ཕྱི་ལོ་ ༢༠༡༨ ལོའི་རྒྱ་གར་རྒྱལ་ཡོངས་བོད་རིགས་མཐོ་རིམ་སློབ་མའི་ལྷན་ཚོགས་ཀྱི་མཛའ་འབྲེལ་རིག་རྩལ་འདུ་འཛོམས་ཆེན་མོ་ཐེངས་ ༡༤ པ་དེ་བཞིན་འདི་ལོའི་ཕྱི་ཟླ་ ༩ པའི་ཟླ་མཇུག་གམ་ཡང་ན་ཕྱི་ཟླ་ ༡༠ པའི་མགོ་སྟོད་དུ་རྒྱ་གར་ལྷོ་ཕྱོགས་སྦེལ་སྐོབ་བོད་མིའི་གཞིས་ཆགས་སུ་ཚོགས་གཏན་འཁེལ་འདུག
དེ་ཡང་དེ་རིང་སྔ་དྲོ་རྡ་ས་བོད་ཀྱི་གསོལ་མགྲོན་ཁང་གི་ཚོགས་ཁང་དུ་གསར་འགོད་ལྷན་ཚོགས་ཤིག་གི་ཐོག་འདུ་འཛོམས་ཆེན་མོའི་ཚོགས་དུས་དང་ས་ཚིག་གསལ་སྒྲགས་གནང་བ་དང་འབྲེལ། རྩ་བའི་ད་བར་ལོ་ ༡༣ རིང་ལོ་ལྟར་རྒྱ་གར་ལྷོ་ཕྱོགས་ Chennai གྲོང་ཁྱེར་ནང་གི་ TSAM སློབ་ཕྲུག་ཚོགས་པའི་ངོས་ནས་འདུ་འཛོམས་དེ་གོ་སྒྲིག་གནང་བཞིན་ཡོད་པ་དེ་ལྟར་ཡང་། དེང་སྐབས་ Chennai ནང་མཐོ་སློབ་གཉེར་བཞིན་པའི་སློབ་ཕྲུག་གི་གྲངས་འབོར་ཉུང་རུ་ཕྱིན་པ་དང་། དཔལ་འབྱོར་གྱི་དཀའ་ངལ་སོགས་ཀྱི་རྐྱེན་པས་སློབ་ཕྲུག་ཚོགས་པ་དེའི་ངོས་ནས་ད་ལོ་ལས་གཞི་དེ་གོ་སྒྲིག་གནང་ཐུབ་ཀྱི་མེད་སྟབས། རྒྱ་གར་ས་ཕྱོགས་འདྲ་མིན་གྱི་སློབ་ཕྲུག་ཚོགས་པ་རྣམས་ཀྱི་འཐུས་མི་ལས་གྲུབ་པའི་གོ་སྒྲིག་ཚོགས་ཆུང་ཞིག་གསར་བཛུགས་གནང་བའི་ཐོག་ནས་ལོ་འདིའི་ཚོགས་འདུ་དེ་གོ་སྒྲིག་གནང་བཞིན་པ་རེད་འདུག
ལས་གཞི་རྒྱུན་ཆད་རྒྱུའི་ཉེན་ཚབ་ཀྱི་གནས་སྟངས་འགྱུར་བ་དང་བསྟུན། འདི་ལོའི་འདུ་འཛོམས་གོ་སྒྲིག་ཚོགས་ཆུང་གི་ངོས་ནས་བོད་པའི་སློབ་ཕྲུག་གི་ཕ་མ་དང་སྤྱི་ཚོགས་ཀྱི་ངོས་ནས་གཞོན་སྐྱེས་ཚོར་སྤྱི་ཚོགས་ཀྱི་ལས་དོན་ཐོག་འཁུར་མཉམ་ལེན་བྱ་རྒྱུའི་སྐུལ་སློང་མང་ཙམ་སྤེལ་དགོས་པ་དང་། བོད་པའི་ཚོགས་སྡེ་ཁག་དང་སྤྱི་ཚོགས་ཀྱི་ངོས་ནས་ད་བར་ལས་གཞི་དེའི་རིགས་ལ་རྒྱབ་སྐྱོར་མཐུན་འགྱུར་གནང་བ་བཞིན། ལས་གཞི་དེ་དག་གལ་ཆེའི་རང་བཞིན་ལ་གཟིགས་ཏེ་རྒྱབ་སྐྱོར་སྔར་ལྷག་གནང་དགོས་པའི་འབོད་སྐུལ་ཞུ་བཞིན་འདུག
རྩ་བའི་ཐེངས་འདིའི་འདུ་འཛོམས་ཐོག་རྒྱ་གར་རྒྱལ་ཡོངས་ཀྱི་ས་གནས་གང་སར་ཡོད་པའི་བོད་པའི་སློབ་ཕྲུག་ཚོགས་པ་ ༡༡ ནས་སློབ་ཕྲུག་ཁྱོན་ ༣༠༠ ཙམ་ནས་མཉམ་ཞུགས་གནང་རྒྱུའི་རེ་བ་གནང་བཞིན་འདུག་པ་དང་། འདུ་འཛོམས་ལས་གཞི་དེའི་ཐོག་ས་གནས་འདྲ་མིན་གྱི་སློབ་ཕྲུག་ཕན་ཚུན་དབར་བགྲོ་གླེང་དང་ཡིག་རིགས་འགྲེམས་སྤེལ། ཚོགས་པ་སོ་སོའི་ངོ་སྤྲོད་ཀྱི་གློག་བརྙན་བཟོ་བསྐྲུན། གཞས་སྣ་འཁྲབ་སྟོན་དང་སིལ་པོལ་རྩེད་འགྲན་སོགས་གནང་རྒྱུ་རེད་འདུག གོ་སྒྲིག་ཚོགས་ཆུང་ངོས་ནས་ལས་གཞི་དེའི་ཆེད་དུ་དངུལ་འབོར་འབུམ་ ༥ དང་ཁྲི་ ༦ ཙམ་གྱི་འགྲོ་གྲོན་ཚོད་དཔག་གནང་གི་འདུག་པ་དང་། ད་བར་བོད་པའི་གཞུང་འབྲེལ་མ་ཡིན་པའི་ཚོགས་པ་ ༥ དང་ཀིརྟི་དགེ་རྩ་ཚོགས་པ་བཅས་ནས་ཧིན་སྒོར་བདུན་ཁྲི་ལྔ་སྟོང་ཙམ་ཞིག་ཞལ་འདེབས་གནང་མཁན་བྱུང་འདུག
