16th TPiE Sessions

དེ་རིང་སྐབས་ ༡༦ བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་པའི་ལས་ཉིན་དྲུག་པའི་ཐོག་དཔལ་འབྱོར་ལས་ཁུངས་དང་དེ་འབྲེལ་ལས་ཁུངས་ཁག་གི་ལོ་འཁོར་སྔོན་རྩིས་གཏན་འབེབས་དང་ལས་དོན་གནང་ཕྱོགས་ཐོག་བགྲོ་གླེང་གནང་སྐབས་དཔལ་འབྱོར་བཀའ་བློན་མཆོག་གིས་གངས་ལྔོངས་དཔལ་འབྱོར་ཞབས་ཞུ་ཁང་གི་ལས་དོན་ཐོག་ལན་འདེབས་གསལ་བཤད་གནང་བ་དང་སྦྲགས། Education Loan འམ་ཤེས་ཡོན་དང་འབྲེལ་བའི་བུན་གཡར་ལས་གཞི་འོག་ད་ལྟའི་ཆར་ཁྱད་ལས་ཁོངས་ནས་སྨན་པའི་སློབ་སྦྱོང་གནང་མཁན་ཚོར་བུན་གཡར་གྱི་སློབ་ཡོན་གནང་གཏན་འཁེལ་ཡོད་པ་གསུངས་སོང་།སྤྱི་འཐུས་ཁག་ཅིག་གིས་དཔལ་འབྱོར་ལས་ཁུངས་ཀྱི་ཁྱབས་ཁོངས་གངས་ལྗོངས་དཔལ་འབྱོར་ཞབས་ཞུ་ཁང་ནས་བུན་གཡར་གྱི་ལས་གཞི་ཁག་ཅིག་སྤེལ་བཞིན་ཡོད་པ་དང་། བུན་གཡར་དེ་བཞིན་ང་ཚོའི་མ་འོངས་སོན་རྩ་སློབ་ཕྲུག་ཚོའི་ཤེས་ཡོན་ཐོག་བུན་གཡར་གནང་རྒྱུའི་དགོངས་པ་བཞེས་དགོས་པའི་རེ་སྐུལ་ཞུས་སོང་བ་ལྟར། དཔལ་འབྱོར་བཀའ་བློན་མཆོག་གིས་སྤྱིར་གངས་ལྗོངས་དཔལ་འབྱོར་ཞབས་ཞུ་ཁང་འདི་རྒྱ་གར་གྱི་ཁྲིམས་སྒྲིག་གཞིར་བཟུང་འགྲོ་དགོས་སྟབས་ད་ལྟའི་ཆར་དངུལ་ཁང་རང་གི་ངོ་བོར་ཆགས་མེད་ཀྱང་། མ་འཛུགས་ཀྱི་ལས་གཞི་ཁག་གནང་མུས་ཡིན་པ་སོགས་འགྲེལ་བརྗོད་གནང་བ་དང་ཆབས་ཅིག གངས་ལྗོངས་དཔལ་འབྱོར་ཞབས་ཞུ་ཁང་ནས་ཤེས་རིག་ལས་ཁུངས་དང་གོ་བསྡུར་ཞུས་ནས་ཤེས་ཡོན་དང་འབྲེལ་བའི་བུན་གཡར་ལས་གཞི་འོག་ཁྱད་ལས་ཁོངས་ནས་སྨན་པའི་ཐོག་སློབ་སྦྱོང་གནང་མཁན་ཚོར་བུན་གཡར་གྱི་སློབ་ཡོན་གནང་གཏན་འཁེལ་ཡོད་པ་གསུངས་ཡོད།   སྤྱི་འཐུས་ཁག་ཅིག་གིས་གངས་ལྗོངས་དཔལ་འབྱོར་ཞབས་ཞུ་ཁང་ལ་མི་མང་ནས་མ་འཛུགས་ཇི་ལྟར་གནང་དགོས་པ་དང་། བུན་གཡར་སྐབས་སུ་ཆ་རྐྱེན་གང་དག་དགོས་པ་སོགས་ཀྱི་ཐོག་བཀའ་དྲི་ཁག་ཅིག་ཞུས་པར་བཀའ་བློན་མཆོག་གི་ངོས་ནས་མ་འཛུགས་གནང་མཁན་ཇི་ཙམ་བྱུང་ཡང་དགའ་བསུ་ཡོད་པ་དེ་ལྟར་ཡང་། མ་འཛུགས་ཀྱི་དངུལ་དེ་དག་ངེས་པར་དུ་ཁྲིམས་དང་མཐུན་པ་ཞིག་དགོས་གལ་དང་། རྒྱ་གར་གཞུང་གི་ཚོང་དོན་ལྷན་ཚོགས་ཀྱི་ཁྲིམས་སྒྲིག་གཞིར་བཟུང་མ་ཤེར་བདག་དབང་གི་ལག་འཁྱེར་གནང་བཞིན་ཡོད་པ་སོགས་འགྲེལ་བརྗོད་གནང་སོང་།  དེ་བཞིན་དཔལ་འབྱོར་ལས་ཁུངས་ཀྱི་ཁྱབ་ཁོངས་བེུད་ནུས་སྟོབས་གོང་འཕེལ་ཚན་པ་དང་འབྲེལ་ནས་ཚན་པའི་ངོས་ནས་བོད་པའི་སྤྱི་ཚོགས་ཁྲོད་བེུད་ནུས་སྟོབས་གོང་འཕེལ་དང་འབྲེལ་བའི་ཟབ་སྦྱོང་ཁག་ཅིག་གནང་བཞིན་པར་བསྔགས་བརྗོད་དང་སྦྲགས། ཚན་པར་ཆེད་འཛུགས་གནང་བའི་རིན་མེད་ཁ་པར་འབྲེལ་མཐུད་བརྒྱུད་བེུད་ཀྱི་བེད་སྡུག་ཞུ་མཁན་ག་ཚོད་བྱུང་ཡོད་དམ་ཞེས་སོགས་བཀའ་འདྲི་ཞུ་མཁན་བྱུང་ཡོད།  དཔལ་འབྱོར་ལས་ཁུངས་དང་དེ་འབྲེལ་ཚན་པ་ཁག་གི་ལོ་འཁོར་སྔོན་རྩིས་གཏན་འབེབས་ཟིན་པའི་རྗེས་སུ་ཆོས་རིག་ལས་ཁུངས་ཀྱི་ལོ་འཁོར་སྔོན་རྩིས་གཏན་འབེབས་དང་དེ་འབྲེལ་ལས་དོན་ཁག་གི་ཐོག་བགྲོ་གླེང་གནང་སྐབས་སྤྱི་འཐུས་ལ་ལས་འདས་པའི་ཟླ་ཤས་ཁྲོད་སྤྱི་ཚོགས་ནང་༸གོང་ས་མཆོག་ལ་མཚན་སྨད་ཞུ་མཁན་ཁག་ཅིག་བྱུང་བ་དེ་དག་ལ་སྲིད་སྐྱོང་མཆོག་གིས་དབུས་པའི་འཛིན་སྐྱོང་བཀའ་ཤག་ནས་གདོང་ལེན་གནང་ཕྱོགས་ཐད་བཀའ་འདྲི་གནང་མཁན་བྱུང་སོང་། སྤྱི་འཐུས་ཁག་ཅིག་ནས་༸གོང་ས་མཆོག་ལ་མཚན་སྨད་ཞུ་མཁན་སུ་ཡིན་མིན་ལ་དབྱེ་བ་མེད་པར་ཚང་མར་ངོ་རྒོལ་གཅིག་མཚུངས་གནང་དགོས་པའི་དགོངས་འཆར་གནང་བར་ཆོས་རིག་བཀའ་བློན་མཆོག་གིས་འཛིན་སྐྱོང་བཀའ་ཤག་གི་ངོས་ནས་༸གོང་ས་མཆོག་ལ་མཚན་སྨད་ཞུ་མཁན་ཚོར་མཐའ་གཅིག་ཏུ་ངོ་རྒོལ་གནང་མུས་ཐོག་མུ་མཐུད་ནས་དེ་ལྟར་གནང་རྒྱུའི་དགོངས་བཞེས་ཡོད་ཅེས་གསུངས་ཡོད། ཆོས་རིག་ལས་ཁུངས་ནས་མ་འོངས་པར་༸གོང་ས་མཆོག་གི་ཐུགས་བསྐྱེད་ཆེན་པོ་བཞི་པོ་རྣམས་བོད་མིའི་གནས་ཡུལ་གཞིས་ཆགས་ཁག་ཏུ་ས་གནས་སོ་སོའི་སྐད་ཡིག་ཐོག་ཕབ་སྒྱུར་གནང་སྟེ་འགྲེམས་སྤེལ་གནང་གལ་ཡིན་པ་དང་ལྷག་པར་དུ་དེ་སྔ་བླ་ཆེན་རྣམ་པའི་ཚོགས་ཆེན་ཐོག་ཆོས་བརྒྱུད་ཁག་གི་བསྟན་བདག་བླ་ཆེན་རྣམ་པས་༸གོང་ས་མཆོག་གི་༸སྐུའི་ཡང་སྲིད་ཀྱི་གནད་དོན་ཐོག་སྩལ་བའི་བཀའ་སློབ་ཁག་ཕྱོགས་བསྒྲིགས་ཀྱིས་དཔར་སྐྲུན་གནང་གལ་ཡིན་སྐོར་གསུངས་མཁན་བྱུང་ཡོད།དེང་སྐབས་བཙན་བྱོལ་ནང་གི་དགོན་སྡེ་ཁག་ཏུ་གྲྭ་བཙུན་གྱི་གྲངས་འབོར་ཉུང་དུ་འགྲོ་བཞིན་པ་དང་། ལྷག་པར་དུ་བོད་རིགས་གྲྭ་བཙུན་ནང་འཛུl་ཞུགས་གནང་མཁན་ཧ་ཅང་ཉུང་ངུ་ཆགས་བཞིན་ཡོད་པའི་གནད་དོན་སྐོར་གླེང་སློང་གནང་སྐབས་ཆོས་རིག་བཀའ་བློན་མཆོག་གིས་གནད་དོན་དེ་དངོས་འབྲེལ་ཡིན་པ་དང་། ད་ལྟའི་ཆར་ཆོས་རིག་ལས་ཁུངས་ཀྱི་ངོས་ནས་གྲངས་འབོར་མང་ཉུང་ལ་མ་ལྟོས་པར་ད་ཡོད་པ་རྣམས་ལ་སྤུས་ཚད་ལྡན་པ་ཞིག་ཡོང་བར་འབད་བརྩོན་ཞུ་བཞིན་ཡོད་པར་གསུངས་སོང་།གཞན་ཡང་སྤྱི་འཐུས་རྣམ་པས་ཆོས་རིག་ལས་ཁུངས་ཀྱི་སྔོན་རྩིས་ལས་དོན་དང་འབྲེལ་ཏེ་དགོན་སྡེ་ཁག་གི་དཔེ་ཁྲིད་དགེ་རྒན་དང་བོད་ནས་ཕེབས་པའི་ཁ་འཐོར་ས་གནས་ཁག་ཏུ་བཞུགས་པའི་གྲྭ་བཙུན། དེ་བཞིན་དགེ་བཤེས་མའི་བསླབ་པ་སློབ་གཉེར་གནང་ཟིན་ཁག་གི་ནུས་པ་སྔར་ལྷག་རྒྱ་སྐྱེད་གནང་བར་རོགས་རམ་གནང་དགོས་པའི་གཞེན་སྐུལ་གནང་ཡོད།གཞི་རྩའི་དེ་རིང་གི་གྲོས་ཚོགས་ལས་ཉིན་ཐོག་དཔལ་འབྱོར་ལས་ཁུངས་དང་ཆོས་རིག་ལས་ཁུངས་ཀྱི་རྩིས་ལོ་ ༢༠༢༡་༢༠༢༢ ལོའི་ཕྱོགས་བསྡོམས་སྔོན་རྩིས་འགྲོ་གྲོན་གྱི་དགོས་དངུལ་ཁག་གཏན་འཕེབས་གནང་སྟེ་ཚོགས་དུས་མཐའ་མའི་ཐོག་འཕྲོད་བསྟེན་ལས་ཁུངས་ཀྱི་སྔོན་རྩིས་གཏན་འབེབས་ལས་དོན་ཐོག་ཕེབས་ཡོད།

དེ་རིང་སྐབས་ ༡༦ བོད་མི་མང་སྤྱི་འཐུས་ལྷན་ཚོགས་གྲོས་ཚོགས་ཚོགས་དུས་བཅུ་པའི་ལས་ཉིན་བཞི་པའི་ཚོགས་དུས་གཉིས་པའི་ཐོག་བོད་མིའི་སྒྲིག་འཛུགས་ཀྱི་ལས་ཁུངས་མ་ལག་དང་བཅས་པའི་རྩིས་ལོ་ ༢༠༢༡༌༢༢ ལོའི་སྔོན་རྩིས་གཏན་འབེབས་ཀྱི་ལས་རིམ་ཐོག་ཕེབས་ཡོད་པ་དང་། སྐབས་དེར་དབུས་འོས་བསྡུ་ལས་ཁང་གི་སྔོན་རྩིས་གཏན་འབེབས་ཀྱི་ལས་དོན་ཁྲོད་འགྲོ་བཞིན་པའི་སྲིད་སྤྱི་གཉིས་ཀྱི་འོས་བསྡུའི་ལས་རིམ་དང་འབྲེལ་ནས་དབུས་འོས་བསྡུ་ལས་ཁང་ལ་བཀའ་འདྲི་ཁག་ཅིག་ཕེབས་སོང་། སྤྱི་འཐུས་ཁག་ཅིག་གིས་སྲིད་སྤྱི་གཉིས་ཀྱི་འོས་བསྡུའི་ལས་རིམ་ཁྲོད་འཛིན་སྐྱོང་བཀའ་ཤག་ནས་ས་གནས་འགོ་འཛིན་ཁག་ཅིག་གནས་སྤོར་བཏང་པའི་གནད་དོན་དང་དེ་བཞིན་སྲིད་སྐྱོང་མཆོག་གི་ལས་ཡུན་ཚང་ལ་ཉེ་བའི་སྐབས་སུ་ཐོན་མཇལ་དུ་ཕེབས་སྲོལ་ཡོད་པ་དེ་འོས་བསྡུའི་སྐབས་སུ་ཕེབས་མི་དགོས་པ་གནང་དགོས་པའི་གཞེན་སྐུལ་གནང་ཡོད་པ་རེད། སྤྱི་འཐུས་ལ་ལས་འོས་བསྡུའི་དེབ་སྐྱེལ་བྱེད་སྐབས་དང་འོས་གྲངས་གསལ་བསྒྲགས་གནང་སྟངས། དེ་བཞིན་ཆོས་བརྒྱུད་དང་འབྲེལ་བའི་འོས་ཤོག་གཙོས་འོས་བསྡུའི་ལས་རིམ་ཁག་ཅིག་གྲ་སྒྲིག་ཚགས་ཚུད་བྱུང་མེད་པའི་དགོངས་ཚུལ་དང་བཀའ་འདྲི་ཁག་ཅིག་ཞུས་ཡོད། སྤྱི་འཐུས་ཁག་ཅིག་ནས་ཏོག་དབྱིབས་ཀྱི་ཛ་དྲག་གནས་སྟངས་ཁྲོད་འོས་བསྡུ་ལས་ཁང་ནས་ཕྱག་ལས་ཡག་པོ་གནང་ཡོད་པའི་བསྔགས་བརྗོད་གནང་མཁན་ཡང་བྱུང་སོང་བར་མ་ཟད། སྤྱི་ཡོངས་ནས་འོས་བསྡུའི་སྒྲིག་གཞི་འདི་གྲོས་ཚོགས་ནས་གཏན་འབེབས་གནང་བ་ཞིག་ཡིན་སྟབས་གྲོས་ཚོགས་འཐུས་མི་ཚོས་དེར་དགོངས་པ་བཞེས་རྒྱུ་དེ་ཡང་གལ་ཆེན་པོ་ཡིན་པའི་དགོངས་ཚུལ་གསུང་མཁན་ཡང་བྱུང་ཡོད།འོན་ཀྱང་གྲོས་ཚོགས་ནང་དབུས་འོས་བསྡུ་ལས་ཁང་གི་སྐུ་ཚབ་མེད་ཙང་སྤྱི་འཐུས་རྣམ་པའི་བཀའ་འདྲི་ཁག་འཛིན་སྐྱོང་བཀའ་ཤག་བརྒྱུད་དབུས་འོས་བསྡུ་ལས་ཁང་ལ་སྙན་སེང་ཞུས་ཏེ་གྲོས་ཚོགས་ཀྱི་ལས་ཉིན་རྗེས་མའི་སྐབས་སུ་ལན་འདེབས་གསལ་པོ་ཞིག་གྲོས་ཚོགས་སུ་ཕེབས་རྒྱུ་ཡིན་སྟབས། དེ་རིང་དབུས་འོས་བསྡུ་ལས་ཁང་གི་སྔོན་རྩིས་གཏན་འབེབས་མ་ཐུབ་པར་སྒོ་ཕྱེ་ནས་བཞག་དགོས་བྱུང་ཡོད། དེ་རིང་སྐུ་ཚབ་དོན་གཅོད་ལས་ཁུངས་ཁག་གི་སྔོན་རྩིས་གཏན་འབེབས་གནང་སྐབས་བལ་ཡུལ་སྐུ་ཚབ་དོན་གཅོད་ལས་ཁུངས་ཀྱི་སྔོན་རྩིས་ལས་དོན་དང་འབྲེལ་སྤྱི་འཐུས་ཁག་ཅིག་ནས་སྲིད་སྐྱོང་མཆོག་གིས་ལས་ཡུན་ལོ་བཅུ་ཙམ་འགྲོ་བཞིན་པའི་ཁྲོད་དེར་བལ་ཡུལ་དུ་ཕེབས་མེད་སྟབས། ཡོང་རྒྱུའི་དུས་ཡུན་ནང་བལ་ཡུལ་དུ་ཕེབས་འཆར་ཡོད་དམ་ཞེས་དང་བལ་ཡུལ་ནང་ཡོད་པའི་སྐྱབས་བཅོལ་བོད་མི་ཚོར་འཕྲད་བཞིན་པའི་ཁྲིམས་མཐུན་གྱི་ཡིག་ཆ་དང་འཚོ་ཐབས་སོགས་ཀྱི་དཀའ་ངལ་ཐད་སྒྲིག་འཛུགས་ནས་གཟིགས་སྐྱོང་གང་འདྲ་གནང་ཡོད་མེད་སོགས་བཀའ་འདྲི་ཁག་ཅིག་ཞུས་སོང་། སྲིད་སྐྱོང་མཆོག་ནས་ད་བར་སྲིད་སྐྱོང་གི་ངོ་བོའི་ཐོག་ནས་བལ་ཡུལ་ནང་ཕེབས་མ་ཐུབ་པ་དེར་བློ་ཕམ་ཆེན་པོ་གནང་ཡོད་པ་དང་། དེ་ཡང་རྐང་རྒྱ་ནག་གཞུང་གི་གནོན་ཤུགས་འོག་བལ་ཡུལ་གཞུང་ནས་སྲིད་སྐྱོང་གིས་དབུས་པའི་བོད་མིའི་དབུ་ཁྲིད་དགུ་བལ་ཡུལ་ནང་ཕེབས་མི་ཆོག་པའི་དམ་དྲག་བྱས་པའི་དབང་གིས་ཡིན་པ་སོགས་འགྲེལ་བརྗོད་དང་སྦྲགས། སྲིད་སྐྱོང་མཆོག་སྐུ་སྒེར་ཕེབས་མ་ཐུབ་ཀྱང་བཀའ་ཤག་གི་བཀའ་བློན་ཁག་ཅིག་བལ་ཡུལ་དུ་ཕེབས་ཏེ་བོད་མིའི་གནས་སྟངས་ལ་གཟིགས་ཞིབ་སོགས་གནང་ཡོད་སྐོར་གསུངས་ཡོད།སྲིད་སྐྱོང་མཆོག་ནས་བལ་ཡུལ་ནང་སྡོད་ཁང་དང་འཚོ་ཐབས་དཀའ་ངལ་ཡོད་མཁན་ཚོར་Katmandu རྒྱལ་སའི་ཁུལ་དུ་སྡོད་ཁང་གསར་རྒྱག་བྱེད་རྒྱུ་དེ་ཆབ་སྲིད་སོགས་ཀྱི་གནས་བབ་གང་གི་ཆ་ནས་ཁག་པོ་ཞིག་ཆགས་ཡོད་སྟབས་བལ་ཡུལ་བྱམས་པ་གླིང་དང་། རྒྱ་གར་ནང་གཞིས་སྤོར་གནང་འདོད་ཡོད་མཁན་ཚོར་སྡོད་ཁང་གནང་རྒྱུའི་ལས་གཞི་ཞིག་ནང་སྲིད་ལས་ཁུངས་བརྒྱུད་གསལ་བསྒྲགས་གནང་ཟིན་ཡོད་པ་སོགས་གསུངས་སོང་། དེ་བཞིན་སྤྱི་འཐུས་ཁག་ཅིག་ནས་བལ་ཡུལ་ནང་ཆོས་དང་རིག་གཞུང་གི་ཐོག་ནས་འབྲེལ་བ་འཛུགས་ཐབས་གནང་དགོས་པའི་འབོད་སྐུལ་གནང་བ་དང་། སྦར་སིལ་སྐུ་ཚབ་དོན་གཅོད་དང་པེ་རི་སི་བོད་ཁང་ཐེབས་རྩའི་སྔོན་རྩིས་ལས་དོན་དང་འབྲེལ་ས་གནས་ཁག་ཏུ་བོད་དོན་ལས་འགུལ་སྤེལ་མཁན་ལ་བསྔགས་བརྗོད་དང་མ་འོངས་པར་འཛིན་སྐྱོང་གི་ངོས་ནས་ཕྱི་རྒྱལ་ཁག་ཏུ་བོད་ཀྱི་ཆོས་དང་རིག་གཞུང་ཐོག་ཤུགས་སྣོན་བྱེད་དགོས་པའི་དགོངས་ཚུལ་གསུང་མཁན་བྱུང་ཡོད།དེ་རིང་གི་གྲོས་ཚོགས་ལས་རིམ་ཐོག་སྔོན་རྩིས་ལས་དོན་དང་འབྲེལ་སྐུ་ཚབ་དོན་གཅོད་ལས་ཁུངས་ཁག་དང་། ལས་བྱེད་འདེམས་བསྐོ་ལྷན་ཁང་། དེ་བཞིན་སྤྱི་ཁྱབ་རྩིས་ཞིབ་ལས་ཁང་དང་དེའི་ཡན་ལག་ལས་ཁང་ཁག་བཅས་ཀྱི་རྩིས་ལོ་ ༢༠༢༡ ནས་༢༠༢༢ ལོའི་ཕྱོགས་བསྡོམས་སྔོན་རྩིས་འགྲོ་གྲོན་གྱི་དགོས་དངུལ་ཁག་གཏན་འབེབས་གནང་སྟེ་དཔལ་འབྱོར་ལས་ཁུངས་ཀྱི་སྔོན་རྩིས་གཏན་འབེབས་ལས་དོན་ཐོག་ཕེབས་ཡོད།

དེ་རིང་སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༡༠ པའི་ལས་ཉིན་ ༥ པའི་ཐོག་ བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་ཚོས་གཙོས་པའི་དབུས་ས་ཡན་ལག་དང་བཅས་པའི་སྲི་ཞུ་བ་ཕོ་མོ་ཁྱད་མེད་ཀྱིས་ཉིན་ལྟར་ལས་ཁུངས་སུ་བཅར་སྐབས་བོད་ཆས་སྤྲས་དགོས་པ་དང་བོད་སྐད་གཙང་མ་རྒྱག་དགོས་པ། དེ་བཞིན་ལས་ཁུངས་ཁག་ལ་བཅར་མཁན་བོད་མི་སྐྱ་སེར་སུ་རུང་ལའང་དེ་དེ་བཞིན་གྱི་གཞེན་སྐུལ་གནང་དགོས་པའི་གྲོས་ཆོད་ཅིག་མང་མོས་ཀྱིས་གཏན་འབེབས་གནང་སོང་།དེ་རིང་གྲོས་ཚོགས་ཀྱི་སྔ་དྲོའི་ཚོགས་ཐེངས་དང་པོའི་ལས་རིམ་དེ་སྤྱི་འཐུས་སྒེར་གྱི་གྲོས་ཆོད་གྲོས་འཆར་ཐོག་ཕེབས་པ་དང་འབྲེལ་ནས་སྤྱི་འཐུས་མཁན་པོ་འཇམ་དཔལ་བསྟན་འཛིན་ལགས་ཀྱིས་སྒེར་གྱི་གྲོས་ཆོད་གྲོས་འཆར་བསྣམས་པར་ད་ཕན་རང་རེ་བོད་མིའི་སྒྲིག་འཛུགས་ཀྱི་དབུས་ས་ཡན་ལག་དང་བཅས་པའི་སྲི་ཞུ་བ་སུ་འདྲ་ཞིག་ཡིན་རུང་ཕོ་མོ་ཁྱད་མེད་ཀྱིས་ཉིན་ལྟར་ལས་ཁུངས་སུ་བཅར་སྐབས་བོད་ཆས་སྤྲས་དགོས་པ་དང་བོད་སྐད་གཙང་མ་རྒྱག་དགོས་པ། དེ་བཞིན་ལས་ཁུངས་ཁག་ལ་བཅར་མཁན་བོད་མི་སྐྱ་སེར་སུ་རུང་ལའང་དེ་དེ་བཞིན་གྱི་གཞེན་སྐུལ་གནང་དགོས་ཞེས་འཁོད་ཡོད་པ་ལྟར། དེའི་ཐོག་སྲིད་སྐྱོང་བློ་བཟང་སེང་གེ་མཆོག་གིས་གིས་གཙོས་པའི་སྤྱི་འཐུས་རྣམ་པས་བགྲོ་གླེང་ལྷུག་པོ་གནང་སྟེ་གྲོས་ཆོད་ཀྱི་ཚིག་བརྗོད་ལ་འགྱུར་བ་ཕྲན་བུ་གནང་མཐར་མང་མོས་ཀྱིས་གཏན་འབེབས་གནང་ཡོད། སྐབས་དེར་གྲོས་འཆར་འདོན་མཁན་དང་རྒྱབ་སྐྱོར་གནང་མཁན་སྤྱི་འཐུས་གཉིས་ཀྱི་ངོས་ནས་བོད་བཙན་པོའི་དུས་སྐབས་ནས་བཟུང་བོད་ཀྱི་ཆས་གོས་དར་སྲོལ་དང་། ཆས་གོས་ཀྱི་དཔའ་ཉམས་བཅས་ཞིབ་རྒྱས་སུ་ངོ་སྤྲོད་གནང་བ་དང་འབྲེལ། བཙན་བྱོལ་རང་དབང་ལུང་པར་བཞུགས་པའི་བོད་མི་རྣམས་ནས་བོད་ཆས་ལེགས་པོ་སྤྲད་ཀྱི་མེད་པ་དང་གཞིས་བཞུགས་བོད་མིས་བོད་ཆས་ལེགས་པོ་སྤྲས་པའི་སྐུ་པར་ལྷན་བསྒྲིགས་ཀྱིས་བློ་འཚབ་ཡོད་པའི་རྣམ་པ་ཆེད་བཏོན་གནང་བ་མཇལ་རྒྱུ་ཡོད་པ་དང་། ལྷག་དོན་བཞུགས་སྒར་དྷརྨ་ས་ལའི་བོད་མིའི་སྒྲིག་འཛུགས་ཀྱི་དཀྱིལ་འཁོར་ལྟ་བུར་མཚོན་ན་སྲི་ཞུ་བའི་ཁོངས་ནས་སྐུ་སྐྱེད་མ་ཚོས་སྔར་ནས་ད་བར་བོད་ཆས་འཐུས་ཚང་སྤྲ་བཞིན་ཡོད་ཀྱང་། སྐྱེད་པ་ཚོས་བོད་ཆས་མ་སྤྲས་པའི་གནས་སྟངས། གཞི་རིམ་མང་ཚོགས་ཀྱི་ཐུགས་རེ་དང་སྲི་ཞུ་བའི་འགན་འཁྲི། དེ་བཞིན་བོད་ཀྱི་ཆོས་དང་རིག་གཞུང་སྲུང་སྐྱོབ་བཅས་ཀྱི་གནད་དོན་མངོན་གསལ་གནང་བ་དང་སྦྲགས། བོད་མིའི་སྒྲིག་འཛུགས་ཀྱི་སྲི་ཞུ་བ་དང་དབུ་ཁྲིད་རྣམས་མང་ཚོགས་ཀྱི་མིག་དཔེ་ཡར་ལྟ་ཞུ་ཡུལ་ཞིག་ཡིན་སྟབས་གྲོས་ཆོད་དེ་ཆེད་བཏོན་གནང་བཞིན་ཡོད་པ་གསུངས་ཡོད།སྐབས་དེར་སྲིད་སྐྱོང་བློ་བཟང་སེང་གེ་མཆོག་གིས་གྲོས་འཆར་ལ་རྒྱབ་སྐྱོར་གནང་བ་དང་འབྲེལ་ནས་འཛིན་སྐྱོང་བཀའ་ཤག་གི་ངོས་ནས་གངས་སྐྱིད་ཡོངས་རྫོགས་སྲོལ་རྒྱུན་གྱི་རྣམ་པ་ཆེད་བཟོ་གནང་ཡོད་སྐོར་གསུངས་པ་དང་ཆབས་ཅིག ཕྱི་ལོ་ ༢༠༡༡ ལོ་ནས་བཟུང་རེས་གཟའ་ལྷག་པ་ནམ་ཡིན་ལ་སྲིད་སྐྱོང་སྐུ་ཉིད་ནས་བོད་ཆས་སྤྲས་པ་དང་དེ་བཞིན་སྲི་ཞུ་བ་གཞན་ཚོར་དེ་ལྟར་སྤྲས་དགོས་པའི་སྐུལ་མ་གནང་ཡོད་པར་གསུངས་སོང་།སྤྱི་འཐུས་གཞན་ཁག་གིས་རྩ་བའི་གྲོས་ཆོད་གྲོས་འཆར་ལ་རྒྱབ་སྐྱོར་ཞུས་ཡོད་ཀྱང་གྲོས་འཆར་གྱི་ཚིག་བརྗོད་ནང་དུ་ཁམས་གཙང་ཞེས་པའི་ཐ་སྙད་དེ་ཕྱག་བསྟར་གནང་སྐབས་ངལ་བ་འཕྲད་སྲིད་པར་བརྟེན་ཚིག་བརྗོད་དེ་ཕྱིར་འཐེན་གནང་དགོས་པ་དང་། སྲི་ཞུ་བ་ཙམ་མ་ཡིན་པར་མཛད་གཙོ་རྣམ་པ་ལའང་དེ་མཚུངས་ཐུགས་འགན་ཡོད་སྟབས་ཚིག་བརྗོད་ཀྱི་ནང་དུ་དེ་ལྟར་འཁོད་དགོས་པའི་སྐོར་གླེང་སློང་གནང་བ་དང་འབྲེལ་གྲོས་ཆོད་གཏན་འབེབས་སྐབས་ཚིག་བརྗོད་ལ་འགྱུར་བ་ཕྲན་བུ་གནང་ཡོད་པ་རེད།དེ་བཞིན་སྤྱི་འཐུས་ཁག་ཅིག་ནས་གྲོས་འཆར་ལ་རྒྱབ་སྐྱོར་གནང་ཡོད་པ་དེ་ལྟར་ཡང་། སྒྲིག་གཞི་ཞིག་གི་ཐོག་ནས་མ་ཡིན་པར་མ་སྐུལ་དང་བླངས་ཀྱིས་རང་མི་རིགས་ཀྱི་ཆས་གོས་ལ་སྤོབས་པ་དང་བཅས་སྤྲས་དགོས་གལ་ཡིན་པར་གཟིགས་སྐོར་གསུངས་པ་དང་རང་ཉིད་ཀྱི་ཚོར་བའི་ཐོག་ནས་དེ་ལྟར་གནང་གནད་ཡིན་པར་གསུངས་སོང་།སྤྱི་འཐུས་ཤིག་གིས་བོད་བརྒྱུད་ནང་བསྟན་གྱི་དགོན་སྡེ་ཁག་ཏུ་བཅར་སྐབས་ཕྱི་རྒྱལ་མི་སྣ་སོགས་སུ་ཡིན་རུང་གྱོན་ཆས་འཐུས་ཚང་སྤྲས་དགོས་པའི་སྐུ་མ་གནང་གལ་སྐོར་གསུངས་ཡོད།རྩ་བའི་དེ་རིང་སྔ་དྲོའི་ཚོགས་ཐེངས་གཅིག་སྤྱིར་འཐུས་སྒེར་གྱི་གྲོས་ཆོད་གྲོས་འཆར་ཐོག་ཕེབས་པའི་རྗེས་སུ་ཉིན་འཁྱོངས་རིང་བོད་མིའི་སྒྲིག་འཛུགས་ཀྱི་ལས་ཁུངས་མ་ལག་བཅས་པའི་སྔོན་རྩིས་གཏན་འབེབས་ཀྱི་ལས་རིམ་ཐོག་ཕེབས་ཡོད།

དེ་རིང་སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༡༠ པའི་ལས་ཉིན་བཞི་པའི་སྔ་དྲོའི་ཚོགས་དུས་ཐོག་བོད་མི་མང་སྤྱི་འཐུས་རྣམ་པས་མུ་མཐུད་བོད་ནང་གི་ཛ་དྲག་གནས་སྟངས་ཐོག་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་ཐོག་བགྲོ་གླེང་ལྷུང་པོ་གནང་སྟེ་རྒྱ་ནག་གཞུང་ནས་བོད་མི་དཔའ་བོ་དཔའ་མོའི་མངོན་འདོད་ལ་ངེས་པར་དུ་འགན་འཁུར་བདག་སྤྲོད་ཞུ་དགོས་པ་མ་ཟད་རྒྱ་ནག་ནང་འཚོགས་ལ་ཉེ་བའི་ཨོ་ལམ་པིག་རྩེད་འགྲན་སོགས་དང་བསྟུན་བཀའ་སྤྱི་གཉིས་ཀྱིས་གཙོས་པའི་གཞུང་དང་གཞུང་འབྲེལ་མིན་པའི་ཚོགས་སྡེ་ཁག་གིས་འཛམ་གླིང་ཡོངས་ཁྱབ་ཏུ་ངོ་རྒོལ་གྱི་ལས་འགུལ་རྒྱ་གང་ཆེར་སྤེལ་དགོས་གལ་ཡིན་པ་སོགས་ཀྱི་གྲོས་ཆོད་གྲོས་འཆར་དོན་ཚན་བརྒྱད་ཅན་ཞིག་སྤྱི་མོས་ཀྱིས་གཏན་འབེབས་གནང་སོང་།གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་གྱི་སྔོན་གླེང་ནང་དུ་ཕྱི་ལོ་ ༡༩༥༩ ལོའི་བར་དུ་བོད་འདི་རང་དབང་རང་བཙན་གྱི་རྒྱལ་ཁབ་ཡིན་པ་དང་། དགྲ་བོ་རྒྱ་དམར་གཞུང་གིས་བོད་ལ་དྲག་པོའི་བཙན་འཛུལ་བྱས་པའི་རྗེས་སུ་རྒྱ་ནག་དམར་ཤོག་གཞུང་གིས་མི་སེར་སྤེལ་བའི་སྲིད་བྱུས་འོག་རྒྱ་རིགས་མང་པོ་བོད་སར་གནས་སྤོས་བྱས་པ། བོད་བརྒྱུད་ནང་བསྟན་རྒྱ་ནག་ཅན་དུ་འགྱུར་རྒྱུའི་སྲིད་བྱུས་འོག་དགོན་སྡེ་ཁག་གི་གྲྭ་བཙུན་ལ་ཚད་བཀག་བྱས་པ་སོགས་ལོ་རྒྱུས་ཐོག་བོད་ཀྱི་དངོས་ཡོད་གནས་བབས་དང་རྒྱ་གཞུང་གི་བྱེད་བབ་བཅས་འགྲེལ་བརྗོད་དང་སྦྲགས། བོད་རྒྱལ་ཁབ་ཆེན་པོའི་རྒྱལ་བསྟན་ཆབ་སྲིད་མི་རིགས་དང་བཅས་པའི་ཆེད་དུ་ལུས་སྲོག་ལོངས་སྤྱོད་དང་བཅས་པ་བློས་བཏང་གནང་མཁན་གྱི་རྒྱལ་གཅེས་དབའ་བོ་དཔའ་མོ་རྣམས་ཀྱི་སྙིང་སྟོབས་ལ་ཡི་རངས་དང་། ཤུལ་ལུས་ནང་མི་ཉེ་འབྲེལ་ཡོངས་ལ་གདུང་སེམས་མཉམ་བསྐྱེད། དེ་བཞིན་བོད་མི་དཔའ་བོ་དཔའ་མོ་གྲངས་ ༡༥༥ ཡིས་རང་ལུས་མེར་བསྲེགས་གནང་སྟེ་རྒྱ་གཞུང་ལ་ཞི་རྒོལ་གནང་ཡོད་པ་དེ་དག་གི་གདུང་འབོད་དང་ཞལ་ཆེམས། མངོན་འདོད་བཅས་ལ་རྒྱ་ནག་གཞུང་ནས་ངེས་པར་དུ་འགན་འཁུར་བདག་སྤྲོད་ཞུ་དགོས་པ་སོགས་ཁྱོན་དོན་ཚན་དྲུག་ཆེད་བཀོད་གནང་ཡོད་པ་རེད།    སྤྱི་འཐུས་རྣམ་པས་དོན་ཚན་དེ་དག་ཐོག་བགྲོ་གླེང་གི་ཆ་ཤས་བཞེས་པ་དང་འབྲེལ་ནས་ད་ལྟའི་ཆར་རྒྱ་ནག་ཝུ་ཧན་ནས་མཆེད་པའི་ཏོག་དབྱིབས་གཉན་རིམས་རྐྱེན་གྱིས་རྒྱལ་སྤྱིའི་ཁྱོན་ཡོངས་ཀྱིས་རྒྱ་ནག་ལ་ལྟ་སྟངས་བཟང་པོ་མེད་པའི་ཁར་རྒྱ་ནག་ནང་འཚོགས་ལ་ཉེ་བའི་རྒྱལ་སྤྱིའི་ཨོ་ལམ་པིག་རྩེད་འགྲན་སོགས་ཀྱི་གོ་སྐབས་དང་བསྟུན་བོད་མིའི་ངོས་ནས་དུས་ཚོད་དམ་འཛིན་གྱིས་ལས་འགུལ་སྤེལ་དགོས་པ་སོགས་ཀྱི་དགོངས་ཚུལ་ཆེས་ཆེར་གནང་ཡོད་སྟབས། གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་དོན་ཚན་དྲུག་པོའི་ཐོག་རྒྱ་ནག་ནང་འཚོགས་ལ་ཉེ་བའི་རྒྱལ་སྤྱིའི་ཨོ་ལམ་པིག་དང་། རྒྱ་ནག་དམར་ཤོག་གཞུང་གིས་བོད་ཞི་བའི་བཅིངས་བཀྲོལ་བཏང་ནས་ལོ་ངོ་ ༧༠ འཁོར་ཡོད་ཟེར་བའི་དུས་དྲན་སྐབས་བོད་མིའི་སྒྲིག་འཛུགས་བཀའ་སྤྱི་གཉིས་ཀྱིས་གཙོས་པའི་གཞུང་དང་གཞུང་འབྲེལ་མ་ཡིན་པའི་ཚོགས་སྡེ་ཁག་གིས་འཛམ་གླིང་ཡོངས་ཁྱབ་ཏུ་ངོ་རྒོལ་གྱི་ལས་འགུལ་རྒྱ་གང་ཆེར་སྤེལ་དགོས་གལ་ཡིན་པ་དང་། ལྷག་དོན་ཏོག་དབྱིབས་གཉན་རིམས་དེ་ཉིད་རྒྱ་ནག་གཞུང་གིས་འཛམ་གླིང་རྒྱལ་ཁབ་གཞན་རྣམས་རང་ཉིད་ཀྱི་དབང་འོག་ཏུ་བསྡུ་ཕྱིར་ཆེད་བཟོ་བྱས་པ་ཞིག་ཡིན་པར་རྒྱལ་ཁབ་དུ་མས་ངོས་འཛིན་གནང་མུས་ལྟར་རྒྱ་ནག་གཞུང་ནས་དེར་ངོས་ལེན་ཞུ་དགོས་པ་སོགས་ཀྱི་དོན་ཚན་གཉིས་ཁ་སྣོན་གནང་བ་དང་འབྲེལ་ཏེ་ཁྱོན་གྲོས་ཆོད་དོན་ཚན་བརྒྱད་ཅན་སྤྱི་མོས་ཀྱིས་གཏན་འབེབས་གནང་ཡོད།    གཞི་རྩའི་བགྲོ་གླེང་གི་བརྒྱུད་རིམ་ཁྲོད་གྲོས་ཆོད་དེའི་ནང་གསལ་བའི་དོན་ཚན་གསུམ་པའི་ཐོག་བོད་མི་མང་སྤྱི་འཐུས་རྡོ་རྗེ་ཚེ་བརྟན་ལགས་ཀྱིས་བསྐྱར་བཅོས་གྲོས་ཆོད་ཅིག་བསྣམས་པར་རྒྱ་ནག་གཞུང་ལ་ཡིད་ཆེས་མེད་སྐོར་འཁོད་པ་དང་འབྲེལ་སྤྱི་འཐུས་ཁག་ཅིག་གིས་ཚིག་བརྗོད་དེ་ནི་དབུ་མའི་ལམ་དང་ཡང་ན་སྲིད་བྱུས་ལ་བསྒྱུར་བཅོས་གཏང་རྒྱུ་དང་འབྲེལ་བ་ཡོད་སྐོར་གསུངས་ནས་དགག་པ་གནང་སོང་བར་མ་ཟད། བགྲོ་གླེང་ལྷུག་པོ་གནང་མཐར་བསྐྱར་བཅོས་ཀྱི་གྲོས་ཆོད་དེའི་ཚོག་བརྗོད་ཁག་ཅིག་བསྐྱར་བཅོས་ཀྱིས་གཏན་འབེབས་ཐུབ་ཡོད་པ་རེད།

དེ་རིང་སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་པའི་ལས་ཉིན་ ༤ ཐོག་ལྷན་ཁང་ཁག་གི་ལས་ཁུངས་མ་ལག་དང་བཅས་པའི་རྩིས་ལོ་ ༢༠༢༡་༢༢ ལོའི་སྔོན་རྩིས་ཐོག་བགྲོ་གླེང་གནང་བའི་ཁྲོད་སྔ་ལོར་རྒྱ་གར་དང་ཨ་རི་ནང་དུ་རྒྱ་གཞུང་གི་སོ་ཉུལ་བ་འཛིན་བཟུང་བྱས་པའི་གནད་དོན་ཐད་བཀའ་འདྲི་ཁག་ཅིག་ཕེབས་དོན་ལྟར། སྲིད་སྐྱོང་བློ་བཟང་སེང་གེ་མཆོག་གིས་བོད་པའི་སྤྱི་ཚོགས་ནང་དུ་རྒྱ་ནག་གི་སོ་མྱུལ་བ་ཡོད་པ་ནི་རྩོད་མེད་ཡིན་སྟབས། རྒྱ་ཆེ་མང་ཚོགས་ཀྱི་ངོས་ནས་དེ་དག་གི་ལག་ཆ་ཆགས་རྒྱུ་མེད་པར་ཡིད་གཟབ་གནང་དགོས་པའི་གཞེན་སྐུལ་ནན་པོ་གནང་སོང་།སྔ་དྲོའི་ཚོགས་ཐེངས་ཐོག་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་ཐོག་བགྲོ་གླེང་གནང་རྗེས་དོན་ཚན་གཉིས་ཁ་སྣོན་གནང་བ་དང་འབྲེལ་ཏེ་ཁྱོན་གྲོས་ཆོད་དོན་ཚན་བརྒྱད་ཅན་སྤྱི་མོས་ཀྱིས་གཏན་འབེབས་གནང་ཡོད་པ་དང་། དེའི་རྗེས་སུ་བོད་མིའི་སྒྲིག་འཛུགས་ཀྱི་ལྷན་ཁང་ཁག་དང་ལས་ཁུངས་མ་ལག་དང་བཅས་པའི་སྔོན་རྩིས་ཐོག་བགྲོ་གླེང་གནང་སྐབས་བྱང་ཨ་རིའི་སྔོན་རྩིས་དང་འབྲེལ་ནས་བགྲོ་གླེང་ཁྲོད་སྤྱི་འཐུས་ཁག་ཅིག་ནས་སྔ་ལོར་ཨ་རི་ནང་གི་བོད་པའི་བུ་བཅོལ་ཁང་ཞིག་གིས་བོད་པའི་ཕྲུ་གུ་ལྷ་སར་འཁྲིད་ནས་བོད་ནང་གནས་སྟངས་ཡག་པོ་ཡོད་ཚུལ་འགྲེལ་བརྗོད་བྱས་པའི་གནད་དོན་དང་། སྒོས་སྔ་ལོར་རྒྱ་གར་དང་ཨ་རི་ནང་དུ་རྒྱ་གཞུང་གི་སོ་ཉུལ་བ་འཛིན་བཟུང་བྱས་པའི་གནད་དོན་དང་འབྲེལ་ནས་བོད་པའི་སྤྱི་ཚོགས་ནང་དུ་རྒྱ་གཞུང་གི་སོ་ཉུལ་བ་ཡོད་པ་ར་འཕྲོད་ལན་མང་བྱུང་བ་བཞིན་རྒྱ་ཆེ་མང་ཚོགས་ཀྱི་ངོས་ནས་ཡིད་གཟབ་གནང་དགོས་པའི་གཞེན་སྐུལ་གནང་ཡོད། དེ་བཞིན་སྤྱི་འཐུས་ཁག་ཅིག་ནས་བྱང་ཨ་མི་རི་ཀས་གཙོས་པའི་ཕྱི་རྒྱལ་ཡུལ་གྲུ་ཁག་ཏུ་མི་འབོར་གྱི་ཆ་ནས་དང་བླངས་དཔྱ་དངུལ་འབུལ་མཁན་ཉུང་བ་དང་། འོས་བསྡུའི་ལས་རིམ་ནང་ཞུགས་མཁན་དེ་བས་ཀྱང་ཉུང་བ་ཡོད་སྐོར་གྱི་བཀའ་འདྲི་ཞུས་པར་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་གིས་རྩ་བའི་དེ་སྔ་བཀའ་ཤག་སྐབས་གོང་མ་ནས་བཟུང་སྟེ་ཕྱི་རྒྱལ་ཡུལ་གྲུ་ཁག་ཏུ་གནས་བཞུགས་བོད་མི་གང་མང་ནས་དཔྱ་དངུལ་སྔར་ལྷག་གནང་ཐུབ་སླད་དུ་དཔྱ་དངུལ་གྱི་འབུལ་འབབ་ཆག་ཡང་གི་ལས་གཞི་སྤེལ་བ་སོགས་ལ་མང་ཚོགས་ནས་ཡི་རང་ཞུ་མཁན་མང་དུ་སོང་ཡོད་ཀྱང་། ཐོག་མའི་དམིགས་ཡུལ་ལྟར་ཡོང་དཀའ་སྐོར་གསུངས་པ་དང་ཆབས་ཅིག མང་ཚོགས་ཀྱི་ཀུན་སློང་ལ་དོགས་པ་མེད་ཀྱང་དུས་ཚོད་དང་འདྲི་རྩད་ཀྱི་བརྒྱུད་རིམ་བཅས་ལ་གཞིགས་པའི་དཀའ་ངལ་འཕྲད་བཞིན་ཡོད་པ་ལྟར། མང་ཚོགས་ཀྱི་ངོས་ནས་ངལ་བ་ཕྲན་བུ་འཕྲད་པར་མ་དགོངས་པར་བོད་མི་ཡིན་ཕྱིན་ཆད་ལ་དཔྱ་དངུལ་འབུལ་ལམ་ཞུ་དགོས་པའི་འོས་འགན་ཡོད་པར་སྐུལ་མ་གནང་སོང་།དེ་རིང་གི་གྲོས་ཚོགས་ཐོག་ཨ་རིའི་ཁུལ་དུ་འདས་པའི་ལོ་མང་ནས་སྔ་ལོ་བར་རྒྱ་ནག་གི་ཁུངས་ཙིའི་སློབ་གླིང་མང་དག་ཅིག་ཕྱིར་བཤོལ་གནང་ཐུབ་ཡོད་སྐོར་གླེང་སློང་གནང་བ་དང་འབྲེལ། སྲིད་སྐྱོང་མཆོག་གིས་རྒྱ་ནག་གི་ཁུངས་ཙིའི་སློབ་གླིང་མང་དག་ཅིག་ཕྱིར་བཤོལ་གནང་བར་ལས་འགུལ་སྤེལ་མཁན་ཚོགས་སྡེ་ཁག་ལ་བསྔགས་བརྗོད་གནང་བ་དང་སྦྲགས། ལས་འགུལ་དེའི་ཐོག་ནས་རྒྱལ་སྤྱིའི་ཁྲོད་རྒྱ་ནག་གི་ངོས་ནས་དངུལ་གྱི་འགྲོ་སོང་ཇི་ལྟར་བཏང་ཡང་གང་འདོད་ལྟར་བྱེད་ས་མེད་པའི་བརྡ་ལན་གསལ་པོ་ཞིག་ཆགས་ཡོད་པར་གསུངས་སོང་།དེ་བཞིན་སྤྱི་འཐུས་ཁག་ཅིག་གིས་སྔ་ལོར་བྱང་ཨ་རི་ཁུལ་དུ་གནས་བཞུགས་བོད་མིའི་ཆབ་སྲིད་བཙོན་ཟུར་དོན་གྲུབ་དབང་ཆེན་ལགས་ལ་སྤྱི་ཚོགས་ཁྲོ་གནོན་ཤུགས་སྤྲད་པའི་གནད་དོན་སྐོར་གླེང་སློང་གནང་བ་དང་འབྲེལ་ནས་སྲིད་སྐྱོང་མཆོག་གིས་དོན་གྲུབ་དབང་ཆེན་ལགས་དང་བོད་ཆོལ་གསུམ་ནང་དུ་རྒྱ་གཞུང་ལ་ངོ་རྒོལ་གྱིས་ལས་འགུལ་སྤེལ་རྐྱེན་འཛིན་བཟུང་གིས་མནར་གཅོད་མྱངས་དང་མྱོང་བཞིན་པ། དེ་བཞིན་བཙན་བྱོལ་དུ་ཕེབས་ནས་ཞལ་ཞེ་གཉིས་མེད་ཀྱིས་བོད་དོན་ལས་འགུལ་སྤེལ་མཁན་རྣམས་ཀྱི་མཛད་རྗེས་ལ་ཡི་རང་བསྔགས་བརྗོད་ཞུས་པ་དང་ཆབས་ཅིག ཁོང་རྣམ་པར་སྐྱོན་བརྗོད་ཞུ་མཁན་དང་གནོན་ཤུགས་སྤྲད་མཁན་རྣམས་ལ་མཐའ་གཅིག་ཏུ་དགག་པ་ཡོད་ཅེས་གསུངས་ཡོད།རྩ་བའི་དེ་རིང་གྲོས་ཚོགས་སུ་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་ཁག་སྤྱི་མོས་ཀྱིས་གཏན་འབེབས་གནང་བའི་རྗེས་སུ་སྔ་དྲོའི་ཚོགས་དུས་གཉིས་པ་ནས་ཕྱི་དྲིལ་ཁྱབ་ཁོངས་སྲིད་བྱུས་ཉམས་ཞིབ་ཁང་དང་ལྡི་ལི་སྐུ་ཚབ་དོན་ཁང་། བྱང་ཨ་རི། སུད་སི། དེ་བཞིན་ཨོ་སི་ཊོ་ལི་ཡ་བཅས་སྐུ་ཚབ་དོན་ཁང་སོ་སོའི་སྔོན་རྩིས་ཐོག་བགྲོ་གླེང་གནང་ཡོད་པ་རེད།  

བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་པའི་ལས་ཉིན་གསུམ་པའི་ཐོག་ཉེ་ལམ་བོད་མིའི་གསུམ་བཅུའི་དུས་དྲན་ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་དབུ་བཞུགས་ཐོག་གཞུང་འབྲེལ་གྱི་མཛད་སྒོའི་སྐབས་མི་མང་ལངས་གླུ་བླངས་པའི་གནད་དོན་དང་འབྲེལ་ནས་འཛིན་སྐྱོང་བཀའ་ཤག་ལ་དེ་ནི་དབུ་མའི་ལམ་གྱི་སྲིད་བྱུས་དང་འགལ་ཟླ་ཆགས་མིན་གྱི་བཀའ་འདྲི་ཞིག་ཕུལ་བར་གླེང་སློང་ཆེས་ཆེར་གནང་སོང་། ཁ་སང་སྤྱི་འཐུས་སྒྲོལ་མ་ཚེ་རིང་ལགས་ཀྱིས་ཁ་སང་བཀའ་དྲུང་ཡིག་ཚང་གི་སྔོན་རྩིས་དང་ལས་དོན་སྐོར་བགྲོ་གླེང་གནང་སྐབས་མི་མང་ལངས་གླུའི་ནང་འཁོད་པའི་ཐ་སྙད་བོད་རྒྱལ་ལོ་དང་རྒྱ་དམར་བོད་ནས་མཐར་སྐྲོལ་གཏོང་གི་ཡིན་ཞེས་པའི་ཐ་སྙད་དེ་དག་སྤྱད་པར་བརྟེན་དབུ་མའི་ལམ་གྱི་སྲིད་བྱུས་དང་འགལ་ཟླ་ཆགས་མིན་གྱི་བཀའ་འདྲི་ཞུས་པ་ལས་འཕྲོས་ཏེ། ཁ་སང་དང་དེ་རིང་གཉིས་ཀྱི་གྲོས་ཚོགས་ཚོགས་དུས་ཐོག་བོད་མི་མང་སྤྱི་འཐུས་ཁག་ཅིག་གིས་དབུ་མའི་ལམ་གྱི་སྲིད་བྱུས་ནི་དད་པ་བྱེད་ས་ཞིག་མིན་པ་དང་། གྲོས་ཚོགས་ནང་བཀའ་མོལ་གནང་སྐབས་ཡིད་གཟབ་གནང་དགོས་གལ་ཡིན་པ་སོགས་གསུངས་པར་མ་ཟད། དོ་བདག་སོ་སོའི་གསུང་བཤད་ཀྱི་མཇུག་ཏུ་བོད་རྒྱལ་ལོ་ཞེས་པའི་འབོད་ཚིག་བསྒྲགས་ཏེ་རྣམ་འགྱུར་སྟོན་གནང་མཁན་ཡང་བྱུང་སོང་བར་མ་ཟད། མང་ཚོགས་ཀྱི་ཁྲོད་བོད་རྒྱལ་ལོ་ཞེས་པའི་ཐ་སྙད་སྤྱད་པ་དང་སྦྲགས་སེམས་ཚོར་གྱི་རྣམ་པ་འདྲ་མིན་སྟོན་མཁན་ཡང་བྱུང་ཡོད་པ་རེད།སྤྱི་འཐུས་ཁག་གཅིག་ནས་དབུ་མའི་ལམ་གྱི་སྲིད་བྱུས་ལ་རྒྱབ་སྐྱོར་དང་དེའི་གྲུབ་འབྲས་ཁག་ལུང་འདྲེན་གནང་བ་དང་། བཀའ་མོལ་གནང་སྐབས་ཚོར་བའི་རྗེས་སུ་འབྲང་རྒྱུ་མེད་པ་དང་འཛིན་སྐྱོང་གི་ངོས་ནས་ཐག་གཅོད་དེ་རིགས་གནང་སྐབས་དང་པོ་གྲོས་ཚོགས་ལ་བསྣམས་ཏེ་འོས་བསྡུའི་ལམ་ནས་ཐག་གཅོད་གནང་ན་དགེ་མཚན་ཡོད་པ་སོགས་གསུང་མཁན་ཡང་བྱུང་ཡོད།    སྲིད་སྐྱོང་མཆོག་གིས་དེ་འབྲེལ་ཐོག་བཀའ་ཤག་གི་གསལ་བཤད་གནང་བར་དབུ་མའི་ལམ་ནི་སྲིད་བྱུས་དང་། མི་མང་ལངས་གླུང་ནི་གླུ་ཞིག་ཡིན་སྟབས་ཚོར་བ་དང་ཁྲིམས། གླུ་དང་སྲིད་བྱུས་བཅས་ལ་དབྱེ་བ་གནང་དགོས་གལ་ཡིན་པར་འགྲེལ་བརྗོད་དང་སྦྲགས། ང་ཚོའི་ངོས་ནས་རྒྱ་ནག་ལ་ Anticipatory Compliance འམ་རེ་བ་ཞིག་གི་ཐོག་ནས་བསྟུན་མཁས་གནང་དྲགས་ཚེ་ནམ་ཞིག་རེ་བས་ཕུང་གི་རེད་ཅེས་གསུངས་ཡོད། སྲིད་སྐྱོང་མཆོག་གིས་དབུ་མའི་ལམ་གྱི་སྲིད་བྱུས་དང་འབྲེལ་ཏེ་རྒྱ་ནག་ལ་ཁོར་ཡུག་སྐྲུན་རྒྱུའི་སྲིད་བྱུས་དེ་དེ་སྔ་ ༢༠༠༨ ལོར་ཕྱིར་འཐེན་གནང་ཟིན་ཡོད་པ་སོགས་གསུངས་ཡོད།གཞན་ཡང་དེ་རིང་གི་གྲོས་ཚོགས་སྐབས་སུ་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་ཐོག་བགྲོ་གླེང་གནང་བར་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་གྱི་དོན་ཚན་གསུམ་པའི་ནང་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་བོད་མིའི་སྒྲིག་འཛུགས་ཀྱི་ངོས་ནས་བོད་རྒྱ་གཉིས་སྨན་དབུ་མའི་ལམ་གྱི་སྲིད་བྱུས་ཀྱི་དགོངས་དོན་བོད་རིགས་ཡོངས་ལ་མིང་དོན་མཚུངས་པའི་རང་སྲིད་རང་སྐྱོང་ཡོང་ཐབས་ལ་འབད་བརྩོན་བར་མ་ཆད་པར་གནང་བཞིན་པ་ལྟར། རྒྱ་གཞུང་གི་འགོ་ཁྲིད་རྣམས་གུ་དོག་མཁྲེགས་འཛིན་གྱི་ལྟ་བ་དོར་ནས་གཉིས་ཕན་མཉམ་གནས་གུ་ཡངས་བཅས་ཀྱི་ཐབས་ལམ་ལ་བརྟེན་ནས་བོད་རྒྱ་འབྲེལ་མོལ་མྱུར་དུ་དབུ་འཛུགས་གནང་ཐུབ་དགོས་ཞེས་འཁོད་པ་དེར་བོད་མི་མང་སྤྱི་འཐུས་རྡོ་རྗེ་ཚེ་བརྟན་ལགས་ནས་ད་ལྟའི་སྲིད་སྐྱོང་མཆོག་གིས་དབུ་ཁྲིད་པའི་བཀའ་ཤག་ལོ་བཅུ་ཚང་ལ་ཉེ་ཡང་རྒྱ་ནག་གཞུང་ནས་བརྡ་ལན་གང་ཡང་མ་སྤྲད་པའི་སྐབས་འདིར་ང་ཚོས་མུ་མཐུད་རྒྱ་ནག་ལ་འབོད་སྐུལ་གནང་ནས་བཞུགས་ན་འགྲིག་མིན་དང་། ལྷག་པར་དུ་ད་ལྟའི་རྒྱལ་སྤྱིའི་ཐོག་རྒྱ་ནག་གི་བྱེད་བབ་དང་༸གོང་ས་མཆོག་གི་དམིགས་བསལ་སྐུ་ཚབ་ཟུར་པ་སྐལ་བཟང་རྒྱལ་མཚན་ལགས་ནས་ད་ལྟའི་རྒྱ་ནག་སྲིད་གཞུང་དང་ལྷན་དོན་ཕན་ལྡན་པའི་གྲོས་མོལ་ཡོང་ཐབས་མི་འདུག་ཅེས་ཚིག་ཐག་ཆོད་པོས་གསུངས་ཡོད་པ་སོགས་གནད་དོན་ཁག་ཅིག་འགྲེལ་བརྗོད་དང་སྦྲགས། གྲོས་ཆོད་གྲོས་འཆར་གྱི་དོན་ཚན་གསུམ་པ་དེར་བསྐྱར་བཅོས་ཀྱི་དོན་ཚན་ཞིག་གྲོས་ཚོགས་སུ་ངོ་སྤྲོད་གནང་ཡོད།  བསྐྱར་བཅོས་གྲོས་ཆོད་དེའི་ཐོག་བོད་མི་མང་སྤྱི་འཐུས་དགེ་བཤེས་ཨ་དཀྲུག་ཚེ་བརྟན་ལགས་ནས་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་ཁོངས་སུ་དེ་ལྟ་བུའི་གྲོས་ཆོད་བསྣམས་པ་དེ་ནི་ཧར་དྲགས་པ་ཙམ་མ་ཟད་དེ་ནི་གཞི་རྩའི་ལྟ་གྲུབ་ལ་བསྒྱུར་བཅོས་གཏོང་རྒྱུའི་བཀའ་མོལ་དང་འབྲེལ་བ་ཡོད་སྟབས་བསྐྱར་བཅོས་ཀྱི་གྲོས་ཆོད་དེར་མཐའ་གཅིག་ཏུ་དགག་པ་ཡོད་ཅེས་གསུངས་སོང་།བསྐྱར་བཅོས་ཀྱི་གྲོས་ཆོད་དེར་དགག་པ་བྱུང་སྟབས་སྤྱི་འཐུས་སྤྱི་ཡོངས་ནས་དེའི་ཐོག་བགྲོ་གླེང་གི་ཆ་ཤས་བཞེས་པ་མ་ཟད། ཁག་ཅིག་གིས་བསྐྱར་བཅོས་གྲོས་ཆོད་ཀྱི་ནང་དོན་རྣམས་ཐད་ཀར་དབུ་མའི་ལམ་གྱི་སྲིད་བྱུས་དང་འབྲེལ་བ་ཡོད་སྟབས་བཀའ་ཤག་ནས་དགོངས་ཚུལ་གནང་གལ་ཡིན་པར་གསུངས་པ་དང་འབྲེལ། སྲིད་སྐྱོང་བློ་བཟང་སེང་གེ་མཆོག་གིས་༸གོང་ས་མཆོག་གི་དགོངས་གཞི་ལྟར་ང་ཚོའི་ངོས་ནས་རྒྱ་ནག་དང་ལྷན་དུ་བཀའ་མོལ་གནང་གི་ཡིན་ཟེར་གྱི་ཡོད་པར་བརྟེན་བསྐྱར་བཅོས་ཀྱི་གྲོས་ཆོད་ནང་ལ་ང་ཚོས་རྒྱ་ནག་གཞུང་ལ་ཡིད་ཆེས་རྩ་ནས་མེད་ཅེས་བཀོད་ཚེ་སྐད་ཆ་བཤད་ཀྱི་མིན་ཞེས་པའི་གོ་ནོར་ཐེབས་ཉེན་ཡོད་པར་གསུངས་ཡོད།  གཞི་རྩའི་དེ་རིང་གྲོས་ཚོགས་དུས་གཙོས་གྲོས་ཚོགས་ཀྱི་ལས་ཉིན་དང་པོ་དང་གཉིས་པ་གཉིས་ཀྱི་སྔ་དྲོའི་ཚོགས་དུས་བཅས་སུ་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་ཐོག་སྤྱི་འཐུས་རྣམ་པས་བགྲོ་གླེང་གནང་ཡོད་ཀྱང་ད་ལྟའི་ཆར་གྲོས་ཆོད་གྲོས་འཆར་དེར་མཐའ་མའི་གཏན་འབེབས་ཤིག་མ་བྱུང་བར་སང་ཉིན་སྔ་དྲོའི་ཚོགས་དུས་ཐོག་མུ་མཐུད་བགྲོ་གླེང་དང་གཏན་འབེབས་ཀྱི་ལས་རིམ་ཐོག་ཕེབས་རྒྱུ་ཡིན་པ་རེད།

དེ་རིང་སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་པའི་ལས་ཉིན་གཉིས་པའི་ཐོག་བོད་ནང་གི་ཛ་དྲག་གནས་སྟངས་ཐོག་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་ཐོག་བོད་མི་མང་སྤྱི་འཐུས་ ༡༧ གྱིས་སེམས་འཚོར་ཆེན་པོས་བགྲོ་གླེང་གི་ཆ་ཤས་བཞེས་ཏེ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་འདི་བཞིན་ཁ་ཞེ་གཉིས་མེད་ཅིག་ཡོང་ཐབས་སུ་བོད་མི་ཚོས་གོ་སྐབས་དམ་འཛིན་གྱིས་ལས་འགུལ་སྤེལ་དགོས་པ་དང་། བོད་ཀྱི་སྐད་ཡིག་གཙོས་རིག་གནས་ཁག་ལ་དོ་སྣང་གནང་དགོས་པ་སོགས་གནད་དོན་མང་དག་ཅིག་གི་ཐོག་བགྲོ་གླེང་གནང་སོང་། སྤྱི་འཐུས་ཁག་གཅིག་གིས་ད་ལྟའི་ཆར་རྒྱལ་སྤྱི་ཁྱོན་ཡོངས་ནས་རྒྱ་ནག་ལ་ལྟ་སྟངས་བཟང་པོ་མེད་པ་དང་ལྷག་པར་དུ་རྒྱ་ནག་གཞུང་ལ་ཧོང་ཀོང་དང་ཐེ་ཝན། ཤིན་ཅང་སོགས་ཀྱི་གནད་དོན་དང་འབྲེལ་ཆབ་སྲིད་ཀྱི་ཆ་ནས་གདོང་ལེན་བྱེད་དགོས་པའི་གནད་དོན་རབ་དང་རིམ་པ་འཕྲད་བཞིན་པའི་སྐབས་འདིར་རྒྱ་ནག་ནང་འཚོགས་རྒྱུའི་རྒྱལ་སྤྱིའི་ཨོ་ལམ་པིག་རྩེད་འགྲན་སོགས་ཀྱི་གོ་སྐབས་དང་བསྟུན་ནས་བོད་མིས་དུས་ཚོད་དམ་འཛིན་གྱིས་བོད་མིའི་སྒྲིག་འཛུགས་དང་ཚོགས་པ་སྤྱི་ཡོངས་ཀྱི་ངོས་ནས་ལས་འགུལ་སྤེལ་དགོས་གལ་ཡིན་པར་མ་ཟད། བོད་མི་མང་ཚོགས་ཀྱིས་ཀྱང་ལས་འགུལ་ནང་མཉམ་ཞུགས་གནང་གནད་ཡིན་པ་སོགས་གསུངས་ཡོད།   ལྷག་པར་དུ་སྤྱི་འཐུས་གཅིག་གིས་ཉེ་ཆར་རྒྱ་ནག་ནང་ཚོགས་པའི་རྒྱ་ནག་མི་དམངས་འཐུས་མི་ཚོགས་ཆེན་དང་ཆབ་སྲིད་གྲོས་མོལ་གྱི་ཚོགས་འདུ། དེ་བཞིན་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་བཅས་ཚོགས་ཡོད་པ་དང་། ཚོགས་འདུ་དེ་དག་ཐོག་རྒྱ་གཞུང་གིས་ཆེད་བཏོན་བྱས་པའི་གྲོས་གཞི་དང་ཞི་ཅིན་ཕིང་གི་ཚོགས་འདུ་དེ་དག་ཐོག་བཤད་པའི་གཏམ་བཤད་ཁག་ལ་འཛིན་སྐྱོང་བཀའ་ཤག་དང་སྤྱི་འཐུས་ཡོངས་ནས་ཐུགས་སྣང་གནང་དགོས་པར་མ་ཟད། རྒྱ་ནག་གཞུང་ལ་དེ་འབྲེལ་བརྡ་ལན་ཞིག་ངེས་པར་གནང་དགོས་པ་སོགས་གསུངས་ཡོད། བགྲོ་གླེང་ཁྲོད་སྤྱི་འཐུས་ཁག་གཅིག་ནས་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་ནང་དུ་དབུ་མའི་ལམ་གྱི་སྐོར་འཁོད་པར་རྒྱབ་སྐྱོར་ཞུས་པ་དང་སྦྲགས། འཛིན་སྐྱོང་གི་ངོས་ནས་དབུ་མའི་ལམ་ངོ་སྤྲོད་ཙམ་མ་ཡིན་པར་དེ་འབྲེལ་ལས་འགུལ་ཐོག་དགོངས་པ་བཞེས་དགོས་སྐོར་གསུང་མཁན་བྱུང་སོང་། སྤྱི་འཐུས་ཁག་གཅིག་གིས་རྒྱལ་སྤྱིའི་ཁོར་ཡུག་གི་གནས་སྟངས་དང་འགྱུར་ལྡོག་ལ་གཞིགས་ཏེ་ད་ཡོད་སྲིད་བྱུས་ལ་འགྱུར་ལྡོག་ཞིག་ངེས་པར་དུ་གནང་དགོས་པ་གསུངས་ཡོད་པ་རེད།དེ་བཞིན་སྤྱི་འཐུས་ལ་ལས་བོད་ནང་གི་ཛ་དྲག་གནས་སྟངས་དང་བོད་མི་རྣམས་ལ་གདུང་སེམས་མཉམ་བསྐྱེད་ཞུ་སྐབས་ཞལ་ཙམ་མ་ཡིན་པར་བཙན་བྱོན་རང་དབང་ལུང་པའི་ནང་ཡོད་པའི་བོད་མི་ཚོས་བོད་ཀྱི་སྐད་ཡིག་ལ་སྨན་པའི་ཞབས་འདེགས་ཞུ་དགོས་གལ་ཡིན་པར་གསུང་མཁན་བྱུང་ཡོད། སྐབས་དེར་སྤྱི་འཐུས་ཁག་གཅིག་ནས་ད་ལྟའི་བོད་ནང་གི་ཛ་དྲག་གནས་སྟངས་ངོ་སྤྲོད་དང་བོད་ནང་གི་བོད་མིས་གཙོས་པའི་དཔའ་པོ་དཔའ་མོ་རྣམས་ཀྱི་སྙིང་སྟབས་དང་མངོན་འདོད་ལ་ཡི་རང་བསྔགས་བརྗོད་སོགས་ཞུས་པ་དང་ཆབས་ཅིག བོད་ནང་གི་ཆབ་སྲིད་བཙོན་པ་རྣམས་རང་དབང་ལུང་པ་ཁག་ལ་སྨན་བཅོས་ཆེད་ཕེབས་རྒྱུའི་ཐད་ང་ཚོའི་ངོས་ནས་འབོད་སྐུལ་ཞུ་དགོས་སྐོར་གསུངས་པ་དང་། དེ་བཞིན་བཙན་བྱོལ་བོད་མི་རྣམས་མཐུན་སྒྲིལ་གནང་ཐུབ་ཚེ་བོད་ནང་གི་བོད་མི་ཚོར་ཁ་ཡོད་ལག་ཡོད་ཀྱི་གདུང་སེམས་མཉམ་བསྐྱེད་ཞུས་པ་ཞིག་ཆགས་ཀྱི་རེད་ཅེས་སོགས་གསུངས་ཡོད། གཞི་རྩའི་བོད་ནང་གི་ཛ་དྲག་གནས་སྟངས་ཐོག་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་དེའི་ནང་ལ་བོད་རྒྱལ་ཁབ་ཆེན་པོའི་རྒྱལ་བསྟན་ཆབ་སྲིད་མི་རིགས་དང་བཅས་པའི་ཆེད་དུ་ལུས་སྲོག་ལོངས་སྤྱོད་དང་བཅས་པ་བློས་བཏང་གནང་མཁན་གྱི་རྒྱལ་གཅེས་དབའ་བོ་དཔའ་མོ་རྣམས་ཀྱི་སྙིང་སྟོབས་ལ་ཡི་རང་དང་ཤུལ་ལུས་ནང་མི་ཉེ་འབྲེལ་ཡོངས་ལ་གདུང་སེམས་མཉམ་བསྐྱེད། དེ་བཞིན་རྒྱ་གཞུང་གི་འགོ་ཁྲིད་རྣམས་གུ་དོག་མཁྲེགས་འཛིན་གྱི་ལྟ་བ་དོར་ནས་བོད་རྒྱ་འབྲེལ་མོལ་གང་མགྱོགས་དབུ་འཛུགས་གནང་ཐབས་གནང་དགོས་པ་སོགས་ཁྱོན་གྲོས་ཆོད་དོན་ཚན་ ༦ འཁོད་ཡོད་པ་དང་། གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་ཐོག་སང་ཉིན་མུ་མཐུད་སྤྱི་འཐུས་རྣམས་ནས་བགྲོ་གླེང་གནང་རྒྱུ་ཡིན་པ་རེད།

དེ་རིང་སྐབས་ ༡༦ པའི་སྤྱི་འཐུས་ལྷན་ཚོགས་ཀྱི་ཚོགས་དུས་ ༡༠ པའི་ལས་ཉིན་གཉིས་པའི་ཐོག་དཔལ་བྱོར་བཀའ་བློན་ཀརྨ་ཡེ་ཤེས་མཆོག་གི་སྔོན་རྩིས་གསུང་བཤད་དང་ཚོད་དཔག་འཆར་རྩིས་ཚོགས་ཆུང་གི་སྙན་ཐོ་སྤྱི་ཡོངས་ཐོག་བགྲོ་གླེང་ལྷུག་པོ་གནང་སོང་།ཁ་སང་དཔལ་འབྱོར་བཀའ་བློན་མཆོག་གིས་བོད་མིའི་སྒྲིག་འཛུགས་ཀྱི་སྔོན་རྩིས་གསུང་བཤད་དང་འབྲེལ་ནས་བོད་མིའི་སྒྲིག་འཛུགས་ཀྱི་ལས་ཁུངས་མ་ལག་དང་བཅས་པའི་རྩིས་ལོ་ ༢༠༢༡་༢༠༢༢ ལོར་ཕྱོགས་བསྡོམས་འགྲོ་གྲོན་དགོས་དངུལ་སྒོར་ས་ཡ་ ༢༦༩༩་༠༡ འགོད་འབུལ་ཞུས་ཡོད་པའི་ཁྲོད་ཆབ་སྲིད་དང་འབྲེལ་བའི་འགྲོ་གྲོན་སྒོར་ས་ཡ་ ༦༣༧ ལྷག་ཙམ་དང་ཤེས་ཡོན་དང་འབྲེལ་བའི་འགྲོ་གྲོན་སྒོར་ས་ཡ་ ༦༠༢ ལྷག་ཙམ། དེ་བཞིན་འཛིན་སྐྱོང་དང་འབྲེལ་བའི་འགྲོ་གྲོན་སྒོར་ས་ཡ་ ༥༩༡་༠༢ སྤྱི་ཚོགས་དང་འབྲེལ་བའི་འགྲོ་གྲོན་སྒོར་ས་ཡ་ ༥༠༦་༩༩ གཞན་ཡང་འཕྲོད་བསྟེན་དང་འབྲེལ་བའི་འགྲོ་གྲོན་སྒོར་ས་ཡ་ ༢༣༥ ལྷག་ཙམ། ཁྲིམས་བཟོ་དང་འབྲེལ་བའི་འགྲོ་གྲོན་སྒོར་ས་ཡ་ ༦༢་༢༡ དང་ཆོས་རིག་དང་འབྲེལ་བའི་འགྲོ་གྲོན་སྒར་ས་ཡ་ ༦༠་༥༧ བཅས་འཆར་འབུལ་ཞུས་ཡོད་པ་རེད།དཔལ་འབྱོར་བཀའ་བློན་མཆོག་གིས་ཁ་སང་གི་སྔོན་རྩིས་གཏམ་བཤད་ཁྲོད་བཀའ་ཤག་སྐབས་ ༡༥ པའི་ལས་ཡུན་རིང་བོད་མའི་སྒྲིག་འཛུགས་ཀྱི་མ་དངུལ་ལོ་ལྟར་ཕྲན་དུ་འཕར་སྣོན་བྱུང་བ་དང་སྒྲིག་འཛུགས་ཀྱི་གཏན་འཇགས་མ་དངུལ་གནས་སྟངས་ཡག་པོ་ཆགས་ཡོད་སྐོར་གསུངས་ཡོད་པ་ལྟར་དེ་རིང་གི་གྲོས་ཚོགས་ཐོག་སྤྱི་འཐུས་ཁག་གཅིག་གིས་དེའི་ཐོག་བཀའ་བློན་ལ་བཀའ་འདྲི་ནན་པོ་ཞུ་མཁན་བྱུང་སོང་།བོད་མིའི་སྒྲིག་འཛུགས་ཀྱི་སྔོན་རྩིས་མ་དངུལ་ཡོང་འཆར་གཙོ་བོ་དང་བླངས་དཔྱ་དངུལ་དང་འབྲེལ་སྤྱི་འཐུས་ཁག་གཅིག་གིས་ཚོར་ཤུགས་ཆེན་པོས་བོད་མི་ཡོངས་ནས་དཔྱ་དངུལ་ངེས་པར་དུ་འབུལ་ལམ་ཞུ་དགོས་པའི་སྐུལ་མ་གནང་སོང་བར་མ་ཟད། ལ་ལས་དཔྱ་ཁྲལ་གྱི་བསྡུ་འབབ་སྤར་ཆ་དགོས་པའི་དགོངས་འཆར་ཕུལ་མཁན་བྱུང་ཡོད་པ་ལྟར་བཀའ་བློན་མཆོག་གིས་བཀའ་ཤག་སྐབས་ ༡༥ པའི་ངོས་ནས་བོད་མི་ཡོངས་ནས་དཔྱ་དངུལ་བསྡུ་རྒྱུ་གལ་ཆེར་རྩིས་པ་ལས་དཔྱ་དངུལ་ལ་སྤར་ཆ་གནང་རྒྱུར་དགོངས་པ་བཞེས་མེད་ཅེས་གསུངས་སོང་།ཉིན་རྒྱབ་ཀྱི་ཚོགས་དུས་ཐོག་ལས་ཁུངས་གོ་རིམ་བཞིན་སྔོན་རྩིས་ཐོག་བགྲོ་གླེང་དང་གཏན་འབེབས་གནང་བཞིན་བོད་རང་དབང་ལྡན་པའི་ལས་འགུལ་ཚོགས་ཆུང་ཁག་གི་སྔོན་རྩིས་ཐོག་བགྲོ་གླེང་ཁྲོད་སླར་ཡང་དཔྱ་ཁྲལ་ལག་དེབ་དང་འབྲེལ་སྤྱི་འཐུས་ཁག་གཅིག་གིས་བཀའ་ཤག་ལ་བཀའ་འདྲི་མང་དག་ཅིག་ཞུས་པའི་ཁོངས་སུ་རྩ་འཛིན་ལག་དེབ་རྐྱེན་གྱིས་དཔྱ་ཁྲལ་ལག་དེབ་ནང་གི་མིང་སོགས་ལ་ནོར་བཅོས་ཀྱི་ཆ་རྐྱེན་ལ་ངལ་འཕྲད་ཐོག་བཀའ་འདྲི་ནན་པོ་ཕེབས་དོན་ལྟར་དཔལ་འབྱོར་བཀའ་བློན་མཆོག་གིས་མང་ཚོགས་ཀྱི་བདེ་སྡུག་ལ་གཟིགས་ཏེ་བསྐྱར་ཞིབ་ཀྱི་དགོངས་པ་བཞེས་ཀྱི་ཡོད་པ་གསུང་སོང་།རྩ་བའི་སྔ་ལོའི་སྔོན་རྩིས་བཀའ་འཁྲོལ་ཐོབ་ཟིན་པའི་ཁྲོད་ཏོག་དབྱིབས་གཉན་རིམས་ཀྱི་ཛ་དྲག་གནས་སྟངས་ཁྲོད་དམིགས་བསལ་དང་དམིགས་བཀར་གྱི་ལས་འཆར་ཁྲོད་འདས་ལོར་ཧིན་སྒོར་ས་ཡ་ ༧༠ ཙམ་གྱི་ལས་གཞི་ཕྱག་ལྟར་གནང་མ་ཐུབ་པའི་གནས་སྟངས་ཆགས་གྱུར་ཡོད་ཁག་ད་རེས་བསྐྱར་དུ་རྒྱབ་གཉེར་ཞུས་འདུག

དེ་རིང་ཕྱི་ཟླ་ ༣ ཚེས་ ༡༥ ཉིན་གྱི་སྔ་དྲོ་ཚོུད་ ༩༌༣༠ ཐོག་བོད་མིའི་སྒྲིག་འཛུགས་ཀྱི་བསྟི་གནས་དྷ་ས་གངས་ཅན་སྐྱིད་གཤོངས་ཀྱི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་སུ་ཏོག་དབྱིབས་གཉན་རིམས་སྔོན་འགོག་གི་གནང་སྒོ་ཁག་འཐུས་གཙང་ཕྱག་བསྟར་གནང་སྟེ་སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་པ་དབུ་འཛུགས་གནང་སོང་བ་དང་། དཔལ་འབྱོར་བཀའ་བློན་ཀརྨ་ཡེ་ཤེས་མཆོག་གིས་བོད་མིའི་སྒྲིག་འཛུགས་ཀྱི་སྔོན་རྩིས་གསུང་བཤད་དང་འབྲེལ་ནས་བོད་མིའི་སྒྲིག་འཛུགས་ཀྱི་ལས་ཁུངས་མ་ལག་དང་བཅས་པའི་རྩིས་ལོ་ ༢༠༢༡་༢༠༢༢ ལོར་ཕྱོགས་བསྡོམས་འགྲོ་གྲོན་དགོས་དངུལ་སྒོར་ས་ཡ་ ༢༦༩༩་༠༡ འཆར་འབུལ་ཞུས་སོང་།བོད་མི་མང་སྤྱི་འཐུས་ཚོགས་གཙོ་པདྨ་འབྱུང་གནས་མཆོག་གིས་རྒྱ་ནག་ཝུ་ཧན་ནས་ཐོག་མར་མཆེད་པའི་ཏོག་དབྱིབས་གཉན་རིམས་རྐྱེན་གྱིས་ཚང་མར་སྐུ་ངལ་ཧ་ཅང་འཕྲད་པར་མ་ཟད་ད་བར་ལས་དོན་མང་པོ་ཞིག་གནང་མ་ཐུབ་པའི་གནས་སྟངས་བྱུང་ཡོད་སྐོར་གསུངས་པ་དང་སྦྲགས། ད་རེས་སྟབས་ལེགས་པར་དེ་རིང་ཚོགས་བཅར་གནང་མཁན་ཚང་མར་ཏོག་དབྱིབས་ཀྱི་ནད་རྟགས་མེད་པར་བཅར་གནང་བར་བློ་བདེ་པོ་བྱུང་ཞེས་གསུངས་པ་དང་ཆབས་ཅིག ད་ལྟའི་ཆར་རྒྱ་གར་ཁྱོན་ཡོངས་དང་ང་ཚོའི་ཁྱིམ་མཚེས་པན་ཇཱབ་མངའ་སྡེར་འཕེལ་བཞིན་པའི་གནས་སྟངས་ཆགས་ཡོད་སྟབས། ང་ཚོའི་གྲོས་ཚོགས་འདི་ཉིན་གྲངས་བཅོ་ལྔ་རིང་ཆ་ཚང་བ་ཚོགས་ཐུབ་མིན་བརྗོད་དཀའ་སྐོར་གསུངས་སོང་། དེ་བཞིན་ཚོགས་གཙོ་མཆོག་གིས་ད་ལྟའི་ཆར་སྲིད་སྤྱི་གཉིས་ཀྱི་འོས་བསྡུའི་ལས་རིམ་འགྲོ་བཞིན་ཡོད་སྟབས། ད་བར་སྔོན་འགྲོའི་ལས་རིམ་ཁྲོད་བཀྲ་མ་ཤིས་པའི་རིགས་གང་ཡང་བྱུང་མེད་ཀྱང་། ད་རེས་གྲོས་ཚོགས་ཀྱི་སྡིངས་ཆ་འདིའི་བརྒྱུད་ནས་སྤྱི་ཚོགས་ནང་ལབ་རྒྱུ་གླེང་རྒྱུ་མེད་པ་ཞིག་བཟོ་དགོས་རྒྱུ་ང་ཚོ་ཚང་མར་འགན་ཡོད་པར་བརྟེན་ཚང་མས་ཐུགས་འགན་བཞེས་ཏེ་གྲོས་ཚོགས་ཀྱི་ལས་རིམ་འདི་བཀྲ་ཤིས་པའི་ངང་ནས་མཇུག་བསྒྲིལ་ཐུབ་མཐུན་འགྱུར་གནང་རོགས་ཞེས་གསུངས་ཡོད། ཚོགས་གཙོའི་དབུ་འབྱེད་ཀྱི་གསུང་བཤད་གྲུབ་མཚམས་སུ་དེ་སྔ་ཕྱི་ལོ་ ༢༠༡༥ ལོར་རྒྱ་གཞུང་གིས་བོད་ཐོག་འཛིན་པའི་དྲག་གནོན་ཅན་གྱི་སྲིད་བྱུས་ཁག་ལ་ཞི་འབོད་དང་སྦྲགས་རང་ལུས་མེར་བསྲེགས་གནང་སྟེ་སྐུ་འདས་གྲོངས་སུ་གྱུར་བ་བོད་མི་ཤུར་མོ་ལགས་དང་། གཞན་ཡང་འདས་པའི་ལོ་དེའི་ནང་སྐུ་འདས་གྲོངས་སུ་གྱུར་བའི་ཐེ་ཝན་གྱི་སྲིད་འཛིན་ཟུར་པ་སྐུ་ཞབས་ Lee Teng-hui ལགས། རྒྱ་གར་གྱི་སྲིད་འཛིན་ཟུར་པ་སྐུ་ཞབས་ Pranab Mukherjee ལགས་ཀྱིས་གཙོས་པའི་རྒྱ་གར་དང་རྒྱལ་སྤྱིའི་ཐོག་གི་བོད་དོན་རྒྱབ་སྐྱོར་བ་དང་དེ་བཞིན་སྤྱི་ཟུར་དང་ཚོགས་དྲུང་ཟུར་པ་བཅས་ཚེ་འདས་དམ་པ་ ༡༦ གིས་བོད་དོན་ཆེད་བློས་བཏང་དང་རྒྱབ་སྐྱོར་གནང་བའི་མཛད་རྗེས་ལ་ཆེ་བསྟོད་དང་དྲན་གསོ་ཞུས་པའི་གཞུང་འབྲེལ་མྱ་ངན་གུས་འདུད་ཀྱི་རྗེས་དྲན་གྲོས་ཆོད་ཁག་ ༡༦ སྤྱི་མོས་ཀྱིས་གཏན་འབེབས་གནང་ཡོད།སྔ་དྲོའི་ཚོགས་དུས་ཐོག་བོད་ནང་གི་ཛ་དྲག་གནས་སྟངས་ཐོག་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་གྲོས་ཚོགས་སུ་སྙན་སྒྲོན་ཞུས་ཏེ་སྤྱི་འཐུས་རྣམ་པས་བགྲོ་གླེང་གི་ཆ་ཤ་བཞེས་ཡོད་པ་དང་གྲོས་ཆོད་དེའི་སྔོན་གླེང་ནང་ཕྱི་ལོ་ ༡༩༥༩ ལོའི་བར་དུ་བོད་འདི་རང་དབང་རང་བཙན་གྱི་རྒྱལ་ཁབ་ཅིག་ཡིན་པ་དང་། དགྲ་བོ་རྒྱ་དམར་གཞུང་གིས་བོད་ལ་དྲག་པོའི་བཙན་འཛུལ་བྱས་རྗེས་༸གོང་ས་མཆོག་གིས་དབུས་པའི་བོད་མི་ཁྲི་ཕྲག་མང་པོ་བཙན་བྱོལ་དུ་ཕེབས་ཡོད་པ་དང་། དེ་ནས་རིམ་པས་རྒྱ་དམར་གཞུང་གིས་བོད་ཀྱི་གཙུག་ལག་ཁང་དང་དགོན་སྡེ་ཁག་གཏོར་བཤིག བོད་མི་ས་ཡ་ལྷག་དམར་གསོད། དེ་བཞིན་མི་སེར་སྤེལ་བའི་སྲིད་བྱུས་འོག་རྒྱ་རིགས་མང་པོ་བོད་སར་གནས་སྤོ་བྱས་པ་དང་བོད་བརྒྱུད་ནང་བསྟན་རྒྱ་ནག་ཅན་དུ་བཟོ་རྒྱུའི་སྲིད་བྱུས་འོག་དགོན་སྡེ་ཁག་གི་གྲྭ་བཙུན་ལ་ཚད་བཀག་བཟོས་པར་མ་ཟད། སྐད་གཉིས་སློབ་གསོའི་སྲིད་བྱུས་འོག་གཞི་རིམ་གྱི་སློབ་ཆུང་ཁག་ཏུ་བོད་ཀྱི་སྐད་ཡིག་ཚབ་ཏུ་རྒྱ་ཡིག་སློབ་ཁྲིད་བྱས་པ། བོད་ཀྱི་ས་བཅད་བགོས་བྱས་པའི་ས་ཁུལ་ཕན་ཚུན་ནང་ལ་དམ་དྲག་ཤུགས་ཆེ་བྱེད་བཞིན་པ་སོགས་རྒྱ་གཞུང་གི་བྱེད་བབས་ཁག་ཐེར་འདོན་གནང་ཐོག་བོད་རྒྱལ་ཁབ་ཆེན་པོའི་རྒྱལ་བསྟན་ཆབ་སྲིད་མི་རིགས་དང་བཅས་པའི་ཆེད་དུ་ལུས་སྲོག་ལོངས་སྤྱོད་དང་བཅས་པ་བློས་བཏང་གནང་མཁན་གྱི་རྒྱལ་གཅེས་དབའ་བོ་དཔའ་མོ་རྣམས་ཀྱི་སྙིང་སྟོབས་ལ་ཡི་རང་དང་ཤུལ་ལུས་ནང་མི་ཉེ་འབྲེལ་ཡོངས་ལ་གདུང་སེམས་མཉམ་བསྐྱེད། ད་བར་ཤེས་རྟོགས་གསལ་པོ་བྱུང་བ་བཅས་ཁྱོན་དཔའ་བོ་དཔའ་མོ་གྲངས་ ༡༥༥ ཡིས་རང་ལུས་མེར་བསྲེགས་གནང་སྟེ་རྒྱ་གཞུང་ལ་ཞི་རྒོལ་གནང་ཡོད་པ་དང་ཁོང་རྣམ་པའི་གདུང་འབོད་དང་ཞལ་ཆེམས། མངོན་འདོད་བཅས་རྒྱ་ནག་གཞུང་གི་ངོས་ནས་འགན་ཁུར་དགོས་པ་ཞིག་ངེས་པར་དུ་བཟོ་རྒྱུ། རྒྱ་གཞུང་གི་འགོ་ཁྲིད་རྣམས་གུ་དོག་མཁྲེགས་འཛིན་གྱི་ལྟ་བ་དོར་ནས་གཉིས་སྨན་མཉམ་གནས་གུ་ཡངས་བཅས་ཀྱི་ཐབས་ལམ་ལ་བརྟེན་སྟེ་བོད་རྒྱ་འབྲེལ་མོལ་གང་མགྱོགས་དབུ་འཛུགས་གནང་ཐབས་གནང་གནད་ཡིན་པ་སོགས་ཁྱོན་གྲོས་ཆོད་དོན་ཚན་ ༦ གཏན་འབེབས་གནང་ཡོད།  སྐབས་  ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་པ་འདི་ཡོངས་གྲགས་ལ་སྔོན་རྩིས་གྲོས་ཚོགས་ཞེས་འབོད་སྲོལ་ཡོད་པ་ལྟར་ཚོགས་དུས་འདིའི་ཐོག་རྐང་བོད་མིའི་སྒྲིག་འཛུགས་ནས་རྩིས་ལོ་ ༢༠༢༡༌༢༢ ལོའི་ལས་ཁུངས་མ་ལག་དང་བཅས་པའི་སྔོན་རྩིས་བཀའ་འཁྲོལ་གཏན་འབེབས་གནང་གི་ཡོད་པ་ལྟར། དེ་རིང་ཉིན་རྒྱབ་ཚོགས་དུས་ཐོག་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་གིས་བོད་མིའི་སྒྲིག་འཛུགས་ཀྱི་སྔོན་རྩིས་གསུང་བཤད་དང་འབྲེལ་ནས་བོད་མིའི་སྒྲིག་འཛུགས་ཀྱི་ལས་ཁུངས་མ་ལག་དང་བཅས་པའི་རྩིས་ལོ་ ༢༠༢༡་༢༠༢༢ ལོར་ཕྱོགས་བསྡོམས་འགྲོ་གྲོན་དགོས་དངུལ་སྒོར་ས་ཡ་ ༢༦༩༩་༠༡ འཆར་འབུལ་ཞུས་སོང་བར་མ་ཟད་བཀའ་བློན་མཆོག་གི་གསུང་བཤད་ཁྲོད་ཐེངས་འདིའི་གྲོས་ཚོགས་འདི་ནི་བཀའ་ཤག་སྐབས་བཅོ་ལྔ་པའི་གྲོས་ཚོགས་མཐའ་མ་དང་བསྟུན། བཀའ་ཤག་སྐབས་བཅུ་བཞི་པ་དང་བཅོ་ལྔ་པས་ཐོག་མར་རྩིས་བཞེས་སྐབས་དང་ད་ལྟ་འགྲོ་བཞི་པའི་རྩིས་ལོའི་བར་སྔོན་རྩིས་མ་དངུལ་དང་གཏན་འཇགས་མ་དངུལ། ཟུར་བཀོལ་བཅས་ཀྱི་འཕར་བབས་གནས་སྟངས་ཁག་གསལ་སྟོན་གནང་ཡོད། བཀའ་བློན་མཆོག་གི་གསུང་བཤད་གྲུབ་མཚམས་སུ་སྔོན་རྩིས་ཚོད་དཔག་འཆར་རྩིས་ཚོགས་ཆུང་གི་ཚོགས་གཙོ་སྤྱི་འཐུས་མཁན་པོ་བསོད་ནམས་བསྟན་འཕེལ་ལགས་ཀྱིས་ཚོགས་ཆུང་གི་སྙན་ཐོ་སྙན་སྒྲོན་གནང་སོང་བ་དང་། གྲོས་ཚོགས་ཀྱི་ལས་ཉིན་རྗེས་མའི་ཐོག་སྔོན་རྩིས་ཀྱི་གནད་དོན་སྤྱི་ཡོངས་ཐོག་བགྲོ་གླེང་དང་གཏན་འབེབས་གནང་རྒྱུ་ཡིན་པ་རེད།གཞི་རྩའི་ཏོག་དབྱིབས་གཉན་རིམས་ཀྱི་ཛ་དྲག་གནས་སྟངས་རྐྱེན་གྱིས་སྔར་ལོའི་སྔོན་རྩིས་གྲོས་ཚོགས་ཉིན་གྲངས་གཅིག་མ་གཏོགས་ཚོགས་ཐུབ་མེད་པ་དང་། དེ་བཞིན་ཕྱི་ཟླ་ ༩ པའི་གྲོས་ཚོགས་དེའང་ཕར་འགྱངས་གནང་བའི་གནས་སྟངས་ཁྲོད་བོད་མི་མང་སྤྱི་འཐུས་རྒྱུན་ལས་དང་ཆེས་མཐོའི་ཁྲིམས་ཞིབ་པའི་དབར་སྒྲིག་གཞི་དང་འབྲེལ་བའི་གླེང་སློང་ཁག་གཅིག་བྱུང་ཡོད། དེ་རིང་ལོ་གཅིག་ཙམ་གྱི་རྗེས་སུ་ཚོགས་པའི་གྲོས་ཚོགས་ཀྱི་ཚོགས་དུས་འདི་སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་མཐའ་མ་དེ་ཆགས་ཀྱི་ཡོད་པ་རེད།