Tibetan Royal Year of 2151 | Year of the Wood Dragon

གསར་འགྱུར།

སོག་ཡུལ་གྱི་ནང་པའི་དགོན་སྡེ་ཁག་ཏུ་ནང་ཆོས་སློབ་སྦྱོང་བྱེད་ས་ཡོད་པ་ཞིག་བཟོ་དགོས།

དེའང་ཟླ་བ་འདིའི་ཕྱི་ཚེས་ ༢༧ ཉིན་བཞུགས་སྒར་༸རྒྱལ་བའི་ཕོ་བྲང་དུ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སོག་པོའི་རུ་ཁག་ཅིག་ལ་གཟིམ་ཆུང་མཇལ་ཁའི་བཀའ་དྲིན་བསྩལ་བ་དང་སྦྲགས། སོག་ཡུལ་གྱི་ནང་པའི་དགོན་སྡེ་ཁག་ཏུ་ནང་ཆོས་སློབ་སྦྱོང་བྱེད་ས་ཡོད་པ་ཞིག་བཟོ་དགོས་གལ་ཡིན་པའི་ལམ་སྟོན་བཀའ་སློབ་བསྩལ་འདུག སྐབས་དེར་༸གོང་ས་མཆོག་གིས་ང་རང་ཚོ་བོད་དང་སོག་པོ་ནང་ཡོད་པའི་ནང་པའི་གཞུང་ཆེན་ཚད་མ་རིག་པ་དང་དབུ་མ། དེ་བཞིན་ཕར་ཕྱིན་གྱི་གཞུང་ལུགས་དག་གལ་ཆེན་པོ་ཆགས་ཡོད་སྟབས། ཁྱེད་རང་ཚོས་དེ་དག་གི་ཐོག་སློབ་གཉེར་གང་ལེགས་ཡོད་པའི་ཁར་དེང་རབས་ཀྱི་ཚན་རིག་ཐད་ལའང་སློབ་སྦྱོང་གང་ཐུབ་གནང་ཚེ་དུས་རབས་ཉེར་གཉིས་དང་ཉེར་གསུམ་ནང་ལ་ནཱ་ལེནྡྲའི་ཆོས་བརྒྱུད་དེ་རྒྱུན་གནས་ཐུབ་པར་ཞབས་འདེགས་ཞུ་ཐུབ་ངེས་ཡིན་པ་ལམ་སྟོན་བཀྲིན་ཆེ་བ་བསྩལ་འདུག ད་དུང་༸གོང་ས་མཆོག་ནས་སྤྱིར་སྟོན་པའི་དམ་ཆོས་ལ་རྣམ་པ་གཉིས་ཡོད་པ་དང་། དེའང་མངོན་པ་མཛོད་ལས། སྟོན་པའི་དམ་ཆོས་རྣམ་གཉིས་ཏེ།། ལུང་དང་རྟོགས་པའི་བདག་ཉིད་དོ།། ཞེས་སོ་གསུངས་པ་ལྟར་ལུང་རྟོགས་ཀྱི་བསྟན་པ་གཉིས་འཛིན་སྐྱོང་སྤེལ་གསུམ་གནང་བར་བཤད་སྒྲུབ་གཉིས་ཀྱི་ཐོག་ནས་གནང་དགོས་གལ་ཡིན་པའི་བཀའ་བསྩལ་འདུག ༸གོང་ས་༸སྐྱབས་མགོན་ཆེན་པོ་མཆོག་གིས་སྐབས་དེར་མཇལ་ཁར་བཅར་བའི་ནང་དེ་སྔ་གདན་ས་ཆེན་མོའི་ནང་སློབ་གཉེར་གནང་མྱོང་མཁན་སོག་པོའི་རིན་པོ་ཆེ་ཞེག་ལ་དཔེ་བཞག་མཛད་དེ་མ་འོངས་པར་སོག་ཡུལ་དུ་ནང་པའི་དགོན་སྡེ་ཡོད་ཁག་ཏུ་ནང་ཆོས་སློབ་སྦྱོང་ཡག་པོ་བྱེད་ས་ཡོད་པ་ཞིག་བཟོ་དགོས་པ་མ་ཟད། ནང་ཆོས་སློབ་སྦྱོང་གནང་རྒྱུ་དེ་གྲྭ་བཙུན་ཁོ་ན་ཙམ་མིན་པར་ཁྱིམ་པ་ཕོ་མོ་ཚོས་ཀྱང་སློབ་གཉེར་གནང་ཐུབ་དགོས་གལ་ཡིན་པའི་ལམ་སྟོན་མཛད་འདུག

ཧྥ་རན་སིའི་རྒྱལ་སྤྱིའི་རང་བཞིན་ལྡན་པའི་རྐང་སྤོལ་འགྲན་བསྡུར་ཐོག་བོད་ཀྱི་རྒྱལ་དར་འཕྱར་བ།

ཧྤ་རན་སིའི་རྒྱལ་ས་ lyon ཁུལ་དུ་རྒྱལ་སྤྱིའི་རང་བཞིན་ལྡན་པའི་རྐང་རྩེད་སྤོ་ལོའི་འགྲན་བསྡུར་ཞིག་གནང་བཞིན་པ་དང་བསྟུན་ཁ་ཉིན་ཕྱི་ཚེས་ ༢༨ ཉིན་གྱི་ཁུལ་དེའི་ཆུ་ཚོད་ ༡༌༣༠ ཐོག་ཧྥ་རན་སའི་རྒྱལས་ས་ lyon རུ་ཁག་ Olympique Lyonnaise དང་རྒྱལ་ས་ Nantes ཡི་ FC Nantes ཞེས་པའི་རུ་ཁག་གཉིས་དབར་རྩེད་འགྲན་གནང་སྐབས་ lyon རུ་ཁག་གི་རྒྱབ་སྐྱོར་བ་ Bad Gones ཞེས་པའི་ཚོགས་པས་གོ་སྒྲིག་འོག་དང་དུ་བླངས་ཀྱི་མི་སྣ་བརྒྱ་ཕྲག་ཁ་ཤས་ཤིག་གིས་ཕྱག་ལ་བོད་རྒྱལ་དར་གྱི་ཚོན་གཞི་ཅན་གྱི་ཤོག་བུ་བསྣམས་ཏེ་དེ་དག་ལས་གྲུབ་པའི་བོད་ཀྱི་རྒྱལ་དར་ཆེན་པོ་ཞིག་དང་དཀྱིལ་དུ་དབྱིན་ཡིག་ཐོག་ free Tibet ཞེས་འཁོད་པའི་སྦྱར་ཡིག་བསྣམས་ཐོག་གཡས་གཡོན་དུ་རས་གཟུགས་སུ་ཡོད་པའི་བོད་ཀྱི་རྒྱལ་དར་ཁ་ཤས་ཤིག་འཕྱར་ཏེ་བོད་དོན་ལ་རྒྱབ་སྐྱོར་གྱི་རྣམ་པ་ཤུགས་ཆེ་བཏོན་འདུག རྒྱལ་སྤྱིའི་རྩེད་འགྲན་ཆེ་གྲས་ཤིག་གི་ཐོག་བོད་ཀྱི་རྒྱལ་དར་འཕྱར་དོན་ནི་རྒྱ་ནག་གི་ཁུལ་དུ་བརྙན་འཕྲིན་བརྒྱུད་རྩེད་འགྲན་དེ་ཐད་གཏོང་གནང་བཞིན་ཡོད་སྟབས། རྒྱ་ནག་གཞུང་གིས་བོད་དེ་བཙན་བཟུང་བྱས་ནས་མི་ལོ་ཧྲིལ་པོ་ ༦༠ འཁོར་ཟིན་ཡང་བོད་ཀྱི་བདེན་མཐའ་མ་སེལ་བར་དེ་མུར་ལྷག་ནས་ཡོད་པའི་བརྡ་ལན་སྤྲད་རྒྱུ་དང་། སྤྱིར་རྐང་རྩེད་སྤོ་ལོའི་འགྲན་བསྡུར་དེ་ཉིན་རྒྱབ་ལ་རྩེ་བཞིན་ཡོད་ཀྱང་དུས་ཚིགས་དེ་དང་བསྟུན་ནས་དུས་ཚོད་སྔ་སྣུར་གྱིས་རྩེད་འགྲན་པ་དང་མང་ཚོགས་ནས་དེར་འདོད་བློ་མ་ཁེངས་པ་ཞིག་བྱུང་ཡོད་སྟབས། ཁུལ་དེར་ཡོད་པའི་བོད་རང་བཙན་སློབ་ཕྲུག་ཚོགས་པའི་རྒྱུན་ལས་བསྟན་འཛིན་རྣམ་རྒྱལ་ལགས་ཀྱིས་ལས་འགུལ་དེ་སྤེལ་ཡོད་སྐོར་གསུངས་སོང་། དེ་བཞིན་དེ་རིང་གྲོས་ཚོགས་སུའང་བོད་མི་མང་སྤྱི་འཐུས་ཟམ་མདོ་བྱམས་པ་ཚེ་རིང་ལགས་ནས་ཁ་ཉིན་ཧྥ་རན་སིའི་རྐང་སྤོལ་རྩེད་འགྲན་ཐོག་ཏུ་བོད་དོན་ལ་བརྩེ་ཞེན་ཡོད་མཁན་མི་མང་བརྒྱ་ཕྲག་མང་པོས་བོད་ཀྱི་རྒྱལ་དར་བཟོས་ནས་དཀྱིལ་དུ་བོད་རང་བཙན་འཁོད་པའི་སྦྱར་ཡིག་འཕྱར་བཞིན་བོད་དོན་ལ་རྒྱབ་སྐྱོར་གནང་བར་ཐུགས་རྗེ་ཆེ་ཞུས་པ་དང་སྦྲགས། ངོ་དེབ་བཀོལ་སྤྱོད་གནང་མཁན་བོད་རིགས་ཚོས་ཁྱབ་སྤེལ་གང་མང་གནང་དགོས་པ་གསུངས་སོང་། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ད་ལྟ་ཧྥ་རན་སིའི་རྩེད་འགྲན་དེའི་ཐོག་གཞི་རྩའི་འགྲོ་བ་མིའི་ཐོབ་ཐང་དང་བོད་ཀྱི་གནད་དོན་དེ་གལ་ཆེ་བར་མཐོང་ནས་མི་མང་སྟོང་ཕྲག་མང་པོས་རང་ཉིད་ཀྱི་ཚོར་བ་དང་འབྲེལ་ནས་རྒྱབ་སྐྱོར་གནང་བ་ཞིག་ཡིན་པ་དང་། རྒྱལ་སྤྱིའི་ཁྱོན་ཡོངས་ལ་ཤིན་ཅང་དང་ཧོང་ཀོང་ལ་རྒྱབ་སྐྱོར་དང་བརྒྱུད་ལམ་ཁག་ཏུ་ཁོང་ཚོའི་གནད་དོན་དང་འབྲེལ་བའི་གསར་འགྱུར་མང་པོ་འཐོན་བཞིན་ཡོད་ཀྱང་རྒྱལ་སྤྱིའི་མི་མང་ཁྲོད་དུ་༸གོང་ས་མཆོག་གི་ཐུགས་རྗེ་བཀའ་དྲིན་ལ་བརྟེན་ནས་བོད་ལ་རྒྱབ་སྐྱོར་གནང་མཁན་མང་བ་འབྱུང་བཞིན་པ་ནི་རྩ་ཆེན་པོ་ཞིག་རེད་ཅེས་གསུངས་ཡོད།

བཙན་བྱོལ་སྤྱི་ཚོགས་དང་ཕྱི་རྒྱལ་ཡུལ་གྲུ་ཁག་གི་བོད་མི་ཡོད་དོ་ཅོག་མཐུན་ལམ་རྡོག་རྩ་གཅིག་དྲིལ་ཐོག་འཁྲིད་རྒྱུར་འབད་དགོས་པའི་རེ་སྐུལ།

དེ་རིང་གྲོས་ཚོགས་ཀྱི་ལས་ཉིན་བརྒྱད་པའི་ཐོག་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་ལས་བསྡོམས་ཐོག་ཉིན་འཁྱོངས་བགྲོ་གླེང་དང་དྲི་བ་དྲིས་ལན་བཅས་གནང་བའི་ཁྲོད། བོད་ཀྱི་སྐུ་ཚབ་དོན་གཅོད་ཁང་ཁག་གི་གནས་བབ་དང་། རྒྱ་རིགས་འབྲེལ་མཐུད་པའི་ལས་དོན། རྒྱ་གར་མི་སེར་བཞེས་པའི་གནད་དོན། དེ་བཞིན་འགྲེམས་སྟོན་ཚན་པའི་ལས་གཞི་དང་དབུ་མའི་ལམ་གྱི་གོ་རྟོགས་ལས་གཞི་སོགས་ཀྱི་གནད་དོན་མང་དག་ཅིག་གི་ཐོག་ལ་འདྲི་རྩད་ལྷུག་པོ་གནང་སོང་། སྐབས་དེར་སྤྱི་འཐུས་ཁག་གཅིག་ནས་ད་ལྟའི་འཛིན་སྐྱོང་བཀའ་ཤག་གི་ལས་དོན་གནང་ཕྱོགས་སྐོར་ལས་འཕྲོས་ཏེ་ Australia  Sydney གྲོང་ཁྱེར་ནང་བོད་མི་རྣམས་ཤོག་ཁག་གཉིས་སུ་ཁ་གྱེས་ཡོད་པའི་གནད་དོན་དང་འབྲེལ། སྲིད་སྐྱོང་མཆོག་ནས་བཀའ་ཤག་གི་ལས་ཡུན་ལྷག་པའི་རིང་བོད་རྒྱ་ཆེ་མང་ཚོགས་རྣམས་མཐུན་ལམ་རྡོག་རྩ་གཅིག་དྲིལ་ཐོག་ནུས་པ་མཉམ་སྤུངས་དང་ཕྱོགས་གཅིག་ཏུ་ཁྲིད་ཐབས་སླད་འབད་བརྩོན་གནང་དགོ་ས་པའི་རེ་སྐུལ་ཞུས་སོང་། དེར་ཕྱི་དྲིལ་བཀའ་བློན་གཅིག་ལྕོགས་སྲིད་སྐྱོང་མཆོག་གིས་གཞི་རྩའི་ Sydney ནང་གི་གནད་དོན་དེ་དུས་ཡུན་གང་ཙམ་ཞིག་ནས་བྱུང་ཡོད་པ་དང་དཀའ་ངལ་སེལ་ཐབས་སླད་སྲིད་སྐྱོང་མཆོག་ཡུལ་དེར་གཞུང་འབྲེལ་འཚམས་གཟིགས་སུ་བསྐྱོད་སྐབས་ངོ་རྒོལ་གནང་མཁན་རྣམས་དང་འབྲེལ་བ་བྱ་རྒྱུའི་འདུན་པ་བསྟན་ཡོད་ཀྱང་ཁོང་རྣམས་ནས་འབྲེལ་བ་ཞུས་མེད་པ་འགྲེལ་བརྗོད་དང་སྦྲགས། སྲིད་སྐྱོང་མཆོག་ནས་ཆོལ་ཁའི་ཕྱོགས་ཞེན་ལ་མཐའ་ཅིག་ཏུ་མོས་མཐུན་མེད་པ་མ་ཟད། དེ་སྔ་སྲིད་སྐྱོང་གི་འོས་མིར་བཞེངས་པའི་སྐབས་སུའང་དེ་དག་ནས་རྒྱབ་སྐྱོར་ཞུ་ཐབས་གནང་མེད་པ་ལྟར་ད་ཆ་ཡིན་ཡང་དེ་ལྟར་གནང་གི་མེད་པའི་གསལ་བཤད་གནང་ཡོད། གནད་དོན་དེའི་ཐོག་སྤྱི་འཐུས་གཞན་ཞིག་ནས་ Australia འི་གནད་དོན་དེ་གྲོས་ཚོགས་སུ་གླེང་མོལ་གནང་ནས་སེལ་ཐུབ་ཐབས་མེད་པ་དང་དེའི་ཆེད་བཀའ་སྤྱི་གཉིས་ལས་གྲུབ་པའི་དམིགས་བསལ་ཚོགས་ཆུང་ཞིག་ཆེད་འཛུགས་ཀྱིས་བགྲོ་གླེང་དགོས་གལ་ཡིན་པའི་དགོངས་འཆར་ཕུལ་མཁན་ཡང་བྱུང་སོང་། བགྲོ་གླེང་སྐབས་ཆ་ཤས་བཞེས་མཁན་སྤྱི་འཐུས་ཁག་གཅིག་ནས་རྒྱ་རིགས་འབྲེལ་མཐུད་པའི་ཚོགས་འདུ་སྐོར་དང་འབྲེལ། དེའི་ནང་བཅར་མཁན་གཙོ་བོ་སུ་ཆགས་ཀྱི་ཡོད་མེད་དང་ཚོགས་བཅར་བ་རྣམས་ཕྱིར་རང་ཡུལ་དུ་ཕེབས་རྗེས་དོན་དངོས་བོད་དོན་ལ་ཕན་པའི་ཕྱག་ལས་ཇི་ཙམ་གནང་གི་ཡོད་མེད་དང་དེ་དག་ལྷན་འབྲེལ་ལམ་རྒྱུན་འཛིན་གནང་ཕྱོགས་བཅས་ཀྱི་སྐོར་བཀའ་འདྲི་ཞུས་སོང་བ་དང་། སྐབས་དེར་བཀའ་བློན་མཆོག་གིས་རྒྱ་རིགས་འབྲེལ་མཐུད་པའི་ཚོགས་འདུའི་ནང་ཕལ་ཆེ་བ་རྒྱ་རིགས་འབྲེལ་མཐུད་པ་དམིགས་བསལ་བཙུགས་པའི་རྒྱ་ཡིག་ཤེས་མཁན་གྱི་བོད་རིགས་མཐོ་རིམ་སློབ་མ་དང་སྤྱི་ཚོགས་ལས་འགུལ་བ་སོགས་ལྷན་འཛོམས་གནང་གི་ཡོད་པ་དང་། ཁོང་རྣམས་ནས་ཕྱིར་རང་ཡུལ་དུ་ཕེབས་ནས་སོ་སོའི་ས་གནས་ཀྱི་རྒྱ་རིགས་སློབ་ཕྲུག་གཙོས་པའི་མང་ཚོགས་ཁྲོད་ལ་བོད་དོན་ངོ་སྤྲོད་ལས་རིམ་གང་ཙམ་སྤེལ་གྱི་ཡོད་པ་གསུངས་སོང་བ་དང་ཆབས་ཅིག མ་འོངས་རྒྱ་རིགས་འབྲེལ་མཐུད་པའི་ཚོགས་འདུ་ཐེངས་བདུན་པ་དེ་ཕྱི་ཟླ་ ༧ ནང་འཚོགས་གཏེནཁེལ་ཡོད་པ་གསུངས་སོང་།  རྩ་བའི་ཐེངས་འདིའི་གྲོས་ཚོགས་ཀྱི་ལས་ཉིན་དང་པོའི་ཐོག་བོད་ནང་གི་ཛ་དྲག་གནས་སྟངས་སྐོར་དང་འབྲེལ་གྲོས་ཚོགས་འཐུས་མི་ཁག་གཅིག་གིས་བོད་རྒྱ་འབྲེལ་མོལ་གྱི་གནས་བབ་སྐོར་ལ་དྲི་བ་མང་དག་ཅིག་ཕེབས་པ་ལྟར།་ སྲིད་སྐྱོང་མཆོག་གིས་དེ་དག་ལ་བཀའ་ལན་གནང་སྐབས་ད་བར་བོད་རྒྱ་འབྲེལ་མོལ་གྱི་སྐུ་ཚབ་བསྐོ་བཞག་གནང་མེད་པ་དེ་༸གོང་ས་མཆོག་གི་བཀའ་དགོངས་གཞིར་བཟུང་བསྐོ་གཞག་གནང་མེད་པའི་ཁར། ༸དཔལ་ལྡན་དགའ་ལྡན་ཕོ་བྲང་གི་དྲུང་ཆེ་རྔ་བ་ཚེ་རྒྱམ་ལགས་ཀྱི་མཚན་འདོན་གནང་སྟེ་བོད་རྒྱ་འབྲེལ་མོལ་གྱི་ལས་དོན་ཐོག་དགའ་ལྡན་ཕོ་བྲང་གིས་ཐུསག་འགན་བཞེས་ཀྱི་ཡོད་སྐོར་གསུངས་ཡོད། ཕྱི་དྲིལ་ལས་ཁུངས་ཀྱི་ལས་བསྡོམས་ཐོག་བགྲོ་གླེང་གནང་བའི་ཁྲོད་སྤྱི་འཐུས་ཤིག་ནས་སྲིད་སྐྱོང་མཆོག་གིས་གྲོས་ཚོགས་རྭ་བའི་ནང་༸དཔལ་ལྡན་དགའ་ལྡན་ཕོ་བྲང་ཡིག་ཚང་གི་དྲུང་ཆེ་གཅིག་གི་མཚན་གསལ་འདོན་གནང་བའི་གནད་དོན་དེ་ལུང་འདྲེན་དང་སྦྲགས། ཆབ་སྲིད་ཀྱི་དབུ་ཁྲིད་ཞིག་ནས་བོད་རྒྱ་ཞི་མོལ་དང་འབྲེལ་བའི་བཀའ་མོལ་གནང་སྐབས་ཕྱི་ནང་གསང་གསུམ་ཡོད་པའི་ཐོག་ནས་གནང་རོགས་ཞེས་དགོངས་འཆར་ཕུལ་མཁན་ཡང་བྱུང་སོང་། གཞན་ཡང་གྲོས་ཚོགས་སུ་སྲིད་སྐྱོང་མཆོག་ནས་རྒྱ་གར་གྱི་མི་སེར་བཞེས་པའི་བོད་མི་ཚོ་དང་། ཕྱིའི་རྒྱལ་ཁག་ལ་བཞུགས་པའི་བོད་མི་ཚོས་རྒྱ་གར་གྱི་འོས་བསྡུ་དང་ཆབ་སྲིད་ལས་དོན་སོགས་ཀྱི་ནང་མངོན་གསལ་དོད་པོས་ཆ་ཤས་བཞེས་པ་དང་། སྤྱི་ཚོགས་དྲྭ་ལམ་ཐོག་མཆན་འགྲེལ་བཀོད་སོགས་གནང་ཚེ་ཆེ་ས་ནས་བོད་ཀྱི་རྩ་དོན་དང་། རྒྱ་གར་ནང་བཞུགས་པའི་བོད་མི་ཚོར་གནོད་སྐྱོན་ཐེབས་སྲིད་སྟབས་དེ་རིགས་ལ་དགོངས་པ་ངེས་པར་དུ་བཞེས་དགོས་པའི་སྐུལ་མ་གནང་ཡོད། བགྲོ་གླེང་གི་ལས་རིམ་ཐོག་བོད་མི་མང་སྤྱི་འཐུས་ཁག་གཅིག་ནས་དེ་སྔ་གྲོས་ཚོགས་སུ་ཕྱི་དྲིལ་བཀའ་བློན་མཆོག་ནས་རྒྱ་གར་ནང་བཞུགས་པའི་བོད་མི་ཚོར་Travel Document ཐོབ་ཐབས་གནང་རྒྱུ་ཡིན་སྐོར་གསུངས་པ་དེ་ད་ཆ་གནས་སྟངས་ཇི་ཆགས་དང་འབྲེལ་བཀའ་འདྲི་ཞུས་པར་ Travel Documet ཞེས་པ་དེ་རྒྱ་གར་ནང་ཁྲིམས་མཐུན་ཡིག་ཆ་ཞིག་མིན་སྟབས་དེ་སྔ་ཡོད་བཞིན་པའི་ IC ལག་དེབ་སེར་པོར་ཡར་རྒྱས་གང་འཚམ་བཏང་ཡོད་པ་གསུངས་སོང་། གཞི་རྩའི་དེ་རིང་གྲོས་ཚོགས་ལས་རིམ་དེའི་ཐོག་ཕྱི་དྲིལ་བཀའ་བློན་བློ་བཟང་སེང་གེ་མཆོག་གིས་འདས་ལོའི་ནང་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ནས་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་ཡང་སྲིད་ངོས་འཛིན་ཞུ་རྒྱུའི་ཐད་བསྩལ་བའི་གལ་ཆེའི་བཀའ་ཡིག་བོད་རྒྱ་དབྱིན་གསུམ་ཐོག་དེབ་གྲངས་ ༡༠༠༠ པར་བསྐྲུན་ཞུས་པ་དང་། མཉམ་འབྲེལ་རྒྱལ་ཚོགས་དང་ཡོ་རོབ་མཐུན་ཚོགས། དེ་བཞིན་Canada དང་། Australia སོགས་རྒྱལ་སྤྱིའི་རྒྱལ་ཁབ་ཁག་གི་འགྲོ་བ་མིའི་ཐོབ་ཐང་ཚན་པ་སོགས་སུ་བོད་དོན་གསུང་བཤད་དང་བོད་དོན་དང་འབྲེལ་བའི་ཡིག་ཆ་འགྲེམས་སྤེལ་ཞུས་པ། དབུ་མའི་ལམ་གྱི་ཟབ་སྦྱོང་ཐེངས་༡༠ དང་། རྒྱ་རིགས་དང་འབྲེལ་བའི་ལས་དོན་ཚོགས་འདུ་ཚོགས་པ། ཕྱི་དྲིལ་ཁྱབ་ཁོངས་བོད་ཀྱི་སྐུ་ཚབ་དོན་གཅོད་ལས་ཁུངས་ཁག་གི་ལས་བསྡོམས་སོགས་སྙན་སྒྲོན་གནང་ཡོད་པ་རེད། དེ་རིང་ཉིན་རྒྱབ་ཚོུད་ ༣ བར་སྤྱི་འཐུས་རྣམས་ནས་ཕྱི་དྲིལ་ལས་ཁུངས་ཀྱི་ལོ་བསྡོམས་ཐོག་བགྲོ་གླེང་དང་དྲི་བ་དྲིས་ལན་གནང་རྗེས་སྤྱི་འཐུས་རྣམ་པ་བཞུགས་མོལ་ཚོགས་འདུ་ཐོག་ཕེབས་ཡོད་སྟབས། ཕྱི་དྲིལ་ལས་ཁུངས་ཀྱི་ལས་བསྡོམས་ཐོག་གི་བགྲོ་གླེང་རེ་ཞིག་མཚམས་བཞག་གིས་རེས་གཟའ་ཟླ་བའི་ཉིན་མུ་མཐུད་བགྲོ་གླེང་མཇུག་སྐྱོང་གནང་རྒྱུ་རེད་འདུག

ཆབ་སྲིད་བཙོན་ཟུར་འཇིགས་མེད་རྒྱ་མཚོ་ལགས་ཀྱི་ཨ་མ་འདས་གྲོངས་དང་ཁོང་ལུས་སེམས་བདེ་ཐང་མེད་པ་ཆགས་འདུག

རྒྱ་ནག་གིས་བཙོན་ཁང་དུ་སྔ་རྗེས་ཐེངས་བཞི་བཙོན་འཇུག་བྱས་མྱོང་ཡོད་པའི་བོད་ཀྱི་ཆབ་སྲིད་བཙོན་ཟུར་འཇིགས་མེད་རྒྱ་མཚོའམ་འཇིགས་མེད་མགོ་རིལ་ལགས་བཙོན་ཁང་ནས་གློད་བཀྲོལ་རྗེས་རྒྱ་མིའི་སྐོར་སྲུང་བའི་ལྟ་སྲུང་ནན་པོའི་འོག་ལུས་སེམས་གཉིས་ཀ་བདེ་ཐང་མེད་པའི་གནས་སུ་གྱུར་བ་མ་ཟད། ཁོང་གི་ཨ་མ་ལགས་ཉེ་ལམ་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་ཐོན་འདུག བོད་མདོ་སྨད་ཀན་ལྷོ་ཁུལ་བླ་བྲང་རྒྱུད་སྟོད་གྲྭ་ཚང་གི་དགེ་འདུན་པ་འཇིགས་མེད་རྒྱ་མཚོ་ལགས་ཐོག་མ་ཕྱི་ལོ་ ༢༠༠༦ ལོར་རྒྱ་གར་ལྷོ་ཕྱོགས་ཨམྲ་བཱ་ཏིར་༸གོང་ས་མཆོག་གི་བསྩལ་གནང་བའི་དུས་འཁོར་དབང་ཆེན་ཞུས་པའི་ཉེས་མིང་འོག་འཛིན་བཟུང་དང་། དེ་རྗེས་ཕྱི་ལོ་ ༢༠༠༨ ལོར་དགེ་འདུན་པའི་སྒེར་ལངས་བརྒྱུད་བསྐུལ་བྱས་པ་དང་རྒྱ་མིའི་མནར་གཅོད་དང་འབྲེལ་བའི་བརྙན་ཐུང་འདོན་སྤེལ་གནང་བའི་ཉེས་མིང་འོག་སྔ་རྗེས་འཛིན་བཟུང་གིས་མཐར་ཕྱི་ལོ་ ༢༠༡༡ ནས་ ༢༠༡༦ བར་ལོ་ལྔའི་བཙོན་འཇུག་ཚང་རྗེས་གློད་བཀྲོལ་བཏང་ཡོད་པ་རེད། རྒྱ་གར་ལྷོ་ཕྱོགས་སུ་གནས་བཞུགས་ཁོང་གི་དགེ་ཕྲུག་དགེ་འདུན་ཕུན་ཚོགས་ལགས་ཀྱིས་གནས་ཚུལ་མཁོ་སྤྲོད་གནང་བར་ཁོང་བཙོན་ཁང་ནས་གློད་བཀྲོལ་རྗེས་ནས་བཟུང་དགོན་པའི་ནང་འཛུལ་ཞུགས་མི་ཆོག་པ་དང་། གཟན་ཤམ་ཡང་བསྣམ་བཅུག་མེད་པ་མ་ཟད། ས་གནས་གཞན་དུ་འགྲོ་མི་ཆོག་པ་སོགས་དམ་དྲག་ཧ་ཅང་ཆེན་པོ་བྱེད་ཀྱི་ཡོད་པ་དང་། དེ་སྔོན་ཁོང་ལ་བཙོན་ཁང་ནས་ན་ཚ་གཙོ་བོ་ཟ་ཁུ་གཅིན་སྙི་དང་ཁྲག་ཤེད་མཐོ་བ། མིག་མི་གསལ་བ་དང་། དྲན་ཤེས་གསལ་པོ་མེད་པ་སོགས་ལུས་སེམས་གཉིས་ཀ་བདེ་ཐང་མེད་པའི་གནས་སུ་ལྷུང་ཡོད་པ་རེད་འདུག ཁོང་གི་ཨ་མ་སྐར་མ་མཚོ་ལགས་སུ་དེ་སྔ་ཁོང་བཙོན་ཁང་ནང་ཡོད་དུས་སྙིང་གི་ནད་གཞི་ཕོག་པ་དང་། བཙོན་ཁང་ནས་གློད་བཀྲོལ་རྗེས་ཨ་མར་སྨན་བཅོས་དང་། ལྷག་དོན་རང་གི་ཨ་མ་སྐུ་ཚེ་མ་ཟིན་པའི་སྔོན་ལ་ལྷ་སར་མཇལ་སྐོར་ལ་འཁྲིད་རྒྱུའི་འདུན་པ་ཤིན་ཏུ་ཆེན་པོ་ཡོད་པ་ལྟར། ལོ་གསུམ་ལ་ཉེ་བའི་རིང་རྫོང་སྲིད་གཞུང་དང་ཞིང་ཆེན་རིམ་པར་སྙན་ཞུ་ཡང་ཡང་བརྒྱབས་ཏེ་ཉེ་སྔོན་གཞི་ནས་ཁོང་མ་བུ་གཉིས་ལ་རྒྱ་གཞུང་གིས་ཉིན་ཉི་ཤུའི་ཆོག་མཆན་སྤྲད་དེ་ལྷ་སར་མཇལ་སྐོར་གནང་ཡོད་ཀྱང་། ཉེན་རྟོག་ཁང་དང་ལྟ་སྲུང་ཁང་སོགས་ཀྱིས་ཉིན་རེར་ཁ་པར་ཐེངས་གཉིས་གསུམ་བཏང་ནས་འདྲི་རྟོག་དང་སུན་གཙེར་བཟོས་ཡོད་པ་དང་། ལྷ་ས་ནས་ཕྱིར་འཁོར་བའི་ལམ་བར་ཨ་མ་སྐར་མ་མཚོར་སྙིང་ནད་འཕར་ཏེ་ཛ་དྲག་ཐོག་ནས་མྱུར་སྐྱོབ་གནང་ཀྱང་མ་ཕན་པར་བླ་བྲང་ལ་འབྱོར་ནས་ཉིན་ཞག་བཞིའི་རྗེས་ཉེ་ལམ་ཚེས་ ༢༣ ཉིན་འདས་གྲོངས་སུ་ཕྱིན་ཡོད་པ་རེད་འདུག   འཇིགས་མེད་རྒྱ་མཚོ་ལགས་ཁོང་བཙོན་ཁང་ནང་ཡོད་སྐབས་རང་ཉིད་ཀྱི་ཨ་མར་བྲིས་པའི་རྩོམ་ཡིག་ཞིག་ད་ཆ་ཁོང་གི་དགེ་ཕྲུག་དགེ་འདུན་ཕུན་ཚོགས་ལགས་སུ་ལག་སོན་བྱུང་འདུག

རྟར་ཆེན་གྲོང་བརྡལ་ནས་རྒྱ་གཞུང་གིས་བོད་མི་དྲུག་འཛིན་བཟུང་བཙན་ཁྲིད་བྱས་འདུག

རྒྱ་ནག་དམར་ཤོག་ཚོགས་པ་གསར་འཛུགས་བྱས་ཏེ་ལོ་ངོ་ ༧༠ འཁོར་བའི་རྒྱལ་སྟོན་མཛད་སྒོ་ཚོགས་ལ་ཉེ་བའི་སྐབས་འདིར་ནག་ཆུ་རྟར་ཆེན་གྲོང་བརྡལ་ནས་རྒྱ་གཞུང་གིས་བོད་མི་ ༦ འཛིན་བཟུང་བཙན་ཁྲིད་བྱས་འདུག རླུང་འཕྲིན་ཁང་ལ་མཚན་བརྗོད་འདོད་མེད་པ་ཞིག་གིས་གནས་ཚུལ་མཁོ་སྤྲོད་གནང་བརརྒྱ་གཞུང་གི་རྒྱལ་སྟོན་མཛད་སྒོ་ཚོགས་ལ་ཉེ་བའི་སྐབས་འདིར་ཡུལ་ལུང་མང་པོ་ཞིག་ནང་བཙན་དབང་གིས་རྒྱ་ནག་གི་རྒྱལ་དར་འཕྱར་དགོས་པ་དང་།  དེ་བཞིན་བསྟོད་གླུ་བླང་དགོས་པ་སོགས་བྱས་ཡོད་པ་ལྟར་ཉེ་ལམ་ནག་ཆུ་ས་ཁུལ་རྟར་ཆེན་གྲོང་བརྡལ་དུ་སྲིད་གཞུང་མི་སྣ་ལྟ་སྐོར་ཡོང་གི་ཡོད་པར་བརྗོད་ནས་དམ་དྲག་ཤུགས་ཆེ་བྱས་པ་མ་ཟད་གྲོང་བརྡལ་དེའི་ཁྱབ་ཁོངས་ནས་ཡིན་པའི་སྨན་པ་ཚེ་རྒྱལ་ལགས་དང་། དབྱངས་འཕེལ་ལགས། དེ་བཞིན་བདུད་འདུལ་ལྷ་རྒྱས་ལགས། ནོར་བཟང་ལགས། ཤེས་དབང་རྣམ་རྒྱལ་ལགས། སྲིད་མཐར་དབང་རྒྱལ་ལགས་བཅས་ནས་དེ་འབྲེལ་ཁས་ལེན་མ་བྱས་པའི་རྐྱེན་གྱིས་ཟླ་བ་འདིའི་ཚེས་ ༢༠ ཉིན་འཛིན་བཟུང་བཙན་ཁྲིད་བྱས་འདུག དེ་བཞིན་རྒྱ་གཞུང་ནས་ད་བར་འཛིན་བཟུང་བྱས་པའི་བོད་མི་དེ་དག་གི་ནང་མི་ནས་ཁོང་ཚོར་འབྲེལ་བ་བྱེད་བཅུག་གི་མེད་པ་དང་། ཁྱིམ་ནས་ཟ་མ་དང་ཉལ་ཆས་སོགས་བསྐྱལ་ཆོག་པའི་རེ་སྐུལ་ཞུས་ཀྱང་དེ་དག་བཀག་འགོག་བྱས་ཡོད་པ་དང་ཆབས་ཅིག་ཏུ་དེ་ལྟར་བྱས་ཚེ་ཉིན་གྲངས་མང་པོར་བཀག་ཉར་བྱ་རྒྱུ་ཡིན་པའི་ཉེན་བརྡ་བཏང་ཡོད་པ་རེད་འདུག འཛིན་བཟུང་བཙན་ཁྲིད་བྱས་པའི་མི་སྣ་ཁོངས་ནས་སྨན་པ་ཚེ་རྒྱལ་ལགས་ནི་ཁོང་རང་ཉིད་ཀྱི་བཟའ་ཟླ་དཀར་དབྱངས་ལགས་ཀྱི་ནད་གཡོག་གནང་ནས་བསྡད་སྐབས་སྨན་ཁང་ནས་འཁྲིད་ཡིན་པ་དང་། སྲིད་མཐར་དབང་རྒྱལ་ལགས་ཉེ་འཁོར་དུ་དཔལ་འབྱོར་ཞན་པ་ཚོར་ཟས་གོས་དང་དངུལ་སོགས་ཀྱི་རོགས་སྐྱོར་གནང་མཁན་ཞིག་ཡིན་པ་རེད་འདུག རྩ་བའི་རྒྱ་གཞུང་ནས་རྒྱལ་སྟོན་གྱི་ཉིན་མོ་སྲུང་བརྩི་ཞུ་འཆར་དང་བསྟུན་འདས་པའི་ཉིན་ཤས་ཁྲོད་བོད་རང་སྐྱོང་ལྗོངས་གཙོས་པའི་བོད་ཀྱི་ས་ཁུལ་ཁག་ཏུ་ཡོད་པའི་དགོན་སྡེ་གྲྭ་ཚང་ཁག་གི་སྐུ་ཚབ་འདུ་སྐོང་གིས་རྒྱ་ནག་སྲིད་གཞུང་འོག་ནང་པའི་ཆོས་ལ་ཕན་ཐོགས་བྱུང་ཡོད་སྐོར་ཐོག་བགྲོ་གླེང་གོ་སྒྲིག་ཞུས་ཡོད་པ་དང་རྒྱ་ནག་གི་རྒྱལ་དར་འཕྱར་ཏེ་དམར་ཤོག་ཚོགས་པའི་རྒྱལ་གླུ་བླངས་བཅུག་པ་སོགས་ཀྱི་བྱེད་སྒོ་སྤེལ་ཡོད་པ་རེད།  

ཐེ་ཝན་རྒྱལ་སྤྱིའི་གློག་བརྙན་དུས་སྟོན་ཐོག་བོད་དོན་དང་འབྲེལ་བའི་གློག་བརྙན་ཞིག་གཟིགས་འབུལ་ཞུ་རྒྱུ།

རིང་མིན་ཕྱི་ཟླ་ ༡༠ ཚེས་ ༤ ནས་ཚེས་ ༡༨ བར་ཐེ་ཝན་རྒྱལ་ས་ Taipei དུ་འཚོགས་གཏན་འཁེལ་བའི་ Taiwan International Ethnographic Film Festival ཞེས་པའི་ཐེ་ཝན་རྒྱལ་སྤྱིའི་གློག་བརྙན་དུས་སྟོན་ཐོག་བོད་དོན་འཐབ་རྩོད་དང་འབྲེལ་བའི་ Rituals of Resistance ཞེས་འགོག་རྒོལ་ཁྲོད་ཀྱི་ཆོ་ག་ཞེས་པ་གཟིགས་འབུལ་ཞུ་རྒྱུ་རེད་འདུག གཞི་རྩའི་གློག་བརྙན་དེ་ནི་ཨ་རི་ནང་འཚར་ལོངས་འབྱུང་བཞིན་པའི་བོད་པའི་ན་གཞོན་བསྟན་འཛིན་ཕུན་ཚོགས་ལགས་དང་ཀོ་རི་ཡར་སྐྱེས་ཤིང་ཨ་རི་ནང་འཚར་ལོངའ་བྱེད་བཞིན་པ་ Joey Deetree ལགས་གཉིས་ནས་ཕྱི་ལོ་ ༢༠༡༣ ལོ་ནས་རྒྱ་གར་དང་བལ་ཡུལ། དེ་བཞིན་བོད་དང་ཨ་རི་བཅས་སུ་བརྙན་པར་བླངས་ཏེ་བཟོ་སྐྲུན་ཞུས་པ་ཞིག་རེད་འདུག གློག་བརྙན་དེའི་སྔོན་འགྲོའི་གསལ་བསྒྲགས་ནང་གསལ་ལྟར་ན་གློང་བརྙན་དེ་ཁོང་རྣམ་གཉིས་ནས་བོད་འདི་རྒྱ་ནག་གཞུང་གིས་བཙན་བཟུང་བྱས་པ་ནས་བཟུང་སྟེ་ད་བར་བོད་དོན་འཐབ་རྩོད་ཁྲོད་དུ་ཨ་རིའི་གསང་བའི་ལས་ཁུངས་ཀྱིས་བོད་ཐོག་སྤེལ་བའི་ལས་གཞི་དང་བོད་ཀྱི་དགེ་འདུན་པ་མང་པོ་ཞིག་སྐྱ་བོར་བབས་ཏེ་འཐབ་རྩོད་ཁྲོད་ཞུགས་པའི་ལོ་རྒྱུས། དེ་བཞིན་བོད་མི་མི་ཉུང་བ་ཞིག་༸གོང་ས་མཆོག་གི་དགོངས་བཞེད་ལྟར་དབུ་མའི་ལམ་དུ་ཞུགས་པ་དང་བོད་མི་གཞོན་སྐྱེས་མི་ཉུང་བ་ཞིག་གིས་བོད་དོན་སླད་རང་ལུས་མེར་བསྲེགས་ཀྱིས་ལས་འགུལ་སྤེལ་ཡོད་པ་སོགས་མངོན་གསལ་གནང་བ་མ་ཟད། ད་བར་བོད་མིའི་མི་རབས་གསུམ་ཙམ་བརྗེ་པོ་རྒྱག་བཞིན་པའི་ཁྲོད་དུ་བོད་དོན་འཐབ་རྩོད་ཀྱི་རྣམ་པར་འགྱུར་བ་ཇི་བྱུང་ལ་སོགས་པ་ཆེས་གསལ་འདོན་གནང་འདུག གཞི་རྩའི་གློག་བརྙན་དེ་དེ་སྔ་ཨ་རི་དང་སུད་སི་སོགས་རྒྱལ་ཁབ་ཁག་ཅིག་ཏུ་གཟིགས་འབུལ་ཞུས་ཟིན་ཡོད་པ་དང་རིང་མིན་ཕྱི་ཟླ་ ༡༠ ནང་ཐེ་ཝན་རྒྱལ་སྤྱིའི་གློག་བརྙན་དུས་སྟོན་དང་། བཞུགས་སྒར་དུ་འཚོགས་གཏན་ཁེལ་བའི་བོད་ཀྱི་གློག་བརྙན་དུས་སྟོན་ཐོག་གཟིགས་འབུལ་ཞུ་རྒྱུ་རེད་འདུག བསྟན་འཛིན་ཕུན་ཚོགས་ལགས་ཨ་རིར་གནས་སྡོད་བྱེད་བཞིན་ཡོད་པ་དང་འདས་པའི་ལོ་དུས་ནང་ཁོང་གིས་བཟོས་པའི་གློག་བརྙན་རྣམས་གཙོ་ཆེ་ཤོས་བོད་མིའི་ཆབ་སྲིད་དང་འཐབ་རྩོད་ཀྱི་གནས་སྟངས། དེ་བཞིན་བཙན་བྱོལ་གི་གནས་སྟངས་སོགས་མཚོན་པ་བྱས་པའི་དངོས་བྱུང་གློག་བརྙན་ཞིག་ཆགས་ཡོད་པ་དང་། ཁོང་གི་གློག་བརྙན་དང་པོ་དེ་ The Rebellion Ceremony ཡིན་པ་རེད།

བོད་མིའི་འཐབ་རྩོད་ཀྱི་སྙིང་སྟོབས་དང་ལྷག་བསམ་ལ་དམ་བཅའ་བརྟན་པོ་ཡོད།

དེ་རིང་ཞོགས་པ་ཆུ་ཚོད་བདུན་པའི་སྟེང་བཞུགས་སྒར་ལྷ་རྒྱལ་རིར་བོད་ཀྱི་དགུ་བཅུ་གསུམ་ལས་འགུལ་ཚོགས་པ་དབུ་བརྙེས་ནས་མི་ལོ་ ༢༨ འཁོར་བའི་དུས་དྲན་སྲུང་བརྩི་གནང་ཐོག་བོད་མི་རྣམས་ཀྱི་སྙིང་སྟོབས་དང་ལྷག་བསལ་མ་ཡལ་བར་མུ་མཐུད་དུ་འཐབ་རྩོད་བྱེད་རྒྱུའི་བསྒྲགས་སྤེལ་སོང་། སྐབས་དེར་སྐུ་མགྲོན་གྱི་གཙོ་བོ་བོད་མི་མང་སྤྱི་འཐུས་ཚོགས་གཙོ་ཟུར་པ་མཁན་པོ་བསོད་ནམས་བསྟན་འཕེལ་མཆོག་གིས་གཙོས་པའི་དྷ་ས་ས་གནས་འགོ་འཛིན། བོད་མི་མང་གི་སྤྱི་འཐུས་ཁག་གཅིག་དང་སེར་སྐྱ་མི་མང་ལྔ་བཅུ་ཙམ་ནས་མཉམ་ཞུགས་གནང་སྟེ་བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ཚོགས་གཙོ་ད་ལྟའི་སྤྱི་འཐུས་ཀྱི་ལས་ཐོག་ལྷ་རྒྱ་རི་རྣམ་རྒྱལ་སྒྲོལ་དཀར་ལགས་ཀྱིས་དུས་དྲན་དང་འབྲེལ་བའི་གསུང་བཤད་དང་། དེ་བཞིན་སྐུ་མགྲོན་གྱི་གཙོ་བོ་མཁན་པོ་བསོད་ནམས་བསྟན་འཕེལ་མཆོག་གིས་ མང་ཚོགས་ལ་བོད་ཀྱི་དགུ་བཅུ་གསུམ་ལས་འགུལ་ཚོགས་པའི་གལ་ཆེན་རང་བཞིན་གི་སྐོར་ལ་གསུང་བཤད་གནང་སོང་། བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ཚོགས་གཙོ་ལྷ་རྒྱ་རི་རྣམ་རྒྱལ་སྒྲོལ་དཀར་ལགས་ཀྱིས་སྔོན་གྱི་མི་རབས་རྒན་པའི་ཆབ་སྲིད་བཙོན་ཟུར་རྣམས་ཀྱིས་འབྱོར་ཁོངས་ཞན་པའི་སྤྱི་ཚོགས་ཀྱི་གནས་བབ་ཅིག་གི་འོག་ནས་བོད་བསྟན་སྲིད་མི་རིགས་ཀྱི་བདེ་དོན་ཆེད་དུ་རང་ཉིད་ཀྱི་འཚོ་བའི་དཀའ་སྡུག་ལ་མ་བལྟས་པར་དངུལ་སྒོར་རེ་རེ་གསོགས་སྒྲུབ་བྱས་ཏེ་རི་ནས་མེ་ཤིང་བཏུས་ཏེ་བག་ལེབ་བཟོ་ནས་ཚོང་འགྲེམ་བྱས་ནས་ཚོགས་པ་འདི་བཙུགས་པ་ཞིག་ཡིན་པ་ལྟར། བོད་དོན་འཐབ་རྩོད་ལ་ལྷག་བསམ་རྣམ་དག་གིས་སྐུ་ལས་བསྐྱོན་ཡོད་པ་ལྟར་དུས་དེ་རིང་གི་མི་རབས་གསར་པ་རྣམས་ཀྱིས་ཀྱང་མི་རབས་གོང་མ་རྣམས་ཀྱི་སྙིང་སྟོབས་དང་ཆོད་སེམས་ཡིད་ལ་བཅངས་ནས་མུ་མཐུན་དུ་བོད་དོན་ཆེད་དུ་དཀའ་ལས་རྒྱག་རྒྱུའི་ཆོད་སེམས་དང་དམ་ཚིག་ཡོད་ཅེས་གསུང་བཤད་གནང་སོང་། དེ་བཞིན་བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ཚོགས་གཞོན་ཟླ་བ་བཀྲ་ཤིས་ལགས་ཀྱིས་ཚོགས་པའི་བསྒྲགས་གཏམ་སྒྲོག་སྦྱོང་གནང་སྟེ་རྒྱ་ནག་གིས་ས་བྱི་ལོའི་ཞི་རྒོལ་དང་བསྟུན་ནས་བོད་མི་མང་པོ་འཛིན་བཟུང་བྱས་ཡོད་པ་རྣམས་གང་མགྱོགས་གློད་བཀྲོལ་གཏོང་དགོས་པ་མ་ཟད། མཉམ་འབྲེལ་རྒྱལ་ཚོགས་ཀྱིས་མཚོན་པའི་ཕྱི་ལོག་གི་སྲིད་གཞུང་ཡོངས་ཀྱིས་བོད་ལ་རྒྱབ་སྐྱོར་བྱེད་རྒྱུའི་འབོད་སྐུལ་ཞུས་སོང་། སྐུ་མགྲོན་གཙོ་བོ་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་ཟུར་པ་མཁན་པོ་བསོད་ནམས་བསྟན་འཕེལ་མཆོག་གིས་བོད་མི་རེ་རེ་ལ་བོད་དོན་འཐབ་རྩོད་ཀྱི་འགན་འཁྲི་རང་ཆས་སུ་ཡོད་སྟབས་དུས་ནས་དུས་སུ་འགན་རང་ཁུར་གྱི་ཐོག་ནས་བོད་དོན་འཐབ་རྩོད་ལ་ནུས་ཤུགས་འདོན་རྒྱུ་དེ་གལ་ཆེན་པོ་ཆགས་ཡོད་པ་གསུངས་པ་དང་ཆབ་ཅིག་ཏུ་བོད་ཀྱི་དགུ་བཅུ་གསུམ་ལས་འགུལ་ཚོགས་པས་དུས་རྟག་དུ་མི་མང་ལ་སྣེ་ཁྲིད་ནས་ཆབ་སྲིད་ཀྱི་ལས་འགུལ་སྣ་མང་སྤེལ་བཞིན་པར་བསྔགས་བརྗོད་གནང་སོང་། རྩ་བའི་ཕྱི་ལོ་ ༡༩༨༧ ལོའི་ཟླ་ ༩ ཚེས་ ༢༧ ཉིན་བོད་ཀྱི་རྒྱལ་ས་ལྷ་སར་འབྲས་སྤུངས་དགོན་གྱི་དགེ་འདུན་པ་ཉེར་གཅིག་གིས་སྣེ་ཁྲིད་ཀྱིས་བོད་ཀྱི་བདག་པོ་བོད་མི་ཡིན། རྒྱ་མི་བོད་ནས་ཕྱིར་འབུད་བྱེད་དགོས་ཞེས་པའི་སྐད་འབོད་གནང་སྟེ་ངོ་རྒོལ་གྱི་ལས་འགུལ་སྤེལ་བའི་དུས་དྲན་དང་བསྟུན། བོད་ཀྱི་དགུ་བཅུ་གསུམ་ལས་འགུལ་ཚོགས་པ་འདི་ཕྱི་ལོ་ ༡༩༩༡ ལོའི་ཟླ་ ༩ ཚེས་ ༢༧ ཉིན་དབུ་བརྙེས་པའི་བོད་ཀྱི་ཆབ་སྲིད་བཙོན་ཟུར་གྱི་ལས་འགུལ་ཚོགས་པ་ཞིག་ཡིན་པ་ལྟར་བོད་དོན་འཐབ་རྩོད་ཀྱི་ལས་འགུལ་མང་པོ་སྤེལ་བཞིན་ཡོད་པ་རེད། འབྲེལ་ཡོད་པར་ཁག་ཅིག་བོད་ཀྱི་དགུ་བཅུ་གསུམ་ལས་འགུལ་ཚོགས་པ།

དགེ་རྒན་གྱི་གནས་བབ་ཡར་རྒྱས་གཏང་དགོས་པའི་གླེང་སློང་ཤུགས་ཆེ་གནང་བ།

སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༨ ལས་ཉིན་ ༤ པའི་ཕྱི་དྲོ་ནས་དབུ་འཛུགས་ཏེ་དེ་རིང་ལས་ཉིན་ ༧ པའི་སྔ་དྲོའི་ཚོགས་དུས་དང་པོ་བར་ཤེས་རིག་ལས་ཁུངས་ཀྱི་ཕྱི་ལོ་ ༢༠༡༨ ལོའི་ཕྱི་ཟླ་ ༣ ཚེས་ ༣༡ ནས་ཕྱི་ལོ་ ༢༠༡༩ ལོའི་ཕྱི་ཟླ་ ༤ ཚེས་༡ བར་གྱི་ལོ་འཁོར་ལས་བསྡོམས་དང་སྤྱི་འཐུས་རྒྱུན་ལས་ཀྱི་ཤེས་རིག་གི་ལས་བསྡོམས་རྒྱས་པའི་ཐོག་རྟོག་ཞིབ་གནང་བའི་སྙན་ཐོར་བགྲོ་གླེང་གི་ལས་རིམ་ཐོག་ཕེབས་སྐབས་སྤྱི་འཐུས་མང་དག་ཅིག་ནས་མཉམ་ཞུགས་ཀྱིས་བགྲོ་གླེང་ལྷུག་པོ་གནང་སོང་། སྐབས་དེར་སྤྱི་འཐུས་མང་དག་ཅིག་ནས་དེང་སྐབས་སཾ་བྷོ་ཊ་སློབ་གྲྭ་ཁག་གཙོ་གྱུར་བོད་སློབ་ཁག་ཏུ་དགེ་རྒན་གྱི་གསོལ་ཕོགས་ཉུང་ཉུང་ཡོད་པ་དང་། སློབ་གྲྭ་མང་ཆེ་བའི་ནང་དགེ་རྒན་མང་དག་ཅིག་གཏན་འཇགས་ལས་བྱེད་མ་ཡིན་པར་ཆོད་གན་གྱི་གནས་བབ་ཐོག་བཞག་པར་ཐུགས་འཚབ་ཀྱིས་བཀའ་འདྲི་དང་ཤེས་རིག་ལས་ཁུངས་ནས་དོན་དམ་གྱི་ཕྱག་ལས་གནང་གནད་ཡིན་པའི་ཞུ་སྐུལ་གནང་ཡོད། ཤེས་རིག་ལས་བསྡོམས་ནང་ལོ་འདིའི་ནང་ཕྱི་རྒྱལ་རོགས་ཚོགས་དང་བོད་རིགས་སྦྱིན་བདག་ཁག་ ༢༥ ནས་སློབ་ཕྲུག་གྲངས་ ༡༨༥༢ ལ་སློབ་ཡོན་དང་སློབ་དོད་རོགས་དངུལ་གནང་སོན་བྱུང་ཡོད་པ་དང་། ཉམ་ཐག་ཨང་ག་པ་ཅན་དང་གཞན་དབུལ་ཕོངས་ཕྲུ་གུའི་སློབ་ཡོན་རོགས་སྐྱོར་འོག་ཤེས་རིག་ལས་ཁུངས་ནས་ཁྱོན་བསྡོམས་སློབ་ཕྲུག་ ༢༦༥ ལ་བཀའ་ཤག་གི་ཉམ་ཐག་ལྟ་སྐྱོང་རྩ་འཛིན་ལམ་སྟོན་ལྟར་གཟིགས་རྟོག་གནང་མུས་ཡིན་པ་འཁོད་ཡོད་པ་བཞིན་ཕྱི་འཐུས་ཁག་གཅིག་ནས་མཐོ་སློབ་ཁག་ཏུ་སྐྱོད་བཞིན་པའི་སློབ་ཕྲུག་ཁྲོད་ཕ་མ་སྤུན་མཆེད་མེད་པའི་ཕྲུ་གུ་ཞིག་ཡོད་པ་དང་དེར་དཀའ་ངལ་ཆེན་པོ་འཕྲིན་བཞིན་ཡོད་སྐོར་དང་འབྲེལ། ད་ལྟ་ཤེས་རིག་ལས་ཁུངས་ནས་སློབ་ཡོན་འབུལ་ཕྱོགས་ཀྱི་བརྒྱུད་རིམ་ལ་བསྐྱར་ཞིབ་གནང་བཞིན་ཡོད་པ་དང་འབྲེལ་ཏེ་གནད་དོན་དེ་དག་ཐོག་ཐུགས་ཞིབ་གནང་དགོས་གལ་ཡིན་པའི་དགོངས་འཆར་ཕེབས་ཡོད། དེ་བཞིན་དེང་སྐབས་བོད་པའི་སློབ་གྲྭ་ཁག་གི་ནང་སློབ་ཕྲུག་ཁག་གཅིག་མྱོས་རྫས་ངན་གོམས་ལ་ལངས་ཤོར་བའི་དཀའ་ངལ་འཕྲད་པ་ཤེས་རིག་ལས་བསྡོམས་ནང་འདས་པའི་ལོ་འཁོར་ནང་བོད་པའི་སློབ་ཁག་ནང་སློབ་ཕྲུག་བུ་གྲངས་ ༤༧ བྱུང་ཡོད་སྐོར་འཁོད་པ་དང་འབྲེལ། སྤྱི་འཐུས་མང་དག་ཅིག་ནས་མྱོས་རྫས་ངན་གོམས་ཙམ་མིན་པར་ལག་ཐོགས་ཁ་པར་སོགས་ཀྱི་ཐོག་རྩེད་མོ་རྩེ་རྒྱུ་འམ་ Game Addiction དཀའ་ངལ་ཞིག་ཀྱང་འཕྲད་བཞིན་ཡོད་པ་བཅས་འགོག་ཐབས་ཀྱི་ལས་གཞི་སྤེལ་དགོས་པའི་དགོངས་ཚུལ་ཤུགས་ཆེ་གསུང་མཁན་བྱུང་སོང་། དེ་བཞིན་བོད་པའི་སྤྱི་ཚོགས་ནང་དང་སློབ་གྲྭ་ཁག་ཏུ་བཙན་གཡེམ་དང་འཁྲིག་སྤྱོད་ཀྱི་གནད་དོན་རིགས་བྱུང་བར་འཛིན་སྐྱོང་བཀའ་ཤག་ནས་ Zero Tolerance ཞེས་བཟོད་སྒོམ་རྩ་བ་ནས་མེད་པའི་སྲིད་བྱུས་འཛིན་བཞིན་པ་ལྟར་འདས་ལོའི་ནང་དུའང་སོ་ལན་བོན་གཞིར་དུ་དེ་འབྲེལ་ཚུལ་མིན་གནད་དོན་ཁག་གཅིག་བྱུང་ཡོད་པར་འཛིན་སྐྱོང་བཀའ་ཤག་ནས་ཕྱག་བསྟར་གང་གནང་ཡོད་མེད་བཅས་ཀྱི་ཐོག་བཀའ་འདྲི་དང་བགྲོ་གླེང་གནང་བར་བཀའ་བློན་མཆོག་གིས་གནད་དོན་ཇེ་དྲག་ལ་ངོས་བཞེས་ཀྱིས་དོ་བདག་ལ་ཉེན་བརྡ་ནན་པོ་བཏང་སྟེ་ཕྱག་བསྟར་གནང་ཟིན་སྐོར་གསུངས་སོང་། དེ་བཞིན་འདི་ལོ་རྒྱ་གར་རྒྱལ་ས་ལྡི་ལིའི་ནང་གི་མཐོ་སློབ་གྲགས་ཅན་ JNU ནས་སློབ་ཡོན་བརྒྱ་ཆ་ ༡༠༠ ཐམ་པ་སྤར་བའི་འོག་སློབ་ཕྲུག་མང་དག་ཅིག་འཛུལ་ཞུགས་གནང་མ་ཐུབ་པའི་དཀའ་ངལ་འཕྲད་པ་དང་དཀའ་ངལ་དེ་རིགས་མ་འོངས་པར་ལྡི་ལིའི་མཐོ་སློབ་ཁག་གཞན་ནང་འཕྲད་སྲིད་སྐོར་དང་འབྲེལ་གླེང་སློང་ཡང་ཤུགས་ཆེན་པོ་བྱུང་སོང་། འདི་ལོའི་ཕྱི་ཟླ་ ༨ པའི་ནང་ཚོགས་པའི་གཞོན་སྐྱེས་ལྔ་དང་ལྔ་བཅུའི་ཚོགས་འདུའི་ཐོག་ཚོགས་བཅར་བ་ཁག་གཅིག་གིས་བོད་སྐད་འཐུས་ཤིག་བསྐྱོན་མ་ཐུབ་པས་སྤྱི་ཚོགས་ཁྲོད་དུ་ལབ་གླེང་ཤུགས་ཆེ་བྱུང་ཡོད་སྟབས་ད་རེས་གྲོས་ཚོགས་ནང་ཤེས་རིག་ལས་ཁུངས་ཀྱི་ལས་བསྡོམས་ཐོག་བགྲོ་གླེང་དང་དགོངས་འཆར་ཕུལ་མཁན་ཁག་གཅིག་བྱུང་ཡོད། རྩ་བའི་ཤེས་རིག་ལས་ཁུངས་ཀྱིས་གྲོས་ཚོགས་སུ་ཕུལ་བའི་ལོ་འཁོར་ལས་བསྡོམས་ནང་འདི་ལོའི་འཛིན་རིམ་ ༡༠ པ་དང་ ༡༢ ཀྱི་གྲུབ་འབྲས་སྐོར་དང་འབྲེལ། འདི་ལོ་རྒྱ་གར་རྒྱལ་ཡོངས་ཡིག་རྒྱུགས་ཆེན་མོའི་ཁོངས་འཛིན་རིམ་ ༡༢ ཡོད་པའི་སློབ་གྲྭ་ཁག་ ༡༦ གི་སློབ་ཕྲུག་གྲངས་ ༡༡༤༧ ནས་ཡིག་རྒྱུགས་ནང་དངོས་སུ་ཞུགས་ཏེ་རྒྱུགས་འཕྲོད་པའི་སློབ་ཕྲུག་གྲངས་ ༡༠༩༣ བྱུང་བས་སྤྱི་ཡོངས་ཀྱི་རྒྱུགས་འཕྲོད་བརྒྱ་ཆ་ ༩༧་༠༧ སོན་ཡོད་པ་དང། འཛིན་རིམ་བཅུ་པ་ཡོད་པའི་སློབ་གྲྭ་ཁག་ ༢༦ གི་སློབ་ཕྲུག་གྲངས་ ༡༢༦༡ ནས་ཡིག་རྒྱུགས་ནང་དངོས་སུ་ཞུགས་ཏེ་རྒྱུགས་འཕྲོད་པའི་སློབ་ཕྲུག་གྲངས་ ༡༡༣༡ བྱུང་བས་སྤྱི་ཡོངས་རྒྱུགས་འཕྲོད་ཀྱི་བརྒྱ་ཆ་ ༩༢་༣༣ སོན་ཡོད་པ་རེད།

གྲོས་ཚོགས་ཀྱི་སྟོང་པའི་དུས་ཚོད་ཐོག་བདམས་ཐོན་བཀའ་བློན་ནས་དམ་བཅའ་མ་བཞེས་པའི་སྐོར་གླེང་བ།

དེ་རིང་སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༨ པའི་ལས་ཉིན་ ༧ པའི་ཚོགས་དུས་འགྲོ་མུས་ཐོག་ཉིན་དགུང་ཆུ་ཚོད་ ༡༢ ཐོག་བོད་མི་མང་སྤྱི་འཐུས་གསེར་རྟ་ཚུལ་ཁྲིམས་ལགས་ཀྱིས་གྲོས་ཚོགས་ཀྱི་སྟོང་པའི་དུས་ཚོད་གོ་སྐབས་བཞེས་ཏེ་དེ་སྔ་ཕྱི་ཟླ་གསུམ་པའི་གྲོས་ཚོགས་སྐབས་སུ་བདམས་ཐོན་གསལ་བསྒྲགས་གནང་བའི་བཀའ་བློན་སྟོབས་རྒྱལ་ཚེ་རིང་ལགས་ཆེས་མཐོའི་ཁྲིམས་ཞིབ་ཁང་ནས་བཀའ་བློན་དུ་ངོས་བཞེས་མ་གནང་སྟབས་བཀའ་བློན་གྱི་དམ་བཅའ་ཕུལ་ས་བྱུང་མེད་པའི་གནས་སྟངས་སྐོར་གླེང་སོང་། སྤྱི་འཐུས་གསེར་རྟ་ཚུལ་ཁྲིམས་ལགས་ཀྱིས་འདི་ལོའི་ཕྱི་ཟླ་གསུམ་པའི་ནང་ཚོགས་པའི་སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་དུས་བདུན་པའི་ཐོག་སྲིད་སྐྱོང་བློ་བཟང་སེང་མཆོག་གིས་མཚན་འདོན་གནང་བའི་བཀའ་བློན་གྱི་འོས་མི་བཀའ་དྲུང་ལས་ཐོག་སྟོབས་རྒྱལ་ཚེ་རིང་ལགས་གྲོས་ཚོགས་ནས་བཅའ་ཁྲིམས་ཀྱི་དགོངས་དོན་ཇི་བཞིན་བཀའ་བློན་དུ་བདམས་ཐོན་བྱུང་བར་གསལ་བསྒྲགས་གནང་ཡོད་ཀྱང་། རྗེས་སུ་ཆེས་མཐོའི་ཁྲིམས་ཞིབ་ཁང་ནས་དེར་ངོས་བཞེས་མ་གནང་བའི་གནས་སྟངས་བྱུང་ཡོད་པ་སོགས་སྐབས་དེའི་བཀའ་བློན་འོས་འདེབས་ཀྱི་བྱུང་བ་ཁག་འགྲེལ་བརྗོད་དང་སྦྲགས། སྐབས་དེར་ཆེས་མཐོའི་ཁྲིམས་ཞིབ་ཁང་གི་ཐག་གཅོད་དེར་གྲོས་ཚོགས་ནས་ངོས་བཞེས་གང་འདྲ་ཞིག་གནང་དགོས་མིན་དང་ལྷག་པར་དུ་སྐབས་དེའི་ཆེས་མཐོའི་ཁྲིམས་ཞིབ་ཁང་གི་ཐག་གཅོད་དེ་བཙན་བྱོལ་བོད་མིའི་བཅའ་ཁྲིམས་དང་མཐུན་པ་ཞིག་ཡིན་ཚེ་སྐབས་དེར་བོད་མི་མང་སྤྱི་འཐུས་ལྷན་ཚོགས་ནས་ཐག་གཅོད་གནང་སྟངས་དེ་བཙན་བྱོལ་བོད་མིའི་བཅའ་ཁྲིམས་དང་འགལ་བ་ཞིག་ཏུ་ངོས་འཛིན་མ་ཞུ་ཐབས་མེད་ཡིན་པ་དང་། ཡང་ན་སྐབས་དེར་གྲོས་ཚོགས་ནས་ཐག་གཅོད་གནང་བ་དེ་འགྲིག་ཡོད་ཚེ་ཆེས་མཐོའི་ཁྲིམས་ཞིབ་ཁང་གི་ཐག་གཅོད་དེ་བཙན་བྱོལ་བོད་མིའི་བཅའ་ཁྲིམས་དང་འགལ་བ་ཞིག་ཡིན་པ་ལས་དེའི་བར་ན་གཉིས་ཀ་ཡིན་པའི་ལམ་དེ་འདྲ་ཡོད་མ་རེད་ཅེས་གསུངས་སོང་། སྤྱི་འཐུས་གསེར་རྟ་ཚུལ་ཁྲིམས་ལགས་ཀྱིས་ད་དུང་གནད་དོན་དེ་དང་འབྲེལ་ཏེ་བོད་མི་མང་སྤྱི་འཐུས་ལྷན་ཚོགས་ནས་གཏན་འབེབས་ཟིན་པའི་གནད་དོན་ཞིག་ལ་བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་ཚོས་ཕན་ཚུན་འཇིགས་སྙོམས་སྟངས་འཛིན་གྱི་ཐོག་ནས་ཐག་གཅོད་གནང་སྟངས་ཁྲིམས་ཐོག་ལ་གང་དང་གང་འཁོད་ཡོད་མེད་གསལ་པོ་ཞིག་མ་ཆགས་ཚེ་མ་འོངས་པར་དེ་མཚུངས་ཀྱི་དཀའ་ངལ་མང་དག་ཅིག་འཕྲད་ངེས་ཡིན་པ་སོགས་གསུངས་ཡོད། སྐབས་དེར་བོད་བོད་མི་མང་སྤྱི་འཐུས་ཚོགས་གཙོ་པདྨ་འབྱུང་གནས་མཆོག་གིས་གནད་དོན་དེའི་ཐོག་མང་ཚོགས་དང་བརྒྱུད་ལམ་ཁག་གི་དྲྭ་བར་ཕེབས་སྐབས་བཙན་བྱོལ་བོད་མིའི་བཅའ་ཁྲིམས་དང་། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་འདུའི་འགྲོ་ལུགས་དང་ལས་དོན་བྱེད་ཕྱོགས་ཀྱི་སྒྲིག་གཞི་དགོངས་དོན་ལྟར་སྲིད་སྐྱོང་མཆོག་གིས་བཀའ་བློན་དུ་མཚན་འདོན་གནང་ཐོག་སྤྱི་འཐུས་རྣམ་པས་འོས་འཕངས་ཏེ་མཐར་ཚོགས་གཙོ་མཆོག་གིས་བཀའ་བློན་དུ་བདམས་ཐོན་བྱུང་བར་གསལ་བསྒྲགས་གནང་བ་བཞིན་ད་ལྟའང་སྐབས་དེར་གྲོས་ཚོགས་ཀྱི་གནང་བ་དེ་འགྲིག་པ་ཞིག་ལ་ངོས་འཛིན་ཞུ་བཞིན་ཡོད་ཅེས་གསུངས་པ་དང་ཆབས་ཅིག བཀའ་བློབ་དུ་བདམས་ཐོབ་བྱུང་མཚམས་སུ་དམ་བཅའ་བཞེས་དང་མ་བཞེས་ཆེས་མཐོའི་ཁྲིམས་ཞིབ་ཁང་གི་སྐུ་དབང་ཡིན་སྟབས་དེའི་ཐོག་སྲིད་སྐྱོང་དང་ཚོགས་གཙོ། དེ་བཞིན་གྲོས་ཚོགས་བཅས་ནས་ཐེ་གཏོགས་གནང་ན་འགྲིག་གི་ཡོད་མ་རེད་ཅེས་གསུངས་ཡོད། གཞི་རྩའི་སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་དུས་བདུན་པའི་ལས་ཉིན་བཞི་པའི་ཐོག་སྲིད་སྐྱོང་བློ་བཟང་སེང་མཆོག་གིས་བཙན་བྱོལ་བོད་མིའི་བཅའ་ཁྲིམས་དོན་ཚན་ ༢༡ པའི་དགོངས་དོན་ལྟར་སྐབས་དེའི་བཀའ་དྲུང་ལས་ཐོག་སྟོབས་རྒྱལ་ཚེ་རིང་ལགས་བཀའ་ཤག་སྐབས་ ༡༥ པའི་བཀའ་བློན་དུ་མཚན་འདོན་གནང་དོན་གནང་ཡོད་པ་དང་། སྐབས་དེར་གྲོས་ཚོགས་ཀྱི་ངོ་ཡོད་སྤྱི་འཐུས་ ༤༣ ནས་གསང་བའི་འོས་ཤོག་བརྒྱུད་སྟོབས་རྒྱལ་ཚེ་རིང་ལགས་སུ་འོས་པའི་འོས་གྲངས་ ༢༡ ཐོབ་སྟེ་མང་མོས་ཐོག་ནས་སྐབས་ ༡༥ པའི་བཀའ་ཤག་ལྷན་ཚོགས་ཀྱི་བཀའ་བློན་དུ་བདམས་ཐོན་བྱུང་བར་གྲོས་ཚོགས་ནས་གསལ་བསྒྲགས་གནང་ཡོད། འོན་ཀྱང་སྐབས་དེར་བཀའ་བློན་འོས་བདམས་སྐབས་སུ་ངོ་ཡོད་སྤྱི་འཐུས་ ༤༣ ཡོད་པ་ལས་དགོས་མཁོའི་ཆ་གྲངས་ ༢༡ དང་ཕྱེད་ཀ་ཡིན་ཡང་བཀའ་བློན་འོས་མི་སྟོབས་རྒྱལ་ཚེ་རིང་ལགས་ལ་འོས་གྲངས་༢༡ ལས་ཐོབ་མེད་སྟབས། བཅའ་ཁྲིམས་དགོངས་དོན་ལྟར་ཁོང་ལ་ངོ་ཡོད་སྤྱི་འཐུས་རྒྱ་ཆ་ ༥༠ ཡི་རྒྱབ་སྐྱོར་ཐོབ་ཡོད་མེད་ཀྱི་གླེང་གཞི་ཞིག་བྱུང་ཡོད་པ་ལྟར། ཆེས་མཐོའི་ཁྲིམས་ཞིབ་ཁང་ནས་བཙན་བྱོལ་བོད་མིའི་བཅའ་ཁྲིམས་ནང་གསལ་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་འདུའི་འགྲོ་ལུགས་དང་ལས་དོན་བྱེད་ཕྱོགས་ཀྱི་སྒྲིག་གཞི་དོན་ཚན་ ༨༦ པའི་ནང་གསལ་ལྟར་ངོ་ཡོད་སྤྱི་འཐུས་ཀྱི་རྒྱ་ཆ་ ༥༠ ལོན་མེད་པའི་རྒྱུ་མཚན་དང་འབྲེལ། སྐབས་དེའི་བདམས་ཐོན་བཀའ་བློན་སྟོབས་རྒྱལ་ཚེ་རིང་ལགས་བཀའ་བློན་དུ་ངོས་བཞེས་གནང་མེད་པ་རེད། དེ་རྗེས་གནད་དོན་དེའི་ཐོག་ཚོགས་གཙོ་སྦྲེལ་པོ་དང་ཁྲིམས་ཞིབ་པ་ཆེ་བ། སྲིད་སྐྱོང་བཅས་ཁྲིམས་ཞིབ་ཁང་དུ་བཞུགས་མོལ་ཚོགས་འདུ་ཚོགས་པ་དང་། དེ་ནས་རིམ་པས་བཀའ་ཤག་ཁྲིམས་ཞིབ་ཁང་དུ་བཅར་ཏེ་བཀའ་བསྡུར་གནང་བ་མ་ཟད། བཀའ་དྲུང་ཡིག་ཚང་ནས་དམ་འབུལ་གྱི་ཞུ་སྐུལ་གནང་ཡོད་ཀྱང་། ཆེས་མཐོའི་ཁྲིམས་ཞིབ་ཁང་ནས་ཕྱི་ཟླ་ ༤ ཚེས་ ༤ ཉིན་གྱི་སྔ་དྲོ་གསར་འགོད་ལྷན་ཚོགས་ཤིག་བསྐོང་ཚོགས་གནང་སྟེ་ཆེས་མཐོའི་ཁྲིམས་ཞིབ་ཁང་ནས་བདམས་ཐོན་བཀའ་བློན་གསལ་བསྒྲགས་གནང་བའི་སྐྱེ་བོ་དེར་བཅའ་ཁྲིམས་ནང་གསལ་གྱི་ཆ་རྐྱེན་ཚང་གི་མེད་སྟབས། དེའི་ཐོག་བཅའ་ཁྲིམས་དང་མཐུན་པའི་གནང་ཕྱོགས་ཤིག་མ་བྱུང་བར་དུ་བཅའ་ཁྲིམས་དོན་ཚན་ ༢༥ པ་ནང་གསལ་ལས་འཁུར་དང་གསང་རྒྱའི་དམ་བཅའ་འབུལ་བཞེས་ཀྱི་ལས་རིམ་ཐོག་ཕེབས་ཐབས་མེད་པ་སོགས་དོན་གནད་ལྔའི་ཐོག་ནས་གསལ་བཤད་གནང་སྟེ་གང་ལྟར་སྐབས་དེའི་གྲོས་ཚོགས་ནས་བདམས་ཐོན་བྱུང་བའི་བཀའ་བློན་དེ་དུས་ད་ལྟའང་བཀའ་བློན་གྱི་ལས་འགན་བཞེས་མ་ཐུབ་པར་ལུས་ཡོད་པ་རེད།

Latest news