དཔྱད་ཞིབ་པས་ནད་རླབས་གསུམ་པ་དེ་བྱིས་པ་ཚོར་ཉེན་ཁ་ཆགས་སྲིད་ཀྱི་རེད་ཅེས་གསུངས་ཀྱི་ཡོད་པ་ལྟར། ད་ཆ་ Covaxin སྔོན་ཁབ་དེ་ལོ་ན་ ༢ ནས་ ༡༨ ཀྱི་བྱིས་པ་ཚོར་ཛ་དྲག་ཆེད་བེད་སྤྱོད་གཏོང་རྒྱུར་བཀའ་ཁྲོལ་གནང་འདུག 
ཁ་སང་བོད་མིའི་སྒྲིག་འཛུགས་ཀྱི་ COVID19 ཛ་དྲག་ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐེངས་ ༨༡ པའི་ཐོག་འཕྲོད་བསྟེན་ལས་ཁུངས་ཀྱི་དྲུང་གཞོན་བསྟན་འཛིན་ཀུན་བཟང་ལགས་ཀྱིས། ད་ཆར་ཏོག་དབྱིབས་གཉན་རིམས་ཀྱི་གནས་སྟངས་ཇེ་བཟང་དུ་འགྲོ་བཞིན་ཡོད་ཀྱང་དེ་སྔ་ནད་རླབས་གཉིས་པ་ལས་སློབ་གསོ་བླངས་ཏེ་ལྷག་པར་ཐུགས་གཟབ་གནང་གལ་ཡིན་པ་གསུངས་སོང་ལ། ལྷག་པར་འདི་ལོ་དགུན་ཚོང་ལ་ཕེབས་མཁན་བོད་མི་རྣམས་ནས་ཏོག་དབྱིབས་གཉན་རིམས་ཁྱབ་གདལ་འགོག་ཐབས་ཀྱི་ལམ་སྟོན་ཁག་མུ་མཐུད་བསྟེན་གནང་གལ་ཡིན་པ་མ་ཟད། ད་ཆ་རིམ་པས་སློབ་གྲྭ་ཁག་འགོ་འཛུགས་ངེས་ཡིན་སྟབས། སློབ་ཕྲུག་ཚོ་འདུ་འཛོམས་ཆེ་སར་རླུང་འགྲོ་ཡག་པོ་དགོས་གལ་དང་སློབ་གྲྭའི་དགེ་ལས་ཚོའི་ཏོག་དབྱིབས་སྔོན་འགོག་ཐད་ལམ་སྟོན་ཡང་ཡང་གནང་རོགས་བཅས་དོན་ཚན་ལྔ་གསུངས་སོང་།
ཛ་དྲག་ལས་དོན་ཚོགས་ཆུང་གི་གསར་འགོད་འབྲེལ་མཐུད་པ་གསོ་རིག་སྨན་པ་ཚེ་རིང་མཚམས་གཅོད་ལགས་ཀྱིས་གཟའ་འཁོར་འདིའི་ནང་ཁྱོན་ནད་གཞི་ཕོག་མཁན་མི་གྲངས་ ༥༥ དང་དེའི་ཁྲོད་དགུང་ལོ་བགྲེས་ཤོས་དེ་ ༩༣ དང་ཆུང་ཤོས་དེ་ ༢༢ ཡིན་པ་དང་། ནད་ཡམས་རྐྱེན་གྱིས་སྐྱེས་མ་རང་ལོ་ ༨༨ སོན་པ་ཞིག་གཅིན་སྙིའི་ནད་གཞི་ཡོད་པ་ཞིག་འདས་གྲོངས་སུ་གྱུར་ཡོད་པ་བཅས་ཁྱོན་རྒྱ་བལ་གཉིས་ནང་ད་བར་ནད་གཞི་ཕོག་པ་དེ་ ༦༦༦༨ དང་དྲག་སྐྱེད་སོང་བ་ ༦༤༡༧ ནད་ཡམས་རྐྱེན་གྱིས་འདས་གྲོངས་སོང་བ་བོད་མི་ ༡༥༢ དང་ད་ཆ་ནད་ཀྱིས་མནར་བཞིན་པ་དེ་ ༩༩ ཡོད་པ་གསུངས་བ་དང་ཆབས་ཅིག ནད་རྟགས་རིགས་མངོན་སྐབས་ངེས་པར་དུ་བརྟག་དཔྱད་དང་ཟུར་བཀག་གནང་རོགས་ཞེས་བསྐྱར་ནན་གནང་སོང་།
དེ་བཞིན་ཁོང་གིས་སྔོན་ཁབ་དང་འབྲེལ། རྒྱ་གར་ནང་ད་བར་ཏོག་དབྱིབས་སྔོན་འགོག་སྨན་ཁབ་རིམ་པ་གཉིས་ཀ་ཐོབ་པའི་བོད་མི་གྲངས་འབོར་དེ་༣༩༩༨༤ དང་རིམ་པ་དང་པོ་ཐོབ་པ་དེ་ ༡༡༤༦༧ དང་ཕྱོགས་མཚུངས་བལ་ཡུལ་ཁུལ་དུ་སྔོན་ཁབ་གཉིས་ཀ་ཐོབ་ཟིན་པ་དེ་ ༦༦༩༧ དང་རིམ་པ་དང་པོ་ཐོབ་པ་དེ་ ༥༡ ཆགས་ཀྱི་ཡོད་པ་གསུངས་སོང་། ཆབས་ཅིག་རྒྱ་གར་ནང་བྱིས་པ་ལོ་གཉིས་ནས་བཅོ་བརྒྱད་དབར་སྔོན་ཁབ་གང་མྱུར་བསྐྱོན་རྒྱུ་ཡིན་པས་འབྲེལ་ཡོད་སློབ་གྲྭའི་འགན་འཛིན་དང་སློབ་སྤྱི། ཕ་མ་རྣམས་ཀྱིས་ངེས་པར་དུ་ཐུགས་སྣང་གནང་རོགས་ཞེས་གསུངས་སོང་།
མ་ཟད་གསར་འགོད་གསལ་བསྒྲགས་ཐོག་ཕྱི་ལུགས་སྨན་པ་བསྟན་འཛིན་བརྩོན་འགྲུས་ལགས་ཀྱིས་ད་ཆ་རྒྱ་གར་ནང་ནད་ཡམས་དང་འབྲེལ་གནས་སྟངས་ཇེ་བཟང་འགྲོ་མུས་ཡིན་པ་དང་སྒོས། རང་རེའི་བོད་པའི་སྤྱི་ཚོགས་ཁྲོད་དཀའ་ངལ་ཆེ་བ་དེ་མོན་གྷོ་དང་སྦེལ་ཀོབ་གཉིས་ཆགས་ཀྱི་འདུག་པས་མང་ཚོགས་ནས་ནད་རྟགས་རིགས་ཐོན་སྐབས་གང་མགྱོགས་མགྱོགས་དང་གང་མང་མང་བརྟག་དཔྱད་གནང་གལ་ཡིན་པའི་ཐད་ཐུགས་འགན་བཞེས་རོགས་ཞེས་འབོད་སྐུལ་ཞུས་སོང་།
དེ་བཞིན་ད་དུང་རྒྱ་གར་ནང་བྱིས་པ་ལོ་ ༢ ནས་ ༡༨ བར་ Covaxin འགོག་ཁབ་དེ་བཞིན་ཛ་དྲག་ཆེད་བེད་སྤྱོད་གཏོང་རྒྱུ་ཡིན་ནའང་ད་ཆ་ Drug Controller General of India ནས་བཀའ་ཁྲོལ་ཐོབ་མེད། འོན་ཀྱང་སྔོན་ཁབ་སོགས་ཀྱི་གྲ་སྒྲིག་ཚགས་ཚུད་སླད་ད་ལྟ་ནས་སློབ་གྲྭ་དང་དགོན་སྡེ་གྲྭ་ཚང་ནས་བྱིས་པ་ཚོའི་གྲངས་ཐོ་བསྡུ་རུབ་གནང་རོགས་ཞེས་གསུངས་སོང་།
