དེ་རིང་གཅེར་བུ་བའི་བླ་ཆེན་ Acharya Dr. Lokesh Muni མཆོག་དང་ཧིཾ་དྷཱུའི་བླ་ཆེན་ Maha Mandleshwar Mahant Naval Kishore Das མཆོག སིག་བླ་ཆེན་ Jathedar Bhai Ranjit Singh མཆོག་བཅས་རྒྱ་གར་གྱི་ཆོས་ལུགས་ཆེ་ཁག་གསུམ་གྱི་དབུ་ཁྲིད་ནས་དེ་རིང་བཞུགས་སྒར་༸རྒྱལ་བའི་ཕོ་བྲང་དུ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཟུར་མཇལ་ཞུས་པ་དང་སྦྲགས་ཏེ་མགོན་པོ་༸གང་ཉིད་མཆོག་ལ་རིང་མིན་རྒྱལ་ས་ལྡི་ལིར་འཚོགས་གཏན་ཁེལ་བའི་ཆོས་ལུགས་རིས་མེད་ཀྱི་ཚོགས་ཆེན་གྱི་ཚོགས་མགོན་དུ་དབུ་བཞུགས་མཛད་གནང་ཡོང་བའི་གདན་ཞུ་གསོལ་འདེབས་ཞུས་འདུག
དེ་རིང་སྔ་དྲོའི་ཟུར་མཇལ་ལེགས་གྲུབ་ཟིན་མཚམས་སུ་ཆོས་ལུགས་བླ་ཆེན་རྣམས་ཀྱིས་གསར་འགོད་པའི་བཅར་འདྲིར་དང་ལེན་གནང་སྟེ་གཅེར་བུ་བའི་བླ་ཆེན་ Acharya Dr. Lokesh Muni མཆོག་གིས་དེང་སྐབས་འཛམ་གླིང་གི་གནས་སྟངས་སྤྱི་དང་ཆོས་ལུགས་དབར་འགལ་ཟླ་སོགས་ཀྱི་དཀའ་རྙོག་རིམ་འཕྲད་ཁྲོད་ཆོས་ལུགས་རིས་མེད་ཀྱི་ལྷན་ཚོགས་ཤིག་བསྐོང་ཚོགས་གནང་གལ་ཆགས་ཡོད་པ་ལྟར་། Ahimsa Vishwa Bharti ཞེས་པའི་འཚེ་མེད་ཞི་བའི་ཚོགས་པས་རིང་མིན་རྒྱ་གར་གྱི་རྒྱལ་ས་ལྡི་ལིར་རྒྱལ་སྤྱིའི་ཆོས་ལུགས་རིས་མེད་ཀྱི་ཚོགས་ཆེན་ཞིག་གོ་སྒྲིག་གནང་རྒྱུ་ཡིན་པ་དང་། ཚོགས་ཆེན་གྱི་ཚོགས་མགོན་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཆིབས་བསྒྱུར་བཀའ་དྲིན་བསྐྱང་གནང་ཡོང་བའི་གསོལ་འདེབས་ཇི་ལྟར་ཞུས་པ་བཞིན་མགོན་པོ་༸གང་ཉིད་མཆོག་གིས་བཀའ་བཞེས་བཟང་པོ་སྨིན་སྩལ་མཛད་སོང་ཞེས་གསུངས་སོང་།
ཁོང་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནི་ནང་པའི་དགེ་སློང་དཀྱུས་མ་ཞིག་མིན་པར་རྒྱལ་སྤྱིའི་ཁྱོན་ཡོངས་ནས་གུས་བརྩི་དང་གདེང་འཇོག་ཆེན་པོ་ཞུ་ཡུལ་གྱི་སྐྱེས་བུ་དམ་པ་ཞིག་ཡིན་སྟབས་༸གོང་ས་མཆོག་ཚོགས་ཆེན་ཐོག་དབུ་བཞུགས་མཛད་དེ་ཞི་བདེའི་བརྡ་ལན་གང་མཛད་པ་དེ་དག་རྒྱལ་སྤྱིའི་ཁྱོན་ཡོངས་སུ་ཁྱབ་སྤེལ་ངེས་ཡིན་པར་མ་ཟད། འགྲོ་བ་མིའི་ཡོན་ཏན་གྱི་རིན་ཐང་གོང་འཕེལ་འགྲོ་བར་ཐུགས་ཕན་གསོས་པ་ཞིག་བྱུང་རྒྱུ་ཡིན་པ་གསུངས་ཡོད།
འཚེ་མེད་ཞི་བའི་ཚོགས་པས་རྒྱལ་ས་ལྡི་ལིར་ཞི་བདེའི་སློབ་སྟོན་ཁང་ཞིག་གསར་རྒྱག་གནང་བཞིན་ཡོད་པ་དང་། དེའི་ནང་བྱིས་པ་དང་གཞོན་སྐྱེས། བུད་མེད། སྨན་པ་བཅས་ལ་ཞི་བདེ་སྐོར་གྱི་སློབ་ཁྲིད་གནང་རྒྱུ་ཡིན་པ་ལྟར་༸གོང་ས་མཆོག་ཚོགས་ཆེན་ཐོག་ཆིབས་བསྒྱུར་བཀའ་དྲིན་མཛད་སྐབས་ལྟེ་གནས་ཁང་དེར་གཟིགས་ཞིབ་མཛད་ཀྱི་ཡོད་སྐོར་གསུངས་སོང་།
ཁོང་གིས་ Ahimsa Vishwa Bharti ཚོགས་པའི་ངོས་ནས་ཚོགས་ཆེན་དང་བསྟུན་༸གོང་ས་མཆོག་ལ་རྒྱལ་སྤྱིའི་འཚེ་མེད་ཞི་བའི་གཟེངས་རྟགས་ཤིག་འབུལ་ལམ་ཞུ་རྒྱུ་ཡིན་སྐོར་གསུངས་ཡོད།
རྒྱ་གར་གྱི་ཆོས་ལུགས་ཆེ་ཁག་གསུམ་གྱི་དབུ་ཁྲིད་རྣམ་པ་བཞུགས་སྒར་དྷརྨ་སཱ་ལཱར་ཕེབས་འབྱོར་སྐབས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད་པ་ལྟར། ཁ་སང་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་ཚོགས་གཞོན་སྒྲོལ་མ་ཚེ་རིང་མཆོག་རྣམ་གཉིས་དང་མཇལ་འཕྲད་གནང་ཡོད་པར་མ་ཟད། གྲོས་ཚོགས་ཀྱི་ཚོགས་ཁང་དང་བོད་ཀྱི་འགྲེམས་སྟོན་ཁང་སོགས་ལ་གཟིགས་སྐོར་གནང་ཡོད།