ཉེ་ལམ་ཟླ་བ་འདིའི་ཚེས་ ༢༥ ཉིན་སུད་སི་ནང་དུ་༸དཔལ་རྒྱལ་དབང་ཀརྨ་པ་ཨོ་རྒྱན་འཕྲིན་ལས་རྡོ་རྗེ་རིན་པོ་ཆེ་མཆོག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མཇལ་འཕྲད་ཞུས་ཡོད་པ་དང་བསྟུན། དེ་རིང་ཕྱི་ཚེས་ ༢༩ ཉིན་རྒྱལ་དབང་ཀརྨ་པ་སྐུ་ཉིད་ཀྱི་ངོ་དེབ་ཐོག་མཇལ་འཕྲད་སྐབས་ཡིད་ལ་གདུང་བ་དང་། བཀའ་དྲིན་དྲན་པའི་བསམ་པ་གཉིས་ཕན་ཚུན་འགྲན་པ་བཞིན་དུ་སྐྱེ་བ་ཞིག་བྱུང་སྐོར་བཀའ་སྩལ་དང་འབྲེལ། ༸གོང་ས་མཆོག་གིས་སྐུ་ཚེ་འདིར་ཐུགས་ལ་ཅི་བཞེད་པའི་དགོངས་པ་མཐའ་དག་འཕྲལ་དང་མྱུར་དུ་སྒྲུབ་དགོས་པ་ལས། ཕྱིར་བཤོལ་དང་ལྷོད་གཡེང་བྱེད་པའི་དུས་ཚོད་མེད་པ་དང་། བོད་མི་རྣམས་མཐུན་ལམ་གནང་དགོས་གལ་ཡིན་ཞིང་། ཆོལ་ཁ་དང་ཆོས་ལུགས། ལྟ་བ་ལངས་ཕྱོགས་ཇི་འདྲ་ཡིན་རུང་བོད་སྤྱི་ཡི་ཕན་བདེའི་དོན་དུ་ཆེ་བཞག་ཆུང་བསྐྱུར་བྱ་དགོས་གལ་ཡིན་པའི་ལམ་སྟོན་བཀའ་དྲིན་ཆེ་བ་སྩལ་འདུག མ་ཟད་ད་ནི་༸གོང་ས་མཆོག་གི་སྐུ་ནའི་བབས་དང་། སྐུ་གཟུགས་ཀྱི་གནས་སྟངས་སོགས་ལ་གཞིགས་ན་སྐུ་ངལ་གསོ་རྒྱུ་དང་། སྐུའི་འཕྲོད་གཞེས་གནང་རྒྱུ་ལས་ལྷག་པའི་དོན་ཆེན་ཞིག་མེད་པས། དེ་ལ་རང་གཞན་ཚང་མས་བསམ་ཤེས་དང་དོ་ཁུར་ངེས་པར་མཛད་དགོས་པར་འདུག་ཅེས་བཀའ་སྩལ་འདུག
དེ་ཡང་༸དཔལ་རྒྱལ་དབང་ཀརྨ་པ་ཨོ་རྒྱན་འཕྲིན་ལས་རྡོ་རྗེ་རིན་པོ་ཆེ་མཆོག་གི་ངོ་དེབ་ཐོག ད་ལམ་སུད་སིའི་གྲོང་ཁྱེར་ཛུ་རིག་ཏུ་༧སྐྱབས་མགོན་དོན་གྱི་བདག་པོའི་དགྱེས་ཞལ་སླར་ཡང་མཇལ་ནས། གསུང་གི་བདུད་རྩི་མཉན་པའི་སྐལ་བཟང་མངོན་དུ་གྱུར་པས་ཡིད་ལ་དགའ་སྐྱོ་ཟུང་འབྲེལ་གྱི་ཉམས་ཤིག་སྐྱེས། ནམ་རྒྱུན་བརྙན་འཕྲིན་སོགས་ནས་མཇལ་བ་དང་མི་འདྲ་བར་ད་རེས་ཞལ་གྱི་དཀྱིལ་འཁོར་དངོས་སུ་མཇལ་སྐབས་སྐུ་བགྲེས་ཉམས་ཆེ་ཞིང་། ཐ་ན་ཞལ་འཕྲོས་མཛད་དུས་ཀྱང་གསུང་ཤུགས་ཞན་པ་སོགས་སྔར་དང་གཏན་ནས་མི་འདྲ་བས་བློས་མི་བཟོད་པ་ཆེན་པོ་བྱུང་ཞིང་། ༧མགོན་པོ་གང་གིས་སྐུ་གསུང་ཐུགས་ཀྱི་ཟུངས་སྟོབས་ཡོད་ཚད་ངེད་ཅག་གི་དོན་དུ་བཏང་ནས། ད་ལྟ་སྐུ་ལུས་ཉམ་ཆུང་བ་འདི་ལྟ་བུ་ཞིག་ཏུ་གྱུར་པ་དེས་ཡིད་ལ་གདུང་བ་དང་། བཀའ་དྲིན་དྲན་པའི་བསམ་པ་གཉིས་ཕན་ཚུན་འགྲན་པ་བཞིན་དུ་སྐྱེ་བ་ཞིག་བྱུང་།
སྐུ་གཟུགས་ཀྱི་གནས་སྟངས་དང་། སྐུ་ཐང་ཆད་པའི་ཉམས་འགྱུར་དེས་གཞན་མང་པོ་ཞིག་ངག་ནས་མ་ཐོན་ཀྱང་། བསྟན་དང་འགྲོ་བའི་དོན་དུ་སྐུ་ཚེ་ཞབས་པད་བརྟན་རྒྱུ་ལས་ལྷག་པའི་དོན་ཞིག་མེད་ལུགས་ཞུས་ཤིང་། གཞན་ཞུ་བའི་རིགས་ཐམས་ཅད་ཡིག་ཐོག་ཏུ་བྲིས་ནས་ཕུལ་བ་ལ་སྐར་མ་བཅུ་ཙམ་རིང་གཟིགས་རྟོག་ཞིབ་མོ་མཛད་ནས། ༧མགོན་པོ་གང་ཉིད་དགུང་ལོ་བརྒྱ་དང་བཅུ་གྲངས་བཞུགས་རྒྱུའི་ལུང་བསྟན་ཡོད་ཚུལ་དང་། ཐུགས་བཞེད་གཙོ་བོ་རྒྱ་ནག་རི་བོ་རྩེ་ལྔར་གནས་སྐོར་ལ་ཕེབས་རྒྱུ་དང་། ཐེག་པ་ཆེ་ཆུང་སྔགས་དང་བཅས་པའི་བསྟན་པ་ཆ་ཚང་བ་འདི་འདྲ་བོད་གངས་ཅན་ལྗོངས་ལས་གཞན་ལ་མེད་པའི་ཁྱད་ནོར་ཡིན་པས། དེ་ཉིད་འཛིན་སྐྱོང་སྤེལ་གསུམ་བྱ་རྒྱུ་གལ་ཆེར་མཛད་ལུགས་ཀྱི་བཀའ་ཕེབས།
མདོར་ན་ད་རེས་ཞལ་མཇལ་བ་དང་། གསུང་ཐོས་པ་དེས་སེམས་ལ་དཀོན་པའི་འདུ་ཤེས་སྔར་དང་མི་འདྲ་བ་ཞིག་སྐྱེས་པར་མ་ཟད།༧སྐྱབས་མཆོག་གང་གིས་སྐུ་ཚེ་འདིར་ཐུགས་ལ་ཅི་བཞེད་པའི་དགོངས་པ་མཐའ་དག་འཕྲལ་དང་མྱུར་དུ་སྒྲུབ་དགོས་པ་ལས། ཕྱིར་བཤོལ་དང་ལྷོད་གཡེང་བྱེད་པའི་དུས་ཚོད་མེད་པ་ལྟ་བུ་ཞིག་མཇལ།
༧མགོན་པོ་གང་གིས་བདག་ཅག་གི་དོན་དུ་སྐུ་ངལ་འོ་བརྒྱལ་བསམ་གྱིས་མི་ཁྱབ་པ་མཛད་ཟིན་ཅིང་། ད་ནི་སྐུ་ནའི་བབས་དང་། སྐུ་གཟུགས་ཀྱི་གནས་སྟངས་སོགས་ལ་གཞིགས་ན་སྐུ་ངལ་གསོ་རྒྱུ་དང་། སྐུའི་འཕྲོད་གཞེས་གནང་རྒྱུ་ལས་ལྷག་པའི་དོན་ཆེན་ཞིག་མེད་པས། དེ་ལ་རང་གཞན་ཚང་མས་བསམ་ཤེས་དང་དོ་ཁུར་ངེས་པར་མཛད་དགོས་པར་འདུག །
ལྷག་པར་༧མགོན་པོ་གང་ཉིད་སྐུ་འཚོ་ཞིང་གཞེས་པ་འདིའི་རིང་ལ་ཕ་ཡུལ་གངས་ཅན་གྱི་ལྗོངས་སུ་ཆིབས་ཞལ་བསྒྱུར་ནས། ཞབས་སེན་ས་ལ་རེག་པ་ཙམ་གྱིས་ཀྱང་གཞིས་ལུས་བོད་མི་ཤི་གསོན་ཐམས་ཅད་ཀྱི་རེ་བ་རྫོགས་ཤིང་། བླ་མའི་ཐུགས་དགོངས་འགྲུབ་པ་ཞིག་འོང་བར་འདུག་པས། རང་རིགས་ཕུ་ནུ་མིང་སྲིང་ཐམས་ཅད་ནས་མཐུན་ལམ་དཀར་འཇམ་ཡུག་གཅིག་གིས་༧རྒྱལ་བའི་དགོངས་པ་མྱུར་དུ་འགྲུབ་པའི་མཐུན་འགྱུར་གྱི་ཞབས་འདེགས་དང་། ཐ་ན་བསྔོ་བ་སྨོན་ལམ་ཚུན་ཆད་ཉིན་མཚན་ལྟོས་མེད་དུ་འདེབས་དགོས་པའི་དུས་གལ་པོ་ཆེ་ལ་སླེབས་འདུག །
ཆོལ་ཁ་ག་གེ་མོ། ཆོས་ལུགས་ཆེ་གེ་མོ། ལྟ་བ་དང་ལངས་ཕྱོགས་ཉོག་གེ་མོ་སོགས་ཅི་ཡིན་ཀྱང་རུང་། བོད་སྤྱི་ཡི་ཕན་བདེའི་དོན་དུ་ཆེ་བཞག་ཆུང་བསྐྱུར་མཛད་དེ། གསེར་དང་ར་གན་མ་ནོར་བ། ཙནྡ་ཐལ་བར་བཟོས་ནས་མ་འཚོང་བ་ཞིག་གལ་ཆེ་བར་འདུག །
གཙོ་བོ་བླ་མ་ཡིད་བཞིན་གྱི་ནོར་བུ་འདི་ལྟ་བུ་ཡོད་པ་ཐུགས་ལ་བཞག་ནས་བསྟན་པའི་སྤྱི་དོན་དང། བོད་མིའི་བདེ་དོན་ལ་གདུང་ཤུགས་ཆེར་བསྐྱེད་མཛད་པར་ཞུ་ཞེས་ངག་ནས་ཐལ་ལོ། ཞེས་བཀའ་སྩལ་འདུག
གཞི་རྩའི་ཕྱི་ཚེས་ ༢༥ ཉིན་དཔལ་༸རྒྱལ་དབང་ཀརྨ་པ་ཨོ་རྒྱན་འཕྲིན་ལས་རྡོ་རྗེ་མཆོག་ནས་༸གོང་ས་༸སྐྱབས་མགོན་ཆེན་པོ་མཆོག་ལ་མཇལ་ཁ་ཞུས་པ་དེ་ནི་ཕྱི་ལོ་ ༢༠༡༧ རྗེས་ཀྱི་ཆེས་ཐོག་མ་དེ་ཆགས་ཀྱི་ཡོད་པ་དང་། དེའང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨ་རིར་ཞབས་པུས་སྨན་བཅོས་ལེགས་གྲུབ་ཀྱིས་རྒྱ་གར་ལ་ཆིབས་ཐོན་མཛད་པའི་ཁྲོད། ལམ་བར་སུད་སི་ནང་སྐུ་ངལ་གསོ་བཞུགས་མཛད་པའི་དུས་སྐབས་དང་བསྟུན་མཇལ་ཁ་ཞུས་ཐུབ་པ་ཞིག་ཆགས་ཡོད།
