Tibetan Royal Year of 2151 | Year of the Wood Dragon

ཞི་ཅིན་ཕིང་གིས་བརྒྱུད་གཅིག་ལམ་གཅིག་གི་གནད་དོན་དང་འབྲེལ་ནུབ་ཕྱོགས་རྒྱལ་ཁབ་ལ་ཉེན་བརྡ།

Tibetan News Headlines

  • Dalai Lama congratulates president Murmu on her 66th birthday
  • China places stringent restrictions on access to sacred Tibetan religious site in Golok
  • Tibetans worldwide hold prayer vigils for Dalai Lama’s successful knee surgery
  • Xi’s visit to Tibetan areas in Qinghai shows continuation of his Sinicization policy
  • Australian Tibetan protestor hospitalized after attack by China supporter during Li Qiang’s visit
  • US approves new $360 million arms sale to Taiwan for drones, related equipment

རེས་གཟའ་ཕུར་བུ། ༢༠༢༤།༠༦།༢༠

  • ༸གོང་ས་མཆོག་གིས་རྒྱ་གར་གྱི་སྲིད་འཛིན་ Murmu མཆོག་གི་སྐྱེས་སྐར་ཉིན་འཚམས་འདྲི་སྩལ་བ། མགོ་ལོག་ཁུལ་གྱི་གནས་ཆེན་གཉན་པོ་གཡུ་རྩེ་རུ་ཆོས་ཕྱོགས་ཀྱི་བྱེད་སྒོར་དམ་བསྒྲགས།
  • བོད་མི་ཚོས་༸གོང་ས་མཆོག་གི་ཞབས་པུས་སྨན་བཅོས་ལེགས་གྲུབ་ཡོང་བའི་གསོལ་འདེབས་སྨོན་ལམ་ཞུ་བཞིན་འདུག
  • ཞི་ཅིན་ཕིང་གི་མཚོ་སྔོན་ལྟ་སྐོར་དེ་ནི་རྒྱ་གཞུང་གིས་བོད་མིའི་ཐོག་རྒྱ་བསྒྱུར་གྱི་སྲིད་བྱུས་དེ་མུ་མཐུད་ལག་བསྟར་མཁྲེགས་འཛིན་བྱེད་བཞིན་པའི་རྣམ་པ་རེད།
  • ཨོ་གླིང་བོད་མི་ཞི་རྒོལ་བར་རྒྱ་ནག་རྒྱབ་སྐྱོར་བས་ཉེས་རྡུང་གིས་སྨན་ཁང་དུ་བསྐྱལ་དགོས་བྱུང་འདུག
  • ཨ་རིས་ཐའེ་ཝན་ལ་ཨ་སྒོར་ས་ཡ་ ༣༦༠ ལྷག་གི་གོ་ལག་ཚོང་འགྲེམས་བྱ་རྒྱུ།

ཁ་སྔོན་ཕྱི་ཚེས་ ༡༨ ཉིན་རྒྱ་ནག་གི་རྒྱལ་ས་པེ་ཅིང་དུ་རྒྱ་གཞུང་གིས་ཆེད་བཟོ་བྱེད་པའི་བརྒྱུད་གཅིག་ལམ་གཅིག་གི་ཚོགས་ཆེན་ཐེངས་གསུམ་པ་ཚོགས་ཡོད་པ་དང་འབྲེལ། དེ་སྔ་དང་བསྡུར་ན་ཚོགས་ཆེན་དེའི་ཐོག་ནུབ་ཕྱོགས་རྒྱལ་ཁབ་ཁག་གི་དབུ་ཁྲིད་མང་པོ་ཞིག་མཉམ་ཞུགས་གནང་མེད་པ་མ་ཟད། ལས་གཞི་དེའི་ནང་མ་འཛུགས་ལ་བཀག་སྡོམ་སོགས་ཀྱི་གནད་དོན་འབྱུང་བཞིན་ཡོད་སྟབས། ཞི་ཅིན་ཕིང་གིས་ང་ཚོས་གནད་དོན་དེ་དག་གི་ཐོག་ལ་ཁ་གཏད་ནན་པོ་བྱ་རྒྱུ་ཡིན་པའི་ཉེན་བརྡ་བཏང་འདུག

དེ་ཡང་དེ་སྔོན་ཕྱི་ལོ་ ༢༠༡༩ ལོར་ཚོགས་པའི་རྒྱ་ནག་གི་བརྒྱུད་གཅིག་ལམ་གཅིག་གི་ཚོགས་ཆེན་དེའི་ཐོག་རྒྱལ་ཁབ་ ༣༧ གི་དབུ་འཁྲིད་བཅར་ཡོད་པ་དེ་ལྟར་ཡང་། ཁ་སྔོན་ཕྱི་ཚེས་ ༡༨ ཉིན་ཚོགས་པའི་དེ་འབྲེལ་ཚོགས་ཆེན་ཐེངས་ ༣ པའི་ཐོག་རྒྱལ་ཁབ་ ༢༣ གི་དབུ་འཁྲིད་མ་གཏོགས་བཅར་མེད་པ་རེད། ལྷག་པར་དུ་ཨ་རི་གཙོས་པའི་ནུབ་ཕྱོགས་རྒྱལ་ཁབ་ཕལ་མོ་ཆེ་མཉམ་ཞུགས་གནང་མེད་སྟབས། ཞི་ཅིན་ཕིང་གི་དབུ་འབྱེད་མཛད་སྒོའི་གཏམ་བཤད་ནང་། ནུབ་ཕྱོགས་རྒྱལ་ཁབ་ཚོས་རྒྱ་ནག་གི་བརྒྱུད་གཅིག་ལམ་གཅིག་གི་ལས་གཞི་དེའི་ནང་མ་འཛུགས་བཀག་སྡོམ་བཅས་ཀྱི་གནད་དོན་ལ་སྐྱོན་བརྗོད་ཙམ་མ་ཟད། རྒྱ་ནག་གི་ཡར་རྒྱས་དེ་བཞིན་མ་རྩ་ཞིག་ཏུ་ལྟ་དགོས་པ་ལས་ཉེན་ཁ་ཞིག་ཏུ་ལྟ་རྒྱུ་མེད་ལུགས་བཤད་འདུག

ད་དུང་བརྒྱུད་གཅིག་ལམ་གཅིག་གི་ལས་གཞི་དེ་འགོ་བཙུགས་ནས་ལོ་ངོ་ ༡༠ ཧྲིལ་པོ་འཁོར་བའི་དུས་སྐབས་དང་བསྟུན། འབྱུང་འགྱུར་ལས་འཆར་ངོ་སྤྲོད་ཀྱིས་བསྟོད་བསྔགས་དང་། ལས་གཞི་དེ་ཨེ་ཤི་ཡ་དང་། ཨ་ཕི་རི་ཀ ཡོ་རོབ་བཅས་ལ་འཛུགས་བསྐྲུན་ཡར་རྒྱས་དང་འབྲེལ་མཐུད་ནུས་སྟོབས་གོང་འཕེལ་སོགས་ཀྱི་དམིགས་ཡུལ་ལྡན་པ་ཞིག་ཆགས་ཀྱི་ཡོད་ལུགས་བཤད་དེ། འདི་ལོའི་ལས་འཆར་ནང་ཨ་སྒོར་དུང་ཕྱུར་ ༡༡ མ་ཟིན་ཙམ་འགྲོ་གྲོན་གཏང་རྒྱུ་ཡིན་ཞིང་། རྒྱ་ནག་གི་ཡར་རྒྱས་ལ་དོགས་ཟོན་དང་། རྒྱ་ནག་གི་དཔལ་འབྱོར་ལ་རྟེན་རྒྱུ་མེད་ཅེས་བཤད་རྒྱུ་དེ་ནི་རང་ཉིད་ཀྱི་ཡར་རྒྱས་ལ་གནོད་གཞི་ཞིག་ཡིན་པ་དང་། རྒྱལ་སྤྱིའི་སྤྱི་ཚོགས་ཀྱིས་ལས་དོན་ཡག་པོ་བྱས་ཚེ་རྒྱ་ནག་ཀྱང་དེ་བཞིན་བྱ་རྒྱུ་ཡིན་ལུགས། དེ་བཞིན་ནམ་ཞིག་རྒྱ་ནག་གི་ཡག་པོ་བྱས་ཚེ་འཛམ་གླིང་སྔར་ལྷག་ཡག་ཏུ་འགྲོ་རྒྱུ་ཡིན་ཚུལ་དང་ད་བར་རྒྱ་གཞུང་ལ་བཀལ་བའི་ཕྱོགས་གཅིག་ཁོ་ནའི་སྲིད་དོན་ཉེས་ཆད་སོགས་ལ་གདོང་ལེན་ནན་པོ་བྱ་རྒྱུ་ཡིན་པའི་ཉེན་བརྡ་བཏང་འདུག

མ་ཟད་རྒྱ་གཞུང་གི་ངོས་ནས་ལས་གཞི་དེའི་བརྒྱུད་ཡར་རྒྱས་འགྲོ་བཞིན་པའི་རྒྱལ་ཁབ་ཁག་ལ་སྒོར་མོ་དུང་ཕྱུར་མང་པོའི་དཔལ་འབྱོར་རྒྱབ་རྟེན་བྱ་རྒྱུ་ཡིན་པ་སོགས་ཁས་ལེན་བྱས་ཏེ། དེ་ནི་མདུན་བསྐྱོད་ཀྱི་ལམ་ཁ་ནོར་མེད་པ་ཞིག་ལུགས་བཤད་འདུག

རྩ་བའི་རྒྱ་ནག་གི་བརྒྱུད་གཅིག་ལམ་གཅིག་ཟེར་བའི་དེ་ནི་ཕྱི་ལོ་ ༢༠༡༣ ལོར་ཞི་ཅིང་ཕིན་གྱི་སྲིད་བྱུས་འོག་ནས་འགོ་ཚུགས་པ་ཞིག་ཡིན་པ་དང་། དེ་སྔ་དར་གོས་འགྲུལ་ལམ་མམ་ Silk Road ཞེས་པ་ལྟར་ལས་གཞི་དེའི་བརྒྱུད་ནས་ཨེ་ཤི་ཡ་དང་། ཨ་ཕི་རི་ཀ དེ་བཞིན་ཡོ་རོབ་བཅས་སུ་བརྒྱུད་ལམ་གཅིག་གི་ཐོག་ནས་ཚོང་འབྲེལ་སོགས་དང་འབྲེལ་བ་ཡོད་པ་མ་ཟད། དེའི་ནང་རྒྱལ་ཁབ་ ༡༥༠ ལྷག་དང་རྒྱལ་སྤྱིའི་ཚོགས་སྡེ་ཁག་མང་པོ་མཉམ་ཞུགས་ཡོད་པ་ཞིག་ཆགས་ཀྱི་ཡོད་པ་རེད།

འོན་ཀྱང་ད་ལྟའི་ཆར་རྒྱལ་སྤྱིའི་ནང་རྒྱལ་ཁབ་མང་པོ་ཞིག་རྒྱ་ནག་གི་བརྒྱུད་གཅིག་ལམ་གཅིག་མཚོན་པའི་ལས་གཞི་གཞན་ཁག་དང་འབྲེལ་ནས་བུ་ལོན་འོག་ཚུད་དེ་དཀའ་ངལ་ཧ་ཅང་འཕྲད་བཞིན་ཡོད་པ་མངོན་གསལ་ཡིན་ཞིང་། ལྷག་པར་དུ་འདི་ལོ་ཕྱི་ཟླ་ ༩ ནང་རྒྱ་གར་གྱི་རྒྱལ་ས་ལྡི་ལིར་སྟོབས་ཆེན་རྒྱལ་ཁབ་ ༢༠ G20 ལྷན་ཚོགས་ཐོག་ Italy སྲིད་བློན་ལྕམ་སྐུ་ Giorgia Meloni མཆོག་གིས་རྒྱ་ནག་གི་སྲིད་བློན་ Li Quang དང་ལྷན་དུ་ཟུར་ཚོགས་གནང་སྟེ། Italy ངོས་ནས་རྒྱ་ནག་གི་བརྒྱུད་གཅིག་ལམ་གཅིག་ལས་ཁེ་དབང་མེད་པར་གསུངས་ཏེ་ཕྱིར་འཐེན་བྱ་རྒྱུ་འཆར་གཞི་ཡོད་སྐོར་བརྗོད་ཡོད།

གནད་དོན་དེ་དང་འབྲེལ་ནས་ཁ་སྔོན་ཕྱི་ཚེས་ ༡༨ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ཨ་རིའི་རྒྱལ་ཡོངས་གསར་འགོད་ལྷན་ཚོགས་ཀྱི་བཅར་འདྲི་ལས་རིམ་ཞིག་གི་ཐོག ད་ལྟའི་ཆར་རྒྱ་ནག་དང་ལྷན་དུ་ཚོང་འབྲེལ་ཡོད་པའི་རྒྱལ་ཁབ་མང་པོ་ཞིག་བུ་ལོན་ཚད་མེད་འོག་ཚུད་ཡོད་པ་དང་། ད་དུང་རྒྱལ་ཁབ་མང་པོས་རྒྱ་ནག་གི་རྒྱབ་ལྗོངས་དམིགས་ཡུལ་སོགས་ཤེས་རྟོགས་ཐུབ་ཀྱི་མེད་པ་མ་ཟད། རྒྱ་ནག་གིས་རྒྱལ་སྤྱིའི་ལམ་ལུགས་གསར་པ་བཟོ་ཐབས་བྱེད་བཞིན་པའི་སྲིད་བྱུས་འོག་ཚུད་རྒྱུ་མེད་ཅེས་ནན་བརྗོད་གནང་ཡོད།

གཞི་རྩའི་ཕྱི་ལོ་ ༢༠༡༧ ལོར་ཚོགས་པའི་བརྒྱུད་གཅིག་ལམ་གཅིག་གི་ཚོགས་ཆེན་དེའི་ཐོག་རྒྱལ་ཁབ་ ༣༠ གི་དབུ་ཁྲིད་བཅར་ཡོད་པ་དང་། ཕྱི་ལོ་ ༢༠༡༩ ལོར་རྒྱལ་ཁབ་ ༣༧ གི་དབུ་ཁྲིད་བཅར་ཡོད་པ་དེ་ལྟར་ཡང་། ཐེངས་འདིའི་ཚོགས་ཆེན་ཐོག་ཨུ་རུ་སུའི་སྲིད་བློན་པུ་ཊིིན་གཙོས་པའི་ཨིན་ཌོ་ནི་ཤི་ཡ་དང་། པ་ཀིས་ཏན། ཨི་ཇིབཊ་སོགས་རྒྱལ་ཁབ་ ༢༣ གི་དབུ་ཁྲིད་བཅར་ཡོད་པ་རེད། མདོར་ན་རྒྱལ་ཁབ་ཀྱི་དབུ་ཁྲིད་རྣམ་པའི་མཉམ་ཞུགས་བྱེད་བབ་ལ་གཞིགས་ཚེ་རྒྱལ་སྤྱིའི་སྤྱི་ཚོགས་ནས་རྒྱ་ནག་གིས་ཆེད་བཟོ་བྱེད་པའི་བརྒྱུད་གཅིག་ལམ་གཅིག་གི་ལས་གཞི་སོགས་ལ་དོགས་ཟོན་ཆེན་པོ་བྱེད་བཞིན་ཡོད་པ་མངོན་གསལ་ཆགས་ཀྱི་ཡོད།

འབྲེལ་ཡོད་གསར་གནས།

གསར་གནས།