Tibetan Royal Year of 2151 | Year of the Wood Dragon

གསར་འགྱུར།

༸གོང་ས་མཆོག་བཞུགས་སྒར་ནས་རྒྱལ་ས་ལྡི་ལིར་ཆིབས་བསྒྱུར་མཛད་པ།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དེ་རིང་ཕྱི་ཚེས་༡༩ ཉིན་གྱི་ཉིན་དགུང་ཚོུད་ ༡༢།༠༠ ཙམ་ལ་བཞུགས་སྒར་༸རྒྱལ་བའི་ཕོ་བྲང་ནས་ཆིབས་ཐོན་གྱིས་གྷ་གྷལ་གནམ་ཐང་ནས་མཁའ་ལམ་བརྒྱུད་རྒྱ་གར་རྒྱལ་ས་ལྡི་ལིར་དང་རྒྱ་གར་Uttar Pradesh མངའ་སྡེའི་ནང་གི་མ་ཐུ་རར་གཟའ་འཁོར་གཅིག་ལྷག་གི་མཛད་འཆར་གྱི་སླད་ཆིབས་བསྒྱུར་བསྐྱང་གནང་མཛད་སོང་། མཛད་འཆར་ལྟར་ན་མགོན་པོ་མཆོག་སང་ཉིན་ཕྱི་ཚེས་༢༠ཉིན་རྒྱ་གར་གྱི་རྒྱལ་ས་ལྡི་ལིའི་ནང་རྟེན་གཞི་བྱས་པའི་ Shri Ram སློབ་གྲྭར་Spic Macay མཛད་སྒོའི་ཐོག་དབུ་བཞུགས་མཛད་དེ་དེར་སློབ་ཁག་མི་འདྲ་བ་༥༠ ནས་ཁྱོན་སློབ་མ་གྲངས་ ༢༣༠༠ ཙམ་ལ་Educating  the Heart and  mind  ཞེས་སེམས་བཅོས་ཐབས་ཀྱི་ཤེས་ཡོན་གྱི་སྐོར་ལ་བཀའ་སློབ་སྩོལ་གནང་རྒྱུ་ཡིན་པ་དང་། ཕྱི་ཚེས་ ༢༡ ཉིན་ཏཇ་མན་སིང་མགྲོན་ཁང་དུ་མཁས་དབང་ཁག་ཅིག་དང་། ཤེས་ལྡན་མི་སྣ། གཞན་ཡང་རྒྱལ་འབྲེལ་སྐུ་ཚབ་ཁག་ཅིག་དང་ལྷན་དུ་མཇལ་མོལ་གནང་རྒྱུ་ཡིན་པ་རེད། ཕྱི་ཚེས་༢༢ཉིན་རྒྱལ་ས་ལྡི་ལིའི་ཉེ་འཁྲིས་སུ་ཆགས་པའི་རྒྱ་གར་Uttar Pradesh མངའ་སྡེའི་ནང་གི་མ་ཐུ་རར་ཡོད་པའི་Sri Udasin Karhni Ashram དུ་ཧིན་དུའི་བླ་མ་ Swami Karshni Gurushranandaji Maharaja དང་ལྷན་དུ་མཇལ་མོལ་གནང་རྒྱུ་ཡིན་པ་མ་ཟད། ཕྱི་ཚེས་༢༣ ཉིན་ཁུལ་དེར་མགོན་པོ་༸གང་ཉིད་མཆོག་ནས་བཀའ་སློབ་ལམ་སྟོན་གནང་རྒྱུའི་མཛད་འཆར་དང་། དེ་ནས་ཕྱི་ཚེས་ ༢༥ ཉིན་སླར་ཡང་ལྡི་ལི་རྙིང་པའི་ཁུལ་དུ་ཆགས་པའི་ Harijan Sevak Sangh, Gandhi Ashram ཞེས་པ་དེར་ཆོས་ལུགས་མཐུན་འབྲེལ་གྱི་མཛད་སྒོའི་ཐོག་དབུ་བཞུགས་མཛད་དེ་ཕྱི་ཚེས་ ༢༦ ཉིན་ཕྱིར་བཞུགས་སྒར་དུ་ཆིབས་ཐོན་གནང་རྒྱུ་ཡིན་པ་རེད།    

རྒྱ་ནག་གི་འགྲོ་བ་མིའི་ཐོབ་ཐང་གི་གནས་བབ་ཡར་རྒྱས་ཕྱིན་མི་འདུག

རྒྱལ་ཚོགས་ཀྱི་འགྲོ་བ་མིའི་ཐོབ་ལྷན་ཚོགས་ཐེངས་༤༢ ཐོག རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནད་དོན་ཐོག་རྒྱལ་ཚོགས་ཀྱི་ཚོགས་མི་རྒྱལ་ཁབ་ཁག་བརྒྱད་ནས་སེམས་འཚབ་གནང་ཡོད་པ་སྤྱི་དང་།  ཡང་སྒོས་དེའི་ནང་ཚན་ནས་ཅེཀ་སྤྱི་མཐུན་རྒྱལ་ཁབ་དང། འཇར་མན།  ཧྥ་རན་སི། སུའི་ཀྲན་བཅས་རྒྱལ་ཚོགས་ཀྱི་ཚོགས་མི་རྒྱལ་ཁབ་༤དང། དེ་བཞིན་ཡོ་རོབ་མཐུན་ཚོགས་བཅས་ནས་བོད་ནང་གི་འགྲོ་བ་མིའི་ཐོབ་ཐང་གི་གནས་བབ་ཡར་རྒྱས་ཕྱིན་མེད་སྐོར་གླེང་སློང་གནང་བ་དང་འབྲེལ། རྒྱ་གཞུང་གིས་བོད་དང་ཡུ་གུར་ནང་གི་མང་ཚོགས་ཀྱི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་བྱ་སྤྱོད་ངེས་པར་དུ་འཕྲལ་མར་མཚམས་འཇོག་བྱེད་དགོས་པར་བརྗོད་འདུག དེ་ཡང། ཟླ་བ་འདིའི་ཕྱི་ཚེས་ ༩ ནས་སུད་སི་གྲོང་ཁྱེར་ཇི་ནི་ལྦའི་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལྷན་ཚོགས་ ཐེངས་ ༤༢ འཚོགས་བཞིན་ཡོད་པ་དང། ཕྱི་ཚེས་༡༧་ཉིན་འཛམ་གླིང་རྒྱལ་ཁབ་ཁག་གི་འགྲོ་བ་མིའི་ཐོབ་ཐང་གི་གནས་བབ་ཐོག་ཚོགས་མི་རྒྱལ་ཁབ་ཁག་གི་ཐུགས་སྣང་དགོས་པའི་རྒྱལ་ཚོགས་ཀྱི་ཚོགས་དུས་ ༡༧ པའི་སྐབས། འཇར་མན་གྱི་སྐུ་ཚབ་ཀྱིས་རྒྱ་ནག་གཞུང་གིས་ད་ལྟའི་ཆར་བོད་དང་ཡུ་གུར་ནང་མང་ཚོགས་ཕོན་ཆེན་བཀག་ཉར་དོ་དམ་དང་མནར་གཅོད་གཏོང་བཞིན་པའི་བྱ་སྤྱོད་དེ་ཁྲིམས་མཐུན་མིན་པ་ཐེར་འདོན་བྱས་པ་དང་ལྷན་དུ། མང་ཚོགས་ཀྱི་སྤྱི་འབངས་དང་ཆབ་སྲིད། དེ་བཞིན་ཆོས་དད་རང་དབང་ཐོབ་ཐང་རྡོག་རོལ་ཚབ་ཆེར་གཏོང་བཞིན་པའི་གནས་བབ་བཅས་ལ་ཧ་ཅང་གི་སེམས་འཚབ་ཡོད་ཅེས་གསུངས་བ་དང་འབྲེལ། ལྷན་ཚོགས་དེ་བརྒྱུད་ནས་རྒྱ་ནག་གཞུང་ལ་བྱ་སྤྱོད་དེ་དག་འཕྲལ་མ་ཉིད་དུ་མཚམས་འཇོགས་དགོས་ཞེས་གསུངས་སོང་། ཡང་ལྷན་ཚོགས་ཐོག་ཅེཀ་སྤྱི་མཐུན་རྒྱལ་ཁབ་ཀྱི་སྐུ་ཚབ་ཀྱིས་རྒྱ་ནག་ནང་དཔལ་འབྱོར་ཡར་རྒྱས་ཚད་མཐོན་པོ་ཕྱིན་ཡོད་ནའང་། མང་ཚོགས་ཀྱི་འགྲོ་བ་མིའི་ཐོབ་ཐང་དང་མང་གཙོ། དེ་བཞིན་ཁྲིམས་ལུགས་དབང་འཛིན་གྱི་གནས་བབ་ད་དུང་ཡར་རྒྱས་ཕྱིན་མེད་པ་དང་། བོད་དང་ཡུ་གུར་ནང་དུ་ཞི་བདེ་དང་ཡར་རྒྱས་ཀྱི་གྲུབ་འབྲས་ཐོན་པར་རྒྱ་གཞུང་གི་ངོས་ནས་ཁུལ་དེའི་ནང་གི་མང་ཚོགས་ཀྱི་ཆོས་དད་རང་དབང་དང་འདུ་འཛོམས་རང་དབང་། དེ་བཞིན་མང་ཚོགས་ཀྱི་ཆེ་མཐོང་ལ་གུས་བརྩི་བྱེད་དགོས་པ་གསུངས་འདུག ལྷག་པར་དུ་ཅེཀ་སྤྱི་མཐུན་རྒྱལ་ཁབ་ཀྱི་སྐུ་ཚབ་ཀྱིས་ད་ལྟའི་ཆར་རྒྱ་ནག་གཞུང་གིས་བཙོན་འཇུག་བཀག་ཉར་བྱས་པའི་མི་སྣ་ཁག་གི་གནད་དོན་གླེང་བའི་ཁྲོད། བོད་མིའི་སྐད་ཡིག་ལས་འགུལ་བ་བཀྲིས་དབང་ཕྱུགས་ལགས་ཀྱི་གནས་སྟངས་ཐོག་སེམས་འཚབ་དང་ཁོང་གློད་བཀྲོལ་དགོས་པའི་བསྐྱར་ནན་ཞུས་འདུག  དེ་དང་ཕྱོགས་མཚུངས། སྐབས་དེར་Sweden སྐུ་ཚབ་ཀྱིས་རྒྱ་ནག་གཞུང་གི་ངོས་ནས་སྤྱིར་མང་ཚོགས་ཀྱི་ཆོས་དད་རང་དབང་དང་གོམས་སྲོལ། དེ་བཞིན་འདུ་འཛོམས་རང་དབང་ལ་གུས་བརྩི་དགོས་པ་དང་། ལྷག་པར་དུ་བོད་དང་ཡུ་གུར་མང་ཚོགས་ཀྱི་རང་དབང་དང་ཐོབ་ཐང་ལ་གུས་བརྩི་ཞུ་དགོས་ཞེས་གསུངས་བ་དང་ཆབས་ཅིག ས་ཁུལ་དེ་གཉིས་ནང་དུ་འགྲོ་བ་མིའི་ཐོབ་ཐང་གི་གནས་བབ་ལ་ཕྱིའི་རང་དབང་ཅན་གྱི་རྟོག་ཞིབ་བྱེད་མཁན་མི་སྣ་ལ་རྒྱ་གཞུང་གི་བཀག་འགོག་བྱས་མི་ཆོག་པར་ནན་བརྗོད་བྱས་འདུག ཡང་སྐབས་དེར་ལྷན་ཚོགས་ཐོག་ Finland སྐུ་ཚབ་ཀྱིས་ཡོ་རོབ་མཐུན་ཚོགས་ཀྱི་ཚབ་ཞུས་ཏེ། ཡོ་རོབ་མཐུན་ཚོགས་ཀྱི་སྤྱི་བསྒྲགས་སྒྲོག་སྦྱང་གནང་བ་དང་།  ཡོ་རོབ་མཐུན་ཚོགས་ཀྱི་ངོས་ནས་ཐེངས་འདིའི་ལྷན་ཚོགས་དེའི་ཐོག་སླར་ཡང་རྒྱ་ནག་གཞུང་གིས་བོད་དང་ཡུ་གུར་མང་ཚོགས་ཀྱི་འགྲོ་བ་མིའི་ཐོབ་ཐང་ལ་གུས་བརྩི་ཞུ་དགོས་པའི་ནན་བརྗོད་གནང་བ་མ་ཟད། དེ་བཞིན་ཧྥ་རན་སའི་སྐུ་ཚབ་ཀྱིས་ཀྱང་ཡོ་རོབ་མཐུན་ཚོགས་ཀྱི་ལྷན་ཚོགས་ཀྱི་སྤྱི་བསྒྲགས་ལ་རྒྱབ་སྐྱོར་ཞུས་པ་དང་འབྲེལ། བོད་དང་ཡུ་གུར་ནང་གི་འགྲོ་བ་མིའ་ཐོབ་ཐང་གི་གནས་སྟངས་ལ་སེམས་འཚབ་བསྟན་པ་དང་ཆབས་ཅིག   རྒྱ་ནག་གཞུང་གིས་ཁུལ་དེ་དག་ནང་མང་ཚོགས་མང་པོ་བཀག་ཉར་དོ་དམ་བྱེད་བཞིན་པའི་བྱ་སྤྱོད་མཚམས་འཇོག་དགོས་པ་བརྗོད་འདུག ལྷན་ཚོགས་ཐོག་གཞན་ཡང་། དབྱིན་ཡུལ་དང་། Australia དང་ finland དེ་བཞིན་ནོར་ཝེ་བཅས་ཀྱི་སྐུ་ཚབ་ཀྱིས་ཀྱང་རྒྱ་ནག་གཞུང་གིས་མང་ཚོགས་ཀྱི་འགྲོ་བ་མིའི་ཐོབ་ཐོང་མུ་མཐུད་ནས་རྡོག་རོལ་དང་ཁྲིམས་སྒྲིག་རྡོག་རོལ་གཏོང་མཁན་དང་འབྲེལ་བའི་དཔོན་རིགས་ཚོར་ཉེས་མེད་གུ་ཡངས་གཏོང་བཞིན་པའི་བྱ་སྤྱོད་ལ་སེམས་འཚབ་ཡོད་པ་བསྟན་འདུག རྩ་བའི་ཐེངས་འདིའི་རྒྱལ་ཚོགས་ཀྱི་ལྷན་ཚོགས་ཐེངས་༤༢ པའི་འདས་པའི་ཚོགས་དུས་དེའི་ཁྲོད། རྒྱལ་སྤྱིའི་འགྲོ་བ་མིའི་ཐོབ་ཐང་དང་འབྲེལ་གཞུང་འབྲེལ་མིན་པའི་ཚོགས་པ་ཁག་གིས་ཀྱང། རྒྱ་གཞུང་གིས་བོད་ནང་གི་བོད་མིའི་ཆོས་དད་རང་དབང་དང་།  འདུ་འཛོམས་རང་དབང་། དེ་བཞིན་སྐད་ཡིག་རང་དབང་། སྤྱི་འབངས་ཐོབ་ཐང་བཅས་རྡོག་རོལ་མུ་མཐུད་ནས་གཏོང་བཞིན་ཡོད་པ་དང་། འཛུགས་སྐྲུན་དང་དཔལ་འབྱོར།  ཁོར་ཡུག་དང་མང་ཚོགས་བཅས་ལ་དོ་ཕོག་ཆེན་པོ་དང་གཏོར་སྐྱོན་གཏོང་བཞིན་ཡོད་པ་ཐེར་འདོན་ཡང་བྱས་འདུག

བོད་མིའི་དཀའ་སྡུག་རྣམས་འཇར་མན་གྱི་འགྲོ་བ་མིའི་ཐོབ་ཐང་ཚོགས་ཆུང་ལ་འབུལ་རྒྱུ་ཡིན།

ཁ་སང་སྔ་དྲོ་འཇར་མ་ནིའི་གྲོས་ཚོགས་འཐུས་མི་སྐུ་ཞབས་ Frank Heinrich ལགས་ཀྱིས་སྣེ་ཁྲིད་པའི་གྲོས་ཚོགས་ཀྱི་འགྲོ་བ་མིའི་ཐོབ་རྟོག་ཞིབ་ཚོགས་ཆུང་གི་སྐུ་ཚབ་མི་སྣ་དྲུག་བཞུགས་སྒར་དུ་འཚམས་གཟིགས་སུ་ཕེབས་འབྱོར་བྱུང་སྟེ་བོད་མིའི་སྒྲིག་འཛུགས་ཀྱི་ལྷན་ཁང་ཁག་ཏུ་འཚམས་གཟིགས་གནང་ཡོད་པ་ལྟར་སྐུ་ཚབ་ཚོགས་ཆུང་དེ་རིང་སྔ་དྲོ་བཞུགས་སྒར་༸རྒྱལ་བའི་ཕོ་བྲང་དུ་༸གོང་ས་མཆོག་ལ་མཇལ་ཁ་ཞུས་སོང་། མཇལ་ཁའི་སྐབས་༸གོང་ས་མཆོག་གིས་ད་ཆ་རྒྱ་ནག་གི་ནང་ནང་པ་ས་ཡ་སུམ་བརྒྱ་ལྷག་ཡོད་པར་བཀའ་གནང་སྟེ་ རྒྱ་ནག་ནང་གི་ཆོས་ལུགས་དད་མོས་ཀྱི་རང་དབང་དེ་གལ་ཆེན་པོ་ཡིན་པ་བཀའ་བསྩལ་བ་དང་འབྲེལ། འཇར་མན་ལྟ་བུའི་རང་དབང་རྒྱལ་ཁབ་གྱི་གྲོས་ཚོགས་སུ་དུས་རྒྱུན་ནས་བོད་དོན་སྤྱི་དང་སྒོས་བོད་ཀྱི་ཆོས་རིག་དང་ཁོར་ཡུག་སོགས་ཀྱི་གནད་དོན་ཐོག་གླེང་སློང་གནང་རོགས་ཞེས་རེ་སྐུལ་གནང་འདུག རྩ་བའི་འཇར་མན་གྲོས་ཚོགས་ཀྱི་འགྲོ་བ་མིའི་ཐོབ་ཐང་གི་ཚན་པའི་ངོས་ནས་ལོ་ཕྱེད་ཅིག་གི་རིང་ལ་ཆོས་ལུགས་དད་མོས་ཀྱི་རང་དབང་ཐད་ལ་ཕྱག་ལས་གནང་རྒྱུའི་གྲོས་མཐུན་བྱུང་ཡོད་སྟབས་བརྗོད་གཞི་དང་འབྲེལ་ནས་ས་གནས་འདྲ་མིན་དུ་ཕེབས་ཏེ་དངོས་ཡོད་གནས་སྟངས་ལ་རྟོག་ཞིབ་གནང་གི་ཡོད་པ་ལྟར། ཟླ་བ་སྔོན་མའི་ནང་བོད་ དུ་ཕེབས་རྒྱུར་ཐབས་ཤེས་གནང་ཡོད་ཀྱང་རྒྱ་ནག་གཞུང་ནས་བཀག་སྡོམ་བྱས་ཡོད་རྐྱེན་ཐེངས་འདིར་བཞུགས་སྒར་དུ་ཆེད་ཕེབས་གནང་བ་ཞིག་ཡིན་པ་རེད། དེ་རིང་༸གོང་ས་མཆོག་གི་མཇལ་ཁ་གྲུབ་མཚམས་སུ་སྐུ་ཞབས་ Frank Heinrich ལགས་ཀྱིས་གསར་འགོད་པར་ང་ཚོའི་དམིགས་ཡུལ་དེ་བོད་ནང་ཆེད་སྐྱོད་ཀྱིས་དངོས་ཡོད་གནས་ཚུལ་ལ་རྟོག་ཞིབ་བྱེད་རྒྱུ་དེ་ཡིན་ཀྱང་རྒྱ་ནག་གཞུང་གིས་བཀག་འགོག་བྱས་ཡོད་སྟབས་སྐབས་དེར་ང་ཚོར་ཚོར་བ་མ་བདེ་བ་ཞེ་དྲག་བྱུང་སོང་།  ང་ཚོས་འདས་པའི་བདུན་ཕྲག་ཁ་ཤས་གོང་བར་དུ་བོད་སྐྱོད་ཐུབ་རྒྱུར་འབད་བརྩོན་བྱས་པ་ཡིན་ཀྱང་མཐའ་མར་བོད་ནང་འགྲོ་མ་ཐུབ་སྟབས་བོད་མིའི་སྤྱི་ཚོགས་སུ་གནས་ཚུལ་འཚོལ་བསྡུ་ཆེད་དུ་འདིར་བཅར་བ་ཡིན་ཞེས་གསུངས་སོང་། ཁོང་གིས་ད་དུང་ང་ཚོས་འདིར་རྟོག་ཞིབ་བྱས་ཏེ་གནས་ཚུལ་མཁོ་སྒྲུབ་བྱས་རྗེས་འཇར་མན་གྲོས་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ལ་བོད་མིའི་དཀའ་སྡུག་དང་འབྲེལ་བའི་སྙན་ཐོ་ཞིག་འབུལ་རྩིས་ཡོད། དེ་རྗེས་གཞི་ནས་ཐེངས་འདིའི་འཚམས་གཟིགས་ཀྱི་གྲུབ་དོན་དེ་གྲོས་གཞི་ཆགས་མིན་དང་འཇར་མན་སྲིད་གཞུང་གི་ཕྱི་འབྲེལ་གྱི་བློན་ཆེན་ལ་གནས་ཚུལ་དེ་དང་འབྲེལ་བའི་བརྡ་ལན་ཇི་ལྟར་སྤྲོད་དགོས་མིན་སོགས་ལ་གཟིགས་རྒྱུ་ཡིན་ཞེས་གསུངས་ཡོད། སྐུ་ཞབས་ Heinrich ལགས་ཀྱིས་༸གོང་ས་མཆོག་ལ་མཇལ་ཁ་ཞུས་བ་བརྒྱུད་ནས་ཆོས་སྲིད་དང་མི་སྒེར་བཅས་ཀྱི་གནད་དོན་མང་པོ་ཞིག་གི་སྐོར་ནས་ངེས་ཤེས་རྙེད་ཡོད་པར་འགྲེལ་བརྗོད་ཀྱིས་འགྲོ་བ་མིའི་རིགས་ཀྱི་བདེ་སྐྱིད་ནི་བཤད་རྒྱུ་ཙམ་དང་བསམ་རྒྱུ་ཙམ་མ་ཡིན་པར་དོན་དདོས་སུ་ཉིན་རེའི་འཚོ་བའི་ནང་ལག་བསྟར་བྱེད་རྒྱུ་ཞིག་ཡིན་པ་ཤེས་རྟོགས་བྱུང་སོང་ཞེས་གསུངས་པ་དང་ཆབས་ཅིག མགོན་པོ་༸གང་ཉིད་མཆོག་གི་མཇལ་ཁ་ཞུ་རྒྱུ་བྱུང་བར་ཧ་ཅང་བཀའ་དྲིན་ཆེན་པོ་ཚོར་ཡོད་པ་གསུངས་སོང་། རྩ་བའི་ཟླ་བ་སྔོན་མའི་ནང་རྒྱ་ནག་གཞུང་གིས་འཇར་མ་ནིའི་གྲོས་ཚོགས་ཀྱི་འགྲོ་བ་མིའི་ཐོབ་ཐང་གི་ཚོགས་ཆུང་ལ་རྒྱ་ནག་ཏུ་ཕེབས་རྒྱུའི་མཐོང་མཆན་སྤྲད་མེད་པའི་གནས་ཚུལ་བྱུང་བ་མ་ཟད། གྲོས་ཚོགས་ཀྱི་ digital affairs ཚོགས་ཆུང་གི་ཚོགས་མི་ཁག་གཅིག་ཀྱང་རྒྱ་ནག་ཏུ་ཕེབས་འཆར་ལ་འགོག་རྐྱེན་བཟོས་ཏེ་ཚོགས་ཆུང་དེའི་ནང་རྒྱུན་དུ་རྒྱ་ནག་གི་འགྲོ་བ་མིའི་ཐོབ་ཐང་གི་གནས་སྟངས་ལ་སྐྱོན་བརྗོད་གནང་མཁན་ལྕམ་སྐུ་ Margareta Bause ལགས་ཡོད་སྟབས་ཁོང་ལ་མཐོང་མཆན་སྤྲོད་རྒྱུ་མིན་སྐོར་བཤད་པར་བརྟེན་ཚོགས་ཆུང་དེའི་ཚོགས་མི་ཡོངས་རྒྱ་ནག་ཏུ་ཕེབས་རྒྱུ་ཕྱིར་འཐེན་གནང་ཡོད་པ་ཞིག་ཆགས་ཡོད་པ་རེད། ལྕམ་སྐུ་ Margareta Bause ལགས་ཀྱང་ཐེངས་འདིའི་འཚམས་གཟིགས་ནང་བཞུགས་སྒར་དུ་ཕེབས་ཡོད་པ་ལྟར་ཁོང་གིས་གསར་འགོད་པར་༸གོང་ས་མཆོག་ནས་མཇལ་མོལ་སྐབས་གཙོ་བོ་འགྲོ་བ་མིའི་རིགས་ཀྱི་བདེ་རྩ་དང་འབྲེལ་ནས་ལམ་སྟོན་གནང་ཡོད་པ་འགྲེལ་བརྗོད་ཀྱིས་གནད་དོན་དེ་ནི་འཇར་མན་གྱི་གྲོས་ཚོགས་ཙམ་མ་ཟད་རྒྱལ་སྤྱིའི་ཁྱོན་གལ་གནད་ཆེན་པོ་ཞིག་ཆགས་ཡོད་སྐོར་གསུངས་པ་དང་ལྷན་ཅིག་ཏུ་ཁོང་རྣམས་ཕྱིར་ཕེབས་རྗེས་ འགྲོ་བ་མིའི་ཐོབ་ཐང་སྤྱི་དང་སྒོས་བོད་དོན་ཐོག་རྒྱབ་སྐྱོར་གནང་ངེས་ཡིན་ཞེས་གསུངས་སོང་། དེ་རིང་སྔ་དྲོ་བཞུགས་སྒར་དུ་མགོན་པོ་༸གང་ཉིད་མཆོག་གི་མཇལ་ཁ་གྲུབ་མཚམས་སུ་ཁོང་རྣམས་ནས་བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་མཆོག་དང་མཇལ་འཕྲད་དང་། དེ་རྗེས་ནོར་གླིང་དུ་གཟིགས་སྐོར་ལ་ཕེབས་ ཡོད་པ་དང་། དགོང་དྲོ་བོད་མི་མང་སྤྱི་འཐུས་ལྷན་ཁང་གི་རྒྱུན་ལས་རྣམས་ནས་ཁོང་རྣམས་ལ་དགོང་ཚིགས་འདེགས་འབུལ་ཞུ་རྒྱུ་ཡིན་པ་རེད། སང་ཕྱི་ཚེས་ ༡༩ ཉིན་སྔ་ཐོག་ཕྱིར་ལྡི་ལིར་ཕེབས་རྒྱུ་ཡིན་པ་རེད།

རྒྱ་རིགས་སློབ་དཔོན་ཞིག་གིས་རྒྱ་གཞུང་ལ་བོད་མིའི་ཞིང་འབྲོག་མང་ཚོགས་གཞིས་སྤོ་གཏང་རྒྱུ་མེད་པར་ཞུ་སྐུལ།

རྒྱ་ནག་རྒྱལ་ས་པེ་ཅིང་དུ་རྟེན་གཞི་བྱས་པའི་ Institute of Geographic Sciences and Natural Resources Research ཞེས་རྒྱ་ནག་གི་ས་ཁམས་ཚན་རིག་རང་བྱུང་ཐོན་ཁུངས་ཉམས་ཞིབ་བསྟི་གནས་ཁང་གི་ཁྱབ་འོག་ཡོད་པའི་ Center for Natural and Cultural Heritage ཞེས་རྒྱལ་ཚོགས་ཀྱི་རང་བྱུང་དང་རིག་གཞུང་གཅེས་ནོར་བསྟི་གནས་ཁང་གི་ངེས་སྟོན་པ་གཞོན་པ་རྒྱ་རིགས་སློབ་དཔོན་སྐུ་ཞབས་ Min Qingwen ལགས་ཀྱིས་རྒྱ་གཞུང་གིས་ཁོར་ཡུག་སྲུང་སྐྱོབ་ཀྱི་སྲིད་བྱུས་ཁྲོད་བོད་མཐོ་སྒང་གྱི་ས་ཁོངས་རྒྱ་ཆེ་ཞིག་རྒྱལ་ཁབ་སྤྱི་གླིང་གྱི་ངོ་བོར་བསྒྱུར་རྒྱུའི་ལས་གཞིའི་འོག ས་ཁུལ་དེ་དག་ནང་དུ་བཅའ་བསྡོད་གནང་མཁན་ས་གནས་བོད་མི་རྣམས་ཀྱི་ཁེ་ཕན་དང་། ཡུལ་མི་དེ་དག་གི་རིག་གཞུང་དང་གོམས་སྲོལ་རྣམས་ཀྱིས་ཁོར་ཡུག་སྲུང་སྐྱོབ་གནང་བར་དགེ་མཚན་ཆེན་པོ་ཆགས་ཀྱི་ཡོད་པའི་གནད་དོན་ལ་སྣང་མེད་དང་རྩིས་མེད་མ་གཏང་བར་ས་གནས་བོད་མི་རྣམས་གཞིས་སྤོ་བྱེད་བཞིན་ཡོད་པ་དང་འབྲེལ། ས་གནས་ཡུལ་མི་རྣམས་ཀྱི་གནའ་སྔ་མོ་ནས་ཁོར་ཡུག་སྲུང་སྐྱོབ་གནང་ཐོག་ས་ཁུལ་དུ་འཚོ་གནས་བྱེད་བཞིན་ཡོད་པ་དང། བོད་མིའི་གོམས་སྲོལ་དེ་དག་འཚོ་གནས་ཙམ་མ་ཟད་ཁོར་ཡུག་སྲུང་སྐྱོབ་ཐད་ལ་ཡང་གལ་འགངས་ཆེན་པོ་ཆགས་ཀྱི་ཡོད་པས་རྒྱ་གཞུང་གིས་ས་གནས་བོད་མི་རྣམས་སྔར་བཞིན་གནས་འཇུག་དགོས་པ་མ་ཟད། ཁོར་ཡུག་སྲུང་སྐྱོབ་སྣེ་ཁྲིད་གནང་མཁན་དུ་བཞག་དགོས་པའི་ཞུ་སྐུལ་གནང་འདུག བཞུགས་སྒར་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་གནས་ཚུལ་སྤེལ་བར་ཟླ་བ་སྔོན་མར་རྒྱ་ནག་མི་དམངས་སྲིད་གྲོས་ཚོགས་པའི་དྲྭ་གནས་ཐོག་སྙན་ཐོ་ཞིག་འདོན་སྤེལ་གནང་བའི་ནང་སློབ་དཔོན་ Min Qingwen ལགས་ཀྱིས་རྒྱ་གཞུང་གིས་ཁོར་ཡུག་སྲུང་སྐྱོབ་ཀྱི་སྲིད་བྱུས་ལ་བསྒྱུར་བ་བཏང་སྟེ་ཕྱི་ལོ་ ༢༠༡༧ ལོ་ནས་བཟུང་བོད་མཐོ་སྒང་གྱི་ས་ཁུལ་མང་དག་ཅིག་ National Park འམ་རྒྱལ་ཁབ་སྤྱི་གླིང་དུ་བསྒྱུར་རྒྱུའི་ལས་གཞི་སྤེལ་བཞིན་པའི་ཁྲོད་རྒྱ་གཞུང་གིས་སྤྱི་གླིང་གསར་རྒྱག་གི་ས་ཁུལ་ཁག་ཏུ་རྒྱལ་ཁབ་གཞན་དང་མི་འདྲ་བར་ཞིང་འབྲོག་མང་ཚོགས་ཕོན་ཆེན་པོ་འཚོ་གནས་བྱེད་བཞིན་ཡོད་པ་དང། ང་ཚོའི་ཁོར་ཡུག་གི་གནད་དོན་གསལ་བར་ས་ཁུལ་དེ་དག་ནང་གི་མང་ཚོགས་ཀྱི་འཚོ་གནས་དང་ཐོན་ཁུངས་བཅས་ཀྱི་ཐོག་ལ་ཐབས་ལམ་ཞིག་འདོན་དགོས་ངེས་ཡིན་སྐོར་གསུངས་པ་དང་འབྲེལ། ཁོང་གིས་ཞིབ་འཇུག་ཁྲོད་སྤྱི་གླིང་གསར་རྒྱག་གི་ལས་བྱེད་པ་རྣམས་ཀྱི་ས་ཁུལ་ལ་དོ་སྣང་སྤྲད་པ་མ་གཏོགས་ས་ཁུལ་དེར་སྤྱི་གླིང་གསར་རྒྱག་གི་ལས་གཞིའི་དམིགས་ཡུལ་གཙོ་བོ་དེར་སྣང་མེད་གཏོང་བཏང་བཞིན་ཡོད་པ་དང་། དེའང་ས་ཁུལ་དེ་དག་ནང་གི་ཡུལ་མི་གཞིས་སྤོ་གཏང་རྒྱུ་དེ་ལག་ལེན་ཐོག་ཁག་པོ་ཡོད་པ་མ་ཟད་ཁོར་ཡུག་སྲུང་སྐྱོབ་ལ་ཡང་ཁེ་ཕན་མེད་པ་གསུངས་འདུག སློབ་དཔོན་ Min Qingwen ལགས་ཀྱིས་རྒྱ་གཞུང་ནས་ཕྱི་ལོ་ ༢༠༢༠ ལོར་དབུ་བྱེད་བྱ་འཆར་ཡོད་པའི་ Sanjiangyuan འམ་མཚོ་སྔོན་ཞིང་ཆེན་ཁུལ་གྱི་ས་གནས་ཁག་གསུམ་དུ་འདི་ལོ་གངས་རུད་ཀྱི་གོད་ཆག་འོག་ས་ཁུལ་དེའི་ནང་གི་རི་དྭགས་རྣམས་ལ་རྩྭ་ཆུ་མེད་པའི་དཀའ་ངལ་ཆེན་པོ་འཕྲད་སྐབས་སུ་ས་གནས་བོད་མི་སེར་སྐྱ་ཚོས་འགན་ཁུར་བླངས་ཏེ་ལྟོག་ཤི་ཐེབས་བཞིན་པའི་རི་དྭགས་དེ་དག་ལ་རྩ་སོགས་སྐྱེལ་བའི་གནས་ཚུལ་བྱུང་ཡོད་པ་ལུང་འདྲེན་གྱིས་སླད་མར་ས་གནས་བོད་མི་རྣམས་ལ་ཁོར་ཡུག་སྲུང་སྐྱོབ་གནང་རྒྱུའི་རང་བཞིན་གྱི་ནུས་པ་ལྡན་ཡོད་སྐོར་གསུངས་འདུག མི་རབས་མང་པོའི་རིང་ས་ཁུལ་དེ་དག་ཏུ་བསྡད་མྱོང་མཁན་ས་གནས་བོད་མི་ཞིང་འབྲོག་རྣམས་ནས་ཁོར་ཡུག་སྲུང་སྐྱོབ་བྱེད་པའི་ཐོག་ནས་ཞིང་ལས་དང་ཕྱུགས་རིགས་འཚོ་རྒྱུའི་ལམ་སྲོལ་དར་ཁྱབ་གནང་ཡོད་པ་དེ་དག་གིས་ཁོར་ཡུག་ལ་དོ་ཕོག་བཏང་མེད་པ་མ་ཟད་ཁོར་ཡུག་གི་བྱེད་ལས་ལ་ཕན་ཐོགས་པ། མི་དང་རང་བྱུང་ཁོར་ཡུག་དབར་ཆ་སྙོམས་ཀྱི་འབྲེལ་བ་བཞག་ཡོད་པ་སོགས་ལ་གཞིགས་ཏེ་ས་གནས་ཡུལ་མི་དེ་དག་གི་ཁེ་ཕན་དང་ཁོར་ཡུག་སྲུང་སྐྱོབ་ཐད་ཆ་ཤས་གལ་ཆེན་པོ་ཆགས་ཀྱི་ཡོད་པ་དེར་སྣང་མེད་གཏང་ཐབས་མེད་སྐོར་གསུངས་པ་དང་འབྲེལ། རྒྱུ་མཚན་དང་དོན་ཕན་ལྡན་པའི་འཆར་གཞིའི་བཀོད་ཐོག་སྤྱི་གླིང་གསར་རྒྱག་གི་ལས་གཞི་དེ་རྒྱལ་ས་དང་ས་གནས་ཡུལ་མི་དེ་དག་གི་འཚོ་གནས་ཡར་རྒྱས་གོང་འཕེལ་ཡོང་ཆེད་ས་གནས་ཡུལ་མི་རྣམས་ས་ཁུལ་དུ་རང་འཇགས་འཇོག་གནད་ཡིན་པ་གསུངས་འདུག སྐུ་ཞབས་ Min ལགས་ཀྱིས་ཁོར་ཡུག་སྲུང་སྐྱོབ་ཐད་རྒྱལ་སྤྱིའི་བསམ་བློ་གཏོང་ཕྱོགས་དང་རྒྱ་ནག་གི་ས་ཁུངས་གནས་སྟངས་དེ་དག་ལ་གཞིར་བཅོལ་ནས་མི་དང་ཁོར་ཡུག་གཉིས་ཁ་བྲལ་ཐབས་མེད་པ་ཡིན་སྟབས། ཁོར་ཡུག་སྲུང་སྐྱོབ་ཀྱི་ལས་གཞི་དང་ས་གནས་ཡུལ་མིའི་འཚོ་གནས་སྐོར་དགོངས་པ་བཞེད་གནང་དགོས་ངེས་ཡིན་སྐོར་གསུངས་པ་དང་ཆབས་ཅིག ས་གནས་ཡུལ་མིའི་ཁེ་ཕན་དང་ཁོང་རྣམ་པའི་ཁྱད་དུ་འཕགས་པའི་རིག་གཞུང་དག་སྲུང་སྐྱོབ་ལ་དོ་སྣང་བྱེད་དགོས་ཞེས་གསུངས་འདུག བོད་ཀྱི་འགྲོ་བ་མིའི་ཐོབ་དང་མང་གཙོ་འཕེལ་རྒྱས་ལྟེ་གནས་ཁང་གིས་སློབ་དཔོན་ Min Qingwen ལགས་ཀྱིས་ད་རེས་གསུངས་པ་དང་དེ་སྔ་ཕྱི་ལོ་ ༢༠༡༥ ལོར་ལྟེ་གནས་ཁང་གིས་བོད་མི་འབྲོག་པའི་གནས་སྟངས་སྐོར་གྱི་དམིགས་གསལ་སྙན་ཐོ་འདོན་སྤེལ་གནང་བ་ཀྱི་གྲུབ་དོན་རྣམས་ཡོངས་སུ་མཐུན་ཡོད་པ་མ་ཟད། ལྟེ་གནས་ཁང་གིས་སྤེལ་བའི་སྙན་ཐོར་རྒྱ་གཞུང་གིས་འབྲོག་པ་གཞིས་སྤོའི་ནོར་འཁྲུལ་ཅན་གྱི་ཁོར་ཡུག་སྲུང་སྐྱོབ་སྲིད་བྱུས་རྣམས་གསལ་འདོན་གནང་ཡོད་པ་གསུངས་འདུག

ཨ་རིའི་གྲོས་ཚོགས་ནང་ཧོང་ཀོང་གི་གནད་དོན་ཐོག་ཉན་ཞིབ་ལས་རིམ་ཞིག་ཚོགས་པ།

ཁ་སང་ཨ་རིའི་གྲོས་ཚོགས་གོང་མའི་ཚོགས་ཁང་ཨང་ ༤༡༩ ནང་ CECC ཞེས་ཨ་རིའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་གིས་ཧོང་ཀོང་གི་གནད་དོན་དང་ཨ་རིའི་སྲིད་བྱུས་ཞེས་པའི་བརྗོད་གཞིའི་ཐོག་ཉན་ཞིབ་ཀྱི་ལས་རིམ་ཞིག་ཚོགས་ཐོག་འདས་པའི་ཟླ་བ་བཞི་ལྷག་གི་གོང་ནས་ཧོང་ཀོང་ནང་འབྱུང་བཞིན་པའི་ཧོང་མི་མང་གི་ཞི་བའི་ལས་འགུལ་ཁྲོད་རྒྱ་ནག་གཞུང་གིས་ཐེ་བྱུས་བྱས་པའི་གནས་སྟངས་དང་ཧོང་གཞུང་འབྲེལ་ཉེན་རྟོག་པས་ལས་འགུལ་བར་དྲག་སྤྱོད་སྤེལ་པའི་གནས་སྟངས་སོགས་གསལ་འདོན་གནང་འདུག ཉན་ཞིབ་ཀྱི་ལས་རིམ་ཐོག་ཨ་རིའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་གི་ཚོགས་གཙོ་ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་ Jim McGovern ལགས་དང་མཉམ་འབྲེལ་ཚོགས་གཙོ་ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་ Marco Rubio ལགས་དབུས་གྲོས་ཚོགས་འཐུས་མི་སྐུ་ཞབས་ Christopher H. Smith ལགས་དང་སྐུ་ཞབས་ Tom Suozzi ལགས། སྐུ་ཞབས་ Todd Youngལགས། སྐུ་ཞབས་ Angus King སྐུ་ཞབས་ McAdams ལགས། གནད་ཡོད་མི་སྣ་ཁག་གཅིག་དང་ཧོང་ཀོང་མང་གཙོའི་ལས་འགུལ་བ་ Joshua Wong ལགས། ཧོང་ཀོང་གི་མང་གཙོ་དོན་གཉེར་བ་གཞས་མ་ Denise Ho ལགས། དེ་བཞིན་ཧོང་ཀོང་རྒྱལ་སྤྱིའི་ཤེས་ཡོན་ལྟེ་གནས་ཁང་གི་མགྲིན་ཚབ་པ་ Sunny Cheung ལགས། རྒྱ་ནག་ནང་གི་འགྲོ་བ་མིའི་ཐོབ་ཐང་ཐོག་སློབ་སྟོན་གནང་མཁན་ཨ་རིའི་ New York གཙུག་ལག་སློབ་གྲྭ་ཆེན་མོའི་སློབ་དཔོན་ Sharon Hom ལགས་དང་དཔྱད་ཞིབ་པ་ Dan Garrett ལགས་བཅས་ལྷན་ཞུགས་གནང་འདུག སྐབས་དེར་སྐུ་ཞབས་ Jim McGovern ལགས་ནས་ཧོང་ཀོང་མི་མང་གི་ཞི་བའི་ལས་འགུལ་དེར་རྒྱལ་སྤྱིའི་ཐོག་ནས་དོ་སྣང་ཆེན་པོ་གནང་བ་མ་ཟད་ལྷག་པར་དུ་རྒྱལ་ཚོགས་དང་ཨིན་ཡུལ་གཞུང་། དེ་བཞིན་ཨ་རི་གྲོས་ཚོགས་བཅས་ནས་ཉེ་ཆར་ཧོང་ཀོང་མི་མང་གི་ལས་འགུལ་ལ་ཐེ་བྱུས་བྱེད་མཁན་གྱི་ཚོང་ལས་ཁང་ཁག་དང་ཚོང་འབྲེལ་གནང་རྒྱུ་མིན་པའི་སྲིད་བྱུས་གཏན་འབེབས་དང་། ཧོང་ཀོང་སྲུང་སྐྱོབ་དགོས་ཞེས་པའི་ཁྲིམས་འཆར་སོགས་ཆེད་འདོན་གནང་ཡོད་པར་འགྲེལ་བརྗོད་གནང་བ་དང་འབྲེལ་ཏེ་ཨ་མི་རི་ཀའི་གཞུང་ནས་དེ་སྔ་ཕྱི་ལོ་ ༡༩༩༢ ལོར་ཧོང་ཀོང་དང་ཨ་རི་དབར་བཞག་པའི་ཁྲིམས་གཞིའི་དགོངས་དོན་ལྟར་ཧོང་ཀོང་དེ་རང་སྐྱོང་ཚད་ལྡན་ཞིག་ཏུ་ངོས་འཛིན་ཞུ་བཞིན་ཡོད་ཀྱང་། འདས་པའི་ལོ་ཤས་ནང་ཧོང་ཀོང་རང་སྐྱོང་གི་གནས་བབས་དང་ཚོང་འབྲེལ་གྱི་གནས་སྟངས་སོགས་ཀྱི་ཐད་ཉམས་གུད་ཆེན་པོ་འགྲོ་བཞིན་པ་ནི་རྒྱ་ནག་གཞུང་ནས་ཧོང་ཀོང་གི་ཁྲིམས་ལུགས་དབང་འཛིན་དང་འཛིན་སྐྱོང་གི་ལས་དོན་སོགས་ལ་ཐེ་བྱུས་བྱེད་བཞིན་པ་དེ་ཆགས་ཡོད་སྟབས། རྒྱ་ནག་ནས་མུ་མཐུད་དེ་ལྟར་ཐེ་བྱུས་རིགས་བྱེད་ཚེ་ཨ་རི་དང་རྒྱ་ནག་དབར་གྱི་ཚོང་འབྲེལ་གཙོས་གནད་དོན་མང་དག་ཐོག་དོ་ཕོག་འགྲོ་སྲིད་པ་གསུངས་འདུག དེ་བཞིན་སྐུ་ཞབས་ Christopher H. Smith ལགས་ཀྱིས་ཧོང་ཀོང་མི་མང་གི་ཞི་བའི་ལས་འགུལ་དེས་མང་གཙོའི་ལམ་ལུགས་དང་དབང་ཆ་གཅིག་སྡུད་རིང་ལུགས་གཉིས་མཉམ་དུ་ཡོང་ཐབས་མེད་པ་དང་ལྷག་དོན་རྒྱ་ནག་གཞུང་ནས་རྒྱལ་སྤྱིའི་ཁྲིམས་ལུགས་ཁག་ལ་རྩིས་སྲུང་མེད་པར་ཧོང་ཀོང་རང་སྐྱོང་གི་གནས་བབས་ལ་ཐེ་བྱུས་བྱས་པ་ཙམ་མ་ཟད། བོད་དང་ཡུ་གུར་མི་མང་གི་གཞི་རྩའི་ཐོབ་ཐང་ཁག་རྩིས་མེད་རྡོག་རོལ་གཏོང་བཞིན་པའི་གནས་སྟངས་དང་། འགྲོ་བ་མིའི་ཐོབ་ཐང་ལས་འགུལ་བ་དང་ཁྲིམས་རྩོད་པ། དེ་བཞིན་གསར་འགོད་པ་ཚོར་དམ་དྲག་དང་འཛིན་བཟུང་བཙན་ཁྲིད་བྱེད་བཞིན་པའི་བྱ་སྤྱོད་རྣམས་རྒྱལ་སྤྱིའི་ཐོག་མངོན་གསལ་གནང་ཐུབ་པ་བྱུང་ཡོད་ཅེས་གསུངས་འདུག ཧོང་ཀོང་མང་གཙོའི་ལས་འགུལ་བ་ Joshua Wong ལགས་ནས་ཧོང་ཀོང་ནང་གི་ཞི་བའི་ལས་འགུལ་གྱི་བྱུང་རིམ་ཁག་ངོ་སྤྲོད་དང་སྦྲགས་ཏེ་ལས་འགུལ་ཁྲོད་སྤྱི་ཁྱབ་ཀེ་རི་ལེམ་གྱིས་ཉེས་ཅན་རྩིས་སྤྲོད་ཀྱི་ཁྲིམས་འཆར་དེ་ཕྱིར་འཐེན་གནང་ཡོད་ཀྱང་ཧོང་ཀོང་མི་མང་གི་མངོན་འདོད་དེ་ནི་ཁྲིམས་འཆར་གཅིག་དང་གང་ཟག་ཅིག་གི་འཐབ་རྩོད་མིན་པར་གཙོ་བོ་ཧོང་ཀོང་གི་ཆབ་སྲིད་སྒྲོམ་གཞི་ལ་བསྒྱུར་བཅོས་བརྒྱུད་མི་མང་ལ་མང་གཙོ་དང་རང་དབང་ལྡན་པའི་འོས་བསྡུའི་ཐོབ་ཐང་གནང་རྒྱུ་དེ་ཡིན་པ་འགྲེལ་བརྗོད་དང་སྦྲགས། ཧོང་ཀོང་མང་གཙོ་དོན་གཉེར་རྣམས་ནས་ལས་འགུལ་དི་མུ་མཐུད་རྒྱུན་འཁྱོངས་གནང་རྒྱུ་ཡིན་པ་དང་། དེའི་མཇུག་འབྲས་གང་འདྲ་ཞིག་ཡོང་མིན་སུས་ཀྱང་དཔོག་དཀའ་ཐུབ་ཀྱི་མ་རེད་ཅེས་གསུངས་འདུག ཁོང་གིས་རྒྱ་གཞུང་ནས་ཧོང་ཀོང་གི་ལས་འགུལ་ཁྲོད་ཐེ་བྱུས་བྲས་པའི་གནས་སྟངས་དང་། བོད་དང་ཐེ་ཝན། ཤིན་ཅང་སོགས་ཀྱི་ནང་དྲག་པོའི་སྲིད་བྱུས་འདྲ་མིན་ལག་བསྟར་བྱེད་བཞིན་པ་དེ་ནི་རྒྱ་ནག་གཞུང་ནས་མཇུག་འབྲས་གང་ཡིན་ལ་ལྟོས་མེད་སོ་སོའི་ཁེ་ཕན་བསྒྲུབ་ཐབས་ཁོ་ནར་འབད་བརྩོན་བྱེད་བཞིན་པ་གསལ་པོ་རེད་ཅེས་གསུངས་འདུག དེ་བཞིན་ཧོང་ཀོང་གི་མང་གཙོ་དོན་གཉེར་བ་གཞས་མ་ Denise Ho ལགས་ནས་ཧོང་ཀོང་ནང་རྟེན་གཞི་བྱས་པའི་ཚོང་གི་སྡེ་ཚན་དང་གཞུང་འབྲེལ་མ་ཡིན་པའི་ཚོགས་པ་མང་དག་ཅིག་རྒྱ་ནག་དང་ལག་འབྲེལ་བྱས་ཏེ་ཧོང་ཀོང་ཞི་བའི་ལས་འགུལ་བ་དང་།སྒྱུ་རྩལ་བ་རྣམས་ལ་ཚོད་འཛིན་དམ་དྲག་འདྲ་མིན་བྱེད་བཞིན་པ་སོགས་ཐེར་འདོན་གནང་བ་མ་ཟད། ཧོང་ཀོང་རྒྱལ་སྤྱིའི་ཤེས་ཡོན་ལྟེ་གནས་ཁང་གི་མགྲིན་ཚབ་པ་ Sunny Cheung ལགས་ཀྱིས་ཀྱང་ཧོང་ཀོང་ནང་གི་ཞི་བའི་ལས་འགུལ་དེ་ནི་ཧོང་ཀོང་མི་མང་གི་གཞི་རྩའི་ཐོབ་ཐང་དང་། རྒྱལ་ཁབ་ཀྱི་ཁྲིམས་ལུགས་དབང་འཛིན་སྲུང་སྐྱོབ་གནང་རྒྱུ་དེ་ཡིན་སྟབས་མང་ཚོགས་ཀྱིས་ལས་འགུལ་དེ་མུ་མཐུད་ནས་སྤེལ་རྒྱུ་ཡིན་པ་སོགས་གསུངས་འདུག མ་ཟད་སློབ་དཔོན་Sharon Hom ལགས་དང་དཔྱད་ཞིབ་པ་ Dan Garrett ལགས་ནས་ཀྱང་ཧོང་ཀོང་ཞི་བའི་ལས་འགུལ་དེ་ནི་ཧོང་ཀོང་མི་མང་གཅིག་པོའི་གནས་དོན་མིན་པར་རྒྱལ་སྤྱིའི་ཐོག་རྒྱ་ནག་གཞུང་གིས་འགྲོ་བ་མིའི་ཐོབ་ཐང་གི་གནས་སྟངས་འགྲེལ་བརྗོད་ལོག་པར་བྱེད་པའི་བྱ་སྤྱོད་ཐེར་འདོན་རྒྱུད། མང་གཙོ་དང་འགྲོ་བ་མིའི་ཐོབ་ཐང་སྲུང་སྐྱོབ་བྱེད་རྒྱུ་དང་འབྲེལ་བ་ཡོད་པ་ཡིན་པ་སོགས་གསུངས་འདུག ཉན་ཞིབ་ཀྱི་ལས་རིམ་དེའི་ཁྲོད་ཨ་རིའི་གྲོས་ཚོགས་འཐུས་མི་རྣམས་ནས་ཧོང་ཀོང་གི་གནད་དོན་ཐོག་ཐུགས་འཚབ་དང་འབྲེལ་གསུང་བཤད་གནང་ཡོད་པ་དང་། སྐབས་དེར་སྐུ་ཞབས་ Marco Rubio ལགས་ཀྱིས་རྒྱ་ནག་གཞུང་ནས་ཧོང་ཀོང་གི་གནད་དོན་དེ་རྒྱ་ནག་རྒྱལ་ནང་གི་གནད་དོན་ཡིན་སྐོར་བརྗོད་བཞིན་པ་དེ་ནི་བདེན་པ་མིན་པ་དང་ཧོང་ཀོང་མི་མང་གི་རང་དབང་སྲུང་སྐྱོབ་གནང་རྒྱུའི་འགན་དེ་ཨ་རིས་གཙོས་པའི་རྒྱལ་སྤྱིའི་རྒྱལ་ཁབ་ཚང་མར་ཡོད་པ་ནན་པོ་གསུངས་འདུག ཉན་ཞིབ་ཀྱི་མཐའ་མར་ཧོང་ཀོང་གི་སྐུ་ཚབ་རྣམས་ནས་ཨ་རིའི་གྲོས་ཚོགས་སུ་ཧོང་ཀོང་གི་གནད་དོན་གླེང་སློང་གནང་རྒྱུའི་གོ་སྐབས་གནང་བར་ཐུགས་རྗེ་ཆེ་ཞུས་དང་སྦྲགས། ཨ་རིའི་སྲིད་གཞུང་ནས་ཧོང་ཀོང་གི་གནད་དོན་ཐོག་མུ་མཐུད་རྒྱབ་སྐྱོར་དང་ཨ་རིའི་གྲོས་ཚོགས་ནང་ཧོང་ཀོང་མི་མང་གི་མངོན་འདོད་དང་མང་གཙོ། འགྲོ་བ་མིའི་ཐོབ་ཐང་སོགས་ཀྱི་ཐོག་རྒྱབ་སྐྱོར་ཡོད་པའི་ཁྲིམས་འཆར་ཞིག་ངེས་པར་དུ་གཏན་འབེབས་གནང་སྐྱོང་ཡོང་བ་ཞུ་ཞེས་འབོད་སྐུལ་ཞུས་འདུག

བྷོ་ཊའི་སྐད་ཡིག་ལ་གཞུང་འབྲེལ་ངོས་འཛིན་དང་ལ་དྭགས་བརྒྱུད་ཏི་སིའི་འགྲུལ་ལམ་ཕྱེ་དགོས།

ལ་དྭགས་ཧི་མཱ་ལ་ཡའི་ནང་པའི་ཆོས་རིག་འཛིན་སྐྱོང་ཚོགས་པའི་ངོས་ནས་བོད་ཀྱི་སྐད་ཡིག་གམ་བྷོ་ཊའི་སྐད་ཡིག་དེ་རྒྱ་གར་གཞུང་གིས་ངོས་འཛིན་གནང་དགོས་པ་དང་འདི་བཞིན་ལ་དྭགས་དང་བོད་ཀྱི་ས་མཚམས་སུ་ཚོང་འབྲེལ་སླར་གསོའི་གཙོས་པའི་ལ་དྭགས་བརྒྱུད་ནས་གངས་རིན་པོ་ཆེར་གནས་མཇལ་གྱི་འགྲུལ་ལམ་ཕྱེ་དགོས་པའི་འབོད་སྐུལ་གནང་འདུག ཟླ་ ༩ ཚེས་ ༡༢ ཉིན་ལ་དྭགས་གླེའི་རྒྱལ་སའི་ནང་ Himalayan Buddhist Culture Association འམ་ཧི་མཱ་ལ་ཡའི་ནང་པའི་ཆོས་རིག་འཛིན་སྐྱོང་ཚོགས་པས་གསར་འགོད་ལྷན་ཚོགས་ཤིག་སྐོང་ཚོགས་གནང་ཐོག་ཉེ་ལམ་ ལ་དྭགས་དེ་རྒྱ་གར་དབུས་གཞུང་གིས་འཛིན་སྐྱོང་མངའ་ཁུལ་དུ་གྱུར་བ་དང་བསྟུན་ཚོགས་པའི་ཚོགས་གཙོ་བཀྲིས་དར་རྒྱས་ལགས་ཀྱིས་རྒྱ་གར་གཞུང་འཛིན་ཚོགས་པར་ཐུགས་རྗེ་ཆེ་ཞུས་པ་དང་སྦྲགས། ལ་དྭགས་ཀྱི་ཁུལ་ UT དང་འབྲེལ་ནས་ཕྱག་བསྟར་དབུ་འཛུགས་མ་གནང་གོང་བོད་ཀྱི་སྐད་ཡིག་གམ་བྷོ་ཊའི་སྐད་ཡིག་དེ་རྒྱ་གར་གྱི་རྩ་ཁྲིམས་ནང་གསལ་གཞུང་འབྲེལ་ངོས་ལེན་ཡོད་པའི་སྐད་ཡིག་གི་ཁོངས་སུ་འཇོག་དགོས་པའི་འབོད་སྐུལ་གནང་འདུག ལ་དྭགས་ཡུལ་མི་རྣམས་ནས་རང་ཉིད་ཀྱི་ཆོས་ལུགས་ཀྱི་གནད་དོན་གཙོ་བོར་གནང་བའི་ཡུལ་སྐོར་སྤྲོ་འཆམ་པ་མང་དུ་འགྲོ་རྒྱུ་དང་། དཔལ་འབྱོར་ཡར་རྒྱས་གོང་འཕེལ་ལ་དམིགས་ཏེ་ལོ་མང་གི་སྔོན་ནས་རྒྱ་གར་དབུས་གཞུང་ལ་ཞུ་སྐུལ་ཞུ་བཞིན་པའི་གནད་དོན་ནི་ལ་དྭགས་ཡུལ་ལུང་བརྒྱུད་ནས་གནས་ཆེན་གངས་རིན་པོ་ཆེར་གནས་མཇལ་དུ་བསྐྱོད་ཆོག་པ་ཞིག་བཟོས་དགོས་པའི་འབོད་སྐུལ་ཞུས་འདུག་པ་མ་ཟད། དེ་སྔ་ལོ་རྒྱུས་ཀྱི་ཐོག་བོད་དང་ལ་དྭགས་ཀྱི་ས་མཚམས་སུ་ཆགས་པའི་བྱང་ཐང་གི་ས་ཚིགས་ཁག་ཏུ་ཚྭ་དང་བལ། ལེ་ན་སོགས་ཀྱི་ཚོང་འབྲེལ་ཆེན་པོ་ཡོད་ཀྱང་ད་ཆ་ཚོང་འབྲེལ་དེ་མུ་མཐུད་རྒྱུན་གནས་བྱུང་མེད་སྟབས། རྒྱ་གར་གཞུང་ནས་དེར་གཟིགས་སྐྱོང་གནང་ཐོག་སྔར་གྱི་ཚོང་འབྲེལ་བཟང་པོ་དེ་སླར་གསོ་གནང་དགོས་པའི་ཞུ་སྐུལ་བསྐྱར་ནན་གནང་འདུག

༸གོང་ས་མཆོག་གིས་སྲིད་བློན་མོ་དཱི་མཆོག་གི་འཁྲུངས་སྐར་ལ་འཚམས་འདྲི་མཛད་པ།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་གྱི་སྲིད་བློན་མོ་དཱི་མཆོག་གི་འཁྲུངས་སྐར་ལ་འཚམས་འདྲི་མཛད་པ་དང་འབྲེལ་ཏེ་སྲིད་བློན་མཆོག་གིས་གདེང་སྤོབས་ཆེན་པོའི་ཐོག་ནས་རྒྱ་གར་རྒྱལ་ཁབ་འདི་ཡར་རྒྱས་ཀྱི་ཕྱོགས་སུ་འཁྲིད་བཞིན་པར་ཡི་རངས་བསྔགས་བརྗོད་མཛད་འདུག ༸གོང་ས་མཆོག་གིས་དེ་རིང་ཟླ་ ༩ ཚེས་ ༡༧ ཉིན་སྲིད་བློན་མོ་དཱི་མཆོག་དགུང་ལོ་ ༦༩ ལ་ཕེབས་པའི་འཁྲུངས་སྐར་ཉིན་མོར་དགའ་བསུའི་འཚམས་འཕྲིན་ཞིག་བསྩལ་བའི་ནང་མགོན་པོ་༸གང་ཉིད་མཆོག་ནི་ཡུན་རིང་ནས་རྒྱ་གར་གྱི་མགྲོན་པོ་ཞིག་ཡིན་པ་མ་ཟད་འཕགས་ཡུལ་འདི་ཉིད་ལ་དོན་དམ་གྱི་མཛའ་བརྩེའི་བསམ་པ་ཡོད་མཁན་ཞིག་ཡིན་སྟབས་སྲིད་བློན་མཆོག་གི་འདས་པའི་ལོ་དུས་ནང་འདེང་སྤོབས་ཆེན་པོའི་ཐོག་རྒྱ་གར་རྒྱལ་ཁབ་འདི་ཡར་རྒྱས་ཀྱི་ཕྱོགས་སུ་འཁྲིད་བཞིན་པར་ཡི་རངས་བསྔགས་བརྗོད་མཛད་པ་དང་ཆབས་ཅིག རྒྱ་གར་རྒྱལ་ཁབ་འདི་ཡར་རྒྱས་དང་ལམ་ལྷོངས་ལྡན་པ་ཞིག་བྱུང་ཚེ་རྒྱ་གར་ཡུལ་མི་ཙམ་མིན་པར་འཛམ་གླིང་སྤྱིའི་ཡར་རྒྱས་ལ་ཞབས་འདེབས་ཆེན་པོ་ཞུ་ཐུབ་ཀྱི་རེད་ཅེས་བཀའ་བསྩལ་འདུག ༸གོངས་མཆོག་གིས་དེ་སྔ་སྲིད་བློན་མོ་དཱི་མཆོག་ལ་རྒྱ་གར་གྱི་གནའ་བོའི་རིག་གནས་བསྐྱར་གསོ་གནང་དགོས་གལ་སྐོར་བཀའ་བསྡུར་མཛད་མྱོང་ཡོད་པ་དྲན་གསོ་དང་སྦྲགས། ད་ལྟའི་ཆར་རྒྱ་གར་གྱི་གཞོན་སྐྱེས་ཁྲོད་དུ་རྒྱ་གར་གྱི་གནའ་བོའི་རིག་གནས་བསྐྱར་གསོའི་ལས་དོན་ལ་དོ་སྣང་གནང་མཁན་ཇེ་མང་དུ་ཕྱིན་ཏེ་ཤར་ཕྱོགས་ཀྱི་ཉི་མ་ལྟར་དར་འཕེལ་འབྱུང་བཞིན་ཡོད་པ་མ་ཟད་རིག་གནས་དེ་དག་དེང་གི་འཛམ་གླིང་ཐོག་དགོས་མཁོ་ཧ་ཅང་ཆེན་པོ་ཆགས་ཡོད་སྟབས། སྙིང་རྗེའི་ཉམས་ལེན་དང་ཞི་གནས་དང་ལྷག་མཐོང་སོགས་བློའི་རྣམ་གཞག་དང་བྱེད་ལས་སྐོར་གསུངས་ཡོད་པ་དེ་དག་དང་ལྷག་པར་དུ་དཔལ་ནཱ་ལེནྡཱ་ནས་བྱུང་བའི་ཚད་མ་རིག་པ་དང་གཏན་ཚིགས་རིག་པའི་རྣམ་གཞག་དེ་རྣམས་དེང་དུས་ཤེས་ཡོན་སློབ་གསོའི་ནང་འཇོག་ཐུབ་ཚེ་འགྲོ་བ་མི་རིགས་སྤྱི་ལ་ཕན་ཐོགས་ཡོང་ཐུབ་ངེས་ཡིན་པ་བཀའ་བསྩལ་འདུག གཞན་ཡང་༸གོང་ས་༸སྐྱབས་མགོན་ཆེན་པོ་མཆོག་གིས་མགོན་པོ་༸གང་ཉིད་མཆོག་འཛམས་གླིང་གི་ས་གནས་གང་དུ་ཕེབས་ཀྱང་རྒྱ་གར་གྱི་མགྲིན་ཚབ་པ་ཞིག་ཡིན་པའི་དགོངས་གཞིའི་ཐོག་ནས་མང་ཚོགས་རྣམས་ལ་རྒྱ་གར་རྒྱལ་ཁབ་འདི་མང་གཙོའི་རྒྱལ་ཁབ་ཆེ་ཤོས་ཤིག་དང་། སྤྱི་ཚོགས་བརྟན་ལྷིང་དང་འཆམ་མཐུན་ཐོག་ཆོས་ལུགས་འདྲ་མིན་མཉམ་གནས་གནང་ཡུལ་གྱི་རྒྱལ་ཁབ་གཅིག་པོ་དེ་ཡིན་པར་བསྔགས་བརྗོད་མཛད་བཞིན་ཡོད་སྐོར་བཀའ་བསྩལ་ཡོད་པ་རེད། ལྷག་པར་དུ་༸གོང་ས་མཆོག་གིས་ཐེངས་འདིའི་སྲིད་བློན་མཆོག་གི་འཁྲུངས་སྐར་ལ་འཚམས་འདྲི་དང་སྦྲགས། བོད་མི་བཙན་བྱོལ་བ་ཚོར་ཆ་མཚོན་ན་རྒྱ་གར་འཕགས་པའི་ཡུལ་འདི་ནི་ཆོས་ཕྱོགས་ཀྱི་སྐྱབས་ཡུལ་ཙམ་མིན་པར་འདས་པའི་མི་ལོ་དྲུག་ཅུ་ལྷག་གི་རིང་བོད་མིའི་འཚོ་གནས་ཤིག་ཀྱང་ཆགས་ཡོད་པ་བཀའ་བསྩལ་བ་དང་ལྷན་གཅིག་ཏུ་རྒྱ་གར་གཞུང་མང་ཡོངས་ལ་ཐུགས་རྗེ་ཆེ་ཞེས་བཀའ་བསྩལ་འདུག

འཇར་མི་ནི་གྲོས་ཚོགས་ཀྱི་འགྲོ་བ་མིའི་ཐོབ་ཐང་ཚོགས་ཆུང་གི་སྐུ་ཚབ་ཁག་གཅིག་བཞུགས་སྒར་དུ་འཚམས་གཟིགས།

དེ་རིང་སྔ་ཐོག་འཇར་མ་ནིའི་གྲོས་ཚོགས་འཐུས་སྐུ་ཞབས་ Frank Heinrich ལགས་ཀྱིས་སྣེ་ཁྲིད་པའི་གྲོས་ཚོགས་ཀྱི་འགྲོ་བ་མིའི་ཐོབ་ཚོགས་ཆུང་གི་སྐུ་ཚབ་མི་སྣ་དྲུག་བཞུགས་སྒར་དུ་འཚམས་གཟིགས་སུ་ཕེབས་འབྱོར་བྱུང་སོང་། འཇར་མ་ནི་གྲོས་ཚོགས་འཐུས་མི་ Frank Heinrich ལགས་དང་ལྕམ་ Ute Vogi ལགས། དེ་བཞིན་ལྕམ་ Margareta Bause ལགས་གཙོས་པའི་ཚོགས་མི་གཞན་གསུམ་པོ་དེ་དག་དེ་རིང་སྔ་ཐོག་བཞུགས་སྒར་དུ་ཕེབས་འབྱོར་གྱིས་བོད་མིའི་སྒྲིག་འཛུགས་ཀྱི་ལྷན་ཁང་ཁག་ཏུ་འཚམས་གཟིགས་གནང་ཡོད་པ་ལྟར་ཉིན་རྒྱབ་ཏུ་སྐུ་ཚབ་ཚོགས་ཆུང་དེས་བོད་མི་མང་སྤྱི་འཐུས་ལྷན་ཚོགས་སུ་འཚམས་གཟིགས་གནང་སྐབས་ཚོགས་གཙོ་མཆོག་གིས་སྐུ་མགྲོན་རྣམ་པར་བོད་ཀྱི་འདས་མ་ད་གསུམ་གྱི་ལོ་རྒྱུས་དང་བཙན་བྱོལ་ནང་གི་མང་གཙོའི་འཕེལ་རིམ་ད་ལྟའི་གནས་སྟངས་སོགས་ཀྱི་སྐོར་ལ་ངོ་སྤྲོད་གནང་འདུག སྐབས་དེར་གསར་འགོད་པས་འཇར་མན་གྲོས་ཚོགས་འཐུས་མི་ཁོངས་སུ་ཡོད་པ་ལྕམ་ Ute Vogi ལགས་དང་ལྕམ་ Margareta Bause ལགས་གཉིས་ལ་བཞུགས་སྒར་དུ་འཚམས་གཟིགས་སུ་ཕེབས་དོན་གང་ཡིན་སྐོར་ལ་བཅར་འདྲི་ཞུས་པར་བོད་ནང་གི་གནས་སྟངས་ཐར་ཀར་རྒྱུས་ལོན་ཞུ་དཀའ་སྟབས་བོད་ནང་གི་དོན་དམ་གྱི་གནས་སྟངས་གང་ཡིན་ཤེས་རྟོགས་ཡོང་ཆེད་དང་བཙན་བྱོལ་བོད་མིའི་གནས་སྟངས་དང་བོད་ནང་གི་གནས་སྟངས་ངོ་མ་གང་ཡིན་ཤེས་ཐབས་སུ་འདིར་བཅར་བ་ཡིན་པ་དང་ཕྱིར་རང་ཡུལ་དུ་ཕེབས་རྗེས་གྲོས་ཚོགས་ནང་གནས་སྟངས་དེ་དག་སྙན་སེང་ཞུ་ངེས་ཡིན་པ་སོགས་གསུངས་སོང་། ཤེས་རྟོགས་བྱུང་བར་གཞིགས་ན་ཚོགས་པ་དེའི་ཚོགས་མི་རྣམས་བཞུགས་སྒར་དུ་ཚེས་ ༡༩ བར་འཚམས་གཟིགས་གནང་གི་འདུག་པ་དང་། དེ་རིང་ཕྱི་དྲོ་སྐུ་ཚབ་རྣམས་ལ་བོད་མིའི་སྒྲིག་འཛུགས་ཀྱི་བཀའ་ཤག་ཏུ་སྲིད་སྐྱོང་མཆོག་གིས་དབུས་པའི་བཀའ་བློན་རྣམ་པ་དང་ལྷན་དུ་གསོལ་ཚིགས་འདེགས་འབུལ་ཞུ་གྱི་ཡོད་པ་མ་ཟད། ཁོང་རྣམས་ནས་སང་ཉིན་སྔ་དྲོ་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་གཙོས་པའི་བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག དེ་བཞིན་བོད་ཀྱི་གཞོན་ནུ་ལྷན་ཚོགས་དང་བེུད་ལྷན་ཚོགས་ཀྱི་སྐུ་ཚབ་རྣམ་པ་བཅས་ལ་ཐུག་འཕྲད་གནང་གནང་རྒྱུ་རེད་འདུག གཞི་རྩའི་ཟླ་བ་སྔོན་མའི་ནང་རྒྱ་ནག་གཞུང་གིས་འཇར་མ་ནིའི་གྲོས་ཚོགས་ཀྱི་འགྲོ་བ་མིའི་ཐོབ་ཐང་གི་ཚོགས་ཆུང་ལ་རྒྱ་ནག་ཏུ་ཕེབས་རྒྱུའི་མཐོང་མཆན་སྤྲད་མེད་པའི་གནས་ཚུལ་བྱུང་བ་མ་ཟད། གྲོས་ཚོགས་ཀྱི་ digital affairs ཚོགས་ཆུང་གི་ཚོགས་མི་ཁག་གཅིག་ཀྱང་རྒྱ་ནག་ཏུ་ཕེབས་འཆར་ལ་འགོག་རྐྱེན་བཟོས་ཏེ་ཚོགས་ཆུང་དེའི་ནང་རྒྱུན་དུ་རྒྱ་ནག་གི་འགྲོ་བ་མིའི་ཐོབ་ཐང་གི་གནས་སྟངས་ལ་སྐྱོན་བརྗོད་གནང་མཁན་ལྕམ་སྐུ་ Margareta Bause ལགས་ཡོད་སྟབས་ཁོང་ལ་མཐོང་མཆན་སྤྲད་མིན་སྐོར་བཤད་པར་བརྟེན་ཚོགས་ཆུང་དེའི་ཚོགས་མི་ཡོངས་རྒྱ་ནག་ཏུ་ཕེབས་རྒྱུ་ཕྱིར་འཐེན་གནང་ཡོད་པ་རེད།

ཨ་རིའི་བོད་དོན་ཁྲིམས་འཆར་གསར་པས་རྒྱ་གཞུང་ལ་ཆབ་སྲིད་ཀྱི་སྔོན་བརྡ་ཞིག་སྤྲད་པ།

ཨ་རིའི་གྲོས་ཚོགས་འོག་མའི་ཚོགས་དུས་ ༡༡༦ པ་འཚོགས་བཞིན་པ་དང་བསྟུན་ཕྱི་ཚེས་ ༡༣ ཉིན་ CECC ཞེས་ཨ་རིའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་གི་ཚོགས་གཙོ་ཨ་རའི་གྲོས་ཚོགས་འཐུས་མི་སྐུ་ཞབས་ Jim McGovern ལགས་ནས་དེ་སྔ་ཕྱི་ལོ་ ༢༠༠༢ ལོར་ཡུལ་དེའི་གྲོས་ཚོགས་སུ་གཏན་འབེབས་གནང་བའི་ Tibet Policy Act 2002 ཞེས་ཨ་རི་བོད་ཐོག་འཛིན་པའི་སྲིད་བྱུས་དེ་ནུས་ཤུགས་ལྡན་པ་ཞིག་བཟོ་རྒྱུ་དང་འབྲེལ། Tibetan Policy and Support Act of 2019 ཞེས་པའི་ཨ་རིའི་བོད་དོན་ཁྲིམས་འཆར་གསར་པ་ཞིག་ཆེད་འདོན་གནང་བ་མ་ཟད། ཁྲིམས་འཆར་དེར་ཨ་རིའི་ཆབ་སྲིད་ཚོགས་པ་གཉིས་ཀ་ལས་གྲུབ་པའི་གྲོས་ཚོགས་འཐུས་མི་བདུན་ནས་རྒྱབ་སྐྱོར་གནང་ཡོད་པ་རེད། ཨ་རིའི་བོད་དོན་ཁྲིམས་འཆར་གསར་པ་དེ་དང་འབྲེལ་ཏེ་ཨ་རིར་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་གཞོན་པ་བུ་ཆུང་ཚེ་རིང་ལགས་སུ་ཞལ་པར་བརྒྱུད་བཀའ་འདྲི་ཁག་གཅིག་ཞུས་པར་ཨ་རིའི་གྲོས་ཚོགས་འོག་མའི་ནང་བོད་དོན་དང་འབྲེལ་བའི་ཁྲིམས་འཆར་གསར་པ་ཞིག་ཆེད་འདོན་གནང་བ་དེས་ཨ་རི་གྲོས་ཚོགས་ནས་བོད་དོན་ཐོག་ཐུགས་འཁུར་མུ་མཐུད་བཞེས་ཐོག་རྒྱ་ནག་གཞུང་ལ་ཆབ་སྲིད་ཀྱི་སྔོན་བརྡ་ཞིག་སྤྲད་པ་མཚོན་ཐུབ་པ་མ་ཟད་ཁྲིམས་འཆར་དེ་རིམ་པས་གཏན་འབེབས་ཐུབ་ཚེ་བོད་འདི་ཨ་རི་དང་རྒྱ་ནག་དབར་གྱི་འབྲེལ་ལམ་ཁྲོད་གནད་དོན་གལ་ཆེ་ཞིག་ཆགས་ཡོད་པའི་དཔང་རྟགས་ཐུབ་ཀྱི་རེད་ཅེས་གསུངས་སོང་། གཞི་རྩའི་ཨ་རིའི་བོད་དོན་ཁྲིམས་འཆར་གསར་པ་དེའི་ནང་ལ་དེ་སྔ་ ༢༠༠༢ ལོར་གཏན་འབེབས་གནང་བའི་ Tibet Policy Act 2002 ཞེས་ཨ་རིའི་བོད་ཐོག་འཛིན་པའི་སྲིད་བྱུས་ནང་གསལ་བའི་དོན་ཚན་ཁག་ལ་རྒྱས་བཤད་དང་༸གོང་ས་མཆོག་གིས་དབུས་པའི་བོད་ཀྱི་བླ་སྤྲུལ་ཡང་སྲིད་ཀྱི་གནད་དོན། དེ་བཞིན་བོད་ཀྱི་རང་བྱུང་ཁོར་ཡུག་སྲུང་སྐྱོབ་དགོས་པ། ཨ་རི་གཞུང་ནས་བོད་མིར་རོགས་སྐྱོར་མུ་མཐུད་གནང་དགོས་པ་སོགས་དོན་ཚན་ཆེ་ཁག་ལྔ་ཆེད་བཀོད་གནང་འདུག ༸གོང་ས་མཆོག་གིས་དབུས་པའི་བོད་ཀྱི་བླ་སྤྲུལ་ཡང་སྲིད་ཀྱི་གནད་དོན་དང་འབྲེལ་བའི་ནང་བླ་སྤྲུལ་ཡང་སྲིད་ཀྱི་གནད་དོན་དེ་ནི་བོད་མིའི་གཞི་རྩའི་ཆོས་དད་རང་དབང་དང་འབྲེལ་ཡོད་སྟབས། རྒྱ་ནག་གཞུང་ལ་དེའི་ཐོག་ཐེ་བྱུས་བྱ་རྒྱུའི་ཐོབ་ཐང་མེད་པ་དང་། ལྷག་པར་དུ་རྒྱ་ནག་གཞུང་གིས་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་ཡང་སྲིད་ཀྱི་གནད་དོན་ལ་ཐེ་བྱུས་བྱེད་ཚེ་རྒྱ་ནག་གཞུང་འབྲེལ་གྱི་གང་ཟག་དེ་ཨ་རི་ནང་འགྲོ་སྐྱོད་བྱ་རྒྱུའི་ཐོབ་ཐང་སྤྲད་རྒྱུ་མིན་པ་མ་ཟད། ཨ་རི་ནང་ཡོད་པའི་གང་ཟག་དེའི་རྒྱུ་དངོས་རྣམས་བེད་སྤྱོད་མི་ཆོག་པའི་བཀག་རྒྱ་གཏང་དགོས་པ། ཨ་རི་ཕྱི་སྲིད་ལས་ཁུངས་སུ་ཡོད་པའི་ཨ་རིའི་བོད་དོན་དམིགས་བསལ་འབྲེལ་མཐུད་པས་རྒྱལ་སྤྱིའི་ཆབ་སྲིད་ཀྱི་འབྲེལ་ལམ་བརྒྱུད་རྒྱ་གཞུང་གིས་༸སྐུའི་ཡང་སྲིད་ཀྱི་གནད་དོན་ཐོག་ཐེ་བྱུས་བྱེད་བཞིན་པར་སྐྱོན་བརྗོད་ནན་པོ་གནང་དགོས་དགོས་ཞེས་བཀོད་འདུག དེ་བཞིན་ཨ་རི་གཞུང་ནས་བོད་དོན་ཐོག་རྒྱབ་སྐྱོར་སྔར་ལྷག་གནང་གལ་དང་འབྲེལ་བའི་དོན་ཚན་ཁོངས་སུ་དེ་སྔ་ ༢༠༠༢ ལོར་གཏན་འབེབས་གནང་བའི་སྲིད་བྱུས་ཀྱི་དགོངས་དོན་ལྟར་ཨ་རི་ཕྱི་སྲིད་ལས་ཁུངས་སུ་ཨ་མི་རི་ཀའི་བོད་དོན་དམིགས་བསལ་འབྲེལ་མཐུད་པ་ངེས་པར་དུ་བསྐོ་གཞག་དགོས་པ་མ་ཟད། དམིགས་བསལ་འབྲེལ་མཐུད་པའི་ལས་ཁུངས་ནང་རྒྱུན་དུ་བོད་དོན་ཐོག་ཕྱག་ལས་གནང་མཁན་ལས་བྱེད་གསུམ་ལས་མི་ཉུང་བ་ཞིག་བསྐོ་གཞག་གནང་དགོས་ཞེས་འབུར་འདོན་དང་སྦྲགས། ཨ་མི་རི་ཀའི་བོད་དོན་དམིགས་བསལ་འབྲེལ་མཐུད་པ་མཆོག་ནས་རྒྱ་ནག་གཞུང་ལ་བོད་མིའི་གཞི་རྩའི་ཐོབ་ཐང་ཁག་སྲུང་སྐྱོབ་དགོས་པའི་དགོས་འདུན་ཆེད་བཏོན་དགོས་པ། ཆ་རྐྱེན་གང་ཡང་མེད་པར་རྒྱ་ནག་གཞུང་དང་༸གོང་ས་མཆོག་གམ་མགོན་པོ་༸གང་ཉིད་མཆོག་གི་སྐུ་ཚབ། ཡང་ན་བོད་མིའི་སྒྲིག་འཛུགས་ཀྱི་སྐུ་ཚབ་བཅས་དང་ལྷན་དུ་གྲོས་མོལ་བསྐྱར་གསོ་ཐུབ་ཐབས་གནང་དགོས་པ་སོགས་བཀོད་འདུག བོད་ཀྱི་རྒྱལ་ས་ལྷ་སར་ཨ་རིའི་གཞུང་ཚབ་ལས་ཁུངས་ཆེད་འཛུགས་གནང་གལ་དང་འབྲེལ་ཏེ་གལ་སྲིད་རྒྱ་གཞུང་ནས་བོད་ནང་ཨ་རིའི་གཞུང་ཚབ་ཆེད་འཛུགས་གནང་རྒྱུར་བཀག་སྡོམ་བྱེད་ཚེ་ཨ་རིའི་ཕྱི་སྲིད་ལས་ཁུངས་ནས་ཨ་རིར་རྒྱ་ནག་གི་གཞུང་ཚབ་ཁང་གསར་པ་གསར་འཛུགས་བྱ་རྒྱུའི་ཐོབ་ཐང་སྤྲད་རྒྱུ་མེད་པ་དང་། རྒྱ་ནག་གི་རྒྱལ་ས་པེ་ཅིང་ནང་རྟེན་གཞི་བྱས་པའི་ཨ་རིའི་གཞུང་ཚབ་ཁང་དུ་བོད་ཐོག་དཔྱད་ཞིབ་དང་ཐུགས་འཁུར་བཞེས་མཁན་གྱི་ཚན་པ་ཞིག་ལོགས་སུ་ཆེད་འཛུགས་དགོས་པ་གསལ་འདུག དེ་བཞིན་བོད་ཀྱི་ཁོར་ཡུག་གནད་དོན་ཁོངས་སུ་བོད་འདི་ཨེ་ཤ་ཡའི་རྒྱལ་ཁབ་ཁག་གི་ཆུའི་འབྱུང་ཁུངས་གཙོ་བོ་དེ་ཡིན་སྟབས། བོད་ནང་གི་གནམ་གཤིས་གནས་སྟངས་སྤྱི་དང་ལྷག་དོན་ཆུའི་གནས་བབས་ཉམས་ཉེས་སུ་ཕྱིན་ཚེ་ཨེ་ཤ་ཡའི་མི་འབོར་ཐེར་འབུམ་གཅིག་ལྷག་གི་འཚོ་བར་དཀའ་ངལ་འཕྲད་ངེས་ཡིན་པ་སོགས་འགྲེལ་བརྗོད་དང་སྦྲགས། ཨ་རིའི་ཕྱི་སྲིད་ལས་ཁུངས་ཀྱིས་བོད་ནང་གི་རྒྱུག་ཆུ་དང་གཙང་པོ་ཁག་སྲུང་སྐྱོབ་ཐུབ་ཐབས་སུ་ལམ་སྟོན་རྩ་འཛིན་ངེས་ཅན་ཞིག་གཏན་འབེབས་དགོས་པ་མ་ཟད། རྒྱ་གཞུང་དང་གཞུང་འབྲེལ་མ་ཡིན་པའི་ཚོགས་པ་ཁག་ལ་བོད་ཀྱི་རྩྭ་ཐང་དང་འབྲོག་པའི་སྲོལ་རྒྱུན་འཚོ་ཐབས་སྲུང་སྐྱོབ་དགོས་པའི་སྐུལ་མ་ཡང་ཡང་གནང་དགོས་པ་མ་ཟད་བོད་ནང་ཡོད་པའི་ཨ་རིའི་བཟོ་ལས་ཁང་དེ་དག་ཁོར་ཡུག་དང་འགྲོ་བ་མིའི་ཐོབ་ཐང་ལ་མི་གནོད་པ་ཞིག་དགོས་ངེས་སོགས་ཆེད་བཀོད་གནང་ཡོད་པ་རེད། གཞན་ཡང་ཨ་རིའི་བོད་དོན་གྱི་ཁྲིམས་འཆར་གསར་པའི་ནང་༸གོང་ས་མཆོག་གིས་བོད་མིའི་མང་གཙོའི་ལམ་སྲོལ་གསར་གཏོད་མཛད་པའི་བརྒྱུད་རིམ་ཁག་འགྲེལ་བརྗོད་དང་སྦྲགས། ཨ་རི་གཞུང་ནས་ད་ཡོད་བཞུགས་སྒར་དུ་རྟེན་གཞི་བྱས་པའི་བོད་མིའི་སྒྲིག་འཛུགས་འདི་རྒྱལ་སྤྱིའི་ཁྱོན་ལ་བཞུགས་པའི་བོད་མི་མང་གི་མངོན་འདོད་མཚོན་པའི་ཁྲིམས་མཐུན་གྱི་སྒྲིག་འཛུགས་ཤིག་ཏུ་ངོས་འཛིན་གནང་ཐོག་བོད་མིའི་འཚོ་ཐབས་དང་བོད་ཀྱི་ཐུན་མོང་མ་ཡིན་པའི་རིག་གཞུང་སྲུང་སྐྱོབ་སོགས་ཀྱི་ཐད་ལ་དཔལ་འབྱོར་གྱི་རོགས་རམ་གནང་དགོས་པ་དང་། ལྷག་པར་དུ་བལ་ཡུལ་ནང་བཞུགས་པའི་བོད་མི་ཚོར་ཁྲིམས་མཐུན་གྱི་ཡིག་ཆ་ཁག་ཐོབ་ཐབས་སུ་བལ་ཡུལ་གཞུང་ལ་ངེས་པར་དུ་འབོད་སྐུལ་གནང་དགོས་པ་སོགས་ཀྱང་ཆེད་བཀོད་གནང་འདུག གཞི་རྩའི་ད་ལྟའི་ཆར་ཨ་རིའི་བོད་དོན་གྱི་ཁྲིམས་འཆར་གསར་པ་དེའི་ཐོག་ཨ་མི་རི་ཀའི་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་དང་ཁྲིམས་ལུགས་ཚོགས་ཆུང་གཉིས་སུ་ཕུལ་ཏེ་དོན་ཚན་ཁག་རེ་རེའི་ཐོག་གྲོས་བསྡུར་དང་དཔྱད་ཞིབ་གནང་གི་ཡོད་པ་དང་། གཟའ་འཁོར་འདིའི་ནང་ཁྲིམས་འཆར་གསར་པ་དེ་ CECC ཞེས་ཨ་རིའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་གི་མཉམ་འབྲེལ་ཚོགས་གཙོ་ཨ་རིའི་གྲོས་ཚོགས་འཐུས་མི་སྐུ་ཞབས་ Marco Rubio ལགས་ནས་ཡུལ་དེའི་གྲོས་ཚོགས་གོང་མར་ཆེད་བཏོན་གནང་གི་ཡོད་པ་རེད།

Latest news