བདུན་ཕྲག་འདིའི་རེས་གཟའ་ཉི་མའི་ཉིན་བོད་ཀྱི་རྒྱལ་ས་ལྷ་ས་གཙོས་ཉེ་འཁོར་གྱི་ས་གནས་ཁག་གཅིག་གི་མི་མང་ལ་ཏོག་དབྱིབས་གཉན་རིམས་ ༡༩ ཕོག་པར་བརྟེན་ཕོ་བྲང་པོ་ཏ་ལ་གཙོས་ཆོས་ཕྱོགས་ཀྱི་བསྟི་གནས་ཁག་དུས་ཚོད་ངེས་མེད་བར་སྒོ་རྒྱག་རྒྱུའི་གསལ་བསྒྲགས་སྤེལ་བ་དང་འབྲེལ། ས་གནས་ལ་ཁྱིམ་སྡོད་བཀའ་རྒྱ་བསྡམས་པའི་གནས་ཚུལ་ཐོན་ཡོད་པ་རེད།གནས་ཚུལ་དེ་དང་འབྲེལ་འདས་པའི་ཉིན་ཤས་ཁྲོད་དུ་རྒྱ་ནག་གཞུང་འབྲེལ་གྱི་བརྒྱུད་ལམ་ཁག་ཏུ་བོད་ཀྱི་ས་ཁུལ་ཁག་ཏུ་ཐོན་པའི་ཏོག་དབྱིབས་གཉན་རིམས་ ༡༩ དེ་ནི་ Omicron ཡི་རིགས་གསར་ BA.2.76 ཞེས་པ་དེ་ཡིན་པར་འགྲེལ་བརྗོད་དང་སྦྲགས་ཏེ་བོད་ནང་གི་རིམས་ནད་དེ་ཉེ་འཁོར་ཁྱིམ་མཚེས་རྒྱལ་ཁབ་ཁག་ནས་ཁྱབ་གདལ་བྱུང་བའི་རྣམ་འགྱུར་བསྟན་པ་མ་ཚད་པར་ས་གནས་མི་མང་རྣམས་ནས་རིམས་ནད་དང་འབྲེལ་བའི་གནས་ཚུལ་སྤྱི་ཚོགས་དྲ་ལམ་སོགས་ཀྱི་ཐོག་ཕྱིར་གྱར་བྱེད་མི་ཆོག་པའི་དམིགས་བསལ་གྱིས་དམ་དྲག་བྱེད་བཞིན་འདུག
འོན་ཀྱང་རྒྱ་ནག་གཞུང་འབྲེལ་གྱི་འབྲེལ་བརྗོད་དང་དམ་དྲག་ཇི་བྱེད་ཁག་ལ་ལྟོས་མེད་གང་ཟག་ཁག་གཅིག་གིས་སྤྱི་ཚོགས་དྲ་ལམ་ཐོག་བོད་ནང་ཐོན་པའི་ཏོག་དབྱིབས་རིམས་ནད་དེ་ནི་ Omicron ཞེས་པའི་རིམས་ནད་དེ་ཡིན་པར་མ་ཟད་ལྷག་པར་དུ་ད་ཆ་དབྱར་ཁའི་གུང་སེང་དང་བསྟུན་བོད་ནང་ལ་ཡུལ་སྐོར་སྤྲོ་འཆམ་དུ་ཡོང་མཁན་རྒྱ་རིགས་ཚོའི་བརྒྱུད་ནས་ཁྱབ་གདལ་བྱུང་བ་ཞིག་རེད་ཅེས་འགྲེལ་བརྗོད་གནང་འདུག
དེ་བཞིན་གང་ཟག་ལ་ལས་ད་ཆ་བོད་ནང་ལ་ཏོག་དབྱིབས་གཉན་རིམས་ ༡༩ ཁྱབ་གདལ་བྱུང་མཚམས་སུ་རྒྱ་ནག་གཞུང་འབྲེལ་གྱི་ལས་ཁུངས་ཁག་ནས་ས་གནས་མི་མང་ཚོས་ནད་རྟགས་ཡོད་མེད་ངེས་པར་དུ་བརྟག་དགོས་པའི་བཀའ་བཏང་ཡོད་ཀྱང་། བརྟག་དཔྱད་བྱ་ཡུལ་གྱི་ས་ཚིགས་ཁག་འདང་ངེས་མེད་པའི་ཁར་མཐུན་རྐྱེན་ཞན་པ་དང་ལས་བྱེད་ཚོས་གཙང་འཕྲོད་ལྡན་པའི་ཐོག་ནས་བརྟག་དཔྱད་བྱེད་ཀྱི་མེད་པ་ཐེར་འདོན་དང་སྦྲགས། མི་མང་རྣམས་དུས་ཡུན་རིང་པོར་བང་སྒྲིག་དགོས་པར་མ་ཟད་བརྟག་དཔྱད་ཀྱི་གྲུབ་འབྲས་ཁག་ཀྱང་དུས་ཡུན་ཆུ་ཚོད་སུམ་ཅུ་ཙམ་གྱི་རྗེས་སུ་མ་གཏོགས་རག་གི་མེད་པ་གསུངས་འདུག
བོད་ཀྱི་རྒྱལ་ས་ལྷ་ས་གཙོས་ཉེ་འཁོར་གྱི་ས་གནས་ཁག་གཅིག་ཏུ་གཉན་རིམས་ཀྱི་ནད་རྟགས་ཐོན་པའི་གནས་ཚུལ་ཡོངས་གྲགས་བྱུང་བ་དང་འབྲེལ། ཨ་རིར་གནས་བཞུགས་རྒྱ་ནག་གི་གནད་དོན་ཐོག་དཔྱད་ཞིབ་པ་དང་བོད་མིའི་སྒྲིག་འཛུགས་ཀྱི་རྒྱ་རིགས་འབྲེལ་མཐུད་པ་ཟུར་པ་ཀུན་དགའ་བཀྲིས་ལགས་ཀྱིས་དཔྱད་ཞིབ་གནང་བའི་ནང་ད་རེས་བོད་ཀྱི་རྒྱལ་ས་ལྷ་ས་དང་པུ་ཧྲེང་རྫོང་ནང་ཐོན་པའི་ཏོག་དབྱིབས་རིམས་ནད་དེ་དག་གཞིས་ཀ་རྩེ་ནས་བྱུང་བ་དང་རིམས་ནད་མང་ཤོས་ཐོན་ཡུལ་ས་ཚིགས་ཀྱང་གཞིས་ཀ་རྩེ་གྲོང་ཁྱེར་བསམ་གྲུབ་རྩེ་ཡིན་སྟབས། ས་ཁུལ་དེར་འགྲོ་འོང་བྱེད་མཁན་རྒྱ་རིགས་ཚོའི་བརྒྱུད་ནས་ཁྱབ་གདལ་བྱུང་བ་དང་། ལྷག་པར་དུ་རྒྱ་ནག་གཞུང་ནས་ཡོངས་གྲགས་བྱེད་ཀྱི་མེད་ཀྱང་། ལྷ་སའི་ལས་ཁུངས་ཁག་གཅིག་གི་ལས་བྱེད་ཁྲོད་ལའང་ནད་རྟགས་ཐོན་པའི་གནས་ཚུལ་བྱུང་ཡོད་པར་གསུངས་ཡོད།
རྩ་བའི་ཕྱི་ལོ་ ༡༠༡༩ ལོའི་ལོ་མཇུག་ཙམ་ལ་རྒྱ་ནག་ཝུ་ཧན་གྲོང་ཁྱེར་ནས་ཏོག་དབྱིབས་རིམས་ནད་ཐོག་མར་ཁྱབ་གདལ་བྱུང་བ་ནས་བཟུང་རྒྱ་ནག་གི་གྲོང་ཁྱེར་ཁག་དང་རིམ་པས་འཛམ་གླིང་ཁྱོན་ཡོངས་སུ་རིམས་ནད་དེ་ཁྱབ་གདལ་ཆེན་པོ་བྱུང་བར་བརྟེན་མི་གྲངས་ས་ཡ་མང་པོའི་ཚེ་སྲོག་ཤོར་ཡོད་པ་དང་། བོད་ཀྱི་རྒྱལ་ས་ལྷ་ས་གཙོས་ ས་ཁུལ་ཁག་ཏུ་གཉན་རིམས་ཁྱབ་གདལ་གྱི་དུས་ཚོད་སྡུག་ཤོས་སྐབས་སུའང་ནད་ཡམས་འགོས་པ་གཅིག་ལས་བྱུང་མེད་ཅེས་རྒྱ་ནག་གཞུང་གིས་འགྲེལ་བརྗོད་བྱས་པར་མ་ཟད། དུས་སྐབས་དེར་རིམས་ནད་སྔོན་འགོག་གི་མི་བྱང་འོག་ས་གནས་བོད་མི་ལ་དམིགས་བསལ་དམ་དྲག་དང་འཛིན་བཟུང་བྱས་པའི་གནས་ཚུལ་བྱུང་ཡོད་ཀྱང་། དོན་དངོས་ཐོག་བོད་ནང་ལ་རྒྱལ་སྤྱིའི་མི་སྣ་དང་གསར་འགོད་པ་ཕེབས་རྒྱུར་དམ་དྲག་བྱས་པ་ལས་རྒྱ་རིགས་ཡུལ་སྐོར་སྤྲོ་འཆམ་པ་རྣམས་བོད་ལ་འགྲོ་འོང་བྱ་རྒྱུར་དམ་དྲག་རིགས་མེད་པ་རེད།
ད་ལྟའི་ཆར་བོད་ནང་ཏོག་དབྱིབས་རིམས་ནད་ཕོག་མཁན་ག་ཚོད་ཡོད་མེད་ཀྱི་གྲངས་ཐོ་ངེས་ཅན་ཞིག་རག་ཐབས་དཀའ་ནའང་། ཁ་ཉིན་རྒྱ་ནག་གཞུང་འབྲེལ་གྱིས་སྤེལ་བའི་གྲངས་ཐོར་གཞིགས་ན་རྒྱལ་ས་ལྷ་སར་ནད་རྟགས་ཐོན་པ་ ༢༧ དང་། གཞིས་རྩེ་གྲོང་ཁྱེར་དུ་ ༡༨ མངའ་རིས་ཁུལ་དུ་ ༡༡ བཅས་ཆགས་ཡོད།
བོད་ནང་ཐོན་པའི་གཉན་རིམས་དེ་རྒྱ་རིགས་ཡུལ་སྐོར་སྤྲོ་འཆམ་པ་བརྒྱུད་ནས་ཁྱབ་གདལ་བྱུང་བ་ཞིག་ཡིན་པར་གསུངས་འདུག
Tibetan News Headlines
- Monpa community offers ‘Tenshug’ to the Dalai Lama
- Monpa Community and Tibetans Celebrate 90th Birthday of His Holiness the Dalai Lama in Dharamshala
- 13 United Nations Special Procedures raise serious concerns about the construction of Kamtok hydroelectric dam in Tibet
རེས་གཟའ་སྤེན་པ། ༢༠༢༤།༠༩།༠༧
- མོན་པའི་དད་ལྡན་པ་ཚོས་༸གོང་ས་མཆོག་ལ་བརྟན་བཞུགས་བསྟར་འབུལ།
- མོན་པས་༸སྐུའི་གོ་སྟོན་སྲུང་བརྩི་ཞུས་པ།
- རྒྱལ་ཚོགས་ཀྱི་དམིགས་བསལ་སྐུ་ཚབ་ ༡༣ གྱིས་སྡེ་དགེ་སྐམ་ཐོག་གི་ཆུ་མཛོད་ལས་གཞིར་ཐུགས་འཚབ་ཀྱི་རྣམ་པ་ཤུགས་ཆེ་བཏོན་གནང་འདུག