16th TPiE Sessions

དེ་རིང་ཕྱི་ཟླ་ ༣ ཚེས་ ༡༧ ཉིན་གྱི་སྔ་དྲོར་སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དགུ་པའི་ཐོག་བོད་མིའི་སྒྲིག་འཛུགས་ཀྱི་ལས་ཁུངས་མ་ལག་དང་བཅས་པའི་རྩིས་ལོ་ ༢༠༢༠༌༢༡ ལོའི་དགོས་དངུལ་སྔོན་རྩིས་བཀའ་འཁྲོལ་ཐོབ་པ་སྒོར་ས་ཡ་༢༧༡༤༧༩༤༦༠༥ གཏན་འབེབས་གནང་སོང་།བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་པདྨ་འབྱུང་གནས་མཆོག་གིས་གྲོས་ཚོགས་ཚོགས་དུས་དགུ་པ་དབུ་འཛུགས་དང་འབྲེལ། བཙནབྱོལ་བོད་མིའི་བཅའ་ཁྲིམས་དོན་ཚན་ ༤༠ པའི་དགོངས་དོན་བཞིན་གྲོས་ཚོགས་ཚོགས་དུས་ ༩ པ་དེ་དེ་རིང་ནས་ཕྱི་ཚེས་ ༢༧ བར་ལས་ཉིན་བཅུའི་རིང་འཚོགས་གཏན་འཁེལ་ཡོད་ཀྱང་ད་ལྟའི་ཆར་རྒྱ་ནག་ཝུ་ཧན་གྲོང་ཁྱེར་ནས་ཁྱབ་གདལ་བྱུང་བའི་ཏོག་དབྱིབས་རིམས་ནད་དེ་རྒྱལ་སྤྱིའི་ཁྱོན་དུ་ཁྱབ་གདལ་ཤུགས་ཆེ་འགྲོ་མུས་ལ་བརྟེན་ཆེས་ཛ་དྲག་རང་བཞིན་ཞིག་ཏུ་འགྱུར་བཞིན་པ་དང་ལྷག་དོན་གནས་ཡུལ་རྒྱ་གར་ནང་དུ་རིམས་དེ་ཉིན་རེ་བཞིན་ཇེ་འཕེལ་འགྲོ་བཞིན་པར་བརྟེན་བཅའ་ཁྲིམས་ ༤༤ པའི་དགོངས་དོན་ལྟར་སྤྱི་ལྷན་རྒྱུན་ལས་དང་བཀའ་བསྡུར་གནང་མཐར་ཉིན་གྲངས་གཅིག་གི་རིང་གྲོས་ཚོགས་འཚོགས་རྒྱུ་མ་གཏོགས་དེ་མིན་ཕྱིར་བཤོལ་གནང་རྒྱུ་ཐུགས་ཐག་བཅད་ཡོད་པ་གསུངས་སོང་།དེ་རིང་སྔ་དྲོར་ཚོགས་གཙོའི་དབུ་འབྱེད་གསུང་བཤད་གྲུབ་མཚམས་སུ་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་གིས་བོད་མིའི་སྒྲིག་འཛུགས་ཀྱི་ལས་ཁུངས་མ་ལག་དང་བཅས་པའི་རྩིས་ལོ་ ༢༠༢༠༌༢༡ ལོའི་སྔོན་རྩིས་འཆར་འབུལ་གྲོས་ཚོགས་སུ་སྙན་སྒྲོན་ཞུས་པ་དང་འབྲེལ་ཏེ་མ་དངུལ་རྒྱུན་གྲོན་དང་དམིགས་བས་ལས་དོན། དེ་བཞིན་ཟུར་བཀོལ་ལས་འཆར་བཅས་ཀྱི་ཕྱོགས་བསྡོམས་འགྲོ་འཆར་ཧིན་སྒོར་ས་ཡ་ཉིས་སྟོང་བདུན་བརྒྱ་བཅུ་བཞི་ལྷག་རེད་འདུག་པ་དང་། དེ་སྔ་ལོའི་གྲོས་ཚོགས་ནས་གཏན་འབེབས་ཟིན་པའི་སྔོན་རྩིས་དང་བསྡུར་ན་འདི་ལོའི་སྔོན་རྩིས་ནང་སྒོར་ས་ཡ་ ༢༠༩ ལྷག་གི་འགྲོ་གྲོན་འཕར་བ་བྱུང་འདུགའདི་ལོའི་ལོ་འཁོར་མོ་གཅིག་གི་བོད་མིའི་སྒྲིག་འཛུགས་ཀྱི་ལས་དོན་འཆར་སྒྲིག་དང་དགོས་དངུལ་སྔོན་རྩིས་འཆར་འབུལ་ཞུས་པ་ལ་གཞིགས་ཚེ་ཕྱོགས་བསྡོམས་འགྲོ་འཆར་ཧིན་སྒོར་ས་ཡ་གཉིས་སྟོང་བདུན་བརྒྱ་བཅུ་བཞི་ནས་ཁྲིམས་བཟོ་དང་འབྲེལ་བའི་འགྲོ་གྲོན་སྒོར་ས་ཡ་ ༥༧།༠༢ དང་ཆབ་སྲིད་དང་འབྲེལ་བའི་འགྲོ་གྲོན་སྒོར་ས་ཡ་ ༥༨༩།༥༥ དེ་བཞིན་འཛིན་སྐྱོང་དང་འབྲེལ་བའི་འགྲོ་གྲོན་སྒོར་ས་ཡ་ ༥༨༦།༡༠ སྤྱི་ཚོགས་དང་འབྲེལ་བའི་འགྲོ་གྲོན་སྒོར་ས་ཡ་ ༡༤༨༣ ལྷག་བཅས་རྒྱབ་གཉེར་ཞུས་འདུག་པར་མ་ཟད་དེའི་ཁོངས་ཆོས་དང་རིག་གཞུང་། འཕྲོད་བསྟེན་ལྟ་སྐྱོང་། ཤེས་ཡོན་དང་འབྲེལ་བའི་ལས་གཞི། སྤྱི་ཚོགས་བདེ་དོན་ལས་གཞི། རོགས་དངུལ་འདུ་འགོད་དང་འབྲེལ་བའི་ལས་གཞི་སོགས་ཀྱི་ཆེད་དུ་སྔོན་རྩིས་འཆར་འབུལ་ཞུས་འདུགསྐབས་དེར་རྩིས་ལོ་ ༢༠༢༠༌༢༡ ལོའི་བོད་མིའི་སྒྲིག་འཛུགས་ཀྱི་ལོ་འཁོར་སྔོན་རྩིས་ལ་བོད་མི་མང་སྤྱི་འཐུས་ལྷན་ཚོགས་ཀྱི་སྔོན་རྩིས་ཚོད་དཔག་འཆར་རྩིས་ཚོགས་ཆུང་གི་ལྟ་ཞིབ་སྙན་ཐོ་སྒྲོག་སྦྱང་དང་འབྲེལ། ཚོད་དཔག་འཆར་རྩིས་ཚོགས་ཆུང་ལ་ལས་ཉིན་ཧ་ཅང་ཉུང་རྐྱེན་དཔལ་འབྱོར་གྱི་གནས་སྟངས་ཞིབ་ཏུ་གཟིགས་རྒྱུ་དཀའ་ཞིང་། སྤྱི་ཚོགས་ནས་བོད་མིའི་སྒྲིག་འཛུགས་ཀྱི་དཔལ་འབྱོར་གནས་བབ་ལ་བསྐྱར་ཞིབ་ཅིག་དགོས་གལ་དུ་མཐོང་བ་དང་དེ་བཞིན་ཕྱི་ལོ་ ༢༠༢༠ འདི་ལོར་འཛིན་སྐྱོང་བཀའ་ཤག་ངོས་ནས་ལོ་འཁོར་མོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བཀའ་དྲིན་རྗེས་དྲན་གྱི་ལོར་སྲུང་བརྩི་ཞུ་ཕྱིར་བཀའ་དྲིན་རྗེས་དྲན་གྱི་ལོ་ཡིན་ཞེས་གསལ་བསྒྲགས་གནང་ཟིན་པ་ལྟར་ལྷན་ཁང་སོ་སོའི་སྔོན་རྩིས་ནང་སྤོམ་དངུལ་རེ་བཀོད་འདུག་པ་མ་གཏོགས་བཀའ་དྲིན་རྗེས་དྲན་ཇི་ལྟར་ཞུ་སྟངས་ཀྱི་གནས་ཚུལ་ཞིབ་ཕྲ་གང་ཡང་བཀོད་མེད་སྟབས་མ་འོངས་པར་ལས་དོན་བྱ་རིམ་ལ་ངེས་པར་ཡིད་གཟབ་དགོས་པ་སོགས་ཀྱི་གཟིགས་ཚུལ་ཁག་ཅིག་གསུངས་ཡོད།གཞི་རྩའི་ཉིན་གཅིག་གི་རིང་ཚོགས་པའི་སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༩ པའི་ཚོགས་གཙོའི་མཇུག་བསྡོམས་ཀྱི་གསུངས་བཤད་ཁྲོད་ཕྱི་ལོ་ ༢༠༢༠ འདི་ལོར་འཛིན་སྐྱོང་བཀའ་ཤག་ངོས་ནས་ལོ་འཁོར་མོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བཀའ་དྲིན་རྗེས་དྲན་གྱི་ལོར་སྲུང་བརྩི་ཞུ་རྒྱུ་རེད། བཀའ་དྲིན་རྗེས་དྲན་གྱི་ལོའི་ནང་བོད་མི་སྤྱི་བོ་གནམ་བསྟན་ཡོངས་ཀྱིས་༸རྒྱལ་བའི་བཀའ་དགོངས་གང་ཐུབ་བསྒྲུབ་རྒྱུ་དང་། མཐུན་ལམ་གོང་བུ་གཅིག་ཏུ་བསྒྲིལ་ཏེ་རྩ་དོན་ཁོ་ནའི་ཆེད་དུ་དུས་ཚོད་གཏང་ཐུབ་པ་ཞིག་དང་། དོན་མེད་ང་ཚོའི་སྤྱི་ཚོགས་ནང་དཀྲོག་རྐྱེན་བཟོ་རྒྱུའི་རིགས་སུ་ལའང་དགོས་པ་མེད། མི་དགོས་པ་དེར་དང་ལེན་མ་གནང་བར་རྒྱང་རིང་དུ་བཏང་བའི་ཐོག་ནས་དུས་ཚོད་གང་ཡོད་པ་སྤྱི་པའི་རྩ་དོན་ཆེད་གང་བྱེད་དགོས་པ་དང་། སོ་སོའི་ནུས་པ་གང་འདོན་ཐུབ་པ་དེ་དག་གི་ཐོག་ནུས་པ་མཉམ་སྤུངས་ཐུབ་པར་འབད་དགོས་པའི་གཞེན་བསྐུལ་གནང་སོང་།འདས་པའི་གྲོས་ཚོགས་སྔ་རྗེས་ལྟར་དེ་རིང་ཉིན་གཅིག་གི་རིང་གྲོས་ཚོགས་ལས་རིམ་ཐོག་གཞན་ཡང་བོད་ནང་གི་ཛ་དྲག་གནས་སྟངས་དང་འབྲེལ་བའི་དོན་ཚན་ལྔ་ཅན་གྱི་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་གཅིག་དང་དེ་བཞིན་འདས་གྲོངས་སུ་གྱུར་བ་བོད་མི་རང་ལུས་མེར་བསྲེགས་གནང་མཁན་རྒྱལ་གཅེས་པ་ཡོན་ཏན་ལགས་དང་། ཚེ་འདས་བོད་མི་མང་དགེ་ལུགས་སྤྱི་ཟུར་དམ་པ་དགའ་བྱང་དགེ་བཤེས་ལྷ་རམས་པ་བཀྲིས་རྒྱལ་མཚན་མཆོག་བཅས་ལ་གཞུང་འབྲེལ་མྱ་ངན་གུས་འདུད་ཀྱི་རྗེས་དྲན་གྲོས་ཆོད་གྲོས་འཆར་གཉིས་སྤྱི་མོས་ཀྱིས་གཏན་འབེབས་གནང་ཡོད་པ་དང་། ལྷག་པར་དུ་དེ་རིང་དུས་ཚོད་རྐྱེན་པས་གཞུང་འབྲེལ་རྗེས་དྲན་དང་མྱ་ངན་གུས་འདུད་ཀྱི་གྲོས་འཆར་ཁག དེ་བཞིན་རྩིས་ལོ་ ༢༠༢༠ དང་ ༢༡ ལོའི་བོད་མིའི་སྒྲིག་འཛུགས་ཀྱི་ལོ་འཁོར་སྔོན་རྩིས་གཏན་འབེབས་ཐོག་གྲོས་ཚོགས་འཐུས་མི་རྣམས་ནས་བགྲོ་གླེང་གི་ཆ་ཤས་མ་བཞེས་པར་ལས་རིམ་ཡོངས་རྫོགས་མཇུག་སྐྱོང་གནང་སོང་། འོན་ཀྱང་སྐབས་དེར་སྤྱི་འཐུས་ཟླ་བ་ཕུན་སྐྱིད་ལགས་ཀྱིས་འདི་ལོའི་ལོ་འཁོར་མོ་གཅིག་གི་སྔོན་རྩིས་འགྲོ་གྲོན་གྱི་དགོས་དངུལ་གཏོང་ཁུངས་དང་འབྲེལ་ནས་བགྲོ་གླེང་དགོས་སྐོར་གྱི་དགོངས་ཚུལ་ཞུས་པར་སྤྱི་འཐུས་ཚོགས་གཙོ་མཆོག་གིས་ད་རེས་ཏོག་དབྱིབས་རིམས་ནད་རྐྱེན་པས་ཐེངས་འདིའི་སྔོན་རྩིས་གྲོས་ཚོགས་འདི་དེ་རིང་ཉིན་གཅིག་ནང་མཇུག་སྒྲིལ་གནང་དགོས་པས་བགྲོ་གླེང་གི་གོ་སྐབས་གནང་ཐབས་མེད་པའི་གསལ་བཤད་གནང་ཡོད།གཞི་རྩའི་ཏོག་དབྱིབས་རིམས་ནད་རྐྱེན་པས་ཐེངས་འདིའི་གྲོས་ཚོགས་ཚོགས་དུས་ཐོག་ཡུ་རོབ་སྤྱི་འཐུས་ གཉིས་དང་ཨོ་གླིང་དུ་གནས་བཞུགས་སྤྱི་འཐུས་གཉིས། ཨ་རིར་གནས་བཞུགས་སྤྱི་འཐུས་གཉིས། དེ་བཞིན་བལ་ཡུལ་དུ་གནས་བཞུགས་སྤྱི་འཐུས་གཅིག་དང་དྷ་སར་གནས་བཞུགས་སྤྱི་འཐུས་གཅིག་བཅས་ཁྱོན་སྤྱི་འཐུས་བརྒྱད་ཚོགས་བཅར་གནང་ཐུབ་མི་འདུག

དེ་རིང་ཚོགས་གཙོ་པདྨ་འབྱུང་གནས་མཆོག་དབུ་བཞུགས་ཐོག་སྔ་དྲོ་ཕྱི་དྲིལ་ལས་ཁུངས་དང་ཉིན་རྒྱབ་འཕྲོད་བསྟེན་ལས་ཁུངས་ཀྱི་ལོ་ཁོར་ལས་བསྡོམས་ཐོག་སྤྱི་འཐུས་རྣམ་པའི་བགྲོ་གླེང་དང་འཕྲོས་སྐྱོང་ཡོད་ཐོག་གོ་སྐབས་གནང་རྗེས་སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བརྒྱད་པ་མཇུག་སྒྲིལ་གནང་སོང་། སྐབས་དེར་ཚོགས་གཙོས་འཛིན་སྐྱོང་བཀའ་ཤག་ནས་སྤྱི་འཐུས་རྣམ་པའི་དགོངས་འཆར་ཇི་ཕེབས་ཁག་གལ་ཆེན་པོར་ངོས་བཞེས་ཀྱིས་དེ་དག་ཕྱག་བསྟར་གནང་དགོས་པ་དང། ཕྱག་བསྟར་གནང་མ་ཐུབ་ཚེ་དེ་ལྟར་མ་ཐུབ་པའི་ལན་གསོལ་པོ་གནང་དགོས་གལ་ཡིན་པ། སྤྱི་འཐུས་རྣམ་པའི་ངོས་ནས་ཀྱང་སྤྱི་འཐུས་རྣམ་པ་དང་མི་མང་དབར་རྒྱང་ཐག་མེད་པ་བཟོ་ཆེད་དུ་ས་གནས་ཁག་ལ་ས་བགོས་གནང་སྟེ་འཚམས་གཟིགས་ཕེབས་རྒྱུ་གོ་སྒྲིག་གནང་གི་ཡོད་པ་བཞིན་སྤྱི་འཐུས་རྣམས་ནས་དེ་ལྟར་གཙིགས་ཆེར་ངོས་བཞེས་ཀྱིས་ཕྱག་བསྟར་གནང་གནད་ཡིན་པ་གསུངས་སོང་། ཚོགས་གཙོ་མཆོག་གིས་ད་དུང་ཚོགས་དུས་བརྒྱད་པ་འདིའི་ཐོག་བགྲོ་གླེང་ཤུགས་ཆེ་བྱུང་བའི་གནད་དོན་ཁག་གཅིག་གི་ཐོག་ལམ་སྟོན་དང་དགོངས་འཆར་ཁག་གཅིག་གནང་བའི་ཁོངས་སུ་ད་ལན་ནང་སྲིད་ཀྱི་ལས་བསྡོམས་དང་འབྲེལ་ས་ཁང་གི་སྒྲིག་གཞིའི་ཐོག་གླེང་སློང་ཤུགས་ཆེ་བྱུང་སྐོར་དང་འབྲེལ། ས་ཁང་གི་སྒྲིག་གཞི་དེ་དག་ནི་དེ་སྔ་སྤྱི་འཐུས་སྐབས་ ༡༣ པའི་སྐབས་སུ་འཛིན་སྐྱོང་གི་དགོས་མཁོ་བཞིན་གཏན་འབེབས་གནང་བ་ཆགས་ཀྱི་ཡོད་པ་དང་དེའི་ཐོག་འཛིན་སྐྱོང་རིམ་པས་བསྐྱར་བཅོས་ཀྱི་གྲོས་འཆར་རིམ་པ་ཆེད་བཏོན་དང་འགྱུར་བ་རིམ་པ་བཏང་ཡོད་ཀྱང་། དུས་ད་ལྟའང་ས་ཁང་སྒྲིག་གཞི་གཞིར་བཟུང་ཕྱག་བསྟར་གནང་ཐུབ་ཀྱི་མེད་པའི་རྣམ་པ་གསལ་པོ་མངོན་རྒྱུ་ཡོད་སྟབས། དམིགས་བསལ་ཚོགས་ཆུང་ཞིག་བསྐོ་འཛུགས་གནང་སྟེ་ས་གནས་སོ་སོའི་གནས་སྟངས་ལ་གཞིགས་ཏེ་ཞིབ་འཇུག་གིས་བསྐྱར་བཅོས་གནང་ཐུབ་ཚེ་དགེ་མཚན་སྐོར་ལམ་སྟོན་གནང་སོང། དེ་བཞིན་ཉམ་ཐག་གི་གནས་སྟངས་དང་འབྲེལ་ཏེ་ང་ཚོའི་སྲིད་བྱུས་དེ་ཉམ་ཐག་མེད་པ་བཟོ་རྒྱུ་དེ་ཡིན་སྟབས། ད་བར་གྱི་ཉམ་ཐག་གཟིགས་སྐྱོང་གནང་ཕྱོགས་དེ་འགྲིག་ཡོད་མེད་ཐོག་ཐུགས་ཞིབ་གནང་དགོས་པ་མ་ཟད་ཐེངས་འདིའི་གྲོས་ཚོགས་ཐོག་སྤྱི་འཐུས་ཁག་གཅིག་ནས་ཨོ་སི་ཊོ་ལི་ཡའི་ Sydney བོད་རིགས་སྤྱི་མཐུན་ཚོགས་པ་དང་སྐུ་ཚབ་དོན་གཅོད་ཕྱོགས་གཉིས་དབར་རྩོད་རྙོག་ཐོག་གླེང་སློང་བྱུང་བ་བཞིན་དཀའ་རྙོག་དེ་རིགས་མེད་པ་བཟོ་དགོས་པ་དང་མ་འོངས་པར་དེ་ལྟར་མི་ཡོང་བ་གནང་དགོས་པ་སོགས་ཀྱི་ལམ་སྟོན་གནང་ཡོད། གྲོས་ཚོགས་ཐོག་སྲིད་སྐྱོང་མཆོག་གིས་བོད་རྒྱ་འབྲེལ་མོལ་གྱི་གནད་དོན་དང་འབྲེལ་ནས་༸དཔལ་ལྡན་དགའ་ལྡན་ཕོ་བྲང་གི་དྲུང་ཆེ་མཚན་སྨོས་པ་བཅས་ཀྱི་ཁྲོད་སྤྱི་འཐུས་ཁག་གཅིག་ནས་དེའི་ཐོག་གླེང་སློང་རིམ་པ་བྱུང་བ་ལྟར། དེ་རིང་ཚོགས་གཙོ་མཆོག་གིས་མ་འོངས་པར་གྲོས་ཚོགས་ཚོགས་པའི་སྐབས་སུ་༸དཔལ་ལྡན་དགའ་ལྡན་ཕོ་བྲང་ཡིག་ཚང་གི་ཕྱག་ལས་གནང་ཕྱོགས་འགྲིག་དང་མ་འགྲིག་སྐོར་ལ་གླེང་སློང་གནང་རྒྱུ་མེད་པའི་འབོད་སྐུལ་བསྐྱར་ནན་གནང་ཡོད། རྩ་བའི་གྲོས་ཚོགས་ཚོགས་དུས་བརྒྱད་པ་འདིའི་ཐོག་གཙོ་བོ་བོད་མིའི་སྒྲིག་འཛུགས་ཀྱི་ལས་ཁུངས་མ་ལག་དང་བཅས་པའི་ལྷན་ཁང་ཁག་གི་ལོ་འཁོར་ལས་བསྡོམས་སྙན་སྒྲོན་དང་དེ་དག་ཐོག་བགྲོ་གླེང་གནང་ཡོད་པ་དང། དེ་བཞིན་བོད་ནང་གི་ཛ་དྲག་གནས་སྟངས་དང་འབྲེལ་བའི་དོན་ཚན་ལྔ་ཅན་གྱི་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་གཅིག གཞུང་འབྲེལ་མྱ་ངན་གུས་འདུད་ཀྱི་རྗེས་དྲན་གྲོས་ཆོས་ ༩ དེ་བཞིན་མང་གཙོ་རྩིས་ཁྲ་ཚོགས་ཆུང་བསྐོ་འཛུགས་དགོས་པའི་གྲོས་ཆོད་གྲོས་འཆར་གཅིག་བཅས་གཏན་འབེབས་གནང་ཡོད་པ་རེད། དེ་མིན་ཆེས་མཐོའི་ཁྲིམས་ཞིབ་པ་ཆེ་བ་གཅིག་དང་ཁྲིམས་ཞིབ་པ་གཞན་གཅིག དབུས་འོས་བསྡུ་ལས་ཁངས་དང་གཞུང་ཞབས་འདེམས་བསྐོ་ལྷན་ཁང་གི་ཚོགས་གཙོ་གཅིག་ལྕོགས་བཅས་གསར་འདེམས་དང་ཁྲིམས་བཟོའི་ལས་དོན་ཁག་ ༦ ཙམ་ཐོག་ཕེབས་པ་སོགས་ཡིག་ཆ་ཨང་ ༥༣ ཙམ་འགྲེམས་སྤེལ་གནང་ཡོད་པ་རེད། དེ་བཞིན་ཡོ་རོབ་སྤྱི་འཐུས་ཐུབ་བསྟན་དབང་ཆེན་ལགས་ཡོ་རོབ་རྒྱལ་ཁབ་ཁག་ཅིག་ཏུ་བོད་དོན་ལས་འགུལ་སྤེལ་བཞིན་པ་དང་འབྲེལ་ནས་གྲོས་ཚོགས་སུ་བཅར་མ་ཐུབ་པ་མ་གཏོགས་ཐེངས་འདིའི་གྲོས་ཚོགས་ཐོག་ཚོགས་གཙོ་གཞོན་པ་མཆོག་གིས་དབུས་པའི་སྤྱི་འཐུས་ཞལ་གྲངས་ ༤༢ ནས་མཉམ་ཞུགས་གནང་ཡོད་པ་རེད།  

བོད་མིའི་སྒྲིགས་འཛུགས་ཀྱི་སྲིད་སྐྱོང་དང་ཕྱི་དྲིལ་བཀའ་བློན་གཅིག་ལྕོགས་བློ་བཟང་སེང་གེ་མཆོག་གིས་དེ་རིང་གྲོས་ཚོགས་ཀྱི་ལས་ཉིན་མཐའ་མའི་ཐོག་ཕྱི་དྲིལ་ལས་ཁུངས་ཀྱི་རྩིས་ལོའི་ལས་བསྡོམས་ཐོག་བགྲོ་གླེང་གནང་སྐབས་བོད་རྒྱ་འབྲེལ་མོལ་དང་འབྲེལ་ཏེ་གནད་དོན་གཅིག་དང་བརྒྱུད་ལམ་གཅིག་ཞེས་པའི་བཀའ་ཤག་གི་ལམ་སྟོན་དུས་ད་ལྟའང་གནས་ཡོད་པ་དང། བཀའ་ཤག་ནས་མཁྱེན་རྟོགས་མེད་པར་རྒྱ་གཞུང་དང་འབྲེལ་བ་གནང་གི་ཡོད་ཚེ་དེ་བཀའ་ཤག་གི་ལམ་སྟོན་དང་ཡོངས་སུ་འགལ་བ་མ་ཟད་རྩ་དོན་ལ་གནོད་གཞི་ཞིག་ཡིན་པ་གསུངས་སོང་། དེ་རིང་གྲོས་ཚོགས་ཉིན་མཐའ་མའི་སྔ་དྲོའི་ཚོགས་དུས་ཐོག་སྤྱི་འཐུས་ཁག་གཅིག་གིས་སྤྱིར་སྲིད་སྐྱོང་མཆོག་ནས་གྲོས་ཚོགས་ཀྱི་ལས་ཉིན་དང་པོའི་ཐོག་བོད་རྒྱ་འབྲེལ་མོལ་གྱི་གནད་དོན་ཐད་༸དཔལ་ལྡན་དགའ་ལྡན་ཕོ་བྲང་ཡིག་ཚང་གི་རྒྱ་ནག་སྡེ་ཚན་ནས་ཐུགས་འགན་བཞེས་བཞིན་ཡོད་སྐོར་གསུངས་པ་དེ་ལྟར་ཡང་། སྲིད་སྐྱོང་མཆོག་ཆབ་སྲིད་ཀྱི་དབུ་ཁྲིད་ཅིག་ཡིན་པའི་ཆ་ནས་བོད་ཀྱི་དཀའ་རྙོག་སེལ་རྒྱུ་དང་སྒོས་བོད་རྒྱ་འབྲེལ་མོལ་ཐོག་ཕྱག་ལས་གང་དང་གང་གནང་ཡོད་མེད་སླར་ཡང་བཀའ་འདྲི་ཞུ་མཁན་བྱུང་སོང། སྲིད་སྐྱོང་མཆོག་གིས་བོད་རྒྱ་འབྲེལ་མོལ་ཐོག་ཟུར་ལ་བཀའ་འདྲི་གནང་མཁན་ཡོད་ན་བཀའ་ལན་གནང་རྒྱུ་ཡིན་པ་དང། གྲོས་ཚོགས་ཐོག་ཚང་མ་ཞུ་ན་ཕན་ལས་གནོད་མང་བ་ཡོང་རྒྱུ་ཡིན་སྐོར་གསུངས་ཡོད། འོན་ཀྱང་སྲིད་སྐྱོང་མཆོག་གིས་བོད་རྒྱ་འབྲེལ་མོལ་གྱི་གནད་དོན་ཐོག་འཐུས་ཤོར་རྩ་བ་ནས་བཏང་མེད་པར་ནན་ གནང་བ་དང་ཆབས་ཅིག གནད་དོན་གཅིག་དང་བརྒྱུད་ལམ་གཅིག་ཅེས་པའི་བཀའ་ཤག་གིས་དེ་སྔའི་ལམ་སྟོན་དེ་དུས་ད་ལྟའང་རང་སོར་གནས་ཡོད་པ་དང་། སྲིད་སྐྱོང་ནས་མཁྱེན་རྟོགས་མེད་པར་རྒྱ་ནག་གི་འགོ་ཁྲིད་དང་འབྲེལ་བ་གནང་ཚེ་དེ་ནི་བཀའ་ཤག་གི་ལམ་སྟོན་དང་ཁྲིམས་དང་ཡོངས་སུ་འགལ་བ་མ་ཟད། རྩ་དོན་ལ་གནོད་གཞིག་ཞིག་ཡིན་པ་གསུངས་པ་དང་འབྲེལ། རྒྱ་ནག་ཕྱོགས་ནས་དེ་ལྟ་བུའི་འབྲེལ་བ་རིགས་རང་ཉིད་ཀྱི་ཁས་ཕན་ཆེད་སྤྱོད་ཀྱི་ཡོད་པ་མངོན་གསལ་གནང་སོང། རྩ་བའི་སྲིད་སྐྱོང་བློ་བཟང་སེང་གེ་མཆོག་གིས་སྐབས་ ༡༦ པའི་གྲོས་ཚོགས་ཚོགས་དུས་བརྒྱད་པའི་ཉིན་དང་པོའི་ཐོག་བོད་རྒྱ་འབྲེལ་མོལ་དང་འབྲེལ་སྤྱི་འཐུས་ཁག་གཅིག་གི་དྲི་བར་བཀའ་ལན་གནང་བར་༸དཔལ་ལྡན་དགའ་ལྡན་ཕོ་བྲང་ཡིག་ཚང་གི་རྒྱ་ནག་སྡེ་ཚན་ནས་ཐུགས་འགན་བཞེས་ཀྱི་ཡོད་པ་དང་། ད་བར་བོད་རྒྱ་འབྲེལ་མོལ་གྱི་སྐུ་ཚབ་ཆེད་བཙུགས་གནང་མེད་པ་དེ་༸གོང་ས་མཆོག་གིས་བཀའ་དགོངས་བཞིན་བསྐོ་གཞག་གནང་མེད་པ་འགྲེལ་བརྗོད་གནང་རྗེས་གྲོས་ཚོགས་སུ་སྤྱི་འཐུས་ཁག་གཅིག་ནས་བོད་རྒྱ་འབྲེལ་མོལ་སྐོར་ལ་སྲིད་སྐྱོང་མཆོག་ནས་ལན་འདེབས་གསལ་བཤད་གནང་སྐབས་ཕྱི་ནང་གསང་གསུམ་དགོས་གལ་ཆེ་བར་གསུངས་པ་ལས་འཕྲོས་ཏེ་ཚོགས་གཙོ་མཆོག་གིས་བཀའ་ཤག་དང་སྤྱི་འཐུས་རྣམ་པས་༸དཔལ་ལྡན་དགའ་ལྡན་ཕོ་བྲང་ནས་བཀའ་འཁྲོལ་མེད་པར་མ་འོངས་པར་གྲོས་ཚོགས་ནང་༸དཔལ་ལྡན་དགའ་ལྡན་ཕོ་བྲང་ཐོག་གླེང་སློང་མི་གནང་བའི་འབོད་སྐུལ་ཞུས་ཡོད་པ་རེད། དེ་རིང་གྲོས་ཚོགས་ཀྱི་ཚོགས་དུས་བརྒྱད་པའི་ལས་ཉིན་དགུ་པའི་སྔ་དྲོ་ཚོགས་ཐེངས་ཐོག་ཕྱི་དྲིལ་ལས་ཁུངས་ཀྱི་ལས་བསྡོམས་ཐོག་སྤྱི་ཡོངས་བགྲོ་གླེང་དང་དྲི་བ་དྲིས་ལན་བཅས་གནང་རྗེས་བོད་མིའི་སྒྲིག་འཛུགས་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་གིས་འཕྲོད་བསྟེན་ལས་ཁུངས་ཀྱི་ལོ་འཁོར་ལས་བསྡོམས་གྲོས་ཚོགས་སུ་སྙན་སྒྲོན་ཞུས་ཡོད་པ་མ་ཟད། སྐབས་དེར་སྤྱི་འཐུས་མང་དག་ཅིག་གིས་འཕྲོད་བསྟེན་ལས་ཁུངས་ཀྱི་ལས་བསྡོམས་དང་འབྲེལ་ཏེ་འབྲེལ་ཡོད་བཀའ་བློན་མཆོག་གིས་དབུས་པའི་ཕྱག་སྦྲེལ་ལས་བྱེད་ཡོངས་ལ་བསྔགས་བརྗོད་ཞུས་པ་དང་སློབ་གྲྭ་ཁག་ནང་ཟས་བཅུད་བསྟེན་ཕྱོགས་དང་བཙན་བྱོལ་བོད་མིའི་སྨན་བཅོས་ལྟ་སྐྱོང་ལས་གཞི། དེ་བཞིན་ས་གནས་ཁག་གི་འཕྲོད་བསྟེན་སྨན་ཁང་ཚད་ལྡན་ཡོང་སླད་དང་མཆིན་ནད་དུག་ཐབས་སྔོན་འགོག་ལས་གཞི། བོད་ཀྱི་གསོ་རིག་ཁྱབ་སྤེལ་དང་ས་གནས་ཁག་གི་འཐུང་ཆུའི་དཀའ་ངལ་སོགས་ཀྱི་ལས་འཆར་འདྲ་མིན་ཐོག་དོགས་འདྲི་ ༡༥ ཕེབས་ཡོད་པ་རེད། རྩ་བའི་གྲོས་ཚོགས་ཀྱི་ལས་ཉིན་མཐའ་མའི་ཐོག་བོད་མིའི་སྒྲིག་འཛུགས་ལྷན་ཁང་ཁག་གི་ལས་བསྡོམས་སྙན་སྒྲོན་དང་དེར་སྤྱི་ཡོངས་བགྲོ་གླེང་བཅས་གནང་རྗེས་གྲོས་ཚོགས་སུ་བཀའ་ཤག་གི་གསལ་བཤད་དང་ལན་འདེབས་ཀྱི་ལས་རིམ་ཞིག་གནང་སྲོལ་ཡོད་ཀྱང་དེ་རིང་འཕྲོད་བསྟེན་ལས་ཁུངས་ཀྱི་ལས་རིམ་གྲུབ་རྗེས་བཀའ་ཤག་གི་གསལ་བཤད་ལས་རིམ་དེ་གནང་མེད་པ་དང་། བོད་མི་མང་སྤྱི་འཐུས་ཚོགས་གཙོ་མཆོག་གིས་མཇུག་བསྡོམས་གསུང་བཤད་གནང་སྟེ་སྐབས་ ༡༦ པའི་གྲོས་ཚོགས་ཀྱི་ཚོགས་དུས་བརྒྱད་པ་དེ་མཇུག་སྒྲིལ་གནང་ཡོད་པ་རེད།

དེ་རིང་གྲོས་ཚོགས་ཀྱི་ལས་ཉིན་བརྒྱད་པའི་ཐོག་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་ལས་བསྡོམས་ཐོག་ཉིན་འཁྱོངས་བགྲོ་གླེང་དང་དྲི་བ་དྲིས་ལན་བཅས་གནང་བའི་ཁྲོད། བོད་ཀྱི་སྐུ་ཚབ་དོན་གཅོད་ཁང་ཁག་གི་གནས་བབ་དང་། རྒྱ་རིགས་འབྲེལ་མཐུད་པའི་ལས་དོན། རྒྱ་གར་མི་སེར་བཞེས་པའི་གནད་དོན། དེ་བཞིན་འགྲེམས་སྟོན་ཚན་པའི་ལས་གཞི་དང་དབུ་མའི་ལམ་གྱི་གོ་རྟོགས་ལས་གཞི་སོགས་ཀྱི་གནད་དོན་མང་དག་ཅིག་གི་ཐོག་ལ་འདྲི་རྩད་ལྷུག་པོ་གནང་སོང་། སྐབས་དེར་སྤྱི་འཐུས་ཁག་གཅིག་ནས་ད་ལྟའི་འཛིན་སྐྱོང་བཀའ་ཤག་གི་ལས་དོན་གནང་ཕྱོགས་སྐོར་ལས་འཕྲོས་ཏེ་ Australia  Sydney གྲོང་ཁྱེར་ནང་བོད་མི་རྣམས་ཤོག་ཁག་གཉིས་སུ་ཁ་གྱེས་ཡོད་པའི་གནད་དོན་དང་འབྲེལ། སྲིད་སྐྱོང་མཆོག་ནས་བཀའ་ཤག་གི་ལས་ཡུན་ལྷག་པའི་རིང་བོད་རྒྱ་ཆེ་མང་ཚོགས་རྣམས་མཐུན་ལམ་རྡོག་རྩ་གཅིག་དྲིལ་ཐོག་ནུས་པ་མཉམ་སྤུངས་དང་ཕྱོགས་གཅིག་ཏུ་ཁྲིད་ཐབས་སླད་འབད་བརྩོན་གནང་དགོ་ས་པའི་རེ་སྐུལ་ཞུས་སོང་། དེར་ཕྱི་དྲིལ་བཀའ་བློན་གཅིག་ལྕོགས་སྲིད་སྐྱོང་མཆོག་གིས་གཞི་རྩའི་ Sydney ནང་གི་གནད་དོན་དེ་དུས་ཡུན་གང་ཙམ་ཞིག་ནས་བྱུང་ཡོད་པ་དང་དཀའ་ངལ་སེལ་ཐབས་སླད་སྲིད་སྐྱོང་མཆོག་ཡུལ་དེར་གཞུང་འབྲེལ་འཚམས་གཟིགས་སུ་བསྐྱོད་སྐབས་ངོ་རྒོལ་གནང་མཁན་རྣམས་དང་འབྲེལ་བ་བྱ་རྒྱུའི་འདུན་པ་བསྟན་ཡོད་ཀྱང་ཁོང་རྣམས་ནས་འབྲེལ་བ་ཞུས་མེད་པ་འགྲེལ་བརྗོད་དང་སྦྲགས། སྲིད་སྐྱོང་མཆོག་ནས་ཆོལ་ཁའི་ཕྱོགས་ཞེན་ལ་མཐའ་ཅིག་ཏུ་མོས་མཐུན་མེད་པ་མ་ཟད། དེ་སྔ་སྲིད་སྐྱོང་གི་འོས་མིར་བཞེངས་པའི་སྐབས་སུའང་དེ་དག་ནས་རྒྱབ་སྐྱོར་ཞུ་ཐབས་གནང་མེད་པ་ལྟར་ད་ཆ་ཡིན་ཡང་དེ་ལྟར་གནང་གི་མེད་པའི་གསལ་བཤད་གནང་ཡོད། གནད་དོན་དེའི་ཐོག་སྤྱི་འཐུས་གཞན་ཞིག་ནས་ Australia འི་གནད་དོན་དེ་གྲོས་ཚོགས་སུ་གླེང་མོལ་གནང་ནས་སེལ་ཐུབ་ཐབས་མེད་པ་དང་དེའི་ཆེད་བཀའ་སྤྱི་གཉིས་ལས་གྲུབ་པའི་དམིགས་བསལ་ཚོགས་ཆུང་ཞིག་ཆེད་འཛུགས་ཀྱིས་བགྲོ་གླེང་དགོས་གལ་ཡིན་པའི་དགོངས་འཆར་ཕུལ་མཁན་ཡང་བྱུང་སོང་། བགྲོ་གླེང་སྐབས་ཆ་ཤས་བཞེས་མཁན་སྤྱི་འཐུས་ཁག་གཅིག་ནས་རྒྱ་རིགས་འབྲེལ་མཐུད་པའི་ཚོགས་འདུ་སྐོར་དང་འབྲེལ། དེའི་ནང་བཅར་མཁན་གཙོ་བོ་སུ་ཆགས་ཀྱི་ཡོད་མེད་དང་ཚོགས་བཅར་བ་རྣམས་ཕྱིར་རང་ཡུལ་དུ་ཕེབས་རྗེས་དོན་དངོས་བོད་དོན་ལ་ཕན་པའི་ཕྱག་ལས་ཇི་ཙམ་གནང་གི་ཡོད་མེད་དང་དེ་དག་ལྷན་འབྲེལ་ལམ་རྒྱུན་འཛིན་གནང་ཕྱོགས་བཅས་ཀྱི་སྐོར་བཀའ་འདྲི་ཞུས་སོང་བ་དང་། སྐབས་དེར་བཀའ་བློན་མཆོག་གིས་རྒྱ་རིགས་འབྲེལ་མཐུད་པའི་ཚོགས་འདུའི་ནང་ཕལ་ཆེ་བ་རྒྱ་རིགས་འབྲེལ་མཐུད་པ་དམིགས་བསལ་བཙུགས་པའི་རྒྱ་ཡིག་ཤེས་མཁན་གྱི་བོད་རིགས་མཐོ་རིམ་སློབ་མ་དང་སྤྱི་ཚོགས་ལས་འགུལ་བ་སོགས་ལྷན་འཛོམས་གནང་གི་ཡོད་པ་དང་། ཁོང་རྣམས་ནས་ཕྱིར་རང་ཡུལ་དུ་ཕེབས་ནས་སོ་སོའི་ས་གནས་ཀྱི་རྒྱ་རིགས་སློབ་ཕྲུག་གཙོས་པའི་མང་ཚོགས་ཁྲོད་ལ་བོད་དོན་ངོ་སྤྲོད་ལས་རིམ་གང་ཙམ་སྤེལ་གྱི་ཡོད་པ་གསུངས་སོང་བ་དང་ཆབས་ཅིག མ་འོངས་རྒྱ་རིགས་འབྲེལ་མཐུད་པའི་ཚོགས་འདུ་ཐེངས་བདུན་པ་དེ་ཕྱི་ཟླ་ ༧ ནང་འཚོགས་གཏེནཁེལ་ཡོད་པ་གསུངས་སོང་།  རྩ་བའི་ཐེངས་འདིའི་གྲོས་ཚོགས་ཀྱི་ལས་ཉིན་དང་པོའི་ཐོག་བོད་ནང་གི་ཛ་དྲག་གནས་སྟངས་སྐོར་དང་འབྲེལ་གྲོས་ཚོགས་འཐུས་མི་ཁག་གཅིག་གིས་བོད་རྒྱ་འབྲེལ་མོལ་གྱི་གནས་བབ་སྐོར་ལ་དྲི་བ་མང་དག་ཅིག་ཕེབས་པ་ལྟར།་ སྲིད་སྐྱོང་མཆོག་གིས་དེ་དག་ལ་བཀའ་ལན་གནང་སྐབས་ད་བར་བོད་རྒྱ་འབྲེལ་མོལ་གྱི་སྐུ་ཚབ་བསྐོ་བཞག་གནང་མེད་པ་དེ་༸གོང་ས་མཆོག་གི་བཀའ་དགོངས་གཞིར་བཟུང་བསྐོ་གཞག་གནང་མེད་པའི་ཁར། ༸དཔལ་ལྡན་དགའ་ལྡན་ཕོ་བྲང་གི་དྲུང་ཆེ་རྔ་བ་ཚེ་རྒྱམ་ལགས་ཀྱི་མཚན་འདོན་གནང་སྟེ་བོད་རྒྱ་འབྲེལ་མོལ་གྱི་ལས་དོན་ཐོག་དགའ་ལྡན་ཕོ་བྲང་གིས་ཐུསག་འགན་བཞེས་ཀྱི་ཡོད་སྐོར་གསུངས་ཡོད། ཕྱི་དྲིལ་ལས་ཁུངས་ཀྱི་ལས་བསྡོམས་ཐོག་བགྲོ་གླེང་གནང་བའི་ཁྲོད་སྤྱི་འཐུས་ཤིག་ནས་སྲིད་སྐྱོང་མཆོག་གིས་གྲོས་ཚོགས་རྭ་བའི་ནང་༸དཔལ་ལྡན་དགའ་ལྡན་ཕོ་བྲང་ཡིག་ཚང་གི་དྲུང་ཆེ་གཅིག་གི་མཚན་གསལ་འདོན་གནང་བའི་གནད་དོན་དེ་ལུང་འདྲེན་དང་སྦྲགས། ཆབ་སྲིད་ཀྱི་དབུ་ཁྲིད་ཞིག་ནས་བོད་རྒྱ་ཞི་མོལ་དང་འབྲེལ་བའི་བཀའ་མོལ་གནང་སྐབས་ཕྱི་ནང་གསང་གསུམ་ཡོད་པའི་ཐོག་ནས་གནང་རོགས་ཞེས་དགོངས་འཆར་ཕུལ་མཁན་ཡང་བྱུང་སོང་། གཞན་ཡང་གྲོས་ཚོགས་སུ་སྲིད་སྐྱོང་མཆོག་ནས་རྒྱ་གར་གྱི་མི་སེར་བཞེས་པའི་བོད་མི་ཚོ་དང་། ཕྱིའི་རྒྱལ་ཁག་ལ་བཞུགས་པའི་བོད་མི་ཚོས་རྒྱ་གར་གྱི་འོས་བསྡུ་དང་ཆབ་སྲིད་ལས་དོན་སོགས་ཀྱི་ནང་མངོན་གསལ་དོད་པོས་ཆ་ཤས་བཞེས་པ་དང་། སྤྱི་ཚོགས་དྲྭ་ལམ་ཐོག་མཆན་འགྲེལ་བཀོད་སོགས་གནང་ཚེ་ཆེ་ས་ནས་བོད་ཀྱི་རྩ་དོན་དང་། རྒྱ་གར་ནང་བཞུགས་པའི་བོད་མི་ཚོར་གནོད་སྐྱོན་ཐེབས་སྲིད་སྟབས་དེ་རིགས་ལ་དགོངས་པ་ངེས་པར་དུ་བཞེས་དགོས་པའི་སྐུལ་མ་གནང་ཡོད། བགྲོ་གླེང་གི་ལས་རིམ་ཐོག་བོད་མི་མང་སྤྱི་འཐུས་ཁག་གཅིག་ནས་དེ་སྔ་གྲོས་ཚོགས་སུ་ཕྱི་དྲིལ་བཀའ་བློན་མཆོག་ནས་རྒྱ་གར་ནང་བཞུགས་པའི་བོད་མི་ཚོར་Travel Document ཐོབ་ཐབས་གནང་རྒྱུ་ཡིན་སྐོར་གསུངས་པ་དེ་ད་ཆ་གནས་སྟངས་ཇི་ཆགས་དང་འབྲེལ་བཀའ་འདྲི་ཞུས་པར་ Travel Documet ཞེས་པ་དེ་རྒྱ་གར་ནང་ཁྲིམས་མཐུན་ཡིག་ཆ་ཞིག་མིན་སྟབས་དེ་སྔ་ཡོད་བཞིན་པའི་ IC ལག་དེབ་སེར་པོར་ཡར་རྒྱས་གང་འཚམ་བཏང་ཡོད་པ་གསུངས་སོང་། གཞི་རྩའི་དེ་རིང་གྲོས་ཚོགས་ལས་རིམ་དེའི་ཐོག་ཕྱི་དྲིལ་བཀའ་བློན་བློ་བཟང་སེང་གེ་མཆོག་གིས་འདས་ལོའི་ནང་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ནས་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་ཡང་སྲིད་ངོས་འཛིན་ཞུ་རྒྱུའི་ཐད་བསྩལ་བའི་གལ་ཆེའི་བཀའ་ཡིག་བོད་རྒྱ་དབྱིན་གསུམ་ཐོག་དེབ་གྲངས་ ༡༠༠༠ པར་བསྐྲུན་ཞུས་པ་དང་། མཉམ་འབྲེལ་རྒྱལ་ཚོགས་དང་ཡོ་རོབ་མཐུན་ཚོགས། དེ་བཞིན་Canada དང་། Australia སོགས་རྒྱལ་སྤྱིའི་རྒྱལ་ཁབ་ཁག་གི་འགྲོ་བ་མིའི་ཐོབ་ཐང་ཚན་པ་སོགས་སུ་བོད་དོན་གསུང་བཤད་དང་བོད་དོན་དང་འབྲེལ་བའི་ཡིག་ཆ་འགྲེམས་སྤེལ་ཞུས་པ། དབུ་མའི་ལམ་གྱི་ཟབ་སྦྱོང་ཐེངས་༡༠ དང་། རྒྱ་རིགས་དང་འབྲེལ་བའི་ལས་དོན་ཚོགས་འདུ་ཚོགས་པ། ཕྱི་དྲིལ་ཁྱབ་ཁོངས་བོད་ཀྱི་སྐུ་ཚབ་དོན་གཅོད་ལས་ཁུངས་ཁག་གི་ལས་བསྡོམས་སོགས་སྙན་སྒྲོན་གནང་ཡོད་པ་རེད། དེ་རིང་ཉིན་རྒྱབ་ཚོུད་ ༣ བར་སྤྱི་འཐུས་རྣམས་ནས་ཕྱི་དྲིལ་ལས་ཁུངས་ཀྱི་ལོ་བསྡོམས་ཐོག་བགྲོ་གླེང་དང་དྲི་བ་དྲིས་ལན་གནང་རྗེས་སྤྱི་འཐུས་རྣམ་པ་བཞུགས་མོལ་ཚོགས་འདུ་ཐོག་ཕེབས་ཡོད་སྟབས། ཕྱི་དྲིལ་ལས་ཁུངས་ཀྱི་ལས་བསྡོམས་ཐོག་གི་བགྲོ་གླེང་རེ་ཞིག་མཚམས་བཞག་གིས་རེས་གཟའ་ཟླ་བའི་ཉིན་མུ་མཐུད་བགྲོ་གླེང་མཇུག་སྐྱོང་གནང་རྒྱུ་རེད་འདུག

སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༨ ལས་ཉིན་ ༤ པའི་ཕྱི་དྲོ་ནས་དབུ་འཛུགས་ཏེ་དེ་རིང་ལས་ཉིན་ ༧ པའི་སྔ་དྲོའི་ཚོགས་དུས་དང་པོ་བར་ཤེས་རིག་ལས་ཁུངས་ཀྱི་ཕྱི་ལོ་ ༢༠༡༨ ལོའི་ཕྱི་ཟླ་ ༣ ཚེས་ ༣༡ ནས་ཕྱི་ལོ་ ༢༠༡༩ ལོའི་ཕྱི་ཟླ་ ༤ ཚེས་༡ བར་གྱི་ལོ་འཁོར་ལས་བསྡོམས་དང་སྤྱི་འཐུས་རྒྱུན་ལས་ཀྱི་ཤེས་རིག་གི་ལས་བསྡོམས་རྒྱས་པའི་ཐོག་རྟོག་ཞིབ་གནང་བའི་སྙན་ཐོར་བགྲོ་གླེང་གི་ལས་རིམ་ཐོག་ཕེབས་སྐབས་སྤྱི་འཐུས་མང་དག་ཅིག་ནས་མཉམ་ཞུགས་ཀྱིས་བགྲོ་གླེང་ལྷུག་པོ་གནང་སོང་། སྐབས་དེར་སྤྱི་འཐུས་མང་དག་ཅིག་ནས་དེང་སྐབས་སཾ་བྷོ་ཊ་སློབ་གྲྭ་ཁག་གཙོ་གྱུར་བོད་སློབ་ཁག་ཏུ་དགེ་རྒན་གྱི་གསོལ་ཕོགས་ཉུང་ཉུང་ཡོད་པ་དང་། སློབ་གྲྭ་མང་ཆེ་བའི་ནང་དགེ་རྒན་མང་དག་ཅིག་གཏན་འཇགས་ལས་བྱེད་མ་ཡིན་པར་ཆོད་གན་གྱི་གནས་བབ་ཐོག་བཞག་པར་ཐུགས་འཚབ་ཀྱིས་བཀའ་འདྲི་དང་ཤེས་རིག་ལས་ཁུངས་ནས་དོན་དམ་གྱི་ཕྱག་ལས་གནང་གནད་ཡིན་པའི་ཞུ་སྐུལ་གནང་ཡོད། ཤེས་རིག་ལས་བསྡོམས་ནང་ལོ་འདིའི་ནང་ཕྱི་རྒྱལ་རོགས་ཚོགས་དང་བོད་རིགས་སྦྱིན་བདག་ཁག་ ༢༥ ནས་སློབ་ཕྲུག་གྲངས་ ༡༨༥༢ ལ་སློབ་ཡོན་དང་སློབ་དོད་རོགས་དངུལ་གནང་སོན་བྱུང་ཡོད་པ་དང་། ཉམ་ཐག་ཨང་ག་པ་ཅན་དང་གཞན་དབུལ་ཕོངས་ཕྲུ་གུའི་སློབ་ཡོན་རོགས་སྐྱོར་འོག་ཤེས་རིག་ལས་ཁུངས་ནས་ཁྱོན་བསྡོམས་སློབ་ཕྲུག་ ༢༦༥ ལ་བཀའ་ཤག་གི་ཉམ་ཐག་ལྟ་སྐྱོང་རྩ་འཛིན་ལམ་སྟོན་ལྟར་གཟིགས་རྟོག་གནང་མུས་ཡིན་པ་འཁོད་ཡོད་པ་བཞིན་ཕྱི་འཐུས་ཁག་གཅིག་ནས་མཐོ་སློབ་ཁག་ཏུ་སྐྱོད་བཞིན་པའི་སློབ་ཕྲུག་ཁྲོད་ཕ་མ་སྤུན་མཆེད་མེད་པའི་ཕྲུ་གུ་ཞིག་ཡོད་པ་དང་དེར་དཀའ་ངལ་ཆེན་པོ་འཕྲིན་བཞིན་ཡོད་སྐོར་དང་འབྲེལ། ད་ལྟ་ཤེས་རིག་ལས་ཁུངས་ནས་སློབ་ཡོན་འབུལ་ཕྱོགས་ཀྱི་བརྒྱུད་རིམ་ལ་བསྐྱར་ཞིབ་གནང་བཞིན་ཡོད་པ་དང་འབྲེལ་ཏེ་གནད་དོན་དེ་དག་ཐོག་ཐུགས་ཞིབ་གནང་དགོས་གལ་ཡིན་པའི་དགོངས་འཆར་ཕེབས་ཡོད། དེ་བཞིན་དེང་སྐབས་བོད་པའི་སློབ་གྲྭ་ཁག་གི་ནང་སློབ་ཕྲུག་ཁག་གཅིག་མྱོས་རྫས་ངན་གོམས་ལ་ལངས་ཤོར་བའི་དཀའ་ངལ་འཕྲད་པ་ཤེས་རིག་ལས་བསྡོམས་ནང་འདས་པའི་ལོ་འཁོར་ནང་བོད་པའི་སློབ་ཁག་ནང་སློབ་ཕྲུག་བུ་གྲངས་ ༤༧ བྱུང་ཡོད་སྐོར་འཁོད་པ་དང་འབྲེལ། སྤྱི་འཐུས་མང་དག་ཅིག་ནས་མྱོས་རྫས་ངན་གོམས་ཙམ་མིན་པར་ལག་ཐོགས་ཁ་པར་སོགས་ཀྱི་ཐོག་རྩེད་མོ་རྩེ་རྒྱུ་འམ་ Game Addiction དཀའ་ངལ་ཞིག་ཀྱང་འཕྲད་བཞིན་ཡོད་པ་བཅས་འགོག་ཐབས་ཀྱི་ལས་གཞི་སྤེལ་དགོས་པའི་དགོངས་ཚུལ་ཤུགས་ཆེ་གསུང་མཁན་བྱུང་སོང་། དེ་བཞིན་བོད་པའི་སྤྱི་ཚོགས་ནང་དང་སློབ་གྲྭ་ཁག་ཏུ་བཙན་གཡེམ་དང་འཁྲིག་སྤྱོད་ཀྱི་གནད་དོན་རིགས་བྱུང་བར་འཛིན་སྐྱོང་བཀའ་ཤག་ནས་ Zero Tolerance ཞེས་བཟོད་སྒོམ་རྩ་བ་ནས་མེད་པའི་སྲིད་བྱུས་འཛིན་བཞིན་པ་ལྟར་འདས་ལོའི་ནང་དུའང་སོ་ལན་བོན་གཞིར་དུ་དེ་འབྲེལ་ཚུལ་མིན་གནད་དོན་ཁག་གཅིག་བྱུང་ཡོད་པར་འཛིན་སྐྱོང་བཀའ་ཤག་ནས་ཕྱག་བསྟར་གང་གནང་ཡོད་མེད་བཅས་ཀྱི་ཐོག་བཀའ་འདྲི་དང་བགྲོ་གླེང་གནང་བར་བཀའ་བློན་མཆོག་གིས་གནད་དོན་ཇེ་དྲག་ལ་ངོས་བཞེས་ཀྱིས་དོ་བདག་ལ་ཉེན་བརྡ་ནན་པོ་བཏང་སྟེ་ཕྱག་བསྟར་གནང་ཟིན་སྐོར་གསུངས་སོང་། དེ་བཞིན་འདི་ལོ་རྒྱ་གར་རྒྱལ་ས་ལྡི་ལིའི་ནང་གི་མཐོ་སློབ་གྲགས་ཅན་ JNU ནས་སློབ་ཡོན་བརྒྱ་ཆ་ ༡༠༠ ཐམ་པ་སྤར་བའི་འོག་སློབ་ཕྲུག་མང་དག་ཅིག་འཛུལ་ཞུགས་གནང་མ་ཐུབ་པའི་དཀའ་ངལ་འཕྲད་པ་དང་དཀའ་ངལ་དེ་རིགས་མ་འོངས་པར་ལྡི་ལིའི་མཐོ་སློབ་ཁག་གཞན་ནང་འཕྲད་སྲིད་སྐོར་དང་འབྲེལ་གླེང་སློང་ཡང་ཤུགས་ཆེན་པོ་བྱུང་སོང་། འདི་ལོའི་ཕྱི་ཟླ་ ༨ པའི་ནང་ཚོགས་པའི་གཞོན་སྐྱེས་ལྔ་དང་ལྔ་བཅུའི་ཚོགས་འདུའི་ཐོག་ཚོགས་བཅར་བ་ཁག་གཅིག་གིས་བོད་སྐད་འཐུས་ཤིག་བསྐྱོན་མ་ཐུབ་པས་སྤྱི་ཚོགས་ཁྲོད་དུ་ལབ་གླེང་ཤུགས་ཆེ་བྱུང་ཡོད་སྟབས་ད་རེས་གྲོས་ཚོགས་ནང་ཤེས་རིག་ལས་ཁུངས་ཀྱི་ལས་བསྡོམས་ཐོག་བགྲོ་གླེང་དང་དགོངས་འཆར་ཕུལ་མཁན་ཁག་གཅིག་བྱུང་ཡོད། རྩ་བའི་ཤེས་རིག་ལས་ཁུངས་ཀྱིས་གྲོས་ཚོགས་སུ་ཕུལ་བའི་ལོ་འཁོར་ལས་བསྡོམས་ནང་འདི་ལོའི་འཛིན་རིམ་ ༡༠ པ་དང་ ༡༢ ཀྱི་གྲུབ་འབྲས་སྐོར་དང་འབྲེལ། འདི་ལོ་རྒྱ་གར་རྒྱལ་ཡོངས་ཡིག་རྒྱུགས་ཆེན་མོའི་ཁོངས་འཛིན་རིམ་ ༡༢ ཡོད་པའི་སློབ་གྲྭ་ཁག་ ༡༦ གི་སློབ་ཕྲུག་གྲངས་ ༡༡༤༧ ནས་ཡིག་རྒྱུགས་ནང་དངོས་སུ་ཞུགས་ཏེ་རྒྱུགས་འཕྲོད་པའི་སློབ་ཕྲུག་གྲངས་ ༡༠༩༣ བྱུང་བས་སྤྱི་ཡོངས་ཀྱི་རྒྱུགས་འཕྲོད་བརྒྱ་ཆ་ ༩༧་༠༧ སོན་ཡོད་པ་དང། འཛིན་རིམ་བཅུ་པ་ཡོད་པའི་སློབ་གྲྭ་ཁག་ ༢༦ གི་སློབ་ཕྲུག་གྲངས་ ༡༢༦༡ ནས་ཡིག་རྒྱུགས་ནང་དངོས་སུ་ཞུགས་ཏེ་རྒྱུགས་འཕྲོད་པའི་སློབ་ཕྲུག་གྲངས་ ༡༡༣༡ བྱུང་བས་སྤྱི་ཡོངས་རྒྱུགས་འཕྲོད་ཀྱི་བརྒྱ་ཆ་ ༩༢་༣༣ སོན་ཡོད་པ་རེད།

དེ་རིང་སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༨ པའི་ལས་ཉིན་ ༧ པའི་ཚོགས་དུས་འགྲོ་མུས་ཐོག་ཉིན་དགུང་ཆུ་ཚོད་ ༡༢ ཐོག་བོད་མི་མང་སྤྱི་འཐུས་གསེར་རྟ་ཚུལ་ཁྲིམས་ལགས་ཀྱིས་གྲོས་ཚོགས་ཀྱི་སྟོང་པའི་དུས་ཚོད་གོ་སྐབས་བཞེས་ཏེ་དེ་སྔ་ཕྱི་ཟླ་གསུམ་པའི་གྲོས་ཚོགས་སྐབས་སུ་བདམས་ཐོན་གསལ་བསྒྲགས་གནང་བའི་བཀའ་བློན་སྟོབས་རྒྱལ་ཚེ་རིང་ལགས་ཆེས་མཐོའི་ཁྲིམས་ཞིབ་ཁང་ནས་བཀའ་བློན་དུ་ངོས་བཞེས་མ་གནང་སྟབས་བཀའ་བློན་གྱི་དམ་བཅའ་ཕུལ་ས་བྱུང་མེད་པའི་གནས་སྟངས་སྐོར་གླེང་སོང་། སྤྱི་འཐུས་གསེར་རྟ་ཚུལ་ཁྲིམས་ལགས་ཀྱིས་འདི་ལོའི་ཕྱི་ཟླ་གསུམ་པའི་ནང་ཚོགས་པའི་སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་དུས་བདུན་པའི་ཐོག་སྲིད་སྐྱོང་བློ་བཟང་སེང་མཆོག་གིས་མཚན་འདོན་གནང་བའི་བཀའ་བློན་གྱི་འོས་མི་བཀའ་དྲུང་ལས་ཐོག་སྟོབས་རྒྱལ་ཚེ་རིང་ལགས་གྲོས་ཚོགས་ནས་བཅའ་ཁྲིམས་ཀྱི་དགོངས་དོན་ཇི་བཞིན་བཀའ་བློན་དུ་བདམས་ཐོན་བྱུང་བར་གསལ་བསྒྲགས་གནང་ཡོད་ཀྱང་། རྗེས་སུ་ཆེས་མཐོའི་ཁྲིམས་ཞིབ་ཁང་ནས་དེར་ངོས་བཞེས་མ་གནང་བའི་གནས་སྟངས་བྱུང་ཡོད་པ་སོགས་སྐབས་དེའི་བཀའ་བློན་འོས་འདེབས་ཀྱི་བྱུང་བ་ཁག་འགྲེལ་བརྗོད་དང་སྦྲགས། སྐབས་དེར་ཆེས་མཐོའི་ཁྲིམས་ཞིབ་ཁང་གི་ཐག་གཅོད་དེར་གྲོས་ཚོགས་ནས་ངོས་བཞེས་གང་འདྲ་ཞིག་གནང་དགོས་མིན་དང་ལྷག་པར་དུ་སྐབས་དེའི་ཆེས་མཐོའི་ཁྲིམས་ཞིབ་ཁང་གི་ཐག་གཅོད་དེ་བཙན་བྱོལ་བོད་མིའི་བཅའ་ཁྲིམས་དང་མཐུན་པ་ཞིག་ཡིན་ཚེ་སྐབས་དེར་བོད་མི་མང་སྤྱི་འཐུས་ལྷན་ཚོགས་ནས་ཐག་གཅོད་གནང་སྟངས་དེ་བཙན་བྱོལ་བོད་མིའི་བཅའ་ཁྲིམས་དང་འགལ་བ་ཞིག་ཏུ་ངོས་འཛིན་མ་ཞུ་ཐབས་མེད་ཡིན་པ་དང་། ཡང་ན་སྐབས་དེར་གྲོས་ཚོགས་ནས་ཐག་གཅོད་གནང་བ་དེ་འགྲིག་ཡོད་ཚེ་ཆེས་མཐོའི་ཁྲིམས་ཞིབ་ཁང་གི་ཐག་གཅོད་དེ་བཙན་བྱོལ་བོད་མིའི་བཅའ་ཁྲིམས་དང་འགལ་བ་ཞིག་ཡིན་པ་ལས་དེའི་བར་ན་གཉིས་ཀ་ཡིན་པའི་ལམ་དེ་འདྲ་ཡོད་མ་རེད་ཅེས་གསུངས་སོང་། སྤྱི་འཐུས་གསེར་རྟ་ཚུལ་ཁྲིམས་ལགས་ཀྱིས་ད་དུང་གནད་དོན་དེ་དང་འབྲེལ་ཏེ་བོད་མི་མང་སྤྱི་འཐུས་ལྷན་ཚོགས་ནས་གཏན་འབེབས་ཟིན་པའི་གནད་དོན་ཞིག་ལ་བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་ཚོས་ཕན་ཚུན་འཇིགས་སྙོམས་སྟངས་འཛིན་གྱི་ཐོག་ནས་ཐག་གཅོད་གནང་སྟངས་ཁྲིམས་ཐོག་ལ་གང་དང་གང་འཁོད་ཡོད་མེད་གསལ་པོ་ཞིག་མ་ཆགས་ཚེ་མ་འོངས་པར་དེ་མཚུངས་ཀྱི་དཀའ་ངལ་མང་དག་ཅིག་འཕྲད་ངེས་ཡིན་པ་སོགས་གསུངས་ཡོད། སྐབས་དེར་བོད་བོད་མི་མང་སྤྱི་འཐུས་ཚོགས་གཙོ་པདྨ་འབྱུང་གནས་མཆོག་གིས་གནད་དོན་དེའི་ཐོག་མང་ཚོགས་དང་བརྒྱུད་ལམ་ཁག་གི་དྲྭ་བར་ཕེབས་སྐབས་བཙན་བྱོལ་བོད་མིའི་བཅའ་ཁྲིམས་དང་། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་འདུའི་འགྲོ་ལུགས་དང་ལས་དོན་བྱེད་ཕྱོགས་ཀྱི་སྒྲིག་གཞི་དགོངས་དོན་ལྟར་སྲིད་སྐྱོང་མཆོག་གིས་བཀའ་བློན་དུ་མཚན་འདོན་གནང་ཐོག་སྤྱི་འཐུས་རྣམ་པས་འོས་འཕངས་ཏེ་མཐར་ཚོགས་གཙོ་མཆོག་གིས་བཀའ་བློན་དུ་བདམས་ཐོན་བྱུང་བར་གསལ་བསྒྲགས་གནང་བ་བཞིན་ད་ལྟའང་སྐབས་དེར་གྲོས་ཚོགས་ཀྱི་གནང་བ་དེ་འགྲིག་པ་ཞིག་ལ་ངོས་འཛིན་ཞུ་བཞིན་ཡོད་ཅེས་གསུངས་པ་དང་ཆབས་ཅིག བཀའ་བློབ་དུ་བདམས་ཐོབ་བྱུང་མཚམས་སུ་དམ་བཅའ་བཞེས་དང་མ་བཞེས་ཆེས་མཐོའི་ཁྲིམས་ཞིབ་ཁང་གི་སྐུ་དབང་ཡིན་སྟབས་དེའི་ཐོག་སྲིད་སྐྱོང་དང་ཚོགས་གཙོ། དེ་བཞིན་གྲོས་ཚོགས་བཅས་ནས་ཐེ་གཏོགས་གནང་ན་འགྲིག་གི་ཡོད་མ་རེད་ཅེས་གསུངས་ཡོད། གཞི་རྩའི་སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་དུས་བདུན་པའི་ལས་ཉིན་བཞི་པའི་ཐོག་སྲིད་སྐྱོང་བློ་བཟང་སེང་མཆོག་གིས་བཙན་བྱོལ་བོད་མིའི་བཅའ་ཁྲིམས་དོན་ཚན་ ༢༡ པའི་དགོངས་དོན་ལྟར་སྐབས་དེའི་བཀའ་དྲུང་ལས་ཐོག་སྟོབས་རྒྱལ་ཚེ་རིང་ལགས་བཀའ་ཤག་སྐབས་ ༡༥ པའི་བཀའ་བློན་དུ་མཚན་འདོན་གནང་དོན་གནང་ཡོད་པ་དང་། སྐབས་དེར་གྲོས་ཚོགས་ཀྱི་ངོ་ཡོད་སྤྱི་འཐུས་ ༤༣ ནས་གསང་བའི་འོས་ཤོག་བརྒྱུད་སྟོབས་རྒྱལ་ཚེ་རིང་ལགས་སུ་འོས་པའི་འོས་གྲངས་ ༢༡ ཐོབ་སྟེ་མང་མོས་ཐོག་ནས་སྐབས་ ༡༥ པའི་བཀའ་ཤག་ལྷན་ཚོགས་ཀྱི་བཀའ་བློན་དུ་བདམས་ཐོན་བྱུང་བར་གྲོས་ཚོགས་ནས་གསལ་བསྒྲགས་གནང་ཡོད། འོན་ཀྱང་སྐབས་དེར་བཀའ་བློན་འོས་བདམས་སྐབས་སུ་ངོ་ཡོད་སྤྱི་འཐུས་ ༤༣ ཡོད་པ་ལས་དགོས་མཁོའི་ཆ་གྲངས་ ༢༡ དང་ཕྱེད་ཀ་ཡིན་ཡང་བཀའ་བློན་འོས་མི་སྟོབས་རྒྱལ་ཚེ་རིང་ལགས་ལ་འོས་གྲངས་༢༡ ལས་ཐོབ་མེད་སྟབས། བཅའ་ཁྲིམས་དགོངས་དོན་ལྟར་ཁོང་ལ་ངོ་ཡོད་སྤྱི་འཐུས་རྒྱ་ཆ་ ༥༠ ཡི་རྒྱབ་སྐྱོར་ཐོབ་ཡོད་མེད་ཀྱི་གླེང་གཞི་ཞིག་བྱུང་ཡོད་པ་ལྟར། ཆེས་མཐོའི་ཁྲིམས་ཞིབ་ཁང་ནས་བཙན་བྱོལ་བོད་མིའི་བཅའ་ཁྲིམས་ནང་གསལ་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་འདུའི་འགྲོ་ལུགས་དང་ལས་དོན་བྱེད་ཕྱོགས་ཀྱི་སྒྲིག་གཞི་དོན་ཚན་ ༨༦ པའི་ནང་གསལ་ལྟར་ངོ་ཡོད་སྤྱི་འཐུས་ཀྱི་རྒྱ་ཆ་ ༥༠ ལོན་མེད་པའི་རྒྱུ་མཚན་དང་འབྲེལ། སྐབས་དེའི་བདམས་ཐོན་བཀའ་བློན་སྟོབས་རྒྱལ་ཚེ་རིང་ལགས་བཀའ་བློན་དུ་ངོས་བཞེས་གནང་མེད་པ་རེད། དེ་རྗེས་གནད་དོན་དེའི་ཐོག་ཚོགས་གཙོ་སྦྲེལ་པོ་དང་ཁྲིམས་ཞིབ་པ་ཆེ་བ། སྲིད་སྐྱོང་བཅས་ཁྲིམས་ཞིབ་ཁང་དུ་བཞུགས་མོལ་ཚོགས་འདུ་ཚོགས་པ་དང་། དེ་ནས་རིམ་པས་བཀའ་ཤག་ཁྲིམས་ཞིབ་ཁང་དུ་བཅར་ཏེ་བཀའ་བསྡུར་གནང་བ་མ་ཟད། བཀའ་དྲུང་ཡིག་ཚང་ནས་དམ་འབུལ་གྱི་ཞུ་སྐུལ་གནང་ཡོད་ཀྱང་། ཆེས་མཐོའི་ཁྲིམས་ཞིབ་ཁང་ནས་ཕྱི་ཟླ་ ༤ ཚེས་ ༤ ཉིན་གྱི་སྔ་དྲོ་གསར་འགོད་ལྷན་ཚོགས་ཤིག་བསྐོང་ཚོགས་གནང་སྟེ་ཆེས་མཐོའི་ཁྲིམས་ཞིབ་ཁང་ནས་བདམས་ཐོན་བཀའ་བློན་གསལ་བསྒྲགས་གནང་བའི་སྐྱེ་བོ་དེར་བཅའ་ཁྲིམས་ནང་གསལ་གྱི་ཆ་རྐྱེན་ཚང་གི་མེད་སྟབས། དེའི་ཐོག་བཅའ་ཁྲིམས་དང་མཐུན་པའི་གནང་ཕྱོགས་ཤིག་མ་བྱུང་བར་དུ་བཅའ་ཁྲིམས་དོན་ཚན་ ༢༥ པ་ནང་གསལ་ལས་འཁུར་དང་གསང་རྒྱའི་དམ་བཅའ་འབུལ་བཞེས་ཀྱི་ལས་རིམ་ཐོག་ཕེབས་ཐབས་མེད་པ་སོགས་དོན་གནད་ལྔའི་ཐོག་ནས་གསལ་བཤད་གནང་སྟེ་གང་ལྟར་སྐབས་དེའི་གྲོས་ཚོགས་ནས་བདམས་ཐོན་བྱུང་བའི་བཀའ་བློན་དེ་དུས་ད་ལྟའང་བཀའ་བློན་གྱི་ལས་འགན་བཞེས་མ་ཐུབ་པར་ལུས་ཡོད་པ་རེད།

དེ་རིང་སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༨ པའི་ལས་ཉིན་ ༧ ཐོག་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་ལོ་འཁོར་ལས་བསྡོམ་ཐོག་ཞིབ་གཤེར་དང་བགྲོ་གླེང་ཁག་གྲུབ་མཚམས་སུ་བོད་མིའི་སྒྲིག་འཛུགས་བདེ་སྲུང་ལས་ཁུངས་ཀྱི་ཕྱི་ལོ་ ༢༠༡༨ ནས་ ༢༠༡༩ ལོའི་ལོ་འཁོར་ལས་བསྡོམས་སྙིང་བསྡུས་སྙན་སྒྲོན་དང་སྦྲགས་ཏེ་སྤྱི་འཐུས་རྣམ་པས་ཞིབ་གཤེར་དང་བགྲོ་གླེང་ལས་དོན་ཐོག་ཕེབས་ཡོད།  བདེ་སྲུང་བཀའ་བློན་འཕགས་པ་ཚེ་རིང་མཆོག་གིས་སྙན་སྒྲོན་གནང་བའི་བདེ་སྲུང་ལས་ཁུངས་ཀྱི་ལོ་འཁོར་ལས་བསྡོམས་ནང་འདས་ལོའི་ནང་༸གོང་ས་༸སྐྱབས་མགོན་ཆེན་པོ་མཆོག་ཕྱི་རྒྱལ་ཡུལ་གྲུག་ཁག་གཙོས་པའི་རྒྱ་གར་གྱི་ས་གནས་ཁག་གི་ཆིབས་བསྒྱུར་སྐབས་རྒྱ་གར་གཞུང་ཕྱོགས་ནས་༸སྐུ་ཕྱྭའི་ཉེན་སྲུང་ཞུ་སྒོའི་གྲ་སྒྲིག་གང་ལེགས་གནང་ཡོད་ཐོག་བདེ་སྲུང་ལས་ཁུངས་ནས་ཀྱང་སྔར་ལམ་ལྟར་མི་འགྲོ་སྔོན་བསྐྱོད་དང་། ཆིབས་ཞབས་སུ་ལྷན་བཅར་ཞུ་སྒོ་ཁག་ཞུ་མུས་ཡིན་པ་དང་དེ་བཞིན་འདས་ལོའི་ནང་བོད་ནས་རྒྱ་གར་དུ་ཕེབས་པའི་བོད་མི་གྲངས་ ༣༢ ལ་བསུ་ལེན་ཞུས་ཏེ་༸གོང་ས་མཆོག་གི་མཇལ་ཁ་གོ་སྒྲིག་ཞུས་པ་མ་ཟད་ཁོང་རྣམས་རྒྱ་གར་ནང་གཏན་སྡོད་ཆོག་པའི་ཕྱག་འཁྱེར་ RC བཟོས་ཏེ་སློབ་གྲྭ་དང་ཆོས་སྡེ་ཁག་ལ་རང་ཉིད་ཀྱི་འདོད་མོས་ལྟར་བཏང་ཡོད་པ། རྒྱ་གར་ནང་གསར་སྐྱེས་དང་དྭ་ཕྲུག་བོད་ཕྲུག་གྲངས་ ༥༤༥ ལ་རྒྱ་གར་ནང་གཏན་སྡོད་ཆོག་པའི་ཕྱག་འཁྱེར་ RC བཟོས་ཡོད་པ་སོགས་འཁོད་འདུག སྐབས་དེར་བོད་མི་མང་སྤྱི་འཐུས་རྣམ་པས་བདེ་སྲུང་ལས་ཁུངས་ཀྱི་ལས་བསྡོམས་ཐོག་ཞིབ་གཤེར་དང་བགྲོ་གླེང་གནང་སྐབས་བར་སྐབས་ནས་བོད་ནས་རྒྱ་གར་ནང་ཕེབས་མཁན་གྱི་བོད་མི་ཉུང་དུ་ཕྱིན་ཡོད་པ་དང་། ལྷག་པར་དུ་ཆབ་སྲིད་བཙོན་པ་དང་དེའི་འབྲེལ་ཆགས་ཕེབས་མཁན་གྱི་གྲངས་འབོར་དེ་བས་ཀྱང་ཉུང་དུ་ཕྱིན་ཡོད་སྟབས། བདེ་སྲུང་ལས་ཁུངས་དང་འཛིན་སྐྱོང་བཀའ་ཤག་ནས་དེ་སྔ་ལོ་ལྟར་བཞིན་དུ་ཨ་སི་ཊོ་ལི་ཡར་བོད་མི་གཞིས་སྤོས་ཀྱི་ལས་གཞིའི་ཁོངས་སུ་བོད་མིའི་ཆབ་སྲིད་བཙོན་པ་དང་དེའི་འབྲེལ་ཆགས་རྣམས་གཏོང་བཞིན་པའི་སྒྲིག་གཞིར་བསྒྱུར་བཅོས་གནང་ཡོད་མེད་སོགས་དང་འབྲེལ་བའི་བཀའ་དྲི་ཁག་གཅིག་ཞུས་པར་བདེ་སྲུང་བཀའ་བློན་མཆོག་གིས་འཛིན་སྐྱོང་བཀའ་ཤག་ནས་སྒྲིག་གཞི་དེར་བསྒྱུར་བཅོས་གནང་སྟེ་མ་འོངས་པར་བོད་མིའི་ཆབ་སྲིད་བཙོན་པ་དང་འབྲེལ་ཆགས་བཏང་ཐོག་ས་དམིགས་སྟོང་པ་བྱུང་ཚེ་བོད་མི་ཉམ་ཐག་ཤེས་ཡོན་ཡོད་པ་རྣམས་ལ་གོ་སྐབས་གནང་རྒྱུ་ཡིན་པ་གསུངས་སོང་།    དེ་བཞིན་སྐབས་དེར་སྤྱི་འཐུས་ཁག་གཅིག་ནས་༸གོང་ས་མཆོག་གི་དགུང་ལོའི་བབས་དང་བསྟུན་མཛད་འཕྲིན་ཁག་ཉུང་འཕྲི་གནང་སྟེ་༸སྐུ་ངལ་གསོ་བཞུགས་མང་ཙམ་གནང་དགོས་གལ་དང་། ལྷག་པར་དུ་བཞུགས་སྒར་དུ་བཀའ་ཆོས་རིགས་གནང་སྐབས་ཕེབས་བདེའི་སླད་དུ་ཐེག་ཆེན་ཆོས་གླིང་གཙུག་ལག་ཁང་གི་སྐས་འཛེག་དེ་དེང་དུས་དང་མཐུན་པའི་གློག་གི་སྐས་འཛེག་གསར་བཟོ་དགོས་གལ་ཡིན་པ་གསུངས་སོང་བ་དང་། སྐབས་དེར་བཀའ་བློན་མཆོག་ནས་ཐེག་ཆེན་ཆོས་གླིང་གཙུག་ལག་ཁང་གི་སྐས་འཛེག་དེ་གློག་གི་སྐས་འཛེག་ཞིག་བཟོ་རྒྱུའི་འཆར་གཞི་གཏན་འབེས་ཟིན་ཡོད་ཀྱང་། འདི་ལོ་༸གོང་ས་མཆོག་གི་༸སྐུའི་དགུང་སྐེག་འཁེལ་གྱི་ཡོད་སྟབས་ལས་གཞི་དེ་རེ་ཞིག་འཕར་འགྱངས་ཞུས་ཡོད་ཅེས་ལན་འདེབས་གནང་ཡོད།   བོད་མི་མང་སྤྱི་འཐུས་ཁག་གཅིག་ནས་བདེ་སྲུང་ལས་ཁུངས་དང་འཛིན་སྐྱོང་བཀའ་ཤག་ནས་མུ་མཐུད་རྒྱ་གར་ནང་གཏན་སྡོད་ཆོག་པའི་ཕྱག་འཁྱེར་ RC མེད་མཁན་ཚོར་གང་ཐུབ་རོགས་རམ་གནང་དགོས་པ་དང་། ལྷག་པར་དུ་བོད་མི་རྣམས་ IC ཞེས་ཕྱི་སྐྱོད་ལག་འཁྱེར་སེར་པོའི་ཐོག་ཕྱོགས་སྐྱོད་གནང་སྐབས་གནམ་ཐང་སོགས་སུ་དཀའ་ངལ་མུ་མཐུད་འཕྲད་བཞིན་ཡོད་སྟབས། བོད་མི་ཚོར་རྒྱལ་ཁབ་གཞན་ཁག་ཅིག་གི་མི་སེར་ལྟར་ Travel Documet ཞེས་འགྲུལ་བཞུད་ཡིག་ཆ་ཞིག་ཐོབ་ཐབས་གནང་དགོས་པ་སོགས་གནད་དོན་མི་ཉུང་བ་ཞིག་གི་ཐོག་བཀའ་བསྡུར་གཟབ་རྒྱས་གནང་ཡོད། གཞི་རྩའི་དེ་རིང་བདེ་སྲུང་བཀའ་བློན་མཆོག་གིས་གྲོས་ཚོགས་སུ་སྙན་སྒྲོན་གནང་བའི་བདེ་སྲུང་ལས་ཁུངས་ཀྱི་ཕྱི་ལོ་ ༢༠༡༨ ནས་ ༢༠༡༩ ལོའི་ལོ་འཁོར་ལས་བསྡོམས་སྙིང་བསྡུས་ནང་འདས་ལོའི་ནང་༸གོང་མཆོག་གིས་རྒྱལ་སྤྱིའི་རྒྱལ་ཁབ་མི་འདྲ་བ་དྲུག་དང་། རྒྱ་གར་གྱི་ས་གནས་མི་འདྲ་བ་ ༧ ནང་ཆིབས་བསྒྱུར་བཀའ་དྲིན་བསྐྱངས་ཡོད་པ་དང་། སྔར་ལོ་བོད་ནས་གཏན་སྡོད་དང་གནས་སྐོར་ལ་ཕེབས་མཁན་བོད་མི་ ༢༨༦༡ བྱུང་བའི་ནང་ནས་བོད་མི་ ༢༣༠ བོད་དུ་ཕྱིར་ཕེབས་ཡོད་པ། དེ་བཞིན་ཕྱི་ཕྱོགས་ནས་བོད་ནང་གཉེན་འཕྲད་དུ་ཕེབས་མཁན་སེར་སྐྱ་ཕོ་མོ་གྲངས་ ༡༢༤ བྱུང་ཡོད་པ་དང་འདས་ལོའི་ནང་ཕྱི་རྒྱལ་ནས་ཕྱིར་ལོག་མཐོང་མཆན་ནམ་ Return Visa ཞུ་མཁན་གྲངས་ ༥༩༨ དང་། རྒྱ་གར་ནས་ཕྱིར་ཐོན་ལག་འཁྱེར་ Exit Permit ཞུ་མཁན་ ༦༩༦ བྱུང་ཡོད་པ་སོགས་ཀྱང་ཆེད་བཀོད་གནང་འདུག

དེ་རིང་སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བརྒྱད་པའི་ལས་ཉིན་བཞི་པའི་ཐོག་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་གིས་དཔལ་འབྱོར་ལས་ཁུངས་དང་འབྲེལ་བའི་བོད་མིའི་ཡར་ཐོན་ཚོང་ལས་རམ་འདེགས་ཀྱི་ལས་གཞི་དང་། བེུད་ནུས་སྟོབས་གོང་སྤེལ་ལས་དོན། གངས་ལྗོངས་དཔལ་འབྱོར་ཞབས་ཞུ་ཁང་གི་ལས་དོན། བོད་མིའི་ཁྱད་ལས་དང་བླངས་ཞབས་ཞུ་དང་བོད་མིའི་འཛིན་སྐྱོང་བདེ་དོན་ལྷན་ཚོགས་སོགས་བོད་མིའི་སྒྲིག་འཛུགས་དཔལ་འབྱོར་ལས་ཁུངས་མ་ལག་དང་བཅས་པའི་ཕྱི་ལོ་ ༢༠༡༨ ནས་ ༢༠༡༩ ལོའི་ལོ་འཁོར་ལས་བསྡོམས་སྙིང་བསྡུས་སྙན་སྒྲོན་དང་སྦྲགས་སྤྱི་འཐུས་རྣམ་པས་ཞིབ་གཤེར་དང་བགྲོ་གླེང་ལས་དོན་ཐོག་ཕེབས་སོང་།  སྐབས་དེར་བོད་མི་མང་སྤྱི་འཐུས་ཁག་གཅིག་ནས་བཙན་བྱོལ་བོད་མིའི་རང་དབང་གཅེས་འཛིན་དང་བླངས་དཔྱ་དངུལ་ལག་དེབ་དང་འབྲེལ་དཔྱ་དངུལ་ལག་དེབ་བོར་བརླག་བྱུང་བ་ཚོར་གསར་བཟོ་གནང་སྟངས་དང་། དཔྱ་དངུལ་གྱི་བསྡུ་བྱ་དེ་བཞིན་རྒྱ་བལ་འབྲུག་གསུམ་དང་ཕྱི་རྒྱལ་ཁག་ལ་བཞུགས་པ་ཚོའི་དབར་ཆ་སྙོམས་བཟོ་དགོས་པ། ལྷག་པར་དུ་ཕྱི་རྒྱལ་ཁག་ནས་དཔྱ་དངུལ་བསྡུ་བྱ་སྔར་ལྷག་ཡོང་ཐབས་སུ་དྲྭ་ཐོག་ནས་བསྡུ་རྒྱུ་ཡོད་པ་ཞིག་བཟོ་གལ་ཡིན་པ་སོགས་ཀྱི་ཐོག་དགོངས་ཚུལ་ཤུགས་ཆེན་པོ་ཕེབས་ཡོད་དང་། སྐབས་དེར་དཔལ་འབྱོར་བཀའ་བློན་མཆོག་ནས་བཙན་བྱོལ་བོད་མིའི་དང་བླངས་དཔྱ་དངུལ་དེ་དྲྭ་ཐོག་བརྒྱུད་ནས་བསྡུ་རྒྱུའི་ཚོད་ལྟའི་ལས་གཞི་དབུ་འཛུགས་གནང་འཆར་ཡོད་པ་གསུངས་ཡོད། དེ་བཞིན་སྤྱི་འཐུས་ཁག་གཅིག་གིས་དཔལ་འབྱོར་ལས་ཁུངས་ཀྱི་ཁྱབ་ཁོངས་གངས་ལྗོངས་དཔལ་འབྱོར་ཞབས་ཞུ་ཁང་གི་ད་ལྟའི་གནས་སྟངས་དང་ལས་གཞི་ཇི་སྤེལ་སོགས་ཀྱི་ཐད་ལ་བཀའ་འདྲི་ཁག་གཅིག་ཞུས་སོང་བ་དང་། བཀའ་བློན་མཆོག་གིས་གངས་ལྗོངས་དཔལ་འབྱོར་ཞབས་ཞུ་ཁང་གསར་འཛུགས་གནང་རྗེས་ད་ལྟའི་ཆར་རྒྱ་གར་དངུལ་ཁང་ཆེན་མོ་ནས་བུན་གཡར་སོགས་དང་འབྲེལ་བའི་ལས་གཞི་སྤེལ་ཆོག་པའི་ཁྲིམས་མཐུན་གྱི་ལག་འཁྱེར་ཐོབ་ཡོད་པ་མ་ཟད། འདས་ལོའི་ནང་བོད་མི་སུད་ཚོང་བ་གྲངས་ ༡༣༡༦ དང་རྒྱན་ཆ་ཙག་གི་ཙིག་གི་ཚོང་པ་ ༡༩༡ དེ་བཞིན་རྟ་དྲེལ་ཁྱིམ་ཚང་ ༤༢ དང་གླ་རྒྱུག་སྣུམ་འཁོར་གཏོང་མཁན་ ༡༨༠ དབྱར་ཚོང་གནང་མཁན་ཁྱིམ་ཚང་ ༡༠༣ སོགས་ལ་བུན་གཡར་གྱི་ལས་གཞི་སྤེལ་ཏེ་ཕན་ཐོགས་ཆེན་པོ་བྱུང་ཡོད་པ་སོགས་འགྲེལ་བརྗོད་གནང་བ་དང་ཆབས་ཅིག རིམ་པས་ཚོང་ཆེན་པོ་གནང་མཁན་ཚོར་འབུམ་བཅུ་དང་བཅོ་ལྔའི་བར་གྱི་བུན་གཡར་ལས་གཞི་སྤེལ་འཆར་ཡོད་པ་དང་སླད་མར་ད་ལྟའི་བཀའ་ཤག་འདི་འཁྱུར་བའི་སྐབས་སུ་གངས་ལྗོངས་དཔལ་འབྱོར་ཞབས་ཞུ་ཁང་གི་མ་དངུལ་གནས་ཚད་དེ་བྱེ་བ་བརྒྱ་བཟོ་རྒྱུའི་དམིགས་ཚད་འཛིན་བཞིན་ཡོད་པ་གསུངས་ཡོད། སུད་ཚོང་གནང་མཁན་ཚོའི་ཚོང་གི་བདེ་འཇགས་དང་ས་ཆའི་དཀའ་ངལ་སེལ་ཐབས་སོགས་ཀྱི་ཐོག་བཀའ་འདྲི་ཁག་གཅིག་ཕེབས་ཡོད་པ་ལྟར། དཔལ་འབྱོར་ལས་ཁུངས་ནས་འདས་པའི་ལོ་དུས་ནང་དགུན་ཚོང་གནང་མཁན་ཚོར་དངུལ་ཟོག་གྱི་ཁྲལ་བབས་དང་། ངེས་སྲུང་། དེ་བཞིན་ཚོང་ཟོག་འོར་འདྲེན་གྱི་གྱན་རྒྱ་སོགས་དང་འབྲེལ་བའི་ཟབ་སྦྱོང་དང་། དགོས་ངེས་ཀྱི་ལམ་སྟོན་གནང་མུས་ཡིན་པ། དགུན་ཚོང་བའི་དཀའ་ངལ་དེ་དག་སེལ་ཐབས་སུ་ཚོང་ལས་དེ་དག་ཁྲིམས་དང་མཐུན་པ་ཞིག་གནང་དགོས་གལ་ཡིན་པ་གསུངས་ཡོད།  གཞན་ཡང་སྐབས་དེར་སྤྱི་འཐུས་ཁག་ལ་ལས་བེུད་ནུས་སྟོབས་གོང་སྤེལ་ལས་གཞིའི་ཐོག་བཀའ་འདྲི་ཁག་གཅིག་ཞུས་པ་བརྒྱུད་ནས་ཚན་པ་དེའི་ལས་དོན་ཚགས་ཚུད་ཡོང་ཐབས་སུ་གོ་གནས་ཡོད་པའི་སྲི་ཞུ་བ་ཞིག་སྡེ་ཚན་དེའི་འགན་འཛིན་དུ་ངེས་བསྐོ་གནང་དགོས་པ་དང་། བེུད་རྣམས་ནུས་སྟོབས་འཕེལ་ཐབས་སུ་ཟབ་སྦྱོང་གི་ལས་གཞི་ཁག་ཏུ་སྐྱེས་པ་ཚོས་ཀྱང་མཉམ་ཞུགས་གནང་བ། དེ་བཞིན་གཙོ་བོ་མིའི་བསམ་བློ་ལ་འགྱུར་བ་ཐེབས་པ་ཞིག་གནང་གལ་ཡིན་པ་སོགས་ཀྱི་དགོངས་ཚུལ་ཕུལ་སོང་།  གཞི་རྩའི་དེ་རིང་ཉིན་འཁྱོངས་རིང་ལ་དཔལ་འབྱོར་ལས་ཁུངས་ཀྱི་ལས་བསྡོམས་དང་འབྲེལ་སྤྱི་འཐུས་ཁག་ ༢༠ ལྷག་ནས་བགྲོ་གླེང་གི་ཆ་ཤས་བླངས་བཞེས་ཏེ་ཕྱིའི་རོགས་ཚོགས་ཁག་གི་རོགས་དངུལ་གནས་བབས་དང་། བོད་མིའི་ཁྱད་ལས་དང་བླངས་ཞབས་ཞུ་ཁང་། དེ་བཞིན་བོད་མིའི་ཡར་ཐོན་ཚོང་ལས་རམ་འདེགས་ལས་དོན་སོགས་དཔལ་འབྱོར་ལས་ཁུངས་དང་འབྲེལ་བའི་ལས་ཁུངས་མ་ལག་དང་བཅས་པའི་ལས་གཞི་མང་དག་ཐོག་བཀའ་བསྡུར་གཟབ་རྒྱས་གནང་ཡོད།