རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༤༤ ཐོག་བོད་མིའི་སྐུ་ཚབ་ནས་ཉེ་བའི་ཆར་རྒྱ་གཞུང་གིས་ཏོག་དབྱིབས་གཉན་རིམས་ལ་ཁ་གཡར་ཏེ་བོད་ནང་གི་བོད་མིའི་ཐོག་དམ་དྲག་བྱེད་ཤུགས་ཆེ་རུ་བཏང་ཡོད་པ་སྙན་སེང་ཞུས་འདུག
ཕྱི་ཟླ་ ༦ ཚེས་ ༣༠ ནས་སུད་སི་གྲོང་ཁྱེར་ཇི་ནི་ཝ་ནང་རྟེན་གཞི་བྱས་པའི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༤༤ དབུ་འཛུགས་གནང་ཡོད་པ་དང་། ཁ་སང་ཕྱི་ཚེས་ ༣ ཉིན་རྒྱལ་ཚོགས་ཀྱི་ཤེས་ཡོན་སློབ་གསོའི་རང་དབང་གི་དམིགས་བསལ་ཁེ་ལས་རྟོག་ཞིབ་པས་ཏོག་དབྱིབས་གཉན་རིམས་ཁྱབ་གདལ་ཁྲོད་ཀྱི་འཛམ་གླིང་སྤྱིའི་ཤེས་ཡོན་སློབ་གསོའི་རང་དབང་གི་གནས་སྟངས་དང་འབྲེལ་བའི་སྙན་ཐོ་ལྷན་ཚོགས་སུ་སྙན་སྒྲོན་ཞུས་པ་དང་འབྲེལ་བགྲོ་གླེང་ལས་རིམ་གྱི་ཚོགས་དུས་སྐབས་སུད་སི་དོན་ཁང་གི་འབྲེལ་ཡོད་ལས་བྱེད་འཕྲིན་ལས་ཆོས་སྐྱིད་ལགས་ཀྱིས་ Society for Threatened People ཞེས་པའི་རྒྱལ་ཚོགས་ཀྱི་གཞུང་འབྲེལ་མིན་པའི་ཚོགས་པའི་མཚན་ཐོག་ནས་བོད་ནང་ཤེས་ཡོན་སློབ་གསོའི་རང་དབང་དང་འབྲེལ་བའི་གནས་སྟངས་རྒྱལ་ཚོགས་སུ་སྙན་སེང་ཞུས་འདུག
སྐབས་དེར་སྐར་མ་གཅིག་དང་ཕྱེད་ཀའི་ཞུ་གཏུག་སྙན་སེང་སྐབས་ཁོང་གིས་རྒྱ་ནག་ཝུ་ཧན་གྲོང་ཁྱེར་ནས་ཐོག་མར་མཆེད་པའི་ཏོག་དབྱིབས་གཉན་རིམས་ལ་ཁ་གཡར་ཏེ་བོད་ནང་རྒྱ་གཞུང་གིས་བོད་མིའི་ཐོག་དམ་དྲག་བྱེད་ཤུགས་ལྡབ་གཉིས་ཆེ་རུ་བཏང་བ་དེ་བོད་མི་ཚོས་མྱོང་བཞིན་ཡོད་པ་དང་། རྒྱ་ནག་གཞུང་གི་དམ་དྲག་འོག་བོད་ནང་བོད་མིའི་སྐད་ཡིག་དང་ཆོས་ཕྱོགས་ཀྱི་སློབ་གཉེར་རང་དབང་བཅས་ཀྱི་གནས་བབས་ནི་འཛམ་གླིང་ཁྱོན་ལ་ཏོག་དབྱིབས་གཉམ་རིམས་ཁྱབ་གདལ་མ་འགྲོ་སྔོན་ནས་ཆེས་ཞན་པོ་ཡོད་པ་མ་ཟད། ད་རེས་གཉན་རིམས་འདིའི་འོག་བོད་མིའི་ཚོའི་ཤེས་ཡོན་སློབ་གསོའི་རང་དབང་གི་གནས་བབས་དེ་བས་ཇེ་ཞན་ཇེ་སྡུག་ཏུ་སོང་ཡོད་པ་དང་དེ་བཞིན་རྒྱ་ནག་གཞུང་གིས་བོད་མིར་མི་རིགས་དབྱེ་འབྱེད་ཀྱི་བྱེད་ཤུགས་ཆེ་རུ་བཏང་ཡོད་པའི་གནད་དོན་ཁག་ཆེད་འདོན་སྙན་སེང་ཞུས་འདུག 
དེ་བཞིན་འདས་པའི་ལོ་ངོ་ ༢༥ རིང་རྒྱ་གཞུང་གིས་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་བཙན་འཁྲིད་ཀྱིས་གར་སོང་ཆ་མེད་དུ་བཏང་སྟེ་ཆོས་ཕྱོགས་ཀྱི་སློབ་གཉེར་གནང་རྒྱུའི་རང་དབང་ཡོངས་རྫོགས་མེད་པ་བཟོས་པའི་གནད་དོན་དང་འབྲེལ། རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་ནས་རྒྱ་གཞུང་ལ་གནོན་ཤུགས་ཀྱིས་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གིས་གཙོས་པའི་བོད་མིའི་སྐད་ཡིག་སྲུང་སྐྱོབ་པ་བཀྲིས་དབང་ཕྱུག་ལགས་དང་བསོད་ནམས་དཔལ་ལྡན་ལགས། དེ་བཞིན་ཁོར་ཡུག་སྲུང་སྐྱོབ་པ་ཨ་ཉ་སེང་སྒྲ་ལགས་གློད་བཀྲོལ་དགོས་པའི་འབོད་སྐུལ་ཞུས་འདུག་པ་མ་ཟད། ལྷག་པར་དུ་ཉེ་ཆར་རྒྱལ་ཚོགས་ཀྱི་ཤེས་ཡོན་སློབ་དམིགས་བསལ་ཁེ་ལས་རྟོག་ཞིབ་མི་སྣ་གཙོས་ཁེ་ལས་མི་སྣ་ ༤༩ ནས་རྒྱ་ནག་གཞུང་གིས་བོད་དང་ཧོང་ཀོང་། ཤར་ཏུ་ཀི་སི་ཐན་ནང་གི་འགྲོ་བ་མིའི་ཐོབ་རྡོག་རོལ་གཏོང་བཞིན་པའི་གནད་དོན་དང་འབྲེལ་ཏེ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་དང་ཚོགས་མི་རྒྱལ་ཁབ་ཁག་ལ་རྒྱ་ནག་ཐོག་དམིགས་བསལ་ཚོགས་དུས་ཤིག་བསྐོང་ཚོགས་གནང་དགོས་པ་དང་རྒྱ་ནག་ཐོག་དམིགས་བསལ་རྟོག་ཞིབ་ཚོགས་ཆུང་ཆེད་འཛུགས་དགོས་པའི་དགོས་འདུན་ཆེད་འདོན་གནང་བ་ལྟར་དོན་འཁྱོལ་ཕྱག་བསྟར་ཡོང་བའི་འབོད་སྐུལ་ཞུས་འདུག
རྩ་བའི་ཐེངས་འདིའ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་དེ་ཕྱི་ཟླ་ ༦ ཚེས་ ༣༠ ཉིན་ནས་ཕྱི་ཟླ་ ༧ ཚེས་ ༢༠ བར་ཚོགས་ཀྱི་ཡོད་པ་རེད། འདི་ལོ་རྒྱ་ནག་ཝུ་ཧན་ནས་ཐོག་མར་མཆེད་པའི་ཏོག་དབྱིབས་གཉན་རིམས་རྐྱེན་པས་སྔ་ལོའི་ཚོགས་དུས་ ༤༣ པ་དེ་དུས་ཚོད་གཅིག་གི་ནང་ཆ་ཚང་ཚོགས་ཐུབ་མེད་པ་དང་། ད་ལན་རྒྱལ་ཚོགས་ཀྱི་ལྷན་ཚོགས་ཐེངས་ ༤༤ པའི་ཚོགས་འདུ་འགྲོ་ལུགས་དང་ལས་རིམ་ཁག་ཀྱང་རྣམ་ཀུན་དང་མི་འདྲ་བ་གནང་དགོས་བྱུང་འདུག་པ་མ་ཟད། དེ་བཞིན་ཚོགས་་འདུ་མང་དག་ཅིག་དྲྭ་ལམ་ཐོག་ཚོགས་གནང་གི་ཡོད་པ་རེད།
