གསར་འགྱུར།

ཉེ་ཆར་ཨ་རིའི་རྒྱལ་སྤྱིའི་ཆོས་དད་རང་དབང་གི་སྐུ་ཚབ་སྐུ་ཞབས་ Sam Brownback མཆོག་བཞུགས་སྒར་དྷ་རྨ་སཱ་ལཱར་ཕེབས་སྐབས་སུ་ཁོང་གིས་རྒྱ་གཞུང་གིས་བོད་མིའི་ཆོས་དད་རང་དབང་ལ་རྩིས་མེད་རྡོག་རོལ་བཏང་བར་སྐྱོན་བརྗོད་གནང་བ་དང་། བོད་མི་རྣམས་ལ་སོ་སོའི་ཆོས་ཕྱོགས་ཀྱི་དབུ་ཁྲིད་བདམ་དབང་ཆ་ཚང་ཡོད་པ་གསུངས་པ་མ་ཟད་༸རྒྱལ་བའི་༸སྐུའི་ཡང་སྲིད་ཀྱི་བདག་དབང་དང་འབྲེལ་ཐག་གཅོད་གནང་དབང་དེ་༸གོང་ས་༸སྐྱབས་མགོན་ཆེན་པོ་མཆོག་དང་བོད་བརྒྱུད་ནང་བསྟན་གྱི་བླ་ཆེན་རྣམ་པ། དེ་བཞིན་བོད་མི་རྒྱ་ཆེ་མང་ཚོགས་བཅས་ལ་ཡོད་པ་ལས་གཞན་རྒྱལ་ཁབ་སུ་ལ་ཡང་ཐོབ་ཐང་མེད་པར་ནན་བརྗོད་གནང་ཡོད་པ་ལྟར། རྒྱ་ནག་གཞུང་གིས་སྐུ་ཞབས་ Brownback མཆོག་ལ་སྐྱོན་བརྗོད་དང་འབྲེལ་ཏེ་སླད་མར་༸རྒྱལ་བའི་༸སྐུའི་ཡང་སྲིད་ཀྱི་བདག་དབང་ཐོག་རྒྱ་གཞུང་ནས་བཀའ་འཁྲོལ་ངེས་པར་དུ་ཞུ་དགོས་ཞེས་སྐྱོན་བརྗོད་བསྐྱར་ནན་བྱས་འདུག Indiatoday གཙོས་པའི་བརྒྱུད་ལམ་ཁག་གིས་གནས་ཚུལ་སྤེལ་བར་ཁ་ཉིན་ཕྱི་ཚེས་ ༢༩ ཉིན་རྒྱ་ནག་གི་ཕྱི་སྲིད་ལས་ཁུངས་ཀྱི་མགྲིན་ཚབ་པ་ Geng Shuang ཡིས་གསར་འགོད་པར་ཨ་རིའི་རྒྱལ་སྤྱིའི་ཆོས་དད་རང་དབང་སྐུ་ཚབ་ཀྱི་གསུངས་པ་དེས་རྒྱ་ནག་གི་ནང་སྲིད་གནད་དོན་ལ་ཐད་བྱུས་བྱས་པ་ཞིག་ཡིན་པ་དང་། ༸གོང་ས་༸སྐྱབས་མགོན་ཆེན་པོ་སྐུ་ཕྲེང་བཅུ་བཞི་པ་མཆོག་ནི་བཙན་བྱོལ་ནང་དུ་ཆོས་ཀྱི་མཚན་ཐོག་ནས་རྒྱ་ནག་ལ་གནོད་གཞིའི་ལས་དོན་སྤེལ་མཁན་ཞིག་ཡིན་པ་དང་། རྒྱ་ནག་གཞུང་གི་ངོས་ནས་རྒྱལ་སྤྱིའི་མི་སྣ་སུ་འདྲ་ཞིག་ནས་༸གོང་ས་མཆོག་དང་འབྲེལ་བ་གནང་བར་མཐའ་གཅིག་ཏུ་མུ་མཐུན་མེད་པ་དང་། ལྷག་པར་དུ་ཨ་རིའི་གཞུང་འབྲེལ་མི་སྣ་ཁག་གཅིག་གིས་བཀའ་མོལ་གསུང་སྟངས་དང་བྱ་སྤྱོད་སྤེལ་སྟངས་རྣམས་ཨ་རིའི་གཞུང་གི་ངོས་ནས་བོད་དེ་རྒྱ་ནག་གི་ཆ་ཤས་ཡིན་པ་དང་། བོད་རང་བཙན་གྱི་ལས་འགུལ་ལ་རྒྱབ་སྐྱོར་གནང་རྒྱུ་མིན་པའི་སྲིད་བྱུས་དང་རྒྱབ་འགལ་ཆགས་ཀྱི་ཡོད་པས་དེར་རྒྱ་ནག་གཞུང་གིས་དགག་པ་ཡོད་སྐོར་སྐྱོན་བརྗོད་བྱས་འདུག ཁོ་པས་ད་དུང་སྤྲུལ་པའི་སྐུ་འམ་ཡང་སྲིད་ཕེབས་རྒྱུའི་བོད་བརྒྱུད་ནང་བསྟན་གྱི་ལམ་སྲོལ་དེ་ནི་ལམ་དང་ལུགས་སྲོལ་གཏན་འབེབས་ཡོད་པའི་འགྲོ་ལུགས་ཤིག་གི་ཐོག་ནས་བདམ་གྱི་ཡོད་སྐོར་དང་འབྲེལ། བོད་མིའི་ཆོས་ཕྱོགས་ཀྱི་དབུ་ཁྲི་མཐོ་ཤོས་སུ་ངོས་འཛིན་བཞིན་པ་༸རྒྱལ་མཆོག་སྐུ་ཕྲེང་བཅུ་བཞི་པ་ཆེན་པོ་མཆོག་ཀྱང་རྒྱ་ནག་གཞུང་གིས་ངོས་འཛིན་ཞུས་ཏེ་བདམས་པ་ཞིགཡིན་པར་བཤད་པ་མ་ཟད་རྒྱ་ནག་གཞུང་ནས་ཆོས་དོན་སྒྲིག་གཞི་དང་བླ་སྤྲུལ་ཡང་སྲིད་ངོས་འཛིན་བྱེད་ཕྱོགས་བཏང་འཛིན་གྱི་སྒྲིག་གཞིའི་འོག་ནས་བོད་བརྒྱུད་ནང་བསྟན་གྱི་བླ་སྤྲུལ་ཡང་སྲིད་བདམ་ཕྱོགས་ཀྱི་ལམ་ལུགས་ལ་གུས་བརྩི་དང་ཆོས་དད་རང་དབང་གི་སྲིད་བྱུས་ལག་བསྟར་བྱེད་བཞིན་ཡོད་པ་བཤད་ཡོད། ཨ་རིའི་གཞུང་གིས་ཏཱ་ལའི་རུ་ཚོགས་དང་ལྷན་དུ་འབྲེལ་བ་བྱ་མཚམས་བཞག་དགོས་པ་དང་འགན་ཁུར་མེད་པའི་གཏམ་བཤད་འདི་རིགས་སྤེལ་མཚམས་བཞག་དགོས་པ་དེ་བཞིན་བོད་དང་འབྲེལ་བའི་གནད་དོན་ཐོག་རྒྱ་ནག་གི་ནང་སྲིད་གནད་དོན་ལ་ཐད་བྱུས་བྱ་མཚམས་བཞག་སྟེ་ཨ་རི་དང་རྒྱ་ནག་ཕྱོགས་གཉིས་ཀྱི་འབྲེལ་ལམ་ཡར་རྒྱས་གཏང་རྒྱུར་དོ་སྣང་ཆེ་ཙམ་བྱེད་དགོས་པའི་འབོད་སྐུལ་ཞུས་འདུག རྩ་བའི་ཉེ་ཆར་ཟླ་བ་འདིའི་ཟླ་མགོར་བཞུགས་སྒར་གངས་སྐྱིད་ཚོགས་ཁང་དུ་བཙན་བྱོལ་བོད་མིའི་དམིགས་བསལ་ཚོགས་ཆེན་ཐེངས་གསུམ་པ་དེ་ཚོགས་ཐོག་ཚོགས་བཅར་བ་རྣམ་པ་མགྲིན་དབྱངས་གཅིག་གྱུར་གྱིས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་༸སྐུ་ཕྲེང་བཅུ་བཞི་པ་ཆེན་པོ་མཆོག་༸སྐུ་ཚེ་༸ཞབས་པད་བསྐལ་པ་བརྒྱ་ཕྲག་བར་བོད་མི་རྩམ་ཟན་ཡོངས་ཀྱི་འདི་ཕྱི་གཉིས་ཀྱི་མགོན་སྐྱབས་དཔུང་གཉེན་དམ་པར་མུ་མཐུད་བཞུགས་གནང་ཡོང་བའི་གསོལ་བ་ཕུར་ཚུགས་སུ་འདེབས་རྒྱུ་དང་། ཇི་སྲིད་བོད་ཁ་བ་ཅན་གྱི་འགྲོ་བ་ནམ་གནས་ཀྱི་བར་དུ་༸རྒྱལ་བའི་སྐུ་ཕྲེང་རིམ་བྱོན་རྣམས་ངེས་ཕེབས་ཡོང་བའི་མགྲིན་དབྱངས་གཅིག་གྱུར་གྱི་གསོལ་བ་ཕུར་ཚུགས་སུ་འདེབས་རྒྱུ། ༸རྒྱལ་བའི་ཡང་སྲིད་ངོས་འཛིན་གནང་རྒྱུའི་འགན་དབང་ཆ་ཚང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་༸སྐུ་ཉིད་མཆོག་དང་། ༸གོང་ས་ཏཱ་བླའི་བླ་མའི་བླ་བྲང་དགའ་ལྡན་ཕོ་བྲང་ཡིད་ཆེས་དགེ་རྩའི་དབང་ལྡན་འགན་འཛིན་ཁོ་ནར་ཡོད་པ་ལས་གཞན་རྒྱལ་ཁབ་དང་གཞུང་། སྒྲིག་འཛུགས། མི་སྒེར་བཅས་སུ་ལ་ཡང་མེད། དེ་བཞིན་རྒྱ་ནག་གཞུང་གིས་དེ་སྔོན་བོད་བརྒྱུད་ནང་བསྟན་གྱི་སྤྲུལ་སྐུ་ངོས་འཛིན་བྱས་པ་སྤྱི་དང་ལྷག་པར་དུ་ཕྱི་ལོ་ ༢༠༠༧ ལོར་གཏན་འབེབས་གནང་བའི་བླ་སྤྲུལ་ཡང་སྲིད་ངོས་འཛིན་བྱེད་ཕྱོགས་ཀྱི་བཙན་བཀའ་ཨང་ལྔ་པ་བརྒྱུད་ནས་༸རྒྱལ་བའི་ཡང་སྲིད་ངོས་འཛིན་བྱེད་ཕྱོགས་ཐད་བྱུས་ངན་བཏོན་དང་འདོན་བཞིན་པ་དེར་དགག་པ་མཐའ་ཅིག་ཏུ་བྱ་རྒྱུ་ཞེས་གྲོས་ཆོད་ནང་གསེས་བཞི་ཅན་ཞིག་སྤྱི་མོས་ཀྱིས་གཏན་འབེབས་གནང་ཡོད་པ་རེད། དེ་བཞིན་ཉེ་ཆར་ཨ་རིའི་གྲོས་ཚོགས་གོང་འོག་གཉིས་ཀྱི་ནང་དུའང་ Tibet Policy and Support Act of 2019 ཞེས་བོད་དོན་རྒྱབ་སྐྱོར་དང་འབྲེལ་བའི་ཁྲིམས་ཆར་ཆེད་འདོན་གྱིས་༸གོང་ས་མཆོག་གི་༸སྐུའི་ཡང་སྲིད་ཀྱི་གནད་དོན་དེ་ནི་ཆོས་ཕྱོགས་ཀྱི་གནད་དོན་ཞིག་ཡིན་པ་དང། དེའང་༸གོང་ས་མཆོག་གམ་མགོན་པོ་༸གང་ཉིད་མཆོག་གི་རྗེས་འབྲང་པ་རྣམས་ལ་ཐག་གཅོད་གནང་རྒྱུའི་གནད་དོན་ཞིག་ཡིན་སྐོར་གསུངས་པ་དང་འབྲེལ། ཨ་རིའི་ཕྱི་སྲིད་ལས་ཁུངས་ཀྱི་ངོས་ནས་༸སྐུའི་ཡང་སྲིད་ཀྱི་གནད་དོན་ཐད་ལ་རྒྱལ་སྤྱིའི་ཁྲོད་ཨ་རིའི་ལྟ་བུའི་བཞེངས་ཕྱོགས་འཛིན་མཁན་རྒྱལ་ཁབ་དང་ལྷན་དུ་མཉམ་རུབ་ཀྱིས་རྒྱ་ནག་གི་༸སྐུའི་ཡང་སྲིད་བདམ་རྒྱུའི་འཆར་གཞིར་གདོང་ལེན་བྱེད་དགོས་པ་སོགས་འཁོད་ཡོད་པ་རེད། དེ་དོན་ཨ་རིའི་ས་གནས་འདྲ་མིན་གྱི་བོད་རིགས་ཚོགས་པ་ཁག་དང་སྐུ་ཚབ་དོན་ཁང་། དེ་བཞིན་རྒྱལ་སྤྱིའི་བོད་དོན་ལས་འགུལ་ཁང་བཅས་ཀྱིས་ཨ་རིའི་རྒྱལ་ཡོངས་སུ་བོད་དོན་ཁྲིམས་གཞིར་རྒྱབ་སྐྱོར་དགོས་པའི་ཞུ་གཏུག་གི་ལས་འགུལ་སྤེལ་བཞིན་ཡོད་པ་དང་། ཨ་རིའི་གྲོས་ཚོགས་གོང་འོག་གཉིས་ཀའི་གྲོས་ཚོགས་འཐུས་མིའི་ཁོངས་སུ་རྒྱབ་སྐྱོར་གནང་མཁན་ཇེ་མང་དུ་འགྲོ་བཞིན་པའི་གནས་ཚུལ་ཐོན་ཡོད་པ་རེད།

གཟའ་འཁོར་འདིའི་རེས་གཟའ་ཟླ་བ་ནས་བཞུགས་སྒར་དྷ་རྨ་སཱ་ལཱར་མཛད་རིམ་འདྲ་མིན་བརྒྱུད་བོད་ཀྱི་ཟློས་གར་ཚོགས་པ་དབུ་བརྙེས་ནས་ལོ་ངོ་དྲུག་ཅུ་འཁོར་བའི་དུས་དྲན་སྲུང་བརྩི་ཞུ་བཞིན་ཡོད་པ་ལྟར། དེ་རིང་སྔ་དྲོ་ཆུ་ཚོད་ ༡༠་༣༠ ཙམ་ལ་བོད་ཀྱི་ཟློས་གར་ཚོགས་པའི་ཚོགས་མི་ཟུར་པ་ཡོངས་གྲངས་སུ་ཨ་ཇོ་ཌེ་ཎི་དང་དངོས་མིང་བསོད་ནམས་བཀྲ་ཤིས་ལགས་ཀྱིས་རྐང་འགན་བཞེས་ཐོག་བཟོ་སྐྲུན་གནང་བའི་ལྭ་བ་ནོར་བུ་ཚེ་རིང་། སྐྱོར་མོ་ལུང་ཨ་ཅེ་ལྷ་མོ་ཞེས་པའི་གློག་བརྙན་གཟིགས་འབུལ་ཞུས་སོང་། གློག་བརྙན་དེ་ནི་བོད་ཀྱི་ཐུན་མོང་མ་ཡིན་པའི་ལྷ་མོའི་འཁྲབ་གཞུང་གི་གལ་གནད་དང་དར་ཁྱབ་བྱུང་ཚུལ། ལྷག་པར་དུ་བོད་ཀྱི་ལྷ་མོའི་འཁྲབ་གཞུང་ཁུངས་ནས་སྐྱོར་མོ་ལུང་ཨ་ཅེ་ལྷ་མོའི་འཕེལ་རིམ་དང་འཁྲབ་སྲོལ་སོགས་དང་འབྲེལ་བའི་བོད་ཕྱི་ནང་གཉིས་སུ་ཡོད་པའི་ལྷ་མོའི་འཁྲབ་གཞུང་ལ་དམིགས་བསལ་མཁྱེན་རྟོགས་ཡོད་པའི་མཁས་པ་བདུན་ཙམ་ལ་བཅར་འདྲི་དང་ལོ་རྒྱུས་ཐོག་གི་པར་དང་བརྙན་སོགས་ཕྱོགས་སྒྲིག་གི་ལམ་ནས་བཟོས་པ་ཞིག་ཡིན་པ་རེད། གློག་བརྙན་དེའི་ནང་ཨ་ཇོ་ཌེ་ཎི་ལགས་ནས་དེ་སྔ་དངོས་ཤུགས་བརྒྱུད་གསུམ་ནས་ལྷ་མོའི་འཁྲབ་གཞུང་སློབ་ཁྲིད་ཞུ་ཡུལ་རྒན་ནོར་བུ་ཚེ་རིང་ལགས་དམ་པ་དེ་ཉིད་ཀྱིས་གཙོས་པའི་དགེ་རྒན་དམ་པ་ཚོར་བཀའ་དྲིན་རྗེས་དྲན་མཚོན་པ་གནང་འདུག གློག་བརྙན་གཟིགས་འབུལ་གྲུབ་མཚམས་སུ་གསར་འགོད་པས་ཨ་ཇོ་ཌེ་ཎི་ལགས་སུ་གློག་བརྙན་བཟོ་སྐྲུན་གནང་བའི་དགོས་དམིགས་སོགས་དང་འབྲེལ་བཅར་འདྲི་ཞུས་པར་ད་ཆ་རྒྱ་ནག་གཞུང་གིས་བོད་ནང་བོད་ཀྱི་སྲོལ་རྒྱུན་འཁྲབ་གཞུང་ཁག་བཟོ་བཅོས་འདྲ་མིན་བྱས་ཏེ་སྟོན་བཞིན་པ་དང་། བོད་ཕྱི་ནང་གཉིས་སུ་ཡོད་པའི་བོད་མི་མི་རབས་རྒན་པ་རྣམས་རིམ་པས་སྐུ་ན་མ་ཟིན་པའི་གནས་སྟངས་འབྱུང་བཞིན་པའི་ཁྲོད་འདིར་རང་ཉིད་ད་བར་སློབ་སྦྱོང་ཞུས་པའི་བོད་པའི་རིག་གཞུང་དེ་དག་མི་རབས་གསར་པ་ཚོས་ཤེས་རྟོགས་དང་དོ་སྣང་ཡོང་བར་ཆེད་དམིགས་གནང་བ་ཞིག་ཡིན་པ་གསུངས་སོང་བ་དང་ཆབས་ཅིག་ཏུ་སྤྱི་ཚོགས་ནང་བོད་ཀྱི་ལྷ་མོའི་འཁྲབ་གཞུང་དང་རིག་གནས་སྤྱི་རིགས་ཐོག་མཁྱེན་རྒྱ་ཡོད་པ་ཚོས་དེ་ལྟར་གནང་བའི་རེ་བ་ཡོད་པ་སོགས་གསུངས་ཡོད།  གཞི་རྩའི་ཐེངས་འདིའི་གློག་བརྙན་གཟིགས་འབུལ་གྱི་མཛད་རིམ་ཐོག་སྐུ་མགྲོན་གཙོ་བོ་བོད་མི་སྒྲིག་འཛུགས་ཆོས་བཀའ་བློ་གཡུ་ཐོག་ཀརྨ་དགེ་མཆོག་ཕེབས་ཡོད་པ་དང་བཀའ་བློན་མཆོག་གིས་སྤྱི་ཡོངས་ནས་འདས་པའི་ལོ་ངོ་དྲུག་ཅུའི་ནང་ཟློས་གར་གྱི་ཁྱབ་ཁུངས་སུ་གཏོགས་པའི་རིག་གནས་ཁག་འཛིན་སྐྱོང་གང་ལེགས་གནང་ཐུབ་པ་བྱུང་ཡོད་ཀྱང་། དེ་དག་མུ་མཐུད་འཛིན་སྐྱོང་ཐུབ་ཐབས་སུ་ཚང་མས་དགོངས་བཞེས་གནང་དགོས་གལ་ཡིན་པ་གསུངས་སོང་། བཀའ་བློན་མཆོག་གིས་ད་དུང་ཟློས་གར་གྱི་རིག་གནས་དེ་དེང་དུས་དང་མཐུན་པའི་ཐོག་ནས་ཆེད་ལས་རང་བཞིན་ཐོག་འགྲོ་ཐུབ་ཚེ་རིག་གནས་ཀྱི་རྩ་གཞུང་དེ་དག་ཡག་པོ་བཟོ་ཐུབ་པ་མ་ཟད་གསར་གཏོད་ཀྱི་རྣམ་པ་ཆེད་འདོན་ཐུབ་རྒྱུ་སོགས་ཀྱི་དགེ་མཚན་ཡོད་པ་སོགས་གསུངས་ཡོད།

བྷེལ་ཇམ་ནང་དུ་ལོ་ངོ་བཅུ་ལྷག་འདུག་མྱོང་ཡོད་པའི་རྒྱ་ནག་གི་ཁུང་ཙི་སློབ་གླིང་གི་འགན་འཛིན་ཟུར་པ་ Xinning Song ཟེར་བ་ཞིག་གིས་རྒྱ་གཞུང་གི་ཆེད་དུ་གསང་ཉུལ་གྱི་ལས་ཀ་བྱེད་ཀྱི་ཡོད་པར་ཤེས་རྟོགས་བྱུང་སྟེ་ཡོ་རོབ་སྤྱི་མཐུན་གྱི་རྒྱལ་ཁབ་ཅིག་གི་ནང་དུ་ཡང་འགྲོ་མི་ཆོག་པའི་བཀག་སྡོམ་བྱས་འདུག  Belgium གྱི་རྒྱལ་ས་ Brussels ནང་རྟེན་གཞི་བྱས་པའི་ VUB ཉམས་ཞིབ་སློབ་གཉེར་ཁང་གི་ཁུང་ཙི་སློབ་གླིང་དེ་ནི་ཕྱི་ལོ་ ༢༠༡༦ ལོར་གསར་འཛུགས་བྱས་པ་ཞིག་ཡིན་པ་དང་། སྔར་ལོ་ཡུལ་དེའི་གསང་བའི་ལས་ཁུངས་གིས་VUB ཉམས་ཞིབ་སློབ་གཉེར་ཁང་ལ་རྒྱ་གཞུང་གིས་ཁུང་ཙི་སློབ་གླིང་བརྒྱུད་ནས་གསང་ཉུལ་ལས་དོན་སྤེལ་གྱི་ཡོད་པའི་ཉེན་བརྡ་བཏང་མྱོང་ཡོད་ཀྱང། སྐབས་དེར་སློབ་གླིང་དེའི་ཐོག་ཡ་ལན་གང་ཡང་བྱས་མེད་པ་དེ་ལྟར་ཡང་། དེ་རིང་གསར་ལམ་ཁག་ཏུ་གསར་དུ་ཐོན་པའི་གནས་ཚུལ་ནང་གསལ་ལྟར་ན་བྷེལ་ཇམ་གྱི་ནང་སྲིད་ལས་ཁུངས་ནས་ཉེ་ཆར་ VUB ཁུང་ཙི་སློབ་གླིང་ཁང་དེའི་འགན་འཛིན་ཟུར་པ་ Xinning Song གྱིས་ཡུལ་དེའི་ནང་གི་རྒྱ་རིགས་སློབ་ཕྲུག་དང་ཚོང་འབྲེལ་མི་སྣ་ཁག་གཅིག་དང་མཉམ་འབྲེལ་གྱིས་རྒྱ་གཞུང་ཆེད་གསང་ཉུལ་ལས་དོན་སྤེལ་ཡོད་པའི་ཉེས་འཛུགས་དང་བཅས་ཁོང་རྒྱལ་ཁབ་དེའི་ནང་མ་འོངས་པར་ལོ་བརྒྱད་རིང་འཛུལ་ཞུགས་བྱེད་མི་ཆོག་པ་བཟོས་འདུག Xinning Song གྱིས་གསར་ལམ་ཁག་ཏུ་ཁོང་ལ་བཙུགས་པའི་ཉེས་འཛུགས་དེར་ངོས་ལེན་མེད་པར་བརྗོད་དེ་དེའི་ཐོག་ཞུ་གཏུག་བྱ་རྒྱུ་ཡིན་པ་བརྗོད་འདུག་མོད། གང་ལྟར་ད་ལྟའི་ཆར་ཁོ་པ་བྷེལ་ཇམ་ཙམ་མ་ཡིན་པར་ཡུ་རོབ་མཐུན་ཚོོགས་ཀྱི་རྒྱལ་ཁབ་གང་དུའང་འཛུལ་ཞུགས་བྱེད་མི་ཆོག་པ་བཟོས་འདུག གཞི་རྩའི་རྒྱ་ནག་གིས་ཕྱི་ལོ་ ༢༠༠༤ ལོ་ནས་བཟུང་ཁུང་ཙི་སློབ་གླིང་རྩ་འཛུགས་བྱས་ཏེ་རྒྱལ་སྤྱིའི་རྒྱལ་ཁབ་མ་འདྲ་བ་༡༣༤ ནང་དུ་སློབ་གླིང་ ༥༠༠ ལྷག་འཛུགས་སྐྲུན་བྱས་ཏེ་རྒྱ་ནག་གི་སྐད་ཡིག་དང་རིག་གཞུང་བརྒྱུད་སྤེལ་བྱེད་ཀྱི་ཡོད་པ་མ་ཟད་རྒྱལ་སྤྱིའི་ཁྱོན་ལ་ཞིབ་འཇུག་བྱེད་ཆེད་མ་དངུལ་གཏོང་གི་ཡོད་ཀྱང་། ད་ཆ་རྒྱལ་སྤྱིའི་ས་གནས་མང་པོ་ཞིག་ཏུ་རྒྱ་ནག་གི་ཁུང་ཙི་སློབ་གླིང་དེར་དོགས་ཟོན་བྱེད་བཞིན་ཡོད་པ་དང་དེ་ལྟ་བུའི་ཁུང་ཙི་སློབ་གླིང་མང་པོ་ཞིག་སྒོ་བརྒྱབས་མུས་ཡིན་པ་རེད། VUB ཉམས་ཞིབ་སློབ་གཉེར་ཁང་གི་གསར་འགོད་འབྲེལ་མཐུད་པ་ Sicco Witterman ལགས་ཀྱིས་སློབ་གཉེར་ཁང་དེའི་ངོས་ནས་ད་ཆ་ཁུང་ཙི་སློབ་གླིང་དང་འབྲེལ་བའི་གནད་དོན་དེའི་ཐད་ Belgium གྱི་གསང་བའི་ལས་ཁུངས་དང་མཉམ་ལས་གནང་བཞིན་ཡོད་པ་མ་ཟད་ཁུང་རྩི་སློབ་གླིང་གི་འགན་འཛིན་གསར་པ་བསྐོ་གཞག་ཐོག་ལའང་གསང་བའི་ལས་ཁུངས་དང་གྲོས་བསྡུར་གནང་ཡོད་སྐོར་གསུངས་པ་དང་སྤྱིར་ VUB ཉམས་ཞིབ་སློབ་གཉེར་ཁང་དང་ཁུང་ཙི་སློབ་གླིང་དབར་གྱི་གན་ཡིག་གྱི་དུས་ཡུན་དེ་ལོ་རྗེས་མར་ཚང་གི་ཡོད་སྟབས་ཕྱོགས་གཉིས་ཀྱི་གན་ཡིག་མུ་མཐུད་མཇུག་སྐྱོང་བྱ་མིན་ཐད་ཡིད་གཟབ་གནང་རྒྱུ་ཡིན་པ་གསུངས་འདུག རྩ་བའི་རྒྱ་ནག་་གི་ཁུང་ཙི་སློབ་གླིང་གི་འགན་འཛིན་ཟུར་པ་དེ་ནི་པེ་ཅིན་དུ་རྟེན་གཞི་བྱས་པའི་མི་རིགས་སློབ་གྲྭ་ཆེན་མོའི་དགེ་རྒན་ཞིག་ཀྱང་ཡིན་པ་དང་ཕྱི་ལོ་ ༢༠༡༦ བར་དུ་ Belgium ནང་དུ་ཁུང་ཙི་སློབ་གླིང་གི་འགན་འཛིན་བྱས་མྱོང་ཡོད་པ་རེད།

དེ་རིང་ཕྱི་ཟླ་ ༡༠ ཚེས་ ༣༠ ཉིན་སྔ་དྲོ་ཚོུད་དགུ་པ་ཡོལ་ཙམ་ལ་བཞུགས་སྒར་༸རྒྱལ་བའི་ཕོ་བྲང་ནང་དུ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་སེམས་དང་སྲོག་གི་ལྷན་ཚོགས་ཐེངས་ ༣༤ པ་དབུ་འཛུགས་གནང་སོང་། ཐེངས་འདིའི་ལྷན་ཚོགས་ཐོག་༸གོང་ས་མཆོག་གིས་དབུས་པའི་སེམས་དང་སྲོག་བསྟི་གནས་ཁང་གི་འགན་འཛིན་ལྷན་ཚོགས་ཀྱི་ངེས་སྟོན་པ་༸སྐུའི་དབྱིན་སྐད་གསུང་བསྒྱུར་བ་དགེ་བཤེས་ཐུབ་བསྟན་སྦྱིན་པ་ལགས་དང་འགན་འཛིན་ལྷན་ཚོགས་ཀྱི་ཚོགས་མི་སྐུ་ཞབས་ Aaron Stern ལགས། དེ་བཞིན་བསྟི་གནས་ཁང་གི་ཚོགས་གཙོ་ Susan Bauer-Wu ལགས་དང་ཀླད་པའི་ཚན་རིག་པ་གྲགས་ཅན་སྐུ་ཞབས་ Richard Davidson ལགས། སྐྱེས་དངོས་རིག་པའི་འཕེལ་རིམ་ཐོག་གི་ཚན་རིག་མཁས་པ་སྐུ་ཞབས་ David Sloan Wilson ལགས་དང་སྤྱི་ཚོགས་འཕྲོད་བསྟེན་དང་སེམས་ཁམས་རིག་པའི་ཚན་རིག་པ་ལྕམ་ Pumla Gobodo-Madikizela ལགས། སེམས་དང་སྲོག་བསྟི་གནས་ཁང་དང་འབྲེལ་བ་ཡོད་པའི་རྒྱལ་སྤྱིའི་ཚན་རིག་མཁས་པ་སོགས་ནས་ལྷན་ཞུགས་གནང་འདུག ལྷན་ཚོགས་ཀྱི་ཐོག་མར་དེར་༸གོང་ས་༸སྐྱབས་མགོན་ཆེན་པོ་མཆོག་གིས་སེམས་དང་སྲོག་བསྟི་གནས་ཁང་གིས་འདས་པའི་ལོ་ངོ་མང་པོའི་རིང་ལ་མགོན་པོ་༸གང་ཉིད་མཆོག་དང་རྒྱལ་སྤྱིའི་ཚན་རིག་མཁས་པའི་དབར་བགྲོ་གླེང་གནང་རྒྱུ་སོགས་ཀྱི་མཛད་རིམ་གོ་སྒྲིག་ཞུ་བཞིན་པ་དེས་ཕྱོགས་གཉིས་ཀར་ཕན་ཐོགས་ཆེན་པོ་བྱུང་ཡོད་པར་བཀའ་བསྩལ་བ་དང་སྦྲགས། བསྟི་གནས་ཁང་གི་འགན་འཛིན་གྱིས་དབུས་པའི་ལས་བྱེད་ཡོངས་ལ་ཐུགས་རྗེ་ཆེ་ཞེས་འཚམས་འདྲི་མཛད་སོང་།  མགོན་པོ་༸གང་ཉིད་མཆོག་གིས་སྤྱིར་འཛམ་བུ་གླིང་འདིའི་ཐོག་ཡོད་པའི་ཆོས་ལུགས་ཚང་མའི་གཞི་རྩའི་བསླབ་བྱ་གཙོ་བོ་དེ་བྱམས་བརྩེ་གོང་འཕེལ་གཏོང་རྒྱུ་གཅིག་མཚུངས་ཡིན་ཡང་ལྟ་གྲུབ་ཀྱི་ཆ་ནས་ནང་པའི་ཆོས་ལུགས་འདི་དད་པ་ཁོ་ན་མིན་པར་དཔྱད་པ་གནང་རྒྱུའི་རང་དབང་ཡོད་པ་དེ་ནི་ཆོས་ལུགས་གཞན་ལས་ཅུང་ཟད་དམིགས་བསལ་བ་ཞིག་ཡིན་པ་ངོ་སྤྲོད་མཛད་པ་དང་སྦྲགས། ང་ཚོས་རྒྱུན་དུ་གནད་དོན་ཅི་རིགས་ཐོག་སོ་སོའི་ཀླད་པའི་བྱེད་ལས་དེ་དག་ནུས་པ་ཆ་ཚང་བ་ཞིག་སྤྱོད་རྒྱུ་གལ་ཆེན་པོ་ཡིན་པ་ལམ་སྟོན་བཀྲིན་ཆེ་བ་བསྩལ་ཡོད། ལྷག་པར་དུ་ཐེངས་འདིའི་སེམས་དང་སྲོག་གི་བགྲོ་གླེང་བརྒྱུད་ནས་ཕྱོགས་ཕན་ཚུན་དབར་ཤེས་ཡོན་བརྗེ་ལེན་གནང་ཐུབ་པའི་དགེ་མཚན་ལྡན་ཡོད་པ་དང་། ཚན་རིག་གི་ཐོག་ནས་ཕྱི་དངོས་པོའི་ཐོག་ཞིབ་འཇུགས་ཚད་མཐོ་པོ་གནང་སྟེ་ཡར་རྒྱས་ཀྱི་རྣམ་པ་ཤུགས་ཆེ་སྐྲུན་ཐུབ་ཡོད་ཀྱང་ནང་སེམས་ཀྱི་རྣམ་གཞག་དང་འགྲོ་བ་མིའི་སེམས་ཚོར་དང་འབྲེལ་བའི་རྣམ་གཞག་ཐོག་དུས་ད་ལྟ་ཡང་ཚན་རིག་ཐོག་ནས་འདངས་ངེས་ཤིག་མེད་སྟབས། ཚན་རིག་པ་རྣམས་ནས་མུ་མཐུད་དེ་དེ་དག་ཐོག་ཐུགས་སྣང་དང་ཞིབ་འཇུག་གནང་དགོས་གལ་ཡིན་པ་བཀའ་བསྩལ་ཡོད།    དེ་བཞིན་མགོན་པོ་༸གང་ཉིད་མཆོག་གིས་འཛམ་བུ་གླིང་འདིའི་ཐོག་འཕྲད་བཞིན་པའི་རང་བྱུང་གི་གོད་ཆག་ཁག་ཅིག་ང་ཚོས་འགོག་ཐབས་མེད་ཀྱང་། འགྲོ་བ་མིའི་སྤྱི་ཚོགས་ཁྲོད་ཀྱི་དབུལ་ཕྱུག་གི་དཀའ་ངལ་དང་། དམག་འཁྲུག དེ་བཞིན་ཆོས་ལུགས་ཀྱི་འཐེན་འཁྱེར་ཐོག་འབྱུང་བཞིན་པའི་འཁྲུག་རྩོད་སོགས་ནི་འགྲོ་བ་མིས་བཟོས་པ་ཞིག་ཡིན་སྟབས་དཀའ་ངལ་དེ་དག་རྩ་བ་ནས་མེད་པ་བཟོ་ཐུབ་ཀྱི་མེད་རུང་ཉུང་དུ་གཏང་རྒྱུའི་ནུས་པ་དང་འགན་དེ་ང་ཚོ་མི་ཚོར་ཡོད་སྐོར་བཀའ་བསྩལ་བ་དང་ཆབས་ཅིག དེའི་ཐོག་ཐབས་ལམ་འཚོལ་རྒྱུ་གལ་ཆེན་པོ་ཡིན་པ་དང་ཚན་རིག་དང་མཐུན་པའི་ཐོག་ནས་ཤེས་ཡོན་སློབ་གསོའི་ནང་འགྲོ་བ་མིའི་རང་བཞིན་བཟང་པོའི་ཡོན་ཏན་རྣམས་སློབ་ཁྲིད་གནང་བར་འབད་རྩོན་གནང་དགོས་པའི་ལམ་སྟོན་སོགས་བསྩལ་ཡོད། གཞི་རྩའི་དེ་རིང་སེམས་དང་སྲོག་གི་ལྷན་ཚོགས་ཀྱི་ཉིན་དང་པོའི་བརྗོད་གཞི་གཙོ་བོ་ནི་སྐྱེས་དངོས་རིག་པའི་འཕེལ་རིམ་དང་ཀུན་སྤྱོད་ཀྱི་འབྲེལ་བའི་སྐོར་ཡིན་པ་ལྟར། སྐྱེས་དངོས་རིག་པའི་འཕེལ་རིམ་ཐོག་གི་ཚན་རིག་མཁས་པ་སྐུ་ཞབས་ David Sloan Wilson ལགས་ནས་འདས་པའི་ལོ་ངོ་ ༥༠ ཙམ་གི་གོང་ལ་སྐྱེས་དངོས་རིག་པའི་ཚན་རིག་པ་ཚོས་སྐྱེས་དངོས་ཀྱི་འཕེལ་རིམ་འགྲེལ་བརྗོད་གནང་སྐབས་རིགས་རྒྱུན་གྱི་ས་བོན་ལ་གཞི་གཙོ་བོར་འཛིན་བཞིན་ཡོད་ཀྱང་། རིམ་པས་ཚན་རིག་གི་དཔྱད་ཞིབ་ཁྲོད་མིས་གཙོས་པའི་སྐྱེས་དངོས་འཕེལ་རིམ་གྱི་གྲུབ་བྱའི་ནང་རིགས་རྒྱུན་གྱི་ས་བོན་དང་དེའི་ཁྱད་ཆོས་ཙམ་མ་ཟད། སྐྱེས་དངོས་ཀྱི་ཀུན་སྤྱོད་དང་སྤྱི་ཚོགས། དེ་བཞིན་ནང་པའི་གཞུང་ནས་གསུང་བཞིན་པའི་བལྟོས་གྲུབ་དང་འབྲེལ་བ་ངེས་ཅན་ཞིག་ཡོད་པ་ར་ཕྲོད་བྱུང་སྐོར་སོགས་སྙན་སེང་ཞུས་སོང་། སྐབས་དེའི་བགྲོ་གླེང་ཁྲོད་མགོན་པོ་༸གང་ཉིད་མཆོག་གིས་སྐྱེས་དངོས་ཀྱི་འཕེལ་རིམ་ཤེས་པ་དང་འཚོ་བ་སོགས་ཀྱི་སྐོར་གསུངས་སྐབས་ཚན་རིག་པ་རྣམས་ནས་རྒྱ་གར་གྱི་སེམས་ཁམས་རིག་པའི་ཐོག་སློབ་སྦྱོང་གནང་དགོས་གལ་ཡིན་པ་ལམ་སྟོན་སོགས་མཛད་ཡོད། གཞི་རྩའི་སེམས་དང་སྲོག་གི་བསྟི་གནས་ཁང་དེ་ནི་ཕྱི་ལོ་ ༡༩༨༧ ལོར་གསར་འཛུགས་གནང་བ་ནས་བཟུང་རྒྱལ་སྤྱིའི་ཚན་རིག་མཁས་པ་དང་ཤེས་ལྡན་མི་སྣ། དེ་བཞིན་ནང་པའི་ལྟ་གྲུབ་མཁས་པ་ཚོའི་དབར་ཕྱི་ནང་གི་ཤེས་ཡོད་བརྗེ་རེས་གནང་སྟེ་འགྲོ་བ་མིའི་སྤྱི་ཚོགས་ཁྲོད་བྱམས་སྙིང་རྗེ་དང་གཞན་ཕན་གྱི་བསམ་བློ་གོང་མཐོར་གྱིས་འགྲོ་བ་མི་གཅིག་གྱུར་གྱི་འདུ་ཤེས་སྐྲུན་ཐབས་སོགས་ལ་ཆེད་དམིགས་གནང་དོན་ལྟར་དེ་རིང་སེམས་དང་སྲོག་གི་ལྷན་ཚོགས་ཐེངས་ ༣༤ འཚོགས་བཞིན་ཡོད་པ་དང་། གནངས་ཉིན་ལྷན་ཚོགས་ཉིན་གཉིས་པའི་ཐོག་སྤྱི་ཚོགས་འཕྲོད་བསྟེན་དང་སེམས་ཁམས་རིག་པའི་ཚན་རིག་པ་ལྕམ་ Pumla Gobodo-Madikizela ལགས་དང་༸གོང་ས་མཆོག་ལྷན་རྒྱས་དབར་བཀའ་བསྡུར་གནང་གི་ཡོད་པ་རེད།

ཨོ་སི་ཊོ་ལི་ཡའི་ཕྱི་སྲིད་བློན་ཆེན་ལྕམ་སྐུ་ Marise Payne མཆོག་གིས་ཀེན་བྷི་ར་ནས་རྒྱ་ནག་གིས་ཁུལ་དེའི་མངའ་ཁོངས་སུ་ཡོད་པའི་མི་རིགས་ཀྱི་འགྲོ་བ་མིའི་ཐོབ་ཐང་རྡོག་རོལ་གཏོང་བར་འགན་ཁུར་བ་ཞིག་བཟོ་རྒྱུ་ཡིན་པ་དང་སྦྲགས་ཏེ་ཨོ་གླིང་ནས་འགྲོ་བ་མིའི་ཐོབ་ཐང་ལ་ཚོར་བ་རྣོ་བའི་གནད་དོན་དག་མ་གླེང་ནས་ཁུ་སིམ་པོར་བཞུགས་རྒྱུ་ནི་ཨོ་གླིང་རྒྱལ་ཁབ་ཀྱི་བཞེངས་ཕྱོགས་མིན་པ་གསུངས་འདུག  དེ་རིང་ Reuters གསར་ཁང་གིས་ཉེ་བའི་ལོ་རབས་ནང་རྒྱ་ནག་གིས་ཨོ་གླིང་རྒྱལ་ཁབ་ཀྱི་ནང་མོལ་གནད་དོན་ཐད་ཐེ་གཏོགས་ཀྱིས་ཨོ་གླིང་གཞུང་ནས་དེར་སྐྱོན་འཛུགས་དང་འབྲེལ། ཨོ་གླིང་རྒྱལ་ས་ཀེན་བྷི་ར་དང་རྒྱ་ནག་གཉིས་དབར་གྱི་ཚོང་འབྲེལ་ཇེ་སྡུག་ཏུ་ཕྱིན་ཡོད་པ་དང་རྒྱལ་ཁབ་ཕྱོགས་གཉིས་ཀྱི་འབྲེལ་མོལ་ཐད་དོ་ཕོག་ཕྱིན་པའི་ཁྲོད་ཚོང་ལས་འགན་འཛིན་ཁག་གཅིག་གིས་ཨོ་གླིང་གཞུང་ནས་དཔལ་འབྱོར་གྱི་སྲིད་བྱུས་དེ་སྤྱི་ཚོགས་ཀྱི་གནད་དོན་ལས་གལ་ཆེར་ངོས་འཛིན་དགོས་པར་བརྗོད་ཡོད་པ་རེད། འོན་ཀྱང་ལྕམ་སྐུ་ Payne མཆོག་གིས་རྒྱལ་ཁབ་ཕྱོགས་གཉིས་ཀྱི་འབྲེལ་ལམ་ལེགས་པོ་ཡོང་བར་རྒྱལ་ཁབ་ཕན་ཚུན་ནས་དེ་གའི་རྒྱལ་ཁབ་ཀྱི་བདག་དབང་ལ་བརྩི་བཀུར་ངེས་པར་དུ་ཞུ་དགོས་སྐོར་དང་སྒོས་ཨོ་གླིང་ནས་སླད་མར་རྒྱ་ནག་དང་ལྷན་དུ་འགྲོ་བ་མིའི་ཐོབ་ཐང་གི་གནད་དོན་མུ་མཐུད་གླེང་རྒྱུ་དང་ཚོར་བ་རྣོ་བའི་གནད་དོན་ཐད་ཁུ་སིམ་པོར་བཞུགས་རྒྱུ་མེད་པ་གསུངས་འདུག ཁོང་གིས་འགྲོ་བ་མིའི་ཐོབ་ཐང་གི་གནད་དོན་ལ་སྣང་མེད་བཏང་བ་ནི་དེ་འབྲེལ་བྱ་སྤྱོད་ལ་ཁས་ལེན་ཞུས་ཡོད་པ་གཅིག་མཚུངས་ཡིན་པ་དང་། ལྷག་པར་དུ་དེས་རྒྱལ་སྤྱིའི་ཞི་བདེ་དང་སྲ་བརྟན་གྱི་རང་བཞིན་ལ་སྣང་ཆུང་བཏང་བ་མཚོན་གྱི་ཡོད་པ་གསུངས་འདུག་པ་མ་ཟད་ང་ཚོའི་གདོང་ལེན་བྱེད་དགོས་པའི་གནད་དོན་ལ་གདོང་ལེན་མ་གནང་ཚེ་ཡར་རྒྱས་ཀྱི་གཞི་མེད་པར་གྱུར་ངེས་ཡིན་པ་གསུངས་འདུག གཞི་རྩའི་རྒྱ་ནག་དེ་ཨོ་གླིང་རྒྱལ་ཁབ་ཀྱི་ཚོང་འབྲེལ་ཤུགས་ཆེ་བཞག་སའི་རྒྱལ་ཁབ་ཆགས་ཀྱི་ཡོད་ཀྱང་ཉེ་ལམ་རྒྱ་ནག་ནས་ཨོ་གླིང་གི་འོས་བསྡུ་ཆེན་མོའི་སྔ་རོལ་དུ་གྲོས་ཚོགས་དང་ཆབ་སྲིད་ཚོགས་པ་ཆེ་ཤོས་གསུམ་ལ་དྲྭ་ལམ་འགོག་ཐབས་ཀྱི་བཙན་རྒོལ་བྱས་ཡོད་པ་རེད། ནང་སྲིད་བློན་ཆེ་སྐུ་ཞབས་ Peter Dutton མཆོག་གིས་རྒྱ་ནག་གིས་གཙོ་བོ་དེ་འབྲེལ་ཨོ་གླིང་གི་ཆབ་སྲིད་ཚོགས་པ་དང་གཙུག་ལག་སློབ་གཉེར་ཁང་ལ་དམིགས་འབེན་དུ་བཟུང་གི་ཡོད་པ་གསུངས་ཡོད་ཀྱང་རྒྱ་ནག་གི་ཕྱི་སྲིད་ལས་ཁུངས་ནས་དེ་འབྲེལ་གནད་དོན་ཁས་ལེན་བྱས་མེད་པ་རེད།

བོད་ཀྱི་ཟློས་གར་ཚོགས་པ་དབུ་བརྙེས་ནས་མི་ལོ་ ༦༠ འཁོར་བའི་དུས་ཆེན་སྲུང་བརྩི་དང་འབྲེལ་༸གོང་ས་༸སྐྱབས་མགོན་ཆེན་པོ་མཆོག་ལ་ཇི་ལྟར་གསོལ་འདེབས་ཞུས་དོན་བཞིན་དེ་རིང་ཕྱི་ཟླ་ ༡༠ ཚེས་ ༢༩ ཉིན་གྱི་ཞོགས་པ་ ༩ ཡོལ་ཙམ་ལ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཆིབས་བསྒྱུར་བཀའ་དྲིན་བསྐྱངས་ཏེ་བོད་ཀྱི་ཟློས་གར་ཚོགས་པའི་ཚོགས་ཁང་གསར་པ་བོད་ཀྱི་གར་གླུའི་རིག་རྩལ་ཁང་དབུ་འབྱེད་རབ་གནས་བཀའ་དྲིན་བསྐྱངས་སོང་། ཚོགས་ཁང་གསར་པའི་དབུ་འབྱེད་ཀྱི་མཛད་སྒོའི་ཐོག་༸གོང་ས་མཆོག་དབུ་བཞུགས་གཙོས། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་མང་གཙོའི་ཀ་བ་གསུམ་གྱི་མཛད་གཙོ་རྣམ་པ། བོད་ཀྱི་ཟློས་གར་ཚོགས་པའི་སློབ་ཟུར་དང་དགེ་ལས་སློབ་ཕྲུག ས་གནས་མི་མང་བཅས་འདུ་འཛོམས་གནང་སོང་། སྐབས་དེར་བོད་ཀྱི་ཟློས་གར་ཚོགས་པའི་འགན་འཛིན་ལྷན་ཚོགས་ནས་༸གོང་ས་མཆོག་ལ་མཎྜལརྟེན་གསུམ་འདེགས་འབུལ་ཞུས་པ་བརྒྱུད་ནས་བོད་ཀྱི་ཟློས་གར་ཚོགས་པའི་དབུས་ལས་ཟུར་ཐུན་མོང་ནས་བཀའ་དྲིན་རྗེས་སུ་དྲན་པའི་སྐུ་རྒྱུ་རིན་ཆེན་སྣ་ཚོགས་ལས་གྲུབ་པའི་༸དཔལ་ཕྱག་ན་རྡོ་རྗེའི་སྤྲུལ་པར་གྲགས་པ་གསང་བདག་རྔོན་པའི་སྣང་བརྙན་ངོ་མཚར་ཅན་ཞིག་གཟེངས་རྟགས་སུ་འབུལ་ལམ་ཞུས་སོང་བ་མ་ཟད། བཀའ་བློན་ཁྲི་ཟུར་མཁས་དབང་༸སྐྱབས་རྗེ་ཟམ་གདོང་རིན་པོ་ཆེ་མཆོག་གིས་ལྗགས་རྩོམ་མཛད་པའི་བསྟོད་དབྱངས་ཤིག་བོད་ཀྱི་ཟློས་གར་ཚོགས་པའི་བྲོ་བ་རྣམས་ནས་མཆོད་དབྱངས་སུ་འབུལ་ལམ་ཞུས་སོང་། སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་མགོན་པོ་མཆོག་སྐུ་ན་ཆུང་དུས་སུ་ལྷ་མོ་འཁྲབ་མྱོང་ཡོད་ཅེས་ཐུགས་དྲན་གསོ་མཛད་པ་བརྒྱུད་ཞབས་བྲོ་འཁྲབ་རྒྱུ་ནི་རྒྱ་རིགས་ཚོས་བོད་ཀྱི་ཞབས་བྲོ་འཁྲབ་ཐུབ་ཀྱི་ཡོད་ཀྱང་བོད་ཀྱི་རྣམ་མཐར་གཏོང་རྒྱུའི་ལམ་ལུགས་དེ་བོད་ཀྱི་ཐུན་མོང་མ་ཡིན་པའི་རིག་གཞུང་ཞིག་ཡིན་པ་ལས་རྒྱ་རིགས་ཚོས་ཇི་ལྟར་བྱས་ཀྱང་རྣམ་མཐར་གཏོང་ཐུབ་ཀྱི་མེད་པས་དེ་ནི་བོད་ཀྱི་ཐུན་མིན་རིག་པའི་གཞུང་ལུགས་ཁྱད་པར་བ་ཞིག་ཡིན་པ་བཀའ་བསྩལ་ཡོད། བོད་ཀྱི་ཟློས་གར་ཚོགས་པ་དེ་བཞིན་བོད་ཀྱི་རིག་གཞུང་གི་ཆ་ཤས་ཤིག་ཡིན་པ་དང་ད་བར་འབྲེལ་ཡོད་ཚོས་ཧུར་ཐག་གནང་ཡོད་པ་མ་ཟད་མི་རབས་གསར་པ་ཚོས་ཀྱང་མུ་མཐུད་རྒྱུན་སྐྱོང་གནང་བཞིན་པར་ཡི་རང་བསྔགས་བརྗོད་མཛད་སོང་། དེ་བཞིན་མགོན་པོ་མཆོག་གིས་དེ་སྔ་བོད་ལ་སངས་རྒྱས་པའི་བསྟན་པ་དེ་མུ་སྟེགས་པ་དང་འདྲེས་པ་ལྟ་བུ་ཡོད་ནའང་ཕྱིས་སུ་བོད་ལ་དུས་འགྱུར་བྱུང་ནས་བཙན་བྱོལ་ལ་སླེབས་རྗེས་རྒྱལ་སྤྱིའི་ཁྲོད་བོད་ཀྱི་སངས་རྒྱས་པའི་ཆོས་བརྒྱུད་དེ་དཔལ་ནཱ་ལེནྡཱའི་ཆོས་བརྒྱུད་དྲི་མ་མེད་པ་ཞིག་ཡིན་པ་གསུང་མཁན་ཇེ་མང་དུ་ཕྱིན་ཡོད་པ་མ་ཟད། བོད་ཀྱི་ཆོས་དང་རིག་གཞུང་ལ་རྒྱལ་སྤྱིའི་ཁྲོད་མཐོང་དང་དོ་སྣང་ཆེན་པོ་སླེབས་པ་ནི་བཙན་བྱོལ་ལ་འབྱོར་རྗེས་ཀྱི་བྱས་རྗེས་ཤིག་ཡིན་པར་བཀའ་བ་དང་འབྲེལ། ཅི་སྟེ་བཙན་བྱོལ་བ་ཞིག་མ་ཆགས་པ་ཡིན་ན་སྔར་གྱི་ལམ་ལུགས་ལ་རང་སོར་ལྷག་པ་ལས་བོད་ཀྱི་ཆོས་དང་རིག་གཞུང་སོགས་ལྟ་གྲུབ་རྣམས་རྒྱལ་སྤྱིའི་ཁྲོད་ཁྱབ་སྤེལ་གནང་ཐུབ་ཀྱི་མེད་སྟབས་བཙན་བྱོལ་བར་གྱུར་བ་དེས་རྐྱེན་ངན་གྲོགས་ཤར་བྱུང་ཡོད་པ་བཀའ་བསྩལ་ཡོད། མགོན་པོ་༸གང་ཉིད་མཆོག་གིས་བོད་ཀྱི་འཐབ་རྩོད་ཀྱི་ནུས་པ་དེ་བདེན་པ་ལ་བརྟེན་ཡོད་སྟབས་རྒྱ་ནག་དེ་གོ་མཚོན་ལ་བརྟེན་ཡོད་སྐོར་བཀའ་བསྩལ་ཏེ་འཛམ་བུ་གླིང་གི་ལོ་རྒྱུས་ཁྲོད་གོ་མཚོན་གྱི་ནུས་པ་དེ་མཐར་འཁྱོལ་གྱི་མེད་པ་དང་བདེན་པའི་ནུས་པར་གྲུབ་འབྲས་ཤིག་སོན་གྱི་ཡོད་པ་ལྟར་བོད་ལྟ་བུ་དཔུང་སྟོབས་ཀྱི་ཆ་ནས་རྒྱ་ནག་ལ་ཁ་གཏད་བྱ་ཐུབ་ངེས་ཤིག་མིན་ཡང་བདེན་པའི་ནུས་པ་དེས་བོད་ཀྱི་བདེན་མཐའ་སེལ་ངེས་ཡིན་པར་བཀའ་བསྩལ་སོང་། ༸གོང་ས་༸སྐྱབས་མགོན་ཆེན་པོ་མཆོག་གིས་རང་གི་ཆོས་ལ་དད་པ་དང་གཞན་གྱི་ཆོས་ལ་གུས་བརྩི་བྱེད་དགོས་པ་བཀའ་བསྩལ་ཏེ་སྤྱིར་འཛམ་གླིང་འདིའི་ནང་དུ་ཆོས་ལུགས་མི་འདྲ་བ་ལས་ལྟ་གྲུབ་མི་འདྲ་བ་ཡོད་པ་དང་། བྱམས་པ་དང་བརྩེ་བ་ནི་ཆོས་ལུགས་ཚང་མས་གཅིག་མཚུངས་སུ་འདོད་ཀྱི་ཡོད་ཀྱང་ཆོས་ལུགས་འདྲ་མིན་རྐྱེན་པས་མི་གསོད་ཕྲག་སྦྱོར་བྱེད་བཞིན་པ་དེ་ནི་ཐབས་སྐྱོ་པོ་ཡིན་པ་དང་། ཆོས་ལུགས་མཐུན་སྒྲིལ་དགོས་རྒྱུ་ཤིན་ཏུ་ནས་གལ་ཆེན་པོ་ཡིན་པར་ལམ་སྟོན་བཀྲིན་ཆེ་བ་མཛད་ཡོད། དེ་བཞིན་སྲིད་སྐྱོང་བློ་བཟང་སེང་གེ་མཆོག་གིས་བོད་ཀྱི་ཟློས་གར་ཚོགས་པ་དེ་ལོ་ ༦༠ འཁོར་བའི་དུས་ཆེན་སྲུང་བརྩི་ཞུ་རྒྱུ་བྱུང་བ་འདི་ནི་༸གོང་ས་མཆོག་གི་བཀའ་དགོངས་ལམ་སྟོན་དང་། མི་རབས་གོང་མ་ཚོས་སྐུ་ལས་སྐྱོན་པ་ལས་བྱུང་བ་ཞིག་ཡིན་པ་དང་། ལྷག་པར་དུ་བོད་པའི་སློབ་གྲྭ་ཁག་གི་ནང་དུ་བོད་ཕྲུག་ཚོར་བོད་པའི་གཞས་དང་ཞབས་བྲོ་འཁྲབ་རྒྱུ་ཡོད་པ། ཕྱི་རྒྱལ་ཡུལ་གྲུ་ཁག་ཏུ་ཟློས་གར་ཟུར་པ་རྣམས་ནས་ཀྱང་བོད་ཀྱི་རིག་གཞུང་ཁྱབ་སྤེལ་གནང་སྟེ་རྒྱལ་སྤྱིའི་ཁྲོད་ངོམས་སུ་ཆོག་པ་ཞིག་བྱུང་བ་དེ་དག་མཐའ་དག་མགོན་པོ་༸གང་ཉིད་མཆོག་གི་ཐུགས་རྗེ་བཀའ་དྲིན་ལ་བརྟེན་ནས་གྲུབ་འབྲས་སྨིན་པ་ཞིག་ཡིན་པ་གསུངས་སོང་། དེ་རིང་གི་མཛད་སྒོའི་ཐོག་དགུང་ལོ་ ༩༣ ལ་ཕེབས་པའི་སྐུ་ངོ་བསམ་པོ་འཇིགས་མེད་དབང་ཆེན་ལགས་སུ་བོད་གཞིས་བྱེས་གཉིས་ཀྱི་ནང་ནས་བོད་ཀྱི་རོལ་ཆ་མཁན་སྐུ་ན་བགྲེས་ཤོས་ཀྱི་མི་གཡང་དང་དཔེ་བཟང་ཕུལ་བྱུང་མི་སྣའི་གཟེངས་རྟགས་ཤིག་འབུལ་ལམ་ཞུས་ཡོད་པ་དང་མ་ཟད། ཚོགས་ཁང་གསར་པའི་སྦྱིན་བདག་ཁག་གཅིག་ལ་ཐུགས་རྗེ་ལེགས་འབུལ་གྱི་ཕྱག་རྟགས་བཅས་གསོལ་བསྩལ་གནང་སོང་།

དེ་རིང་བཞུགས་སྒར་༸རྒྱལ་བའི་ཕོ་བྲང་དུ་སྔ་དྲོ་ཚོུད་ ༨ པ་ཙམ་ལ་འབྲས་ལྗོངས་བཻ་རོ་ཙ་ན་བོད་ཀྱི་རིག་གཞུང་གཅེས་འཛིན་ཁང་གི་དགེ་ལས་སློབ་ཕྲུག་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དམིགས་བསལ་མཇལ་ཁ་དང་ལམ་སྟོན་བཀའ་སློབ་ཞུས་སོང་། དེ་རིང་ཟླ་ ༡༠ ཚེས་ ༢༩ ཉིན་སྔ་དྲོར་རྒྱ་གར་བྱང་ཤར་ཁུལ་དུ་ཆགས་པའི་འབྲས་ལྗོངས་མངའ་སྡེའི་ནང་རྟེན་གཞི་བྱས་པའི་བཻ་རོ་ཙ་ན་བོད་ཀྱི་རིག་གཞུང་གཅེས་འཛིན་ཁང་གི་དགེ་སློབ་གཙོས་པའི་གུ་རུང་དང་། བལ་ཡུལ། ཤར་པ།  ལེབ་ཆ། ཅེཏ་རི། འབྲས་ལྗོངས་སོགས་ཁྱོན་མི་གྲངས་ ༡༨༥ ལྷག་བཞུགས་སྒར་དུ་ཆེད་བཅར་གྱིས་༸གོང་ས་མཆོག་གི་མཇལ་ཁ་ཞུས་པ་དང་འབྲེལ་མགོན་པོ་༸གང་ཉིད་མཆོག་གིས་རིག་གཞུང་གལ་གནད་སྐོར་ངོ་སྤྲོད་བསྩལ་བ་དང་དང་སྦྲགས་ཏེ་ཕྱི་ལོ་ ༡༩༤༩ དང་ ༡༩༥༠ ནས་བཟུང་རྒྱ་གཞུང་གིས་བོད་མིར་དྲག་གནོན་དང་དགོན་པ་གཏོར་བཅོམ་གྱིས་བོད་མི་འབུམ་མང་པོ་དམར་གསོད་བཏང་ཡོད་ཀྱང་། བོད་མི་རིགས་ཀྱི་སེམས་ཤུགས་དང་ཞེན་ཁོག་དེ་བརླག་མེད་པ་དང་སྒོས་ཧི་མཱ་ལ་ཡའི་རི་རྒྱུད་ལ་ཡོད་པའི་མི་རིགས་རྣམས་བོད་ཀྱི་ཆོས་དང་རིག་གཞུང་དང་འབྲེལ་བ་ཡོད་པ་ཞིག་ཡིན་སྟབས་ཧི་མཱ་ལ་ཡའི་རི་རྒྱུད་ཀྱི་མི་རིགས་ནས་སོ་སོར་ཡོད་པའི་རང་དབང་གི་གོ་སྐབས་སྤྱད་དེ་མུ་མཐུད་སངས་རྒྱས་པའི་ཆོས་བདག་གཅེས་གནང་དགོས་པ་ལམ་སྟོན་བཀྲིན་ཆེ་བ་བསྩལ་ཡོད་པ་རེད། དེ་བཞིན་༸གོང་ས་མཆོག་གིས་ལྟ་གྲུབ་ཐོག་ནས་ནང་པའི་ཆོས་བརྒྱུད་དེ་ཚན་རིག་དང་བསྟུན་ནས་འགྲོ་མཁན་ཞིག་ཡིན་པས་བོད་མིས་གཙོས་པའི་ཧི་མཱ་ལ་ཡ་རི་རྒྱུད་ཀྱི་མི་མང་ནས་དེར་སྤོབས་པ་བྱེད་དགོས་པ་དང་ཆབས་ཅིག་ཏུ་དབང་རྣོན་ཆོས་ཀྱི་རྗེས་འབྲང་པ་ཞིག་བྱེད་དགོས་གལ་ཡིན་པ་བཀའ་བསྩལ་སོང་། ༸གོང་ས་མཆོག་གིས་བོད་མི་ལྟ་བུར་མཚོན་ན་རང་ཉིད་ཀྱི་ལུང་པ་དང་བྲལ་ཡོད་ཀྱང་བོད་ཀྱི་བདེན་མཐའ་ཏན་ཏན་སེལ་ཐུབ་ངེས་ཡིན་སྐོར་བཀའ་བསྩལ་དང་འབྲེལ་ཏེ་ཧི་མཱ་ལ་ཡའི་མི་རིགས་ཚོས་བོད་ཀྱི་སངས་རྒྱས་ཀྱི་བསྟན་པ་དེར་སློབ་སྦྱོང་གནང་ཐོག་ཉམས་པ་སོར་ཆུད་དང་མི་ཉམས་གོང་འཕེལ་གནང་དགོས་པ་བཀའ་བསྩལ་ཡོད། གཞི་རྩའི་འབྲས་ལྗོངས་བཻ་རོ་ཙ་ན་བོད་ཀྱི་རིག་གཞུང་གཅེས་འཛིན་ཁང་ནི་དེ་སྔར་མགོན་པོ་༸གང་ཉིད་མཆོག་གིས་འབྲས་ལྗོངས་ནང་བོད་པའི་ཐུན་མོང་མ་ཡིན་པའི་ཆོས་དང་རིག་གཞུང་སྲུང་སྐྱོབ་གནང་དགོས་པར་བཀའ་བསྩལ་མཛད་པ་ལྟར་ཕྱི་ལོ་ ༡༩༩༩ ལོར་རྒན་བྱམས་པ་ཆོས་འཕེལ་ལགས་ཀྱིས་གཙོས་པའི་དང་བླངས་བ་ཁག་གཅིག་ནས་འགན་ཁུར་གྱིས་ཆེད་འཛུགས་གནང་བའི་སློབ་གཉེར་ཁང་ཞིག་ཆགས་ཀྱི་ཡོད་པ་རེད། ད་ཆ་སློབ་གཉེར་ཁང་དབུ་བརྙེས་ནས་ལོ་ངོ་ ༢༠ འཁོར་གྱི་ཡོད་པ་རེད། སློབ་གཉེར་ཁང་དེའི་ནང་བོད་སྐད་དང་བོད་ཡིག  དེ་བཞིན་ཀུན་བཟང་བླ་མའི་ཞལ་ལུང་། སྤྱོད་འཇུག་ལས་བྱང་ཆུབ་སེམས་དང་སྟོང་ཉིད། དེ་བཞིན་བར་དོའི་སྐོར་བོད་སྐད་དང་དབྱིན་ཇི། བལ་སྐད་བཅས་ནང་སློབ་ཁྲིད་གནང་གི་ཡོད་པ་དང་། སློབ་གཉེར་ཁང་དེ་ཐོག་མ་ཆེད་འཛུགས་གནང་མཁན་ཁོངས་སུ་ཡོད་པ་དང་ནང་ཆོས་སློབ་ཁྲིད་གནང་མཁན་རྒན་བྱམས་པ་ཆོས་འཕེལ་ལགས་ཡིན་པ་རེད།

ཁ་སང་ཕྱི་ཚེས་ ༢༨ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་༸རྒྱལ་བའི་ཕོ་བྲང་དུ་གཟིམ་ཆུང་མཇལ་མང་སྐབས་མ་སུ་རིར་རྟེན་གཞི་བྱས་པའི་ལྦན་བྷག་ཨལ་ལཎ་གྱི་སློབ་ཕྲུག་ཁག་གཅིག་ལ་དམིགས་བསལ་མཇལ་ཁ་བསྩལ་བ་དང་སྦྲགས། བོད་ཀྱི་སྐད་ཡིག་ལ་སློབ་སྦྱོང་བྱེད་དགོས་གལ་ཡིན་པའི་སྐོར་ལ་ལམ་སྟོན་མཛད་འདུག སྐབས་དེར་མགོན་པོ་༸གང་ཉིད་མཆོག་གིས་སློབ་ཕྱུག་ཁྱེད་རང་ཚོ་རིམ་བཞིན་སློབ་སྦྱོང་བྱས་ནས་སློབ་མཐར་སོན་པའི་རྗེས་སུ་བོད་མི་སྤྱི་བོ་གནམ་བསྟན་ཡོངས་དང་སྒོས་སུ་གཞིས་བཞུགས་བོད་མི་ཚོའི་ཆེད་དུ་ཞབས་འདེབས་བསྒྲུབ་ཐུབ་པར་སེམས་ཤུགས་བསྐྱེད་དགོས་པར་ལམ་སྟོན་བསྩལ་བ་མ་ཟད། དེ་ལྟར་ཞབས་འདེགས་བསྒྲུབ་པར་བོད་ཡིག་དེ་ཧ་ཅང་གལ་ཆེན་པོ་ཆགས་ཡོད་པ་དང་། ཁྱད་པར་དུ་འཛམ་གླིང་འདིའི་ཐོག་ལ་ནང་པ་སངས་རྒྱས་པའི་ལྟ་གྲུབ་དང་སེམས་ཁམས་རིག་པ། དེ་བཞིན་གཏན་ཚིགས་རིག་པ་བཅས་འགྲེལ་བརྗོད་བྱེད་པར་བོད་ཀྱི་སྐད་ཡིག་འདི་ལེགས་ཤོས་ཡིན་སྟབས་ཁྱེད་རང་ཚོའི་ངོས་ནས་བོད་ཡིག་ལ་སློབ་སྦྱོང་བྱེད་དགོས་ཞེས་ལམ་སྟོན་བསྩལ་འདུག དེ་བཞིན་མགོན་པོ་༸གང་ཉིད་མཆོག་གིས་ནང་པའི་ལྟ་གྲུབ་དེ་དག་ཧ་ཅང་གལ་ཆེན་པོ་ཆགས་ཡོད་པས་དེ་རྣམས་སློབ་ཁྲིད་གནང་དགོས་གལ་ཡིན་པ་དང་། ལྷག་པར་དུ་དེང་སྐབས་ཚན་རིག་པ་ཆོས་ལ་དོ་སྣང་མེད་མཁན་ཚོས་ཀྱང་ནང་པའི་ལྟ་གྲུབ་རྣམ་གཞག་བཤད་སྐབས་དོ་སྣང་ཆེན་པོ་གནང་གི་ཡོད་སྐོར་བཀའ་བསྩལ་དང་ཆབས་ཅིག རིམ་བཞིན་འཛམ་གླིང་སྤྱི་ཡོངས་ལ་ཆོས་ཀྱི་བཀའ་མོལ་གང་ཡང་མེད་པར་ང་ཚོ་བོད་མི་ཚོས་རྒྱ་གར་འཕགས་པའི་ཡུལ་གྱི་དཔལ་ནཱ་ལེནྡཱའི་དྲི་མ་མེད་པའི་ཆོས་བརྒྱུད་སྔར་ནས་དུས་ད་ལྟ་བར་ཐོས་བསམ་སྒོམ་གསུམ་གྱི་ཐོག་ནས་འཐུས་ཚང་བདག་གཅེས་གནང་བའི་ནང་པའི་ལྟ་གྲུབ་དེ་དག་ཤེས་ཡོན་གྱི་ལམ་ལུགས་ཐོག་ནས་ཞབས་འདེགས་ཤིག་བསྒྲུབ་ཐུབ་རྒྱུ་ཡོད་སྟབས་གཞོན་སྐྱེས་ཁྱེད་ཅག་གིས་ཤུགས་སྣོན་རྒྱག་དགོས་ཞེས་བཀའ་བསྩལ་འདུག ༸གོང་ས་མཆོག་གིས་ད་དུང་དེ་ལྟར་གནང་ཐུབ་ཚེ་གཞན་ཕན་གྱི་བྱ་བ་དང་བོད་སྤྱིའི་མཚན་མཐོང་ལའང་དགེ་མཚན་ལྡན་ཡོད་པ་བཀའ་བསྩལ་འདུག

ཕ་རན་སི་ལྷོ་ཕྱོགས་གྲོང་ཁྱེར་ Pau ནང་རྒྱ་གཞུང་གི་ཁུང་རྩི་སློབ་གླིང་སྒོ་འབྱེད་གཉེར་བའི་ཉིན་མོར་ཕ་རན་སི་བོད་རང་བཙན་སློབ་ཕྲུག་ཚོགས་པ་དང་བོད་དོན་རྒྱབ་སྐྱོར་བས་ཁུལ་དེའི་གྲོང་ཁྱེར་སྤྱི་ཁྱབ་དང་ཆེས་སྡུག་རྩུབ་ཆེ་བའི་དབང་ཆ་གཅིག་བསྡུས་རིང་ལུགས་རྒྱ་ནག་གཉིས་དབར་གྱི་ལག་འབྲེལ་གྱིས་བྱ་སྤྱོད་སྤེལ་བར་ངོ་རྒོལ་གྱི་ལས་འགུལ་ཤུགས་ཆེ་གནང་འདུག ཁ་སང་ཕྱི་ཚེས་ ༢༨ ཉིན་གྱི་ཕྱི་དྲོ་ཕ་རན་སི་ལྷོ་ཕྱོགས་གྲོང་ཁྱེར་ Pau ནང་རྒྱ་ནག་གཞུང་ཚབ་པ་ Lu Shaye དང་ Pau གྲོང་ཁྱེར་སྤྱི་ཁྱབ་པ་ Francois Bayrou ལྷན་འཛོམས་ཐོག་གྲོང་ཁྱེར་དེར་རྟེན་གཞི་བྱས་པའི་ Pau གཙུག་ལག་སློབ་གཉེར་ཁང་དུ་ཁུང་རྩི་སློབ་གཉེར་སྒོ་འབྱེད་གཉེར་འདུག་པ་དང། སྐབས་དེར་བོད་རང་བཙན་སློབ་ཕྲུག་ཚོགས་པ་དང། France Tibet ཞེས་པའི་བོད་དོན་རྒྱབ་སྐྱོར་ཚོགས་པ། དེ་བཞིན་འགྲོ་བ་མིའི་ཐོབ་ཐང་རྩོད་ལེན་པའི་ཚོགས་པ་བཅས་ཀྱིས་བོད་ཀྱི་རྒྱལ་དར་དང། རྒྱ་གཞུང་གི་བྱ་སྤྱོད་ལ་སྐྱོན་བརྗོད་ཀྱི་ཕྲེད་དར་སོགས་བསྣམས་ཏེ་ཁུང་རྩི་སློབ་གླིང་ནི་རྒྱ་ནག་བཙན་རྒྱལ་རིང་ལུགས་ཀྱི་ལག་ཆ་གཙོ་བོ་རེད་ཅེས་ངོ་རྒོལ་གནང་འདུག སྐབས་དེར་འདི་ག་རླུང་འཕྲིན་ཁང་ནས་ཕ་རན་སི་བོད་རང་ཙན་སློབ་ཕྲུག་ཚོགས་པའི་ལས་འགུལ་བ་བསྟན་རྣམ་ལགས་ལ་གནས་འདྲི་ཞུས་པར་ཉེ་བའི་ལོ་ཤས་ནང་དུ་ཨ་མི་རི་ཀ་གཙོས་མང་གཙོའི་རྒྱལ་ཁབ་ཆེས་གྲས་ཁག་ཏུ་ཁུང་རྩི་སློབ་གླིང་དོག་ཟོན་གྱི་སྒོ་རྒྱག་བཞིན་པའི་གནས་སྟངས་འབྱུང་བཞིན་ཡོད་པ་དེ་ལྟར་ཡང། ཕ་རན་སི་ནང་དུ་ཆ་མཚོན་ན་ཉེ་བའི་ལོ་ཤས་ནང་ཁུང་རྩི་སློབ་གླིང་ལྟེ་གནས་ཁང་མང་དུ་འགྲོ་བཞིན་འདུག་ཅེས་ངོ་སྤྲོད་གནང་སོང་། རྩ་བའི་རྒྱ་ནག་གཞུང་འབྲེལ་གྱི་ཁུང་རྩི་སློབ་གླིང་ཞེས་པ་དེ་ནི་ཕྱིའི་རྒྱལ་ཁབ་ཁག་གི་མཐོ་སློབ་ཁག་ཏུ་རྒྱ་སྐད་དང་རྒྱ་ཡིག་སློབ་ཁྲིད་བྱེད་ཚུལ་གྱི་མིང་ཐོག་ནས་མཐོ་སློབ་ཁག་གི་ཤེས་ཡོན་སློབ་གསོའི་རང་དབང་ལ་ཐེ་གཏོགས་དང་འབྲེལ་རྒྱ་ནག་དམར་ཤོག་གི་ལྟ་སྤྱོད་དར་སྤེལ་དང་རྒྱལ་སྤྱིའི་ཁྲོད་རྒྱ་ནག་ལ་ལྟ་ཕྱོགས་འགྱུར་བ་གཏོང་ཐབས་བྱེད་བཞིན་པའི་རྒྱ་ནག་གི་འཇམ་པོའི་སྟོབས་ཤུགས་ལག་ཆ་གཙོ་བོ་ཞིག་ཆགས་ཀྱི་ཡོད་པ་རེད། བརྒྱུད་ལམ་ཁག་ཏུ་ཐོན་པར་གཞིགས་ན་ཁ་སང་སྒོ་འབྱེད་བྱས་པའི་ཁུང་རྩི་སློབ་གླིང་ཁང་དེ་ཕ་རན་ནང་དུ་ཁུང་རྩི་སློབ་གླིང་ ༢༠ པ་དེ་ཆགས་ཀྱི་ཡོད་པ་རེད་འདུག ད་རེས་གྲོང་ཁྱེར་ Pau ནང་དུ་ཁུང་རྩི་སློབ་གླིང་སྒོ་འབྱེད་ཀྱི་ཉིིན་གཉིས་ཀྱི་སྔ་རོལ་དུ་ལས་འགུལ་སྤེལ་མཁན་འབྲེལ་ཡོད་ཚོགས་པ་ཁག་ནས་མཉམ་འབྲེལ་གྱིས་ཐེངས་དེའི་ཤེས་ཡོན་མཉམ་འབྲེལ་གྱི་ལས་དོན་ལ་ངོ་རྒོལ་ཀྱིས་གསར་འགོད་གསལ་བསྒྲགས་ཤིག་ཀྱང་སྤེལ་འདུག གྲོང་ཁྱེར་ Pau ནང་དུ་ཁུང་རྩི་སློབ་གླིང་སྒོ་འབྱེད་བྱས་པའི་ཉིན་མོ་དེ་ནས་ཁུལ་དེའི་ནང་གི་ཤེས་ཡོན་གྱི་རང་དབང་ལ་དོ་ཕོག་འགྲོ་ཉེན་ཡོད་པ་དང། ལྷག་པར་དུ་ལན་ཁུང་རྩི་སློབ་ཁང་དང་ལག་འབྲེལ་བྱས་པ་འདིས་རྒྱ་ནག་གི་བཙན་གནོན་འོག་ཡོད་པའི་བོད་དང་ཡུ་གུར་སོགས་ཀྱི་མང་ཚོགས་ཀྱི་རང་དབང་དང་ཐོབ་ཐང་ལ་ཁྱད་གསོད་བྱས་པ་ཞིག་ཡིན་སྐོར་འགྲེལ་བརྗོད་གནང་འདུག གཞི་རྩའི་ཁུང་རྩི་སློབ་གླིང་ཞེས་པའི་ལས་འཆར་འདི་ནི་རྒྱ་ནག་གཞུང་འབྲེལ་ཤེས་ཡོན་ལྷན་ཁང་འོག་ཕྱི་ལོ་༢༠༠༤ ལོར་དངོས་སུ་ཆེད་བཙུགས་བྱས་ནས་ད་ལྟའི་ཆར་ལྷོ་བྱང་ཨ་མི་རི་ཀ་དང་ཡོ་རོབ། ཨ་ཕི་རི་ཀ། དེ་བཞིན་ཨོ་སི་ཊོ་ལི་ཡ་བཅས་འཛམ་གླིང་གི་གླིང་ཆེན་དྲུག་ནང་དུ་ =ཁུང་རྩི་སློབ་གླིང་ལྟེ་གནས་ཁང་ ༥༣༠ ལྷག་ཆེད་བཙུགས་བྱས་ཟིན་འདུག་པ་དང། རྒྱ་ནག་གཞུང་གི་འཆར་གཞི་ལྷར་ཕྱི་ལོ་ ༢༠༢༠ ནང་ཚུད་ལ་འཛམ་གླིང་ནང་དུ་ཁུང་རྩི་སློབ་གླིང་ལྟེ་གནས་ཁང་ ༡༠༠༠ ཆེད་འཛུགས་བྱ་འཆར་ཡོད་པ་རེད་འདུག འོན་ཀྱང་འདས་པའི་ལོ་ཤས་ནང་དུ་ཨ་རི་དང་ཁེ་ན་ཌ་སོགས་ཀྱི་མཐོ་སློབ་ཁག་ནས་རྒྱ་ནག་གི་ཁུང་རྩི་སློབ་གླིང་ལས་དོན་ལ་དོག་ཟོན་གྱིས་སྒོ་བརྒྱབ་པའི་གནས་ཚུལ་བྱུང་ཡོད་པ་རེད། དེ་བཞིན་ཨ་རིའི་ནང་ནང་རྟེན་གཞི་བྱས་པའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པས་འདི་ལོའི་ཕྱི་ཟླ་གསུམ་པའི་ནང་རྒྱ་ནག་གིས་ཐབས་བརྒྱ་བྱུས་སྟོང་གིས་ཁུང་རྩི་ཤེས་ཡོན་ལྟེ་གནས་ཆེད་འཛུགས་ཀྱིས་ཕྱི་ཕྱོགས་སུ་རྒྱ་ནག་གི་གནོད་ཤུགས་ཁྱབ་སྤེལ་དང་ཤེས་ཡོན་གྱི་རང་དབང་ཉམ་དམས་སུ་གཏོང་བཞིན་ཡོད་པ་གསལ་འདོན་དང་སྦྲགས། ཕྱི་ཕྱོགས་ཀྱི་མཐོ་སློབ་དང་གཙུག་ལག་སློབ་ཆེན་སོགས་ཀྱིས་ལག་བསྟར་བྱེད་དགོས་པའི་སྒྲིག་ཡིག་དོན་ཚན་བཅུ་གཉིས་ཅན་ཞིག་ཁྱབ་བསྒྲགས་ཀྱིས་རྒྱ་ནག་གི་གནོད་ཤུགས་ལ་བཀག་འགོག་བྱེད་དགོས་པ་ཡང་གསུངས་ཡོད་པ་རེད།