གཟའ་འཁོར་འདིའི་རེས་གཟའ་ཟླ་བའི་ཉིན་ཉི་ཧོང་ནང་ས་ཡོམ་གྱི་གོད་ཆགས་ཚབས་ཆེ་ཕོག་ཡོད་པའི་ཡིད་སྐྱོའི་གནས་ཚུལ་ཐོན་པར་བརྟེན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༧སྐྱབས་མགོན་ཆེན་པོ་མཆོག་གིས་གནས་མཆོག་རྡོ་རྗེ་གདན་ནས་ཉི་ཧོང་གི་སྲིད་བློན་ Fumio Kishida མཆོག་གི་མཚན་ཐོག་ཏུ་གདུང་སེམས་མཉམ་བསྐྱེད་ཀྱི་ཐུགས་གསོའི་གསུང་འཕྲིན་བསྩལ་འདུག
དེ་རིང་ཕྱི་ཟླ་ ༡ ཚེས་ ༣ ཉིན་གནས་མཆོག་རྡོ་རྗེ་གདན་དུ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གདན་ས་གསུམ་དང་བཀྲ་ཤིས་ལྷུན་པོ། ར་སྟོད་གྲྭ་ཚང་བཅས་ཀྱི་དགེ་བཤེས་ལྷ་རམས་པའི་བསླབ་པ་མཐར་སོན་གྱི་ཕྱག་འཁྱེར་གནང་བའི་མཛད་སྒོའི་ཐོག་དབུ་བཞུགས་མཛད་སྐབས་༸གང་ཉིད་མཆོག་གིས་ཉི་ཧོང་གི་སྲིད་བློན་ Fumio Kishida མཆོག་གི་མཚན་ཐོག་ལ་ཉི་ཧོང་ནང་དུ་ས་ཡོམ་བྱུང་སྟེ་མང་ཚོགས་ཀྱི་ཚེ་སྲོག་ཤོར་བ་དང་མཁར་དངོས་དང་བཀོད་པ་འཛུགས་སྐྲུན་ལ་གཏོར་སྐྱོན་ཕོག་པར་ཐུགས་ཕམ་ཆེན་པོ་བྱུང་ཞེས་བཀའ་བསྩལ་བ་དང་སྦྲགས། གོད་ཆག་དེའི་འོག་རྐྱེན་འདས་སུ་གྱུར་པ་རྣམས་ཀྱི་ནང་མི་སོགས་ལ་ཐུགས་གསོ་སྩལ་འདུག
དེ་བཞིན་ཉི་ཧོང་གཞུང་གིས་རང་ནུས་གང་ཡོད་ཀྱིས་དབུལ་ཕོངས་ཉམ་ཐག་ཚོར་རོགས་སྐྱོར་གནང་བཞིན་པར་ཐུགས་དགྱེས་ཚོར་ཆེན་པོ་བྱུང་ཞེས་དང་མགོན་པོ་༸གང་ཉིད་མཆོག་ད་ལྟའི་ཆར་རྒྱ་གར་གྱི་གནས་མཆོག་རྡོ་རྗེ་གདན་དུ་ཡོད་པའི་བཀའ་འབྲེལ་དང་སྦྲགས། ཁུལ་དེར་དགེ་འདུན་པའི་སྡེ་དང་ལྷན་དུ་གནས་ཆེན་འདིར་གནས་སྐོར་གནང་མཁན་ཚོས་ས་ཡོམ་གྱི་གནོད་འཚེ་ཕོག་པའི་སྐྱེ་བོ་རྣམས་ཀྱི་ཆེད་དུ་ཤེས་རབ་སྙིང་པོ་གསུང་འདོན་གྱི་ཐོག་ནས་ཐུགས་སྨོན་མཛད་ཡོད་པ་བཀའ་བསྩལ་འདུག
གཞན་ཡང་དེ་རིང་སྔ་དྲོ་གནས་མཆོག་རྡོ་རྗེ་གདན་དུ་དགེ་བཤེས་ལྷ་རམས་པའི་བསླབ་པ་མཐར་སོན་གྱི་ཕྱག་འཁྱེར་འབུལ་བཞེས་ཀྱི་མཛད་སྒོའི་ཐོག་༸གོང་ས་མཆོག་་གིས་ཉི་ཧོང་གི་ཁུལ་དུ་ས་ཡོམ་གྱི་གོད་ཆགས་ཚབས་ཆེ་བྱུང་ནས་མི་མང་པོ་རྐྱེན་འདས་སུ་གྱུར་པ་དང་མང་ཚོགས་ཀྱི་སེམས་ནང་དངངས་འཚབ་ཆེན་པོ་བྱུང་ཡོད་པ་བཀའ་བསྩལ་བ་དང་འབྲེལ། ཉི་ཧོང་དེ་ནང་པའི་རྒྱལ་ཁབ་ཞིག་ཡིན་ཞིང་ཚང་མས་ཤེས་རབ་སྙིང་པོ་འདོན་གྱི་ཡོད་སྟབས། རྐྱེན་ངན་འཕྲད་ཡུལ་ཉི་ཧོང་གི་ཆོས་གྲོགས་ཚོར་དམིགས་ནས་ཤེས་རབ་སྙིང་པོ་གསུང་འདོན་གནང་རྒྱུ་དང་འདས་གསོན་ཀུན་ལ་ཐུགས་སྨོན་མཚམས་སྦྱོར་མཛད་སོང་།
གཞི་རྩའི་རེས་གཟའ་ཟླ་བའི་ཉིན་ཉི་ཧོང་གི་ཕྱི་དྲོའི་ཆུ་ཚོད་ ༤ པ་ཡོལ་ཙམ་ལ་ཡུལ་དེའི་ནུབ་ཁུལ་གྱི་མཚོ་ཁ་རུ་ཡོད་པའི་ Honshu གླིང་ཕྲན་གྱི་ས་གནས་ Ishikawa འི་ཁུལ་དུ་ས་ཡོམ་འགུལ་ཚད་རིམ་པ་ ༧.༦ ཅན་ཞིག་བྱུང་ནས་ད་བར་མི་གྲངས་ ༤༨ རྐྱེན་འདས་སུ་གྱུར་པ་དང་ཁང་པ་དང་གཞུང་ལམ་སོགས་གཏོར་བཤིག་ཚབས་ཆེན་བྱུང་བ་སོགས་མི་རྒྱུ་གཉིས་ཀར་གནོད་འཚེ་ཚབས་ཆེ་ཕོག་ཡོད་པ་དང་། ཉི་ཧོང་གི་གནམ་གཤིས་རིག་པས་བརྗོད་དོན་ལྟར་ན་ས་ཡོམ་གྱི་རྐྱེན་པས་ཡུལ་དེའི་ནུབ་ཁུལ་གྱི་མཚོ་ཁར་ཡོད་པའི་ Honshu གླིང་ཕྲན་གྱི་རྒྱལ་ས་ Toyama གཙོས་ Niigata གྲོང་ཁྱེར། དེ་བཞིན་ Hokkaido གླིང་ཕྲན་བཅས་ལ་ Tsunami འམ་མཚོ་རླབས་འབྱུང་ཉེན་ཡོད་པའི་ཉེན་བརྡ་བཏང་ཡོད་པ་མ་ཟད། ཨུ་རུ་སུ་དང་བྱང་ཀོ་རི་ཡའི་རྒྱལ་ཁབ་ཀྱི་ས་ཁུལ་ཁག་ཅིག་ཏུའང་མཚོ་རླབས་འབྱུང་ཉེན་ཡོད་པའི་ཉེན་བརྡ་བཏང་འདུག
