གསར་འགྱུར།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གནས་མཆོག་རྡོ་རྗེ་གདན་དུ་ཆོས་འབྲེལ་གྱི་མཛད་འཕྲིན་ཁག་ལེགས་གྲུབ་ཀྱིས་རྒྱལ་ས་ལྡི་ལིར་༸སྐུའི་འཕྲོད་བཞེས་བརྟག་དཔྱད་ཆེད་ཉིན་གྲངས་གསུམ་རིང་བཞུགས་ཞག་མཛད་ཀྱི་འདུག དེ་ཡང་༸གོང་ས་༸སྐྱབས་མགོན་ཆེན་པོ་མཆོག་གནས་མཆོག་རྡོ་རྗེ་གདན་དུ་གཟའ་འཁོར་བཞི་ལྷག་གྱི་མཛད་འཕྲིན་ཁག་ལེགས་གྲུབ་ཀྱིས་ཁ་སང་མཁའ་ལམ་བརྒྱུད་རྒྱལ་ས་ལྡི་ལིར་ཆིབས་བསྒྱུར་མཛད་ཡོད་པ་རེད། དེ་རིང་ཚེས་ ༢༩ ནས་ ༣༡ བར་བཅས་ཉིན་གྲངས་གསུམ་རིང་མགོན་པོ་༸གང་ཉིད་མཆོག་ལྡི་ལིར་རྟེན་གཞི་བྱས་པའི་ Max སྨན་ཁང་དུ་ལོ་རེའི་མཚམས་སུ་༸སྐུའི་འཕྲོད་བཞེས་བརྟག་དཔྱད་དང་འབྲེལ་༸སྐུ་གཟུགས་བརྟག་དཔྱད་གནང་སྲོལ་ཡོད་པ་ལྟར་གནང་རྒྱུ་ཡིན་པ་མ་ཟད། ཁུལ་དེར་ཡོད་པའི་རྒྱ་གར་གཞུང་གི་ AIIMS སྨན་ཁང་དུའང་སྤྱན་བརྟག་དཔྱད་གནང་རྒྱུ་རེད་འདུག གཞི་རྩའི་༸གོང་ས་༸སྐྱབས་མགོན་ཆེན་པོ་མཆོག་ཁ་སང་རྡོ་རྗེ་གདན་ནས་ཆིབས་ཐོན་མ་མཛད་གོང་རྡོ་རྗེ་གདན་གྱི་བྱང་ཆུབ་མཆོད་རྟེན་རིན་པོ་ཆེར་གནས་གཟིགས་དང་འབྲེལ་སྟོན་པའི་༸སྐུ་བརྙན་རིན་པོ་ཆེར་ཐུགས་སྨོན་མཛད་ཡོད་པ་དང་། ཕྱི་ཚེས་ ༢༧ ཉིན་སྔ་ཐོག་ཚོུད་ ༨ སྟེང་སྔ་འགྱུར་རྙིང་མའི་དབུ་འཛིན་ཁྲི་རབས་བདུན་པ་༸སྐྱབས་རྗེ་ཀཿ ཐོག་དགེ་རྩེ་རིན་པོ་ཆེ་མཆོག་གིས་དབུས་པའི་སྔ་འགྱུར་རྙིང་མའི་སྐུ་ཚབ་རྣམ་པ་དང་སྤྱི་འཐུས། རི་མགོ་སྤྲུལ་སྐུ་སོགས་བླ་ཆེན་ཁག་གཅིག་ནས་གནས་མཆོག་རྡོ་རྗེ་གདན་དུ་༸གོང་ས་༸སྐྱབས་མགོན་ཆེན་པོ་མཆོག་ལ་གསར་མཇལ་ཞུས་ཡོད་པ་དང་། ༸སྐྱབས་རྗེ་ཀཿ ཐོག་དགེ་རྩེ་རིན་པོ་ཆེ་མཆོག་གིས་མགོན་པོ་༸གང་ཉིད་མཆོག་ལ་མཎྜལ་རྟེན་གསུམ་འདེགས་འབུལ་ཞུས་ཡོད་པ་དང་། ༸གོང་ས་མཆོག་གིས་རིན་པོ་ཆེ་མཆོག་ལ་གུ་རུའི་སྐུ་བརྙན་བྱིན་ཅན་ཞིག་ཕྱག་རྟགས་སུ་གསོལ་སྩལ་མཛད་དེ་སྔ་འགྱུར་རྙིང་མའི་དབུ་འཛིན་ཁྲི་རབས་བདུན་པར་འདེམས་ཐོན་བྱུང་བར་དགའ་བསུའི་འཚམས་འདྲི་ཡང་མཛད་ཡོད་པ་རེད། དེ་བཞིན་༸གོང་ས་མཆོག་ནས་ཕྱི་ཚེས་ ༢༥ ཉིན་བྱང་ཆུབ་མཆོད་རྟེན་ཆེན་གྱི་ཉེ་འགྲམ་དུ་རྟེན་གཞི་བྱས་པའི་ཐའི་ལེནྜི་དགོན་པ་གསར་པ་ At Watpa ཞེས་པ་དབུ་འབྱེད་རབ་གནས་མཛད་པ་དང་ཆབས་ཅིག ཆོས་ལུགས་ཚང་མའི་དམིགས་ཡུལ་ནི་བདེ་སྐྱིད་བསྐྲུན་རྒྱུ་གཅིག་མཚུངས་ཡིན་པ་རེད། ལྷག་ཏུ་དེང་སྐབས་ཚན་རིག་མཁས་པ་མང་པོས་ནང་པའི་སེམས་ཁམས་རིག་པའི་ཐོག་དམིགས་བསལ་དོ་སྣང་བྱེད་བཞིན་ཡོད་སྟབས་ནང་ཆོས་ལ་བསླབ་པ་སློབ་གཉེར་གནང་རྒྱུ་གལ་ཆེ་ཡིན་པར་ལམ་སྟོན་བཀྲིན་བསྩལ་འདུག གསར་འགོད་པས་དཔལ་ལྡན་དགའ་ལྡན་ཕོ་བྲང་གི་རྒྱ་གར་དང་ལྷོ་ཤར་ཨེ་ཤ་ཡའི་ངེས་སྟོན་པ་བཀའ་ཟུར་བསྟན་པ་ཚེ་རིང་ལགས་སུ་༸གང་ཉིད་མཆོག་གི་༸སྐུའི་འཕྲོད་བཞེས་བརྟག་དཔྱད་དང་འབྲེལ་བའི་ཐོག་བཀའ་འདྲི་ཁག་ཅིག་ཞུས་ཡོད། རྩ་བའི་༸གོང་ས་༸སྐྱབས་མགོན་ཆེན་པོ་མཆོག་ཟླ་བ་སྔོན་མའི་ཕྱི་ཚེས་ ༧ ཉིན་བཞུགས་སྒར་ནས་ཕེབས་ཐོན་གྱིས་ད་བར་ཟླ་བ་གཉིས་ཙམ་རིང་རྒྱ་གར་ལྷོ་ཕྱོགས་ཀྱི་གྲོང་ཁྱེར་མུམ་བའེ་དང་སྦེང་ལོར། པུ་ནེ། རྒྱ་གར་ལྷོ་ཕྱོགས་བོད་མིའི་གཞིས་ཆགས་ཁག་ཅིག ཝཱ་རཱ་ཎ་སཱི། དེ་བཞིན་རྡོ་གདན་བཅས་སུ་མང་ཚོགས་ལ་བཀའ་སློབ་དང་ཆོས་འབྲེལ་གྱི་མཛད་འཕྲིན་རྒྱ་ཆེ་བསྐྱངས་ཡོད་པ་རེད། མཛད་འཆར་ལྟར་ན། མགོན་པོ་༸གང་ཉིད་མཆོག་གི་༸སྐུའི་འཕྲིད་བཞེས་བརྟག་དཔྱད་གྲུབ་རྗེས་ཟླ་ ༢ ཚེས་ ༡ ཉིན་བཞུགས་སྒར་དུ་ཚུར་ཆིབས་བསྒྱུར་མཛད་ཀྱི་ཡོད་པ་དང་། ཟླ་ ༣ ཚེས་ ༢ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་སྐྱེས་རབས་སོ་བཞིའི་བཀའ་ཆོས་བསྩལ་རྒྱུ་ཡིན་པ་རེད།

དེ་རིང་ཟླ་ ༡ ཚེས་ ༢༦ སྔ་དྲོ་ཚོུད་ ༨ སྟེང་གནས་མཆོག་རྡོ་རྗེ་གདན་བྱང་ཆུབ་མཆོད་རྟེན་ཆེན་མོ་ནང་དུ་སྔ་འགྱུར་རྙིང་མའི་སྨོན་ལམ་ཆེན་མོར་བཅར་བའི་རྒྱ་བལ་འབྲུག་གསུམ་གྱི་དགོན་སྡེ་ཁག་ནས་ཕེབས་པའི་དགེ་འདུན་འདུས་མང་དགུ་སྟོང་བརྒལ་བ་ལྷན་འཛོམས་ཐོག་དཔལ་སྔ་འགྱུར་རྙིང་མའི་མཁན་བླ་སྤྲུལ་ཁག་དང་རྙིང་མའི་སྤྱི་འཐུས་རྣམ་པ། སྨོན་ལམ་ཆེན་མོའི་ཚོགས་གཙོ་དང་རྒྱུན་ལས་རྣམ་པས་དབུས་པའི་དགོན་སྡེ་ཁག་གི་སྐུ་ཚབ་དགེ་བསྐོས་རྣམ་པ་བཅས་ཀྱིས་རྟེན་འབྲེལ་བཀྲིས་མཇལ་དར་སྒྲོན་འབུལ་སོགས་གནང་ཐོག་ཀཿ ཐོག་བླ་ཆེན་༸སྐྱབས་རྗེ་ཀཿ ཐོག་དགེ་རྩེ་རིན་པོ་ཆེ་མཆོག་སྔ་འགྱུར་རྙིང་མའི་དབུ་འཛིན་ཁྲི་རབས་བདུན་པར་བདམས་ཐོན་བྱུང་བའི་ཁྲི་འདོན་གྱི་མཛད་སྒོ་ཚོགས་ཡོད་པ་རེད། དེའང་སྔ་འགྱུར་རྙིང་མའི་དབུ་འཛིན་ཁྲི་རབས་དྲུག་པ་སྟག་ལུང་རྩེ་སྤྲུལ་རིན་པོ་ཆེ་མཆོག་ཕྱི་ལོ་ ༢༠༡༧ ཕྱི་ཟླ་ ༡༢ ཚེས་ ༢༣ ཉིན་གནས་མཆོག་རྡོ་རྗེ་གདན་དུ་དགོངས་པ་གཞན་དོན་དུ་གཤེགས་རྗེས་གནས་དུས་ཀྱི་རྐྱེན་པས་རྙིང་མའི་ཆོས་བརྒྱུད་ཀྱི་དབུ་འཛིན་གསར་པ་ད་བར་གཏན་འཁེལ་བ་བྱུང་ཐུབ་མེད་པ་རེད། ད་ལན་གནས་མཆོག་རྡོ་རྗེ་གདན་དུ་སྔ་འགྱུར་རྙིང་མའི་སྨོན་ལམ་ཆེན་མོ་ཐེངས་ ༢༩ པ་ཚོགས་སྐབས་དང་འབྲེལ་སྔ་འགྱུར་རྙིང་མའི་བླ་ཆེན་ཁག་དང་། སྐུ་ཚབ་བཅས་ལྷན་འཛོམས་སར་སྔ་འགྱུར་རྙིང་མའི་དབུ་འཛིན་ཕེབས་ཕྱོགས་སྐོར་གོ་བསྡུར་ཐག་གཅོད་གནང་དགོས་པའི་སྐོར་སྔ་འགྱུར་རྙིང་མའི་སྤྱི་འཐུས་དང་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་སྤྱི་འཐུས་མཁན་པོ་འཇམ་དཔལ་བསྟན་འཛིན་ལགས་རྣམ་གཉིས་ནས་ཞེན་སྐུལ་གནང་དོན་ལྟར་དེ་དོན་གྲོས་བསྡུར་གནང་ཐོག་དཔལ་༸རྒྱལ་བ་ཀཿ ཐོག་པའི་བླ་ཆེན་༸སྐྱབས་རྗེ་ཀཿ ཐོག་དགེ་རྩེ་རིན་པོ་ཆེ་མཆོག་ལ་མོས་མཐུན་གྲོས་ཆོད་བྱུང་བ་བཞིན་གསོལ་འདེབས་ཞུས་ནས་སྔ་འགྱུར་རྙིང་མའི་དབུ་འཛིན་ཁྲི་རབས་ ༧ པའི་མཚན་གནས་ཞལ་བཞེས་ལེགས་ཐོབ་བྱུང་ཡོད་པ་རེད། བོད་ལ་དེ་སྔ་སྔ་འགྱུར་རྙིང་མའི་དབུ་འཛིན་གྱི་ལམ་སྲོལ་དེ་མེད་ཀྱང་དུས་འགྱུར་བྱུང་རྗེས་བཙན་བྱོལ་ནང་རྙིང་མའི་མ་དགོན་དྲུག་ནས། དེ་ཡང་དང་པོ་ཀཿ ཐོག་དང་རྫོགས་ཆེན། ཞེ་ཆེན། སྨིན་གྲོལ་གླིང་། རྡོ་རྗེ་བྲག དཔལ་ཡུལ་བཅས་ཀྱི་བླ་ཆེན་ཁག་རིམ་པས་དབུ་འཛིན་གྱི་མཚན་གནས་ལོ་གསུམ་རིར་རེ་མོས་བཞེས་གནང་རྒྱུའི་ཐུགས་ཐག་བཅད་ཡོད་པ་རེད། གཞི་རྩའི་སྔ་འགྱུར་རྙིང་མའི་དབུ་འཛིན་བདུན་པ་༸སྐྱབས་རྗེ་ཀཿ ཐོག་དགེ་རྩེ་རིན་པོ་ཆེ་མཆོག་ནི་ཕྱི་ལོ་ ༡༩༥༤ ལོར་མགོ་ལོག་རྡོ་ཡུལ་མཁར་ནང་གོང་མའི་ལྷ་ཁང་སུམ་མདོ་རུ་ཡབ་བློ་ལྡན་ཕུན་ཚོགས་དང་། མ་ཡུམ་ཆོས་འཕགས་སྒྲོལ་གཉིས་ཀྱི་སྲས་སུ་སྐུ་འཁྲུངས། ཨ་འཛོམས་རྒྱལ་སྲས་འགྱུར་མེད་རྡོ་རྗེ་མཆོག་དང་། རྫོང་གསར་འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་མཆོག ཀརྨ་པ་རིག་པའི་རྡོ་རྗེ་མཆོག་སོགས་ནས་ངོས་འཛིན་གནང་བ་བཞིན་ཤར་རྒྱལ་བ་ཀཿ ཐོག་དགོན་དུ་ཕྱི་ལོ་ ༡༩༨༠ ལོར་ཁྲི་འདོན་མཛད་སྒོ་གཟབ་རྒྱས་གནང་། དེ་རྗེས་སྤྲུལ་སྐུ་ཉི་ཟླ་མཆོག་དང་། མཁན་ཆེན་འཇིགས་མེད་ཕུན་ཚོགས་མཆོག ཀཿ ཐོག་མཁན་རྒན་རྒྱལ་མཚན་ནོར་བུ་མཆོག ཀཿ ཐོག་རྨོག་ཚ་རིན་པོ་ཆེ། ཨ་འཛོམས་འབྲུག་པ་རིན་པོ་ཆེ་སོགས་ཀྱི་མདུན་ནས་དབང་ལུང་གིས་ཐུགས་རྒྱུད་ཡོངས་སུ་ཕྱུག་པར་མཛད། ཕྱི་ལོ་ ༡༩༩༧ ལོར་འཕགས་ཡུལ་དུ་ཕེབས་འབྱོར་རྗེས་༸གོང་ས་༸སྐྱབས་མགོན་ཆེན་པོ་མཆོག་གི་དབུས། སྐྱབས་རྗེ་འཁྲུལ་ཞིག་རིན་པོ་ཆེ། སྐྱབས་རྗེ་སྟག་ལུང་རྩེ་སྤྲུལ་རིན་པོ་ཆེ། སྐྱབས་རྗེ་གྲུབ་དབང་པད་ནོར་རིན་པོ་ཆེ་སོགས་ཀྱི་མདུན་དབང་ལུང་གདམས་ངག་མང་པོ་ཞུས་ཤིང་། འཕགས་པའི་གནས་ཆེན་ཁག་ཏུ་སྐུ་མཚམས་ལ་བཞུགས་གནང་བ་དང་། འཛམ་གླིང་ཤར་ནུབ་མང་པོ་ཕེབས་ནས་བསྟན་འགྲོའི་དོན་མཛད་གནང་ཡོད།

དེའང་ཕྱི་ལོ་ ༡༩༥༤ ལོ་ནས་བཟུང་རྒྱ་གར་གྱི་མང་གཙོ་ཉིན་མོ་དང་བསྟུན་རྒྱ་གར་དབུས་གཞུང་ནས་རྒྱ་གར་གྱི་སྲིད་འཛིན་མཆོག་གི་ཕྱག་ནས་རྒྱལ་ཁབ་འདིའི་སྒྱུ་རྩལ་བ་དང་བཟོ་རིག་པ། རྩེད་རིགས། ཚན་རིག་ཤེས་བྱ། དེ་བཞིན་རྒྱལ་ཁབ་དང་མང་ཚོགས་ཀྱི་བདེ་དོན་སླད་ཕྱག་ལས་གཟེངས་སུ་ཐོན་པ་གནང་མཁན་ཁག་ལ་ཆེ་བསྟོད་དང་སྦྲགས། ཡུལ་དེའི་ཆེས་མཐོའི་གཟེངས་རྟགས་མཐོ་ཤོས་ཨང་དང་པོ་ Bharat Ratna དང་ཨང་གཉིས་པ་ Padma Vibhushan ཨང་གསུམ་པ་ Padma Bhushan ཨང་བཞི་པ་ Padma Shri ལ་སོགས་པའི་གཟེངས་རྟགས་གནང་སྲོལ་ཡོད་པ་ལྟར། འདི་ལོའི་རྒྱ་གར་གི་ཆེས་མཐོའི་གཟེངས་རྟགས་བཞི་པར་གྲགས་པ་ Padma Shri ཞེས་པ་དེ་༸རྒྱལ་བའི་བོད་ལུགས་བླ་སྨན་ཟུར་པ་དགེ་སློང་ཡེ་ཤེས་དོན་ལྡན་ལགས་སུ་ཕུལ་ཡོད་པ་རེད། དེ་རིང་རྒྱ་གར་དབུས་གཞུང་ནས་གཟེངས་རྟགས་མཐོ་ཤོས་གཉིས་པ་ Padma Vibhushan བཞེས་མཁན་ ༤ དང་མཐོ་ཤོས་གསུམ་པ་ Padma Bhushan བཞེས་མཁན་ ༩ དེ་བཞིན་མཐོ་ཤོས་བཞི་པ་ Padma Shri བཞེས་མཁན་ ༧༣ བཅས་ཁྱོན་རྒྱ་གར་ནང་དུ་སྡེ་ཚན་ཅི་རིགས་ཐོག་གཟེངས་སུ་ཐོན་པའི་ཕྱག་ལས་གནང་མཁན་གྱི་གང་ཟག་ ༨༥ ལ་གཟེངས་རྟགས་དེ་ཕུལ་ཡོད་པ་ལྟར། བོད་མིའི་ཁྲོད་ནས་༸གོང་ས་མཆོག་གི་༸སྐུའི་བོད་ལུགས་བླ་སྨན་ཟུར་པ་ཡེ་ཤེས་དོན་ལྡན་ལགས་ལ་ པདྨ་ཤྲི་གཟེངས་རྟགས་ཕུལ་ཡོད་པ་རེད། གསར་འགོད་པས་སྨན་པ་ཡེ་ཤེས་དོན་ལྡན་ལགས་ལ་རྒྱ་གར་གྱི་ཆེས་མཐོའི་གཟེངས་རྟགས་བཞི་པ་པདྨ་ཤྲི་འབུལ་བཞེས་དང་འབྲེལ་བའི་ཐོག་བཅར་འདྲི་ཞུས་པར་ཁོག་གིས་ད་རེས་རྒྱ་གར་གཞུང་ནས་ཆེ་བསྟོད་ཀྱི་གཟེངས་རྟགས་དེ་ཁོང་ལ་གནང་དོན་གཙོ་བོ་ནི་ཁོང་ནས་ད་བར་ནད་པ་ཚོར་སྨན་བཅོས་ཞུས་པར་བརྟེན་གསོལ་བསྩལ་གནང་བ་ཞིག་ཡིན་པ་དང་། དེ་སྔ་ཡང་རྒྱ་གར་གཞུང་ནས་ཁོང་སྒེར་གྱི་སྨན་ཁང་ཆེད་འཛུགས་ཆོག་པའི་ཆོག་མཆན་དང་སྦྲགས། ནད་པ་ ༢༠ ཐམ་པའི་ཉལ་ཁྲི་ཡང་གསོལ་བསྩལ་གནང་ཡོད་པ་སོགས་དྲན་གསོ་གནང་སོང་། ཐེངས་འདིའི་གཟིེངས་རྟགས་དང་འབྲེལ་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་༸སྐུའི་བོད་ལུགས་བླ་སྨན་པ་མཆོག་ནས་ད་བར་བོད་མིའི་གསོ་བ་རིག་པ་དར་སྤེལ་ཐོག་གཟེངས་སུ་ཐོན་པའི་ཞབས་འདེགས་རླབས་ཆེན་བསྒྲུབས་པར་བསྔགས་བརྗོད་ཀྱི་འཚམས་འདྲི་གནང་འདུག ལྷག་དོན་དེ་རིང་བཞུགས་སྒར་དུ་བོད་མིའི་སྒྲིག་འཛུགས་ཀྱི་གཞུང་འབྲེལ་མཛད་སྒོ་གྲུབ་བསྟུན་སྲིད་ཚབ་ཆོས་རིག་བཀའ་བློན་མཆོག་ནས་ཀྱང་འཚམས་འདྲི་དང་སྦྲགས། རིང་མིན་བཀའ་ཤག་རྣམ་པ་ངོ་བཅར་ཐོག་འཚམས་འདྲི་ཞུ་རྒྱུ་ཡིན་པ་གསུངས་ཡོད། གཞི་རྩའི་༸རྒྱལ་བའི་བོད་ལུགས་བླ་སྨན་ཟུར་པ་རྔོག་རིགས་དགེ་སློང་ཡེ་ཤེས་དོན་ལྡན་ལགས་ནི་ཕྱི་ལོ་ ༡༩༢༧ ལོར་བོད་ལྷོ་ཁ་རྫོང་ཁོངས་གནམ་རི་གྲོང་སྡེར་འཁྲུངས་ཤིང་དགུང་ལོ་ ༡༡ ཕེབས་སྐབས་ལྷ་ས་ལྕགས་པོ་རི་བོད་ཀྱི་གསོ་བ་རིག་པ་སློབ་གཉེར་ཁང་དུ་སློབ་ཞུགས་ཀྱི་སློབ་གཉེར་གནང་ཡོད་པ་དང་། རྒྱ་གར་དུ་སྐྱབས་བཅོལ་ཕེབས་རྗེས་༸གོང་ས་མཆོག་གི་༸སྐུའི་བོད་ལུགས་བླ་སྨན་པ་གནང་བ་མ་ཟད། ༡༩༦༡ ལོར་༸གོང་ས་མཆོག་གི་དགོངས་བཞེས་ལྟར་བཞུགས་སྒར་རྡ་རམ་ས་ལར་བོད་ཀྱི་སྨན་རྩིས་ཁང་དངོས་སུ་དབུ་འཛུགས་ཀྱིས་ཕྱི་ལོ་ ༡༩༧༩ བར་སྨན་རྩིས་ཁང་གི་ངེས་སྟོན་པ་དང་སློབ་སྤྱིའི་ཐུགས་འགན་བཞེས་ཡོད། ད་ལྟའི་ཆ་ལ་ཁོང་དགུང་གྲངས་ ༩༣ ལ་ཕེབས་བཞིན་ཡོད་ཀྱང་བཞུགས་སྒར་མེག་གྷན་དུ་ཆེད་འཛུགས་གནང་བའི་ཁོང་སྐུ་སྒེར་གྱི་སྨན་ཁང་དུ་བོད་ཀྱི་གསོ་བ་རིག་པའི་སྨན་བཅོས་ཐོག་ནས་ཕྱི་ནང་གི་ནད་པ་དུ་མར་སྨན་བཅོས་གནང་མུས་ཡིན་པ་མ་ཟད། ལྷག་ཏུ་ཁོང་ནས་ད་བར་ཕྱི་ནང་གི་ནད་པ་མང་དག་ལ་སྨན་བཅོས་གནང་བའི་ཁྲོད་རྒྱལ་སྤྱིའི་ཐོག་ཆེས་ཛ་དྲག་ཆེ་བའི་ནད་གཞི་འབྲས་ནད་དང་རེག་དུག་སོགས་ལ་ཕན་ཐོགས་ཆེན་པོ་བྱུང་ཡོད་པ་རེད།

དེ་རིང་ཕྱི་ཟླ་ ༡ ཚེས་ ༢༦ ཉིན་མོ་སྟེ་དེ་སྔ་ཕྱི་ལོ་ ༡༩༥༠ ལོར་རྒྱ་གར་རྒྱལ་ཁབ་ཀྱི་རྩ་ཁྲིམས་གཏན་ལ་ཕན་ནས་མང་གཙོ་དབུ་བརྙེས་ཏེ་ལོ་ངོ་ ༦༩ འཁོར་བའི་དུས་ཚིགས་ཁྱད་པར་བ་ཞིག་ཆགས་ཡོད་པ་ལྟར། དེ་རིང་རྒྱ་གར་གྱི་རྒྱལ་ས་ལྡི་ལི་གཙོས་པའི་རྒྱལ་ཁབ་ཁྱོན་ཡོངས་ལ་གཞུང་མང་གཉིས་ཀྱིས་ཉིན་མོ་འདི་བཞིན་སྲུང་བརྩི་ཞུ་བཞིན་ཡོད་པ་རེད། བཙན་བྱོལ་བོད་མིའི་བསྟི་གནས་བཞུགས་སྒར་དྷ་རྨ་ས་ལར་རྣམ་ཀུན་ལྟར་སྔ་དྲོ་ཚོུད་ ༩།༠༠ སྟེང་བོད་མིའི་སྒྲིག་འཛུགས་ཀྱི་སྲིད་ཚབ་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་གིས་དབུས་པའི་ཕྱག་སྦྲེལ་བཀའ་བློན་རྣམ་པ་དང་། ལྷན་ཁང་ཁག་གི་དྲུང་ཆེ་ཆུང་རྣམ་པ་ལྷན་འཛོམས་ཐོག་སྲིད་ཚབ་མཆོག་གིས་རྒྱ་གར་གྱི་རྒྱལ་དར་མཁའ་དབྱིངས་སུ་སྒྲེང་འཛུགས་གནང་བ་དང་འབྲེལ་རྒྱ་གར་གྱི་མང་གཙོའི་དུས་ཆེན་ཐེངས་ ༦༩ པ་སྲུང་བརྩི་གཟབ་རྒྱས་ངང་ཞུས་སོང་། སྲིད་ཚབ་ཆོས་རིག་བཀའ་བློན་མཆོག་གིས་རྒྱ་གར་གཞུང་གཉིས་ལ་དགའ་བསུའི་འཚམས་འདྲི་དང་འབྲེལ། འདས་པའི་ལོ་ངོ་ ༦༠ རིང་རྒྱ་གར་གཞུང་མང་གཉིས་ནས་བོད་མིའི་ཐོག་མཐུན་འགྱུར་རོགས་སྐྱོར་གང་ལེགས་གནང་བར་སྙིང་དབུས་ནས་ཐུགས་རྗེཆེ་ཞུས་པ་མ་ཟད་ཁྱད་པར་དུ་རྒྱལ་ཁབ་འདི་འབྱུང་འགྱུར་སྔར་ལྷག་ཡར་རྒྱས་གོང་འཕེལ་ཕྱིན་ནས་མ་འོངས་པར་འཛམ་གླིང་ནང་མིང་དོན་མཚུངས་པའི་སྟོབས་ཆེན་རྒྱལ་ཁབ་ཞིག་ཆགས་རྒྱུའི་རེ་བ་དང་ཡིད་ཆེས་ཡོད་པ་གསུངས་སོང་། སྔ་ཐོག་མཛད་སྒོ་གྲུབ་བསྟུན་སྔ་དྲོ་ཚོུད་ ༡༡།༠༠ ཐོག་སྲིད་ཚབ་ཆོས་རིག་བཀའ་བློན་མཆོག་དང་བོད་མི་མང་སྤྱི་འཐུས་ཚོགས་གཞོན་མཆོག་རྣམ་གཉིས་ས་གནས་ཀྱི་ཉེན་རྟོག་ལས་ཁུངས་སུ་རྒྱ་གར་ས་གནས་གཞུང་གིས་མཛད་སྒོར་ལྷན་བཞུགས་ཀྱིས་དཔོན་རིགས་ཁག་ཅིག་དང་མཇལ་འཕྲད་གནང་བ་མ་ཟད། འདི་ལོ་བོད་མི་རྣམ་བཙན་བྱོལ་རྒྱ་གར་དུ་འབྱོར་ནས་ལོ་ངོ་ ༦༠ འཁོར་བ་དང་བསྟུན། མཛད་སྒོའི་ཐོག་རྒྱ་གར་གཞུང་མང་གཉིས་ལ་ཐུགས་རྗེ་ཞུ་ཆེད་བོད་མིའི་སྒྲིག་འཛུགས་ནས་པར་སྐྲུན་ཞུས་པའི་ཕྱི་ལོ་ ༢༠༡༨ ལོའི་ལོ་ཐོ་རྒྱ་གར་མང་ཚོགས་རྣམས་ལ་འགྲེམས་སྤེལ་ཞུ་རྒྱུ་རེད་འདུག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་སྔ་དྲོ་གནས་མཆོག་རྡོ་རྗེ་གདན་གྱི་དུས་འཁོར་ཐང་ཆེན་དུ་Alice སློབ་གྲྭ་གཙོ་བོར་གྱུར་པའི་ས་གནས་ཀྱི་སློབ་ཕྲུག་ཆིག་ཁྲི་བཞི་སྟོང་སྐོར་ཞིག་ལ་ཤེས་ཡོན་ཁོངས་སུ་བཟང་སྤྱོད་ཀྱི་རིན་ཐང་ཞེས་པའི་བརྗོད་གཞིའི་ཐོག་བླང་དོར་བཀའ་སློབ་བཀྲིན་བསྩལ་འདུག་པ་དང་། ལྷག་པར་དུ་མགོན་པོ་༸གང་ཉིད་མཆོག་གིས་མ་འོངས་པར་རྒྱ་གར་རྒྱལ་ཁབ་དེ་གང་འདྲ་ཆགས་མིན་དེ་ད་ལྟའི་མི་རབས་ཚོ་ལ་རག་ལས་ཡོད་པས་དེའི་ཐད་ཤེས་ཡོན་ནི་ལྡེ་མིག་ལྟ་བུ་ཡིན་པར་ལམ་སྟོན་བཀྲིན་བསྩལ་འདུག ༸གོང་ས་མཆོག་གི་བཀའ་སློབ་ཀྱི་མཛད་རིམ་དེ་ནི་ས་གནས་ཀྱི་ Alice སློབ་གྲྭས་གསོལ་འདེབས་ཞུས་པ་ཞིག་ཡིན་པ་དང་། དེ་རིང་དུས་འཁོར་ཐང་ཆེན་ནང་དུ་བྷི་ཧཱར་ནང་གི་སློབ་གྲྭ་ ༡༥༣ གྱི་སློབ་ཕྲུག་ཆིག་ཁྲི་བཞི་སྟོང་སྐོར་ཞིག་དང་དགེ་རྒན་ལས་བྱེད་ཉིས་སྟོང་ལྷག་བཅར་འདུག ༸གོང་ས་༸སྐྱབས་མགོན་ཆེན་པོ་མཆོག་གིས་མཛད་སྒོའི་སྟེང་ Alice སློབ་གྲྭ་གསར་འཛུགས་གནང་མཁན་ Italy མི་རིགས་ཡིན་པ་སྐུ་ཞབས་ Valentino མཆོག་ནས་༸གོང་ས་མཆོག་གི་བཀའ་དགོངས་བཞིན་སྟོན་པ་བཅོམ་ལྡན་འདས་མངོན་པར་རྫོགས་པ་སངས་རྒྱས་ཡུལ་གནས་མཆོག་རྡོ་རྗེ་གདན་དུ་སློབ་གྲྭ་དེ་ལྟར་བཙུགས་གནང་བ་དེ་ནི་རླབས་ཆེན་གྱི་བྱ་གཞག་ཞིག་དང་ང་ཚོར་གང་དགོས་པ་དེ་ལག་ལེན་དུ་སྐྱེལ་བ་རེད་ཅེས་ཁོང་ལ་ཡི་རངས་བསྔགས་བརྗོད་མཛད་ཡོད། མགོན་པོ་མཆོག་གིས་ Universal Ethics in Education འམ་ཤེས་ཡོན་ཁོངས་སུ་བཟང་སྤྱོད་ཀྱི་རིན་ཐང་ཞེས་པའི་བརྗོད་གཞིའི་ཐོག་ལམ་སྟོན་བསྩལ་བའི་ཁྲོད། ༸གང་ཉིད་མཆོག་གིས་རྒྱ་གར་སློབ་ཕྲུག་རྣམས་ལ་དུས་ཚོུད་ནི་ག་དུས་ཡིན་ཡང་འགྲོ་གྱི་ཡོད་པ་དང་། འདས་པའི་དུས་ཚོུད་དེ་དག་ནི་འདས་པ་ཙམ་ཞིག་དང་ལོ་རྒྱུས་ནང་འཁོད་རྒྱུ་ཙམ་ལས་གཞན་གང་ཡང་བྱ་རྒྱུ་མེད་པ་རེད། འོན་ཀྱང་མ་འོངས་དེ་ཡག་པོ་ཞིག་བཟོ་ཐུབ་དང་མ་ཐུབ་གོ་སྐབས་ཆ་ཚང་ང་ཚོ་དང་ལྷག་པར་མི་རབས་གཞོན་པ་ཚོ་ལ་རག་ལས་ཡོད་ཅེས་ལམ་སྟོན་བཀའ་གནང་འདུག ཁྱད་པར་དུ་༸གོང་ས་མཆོག་གིས་སློབ་མ་རྣམས་ལ་༸གང་ཉིད་མཆོག་དང་དེ་བཞིན་དེང་གི་ཚན་རིག་པ་དང་ཤེས་ཅན་མང་པོས་དེང་གི་ཤེས་ཡོན་ལམ་ལུགས་དེ་ཕྱི་དངོས་པོ་ཡར་རྒྱས་གཙོ་བོར་དམིགས་རྐྱེན་འཛམ་གླིང་འདིའི་ནང་དུ་དཀའ་ངལ་མང་དག་ཞིག་འཕྲད་དང་འཕྲད་མུས་ཡིན་པ་ངོས་འཛིན་གནང་གི་ཡོད་སྐོར་བཀའ་གནང་བ་དང་སྦྲགས། ང་ཚོས་དེང་གི་ཤེས་ཡོན་ལམ་ལུགས་ཀྱི་ཞེན་ཆ་དེ་ཤེས་ཐོག་སློབ་གྲྭའི་ནང་དུ་མིའི་ལྷན་སྐྱེས་ཀྱི་ནང་སེམས་རྒྱུད་ཀྱི་བཟང་སྤྱོད་རིན་ཐང་སྐོར་དེ་དག་ཤེས་ཡོན་གྱི་ངོ་བོའི་ཐོག་ནས་སློབ་ཁྲིད་གནང་སྟེ་སློབ་མའི་སེམས་རྒྱུད་ལ་འཇག་ཐབས་སུ་འབད་བརྩོན་དོན་ནན་གནང་དགོས་པ་མ་ཟད། སློབ་མ་ཚོས་ཀྱང་བསམ་གཞིག་ཡག་པོ་གནང་དགོས་པར་ལམ་སྟོན་བཀྲིན་བསྩལ་གནང་ཡོད། ད་དུང་༸གོང་ས་མཆོག་གིས་སློབ་ཕྲུག་རྣམས་ལ་དེ་སྔ་དཔལ་ནཱ་ལེནྡཱའི་ཤེས་ཡོན་ལྟེ་གནས་ཁང་དེ་ནས་མཁས་པ་ཚོས་རང་ལུགས་ཁོ་ན་མ་ཡིན་པར་ཁ་ཅིག་གཞན་གྱི་འདོད་ལུགས་ཁག་ལའང་སློབ་གཉེར་གནང་གི་ཡོད་པ་དེ་དག་དཔེ་ལ་བྱེད་ནས་སློབ་གྲྭའི་ནང་དུ་སློབ་ཚན་གང་ཞིག་བསླབ་རུང་ཀླད་པར་ཤེས་ཡོན་གྱི་ལག་ཆ་སྤྲད་དེ་རྒྱུ་མཚན་ཤེས་པའི་ཐོག་ནས་རང་ཉིད་རྙེད་པ་ཞིག་བཟོ་ཐུབ་གལ་ཡིན་པ་ལམ་སྟོན་རྒྱ་ཆེ་བསྩལ་ཡོད་པ་རེད། གཞན་ཡང་༸གོང་ས་མཆོག་གིས་ད་ལྟའི་རྒྱ་གར་གྱི་མི་རབས་གཞོན་པ་ཚོས་འཚེ་བ་མེད་པ་དང་ཆོས་ལུགས་མཐུན་སྒྲིལ་སོགས་རང་གི་གནའ་བོའི་རིག་གཞུང་དང་ཤེས་བྱ་ཕྱུག་པོ་དེ་དག་ཉམས་པ་སོར་ཆུད་དང་མི་ཉམས་གོང་འཕེལ་གང་ཐུབ་གནང་ཐུབ་ཚེ་མ་འོངས་ལོ་ཉི་ཤུ་དང་སུམ་ཅུ་རྗེས་སུ་ཏན་ཏན་ཁྱིམ་ཚང་བདེ་སྐྱིད་ལྡན་པ་དང་འཛམ་གླིང་ཞི་བདེ་ལྡན་པ་ཞིག་སྐྲུན་ཐུབ་པར་ཐུགས་རེ་གནང་བཞིན་ཡོད་པ་སོགས་ཐུགས་བརྩེའི་བཀའ་སློབ་གནང་ཡོད། ༸གོང་ས་མཆོག་གི་བཀའ་སློབ་ཀྱི་མཛད་རིམ་གསོལ་འདེབས་ཞུ་མཁན་ Alice སློབ་གྲྭའི་སྤྱི་ཁྱབ་འགན་འཛིན་ཚེ་དབང་བསྟན་འཛིན་ལགས་ནས་ཤེས་ཡོན་ལྟེ་གནས་ཁང་དེའི་ངོ་སྤྲོད་སྙིང་བསྡུས་དང་སྦྲགས། དེ་རིང་གི་ལས་རིམ་གྲུབ་རྗེས་རྒྱ་གར་གྱི་དགེ་ལས་མང་པོས་སེམས་ཚོར་ཆེན་པོ་དང་བཅས་༸གོང་ས་མཆོག་གི་བཀའ་སློབ་གང་གནང་བ་དེ་དག་མཇུག་སྐྱོང་དང་ལག་ལེན་ཞུ་ཐབས་གནང་གལ་སྐོར་གསུངས་མཁན་བྱུང་འདུག

དབུས་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱིས་རྒྱ་གར་ནང་གི་བོད་མིའི་གཞིས་ཆགས་ཆེ་བ་བརྒྱད་ཀྱི་ནང་ཆུའི་གནས་བབ་རྒྱུས་ལོན་གྱི་རྟོག་ཞིབ་ལས་གཞི་སྤེལ་འགོ་བརྩམས་འདུག དེ་ཡང་འདས་པའི་ལོ་ཤས་ནང་གོ་ལའི་ཚ་དྲོད་རྒྱས་ཏེ་འཛམ་གླིང་སྤྱིའི་གནམ་གཤིས་འགྱུར་ལྡོག་འགྲོ་བཞིན་པའི་ཁྲོད་བཙན་བྱོལ་བོད་མིའི་གཞིས་ཆགས་ཆེ་ཁག་ནང་དུ་ཆར་ཆུ་དུས་སུ་མ་བབ་པ་བཅས་ལ་བརྟེན་ལོ་རེ་བཞིན་ས་སྟེང་འོག་གཉིས་ཀྱི་ཆུའི་གནས་བབ་ཇེ་ཉུང་དུ་ཕྱིན་ནས་ས་གནས་ཁག་ཏུ་ཆུའི་དཀའ་ངལ་དུ་མ་ཞིག་འཕྲད་ཡོད་སྟབས། ཉེ་ཆར་དབུས་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱིས་  རྒྱ་གར་གྲོང་ཁྱེར་སྦེང་ལོར་ནང་རྟེན་གཞི་བྱས་པའི་ Space Geo Tech ཞེས་པའི་ཁྱད་ལས་ས་ཁམས་དཔྱད་ཞིབ་པ་དང་མཉམ་དུ་བོད་མིའི་གཞིས་ཆགས་ཆེ་གྲས་བརྒྱད་ཀྱི་ནང་ཆུའི་གནས་བབ་རྒྱུས་ལོན་གྱི་རྟོག་ཞིབ་ལས་གཞི་སྤེལ་འགོ་བརྩམས་འདུག ད་ལན་རྟོག་ཞིབ་ཀྱི་ལས་གཞི་སྤེལ་ཡུལ་གཞིས་སྒར་ཁག་ནི། སྦེལ་ཀོབ་གཞི་ཆགས་གསར་རྙིང་གཉིས་དང།  ཧུན་སུར། ཀོ་ལི་སྒར།  དེ་བཞིན་མོན་གྷོ་བཅས་ལྷོ་ཁུལ་གཞིས་ཆགས་ཆེ་ཁག་ལྔ་དང། བྷན་དྷ་ར། ཨུ་རུ་ས། མན་སྤར་བཅས་ཡིན་པ་རེད། འདི་ག་རླུང་འཕྲིན་ཁང་གིས་དབུས་བོད་མིའི་སྒྲིག་འཛུགས་འཕྲོད་ལས་ཁུངས་ཀྱི་འཆར་འགོད་ཚན་པའི་འབྲེལ་ཡོད་ལས་བྱེད་ཉི་མ་རྒྱལ་མཚན་ལགས་སུ་ལས་གཞི་དེ་འབྲེལ་བཅར་འདྲི་ཞུས་པར་ཁོང་གིས་ལས་གཞི་དེའི་དམིགས་ཡུལ་གཙོ་བོ་ནི་བཙན་བྱོལ་བོད་མིའི་གཞིས་ཆགས་ཆེ་ཁག་ནང་ཆུའི་གནས་བབ་རྒྱུས་ལོན་གནང་སྟེ་འབྱུང་འགྱུར་ཆུའི་དཀའ་ངལ་འཕྲད་སྲིད་པའི་ས་ཁག་ཏུ་སྔོན་འགོག་ཐབས་ལམ་འཚོལ་ཐབས་དང། ལྷག་དོན་ས་ཁག་ཏུ་ཆུའི་འབྱུང་ཁུངས་ཁག་མ་འོངས་པར་སྲ་བརྟན་དང་རྒྱུན་གནས་ཐུབ་ཆེད་ཡིན་པ་གསུངས་ཡོད།

ཕ་རན་སིའི་གྲོས་ཚོགས་གོང་མའི་འཐུས་མི་བཅུ་བཞིས་རྒྱ་གཞུང་གིས་བོད་མི་སྐད་ཡིག་སྲུང་སྐྱོབ་ལས་འགུལ་བ་བཀྲིས་དབང་ཕྱུག་ལགས་ལ་རྒྱལ་སྤྱིའི་ཁྲིམས་ཀྱི་འབྲུ་དོན་ལྟར་དྲང་བདེན་དང་ཕྱི་གསལ་ནང་གསལ་གྱི་ཁྲིམས་བཤེར་དགོས་པ་མ་ཟད། ལྷག་དོན་དུ་ཁོང་གི་ཐུགས་འདོད་ལྟར་ཁྲིམས་རྩོད་པ་གླ་རྒྱུ་དང་རང་ཉིད་ཀྱི་ནང་མི་དང་ལྷན་རྒྱུན་ལྡན་བཞིན་ཐུག་འཕྲད་གནང་བཅུག་དགོས་པའི་ཞུ་འབོད་གནང་འདུག དེའང་ཕ་རན་སིའི་གྲོས་ཚོགས་གོང་མའི་ནང་གི་བོད་དོན་ཚོགས་ཆུང་གི་ཚོགས་གཙོ་སྐུ་ཞབས་ Michel Raison ལགས་ཀྱི་མཚན་ཐོག་ཏུ་ཁ་སང་ཕྱི་ཚེས་ ༢༣ ཉིན་སྤྱི་བསྒྲགས་ཤིག་འདོན་སྤེལ་གནང་ཡོད་པ་དང། དེའི་ཐོག་སྐུ་ཞབས་ Raison ལགས་དང་ཚོགས་གཙོ་གཞོན་པ་ Annick Billon ལགས། Patricia Morhiet-Richaud ལགས། Andre Gattolin ལགས་བཅས་དབུས་པའི་ཁྱོན་གྲོས་ཚོགས་འཐུས་མི་ ༡༤ ནས་རྒྱབ་སྐྱོར་མཚན་རྟགས་བཀོད་འདུག གཞི་རྩའི་བཀྲིས་དབང་ཕྱུག་ལགས་ལ་འདི་ལོ་ཟླ་ ༡ ཚེས་ ༤ ཉིན་རྒྱ་གཞུང་གིས་དབྱེ་བའི་མཚོ་སྔོན་ཞིང་ཆེན་ཡུལ་ཤུལ་འབྲིང་རིམ་མི་དམངས་ཁྲིམས་ཁང་དུ་ཁོང་གི་ནག་ཉེས་དང་འབྲེལ་གཏུགས་བཤེར་ཚོུད་ ༤ ཙམ་གནང་ཡོད་ཀྱང་ཁྲིམས་ཁང་ནས་སྐབས་དེར་ཁོང་གི་གྱོད་གཞིའི་ཐོག་ཐག་གཅོད་གང་ཡང་བྱུང་མེད་པ་མ་ཟད། དེ་ཉིན་ཨ་རི་དང་འཇར་མ་ནི། དབྱིན་ཡུལ། ཁེ་ན་ཌ། དེ་བཞིན་ཡུ་རོབ་མཐུན་ཚོགས་བཅས་ཀྱི་གཞུང་ཚབ་ལས་ཁང་ནས་བཀྲིས་དབང་ཕྱུག་ལགས་ཀྱི་གཏུགས་བཤེར་ཐོག་བཅར་རྒྱུའི་ཆེད་དུ་ཡུལ་ཤུལ་བར་ཕེབས་ཡོད་ཀྱང་རྒྱ་གཞུང་གིས་ཁྲིམས་བཤེར་དངོས་ཀྱི་ཐོག་བཅར་བཅུག་མེད་པ་རེད། ཕ་རན་སིའི་གྲོས་ཚོགས་གོང་མའི་འཐུས་མི་ ༡༤ རྣམས་ཀྱིས་སྤེལ་བའི་སྤྱི་བསྒྲགས་དེའི་ནང་དེ་སྔོན་ཕྱི་ལོ་ ༢༠༡༦ ཟླ་ ༡༢ ཚེས་ ༡༠ ཉིན་མོ་སྟེ་རྒྱལ་སྤྱིའི་འགྲོ་བ་མིའི་ཐོབ་ཐང་ཉིན་མོ་དང་བསྟུན་ཡོ་རོབ་མཐུན་ཚོགས་ཚོགས་མི་རྒྱལ་ཁབ་ ༢༨ སོ་སོའི་རྒྱ་ནག་གི་གཞུང་ཚབ་རྣམས་ནས་བཀྲིས་དབང་ཕྱུག་ལགས་གློད་བཀྲོལ་དགོས་པའི་ཡོངས་ཁྱབ་སྤྱི་བསྒྲགས་སྤེལ་ཡོད་པ་མ་ཟད་སྔ་ལོའི་ཟླ་ ༢ པའི་ནང་མཉམ་འབྲེལ་རྒྱལ་ཚོགས་གྱི་དམིགས་བསལ་རྟོག་ཞིབ་པ་ལྔ་དང་གཞན་ཡང་རྒྱལ་ཚོགས་ཀྱི་གང་བྱུང་བཀག་ཉར་རྟོག་ཞིབ་ལས་དོན་ཚོགས་ཆུང་ནས་ཀྱང་ཁོང་ལ་སེམས་འཚབ་ཡོད་སྐོར་གསུངས་ཡོད་པ་ལུང་འདྲེན་དང་འབྲེལ། ཕ་རན་སི་གྲོས་ཚོགས་ནང་གི་བོད་དོན་ཚོགས་ཆུང་གིས་ཀྱང་དེ་དག་ལ་རྒྱབ་སྐྱོར་ཞུ་རྒྱུ་མ་ཟད། རྒྱ་གཞུང་གི་ངོས་ནས་ད་རེས་བཀྲིས་དབང་ཕྱུག་ལགས་སུ་རྒྱལ་སྤྱིའི་ཁྲིམས་ཀྱི་འབྲུ་དོན་བཞིན་དྲང་བདེན་དང་ཕྱི་གསལ་ནང་གསལ་གྱི་ཁྲིམས་བཤེར་བྱེད་དགོས་ཞེས་གསུངས་འདུག

བོད་མིའི་བླ་ན་མེད་པའི་དབུ་ཁྲིད་༸གོང་ས་༸སྐྱབས་མགོན་ཆེན་པོ་མཆོག་གིས་ཁ་སང་དང་དེ་རིང་བཅས་སུ་གནས་མཆོག་རྡོ་རྗེ་གདན་དུ་ཆེད་དུ་བྱ་བའི་འདུལ་བྱ་རྒྱ་རིགས་དད་ལྡན་པ་ཁག་གཅིག་ལ་ཉིན་གཉིས་རིང་རྡོ་རྗེ་གཅོད་པའི་བཀའ་ཁྲིད་དང་ལྷ་མོ་དབྱངས་ཅན་མའི་རྗེས་གནང་བཀྲིན་བསྩལ་ཡོད་པ་རེད། དེ་རིང་སྔ་ཐོག་ཚོུད་ ༡༡ སྟེང་མགོན་པོ་མཆོག་གིས་ཆོས་འབྲེལ་ཡོངས་སུ་ལེགས་གྲུབ་ཀྱིས་ཆེད་དུ་དམིགས་ནས་ཕེབས་པའི་རྒྱ་རིགས་དད་ལྡན་ཆོས་གྲོགས་རྣམས་ལ་ཡུམ་དབྱངས་ཅན་མ་དང་ཡབ་རྗེ་བཙུན་འཇམ་དཔལ་དབྱངས་གཉིས་པོ་སྒྲུབ་ཐུབ་ཚེ་ཤེས་རབ་གོང་ནས་གོང་དུ་འཕེལ་རྒྱུའི་ཁྱད་པར་ཡོད་པ་དང་། ལྷག་པར་མགོན་པོ་མཆོག་གིས་རྒྱ་ནག་དེ་རྗེ་བཙུན་འཇམ་དཔལ་དབྱངས་དང་དམིགས་བསལ་འབྲེལ་བ་ཡོད་པ་ཞིག་ཆགས་ཀྱི་ཡོད་སྟབས་བྱིན་རླབས་ཁྱད་པར་བ་ཡོད་པ་དང་། ༸གང་ཉིད་མཆོག་ནས་ཀྱང་མ་འོངས་པ་རྒྱ་ནག་རི་བོ་རྩེ་ལྔར་འཇམ་དབྱངས་ཀྱི་བྱིན་རླབས་དེ་འདྲ་བསྩལ་ཐུབ་པའི་ཐུགས་སྨོན་མཛད་བཞིན་ཡོད་ཅེས་བཀའ་གནང་འདུག རྩ་བའི་དེ་རིང་སྔ་ཐོག་༸གང་ས་མཆོག་གིས་རྒྱ་རིགས་དད་ལྡན་པ་གཙོ་བོར་གྱུར་པའི་ཕྱི་ནང་གི་ཆོས་ཞུ་བ་ཁྲི་ཚོ་ཁ་ཤས་ལ་རྡོ་རྗེ་གཅོད་པའི་བཀའ་ཆོས་འཕྲོ་སྐྱོང་དང་དེ་གྲུབ་མཚམས་སུ་ལྷ་མོ་དབྱངས་ཅན་མའི་རྗེས་གནང་བཀྲིན་བསྩལ་ཡོད་པ་རེད། དེ་ཡང་སྐབས་དེར་༸གང་ཉིད་མཆོག་གིས་རྡོ་རྗེ་གཅོད་པ་ལས་གཏི་མུག་བདེན་འཛིན་གྱི་གཉེན་པོ་བདག་མེད་ལྟ་བའི་སྐོར་ལ་ལམ་སྟོན་བཀའ་བསྩལ་ཡོད། གཞི་རྩའི་༸གོང་ས་༸སྐྱབས་མགོན་ཆེན་པོ་མཆོག་ནས་ཟླ་བ་འདིའི་ཕྱི་ཚེས་ ༥ ནས་འགོ་འཛུགས་ཀྱི་དེ་རིང་བར་ཆོས་འབྲེལ་མི་འདྲ་བ་ཁག་བཞི་བཀྲིན་བསྩལ་ཡོད་པ་ལྟར། དེ་རིང་ཉིན་མཐའ་མའི་སྟེང་མགོན་པོ་མཆོག་གིས་ཕྱི་ནང་གི་དད་ལྡན་པ་ཀུན་ལ་ཆོས་འབྲེལ་མང་དག་ཐོབ་རྗེས་གཙོ་བོ་སྟོང་ཉིད་ཀྱི་ལྟ་བ་དང་གཞན་གཅེས་པའི་བྱང་ཆུབ་ཀྱི་སེམས་ཐོག་ལ་དོ་སྣང་ཤུགས་ཆེ་ཙམ་གནང་ནས་ཆོས་རབ་ཏུ་རྣམ་འབྱེད་ཀྱི་ཤེས་རབ་གོང་འཕེལ་དང་སེམས་བཟང་པོའི་ཀུན་སློང་གོང་དུ་འཕེལ་ཐུབ་ན་རྡོ་རྗེ་གདན་དུ་སླེབས་རིན་ཆོག་པ་རེད་ཅེས་ཐུགས་བརྩེའི་ལམ་སྟོན་རྒྱ་ཆེ་བསྩལ་འདུག ༸གོང་ས་༸སྐྱབས་མགོན་ཆེན་པོ་མཆོག་གིས་འདས་པའི་ཉིན་གྲངས་ཉི་ཤུ་ལྷག་དེའི་ནང་གནས་མཆོག་རྡོ་རྗེ་གདན་དུ་ཐོག་མར་ནཱ་ལེནྡཱ་སློབ་གཉེར་ཁང་འམ་ Nalanda Shiksha ཞེས་པའི་རྒྱ་གར་གྱི་ཚོགས་པས་ཇི་ལྟར་གསོལ་འདེབས་ཞུས་དོན་བཞིན་༸རྒྱལ་བའི་བཀའ་འགྱུར་རིན་པོ་ཆེ་ལས་ཆོས་ཀྱི་འཁོར་ལོའི་མདོ་དང་སཱ་ལུ་ལྗང་པའི་མདོ་གཉིས་ཀྱི་ཆོས་འབྲེལ་དང་། དེའི་རྗེས་སུ་ཚེས་ ༡༤ ནས་ཉིན་གསུམ་རིང་ལ་བྱང་ཆུབ་སེམས་འགྲེལ་དང་ལག་ལེན་སོ་བདུན་མའི་བཀའ་ཆོས་དང་ལྷན་ཐུགས་རྗེ་ཆེན་པོའི་བཀའ་དབང་། ཕྱི་ཚེས་ ༡༨ ནས་ ༢༡ བར་འཇིགས་བྱེད་ལྷ་བཅུ་གསུམ་དང་། འཇིགས་བྱེད་དཔའ་བོ་གཅིག་པའི་བཀའ་དབང་བཀྲིན་བསྩལ་ཡོད་པ་རེད།

ཉེ་ལམ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་ད་ལྟའི་ཆར་རྒྱ་གར་གྱི་གནས་མཆོག་རྡོ་རྗེ་གདན་དུ་ཕྱི་ནང་གི་དད་ལྡན་ཆོས་ཞུ་བ་ཁྲི་ཚོགས་ལྷག་ལ་བཀའ་ཆོས་བཀྲིན་སྩོལ་བཞིན་པའི་ཁྲོད། ཕྱི་ཚེས་ ༡༩ ཉིན་ཕྱི་དྲོ་ས་གནས་ཉེན་རྟོག་པས་གསུང་ཆོས་རྭ་བའི་ཉེ་འཁྲིས་ནས་འབར་རྫས་གཉིས་རྙེད་སོན་བྱུང་བའི་གནས་ཚུལ་ཐོན་ཡོད་པ་རེད། འབར་རྫས་རྙེད་སོན་གྱི་གནད་དོན་དེ་དང་འབྲེལ་ཁ་ཉིན་རེས་གཟའ་ཉི་མའི་ཉིན་ལ་དྭགས་ནང་རྟེན་གཞི་བྱས་པའི་ལ་དྭགས་ནང་པའི་ཚོགས་འདུ་ལྷན་ཚོགས་དང་ལ་དྭགས་དགོན་པ་ལྷན་ཚོགས་གཉིས་ནས་སླེ་ས་གནས་ཀྱི་རྫོང་དཔོན་ Avny Lavasa ལགས་ཀྱི་བརྒྱུད་རྒྱ་གར་སྲིད་བློན་སྐུ་ཞབས་ Narindra Modi མཆོག་དང་ནང་སྲིད་བློན་ཆེན་སྐུ་ཞབས་ Rajnath Singh མཆོག དེ་བཞིན་འབྲེལ་ཡོད་བི་ཧཱར་མངའ་སྡེའི་བློན་ཆེན་སྐུ་ཞབས་ Nitish Kumar མཆོག Jammu Kashmir མངའ་སྡེའི་བློན་ཆེན་ལྕམ་ Mehbooba Mufti Sayeed མཆོག་བཅས་ཀྱི་མཚན་ཐོག་ཏུ་ཕྱག་བྲིས་ཤིག་ཕུལ་ཡོད་པ་དང་། དེའང་རྒྱ་གར་དབུས་གཞུང་དང་མངའ་སྡེ་གཞུང་ནས་གནས་མཆོག་རྡོ་རྗེ་གདན་དུ་ཡོད་པའི་ཆོས་ཞུ་བ་སྤྱི་དང་། ལྷག་ཏུ་༸གོང་ས་༸སྐྱབས་མགོན་ཆེན་པོ་མཆོག་གིསྐུ་ཕྱྭའི་སྲུང་སྐྱོབ་ཀྱི་ཉེན་སྲུང་གི་ལས་དོན་སྔར་ལྷག་ཐུགས་འགན་བཞེས་དགོས་པ་མ་ཟད། ད་རེས་ཁུལ་དེ་ནས་རྙེད་སོན་བྱུང་བའི་འབར་རྫས་ཀྱི་གནད་དོན་དེ་སྣང་མེད་དུ་མ་བཞག་པར་རྒྱ་གར་དབུས་གསང་བའི་ལས་ཁུངས་ཀྱིས་གནད་དོན་དེའི་ཐོག་ཞིབ་འཇུག་གནང་དགོས་པའི་ཞུ་གཏུག་གནང་འདུག གསར་འགོད་པས་ལ་དྭགས་ནང་པའི་ཚོགས་འདུ་ལྷན་ཚོགས་ཀྱི་དྲུང་ཆེ་བསོད་ནམས་ཟླ་བ་ལགས་སུ་ཞལ་པར་བརྒྱུད་བཅར་འདྲི་ཁག་ཅིག་ཞུས་པར་ཁོང་གིས་གནས་མཆོག་རྡོ་རྗེ་གདན་དུ་འབར་རྫས་ཀྱི་གནད་དོན་བྱུང་བ་དེ་ཐེངས་དང་པོ་ཞིག་མིན་པར་དེ་སྔ་ཕྱི་ལོ་ ༢༠༡༣ ལོར་ཁུལ་དེར་འབར་རྫས་ཀྱི་དོན་རྐྱེན་འོག་གཏོར་སྐྱོན་དང་རྨས་སྐྱོན་རིགས་བྱུང་མྱོང་ཡོད་པ་འགྲེལ་བརྗོད་དང་སྦྲགས། རྒྱ་གར་དབུས་ས་གཉིས་ནས་ཁུལ་དེའི་བདེ་འཇགས་ཀྱི་ལས་དོན་ཐོག་སྔར་ལྷག་ཐུགས་འཁུར་བཞེས་དགོས་གནད་ཡིན་པ་སོགས་གསུངས་ཡོད། ད་དུང་ཁོང་གིས་ཐེངས་འདིའི་འབར་རྫས་ཀྱི་དོན་རྐྱེན་ལ་ངོ་རྒོལ་གྱི་རྣམ་པ་མཚོན་ཆེད་ཚེས་ ༢༡ ཉིན་ལ་དྭགས་སླེ་དང་བྱང་ཐང་། དེ་བཞིན་ནུབ་ར་སོགས་ས་གནས་ཁག་གཅིག་ཏུ་ཚོང་ཁང་ཡོངས་རྫོགས་སྒོ་བརྒྱབ་ནས་མར་མེ་ཁྲོམ་སྐོར་གྱི་ལས་འགུལ་སྤེལ་གནང་ཡོད་པ་གསུངས་སོང་། གཞི་རྩའི་འབར་རྫས་ཀྱི་གནད་དོན་དེ་བྱུང་སྐབས་ཁུལ་དེར་ཡོད་པའི་འདི་རླུང་འཕྲིན་ཁང་གི་ཆེད་གཉེར་གསར་འགོད་པས་བོད་མིའི་སྒྲིག་འཛུགས་བདེ་སྲུང་དྲུང་ཆེ་ཀརྨ་རིན་ཆེན་ལགས་སུ་བཅར་འདྲི་ཞུ་སྐབས་ཁོང་གིས་ད་ལན་འབར་རྫས་གཉིས་རྙེད་སོན་བྱུང་ཡོད་པའི་གནས་ཚུལ་དེ་དངོས་འབྲེལ་ཡིན་པ་དང་། འབར་རྫས་ཀྱི་གནད་དོན་དེ་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུ་ཕྱྭར་དམིགས་པ་ཞིག་མ་རེད་ཅེས་གསུངས་པ་མ་ཟད། ད་ལྟའི་ཆར་མངའ་སྡེའི་གཞུང་ནས་༸སྐུ་ཕྱྭའི་སྲུང་སྐྱོབ་ཀྱི་ཉེན་སྲུང་ཚད་མཐོ་རུ་བཏང་ཡོད་སྟབས་བོད་མི་གཙོས་པའི་ཕྱི་ནང་གི་དད་ལྡན་མང་ཚོགས་རྣམས་ནས་བློ་འཚབ་མ་གནང་རོགས་ཞེས་འབོད་སྐུལ་གནང་ཡོད་པ་རེད།