ་མིན་གྱི་རྐྱེན་གྱིས་ལྡི་ལིར་རྟེན་གཞི་བྱས་པའི་Army Hospital ResearchAndReferralཞེས་པའི་སྨན་ཁང་ལ་བརྟག་དཔྱད་གནང་བར་ཕེབས་ནས་རྟོག་ཞིབ་སླད་ཟུར་འཇོག་གནང་འདུག་པ་དང་།ཕྱི་ཉིན་དེར་AIIMSསྨན་ཁང་ལ་བརྗེ་ལན་གནང་ནས་སྨན་པས་སྙིང་རྩ་གཤག་བཅོས་གནང་རྒྱུའི་ལམ་སྟོན་གནང་དོན་བཞིན་ཁ་སང་ཕྱི་ཚེས་༣༠ ཉིན་གྱི་ཞོགས་པ་གཤགབཅོས་ལེགས་གྲུབ་བྱུང་ནས་ད་ཆ་ཁོང་སྨན་ཁང་དེའི་སྨན་པ་རྒན་གྲས་ཁག་ཅིག་གིས་གཟིགས་རྟོག་དང་སྨན་བཅོས་གནང་བ་བཞིན་སྐུ་ཁམས་བདེ་ཐང་ཡོད་པ་རེད་འདུག