Tibetan Royal Year of 2151 | Year of the Wood Dragon

གསར་འགྱུར།

༸གོང་ས་མཆོག་བཞུགས་སྒར་ནས་མ་ན་ལིར་ཆིབས་བསྒྱུར་མཛད་པ།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དེ་རིང་ཕྱི་ཟླ་ ༨ ཚེས་ ༩ ཉིན་གྱི་སྔ་དྲོ་ཚོུད་ ༨༌༢༥ ཡོལ་ཙམ་ལ་བཞུགས་སྒར་༸རྒྱལ་བའི་ཕོ་བྲང་ནས་ཆིབས་ཐོན་གྱིས་ཆིབས་གྲུ་བརྒྱུད་ཧི་མཱ་ཅལ་མངའ་སྡེ་ནང་ཡོད་པའི་མ་ན་ལིར་གཟའ་འཁོར་གཉིས་ཙམ་གྱི་རིང་ལ་༸སྐུ་ངལ་གསོ་བཞུགས་དང་བཀའ་ཆོས་བསྩལ་རྒྱུ་སོགས་ཀྱི་མཛད་འཆར་བསྐྱང་སླད་ཆིབས་བསྒྱུར་མཛད་ཡོད་པ་རེད། ༸གོང་ས་༸སྐྱབས་མགོན་ཆེན་པོ་མཆོག་མ་ན་ལིར་ཆིབས་བསྒྱུར་མཛད་པའི་ལམ་བར་དུ་དེ་རིང་དགོང་དྲོ་མཾཌཱི་གྲོང་སྡེར་མཚན་གཅིག་བཞུགས་གཞག་མཛད་རྒྱུ་ཡིན་པ་དང་། འདི་ག་རླུང་འཕྲིན་ཁང་གིས་ཞལ་དཔར་བརྒྱུད་ནས་མཾཌཱི་དང་ཀུ་ལུ་མ་ན་ལིའི་ས་གནས་འགོ་འཛིན་རྣམ་གཉིས་སོ་སོར་བཅར་འདྲི་ཞུས་པར་ད་ལྟའི་འཆར་མགོན་པོ་༸གང་ཉིད་མཆོག་ས་ཁུལ་དེ་དག་ལ་༸སྐུ་ངལ་གསོ་བཞུགས་མཛད་རྒྱུ་ལས་གཞན་མཛད་འཆར་གང་ཡང་ཐུགས་གཏན་ཁེལ་མེད་པར་གསུངས་སོང་། རྩ་བའི་༸གོང་ས་མཆོག་མ་ན་ལིར་ཆིབས་བསྒྱུར་རིང་ཁུལ་དེའི་ནང་རྟེན་གཞི་བྱས་པའི་དཔལ་ལྡན་འོན་མངའ་རིས་གྲྭ་ཚང་དུ་བཞུགས་གཞག་མཛད་རྒྱུ་ཡིན་པ་རེད་འདུག དགོན་པའི་ཕྱག་མཛོད་བློ་བཟང་ལགས་ཀྱིས་འགྲེལ་བརྗོད་གནང་དོན་ལྟར་ན། དེ་ནི་འོན་མངའ་རིས་གྲྭ་ཚང་གིས་ལོ་གསུམ་གྱི་གོང་ནས་གསོལ་འདེབས་ཞུས་པ་ཞིག་ཡིན་པ་དང་། ད་ལྟའི་འཆར་མགོན་པོ་མཆོག་འདི་གར་༸སྐུ་ངལ་གསོ་བཞུགས་མཛད་རྒྱུ་དང་རིང་མིན་བཀའ་ཆོས་བསྩལ་རྒྱུའི་མཛད་འཆར་ཡོད་ཀྱང་ད་ལྟའི་འཆར་ཚེས་གྲངས་གང་ཡང་ཐུགས་གཏན་ཁེལ་མེད་པ་རེད་འདུག གཞི་རྩའི་༸གོང་ས་༸སྐྱབས་མགོན་ཆེན་པོ་མཆོག་འདི་ལོའི་ཕྱི་ཟླ་ ༦ པའི་ནང་རྒྱ་གར་གྱི་རྒྱལས་་ལྡི་ལིར་ཁ་ཆེ་ཆོས་ལུགས་ནང་ཁུལ་མཐུན་སྒྲིལ་གོང་འཕེལ་ཆེད་རྒྱལ་སྤྱིའི་རང་བཞིན་ལྡན་པའི་ཆོས་ལུགས་ལྷན་ཚོགས་ཀྱི་ཚོགས་མགོན་དབུ་བཞུགས་ཀྱི་མཛད་འཆར་གྲུབ་རྗེས་མ་ན་ལིར་ཆིབས་བསྒྱུར་མཛད་གཏན་ཁེལ་ཡོད་ཀྱང་། ཉེ་ལམ་༸མགོན་པོ་མཆོག་སྙུང་གཞི་ཕྲན་བུ་བཞེས་བསྟུན་དགུང་ལོའི་བབས་ཀྱི་ཆ་ནས་ཚོགས་སྐྱིད་ཁག་དང་བོད་མི་མང་ཚོགས་ནས་༸སྐུའི་མཛད་འཕྲིན་ཉུང་འཕྲི་གནང་རྒྱུ་དང་། ༸སྐུ་ངལ་མང་ཙམ་གསོ་བཞུགས་མཛད་རྒྱུའི་ཞུ་སྐུལ་ལན་མང་ཞུས་པ་ལྟར་མ་ན་ལིའི་མཛད་འཆར་དེ་དུས་ཚོད་ངེས་མེད་བར་དུ་ཕྱིར་འཐེན་གནང་ཡོད་པ་རེད། རྩ་བའི་ཕྱི་ཟླ་ ༨ ཚེས་ ༢༢ ཉིན་ཤང་དགའ་ལྡན་ཆོས་འཁོར་གླིང་དང་མདོ་ཁམས་ཆུ་སྒང་། སྤྱི་མཐུན་མཉམ་འབྲེལ། འབྲུག་སྡོད་བོད་མི། གོ་ཇོ་བཅས་ཚོགས་པ་ལྔས་མགོན་པོ་༸གང་ཉིད་མཆོག་སྐུ་ཚེ་མི་འཇིགས་རྡོ་རྗེ་འཆང་གི་ངོ་བརོར་བརྟན་པའི་བརྟན་བཞུགས་བསྟར་འབུལ་ཞུ་གཏན་འཁེལ་ཡོད་ཀྱང་ད་ཆ་ཕྱི་ཟླ་ ༩ ཚེས་ ༡༣ ཉིན་བསྟར་འབུལ་རྒྱུའི་དུས་འགྱངས་གནང་འདུག

བོད་ནང་སྐུ་ཚབ་ཐེངས་བཞི་ཕེབས་སྐོར་གྱི་པར་རིས་འགྲེམས་སྟོན་དབུ་འབྱེད། 

བོད་མིའི་སྒྲིག་འཛུགས་ཕྱི་དྲིལ་བོད་ཀྱི་འགྲེམས་སྟོན་ཁང་དུ་ཟླ་གསུམ་མཚམས་དུས་ཐུང་པར་རིགས་འགྲེམས་སྟོན་ཞུ་བཞིན་ཡོད་པ་ལྟར། དེ་རིང་བོད་ནང་དངོས་དོན་རྟོག་ཞིབ་ཀྱི་གཟིགས་སྐོར་སྐུ་ཚབ་ཐེངས་བཞི་ཕེབས་པའི་སྐོར་གྱི་པར་རིས་འགྲེམས་སྟོན་ཞིག་དབུ་འབྱེད་གནང་སོང་།  བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་གི་ཉེ་འཁྲིས་སུ་ཆགས་པའི་ཕྱི་དྲིལ་བོད་ཀྱི་འགྲེམས་སྟོན་ཁང་དུ་སྔ་དྲོ་ཚོུད་ ༡༠༌༣༠ ཡོལ་ཙམ་ལ་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་དམིགས་བསལ་སྐུ་མགྲོན་བོད་ནང་དངོས་དོན་རྟོག་ཞིབ་ཀྱི་གཟིགས་སྐོར་སྐུ་ཚབ་དང་པོའི་ཁོངས་སུ་ཡོད་པ་དང་ཆེས་མཐོའི་ཁྲིམས་ཞིབ་པ་ཟུར་པ་བློ་བཟང་དར་རྒྱས་མཆོག་གིས་གཙོས་པའི་ཕྱི་འབྲེལ་དྲུང་ཆེ་དྭགས་པོ་བསོད་ནམས་ནོར་བུ་ལགས། བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཤོ་ཟུར་ཚེ་དབང་སྒྲོལ་མ་ལགས། དེ་བཞིན་གཞུང་འབྲེལ་མིན་པའི་ཚོགས་ཁག་གི་སྐུ་ཚབ། མང་ཚོགས་དོན་གཉེར་ཅན་སོགས་ནས་མཉམ་ཞུགས་གནང་བ་མ་ཟད། སྐུ་ཚབ་གཉིས་པའི་ཁོངས་སུ་ཕེབས་མཁན་བཀའ་ཁྲི་ཟུར་པ་བཀྲས་མཐོང་བསྟན་འཛིན་རྣམ་རྒྱལ་ལགས་དང་སྤྱི་ཟུར་ཚེ་རིང་རྡོ་རྗེ་ལགས་རྣམ་གཉིས་ཀྱིས་དེ་འབྲེལ་མྱོང་ཚོར་ཇི་བྱུང་གསུངས་པའི་བརྙན་ཐུང་ཞིག་གཟིགས་འབུལ་ཞུས་ཡོད། སྐབས་དེར་སྲིད་སྐྱོང་མཆོག་གིས་མཛད་སྒོ་འདི་སྟབས་བདེ་ཆུང་ཆུང་ཞིག་ཡིན་ཀྱང་ལོ་རྒྱུས་ཀྱི་ཐོག་ནས་གལ་འགངས་ཆེན་པོ་ཡིན་སྐོར་དང་།  དེ་བཞིན་༸ཀུན་གཟིགས་༸པཎ་ཆེན་རིན་པོ་ཆེ་མཆོག་ནས་ཡིག་འབྲུ་ཁྲི་བདུན་གྱི་ཕྱག་དེབ་ནང་ཕྱི་ལོ་ ༡༩༦༣ སྔོན་རྒྱ་གཞུང་གིས་དགོན་སྡེ་ཁག་བརྒྱ་ཆ་ ༩༨ ཙམ་གཏོར་བཤིག་དང་། བོད་མིའི་ཆོས་དད་རང་དབང་མེད་པ་བཟོས་པའི་སྐོར། སྐུ་ཚབ་རྣམ་པ་བོད་ནང་ཕེབས་སྐབས་དགོན་པ་ཕལ་མོ་ཆེའི་ཤུལ་ཀྱང་མེད་པའི་སྐུ་པར་སྒྲོན་པ་དག་དཔང་རྟགས་ཆགས་ཡོད་སྟབས། བོད་མི་གཞོན་སྐྱེས་ནས་རྒན་བགྲེས་ཚོས་སྐུ་ལས་སྐྱོན་སྟངས་དང་། རྒྱ་གཞུང་གིས་བོད་དེ་རྒྱ་སྡེར་འགྱུར་ཐབས་བྱེད་པ་མཁྱེན་དགོས་པ་གསུངས་སོང་། དེ་བཞིན་བློ་བཟང་དར་རྒྱས་མཆོག་གིས་ཕྱི་ལོ་ ༡༩༥༩ ལོ་ནས་ ༧༩ འི་ནང་སྐུ་ཚབ་དང་པོ་བོད་ནང་གཟིགས་སྐོར་ཕེབས་པའི་དབར་ལོ་ངོ་ ༢༠ མན་ཙམ་ཞིག་གི་ནང་གཞིས་བྱེས་གཉིས་ཀྱི་གནས་སྟངས་དེ་བོད་མི་ཕན་ཚུན་མཁྱེན་གྱི་མེད་པ་དང་། སྐུ་ཚབ་རྣམ་པ་ཐོག་མར་པེ་ཅིན་ལ་རྒྱ་རིགས་དཔོན་པོ་ཐུག་འཕྲད་ཀྱིས་དཔོན་རིགས་ཚོས་བོད་ནང་ཡར་རྒྱས་ཧ་ཅང་བཏང་ཟིན་སྐོར་བརྗོད་པ་དེ་ལྟར་ཡང་། སྐུ་ཚབ་རྣམ་པ་བོད་མདོ་དབུས་ཁམས་གསུམ་ནང་དངོས་སུ་ཕེབས་སྐབས་དགོན་སྡེ་ཁག་གཏོར་བཤིག་དང་ཁག་གཅིག་ཉམས་གསོ་བྱས་པ། ཤིང་ནགས་གཅོད་འབྲེག་གིས་ཁོར་ཡུག་གཏོར་བཅོམ་དང་། དེ་བཞིན་བོད་མི་རྣམས་ནས་༸གོང་ས་མཆོག་ལ་གཡོ་བ་མེད་པའི་དད་གུས་ཡོད་པ་དང་ཆབས་ཅིག་ཏུ་ཕྱི་རྒྱལ་གྱི་གནས་སྟངས་གང་འདྲ་ཡོད་པ་ཤེས་འདོད་ཡོད་པ། བོད་མི་དེ་དག་གིས་ལོ་ངོ་ ༢༠ རིང་བདེ་སྡུག་སྣ་མང་མྱངས་པ་ཐོས་པ་དང་མཐོང་བ་སོགས་ཀྱི་མྱོང་ཚོར་གསུངས་པ་དང་སྦྲགས། སྐབས་དེའི་པར་རིས་ཁག་གཅིག་ད་ཆ་མཐོང་རྒྱུ་ཡོད་པས་ལོ་རྒྱུས་ཀྱི་དེ་བྱུང་དག་བདག་གཅེས་གནང་དགོས་གལ་ཡིན་སྐོར་གསུངས་སོང་།

གསང་སྔགས་མཁས་པའི་བགྲོ་གླེང་ཆེས་ཐོག་མ་དབུ་འཛུགས།

རྒྱ་གར་ལྷོ་ཕྱོགས་ཧུན་སོར་རབ་རྒྱས་གླིང་བོད་མིའི་གཞིས་སྒར་དུ་རྟེན་གཞི་བྱས་པའི་དཔལ་ལྡན་རྒྱུད་སྨད་གྲྭ་ཚང་དུ་གསང་སྔགས་ཀྱི་བགྲོ་གླེང་ཆེན་མོ་ཞིག་དབུ་འཛུགས་གནང་འདུག དེ་རིང་ཟླ་ ༨ ཚེས་ ༩ ཉིན་རྒྱ་གར་ལྷོ་ཕྱོགས་ཧུན་སོར་རབ་རྒྱས་གླིང་བོད་མིའི་གཞིས་སྒར་དུ་རྟེན་གཞི་བྱས་པའི་དཔལ་ལྡན་རྒྱུད་སྨད་གྲྭ་ཚང་གི་ཆོས་ར་རིགས་པའི་ལྡིང་ཁང་དུ་འཇམ་མགོན་བླ་མ་༸རྗེ་ཙོང་ཁ་པ་ཆེན་པོ་མཆོག་གདུལ་བྱ་རྟག་འཛིན་ཅན་གྱི་ངོར་དགོངས་པ་ཆོས་དབྱིངས་སུ་ཐིམ་ཚུལ་བསྟན་ནས་མི་ལོ་ཧྲིལ་པོ་ ༦༠༠ འཁོར་བ་དང་༸རྗེ་བཙུན་ཤེས་རབ་སེངྒེ་༸གང་ཉིད་མཆོག་གསང་སྔགས་བསྟན་པའི་བདག་པོར་མངའ་གསོལ་ནས་གྲང་བྱ་ ༦༠༠ འཁོར་བའི་དུས་སྟོན་གཉིས་དང་བསྟུན་༸རྗེ་བདག་ཉིད་ཆེན་པོའི་བཀའ་དྲིན་རྗེས་དྲན་ཞུ་སླད་གྲྭ་ཚང་རང་གིས་གསང་སྔགས་མཁས་པའི་བགྲོ་གླེང་ཆེན་མོ་ཞིག་གོ་སྒྲིག་ཞུས་པ་ལྟར། དེ་རིང་སྔ་དྲོ་བགྲོ་གླེང་གི་ཚོགས་ཆེན་ཐོག་སྐུ་མགྲོན་གཙོ་བོ་འཁོན་རིགས་བསྟན་པའི་སྲོག་ཤིང་༸དཔལ་མཉམ་མེད་ས་སྐྱའི་ཁྲི་འཛིན་སྐྱབས་རྗེ་རཏྣ་བཛྲ་རིན་པོ་ཆེ་མཆོག་དང་འཇམ་མགོན་༸རྒྱལ་བ་གཉིས་པའི་རྒྱལ་ཚབ་དགའ་ལྡན་ཁྲི་པ་ཡབ་སྲས་རྣམ་གསུམ་མཆོག ལྷོ་སྤྱི་ཆོས་འཕེལ་ཐུབ་བསྟན་ལགས། ལས་སྣེ་གོང་མ་གསུམ་དང་ཕྱག་མཛོད། སྦྱིན་བདག་ཁག་གཅིག དེ་བཞིན་ཚོགས་སྡེ་ཁག་གི་འཐུས་མི་དང་མང་ཚོགས་བཅས་མི་གྲངས་ ༡༠༠༠ བརྒལ་བ་ལྷན་འཛོམས་ཐོག་གསང་སྔགས་མཁས་པའི་བགྲོ་གླེང་ཆེས་ཐོག་མ་དབུ་འཛུགས་གནང་འདུག སྐུ་མགྲོན་གཙོ་བོ་༸དཔལ་ས་སྐྱའི་ཁྲི་འཛིན་སྐྱབས་རྗེ་རཏྞ་བཛྲ་རིན་པོ་ཆེ་མཆོག་གིས་རིན་པོ་ཆེ་མཆོག་ད་ལན་༸དཔལ་ལྡན་སྨད་རྒྱུད་གྲྭ་ཚང་དུ་ཕེབས་རྒྱུ་བྱུང་བར་ཐུགས་དགྱེས་ཚོར་ཆེན་པོ་བྱུང་ཞེས་བཀའ་བསྩལ་བ་དང་སྦྲགས། ཚུལ་བཞིའི་སྒོ་ནས་ཟབ་ཅིང་བརླིང་བའི་༸དཔལ་གསང་བ་འདུས་པའི་ཚིག་འགྲེལ་གནང་སྟེ་འདུས་མང་ཡོངས་ལ་ལམ་སྟོན་མཛད་འདུག དེ་བཞིན་སྐུ་མགྲོན་གཙོ་བོ་འཇམ་མགོན་༸རྒྱལ་བ་གཉིས་པའི་རྒྱལ་ཚབ་དགའ་ལྡན་ཁྲི་རིན་པོ་ཆེ་མཆོག་གིས་༸རྗེ་བདག་ཉིད་ཆེན་པོས་༸རྗེ་བཙུན་ཤེས་རབ་སེངྒེ་ལ་གནང་བའི་འགྲེལ་པ་བཞི་སྦྲགས་ཀྱི་ཕྱག་དཔེའི་ཐོག་དཔལ་ལྡན་རྒྱུད་གྲྭ་སྟོད་སྨད་གཉིས་ནས་རྒྱུན་འཛིན་གནང་དགོས་པའི་ལམ་སྟོན་བསྩལ་འདུག གཞན་ཡང་དེ་རིང་གསང་སྔགས་མཁས་པའི་བགྲོ་གླེང་གི་མཛད་སྒོའི་སྐབས་སུ་སྔོན་ཕྱི་ལོ་ ༡༤༡༩ ལོར་༸རྗེའི་སྒྲུབ་གནས་སེ་ར་ཆོས་སྡིངས་སུ་འཇམ་མགོན་ཆོས་ཀྱི་རྒྱལ་པོ་ཙོང་ཁ་པ་ཆེན་པོའི་ཞལ་སྔ་ནས་མཁས་གྲུབ་ཆེན་པོ་༸རྗེ་བཙུན་ཤེས་རབ་སེངྒེ་ལ་རྒྱུད་ཀྱི་གླེགས་བམ་ཕྱག་ཏུ་གཏད་ནས་དགེ་ལྡན་གསང་སྔགས་བསྟན་པའི་བདག་པོར་མངའ་གསོལ་བ་བཞིན། དེང་འདིར་ཡང་འཇམ་མགོན་རྒྱལ་བའི་གདུང་ཚབ་དགའ་ལྡན་ཁྲི་རིན་པོ་ཆེའི་ཞལ་སྔ་ནས་ཀྱང་༸རྗེ་བཙུན་ཤེས་རབ་སེངྒེའི་གདན་རབས་ ༩༩ པ་མཁན་ཆེན་ རྗེ་བཙུན་བློ་བཟང་དབང་འདུས་མཆོག་ལ་རྒྱུད་ཀྱི་གླེགས་བམ་དང་སྔོན་གྱི་ལོ་རྒྱུས་ལྡན་པའི་དཔལ་གསང་བ་འདུས་པའི་སྐུ་བརྙན་བཅས་ཕྱག་ཏུ་བསྩལ་ཡོད་པ་རེད། འདི་ག་རླུང་འཕྲིན་ཁང་གིས་༸དཔལ་ལྡན་སྨད་རྒྱུད་གྲྭ་ཚང་གི་ཕྱག་མཛོད་རྒན་པ་དགེ་བཤེས་སྔགས་རམས་པ་ཚེ་རིང་བཀྲིས་ལགས་སུ་གསང་སྔགས་མཁས་པའི་བགྲོ་གླེང་ཆེས་ཐོག་མ་བསྐོང་ཚོགས་གནང་དོན་སོགས་དང་འབྲེལ་བའི་བཅར་འདྲི་ཁག་གཅིག་ཞུས་པར་ཁོང་གིས་དེ་འབྲེལ་ལོ་རྒྱུས་སྙིང་བསྡུས་ངོ་སྤྲོད་དང་། དེ་བཞིན་ཕྱི་ཚེས་ ༩ ནས་ ༡༢ བར་སྔ་དྲོ་ཚོུད་ ༥ ནས་ ༧ བར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུ་ཚེའི་ཚེ་སྒྲུབ་གནང་གི་ཡོད་པ་སོགས་གསུངས་ཡོད། རྩ་བའི་༸དཔལ་ལྡན་སྨད་རྒྱུད་གྲྭ་ཚང་ནས་ཆེས་ཐོག་མའི་གསང་སྔགས་མཁས་པའི་བགྲོ་གླེང་ཞིག་གོ་སྒྲིག་གནང་ཡོད་པ་ལྟར་བགྲོ་གླེང་མོ་འདི་དེ་རིང་ཟླ་ ༨ ཚེས་ ༩ ནས་ ༡༢ བར་འཚོགས་གནང་གི་ཡོད་པ་རེད།

ལ་དྭགས་རྒྱ་གར་དབུས་འཛིན་སྐྱོང་མངའ་ཁུལ་དུ་གྱུར་པས་ས་གནས་བོད་མིའི་དཀའ་ངལ་སེལ་བའི་རེ་བ།

དེ་རིང་ཕྱི་ཟླ་ ༨ ཚེས་ ༨ ཉིན་གྱི་སྔ་དྲོ་རྒྱ་གར་བྱང་ཕྱོགས་ལ་དྭགས་གླེ་རྒྱལ་སར་རྟེན་གཞི་བྱས་པའི་ཇོ་ཁང་གི་རྭ་བར་རྟོགས་ལྡན་རིན་པོ་ཆེ་མཆོག་གིས་དབུས་པའི་ལ་དྭགས་ཀྱི་དཔོན་རིགས་དང་ས་གནས་མི་མང་བཅས་ལྷན་འཛོམས་གནང་ཐོག་ལ་དྭགས་དེ་ Union Territory ཞེས་ཇ་མྨུ་ཀཤྨིར་ནས་ལོགས་སུ་དབྱེ་སྟེ་རྒྱ་གར་དབུས་གཞུང་གི་ཐད་ཀའི་འཛིན་སྐྱོང་བཏང་འཛིན་གནང་གཏན་ཁེལ་བར་དགའ་བསུ་རྟེན་འབྲེལ་ཞུ་སླད་དུ་མཛད་སྒོ་རྒྱས་པ་ཞིག་ཚོགས་སོང་། ལ་དྭགས་ནང་པའི་ཚོགས་འདུའི་ཚོགས་གཙོར་དེ་འབྲེལ་བཅར་འདྲི་ཞུས་པར་ཁོང་གིས་ལ་དྭགས་འདི་རྒྱ་གར་དབུས་འཛིན་སྐྱོང་མངའ་ཁུལ་དུ་གྱུར་པས་སླད་མར་ས་གནས་བོད་མིའི་དཀའ་ངལ་སེལ་བའི་རེ་བ་ཡོད་ཅེས་སོགས་གསུངས་ཡོད།

གཞུང་འབྲེལ་མཆོད་འབུལ་བརྒྱུད་སྐབས་ ༡༥ པའི་བཀའ་ཤག་ལོ་གསུམ་ཚང་བའི་དུས་ཚིགས་སྲུང་བརྩི།

བཞུགས་སྒར་དུ་བཀའ་ཤག་སྐབས་ ༡༥ པས་དམ་འབུལ་མཛད་ཁུར་བཞེས་ནས་ལོ་གསུམ་ཧྲིལ་པོ་འཁོར་བའི་དུས་ཚིགས་སྲུང་བརྩི་དང་འབྲེལ་གཞུང་འབྲེལ་མཆོད་འབུལ་སྨོན་ལམ་ཚོགས་སོང་། དེ་རིང་ཟླ་ ༨ ཚེས་ ༨ ཉིན་རྒྱབ་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་ཕྱག་ཚོད་ ༤ ཐོག་རྣམ་རྒྱལ་གྲྭ་ཚང་གི་སློབ་དཔོན་ངག་དབང་སྟོབས་ལྡན་མཆོག་ཚོགས་མགོན་དུ་དབུ་བཞུགས་ཐོག་སྲིད་སྐྱོང་མཆོག་གིས་དབུས་པའི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་སྲི་ཞུ་བ་དང་དགེ་འདུན་པ། དྷ་ས་མང་ཚོགས་སོགས་འདུ་འཛོམས་ཐོག་སྐབས་ ༡༥ པའི་བཀའ་ཤག་གི་ལས་ཡུན་ལོ་གསུམ་ཚང་བར་སྲུང་བརྩི་དང་འབྲེལ་ཕྱི་ལོ་ ༢༠༠༩ ནས་བཟུང་ད་བར་བོད་ནང་རང་ལུས་མེར་སྲེག་གནང་མཁན་བོད་མི་གཙོས་པའི་བོད་བསྟན་སྲིད་མི་རིགས་ཀྱི་ཆེད་དུ་བློས་བཏང་གནང་མཁན་རྒྱལ་གཅེས་པ་ཡོངས་ལ་གུས་འདུད་དང་དམ་པ་དེ་དག་གི་ཉེ་འབྲེལ་ནང་མི་རྣམས་ལ་གདུང་སེམས་མཉམ་བསྐྱེད་ཞུས་སོང་། སྐབས་དེར་སྲིད་སྐྱོང་མཆོག་གིས་བོད་ནང་གི་རྒྱལ་གཅེས་དཔའ་བོ་དཔའ་མོ་རྣམས་དང་དེ་དག་གི་ཤུལ་ལུས་ནང་མི་ཡོངས་ལ་གདུང་སེམས་མཉམ་བསྐྱེད་ཞུས་པ་དང་སྦྲགས། བོད་མིའི་སྒྲིག་འཛུགས་ནས་གཉིས་སྨན་དབུ་མའི་ལམ་གྱི་སྲིད་བྱུས་བརྒྱུད་བོད་མིར་མིང་དོན་མཚུངས་པའི་རང་སྲིད་རང་སྐྱོང་ཐོབ་པ་དང་ལྷག་དོན་༸གོང་ས་༸སྐྱབས་མགོན་ཆེན་པོ་མཆོག་བོད་ལ་གདན་འདྲེན་ཞུ་ཐུབ་པའི་རེ་བ་ཞུ་མུས་ཡིན་སྟབས་རྒྱ་ཆེ་མང་ཚོགས་ནས་རེ་བ་དེ་བསྒྲུབ་པར་འབད་བརྩོན་གནང་དགོས་པའི་སྐུལ་མ་གནང་སོང་། གཞི་རྩའི་དེ་རིང་བཀའ་ཤག་སྐབས་ ༡༥ པས་དམ་འབུལ་མཛད་ཁུར་བཞེས་ནས་ལོ་ངོ་གསུམ་འཁོར་བ་དང་བསྟུན་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་བཀའ་ཤག་སྐབས་ ༡༤ དང་ ༡༥ གཉིས་ཀྱི་སྲིད་སྐྱོང་ཀྱི་མཛད་ཁུར་བཞེས་ནས་ད་ཆ་ལོ་བརྒྱད་འགྲོ་མུས་ཡིན་པ་རེད།  

རྒྱ་གར་ཕྱི་སྲིད་བློན་ཆེན་ཟུར་པ་ལྕམ་ Sushma Swaraj མཆོག་ལ་ཐུགས་གསོ་མཛད་པ།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ BJP ཆབ་སྲིད་ཚོགས་པའི་འགོ་ཁྲིད་རྒན་གྲས་རྒྱ་གར་གྱི་ཕྱི་སྲིད་བློན་ཆེན་ཟུར་པ་དང་དེ་སྔ་རྒྱལ་ས་ལྡི་ལིའི་སྤྱི་ཁྱབ་བློན་ཆེན་གནང་མྱོང་མཁན་ལྕམ་སྐུ་ Sushma Swaraj མཆོག་དགུང་གྲངས་ ༦༧ ཐོག་སྐུ་ཚེ་མ་ཟིན་པའི་ཡིད་སྐྱོའི་གནས་ཚུལ་ཐོན་པར་ཐུགས་གསོའི་གསུང་འཕྲིན་ཞིག་བསྩལ་འདུག     ཁ་སང་དགོང་དྲོའི་ཚོུད་ ༡༠༌༣༠ མ་ཟིན་ཙམ་ལ་རྒྱ་གར་གྱི་ཕྱི་སྲིད་བློན་ཆེན་ཟུར་པ་ལྕམ་ Sushma Swaraj མཆོག་སྙིང་རྩ་དགག་པའི་ནད་གཞིའི་རྐྱེན་པས་ཆེད་ཛ་དྲག་ཐོག་རྒྱལ་ས་ལྡི་ལིར་རྟེན་གཞི་བྱས་པའི་རྒྱ་གར་དབུས་གཞུང་གི་ AIIMS སྨན་ཁང་དུ་མྱུར་སྐྱོབ་སླད་སྨན་གཏུགས་གནང་ཡང་དྲག་སྐྱེད་མ་བྱུང་བར་དགོངས་པ་རྫོགས་པའི་ཡིད་སྐྱོའི་གནས་ཚུལ་ཐོན་ཡོད་པ་དང་། དེ་རིང་ཟླ་ ༨ ཚེས་ ༧ ཉིན་སྔ་དྲོར་༸གོང་ས་༸སྐྱབས་མགོན་ཆེན་པོ་མཆོག་གིས་དམ་པ་ཁོང་གི་སྐུ་ཟླ་སྐུ་ཞབས་ Kaushal Swaraj ལགས་ཀྱི་མཚན་ཐོག་ཏུ་ཐུགས་གསོའི་གསུང་འཕྲིན་དེའི་ནང་༸གང་ཉིད་མཆོག་གིས་ལྕམ་སྐུ་ཁོང་དང་ཤུལ་ལུས་སྐུ་འཁོར་ལྷན་རྒྱས་ཡོངས་ལ་ད་ལྟ་ཆེས་དཀའ་ཚེགས་བའི་དུས་སྐབས་འདིར་ཐུགས་སྨོན་དང་ཐུགས་གསོ་ཡོད་ཅེས་བཀའ་བསྩལ་བ་མ་ཟད། མགོན་པོ་༸གང་ཉིད་མཆོག་ནས་ལྕམ་སྐུ་དམ་པ་ Sushma Swaraj མཆོག་གིས་འདས་པའི་ཕྱག་ལས་གནང་བ་རྣམས་གཞན་ཕན་དང་མཛའ་མཐུན་ རང་གཤིས་བཟང་པོའི་ཐོག་གནང་ཡོད་སྟབས། མི་མང་མང་དག་གིས་གུས་ཞབས་དང་ཆེ་མཐོང་ཞུ་ཡུལ་ཞིག་ཏུ་གྱུར་ཡོད་པར་བཀའ་འགྲེལ་དང་སྦྲགས། ལྕམ་སྐུ་དམ་པ་ཁོང་གིས་རང་ཉིད་ཀྱི་མི་ཚེ་དེ་མི་མང་གི་ཞབས་ཞུ་སླད་བློས་བཏང་གནང་སྟེ་མི་ཚེ་དོན་ལྡན་ཞིག་བསྐྱེལ་ཡོད་པ་རེད་ཅེས་བཀའ་བསྩལ་འདུག     དེ་བཞིན་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ཀྱང་ལྕམ་སྐུ་དམ་པ་ Sushma Swaraj མཆོག་དགོངས་པ་རྫོགས་པའི་ཡིད་སྐྱོའོ་གནས་ཚུལ་ཐོན་པར་མྱ་ངན་དང་གདུང་སེམས་མཉམ་བསྐྱེད་ཡོད་པའི་ཐུགས་གསོའི་གསུང་འཕྲིན་ཞིག་བསྩལ་བ་དང་སྦྲགས། ལྷག་པར་དུ་ཕྱི་ལོ་ ༢༠༡༡ ལོར་སྲིད་སྐྱོང་མཆོག་ནས་དམ་པ་ཁོང་དང་དངོས་སུ་མཇལ་མོལ་གནང་སྐབས་དམ་པ་ཁོང་གིས་བོད་ཀྱི་གནད་དོན་ཐོག་ཐུགས་འཁུར་དང་༸གོང་ས་མཆོག་ལ་ཆེས་གུས་ཀྱི་རྣམ་པ་མངོན་གསལ་གནང་སྐོར་དྲན་གསོ་དང་འབྲེལ་ཏེ། ལྕམ་སྐུ་དམ་པ་མཆོག་ནི་རྒྱ་གར་གྱི་གྲོས་ཚོགས་ནང་དུ་བོད་ཀྱི་གནད་དོན་ཐོག་གླེང་སློང་ཤུགས་ཆེ་གནང་མཁན་ཞིག་ཡིན་སྟབས། རྒྱ་གར་མང་ཚོགས་ནས་དམ་པ་ཁོང་དགོངས་པ་རྫོགས་པར་མྱ་ངན་ཞུ་བཞིན་པའི་དུས་སྐབས་འདིར་བོད་མིའི་ངོས་ནས་ཀྱང་དེ་ལྟར་གདུང་སེམས་མཉམ་བསྐྱེད་ཞུ་དགོས་གལ་ཡིན་པ་གསུངས་འདུག གཞི་རྩའི་ལྕམ་སྐུ་དམ་པ་ Sushma Swaraj མཆོག་ཕྱི་ལོ་ ༡༩༥༢ ལོར་རྒྱ་གར་གྱི་མངའ་སྡེ་ Haryana ནང་འཁྲུངས་ཡོད་པ་དང་། དགུང་ལོ་ ༢༥ ལ་ཕེབས་སྐབས་མངའ་སྡེའི་བློན་ཆེན་རིམ་པའི་ཁོངས་སུ་འདེམས་ཐོན་བྱུང་ཡོད་པ་རེད། ཕྱི་ལོ་ ༡༩༩༨ ལོར་རྒྱལ་ས་ལྡི་ལིའི་སྤྱི་ཁྱབ་བློན་ཆེན་དང་རྒྱ་གར་གྱི་གྲོས་ཚོགས་འཐུས་མི་སྐབས་བདུན་བཅས་གནང་མྱོང་ཡོད་པ་མ་ཟད། ཕྱི་ལོ་ ༢༠༡༤ ལོ་ནས་ ༢༠༡༩ བར་སྲིད་བློན་སྐུ་ཞབས་  Narendra Damodardas Modi མཆོག་གི་དབུ་ཁྲིད་པའི་རྒྱ་གར་གཞུང་གི་ཕྱི་སྲིད་བློན་ཆེན་གྱི་ཐུགས་འགན་བཞེས་ཏེ་རྒྱ་གར་གྱི་ཕྱི་སྐྱོད་ལག་ཁྱེར་ཐོག་དགོས་ངེས་ཀྱི་བསྒྱུར་བཅོས་དང་། ཡུལ་མིར་འཕྲད་བཞིན་པའི་འགྲུལ་བཞུད་དང་འབྲེལ་བའི་དཀའ་ངལ་གཙང་སེལ་གནང་རྒྱུ། ལྷག་དོན་རྒྱ་གར་གྱི་ཕྱི་འབྲེལ་ལས་དོན་སོགས་ཀྱི་ཐོག་གཟེངས་སུ་ཐོན་པའི་ཕྱག་ལས་མང་པོ་གནང་མྱོང་ཡོད་པ་དང་། དམ་པ་ཁོང་ནི་རྒྱ་གར་གྱི་ཕྱི་སྲིད་བློན་ཆེན་གྱི་ཐུགས་འགན་བཞེས་མཁན་བེུད་གཉིས་པ་དེ་ཆགས་ཀྱི་ཡོད་པ་རེད།

བོད་ལ་གནད་དོན་གང་བྱུང་བ་དེ་རྒྱལ་ཁབ་གཞན་དུའང་འབྱུང་སྲིད་པའི་ཉེན་བརྡ་བཏང་བ།

བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ཁ་སང་རྒྱ་གར་གྱི་རྒྱལ་ས་ལྡི་ལིར་རྒྱ་གཞུང་གིས་ལོ་ངོ་ ༦༠ གོང་དུ་བོད་ནང་ལག་བསྟར་བྱས་པའི་སྲིད་བྱུས་དེ་དེང་སྐབས་འཛམ་གླིང་གི་རྒྱལ་ཁབ་གཞན་ནང་དུའང་ལག་བསྟར་བྱེད་བཞིན་ཡོད་པ་དང་། གལ་ཏེ་རྒྱལ་ཁབ་སོ་སོས་ཡིད་གཟབ་མ་གནང་ཚེ་མཇུག་འབྲས་ངན་པ་ཡོང་རྒྱུའི་ཉེན་བརྡ་བཏང་ཡོད་པ་རེད།   རྒྱ་གར་གྱི་ཕྱི་རྒྱལ་གསར་འགོད་པའི་མཐུན་ཚོགས་ནས་ཁ་སང་གོ་སྒྲིག་ཞུས་པའི་བོད་ཀྱི་གནད་དོན་གླེང་མོལ་གྱི་ལས་རིམ་ཐོག་སྲིད་སྐྱོང་བློ་བཟང་སེང་གེ་མཆོག་གིས་རང་ཉིད་ནས་འདས་པའི་ལོ་ངོ་ ༧ ལྷག་གི་རིང་མགོ་ཁྲིད་བྱས་ནས་ཕྱིའི་རྒྱལ་ཁབ་ཁག་གི་དཔོན་རིགས་དང་གནད་ཡོད་མི་སྣ་བཅས་ཐུག་འཕྲད་དང་འབྲེལ་ལམ་ཞུས་པའི་ཉམས་མྱོང་ཁྲོད་རྒྱ་ནག་གིས་ཆབ་སྲིད་ཤུགས་རྐྱེན་ཁོ་ན་ཙམ་མིན་པར་ཚོང་འབྲེལ་དང་རྒྱལ་ཁབ་ཀྱི་བདེ་འཇགས། སྤྱི་ཚོགས་བཅས་ཕྱོགས་ཡོངས་སུ་ཤུགས་རྐྱེན་ཆེན་པོ་སླེབས་ཡོད་ཅེས་འགྲེལ་བརྗོད་གནང་འདུག རྒྱལ་ས་ལྡི་ལིའི་  IIC རྒྱ་གར་དང་རྒྱལ་སྤྱིའི་ལྟེ་གནས་ཁང་དུ་ཚོགས་པའི་ཕྱི་རྒྱལ་གསར་འགོད་པ་དང་གླེང་མོལ་གནང་རྒྱུའི་ལས་རིམ་ཐོག་སྲིད་སྐྱོང་མཆོག་གིས་ཨོསི་ཊོ་ལི་ཡ་དེ་དཔེ་མཚོན་དུ་བཞག་ཏེ་ལོ་ངོ་ ༣༠ གོང་དུ་རྒྱ་ནག་དང་རྒྱལ་ཁབ་དེའི་དབར་ཚོང་འབྲེལ་དབུ་འཛུགས་ཀྱིས་འབྲེལ་བ་ཧ་ཅང་ཡག་པོ་ཡོད་ཀྱང་། དེང་སྐབས་རྒྱ་ནག་གིས་རྒྱལ་ཁབ་དེའི་ཆབ་སྲིད་དང་བདེ་འཇགས། སྤྱི་ཚོགས། ཤེས་ཡོན་གྱི་ལྟེ་གནས་བཅས་ལ་ཤུགས་རྐྱེན་ཆེན་པོ་ཞིག་སྤྲོད་པའི་གནོན་ཤུགས་སླེབས་ཡོད་པར་འགྲེལ་བརྗོད་དང་སྦྲགས། དེ་སྔོན་ལོ་ངོ་ ༦༠ སྔོན་དུ་རྒྱ་ནག་ནས་བོད་ནང་ཐོག་མར་མཐོ་རིམ་གྱི་སྤྱི་ཚོགས་མི་སྣ་དང་ཚོང་པ། དེ་ནས་སྤྱི་ཚོགས་ནང་ཤུགས་རྐྱེན་ཡོད་པའི་མི་སྣ་བཅས་དབང་སྒྱུར་ཏེ་ད་ལྟ་ཨོ་སི་ཊོ་ལི་ཡའི་ནང་ཡོང་བཞིན་པ་ལྟར་རིམ་པས་བོད་ཧྲིལ་པོར་བཙན་འཛུལ་བྱས་ཡོད་སྐོར་གསུངས་པ་མ་ཟད། རྒྱ་ནག་གི་ཉེ་ཆར་༸གོང་ས་མཆོག་གི་༸སྐུའི་འཁྲུངས་སྐར་ཉིན་ལ་དྭགས་ཕྱོགས་ནས་ས་མཚམས་ནང་བཙན་འཛུལ་བྱས་པའི་གནས་ཚུལ་ངོ་སྤྲོད་དང་རྒྱ་གར་གཞུང་ནས་ཀྱང་དེར་ཡིད་གཟབ་གནང་དགོས་པའི་ཉེན་བརྡ་ཡང་བཏང་ཡོད། སྲིད་སྐྱོང་བློ་བཟང་སེང་གེ་མཆོག་གིས་རྒྱ་གར་གྱི་ཕྱི་རྒྱལ་གསར་འགོད་པ་དེ་དག་ལ་ཨ་རིའི་ Freedom House ཡི་སྙན་ཐོ་གཞིར་བཟུང་བོད་དེ་ད་ལྟའི་འཆར་འཛམ་གླིང་ནང་ Syria རྒྱལ་ཁབ་ཀྱི་རྗེས་སུ་རང་དབང་ཞན་ཤོས་ཀྱི་རྒྱལ་ཁབ་ཆགས་ཡོད་སྐོར་སོགས་གསུངས་པ་མ་ཟད། རྒྱ་ནག་གིས་ནོར་ཝེ་དང་ཨ་ཕི་རི་ཀ་སོགས་ཀྱི་རྒྱལ་ཁབ་ཁག་ཏུ་ཤུགས་རྐྱེན་དེ་ལྟར་སྤྲོད་བཞིན་པར་འགྲེལ་བརྗོད་དང་སྦྲགས། བཙན་བྱོལ་དུ་གནས་པའི་བོད་མི་ཚོས་བོད་མིའི་ངོ་བོ་སྲུང་སྐྱོབ་ཇི་ལྟར་གནང་སྐོར་གསལ་བཤད་དང་རྒྱ་གར་ནི་བདག་ཅག་གི་སྟོན་པ་སངས་རྒྱས་བཅོམ་ལྡན་འདས་༸སྐུ་འཁུངས་ཡུལ་གྱི་རྒྱལ་ཁབ་ཅིག་དང་། ནང་པ་ཚོར་ཤུགས་རྐྱེན་སྤྲོད་ཐུབ་པའི་གནས་རྩ་ཆེན་ཡོད་པའི་རྒྱལ་ཁབ་ཅིག་ཡིན་སྟབས། གནས་ས་དེ་དག་གི་རྨང་གཞིའི་འཛུགས་སྐྲུན་གོང་འཕེལ་གནང་བ་བརྒྱུད་རྒྱལ་ཁབ་ཀྱི་དཔལ་འབྱོར་དང་ཆབ་སྲིད་ཕྱོགས་གཉིས་ཀའི་ཐོག་ནས་ཁེ་ཕན་བསྐྲུན་ཐུབ་པ་ཞིག་གནང་དགོས་པ་སོགས་གསུངས་ཡོད་པ་རེད།གསར་འགྱུར་དང་འབྲེལ་བའི་རྣམས་ TIBET TV

དབུས་བོད་ཀྱི་བེུད་ལྷན་ཚོགས་ཀྱི་འགན་འཛིན་ལྷན་ཚོགས་ཐེངས་ ༡༣ པ་དབུ་འཛུགས།

རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་བོད་མིའི་གཞིས་ཆགས་སུ་དབུས་བོད་ཀྱི་བེུད་ལྷན་ཚོགས་གཙོ་གྱུར་ས་གནས་ཁག་ ༢༥ འི་རྒྱུན་ལས་བཅས་ཁྱོན་ཚོགས་མི་ ༧༣ ཙམ་མཉམ་ཞུགས་ཐོག་འགན་འཛིན་ལྷན་ཚོགས་ཐེངས་ ༡༣ པ་དབུ་འཛུགས་གནང་འདུག ཁ་སྔོན་བེུད་ལྷན་ཚོགས་ཀྱི་འགན་འཛིན་ལྷན་ཚོགས་དབུ་འབྱེད་ཀྱི་མཛད་སྒོའི་སྐུ་མགྲོན་དུ་བོད་མིའི་སྒྲིག་འཛུགས་ཀྱི་ལྷོ་སྤྱི་ཆོས་འཕེལ་ཐུབ་བསྟན་ལགས་དང་དམིགས་བསལ་སྐུ་མགྲོན་མོན་གྷོ་འདོད་རྒུ་གླིང་གི་ས་གནས་འགོ་འཛིན་ལྷག་པ་ཚེ་རིང་ལགས། དགོན་སྡེ་ཁག་གི་མཁན་པོ་རྣམ་པ། ས་གནས་གྲོས་ཚོགས་ཀྱི་ཚོགས་མི་སོགས་ལྷན་འཛོམས་གནང་ཡོད་པ་དང་། མཛད་སྒོའི་ཐོག་འདི་ལོར་བུད་མེད་ལྷན་ཚོགས་ཀྱིས་འགོ་ཁྲིད་འོག་༸ཀུན་གཟིགས་༸པཎ་ཆེན་རིན་པོ་ཆེ་སྐུ་ཕྲེང་བཅིུག་པ་དགེ་འདུན་ཆོས་ཀྱི་ཉི་མ་མཆོག་དགུང་གྲངས་སུམ་ཅུར་ཕེབས་པ་དང་རྒྱ་གཞུང་གིས་འཛིན་བཟུང་བྱས་ནས་ལོ་ངོ་ ༢༤ ལྷག་འགྲོ་ཡི་ཡོད་སྟབས་རྒྱལ་སྤྱིའི་ཁྲོད་དེ་འབྲེལ་གོ་རྟོགས་དང་རྒྱབ་སྐྱོར་རག་ཐབས། དེ་བཞིན་རྒྱ་གཞུང་ནས་༸སྐུ་ཉིད་མཆོག་གི་གནས་བབ་ཕྱིར་བསྒྲགས་བྱས་པའི་ཁར་གློད་བཀྲོལ་གཏང་དགོས་པའི་དགོས་འདུན་འོག་ཚོགས་མི་བགོད་འགྲེམས་ཀྱིས་རྒྱ་གར་གྱི་ས་གནས་ཁག་ལྔ་ནང་ཞི་བའི་གོམ་བགྲོད་གོ་སྒྲིག་ཞུས་པ་སོགས་དང་འབྲེལ་བའི་སྙན་ཐོའི་ཕྱག་དེབ་དབུ་འབྱེད་གནང་འདུག ལྷོ་སྤྱི་ཆོས་འཕེལ་ཐུབ་བསྟན་ལགས་ནས་བུད་མེད་ལྷན་ཚོགས་ཀྱིས་ད་བར་བོད་ཀྱི་རྩ་དོན་སླད་ལས་འགུལ་རབ་དང་རིམ་པ་སྤེལ་བ་དེ་དག་སླད་མར་མུ་མཐུད་གནང་རྒྱུ་དང་བུད་མེད་ནུས་སྟོབས་གོང་འཕེལ་གྱི་ལས་གཞིའི་འོག་བུད་མེད་ཀྱི་ཤེས་ཡོན་ཡར་རྒྱས་སྔར་ལྷག་ཡོང་བར་ཕྱག་ལས་གནང་དགོས་པའི་འབོད་སྐུལ་ཞུས་འདུག འགན་འཛིན་ལྷན་ཚོགས་ཀྱི་ཚོགས་ཆེན་ཐོག་དབུས་ས་གཉིས་ཀྱི་ལས་བསྡོམས་དང་རྩིས་ཁྲ་སྒྲོག་སྦྱང་དང་། ཕྱི་ལོ་ ༢༠༡༨ ལོར་བཞག་པའི་གྲོས་ཆོད་དག་ལ་བསྐྱར་ཞིབ། དེ་བཞིན་༸གོང་ས་མཆོག་གི་༸སྐུ་ཕྱཱ་དང་བོད་ཀྱི་སྐད་ཡིག་སྲུང་སྐྱོབ། འདི་ལོ་རྒྱ་གཞུང་གིས་བོད་ལ་དབང་སྒྱུར་བྱས་ནས་མི་ལོ་ ༦༠ འཁོར་བ་དང་འབྲེལ་བའི་ལས་འགུལ་སྤེལ་ཕྱོགས་སོགས་གྲོས་གཞི་བཅུའི་ཐོག་གྲོས་བསྡུར་དང་རིམ་བཞིན་གྲོས་ཆོད་གཏན་འབེབས་གནང་རྒྱུ་དང་བཀའ་སྤྱི་གཉིས་ནས་ཕྱི་ཟླ་ ༡༠ པའི་ནང་དམིགས་བསལ་ཚོགས་ཆེན་འཚོགས་རྒྱུའི་ཐོག་དགོངས་འཆར་དང་། ༸རྒྱལ་དབང་སྐུ་ཕྲེང་རིམ་བྱོན་དང་བོད་མིའི་དབར་གྱི་འབྲེལ་བ་ཞེས་པའི་བརྗོད་གཞིའི་ཐད་གྲོས་བསྡུར་གནང་རྒྱུ་རེད་འདུག རྩ་བའི་འགན་འཛིན་ལྷན་ཚོགས་དེ་ཟླ་ ༨ ཚེས་ ༥ ནས་དབུ་འཛུགས་ཀྱིས་ཚེས་ ༡༠ བཅས་ཚོགས་ཀྱི་ཡོད་པ་དང་ཚེས་ ༡༡ དང་ ༡༢ བཅས་སུ་རྒྱ་གར་གཞུང་གི་རྩ་ཁྲིམས་གཞིར་བཟུང་རྩིས་ཁྲ་ཉར་ཕྱོགས་དང་འབྲེལ་བའི་ཟབ་སྦྱོང་དང་མང་ཚོགས་ལ་དབུ་མའི་ལམ་གྱི་སྲིད་བྱུས་ཀྱི་གོ་རྟོགས་སྤེལ་རྒྱུའི་ལས་རིམ་ཡོད་པ་རེད།

རྒྱ་གར་གྱི་གནའ་བོའི་བསམ་བློ་དེ་དག་དེང་སྐབས་སུ་དགོས་མཁོ་ཆེན་པོ་ཆགས་ཡོད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་བ་རྒན་གཞོན་ཁག་གཅིག་ལ་དམིགས་བསལ་མཇལ་ཁ་བསྩལ་སྐབས་རྒྱ་གར་གྱི་གནའ་བོའི་བསམ་བློ་དེ་དག་དེང་གི་འཛམ་གླིང་ལ་དགོས་མཁོ་ཆེན་པོ་ཆགས་ཡོད་ཅེས་ལམ་སྟོན་བསྩལ་འདུག ཁ་སང་སྔ་དྲོ་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་༸རྒྱལ་བའི་ཕོ་བྲང་དུ་རྒྱ་གར་བ་རྒན་གཞོན་ཁག་གཅིག་ལ་དམིགས་བསལ་མང་མཇལ་བསྩལ་སྐབས་སུ་མགོན་པོ་༸གང་ཉིད་མཆོག་ནས་འཛམ་གླིང་ཐོག་ཡོད་པའི་ཆོས་ལུགས་ཚང་མར་གུས་བརྩི་ཞུ་བཞིན་ཡོད་ཀྱང་། འགྲོ་བ་མིའི་སྤྱི་ཚོགས་ཁྲོད་དཀའ་རྙོག་དང་མི་གསོད་ཁྲག་སྦྱོར་གྱི་གནས་ཚུལ་མང་དག་ཅིག་ཡོང་བཞིན་པའི་དུས་སྐབས་དང་། ལྷག་པར་དུ་ཆོས་ལུགས་ཁག་ཀྱང་མི་གསོད་ཁྲག་སྦྱོར་ཡོང་གཞིར་བཟོ་བཞིན་སྐབས་འདིར་རྒྱ་གར་ནང་མི་ལོ་སུམ་སྟོང་ཙམ་གྱི་གོང་ནས་དར་ཁྱབ་བྱུང་བའི་ཞི་གནས་དང་ལྷག་མཐོང་གི་རྣམ་གཞག བྱམས་བརྩེ་དང་འཚེ་བ་མེད་པའི་ལྟ་སྤྱོད་སོགས་རྒྱ་གར་གྱི་གནའ་བོའི་རིག་གནས་ནང་ཡོད་པའི་བསམ་བློའི་རྣམ་གཞག་དེ་དག་དེང་གི་འཛམ་ གླིང་ལ་ཕན་ཐོགས་དང་དགོས་མཁོ་ཆེན་པོ་ཆགས་ཡོད་ཅེས་ལམ་སྟོན་བསྩལ་འདུག མགོན་པོ་༸གང་ཉིད་མཆོག་གིས་ད་དུང་སངས་རྒྱས་པའི་ཆོས་འདི་ནི་རྨོངས་དད་ཙམ་གྱིས་མི་འགྲིག་པར་རྒྱུ་མཚན་གྱི་ཐོག་ནས་བརྟག་དཔྱད་གནང་ཚེ་རང་གཞན་ཀུན་ལ་དགེ་མཚན་ཆེན་པོ་ཡོད་པ་དང་། དེའང་བདག་བཅག་གི་སྟོན་པ་སངས་རྒྱས་བཅོམ་ལྡན་འདས་ཀྱིས་ཞལ་ནས་སྟོན་པ་༸གང་ཉིད་ཀྱི་རྗེས་འཇུག་གདུལ་བྱ་ཚོས་བརྟག་དཔྱད་བྱེད་དགོས་པ་གསུངས་དོན་ལྟར། དཔལ་ནཱ་ལེནྡཱའི་མཁས་དབང་སློབ་དཔོན་ཀླུ་སྒྲུབ་དང་། སློབ་དཔོན་སངས་རྒྱས་བསྐྱངས། སློབ་དཔོན་ཟླ་བ་གྲགས་པ་སོགས་ནས་སངས་རྒྱས་ཀྱི་བཀའ་ལ་དྲང་ངེས་ཀྱི་རྣམ་གཞག་ཕྱེས་ཏེ་དངོས་ཡོད་གནས་ཚུལ་ལ་འགལ་ཟླ་བྱུང་ཚེ་དགག་བཞག་སྤོང་གསུམ་གནང་གི་ཡོད་པ་སོགས་བཀའ་འགྲེལ་དང་འབྲེལ། ང་ཚོ་སློབ་དཔོན་ཚོའི་སྲོལ་རྒྱུན་གྱི་སློབ་ཕྲུག་ཞིག་ཡིན་པས་སངས་རྒྱས་ཀྱི་བཀའ་ལའང་དཔྱད་པ་བྱེད་བཞིན་ཡོད་སྟབས། ང་ཚོའི་བསམ་བློ་གཏོང་སྟངས་དེ་ཚན་རིག་དང་མཐུན་པ་ཞིག་ཆགས་ཡོད་ཅེས་བཀའ་བསྕལ་འདུག

Latest news