རྒྱ་གར་མངའ་སྡེ་བྷི་ཧཱར་གྱི་གྷ་ཡ་རྫོང་དུ་ཆགས་པའི་གནས་མཆོག་ཁྱད་པར་ཅན་རྡོེ་རྗེ་གདན་དུ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༢༠ ལོའི་ཟླ་ ༡ ཚེས་ ༢ ཉིན་དད་ལྡན་ཆོས་ཞུ་བར་རྒྱལ་སྲས་ཐོགས་མེད་བཟང་པོས་མཛད་པའི་རྒྱལ་སྲས་ལག་ལེན་སོ་བདུན་མའི་གསུང་ཆོས་དང་ཕྱི་ཚེས་ ༣ ཉིན་སྤྱན་རས་གཟིགས་ཀྱི་བཀའ་དབང་། དེ་བཞིན་ཕྱི་ཚེས་ ༤ ནས་ ༦ བར་དུ་འདི་ལོའི་མགོ་སྟོད་དུ་གནས་མཆོག་རྡོ་རྗེ་གདན་དུ་བསྩལ་བའི་ཉེ་བརྒྱུད་འཇམ་དབྱངས་ཆོས་སྐོར་གྱི་བཀའ་ཆོས་འཕྲོ་སྐྱོང་མཛད་རྒྱུ་ཡིན་པ་དང་བསྟུན་ཆོ་འཕྲུལ་སྨོན་ལམ་འཚོགས་གནང་རྒྱུ་རེད་འདུག
གཞི་རྩའི་མགོན་པོ་༸གང་ཉིད་མཆོག་ཉེ་ལམ་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་དུ་རྟེན་གཞི་བྱས་པའི་དགའ་ལྡན་བྱང་རྩེ་གྲྭ་ཚང་གི་འདུ་ཁང་དུ་དམ་གཟིགས་ལ་ཆིབས་བསྒྱུར་དང་བླང་དོར་བཀའ་སློབ་བཀའ་དྲིན་སྩལ་སྐབས་ད་རེས་ཆོས་འཕྲུལ་སྨོན་ལམ་ཆེན་མོ་རྡོ་རྗེ་གདན་དུ་འཚོགས་རྒྱུ་ཡིན་སྐོར་བཀའ་བསྩལ་བ་བཞིན་ཐེངས་འདིའི་མགོན་པོ་མཆོག་གི་བཀའ་ཆོས་དང་བསྟུན་གསུང་ཆོས་ཀྱི་ཉིན་རྒྱབ་ཏུ་འཇམ་མགོན་བླ་མ་༸རྗེ་ཙོང་ཁ་པ་ཆེན་པོ་མཆོག་གདུལ་བྱ་རྟག་འཛིན་ཅན་གྱི་ངོར་དགོངས་པ་ཆོས་དབྱིངས་སུ་ཐིམ་ཚུལ་བསྟན་ནས་མི་ལོ་ ༦༠༠ འཁོར་བའི་རྗེས་དྲན་སླད་ཆོ་འཕྲུལ་སྨོན་ལམ་འཚོགས་རྒྱུ་ཡིན་པ་རེད།
༸གོང་ས་མཆོག་གི་བཀའ་ཆོས་དང་བསྟུན་དབུས་བོད་ཀྱི་གཞོན་ནུ་ལྷན་ཚོགས་ནས་དུས་རྒྱུན་ལོ་ལྟར་འཆར་ཅན་མགོན་པོ་༸གང་ཉིད་མཆོག་གི་བཀའ་ཆོས་བསྩལ་སའི་ས་གནས་ཆེ་ཁག་ཏུ་ཆོས་ཞུ་བར་སྨན་པའི་སྤྱི་ཚོགས་ཞབས་ཞུའི་ལས་འགུལ་སྤེལ་གྱི་ཡོད་པ་ལྟར་ད་རེས་གནས་མཆོག་རྡོར་གདན་དུའང་སྡེ་ཚན་འདྲ་མིན་ཁག་གཅིག་ཆ་བགོས་ཀྱིས་དེ་འབྲེལ་སྤྱི་ཚོགས་ཞབས་ཞུ་ལས་དོན་གཉེར་བཞིན་འདུག
ཆོས་ཞུ་བ་ཁྲི་ཚོ་བརྒལ་བ་གནས་མཆོག་འདིར་འཛོམས་པ་དང་བསྟུན་མགུལ་ཆམ་བཞེས་པ་སོགས་ཀྱི་འཕྲོད་བསྟེན་ཐད་ལ་དཀའ་ངལ་མི་ཉུང་བ་ཞིག་འཕྲད་ཀྱི་ཡོད་སྟབས་དབུས་བོད་ཀྱི་སྨན་རྩིས་ཁང་ནས་གསུང་ཆོས་དངོས་གཞི་དབུ་འཛུགས་རིང་ནད་པར་རིན་མེད་ཐོག་བརྟག་དཔྱད་དང་སྨན་སྦྱིན་གནང་རྒྱུ་རེད་འདུག
གཞི་རྩའི་༸གོང་ས་མཆོག་གི་ཐེངས་འདིའི་བཀའ་ཆོས་དང་འབྲེལ་དད་ལྡན་ཆོས་ཞུ་བ་མང་དག་ཅིག་ཉིན་རེ་ཇེ་མང་དུ་འགྲོ་བཞིན་པ་དང་བསྟུན་ཆོས་ཞུ་བའི་ཁོངས་སུ་བོད་མི་དང་ཧི་མཱ་ལ་ཡའི་རིགས་རྒྱུད་ཀྱི་གྲྭ་བཙུན་གཙོས་ཕྱི་རྒྱལ་བ་དང་། ལོ་ན་ ༦༠ བགྲེས་པ་སོགས་ཐོ་འགོད་གནང་དགོས་པ་ལྟར་ད་བར་ཐོ་འགོད་གནང་མཁན་མི་གྲངས་ ༡༢༠༠༠ ལྷག་བྱུང་འདུག
