Tibetan Royal Year of 2151 | Year of the Wood Dragon

གསར་འགྱུར།

༢༠༡༩ ནང་རྒྱ་ནག་ནང་འགྲོ་བ་མིའི་ཐོབ་ཐང་གི་གནས་སྟངས་དང་ཁྲིམས་ལུགས་དབང་འཛིན་ཇེ་སྡུག་ཏུ་ཕྱིན་འདུག

CECC ཞེས་ཨ་མི་རི་ཀའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་གིས་ཕྱི་ལོ་ ༢༠༡༩ ལོའི་ལོ་འཁོར་སྙན་ཐོ་འདོན་སྤེལ་གནང་བའི་ནང་ལ་འདས་ལོ་ ༢༠༡༩ ནང་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་དང་ཁྲིམས་ལུགས་དབང་འཛིན་ཇེ་སྡུག་ཏུ་ཕྱིན་ཡོད་པ་ཐེར་འདོན་དང་སྦྲགས། ཨ་རི་མི་ཀའི་འཛིན་སྐྱོང་དང་གྲོས་ཚོགས་ཀྱིས་རྒྱ་ནག་ནང་གི་འགྲོ་བ་མིའི་ཐོབ་ཐང་ཐོག་ངེས་པར་དུ་གླེང་སློང་དང་ལྷག་དོན་སྲིད་འཛིན་སྐུ་ཞབས་ Donald Trump མཆོག་ནས་རྒྱ་ནག་གཞུང་ལ་༸གོང་ས་མཆོག་གི་༸སྐུའི་ཡང་སྲིད་གནད་དོན་ཐད་ལ་ཐེ་བྱུས་བྱེད་དབང་མེད་ཅེས་གསུངས་དགོས་པའི་དགོས་འདུན་ཁག་གཅིག་ཆེད་བཏོན་གནང་འདུག ཁ་སང་ཕྱི་ཚེས་ ༨ ཉིན་ཨ་མི་རི་ཀའི་གྲོས་ཚོགས་ཀྱི་ཚོགས་ཁང་ཨང་ ༢༠༠ ནང་ལ་ཨ་མི་རི་ཀའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་གི་ཚོགས་གཙོ་གྲོས་ཚོགས་འོག་མའི་འཐུས་མི་སྐུ་ཞབས་ James McGovern ལགས་དང་མཉམ་འབྲེལ་ཚོགས་གཙོ་གྲོས་ཚོགས་གོང་མའི་འཐུས་མི་སྐུ་ཞབས་ Marco Rubio ལགས་གཉིས་ཀྱིས་དབུས་པའི་ཚོགས་ཆུང་གི་ཚོགས་མི་གྲོས་ཚོགས་འཐུས་མི་རྣམ་པ་ལྷན་ཞུགས་ཐོག་ཕྱི་ལོ་ ༢༠༡༩ ལོའི་ཚོགས་ཆུང་གི་ལོ་འཁོར་སྙན་འདོན་སྤེལ་གནང་ཡོད་པ་དང་། དེའི་ནང་རྒྱ་ནག་དམར་ཤོག་ཚོགས་པ་ཆེད་འཛུགས་བྱས་པ་ནས་བཟུང་སྟེ་རྒྱ་ནག་གཞུང་གི་འགྲོ་བ་མིའི་གཞི་རྩའི་ཐོབ་ཐང་སྤྱི་དང་ལྷག་པར་དུ་གཞི་རིམ་མང་ཚོགས་ཀྱི་སྨྲ་བརྗོད་དང་འདུ་འཛོམས། དེ་བཞིན་ཆོས་དད་རང་དབང་སོགས་ལ་ཚོད་འཛིན་དམ་དྲག་བྱེད་མུས་ཁར་ཕྱི་ལོ་ ༢༠༡༣ ལོར་ཞི་ཅིན་ཕིང་རྒྱ་ནག་གི་སྲིད་འཛིན་ཆགས་པ་ནས་བཟུང་རྒྱ་ནག་གི་བདེ་འཇགས་དང་གཏན་ལྷིང་གི་མིང་བྱང་འོག་ཁྲིམས་ལུགས་གསར་བཟོ་མང་དག་ཅིག་གི་བརྒྱུད་ནས་རྒྱལ་ནག་ཁྱོན་ཡོངས་སུ་དམ་དྲག་བྱེད་ཤུགས་ཆེ་རུ་བཏང་ཡོད་པ་བཀོད་འདུག འདས་ལོ་ ༢༠༡༩ ནང་ལ་རྒྱ་གཞུང་གིས་གཏན་འབེབས་བྱས་པའི་ཁྲིམས་ལུགས་གསར་དེ་དག་བེད་སྤྱོད་བྱས་ཏེ་སྤྱི་ཚོགས་དང་ཆབ་སྲིད་ལས་དོན་ལ་དམ་དྲག གསར་འགོད་རང་དབང་ལ་ཚོད་འཛིན། དེ་བཞིན་བོད་དང་ཡུ་གུར་གཙོས་པའི་གྲངས་ཉུང་མི་རིགས་ཀྱི་ས་ཁུལ་ཁག་ཏུ་དེང་དུས་ཀྱི་གསང་བའི་ལྟ་སྲུང་འཕྲུལ་ཆས་སྤྱོད་དེ་མང་ཚོགས་ཀྱི་ལས་དོན་སྤྱི་རིགས་ཐོག་ལྟ་སྲུང་གིས་འཛིན་བཟུང་བྱས་པ་ཐེར་འདོན་གནང་སྟེ་འདས་ལོ་ ༢༠༡༩ ནང་རྒྱ་ནག་ནང་འགྲོ་བ་མིའི་ཐོབ་ཐང་གི་གནས་སྟངས་སྤྱི་དང་ཁྲིམས་ལུགས་དབང་འཛིན་ལག་བསྟར་བྱེད་ཕྱོགས་ཇེ་སྡུག་ཏུ་ཕྱིན་འདུག་ཅེས་གསུངས་འདུག ལྷག་པར་དུ་སྙན་ཐོ་དེའི་ནང་བོད་དང་འབྲེལ་བའི་གནས་ཚུལ་ཁོངས་སུ་སྔར་ལོ་ ༢༠༡༩ ལོ་དེ་ནི་༸གོང་ས་མཆོག་གིས་དབུས་པའི་བོད་མི་རྣམས་བཙན་བྱོལ་དུ་འབྱོར་ནས་ལོ་ངོ་ ༦༠ འཁོར་བཞིན་ཡོད་ཀྱང་རྒྱ་ནག་གཞུང་ནས་ཕྱོགས་གཉིས་ཀྱི་དཀའ་རྙོག་ཞི་འགྲིག་ཡོང་ཐབས་སུ་༸གོང་ས་མཆོག་གམ་ཡང་ན་མགོན་པོ་༸གང་ཉིད་མཆོག་གི་སྐུ་ཚབ་དང་ལྷན་དུ་གྲོས་མོལ་ཡོང་ཐབས་སུ་དོན་དམ་གྱི་འབད་བརྩོན་རྩ་་བ་ནས་མ་གནང་བའི་ཁར་འདས་ལོའི་ནང་ཐབས་བྱུས་ལྡན་པའི་ཐོག་བོད་མི་མང་ཚོགས་ཀྱི་གཞི་རྩའི་འགྲོ་བ་མིའི་ཐོབ་ཐང་རྡོལ་རོལ་བཏང་བ་མ་ཟད། བོད་ཐོག་རྒྱབ་ཤ་དཀར་པོ་ཞེས་པའི་ཡིག་ཆ་འདོན་སྤེལ་བྱས་ཏེ་༸གོང་ས་མཆོག་གི་༸སྐུའི་ཡང་སྲིད་ཀྱི་གནད་དོན་ཐག་གཅོད་བྱེད་རྒྱུའི་འགན་དབང་རྒྱ་ནག་གཞུང་ལ་ཡོད་སྐོར་བརྗོད་པ་སོགས་ཐེར་འདོན་གྱིས་རྒྱ་གཞུང་གི་ཐེ་བྱུས་ཅན་གྱི་བྱ་སྤྱོད་དེ་དག་བོད་མིའི་ཆོས་དད་རང་དབང་ལ་རྡོག་རོག་བཏང་བ་ཞིག་རེད་ཅེས་བཀོད་འདུག རྒྱ་གཞུང་གིས་བོད་ས་ཁྱོན་ཡོངས་སུ་ཆོས་ཕྱོགས་དང་ཚོགས་པ་ཁག་གི་ལས་དོན་ལ་དམ་དྲག་བྱེད་མུས་ཁྲོད་སྔ་ལོ་རྒྱ་གཞུང་གིས་དབྱེ་བའི་བོད་རང་སྐྱོང་ལྗོངས་ཁུལ་དུ་རྒྱལ་སྤྱིའི་སྐུ་ཚབ་མི་སྣ་དང་གསར་འགོད་པ་རྣམས་འགྲོ་བསྐྱོད་བྱེད་རྒྱུར་སྔར་དམ་དྲག་ཆེ་རུ་བཏང་བ་དེས་དམ་དྲག་ཆེ་ས་བྱང་ཀོ་རི་ཡའི་རྒྱལ་ཁབ་ནང་འགྲོ་རྒྱུ་ལས་བོད་རང་སྐྱོང་ལྗོངས་ནང་འགྲོ་རྒྱུ་དཀའ་བ་ཆགས་འདུག་ཅེས་གསུངས་འདུག གཞན་ཡང་ཤོགས་གྲངས་ ༣༢༣ ཅན་གྱི་ལོ་འཁོར་སྙན་ཐོ་དེའི་ནང་ལ་རྒྱ་ནག་གཞུང་གིས་འདས་ལོའི་ནང་ཧོང་མི་མང་གི་ཞི་བའི་ལས་འགུལ་ལ་དྲག་པོས་ཐེ་བྱུས་བྱས་པའི་གནས་སྟངས་དང་། སྔར་ལོ་རྒྱ་ནག་གིས་དྲུག་བཞི་དོན་རྐྱེན་བྱུང་ནས་ལོ་ངོ་ ༣༠ འཁོར་བཞིན་ཡོད་ཀྱང་རྒྱ་ནག་གཞུང་ནས་སྐབས་དེའི་དངོས་ཡོད་གནས་སྟངས་དང་འབྲེལ་བའི་གནས་ཚུལ་རྣམས་རྒྱལ་སྤྱིའི་མང་ཚོགས་ལ་འགྲེལ་བརྗོད་མ་བྱས་པར་རྗེས་དྲན་གྱི་ལོ་ཚིག་སྲུང་བརྩི་ཞུ་མཁན་གྱི་གཞི་རིམ་མང་ཚོགས་རྣམས་ལ་དམ་དྲག་བྱས་པར་མ་ཟད་ཡུ་གུར་མི་མང་ས་ཡ་ལྷག་བཀག་ཉར་གྱིས་ཆབ་སྲིད་ཀྱི་སློབ་གསོ་སྤྲོད་བཞིན་པ་སོགས་ཞིབ་ཕྲ་འགྲེལ་བརྗོད་དང་འབྲེལ་ཏེ་རྒྱ་གཞུང་གིས་བྱེད་སྟངས་དེ་ནི་འགྲོ་མིའི་ཐོག་ལ་སྤེལ་བའི་འཁྲིམས་འགལ་གྱི་ནག་ཉེས་ཚབས་ཆེན་ཞིག་རེད་ཅེས་གསུངས་འདུག གཞི་རྩའི་ CECC ཞེས་ཨ་མི་རི་ཀའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་ནས་ལོ་ལྟར་རྒྱ་ནག་ནང་གི་འགྲོ་བ་མིའི་ཐོབ་དང་ཁྲིམས་ལུགས་ལས་དོན་སོགས་དང་འབྲེལ་ཨ་རིའི་གྲོས་ཚོགས་ནང་ཉན་ཞིབ་ལས་རིམ་དང་། ཁྲིམས་འཆར་འདོན་སྤེལ་སོགས་གནང་མུས་ལྟར་འདས་ལོའི་ནང་བོད་དང་ཤིན་ཅང་། ཧོང་ཀོང་། རྒྱ་ནག་བཅས་ཀྱི་ཐོག་ཉན་ཞིབ་ལས་རིམ་བཞི་དང་ལྷག་པར་དུ་ཕྱི་ཟླ་ ༩ ཕྱི་ཚེས་ ༢༤ ཉིན་ཚོགས་ཆུང་དེའི་ཚོགས་གཙོ་དང་སྐུ་ཞབས་ Jim McGovern ལགས་དང་མཉམ་འབྲེལ་ཚོགས་གཙོ་སྐུ་ཞབས་ Marco Rubio ལགས་གཉིས་ནས་ཡུལ་དེའི་གྲོས་ཚོགས་གོང་འོག་གཉིས་སུ་ Tibetan Policy and Support Act of 2019 ཞེས་པའི་ཨ་རིའི་བོད་དོན་ཁྲིམས་འཆར་གསར་པ་ཞིག་ཆེད་འདོན་གནང་ཡོད་པ་དང་། ཁ་སང་ལོ་འཁོར་སྙན་ཐོ་འདོན་སྤེལ་གནང་སྐབས་སྐུ་ཞབས་སྐུ་ཞབས་ James McGovern ལགས་ཀྱིས་བོད་དོན་ཁྲིམས་འཆར་གསར་པ་དེ་བདུན་ཕྲག་རྗེས་མའི་ནང་གྲོས་ཚོགས་གོང་འོག་གཉིས་སུ་གཏན་འབེབས་ཐུབ་པའི་རེ་བ་ཡོད་པ་གསུངས་འདུག རྩའི་ཁ་སང་ཨ་མི་རི་ཀའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་ནས་རྒྱ་ནག་དང་འབྲེལ་བའི་ལོ་འཁོར་སྙན་ཐོ་འདོན་སྤེལ་དང་སྦྲགས་ཏེ་ཨ་མི་རི་ཀའི་སྲིད་འཛིན་ Donald Trump མཆོག་རྒྱ་ནག་དང་ལྷན་དུ་ཆབ་སྲིད་ཀྱི་འབྲེལ་བ་བྱེད་སྐབས་བོད་དང་ཧོང་ཀོང་། ཤིན་ཅང་སོགས་ཀྱི་གནད་དོན་གླེང་དགོས་པ་དང་། རྒྱ་ནག་གཞུང་ལ་༸གོང་ས་མཆོག་གི་༸སྐུའི་ཡང་སྲིད་གནད་དོན་ཐོག་ཐེ་བྱུས་བྱེད་རྒྱུའི་ཐོབ་ཐང་མེད་པ། འགྲོ་བ་མིའི་ཐོབ་ཐང་རྡོལ་རོལ་གཏོང་བཞིན་པའི་གནད་དོན་རྣམས་ཐེར་འདོན་བྱེད་དགོས་པ་མ་ཟད་དེ་སྔ་ ༢༠༡༨ ལོར་གཏན་འབེབས་གནང་བའི་བོད་ནང་འདྲ་མཉམ་ཐོག་འགྲུལ་བསྐྱོད་ཆོག་པའི་ཁྲིམས་འཆར་ལག་བསྟར་བྱེད་དགོས་པ་སོགས་ཀྱི་འདོན་འདུན་ཁག་གཅིག་ཆེད་བཏོན་གནང་ཡོད་པ་རེད།

ཆོས་རིག་དྲུང་ཟུར་༸སྐྱབས་རྗེ་སྒ་རྗེ་ཁམས་སྤྲུལ་འཇམ་དབྱངས་དོན་གྲུབ་མཆོག་དགོངས་པ་རྫོགས་པར་གཞུང་འབྲེལ་མཆོད་འབུལ།

ཕྱི་ཟླ་ ༡༢ ཚེས་ ༣༠ ཉིན་རྒྱ་གར་གྱི་རྒྱལ་ས་ལྡི་ལིའི་ Max སྨན་ཁང་དུ་ཐོ་རེངས་ཚོུད་ ༡༌༥༦ ཙམ་ལ་ཆོས་རིག་དྲུང་ཟུར་༸སྐྱབས་རྗེ་སྒ་རྗེ་ཁམས་སྤྲུལ་འཇམ་དབྱངས་དོན་གྲུབ་མཆོག་དགོངས་པ་ཆོས་དབྱིངས་སུ་ཐིམ་ པའི་ཡིད་སྐྱོའི་གནས་ཚུལ་ཐོན་པ་དང་བསྟུན། དེ་རིང་ཉིན་དགུང་ཚོུད་ ༢༌༠༠ ཐོག་བོད་མིའི་སྒྲིག་འཛུགས་ཀྱི་ཆོས་རིག་ལས་ཁུངས་ཀྱིས་གོ་སྒྲིག་འོག་བཀའ་ཤག་གི་ཚོགས་ཁང་གསར་པ་སྲིད་སྐྱོང་ཚོགས་ཁང་དུ་གནས་ཆུང་སྒྲ་དབྱངས་གླིང་གི་དགེ་འདུན་པ་ཁག་ཅིག་དབུ་བཞུགས་ཐོག་བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་། སྲི་ཞུ་ལས་བྱེད་ཡོངས་ནས་དྲུང་ཟུར་དམ་པ་མཆོག་ལ་མྱ་ངན་གུས་བཏུད་ཞུ་ཕྱིར་ལྷན་འཛོམས་ཀྱིས་བསྔོ་སྨོན་གསུང་འདོན་གནང་བ་མ་ཟད། དེ་རིང་ཉིན་རྒྱབ་ནས་དབུས་ལས་ཁུངས་ཁག་ནས་ལས་མཚམས་བཞག་ཡོད་པ་རེད། སྐབས་དེར་བོད་མིའི་སྒྲིག་འཛུགས་ཀྱི་སྲིད་ཚབ་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་གིས་སྐུ་གཤེགས་དམ་པ་ཆོས་རིག་དྲུང་ཟུར་༸སྐྱབས་རྗེ་སྒ་རྗེ་ཁམས་སྤྲུལ་འཇམ་དབྱངས་དོན་གྲུབ་མཆོག་དགོངས་པ་ཆོས་དབྱིངས་སུ་ཐིམ་ཚུལ་བསྟན་པར་བོད་མིའི་སྒྲིག་འཛུགས་ཀྱི་ངོས་ནས་མྱ་ངན་གུས་བཏུད་དང་། སླད་མར་ཡང་སྤྲུལ་མགྱོགས་མྱུར་ཕེབས་པའི་སྨོན་ལམ་ཡོད་ཅེས་གསུངས་པར་མ་ཟད། དམ་པ་ཁོང་གི་ཤུལ་ལུས་སྐུ་འཁོར་ནང་མི་ཉེ་འབྲེལ་རྣམས་ལ་བོད་མིའི་སྒྲིག་འཛུགས་ཀྱི་ངོས་ནས་ཐུགས་གསོ་ཞུས་སོང་། གཞི་རྩའི་ཆོས་རིག་དྲུང་ཟུར་༸སྐྱབས་རྗེ་སྒ་རྗེ་ཁམས་སྤྲུལ་འཇམ་དབྱངས་དོན་གྲུབ་མཆོག་ནི་བོད་ཆོལ་གསུམ་ལས་མདོ་ཁམས་ཁོངས་གཏོགས་ལི་ཐང་དུ་ཡབ་ངག་དབང་ལེགས་གྲུབ་དང་ཡུམ་བསོད་ནམས་དབྱངས་ཅན་གཉིས་ཀྱི་སྲས་སུ་ཕྱི་ལོ་ ༡༩༢༨ ཟླ་ ༡༢ ཚེས་ ༢༩ ཉིན་སྐུ་འཁྲུངས་ཡོད་པ་དང་། ཕྱི་ལོ་ ༡༩༥༩ ལོར་བོད་ལ་དུས་ལོག་བྱུང་རྗེས་བཙན་བྱོལ་དུ་ཕེབས་ཡོད་པ་མ་ཟད། ཕྱི་ལོ་ ༡༩༦༡ ཙམ་ནས་གཞུང་ཞབས་ཁོངས་སུ་ཞུགས་ཏེ་སྲི་ཞུ་བའི་ཕྱག་ལས་གནང་མྱོང་ཡོད་པ་རེད། ཕྱི་ལོ་ ༡༩༨༠ ནས་ཆོས་རིག་ལས་ཁུངས་ཀྱི་དྲུང་ཆེའི་མཛད་ཁུར་བཞེས་ཏེ་བགྲེས་ཡོལ་འཔར་འགྱངས་ལོ་གསུམ་བཞུགས་པ་དང་མཏར་ ༡༩༨༦ ལོར་བགྲེས་ཡོལ་དུ་ཕེབས། ལྷག་པར་དུ་རིན་པོ་ཆེ་དམ་པ་མཆོག་གིས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་ལྟར་སྐུ་ཚེ་ཧྲིལ་པོར་ལུགས་གཉིས་ཀྱི་ཐོག་ནས་བསྟན་སྲིད་སྤྱིའི་སླད་དུ་མཛད་བཟང་དུ་མ་བསྐྱངས་མྱོང་ཡོད་པ་རེད། ཆོས་རིག་དྲུང་ཟུར་༸སྐྱབས་རྗེ་སྒ་རྗེ་ཁམས་སྤྲུལ་འཇམ་དབྱངས་དོན་གྲུབ་མཆོག་ཕྱི་ཟླ་ ༡༢ ཚེས་ ༣༠ ཉིན་རྒྱ་གར་གྱི་རྒྱལ་ས་ལྡི་ལིའི་ Max སྨན་ཁང་དུ་ཐོ་རེངས་ཚོུད་ ༡༌༥༦ ཙམ་ལ་དགོངས་པ་ཆོས་དབྱིངས་སུ་ཐིམ་པ་ནས་བཟུང་དེ་རིང་བར་ཁྱོན་ཉིན་གྲངས་བཅིུག་རིང་ལ་ཐུགས་དམ་དུ་བཞུགས་མུས་ཡིན་པ་རེད།

རྒྱ་གཞུང་གིས་ཚད་མཐོའི་འཕྲུལ་རིགས་ཁག་རྒྱལ་ཁབ་གཞན་དུ་ཕྱིར་བཙོང་གིས་འཛམ་གླིང་གི་མང་གཙོ་ཉམས་གུད་གཏོང་བཞིན་པ་མངོན་གསལ།

ཁ་སང་བཞུགས་སྒར་དུ་རྟེན་གཞི་བྱས་པའི་བོད་ཀྱི་སྲིད་བྱུས་ཉམས་ཞིབ་ཁང་གི་རྒྱ་གཞུང་གི་དྲྭ་རྒྱ་ཉམས་ཞིབ་པ་བསྟན་འཛིན་དགྲ་ལྷ་ལགས་ཀྱིས་རྒྱ་གཞུང་གིས་མང་ཚོགས་ཐོག་དམ་དྲག་བྱ་རྒྱུའི་ཚད་མཐོའི་འཕྲུལ་རིགས་ཁག་རྒྱལ་ཁབ་གཞན་ནང་དུ་ཕྱིར་བཙོང་ཞེས་པའི་བརྗོད་གཞིའི་ཐོག་ཉམས་ཞིབ་ཀྱི་དཔྱད་རྩོམ་ཞིག་སྤེལ་ཏེ་རྒྱ་ནག་དེ་འཛམ་གླིང་རྒྱལ་ཁབ་གཞན་གྱི་ནང་ནས་ལྟ་སྲུང་པར་ཆས་མང་ཤོས་བཙུགས་ཏེ་འགྲོ་བ་མིའི་གཞི་རྩའི་ཐོབ་ཐང་རྡོག་རོལ་གཏོང་མཁན་རྒྱལ་ཁབ་ཆེ་སྡུག་ཤོས་གྲས་ཤིག་ཡིན་པ་མ་ཟད། དེང་སྐབས་རྒྱ་ནག་ཏུ་སྲིད་འཛིན་ཞི་ཅིན་ཕིང་གིས་སྣེ་ཁྲིད་འོག་དེང་དུས་ཀྱི་ཚད་མཐོའི་འཕྲུལ་ཆས་སྤྱོད་ཐོག་གསར་འགྱུར་དང་གསར་འགོད་པར་དམ་དྲག་ནན་པོ་བྱས་པ་མ་ཟད་མང་ཚོགས་ཐོག་ལྟ་སྲུང་སོགས་སྔར་ལྷག་བྱས་ནས་རྒྱལ་སྤྱིའི་ཁྱོན་ལ་རྒྱ་ནག་གི་ཤུགས་རྐྱེན་ཡོད་པའི་བརྒྱུད་ལམ་གྱི་འགྲོ་ལུགས་སྤེལ་ཐབས་བྱེད་བཞིན་ཡོད་པ་མངོན་གསལ་གནང་འདུག ཁོང་གིས་ད་དུང་དཔྱད་རྩོམ་དེའི་ནང་དུ་དེང་སྐབས་རྒྱ་གཞུང་གིས་ཚད་མཐོའི་འཕྲུལ་རིགས་བཀོལ་སྤྱོད་བརྒྱུད་དེ་རྒྱ་ནག་སྤྱི་དང་སྒོས་བོད་མི་མང་ཚོགས་ཐོག་དྲག་གནོན་དང་ལྟ་སྲུང་གིས་ཁུལ་དེའི་ནང་གི་མང་ཚོགས་ཀྱི་འགྲོ་བ་མིའི་ཐོབ་ཐང་གནས་སྟངས་ཉིན་རེ་བཞིན་ཇེ་ཞན་ཇེ་སྡུག་ཏུ་འགྲོ་བཞིན་པའི་ཁྲོད་ཉེ་ཆར་རྒྱ་གཞུང་གིས་བཟོ་སྐྲུན་བྱས་པའི་མང་ཚོགས་ཐོག་དམ་དྲག་བྱ་རྒྱུའི་ཚད་མཐོའི་འཕྲུལ་རིགས་ཁག་རྒྱལ་ཁབ་གཞན་ནང་དུ་ཕྱིར་བཙོང་གིས་འཛམ་གླིང་ཁྱོན་ཡོངས་ཀྱི་མང་གཙོ་ཉམས་རྒུད་གཏོང་བཞིན་ཡོད་པར་མ་ཟད། དབང་ཆ་གཅིག་བསྡུས་རིང་ལུགས་ཀྱི་དབང་ཚད་གོ་ལ་ཁྱོན་ཡོངས་སུ་དར་སྤེལ་བྱེད་བཞིན་པའི་བྱ་སྤྱོད་ནི་ཧ་ཅང་སེམས་འཚབ་བྱ་ཡུལ་ཞིག་ཏུ་གྱུར་ཡོད་པ་གསུངས་འདུག དཔྱད་རྩོམ་དེའི་ནང་དུ་སྡེ་ཚན་ལྔར་དབྱེ་ཡོད་པ་ལྟར་ཡིད་བརྟན་སྤྱི་ཚོགས་ལམ་ལུགས་དང་རྒྱ་ནག་གི་འཕྲུལ་རིགས་བཀོལ་སྤྱོད་བརྒྱུད་དེ་རྒྱལ་སྤྱིའི་ཁྲོད་ཤུགས་རྐྱེན་སྤྲོད་ཕྱོགས། རྒྱ་ནག་ནས་བུན་གཡར་ཐོག་འཛམ་གླིང་རྒྱལ་ཁབ་གཞན་ནང་ཚད་མཐོའི་ལྟ་སྲུང་འཕྲུལ་རིགས་ཆེད་འཛུགས། ཚད་མཐོའི་འཕྲུལ་རིགས་ཁག་རྒྱལ་ཁབ་གཞན་ནང་ཕྱི་བཙོང་བྱས་པའི་ཉེན་སྲུང་མཇུག་འབྲས། དེ་བཞིན་རྒྱ་ནག་དམར་ཤོག་ཚོགས་པའི་བོད་མི་མང་ཚོགས་ཐོག་ལྟ་སྲུང་དང་འབྲེལ་བའི་ཐབས་བྱུས་བཅས་ཆགས་ཡིན་པ་རེད།

ཏཱ་ལའི་བླ་མ་དགེ་རྩས་རྡོར་གདན་གྱི་ངན་སློང་རྣམས་ལ་ཟས་དངུལ་གྱི་སྦྱིན་གཏོང་གནང་བ།

ཁ་སང་ཟླ་ ༡ ཚེས་ ༨ རེས་གཟའ་ལྷག་པ་སྟེ་༸གོང་ས་མཆོག་གི་༸སྐུའི་བླ་གཟའ་དང་བསྟུན་ཏཱ་ལའི་བླ་མའི་དགེ་རྩ་ནས་ངན་སློང་ལ་ཟས་དང་དངུལ་གྱི་སྦྱིན་པ་གནང་ཡོད་པ་རེད། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གནས་མཆོག་གནས་མཆོག་རྡོ་རྗེ་གདན་དུ་ནམ་ཆིབས་བསྒྱུར་མཛད་རིང་ལ་ཏཱ་ལའི་བླ་མ་དགེ་རྩས་༸གོང་ས་མཆོག་༸སྐུ་ཚེ་ཞབས་པད་བརྟན་ཕྱིར་དང་བོད་ཀྱི་བདེན་མཐའ་མྱུར་དུ་སེལ་སླད་རེས་གཟའ་ལྷག་པའི་ཉིན་ས་གནས་འདིར་ཡོད་པའི་ངན་སློང་ལ་ཟས་དང་དངུལ་ གྱི་སྦྱིན་པ་གནང་གི་ཡོད་པ་རེད། ཁ་སང་སྔ་དྲོ་ཚོུད་ ༡༡ ཡོལ་ཙམ་ལ་དུས་འཁོར་ཐང་ཆེན་དུ་ངན་སློང་དང་དབུལ་ཕོངས་སྟོང་ཕྲག་ལ་ཞལ་ལག་དང་ཧིན་སྒོར་བརྒྱ་རེ་དང་དེ་བཞིན་དབང་པོ་སྐྱོན་ཅན་ཚོར་ཧིན་སྒོར་ ༢༠༠ རེ་སྦྱིན་གཏོང་གནང་ཡོད་པ་རེད། གཞི་རྩའི་ཏཱ་ལའི་བླ་མ་དགེ་རྩ་ནས་༸གོང་ས་མཆོག་རྡོར་གདན་དུ་བཞུགས་ཞག་མཛད་རིང་ལ་༸སྐུའི་བླ་གཟའ་ནམ་འཁེལ་དང་བསྟུན་ངན་སློང་ལ་ཟས་དངུལ་གྱི་སྦྱིན་གཏོང་གནང་བར་ཙམ་མ་ཟད་ལོ་འཁོར་མོར་ཚེས་བཟང་དུས་བཟང་སྐབས་རྡོར་གདན་དུ་རྟེན་གཞི་བྱས་པའི་རྣམ་རྒྱལ་གྲྭ་ཚང་བརྒྱུད་དེ་ངན་སློང་དང་དབུལ་ཕོངས་ལ་གསོལ་ཆས་དང་།  སྐབས་རེ་ཉིན་དགུང་ཞལ་ལག དེ་བཞིན་ཕྱག་དངུལ་སོགས་གནང་གི་ཡོད་པ་རེད།  

བྷི་ཧཱར་མངའ་སྡེའི་སྤྱི་ཁྱབ་བློན་ཆེན་མཆོག་གིས༸གོང་ས་མཆོག་ལ་མཇལ་བཅར་ཞུས་པ།

བྷི་ཧར་མངའ་སྡེའི་སྤྱི་ཁྱབ་བློན་ཆེན་མཆོག་གིས་དེ་རིང་ཉིན་རྒྱབ་གནས་མཆོག་རྡོ་རྗེ་གདན་དུ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་ལ་མཇལ་འཕྲད་ཞུས་འདུག དེའང་༸གོང་ས་མཆོག་གནས་མཆོག་རྡོ་རྗེ་གདན་དུ་ཆིབས་བསྒྱུར་ནམ་བྱུང་སྐབས་བྷི་ཧར་མངའ་སྡེའི་བློན་ཆེན་སྐུ་ཞབས་Nitish Kumar མཆོག་གིས་མགོན་པོ་གང་ཉིད་གི་མཆོག་ལ་མཇལ་ཁ་ཞུ་སྲོལ་ཡོད་པ་ལྟར། དེ་རིང་ཉིན་རྒྱབ་ཆུ་ཚོད་ ༢།༥༠ ཙམ་གྱི་ཐོག་སྤྱི་ཁྱབ་བློན་ཆེན་མཆོག་གནས་མཆོག་རྡོ་རྗེ་གདན་དུ་ཡོད་པའི་རྒྱལ་བའི་བཞུགས་གནས་ཕོ་བྲང་དུ་ཆེད་ཕེབས་དང་འབྲེལ། ༸གོང་ས་མཆོག་ལ་མཇལ་བཅར་ཞུས་ཡོད་པ་རེད། ༸གོང་ས་མཆོག་གིས་སྐབས་དེར་སྤྱི་ཁྱབ་བློན་ཆེན་མཆོག་ནི་རྒྱ་གར་གྱི་དཔལ་ནཱ་ལེནྡཱའི་གནའ་བོའི་རིག་གནས་ལ་དོ་དབྱིངས་ཆེན་པོ་གནང་མཁན་གྱི་སྐུའི་མཛའ་གྲོགས་རྙིང་པ་ཞིག་ཡིན་པའི་དགའ་བསུ་ཞུས་པ་དང་སྦྲགས། དབུ་ཁྲིད་རྣམས་གཉིས་དབར་གྱི་མཇལ་མོལ་དེའི་ཁྲོད་གཙོ་བོ་མགོན་པོ་མཆོག་གི་སྐུའི་ཐུགས་བསྐྱེད་དམ་བཅའ་བཞིའི་སྐོར་དང་། དེའི་ནང་གསལ་དཔལ་ནཱ་ལེནྡཱའི་གནའ་བོའི་རིག་གནས་བསྐྱར་གསོའི་སྐོར་ལ་བཀའ་བསྡུར་མཛད་འདུགགང་ཉིད་དང་བློན་ཆེན་གྱི་མཇལ་མོལ་དེའི་སྐབས་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ཀྱང་ཆེད་བཅར་ཞུས་ཡོད་པ་རེད་འདུག གཞི་རྩའི་བྷེ་ཧཱར་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ Nitish Kumar མཆོག་གིས་༸གོང་ས་སྐྱབས་མགོན་ཆེན་པོ་མཆོག་གནས་མཆོག་རྡོ་རྗེ་གདན་དུ་ཆིབས་བསྒྱུར་ནམ་བྱུང་སྐབས། མགོན་པོ་གང་ཉིད་དང་ལྷན་མཇལ་འཕྲད་ཞུ་སྲོལ་ཡོད་པ་ལྟར། སྔ་ལོའི་ཕྱི་ཟླ་ ༡༢ པའི་ལོ་མཇུག་ཏུའང་༸གོང་ས་མཆོག་ཁུལ་དེར་ཆིབས་བསྒྱུར་མཛད་སྐབས། ཁོང་གིས་མགོན་པོ་གང་ཉིད་ཀྱི་མཇལ་ཁ་ཞུས་ཡོད་པ་མ་ཟད། ༸གོང་ས་མཆོག་ལ་ཡུལ་དེའི་ སྤྱི་དམངས་ཀྱི་ཆེས་མཐོའི་གཟེངས་རྟགས་ Bharat Ratna འབུལ་ལམ་ཞུ་དགོས་པའི་དགོས་འདུན་ལ་རྒྱབ་སྐྱོར་ཞུ་མྱོང་ཡོད་པ་རེད།

༸སྐྱབས་རྗེ་སྒ་རྗེ་ཁམས་སྤྲུལ་འཇམ་དབྱངས་དོན་གྲུབ་མཆོག་དགོངས་པ་རྫོགས་ནས་ཐུགས་དམ་ལ་བཞུགས་མུས་རེད་འདུག

༸སྐྱབས་རྗེ་སྒ་རྗེ་ཁམས་སྤྲུལ་འཇམ་དབྱངས་དོན་གྲུབ་མཆོག་ཉེ་ཆར་ཕྱི་ཟླ་ ༡༢ ཚེས་ ༣༠ ཉིན་རྒྱ་གར་གྱི་རྒྱལ་ས་ལྡི་ལིའི་ Max སྨན་ཁང་དུ་དགོངས་པ་ཆོས་དབྱིངས་སུ་ཐིམ་ཚུལ་བསྟན་ཡོད་སྟབས་དེ་ཉིན་རང་ལ་རིན་པོ་ཆེ་མཆོག་གི་དགོན་པ་ བཞུགས་སྒར་གྱི་ཉེ་འཁྲིས་སུ་རྟེན་གཞི་བྱས་པའི་སྔ་འགྱུར་རྙིང་མའི་དགོན་པ་འཆི་མེད་དགའ་ཚལ་གླིང་དུ་གདན་འདྲེན་ཞུས་པ་ལྟར་ཐུགས་དམ་ལ་བཞུགས་མུས་ཡིན་པ་དང། རིན་པོ་ཆེ་དམ་པ་མཆོག་གི་དགོན་པ་ལྷུན་གྲུབ་འཆི་མེད་དགའ་ཚལ་གླིང་ཡིག་ཚང་ནས་རིན་པོ་ཆེ་མཆོག་དགོངས་པ་གཞན་དུ་གཤེགས་པའི་གནས་ཚུལ་དེ་དེ་རིང་བར་གསང་རྒྱ་གནང་སྟེ་དེའི་སྐོར་འབྲེལ་ཡོད་གང་ཡང་གསུང་མེད་པ་རེད། གཞི་རྩའི་༸སྐྱབས་རྗེ་སྒ་རྗེ་ཁམས་སྤྲུལ་འཇམ་དབྱངས་དོན་གྲུབ་མཆོག་ནི་བོད་ཆོལ་གསུམ་ལས་མདོ་ཁམས་ཁོངས་གཏོགས་ལི་ཐང་དུ་སྐུ་འཁྲུངས་ཡོད་པ་དང་། ཕྱི་ལོ་ ༡༩༥༩ ལོར་བོད་ལ་དུས་ལོག་བྱུང་རྗེས་བཙན་བྱོལ་དུ་ཕེབས་ཡོད་པ་མ་ཟད། ཕྱི་ལོ་ ༡༩༦༡ ཙམ་ནས་གཞུང་ཞབས་ཁོངས་སུ་ཞུགས་ཏེ་སྲི་ཞུ་བའི་ཕྱག་ལས་གནང་མྱོང་ཡོད་པ་རེད། ལྷག་པར་དུ་རིན་པོ་ཆེ་དམ་པ་མཆོག་གིས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་ལྟར་སྐུ་ཚེ་ཧྲིལ་པོར་ལུགས་གཉིས་ཀྱི་ཐོག་ནས་བསྟན་སྲིད་སྤྱིའི་སླད་དུ་མཛད་བཟང་དུ་མ་བསྐྱངས་མྱོང་ཡོད་པ་རེད། འདི་ག་རླུང་འཕྲིན་ཁང་གིས་༸སྐྱབས་རྗེ་སྒ་རྗེ་ཁམས་སྤྲུལ་འཇམ་དབྱངས་དོན་གྲུབ་མཆོག་གི་གདུང་སྲས་རྒན་པ་ཨ་བན་མཆོག་སྤྲུལ་རིན་པོ་ཆེ་མཆོག་ལ་ཁམས་སྤྲུལ་རིན་པོ་མཆོག་དགོངས་པ་གཤེགས་ཚུལ་དང་སྐུ་ཚེའི་མཛད་རྗེས་སོགས་ཀྱི་ཐོག་ལ་དམིགས་བསལ་བཀའ་འདྲི་ཁག་གཅིག་ཞུས་ཡོད། རྩ་བའི་ཕྱི་ལོ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ ༢༠༠༩ ཕྱི་ཟླ་ ༤ ཚེས་ ༡༢ ཉིན་བཞུགས་སྒར་གྱི་ཉེ་འཁྲིས་སུ་ཁམས་སྤྲུལ་འཇམ་དབྱངས་དོན་གྲུབ་མཆོག་གིས་ཕྱག་བཏབ་པའི་སྔ་འགྱུར་རྙིང་མའི་དགོན་པ་འཆི་མེད་དགའ་ཚལ་གླིང་དབུ་འབྱེད་རབ་གནས་མཛད་ཡོད་པ་དང་། སྐབས་མགོན་པོ་༸གང་ཉིད་མཆོག་གིས་ང་ཚོ་བཙན་བྱོལ་བ་ཆགས་ནས་དུས་ཚོད་གཉན་འཕྲང་དཀའ་ལས་ཁག་པོའི་རིང་མཉམ་དུ་གཤིབས་ཏེ་ཁམས་སྤྲུལ་རིན་པོ་ཆེས་དབུ་མཛད་པའི་གཙུག་ལག་ཁང་རྟེན་དང་བརྟེན་པ་བཅས་གསར་བཞེངས་བསྒྲུབས་པ་དང་།རིན་པོ་ཆེས་སྙིང་སྟོབས་ཞུམ་པ་མེད་པའི་ཐོག་ནས་ལོ་ནས་ལོ་བསྟུད་དེ་དཀའ་ལས་བརྒྱབ་པའི་གྲུབ་འབྲས་བཅས་ལ་ཡི་རང་བསྔགས་བརྗོད་མཛད་མྱོང་ཡོད་པ་རེད།

ཚན་རིག་དང་མཐུན་པར་དཔྱད་ཞིབ་གནང་རྒྱུ་ནི་ནཱ་ལེནྡཱའི་ཆོས་བརྒྱུད་ངོ་མ་རེད།

ཁ་སང་ཟླ་ ༡ ཚེས་ ༧ ཉིན་གནས་མཆོག་རྡོ་རྗེ་གདན་དགའ་ལྡན་འཕེལ་རྒྱས་གླིང་གཟིམ་ཆུང་དུ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལྷོ་ཤར་ཨེ་ཤ་ཡའི་དད་ལྡན་ཆོས་ཞུ་བའི་རུ་ཁག་གཅིག་ལ་མཇལ་ཁ་བསྩལ་བ་དང་སྦྲགས། དུས་རབས་ཉི་ཤུ་རྩ་གཅིག་པའི་ནང་དད་པ་ཙམ་བྱ་རྒྱུ་ནི་དུས་ཚོད་ཡོལ་བའི་སྐད་ཆ་ཞིག་ཡིན་པ་ལས་རྒྱུ་མཚན་གྱི་ཐོག་ནས་དཔྱད་པ་གནང་བའི་བརྒྱུད་སརྒྱས་པའི་ཆོས་ལ་དད་པ་རྙེད་རྒྱུ་དང་། ཚན་རིག་དང་མཐུན་པར་དཔྱད་ཞིབ་གནང་རྒྱུ་ནི་ནཱ་ལེནྡཱའི་ཆོས་བརྒྱུད་ངོ་མ་རེད་ཅེས་བཀའ་བསྩལ་འདུག སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་དུས་རབས་ཉེར་གཅིག་པའི་ནང་ཚན་རིག་ཡར་རྒྱས་ཆེན་པོ་ཕྱིན་ཡོད་པ་ལྟར་ད་བར་ལོ་ངོ་ ༤༠ ཙམ་གྱི་རིང་ལ་མགོན་པོ་མཆོག་གིས་ཚན་རིག་པ་དང་ལྷན་དུ་བཀའ་བསྡུར་མང་དག་ཅིག་གནང་བའི་བརྒྱུད་རིམ་ཁྲོད་ཚན་རིག་པ་མང་དག་གིས་སརྒྱས་པའི་ཆོས་དང་སེམས་ཁམས་རིག་པའི་ལྟ་གྲུབ་ལ་བསྔགས་བརྗོད་ཆེན་པོ་གནང་གི་ཡོད་པ་བཀའ་གནང་བ་དང་སྦྲགས། ནཱ་ལེནྡཱའི་ཆོས་ཆོས་བརྒྱུད་དེ་ཚན་རིག་དང་བར་ཐག་ཉེ་བར་གྱུར་ཡོད་པ་དང་། སརྒྱས་པའི་ཆོས་དེ་དད་པ་ཙམ་གྱི་སྒོ་ནས་ཁ་འདོན་བྱས་ནས་བསྡད་པ་ཡིན་ན་སརྒྱས་པའི་ཆོས་བརྒྱུད་དེ་མི་རབས་གཅིག་གཉིས་ཀྱི་རྗེས་སུ་ཡལ་ངེས་ཡིན་པ་དང་། རྒྱུ་མཚན་དང་རིགས་པའི་ལམ་ནས་དཔྱད་ཞིབ་དང་སློབ་སྦྱོང་གནང་ཚེ་མ་འོངས་པའི་དུས་རབས་གཉིས་དང་གསུམ་གྱི་རིང་ལ་སརྒྱས་པའི་ཆོས་གནས་ཐུབ་ངེས་ཡིན་པ་བཀའ་བསྩལ་བ་དང་ཆབས་ཅིག དུས་ཡུན་དེའི་རྗེས་སུ་གོ་ལའི་ཚ་དྲོད་འཕེལ་བའམ་ཁོར་ཡུག་གིས་རྐྱེན་པས་ཆོས་བརྒྱུད་ལྟ་ཞོགས་འགྲོ་བ་གནས་དང་མི་གནས་ནི་འདྲི་གཞི་ཞིག་རེད་ཅེས་ཞལ་ཤོབ་བཅས་བཀའ་བསྩལ་མཛད་འདུག མགོན་པོ་༸གང་ཉིད་མཆོག་གིས་ཡི་ཤུའི་ཆོས་བརྒྱུད་གཙོས་པའི་འཇིག་རྟེན་བཀོད་པ་པོ་འདོད་མཁན་གྱི་ཆོས་ལུགས་མང་དག་ཅིག་གིས་ང་ཚོ་ཚང་མ་དཀོན་མཆོག་གིས་བཟོས་པ་ཞིག་ཏུ་འདོད་ཀྱི་ཡོད་པ་གཞིགས། འཛམ་བུ་གླིང་འདིའི་ནང་དུ་ཡོད་པའི་མི་ཐེར་འབུམ་བདུན་པོ་དེ་དག་དཀོན་མཆོག་གཅིག་གམ་ཕ་གཅིག་ལས་ཆས་པའི་གཅེན་གཅུང་ཤ་སྟགས་ཡིན་པ་མཚོན་ཀྱི་ཡོད་ཀྱང་ང་ཚོ་དང་ཁོང་ཚོ་ཞེས་ཕྱོགས་ཞེན་རྐྱེན་པས་ཕན་ཚུལ་གསོད་རེས་དང་བརྙས་བཅོས་གཏོང་རེས་བྱེད་བཞིན་པའི་བྱ་སྤྱོད་དེ་དག་ནི་དཀོན་མཆོག་ཅེས་ཁ་ཙམ་ལས་ཕན་ཐོགས་མ་བྱུང་བ་ཞིག་ཡིན་པ་བཀའ་བསྩལ་བ་དང་འབྲེལ། སརྒྱས་པའི་ཆོས་བརྒྱུད་ནང་འཇིག་རྟེན་བཀོད་པ་པོ་དང་དཀོན་མཆོག་འདོད་ཀྱི་མེད་པ་དང་། སྟོན་པ་སངས་རྒྱས་བཅོམ་ལྡན་འདས་ནི་ང་ཚོའི་དགེ་རྒན་ཞིག་ཡིན་པར་མ་ཟད་སརྒྱས་ཀྱི་གསུང་ལ་བརྟེན་ནས་དེར་སློབ་སྦྱོང་དང་བརྟག་དཔྱད་གནང་བའི་བརྒྱུད་འགྲོ་བའི་སྡུག་བསྔལ་དང་མ་རུང་བའི་སེམས་དེ་བཅོས་ཐབས་བྱེད་དགོས་པ་ནི་གལ་ཆེན་ཞིག་ཡིན་པར་ལམ་སྟོན་མཛད་འདུག དེ་བཞིན་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་ནས་ཆས་པའི་བོད་བརྒྱུད་ནང་བསྟན་གྱིས་རྒྱུ་མཚན་ལ་དཔྱད་དེ་བརྒྱུད་མ་རུང་བའི་སེམས་དེ་འདུལ་ཐབས་གནང་གི་ཡོད་པ་ནི་དམིགས་བསལ་བ་ཅིག་ཡིན་པ་དང་། མགོན་པོ་༸གང་ཉིད་མཆོག་གིས་དུས་རྟག་ཏུ་སརྒྱས་པའི་ཆོས་བརྒྱུད་ཀྱི་གཞི་མ་ནི་པཱ་ལིའི་ཆོས་བརྒྱུ་ཡིན་པ་དང་། ནཱ་ལེནྡཱའི་ཆོས་བརྒྱུད་ནི་རྒྱུ་མཚན་ལ་བརྟེན་ནས་ཉམས་ལེན་བྱ་རྒྱུ་དེ་ཡིན་སྐོར་བཀའ་བསྩལ་བ་དང་ཆབས་གཅིག  ནཱ་ལེནྡཱའི་ཆོས་ཆོས་བརྒྱུད་འཛིན་མཁན་ཞིག་གི་ངོས་ནས་དུས་ནམ་ཡང་རེད་རེད་ཅེས་པའི་སྒོ་ནས་ཁས་ལེན་མི་བྱེད་པར་ཅིའི་ཕྱིར་ཞེས་རྒྱུ་མཚན་དང་རིགས་པའི་ལམ་ནས་འཇུག་དགོས་གལ་ཡིན་པ་བཀའ་བསྩལ་ཡོད་པ་རེད། མགོན་པོ་༸གང་ཉིད་མཆོག་གིས་མཇུག་ཏུ་བཇལ་བཅར་བ་རྣམས་ལ་༸དཔལ་མགོན་འཕགས་པ་ཀླུ་གྲུབ་ཀྱིས་མཛད་པའི་རྩ་བ་ཤེས་རབ་དང་དབུ་མ་འཇུག་པ་རྣམས་རྒྱ་སྐད་ཏུ་ཡོད་པ་ལྟར། དེ་དག་ཁ་འདོན་བྱ་རྒྱུ་ཙམ་མིན་པར་སློབ་སྦྱོང་བྱེད་དགོས་པ་དང་། སློབ་གཉེར་གནང་སྐབས་དང་ཐོག་མཁྲེགས་པོ་ཚོར་སྲིད་ཀྱང་ཡང་ནས་ཡང་ཏུ་ལྟ་ཀློག་དང་སློབ་སྦྱོང་གནང་བ་དེས་རིམ་བཞིན་གོ་བ་རྙེད་རྒྱུ་ཡོད་པ་དང་དེ་བཞིན་ཕན་ཐོགས་ཀྱང་ཆེན་པོ་ཡོད་པ་བཀའ་བསྩལ་བ་དང་སྦྲགས། སརྒྱས་པའི་ཆོས་ལ་སློབ་སྦྱོང་བྱེད་མཁན་ཞིག་ཡིན་ཕྱིན་ཆད་རང་ཉིད་ཀྱི་སྟོན་པ་སརྒྱས་བཅོམ་ལྡན་འདས་དང་དཔལ་ནཱ་ལེནྡཱའི་མཁས་པ་རྣམས་ཀྱི་སློབ་མ་ཞིག་ཡིན་བསམ་དགོས་པར་བཀའ་བསྩལ་མཛད་ཡོད།

 རྒྱ་གཞུང་གིས་ཆོས་ལུགས་དང་འབྲེལ་བའི་ཁྲིམས་སྒྲིག་གསར་པ་གཏན་འབེབས་བྱས་འདུག

རྒྱ་ནག་གཞུང་གིས་ཆོས་ལུགས་ཚོགས་པ་དོ་དམ་བྱ་ཐབས་ཟེར་བའི་ཁྲིམས་སྒྲིག་གཏན་འབེབས་དང་འབྲེལ། ལོ་འདིའི་ཕྱི་ཟླ་ ༢ པའི་ཚེས་ ༡ ནས་ལག་བསྟར་འགོ་འཛུགས་རྒྱུ་ཡིན་པའི་བརྡ་ཁྱབ་བཏང་འདུག དེའང་ཉེ་ཆར་ཕྱི་ཟླ་ ༡༢ ཀྱི་ཚེས་ ༣༠ ཉིན་འདོན་སྤེལ་བྱས་པའི་ཆོས་ལུགས་ཚོགས་པ་དོ་དམ་བྱ་ཐབས་ཟེར་བའི་ཁྲིམས་སྒྲིག་དེ་ནི་རྒྱ་ནག་རྒྱལ་སྲིད་སྤྱི་ཁྱབ་ཁང་གི་ཁྲིམས་ཡིག་ཨང་༡༣ པ་དེ་ཡིན་པ་དང་། ཕྱི་ལོ་༢༠༢༠ ཟླ་༢ ཚེས་༡ ཉིན་ནས་ལག་བསྟར་བྱ་རྒྱུ་ཡིན་རབས་བསྒྲགས་འདུག ལེའུ་༦ དང་ནང་གསེས་དོན་ཚན་༤༡ ཡོད་པའི་ཁྲིམས་ཡིག་དེའི་ནང་དུ་གཙོ་བོ། ཆོས་ལུགས་ཚོགས་པའི་རྩ་འཛུགས་དང་སྒྲིག་གཞི། ཆོས་ལུགས་ཚོགས་པའི་འགན་འཁུར་མི་སྣ་དང་དེའི་ནུས་པ། དེ་ལ་ལྟ་སྐུལ་དོ་དམ་སོགས་གཏན་འབེབས་བྱས་ཡོད་པ་འཁོད་འདུག ཁྲིམས་སྒྲིག་འདི་ནི་རྒྱ་གཞུང་གིས་ཕྱི་ལོ་ ༢༠༠༥ ལོར་གཏན་འབེབས་དང་ཕྱི་ལོ་༢༠༡༧ ལོར་བསྐྱར་གཅོས་བྱས་སྟེ་༢༠༡༨ ཟླ་༢ ཚེས་༡ ཉིན་ནས་ལག་བསྟར་བྱེད་པའི་༼ཆོས་ལུགས་ལས་དོན་སྲོལ་ཡིག་༽ཅེས་པ་དེ་སྔར་ལྷག་ལག་བསྟར་དོན་འཁྱོལ་གཏིང་ཟབ་བྱེད་ཐབས་ལ་དམིགས་པ་ཞིག་རེད་འདུག རྩ་བའི་ཆོས་ལུགས་ལས་དོན་གྱི་སྲོལ་ཡིག་ཞེས་པ་འདིའི་ནང་གཙོ་བོ། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་བྱ་བཞག་འཕེལ་རྒྱས་དང་། ཏང་དང་མི་དམངས་མང་ཚོགས་དབར་གྱི་ཤ་རུས་ལྟ་བུའི་འབྲེལ་བ་བཟོ་རྒྱུ། དེ་བཞིན་སྤྱི་ཚོགས་ཞི་མཐུན་དང་མི་རིགས་མཐུན་སྒྲིལ། རྒྱལ་ཁབ་ཀྱི་བདེ་འཇགས་དང་མེས་རྒྱལ་གོང་བུ་གཅིག་གྱུར་བཅས་འཁོད་ཡོད་པ་ལྟར། དེའི་ནང་ནས་གཙོ་བོ་དེ་ཆོས་ལུགས་ཀྲུང་གོ་ལ་བསྒྱུར་བ་ཞེས་པ་དེ་ཡིན་པ་རེད་འདུག བཞུགས་སྒར་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་ཉམས་ཞིབ་པ་པད་མ་རྒྱལ་ལགས་སུ་བཀའ་འདྲི་ཞུས་སྐབས། ཁོང་གིས་རྩ་བའི་རྒྱ་ནག་དམར་ཤོག་ཚོགས་པས་ཆོས་ལུགས་ཀྱི་རིག་གཞུང་དེ་དུག་ཡིན་པར་བརྗོད་མཁན་གྱི་ཆོས་མེད་སྨྲ་བའི་སྒེར་གཅོད་སྲིད་གཞུང་ཞིག་ཡིན་པ་ལྟར། མི་རིགས་ཀྱི་ཆོས་ལུགས་རིག་གཞུང་ཚང་མ་ཀྲུང་གོ་ཅན་ལ་བསྒྱུར་དགོས་ཟེར་བ་དེ་ནི་དོན་དངོས་སུ་དམར་པོའི་རིང་ལུགས་དང་། དེའི་ཆབ་སྲིད་ཀྱི་ལྟ་བ་མ་གཏོགས། མི་རིགས་སོ་སོའི་ཆོས་ལུགས་རིག་གཞུང་ཁག་ཚང་མ་རྩ་མེད་བཟོ་དགོས་ཟེར་བ་དང་གཅིག་པ་ཡིན་པར་གསུངས་སོང་། ལྷག་པར་དུ་ཁོང་གིས་རྒྱ་ནག་གཞུང་གིས་དམིགས་ཡུལ་བཟུང་པ་ལྟར་ད་བར་མི་རིགས་ཀྱི་ཆོས་ལུགས་རྩ་མེད་གཏོང་ཐུབ་མེད་པ་སོགས་ལ་བརྟེན་ནས་རྒྱ་གཞུང་གི་ལོ་ལྟར་ཆོས་ལུགས་དང་འབྲེལ་བའི་ཁྲིམས་སྒྲིག་གཏན་འབེབས་དང་བསྐྱར་བཅོས་བྱེད་བཞིན་ཡོད་པ་གསུངས་སོང་།

ཨོ་སི་ཊོ་ལི་ཡ་ནང་དུ་མེའི་གོད་ཆག་ཕོག་པར་བོད་མི་ཚོས་ཞལ་འདེབས་བསྡུ་རུབ་དང་སྨོན་ལམ་གསུང་འདོན།

Australia ནང་དུ་མེའི་གོད་ཆག་འོག་མི་དང་སྲོག་ཆགས་ས་ཡ་མང་པོའི་ཚེ་སྲོག་ཤོར་བའི་ཆེས་ཛ་དྲག་གི་གནས་སྟངས་ཆགས་ཡོད་པ་དང་འབྲེལ། གནས་མཆོག་རྡོ་རྗེ་གདན་དུ་དཔལ་ལྡན་རྒྱུད་སྟོད་གྲྭ་ཚང་དང་དེ་བཞིན་རྒྱ་གར་ལྷོ་ཕྱོགས་སྦེལ་ཀོབ་ཁུལ་དུ་རྟེན་གཞི་བྱས་པའི་རྣམ་གྲོལ་གླིང་དུ་སྨོན་ལམ་བསྔོ་སྨོན་གསུང་འདོན་སོགས་གནང་བ་མ་ཟད། ཨོ་སི་ཊོ་ལི་ཡའི་ Sydney གྲོང་ཁྱེར་ནང་གི་བོད་རིགས་མཐུན་ཚོགས་ཀྱི་ངོས་ནས་མི་སྐྱོན་ཕོག་པ་རྣམས་ལ་རོགས་སྐྱོར་གྱི་ཞལ་འདེབས་བསྡུ་རུབ་དང་རྐྱེན་འདས་སུ་གྱུར་བ་རྣམས་ཀྱི་ཆེད་དུ་མཆོད་འབུལ་སྨོན་ལམ་གནང་བཞིན་འདུག ཁ་སང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གནས་མཆོག་རྡོ་རྗེ་གདན་དུ་བཀའ་ཆོས་ཉིན་མཐའ་མའི་ཐོག་མེའི་འཇིག་པའི་གོད་ཆག་ཚབས་ཆེན་ཕོག་པར་ཐུགས་འཚབ་ཡོད་པའི་བཀའ་སློབ་བསྩལ་བ་དང་བོད་མི་རྣམས་ནས་རང་ནུས་གང་ལྕོགས་ཀྱིས་སྨོན་ལམ་གསུང་འདོན་གནང་དགོས་པའི་ལམ་སྟོན་ཕེབས་དོན་བཞིན་ཕྱི་དྲོ་རྡོ་རྗེ་གདན་དུ་དཔལ་ལྡན་རྒྱུད་སྟོད་གྲྭ་ཚང་གི་འདུན་ཡོངས་ནས་ཨོ་སི་ཊོ་ལི་ཡར་མེའི་འཇིག་པའི་གོད་ཆག་ཕོག་རྐྱེན་ཚེ་སྲོག་ཤོར་བ་དང་དཀའ་སྡུག་མྱོང་བཞིན་པའི་སྐྱེ་འགྲོ་ཡོངས་ཀྱི་ཆེད་དུ་སྨོན་ལམ་གསུང་འདོན་གནང་འདུག དེ་བཞིན་རྒྱ་གར་ལྷོ་ཕྱོགས་སྦེལ་ཀོབ་ཁུལ་དུ་རྟེན་གཞི་བྱས་པའི་རྣམ་གྲོལ་གླིང་དུ་ཨོ་སི་ཊོ་ལི་ཡ་ནང་དུ་མེའི་གོད་ཆག་འོག་མི་དང་སྲོག་ཆགས་ས་ཡ་མང་པོའི་ཚེ་སྲོག་ཤོར་བའི་ཆེས་ཛ་དྲག་གི་གནས་སྟངས་གྱུར་པར་བསྔོ་སྨོན་གསུང་འདོན་སོགས་གནང་འདུག དེ་དང་ཕྱོགས་མཚུངས་ཁ་སང་ཨོ་སི་ཊོ་ལི་ཡ་ནང་གི་ Sydney བོད་རིགས་མཐུན་ཚོགས་ཀྱི་ངོས་ནས་བསྒྲགས་གཏམ་ཞིག་སྤེལ་བའི་ནང་དུ་བོད་རིག་མཐུན་ཚོགས་ཀྱིས་འདས་གསོན་ཡོངས་ལ་གདུང་སེམས་མཉམ་བསྐྱེད་མཚོན་ཕྱིར་ཞལ་འདེབས་བསྡུ་རུབ་ཀྱི་ལས་འགུལ་སྤེལ་དོན་ལྟར་ཞལ་འདེབས་ཇི་བྱུང་རྣམས་འབྲེལ་ཡོད་ལས་ཁུངས་སུ་འབུལ་རྒྱུ་ཡིན་པ་དང། ཕྱི་ཚེས་ ༩ ཉིན་གྱི་སྔ་དྲོ་ཕྱག་ཚོད་ ༡༠ ནས་ཉིན་རྒྱབ་ཕྱག་ཚོད་ ༡ བར་ཁུལ་དེའི་ Dee Why Beach ས་གནས་སུ་དགེ་འདུན་པ་དང་མི་མང་རྣམས་ཞབས་རིམ་གསོག་སྒྲུབ་རྒྱལ་བའི་བཀའ་འགྱུར་རིན་པོ་ཆེའི་ཆོས་བསྐོར་སེར་ཕྲེང་གནང་རྒྱུ་ཡིན་པ་གསུངས་འདུག རྩ་བའི་དེ་རིང་ BBC སོགས་རྒྱལ་སྤྱིའི་བརྒྱུད་ལམ་ཁག་གིས་ཁ་སང་དང་དེ་རིང་གཉིས་ལ་མེ་སྐྱོན་ཚབས་ཆེན་ཕོག་སའི་ས་ཁུལ་ New South Wales དང་ Victoria ནང་དུ་ཆར་པ་ཕྲན་བུ་བབས་པར་བརྟེན་གནས་སྟངས་ཅུང་དྲག་སྐྱེད་ཕྱིན་པས་མེ་སྐྱོན་འོག་ཚུད་པ་རྣམས་ལ་ལྟོ་ཆས་བསྐྱལ་ཐུབ་པ་བྱུང་སྐོར་བཀོད་འདུག འོན་ཀྱང་ཁུལ་དེའི་ནང་གི་གནམ་གཤིས་སྔོན་བརྡར་གཞིགས་ཚེ་ བདུན་ཕྲག་འདིའི་རེས་གཟའ་པ་སངས་ཉིན་སླར་ཚ་དྲོད་རྒྱས་སྲིད་པར་ཚོད་དཔག་གནང་འདུག དེ་རིང་བར་གྱི་གནས་ཚུལ་ལ་གཞིགས་ན་ཐེངས་འདིའི་ཨོ་སི་ཊོ་ལི་ཡའི་མེ་སྐྱོན་འོག་མི་གྲངས་ ༢༥ འདས་གྲོངས་སུ་ཕྱིན་ཡོད་པ་ཤེས་རྟོགས་ཐུབ་པ་དང། རི་དྭགས་ས་ཡ་ ༥༠༠ ཙམ་རྐྱེན་འདས་སུ་གྱུར་བ། མེ་སྐྱོོན་མ་ཕོག་སའི་རྒྱལ་ས་ Canberra དང་ Sydney དེ་བཞིན་ Melbourne བཅས་ཀྱི་ནང་དུའང་དུ་བ་འཁེངས་པས་བེུད་སྦྲུམ་མ་དང་ཕྲུ་གུ དེ་བཞིན་དུས་རྒྱུན་དབུགས་བསག་ནད་པ་ཚོར་འཕྲོད་བསྟེན་གྱི་དཀའ་ངལ་དང། དུ་བ་མང་དྲག་རྐྱེན་མཐོང་མ་ཐུབ་པ་སོགས་ཀྱི་དཀའ་ངལ་འཕྲད་བཞིན་ཡོད་པ་རེད་འདུག ད་ལྟའི་ཆར་ཡུལ་དེའི་སྲིད་བློན་གྱིས་མེ་སྐྱོན་ཕོག་པ་རྣམས་ལ་ངལ་སེལ་རོགས་སྐྱོར་ཆེད་ཨ་སྒོར་ཐེར་འབུམ་ ༢ ཙམ་གྱི་འགྲོ་གྲོན་གཏང་རྒྱུའི་ཐག་གཅོད་གནང་ཡོད་ཀྱང། ཁོང་གིས་མེ་སྐྱོན་ཕོག་སྐབས་ Hawaii ནང་སྤྲོ་འཆམ་ལ་ཕེབས་པ་དང་གནམ་གཤིས་འགྱུར་ལྡོག་ཐད་མཚན་རིག་པ་དང་ཁོར་ཡུག་ལས་འགུལ་བ་རྣམས་ཀྱི་ཉེན་བརྡ་དང་ཞུ་གཏུག་རིམ་པར་སྣང་མེད་བཏང་བར་བརྟེན་མང་ཚོགས་ཀྱིས་སྐྱོན་བརྗོད་ཤུགས་ཆེ་གནང་བཞིན་འདུག དེའི་ཁྲོད་དེ་རིང་སྤྱི་ཚོགས་བརྒྱུད་ལམ་ཁག་གི་ཐོག་རྒྱལ་སྤྱིའི་གློག་བརྙན་འཁྲབ་སྟོན་པ་དང་གཞས་པ། གཞས་མ། དེ་བཞིན་སྙན་གྲགས་ཆེ་བའི་མི་སྣ་མང་དག་ཅིག་ནས་ཨོ་སི་ཊོ་ལི་ཡ་ནང་གི་གནས་སྟངས་ཐོག་སེམས་འཚབ་དང་འབྲེལ་རོགས་སྐྱོར་ཆེད་དཔལ་འབྱོར་བསྡུ་རུབ་ཀྱི་ལས་འགུལ་སྤེལ་བ་ལྟར་གཏོང་ཕོད་ཅན་ཚོས་ཨ་སྒོར་ས་ཡ་མང་པོ་ཞལ་འདེབས་གནང་མཁན་འབྱུང་བཞིན་ཡོད་པ་རེད་འདུག

Latest news