Tibetan Royal Year of 2151 | Year of the Wood Dragon

- Advertisement -spot_img

TAG

ཐེ་ཝན་ནང་དུ་བོད་དོན་དྲིལ་བསྒྲགས་ཀྱི་རྐང་འཁོར་སྐོར་སྐྱོད་ལས་འགུལ་དབུ་འཛུགས།

ཐེ་ཝན་ནང་དུ་བོད་དོན་དྲིལ་བསྒྲགས་ཀྱི་རྐང་འཁོར་སྐོར་སྐྱོད་ལས་འགུལ་དབུ་འཛུགས།

བོད་དང་ཐེ་ཝན་གྱི་འགྲོ་བ་མིའི་ཐོབ་ཐང་འབྲེལ་མཐུད་ཁང་གི་འགན་འཛིན་བཀྲ་ཤིས་ཚེ་རིང་ལགས་ཀྱི་གོ་སྒྲིག་གི་འོག   ཐེ་ཝན་ཁུལ་དུ་ཁ་སང་ནས་དབུ་འཛུགས་ཀྱིས་ཟླ་བ་རྗེས་མའི་གསུམ་བཅུའི་དུས་དྲན་བར་བར་དུ་རེས་གཟའ་ལྷག་པ་འཆར་ཅན་གྱི་བོད་དོན་དྲིལ་བསྒྲགས་ཀྱི་རྐང་འཁོར་སྐོར་སྐྱོད་ཀྱི་ལས་འགུལ་ཞིག་དབུ་འཛུགས་གནང་འདུགཁ་སང་གི་རྐང་འཁོར་སྐོར་སྐྱོད་ཀྱི་ལས་འགུལ་གྱི་ཉིན་དང་པོའི་ཐོག ཐེ་ཝན་ནང་ཡོད་པའི་བོད་མི་དང་ཐེ་ཝན་གྲོས་ཚོགས་ཀྱི་འཐུས་མི། ཐེ་ཝན་དང་ཧོང་ཀོང་གི་བོད་དོན་རྒྱབ་སྐྱོར་བ་སོགས་མི་སྣ་ཁག་ཅིག་མཉམ་ཞུགས་ཐོག་གསར་འགོད་ལྷན་ཚོགས་ཤིག་སྐོང་ཚོགས་ཀྱིས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཀྱི་ཐད་ནས་གཏམ་བཤད་སྤེལ་རྗེས་ལས་འགུལ་དངོས་སུ་དབུ་འཛུགས་གནང་འདུགའདི་ག་རླུང་འཕྲིན་ཁང་གིས་ལས་འགུལ་འདི་གོ་སྒྲིག་ཞུ་མཁན་བོད་དང་ཐེ་ཝན་གྱི་འགྲོ་བ་མིའི་ཐོབ་ཐང་འབྲེལ་མཐུད་ཁང་གི་འགན་འཛིན་བཀྲིས་ཚེ་རིང་ལགས་སུ་ཁ་པར་གྱི་ལམ་ནས་བཀའ་འདྲི་ཞུས་པར་ཁོང་གིས་རྩ་བའི་ལས་འགུལ་དེ་ཕྱི་ལོ་ ༢༠༡༡ ལོར་ཁོང་མི་སྒེར་གྱིས་དབུ་འཛུགས་གནང་བ་ཞིག་ཡིན་ཞིང་། དམིགས་ཡུལ་གཙོ་བོ་ཐེ་ཝན་དུ་ཡོད་པའི་རྒྱ་རིགས་ཀྱི་ཡུལ་སྐོར་སྤྲོ་འཆམ་པ་དང་སློབ་མ་རྣམས་ལ་བོད་མིའི་སྒྲིག་འཛུགས་ཀྱི་སྲིད་བྱུས་དང་འབྲེལ་བའི་བོད་དོན་ངོ་སྤྲོད་དང་དྲིལ་བསྒྲགས་ཀྱི་ལས་འགུལ་ཞིག་ཆགས་ཡོད་ཀྱང་། ད་ཆ་ཁོང་སྒེར་ཙམ་མིན་པར་ལས་འགུལ་དེར་བོད་མི་དང་ཐེ་ཝན་གྱི་གཞུང་འབྲེལ་མི་སྣ་སོགས་ཀྱིས་དོ་སྣང་ཆེན་པོས་འཛུལ་ཞུགས་ཀྱིས་བོད་དོན་དྲིལ་བསྒྲགས་ལ་ཤུགས་སྣོན་བྱེད་བཞིན་པ་ཞིག་ཡིན་པར་ངོ་སྤྲོད་གནང་སོང་། དེ་བཞིན་ཁོང་གིས་ཁ་སང་གི་ལས་འགུལ་དབུ་འཛུགས་སྐབས་ཀྱི་གསར་འགོད་བསྒྲགས་གཏམ་གྱི་བརྗོད་བྱ་གཙོ་བོ་དེ་ནི་རྒྱ་ནག་གིས་བོད་ས་ཞི་བའི་བཅིངས་གྲོལ་ཞེས་པ་བཏང་ནས་ལོ་ངོ་བདུན་ཅུ་འགྲོ་མུས་ཡིན་ཡང་། རྒྱ་ནག་དམར་ཤོག་སྲིད་གཞུང་གི་དྲག་གནོན་གྱི་སྲིད་བྱུས་ཀྱི་འོག་ཏུ། བོད་ནང་གི་ཆོས་དང་རིག་གཞུང་རྩ་གཏོར་ཐེབས་པ་མ་ཟད། འགྲོ་བ་མིའི་ཐོབ་ཐང་ལ་རྡོག་རོལ་ཚབས་ཆེན་གཏོང་གི་ཡོད་པ་དང་འབྲེལ་ནས། བོད་ཙམ་མིན་པར་རྒྱ་ནག་གི་དབང་སྒྱུར་འོག་གི་གྲངས་ཉུང་མི་རིགས་སྤྱི་ཡོངས་ཀྱི་གནས་བབ་ཉམས་དམས་སུ་འགྲོ་བཞིན་པ་ཞིག་ཡིན་སྟབས་ཐེ་ཝན་ཁུལ་གྱི་མང་ཚོགས་ཀྱིས་གནད་དོན་དེ་མཁྱེན་པའི་ཐོག་ནས་བོད་དང་གྲངས་ཉུང་མི་རིགས་གཞན་ཁག་གི་གནས་བབ་ལ་རྒྱབ་སྐྱོར་དགོས་བ་སོགས་ཡིན་པར་གསུངས་སོང་། གཞན་ཡང་ཁོང་གིས་འདི་ལོར་ཏོག་དབྱིབས་རིམས་ནད་ཀྱི་རྐྱེན་གྱིས་རྒྱ་ནག་སྐམ་ས་ཆེན་པོའི་ཡུལ་སྐོར་སྤྲོ་འཆམ་དེ་འདྲ་མང་པོ་མེད་ཀྱང་། ཐེ་ཝན་ནི་སྤྱི་ཡོངས་ཀྱི་ཆ་ནས་རྒྱ་ཡིག་རྒྱ་སྐད་ཤུགས་ཆེར་སྤྱོད་སའི་རང་དབང་དང་མང་གཙོའི་ས་ཁུལ་ཞིག་ཆགས་ཡོད་སྟབས། ལས་འགུལ་གྱི་ཆེ་ཆུང་ལ་མ་ལྟོས་བར་གནས་ཚུལ་གང་ཞིག་ཕྱིར་ཐོན་ཡང་གཙོ་བོ་རྒྱ་ཡིག་རྒྱ་སྐད་ཀྱི་ལམ་ནས་ཕྱིར་བསྒྲགས་བྱེད་ཀྱི་ཡོད་དུས། རྒྱ་ནག་གི་སྐམ་ས་ཆེན་པོའི་མི་མང་དཀྱུས་མ་རྣམས་ཀྱི་ཁྲོད་དུ་བོད་དོན་དང་འབྲེལ་བའི་གནས་ཚུལ་ཁྱབ་སྤེལ་བྱེད་ཐུབ་པ་ཞིག་ཡིན་ཙང་།  ལོ་རྟག་པར་སུམ་བཅུའི་དུས་དྲན་མ་བསླེབ་བར་དུ་ཟླ་གཅིག་གི་རིང་ལ་རྐང་འཁོར་སྐོར་སྐྱོད་ཀྱི་ལས་འགུལ་དེ་སྤེལ་མུས་ཡིན་པར་གསུངས་སོང་། གཞི་རྩའི་ཐེངས་འདིའི་རྐང་འཁོར་སྐོར་སྐྱོད་ཀྱི་ལས་འགུལ་དེ་ཟླ་གཅིག་གི་རིང་ལ་རེས་གཟའ་ལྷག་པ་འཆར་ཅན་ལ་སྤེལ་རྒྱུ་ཡིན་པ་དང་། གཙོ་བོ་རྒྱ་ནག་སྐམ་ས་ཆེན་པོའི་མི་མང་འདས་སྡོད་ཀྱི་ས་ཁུལ་དང་། རྒྱ་ནག་གི་དངུལ་ཁང་གི་ས་ཚིགས། དེ་བཞིན་ཁུལ་དེའི་གྲོང་ཁྱེར་ཆེ་ཁག་ལ་ཆེད་ཕེབས་ཀྱིས་བོད་དོན་དྲིལ་བསྒྲགས་ཀྱི་སྐོར་སྐྱོད་གནང་རྒྱུ་རེད་འདུག

Latest news

- Advertisement -spot_img