Tibetan Royal Year of 2151 | Year of the Wood Dragon

གསར་འགྱུར།

༸གོང་ས་མཆོག་གིས་ཝེ་ཏི་ནམ་དང་ཨིན་ཌོ་ནེ་ཤ་ཡའི་དད་ལྡན་ཁག་གཅིག་ལ་བཀའ་ཆོས་བསྩལ་བ།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རངི་བཞུགས་སྒར་༸རྒྱལ་བའི་ཕོ་བྲང་དུ་ Vietnam དང་ Indonesia དད་་ལྡན་ཁག་གཅིག་ལ་བཀའ་ཆོས་བསྩལ་འདུག དེ་རིང་ཕྱི་ཟླ་ ༡༠ ཚེས་ ༩ ཉིན་སྔ་དྲོ་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་༸རྒྱལ་བའི་ཕོ་བྲང་དུ་ཝེ་ཏི་ནམ་དད་ལྡན་རུ་ཁག་གཅིག་རྒྱ་གར་ནང་གནས་མཇལ་དུ་ཆེད་བཅར་ཞུས་པ་དང་འབྲེལ། མགོན་པོ་༸གང་ཉིད་མཆོག་གི་དྲུང་ནས་བཀའ་ཆོས་ཞུ་སླད་བཞུགས་སྒར་དུ་ཆེད་བཅར་ཞུས་པ་ལྟར་མགོན་པོ་༸གང་ཉིད་མཆོག་གིས་ཝེ་ཏི་ནམ་དད་ལྡན་སེར་སྐྱ་ཕོ་མོ་ ༣༧ དང་གཞན་ཡང་ཨིན་ཌོ་ནེ་ཤ་ཡའི་དད་་ལྡན་རྣམས་ལ་ནང་ཆོས་ངོ་སྤྲོད་དང་ཐུབ་པའི་མཚན་སྔགས་སོགས་བཀྲིན་བསྩལ་འདུག ༸གོང་ས་༸སྐྱབས་མགོན་ཆེན་པོ་མཆོག་གིས་སྐབས་དེར་ཐོག་མར་དད་ལྡན་པ་དེ་དག་ལ་འཚམས་འདྲི་དང་འབྲེལ། སྤྱིར་མགོན་པོ་༸གང་ཉིད་མཆོག་ནས་ནང་ཆོས་ཞེས་པ་དེ་ཆོས་ལུགས་ཀུན་ལས་ཡག་ཤོས་རེད་ཅེས་ནམ་ཡང་བཀའ་བསྩལ་མཛད་ཀྱི་མེད་པ་དེ་ལྟར་ཡང་ལྟ་གྲུབ་ཀྱི་ཐོག་ནས་ནང་ཆོས་དེ་ཚན་རིག་དང་ཧ་ཅང་ཐག་ཉེ་པོ་ཡོད་པ་བཀའ་བསྩལ་འདུག ༸གོང་ས་མཆོག་གིས་ད་དུང་མགོན་པོ་༸གང་ཉིད་མཆོག་ནང་པའི་དགེ་སློང་ཞིག་ཡིན་པའི་ཁར་ཚན་རིག་པ་ཞིག་ཀྱང་ཡིན་ཞེས་བཀའ་བསྩལ་བ་མ་ཟད། ནང་པའི་ཆོས་ཀྱི་སྙིང་པོ་ལྟ་བ་རྟེན་འབྱུང་དང་སྤྱོད་པ་འཚེ་བ་མེད་པ་དེ་ཚན་རིག་དང་ཧ་ཅང་མཐུན་པ་དང་འཛམ་གླིང་ཞི་བདེ་དང་དེ་བས་ཀྱང་འབྲེལ་བ་ཆེས་ཆེན་པོ་ཡོད་པ་ལམ་སྟོན་མཛད་འདུག ༸གོང་ས་མཆོག་གིས་དེ་རྗེས་ཝེ་ཏི་ནམ་དང་ཨིན་ཌོ་ནེ་ཤ་ཡའི་དད་་ལྡན་པ་དེ་དག་ལ་བདག་ཅག་གི་སྟོན་པ་ཐུབ་པའི་དབང་པོ་དང་འཇམ་དཔལ་དབྱངས། སྒྲོལ་མ་སོགས་ཀྱི་མཚན་སྔགས་ལྗགས་ལུང་བསྩལ་བ་མ་ཟད། ཆོས་ཟེར་བ་དེར་ཐོས་བསམ་སྒོམ་གསུམ་གྱི་ཐོག་ནས་ཉམs་ལེན་གནང་དགོས་པ་མ་གཏོགས་དད་པ་ཁོ་ན་ཙམ་གྱིས་འགྲིག་ཐབས་མེད་པར་ལམ་སྟོན་བཀྲིན་ཆེ་བ་བསྩལ་ཡོད་པ་རེད། ཆོས་འབྲེལ་ལེགས་པར་གྲུབ་མཚམས་སུ་གསར་འགོད་པས་ཝེ་ཏི་ནམ་གྱི་རྡོ་གདན་མར་མེ་མཆོད་འབུལ་ཚོགས་ཆུང་གི་གནས་སྐོར་བ་སྣེ་ཁྲིད་གནང་མཁན་ཁོངས་སུ་ཡོད་པ་སྐུ་ཞབས་ Andynoel ལགས་སུ་བཀའ་འདྲི་ཞུས་པར་ཁོང་གིས་༸གོང་ས་མཆོག་ནས་དེ་རིང་ཁོང་རྣམས་ལ་གོ་ལ་འདིའི་ཐོག་ཡོད་པའི་ཆོས་ལུགས་མི་འདྲ་ཡོད་དོ་ཅོག་འཆམ་མཐུན་ཡོང་བར་ལམ་སྟོན་མཛད་ཡོད་པའི་བཀའ་བསྩལ་བ་ངོ་སྤྲོད་གནང་སོང་བ་མ་ཟད། གཞན་ཡང་ཝེ་ཏི་ནམ་གྱི་རྡོ་གདན་་མར་མེ་མཆོད་འབུལ་ཚོགས་ཆུང་གི་ཚོགས་མི་ཡིན་པ་ཡེ་ཤེས་ལྷ་མོ་ལགས་ཀྱིས་ནང་པ་ཞིག་དང་ཉམས་ལེན་པ། དེ་བཞིན་དད་མོས་ཡོད་མཁན་ཞིག་ལ་མཚོན་ན་ཐེངས་འདིའི་བཀའ་ཆོས་དེ་ལེགས་པོ་བྱུང་སོང་བ་དང་། བཀའ་ཆོས་བསྩལ་གྲུབ་བསྟུན་༸གོང་ས་མཆོག་དང་ལྷན་དུ་སྐུ་པར་སྒྲོན་སྐབས་མགོན་པོ་༸གང་ཉིད་མཆོག་གི་༸སྐུའི་དྲུང་དུ་བང་སྒྲིག་རྒྱུ་བྱུང་བ་མ་ཟད་མགོན་པོ་མཆོག་གིས་ཐད་ཀར་གཟིགས་སྐབས་ཚོར་སྣང་གང་བྱུང་བ་སོགས་དགའ་ཚོར་ཆེན་པོ་དང་བཅས་གསུངས་སོང་། རྩ་བའི་ཁོང་རྣམས་ད་ལན་རྒྱ་གར་དུ་གནས་མཆོག་རྡོ་རྗེ་གདན་དང་མཚོ་པདྨ། དེ་བཞིན་བཞུགས་སྒར་དུ་༸གོང་གི་གསེར་ཞལ་མཇལ་རྒྱུ། ཐེག་ཆེན་ཆོས་གླིང་གཙུག་ལག་ཁང་དུ་མཆོད་མཇལ་ཞུ་རྒྱུ་སོགས་ཀྱི་ཆེད་དུ་བཅར་བ་ཞིག་ཡིན་པ་རེད། དེའི་བར་ན་དེ་རིང་སྔ་དྲོ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དད་གུས་དང་ཡིད་སྨོན་ཤུགས་ཆེ་ཞུ་མཁན་མགོན་པོ་༸གང་ཉིད་མཆོག་གི་མཛའ་གྲོགས་སྐུ་ཞབས་ Richard Blum ལགས་དང་ཁོང་གི་སྲས་མོ་ལྕམ་སྐུ་ Heidi ལགས་རྣམ་གཉིས་ནས་༸རྒྱལ་བའི་ཕོ་བྲང་དུ་༸གོང་ས་མཆོག་གི་མཇལ་ཁ་ཞུས་པ་དང་སྦྲགས་ཏེ་བོད་མི་དང་བོད་ཐོག་རྒྱབ་སྐྱོར་གང་ཞུ་དགོས་པའི་ལམ་སྟོན་ཞུས་ཡོད་པ་རེད། གསར་འགོད་པས་སྐུ་ཞབས་ Richard Blum ལགས་སུ་མགོན་པོ་༸གང་ཉིད་མཆོག་གིས་བཀའ་སློབ་གང་བསྩལ་སྐོར་བཀའ་འདྲི་ཞུས་པར་ཁོང་གིས་༸གོང་ས་མཆོག་གིས་ནང་པའི་ལྟ་གྲུབ་ཐོག་ནས་བོད་མི་ཁོ་ན་ཙམ་མིན་པར་འཛམ་གླིང་གི་འགྲོ་བ་ཀུན་ལ་བྱམས་བརྩེའི་ཐོག་ནས་གཞན་ཕན་བསྒྲུབ་དགོས་གལ་ཡིན་པ་སོགས་ལམ་སྟོན་བསྩལ་ཡོད་པ་ངོ་སྤྲོད་གནང་སོང་། རྩ་བའི་བོད་དོན་རྒྱབ་སྐྱོར་བ་སྐུ་ཞབས་ Richard Blum ལགས་ནི་ American Himalayan Foundation ཞེས་པའི་ཐེབས་རྩ་ཁང་གི་ཚོགས་གཙོ་ཡིན་ཞིང་། ཁོང་དང་༸གོང་ས་༸སྐྱབས་མགོན་ཆེན་པོ་མཆོག་རྣམ་གཉིས་ཕྱི་ལོ་ ༡༩༧༢ ལོར་ཆེས་ཐོག་མ་མཇལ་མོལ་བྱུང་བ་ནས་བཟུང་ཁྱོན་མི་ལོ་ ༤༦ ལྷག་གི་རིང་ཐུགས་འདྲིས་ཆེ་བ་དང་། བོད་དང་བོད་མིར་རྒྱབ་སྐྱོར་ཤུགས་ཆེ་གནང་མཁན་དོན་དམ་གྱི་བོད་ཀྱི་གྲོགས་པོ་ཞིག་ཡིན་པ་མ་ཟད། མགོན་པོ་མཆོག་ལ་དད་གུས་དང་ཡིད་སྨོན་ཤུགས་ཆེ་ཞུ་མཁན་ཞིག་ཆགས་ཀྱི་ཡོད་པ་རེད། ལྷག་པར་དུ་ཁོང་དང་ཁོང་གི་སྐུ་ཟླ་ཨ་རིའི་གྲོས་ཚོགས་འཐུས་མི་ལྕམ་སྐུ་ Dianne Feinstein ལགས་རྣམ་གཉིས་ཀྱིས་མགོན་པོ་༸གང་ཉིད་མཆོག་ཕྱི་ལོ་ ༡༩༧༨ ལོར་ཨ་རིའི་ San Francisco མངའ་སྡེར་གདན་འདྲེན་ཞུས་མྱོང་ཡོད་པ་རེད། ཁོང་གིས་ཧི་མཱ་ལ་ཡའི་ཁུལ་གྱི་མི་རིགས་དག་ལ་ཤེས་ཡོན་དང་དཔལ་འབྱོར་སོགས་ཀྱི་ཐོག་རྒྱབ་སྐྱོར་ཧ་ཅང་ཆེན་པོ་གནང་མཁན་ཞིག་ཀྱང་ཆགས་ཀྱི་ཡོད་པ་རེད།

ཇོ་ནང་རྒྱལ་ཚབ་སྐབས་གཉིས་པའི་ཁྲི་སྟོན་མཛད་སྒོ་ཚོགས་པ།

དེ་རིང་སྔ་དྲོ་ཚོུད་ ༡༠ ཐོག་བཞུགས་སྒར་ཉེ་འཁྲིས་ནོར་བུ་གླིང་ཁར་ཇོ་ནང་རྒྱལ་ཚབ་རྒྱལ་ཚབ་རིན་པོ་ཆེ་མཁན་སྤྲུལ་རྡེ་རྗེ་སློབ་དཔོན་ངག་དབང་ཆོས་ཀྱི་སྣང་བ་མཆོག་གི་སྐབས་གཉིས་པའི་ཁྲི་སྟོན་མཛད་སྒོ་ཚོགས་སོང་། ཁྲི་སྟོན་མཛད་སྒོའི་ཐོག་བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་དང་། སྤྱི་འཐུས་ཚོསག་གཞོན་ཨཱཙཱརྱ་ཡེ་ཤེས་ཕུན་ཚོགས་མཆོག རོང་ཆེན་བསྟན་པའི་མངའ་བདག བཀའ་ཟུར་ཀིརྟི་རིན་པོ་ཆེན་མཆོག་གཙོས་པའི་ཆོས་བརྒྱུད་ཁག་གི་བསྟན་བདག་རྣམས་ཀྱི་སྐུ་ཚབ་དང་། སེར་སྐྱ་མང་ཚོགས་ལྔ་བརྒྱ་ལྷག་མཉམ་ཞུགས་གནང་སོང་། སྐབས་དེར་རྒྱལ་སྤྱིའི་ཇོ་ནང་འགྲོ་ཕན་ལྷན་ཚོགས་ཀྱི་ཚོགས་གཙོ་དང་ཁྲིི་སྟོན་བརྟན་བཞུགས་ཚོགས་ཆུང་གི་ཚོགས་གཙོ་བླ་མ་ཚུལ་ཁྲིམས་བཟང་པོ་མཆོག་ནས་དེ་རིང་གི་མཛད་སྒོ་ངོ་སྤྲོད་གནང་བ་དང་ལྷན་དུ་ཕྱི་ལོ་ ༢༠༡༨ ལོའི་རྒྱལ་སྤྱིའི་ཇོ་ནང་གནད་ཡོད་མི་སྣ་རྣམས་ཀྱི་ལོ་འཁོར་ཚོགས་ཆེན་འཚོགས་ཏེ། མཁན་སྤྲུལ་རྡེ་རྗེ་སློབ་དཔོན་ངག་དབང་ཆོས་ཀྱི་སྣང་བ་མཆོག་སླར་ཡང་ཇོ་ནང་གི་རྒྱལ་ཚབ་རིན་པོར་ཆེར་བདམས་ཐོན་བྱུང་བ་ལྟར་དེ་རིང་གི་ཁྲི་སྟོན་གྱི་མཛད་སྒོ་འཚོགས་ཀྱི་ཡོད་པ་གསུངས་སོང་། ཁྲི་སྟོན་གྱི་མཛད་སྒོའི་སྐབས་སུ་རྒྱལ་ཚབ་རིན་པོ་ཆེ་མཆོག་གིས་རང་ཉིད་གྲྭ་རྐྱང་རང་ག་བ་ཞིག་ཡིན་པ་ལས་དམིགས་བསལ་བ་གང་ཡང་མིན་པས་ཁྲི་ཐོག་ནས་བཞུགས་ནས་བཀའ་མོལ་གསུང་རྒྱུར་འོས་བབ་མེད་ནའང་།  ༸དཔལ་རྒྱལ་བ་ཇོ་ནང་པ་རྣམས་ཀྱིས་འོས་བསྡུ་རིམ་པའི་ཐོག་ནས་ཐག་བཅད་ཟིན་པ་ཞིག་ཡིན་པས་བསྟན་པ་སྤྱི་ལ་ཞབས་འདེགས་ཏོག་ཙམ་ཞིག་ཞུ་རྒྱུའི་གོ་སྐབས་བྱུང་བ་ནི་བསོད་ནམས་ཡིན་པར་དགོངས་བཞིན་ཡོད་པ་བཀའ་གནང་བ་དང་འབྲེལ། བོད་མི་སྤྱི་བོ་གནམ་ལྡན་ཡོངས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་གིས་དུས་ནས་དུས་སུ་བཀའ་གནང་བ་ལྟར་ཆོས་བརྒྱུད་དང་ཆོལ་ཁའི་བར་གྱི་འཐེན་འཁྱེར་སྤང་ཏེ་སྤྱི་དོན་གྱི་ཐོག་རང་ནུས་གང་ལྕོགས་གནང་གནད་ཡིན་ཡིན་པའི་བཀའ་སློབ་གནང་སོང་། ཆོས་རིག་བཀའ་བློན་མཆོག་གིས་འཕགས་ཡུལ་ཇོ་ནང་འགྲོ་ཕན་ལྷན་ཚོགས་དང་བོད་ཕྱི་ནང་གཉིས་ཀྱི་ཇོ་ནང་གི་དགོན་སྡེ་བླ་སྤྲུལ་མང་པོའི་ངོས་འཛིན་དང་། དེ་བཞིན་སྤྱི་ནོར་༸གོང་ས་༸སྐྱབས་མགོན་རིན་པོ་ཆེ་མཆོག་གིས་རྒྱལ་ཚབ་རིན་པོ་ཆེ་མཆོག་ལ་ལེགས་གསོལ་བསྔགས་བརྗོད་ཀྱི་འཚམས་འཕྲིན་ཕེབས་པ་དེ་དག་མི་མང་གིས་རྩ་འཛིན་ནས་ཡིད་འཇགས་དགོས་གལ་ཡིན་པ་ངོ་སྤྲོད་དང་། བཙན་བྱོལ་ནང་ཇོ་ནང་པ་རྣམས་ལ་གཞུང་འབྲེལ་གྱི་ཐོག་ནས་ཆོས་བརྒྱུད་གཞན་ལྟར་གཅིག་གྱུར་གྱིས་ཁས་ལེན་ཡོང་ཐབས་ལ་འབད་བརྩོན་བྱེད་ཀྱི་ཡོད་པ་གསུངས་སོང་། དམིགས་བསལ་གྱི་སྐུ་མགྲོན་རོང་ཆེན་ཀིརྟི་༸སྐྱབས་མགོན་རིན་པོ་ཆེ་མཆོག་གིས་རྒྱལ་ཚབ་རིན་པོ་ཆེ་ནི་ཆུང་དུས་ནས་སློབ་ལ་བརྩོན་ཞིང་ཐུགས་གཤིས་བཟང་བའི་བཀུར་འོས་ཀྱི་ངོ་ཤེས་གྲོགས་པོ་ཞིག་ཡིན་པར་འགྲེལ་བརྗོད་དང་བཅས། ཐེངས་གཉིས་ལ་རྒྱལ་ཚབ་ཏུ་འོས་འདེབས་བྱུང་ཡོད་སྟབས་སྔར་དང་མི་འདྲ་བར་བསྟན་པ་སྤྱིའི་དོན་དུ་ཕྱག་ལས་རྒྱ་ཆེར་གནང་དགོས་རྒྱུར་རེ་བ་དང་ཡིད་ཆེས་ཡོད་པ་གསུངས་སོང་། གཞི་རྩའི་ཕྱི་་ལོ་ ༢༠༡༤ ལོར་རྒྱལ་ཕྱི་ནང་གི་ཇོ་ནང་བླ་སྤྲུལ་དང་གནད་ཡོད་མི་སྣས་ལོ་འཁོར་གྱི་ཚོགས་འདུ་ཐེངས་བཞི་པ་ཚོགས་པ་དང་བསྟུན། རྒྱ་གར་ནང་དུ་ཡང་གཅིག་གྱུར་གྱིས་ཁས་ལེན་པའི་ཇོ་ནང་གི་རྒྱལ་ཚབ་ཅིག་དགོས་གལ་ཆེན་པོ་ཡིན་པའི་གྲོས་འཆམ་བྱུང་བ་ལྟར། ཚོགས་འདུའི་སྟེང་དུ་མཁན་སྤྲུལ་རྡེ་རྗེ་སློབ་དཔོན་ངག་དབང་ཆོས་ཀྱི་སྣང་བ་མཆོག་སྤྱི་མོས་ཀྱིས་འོས་འདེམས་བྱུང་སྟེ་ཇོ་ནང་གི་རྒྱལ་ཚབ་ཀྱི་ཁྲི་རབས་དང་པོར་བསྐོ་གཞག་བྱུང་ནས་ལོ་ལྔའི་རིང་ལ་རྒྱལ་ཚབ་ཀྱི་འགན་ཁུར་བཞེས་ཡོད་པ་ལྟར། ཕྱི་ལོ་ ༢༠༡༨ ཟླ་ ༡༢ ནང་གནས་མཆོག་རྡོ་རྗེ་གདན་དུ་ཇོ་ནང་གི་སྨོན་ལམ་དང་སྟབས་བསྟུན་རྒྱལ་ཚབ་ཁྲི་རབས་གཉིས་པ་འོས་འདེམས་དང་འབྲེལ་བའི་གྲོས་གཞིར་བགྲོ་གླེང་གནང་སྐབས་ས་ཚོགས་ཞུགས་པ་ཡོངས་ཀྱི་སྤྱི་མོས་ཐོག་ཇོ་ནང་རྒྱལ་ཚབ་ཁྲི་རབས་གཉིས་པ་འོས་འདེམས་མི་དགོས་པར་ད་ལྟའི་ལས་ཐོག་ཇོ་ནང་རྒྱལ་ཚབ་ཁྲི་རབས་དང་པོ་མཆོག་སྤྲུལ་ཆོས་ཀྱི་སྣང་བ་མཆོག་གིས་བསྐྱར་དུ་ཐུགས་འགན་བཞེས་རྒྱུར་སྤྱིས་མོས་ཀྱིས་ཇི་ལྟར་གསོལ་འདེབས་ཞུས་པ་བཞིན་ཞལ་བཞེས་གནང་བ་ཞིག་རེད་འདུག

བོད་ཕྲུག་རྣམས་ཡིག་རྒྱུགས་ཁྲོད་འཛིན་བཟུང་བྱས་པར་བློ་འཚབ་གནང་བཞིན་པ།

རྒྱ་གར་ལྷོ་ཕྱོགས་ནས་ཞི་ཅིན་ཕིང་ལ་ངོ་རྒོལ་བྱ་སྲིད་པའི་དོགས་གཞིའི་འོག་བོད་མི་ལས་འགུལ་བ་དང་སློབ་ཕྲུག་བཅས་ཁྱོན་མི་ ༩ འཛིན་བཟུང་བྱས་ཏེ་བཙོན་འཇུག་ཐོག་ཁ་སང་སླར་ཅ་ནཡི་ནང་གི་བོད་རིགས་གཙུག་ལག་སློབ་དཔོན་ཞིག་འཛིན་བཟུང་བྱས་པ་མ་ཟད་ཁུལ་དེའི་བོད་རིགས་སློབ་མ་ ༢༥ ཡིག་རྒྱུགས་ཁྲོད་བཙན་འཁྲིད་བྱས་པའི་གནས་ཚུལ་ཐོན་པར་བློ་འཚབ་ཆེན་པོ་གནང་བཞིན་འདུག རྒྱ་གར་གྱི་བརྒྱུད་ལམ་ཁག་ཏུ་གནས་ཚུལ་ཐོན་པར་རྒྱ་ནག་གི་སྲིད་འཛིན་ཞི་ཅིན་ཕིང་བདུན་ཕྲག་འདིའི་རེས་གཟའ་པ་སངས་ནས་ཉིན་གྲངས་གསུམ་གྱི་རིང་རྒྱ་གར་གྱི་ལྷོ་ཕྱོགས་མངའ་སྡེ་ Tamil Nadu ནང་རྒྱ་གར་གྱི་སྲིད་བློན་མོ་དཱི་མཆོག་དང་ལྷན་ནང་མོལ་ལྷན་འཛོམས་ཆེད་ཡོང་གི་ཡོད་སྟབས། ཞི་ཅིན་ཕིང་ལ་ངོ་རྒོལ་གནང་སྲིད་པའི་དོགས་གཞིའི་འོག་ཏུ་རྒྱ་གར་གཞུང་གི་ཉེན་རྟོག་པས་འདས་པའི་ཉིན་ཤས་ནང་བོད་མི་དགུ་འཛིན་བཟུང་གིས་བཀག་བསྐྱིལ་བྱས་ཡོད་པའི་ཁྲོད་ཁ་སང་ས་གནས་ཉེན་རྟོག་པས་ཅ་ནཡི་ནང་གི་ Hindustan གཙུག་ལག་སློབ་གཉེར་ཁང་དུ་སློབ་དཔོན་ཕྱག་རོགས་ཀྱི་ཕྱག་ལས་གནང་བཞིན་པ་བསྟན་འཛིན་ནོར་བུ་ལགས་ནས་བོད་རིགས་སློབ་མ་ཁག་གཅིག་ལྷན་དུ་ཞི་ཅིན་ཕིང་ལ་དར་ཆ་ནག་པོའི་ངོ་རྒོལ་ལས་འགུལ་ཞིག་སྤེལ་འཆར་ཡོད་པར་དོགས་གཞིའི་གནང་སྟེ་འཛིན་བཟུང་བྱས་ཏེ་བཀག་ཉར་ཁང་ཞིག་ཏུ་བཏང་ཡོད་རེད་འདུག ཁ་སང་ཞོགས་པ་སླར་ས་གནས་ཉེན་རྟོག་པས་ཅ་ནཡི་གྲོང་ཁྱེར་ནང་སློབ་གཉེར་བྱེད་བཞིན་པའི་བོད་ཕྲུག་ཚོའི་སྡོད་ཁང་དུ་སྐྱོད་དེ་ཁོང་རྣམ་ཐོག་མར་ངོ་རྟགས་ཆོད་ཕྱིར་ཡིན་སྐོར་བརྗོད་ནས་ Selaiyur ཉེན་རྟོག་ཁང་དུ་འཁྲིད་ཡོད་ཀྱང་། ཕྱིས་སུ་རིམ་པས་ཁོང་ཚོའི་ཁ་པར་ཨང་གྲངས་སོགས་ཐོ་འགོད་བྱེད་བཅུག་ཏེ་ཞི་ཅིན་ཕིང་སླེབས་པའི་སྐབས་ངོ་རྒོལ་གྱི་ལས་འགུལ་རིགས་སྤེལ་རྒྱུ་མིན་པའི་ཁས་ལེན་གྱི་ཡིག་ཆར་མིང་རྟགས་བཀོད་བཅུག་འདུག ཤེས་རྟོགས་བྱུང་བར་གཞིགས་ན། ད་ལན་ཅི་ནཡི་ས་གནས་ཉེན་རྟོག་པས་འདས་པའི་ཉིན་ཤས་ནང་བོད་མི་འཛིན་བཟུང་བཀག་སྐྱིལ་བྱས་པའི་ཁོངས་ནས་ཕལ་ཆེ་བ་སློབ་ཕྲུག་ཆགས་ཀྱི་ཡོད་པ་དང་ལྷག་དོན་དེ་རིང་ནས་ཉིན་གྲངས་གསུམ་རིང་མ་རྡ་ར་སི་མཐོ་སློབ་ཁགགི་རྒྱུགས་སྤྲོད་འཁེལ་གྱི་ཡོད་སྟབས། སློབ་ཕྲུག་རྣམས་ཡིག་རྒྱུགས་ཁྲོད་སེམས་འཚབ་ཆེན་པོའི་ངང་གནས་བཞིན་འདུག འདི་ག་རླུང་འཕྲིན་ཁང་ནས་བོད་རང་བཙན་སློབ་ཕྲུག་ཚོགས་པའི་ལས་འཆར་འགན་འཛིན་བསྟན་འཛིན་གྲགས་པ་ལགས་སུ་བཅར་འདྲི་ཞུས་པར་དབུས་བོད་ཀྱི་གཞོན་ནུ་ལྷན་ཚོགས་དང་བོད་རང་བཙན་སློབ་ཕྲུག་ཚོགས་པའི་ངོས་ནས་ལྡི་ལི་ནས་ཁྲིམས་རྩོད་པ་ཞིག་མངགས་གཏོང་གིས་སློབ་ཕྲུག་གཙོ་བོར་གྱུར་པའི་བོད་མི་དེ་དག་བཙོན་གྲོལ་ཐོབ་ཐབས་སུ་ཞུ་གཏུག་གནང་བཞིན་ཡོད་སྐོར་གསུངས་སོང་། ཁོང་རྣམས་འཛིན་བཟུང་བཀག་བསྐྱིལ་བྱས་ནས་ད་ལྟའི་ཆར་ཚོུད་ ༤༨ ལྷག་འགྲོ་ཡོད་ཀྱང་ས་གནས་ཉེན་རྟོག་པས་ཁོང་རྣམས་ཀྱི་ཁྲིམས་རྩོད་པ་དང་ཐུག་འཕྲད་གནང་བར་མུ་མཐུད་བཀག་སྡོམ་བྱེད་བཞིན་པའི་ཁྲོད་ཁོང་རྣམས་ཀྱི་གནས་སྟངས་ཇི་ཆགས་སོགས་ཞིབ་ཕྲའི་གནས་ཚུལ་གང་ཡང་ཤེས་རྟོགས་མེད་པར་གྱུར་འདུག འོན་ཀྱང་དེ་རིང་འཛིན་འཛིན་ཆོས་སྒྲོན་ལགས་ཀྱིས་ཁོང་གི་ཨ་མ་ལགས་ལ་ཁོང་རྣམས་ད་ཆ་ཅ་ནཡི་དབུས་བཙོན་ཁང་ནས་བཙོན་ཁང་གཞན་ཞིག་ཏུ་གནས་སྤོས་བྱ་འཆར་ཡོད་སྐོར་ཞུས་འདུག རྒྱ་གར་གཞུང་གི་ཉེན་རྟོག་པས་ལྷོ་ཕྱོགས་ནས་ཁྱོན་བོད་མི་བཅུ་འཛིན་བཟུང་གིས་བཀག་བསྐྱིལ་བྱས་པའི་གནས་ཚུལ་ཁག་བརྒྱུད་ལམ་ཁག་ཏུ་ཐོན་སྟབས་བོད་མི་དང་བོད་དོན་རྒྱབ་སྐྱོར་བ་རྣམས་ཀྱིས་སྤྱི་ཚོགས་དྲྭ་ལམ་ཐོག་རྒྱ་གར་གཞུང་གི་བྱེད་སྟངས་དེར་སྐྱོན་བརྗོད་དང་བློ་ཕམ་གྱི་རྣམ་པ་ཤུགས་ཆེ་བསྟན་ཡོད་པ་མ་ཟད། ཁག་གཅིག་གིས་རྒྱ་གར་དེ་མང་གཙོའི་རྒྱལ་ཁབ་ཅིག་ཡིན་པས་རྒྱ་གཞུང་གི་གནོན་ཤུགས་འོག་མགོ་སྒུར་བར་ངོས་འཛིན་ཞུ་བཞིན་ཡོད་པ་དང་། རྒྱ་གར་དབུས་གཞུང་ནས་དེ་ལྟར་གནང་རྒྱུ་མེད་པའི་ཞུ་སྐུལ་གནང་མཁན་ཡང་བྱུང་འདུག

ཨ་རིས་ཤིན་ཅང་གི་གནད་དོན་དང་ངན་པ་ལག་སྦྲེལ་ཡོད་པའི་རྒྱ་གཞུང་མི་སྣར་མཐོང་མཆན་གནང་རྒྱུ་རེད་མི་འདུག

ཁ་སང་ཕྱི་ཟླ་ ༩ ཚེས་ ༨ ཉིན་ཨ་རིའི་སྲིད་གཞུང་གིས་ཤིན་ཅང་གི་ཡུ་གུར་མི་རིགས་གཙོས་གཞན་ཁ་ཆེའི་གྲངས་ཉུང་མི་རིགས་ཁྲི་ཚོ་མང་པོ་བཙོན་འཇུག་མནར་གཅོད་བཏང་ནས་འགྲོ་བ་མིའི་ཐོབ་ཐང་ལ་བརྡལ་བཤིག་གཏོང་བའི་བྱ་སྤྱོད་དང་ངན་པ་ལག་སྦྲེལ་ཡོད་པའི་རྒྱ་ནག་གཞུང་འབྲེལ་མི་སྣ་རྣམས་ཨ་རིའི་ནང་འགྲུལ་སྐྱོད་ཆོག་པའི་མཐོང་མཆན་གནང་རྒྱུ་མིན་པའི་བསྒྲགས་གཏམ་སྤེལ་འདུག ཨ་རི་ New York ནང་རྟེན་གཞི་བྱས་པའི་ Bloomberg ཞེས་པའི་དྲྭ་རྒྱ་གཙོས་དྲྭ་རྒྱ་ཁག་ཅིག་གི་ཐོག་ཏུ་གནས་ཚུལ་སྤེལ་བར་ཨ་རིའི་ཚོང་ལས་སྡེ་ཚན་གྱིས་རྒྱ་ནག་གི་འཕྲུལ་ལས་བཟོ་གྲྭ་དང་ཚོགས་པ་ཁག་ ༢༨ མིང་ཐོ་ནག་པོའི་ནང་དུ་བཅུག་ནས་ཚོགས་པ་དེ་དག་གིས་ཨ་རི་ནས་ཅ་དངོས་རིགས་ཉོ་ཚོང་དང་མཉམ་ལས་རིགས་བྱ་རྒྱུ་མེད་པ་བཟོ་རྒྱུའི་གསལ་བསྒྲགས་སྤེལ་ནས་ཉིན་གཅིག་གི་རྗེས་སུ་ཨ་རིའི་ཕྱི་སྲིད་དྲུང་ཆེ་སྐུ་ཞབས་ Michael Pompeo ལགས་ཀྱིས་ the stain of the century ཞེས་དུས་རབས་ཀྱི་དྲི་ནོག་ཅན་ཞེས་བརྗོད་དེ་ཤིན་ཅང་གི་ཡུ་གུར་མི་རིགས་གཙོས་ཁཱ་ཛཱ་ཁི་སི་དང་། གཞན་ཁ་ཆེའི་གྲངས་ཉུང་མི་རིགས་རྣམས་ལ་ཚད་འདས་རང་བཞིན་གྱི་དྲག་གནོན་དང་མི་གྲངས་ཁྲི་ཕྲག་མང་པོ་བཙོན་འཇུག་མནར་གཅོད་བཏང་ནས་འགྲོ་བ་མིའི་ཐོབ་ཐང་ལ་རྡོག་རོལ་གཏོང་བའི་བྱ་སྤྱོད་དང་ངན་པ་ལག་སྦྲེལ་ཡོད་མཁན་གྱི་རྒྱ་ནག་གཞུང་གི་འགོ་ཁྲིད་དང་རྒྱ་ནག་དམར་ཤོག་ཚོགས་པའི་གཞུང་འབྲེལ་མི་སྣ་རྣམས་ལ་ཨ་རིར་འགྲུལ་སྐྱོད་ཆོག་པའི་མཐོང་མཆན་གནང་རྒྱུ་མིན་པ་མ་ཟད། རྒྱ་ནག་གཞུང་གི་དཔོན་རིགས་དེ་དག་གི་ནང་མི་རྣམས་ལའང་མཐོང་དེ་བཞིན་དམ་དྲག་གནང་རྒྱུ་ཡིན་པ་གསུངས་འདུག ད་དུང་བརྒྱུད་ལམ་དེའི་ཐོག་རྒྱ་ནག་གཞུང་གི་དཔོན་རིགས་ཚོར་མཐོང་མཆན་གནང་རྒྱུ་མིན་པའི་ཐག་གཅོད་དེ་ནི་ Immigration and Nationality Act ཞེས་པའི་ཁྲིམས་གཞི་དེའི་འོག་ནས་བཀའ་འཁྲོལ་བྱུང་བ་ཞིག་དང་ཨ་རིའི་ཕྱི་འབྲེལ་སྲིད་བྱུས་ལ་དོ་ཕོག་གཏོང་མཁན་གྱི་གང་ཟག་སུ་འདྲ་ཞིག་ལ་མཐོང་མཆན་གནང་མི་ཆོག་པའི་ཐག་གཅོད་གནང་རྒྱུའི་དབང་ཚད་དེ་ཕྱི་དྲིལ་དྲུང་ཆེ་ལ་དབང་བ་ཞིག་ཡིན་པ་མ་ཟད། རྒྱ་ནག་གཞུང་ཀྱི་ཚོང་འབྲེལ་འཐུས་ཚབ་མི་སྣ་ཁག་གཅིག་ཨ་རིའི་ནང་སང་ཚོང་འབྲེལ་གྱི་གྲོས་མོལ་ཆེད་སླེབས་ལ་ཉེ་བའི་ཚོར་བ་རྣོ་བའི་དུས་ཚིགས་ཤིག་དང་སྟབས་ཁེལ་ཡོད་པ་རེད། རྒྱ་ནག་གཞུང་གིས་ཤིན་ཅང་གི་ཡུ་གུར་མི་རིགས་གཙོས་ཁཱ་ཛཱ་ཁི་སི་དང་ཁ་ཆེའི་གྲངས་ཉུང་མི་རིགས་རྣམས་ལ་མནར་གཅོད་ཚད་མེད་བཏང་དང་གཏོང་བཞིན་པ་དང་འབྲེལ། སྐུ་ཞབས་ Pompeo ལགས་ཀྱིས་བསྒྲགས་གཏམ་ནང་རྒྱ་ནག་གཞུང་གིས་དྲག་གནོན་དེ་འཕྲལ་དུ་མཚམས་འཇོག་དགོས་པ་དང་། འགྲོ་བ་མིའི་ཐོབ་ཐང་སྲུང་སྐྱོབ་བྱ་རྒྱུ་ནི་གལ་གནད་ཆེ་བ་ཞིག་དང་། རྒྱལ་ཁབ་ཚང་མའི་ངོས་ནས་ངེས་པར་དུ་ འགྲོ་བ་མིའི་ཐོབ་ཐང་དང་འབྲེལ་བའི་དམ་བཅའ་ལ་གུས་བརྩི་ཞུ་དགོས་པ་གསུངས་འདུག དེ་བཞིན་ཨ་རིའི་གཞུང་ནས་བསྒྲགས་གཏམ་དེ་སྤེལ་ཟིན་རྗེས་ཨ་རིར་རྟེན་གཞི་བྱས་པའི་རྒྱ་ནག་གཞུང་ཚབ་ཁང་གིས་འཕྲུལ་བྱའི་དྲྭ་ལམ་བརྒྱུད་ཨ་རིའི་གཞུང་ནས་གཞི་རྩའི་འགྲོ་བ་མིའི་ཐོབ་ཐང་ལ་ཁ་གཡར་ནས་རྒྱ་ནག་གི་འཕྲུལ་ལས་བཟོ་གྲྭ་དང་ཚོགས་པ་ཁག་ཅིག་མིང་ཐོ་ནག་པོའི་ནང་དུ་བཅུག་པའི་ཕྱི་ཉིན་དེར་རྒྱ་ནག་གི་གཞུང་འབྲེལ་མི་སྣ་ལ་མཐོང་མཆན་གནང་རྒྱུ་མིན་ཟེར་བ་ནི་རྒྱལ་སྤྱིའི་ཁྲོད་ཕྱི་འབྲེལ་སྲིད་བྱུས་ཀྱི་འབྲུ་དོན་དང་མཐའ་གཅིག་ཏུ་འགལ་བ་ཞིག་ཡིན་པ་དང་། ཤིན་ཅང་ནང་གི་གནད་དོན་ནི་རྒྱ་ནག་ནང་ཁུལ་གྱི་གནད་དོན་ཞིག་ཡིན་པ་ལས་དེར་ཕྱིའི་རྒྱལ་ཁབ་ཀྱི་ཐད་བྱུས་བྱེད་ཆོག་གི་མེད་པ་མ་ཟད། ཨ་རིའི་གཞུང་ནས་ནོར་འཁྲུལ་དེ་ཁས་བླངས་ཐོག་ནོར་འཁྲུལ་ཡོ་བསྲང་དགོས་སྐོར་རྒོལ་ལན་བྱས་འདུག གཞི་རྩའི་རེས་གཟའ་ཟླ་བའི་ཉིན་ཨ་རིའི་ཚོང་ལས་སྡེ་ཚན་གྱིས་རྒྱ་ནག་གི་འཕྲུལ་ལས་བཟོ་གྲྭ་དང་ཚོགས་པ་ཁག་ ༢༨ མིང་ཐོ་ནག་པོར་བཅུག་དོན་ནི་ཚོང་ལས་ཁང་དེ་དག་གིས་རྒྱ་ནག་གཞུང་ལ་མཉམ་འབྲེལ་བྱས་ནས་ཤིན་ཅང་གི་ཡུ་གུར་མི་རིགས་གཙོས་ཁ་ཆེའི་གྲངས་ཉུང་མི་རིགས་ལ་དྲག་གནོན་དང་འཛིན་བཟུང་འགྲོ་བ་མིའི་ཐོབ་ཐང་ལ་རྡོག་རོལ་ཚབས་ཆེན་བཏང་དང་གཏོང་བཞིན་རྐྱེན་ཡིན་པ་རེད།

ཧོང་ཀོང་གི་ལས་འགུལ་ལ་རྒྱབ་སྐྱོར་བྱས་རྐྱེན་རྒྱ་ནག་ནང་གྲགས་ཅན་NBAསིལ་སྤོལ་འགྲན་བསྡུར་རྒྱང་བསྲིང་བྱ་རྒྱུ་ཕྱིར་འཐེན།

NBA ཞེས་པའི་བྱང་ཨ་མི་རི་ཀའི་རྒྱལ་ཡོངས་སིལ་སྦོལ་མཐུན་ཚོགས་ཀྱི་གཙོ་འཛིན་སྐུ་ཞབས་ Adam Silver ལགས་ཀྱིས་ Houston ནང་རྟེན་གཞི་བྱས་པའི་Rockets སིལ་སྤོལ་རུ་ཁག་གི་འགན་འཛིན་ངོས་ནས་ཧོང་ཀོང་གི་ངོ་རྒོལ་ལས་འགུལ་ལ་རྒྱབ་སྐྱོར་བྱས་པའི་གནད་དོན་དེ་ནི་ཁོང་གི་སྨྲ་བརྗོད་རང་དབང་ཞིག་ཡིང་པར་འགྲེལ་བརྗོད་གནང་རྗེས། རྒྱ་ནག་གི་གཞུང་འབྲེལ་CCTV བརྙན་འཕྲིན་ལས་ཁང་ནས་ NBA  འི་སྔོན་འགྲོའི་རྩེད་འགྲན་ཆ་ཚང་རྒྱ་ནག་ནང་རྒྱང་བསྲིང་བྱ་རྒྱུ་ཕྱིར་འཐེན་བྱས་འདུག དེའང་NBA འི་ཚོགས་མི་ཡིན་པའི་ Houston Rockets རུ་ཁག་གི་འགན་འཛིན་ Daryl Morey ལགས་ཀྱིས་བདུན་ཕྲག་སྔོན་མའི་རེས་གཟའ་པ་སངས་ཉིན་རང་ཉིད་ཀྱི་ Twitter དྲ་གནས་ཐོག་ཧོང་ཀོང་ལ་རྒྱབ་སྐྱོར་གྱི་མཚོན་རྟགས་ཤིག་བརྒྱུད་སྤེལ་གནང་རྗེས།  རྒྱ་རིགས་མི་སེར་མང་པོས་དེར་ངོ་རྒོལ་གནང་པའི་རྐྱེན་གྱིས། སྐུ་ཞབས་ Morey ལགས་ཀྱིས་ལམ་སང་མཚོན་རྟགས་དེ་ཕྱིར་འཐེན་བྱས་ཏེ་དེ་ནི་ཁོང་སྒེར་གྱི་ལངས་ཕྱོགས་ཤིག་ཡིན་པའི་གསལ་བཤད་གནང་བ་མ་ཟད། NBA མཐུན་ཚོགས་ནས་དེའི་རྗེས་སུ་སྐུ་ཞབས་ Morey ལགས་ཀྱི་གནང་སྟངས་དེས་རྒྱ་ནག་གི་མང་ཚོགས་ལ་ཕོག་ཐུག་ཆེན་པོ་བཏང་ཡོད་སྟབས་དེའི་ཐོག་བློ་འགྱོད་ཡོད་པར་འགྲེལ་བརྗོད་གནང་ཡོད་པ་རེད། འོན་ཀྱང་རེས་གཟའ་ཟླ་བའི་ཉིན་ NBA མཐུན་ཚོགས་ཀྱི་གཙོ་འཛིན་སྐུ་ཞབས་ Adam Silver ལགས་ཀྱིས་ཉི་ཧོང་གི་ Kyodo གསར་ཁང་གི་བཅར་འདྲིར་དྭངས་ལེན་གནང་སྐབས། མཐུན་ཚོགས་དེའི་ངོས་ནས་Daryl Morey ལགས་ཀྱི་སྨྲ་བརྗོད་རང་དབང་ལ་གུས་བརྩི་ཞུ་བཞིན་ཡོད་པར་འགྲེལ་བརྗོད་གནང་བ་མ་ཟད། རེས་གཟའ་མིག་དམར་ཉིན་སླར་ཡང་སྤྱི་སྒྲགས་ཤིག་སྤེལ་བའི་ནང། NBA མཐུན་ཚོགས་ངོས་ནས་དེ་གའི་ཚོགས་མི་རྣམ་པའི་ཆབ་སྲིད་ཀྱི་ལངས་ཕྱོགས་ལ་གུས་བརྩི་ཞུ་བཞིན་པ་དང་། སྤྱིར་ཨ་རི་དང་རྒྱ་ནག་གཙོས་པའི་རྒྱལ་སྤྱིའི་མང་ཚོགས་སུ་འདྲ་ཞིག་ཡིན་རུང་གནད་དོན་འདྲ་མིན་ཐོག་བསམ་ཚུལ་འདྲ་མིན་ཡོད་པ་དེ་ཆོས་ཉིད་ཡིན་པ་བཞིན། མཐུན་ཚོགས་ངོས་ནས་དེ་གའི་རྩེད་འགྲན་པ་དང་ལས་བྱེད། དེ་བཞིན་རུ་ཁག་གི་སྦྱིན་བདག་སོགས་ཀྱི་སྨྲ་བརྗོད་རང་དབང་ལ་སྟངས་འཛིན་བྱེད་ཐུབ་ཐབས་མེད་སྐོར་འགྲེལ་བརྗོད་གནང་འདུག སྐུ་ཞབས་ Silver ལགས་ཀྱིས་བཀའ་མོལ་དེ་ལྟར་གནང་མ་ཐག    རྒྱ་ནག་གི་གཞུང་འབྲེལ་CCTV བརྙན་འཕྲིན་ལས་ཁང་དང་ tencent sports ཞེས་དྲ་རྒྱ་བརྒྱུད་རྩེད་འགྲན་ཐད་གཏོང་བྱེད་མཁན་ཚོང་ལས་ཁང་གིས་རྒྱ་ནག་ནང་ནས་རྩེད་འགྲན་དེ་རྒྱང་བསྲིངས་བྱ་རྒྱུ་ཕྱིར་འཐེན་བྱེད་རྒྱུ་གཏན་འཁེལ་ཡོད་སྐོར་བརྗོད་པ་མ་ཟད། CCTV བརྙན་འཕྲིན་ལས་ཁང་གིས། རྒྱལ་ཁབ་ཅིག་གི་ས་ཁོངས་བདག་དབང་དང་སྤྱི་ཚོགས་བརྟན་བརླིང་ལ་ཁ་གཏད་གདོང་ལེན་བྱས་པའི་གཏམ་བཤད་འདི་ལྟ་བུ་ནི་སྨྲ་བརྗོད་རང་དབང་གི་ཁྱབ་ཁོངས་སུ་རྩ་བ་ནས་གཏོགས་ཀྱི་མེད་པར་བརྗོད་དེ་སྐུ་ཞབས་ Silver ལགས་ཀྱི་བཀའ་མོལ་ལ་མཐའ་གཅིག་ཏུ་ངོ་རྒོལ་བྱས་འདུག གཞི་རྩའི་རྒྱ་ནག་ནང་དུ་སིལ་སྤོལ་རྩེད་འགྲན་ལ་དོ་དབྱིངས་ཧ་ཅང་ཆེན་པོ་ཡོད་པ་མ་ཟད། སྔར་ལོ་གཅིག་པོའི་ནང་ tencent བརྒྱུད་ NBA འི་རྩེད་འགྲན་ལྟ་མཁན་ས་ཡ་ ༥༠༠་ ལྷག་བྱུང་ཡོད་པ་དང་། NBAམཐུན་ཚོགས་ངོས་ནས་འདི་ལོའི་ཕྱི་ཟླ་ ༦ པའི་ནང་ tencent ཚོང་ལས་ཁང་དང་ལྷན་དུས་ཡུན་ལོ་ལྔ་ཅན་དང་ཨ་སྒོར་ཐེར་འབུམ་གཅིག་དང་ཕྱེད་ཀ་ལྷག་གི་ཚོང་གི་གྲོས་མཐུན་བཞག་ཡོད་པ་རེད་འདུག ད་ལྟའི་ཆར་ NBAམཐུན་ཚོགས་ཀྱི་ངོས་ ནས་ CCTV བརྙན་འཕྲིན་ལས་ཁང་གི་ཐག་གཅོད་ཐོག་འགྲེལ་བརྗོད་གང་ཡང་གནང་མི་འདུག  

ཅ་ནཡི་ཉེན་རྟོག་པས་བོད་རིགས་སློབ་མ་བརྒྱད་བཀག་བསྐྱིལ།

རྒྱ་ནག་གི་སྲིད་འཛིན་ཞི་ཅིན་ཕིང་དང་རྒྱ་གར་གྱི་སྲིད་བློན་གཉིས་མཇལ་འཕྲད་གནང་རྒྱུ་སྔོན་ལ་བོད་མི་དགུ་ Chennai ཉེན་རྟོག་པས་བཀག་བསྐྱིལ་བྱས་ཡོད་པ་རེད། ཟླ་བ་འདིའི་ཚེས་ ༡༡ ནས་སྲིད་འཛིན་ཞི་ཅིན་ཕིང་རྒྱ་གར་ལྷོ་ཕྱོགས་ Mamallapuram ས་ཁུལ་དུ་གཞུང་འབྲེལ་ཕྱོགས་སྐྱོད་དུ་འབྱོར་གྱི་ཡོད་པར་བརྟེན་སྐོར་སྐྱོད་དེའི་རིང་ཞི་ཅིན་ཕིང་ལ་ངོ་རྒོལ་གྱི་ལས་འགུལ་སྤེལ་རྒྱུའི་འཆར་གཞི་ཡོད་སྲིད་པར་དོགས་པ་གནང་སྟེ་རྒྱ་གར་གཞུང་གི་ཉེན་རྟོག་པས་ཟླ་ ༡༠ ཚེས་ ༥ ཉིན་བོད་རང་བཙན་ལས་འགུལ་བ་བསྟན་འཛིན་བརྩོན་འགྲུས་ལགས་རྒྱ་དཀར་ནག་གཉིས་ཀྱི་དཔོན་རིགས་མཇལ་འཕྲད་གནང་སའི་ས་གནས་དེ་ནས་རྒྱང་ཐག་སྤྱི་ལེ་ ༡༠༠ མ་ཟིན་ཙམ་གྱི་ས་གནས་ཀོ་ཌ་ཀུ་པམ་ནས་འཛིན་བཟུང་གིས་ཅ་ནཡི་དབུས་བཙོན་ཁང་ནང་བཀག་བསྐྱིལ་གནང་ཡོད་ཐོག་དེ་འབྲེལ་གྱི་དོགས་གཞིའི་འོག་ཅི་ནཡི་ནང་གི་མཚམས་བོད་རིགས་སློབ་ཕྲུག་ཚོགས་པ་དང་བོད་ཀྱི་གཞོན་ནུ་ལྷན་ཚོགས། བོད་རང་བཙན་སློབ་ཕྲུག་ཚོགས་པ་གསུམ་གྱི་རྒྱུན་ལས་སོགས་ཁྱོན་བོད་མི་བརྒྱད་འཛིན་བཟུང་གིས་ Santhome ཉེན་རྟོག་ལས་ཁུངས་སུ་བཀག་ཉར་བྱས་ཡོད་པ་རེད། དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་མགོན་པོ་དོན་གྲུབ་ལགས་སུ་བཀའ་འདྲི་ཞུས་པར་ཁོང་གིས་ཁ་ཉིན་དབུས་བོད་ཀྱི་གཞོན་ནུ་ལྷན་ཚོགས་དང་བོད་རང་བཙན་སློབ་ཕྲུག་ཚོགས་པ་གཉིས་ནས་ཅི་ནཡི་གྲོང་ཁྱེར་ནང་ཡོད་པའི་ཚོགས་པ་དེ་གཉིས་ཀྱི་རྒྱུན་ལས་ལ་འབྲེལ་བ་གནང་ཐོག་ཁུལ་དེའི་ནང་བོད་རིགས་གཞོན་སྐྱེས་ཁག་ཅིག་བསྡུ་སྐོང་གནང་རྒྱུའི་ལས་རིམ་ཞིག་སྤེལ་ཁྲོད་རེས་གཟའ་ཉི་མའི་དགོང་མོར་ཅ་ནཡི་ས་གནས་ཉེན་རྟོག་པས་བོད་མི་བརྒྱད་པོ་དེ་དག་འཛིན་བཟུང་གིས་གནས་སྐབས་ཉེ་འཁྲིད་ Santhome ཉེན་རྟོག་ལས་ཁུངས་སུ་བཀག་ཉར་བྱས་ཏེ་ད་ཆ་ཅ་ནཡི་དབུས་བཙོན་ཁང་ནང་གནས་སྤོས་ཀྱིས་བཀའ་བསྐྱིལ་འོག་ཡོད་པ་མ་ཟད། དབུས་བོད་ཀྱི་གཞོན་ནུ་ལྷན་ཚོགས་དང་བོད་རང་བཙན་སློབ་ཕྲུག་ཚོགས་པ་གཉིས་ནས་གནད་དོན་དེ་དང་འབྲེལ་ཏེ་ལྡི་ལིའི་འགྲོ་བ་མིའི་ཐོབ་ཐང་འབྲེལ་མཐུད་ཚན་པའི་ཁྲིམས་རྩོད་པ་ཞིག་གླ་ཐོག་ཁོང་ད་ཆ་ས་གནས་ས་ཐོག་ཏུ་ཆེད་སྐྱོད་གནང་སྟེ་ས་གནས་ཀྱི་ཁྲིམས་རྩོད་པ་ཁག་དང་འབྲེལ་བ་གནང་མུས་ཡིན་པ་གསུངས་སོང་། མགོན་པོ་དོན་གྲུབ་ལགས་ཀྱིས་ད་རེས་སྲིད་འཛིན་ཞི་ཅིན་ཕིང་རྒྱ་གར་ལ་འབྱོར་གྱི་ཡོད་པ་དང་བསྟུན་གཞོན་ནུ་ལྷན་ཚོགས་ངོས་ནས་དེ་སྔའི་དགོས་འདུན་གང་ཡོད་པ་བཞིན་བོད་ལ་བཟང་ཕྱོགས་ཀྱི་འགྱུར་བ་དགོསཔ་དང་རྒྱ་གཞུང་གིས་བོད་ཐོག་འཛིན་པའི་མཁྲེགས་འཛིན་གྱི་སྲིད་བྱུས་དེ་ནོར་འཁྲུལ་ཡིན་པར་ཁས་ལེན་གནང་དགོས་གལ། ལྷག་པར་དུ་བོད་དེ་ལོ་རྒྱུས་ཐོག་ནས་རང་བཙན་གཙང་མའི་རྒྱལ་ཁབ་ཅིག་ཡིན་པ་ལྟར་གཞོན་ནུའི་སྒྲིག་འཛུགས་གིས་རྒྱུ་མཚན་དེ་གཞིར་བཞག་གིས་རང་བཙན་བརྩོན་བཞིན་ཡོད་པ་བསྐྱར་ནན་གནང་སོང་བ་མ་ཟད། ལྷག་དོན་ཞི་ཅིན་ཕིང་ད་རེས་རྒྱ་གར་རང་དབང་ལུང་པར་འབྱོར་གྱི་ཡོད་པ་དང་བསྟུན་རྒྱ་གར་ནང་གནས་བཞུགས་བོད་མི་ཚོས་ཁོ་པར་ངོ་རྒོལ་གནང་སྟེ་རྒྱ་ནག་རྒྱལ་ནང་དུ་སྐྱོད་ཀྱི་ཡོད་པའི་ཚོར་སྣང་ཞིག་བསྐྲུན་རྒྱུའི་འོས་འགན་ཡོད་པར་ནན་བརྗོད་གནང་སོང་། ཤེས་རྟོགས་བྱུང་བར་བསྟན་འཛིན་བརྩོན་འགྲུས་ལགས་ཅ་ནཡི་ Puzhal བཙོན་ཁང་དུ་ཟླ་ ༡༠ ཚེས་ ༡༨ བར་བཀག་བསྐྱིལ་བྱ་སྲིད་པ་དང་དེ་མིན་བོད་མི་བརྒྱད་པོ་དེ་དག་ཁ་ཉིན་རྒྱ་གར་རྒྱལ་ས་ལྡི་ལི་ནས་ཅ་ནཡི་རྒྱལ་སྤྱིའི་གནམ་ཐང་དུ་འབྱོར་སྐབས་འཛིན་བཟུང་བྱས་པ་ཞིག་ཆགས་ཀྱི་འདུག ད་ཆ་ལྷོ་ཕྱོགས་ Tamil Nadu མངའ་སྡེ་ཁྱོན་དུ་དམ་དྲག་ཆེ་རུ་བཏང་ཡོད་པའི་ཁྲོད་ཅ་ནཡི་ས་གནས་ཉེན་རྟོག་པ་རྣམས་ལ་མངའ་སྡེ་ནང་གི་བོད་མི་གཞིས་སྒར་ཁག་ཏུ་གནས་སྡོད་བོད་མི་ཚོར་ལྟ་སྲུང་ནན་པོ་བྱེད་བཞིན་ཡོད་པ་མ་ཟད། ད་ཆ་ཉེན་རྟོག་པས་དོགས་གཞི་ཅན་གྱི་ལས་རིམ་ཁག་ལ་ཞིབ་བཤེར་གནང་ཆེད་མངའ་སྡེའི་མགྲོན་ཁང་དང་ཡུལ་སྐོར་སྤྲོ་འཆམ་གྱི་ལྟེ་གནས་བཅས་སུ་ལྟ་སྐོར་གནང་བཞིན་འདུག གནད་དོན་དེའི་ཐད་བོད་རིགས་སློབ་མའི་ཁྲིམས་རྩོད་པ་སྐུ་ཞབས་ Arvind ལགས་ཀྱིས་ད་ལན་ལྷོ་ཕྱོགས་ Tamil Nadu མངའ་སྡེའི་ས་གནས་ཉེན་རྟོག་པས་ཡུལ་དེའི་ནང་རྒྱ་ནག་གི་སྲིད་འཛིན་ཞི་ཅིན་ཕིང་དང་རྒྱ་གར་གྱི་སྲིད་བློན་གཉིས་མཇལ་འཕྲད་གནང་རྒྱུ་གོང་ལ་བསྟན་འཛིན་བརྩོན་འགྲུས་ལགས་ཀྱིས་གཙོས་པའི་བོད་རིགས་སློབ་མ་བརྒྱད་འཛིན་བཟུང་གིས་བཀག་བསྐྱིལ་གནང་ཡོད་པ་དེ་ནི་རྒྱུ་མཚན་གང་ཡང་མེད་པར་འཛིན་བཟུང་བྱས་པ་དང་ལྷག་དོན་སློབ་ཕྲུག་དེ་དག་རང་ཉིད་ཀྱི་སྡོད་ཁང་ནང་ཡིག་རྒྱུགས་གྲ་སྒྲིག་གནང་བཞིན་སྐབས་སུ་འཛིན་བཟུང་གནང་བ་ཞིག་ཆགས་ཀྱི་ཡོད་སྟབས། སྐུ་ཞབས་ཁོང་ནས་ཆེས་མཐོའི་ཁྲིམས་ཁང་བརྒྱུད་གནད་དོན་དེ་འབྲེལ་ཐོག་གང་མགྱོགས་ཉན་ཞིབ་ཡོང་ཐབས་གནང་རྒྱུ་མ་ཟད། གལ་ཏེ་ཁོང་རྣམས་གློད་བཀྲོལ་མ་ཐོབ་ཚེ་གཟིགས་རྟོག་གང་ལེགས་ཡོང་བའི་ཞུ་སྐུལ་གནང་རྒྱུའི་རེ་བ་གནང་བཞིན་འདུག

ལུས་སེམས་སྲོག་གི་བགྲོ་གླེང་ལྷན་ཚོགས་ཐེངས་བཅུ་པ་དབུ་འཛུགས།

བཞུགས་སྒར་དུ་རྟེན་གཞི་བྱས་པའི་དབུས་བོད་ཀྱི་སྨན་རྩིས་ཁང་གི་ལུས་སེམས་སྲོག་གི་སྡེ་ཚན་གྱིས་གོ་སྒྲིག་གནང་ཐོག་རྒས་པའི་སེམས་ཁམས་གསོ་སྐྱོང་བརྗོད་གཞིའི་ཐོག་ལུས་སེམས་སྲོག་གི་བགྲོ་གླེང་ཐེངས་བཅུ་པ་དབུ་འཛུགས་གནང་སོང་། དེ་རིང་ཟླ་ ༡༠ ཚེས་ ༨ ཉིན་རྒྱབ་ཚོུད་ ༡ སྟེང་བཞུགས་སྒར་དུ་རྟེན་གཞི་བྱས་པའི་བོད་ཀྱི་སྨན་རྩིས་ཀྱི་ཁང་གི་ལུས་སེམས་སྲོག་གི་སྡེ་ཚན་གྱི་གོ་སྒྲིག་འོག་སྨན་རྩིས་མཐོ་སློབ་ཚོགས་ཁང་དུ་རྒས་པའི་སེམས་ཁམས་གསོ་སྐྱོང་ཞེས་པའི་བརྗོད་གཞི་ཐོག་ལུས་སེམས་སྲོག་གི་བགྲོ་གླེང་ལྷན་ཚོགས་ཐེངས་བཅུ་པ་དབུ་འཛུགས་གནང་སོང་བ་དང་། མཛད་སྒོའི་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་སྲིད་སྐྱོད་བློ་བཟང་སེང་གེ་མཆོག་དབུ་བཞུགས་ཐོག་གཞུང་དང་གཞུང་འབྲེལ་མ་ཡིན་པའི་ཚོགས་ཁག་གི་སྐུ་ཚབ་དང་ཕྱོགས་མཐའ་ཁག་ནས་ཆེད་བཅར་ཞུས་པའི་ཚོགས་བཅར་བ་རྣམ་པ། སྨན་རྩིས་ཁང་གི་དབུ་འཛིན་དབུས་པའི་མཐོ་སློབ་ཀྱི་དགེ་ལས་སློབ་མ་བཅས་ནས་མཉམ་ཞུགས་གནང་འདུག སྐབས་དེར་སྲིད་སྐྱོང་མཆོག་གིས་ལུས་སེམས་སྲོག་གི་སྡེ་ཚན་ཕྱི་ལོ་ ༢༠༡༣ ནང་གསར་འཛུགས་གནང་བ་དང་བསྟུན་ལོ་ ༦ ནང་ལུས་སེམས་སྲོག་གི་བགྲོ་གླེང་ཐེངས་བཅུ་གོ་སྒྲིག་གནང་བ་ཆགས་ཡོད་སྟབས། ལས་གཞི་གང་འདྲ་ཞིག་ཡིན་ཡང་དབུ་འཛུགས་གནང་རྒྱུ་ཁག་པོ་ཞིག་ཡིན་པ་དང་སྒོས་རྒྱུན་གནས་གནང་རྒྱུ་དེ་ལས་ཁག་བ་ཞིག་ཡིན་སྟབས་ལུས་སེམས་སྲོག་གི་སྡེ་ཚན་ནས་རྒྱུན་གནས་ཐུབ་པར་བསྔགས་བརྗོད་གནང་སོང་། དེ་བཞིན་སྲིད་སྐྱོང་མཆོག་གིས་སྔ་ལོར་ཕྱི་ལོ་ ༡༩༦༠ ནང་སྨན་རྩིས་ཁང་ཐོག་མར་དབུ་བརྙེས་སྐབས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྐབས་དེ་དུས་སྨན་པ་དང་སྐར་རྩིས་པ་རེ་ཟུང་ཡོད་པ་ཚོར་ཧུར་ཐག་གནང་དགོས་པ་དང་། དེ་ལྟར་གནང་ཚེ་བོད་ཀྱི་ཐུན་མོང་མ་ཡིན་པའི་གསོ་རིག་དར་སྤེལ་འགྲོ་ངེས་ཡིན་པར་ལམ་སྟོན་བཀའ་བསྩལ་བ་ལུང་འདྲེན་གྱིས་ད་ལྟའི་ཆར་སྨན་རྩིས་ཁང་དེ་གསོ་བ་རིག་པའི་ལྟེ་གནས་ཆེ་ཤོས་དང་རྙིང་ཤོས།  དེ་བཞིན་སྙན་གྲགས་ཆེ་ཤོས་ཆགས་ཡོད་པ་ནི་༸གོང་ས་མཆོག་གི་ཐུགས་ཀྱི་བཞེད་དགོངས་བསྒྲུབས་ཡོད་པ་རེད་ཅེས་གསུངས་སོང་། དེ་བཞིན་ལོ་ན་བགྲེས་པ་མང་དག་ཅིག་གཅིག་པུར་ལུས་པ་དང་། སེམས་ངལ་སོགས་ཀྱི་དཀའ་ངལ་འཕྲད་པ་བཞིན།  དེང་རབས་ལོ་ན་གཞོན་པ་ཕལ་མོ་ཆེ་ལག་ཐོགས་ཁ་པར་ཐོག་དུས་ཚོད་མང་པོ་ཞིག་བཏང་ནས་གྲོགས་ཕན་ཚུན་དབར་ཐུག་འཕྲད་སོགས་ཀྱི་དུས་ཚོད་མ་བཏང་བ་དང་ཕ་མ་ལས་ལྷག་པ་ཁ་པར་ལ་དགའ་ཞེན་བྱེད་ཀྱི་ཡོད་སྟབས་ང་ཚོའི་གཞོན་སྐྱེས་ཚོར་བློ་འཚབ་གནང་དགོས་པ་དང་། སེམས་ཁམས་འཕྲོད་བསྟེན་དཀའ་ངལ་དེ་རྒན་གཞོན་དར་གསུམ་ཀུན་ལ་འཕྲད་པའི་དཀའ་ངལ་ཆེན་པོ་ཆགས་ཀྱི་ཡོད་སྐོར་གསུངས་ཡོད། གཞི་རྩའི་བརྗོད་གཞི་གཙོ་བོ་མི་རབས་རྒན་པ་རྣམས་ལ་ཆེ་མཐོང་དང་གུས་པའི་སྒོ་ནས་བཀའ་དྲིན་རྗེས་དྲན་དང་རྒན་རབས་པ་མང་པོ་ཞིག་ལ་ལོ་ནའི་བབ་ཀྱི་ཆ་ནས་འཕྲོད་བསྟེན་ཐད་དཀའ་ངལ་དང་། དེ་བཞིན་ཁེར་རྐྱང་དང་སེམས་སྡུག་སོགས་ཀྱི་དཀའ་ངལ་འཕྲད་ཀྱི་ཡོད་སྟབས། ཁོང་རྣམས་ཀྱི་སམས་ཁམས་འཕྲོད་བསྟེན་གསོ་སྐྱོང་ཆེད་རིག་པའི་གཞུང་ལུགས་འདྲ་མིན་དང་། དེ་དག་གི་ཕན་ནུས་ལྡན་པའི་ཐབས་ལམ་རྣམས་དོན་དུ་གཉེར་རྒྱུར་ཆེད་དམིགས་ཀྱིས་གོ་སྒྲིག་ཞུས་པ་རེད་འདུག ལུས་སེམས་སྲོག་གི་བགྲོ་གླེང་ལྷན་ཚོགས་ཐེངས་བཅུ་པའི་ཐོག་ནང་བསྟན་སེམས་ཁམས་རིག་པ་དང་བོད་ཀྱི་གསོ་བ་རིག་པ། ནུབ་ཕྱོགས་ཚན་རིག ཨ་ཡུར་ཝེ་དྷ། ཧོ་མོ་ཨོ་པེ་ཐི། སི་དྡྷ། ཡུ་ན་ནི། ཡོ་ག བོད་རྩིས་རིག་པ་བཅས་ཀྱི་ཐོག་ནས་རྒས་པའི་སེམས་ཁམས་གསོ་སྐྱོང་གནང་ཐབས་ཐོག་བགྲོ་གླེང་གནང་རྒྱུ་རེད་འདུག

ནང་སྲིད་ལས་ཁུངས་དང་བོད་པའི་གཞིས་ཆགས་ཁག་གི་ལས་དོན་གནང་ཕྱོགས་གོ་བསྡུར།

ཁ་སང་ཚེས་ ༧ ཉིན་གངས་སྐྱིད་གཉའ་ཁྲི་ཚོགས་ཁང་དུ་ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་མཆོག་གིས་གཙོས་དྲུང་ཆེ་དཔེ་ཟུར་དབང་འདུས་ཚེ་རིང་ལགས་དང་དྲུང་འཕར་ཟླ་བ་ཚུལ་ཁྲིམས་ལགས་དབུ་བཞུགས་ཐོག་ཐེངས་འདིར་རྒྱ་བལ་འབྲུག་གསུམ་ནས་དམིགས་བསལ་ཚོགས་ཆེན་ཐོག་བཅར་བའི་ཁོསང་ནས་བོད་མིའི་གཞིས་སྒར་མི་འདྲ་བ་སོ་གྲངས་ཤིག་གི་ས་གནས་འགོ་འཛིན་ཆེད་འཛོམས་ཀྱིས་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་ཁྱབ་ཁོངས་ས་གནས་འགོ་འཛིན་རྣམས་ཀྱི་འཛིན་སྐྱོང་ལས་དོན་གནངཕྱོགས་དང་འབྲེལ་བའི་ཚོགས་འདུ་འཚོགས་འདུག ཁ་སང་ཚོགས་འདུའི་སྐབས་ས་གནས་འགོ་འཛིན་རྣམ་པ་བཅས་ཚང་འཛོམས་ཐོག་ནང་སྲིད་བཀའ་བློན་མཆོག་གིས་ནང་སྲིད་སོ་ནམ་ཚན་པས་སྐྱེ་ལྡན་སོ་ནམ་ལས་གཞི་དང་འབྲེལ་བའི་གྲངས་ཐོ་རྣམས་ལག་ཐོག་ཁ་པར་དང་ཀམ་པུ་ཊར་ཐོག་ལྟ་ཀློག་ཐུབ་ཆེད་བཀོལ་སྤྱོད་མཉེན་ཆས་ Padma App ཞེས་པ་དབུ་འབྱེད་གནང་ཡོད་པ་དང་། མཉེན་ཆས་དེ་ནི་བོད་པའི་སོ་ནམ་སྐྱེ་ལྡན་སོ་ནམ་ལས་གཞི་དང་འབྲེལ་བའི་གྲངས་ཐོ་བསྡུ་རུབ་དང་དཔྱད་ཞིབ་ཁུངས་ལྡན་ཞིག་ཡོང་སླད་ཡིན་པ་རེད་འདུག  གསར་འགོད་པས་ནང་སྲིད་སོ་ནམ་ཚན་པས་སྐྱེ་ལྡན་སོ་ནམ་ལས་གཞི་དང་འབྲེལ་ནས་ནང་སྲིད་དྲུང་འཕར་ཟླ་བ་ཚུལ་ཁྲིམས་ལགས་སུ་བོད་པའི་གཞིས་སྒར་ཁག་གི་སོ་ནམ་ཞིང་ལས་སྤྱི་ཡོངས་ཀྱི་གནས་སྟངས་ཐོག་བཀའ་འདྲི་ཞུས་པར་ཁོང་གིས་དེང་སང་བོད་པའི་གཞིས་སྒར་ཁག་ཏུ་གཞོན་སྐྱེས་རྣམས་ཀྱིས་སོ་ནམ་ཞིང་ལས་ཀྱི་ལས་རིགས་གཉེར་མཁན་ཇེ་ཉུང་དུ་འགྲོ་བཞིན་ཡོད་པ་གསུངས་སོང་། གཞི་རྩའི་སྐབས་འདིའི་ཚོགས་འདུའི་ཁྲོད་བརྗོད་གཞི་ཆེ་ཁག་གཉིས་ཡོད་པ་ནི།  ནང་སྲིད་ལས་ཁུངས་ནས་ཕྱོགས་སྒྲིག་གནང་བའི་རྒྱལ་བལ་འབྲུག་གསུམ་ནང་གི་བོད་མི་ལས་ཤུགས་གྲངས་ཐོ་བསྡུ་རུབ་ཀྱི་ལས་གཞི་གནས་སྟངས་ཐད་སྙན་གསེང་དང་གོ་བསྡུར་གནང་རྒྱུ། དེ་བཞིན་བཙན་བྱོལ་བོད་མིའི་མཐུན་རྐྱེན་སྦྱོར་སྤྲོད་གནང་ཕྱོགས་དང་འབྲེལ་བའི་ཕྱི་ལོ་ ༢༠༡༤ ལོའི་རྒྱ་གར་གྱི་སྲིད་བྱུས་དེ་གཞིས་ཆགས་ཁག་ཏུ་ལག་བསྟར་མཇུག་སྐྱོང་ཇི་ཐུབ་སོགས་ཀྱི་སྐོར་ལ་བགྲོ་གླེང་གནང་འདུག   དེ་བཞིན་རྒྱ་བལ་འབྲུག་གསུམ་ནང་གི་མི་འབོར་ཞིབ་བཤེར་ཐོག་ནས་གཞིས་ཆགས་ཁག་གིས་སྔོན་ཆད་ཕུལ་ཡོད་པའི་ལས་བསྡོམས་དང་ཉེ་ཆར་གྱི་མི་འབོར་ཞིབ་བཤེར་གྱི་གྲངས་ཐོ་གཉིས་ཀྱི་དབར་ལ་ཧེ་བག་ཆེན་པོ་བྱུང་ཡོད་སྟབས་མི་འབོར་ཞིབ་བཤེར་གྱི་ཐད་བགྲོ་གླེང་ལྷུག་པོ་གནང་སྟེ་གྲངས་ཐོ་གཏན་འབེབས་དགོས་པའི་བཀག་མངགས་གནང་ཡོད་སྐོར་གསུངས་ཡོད། རྩ་བའི་ཐེངས་འདིའི་ཚོགས་འདུ་ནི་ས་གནས་འཐུས་ཚབ་རྣམས་ཀྱི་དབར་གོ་བསྡུར་སྦྱང་བཤད་ཙམ་ལས་དམིགས་བསལ་གྲོས་ཆོད་གང་ཡང་འཇོག་གནང་གི་མེད་པ་དང་། ལོ་རྗེས་མར་བོད་མིའི་སྒྲིག་འཛུགས་ཀྱི་ནང་སྲིད་ལྷན་ཁང་ནས་གོ་སྒྲིིག་གནང་ཐོག་བོད་པའི་གཞིས་སྒར་ཁག་གི་ས་གནས་འགོ་འཛིན་ཆ་ཚང་མཉམ་འཛོམས་གནང་སྟེ་ཉིན་གསུམ་གྱི་རིང་ཚོགས་འདུ་རྒྱས་པ་ཞིག་འཚོགས་འཆར་ཡོད་པ་དང་། ལས་དོན་གནང་ཕྱོགས་དང་དཀའ་ངལ་ཅི་ཡོད་སོགས་སྤྱི་ཡོངས་ཀྱི་ཐད་ལ་གོ་བསྡུར་གནང་ནས་གྲོས་ཆོད་འཇོག་གནང་ཡོད་པ་རེད་འདུག  འབྲེལ་ཡོད་པར་རྣམས་དྲིལ་བསྒྲགས་དྲྭ་རྒྱ།  

བསྟན་འཛིན་བཙོན་འགྲུས་ལགས་འཛིན་བཟུང་བྱས་ཏེ་ Puzhal བཙོན་ཁང་དུ་བཀག་བསྐྱིལ།

རིང་མིན་རྒྱ་ནག་གི་སྲིད་འཛིན་ཞི་ཅིན་ཕིང་རྒྱ་གར་ལྷོ་ཕྱོགས་མངའ་སྡེ་ Tamil Nadu ནང་གཞུང་འབྲེལ་ཕྱོགས་བསྐྱོད་དུ་འབྱོར་གྱི་ཡོད་པ་དང་བསྟུན་རྩོམ་པ་པོ་དང་བོད་རང་བཙན་ལས་འགུལ་བ་བསྟན་འཛིན་བརྩོན་འགྲུས་ལགས་མངའ་སྡེ་དེའི་གྲོང་ཁྱེར་ Villupuram ནས་འཛིན་བཟུང་གིས་བཀག་ཉར་བྱས་ཡོད་པ་མ་ཟད་ཞི་ཅིན་ཕིང་གི་ལྟ་སྐོར་མཇུག་སྒྲིལ་མ་ཟིན་བར་དུ་ཁོང་ཁུལ་དེར་བཀག་བསྐྱིལ་གནང་སྲིད་པ་རེད་འདུག བརྒྱུད་ལམ་ཁག་ཏུ་ཐོན་པའི་གནས་ཚུལ་སྤེལ་གསལ་ཟླ་ ༡༠ ཚེས་ ༡༡ ནས་ ༡༣ བར་རྒྱ་གར་གྱི་ལྷོ་ཕྱོགས་གྲོང་ཁྱེར་ Mamallapuram ནང་རྒྱ་གར་གྱི་སྲིད་བློན་ Narendra Modi དང་རྒྱ་ནག་གི་སྲིད་འཛིན་ Xi Jinping གཉིས་དབར་ Sino-Indo summit ཞེས་ལོ་རྒྱུས་ཀྱི་རང་བཞིན་ལྡན་པའི་ཆེས་མཐོའི་གྲོས་མོལ་ཚང་འཛོམས་བྱ་རྒྱུ་ཡིན་པ་ལྟར་ཁ་ཉིན་གཟའ་སྤེན་པ་ཉིན་མངའ་སྡེ་དེའི་གྲོང་ཁྱེར་ Villupuram ཉེན་རྟོག་ལས་ཁང་ལ་རྒྱ་གར་གྱི་ནང་སྲིད་ལས་ཁུངས་བརྒྱུད་བོད་རང་བཙན་ལས་འགུལ་བ་བསྟན་འཛིན་བརྩོན་འགྲུས་ལགས་རྒྱ་དཀར་ནག་གཉིས་ཀྱི་ཆེས་མཐོའི་ལྷན་ཚོགས་ཚོགས་ཡུལ་གྱི་ས་ཚིགས་ཏུ་རྒྱ་ནག་གི་སྲིད་འཛིན་ལ་ངོ་རྒོལ་གནང་སྲིད་པའི་ཉེན་བརྡ་འབྱོར་ཡོད་སྟབས་སྔོན་འགོག་གི་ཆེད་དུ་བརྩོན་འགྲུས་ལགས་ཁ་ཉིན་ Villupuram མངའ་སྡེའི་མགྲོན་ཁང་ཞིག་ནས་འཛིན་བཟུང་གིས་ Kottappuram ས་གནས་ཉེན་རྟོག་ལས་ཁུངས་སུ་བཀག་ཉར་བྱས་ཡོད་པ་མ་ཟད་ཁོང་ནས་གོང་ཞུས་མགྲོན་ཁང་དེའི་ནང་ཁང་པ་ཞིག་རག་ཐབས་གནང་བཞིན་པ་དེས་ས་གནས་བདེ་འཇགས་ཉེན་རྟོག་པར་དོགས་ཟོན་སློང་ཡོད་པར་འགྲེལ་བརྗོད་གནང་ཡོད་པ་རེད། Villupuram བདེ་འཇགས་ཉེན་རྟོག་པ་ཁག་གཅིག་གིས་བརྗོད་པར་གཞིགས་ན་བརྩོན་འགྲུས་ལགས་ནས་ད་རེས་སླར་ཡང་སྲིད་འཛིན་ཞི་ཅིན་ཕིང་གི་ལྟ་སྐོར་དེའི་སྐབས་བོད་རང་དབང་འཁོད་པའི་འཕྲེད་དར་ཆེན་པོ་ཞིག་འཕྱར་རྒྱུའི་འཆར་གཞི་ ཡོད་སྟབས་ཁོང་གློ་བུར་དུ་ས་གནས་དེ་ནས་འཛིན་བཟུང་བྱས་ནས་ཁ་སང་སྔ་ཐོག་ Chennai གྱི་ Puzhal བཙོན་ཁང་དུ་གནས་སྤོས་བྱས་འདུག གནད་དོན་དེའི་ཐད་བསྟན་འཛིན་བརྩོན་འགྲུས་ལགས་ཀྱི་གྲོགས་པོ་ Friends of Tibet ཞེས་བོད་ཀྱི་གྲོགས་པོ་ཚོགས་པའི་འགན་འཛིན་སྐུ་ཞབས་ Sethu Das ལགས་ཀྱིས་སྤྱི་ཚོགས་དྲྭ་གནས་ཐོག་བརྩོན་འགྲུས་ལགས་ཁ་ཉིན་རེས་གཟའ་སྤེན་པ་ནས་འཛིན་བཟུང་གིས་བཀག་ཉར་འོག་ཡོད་པ་དང་སྲིད་འཛིན་ཞི་ཅིན་ཕིང་གི་ལྟ་སྐོར་མཇུག་སྒྲིལ་མ་བྱས་བར་དུ་གློད་བཀྲོལ་ཐོབ་ཐབས་མེད་པའི་གནས་སྟངས་ཞིག་ཆགས་ཡོད་པ་རེད་འདུག གཞི་རྩའི་བསྟན་འཛིན་བརྩོན་འགྲུས་ལགས་དེ་སྔོན་ཕྱི་ལོ་ ༢༠༠༢ དང་ ༢༠༠༥ སོ་སོར་སྐབས་དེའི་རྒྱ་ནག་གི་སྲིད་བློན་རྒྱ་གར་གྱི་གྲོང་ཁྱེར་ Mumbai དང་སྦེང་ལོར་གཉིས་ནང་ལྟ་སྐོར་ལ་འབྱོར་སྐབས་ངོ་རྒོལ་གྱིས་འཕྲེད་དར་འཕྱར་བར་བརྟེན་འཛིན་བཟུང་བཀག་ཉར་བྱས་མྱོང་ཡོད་པ་མ་ཟད། ཕྱི་ལོ་ ༢༠༠༦ ལོར་རྒྱ་ནག་གི་སྲིད་འཛིན་ Hu Jintao རྒྱ་གར་ལ་ལྟ་སྐོར་དུ་འབྱོར་སྐབས་རྒྱ་གར་གྱི་བདེ་འཇགས་ཉེན་རྟོག་ལས་ཁུངས་ནས་བསྟན་འཛིན་བརྩོན་འགྲུས་ལགས་ཀྱི་འགྲུལ་བཞུད་བཀག་སྡོམ་གྱིས་ཁོང་དྷརྨ་ས་ལར་བཞུགས་དགོས་པའི་དམ་བསྒྲགས་གནང་ཡོད་པ་བཅས་ཁོང་གིས་འདས་པའི་ལོ་ཡུན་མང་པོར་རྒྱ་གར་ལྷོ་ཕྱོགས་སྦེང་ལོར་གྲོང་ཁྱེར་གྱི་ཁྲིམས་ཁང་དུ་དེ་འབྲེལ་གནད་དོན་གྱི་ཞུ་གཏུག་སླད་འགྲིམ་འགྲུལ་གནང་དགོས་བྱུང་ཡོད་པ་རེད།

Latest news